PASALTHA THANSANGLUAIA 3

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Sangtea Renthlei
Posts: 13
Joined: July 25th, 2020, 12:02 pm

PASALTHA THANSANGLUAIA 3

Unread post by Sangtea Renthlei » July 25th, 2020, 7:22 pm

A mittui chu hru faiin an khaw pasaltha zilh hauna chuan a rilru ti pakhauhin mi fate pawn an pate an chanin an u leh naute pawh an chan ve tho dawn a, chutiang karah chuan a duap kai bik nih chu a tum zui ta bik lo . Hun inher hian mihring min siam danglam thin a, kan hun tawn hian kan rilru leh kan taksa thlengin min thlak danglam thin. Tun a an hun tawn mek leh hmalam hun a hun harsa leh khirh tak lo la thleng zel tur hian eng ang chiahin nge mi bik nihna nei lo, thlahtu chhuan tur nei lo leh mi pangngai satliah ve maibThansangluaia hi a chher danglam dawn a, eng ang a hriamin nge hun hian a tah hriam dawn kan la hria ang chu.
Lal inchhung a lal leh a upa te rorel tan pawh an hawi lam tur leh thu han keuh thiam pawh a har hle a ni ang. Lalpa suakruma chu tapchhak ah chuan a thu to lurh a, a upa te lah tawngzai chhah zai rel reng awm lo in a thu ngawi nghiai hlawm a.


Pasaltha Hranga chuan lal leh a upate tawngkau han chheh hnan chu hreh ru viau mahse chutiang dinhmunah chuan inthlahrun na chi nia a hriat loh avangin a aw a then khak khak hnu chuan " Lalpa, kan dinhmun chu hei kan hmuh ang hi a lo ni ta mai si a, hetiang teh nuai hi chuan nunau nen a khua hi han chim chi niin a lang si lo a, kan nunau hmun him lam a chinchang hre lo a la tawm rih te hnenah hian kan dinhmun hi zuk thawt loh law law ni sela, chutihrualin tlangval zuan z*ng hliampui tuar lo zawng hian he lai a thu kan vuak thluk mek lai hian ei tur pe in zuk tlawh se la, zan khat dang la tawm bo a ngaih dawn thu zuk hrilh ta mai se la , chung tlangvalte an lo let leh hnu ah chuan He khaw tan a nun chante te hi zah tak a vuiliam ni se " a tih lai chuan Upa Chalthiauva chuan " Pasal fanaute ruang dai em pawh hmu lo a, han thlah liam mai chu nunau an va pamhmai dawn ve maw " a lo ti boh a. Upa Chalthiauva thurawn puak chhuah chu thil awm khai tak pawh a ni reng a, nunau tam takten an pasal, an fapa, an pate ruang tak ngial pawh hmu lo a han thlah liam san mai tur chu rilru a khingbai hle dawn ani tih lah a chiang reng mai si.
Pasaltha Hranga bawk chu rawn tawngchhuak lehin " Kan upa khan min lo hrethiam se la, kei a ngaih dan kawng khatah chuan hetiang thil hmuh nuam lo zet mai rawn hmu a, an mitthla a kumkhua a cham reng tur ai chuan an chhungte ruang dai hmuh loh vanga rilru khingbai deuh an lo awm ta anih pawn tuar a nuam zawk in ka ring a ni " a ti leh a.



