#CHAPTER -24By : Msi, Hmeichhe naupang tereuhte
"Lora... ka sawi zo phawt ang" tih dam thlup pah chuan min rawn ban a tum a mahse a aia hnungah ka tawlh leh a washroom kawngkhar ka su ta dawt "Ka duh lo... ka ngaithla zo duh lo i sawi tum ka hre vek" ka ti chhuak nghek a, vanvadâk chung hian a thaw chhuak nghal hawk a, a mitmeng hreawm tih hmel zet nen chuan min rawn en leh.
"I hriatthiam loh ka hlauh avanga sawifiah tum ka ni Lora min ngaithla rawh" a rawn ti leh a, min rawn pan a tum a mahse ka kut lehlam chu ka phar chhuak in "lo kal hnai suh" ka ti zâwi sap a, ka lu ka thin khum zui nghal nawk nawk.
"Min lo hnaih suh, ka duh lo, i țhianpa kha neih ka duh reng reng lo engtin nge hetiang thil hi i tih theih zawk a, min neih tum angin i insawi a mahse i țhianpa ngei chu min neih tir i tum leh si, min tihder ani tih sawi rawh min tihder tiraw?" 'Aw' a tih ring a beiseina mitmeng nena amah chu en in ka ti chhuak hap a, ka heh ka pet nghal fan fan.
"Bawihi... englo, he thil...." sawi zo lo chuan a ngawi ta daih a, a kut chu a hûm ruh zui ta nghek a "hrep tak hian" a ti zui hrâwih bawk.
"Eng nge he thil chu? Ngatinge engmah i sawi chhunzawm duh leh si loh? Ka hriat ve a rem lo em ni? Thil engkim a bo a bang awm lo a in hrilh vek tur kan ti a mahse tinge tunah engmah i sawi leh si loh? Heng thil zawng zawng thlen chhan hi ka hriat ve a theih loh tihna em ni?" Ka ti vak a, ka thaw chhuak zui nghal hak bawk.
"Ni e... thil engkim inhrilh vek tur kan ti, ka hria kei ngei pawh hian ka la hria asin, mahse nun ani engkim in hrilh vek duh mah ila a theih si lo anih hi, thil pawh hi hriat âwm chin te hi a awm ve a thil zawng zawng inhrilh a hriat vek tum pawh hi thil țha ber ani chuang lo. Chuvang chuan ka sawi hi ngaithla la zawm mai rawh" a tawp lam chu a ri ta deuh hrâwih a, ka maimichhing zui nghal vang vang.
"Engpawh tawk ila harsatna lian tham tak pawh, inhrilh a in puih theihna kawng a awm chuan in puih kan ti a mahse tunah chuan ka laka mihrang daih ang maiin i țawng asin, i țawng tih i inhria em? Engmah sawi zawm ka duh tawh lo... nangmah ka nei dawnlo che anih chuan i țhianpa phei kha chu a hming pawh sawi lan ka duh ngailo ang" ka ti a, min en reng a.
Min en reng lai chuan washroom ațang chuan ka chhuak a, chair-a ka bag lo awm awmna lam pan chuan ka phei nghal vat a mahse chhuak tura ka in her chiah chu ka hnung mai ah chuan Damian-a chu alo ding khui a ka che lai ka tawp chiang takzet.
"Kal suh bawihi... sawidun ang țha takin sawidun ang aw" a rawn ti sup a, min khawih tum ni âwm fahran hian a kut a rawn lek kâng a mahse zâwi muangin a la thla leh riai riai.
"Sawidun ka duhlo, eng ang pawn sawidun mah ila a landanah chuan thil awmzia min hrilh lo in kha i țhianpa kha ka neih a ngaih hmel. Chutiang ang em em a hmeichhe nasa miin a min sawi zui dan tur anga awm chu ka duh lo, chuvang chuan engtia rei pawh nise ka nghak ang che ka nei dawnlo che anih chuan tu dang mah ka nei bik lo ang" ka ti leh ta fak a, chair chu ka tawlhhnun tira amah pawh en tawh lem lo chuan kawngkhar lam pan in ka pên nghal hlawk hlawk.
