James Mallory and Harlen Irene

Episode kal lai dah luhna

Moderator: writers

Maruata jr
Posts: 82
Joined: September 12th, 2018, 10:28 am

James Mallory and Harlen Irene

Unread post by Maruata jr » April 7th, 2021, 7:30 pm

James Mallory and Harlen Irene

Retold by - C.Laizawna
Retype by - Maruata jr

Season - 2

Chapter - 3


Recap :

Indona hian mihring nun a la nasa em em a. Indona avanga NUNNA chhanhim te hi an tam lo zet awm e.

*****************************

FATHER'S DAY
( Pa hun )

Captain Cox-a zing tho chu tukverhah chuan a dak vang vang a. A hmai a phih a, a insiam a. Tukverh a hawng a, lawngchawlhna lam pan chuan lawng te chu an lo kal vu vu mai tih a hmuh chuan rilru nuam lo takin a awm ta a, "Khawnge Irish-a inah ka va leng teh ang. A fanu nen kan inneihna tirang thuai turin ka va rawn teh ang. Philippine atangin French tlangval tam tak an lo hawng dawn si a, a thi kher awm si lova. A rawn tihbuai hmaiin nupuiah ka lo nei ang a, enge a rawn sawi taeh ang. A la rawn tihbuai fo chuan pa kan inbei tawh ang," a ti a. A nui sun sun a. A theih ang tawka nalhin a inchei a, a nalh ve fu a.

Capt Cox chuan Irish kawt chu a va thleng a. Kawtkaiah chuan Irene-i office tur chu a va hmu a, "Capt Cox, i va nalb em! Tuma tluk lohin ka awm ang ti niawm raka i inchei vak mai le. I nalh ngei mai," Irene chuan a ti a, a lo nui ver ver mai a.

"Mai mai thin a. Nang hi alawm nalh." A mit chu a siai vei suk a. Irene chuan hlim deuh hian, "Cox, lo va leng rawh. Kei zawng ka hman dawn lova pawi ka ti ngawt mai. Ka pa chu a awm kha," a ti a.

Capt Cox chuan, "Nang i awm lohin ka awm thei nang ! A nui huk a, "I awm loh chu vawiinah chuan ka duh zawj a ni." Nupui chei tawh fahran hian, "I va awm rei ang em, Irene?" a ti a, a luhsan ta a.

Irene chu Office lam pan chuan a kal ta a, 'Eng vang nge ka awm loh a that zawkna tur chu,' a ti rilru a. Chumi ni tak mai chu Mallory te Melbourne an lo luh ni tih hria sela chu Irene chu a va hlin dawn em ! Philippine atanga French sipaiho lo haw tur chu a hre na a, Mallory chu a lo hawng ngei dawn tih chu a hre si lova, a dam nge a thi tih pawh a hre si lova.

Capt Cox inchhunga a va luh chuan Irish chu a ding thuai a; mahse, a hmelah chuan hlimna a awm teh chiam lova. Thil hriat a nei tih pawh a hmelah chuan a hriat theih a ni. Eng thil nge ni ta ang le? Cox-a pawh chuan a ti rilru a.

Irish chuan, "Capt Cox, enge i duh le?" a ti a.
Ka duh te chu i hre reng lawm ni? Ka duh chu ka sawi dawn chuan a tam lutuk ang. Ka duh ber leh ka rawn kal chhan chu tlemtein i han titi dun teh ang hmiang."

"Ni e. Sawi tur a tam hlein ka ring. Englam thu nge nu ang le?"
Cox-a chu a ngawi vung vung a, Calendar a han en a, "Vawiin hi ni 18 a ni a. Kar leh ni 26 khuan Sydney-ah kan insawn dawn a. Chuvangin, hun ka nei tlem ta hle mai a. A rem chuan Irene nen innei tawh ila ka rawn ti deuh a ni. A...naktukah hian innei ila, Sydney kal pahin Balarat khuaah Honey Moon chu Irene nen chuan kan chen mau tur a nu ang,," a han ti ta phawng mai a.

