SECOND HAND HEART

[Muani_21]

Second Hand Heart
By : Muani

" I might think too much, drink too much stay out too late"

I know, I'm just a fool, but I swear I can change

I can't steal you the star, but I can try everyday,
Oh, you know you've got my second hand heart"

" All your friends think I'm hopeless they don't understand,
That this imperfect love can start over again
It's been broken apart will you still take my second hand heart?"


" Tukverh atanga ni zung rawn in kap lut in ka hmai a rawn chhun chuan ka meng siar siar. Ka mit ka chhing leh dawn chiah ka meng kawk mai. Lalpa vawihin hi Sunday emaw ka tia Sunday ni lo in Saturday chiah alawm ala nih le. Khum aṭang chuan ka tho a, ka bula tui em em a la mu ka thiannu chu ka en deuh vang vang. Mut hi chu a va duh ve chiang tak e aw. Thawh ka hai ni tal hi chuan lo tho ve thin nise hna tlai hlau reng reng hian kan insiam angai ṭhin lo ang maw le ti rilru neuh neuh chungin room atang chuan ka chhuaka ka hmai vel ka phih thuak thuaka room-ah bawk ka let leh.


" Mimi, tho tawh rawh lem hna kan tlai mai dawn" Ka thiannu chu ka sawi dat dat. A rawn rum ṭiah ṭiah mai.

" Imm... Dar engzat nge ni tawh? " Meng manglo chuan arawn ti a.

" Dar sarih a ri dawna lo tho tawh rawh, keiman rawng chu ka lo bawl mai ang. Lo insiam sa la" Ka ti sawk sawk. Rawngbawl turin choka lam ka pan leh nghal.
Chaw bel ka chhuanga alu kan tur chu ka chan malh malh bawk.Mimii pawh mut chhuah hmel fe in bathroom-ah a lut hna hna mai.

Ka hming chu Thlamuanpuii a ni a, kum 21-na ka hmang mek. Tunah hian Aizawl veng pakhatah ka ṭhiannu Hmangaihzuali(Mimi) tia ka koh nen in inluah ṭawmin dawr pakhatah kan thawk ve mek a ni. Thingtlanga piang leh seilian ka ni a. Ka ṭhiannu erawh anutei te nena Aizawla khawsa ho anni thung mahse anutei te hi an fel vak loh avangin ti hian kan intawn aṭang in kan inluah ṭawm ta a ni. Kan chhungkua hi panga niin nau mipa leh hmeichhia ka neia school an la kal ve ve thung. Ka pa hian sorkarah hna chhete ahmingin a thawk ve a, ka nu erawh in engmah a thawk lo. Chutiang bawkin kei pawh class-12 ka pass hnuah college kal zawm peih lo in ti hian hna ka thawk anih hi.

" Alu elo kan hmeh dawn? Ava tui dawn ve" Ka alu channa bula lo din pah chuan Mimii chuan a rawn ti a.

" Anih hi alu i heh sia ka tia" Nuih suk chung chuan ka ti a. Ei loh hmel fein a ner nawng nawng mai.

" Vela che a, nangpawn i duh ve tho" ati nui nui mai.

" Duh lo pawh ka tih si loh" Ka lo ti khauh.
Reilo teah chaw ei ka peih mai bawk,kan ei sawk sawk a kan ei na vel mimi'n a tih fel hlan in ka lo insiam ve thung.
.
"Bus chu ava lo thleng har e, e saw a rawn thleng dawn lawm " Mimii chu ka ena ka nuih ringawt. A phi cheng zel amak ania, kan mizia hi a in ang lo nasa mai sia maw!

Bus chu ala hma bawka a tawt lutuk lo, traffic erawh reilo tete a jam ve leh zeuh zeuh ṭhin. Bus stand-ah Bus ading fel chiah tihin Bus aṭang ka ṭum thla thauh Mimi chuan ' ati leh ta' a lo ti hlak thung. Hei hi nitin min hauh ve na ania, mahse ka ti ziah tho.

Kan dawr pana kan kal phei hlawk hlawk chu kan dawr thlen hmaa Coffee dawr kawtah chuan mi an lo pung khawm tuau tuau chu ni in. Eng chu thleng ni maw tiin lo pung khawm ho chu ka va nek deuh nawk nawk. Chutah an thil lo en chu ka va hmu ve ta mipa pa khat ruih hmel zet hi Coffee dawr hmaah chuan a lo thu bu lak laka, hmeichhe pakhatin pawh thawh tum in a banah a lo pawt ngat ngat chu ni in. Chu pa lah chu din tum hmel reng reng a pu lo, a en ngai a en tlawk tlawk ringawt. A hmel chu ka en chianga a pangngai hmel viau si, eng ti tiha sawtah sawn thu tlat nge anih reng reng ni.

" Mama, tho la, hei miin min enṭhup ania, a zahthlak emai" hmeichhia a mah pawh tawh tum tu chuan ati sa sa. Chu pa pawh chuan athu sawi chu a hre ve ni ta hmiang a hmai tuaipuatin a rawn hawi chhuak ve ta. Chutah thaw leh hawkin anmahni lo din hual vek tu te chu min han en kual thuak thuak a. Ka lo inthiamlo ringawt bawk. Mi rui in hruai haw tum ka lo en ve reng ringawt chu mawl ka in ti hnuhnawh viau mai. Ka la ding hma em em zui leh nghala. Chutah chu pa chuan kan dinna lam chu arawn en a, amah ka lo en ve lai tak a ni bawk si chu kan mit a intawng ta chat mai. Ka mit ka la sawn vat. Ka hawi kual ruai mai.

" Muanpui, kal teh ang kan tlai mai ang" Mimii chuan ka beng bulah a rawn tih sap chuan ka harh zawk. Awi kei hi hna kal tur asin ka nih. Engin nge min mawlh tehreng ni chu pa chu ka va en leh zawk min lo la en reng mai. Ka hawisawn leh vata Mimi banah chuan kaiin ka kal pui ta hlawk hlawk.

" Hei, dingteh ka ban kha ana ania aw" Mimii chuan ati hlar. Ka thlah ve mai bawk.

" Dawr kan thlen tawh hi, vak vak ache, kha tia mi hnuh vak vak a" A ban tuai nauh nauh pah chuan ati leh hlar. Ka hawi chhuak chu kan dawr hmaah kan lo ding reng chu ni in ka nui ta tawp.

Dawrah chuan lutin thil tih tur ang ang chu kan ti sawk sawk. Dawr hi a liana thawktu pawh mi panga lai kan awm a neitu u Melody-i nen paruk ang kan nih chu. A dawr neitu u melo-i hi a fel bawka customer pawh kan ngah thei khawp mai. A dawra thawkte pawh a chhungte ang mai in min ena anuam khawp mai. Hei kum 2 dawn ka thawk tawha sawiselna tur chhete pawh ka la hre miah lo.

" Tlai rengi te pahnih" Kan thawhpui Lucy-i chuan ngeiawm fe hian a rawn ti hlak. Ka lo melh hrawk thung.

" Lucy, an tlai reng bik lo" Opi kan thawhpui tho chuan a rawn ti vat. Lucy-i erawh a lo ner nang mai.

" Keipawh ka tlai ve ziah tawh dawn" Ati zui nang nang.

" I duh leh tlai ziah la a ni mai lawm" Ka lo ti ram hmak. Amah chauh hi ngeiawm thiam a ni hlei nem maw le a. Tun aṭang chuan a ngeiawm thiam poh leh a let in ka ngeiawm tawh dawn hi a ni tawp mai ni.Rawn thawk hnuhnung ber ve si hi a ngeiawm thiam em em ringawt mai.

" Engmaw i sawi" A rawn ti hlar mai.

" I duh leh tlai ziah la ka ti" Ka lo ti ve fak. Rum lutuka min melh pahin a kal sawn ta daih. Ka engahmah a thawk lo ve emai. U Melo-i pawh dar sawm velah a rawn thleng ve a kan buai nghal viau bawk. Chhunchaw ei hunah pawh kan la buai vet vet khawp mai dar hnih dawnah kan ei hman ve hram a ni. Ban dawnah pawh Lucy-i chu zinga ka chhan dan vang kha nge maw ni, midang a nuih ver ver laiin kei erawh min melh rang nasa thei khawp mai. Engah mah hian ka ti si lo a e, min melh rum peih chhung chu min lo melh rum vel mai mai teh se.
.
.

"Awi, ka chau lutuk ringawt, ka kham vek thei" Khuma mut pharh duai pah chuan mimii chuan a ti zuai raih. " I chau ve lo mi? " Eng mah ka sawi ve loh vang nge in kan thlen aṭang tawh khan chu zawhna chu min zawt sek leh nghal.

" Chauh te chu chau ve e, ka sawi avang khan ka hah adam phah dawn pawh ni lo" Ka lo tih chuan a mit a meng kual nasa e. Hetia a tih tawh chuan ka thusawi a ei lo tihna.

" I mitte kha an tlan bo ange kha tin roll vak vak suh" Ka lo tih leh phei chuan a rawn thu chhuak zawk. Ka lo phu dawrh nghe nghe.

" I ngeiawm ve anih chu, vawihina Lucy-i I chhan dante kha a ngeiawm si" Ati ve hmak.