Min rawn man beh leh ka hlauh êm avang chuan lift lam phei chu chak mang kheng hian ka pan phei a, ka tlan ti tih zawk ani ber. Lift bul ka thlen chuan button chu ka hmet a mahse lift erawh ground floor-ah alo la awm.
Hlauthawng ru zet chungin Office lampang chu ka hawi phei a mahse min lo ûm zui lo hlauh, tunah hian ka in chan ber chu ramsa hlauhawm zetin a min seh a tum a tlanchhia ang velah ka in chan ta ani ber.
Engvanga a thianpa nena min inneih tir tum nge anih, nizanah amah zawk ngeiin palai a rawn tir a mahse tunah min neih theih dawn loh thu a sawi leh bawk si. Thil thleng engmah sawifiah a duh leh bawk si lo min ti hrilhhai takzet ani. Tunah lah min rawn ûm zui a tum hauh bawk si lo.
Lift a rawn inhawn leh rual chuan hmanhmawh zet hian ka lut zui nghala lift kawngkhar a inkhar dawn thleng pawn Damian-a alo lan ka la beisei fan a mahse kaw zîm tê chauh a awm tawh tih ah pawh a kawr them tak ngial pawh hmuh tur a awm lo.
Lift a inkhar phui ta, lift bang chu ka ngheng phei nghala lift in hnuailam a pan lai te chuan boruak a chak taka tla thla vawn vawn ang vel ka ni, ka nghilh dûk a zawhna tam tak ka ngaihtuahnaah an lo piang zut zut a mahse chhanna erawh engmah ka dawng thei si lo.
Maimichhing chung in ka thaw chhuak nghal vak a, engvang nge, engvang nge a țhianpa chu min neih tir a tum leh nachhan. Amah ka neih dawn loh avanga mualphona dawn ai chuan amah neih loh a nghah ngai pawh nise ka nghak mai ang.
Mi tam tak in kan innei dawn tih leh kan inngaizawng tih pawh an hre vek tawh a midang neih a sawi zui a mualpho ka duh hauh lo hmeichhia phei chu kan mualpho tawh chuan tawp in tai a nei tawh ngailo mi hriat a nawh reh theih loh zahna tur insiam ka duh lo.
Ka hnena thil engkim a sawifiah duh lo anih chuan zawh țalh pawh ka tum buai peih lo a, a sawi duh lo anih chuan sawi lo mai rawh se min hrilh loh a duh anih chuan keipawn hriat ka duh bik lo, mahse tih luihna hmanga râwn pawh min râwn lo a inneihna an kal tlang pui dawn anih chuan dân ka lek kawh ve tawh ngei ang helam hi chu ka dikna ani ve tlat.
Mahse engvanga fakau a thil engmah ka hriat ve rem ta lo anga sawi nge anih chuan tinge amah ni lo in Sangtea kher. Zawhna ka van ngah tak em! Chhanna erawh tunge min pe ta ang..?
Lift a din dawt rual chuan kawngkhar a rawn inhawng nghala chhuak in kawngkhar lam ka pan a kawngkhar ațanga Jephtha rawn lut tur chiah nen chuan kan in tawk nghal chat.
Min hmu lo tak tak nge min hmu lo der zawk pawh ka hrelo min kal pel hmak a mahse a hming chuan ka au leh a, a ding ve ta dat "Thil eng emaw zawh tur che ka nei a i hman em?" Tiin a dinna lam chu ka pan phei a hmel buai deuh nak pah chuan a bu zui nghut.
Ani pawh hian eng emaw tak chu zêp a nei chiang ang "thil thleng min lo hrilh, ka tih awmzia chu i Boss khitianga a awm chhan te thlengin i hriat zawng zawng min lo hrilh ve Damian-a khian engmah min hrilh duh lo a" ka ti a, a mitah chuan ka en ve ngar ngar a mahse min en ve duh miah lo.
