Edit lohin ka rawn dah tawpa min lo chhiar mam sak hram mai dawn nia🥰
CHAPTER-17
Ka phone chhuata let reng chu Malsawmkima'n arawn chhar a, keive chu ka thu hriatin min ṭhawn lutuk vangin ka khawng vek. Ka ngaihtuahna a mang duk nimai hian ka hria.
"Lovie eng thil nge thleng?" Ka hmalama dingin arawn ti sup. Chhan tumna nei lo hian ka kut ka hum ruh ngat ngat a, ka pain ka ngaihtuahna zawng zawng aluah khat vek.
Tun ang thimhlim maiah engtin nge dawrah kangmei achhuah thut chhan hi ka ngaihtuah ngial pawn ka hrethiam thei lo. Wiring nise felfai taka tihvek a ni. Thil thleng palh ni lovin tu emaw vanga thlengah ka ngai nghet hmak. A ti tur awma ka rinah ka pasal ngei hi ka ngaihtuahna a lut hmasa ber a ni bawk.
Ka hma a ding khawngluah ka pasal ngei mai chu huatna nen ka melh tlawk tlawk!
A nu leh pa boralnaah khan ka pa inrawlha ahriat vangin kan chhungkaw laka phuba lak duhin kei min hruai lut a, tunah min ti na ta chiah bawk.
"I tih a ni em!?" Chang fak hian ka ti a rum lutukin ka melh zui reng bawk. Hriatthiam loh hmel deuha min melhna techuan keimaha thinrimna leh natna inzialkual vel hi achhem alh zel tih hi ahrethiam pha hauh lovang.
"Lovie"
"I tih ani em ka tih chu?" Inchhung khawl rum rumin ka au khum tuarh. Hlutein engkim alo hre ve vek anih pawn pawi tihna ka nei lo. Chutiang bawkin tun hunah hian insum tumna ka nei miah lo.
"Lovie" hriatthiam loh hmel zeta min melhna chuan ka pawi asawi ngawih ngawih.
"I hre lo der amaw?"
"I nu leh pa tan kan chhungkaw tihdarh vek hi i tum a ni lawm ni engtin nge i hriat loh der theih" khabe inkhawng dawt dawt hian ka tihkhum phiar phiar.
"I chhungte chungah thil thleng a awm em ni?" A aw chhuak la dam dup thei chu ka haw hluah hluah.
"Hremhmunah kal rawh" sehchilh ran a ti hlakin ka inher a hmanhmawh zetin kawngkharpui lam ka pan hlawk hlawk.
"Khawiah nge i kal dawn?" Ka chhuah hma chiah hian ka kawrhnungah arawn pawt a. A ni ang palianin min pawt ta tlat chu hmalama pen ngaihna a awm lo.
"Min thlah vat rawh" ka ngaihtuahna buai lutuk nen ka khek chhuak tuarh.
Ka hawilet chiah tihin ka phone arawn ri a mahse Malsawmkima'n alo hum run reng tawh. Ka ban hma chiahin a benga nawr betin a chhang zui nghal sup chu ka melh reng ringawt.
Ka phone kaltlanga athu hriat chuan aṭhawng ve ani mahna a mitmeng thlengin adanglam ve vek. Mahse keichuan lemchanna ang bakah ka ngai hlek lo. Mi chhiatna duh ngat ngat ho hi chuan inthup hi an hnehsawh khawp.
"Kal ang" ti hmukin ka phone a kenlai a kekawr ip a nawr lutin ka banrekah a chelh a, kawngkharpui hawng rawpin garage lam min panpui nghal dawr dawr.
Hospital thlen nan ka ke aichuan motor hi achak zawk dawn tih ka hriat vang chauha ṭan khawh lo mai chauh ka ni. Ka pa vang nilo se keihian a car a chuan tumna ka nei lo.
Garage aṭangin ka chuang lut ve nghal a, hmanhmawh hmel zet hian adawk chhuak nghal zawt.