" Chu kan tawhpui dangten chhangṭha mintih laiin ka thiannu berin ngeiawm min lo ti a nimaw? " Zawt deuh ti tih pah chuan ka chang a. An meng kual leh ralh phawta.

" Tha e, mahse tuna min chan dan kha ka ngei lawm" lungawi chiah lo, lungawi lo anga lan duh chuang si lo hmel hi a pu ber in ka hria.

" Lo nih tak chu a" Ka lo ti hmak.

" I ngeiawm emai a, vawihin hi ngati nge maw ni I ngeiawm em em ni" Tih leh mut a rual leh nghal. Ka chhang chhunzawm tawh bik chuang lo. A hnunglam chu en in ka nui ru var var mai.
.
.
.

" Muanpui, nang dawrah kal la" min nuih tlawn zeta mimii'n a rawn tih chuan chhaih thinrim ka chak leh deuh tlat mahse ka ti ta em lo.

" Enge ka lei ang? " Ka tih chuan ka duh duh lei tur in min ti ve mai bawk.

Khua lah chu a la dur em em zui, ruah sur hmain ka haw leh hman em ang chu maw.

" Kal vat vat rawh, hei ruah a sur dawn aniang khua adur si" Mimii pawh chuan a lo ti ve sawk sawk. Pawisa chu ka laa ka kal ve nghal mai bawk.
Kan kawmchhak dawr neite an lo la awm lo zui, kawngpui ka chhuah chhoh angai dawn nih hi ka va peih lo tak a. Khua lah chu a dur chak khawp leh nghala.

Dawrah chuan ka duh ka la sawk sawk ka chhuak leh nghal mai, thli a thaw vuk vuka khua a thim deuh titih ruah sur hmain ka thlen a ngai ti rilru chung chuan kawngpuiah chuan ka tlan ta chiam, ruah mal a rawn tla tan tawh bawk si kawl a phe zawr zawr bawk si ka hlau nasa mai. Kawlphe hi ka ngai na hlawl lo, khawpui ri nen hian a rap in ka rap kawlphe phei chu en pawh ka en ngam lo ka en chuan ṭek in min man dawn tlata hriatna ka nei thin. Kan in pen dawna step lo awm ka thleng ṭep tihah tu emaw hian min rawn su deuh chawrh keia lo tlan lai ni bawk si nen ka hunglamah ka thu sawp nuaih ka thil lei sa pawh ka thlauh daih. Ka innem khalhna ka kut chu a thip hlar mai ka en chiang chu a lo pilh chu ni in ka dinga ka in beng fai sawk sawk.Min rawn su tu ka hmu chiah chu ka phudawrh thei he pa chu nimina coffee dawr hmaa zurui kha anih hi.

" I ṭha em? " A rawn tih chuan ka lo en reng tih ka hre ve chiah.

" Ṭha e, ka ṭha" Ka lo ti sawk sawk. Thli lah chu a la na em em zui ka sam a chhem leng nasa mai. Chutah ruah mal chu a rawn tam tial tiala ruah a rawn baw ta hawk mai. Thil ka hre chhuak zawk khawnge ka thil lei kha, ka zawng kual ruaia ka hmu miah lo leh nghal. Ruah lah chu a sur tam nasa mai si. Khawnge le?


" I thil khai kha i zawng anih chuan kha lai kawrah khan a tla" Rawn ti hluk ri vang chuan ka thil zawn lai pawh ka tawp ve nghal hmak. A kal daih tawh ang chu tih naklaia ruah sur hnuaiah enge a lo din ve reng ni.
Kawr lam chu ka va ena eng mah ka hmu chuang lo tuihawk chuan a len daih anih ka ring.

" Nangmah vang vek" ka hmai ruahin a nanhuh vek tuaipuat pah chuan ka ti hliai.kawl lah chu a phe zuai zuai leh nghal.

" Ruah a sur nasat em hi tawm hulna tur zawng phawt teh ang" a lo ti daih thung.Ka melh hrep ringawt.

" I duh leh nangmah khan va tawm hul la anih chu" Tih leh kan in awmna lam panin ka kal nghal hlawk hlawk. Thui pawh ka la kal hman lo, ka darah min rawn kuai her sawk ka tlu leh lo chauh.

" Enge? " Ka lo ti hlar. A hmai huh chu tuaipuat in kan sira garage lo awmah chuan min nawr lut nawk nawk ringawt ka lo ṭang ṭung mai. Min nawr tu chu a palian bawka ka lo ṭan ve nate chu engahmah a ngailo tih hriat reng reng.

A cotton dum hak ipte chu adap nawk nawk a a purse chu rawn phawrh in za nga note hi a rawn phawrha ka hmaah a rawn lek va va.

" E nge hei hi?" Ka lo ti haw. Ka huh vek bawk si nen vawt ka ti tan viau mai.

" La rawh, I thil lei ka sut thlak sak vang che kha animai" arawn ti sup.

" Angai lo, ruah asur hi lei pawh a lei theih tawh chuang loh" Ka lo ti hmak. Dik tak chuan ka thil lei ho kha za nga man man pawh a ni lo hrim hrim.

" Kei in a ngai ka tia lawm" A lo ti hluk.

" Kei in a ngai lo ka tia lawm" Ka lo ti ve hlar. Kan in nawr tawn zak zak hnu chuan luhlul mintih hmel fe hian min en a a purse-ah a khung leh ta nge nge. Kan ngawi dun ta reng ringawt. Ruah lah chu ahma ai asur nasa zual sauh emaw tih tur a ni.

" Vawt iti anih kha, kha hei ha rawh" A jacket hak lai chu phelh in ka hmaah a rawn khai va va. Ka khur dar dar chu a hria a ni ngei ang. Ka in thup ve teh reng nen.

" Dik tak chuan ti e, mahse ka haw duh zawk kan in ahla tawh chuang lo a,chu loah ka huh vek tawh tho tho a" A jacket pawh lak tum lem chuang lo chuan ka lo ti a.

" Phal lo ta ila" A rawn ti zawi ruih.

" I thu lo ve emai a" Ka lo tih hlar chuan a rawn nui ri deuh hawk.

" Tihteh, engtinmah ka ti dawn lo che, ka zu in rim i hriat avangin min hlau anih kha" A rawn ti hluk.

" Awihawm loh anih chu ka hlau lo ve che emai" Ka lo ti vat thung. Mahse ka ti ve mai mai diktak chuan ka hlau ru ve deuh tun ang ruah sur bur bur hnuaiah mi vei vak an awm miah lohnaah leh nghal ka mi hriat ngai pawh ni lo,chutah zu rui nen leh nghal, mi garage-ah kan awm dun ania. Thlamuang taka awm chu har ve tak a ni.

" Nia, hmanni pawn min en reng tawh tak alawm" Ka mita min melh reng chung chuan ati sup.

Awi, lalpa he pa hian min hre lo emaw ka tia min lo hria anih hi, ava zahthlak tak a.

"Ih, ka tihpalh anih kha kha mi ni khan en che pawh ka tum em em a ni lo, mi kha an lo awm luih luih sia" Ka ti bah ta nuaih.

Ani erawh a ngawi ta reng ringawt. Keipawh ngawi rengin ka kut ka kuangkuaha ka ding ngawi ve reng ringawt. A khat tawka kawlphe leh khawpui ri chuan min ti phu deuh zawk zawk leh nghal.

" I kut pem kha enkawl tha ang che" Ka kut en reng chung chuan a rawn ti sup a. Ka kut pem chu hriat pawh ka lo hre chang tawh lo hrim hrim. " Ruah han deuh lai hian kal tawh rawh, keipawh ka kal dawn" a jacket a phelh kha a ha ṭha sawt sawt a min rawn en lek zawk in a kal nghal vut.Keipawh reilo te hnuah ka kal ve nghal mai bawk.

" Engati nge a? " Inchhung ka luh rual rualin mimii chuan a rawn ti chul.

" Ka tawlhthlu maw le, towel min lo lak aw" Tih leh bathroom-ah luh ka rual nghal. Ka inbual nghal sawk sawk. Kha pa kha a pangngai hmel teh lul nen nge maw aruih reng ni. Mi hausa fapa duat sual anih ka ring a hmel en kha chuan kei ai kum li vel dawn in a upat ka ring bawk. A hmel kha chu a chhe mawlh lo maw le amah vang khan hmeichhia tu tu emaw chu an buai ve fo dawn anih kha.

" Kha hei towel chu" Bathroom pawn atang chuan mimii chuan a rawn ti lang lang. Kawngka chu hawngin ka lo ban ve vat bawk. Bualin atang chuan chhuakin pindanah ka lut tlang nghal. Rei vak lo hnuah mimii pawh tui leh damdawi rawn keng in a rawn lut ve nghal mai bawk.

" Kha hei eirawh" Tih leh a damdawi ken chu min pek a ruala ka ban ve mai bawk.

" I kut kha a na em? " Ka kut kawh zauh pah chuan arawn ti leh sap.

" Hei maw, na lo nasa, rawng i bawl thei tihna ania, na lo mah se a na ka ti dawn" Fiamthu deuh hian ka lo ti a. Ani pawh a nui ve var var mai. A rilru hi a no lutuk a ka tawlhthluk hi a thiam lohah zu ngai deuh tlat a.
.
.
.
.