Lal suakruma chu thawk a han la hak a " Ni e, kan upa pawn ngaih loh lam lam ah a lo dawng sawng lem lo turah ngai ila, kan dinhmun han thlir hian Pasaltha Hranga thu han vuak thlak kha a pawmawm viau mai ka ti" a ti zuai ruih a.
Amah vek chuan " Tlangaupa, nang kan thu leh hla hi tlangval ho kha va hrilh hre teh khai, kan sawi ang sir siar kha va hrilh tawh " a ti zui nghal a.
Upa Chalthiauva chu rawn tawng chhuak lehin " Lalpa, ngaihloh lam lamah zawng chang lul lo e, hetiang kan dinhmunah chuan suangtuahna in ar bo a zawngin, ngaihtuahnain kiltin a lo dap kual ve e tih thu mai a ni e" tiin a han chawl dat a, chumi hnu ah chuan " Hetiang hi kan dinhmun a nih tak si ah chuan, kan khaw dai ngul leh kan kulhpui te ral kutah kan chanzo chu a ni ta mai si a, kan khaw thenawm tan pawh khaw zuamawm kan lo ni dawn ta reng mai. Kum kha leh chen a min tai reng tu Sesih khua tan pawn zuamawm chan kan chang zo ta tih lah a chiang reng, hei kan pasaltha Hranga hian min dampui hlauh lo phei se chu khawkhat nuchang thingphur satliah mai tan pawh zuamawm chan riak kan chang ta mai si a......" Tiin a ngaihtuahna chu a rawn sawi chhuak zui zat a.


Chu thil chu sawichhuak ve kher lo mahse upa dangte rilru vei ken tak pawh a ni tih hriat tak hian an lo rum pui nghut nghut hlawm a.
Upa Dothlaha chu rawn tawng chhuak zui ve in " Upa Thiauva thu ro lum kha ka ril min luh lian bertu a ni e, kan Dengkhawpui hi luah lum zui zel chi ni pawn ka hre ta lo e ka ti " a lo ti ve a.
Chutiang teh nuai an boruak anih avang chuan thu han keuh thluk mai pawh an harsat tlang viau a ni tih a lang reng a, Lal fing leh remhria Suakruma meuh pawhin thu han keuh tluk mai chu harsa ati ani tih a hriat zet hian a thu ngawi run reng a.
Upa Chiauva, pa luhlul leh rilru tum tlang zet chu a rawn ding hluai a " Kei zawng, mahni bu lum chhuah san a tlanchhiat duai duai zawng ka rilru sukthlek zawng a ni hauh lo mai ka ti, Lalpa, he khua ah ngei hian par kan chhuang leh ang chu le" vaibel pet koh voh chung chuan a rawn ti a.
Lal suakruma chuan " A ni teh tak e ti raw Ruma pa, kan dinhmun hian rilru a tu awk ai viau mai anih hi maw, han thu tha phawt teh khai, ka pasaltha Hranga kha engnge maw i awn lam ve reng, han sawi teh khai " a ti zui leh a.
Hranga chuan " Lalpa, kan upa thu han kam keu ang khan he khua ah ngei hian par han chhuang leh ila tih zawng ka duhthusam ber a ni e. Amaherawh chu kan dinhmun han bih chian a, kan tu leh fa, nunaute hmalam hun tur ka thlir hian , ngaiin thlahlel teh mahila, kan Dengkhawpui hi khawthar kan kaisan a tul ta niin ka hria e " a rawn ti muang ban chalh a.
Upa dangte pawh chuan an duh dan leh ngaihdan te rawn sawi zui ve nak nak hlawmin, thu zai khat han vuak thlak mumal neih erawh a har ani tih an thu a sai sa nak dan ah chuan alang reng a.

Lal suakruma chu rawn tawng chhuak lehin " Ka upate leh ka pasaltha ka rorelna min tawmpuitute u, in thu han vuak thlak leh in kam chhuak ka ngaihthlakin , tun dinhmunah hetiang hi kan dinhmun ni rih mahse in zarah parfung kan chawi leh ang tih ka ringhlel lo e. Kan thu zai han chhah dan ka lo ngaihthlakin kan nunau hmakhua leh he khua hma khua thlir chungin khawthar kai mai hi tun dinhmunah chuan kan tih tur hmasa leh kan that tlanna tur niin ka hria, he khua hi han dinthar leh dawn pawh ni ila, khaw thar kai ang thaw thang kan ni dawn tih lah kan in leh lo mei vap a chang zo ta te en hian a chiang kelh mai si a, chuvang chuan vawiin lamah kan pasaltha , kan mi huaisen te hi thlah liam fel ni se la, naktuk lamah khua hi chhuahsan mai turin in peih tum ila, khawthar kai tur a ram en pawh intir khawtlai hman kan ni pawhin ka hre lo e ka ti. Chuvang chuan kan thlang tlang Hlumpui tlangah khuan kai thla rawih mai ila, khua nun kan chungah zah angai ang a, eng em kan ti lawng chu " tiin thutlukna chu a rawn siam ta a.
Bung-5
Chutia Lalpa berin an hawi lam tur a rawn tih chian takah chuan khaw inlungrual, rorelnaa zaikhat a luang thin an nihna lo lang chhuakin lal thu chu lungawi takin an pawm ta dial a.