"Lora... a pawi ka ti takzet engmah ka hre ve lo sir khan meeting naa ka awm ve a phallo a dawt ka sawi miah lo tak tak ilo thlen pawh khan lehkha pawimawh la turin min ti ringawt a an rel pakhat mah ka hre ve lo" a rawn ti a, a mitmeng ațang chuan dawt a sawi nge sawi lo tih pawh ka ngaihruat thiam tawh lo.
"Eng emaw tal chu i hre hrim hrim ang" ka ti leh hram.
"Ka hriat țhenkhat ho hi chu Sir in sawilo turin min ti a nangmah pawh ni mah la ka hrilh thei lo ang che min hrethiam dawn nia hna ka la ngah bawk sia ka kal phawt mai ang" a ti a, biak chhunzawm hman tawh lo in min kal pel a midang nen an inbe ta daih bawk.
Thaw chhuak hak in hnunglam chu ka hawi a mahse Damian-a hmel tak ngial pawh hmuh tur a awm lo. Khatiang khan awm mahse thil awmzia min hrilhfiah tum a min rawn ûm zui ka rin tehlul nen mahse a hmel tak ngial pawh ka hmu lo a a thusawi kha a ti tak tak ani ngei ngei ang.
Building chhung ațang chuan ka chhuak a taxi awmna lam ka pan phei a țullo zetin Building chu ka en chho leh a mahse ka beisei rûk ang engmah ka hmu lo. Building chhunga Remzuali leh Tlanhlua te lut tur ka hmu hman hram a chu chuan ka ngaih a ti țhalo hle bawk.
Ka phone ken lai chu a rawn ri a ka nu anih avang chuan lak pah in ngaih țha vak lo chungin Building lam ka thlêk leh zuai a mahse Taxi awmna lam ka pan zui leh ta daih.
"Bawihte, lo haw vat teh a eng emaw i tan lehkha a rawn thleng nual a a țhen chu hei ka lo hawng a" a rawn ti a, ka thaw chhuak hak.
"Eng eng nge sawi la, ka lo la haw lawk lo ang intih thawven ka duh a pitei te inah ka chho lawk ang ka lo tia" ka ti a, Taxi chu ka be nghal bawk.
"Pakhat hi chu i thawhna Damdawiin ațanga lo thleng ania naktuk ațangin hna i zawm leh theih dawn thu lehkha ania a dang hi chu nangman rawn en zawk la a țhat ka va ring ve hei ipa pawh alo thleng chiah e" a rawn ti a, a thusawi chuan ka beng a verh nghal zar mai.
"Damdawiin maw?" Ka ti ta hû.
Taxi driver chuan ka kal duhna min rawn zawt a Zotlang lamah tiin ka chhang nghal sap.
"Aw... ka bang tawh i ti khan ka hre sia mahse hei hna i zawm leh tur thu lehkha a rawn thleng a ka van hrethiam lo ve. Khawi maw bawihi nu ka lo en ve ang" tiin ka pa țawng thawm chu ka hre nghal zat a. Ka nu thusawi avang chuan ka thin pawh a hma zawng aiin a phu rang sauh.
A hma khan Damian-a khan thil thleng avanga ban ka nih thu kha a sawi a rei anih dawn loh thu kha a sawi tawh bawk. A sawi ang chiah in tunah ka thawh leh theih tawh thu lehkha a rawn thleng ve leh ta chiah bawk a mih hi.
Hetiang thil rang tak tak a a rawn thlen theih danah hian vawiina an thurel ah khan thil eng emaw tak chu a awm chiang ani.
Ka pa chuan eng eng emaw a rawn sawi leh a mahse ka beng ah a lut a ka beng lehlamah a chhuak lehnghal zel ka rilru ka pe theilo.
Kan inbiak zawh in Damian-a number ka hmet chhuak a call ka tum zet nâng in ka off rang leh mah mah.