Ka kut pilh pawh a hil deuh duak tawh, a dam tawh dawn vang nge a thak thei em em leh nghala. A mar deuh tang bawk nen a thak nasa thei lutuk hi a ninawm lek lek thin.

Dawrah pawh dan ngai te te in kan buai leh map map tawh khawp mai. Kum tawp ni vat vat se ka haw chak tawh, nikum ka haw bawk si lo, kum laihawla chawlh a chho ting tang ang kha a peihawm bawk si lo, August thla chauh la ni mah se ka phur tawh khawp mai.

" Zomuansang leh enge i rawn tih dawn? " U Melo-i ṭawng ring zet vang chuan ka thil tih lai dahin counter lam chu ka va en a. Min hnungchhawn zawnga mipa ding chu U Melo-i chuan a lo beng thak thak.

" Engmaw i rawn tih dawn a? " A tih leh chuan chu pa chuan " Ka lo kal mai mai anih hi" A lo ti sam et.

A aw chu ka hriat hnu a ang pian leh nghal a. Ka va en ṭha leh ngat a tukkhum sam chu a kawng deuh mat a, a chhip lam erawh a buk deuh laih thung, leather jacket a haa, cotton kekawr dum da lam pang a ha leh tawp bawk, a pheikhawk erawh ka hmu chiang thei lo. Chu pa chu a rawn hawi thut ka lo en reng lai anih avangin ka hawisawn hman bik lo min rawn hmuh chuan a nui ta suk. Kei erawh mak ka tih vang nge amah chu ka en reng ringawt. Chutah ka lam a rawn pan ta mai.

" Hey nau, I tha maw? I kut kha enge a an?" Ka bul a rawn thlen rual chuan a rawn ti sup.

" Keimah maw? " Ka lo ti let hu. Ka ât hmel ngawt ang chu .

" Aw, nangmah kha" Then sak pah chuan ati leh sup.

" Er... Hei a ṭha tawh lutuk a dam ṭep tawh" Ka lo ti nawi niai, min koh dan vang khan ka lo lai em em ringawt.

" Khawmaw ka lo en chhin" tihpah chuan ka kut ka hmalama ka dah chu a rawn ban vut. " A dam tawh dawn anih hi" tihpah chuan min rawn en in a nui leh suk.

" Zothansang, Muanpuii hi engtin nge i hriat a? " U Melo-i kan lama rawn phei pah chuan a rawn ti lang lang. Chu pa lah chuan ka kut ala vuan run bawk si, ka la let tur chu alo la hum nghet em em zui a. U Melo-i chuan a rawn hmu nghal chat reng bawk. Keini pahnih chu maktih hmel fe hian min en tawn ta zak zak mai. Kan hmela lah hian a la man nghet nasa mai si.

" Enge awmzia? Nangni pahnih hi in i hre ngai em ni? " U Melo-i bawk chuan ati leh a.

" Aih"
" Aw" Zothansanga atih pa nen chuan kan ti rual deuh ṭhawt mai. U melo- i erawh in mak a tih hmel zual sauh.

" Muanpui, 'aih 'iti bawk sia ani hian ' aw' ati bawk sia enge awmzia? " Min en ralh pah chuan ati a. Ka lo thawhap thung.

" A awmzia chu eng lo ania, eng lo hmanniah min su palh a, kan inhre hran lo ka tihna zawk" Ka lo ti bah deuh nuaih. U Melo-i chu a nui ta hak hak.

" Zomuansang leh " tihpah chuan a darah a benga anui ta vak vak mai. " Muanpui, hepa nen hian thil sawi dun tur kan nei in ka hria, dawr hi ka chhuah san lawk dawn nia aw, nang kha min rawn zui rawh" tih leh Zomuansanga banah chuan a vuan chat.

" Min thlah teh, a ho emai a" Zomuansanga chuan a lo ti hluk thung. Ka ban a vawn na chu a thlah ve ta hram bawk.

" Min zui dawn lo a" Mitko san zauh pah chuan u Melo-i chuan ati hmak.

" Dawn lo, ka kal tawh dawn, anih aw nau" Min rawn en leh zauh pah chuan ati a akal nghal nal nal. Hawi pawh a rawn hawi let chhin eih lo.

" Kan Zomuansanga mai mai chu aw" U melo- i chuan ati zui nang nang. Chutah ka lam rawn hawiin min en deuh vang vang a, min en dan chuan min ti hlau deuh reuh e a, kha pa kha abialpa a mawn le?

" I hmel kha, min van hlauh hmel em em, I ngaihtuahna kha ka hre hrim hrim, ka bialpa emaw iti, a ni lo ania, ka senior ṭhin ania" U melo- i chuan min nuih rah rah pah chuan a ti zang vah. Ka thawveng huai mai. A bialpa alo nia nga min hauh hrep ka lo hlau lutuk a, chu mai ni lo hna atang min ban ka ring zawk hial maw le.

" Nia, diktak chuan anih ka ring a" Ka lo ti ve mai bawk.

Chutah a chet ta tlat tlat mai, " Awi, ani khan maw min duh lo nasa" Nui har har pah chuan ati a. Chutah ka beng bulah rawn kun hniam in " Ka bam nasat theih zia chu a, thuruk anih chu aw" la nuih har har pah chuan arawn ti a. Ka lo phu zawk thung. U Melo-i hi nula hmechhia a ni miah lo mizo nulaah chuan a chhelo pawl aniang mahse, kha pa khan eng tin nge a duh loh theih, a hmelthat mai piah lamah a nungchang a mawi bawk si. A â a ni hrim hrim hetiang khawpa nula fel duh lo tu chu. Ani pawh kha eng vak a ni bik der si lo a.

" Titeh u dawr hi khar ang u, vawihin chu customer kan nei ṭha lo emai" U Melo-i chuan a ti zui lang lang. Kan che zui sang sang a, rei vak loah kan inkhar zui ve mai bawk.

Chaw kan ei lai chuan ka phone charge lai chu a ri ral ral a, ka kham tawh dawn tho avangin ka va la a, sil hmunah kal in ka kut ka va sil leh te te phawt. Min rawn call tu ka en chuan ka nu a lo ni. Ka dam ṭhat leh ṭhat loh min rawn zawt luam a. Ka dam ṭhat thu ka sawi chuan eng engemaw sawi in a rawn titi chiam. Rei tawk fang kan inbiak hnuah phone chu a ti tawp ve hram.

" I nu animaw, sawi tur hi a hre thei bik e" Mimii chuan thleng sil pah chuan a rawn ti a.

" Imm... Anih kha athusawi a ho rap, Mama chanchin a rawn sawi a, a bial nu nen an inti thiam lo ti tau kual vel ka nu bulah an lo insawi khalh ve ve ni awm tak a ni' ka tih chuan kan nui dun ta vak vak.

" E, vawihin ami, u melo-i ṭhianpa kha hmanni a Coffee dawra lo rui deuh kha a ni lo mi? " Mimii bawk chuan arawn ti a. Ka lo ip chawih thung.

" Imm.. Anih kha, a chhe lo tiraw" nui hak pah chuan ka lo ti a.

" Nia, mahse, Lucyi'n a lo hre chiang leh pek khawpa, unaua khawsa an nia, amah kha Lawyer ania, ahna athiam thei lutuk zu a in hma chuan te atih leh tawh kha" Mimii chuan a thleng sil ho rem fel mawlh mawlh pah chuan ati a.

" He nu ve lah hi a,a hmel that teh reng nen a nungchang hian a ti chhia" Ka lo tih san hmak. Min rawn en in a nui tawp.
.
.
.

" Mimi, i hman em?" Pawn atang ka thiannu chu ka au ka lang lang. Lo va chhuak la ka rawn chhuak ve nghal a nimai a ti ve hi minutes sawm panga lai inchhungah a awm leh tawh. Kan hahthlak ania.

" Hei, khatin au vak vak zel suh i aw rawl lah hi a ring ropui si, kal rawh kal ang" Kawngkaa rawn chhuah pah chuan arawn ti nang nang.

" I muang em anih kha, rawn au leh lo phei che ila chuan ila rawn chhuak tawp nang" Ka lo ti hlar. Kawngka chu kalh in kan kal zui nghal.


" Iau, hei enteh mah u, hemite pahnih hi an rawn thleng hma ve rap" dawr kan thleng chiah chu Lucy-i bawk chuan a ze ngeiawm a lo chhuah leh tawh.

" Nia, kan lo thleng anih hi chibai min buk i tum ami? " Ka lo ti ve sak.

" Nang kha khawiah chibai ka buk lul lo ang che" Min hmuhsit hmel fe hian min en kual vel a.

" E, ava lawmawm dawn ve, keipawn i chibai buk nih kha ka lo hlau lutuk a. Ka hlauh ang thil a thlen tak si lohah chuan hei helai hnawk hi kan ti fai a nge aw" Ka sira pheikhawk remfel ngai chu ka kawk pah zauh.

" Mawl lutuk, thingtlang nula tih takah" Tih leh ka piaha ṭhutna awmah chuan a ṭhu thla hmak.

