LOVE IS NEVER ENOUGH CHAPTER - 8 by Amy Cck

Episode kal lai dah luhna

Moderator: writers

Amy
Posts: 224
Joined: May 15th, 2019, 8:49 pm

LOVE IS NEVER ENOUGH CHAPTER - 8 by Amy Cck

Unread post by Amy » August 1st, 2020, 10:39 pm

CHAPTER - 8 💘 by Amy Cck








* ANGEL LALRUATPUII pov *









" I lo kal hloh chu ka van lawm. An pahnih lak atang khan put chhuah dan ka lo zawng char char a. " Dawr kan chhuah rual in Sir Rema chu melh chho vat in ka ti sap. Zah pawh dawn lo in ka hmuh rual in a rual a haw ka duh thu ka sawi ringawt chu ka in thlahrung ve tho, chutah hmel hriat sa tliah pawh ni lo in kan sir a la ni zui.









" Aa....Sir..... Min thlah chung chang kha chu ka ti tak tak chuang lo a nia. Kei mah pawn taxi in ka haw thei tho. " Ka thu sawi hre lo ang mai ngawi ngul in eng emaw a ngaihtuah daih chu in thiam vak lo chuan ka ti leh sap.









" Ni lo e , tih tur ka nei tawh hlei nem. Haw lo in kan leng kual zawk dawn a mi? " Har chhuak thut ang mai a min rawn melh in a rawn ti sup chu mak ti zet in ka melh ha.









" Len kawi maw? Ai.... Ai.... Ai.... Ka u engmah ka hrilh lo a, a chi loh. " Ka ti nawi deuh nak chu min nui suk.









" A nih chuan kan inah lo kal la, i phone kha i rawn la nghal a nga, ka kawl rei tawh bawk a I thuruk chu ka check kual hneh sawh tawh teh mai a nia. " A rawn ti let leh sup chu ka ner nang.









" Awiawm loh , engmah thu ruk ka nei lo! " Ka ti let vak chu a nuih a zat hmel ngang mai.








" Mahse lo lam kawi chu ka duh, college ah i rawn keng duh si lo. " Ka ti zui leh nghal hmak chu a nui chhuak ta hawk kei pawh chu ka nui ve hak hak . Ka u leh u Opi an la rawn haw mai ka ring lo a, rei lo te phone ka lam kawi lawk dawn a ka u pawn a hre lo ang.









" Angel! " Sir Rema motor la chhuak tur a a kal chu kawngsir rem chang lai ah ka nghak a mahse ka hming a min rawn ko tu avang chuan ka hawi buai deuh nak. Tun ang hunah tu nge ka hming in min ko tur khawp a min hre chiang. Kawngpui rawn kan a mipa rawn kal chu hmuh chian tum in mit ti zim deuh san chuan ka melh a, ka bul a rawn thlen dawnah ka hre ve hram chu ka nui nghal var var.









" I ni tak tak a. Tu nge nghah i nei a mi? " U Rinzuala ka bul a rawn thleng chawp chilh nghal chuan a rawn ti a. Min rawn auh na a hlat teh lul nen tun ang zanthimah tawh phei chuan min rawn hre chat chu mak ka ti zawk.









" Aa...Aw...... Ka u nen dinner eiin kan chhuak a. Enge i tih zawk? " Ka ti let ve vat.









" Engvak mah ti lo, khaw nge Reubena chu? Motor a ka rawn tlan tlang tur ka hmu thut che thlah i ngai leh emaw ka ti. Mahse dinner te in ei dun a in in kar a fel leh tawh a ni maw. " Nui deuh suk a a rawn ti chu ka nui ve hak ringawt.









" Angel! " Sir Rema motor parking atang a rawn tlan chho in kan sir a rawn ding in min rawn ko chu ka lo kal dawn tihna lu ka bu nghat.









" Khaw nge Reubena chu? Reubena nen in ni khan i sawi sia? " U Rinzualan ka en na lam melh chuan mak tih hmel zet a a ti chu u Opi nen an la in kawm tui avang in ka haw sawn dawn thu in ka chhang zui ve nghal.









" A nih chuan ka va thlah ang che! " A rawn ti let sup .









" Ai... Thil dang tih kawi tur kan nei a. Ka kal mai aw, i hman hunah kan inah rawn leng la, i rawn lang khat tawh lutuk. " Nui sang a ka ti chu a buai ve thu in min chhang ve mai a. Sir Reman min nghak reng tawh nen motor lam pan a kal ka tum chu ka ban a min vuan tu vang chuan kan ding dat.