Lalpa Suakruma bawk chuan " ka khaw chhanna atan a nun hlan ta, ka pasaltha leh ka tlangval huaisente ruang hi zah takin kan thlah liam ang,tin he khaw tan a an nunna pawh ui lova an thisen luan ral thak thleng a bei tute hi kei an lalpa hian ka ngai hlu a, ka chawimawi a, an zavai hian chawimawina nopui ka hlan mawlh mawlh a ni tih lantirna atan he ka lal in mual zawlah hian an zavai in kan phum ang, he Dengkhawpui hi loh theihlohna avangin kan rauh san dawn ta reng chu a ni mai a, heng ka mi huaisente Dengsur khua lo mawi tawhtu an nih ang ngeiin kumkhua in ka lal in mual hi lo luah rawh se " a ti zui nghal a.
Ni tla vanvuai ruang seng hawi hna leh phum hna an thawh hnu chuan lal in a duh ang ngeiin lal mual zawlah chuan an khaw chhanna atana a nun hlantute zawng zawng chu hmun khatah an phum kim thei ta hram a, ral lam ruang pawh ral mahnise theh thang ngawt chi ni a an hriat loh avangin khaw chuan hnuai lawk a Rohrenga puk an tih ah chuan an dahkhawm a, sa lak ah an him theihna turin thingtuai leh mau hmangin a theih ang angin an hung zui nghal bawk a.


"Pianni nikhat, thihni nikhat" an lo ti mathlawnlovin , thisen chhuak a chemsen lek a mahni nun dahkham a ral hawl ni pawh aliam dawn ta tih hriat takin kawl kung chu a sen no chiai a, Dengsur khaw chhung a manganna leh in runna rapthlak tak thleng chu hriat pui hauh lo in tlai thim hmul lawm Bakchhia te pawh an thlawk leh luap luap hlawm tawh a, nidang ang chu nise , nuapang leikang tawh deuh ten Bakhawl ngul fiak thuai thuai khawpin khawlai lung pawng leh mual pawng remchang atangin an hawl in , thenkhat ten Sairawkherhin an thlawk lai perh thlak tumin an dawm leh laih laih tawh awm si a, mahse chu mi tlai zet chu reh vawng vawng mai ani.
Zingkhua alo var a, nunau himna zawng a hmunhim lam a an hruai tak, an pasal fanaute engang dinhmunah nge an awm tak tih hre lo a rilru khingbai tak chung a awm mekte chu tlangval tlawmngaite chuan hruai chhuakin lal mual chhim chhawng atang chuan khua an rawn lut mek a, khaw rawn lut hmasa chu hmeichhia leh nunau awmnem zawk tih tak a an rawn tap nghal rawih rawih a, an khua kha leh chen a tual an lo chaina meivap mai lo chang ta chuan tah zai a vawr tir lo thei a ni e.