" Thingtlang te chu boruak a thianga anuam asin" A huatthei dan tur ang ber chuan ka aw chu kan thluk vela, a thawk tha ngang mai a ner nawng nawng mai lawm.

" Nangni pahnih kha in ho emaia inhnial reng suh u" Opi chuan keini pahnih in khak fak fak reng chu min rawn hau a. Ka lo ngawi reng thung.

" Kha nu kha hrilh rawh, kei ni lo in" Lucy-i chuan ati hlar.

" U melo-i hriatah phei chuan in inhial vel reu reu ange, kha tiang kha a duh miah lo ania, Lucy, nangpawh i senior te zahna chang hre ve rawh mi hi meinei tak tak in an tawngkhum reng ngai lo" Opi chuan ati leh a, Lucy-i pawh a ṭhu ngawi ta reng.

" Mami, naupang kum 3 mi vel bun tur pheikhawk in kawl mial em aw" An rawn tih takah chuan kan kal darh ta sang sang.

" Nei e, lo kal rawh helamah hian i duh zawng rawn en la, kan thlen thar lai tak ania" Opi chuan a lo ti zung zung. Ani hi chu khawi hmunah pawh awm se a ngaihtuahawm loh ang tih tur khawp a rilru puitling a ni.

Min dawrtu te an chhuak fel deuh chiah u melo-i pawh a rawn thleng ve nghal.Dawr Chabi hi Opi a kal hma thin avangin amah hian a kawla dawr pawh a hawng mai zel tuman kan tihpui ngai lem lo. A vui ngai chuang lem lo bawk. Heite hlei hlei hi a felna ka ti lo thei lo, keini chu ni ila kan phun peih ngawt ang.

" In lo inhralh ṭan nghal der a, nuam awm vel" A rawn ti lut lang lang.

" I awm loh hian kan inhralh ṭha thei riau" Ahmai chuan a lo ti fiamthu hlut.

" Mimi, ania mi ka awm loh hian in inhralh tha zawk ami? Anih chuan ka senior ve tawh mai dawn sia bialpa pawh ka la nei si lo a, pasal tur zawnna hun remchangah ka hmang mai dawn sin" A tih leh chuan kan nui ta dar dar.

" Awi, u melo-i i chhelo emai, bialpa te zawng i hmu dawn lutuk" Lucy-i chuan arawn ti no hliai.

" Hahah Lucy-i chu a, iti lawmawm mang e. Mahse kan hmu zo lo aniang hei kum sawmthum kan hnaih mai dawn" U melo-i bawk chuan a tia. Athusawi chu angaihtuah chianga amah ber ber chuan a lawm emaw tih mai tur counter dawhkan bawh meuh in a nui uar uar mai.

U Melo-i a lo thlen ve hi chuan kan dawr hi a nuam ṭhin ania, a neitu ber e ti lo hian a uang ber berah hian a ṭang thei ziaha fiamthu te hi a duh mai piah lamah a mah hian fiam a dawl em em a, a inla milian lo lutuk te hian a bula awm ati hamdam ṭhin. Anu leh Pa pawh hian tiang ang fanu fel an nei hi chu an inchhuang ve thei ngawt ang.

Awi, Lalpa kei hi counter-ah thil lam ka ngai kan haw hunah chuan an lo inkhar hman dawn bawk si, zingah kal pahin lam dawn ila a buaithlak bawk si." Mimi, ka thil lam tur kha ka theihnghilh daih a lawm, an thleng tawh hrim hrim ang" Ka ti sa sa.

" Eng chu? " A lo ti haw hahthlak hian.

" Aw, i va mak tak, chawhmeh tur " Ka lo ti hlar.

" Ehh, u melo-i saw va dilla, kan pahnih kher pawn angai nang"

" Ngai lo e, chu loah phal pawh nise kan pahniha haw daih kha azia lo emai a" tihpah chuan counter lam chu ka pan a.

" U melo" Ka tih chuan a phone khawilai dah in min rawn en vat.

" Aw, muanpui eng ni ta ? "

" Counter-ah thil lam ka ngai leh tawha" Inthlahrung tak chuan ka ti a.

" Aw, ka hrethiam mai e, khatin inthlahrun hmel fe hian min be bik ziah suh, midang te pawn min ṭhian kawm bawrh bawrh lai hian enge khatia mi mi khual biak bik ziaha" A lo ti duah. Ka lo nui tawi tak thung. Chutia ka mikhual biak bik na pawh ka hre lo e a, mi thil ka dil dawn hian ka nih dan a ni ve hrim hrim hei chu. Ka inthlahrung tlat zel.

" Hei dar hnih ari tawh a lawm, lo let leh kher pawh a tul lo aw, i ban hma ni a ni mai, va kal rawh" Atih chhunzawm zat.

" Aw le, ka lawm e" Counter sira ka bag ka khai chu la in ka kal nghal.


Zarkawtah bus chang turin ka phei hnak hnak. Vawihin chu ni a sa phian leh nghal. Kar tawpah ruah a sur leh nghek dawn chiang lutuk.

" Ka pu, ka coffee zawng zawng i tih buak vek hi, tlangval apumpa ve si ti khan khaw en lai lai ten zu rim I nam leh nghal emaw ni, i inthuam smart teh lul nen, fimkhur ve tur che lawm" Mc parking lot luh dawna kawt zau laiah chuan hmeichhe tleirawl nasat hmel fe hian a ai lian daih mipa chu a lo an khum hlak hlak. Ka kalna lam tur anih avang in ka pan hnai zela an bul ka thleng phei ṭep tihah chu nu bawk chu a ang chhunzawm leh nghal hlawih hlawih. Ka lo zak ang reng zawk keimah hi.

" I va nasa reuh e" Chu pa chuan ati hluk. Chu aw chu ka hre chiang mai.

" Hei, nang hi hetah eng buaina nge i siam leh tawh a" Chumite bul ka thlen rual chuan ka va ti thawr. Anni pahnih chuan min rawn en rual ṭhawt mai.

" Awi, ṭhiannu hepa hi i hre ngai ami, a chhiat loh teh reng nen a mawl reuh ania" Hmeichhia zawk chuan a lo ti hmanhmawh. Ala naupan hmel tehlul nen a ṭawngkam a duhtui lo ang reng viau leh nghal a.

" Aw " Ka lo tih chuan a sam chhawlleng ho a benga zeh that pah chuan a thaw hawk mai.

" A lawmawm nasat chu, hruai haw nal nal rawh, ka coffee min tih buak sak vek, en ta che ka kawr a huh vek hi. " A kawrhma kawh zauh pah chuan a meng kual ralh.

" A tihpalh aniang" Ka ti hman dek dek chauh tihah.

" A tihpalh emaw palh loh pawh ni se, fimkhur ve tur alawm" A lo ti hlar.

Zomuansanga lam chu ka hawi a" Engtin nge i tih buak sak reng renga a coffee chu?" Ka tih chuan min en vung vung ringawt.

" Hey" Ka tih leh chuan a purse rawn phawrh in za nga note pahnih chu chu nu kutah chuan a hmehbel chawt chawt a engmah sawi lo in ka banah a kai lawka min kal pui daih anih chu.

" Hei, dingteh min thlah rawh, i mawl ami" Ka ti lo hlak. Kawngkal an awm ve reng vangin ka ṭawngri chu miin an hriat ka hlau ve tho si. Kan piah deuha car lo inhungah chuan min nawr lut nawk nawka a rawn ṭhu lut ve nghal vat bawk. Engmah ala sawi chuang lo car chu ti nungin a tlan chhuak nghal.

" Hey, khanu kha ngaihdam te dil ve ta che, a kawr i tih huh vek kha, a kawr lahkha ala var zuia a uk vek dawn anih kha" Ka lo la ti ṭalh. Ani erawh ala ngawi reng thung.

" I tawngthei lo ami" a lama inher pah chuan ka va ti leh a. A la ngawi reng tho.

Ngawi reng ta na na na chu ka va be tawh awm bik hlei lo e aw ti rilru chungchuan ka ṭhu ṭha a ka ngawi ta reng. Mahse ni lo hepa hian khawnge min hruai a tum ve ngawt a.

" Hey, khawnge min hruai dawn? " Ka au ring ngang mai.

" Hey, i ṭawngthei lo ami? Khawnge min hruai i tum ve ngawt a, i carah te min chuan tir ve ngawt" Ka ti vin ta hlur. A rawn nui chhuak ta hawk hawk mai. Ka lo melh rum nasa ngang thung.

" Nuihna tur ka sawi lo, chanmari bus stand-ah khan min chhuk tir ang che" Melh rawm rawm pah chuan ka ti hlar.


" Khawnge i kal dawn ka drop ang che" A rawn ti daih anih chu. Ka lo chhang duh bik der lo ka ngei tlat. Ka biak lai zawnga min chhang duh der lo.

" I sawi duh loh chuan ka office-ah ka hruai ve mai dawn che sin" Nuih za aw lek lek a a rawn tih leh chuan ka melh nghek ri ngawt. Ani erawh in kawngpui lam a en ngur thung.