" Hahh.... Ti nge? " U Rinzuala melh chuan ka ti vat.







" Haw tlai lutuk suh aw! " Ti sup in ka kut a thlah leh nghal chu nui lui sak in lu ka bu nghat a motorah ka luh san nghal, a hma pawh in u Rinzuala hi chu kan in a a rawn lan ve zauh zauh a vang leh ka u thawhna damdawiin ah ka u hmu tur a ka kal chang a ka ti buai ve ber a nih avang in ka nel sa em em a. Hmanni a tul lo zet a ka vin vak leh a motor chhung a ka tah khum chiam atang phei kha chuan ka nel leh zual sawt. A ni pawn a farnu ang in min en a min duat ve lutuk tlat.









Sir Rema te in ni ngei tur hmaah chuan ka ding vang a. Chhungkaw awm thei lo zawk zawk an ni lo tih an in atang pawh hian a hriat. In chhung kan lut chu kan in ang maiin a reh thiap a, ka bul lawk a mipa chu ka melh nghal vat.









" U... I rawn let tawh law . " Room pakhat atang a hmeichhe rawn chhuak chuan min hmuh rual chuan a rawn ti a.









" Umm.... Khawnge midang? " Sir Rema chuan a ti ve nghal a. Kei erawh in thlahrung lutuk in a hnungah ka zui det det ringawt.









" Ka nu leh pa chu mitthi inah an kal. Midang chu ka hre bik lo. " A rawn ti sam et a. A room lamah kan phei dawn tih a sawi lai te chuan a nau chuan engah mah min ngaih hmel loh lutuk chu ka en vung vung ringawt. Kan inah ka u in ka hriat ngai loh hmeichhia rawn hruai in, a roomah an awm dawn thu sawi leh nghal phei se chuan ka awm mai mai theih pawh ka ring lo.









"Kha kha i nau a maw? " Room kan luh rual in ka ti vat chu lu bu nghut in a kawr chung a phelh nghal a. Room chhung thutna ka hmuh hmasak berah chuan ka thu thla nghal dat.









" A nih ve kha! Kan unau zing a naupang ber. " Drower hai ri deuh rawk rawk chuan a rawn ti let ve mai.









" Unau engzat nge in nih a? " Ka hma zawnah ka phone hlui kha a rawn lek rual in ka ti leh sap a, ka phone chu ka ban ve vat bawk.









" Panga! Kan u chu pasal neiin a awm hrang tawh a. Nau mipa pahnih leh nichin a mi kha kan la awm. " Ka opposite a thu thla in a ti sup chu lu bu nghat nghat in ka phone min pek chu ka en kual a. A screen a keh bakah a touch na a tha chiah lo tih ka hmu nghal bawk. Ka thloh na bakah midang ho khan an rap emaw an chhuih kual nasat vang a nih ka ring deuh tawp.









" Nula phone ve meuhah chuan a chhung a awm chu ka rin loh lam daih! " A rawn ti sup chu hrethiam lo zet in ka melh vat a mit ka san khum ak bawk.









" I bialpa te thlalak emaw, i bathroom selfie thlalak te, chutiang deuh lam chu hmuh ka beisei a nia. " Fiamthu a a rawn ti chu ka ner khum nang. Ka phone ah te chu kan chhungkaw thlalak leh ka u nen a kan thlalak a tam ber ang. Engmah mi biakna pawimawh pawh ka nei bawk lo a. Chuvang a ka phone a kawl tih ka hriat hnuah pawh la let vut vut lo kha ka nia.









" Ka fiamthu lo a nia, pasal nei mai thei din hmunah i ding ve tawh bawk a. In unau in tlem sia nangni phei chu pasal i neih san daih chuan i u khua a har ve viau chuan ka ring! " A rawn ti leh sup chu nui chhuak hak in ka phone chu ka bagah ka dah lut nghal bawk.









" Chutiang phone a dah duh tur khawp a mawl ka ni lo a nia. Chubakah pasal nei thei din hmunah ka ding ve chiah rih lo. Ka u in nupui a neih hma chu khawhar deuh in ka kal san dawn lo reng reng. Ti buai tur tal in a bulah ka la awm zel dawn." Fiamthu a ka ti let ve chu a nui ve hawk hawk tho.