Vawiina thil thleng ngaihtuah zui nauh nauh in ka maimichhing ta daih a. Damian-a haw hlur tur ka nih laiin ka haw thei si lo ka zawhna zawng zawng chhanna ka duh mahse ani'n engmah min hrilh duh hauh bawk si lo. Eng nge ngaihtuah tur ni a eng nge tih ber tur pawh ka hre tawh lo.
Pitei te in kawmthlangah chuan Taxi chu ka din tir a pawisa pe in ka chho a an in kawngkhar bul ka thleng a pitei leh tu emaw an lo inbia ani ngei ang hmeichhe țap kerh kerh ri ka hria a lut lawk lo chuan kawngkhar bulah ka ding ta reng.
Ka phone a rawn ri a, Maria-i anih avang chuan ka chhang vat
"Khawnge i awm?" A rawn ti nghal tlawng.
"Pitei te inah ka awm tinge?"
"Hei, ka thawhpui te nen lunch ei turin kan chhuak a kan chawlhnaah Damian-a leh Remzuali chuan Tlanhlua pawh a țhianpa Sangtea pawh an lo kal ve. Ngatinge an rawn in zui luh a thil thleng a awm ami?" A rawn ti a, ka dinna ațang chuan ka kalsawn nghala ka kawr âwm chu ka țhâm ta ringawt.
"Eng nge an sawi i hre thei em?" Ka ti thâm chhal.
"Hre thei mai mai lo, min hmuh ka hlau a ka țhiante hnungah ka bi ru thil thleng a awm ami Lora? Oh! Saw Joshua pawh, avan mak em em saw pa saw hna ka ngah a ti ve sia" a rawn ti leh vak.
"Khawi hmunah nge in chawlh min hrilh vat rawh" tih chhuah vak pah chuan pitei te in kawt ațang chuan kawngpui lam pan in ka tlan thla vat. Tunah la la hian thil awmzia hriat vek ka duh.
Dawr hming a rawn sawi rual chuan kawngpuiah chuan ka tlan thla nghala ka phone chu ka hûm rân bawk. Taxi pakhat lo tlan chho chu ka phar ding a Zarkawt lama alo tlan theih hlauh avang chuan engdang sawi set set lo chuan ka lut nghala tlan chhuak turin ka hrilh nghal bawk.
Ka bag chu ka en a, ka nu in dal leh chini leina tura min pek pawisa chu alo la awm, ka hmang anga in a ka pawisa khawl sa in ka hnawh khah sak leh mai ang ti rilru chuan ka phone chu ka hmet êng lehnghal zat.
Damian-a number chu ka hmet chhuak a, tîm dai chung chuan call chu ka sent a, a rawn in ring rual te chuan ner vak chungin ka maimichhing a a lak loh hlauhna in ka khat.
"Hello!" A rawn ti thûm ta dut. Phone ațang chuan thawm pawh a ring țha kher bawk a hmeichhe nui thawm ania ka tih.
"Lem ziak kha ka la let tawh a" tih ri pawh ka hre bawk.
"Khawiah nge i awm?" Ka ti nghat a, min chhan dan tur ka hre chak zek zek tawh ani ber "Thil pawimawh sawi ho in kan chhuak lawk, engthil nge ni a?" A rawn ti a.
"Tute nen nge? Thil pawimawh ti chuan tute nen nge in chhuah?" Ka ti lehnghal zat.
"Chungte chu eng atan nge itih zawk a? Ka thusawi pawh ngaithla duh lo khan ka tih zawng zawng hriat tum in inti buai duh suh" a rawn ti ta nghut. Ka zawt kha ka inchhir nghal zawt zawt. Ka lakah a lungawi loh zia chiang lutuk tak maiin a hriat nghal ta vek bawk a mahse ka van tlawm âwm bik mai mai lo tak!.