" Ramhlunah ka kal dawn, zangena petrol pum bulah khan" lungawi zan lo chuan ka lo ti hmak. Ka awmdan chu ka ngaihtuah chianga ka mawl ka inti hnuhnawh viau thung. Ka hmel hriat ṭha pawh a ni tawp si lo. Min chhan ṭhat loh vang khan ka lo thinrim ve ringawt anih chu. Engemaw a buainaah te khan ka lo va inrawlh thawt thawt ni a ka mawl vang vek.

" Enge i tih dawn?" A lo ti sup.

" Thil ka lam dawn" Kan inchhang tawi tha tek tawk viau mai. Kan ngawi ta reng tumah mah kan tawng tawh lo. Chutia a ngawih tak rengah chuan nuam lo ka ti ru viau bawk boruak chu a ni deuh churh mai in ka hria. He pa hi ami uap ana lutuk mah mah. Thil hriat chhuah ka nei he pa hi zu in chung hian hnaah a kal tihna emaw ni le.

" Enteh.. " Ka ti hman dek dek.

" Enteh ka ni lo, hming ka nei" A lo ti hluk anih chu. Ka zak lutuk chuan ka kuttin ka sik neuh neuh ringawt.

" Zomuansanga ka nia" Dam deuh zawk chuan a rawn ti sup.

" kei chu thla" ka hria lawm a rawn ti sup.
Eng tin nge he pa hian ka hming te a lo hriat ve ngawt. Tak a u meloi'n a awm lai in min ko tawh tak,kha ta ṭang khan a niang.

" Ih" Ka ko hreh deuh chuan kan ngawi leh dat phawt a min rawn en zawk hmalam a en leh nghal vat thung " Zomuansang" Ka ti hlawl. Koh dan tur ka hre lo lawm le a. Kei ai a upa tih hre tho mah ila an koh ṭhin dan ka hre bawk si lo. U melo-i kha chuan a hming pumin a ko mai bawk sia. U deuh ṭut kha chu ka duh bik bawk si lo a.

" Sawi la" Ka ngawih tak reng vang chuan a rawn ti sup. Ka koh dan vang khan a thinrim lo chu a ni phawt a.

"Enteh ka lo sawi ve tur a awm lo tih chu ka hre tho a, mahse zu rim nam chung khan office-ah i kal tihna ami? " Inthlahrung deuh chuan ka zawt a" Ka tih chhan chu a mawi lo a, ih midang ten an lo ning thei che a, mahse i thu ania ka sawi mai mai anih kha" Ka ti leh nghal vat. Ka ka zet hi chu(h) Mimii'n i frank thei lutuk hi a tha lo mintih kha ka hre chhuak zawk mai.

" A nih nangin min ning ve em? Min hmuh apiang hian zu rim i hre ziah sia" A rawn tih chuan ka chhan dan tur ka ngaihtuah nghal char char.

" Aih ning lo, ka tihawmzia chu, ning tur khawp che in kan inhre chiang hlei nem, ka sawi ve mai maiah ngai rawh, ka lei hi lawm a sawi loh tur tur hi a lo sawi ṭhin a" Ka lo ti sawk sawk.

" Anih nghei tur in min duh em? " A rawn tih chuan ka lo nui hak.

" E.. Ka thu chu nise duh teh reng e, tumah hi zu in tur in ka duh lo reng reng mahse, an nun a nia ka va sawi ve vak khan awmzia a awmlo a lawm"

" Sawlai saw em ni i kalna tur chu? " Kawng sir deuha a car din tir paha atih chuan kan thleng tawh tih ka hre ve chiah.

" Aw, ka lawm e" Tih leh chhuah tuma car kawngkhar ka hawng tur chu ka darah min rawn chelh vat.

" Enge a? " Ka dar a vawnna en zauh pah chuan ka ti a.

" I thiltih tur chu va ti la, dawrah ka thlah leh dawn che nia" Ka dar a vawnna kut lakthlak pah chuan ati sup.

" Aih angai lo, dawrah ka let tawh dawn hlei nem, u meloi'n let angai tawh lo atia" Ka lo ti sap.

" Anih chuan in inthleng ka thlah thei che tihna anih chu" Mit ko tisang zauh chung chuan ati a a car seat hnungah a lu a nghat zui zat bawk.

Hnial ka tum viau nanga chaw hmeh an rawn thawn tam viau chuan a rit dawn a Bus a chuan pui ai chuan a nuam zawk dawn bawk nen ka aw ve ta hram. Ka rin ang tak taking chaw hmeh chu an rawn thawn tam phian sathaip a khat tep a lawm le a, mai a tel bawk nen a rit vei phian leh nghal a. Zomuansanga car dinna lam pan chuan zo leh zo lo in ka chawi hnak hnak.

" Kha tiangte chu arit min lo pui rawh ti ve mai ta che" Tihri ka hriat rualin ka thil chawi lai chu a kang lawp a car lam panin a kalpui nghal nal nal. A lian bawk a rit pawh a tih hmel ve vak loh saw. Nui var var in a hnungah ka zui ve dat dat.

" Lut rawh, a hnungah kan dah mai dawn nia" A bul ka thlen rual chuana lo ti hluk. Hlekhluk zela a ṭawng dan teh thut zel hi nelawm loh ve sia maw. Ngawi rengin car-ah chuan ka ṭhu lut a, ani pawh a rawn ṭhulut ve nghal mai bawk. Eng mah sawi tawh lo in car chu a tinunga a tlan chhuak zui nghal.

Kan inpeng chhukna tura step zawnah tak chuan car chu ati thi duk. Ngawi rengin a chhuka ngawi reng bawkin ka thil chu a rawn khai chhuak leh.

" Khawi keiman ka lo khai thla tawh mai ang" A thil khai lai lo ban vat pah chuan ka lo ti a. Eng tin mah min chhang chuang lo chuan stepah chuan a thil khai nen chuan a chhuk thla zui pawk pawk. A awmdan chu a thin ka tirim emaw ka inti hial. Zui ve mai lo chuan a chhuk thlak na lam chu ka en reng ringawt.

" Tahkhan i ding char char dawn ami? " Rawn hawi let pah chuan arawn ti hlur . " Aih" Tih pah chuan step-ah chuan ka pen thla ve nghal zawt zawt.

" Hey, i thin ka tirim ami? " Inchhung kan luh hnu chuan tim deuh tak hian ka zawt a.

" Ka thin tihrim na tur i nei em ni? " A thil khai lai dawhkan chunga dah pah chuan ati a.

" Khawnge i chhung te? " Kan inchhung ruak deuh chu mak ati deuh aniang.

" Hetah an awm ve hlei nem, hei chu ka thiannu nena kan in luah ania, ka chhungte chu thingtlangah an awm a lawm".

" Oh, ven deuh i ngai dawn anih chu" A rawn tih chuan ka lo nui hak hak. Mit ti zim sun in min en thung. A hmel awm dante hlei hlei sawn ka nuih ati za ven rual pawh ka ni tawh lo hrim hrim a.

" Lo thu la, thingpui ka lo lum ang che" La nui reng chung chuan ka ti ta daih.

" Aih, office-ah let leh lawk ka ngai a, a ngai lo" A bana a sana dum bun lawk zet en zauh pah chuan ati sup.

" Awi ni dawn tak min thlahduh kher anih kha, ava zia lo tak" Inthlah tir ka lo remti ta kher kher kha ka inchhir ta viau mai.

" Pawi itih chuan ka thlah manah che i no minpe thei tihna anih chu" A lo ti sam et. Ka in thiam lo bawk si nen ka lo aw ve mai bawk.

" ka lo bia ang che" a ti sup,ka lo bu ve nghat ringawt. Ka no ka pek hnuah rei pawh awm lo in a kal zui ve nghal mai bawk.

A kal liam hnu chuan roomah lutin ka thawmhnaw hak ka thlak sawk sawk a, ka nu te chawhmeh min rawn thawn ho chu phawrh in ka thliar hrang leh vek bawk. Ka phone-a sana ka en chuan dar li a ri thuak tawh rawngbawl a hun ve tawh tho mai tiin chawh chhum tur ka siam a, ka chhuang zui nghal. Chawbel vil pahin mai an bai tur ka hik pah mawlh mawlh bawk.

Mahni chauh in ka awm bawka ngaihtuahna a vak kual ruai mai. Eng eng emaw ka ngaihtuaha chutah Zomuansanga ka hmuh ṭantirh lai vel ka ngaihtuah kai a, mahni in ka nui vur vur mai. Min hmutu awm phei se chu mi â emaw minti hrim hrim. Ka ngaihtuaha kan inhmuh apiang hian a sawi ang tak tak a zu in rim kha ka hre ve ziah zu a duh viau anih ka ring. Mahse amah kha chu a sual hran pawh in ka hre lo, a palian in a chheloa, a tawngtam lo bawk, vawihina a inthuam dan phei kha chu khua lum viau mahse a inhmeh hle anih kha. A kamish var hak a bana athlep cho te a kawrkilh tlema a phelh thawl deuh te khan ati lang sexy hliah hliah. Cooker rawn phit thut ri vang chuan ka phu dawrha ka thutna atang ka maian hik laklawh lai nen chuan ka ding chhuak zawk mai. Engthil nge ka lo ngaihtuah teh hrep kha 'Lalpa kei hian kha pa kha ka duh amia ni lo,ni lo, ka ngaihtuah satliah ve mai mai lawm' ka ṭhut naa ṭhut thlak leh pah chuan keimah leh keimah chu ka in be mawlh mawlh ringawt.