Tap rawih rawih leh lungngai a chiau vawng vawng chungin lal mual chu an rawn pan zel a, anmahni lo nghaktu Lal suakruma te awmna lal in kawt zawl ah chuan an rawn thleng khawm ta thuai a.
Nunau ho an lo thlenkim hnu chuan Lal Suakruma chu lo dingin, lungchhe vankai a lo tap rawih rawih leh tah hla lungchim tak a lo chham mekte chu a kut chuan ngawi turin a han khapa, mipui lam pawh chu an ngawi diak a, Lal suakruma chuan a aw thian kharh in " Ka khua leh tui duhtakte u, in hmuh leh inhriat ang hian kan khaw dinhmun chu hetiang hi a ni ta... tiin rilru na tih hriat takin a ngawi zui dat a, " in fapa, in pa, in unau te chu he khaw chhanna atan hian huaisen tak a dingin, mual an liam ta a, ka fapa ka ril a rah, ka lalna rochun tur ngei he mualah ngei hian a thisen a luang ral ta bawk a.... A tihlai chuan lalnu saidingpuii leh a fa mo, he inrunna rapthlak lo chhuahna chu an lo tap chhuak rawih rawih a.
Lal suakruma chuan sawi zawm leh in " Tun a in hmuh ang hian, he mual a lokal khawm zawng hi dam khaw chhuak kan ni " a han tih meuh chuan an pasal leh an fapa te, an lawmpa chen a " khawiah nge an awm ang ? An dam khaw chhuak angem ?" Tia an lo zawn ruk , hmuh tur awm si lo, lo hawi lo hawi kualte chuan an mi zawn te chu ral kutah an tlu ta ani tih an hrethiam zet mai, khap hleih theih loh khawp a nasa in an tap zui nghal rawih rawih a, nula thenkhat an lawmpa te ral kutah an tlu ta tih an han hriat rual a, mawi leh mawi lo pawh dawn zo lo a, lei a lo thu ta hnawk leh lo tap rawih rawihte pawh an demawm lul lo e.


Tuibur hmuam da chhung zet chutiang a an awm hnu chuan Lal suakruma chuan a han khap dai leh rih a " ka khaw pasaltha leh tlangval huaisen, kan khaw innghahnate chu he lal mual, tuna in dinna hnuaiah khan zah tak leh chawimawina nen phum an ni ta a, hetiang hi kan dinhmun a lo nih tak si ah chuan ro hran kan reh a lo ngai ta si a, chuvang chuan vawiin ni la la hian, khawthar kan kai ang. Chutihrual chuan Lal vakvai, khua leh tui chhan tur pasaltha leh tlangval mumal pawh nei lo ka lo ni ta reng mai. Chutiang a nih avang chuan himna leh thlamuan zawkna beisei a lal dang bel duh in awm a nih chuan kei hian ka dang dawn hauh lo che u a, in tih tur awm riak ti ah ka ngai dawn che u a ni, chuvang chuan zui tlak a min ngai a, khawthar bawh a ka hnung la zui duh apiangte chu tukin tukthuan kan ei kham ve leh Hlumpui tlang lam panin kan chhuak ang " a ti a, thu a sawi lai mek pawh chuan a thinlungnchhung ril chu a rum vawng vawng ni hian a hmel ah chuan a hriat a, engmah sawi zui tawh lo in Lal in chhungah chuan a lut zui nghal a.



Tlangval ho in vawk leh ar, a nei tu ber pawh hriat mumal tawh loh, khaw kangin a kan hlum ve loh lal thupek ang a zan lam a an lo talh lawk diam tawh leh ei tur a an lo buatsaih tawh chu chu mi zing tukthuan atan chuan an ei ta a.
Khaw mipui zawng zawng pawh han insiam leh dan awm tawh chuang lo khawp a, an khaw kangin an in leh lo, an thawmhnaw leh bungrua zawng zawng a kan ral vek avangin, lal mualah chuan lal leh upaten kal a hun e an tih hun a kal mai thei tur chuan an inring tawp mai a, tumah chuan rilru dang pu a, lal dang lak a han pakai san tur hmelpu an awm hek lo.
Fehrehsan hun velah chuan tual an chaina, tu leh fate nen hlim tak a an khawsakna, sa lu leh mi lu lawm a tlang an lo tlirna leh hlimzai vawr a chawngchen leh kut ni vang thla lam an lo thaina hmun chu ui tak chungin an chhuah san ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Sangtea Renthlei
Posts: 13
Joined: July 25th, 2020, 12:02 pm

Unread post by Sangtea Renthlei » July 26th, 2020, 12:17 pm

PASALTHA THANSANGLUAIA 4




PASALTHA THANSANGLUAIA
"Luaia tlan mai rawh " tia aw chau lam tawh in a rawn auh tawk tawk chu hre awm pawh a lang lo hian chu rawlthar chhuak zet zawt, pian ruakhua lam deuh hna a thawh nasat avang hang deuh chhalh chu chempui nen chuan a thianpa Zathlaha hma ah chuan a pa chempui a rochun hum chuan a ding kak hah a, keite ngawhngawl zet chu a hma perhte tual to buk zinga rum leh ngal ngal thin lam chu a en khiau a.
Zathlaha chuan a malpui keite sehna thisen far tluah tluah chu dawmin a nak thawl vunnem lai a keite hamna khap zet a thler thla hawih pawh chu tuar hreawm tham zet a ni tih hairual a ni lo.


