BOUND BY HONOR - 16

Episode kal lai dah luhna

Moderator: writers

Puii Sailo
Posts: 101
Joined: October 21st, 2020, 8:05 pm

BOUND BY HONOR - 16

Unread post by Puii Sailo » October 26th, 2020, 7:16 pm

CHAPTER – 16

Luca chuan runluih hmelpu zetin min rawn melh a. Mi zawng zawng hmuh theih turin ka kawrfual chu ka mal thlengin a hlim chho a. Ka mal dinglama lace chu a kutin a nuai kual zui. Chulaia awmte zawng zawng chuan ka engkim an hmu vek. Ka kawrfual chu ka hmer ngawt ngawt a ni mai. Luca chuan a kut hnunglamah suihin, ka mal hnaih tur chuan a kunhniam nghal a. A hmuiin ka mal a rawn sik takah chuan ka thaw ngam tawh lo.

Mahse mo hlim ber anga ka lan a ngai bawk si. Luca chuan ka mala lace tlangah chuan seh betin, ka ke hmawr lamah chuan a hnuk thla a, ka pheikhawk ke artui sang laia a tan vang chuan ka ke chu Luca hmai zawnah, a seh chhuah theihna turin ka khai kang a. A seh chhuah hnu chuan, ding chhuakin lace chu sawmte hmuh theih turin a lek kang a, kut an beng dur dur mai.

Keipawh chu nui luiin kutte chu ka beng ve ta vel a. Luca chuan aw thum deuh chhakin, “Tlangvalte u, awmkhawm rawh ule. A vannei berin nupui a nei hmasa ber dawn a ni,” a tih chuan a naupang ber thlengin an rawn kalkhawm a, Fabiano pawh a bawng bik lo. A thinrim hmel viau mai, ka nuin tel ve turin a nawr lui tih ka hrethiam nghal mai. Mit ka va siai khum zeuh chuan lei min rawn chhuah khum ve nghal zat. Ka insum thei lo, ka nuichhuak hawk mai. Hun rei tak chhung chu hetianga za hian ka nui tawh ngai lo. Luca pawh chuan mak tihmel zetin min lo en reng ringawt a, ka hawisawn rang kher mai. Luca chuan lace chu tlangval ho awmkhawmna lamah chuan a vawrh a. Midangin an chuhbuai hman hmain Matteo chuan rang lutukin a lo man chat mai.

“Remna a thlen lehzual theih nan Outfit nula min nei duh in awm em?” intihtheih vanga mithmul kan ak chung chuan a ti a, nula leh nuho lam atangin au thawm leh kut beng thawm a ring tha kher mai. Lily pawh hlim vanga kut beng chungin a lo zuang ve tawr tawr a. A tan chuan engkim hi infiamna vek a ni. Matteo chuan hmu ve lo se ka ti…, inneihna a sawi lai khan ahming pawh ngaihtuah lo se ka duh. Kan tradition anih angin Matteo chuan nula pakhat thlang chhuakin a lampui dawn a ni.

Luca chuan min rawn pan hnaiin , intitatu zetin ka kawngah chuan min rawn kuah a. Chutia rin loh taka min rawn kuah thut avang chuan ka lo phu zawk pek a, Luca lungawi zanlo chu a ding khawng deuh luah mai. Matteo chuan a kut chu Lily hmaah phar chhuakin, ani lah chuan thlan chhuah anih vanga phur tih hriat zetin a lo vawn sak vat a. Ka awm a rawn tawt nghal. Kum 15 mi lek hi tuman an la thutak dawn lo. Luca nen kan lam dun lai pawh chuan Matteo leh Lily chu ka en kar a, a hnungah vawn sakin a hmel atang chuan a fiam mai mai tih ka hre thei. Mipain a nupui tura a melh thin angin a melh tlat lo. “Kan naute hi an innei anih chuan New York-ah chhungte i nei dawn tihna a ni mai a,” Luca chuan a ti a. “Lily saw ka neih tir ngai lovang,” ka aw chu a vin lek lek tih ka hria. Engatinge mahni pawh ka inhmuhim theih loh laiin ka naute tan engkim ka huam si?????

“A duh chu Lily saw a nilo,” a tih chuan, inkuangkuah chunga ngun em em a min lo thlir rengtu, Gianna lam chu ka hawi vat a. Ka pa hian a fanu dang New York mi leh sa a neih tir tawh lo ang. Chicago Outfit-ah hian dinhmun tha zawk luah a duh dawn anih chuan, a fate pasal neih tirin chhungkua a phum ngheh a ngai. Kan lam zawh chuan music rang chi an play a, dance floor a khat leh nghal vek. Luca chu ka nu nen an lam dun a, thawk lakna hun ka nei thei ta hlauh mai. Mahni chauha awm rih ka mamawh, anih loh chuan ka buai mai dawnin ka hria.

Ka kawrfual hak tlang chu chawi chhingin, huan sir a tuifinriat kam panna lamah chuan hmanhmawh zetin ka kal ta nghal a. Step tawite awm chu zawh thlain, yatch lo inthlunna lam chu ka pan a. Ka dinglamah chuan beach a inpharh phei duai a, zan thim hnuaiah chuan tuifinriat chu a lang dum kuk mai. Tuipui atanga thli lo thaw chuan ka kawrfual hak a chhem phe hlap hlap thei. Ka pheikhawk sang bun chu phelhin, ke lawngin tiau vaivut dai raih chu ka rap a, maimitchhing vang vang chungin tuifawn ri chu ka ngaithla a.

