MIRANDA
Chapter 2
By Tetakte-i"Miranda"
Vin ṭhata a rawn tih leh chuan ka kalsawn tawh chu ka ding leh dat a
"Eng nga ti nge naupang ang maia i la khawsak ṭhin le!"
Hahthlak min tih hmel zeta min en tlawk tlawk chungin a ti sap a,
"Naupang anga ka khawsak lai ka va hre si lo ve"
Ngeiawm rawng kai lek leka ka chhanna chu a run hle tih a hmel nur nangah chuan ka hre thei, kei erawh ka khi deuh sak thung.
"Titeh Miranda, hetia min pehhel char char hian nuam ka ti lo a nia, a hma ang khan awm leh ang aw…." A tih chuan ka ter nghal at
"Zorinsang, eng ngati nge i hriatthiam theih miah loh, ka hmangaih che emaw tia i laka ngam leh ngam loa ka inpuan hnuah engtin nge i hmel ka hmuh reng ngam a nga!" Ka ti vin hlur a
"Miranda, min hmangaih a lawm...i hriat kha keipawn ka hria a sin, mahse i ngaihdan ang hmangaihna ni lo i unaupa ang zawkin a lawm min hmangaih"
"Awle ka hria e, i sawi tawh..i sawi fo bawk ang".
"Miranda, ka.."
"Engmah sawi bel tawh suh, ka hrethiam e..mahse hun ka mamawh a ni. A lo berah i thusawi hrethiam tura hmangaih ka tawn hunah a hma ang khan kan awm leh thei chauh ang",
"Nang.."
"Chumi hma chu ka awm ang ang hian min awm tir phawt rawh" a sawi tur sawi zawh tir duh loin ka pawt chat zung zung a
Engmah a sawi hi ka ngaithla duh rih lo, ka zahna ti tamtu mai mai a ni dawn,
Hahthlak min tih hmel zeta thawk a la hawk chu ka hre reng, ngaihsak duh loin ka kalsan a.
Ka hringnun zin kawng chhuk chho leh bumboh lutuk a ka nun inchingchivet kual vel dan hi ka hrethiam teh nuaih tawh lo.
Tunge ka hmangaiha eng angin nge ka hmangaih tih pawh ka thliar hrang thei lo chu a nih si hi maw.
Ṭhian ka kawm ngai meuh lo va, kawm pawh ka tum hek lo, ka nunah Nonoi lo chu ṭhian dang seng luh ka tum tawh lo va ka seng lut ngai bawk hek lo ang, ka Nonoi kha ka ngai ṭhin takzet.
Mahni pawh inngaihsak hman lo va Ka phuba lak dan tur ngaihtuah reng renga hun ka hman lai khan Zorinsanga hi ka kiangah a awm deuh chawt a, an in ah pawh riak lovin ka in ah a rawn riak ṭhin.. khatih hun lai khan mangchhiain min tihbuai ṭhin vangin nutein min ngaihtuah thei hle a, Zorinsanga min riahpui turin a ti ta hlauh kha a nia.
Ka be ngai miah lo chung pawh khan a awm awmin a lo awm ve mawp mawp ṭhin a, min ngaihsak em em reng chung khan ka tan ninawm khawp erawhin a awm ngai lo.
Ka khawvel zimteah phuba lakna ringawt ka ngaihtuah laia min ngaihsak rengtu a nih vang leh ka kianga a awm reng ṭhin vang khan ka ngaina em em a, a fiamthu thawh nuihzatthlak loh lutuk ka nuih pui ṭuma mak a tihzia kha ka la hre reng.
A bialnu min hmelhriattir ṭuma min ṭhawn zia kha, a bialnu hming a sawi laia a nuam ti hmel leh a bialnu a en dan kha amah ka hriattirh aṭang a vawikhat tihna a ni.
kei aia ngaihsak zawk a neih kha ka duh lo takzet, ka awm a nawm theih ngang loh vangin
A zanah ka hmangaih thu ka sawi ta tawp mai a, ka thusawiin a ṭhawng hle tih mak tih hmel fe a min melh phawk hra vang chuan ka hre thei mai..
"Miranda hei hi hmangaihna a ni lo, ka tihawm zia chu mipa angin min hmangaih lo ka tihna a nih chu. I mipa hmangaih tak i tawn hunah chuan i kain i duh loh thu sawi mahse i thinlung chuan a pawm thlap ang.