Perhte buk che leh dat dat thin chu Thansangluaia chuan uluk takin a en khiau a, thawklehkhatah perhte buk chu a rawn che luai a, Keite chu rang zetin a rawn inperh chhuak nawlh a, Thansangluaia hrawk bawr chu rawn seh ngei tumin a rawn zuang phei zawk a, chempui nen a in ring ran a lo awm a ni bawk a Thansangluaia chuan keite lo zuang darah chuan a theihtawpin a lo sat ve nghal vat a, mahse ramhnuai sa te khua nu in a tur reng a a siam an nih angin an vun a chhah in kutthlak satliahah phei chuan hliampui tuar khawp a kutthlak pawh har sa fe mai hi a ni reng a. Thansangluaia, rawlthar chhuak hlawt, mi bik leh thahrui nei bik pawh ni hauh lo kutthlak chu kak ve hlawih tho mahse chet lak loh phahna tham a ni tlat lo. Keite chuan a hrawk bawr chu rawn ham pha chiah lo mahse a awm bawr a a tin hnu lang thla ruak khawp chuan a ham hman tho mai.



Chutihnakalaiin Thansangluaia ke chu perhte zai chuan lo kaiin hnung zawngin a tlu zui a, keite chuan a rawn bawh zui nghal bawk nen, Thansangluaia chan chu a chau tan hle tawh ni hian a hriat a, keite in a seh mai lohna atan keite nghawng leh a hmuiah chuan a kut a nawrin a tin lakah chuan a him hauh lo tih hriat takin a nak leh a awm bawr te chu a thi hne hnu tawh a.
A tlukna lamah a chem a thlauh bawk nen, chu keite hro hrang nazet lakah chuan a tlawm mai dawn ni hian a lang tawh a, mahse a tawpna atan ti ni awm takin a ke nen a tangtawmin keite chu a han leng nghek mai a, keite pawh chu a leng lawp ve hial mai. A vanneih a siamin chutia keite a han leng kang lawp tla lam chuan nichin lawk a zathlaha awm hleiin an thang kamna bul lawk a mau fei a zum, " Nakinah sa kan la awh tak thut a chhun hlumna atan " tia a fiamthu deuh pah a thang kamna bul a a a zum van lam hawia sawh bur ah tak chuan keite chu va in dawt tlang a, che zui leh tur pawh awm miah lo in mau fei a ham hawng hawk a dawt tu avang chuan a tal khur char char a.



Chutiang tehnuai chu an dinhmun a nih tak avangin thang hnih khat chauh la kam hman mahse han kam zui zel thei dinhmunah ding tawh hek lo le, an thian dun chuan an inchhawm haw dun hnak hnak a, an hliam tawrh chu hlang han kai pui tham em chu ni lo mahse kal erawh an harsat dun hle a ni tih an chet vel dan atang chuan a hriat theih a , Thansangluaia chu a hliam tawrh a zia awm deuh zawk bawk a, hnung dawlin chho ulh deuh kai zo lo a a thianpa zathlaha lo tawlh let leh at at thin chu dawm pah chung zelin kawt chhuah lung dawh chu an rawn chuang chhuak hlawl a.
Zathlaha chuan " Luaia ti teh, hei lungdawh kan chuang kai ta bawk a, i han thu chawl lawk teh ang " a tih avang chuan lungdawh ah chuan an han thu chawl a, Thansangluaia chuan " A ni teh tak e a, i han chawl ang hmiang, helai Hnahkiah pil hi kan met ang a, lo thu rawh khai " tih pahin lungdawh kiang lawk a Hnahkiah kung chu a kawr chhia chu a han sat fai zung zung a, a kawr chu met in Hnahkiah hnah chuan a dawh khawl a, a duh tawk a meh hnu chuan Zathlaha lam chu a rawn pan phei a " I hliamah khan Hnahkiah pil hi bel teh ang" tih pahin Zathlaha hliam la thi deuh nang nang ah chuan hnahkiah pil a meh chu a bel sak a.