"I thusawi ngaithla duh lo te min ti leh chhawng a. Em em a che, thil zawng zawng hriat vek a țul loh thu min hrilh zawk ani lawm ni nangmah khan, chuan tunah min mawh puh leh zawk amaw? A țha e... min rawn be tawh suh ang che kan inkar chu tunah la la hian tawp fel rawh se chuan kha i țhianpa kha engtikah mah ka nei ngailo ang chu chu lo hre rawh" ka ti hmak a, phone chu la thla in ka off zui nghal hmak bawk.
Engtin nge khatiang khan zak map lo in min la țawng khum theih zawk ni, amak hle mai. A Office ațanga ka chhuah pawh darkar êm ala tling lo a khatiang khan min la mawhpuh let ngam zawk ania ka pai dam mai mai tawh bik hauh lo ang.
Ka bialpa ni mahse duh duh in ka nun a hruai kawi thei bik hauh lo, a thusawi apiang mi â ang mai a ka zawm kil kel chhan tur a awm bik hek lo, ka duh lo anih chuan ka duh lo ani mai. Mihring ka ni a, hmeichhia ka ni bawk ani duh duh a tih kual mai mai theih ka ni bik lo. A țhianpa min neih tir leh daih nachhan tur pawh chu engpawh lo nise ani neih ai chuan ka zahawmna humhim a tumah neih loh a len tar mai pawh pawi tihna ka nei lo.
Ka zahawmna, ka nunna tluk hiala ka venhim hi mi narân mai mai lakah chuan ka pe hauh lo ang. Ka pasal, min Hmangaih tu leh keipawhin ka Hmangaih let ve ngei leh kan inkara inrintawnna nghet tak awm hnenah chauh ka pe ang.
Ka nu chuan ti hian kan unau in min hrilh țhin 'țawngthu chhe lo ah ipa nen hian he khawvelah lo awm tawh lo pawh ani thei, in nundan chu engpawh nise kha in zahawmna, in thianghlimna kha in pasal te hnenah chauh in hlan tur ani. Mipa, 'ka Hmangaih che, engtikah mah ka kalsan ngailo ang che, nupuiah ka nei ngei ngei ang che' titu hnenah inhawng ngawt suh,dawt hmanga nung mipa an nih kha ring ngai suh ang che u.
Bialpa in neih a hmun fal a in awm a i puan hmawr i deh tir ngawt chuan an zuam tulh tulh cheu anga a tawpah chuan lungngaihna khur ah an hnûk lut ang che u. Thianghlim takin a inngaihzawn theih, hmanlai chuan infawh tak ngial pawh an infawp ngailo thianghlim takin an inngaizawnga Hmangaihna chuan a suih zawm mai. Khawvel a changkang ta tih avanga infawt etc. Tihte kha changkanna ani lo.
Khang tello pawh khan nula leh tlangval chu thianghlim takin a inkawp theih. Pathianin a ruat cheu anih chuan Hmangaihna chuan a suihzawm ang che u a pumkhatah a siam mai ang che u. Bialpa nei suh u ka ti lo che u innei anih pawh in in bialpa te hmaah in dawh huam huam suh u, khavanga an ngaizawng peih lo cheu anih chuan a pawi reng reng lo țhen hmak rawh u, lhang vang khan in rilru te han tina vaih te u nula pawh ni ulang ka vaw hreh dawn hauh lo cheu ania' tiin.
Thu țha tam tak min hrilh țhin ka pi leh ka pu, ka pa te chen in kan unau hnih pawn kan nun theihtawpin kan uluk a hmeichhia chu kan mualpho hma êm avangin țawngkam pawh kan hmang fimkhur țhin. Ťhenawm khawveng te pawh tumah kan be chhe lo a tûm hmel kan hmuh ngai mang lo, ka pa duh loh zawng ani.
Hmeichhia kan nihna ang in mahni tawk ah pride neih ve larh tur, mipa in a duh duh a an tih kual mai mai theih a awm loh tur. Hmeichhe dinhmun chawisanna, sang takah kan in hlang kai thei tih khawvel hi hmuhtir zawk.