" Ka phone ber ka la let tawh bawk a ka haw a hun tawh in ka hria. " Ka ti zui zat chu min thlah tur thu sawi in a ding a kei pawh ka ding ve nghal a. Sir Rema te in kan chhuah san chuan dar 8 bawr vel lek a la nia ka u te pawh an la haw ka ring chiah lo.









Kan in lam pan a kan tlan chu kan ti ti barh barh a. Ka phone a kawl rei bawk nen ka sawi chhuah loh pawn eng eng emaw a rawn sawi chhuak hmasa zel a. Chhan loh theih pawh a ni lo. A thu sawi danah huat tur erawh a awm lo a. Ka phone ruak lutuk ber chu ka chhungten min man chhuah loh na ka mi biak te no pawh save duh loah min puh thul. Kan in kawt kan thlen lai pawh hre lo khawp in kan lo tawng tui a , kan in kan tlan pel kan let leh te chu kan nui dun tawp.









" Kan in thleng min thlah a ka lawm lutuk! Naktuk atang chuan hetiang hi ka be leh ngam tawh kher lo mai thei che sia." Ka thutna lam kawngka min rawn pawh hawn sak rual chuan nui sang in ka ti sap. Ka ti tak tak bawk a, Tu nge mahni Lecturer te zan in a ka biak ang khan be ngam ang.









" A pawi lo a nia! " Kan in lam ka pan tur chu ka ban rekah rawn vuan in a ti sup.









" Eng maw? " Ka ti let chu nui suk in ka ban a vawn chu a melh zauh a a thlah dawn a maw ka ti a nia mahse a vuan nghet zawk sawt chu mak ka ti viau.









" Tun ang a min biak khan nuam ka ti. Chubakah i bul a awm hi ka rin ai a hahdam thlak ka ti bawk a. Nidangah pawh kan la in kawm zel ka beisei dawn a nia tun ang tho hian. " Ka mit a min melh run chuan a ti sup chu a ngaihna hre lo zet in ka melh haw ringawt.









" Aw I tih loh chuan ka thlah dawn lo che a nia . " Min en reng chung a a rawn ti sup chu ka khuh deuh kharh ringawt.









" Aw I tihnaah ka ngai mai ang! Muttui aw. " Nui suk a tiin min thlah a. Kan in lam ka pan lai te chuan ka dik lo riau hian ka hre bawk. Hetiang deuh hian damdawiin a ka awm min rawn kan pawh khan ka awm tawh.









" Ehee.... A lo haw tawh a maw? " Ka room ka lut tur chu ka u room lam la eng avang chuan phun sap in ka u room lam chu ka pan leh ta zawk a.









" U.... I lo haw tawh a maw? " Room a luh pah chuan ka ti vat a. A hna thawhna dawhkan hmaah lo thu in hna a lo thawk mawlh mawlh tawh a nih chu.









" Umm.... Khawnge i kal kawi a? " Min en lem lo chuan a ti sup a. Kha zawhna kha chu ka rin sa a ni bawk a thaw hak in ka u thutna sir dawhkan chu ka ngheng a. Ka u lah chuan a lehkha ken ringawt min en san a nih chu.









" Ih... Sir Rema te in ah ka phone hlui kha ka lam kawi lawk a. Ka zawh ve hun che, ti nge i lo haw hma em em a? " Ka ti let nghal zat chu a thutna chair chu ngheng ruai ruai in min rawn melh chu a thinrim hmel deuh tlat in ka hre leh nghal.









" In chhuah hnu lawk khan kan haw ve nghal. " A ti hmuk ringawt chu ka deuh hau in ka melh thung.









" Ti nge? U Opi nen khan eng emaw te sawi dun in nei lo a mi? " Zawhna mit meng a melh chuan ka ti sap.









" Eng thil? " A ti sup chu ngei zet in ka ner nang thung.









" Nang pa hi chu i sual thiam ve ngawt mai! Tlem tal in that i chhuah der thei lo a mi? " A thutna atang a ding vut a min rawn kal pel tur chu ka ti ta vak. U Opin beisei nei deuh in a be ngei a nga tun ang a nel awm loh leh sual thiam a a awm a nih chuan u Opi tan a nuam lem lo viau ang tih ka hmu thiam nghal vek. Mahse ka u rawn chet dan teh thut avang chuan ka tawng tawp chat.