Thing dawhsan rap ri thawm ka hriat vang chuan ka hawilet a, Gianna chuan pheikhawk a phelh ve mek tih ka va hmu a. Ka bul a lo thlen chuan min kuah vang vangin, “Naktukah New York in chhuahsan dawn sia, keipawh Chicago ka pan nghal ang,” a ti sar sar a. Chil ka lem khalh a, “Ka hlau lutuk.” “Zanin hi maw?”

“Aw,” ka ti hmiah. “Zanin leh zan dang la awm zel tur pawh. He khawpuiah hian mal takin Luca bulah ka awm dawn a, aaa….. ka hre lo. Hmelhriat loh bula awmte, hmelma ni thinte bula awmte. Luca ka hrechiang zel anga, a nunrawngzia chauh hriat belh tur a awm ang tihte ka hlau, nang leh Lily leh Fabiano bula ka awm thei tawh lo turte.”

“Ka pain a phal phawt chuan kan rawn tlawh ngun viau ang che. Chuan, zanin chu …..” Gianna aw ah chuan thinrimna a lang tel a. “A tilui thei lo che.” Ka nui chhuak hawk a, a chang chuan Gianna hi ka nau a ni tih ka theihnghilh hial thin. Tun ang thilah hian a naupanna ka hrechhuak leh zawk thin. “A thei a, a ti ngei bawk ang.” “Anih chuan theihtawpin sual let mai rawh”. “Gianna,” ka tawng zawi kher mai.

“Luca hi Capo dei Capi a ni vat dawn a, insual tura piang a ni. Ka lo sual let anih pawhin a nuih ka tiza mai mai ang. Anih loh vek pawhin a thin ka tirim anga, kut min thlak duh mai ang,” ka ngawi dat a. “Bibiana khan min hrilh a, a duh leh beisei ang ka pe anga, ka chunga thatchhuah tur leh min hmangaih tura nawr tum turin min hrilh a.” “Bibiana mawli chuh! enge hriat a neih a?” Gianna chuan min en kar. “Ngaihtuah teh, Pathaua a hlauh de du zia hi. A kutzungtang thau tawi zet khan a duh duhin a taksa a khawih kual tira, khapa mutpui ai kha chuan thih daih pawh ka duh zawk.”

“Luca hi ka inhmangaih tir theih i ring em?” Gianna chuan luthing pahin, “Zalen tir tur che chuan i siam thei maithei. Ani ang mipa hian hmangaihna thinlung an nei thei lo ang.”

“Mi nunrawng ber pawhin thinlung an nei a sin.”

“A nei ve anih pawhin meihawl ang maia dum a ni tal ang, hmangaihna tih velah chuan i hun khawhral duh suh, Aria. Kan khawvelah hi chuan i zawng hmu dawn chuang lo.” A sawi dik chiah, mahse ka beisei lo thei silo. “Chak takin i awm ang tih min tiam rawh. A hmeichhe mutpui thinte ang maiin i incheibawl tir lo ang, tih min tiam rawh. A nupui i nih hi.”

“Danglamna a awm em ni?”

“Aw, a hmeichhe kawp thinte chu an zalen a lawm. Mipa dang pawh an kawp thei reng tho a, an chan a tha fe zawk.” Ka then lui sak a. “Tihngaihna i awm thlawt lo….. i la nui zui a niah,” Gianna chu a thaw hawk a, a hmel pawh a rum deuh ul tawh mai.

“Luca pawhin a ui fing a rawn tirh leh tawh saw. I tlanbo a hlaute pawh a ni mahna.” A hawina lam ka hawi phei ve chuan Romero, min zawng tih hriat zeta a hawi kual vut vut chu ka hmu ve nghal a. “Yatch-ah hian chuangin lo tlanbo daih ila tha tur”.

“Khawiah nge kan tlanbo ang? Khawvel tawp thleng pawhin min umzui zel tho ang.” Ka bana rangkachak sana mawi zet chu ka en zauh a. Luca hi ka hrechiang lo, mahse amah ang mihring hi chu ka hre tawh thin. An thikthu a chhia a, an ta i ni tawh a nih chuan nungdama chhuahsan theih an ni tawh lo. “Let leh tawh ang. Inneih cake zai pawh a hun dawn tawh.” Kan pheikhawk chu bun lehin thawm bengchheng tak lam chu kan pan leh ta a.

Romero chu ka chhang buai peih lo, mahse Gianna chuan vin let hram pahin, “Luca hian engkim ti turin a mamawh che a mi? I puihna telloin a zung ve thei em ang chu ti raw?”

“Luca chu mopa a ni a, misawmte chiau au a ngai a lawm,” Romero chuan a ti ve mai a. Mahse min dem tih chu hai rual a nilo. Luca chuan min hmuh rual chuan min lo melh nghal chat. Rui fe fe hmuh tur an awm nual tawh a, thenkhat lah pool-ah chuan thawmhnaw pawh phelh loin an lo cheng bawk a.

Ka vawn turin Luca chuan a kut a rawn phar chhuak a, ka lo vuan ve mai bawk. “Khawnge i awm daih?” “Boruak thianghlim ka mamawh a.” Sawi zawm turin hun kan nei lo hlauh. Cook chuan inneih cake chu a rawn nawr chhuak ve nghal a. Cake chu a var niin chhawng ruk laia sang a ni. Pangpar peach rawnga chei a ni.

Kut beng ri hluah hluah karah chuan Luca nen kan zai dun leh a. ‘Bacio, bacio’ ti a au riin a zui leh nghal. Kan cake zai thlak chu plate-ah dahin Luca chuan fork hmangin min barh a, ka damchhunga min chawm a intiam tih entirna a ni. Nupui thatak ka nih tur leh, damchhunga enkawl ka intiam tih entirna turin ka barh let ve bawk a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: Google [Bot], Google Adsense [Bot] and 66 guests