★
Maria-i dawr min rawn hrilhna hmun pawh pan lo chuan in lam pan in ka tlan tir leh ta zawk a, Taxi ka chuan chhung chuan ka ngaihtuahna a insual buai ve nasa a zawhna ka inzawt mawlh mawlh bawk.
Tikhan kan inkar chu ka titawp ani ta ringawt a mahse amah pawh khan engmah rawn sawibuai a tum hauh lo bawk anih kha. A tan chuan ka lo pawimawh lo tawp ania nge ni e.. a hna chu a tan chuan a pawimawh lutuk ngei ngei ang thil sawifiah vek pawh nise a țhianpa neih chu engtikah mah ka duh ngai lo ang.
In ka thlen hma chiah chuan Damian-a hnen ațangin call ka dawng a ka pick a mahse chhete pawn ka țawng eih lo. Voice chu ka mute-a a hming ka save chu ka en ngar ngar.
'Engtin nge zan khat thil thu ah tiang khawp hian ka lakah i inthlak danglam nghal theih zawk" ka ti chhuak sep, thaw chhuak hak in phone chu ka iptê ah chuan ka thun a kan tlan pelh motor ho en chuan tukverh ah ka dâk chhuak ta daih bawk.
In ka thlen chuan ka nu in Damian-a'n a phone-a alo call thu min hrilh a, a chhan pawn ka chungchang engmah sawi lo turin ka hrilh a a bak sawi tawh lem lo chuan room-ah ka tlang phei nghala room kawngkhar chu chhung lamah ka kalh zui nghal bawk.
Lukham hnuaiah ka phone chu ka rawlh lut a, ka dawhkan tê bula chair tê awm chu ka pawt chhuak a, țhu in tukverh ah chuan ka dâk nghal vauh vauh.
"Mate... khawnge i dal leh chini lei chu?" Tiin ka nu chuan ka room kawngkhar chu a rawn beng dawt dawt a "Nu... ka lei lo a nakinah siam hma in tlaiah ka pa nen kan lei mai ang" ka ti ve ta vak.
"Hrim hrim in lo chhuak teh, ka be duh che. Tinge room-ah lut a i inkalh hnan nghal hmak ni a, i chîng tawh lo vang vang amaw tih nâk alaiin" a rawn ti ve deuh hrak a, thaw chhuak hak in ka tho chhuak a ka room kawngkhar lam chu zawi zet hian ka pan phei nghal hnak hnak bawk.
Ka kalhna chu ka hawng a ka nu chuan in kuangkuah at chung chuan kawngkhar hmaah tak chuan min lo nghak reng a a tarmit a vuah leh tawh, a tarmit kar ațang chuan min lo melh ang kuau bawk a.
"Lo lut la" ka ti a, a rawn kal theih nan chuan ka lo tawlhsawn a mahse chêt pawh a chesawn lo.
"Rawn chhuak rawh, room-a inbiak a țulna a awm lo" a ti a, sitting room lamah chuan a kal phei nghal daih. A chhuak phei chu ka zui ve nghala ka pa pawh sitting room-ah thingpui nen alo țhu leh rûn tawh.
"I pa bulah chuan țhu thla rawh" ka nu chuan a rawn ti deuh hmak hmak a, thuâwih tak chuan ka țhu thla ve leh mai.
"In a rawn haw a.. engmah sawi si lova tûm hmuk a Room-a inkalh hnan i ching tawh lo emaw kan ti a, ngatinge i rawn thar thawh leh a bawihi, kan sawi zing viau tawh si a sim a hun tawh viau in i hrelo maw?" Ka pa chuan a rawn ti a, chhang lo chuan ka ngawi reng ka kut chuan ka kekawr chu ka hmer a ka kûn deuh ngul bawk.
"Chhang ta che i pa chu" ka nu chuan a rawn ti ve leh a, muangchangin ka dâk chhuak a.
"Thil thleng a awm a chuvang mai mai ania ka rawn tih leh thut nachhan pawh ka hrethiam tawh bik lo" ka ti chhuak hap a, an pahnih chuan min en reng a.