Chutihlai chuan Zathlaha chuan " Buaipui chiam ngai zawng ka ni lo e, nang lo awm lo la chuan kha keite tawnah khan pialral ka lawi ta dah awm e ka ti " a lo ti a.
Thansangluaia chuan " Mai mai a, a hun in min nang ching a, hlau thlabarin engtin tin emaw chan that ka chang ta mai zawk a nih kha " a ti ve vat a.
Zathlaha chuan " Chutia i sawi tak azarah chuan ka rilru helhkam fo thintu thil pakhat a awm a, ti hian muangleiah chuan pang a dam a, kan dam a ni mai a, kan tawng thuchhe lovah, tute khua nen emaw thu inbakkaih awm in, kan tualthu lo chhe ta se, kan khaw dinhmun tur ka ngaihtuah fuh chang hi chuan zan mu han tuah that meuh loh chang ka nei fo mai" tiin a rilru a angaihtuah fo thin chu a thianpa hnenah chuan a hrilh mawlh mawlh a.
Thansangluaia chuan " Chuti ve bawk maw? Keipawh hian ka ngaihtuah fo a sin, kan pasaltha, kan khaw innghahna te an liam zo a, tlangval tia a chhiar tham chu kutzungtang thliah tham lek kan ni a, rawlthar lah sawm rual el awl kan ni mai a, chuta karah kaihruaitu pasaltha ralhrat emaw ralrel thiam nei mumal lo kan ni bawk nen, kan pasaltha Hranga lah huaisenah mi khumin ram lam a thang hial lo chhuah tawh nimahse ramtuileilo mai a ni tawh si " tiin pasaltha Hranga , khankawn nen a an inhmachhawn tum a a banruk an sahtliah avanga ngaiawh thei ta lova ramtuileilo zui ta chanchin chu a sawi kai zauh a.
Zathlaha chuan " Ni chiah mai e. Kan khua hi ding chhuak a, mi leh sa lak a he khaw chhan him tur mi hi kan khua hian a mamawh tak zet a ni " a tih lai mek chuan Pasaltha Hranga tawng ri chuan an titi chu a rawn pawt chat a " E hiau, Thlaha te thian dun lah ni rengin, che hiau, kha lah hliam phing pheng che u a " a rawn ti zui bawrh bawrh a.


Thansangluaia chuan thil thlen dan chu lo sawi zung zungin a thusawi hmawr bawkna atan chuan " Ti ti a pasaltha chanchin an sawite hi ka hre ve fo thin a, keipui meuh pawh chempuiin an sat hlum thin a ni ngai a, kei ve lemin keite tak ngial pawh tuan fum khawpin ka sat zo meuh lo chu a ni a, Pu Hrang, chem han sah dan riau leh kutthlak nat dan riau bik te hi a awm em ni ?" Tiin Pu Hranga chu a zawt let a.
A vanglaia mi leh sa lak a khaw lo thlamuan fo tawh tu Pasaltha Hranga chuan hrilh hriat tur leh zirtir tur chu a hre teh meuh mai, mahse an hliam phing pheng te avang chuan in lam thlenpui thuai chu fuh zawk dawn a hriat avangin " Kan thudang alai chuan hei tlangval in lo ni dawn ta reng mai , zan in atangin Zawlbuk rawn kai ve tawh ula, zanriah eikham hunah keiman ka rawn lam dawn che u nia , kha in hliamte kha inlam thlenpui thuai chi anih kha, i kal tawh ang u khai " tiin Thansangluaia zawhna pawh chu chhang ta chiah lo chuan in lam a pan pui ta a.