Min biak tum tawh lovin a motor khalhlai chauh a ngaihtuah a keipawn biak tum chuang loin hmalam ka melh ding ngar. A thil tih anih ring em em siin motor khatah kan chuang dun leh ta tho chu ania.
Ka pa chu engtiang taka serious nge anih ka hriat loh vangin ka rilru a hmanhmawh tawpkhawk tawh.
"Engkim aṭha leh vek ang" min melh zauh hian arawn ti sup a, ka kut vawn tuma akut rawn lek chhuah rualin kawngka lam ka hnai zui hret chu thaw hawk hian akut ala let a a hmai atuai zui puat. Kei ka nei lo ang hmakin ka ngawi chawrh chawrh thung. A ni nena sawi dun chakna pakhat mah ka nei lo. Ka duh zawng chu ka pa eng ang dinhmunah nge adin tih hriat vat hi a ni tawp mai ni.
Hospital kan thlenga, adin fel hmain kawngka ka nem hawng bawrha ka chhukthla nghal vat. Malsawmkima nghah tumna nei lo hian hospital chhunglam chiai zet hian ka lut a, mahse khawilamah nge kal tur tih ka hre ta hauh lo. Ka ngaihtuahna mang duk aṭanga inthin harh tumin boruak ka hip lut kawk a, mahse eng ka ang thei tak tak chuang lo. Ka dinna kianga mihring inzul pel zut zut techuan min ti pik tulh tulh.
"Helamah" ka banreka chelhin dinglam corridor awm phei rul lamah min kai phei dat dat a. Mumal lo zetin min kaih ang angin ka zui mawl ve tawp.
Ka pa chanchin ka hriattirh kha chuan Malsawmkima hi thah ve nghal law law mai chakna khan min luah ut ut a, mahse tunah lem hmeichhe der dep ang zetin abuaipui ngaiin ka awm leh der tawh chu ania.
OT hmaah kan chhuak hlawl. A pawnlamah ka nu leh kan dawra thawk ṭhenkhat anlo awm nuk a. Lalpuii leh Rinhlua pawh ka hmu tel.
Ka nu bang nghenga ṭhu ngawi reng chu pan hnaiin ahmaah ka dinga thawk kala hap. A mit chhing reng chung hian a mittui abiangah aluang ngiai ngiai thung. Chu chuan ka taksa zawng zawng hi ati na vek thei. Ka pa hian min kalsan anih chuan Malsawmkima leh Hehseni hi ka ngaidam thei ngai lovang. Thinlung na tawpkhawk tuara an rum vawng vawng hma ka um zui zel bawk ang.
"Nu" adara vuan datin kati lawi rat.
"Bawihte" tiin arawn menga aṭap nasa thawkhat a ni ngei ang a mitmeng asen rum mai.
"Bawihte" harsa tih hmel zet hian ati tham chhel a, a mit chhing leh sawkin aheh hnuailam a pet fan fan chu hmuh hrehawm kati lutuk.
"Nu, ka pa chu aṭha dawn tiraw" hrawk na ut ut hian kati chhuak thei hram. Ka insehruh nasa hle bawk. Ka pa hian pasal nei tura min nawr luih lai leh ka thlalak vanga ka mualphonaah a inrawlh tih ka hriat lai zawng zawng kha chuan ka huain kan in lamah pawh ka kal duh miah lo a nihkha. Mahse na atawrh meuh chuan khang huatna khan fanuin pa ahmangaihna ahneh zo lo a ni ber.
"Bawihte ka hre lo" ti ṭiauin alu athinga abiangah mittui aluang zung zung bawk.
"Ka pa hian min kalsan ngawt thei lo" ka ti tham ṭiak. Ka â chulh thei. Ka mittui ka dan beh ṭang ṭang chuan ka biang athlen rualin chhuatah ka nu kut vuan chung hian ka ṭhuthla hnak. Ka inti pachang thei lo. Zorinpuii hian anihna ahlauh vek. Ka kianga midang awm ve ho te chu ka hmu phe vek. Ka awmna vir mup mup chuan ka khaw hmuh ati fiah lo tial tial a, ka hawi â ruai tawh.