" Kha bak a thui chu min kal tir tum suh! " Ka dawhkan nghen sir leh sir a a ban hrawl zet a rawn in nem khalh chuan a rawn ti chhuak hrawk chu ka melh chho deuh dawr a nih chu. Min rawn awm hnaih leh zual hrut a ka beng bulah rawn kun hniam in thawk a la hawk chu ka che ngam tawh lo.









" Dawt hmang a nun hman hreawm zia i hriat loh chuan tun chinah chuan ti tawh suh. Zan in a rem ka tih chhan pawh bul tan leh lam ni lo in ka lakah a beidawn theih nan a ti ka ni. Nang man min ngen vang chiah a ti ka ni tih theihnghilh bawk suh! " Dam deuh zawk a ti chhuak sup in ka dar ka kawr in a khuh lo chinah chuan a khabe a nghat deuh dat a ka taksa rin chhan ti tih chuan a rawn ding awn deuh ruai chu dawhkan a ka tluk mai hlau in ka tang deuh tung bawk.









" Hei lo pawh hi ngaihtuah ka ngah lutuk tlat Naute! Chuvang chuan phur rit dang min siam belh suh! Ka dawhtheihna hi fiah tum suh! " Ka beng bulah chuan a rawn phun nawn leh sup a. Ka beng leh nghawng vel chu a lum tel hawk a, a khabel hmul to deuh siar siar in ka vun nem lai, ka nghawng leh dar, beng bul vel a nawk chu za ka ti lutuk tlat leh nghal. Mahse a tawng thawp sup atang khan a chauh hmel em avang in ka nem sawn duh ta lo. A awm dan zawng zawng leh a thu sawi chu mak ka ti .









Phur rit ka siam avang in hreawm ka ti a, ka dil a piang min pe thin tih ka hriat avang a ka lo nawr lui vak pawh ka in thiam lo em em bawk. Mahse engkim a nih tur ang a ni vek tawh miau a sawi vak tur pawh ka hre chuang lo.









" Ka tihpalh! " Ti sap in ka in nem khalna kut leh lam chu ka la kang a a darah chuan ka beng thak thak a. Hahdam hmel zet a thaw chhuak suai suai in a rawn che hrut chu a tho sawn dawn emaw ka ti hman a mahse a in siam rem ta deuh deuh a nih chu!









Sawi sel lem lo chuan ka ding ran a. Eng tik lai pawn a bulah ka pangchang in a buai nge buai lo ti ngai chang lek lo in ka duh hun hunah ka tih tauh khung ang lawp lawp a. Zan in ang te kha, ka buai ti chung reng in kei mah vang chiah in a chhuak leh ta nge nge a. Ka u hian ka dil leh ka sawi tawh chu min tih sak loh a nei pawn ka hre lo. Chuan tunah a chau ve tak zet a, hetia ka bul a a pang chang ve a nih chuan ka kal san bik thei lo!









" Zan in chu U zawk ka tang mai ang, chuan ka bulah i pangchang thei ang mahse tun ang hi chuan i muhil thei lo a nia, ka chawn a nat tawh bakah i hmui hmul khan ka nghawng a chhun sep sep a, a za ka ti! " Ka ti chhuak sap chu nui hawk in a hmui hmul chuan min rawn nawk lui leh kher a ni chu.









" Ka biang hmul zawk a ni lo maw? " Nuih za aw thawp sup a tiin a rawn nawr lui leh chu a dar ah ka beng ri ta tlawp.









Khum ah thu awn der der in ka nu phone in ka be malh malh a. Ka mal chungah lu nghah a kan thu sawi min lo zawm ve sup sup tu chu ka nu bulah a in ti thu lutuk thu sawi in ka phun char char a ka nu la chuan ka fiamthu emaw tiin min la rawn nuih zawk a nih chu. Thenzawlah zan khat riak in chhoh kan tum ta bawk a. Class kal ti buai lo leh ka u hna ti buai lo tur in inrinniah chho in zan kan riak a nga Pathianni tlaiah haw leh tur in kan in be bawk.









" I ngaih ber i be zo a I muhil nghal hmak a maw? " Ka mal chung a mipa hahdam hmel zet a thawk la suk suk a muhil chu a chhip sam buk lai a na vak lo a tham sak in ka phun sap a. A mutui ve viau a niang a che eih lo. Ka nu biak a rawt tlat vang in kan phone a , a be hmasa a, ka biak zawh meuh chuan hahdam lutuk in a muhil a, ka mal a kham tlat avang in ka tih harh hlau chu ka che sawn ngam bik thak lo.