A hma a rawlthar pahnih kal mekte ti ti leh an thusawi a hriat ruk avang a hlim nui ru var var chungin Pu Hranga chuan Luaia te thian dun chu khaw lam pan chuan a chawm haw ta a. Pasaltha mahni khaw tan a lu pawh chan ngam a bei tawh tu tan chuan rawlthar lo chhuak mek ten an khaw hmakhua thlir a titi an han vawrh dan leh an thu vuakthlak dan han hriat chuan hahdam huai huaina tur chu a ni ve reng ani.
Bung-6
Khua a tlai lam a, tun hma a zathum nufa khua zet lo ni ve tawh, vengtin a ri le lu thin kha, in sawmthum tha awrh niin Hlumpui ngawpui karah chuan an in bawk khawm ve lat a, chung in atang chuan meikhu a lo zam chhuak ve liai liai hlawm a.
Zanriah ei lai chuan Thansangluaia chuan vawiin lam an thil tawn dan leh Pasaltha Hranga'n zawlbuk lam a kai ve tawh tur a a duh thu a han sawi chuan , a pu , kum upa lam tawh, tawng muang sai deuh dar dar tawh chuan " E... Luaia tupa tlangval ka nei ve ta reng mai che , khawi hmunah pawh mi mit ti mim zawngin an khawsa ngai lo a nia, tlawmngaihna hi a hun a hmun a tawrhchhelna leh tumruhna avang a mi tlawmngai nih theih a ni a, mi huaisen pawh hi a hun dik tak a an tih tur ti a hmachhawn ngamte hi mi huaisen leh fak hlawh an ni fo a nia, mi zingah tawngtam lutuk leh thu lei la chhak chhuak fo tu nihte hi a tha ngai lo" tiin a tupa zawlbuk kai ve mai tawh tur chu zilh malh malh a.


Thansangluaia pu, pu kungliana hi Dengsur khua a an awm lai kha chuan Luaia te hian apa hoin in hrang an chan san tawh kha a ni a, mahse Dengsur inrun rapthlakah khan an chhungte zawng zawng thi zo in , khawthar an kai hnu hian Thansangluaia te nen chhungkaw khatin an khawsa leh ta zawk kha a ni a, Thansangluaia chuan a pu thusawi chu ngawi reng a chaw bar mial mial chungin a lo ngaithla kiau a.
Zanriah te an eikham zawh hnu lawkah chuan an sumhmun lam atang a thawm lo awmin Pasaltha Hranga chuan " Ekhai.. hei Luaia pu chu arbawm thar i tah a ni maw? Nangni zawng arva ah hian in tluang nek a" a rawn ti bawrh bawrh a, kawngkhar chu rawn insawn hawngin pasaltha Hranga chu a rawn lut zui nghal a.
Luaia nu Pi Seithangi chuan lo chhawn vat in " Akhai.. k'u Hranga lah ni rengin hawh awi lo thu teh khai ,pawi pangte a awm ta em ni ? Kan in lam lam te i rawn chuan kai tak " tiin a lokal chhan awm ang chu hre tho mahse a lo chhawn vat a.


Pasaltha Hranga chuan " Pawi pang engdang a awm law, hei Luaia hi zawlbuk kai rual a lo ni ve ta reng mi , vawiin ka ram chuan nen kan intawng fuh a, kan rawn haw ho a, ka tawng thlah bawhzuiin ka rawn lam e ka ti anih hi " a lo ti ve vat a.
Pu Kungliana chuan " Ni e hei, tupa rammu rual ka lo nei ve ta reng mai, zawlbuk chu han chuang kai tawh u" a lo ti ve bawk a.
Luaia nu chuan Luaia mamawh tur chu a han lam khawm a, lam khawp han tih lemah puankawp pahnih sin tur leh phah tur zawng chu a ni mai a, Luaia nu in Luaia ken tur a tih fel lai chuan Pu Kungliana chu rawn tawng chhuak lehin " Hei Hranga , kan khaw dinhmun leh kan chim chin chu kei aia hre chiang zawk i ni a, keini tupa ve pawh hi nangin han kaihhruaiin , zirtur leh hrilh hriat ngai ang te pawh nangin i kaihhruai loh chuan kei lah tar ki ring , tap til tawm mai ka ni tawh si a " tiin Hranga lak a a beiseina chu a han chhak chhuak zauh a.
Hranga chuan " A khaih mai mai thin a, keini tehlulin han kaihhruai a han zirtir tur va hre lek suh, amaherawh chu keini thu hla beng a rawng a an lo khung ve duh ta anih leh theihtawp kan chhuah ang chu " tiin a lo chhang ve thuai a.