Khawi hmunah pawh awm la eng thil pawh ti la i rilruah a awm reng a nga, i hawina hmun a piangah hmuh inbeisei takin i awm reng ṭhin ang, i kianga ka awm reng ṭhin vangin min ngaina hle tih ka hria, mipa angin min hmangaih tak tak ni la chuan vawiina sentei ka hmelhriattir lai che khan mak tihna ni loin thikna mit mengin i en ang chu.
Ka sawi dik tiraw, i thik lo...mak i ti a nih kha, nang aia ka ngaihsak zawk i rin avangin i hlauthawng a, a chhan chu miranda engtik lai pawha i kianga awm a ngaihsaktu che ka nih vang a ni".
Tia a sawi laia mak ka tih zia kha ka la hre reng, rilru mumal ka pu pawhin ka hre lo, ka ngainat em avangin ka hmangaih emaw ka ti tihna a nia….
Kha mi zan aṭang khan pehhel dan ngawt ka ngaihtuah a, hmuh loh hram hram ka tum ṭhin, tun hun hi kan thleng ta a ni.
Hriat loh karin School pakhat kawtah chuan ka lo ding leh reng tawh. Ka
chhungte thlan tlawh turin Champhai lamah an phum vek si a, ka ngaih zual chang chuan helai hmunah hian ka kal fo ṭhin.
School naupang hlim taka an infiam lai chu ka thlir reng a, keipawh anni ang sawn hlim takin ka infiam ve ṭhin.
Tleirawl pahnih in hlat vak loa awm in au tawn chhente chu ka thlir reng a…
Hun kal tawhah bawk min chentir leh ta..
4 years ago"Da ...Da…. Min lo nghak ve la maw le!"
Thaw hlawp hlawpa ka ṭhian duhtak Nono-i rawn tlan phei chu ka lo nghak a,
"Em em thin che hian, eng hian nge maw ti hman hmawh ṭhin viau che le?" Ka bul a rawn thlen chuan a ti deuh nang nang a
"I sana bun kha eng atan nge i tih? En ve ṭhin ta che, kan tlai ṭep tawh hi..first period kan nan hman loh chuan min hrem dawn a nia" ka tihkhum hlak hlak a…
"Hmmm...vawiin chu Sir Marama period a ni tho a.."
"Eng a…! I mawl em ni? Miss Thani a lawm…"
"Awi..! ka duh thei lo" tlan nghal hlawk hlawk chung chuan a ti chhuak ṭawk ṭawk a ni ber e..
Ka ṭhiani hi zawng haihawtna zawng zawng neitu a ni miau a.
"Heyhhh ..No-i..No-i...Remsangpui.."
"ka nghak em em che a min tlansan leh daih a", a dara ben thawk pah chuan ka tihkhum chiam a, eng nge mawni..min au ding te te a, amah zawkin min kalsan leh daih vel a nih kha..
"Miss Thani period i ti ni lawm ni, ka tlai duh hlei nem..zak taka mi siam a thiam ropui si.." a theih tawka ruma min melh pah chuan min tihkhum vei hlak hlak a
"Ti khan min melh rum vak suh...I thiam loh a nih kha"
"A na a lawm eng nge min ben vak kher a"
"Shhh ..ngawi tawh rawh...saw...zirtirtu a lo kal"
"I la hre khawp ang.." min melh rawm rawm pah chuan a la ti hram.
Huiss...kut thlawn lah hi a ba duh der bawk si lo.
"canteen-ah lunch ei ang ka treat ang che"
Tlawn titiha ka tih chuan ka rin sa ang chiahin canteen-a thil ei a peih loh thu in min chhang nghal pang.
He mihringnu em em hi chu,
"Canteen chu an siam tui lo thei e, school chhak lawkah khian thil an siam tui thei lutuk"
A duhna hmunah ka zui leh ta nge nge
"Nono, he lai hi tih i chiang a maw.."
kawng sira dawr lian vak lo chul riap tawh chu ka en ding ngar a,
"Umm..an siamtui thei lutuk"
"A thianghlim meuh ang maw"
Rinhlelh hmel fea ka tih chuan min melhrum leh ngang tawh mai
"Lo kal la i hre mai ang"
Kawngkaah chuan min kai lut dawr dawr a,
nu upa lam deuh tawh hian min lo chiauau vatin ṭhutna turte min kawh hmuh sawk sawk a, rin ai daihin a chhung chu a thianghlim reuh phian leh nghal..