Nidang a ka tih thin ang bawk in ka phone chuan thla ka lak sak kual leh vel a. Sir Rema pawh khan min fiamna pakhat chu ka phone ah ka u thlalak tam lutuk kha a ni pakhat a. Tun a ka phone thar ah pawh hian a tam leh tawh viau. Mahse tunah chuan ka thiannte nen a kan thlalak pawh a awm ve ta nual zawk. A bik in Baby-i, i phone camera a tha a ti miau a ka phone hian a hmet mawlh mawlh reng a, delete sak phal loh ka nei nual bawk.









Ka phone a message rawn ri ral chu mut chhuak chung chuan ka en a, Sir Reman * i online duh si lo a muttui aw * tih zawng te hi a rawn thawn chu ka nui sak. Reply vat in ka phone chu khumah ka dah tha sauh sauh a, ka u lah rawn harh mai a tum tawh loh hmel bawk nen lukham a ka thutdan siam rem in mut thilh ka tum ve ta tawp. Zingah erawh ka taksa a rawl deuh thum ngei ang!



*



*


" Vawin tlai chu i haw dawnah min rawn phone tawh ang che. " Kan college gate a tlan lut in ka u in a ti sup chu chhan let tum in a lam ka hawi a, engmah ka sawi hma in a kut a rawn vai nghal vut chu ka ner nang.









" Driver emaw taxi koh , emaw midang rual a rawn haw kha phal a ni lo a nia! " Ka sawi tur hre lawm ang maiin a rawn ti sup chu hmui ti pawrh vak a ner nang in motor seat chu na zet in ka ngheng dawt a, kut ka kuangkuah zui hmak.









" Kha tiang khan awm suh! A nih loh chuan naktuk a Thenzawl a kan kal tur kha ka thulh ang. " A rawn ti leh sup chu engmah sawi lo in thawk ka la hak.









" Mi zawng zawng pawh in i strick leh lutuk an ti vek a, i nau hi hmeichhe awm herh leh ven ngai ang maiin min control an tih che hian engtin nge i awm? " Ka mit sir a melh rawm a ka ti chu min nuih suk a nih chu.









" I awm herh vang ni lo in i hrisel loh vang a ni tih kan hre ve ve a, a bak enge hriat la ngai? " Ti sup a motor a ti ding chu a lam hawiin ka ner khum vak. Heti bak hian ka lawm loh na ka ti lang ve thiam lo hi ka buaina.









" Ni hman nuam! In la boss pa! " Motor kawngka nem hawng a ka ti chu a rum deuh nghut. Engah mah ngai lo in na zet a a motor kawngka nem khar in lei ka chhuak khum vak chu motor chhung atang min melh rum ngei mai.









" Enteh Angel! Kar leh atang in college week kan hmang dawn a freasher dayah enge i hak dawn? " Baby rawn kal in a rawn ti chu ka nui sak ringawt.









" An ti tep ter lutuk hi ka ngei tlat. Mizo thuam hi khawi a mi nge ka hawh ang le, Ji lah hi engmah a ngaihtuah ve lo. " Thu tum bar a a ti niah niah chu ka lehkhabu chhiar dah in a lam ka hawi ta nge nge.









" Ih... I duh a ngem chu ka hre lo a naktukah ka u nen Thenzawlah kan chho dawn ah zan khat riak in. Ka rual a I lo zin ve peih chuan zo thuam i duh ber ka pe ang che. " Ka ti chu a meng bial nasa mai.









" I ti tak tak lo ang. Phal ringawt mah la i chhungten an rem ti lo ang! " A rawn ti a mahse a hmel ah erawh a phur tih ka hria. Kei pawn lo kal ve se ka duh tak zet, ka thian vawikhat kan in a ka hruai haw na tur leh ka chhungte ka hmuh tir na tur a nia ka chak tak zet.









" Ka u nen chiah a nia, phal lo tur an awm lo. Motor ah pawh i leng chiang sa a. I lo zin ve a nih chuan kawr vel pawh chu kei man ka sawi chuan ka pa chuan a phal chiang sa. Nang mah zawk kha i ni mai. " Nui var var a mit ka kan ak chu a duh thu sawi in min kuah nghal vak a. Lawm lutuk in Ji a hrilh ve nghal.