"Chu pawh nise nu leh pa hnenah chuan engmah zêp țhen neih loh tur kan tih kha i rawn haw hma deuh khan i nau pawn min rawn bia a a ni hman dan zawng zawng kimchang takin min rawn hrilh vek a khatiang thlap thlap tur kha. Tinge maw.. a upa zawk hi naupangchhia ang maia i khawsak leh țhin le" ka pa bawk chuan a rawn ti leh a, mahse a rawn sawi chu chhan ngaihna ka hre tawh lo.
"Nu, pa, inneih kha ka duh leh lo sût leh rawh u pasal ka nei dawn lo. Damdawiinah pawh khan ka thawk duh tawh lo, ka ban hi ka entir leh anga a dam hunah hna dang ka zawng anga rilru nei zetin hna ka thawk tawh ang Pasal leh bialpa lam reng reng ka ngaihtuah duh tawh lo" ka ti a, mak an ti tih an hmel ațang chuan ka hmu thei vek a ka dem hran lo.
"Engvang nge ni a? Nizanah Palai an lo kal a inneihna pawh i remti ani lawm ni engvanga tuna pasal ka nei duh lo ti leh nge inih?" Ka pa bawk ani, ka nu erawh chuan engmah sawi lovin min melh ngar ngar.
"A chhan chu...ah.. chhan pawh a awm lo ka ngaihtuaha pasal neih ka duh lo ala..." ka sawi zawh hma hma chuan ka nu chuan "tuman chhan neilo in engthil mah an ti ngailo, i duh loh chhan chu zêp nei miah lo in sawi rawh" a rawn ti a, ka kut chuan ka kekawr chu ka hmer vak a zâwi thei ang ber chuan ka thaw chhuak nghal ham ham.
"A chhan chu, englo.. ih, Damian-a nen inneihna a awm dawn loh vang ani. Ka rawn haw hma khan kan inhmu a ani chuan min neih leh dawn loh thu sawiin leh a țhianpa Sangtea zawkin min neih dawn thu sawi a tum a mahse ka duh lo. Company thil vang anih ka ring a mahse inzawmna ka neih pui loh mipa nen chuan inzawmna siam ka duh lo ka thei lo ang" ka ti a, ka sawi zo a inchhung chu a reh ta tlawk tlawk.
"Bawihte" ka nu chuan min khawngaih hmel zet hian a rawn ti a.
"Heng thil alo thlen chhan hi ka zawt a mahse engmah min hrilh duh lo, ka hriat ve a rem lo pawh ani mahna, min hrilh duh loh miau chuan zawh buai ka tum tawh bik lo mahse eng ang pawn sawi mahse a țhianpa nena kan inneih tho a ngaih hmel a chung chu ka duh loh avangin amah nena kan inzawmna pawh ka tichhia a" ka ti a, an pahnih chuan min chhang lo chuan min en ngur ngur a kei erawh nula e ti lo chuan nu leh pa bul tih takah ka sawi lai zawng zawng te chuan ka mittui a tling pam thei.
"Damian-a chuan engvanga chutiang thil chu rawn ti nge anih a.. Bawihi pa, i țhianpa Saia kha va be teh a a fapa thil tih hi a hriatpui em tih va zawt teh" ka nu chuan a rawn ti a mahse ka pa chu ti lo turin ka hrilh.
"Call buai duh suh, anni chu va tibuai tawh suh u, anni nena inzawmna neih pawh ka duh tawh rih lo an lo bia cheu anih chuan ka duh lo thu sawiin țha takin lo sawi mai rawh u chu bak engmah ka duh lo" ka ti a, ka pa pawh chuan a phone ken lai chu a dah thla leh ta hmak mai.
"Ni e... chutianga kan fanu infiam nan mai mai a lo hmang tur chhungkua te nena inzawmna siam leh neih pawh chu a țullo. Kan fanu hlimna an thlensak thei dawn lo anih chuan keipawh hian inneih chu ka remti hauh lo ang. Damian-a pawh chu ava ti mak reng reng ve" ka pa chuan a rawn ti a,chhang lo chuan ka ngawi ta reng.