Zanah chuan ka phone chu ka en leh zauh zauh thin, Zomuansanga khan ' ka rawn bia ang che' a tih avang khan min rawn biak ka rin vang ani. Message emaw call emaw tala min lo biak ka rin vangin ka phone chu ka kalna apiangah ka keng kual ve zel. A chhan chu ka zun lawk hlan ten min rawn call ka rin vang a ni ber. Mahse dar sawm pakhat dawnah pawh min la rawn be chuang lo reng reng. Ka phone chu en in ka thaw leh hawk thin.

" Mi phone call chan i nei ami? " Mimii chuan a rawn ti ta nge nge.

" Aw, aih... Ka tihna tu nge min lo phone se i tih reng reng a" Ka lo ti bah nuaih.

" Phone call chang i ang em alawm, ni dangah i phone i khawih mang ngai si lo a, chu loah dar sawmah i mu tlangpui bawk sia, i phone kengin ila meng reng bawk si, i zun naah thleng thleng i keng kual sek leh nghal" A rawn tih leh chuan " Ateuh lo emai a, tu phone call mah chan tur ka nei lo ve chiang e, nang anga bialpa nei ka nih loh hi" thawven hmel zet chuan ka lo ti a. Diktak chuan engmah hre ve lo se a ṭha zawk. Kha tiang zu in mi kha chu ani hian min duhpui dawn lo lutuk tih hi beng ka nei tih ka chian tluk zetin ka chiang. Chuvang chuan engmah ka hrilh duh lo.

" Anih chuan mu tawh ang, bialpa neih hi insawitheihna tur chi pawh a ni lo e a, an fel vak loh phei chuan rilru ahah duh mai mai" min rawn kuah sat sat pah chuan ati a. A maimitchhing zui nghal daih. Keipawh ka phone chu ka melh leh zauha light off-na chu hmetin ka mu zui ve nghal.

.
.
.

Kar hnih lai aliam leh tawh Zomuansanga ka hmu tawh ngai lo reng reng. Min rawn biak mial takin tiin ka phone ka check ziah zela mahse, beiseina beidawn thlak mai mai a ni. Check pawh ka check peih tawh lo zawk U melo-i lah in hmannia dawra a lo kal bak kha achanchin engmah a sawi tawh ngai bawk si lo. Atirah kha chuan min zawt zui lo kha ka lawm teh reng nen tunah tak hi chuan a chanchin eng emaw tal rawn sawi se ka ti hluah hluah. A ṭhutna counter lam ka va en chuan Phone in tu emaw a a biaa ahlim hmel hle leh nghal a. A hmel saw a hlim sa reng tho nang in ami biak vang saw nge a eng phet phet ni mai hian ka hria. Kei ve hi nitin ka nguai tulh tulh thung Mimii pawn eng mah sawi lo mahse ka awm dan mak ati tih ka hre reng tho. Keipawh hian mak ka intive tho eng tin nge ka mihriat chian pawh ni lo, vawitam ka hmuh pawh ni miah si loh kha ka duh daih theih le, mak ka ti ka ngaihtuah ngun poh leh mak ka ti ṭhin. Ti ringawt hi chuan ka awmthei lo ang tiin nitin ka infuih ve ṭhin mahse, ka hriat loh hlan hian ka lo ngaihtuah leh ṭhin. Dawra kan buai viau lai tih loh hi chuan ka ngaihtuahna pumpui hi a luah ti ila a dik ang.

" Muanpui, u melo-i sawn a ko char char che ania" Lucy-i chuan ka dara min sawi dat dat pah hian a rawn ti a. Ka lo phu zawk mai.

" Maw? Tu'n maw? " Lucy-i en pah chuan ka ti deuh haw.

" U melodyi'n a au che, counter-ah sawn rawn phei lawk rawh ati" A tih leh chuan u melo-i lam chu ka va en a mi a lo be tawh lo. Mahse a phone erawh ala khawih reng tho.

" Midang ho an lo la let lo ami? " Ka tih chuan " Aw let lo" A lo ti tha ve mai. He nu hi enge ahriat a min van chhang tha thei em em.

" Lucy, i va mak" Ka ti deuh phawng.

" Enge ka mak vakna, ṭha deuha ka chhan vang che khan maw, enteh muanpui, i lakah ka sual in ka chimawm thei lutuk tih ka hria, ka tihpalh anih kha, i nelawm loh theih teh reng nen midang ho in an nel thei lutuk che kha ka thik ṭhina chuvangin i lakah ka ngeiawm ka chhuah vel mai mai ṭhin alawm, min ngaidam dawn nia" Hnuailam en chung chuan ati sap.

" Eh, piangthar kan awm a ni maw" nui sen sen chung chuan ka ti a.

" I ninawm a, min ngaidam dawn lo ami" Min rawn en chung chuan ati hlar. Diktak chuan lucy-i nen hian kan mizia a in ang ka ti ṭhin. Kan chhungril a nem a kan pawnlam landanah erawh kan ti lang duh lo thung. Ani pawh chutiang chiah mizia chu anei in ka hria.

" Ngaihdam i ngai hlei nem, keipawhin ngeiawm deuh deuh in ka chhang ziah tho che lawm, kan in rul tawk chiah" Ka lo tih chuan a nui ve suk.

" Anih chuan athat chu, ṭha deuh in kan awm tlang thei tawh tihna, u melo-i bulah chuan va phei rawh" Atih chuan counter lam pan chuan ka phei ve nghal. Mimii te pa thum godown kal pawh an rawn lut ve chiah bawk.

" E, Mimi, op, Ahmai te nen khan lo va rem fel law law mai ru aw" U melo-i chuan ati zung zung. A bulah ngawi rengin ka lo ding thung. Mimii chuan 'engati nge' tih melh tak hian min lo melh reng ka lo nuih ringawt. Ngaihṭhat hmel zan loh chuan dawr chunglamah chuan a a thil khai ho nen chuan a phei a.

" Muanpui, ṭhu rawh thil lawmawm lutuk ka hria a, kha i hria em? Hmania ka senior ṭhin ka tih Zomuansanga kha nang pawn i hriat kha" Atih chuan ka lungphu a rawn rang nasa mai. Anni pahnih hi an lo inngaizawng te a ni lo maw. U melo-i hian a duh thin thu kha a sawi bawk si a.

" Aw, enge a? " Pangngai tak chuan ka lo ti a. Conter table in min hliah hlauh chu ka va lawm tak. Ni lo se ka kut ka hum ruh nasa lutuk hi a rawn hmu dawn si a.

" Enteh, zu a in deuh reng ṭhin kha maw, tam tak phei chu in lo mah se a in reng ṭhin a, kha kha a chhan chu thla ruk liam ta khan a nu leh pa Car accident-in an borala chuan a thla leh lawkah a bialnu in mipa dang a lo kawp san tih a hre chhuak leh bawk a, ani mipaah pawh kei ka ni in ti ve ngat ṭhin rilru pawh khan na ati ve ngang aniang kha ta ṭang khan zu-ah a ṭuan ta vak a, a bialnu phei chuan ngaihdam a dil nasa lutuk mahse ani Zomuansanga mi luhlul tih takah a uksak duh ta miah lo a, a rilru na chhawk nan ati teh reng emaw ni ti sawn nitin zu a in reng mai ni, mahse a zu in chhan zawk tak saw chu a bialnu vang anih em em pawh ka hre lo kei chuan a nu leh pa thihna a tuar thiam loh lutuk vang a ni ta ber in ka hria" Zawi deuh tak chuan ati siam siam. Ka rin loh lam daih a rawn sawi takah chuan ka kut ka hum ngar ngar pawh ka thlah dul riai riai. An inngaihzawn thu min hrilh dawn emaw te ka lo tia ka lo hlauthawng ve em em a.

" Ngati nge chu chu min hrilh daih a" Ka tih chuan min rawn nuih suk.

" Nia, ka hre bik lo mahse ka sawi tum tak zawk chu eng lo ania, anau nen nghei tura kan tih viau pawha nui liam mai mai ṭhin khan hmeichhe pakhat in nghei tura a duh vang mai in zu a nghei hmaka a lawmawm em asin" hlim tih hriat deuh chuan ati siam siam. Ka lo nui ve sen sen mai Zomuansanga'n zu a nghei anih chu, ka lawmpui rualin zu nghei tir thei tur khawpa a ngaih pawimawh hmeichhia chu ka thik hle bawk.

" I hlim ve tiraw, i hlim ve ka rin vang ania ka hrilh che, diktak chuan chu hmeichhia chu ka thik rual in ka lawmpui bawk Zomuansanga hian a duh tih ka hre mai, a vannei bik ngawt mai" ati leh sap. Nia, keipawh hian sawi lang lo mah ila ka thik alawm. Ka thik lutuk mah mah.

" Ava lawmpui awm ve, chu hmeichhia chu i beng chak awm" Ka rilru put hmang lang lo thei ang ber tur chuan ka lo fiam zauh.

