Ka Hmangaihna Zinkawng

Episode kal lai dah luhna

Moderator: writers

Mala Renthlei
Posts: 1
Joined: August 2nd, 2020, 12:46 am

Ka Hmangaihna Zinkawng

Unread post by Mala Renthlei » August 2nd, 2020, 1:03 am

Aizawl khawpui lum uap churh mai karah chuan ka scooter(scooty kan ti deuh tlangpui ang chu) hûnna tur chu zawngin ka vei vak tak ngiala, a awm ngang loh avangin Temple thlang dawr kawtah chuan rei lo tê hûn chu ka dil ta râwih maia. Ka scooter ka dah fel hnu chuan bak lêngin MC lam chu ka pan phei ta nghal a . Ka hmanhmawh em em chhan pawh a dawr neitu te tan ka lirthei dah chu a hnawk ka hlauh vang a ni. MC ka pan chhan erawh, FK Dawr B-22 ah chuan lehkhabu ; Hriatpuia Kion ziah, 'Mi Tin Thawnthu' tih lei tur chuan a ni thung.

Chutia hmanhmawh taka ka kal lai chuan Scooter ve tho, Facino var, a thar tih hriat em em mai khalhtu hmeichhia kan hmuh nak chuan, Huiz, ka suangtuahna ramah kalo cheng lutuk nge, khaw lum lutuk karah thlifim a thaw heuh heuh a ka hriat tlat pek chu. Mahse, traffic a jam eih silo erawh chu a pawi a ni. Ka hmu rei hman talo. Ka hmuh chhun a sakhmel erawh a tha narawh. Vantihkoh hmelhmang hriattir tura a bîk taka khuanu duan tih hai rual a ni lo. A tlan liam rual chuan, " Ava chhelo ve!" tih a hlawh em chu ka hrelo nângin a hlawh hle erawh ka ring thung.

Ka vanneih vang nge khuanusam suih kan nih dawn vang zawk, ka hrethiam ta hauh lo mai. Zodin piah lawka Lirthei dah khawmna ah chuan a Scooter chu alo hûng mek a. Ava han fuh thei chaih chaih em! Pathian hnena bawk khupa tawngtai ka tum hial hmana, mahse ka tawngtai ta em bikloa. Hmuh fua pawha an that tawh vei nen, en chian chuan atha lehzual nimai hian ka hria. A chawn , a mal leh mawng bâwr inkhai thli zarh mai te chuan a bîka siam a nih zia a lantir chiang hle. A hnar zum lutuk lo, a mawi tawk chiaha zum si leh a mitmeng fiah kâk mai te, chu chang a nilo, a heh, pem hmuam hma ang maia sen tai hlar mai te, a bahsamin a hnungzang a vaw hnâp mai te chuan 'MAWI' a nih zia a ti lang famkim hle. Mahse, a mizia hi alo chhe ru phian ang tih erawh ka hlau kher mai. A mizia chuan a hmel han chhûn ngat phei se chuan , 'FAMKIM' hrilhfiah nan amah hi hmang ila, a zahpui awm hauh lo ang le. Ka kam tam ta luain ka hria. Thawnthu lamah let leh ang.

Ka kal chu ka muang deuh hlek a, achhan pawh a hnungzuitu mai mai nih pawh ka châk em vang a ni. Tichuan ka zui phei ve dat dat a, a kal pawh a zangkhai viau mai, a kal pah chuan a ke chu a khai vawh vawh maia,mi thatchhe tak a nih kan ring lo ve leh nghal ngawt a . Engvang nge maw ni dawn ni? MC ah chuan a lut thak maia, kei lah MC a thil lei tur ka nih vang chuan ka zui lo theilo.

MC chhungah chuan a hawi há ha a. ' A fuh dawn chiah e' tia phun sap pahin," Nula, puih theihna che ka nei em?" tih ka rual a. Ka lam chu a rawn leh hawia. 'Awi ka nu, ka thi!' . Mihring ka nih chungin vawi hnih ka thi ta bik dawn nih hi.

"FK Dawr, B-22 awmna min hrilh theih chuan ka lawm ngawt ang." tih pahin a nui sen sen a. Vawi hnih nan ka thi leh ta!

"Oh! Keipawh chutah tho chuan ka kal dawna, enge i tih dawn?"

"Lehkhabu lei ka tum deuh a, mahse a awmna ka hre silo a nih hi" a nui hawk hawk a.

"Keipawh lehlhabu lei tur thoin lawm ka kal dawn. Rem i tih chuan?" tih pahin ka lu kan sawi nghauh a.

"Ummm, ti lutuk e".

"Nula sual tak zawng a nih dawn loh hi." tiin ka ngaihtuahna ka kawm nghal a. Ka ngaihtuahna vêk chuan "Uai, i luangliam dêr elaw". a rawn tia.

" Lungliam lo , luangliam lo". tiin kalo tawng chhuak leh pek a.

"Maw? Min bia em ni?".

" Be love, keimah leh keimah ka inbia a nih kha" tih pahin ka nui ver ver a.

"Mahni leh mahni inbiak te chu 'MAWL' nihna asin" uang tak hian a ti a, a nui leh ker ker a.