Irish chuan chhan a han tum a; mahse, lehkha rawn thawn kha a hre reng a. A han ngaihtuah vang vang a, "Capt Cox, pawi ka ti ngawt mai. Min ngaidam ang che. Kan lo intiam tawh si a. In inbeih dawn avangin ngunhnam vai zir rawh. Ka duhsak zawk si che a. I hneh ngeiin ka ring a ni," a ti a.

Cox-a chu hawng tur chuan a ding a, "Thiam ila, thuam suh ila. Hneh ila, hneh suh ila. A! Mahse, ka hneh ang," a ti a. "Khawiah pawh ni chhuahna apiangah Isuan ro a rel dawn an tih ang bawkin, khawiah pawh Irene hu awm mah sela a pasal tur chu ka ni ngei ngei ang tih ka puang ngam e."

Irish chu a nui mai a, "Ka hneh ngei ngei ang i ti elaw? I hre chiang lo aniang," a ti a.
Cox chuan, "Ka hming George Cox a ni ang bawkin ka sawi lawk ngam a ni. Ka hneh nfei ngei ang," a ti leh a. A chhuahsan ta a.

Cox-a haw hnu lawk chuan Irene Office chu a lo hawng ta a. A pa chuan, "Naktuk i chanchin tur i hria em?" a ti a. "Ka pa, Cox-a kha kawngah ka tawk a. Min hrilh nual a, ka hre chiang lo," a ti a.

"A nih leh Irene, Mallory chu a lo hawng tawh em? John Calvin-a khan a lo hawng dawn e a ti a."

"Irish Hotel-ah Mallory leg Nick Farland an awn tih Brandy khan min hrilh a."
"A that chu. An lo hawng tawh a nih chu. Keiman ka hrilh ang, nanga hrilh a ngai lovang. Engpawhnisela, pasal nei tur i ni tih hria ang che. Tuk zawk nupui tur emaw chu i ni ngei ang le. Nula anga awm tum lo la a ni mai."

Irene chuan Mallory chu a hlauhpui ta em em mai a. Engpawhnisela, Cox-a han neih ai chuan Mallory tan kawng han hawnsak chu tha a tha zawk si a. Mahse, Mallory chuan Cox-a a hneh si loh chuan engtinnge ni ta ang le! A nutapa Calvin avanga chutiang lo awm a ni chauh leh nghal si a. Capt Cox leh Mallory chuan Irene chu an duh ve ve si a. Cox chuan Irene chu neih a tum si a, Irene erawh chuan Mallory a duh zawk ei a. Chu chu John Calvin an hriattir a. Calvin thu angin Cox leh Mallory chuan Irene chu an inchuh dawn ta a ni.

Irene rilru chu a buai em em mai a. A hmangaih ber Mallory tan chuan a NUNNA pawh a pe phal si a. A chak lo zawk a lo nih mai si chuan an inhmu leh ang a, an inbe leh ang tih tunge sawi thei? A rilru chuan Pathian hnenah Mallory a chak zawkna turin a dil a.

Victory rama Prime Minister Irish chuan a fanu Harlen Irene avangin Capt Cox leh Mallory an invai dawn tiin lehkha a thawn darh a. James Mallory chu an hrilh ve nghe nghe a. Australia rama mite phei chuan chutia Prime Minister meuhina chutiang thu a han puang ta mai chu mak an tiin hmuh an chak em em mai a ni. Tunhma pawhin Australia ramah chuan nula avanga insual an tam hle tawh a; mahse, mahni thua inbei an hlawm a. Mahse, Prime Minister emaw midang reng reng pawhin hetiang thil hi an la ti ngai lova. Chuvangin, mipui chuan Irish awmdan chu mak an ti em em mai le !