" Aih, chak lo, achhan chu ka tih theih loh ti tu a ni miau a, chu loah Zomuansanga ka duh lai te chu class-11 kan zirlai in alawm, amah ai kum khat chiah in ka naupang chungin a nau hmeichhia ang chiah chiah in min cheibawl a, kan nu leh pate an lo in hre leh zel nen, ka nu leh pa phei chuan fapa ang tak tak in an en, ka duh tih an hria
Chu e min nuih vek" Nui hak hak pah chuan ati a ka lo nui ve var var mai.

" Dik tak chuan chu hmeichhia chu a vannei ka ti, Zomuansanga ang mipa ṭha rilru a hneh thei bik hi, a lo duh ve phei chuan ati sual dawn lo tih ka chiang. A bialnu hlui kha a college kal lai pawha sawi kai hat kha a ni ve hrim hrim engtin nge Zomuansanga nen hian an lo intawn pawh ka hre lo, an inngaihzawng rei thei ka lo ti reng reng a, a tawpah chuan anih na a thup zo ta lo reng bawk ka khawngaih rual in ka unaupa leh ṭhian ni bawk a bumna hnuai atanga a zalen hi ka lawmpui daih zawk, atirah tuarna mah se tunah chuan engah mah a ngai tawh lo tih ka hre bawk a, zu a nghei tawh bawk a ka hlim veng veng tawh mai" Ati deuh duah.
.
.
.
Khumah chuan ka mu meng kar, mimii erawh a muhil tui viau tawh thung. Vawihina u Melo-i thu min hrilh ho kha ka ngaihtuah let a ka thaw leh halh thin. Ka lawmpui em em chung in chu hmeichhia zu nghei tir thei khawpa a ngaihpawimawh chu ka lo thik ve em em ringawt bawk si, ka ngaihtuah chian poh leh ka tah te a chhuak in ka hria. Kum hei leh chen hnuah mipa duh ka nei ve a ani lah chuan hmeichhe dang duh anei bawk si. Chutah ka duh tih pawh a inhre ve bawk si lo. Ka biangah chuan ka mittui a rawn luangthla ngiai ngiaia ka tap chhuak teuh kher mai ka ka ka hup bet ngar ngar ringawt. He tiang em em hian ami mi duh neih hi a lo hreawm le. Ka khum lu a ka phone dah chu a rawn ri ral ral. Tunang hunah te tu nge maw ni le? Ka en chu number lawng a lo ni. Ka mittui chu ka hru hul thuak thuak a chutah ka hrawk chu kan thian leh te te phawt a phone chu ka pickup ta chauh.

" Hello" Ka ti hnawk deuh ṭuak.

" In inkawtah ka awm a lo chhuak la" rawn ti sup ri vang chuan ka lungphu a rang nghal dawt dawt thei. Ka mumang anih ringin phone chu ka en leh ngat. Ka mumang a ni miah lo. Amah ani tak tak maw le.


" Tu nge aw? " Ka lawmna kha thinrimna in a rawn thlak thut. Kar hnih chuang a phone call ka chang thlawn a tunah dar 12 rik dawnah min rawn phone leh nghal a.

" Keimah " A rawn ti zawi ruih.

" Nangmah chu tunge i nih ka hre lo che anih hmel" Ka lo ti ve sak.

A rawn thaw ri hak mai " Nau, keimah Zomuansanga " dawhtheih loh hmel zet chuan a rawn ti hluk. Min rawn koh dan avang chuan ka lo nui suk thung.

" Lo chhuak la, in inkawtah ka awm a" a hma ai dam deuh zawk chuan a rawn ti a. Khum aṭang chuan ka chhuk thla vat ka chapal ka bun fel vek tawh tihah thil hriat chhuah ka nei. Khumah bawk chuan ka ṭhu thla leh riai riai.

" Ih, zan arei tawh sia, haw mai rawh" Ka ti zuai ruih. Diktak chuan ka hmu chak lutuk ringawt. Mahse ka hmuh chuan ka rilruah a thar leh sawt anga, tian hmu lo char char ila ka theihnghilh ve mai ang.

" Ka hmu duh che sia lawm, anih loh chuan ka rawn lut dawn ania" A rawn tih chuan ka thutna aṭang chuan ka ding mar zawt mai.

" A ngai lo a tlai tawh tunang hunah te e nge min hmuh i duh reng reng a?" Zawi si vin bawk si chuan ka lo ti hlar.

" I lo chhuak dawn em? " Ka zawhna pawh chhang lo chuan a rawn ti hlur. Mimii chu ka en a ala mutui ngang mai. Kawngka lam pan chuan ka kal ta nge nge.

Pawn ka chhuak chiah chu khua a lo dur nasa ngang mai. Pawn lah chu street light in a rawn en chang chang tih loh chu a thim deuh ruih bawk si. Khawnge Zomuansanga pawh chu a awm reng reng ni. Kawtah ka awm ati ve si.

He pa hi min tihder chiang lutuk a, ka va han ngei mai mai tak a. Ka inher leh tur chiah chu ka hnunglam atang tu emaw hian min rawn kuah thut. Ka rak dawn chiah tihah ka ka arawn hup zui nghal. Ka tal nghek nghek.

" Nau, tal tawhsuh, keimah" Ka beng bulah a rawn tih sup takah chuan ka tallai ka tawp ve nghal . Ka ka a hupna kut ala thla nghal zat bawk.

" Mawla, minti hlau alawm" A kut a lak thlak rual rual chuan ka lo ti hlar. Ani erawhin min kuahna ati nghet sauh thung.

" Khawmaw mi kuah reng suh, enge tunang hunah te i rawn tih dawn reng reng " Min kuahna phelh tum chuan a kut chu ka pawt deuh a. A lo ṭang ve zel nen ka phelh thei lo.

" Khawmaw awm mai mai teh, ka ngai che lawm" A khabe ka dara rawn nghah pah chuan a rawn ti sup. A thusawi vang chuan ka khawng awt nimai hian ka hria. Ka awmdan chu a hrethiam leh nghal emaw ni a rawn nui ri hawk mai.

" Min ngaihna chhantur i nei lo ve emai a, i bialnu emaw minti anih ka ring, i rui leh pek a ni lo maw nang hi? " A kut phelh tum chuan ka lo ti hlar. Mahse tun ṭum chu zu rim ka hre miah lo. Zu chu a lo nghei tak tak pawh a ni mahna.

" Rui lo, ka nghei tawh alawm, min lo en teh" Tih leh amah en theitur chuan min kuai hera. A thim deuh ruih bawk si kan chhaka street light rawn eng va va tih chauh lo chu eng a awm bawk si lo nen a hmel pawh ka hmu chiang thei lo.

" Enge i sawi duh chu sawi la, zan arei tawh ania" Ka lo tih chuan a rawn thaw chhuak ham ham. Ka darah a kut pahniha rawn chelin min en deuh vang vang phawt a chutah.

" Ka duh che" A rawn ti chhuak hlawl. Ka lo ip chawih thung. He pa hian min rawn fiamkual vel mai mai anih ka ring, mahse fiamthu hmel a pu bawk si lo. A hmel chu ka en nawn leh thin a thutak hmel viau bawk si.

" Zomuansang leh min fiam mai mai tur in tun ang zan reihah hian i rawn kal tihna ami" fiamthu deuh tak chuan ka lo ti a, mahse athusawi zawh tak chiah kha ti tak tak se ka ti hle thung.Mahse, beiseina awmze nei lo mai mai a ni.

" Fiamthu hmel ka pu in i hria em ni? Ka ti tak tak alawm" Ka dar a vawnna hmer ngheh sauh pah chuan ati leh sup.

" Mahse, u melo-i sawi dan kha chuan" Ka ti hman dek dek tihah min lo ṭawng khalh vat.

" Ka bialnu hlui chungchang asawi anih chuan eng atan mah ka ti lo e" A chhip sam buk lai tuai puat pah chuan ati hluk.

" Chutiang lam a ni lo, ih, zu i nghei chhan hmeichhe chung chang kha a lawm" Ka kut sik niap niap chung chuan ka lo ti let sap.


" Hah kha mi chungchang kha a lo hrilh hman che a maw, tu nge anih i hre chak em?" Min nuihzat hmel fe chung chuan ati a. Ka lo hnual nghal ruih thung.

" Nula fel tak anih ka ring, a hmel a ṭha hle bawk a nga" Ka rilru thup tum tak chuan ka lo ti a. Ka nuih pah var var bawk

" Fel maw, duhawm zawk mawle, a hmel atha bawk a, tu nge anih i hre chak em? " Phur hmel tak chuan ati a. A thilsawi dan vang chuan ka lo na em em thung. Ka mipa lo duh ruk em em in a hmeichhe duh chungchang min sawi khum chu ania. Tu rilru nge na lo bik ang.

" Tehreng mai, min hrilh ve phal te chuan" Phur hmel tak chuan ka lo ti hliai. Chutah min rawn pan hnaiin a rawn kun hniama.

" Ka hmaa hmeichhe ding duhawm zet leh a rilru chhungril thup tum taka min be ve tang tang tu hi maw le" A rawn tih zawi sup chuan ka lo meng phar awn awn mai in ka hria.