" Hei.... I nu leh pa tlawh in in zin dawn tih ka u in min hrilh a. " Canteen a thil ei tur a ka thu a Baby-i erawh ei tur lam in a kal thung a,ka hmaah Kimkimi rawn thu in a rawn ti chu ka melh ringawt.









" Ka lo hre leh daih chu i lawm vak na nge? " A rawn ti leh nghal zat. He nu tak hi chu buaina hi a zawn hian a zawng a ni ringawt.









" Lawm lo hran lo e, zep chhan tur a awm chuang lo a. I zin ve chak a nih chuan sawi tha ve mai la. " Ka ti zui zat.









" Haa.... Nang tel lo la chuan ka chak mai thei. Mahse tun hi ka thu sawi fiahna chance ah khan hman i tum em tih ka hre chak. " Nui hak a a rawn ti chu hospital a thu sawi kha ka hre chhuak nghal zawk.









" Fiah tur a awm pawn ka hre ve lo. Enteh Kimkim ka u rilru ti hah leh a ngaihtuahna ti phir zawng a awm hi ka duh tawh lo a. Nang nen pawh hian thian em nih chu ka beisei lo a ka duh em em bik hran lo mahse engvang in nge in pangai tak a kan awm theih loh ang tih ka lo ngaihtuah a. " A mit a melh kalh in engmah huat tur emaw tawng kam ki ngeiawm bik riau pawn ka sawi lo. Ka rilru dik tak a ni bawk.









" Engvang in nge ka duh ang? Hahh. . Kei chuan ka nu thu sawi ka hriat kha ka ring tlat a. In zawmna kan neih loh miau chuan in ngeih tak a kan awm dun deuh thut chhan tur ka hre lo. Mahse thil pakhat I fiah a nih chuan loh theih lo in i sawi ang chuan kan awm dawn a nia.









I pa leh ka u te in zawmna chu ka sawi dik lo a ni tih proof na min pe la. A harsa vak a mi? Pafa tak tak an nih chuan engmah hloh tur a awm lo a. Chuan I sawi ang in nang nen a kan in kar pawh kan ching fel a nga. I sawi ang in ka u rilru ti hah reng chu ka duh bik lo. " Meng kual ralh a a ti chu ka thin hian a tuar lo lek lek. Tha tak in thu ka sawi a, mahse tiang khan min chhang a nia.









" A tha lawm! Ka proof ang mahse ka proof thei a nih chuan , in kam ki ru reng a kan awm hi kan ban san ve ve ang! " Ka ti deuh fak chu mit min san khum ak duh chauh a nih chu. Ka u ngaihtuah lo phei i la chuan ' kan awm dan pangai in awm zawk ang' tih leh mai ka chak ut ut hial. Mahse a upa zawk ka nih ang in ka dawn hram a ni ang chu.









" Heii.... Ti nge i din vung vung a Sir I nghak a ni maw? " College gate pawn a ka ding chu hnung lam atang in Babyin min rawn nem thut a , lo in ring lo chu ka kat deuh dawr a, ka sir lawk a thir ban ka vawn rual chuan ka kut phah a thip nghal zawk.









" I va zawi chhe tak e aw! Ka nem nat lo che nen. " Nui hak hak a tiin ka bul a rawn ding chu a rak ve that.









" A thi a nia! Kha tia tih che kha ka tum miah lo a nia. A na viau em? Office ah lut phei leh ang. Ka tihpalh lutuk a nia! " In thiam lo lutuk a tiin ka kut a rawn vuan chu kan hmaah ka u motor a rawn ding ve chiah a. Driver seat atang a rawn chhuak in kan lam pan in motor a rawn kal hual nghal bawk.









" Eng thil hrep nge thleng?" Ka kut a hmuh rual a ti hrawk in a kekawr ip atang in scarve a rawn la chhuak a ka kut chu a rawn hup bet nghal a. Babyi lah in in thlahrung tawk in a tihpalh thu min hrilh mawlh mawlh a. A na vak lo ka tih ngial pawn thi a chhuak hnem nen a tap deuh pur tho.