"Nu" ti sepin ka nu kut ka vawnna ka thlah a, ka thin phu dawt dawtin ka khaw hmuh athim zui mup.
""""""""""""""
Ka mit ka meng siar siara, ka awmna hi khawilai hmun nge ka hre ta hauh lo.
Ka mit chhing sawkin ka meng leh a ka hmufiah thei ta chauh. Ka hawikual a hospital-ah ka pa ang thoin ka awm tih ka hmuthiam thuai. Mahse engvanga helai hmun dah ngai hi nge ka nih ka hrethiam lo.
Ka bana drip khaina hriau an char beh bur techu mak kati tual tual. Ka sirlama Malsawmkima ka kut chelh tlat chung hian khum bawha a ṭhu ka hmuh rualin ka kut ka chet dat. Ka kut lehlam lek chhuakin aluah ka nem dat chu arawn hawi chhuak rang kher bawk.
"Lovie" hahdam huai hmel pu hian arawn ti sup.
"Hetah hian engvanga awm nge ka nih?" Lawi rat hian kati sep.
Malsawmkima mitmenga lawmna chawpchilha rawn lang chhuak chu mak kati tulh tulh.
"Khawiah nge ka pa?" Ka ti leh sep.
"I pa chu ICU ah a awm mek" mit ka chhing sawk.
"Lovie lungngaihna tur a awm lo aw aṭha vek tawh ania" dam dupa arawn tih rualin ka kut achelh reng chu ka phih nghal sawk mahse achelh ngheh em vangin ka lasawn thei chuang lo.
"Khang thil itih vang khan i hlim ta sawt em?"
"Maw i hlim em, kan chhungkaw mangang tal buai i hmuh hian i hlim em?" Ka ti zui ṭhat. Natna ngai bawk thinrimna ngai bawkin min chenchilh leh meuh chuan ka thunun theih bakin ka taksa zawng zawng asa leh pup pup tawh.
"I hmel kha ka hmu peih lo thlawk bo rawh" sehchilh rana ti hlakin ka kut ka phih leh sawk a, athlah rualin ka bana an hriau char beh bur pawh ka pawtthla nghal hlawk. Thisen rawn chik deuh zuai chu ngai pawimawh miah lovin ka kut lehlama hupin ka ṭhuchhuak nghal zat.
Ka luhai deuh mup chu ka mit ka chhing zui sawk. Thawk la ham hamin ka meng chhuak leh a ka puansin lai theh hlimin khum aṭangin ka chhuka, Malsawmkima'n min dan tumna pawh nei lo hian ka che vel chu min melh run run reng. A ni khawngaihna emaw buaipui vel hi ka ngai chhete lo.
Khum aṭanga ka chhuk pen mai ka tum chu ka kaihza tha asai dar dar a,ka pen mai hlei thei ta tlat lo. Khum mawng lama thirkham hum chung hian ka kal dawna ka kaihza tha thlep hnawk vangin chhuatah ka ṭhuthla hnawk.
"I taksa achak tawk lo chuvang chuah luhlul chhuah suh" ti hlukin ka ṭhutna hmun aṭangin min chawikang nawlh a khumah min nghatthla nghal zat.
"Ngati nge ka pa kher a nih?"
"Ngati nge kan chhungkua kher hi i pawisawitu kan nih?"
"Min ngaidamin min en liam mai thei lo em ni"ka bianga mittui luang pap chu ka hru zui tawk. Ka hma a ka pasal min si lo chauha ding kawrhmawr aṭham chungin a dul zawnah ka hmaiin ka nawr tawk a.
"Tunah chuan i hlim tawh ang tiraw, kehchhe leh chuang tur kan awm tawh loh hi min kalsan tawh rawh" ti tiauin ka inhnit chhuak nghal hlawp hlawp.