Luaia leh Pasaltha Hranga chu an inzui chhuak ta a.
Zathlaha te in lam pan tur a ke an pe e aw lai chuan Pasaltha Hranga chuan " Ngawi teh Luaia, Zathlaha lam kan han tum e aw na a , ani kha keite hliamna avang khan zawlbuk pawh a kai thei rih awm lo e ka ti, pang ti sa vir ver khawp zawng anih ve kha, hawh teh Zawlbuk lam chu i kai san rih zawk mai teh ang a " tiin Zathlaha chu zawlbuk a kai mai theih rih pawh a rin loh thu chu a rawn sawi chhuak a.
Zawlbuk an han chuan kai chuan Zawlbuk chhungah chuan putar pahnih leh tlangval pali panga vel tur hi an lo awm a, tlangval zinga pakhat Zatawna chuan " E heu, hei kan Valupa chuan thuihhruai a rawn nei tlat mai ka ti a , zawlbuk kai thar kan nei dawn e " tiin Hranga leh Luaia lo lut chu a lo chhawn vat a.



Khawthar an kai hnu hian tlangval zawlbuk kai rual pawh sawm chaung erh awrh chauh a ni a, zawlbuk pawh an khaw hlui ta zawlbuk nen chuan a len zawng pawh a inthlau ngiang reng a, Thansangluaia tiamin khawthr an kaihnu a zawlbuk kai thar an awm tum thumna ani a. Tumdangah chuan kalphung pangngai ang a zawlbuk kai thar te an tlangnelna atan a han buan fiam pawh an nei ngai tawh lo kha ani a.
Khawthar an kaihnu a, tlangvalho kaihruaitu awm chhun leh loh theih loh avang leh a tluk zo tumah an awm loh avang a val upa nihna hneh tak a chelh zui tu Pasaltha leh Val upa ni bawk Hranga chuan lo chhangin " Ni e, hei Luaia hi zawlbuk kai rual a lo ni ve reng tawh mai a, ka han lawi pui anih hi. Zawlbuk kai thar buan pawh zanin chu nei ila atha awm e, hun kha leh chen kan dinhmun avangin intihhlimna atan a inbuan fiam pawh kan nei ta meuh lo kha ani a, zanin zawng i thar thawh teh ang u hmiang " tiin aw phawi z*ng vahin a lo chhang a.


Tlangval lo awm ho lah an lo phur pheng lehnghal a, a tlem a tlemin an haw haw zui dar dar a, chutia zawlbuk lam a thawm han awm ta dar dar chu thil thar chan teh chawk changin , khawthar an kai hnu a zawlbuk thawm that ber tum a ni miau a, zawlbuk la kai ve hman lo tlangval dangte hmanhmawh fe a zawlbuk lam pan a , puanven hmawr phe hlawk hlawk a lokal te pawh an demawm lo ve. Kar lo ah zawlbuk kaichin tlangval chu an rawn kim thuai a, Val upa Hranga chuan " Khai le Luaia han in ring rawh khai, tunge buan hmasa ber dawn le ?" A han ti zui zat a.
Tlangval fiamthu thiam , zathum khua ah pawh a awmna apianga an nuih rawn dur dur thin, sa pan cher khen khawn, z*ng kul khan mai Tlangval Bawnga chu a rawn ding chhuak a, a ni hi Dengsur in run an tawh tum a, nu nau hmun him a lo tawm pui tur a tlangval an tirh zing a mi a ni.

Link:
BBcode:
HTML:
Hide post links
Show post links

Post Reply
  • Similar Topics
    Replies
    Views
    Last post

Who is online

Users browsing this forum: No registered users and 3 guests