"Ni e, nang vanga 'MAWL' nih ka hlawh dawn pawn, hlawh lâk a zawnga ka lawm ber a ni ta ve ang" tia chhan mai ka nâp a. Mahse," Chutia mawnle" tih leh nuih bak chuan ka chang talo a.

FK Dawr chu kan thleng thuaia. Lehkhabu lèi tur chu a man kan pe fel sawk sawk a, kan chhuak zui ta nghal a. Kan chhuah rual chuan," Kalna tur dang i nei em?" tih ka rual nghal a.

"Aih, nei hran love" tia min chhan leh "CROWN dawrah i chawl dun ang hmiang, ei man ka tum ang. Pawi i ti em?" ka ti zawm nghal zata.

"Pawi ti hran love, mahse ka ei man tal ka pek dawn loh chuan 'PAWI'" ati ve maia.

Rem ka tih sak ve mai bawka, mahse pek tir erawh ka tum baulo.

"Mala ka nia, i hming min han hrilh hre ve hrim hrim la tiro?" kal pah chuan ka ti a.

"Nia mawle, ka hming sawi nachang pawh kalo hrelo a ni maw. Avan at thlak tak! Lalhruaitlungi ka nia, Hruaii tiin min ko mai zel." ati deuh duah a.

"Hming ka hriat tawh azawnga hming mawi ber a ni hial awm e. Ka hmangaihna zin kawngah Tluang takin min Hruai ang che aw.." ka ti lek lek a ni.

"Hming mawi tak a nih chu" ka tiliam ve mai bawk a. Kal kawngah chuan kan ti ti phei bawrh bawrh a. Crown dawr chu mitkhap kar lekin kan thleng ta maia. Hetiang em ema a hnaih ka lo hre ngailo re re. Nge 'Hruai-Lalduhawm-Famkim-Kual-Vel-Vek-i' ka kalpui vang zawk.

Chawnhnu her lam hret a ni tawha, ril a tam ve deuh bawk nen . Ei lam chu ka phur hle a. Menu kan en a, "Enge i ei duh le?" tiin ka zawta. "Buhchiar" a ti deuh hmuka , kan nui dun hawk hawk a. "Tak takah, Vegetable Momo leh Cold Coffee hi nimai" a tih rual chuan lehkha phekah chuan ka handwriting chhe ve pherh phurh tak chuan kalo ziak thla ve mial mial a. Keiin Beef Rice leh Cold Coffee vêk chu ka chah ve bawka, waiter hnenah chuan ka pe fel ta a.

Eitur nghah chhung chuan eng eng emaw kan sawia, a nun hlui zawh chak viau mah ila, a thil duhloh ka lai chhuak ang tih ka hlauh avang chuan ka zawt ta lem loa. Hruaii chu nurse training chhuak chiah a nih thu leh Aizawl Civil Hospital chu kar leh maia a zawm ve tawh dawn thu a sawia. Lawmpuina te chu ka'n hlan veleh hnuhnawh a. Enge ka tih min zawh ve erawh chuan,"Tlangval, chhungte chawm hlawm mai mai alawm ka nih" ka tiliam ve maia, min en dan atang chuan chutiang mi ka nih loh zia a hria tih ka hre nghal maia. A hre dik chiah a ni. Kei hi Chhuankima, CM fapa ve lai, Law(Dân) lam zir chhuak hlim hlawl, ka thiam leh theihna avanga Delhi Law Farm pawhin a an sawn ve ngat ka ni. Mahse sawi lan kher ka tum lem lo..

Ei tur chu a rawn thleng ve ta hram a . Kan ril a tam dun bawk aniang kan ei nghal mawlh mawlh a. Intawng hlìm hlawl kan nih avang chuan sawi tur kan ngah hle a, ka thil ei pawh chuan min dal lem lo. Ei pah chuan kan ti ti chhunzawm bawrh bawrh mai a ni. Kan ei zawh chuan Cold Coffee chu dessert-ah kan hmanga. A dâwt fung, a heh no tak maia an fawp kâk kak mai chu ennawm a tling a , a thil in lai en tur ticket zuar ta ila, hralh a hlawh hem hem viau maithei a ni.

Kan ei zawh chuan,"Bathroom kan hmang lawk" ka ti zauh a. Kan ei man chu ka pe fel ta vek a. "I àwm hahdam deuh chuan kal zai kan rel mai dawn em ni?" ka han ti a.

"Nia, ka chhungten rei min ti lutuk palh a nge tih pah chuan a bag , dàr bah chu a ak tha sawk sawk a. A purse a phawrh a," Ka pek tawh kha aw" tih pahin chhuah ka ruala.

"Ka ei man chu keiman ka pe ang ka tih kha, kha!" tih pahin a ei man chu min pek a tuma . Ka hnar lui zela, a scooter dahna thleng chuan min pek a tum trang trang a, kalo hnar ve thei hram a.

"Nih chuan a leh pekah ka tum ve tawh ang"

"A leh pek chu awm thei hram se kava ti ve"

Anui ver ver a.

End of Eps-1



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: Aaron Dustin and 178 guests