Malsawmkima'n pik hmel zet hian thawk ala ham ham a, akawr hmawr ka chelhna ka kut chu akut lum vung vunga arawn hum khawm vek rualin rawl chhuah meuhin ka ṭap chhuak nghal hlawp hlawp. Ka natna tehi ka up bet reng a nih chuan ka tawt lutuk hi ka â thei mai ang.
"Lovie"
"Min en rawh" ka hma zawna ṭhuhniamin dam dup hian arawn ti a. Mit chhingin lu ka thing nawk nawk.
"Min en rawh le" ka bianga khuap chung hian ati leh sup.
"I pa chunga heng thil thlentir tuhi ka zawng chhuak ang" nghet churh a atih rualin ka meng ve ta chauh. Malsawmkima hian ka pa chungah engmah ati lo tak tak tihna em ni? Ngati nge engmah hi ka hriatthiam tak loh? Ka buaikual vek tawh.
"I tih a ni lo tak tak em?" Ti sepin amitah tak ka melh let a.
"Ka tih a ni lo" ti supin ka chalah achal arawn nghat dat.
"I'm the one who gets played" kan chhungkaw laka phuba lak tumin game a khel a keimah hi chu game chhunga a khelh kual vel mai mai chu ka ni bawk. Chu chuan min ti na lutuk. Chuan ka pa thlengin buaina khurah kan tang ta vek.
"Lovie, ka hmangaih che i hria em. Khang ka thil tum zawng zawng kha nangmaha feelings ka neih rual khan zawi zawiin min vuak ṭhiahsak vek" zawi sup hian arawn ti a, mahse awih harsa kala ti fan anihchu.
"Duh tawk tawh rawh, ka chau tawh. Kan tlawm e" ti tham chhalin ka biang adawmna ka pawtthla a, a hmel hmu thei tura ka hawichhuah rualin ka kut ka hum ruh nghek.
"Kalsawn rawh" ka awmdan siamṭhain pangngai thei ang ber hian ka sawi chhuak thei hram. He game chhunga tan hi ka duh tawh lo. Atawp thleng rawka min nawr chilh hun athlen meuh chuan keimaha ding chhuak tur awm leh tawh lovin ka kehsawm vek mai ang. Helai hmunah hian engkim hi tawp vek se ka duh.
"Awm sawn rawh" Ngawi rengin atawlhsawn hruta. Luhlul chhuah tlatin khum aṭang bawkin ka chhukthla leha,ka kawr haklai ṭham ngawt ngawtin hmalam ka pan chhet chhet.
"Kan inṭhenah kan ngai thei tawh ang chu" kawngka ka hawn hma a hawiletin ka ti sep.
"Lovie" ti hrawihin natna nen min melh ta thung.
"Kan fa lo piang mai tur tan pawh ka bulah awm hram rawh" aw khur ru hluk hian ati zui hrawih a, kawngka hawnna ka hum ngawt ngawt a minung kala nive tih chianna ka awmchhung ami a phu zui dawt dawt. Keihian nau ka pai tihna maw? Tun ang dinhmunah kei hian nau ka pai amaw!?
"Fa maw!?" Mak ti lutuk hian Malsawmkima dinna lam hawi turin ka inher a, ka hma a mipa ding khawng luah chu ka melh zui tlawk tlawk.
"Engtin nge anih theih?" Keimah leh keimah ka inbia a ni zawk mah. Nau ka pai thu hian min ṭhawng mah mah a ni. Malsawmkima nen kan khawsak dan ka mitthla let zut zuta thinrimna bawkin min tuam leh rualin ka mit ka chhing zui sawk.