" Baby tap tawh suh! A na tawh lo a nia. Thisen hi ka ngah lutuk a a chhuak duh ve hrim hrim a lawm. Ka u pawn a pem thuk lo a tih kha! " Motor hnung a thu in babyi mittui chhuak tawp thei lo chu ka thlem a. A tir a thisen ka hmuh avang a ka ngawih reng avang khan a in thiam thei lo ni ber in ka hria. Kei lah khan thisuk ka nei bawk nen min thawng deuh thut kha a nia. Chubakah ka sawi ang khan hrisel lo viau e ti lo hian pem hlek ka neih hian ka taksa a duk hma ang bawk in thisen hi a chhuak hma ka ti mai.









Ka u in motor hma lam atang a rawn thlem ve ta nge nge a. Midang chu ni se ka u hi ti hian a ngawi mai mai in ka ring lo. A vin deuh hrawk loh pawn a thing nawk ngei ang. Mahse Babyi chu a mah a in thiam lo sa lutuk hi han tih belh vak ngaihna pawh a awm lo. Kan in thlem nasa lutuk chu a tawp lamah phei chuan motor hma lam atang in a rawn nuih leh suk thin.



*



*


" Tah belhi te chu i va hman hma reuh ve. " Kawngka a Babyi nen kan lut chu dining hall lam atang ka u chu coffee no keng in a rawn chhuak a nui deuh suk in a rawn ti chu Babyi hriat loh in ka melh nghek.









" Nia... Hman hma a ngai sia! " Za lo zet a nui in Babyin a ti chu a banah kuah in in chhung lamah ka luh pui a. Kan nula ten ei tur an lo chhawp sa chu kan ei dun a. Ka u erawh pawn lamah ka nu te bia in a vai kual thuak thuak thung.









" I kut chu a la na em? Nimin kha chu ka tihpalh tak zet. Chubakah ka hlau thawng bawk nen i u lah kha a tawng duh si lo a, thi daih ka chak zia kha! " Babyin a rawn ti vak chu ka nui tawp.









" A tha vek tawh. " Tih leh ka kut in tuam lak chu ka hmuh tir a, a ner nasa ngang mai. " Ka u chu a tawng tam lo hrim hrim a, i nel hun ah chuan fel I ti viau ang. " Ka ti zui zat chu a awi vak lo nge a nui hak.









Ni min vang khan ka rual a zin tur a thul mai hlau in zingah driver ka tir ve hmiah a. Ka u pawn thian ka nei ngai loh zia a hria a, ka ngaina a ni tih hria in engmah a sawi buai loh bakah ni min chung chang pawh in a kan haw hnu thleng in a sawi lo. Sawi mah se Babyi ka tan dawn tih a hre sa miau.









Kan khua chu tlan chhung a rei lo bawk a, motor seat hnung lam a kan thian dun a thu in eng eng emaw, thil ho lam tak tak kan sawi chhung in kan thleng ve mai a. Kawng lakah ka u lah in kan ril tam a hlau in min ngaihven reng a, nep nawi ei tur a lei teuh bawk. Nidang a ka zin nen chuan ka u pawn ka dang lam a ti viau ang. Babyi tawng duh nen kan ngawi mai mai hman lo a ni ber. Kan tlen dawn tepah erawh engmah ngaihtuah lo in kan lo muhil daih bawk a. Ka pa in motor kawngka a rawn pawh hawn a kan mu kan harh meuh chuan in ngheng rial in kan lo muhil chu an vaiin min nuih vek.









" Kha kha i pa maw? I u nen an in ang lutuk! Chuan nang chuan i nu saw I chhun a nih saw . " Kan in lam pan a kan thian dun kan in kuah phei chu Babyin a ti sap a, ka nui sak. Midang pawn an ti thin ka pa leh ka u an in ang in an mizia zawng zawng nen an in chhun zia an sawi thin a. Engtin nge pafa an nih lo theih teh lul ang!









" Chuan..... I enkual zawh tawh chuan in ti fai i la. Eng lo, zan khat chiah kan riak dawn tho na chung in room hran i duh chuan room ruak a awm tho a , ka room ah pawh kan awm dun thei bawk a. I duh zawk zawk a ni mai. " Babyi nuih var var chuan ka ti a. Common room lamah ka nu leh pa leh ka u te chu an awm thung.









" Ka rin dan chuan room pakhat a awm chu a nawm hmel ka ti. " A rawn ti chu ka nui sak. Kei pawn ka chak ru daih zawk, ka thian te nen kan riak dun ang tih hi ka la ngaihtuah ngai lo. Babyi awm lo se chuan zan in chu ka nu leh pa bulah ka mu hrim hrim ang. Ka ngai ve tawh bawk a.