Ka nu chu ka bulah chuan a rawn țhu a ka kutah chuan a rawn hûm a "mate..." a rawn ti a, chhang lo chuan amah chu ka en a ka mit hnuaiah chuan a rawn tuai a, a tuaina chin chu a hit chem chem mai bawk.
"Ngaihzawng vanga i mittui ti tla lo turin ka hrilh țhin che kha, i nu hmaah hian han nui teh le, i thil tawn harsa tak karah hian hlim hmel i pu thei tih min hmuh tir rawh le" a rawn ti a, nuih luih ngial ka tum a mahse avan harsa tak em! Chhete tak tak pawn ka nui lui theilo hreawm ka ti, hreawm ka ti takzet.
Thil hi a rawn thleng phut phut a, a liam zut zut bawk a engmah sawifiahna a la awm lo zui.
Ka pa rual in intih thawven nan ka chhuak ve leh a mahse bazar vela mipui kal chuan min ti tâwt zual sauh ni berin ka hria. Ka phone ka keng lo a a chhan pawh Damian-a'n min rawn call ka rin vang ania tunah riah chuan ka chhang duh rih lo.
Ka thiamlo zawk nge ni a amah zawk a thiamlo tih pawh ka ngaihruat thiam tawh lo, ka hnenah tiang khan a țawng hmuk hmuk a Remzuali te nen an inhmu tih pawh tlang takin engmah a sawi tawh lo bawk a, keimah min la dem zawk za mah lehnghal bawk a thil han tih vak ngaihna pawh ka hre tawh lo.
Mahse khang hun leh chen a tello pawh khan ka awm thei a tunah pawh hian ka awm leh thei tur ani ringawt mai ni.
Bazarah Damdawiin lama ka thawhpui te nen kan inhmu nual a thawk leh turin min ti vek a mahse ka thawh tawh dawn loh thu engmah ka hrilh lo. Ka be țha ringawt.
Ka pa țhianpa ka ban kan entir nghala ani chuan țhat lam a pan thu min hrilh a a dang te pawh min en sak nual bawk. Ka pa țhianpa chuan Damian-a nena kan chanchin min zawt teh ang nawlh a mak ka ti ang reng viau bawk, a hriat dan zawh ka tum mek laiin kan chanchin vel alo hriat thu min hrilh ta a.
"Kan țha ani mai" ka ti ringawt, mahse a dang min zawt chhunzawm tawh lem chuang lo ka pa nen chuan eng emaw an sawi ta luam bawk.
★
Zanah chuan chaw ei khamah chuan ka inti fai thuak a, mahni chuan tlem in a harsa ve det. Kut pakhat chiah hmang chuan intih fai a har ka nu lah a hman bawk si lo.
Ka nu phone ka hman duh avangin towel veng chung chuan ka chhuak a, ka pa erawh a duty daih thung. Mahse sitting room-a mipa lo țhu kur ka hmuh avang chuan ka ding nghal dat. Tunah hian towel hnuaiah kekawrte chauh ka ha.
Damian-a chuan ka taksa chu a en thla dan dan a, a nui nghal suk. Hepa hi! Hetah engtin nge alo kal theih zawk.
Rang zetin sofa hnungah chuan ka phei a ka awmdan avang chuan alo nui kiai suk. Mahse rum zetin amah chu ka en a "chhuak rawh! Eng nge hetah i rawn tih? Hetah engmah tihtur i nei lo" ti ram hmak.
"Ka bialnu rîm turin ka lo kal, ka nupui ni mai tur ni bawk nen" ala rawn ti ham ham, ala nui ang sâwng lehnghala rapthlak hian!. A zaklo tih bak sawitur ka hrelo khatiang thil vawiina a thlen hrep tawh hnuah pawh alo la kal ngam zawk ania a hmel pawh hi ka hmu peih lo.
★ ★