"Ka paitlang duhin i ring amaw!?"ka men leh rualin kha fak hian ka ti hlak a, ka hmela natnate thupin rum lutuk hian ka melh zui hrak. Tun hi ka tihnat let ve theihna remchang a ni tih ka hria. Keihian ka fa ka pumchhunga ka thisen ringa rawn ṭhanglian tur hi engti kawng mahin ka paih phal lo hulhual chungin natna ka pe ve duh anih chuan helam kawng hi ka zawh mai tur a ni.
"Phuba lak hmang fa hi ka taksa chhungah hian ka awm reng tir duhin i ring em ni" ka sawi zawh rualin thlipui thawk thut ang mai hian min rawn hnaihchilh nghal.
"Sawi nawn leh teh!?" Ti hrawkin ka nghawng hnunglamah a kutphah hrawl zetin ahmer a ka khabe a vuanin min min kuai dak a bek pawng ṭawlh ṭawlh hian min melh chhuk ngur. Keiin zam map lovin rum lutukin ka melh let ve thung.
"Ka paih dawn ka tihna anihchu!" atirlam chu zawi viau mahse atawp lam erawh ka au khum hi a ni hrim. Ka nghawng hnunglam ahmer natzia chu pui tak a ni tawp mahse na tuar anga lan tum hlek lo hian ka nuih ro hak. Kan duh lo zawng anga kan hmangaihten chet an laka anat zia hre ve se ka tih vanga khang thu kha sawi khum kha ka ni. Keihian ka fa hi engtiang pawn min nawrlui mahse ka paih phal lo hulhual. Malsawmkima nat nan tak tak chauh a sawi chhuak ka ni.
"Han sawi leh teh!" Ti hrawkin ka nghawng hmalamah rekin kawngkaah min nawr beta. A chal sa vung vung hian ka chal anawr tel tawk bawk.
"Ka paitlang dawn lo!" ka tih tawn tawn rualin ka biang athip zawk a, ka beng akiu nghal vung vung thei!
Tunah khan kut min thlak!
Ka nghawng arehna athlaha min benna lam akuphah melh ngurin a tawlh hnung dawt. Ka nghawng dawm chung hian chhuat vawtthlerah ka ṭhuthla hnawka ka mittui tling pam chuan ka khaw hmuh ati fiah lo ruai vek tawh.
"Helai hmun hi chhuahsan tum hlek suh ang che!" sehchilh rana ti hlukin kawngka anem hawng bawrh a min chhuahsan nghal daih.
Ka mittui chu dan hman lovin ka biangah aluang lum nghal pap a, hmalam melh ding ngar hian ka heh ka pet a ka awm ka dawm zui ngawih ngawih.
Ka biang abenna lai sa deuh hat hat chu ka tawk de de a, ka biang ai mah chuan kutthlak duhna rilru apu khan min ti na let zawk.
Bang nghenga thawk la halh halh ka ṭhu tawm reng chu phone riin ka ngaihtuahna ril zet aṭangin min phih harh zawk. Ka hawikual a khum chunga Malsawmkima phone letbal chu ka hmu nghal zat. Lak tumna nei lo hian ka melh ngar ngar reng chu atawp zui ve mai. Mahse arik chhunzawm leh zat.
Inbengkangin khum lam ka pan a, a phone chu ka la kang nghal nawlh. Mahse no hlang chauh a ni thung.
Kalo chhan chi a ni em tih ka ngaihtuah rauh rauh laiin a tawpa. A rik ka ring tawh chiah lo khumah bawk dahthlak leh ka tum chu arawn ri zui leh zat anihchu.
Thinrim pik ṭunin ka pick a!
"Ka pu, girls hostel sakna hmun aṭanga tla hlum ta kha a eitura tur pawlhsak talbuai tla hlum anihkha" ka meng zui kawk! Eng thu nge arawn sawi hi?
"School principal thupek a ni tih chiang takin ka hria a finfiahna pawh ka pe thei ang che" arawn tih leh rualin khumah phone ka thehthla nghal bawl!
A nutei pasal thil tih vek tihna maw khang thilthleng zawng zawng kha!
Ahmawr kan bawk ṭep tawh aw...