Ṭhutna erawh pa4 vel chauh a awm a, dawrtu an hmu ve ṭhin a ngem le tih ka lo ngaihtuah hman hmawh
Kan thil chah an rawn dahna plate chu ka en ang hehaw a, A changkang lo takzet. Mahse a fai tih hriat zet hian a tle ve vei ang sur a
"Ei ve ta che" Nonoin a rawn tih chuan ka hmaa eitur inchhawp chu tlem ka tem hlek a..'ummm'..a tui a nih hi.
ka hawp a, ka hawp nawn leh a, ka ei fai ta vek mai..nonoi chuan min nuih var var paha "an siam tui ka tih reng kha" a tih chuan "kal ziah ang aw" ka lo ti deuh sup a.
Ka kal fo duh dawn tlat, an siam tui emai.
"Da..khawnge Rempuia hi a awm a? nilengin ka la hmu miah lo"
"Kei pawhin ka la hmu bik lo...vawiin ah kan la inbe miah lo"
"School a kal lo maw ni le"
"An inah kan Peng kawi dawn mi…"
"Nia a harsa Chuang lo"
kut inkai rialin Rempuiate in lam pan chuan kan kal a,
"Nu Mapui...Rempuia a awm em?"
"Ehe! Miranda nangmahni in ni maw...lo kal ru, exam-na tur inbuatsaih ka ngai e a ti a, school pawh a kal lo a nih kha"
"A va ho e aw… a dam lo emaw kan lo ti a" Nonoi chuan a ti nang nang a.
"han chho ru a room-ah a awm kha"
Rempuia room-ah chuan kan chho, kawngka pawh kik lem loin kan lut tlang pawp
"Eh..Da, eng nge in lo tih dawn?"
"min hmu chu mak i va ti awm ve" Nonoin a tih chuan
"Nia, ka beisei hlei nem che u" a ti let vat a, hemite pahnih ṭawngthei dun lutuk leh inchhang tawk dun lutuk hi chu an lawmawm thei a nia
"Vawiin ni lengin kan hmu lo che a, kan ngai che lawm"
"Over su..exam a hnaih tawh tehreng nen
In thawveng ṭhian dun lutuk"
"Kan pass tho ang" tlawm zawk nih tum lova an inhnial mawlh mawlh lai chuan
"In inchhang tawk thei e"
Ka lo ti zeuh a, an pahnih hnihin an ngawi nghal hmak.
"Eng nge ṭawng leh ta che u, sawi tur ka hre ve hlei nem" ka tih pawhin an ṭawng duh tawh der lo
"Sawi tur in hriat tawh loh chuan kan haw mai ang, Rempui ṭha deuhin lehkha zir rawh aw.."
"Kal mai mai teu min tibuai" a ti hmuk hmuk a
"Mipa tihtauh ching chu an hmelchhe duh"
Nonoin a rawn tih chuan kan nuih vak vak a.
"Nu..khawnge kapa hi", choka lama kanu awm chu ka au lang lang a
"Tahaan-ah bungraw lo thleng tur vel buaipuiin a kal"
"A cham rei dawn em?"
"Thlakhat vel a niang"
"Ka pi leh pute?"
"I nite inah chaw an eidawn a nih kha"
"Oh a nih chu "
room ah ka chho tlang a, inbual faiin lehkha ka zir nghal char char.
Thla thar maia exam kan hmachhawn tur hi ka tan chuan a pawimawh em em a, a chhan chu Distinction ka phak vaih chuan ka pain Aizawla a hotel khu min pe dawn a tinni
Tunah rih chuan a ṭhian hnai tak pakhatin a enkawl a, Hotel lian lutuk a ni lo nain a changtlung thawkhat hle tih ka hria..
Mahse a aia Hotel lian leh changkang a awm nual vangin mi hriat a hlawh lutuk lem lo a ni awm e.
Hotel ka neih huna ka tih tur leh hotel hmasawnna tur ang ngaihtuaha ruahmanna siam chunga lehkha ka zir hian ka thiam theih phahin ka hre deuh tlat leh nghal.
Harsatna tawk loin board exam kan zota, ka tiṭha thawkhat hle in ka inhria, ka ṭhian haihawti pawhin ka pass ṭha ngawt ang a tih vei ngial kha.
Champhai khaw hlun kan ni a, chhungkaw hung tak kan ni, ka pate unau hi pasarih an ni a, amah chiah mipa niin a pangber dawttu a ni. Ka nu hi khawchhak lam mi a ni a, khawchhak mizo kan tih ang chi hi. Ka pa sumdawnna hmun ber a nih avangin Yangon ah a khawsa tam em em a, chuta intawng chu an ni.