Ka room ah ka in ti fai a, room dangah Babyi a in ti fai bawk. Ka in bual zawh chuan in hnuai lamah ka chhuk a. Ka nu leh pa ka hmuh rual in ka u awmna ka zawt nghal zat.









" Factory ah a kal in ka hria. Hna tih fel tur a neih vang a lo chho in ni bawk a, a tih hmasak loh chuan a hahdam leh thei lo ang " Ka nu in bawnghnute in tur min pek pah in a ti chu ka hma zawn a bawnghnute chu melh in ka ner nang.









" A va phakar tak. I sual chuan kan zin leh lo ang te min tih khum a hna vang in zin ngei ngei a ngai reng sia ." ka ti nghal hlak chu ka bulah ka pa a lo nui suk.









" I sual a niang chu! I u hi i hlau lo leh lutuk a. I pu te inah i lo va awm san vel a, kha tih lai khan Aizawlah awm i la chuan ka vaw hrim hrim ang che. " Ka nu in a ti chu ka hmui ka tih pawrh khum vak ringawt.









" Chutiang te hun kal tawh a nih chu. Khaw nge i thiannu kha? Ka fanu hian thian rawn hruai tur a nei tih a sawi khan min thawng lutuk a. " Ka pa in ka nu ang thinrim tak tak tur chu a rawn tih khalh sup.









" A rawn chhuk tep ang. A fel teh mai a nia. Ee... Chuan pa nizanah ka rawn sawi vek tawh kha aw Babyi rawn chhuk hun ah dawrah ka kal pui nghal dawn. " Ka ti zui zat chu ka pa pawh a bu nghat.









" Neih chhun ber in i tih miau chuan. Bawnghnute kha in rawh le. " A ti sup chu nui var var a hnar hup in ka tlak nghal pawp.









" Zanriah ei hma in rawn let u la aw! I pi damdawi leh i damdawi ei hun kha ngaihtuah u la! " Ka nu in a ti ve nghal a. Nu leh pa bul a han awm meuh chuan Aizawl lam a haw leh a peihawm loh zual ngawih ngawih.









Babyi pawn kan khua chu nuam a tih thu a sawi mawlh mawlh a. A duh thu sam ngei kan dawr a mi zo thuam a thlang bawk. Aizawl lam a kan dawr a mi pawh i duh chuan i thlang zawk thei ka ti leh lai lawk a. Mahse a hmun ngei a mi hi a hlu bik a ti ve tlat. A tir chuan a man to ho a thlang ngam lo deuh ni in ka hria a, mahse i duh ber, i in chhir loh na tur thlang rawh ka tih tlat tak ah chuan a duh ber chu a thlang in ka hre bawk.









Ka chhungte tih lohah chuan present ang deuh a mi thil ka tih sak berna a nia, chutah ka thian tha ber , kan in hriatna la rei lutuk lo mahse a ni bawk a. Nuam ka ti tak zet.









Sunday chawhma kan in khawm a, Babyin ka thawmhnaw a haw ve tawp a. Chaw hnu lam erawh rei lo te kan khua ka fan pui a, in a kan let leh meuh chuan Aizawl lam a kan haw a hun ta duai. Naktuk zing dar 9 ah college hall ah kim vek tur a nih avang in riak duh eng ang mah i la kan riak thei lo.









" Enge i va tih leh a? " Motor ka thut luh rual in ka u in driver seat a thu in a rawn ti sup chu nui ver ver in thil ka theihnghilh thu in ka chhang mai a. Ka kut erawh chuan ka bag ka hum ran thung. Ka u leh ka pa toothbrush la in ka khaw thlai deuh kha a nia. Ka u in a room a chhuah san hun nghah kha a ngai miau a. Ka pa pawh vawin tlai a ha nawn tur chu a toothbrush zawng in a hawi lawl lawl ngei ngei ang.









Ka ngaihtuahna avang chuan ka nui sak. Hei hi ka test tir a nga. Chuan Kimkimi a dik loh zia ka hmuh tir ang. Chuan dawt sawi a, a la tan tang tang vang in zak ang chuan a lan ring chiah lo mah i la a zak ru chem chem bawk a nga. Ka u nau ka ni ve lo tih thu pawh min sawi khum leh ngam tawh lo bawk ang.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: Bing [Bot], Google [Bot], Krystal varte and 131 guests