Hetih hunlai hian Melbourne khawpuiah kher lovah pawh, Australia ram hrang hrangah ngunhnam hi an uar em em a. Mi te insualna leh indona ber a ni thin. Ram dangah chuan hmanlai danah an lo hmang tawh a. Australia ramah chuan dan thar ang mai a la ni a.

Mallory chuan lehkha chu a han chhiar puat puat a, John Calvin-a thusawi kha hei ngei hi a lo nih hi a ti a. Melbourne a lo thlen hnuah Irene chu a la hmu lova, hmuh a nghakhlel viau si a. A tan a tuk ni chu thihna tur pawh lo ni se Irene-i hmel a han hmu leh tur chu vanneihthlak a ti hle a. Cox-a chu mi eng ang nge a nih pawh a ngaihtuah chuang lova. Irene hmel a han hmu leh tur chu a nghakhlel em em a. A pasal neih hma ngeia Irene-i a hmu leh tur hi Calvin tanpuina avanga a tan kawng tha a la awm hi vanneihna ropui tak a la ni thlawt mai a ni. Calvin thu ang ni lo sela chuan Irene chuan Cox-a chu neih duh lo mah sela a nei dawn tho si a. Mahse, Calvin-a khan Mallory chu a khawngaih leh a duhsak zawk avangin chutiang remruatna chu a lo siamsak ta a. Chu vanneihna chu hmu lo sela atan vana rah angin Irene-i chu a khawih phak tawh kher lovang.

Mallory nghahhleh ang ngei chuan a tukah chuan a lo thleng ta a. Mallory chuan chumi ni rawn chhuakah chuan vanduaina ni atan a rawn chhuahpui ta tlatin a hria a. A rilru zawng zawng, a taksa zawng zawng te chu a lo chau ta vek mau a. Irene chuan mumang rapthlak tak a nei a, Mallory chuan a hneh dawn lovin a hre tlat a, a lungngai hle mai a. Mallory chuan mipui hmaa insual chu a duhzawng a ni hauh lo mai a. Mahse, Irene tan leh ama tan mualpho a huam avangin a hnial duh lo a ni.

Melbourne khawpuia mi zawng zawng te chu White House lam panin ngunhnam vai en turin an lo kal tan ta sup sup mai le! Enna hmun chang lovang tih hlauin motor te, tawlailir te, lirthei chitin reng te hmangin Insualna lam pan chuan a hun hma daih tawh atangin chatlak lovin mipui chu an lo kal zut zut mai a. Ramdang ami te pawh lawng te, motor te, rel tein an lo thleng zung zung mai a. A hun hma atangin a hmun chu an luah khat vek mai si a. A entu mipui chu sang engemaw zat an ni a. Enna chang lo leh en tum te chu insul pel zut zut mai bawk a.

Biak inpui sana chuan tlailam dar 3 a han khawng ri ta bul bul mai a. Mallory pawh chu Irish Hotel atangin a lo chhuak ve nghal a. Hmanlai(Sword Shipman) ngunhnam vai mite inchei angin kawr banbul dumpawl phat mai hi a ha bawk a. A thianpa Nick Farland pawh chu a inchei ang chiah chuan a inchei ve zen mai a.

Khaia, ziah zawm leh ka tum a. Mahse, a lo tawp leh thut mai a lawm le...A van laklawh mai mai ve le, han inbei law law se tha tur hi nia...Mahse, a tawp laklawh bawk sia...


Tun tum chu ka tih loh dan ang deuh hlekin ti ang aw, Monday, Tuesday, Wednesday, Thursday leh Friday zan thleng hian up tum thin ila. A hmaa ka kalpui dan ang lo deuh hlekin Thursday leh Friday ka belh lawk a nih chu...Tha in tih chuan Fb Comment na lamah in lo sawi mai dawn nia.


Zanin atan chuan duhtawk leh phawt ang aw...


Wait for epi 4



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)