Ka pa chhungte hian ka nu an duh lo hle ṭhin tih ka hria, mahse ka nun min pai tak avangin duh lohna thu vel kha an sawi ngai tawh lo a, an thinlung tak erawh chuan an pawm ngai lo hrim hrim.
Ka pi leh pute erawhin an ngaina hle tawh..a kum a kum han chen ho takah chuan an inhre chiang chho ve zel a, ka nu pawh an ngaina thuai reng a ni.
kapa farnute hian kanu hi tun thleng pawhin an la ngaina lo tih ka hria, mahse kani te zinga upaber ni hruaii hian a laizawnte a hau fo ṭhin. Kani te zingah ni hruaii hi ka ngainat ber a ni a, ani pawhin min duatin a fate nen pawh kan inkawm ngeih hle. Mahse a pasal Pu Siamtea hi a chanchin an sawi fo ṭhin nain ka la hmu miah lo thung.
Vawiin hi kan result chhuah ni a ni a, ka pa zin rawn thlen ni tur a ni bawk, ka phur lutuk hi ka awm mai mai thei lo, chawhnu dar1 ah result an tichhuak dawn a, Nono-i a lo phei a, roomah kan pahnihin kan awm char char. Dar1 rik hma hretin Rempuia a lo thleng ve bawk a, kanu'n kan eitur min siam sakin choka lamah a buai hle..
Ka pi leh pu erawh ṭhutkhawmna ah chekers an khel leh tawh mai thei.
Dar1 a rik chuan result en tumin internet kan on vat a, internet kan on ruala ka phone lo ri ve chhen chu ngaithei lo zeta off tumin ka la a, mahse caller id ka hmuh chuan off loin ka pick ta zawk
"Hello! Sir!"
"Hello! Miranda, Congratulation!" Hlim hmel fahrana a rawn tih chuan ka bang bo hle, ngaihna hre lo zet chuan
"Ngati maw sir?"
Ka ti let ha a
"Result i la en lo em ni?"
"Kan en dawn chiah a min lo call a"
"A nih chuan lo ngaithla rawh aw, tunah khan principalin min hrilh zo chiah a, commerce ah topper kan nei tih"
"Sir...ava lawmawm ve..mahse eng nge kei min rawn hrilh daih daih a"
"nang lo hrilh tur dang an awm chuang hlei nem"
"Nahh..sir min fiam suh aw"
"Miranda commerce subject ah topper i ni e" a tih chuan insum hman loin
"Sir" ka ti vak a, ka au chel chul mai ka hlim lutuk hi a ni ringawt ka beisei phak bak a ni
"Da..eng nge ni vak vak" nonoin a rawn tih chuan chhan tumin ka ang zuau hman
"ehe..Nono rawn en ve mah teh" Rempuian a tih chuan chhang loin ka nvawi leh ta zawk a
"Eng nge ni a?"
"Commerce ah topper kan nei a nih hi
Miranda Saihlupuii"
"Awi ka duh thei lo Da.". tih leh min kuah a rual nghal, kan pathum chuan kan au chiam chaim a, an ni pawh distinction-ah an pass ve ve..kan lawmna hi tuifinriat angin a liam..
In hnuai lamah ka tlan thla nghal a, ka pi leh pu bulah inti thei tawkin ka result ka hrilh chu ka nuin a rawn hre pha ni ngei tur a ni a rawn phul hlut a
An ni pawh an lawmin min chhuang hle tih ka hre thei..ka va han hlim vawng vawng tak em! Ka ṭhiante pahnih pawh zanriah ei ve nghal tura kanu'n a tih chuan an phur hle..
Room a ka ṭhiante nen hlim taka kan nuih ho dar dar lai chuan ṭap thawm kan hre ta phut a, vawi leh khatah a rawn ri chhuak ni berin ka hria, hrilh hai zeta kan in enkual hnuah inhnuai lamah kan tlan thla a, police maw..! Ka nu chhuata ṭhu chunga ṭap hawm hawm leh ka pi leh pu mittui far zawih zawih chunga lo inkuah ka hmuhte chuan ka hrilh hai hle..
"A ruang chu post-mortem turin civil hospital an panpui mek" Police pakhatin a tih chuan ka hawi chhuak nghal vat a..
(Min khawngaiha min chhiarsak tute in chungah ka lawm em em e,)