" Nang hi" Ka tih chuan a lo nui suk.He pa hian ka awmdan zawng zawng kha a lo hre vek tihna a ni em? Lalpa ka inthup ve teh reng nen. Tunah tak hi chuan ka lawmna ai in ka zak zawk mah. Kha hmeichhia kha kei hi ka ni a maw. Ka awih thei lo!

" Nau, i mitmeng ka en hian ka hria alawm min duh ve tih hi, melody-i chuan enge a lo hrilh che ka hre lo, mahse hei erawh ka chiang kha coffee dawr kawta ka rui ka nau in min buaipui ṭuma ka hmuh aṭang tawh che khan nanghi ka ta tura khuanu ruat inih ka ring daih tawh" A lama min hnuhhnaih pah chuan ati sup. Kei erawh sawitur ka hrelo ka lo ngawi reng ringawt. Ka lawm lutuk vang nge ka hamhaih vek mai.

" He rilru hi bum lo tawk tawhin,lo na tawh mah se, lo pawm in i tuam dam leh theih em? " A rawn tih leh chuan ka biangah mittui a rawn luang ngiai ngiai ringawt. Ka mipa duh ruk em em kha ka duh hma daihin min lo duh reng a, a thinlung kehchhe tawh tuamdamtu atan min duh bawk a ka lawm em asin. Ka lawm bawk si, makti bawk si chuan amah chu ka en reng ringawt.

" Naute, ka zawhna chu min chhang dawn lo ami? " Ka biang rawn tawh zauh pah chuan ati a chumi rual chiah chuan a phun hluk thung. Enge a sawi phei chu ka lo hre lem hlei lo a.

" Ngati nge i mittui hi a tlak a? Ka thusawi kha i hua ami?" Hreawm tih hmel zet chuan a rawn ti a. Ka lu ka lo thing nawk nawk thung.

" Anih ngati nge? " A rawn tih leh chuan ka lo inhrut ri hraih. Chumi rual deuh thaw chuan a awm ngheng in min kuah bet thlawp thung. Ka chhipah a khabe rawn nghat in a rawn thaw chhuak ham ham a. Ka chhip thli in a chhem vawh vek tawh chu a rawn thawkkhum lum ham ham mai.

" I sual lutuk anih kha, khang kar hnih chhung zawng khan min lo biak hun ka chang char chara, mahse min rawn be bawk si lo a" A awma hmai phum reng chung chuan ka lo ti deuh ṭuak. Chutah min nawr sawn atuma ka lo kuah let ta ṭung. Ka lungawi lohna ka sawi kha ka zak leh hnuhnawh si chu ka ṭang ṭung mai.

"Nang hian ka lo biak hun che i lo nghak tak tak amaw?" Atih chuan ka lu ka lo bu nghat. A nui tih hriat zetin a awm a rawn nghing dawt thung"Ka awih thei lo zawk" Min kuah ngheh sauh pah chuan ati thawp sup.

" Nangte hian min duh ve tak tak tihna a ni em? " A rawn tih leh chuan ka lo ngawi leh ta reng. 'Aw' tih dawt ka hreh ve si, ka chhan loh chuan 'aih' ka tihnaah a ngaih ka hlau bawk si.

" Nau, min chhang dawn lo ami? " Ngenngawl zeta a rawn tih leh pawh chuan ka lo ngawi ta reng. Chutah a hnunga ka kuah beh tlatna ka kut chu rawn phelh in min nawr hnunga hnuailam ka lo bih ngur thung.

" Ka zawhna che chu?" Amah en thei tura ka bianga min kuai dak chung chuan ati leh sup.

" Aw" Hriattham chang chang chuan ka lo ti ta vat. Ahmel light in a rawn chhun en deuhah chuan amit meng de sar chu alang chiang ngei mai.

" Ka lawm e" tih sup pahin a rawn kun hniama ka hmuiah duhthawh zet hian a hmui nem leh lum ham ham chuan arawn fawp a, ka thiam ang ang in ka lo chhang let ve bat bat bawk.
.
.
.

" Muanpui, tho tawh rawh chaw ei a hun ania, enge tukin chu thawh i va hre lo ve, vawi thum ka rawn kaihthawhna che a ni tawh aw" Mimii chuan a rawn ti lang lang. Ka zi mar ṭiah ṭiah a ka ham zui bai bai bawk. Nizan khan Zomuansanga car-ah dar 3 thleng dawn kan thu duna eng eng emaw sawi in kan titi anih kha. A haw hnu khan ka tlaivar law law tawh mai ang ka ti zet nang in naktuk inrinni anih avang in kan buai dawn sia tiin ka mu leh ta zawk kha ania thawh pawh ka lo hre miah lo chu ni in.

" Dar eng zat nge ni tawh a? " Ka tih chuan mimii chu a chet tlat tlat.

" Dar 8 ari dawn maw le, rawn tho vat mai teh" chhuah pah chuan ati lang lang. Tho chhuakin ka va insil fai ve thuak thuaka ka chhuah leh chuan chaw ei a lo siam fel diam tawh. Ka chaw ei te chu ka phur sarh sarh bawka ka ei hnem ngang mai, tun kar hnih chunga ka ei ai zawng zawng kha ka ei animai awm asin.

" Tukin hi hmuh i va nuam ve a, i mumang a tha deuh ami? " A hmuia lipstick tah mawlh mawlh pah chuan mimii chuan ati sap.

Ka hrilh duh angem aw? hrilh ila min lo duhpui si lo se, ka rilru ana mai mai angem? Nge ka hrilh dawn lo? Hrilh lo ta ila engtikah emaw chuan a hre dawn tho thoa a thin arim zawk mai thei bawk. Engpawh nise ka ṭhiannu alawm anih le ka hrilh tur a ni.

" Mim, eng lo ania, kha Zomuansanga kha i hria em? " Ka tih chuan " Enge ani chu" Ngaihpawimawh loh hmel zet chuan ati liam puat, ka ngawi leh ren rawn phawta "kan ni a" Ka ti chhuak phawng a lipstick in hnawih lai chawl meuhin min rawn en ta reng.

" Engtin? Mahse in inhmu ngai si lo a? " A lo ti haw mak atih hmel viau mai.

" Ih, nizan khan ania" Tiin thil thlen dan zawng zawng chu ka hrilh ta vek. Ka sawi zawh chuan ka thawl huai in ka hria.

" Chuan i ngaihdan ka hre duh bawk a" Ka ti zui sap.

" Thuthlukna i siam vek hnuah ka ngaihdan min zawt amaw? " lungawi hmel vak loh chuan ati ta hmak mai. A awmdan tur hi ka hriat thiampui tho mai, keipawh ni ila ka lungawi bik miah lo ang, engkim a chhia a ṭha kan inhrilh vek thin a ni si a.

" Mim, i ngaihdan tur kha ka hre thiam lutuk" Ka ti dek dek min melh hrep ringawt. Ka lo ip chawi mai. Mimii thinrim ka la hmu ngai lo bawk nen ka ngawi ta reng.

" A awm alawm, i tan hian engmah ka lo ni lo ania nge" tih leh a bag la in kal a tum ta mai.

" Mim, ka tihpalh diktak chuan a thleng thuta, ka lo duh ve tho bawk sia lawm" A bag-ah chuan ka pawt ṭai mai. Anin pawh let a tum keiin ka pawt ve bawk si chu a bag te chu a chhia ang tih a hlauhawm hial zawk. Chutah Mimii chu a rawn nui chhuak ta thut mai. Ka lo en reng ri ngawt.

" Ka bag kha thlah teh, i pawt chhe dawn lawm ka fiamthu mai mai anih kha" A rawn tih chuan ringhlel fe in amah chu ka en reng ri gawt. " Ka ti tak tak, i awm dan ka hmu chak a ka fiamthu anih kha" Atih leh takah chuan a fiamthu tih ka pawm ngam ve chiah.

" Minti hlauthawng hman lutuk alawm" A bag ka vawn lai thlah chawrh pah chuan ka ti hlur.

" Ka uang anih kha" Nuih vur vur pah chuan ati leh a " Ka ngaihdan hriat i duh a ni lo mi? " A rawn tih leh chuan ka lu ka lo bu nghat.

" Ka ngaihdan a pawimawh hlei nem, puitling i ni tawha, i ngaihzawng tur chu i thu thu alawm, mahse min hrilh hriat hrim hrim avang erawh in ka lawm, i tan ka pawimawh ve tak takah ka inngaih phaha min hrilh miah lo la ka vui em em hran lo ang mahse, tlem te chuan ka vui ve tho ang" Khuma thut thlak chawrh paha a tih takah chuan ka lo thaw huai thei hial mai.

" Mahse, zu kha a la in ṭhin em? " A rawn tih leh chuan a nghei tawh thu in ka lo chhang vat. A ner sawk mai " En ang hmiang mahse, ati na che anih chuan a chak lo ang" thutak fe chuan ati a,kei erawh ka rin anga min duhpui loh na thu a chhak chhuak lo erawh ka lawm viau mai.

" Ti rawh kal ang, kan tlai mai dawn" Atih takah chuan ka pheikhawk chu inthawlh sawk sawk in ka zui chhuak nghal.

Dawr kan thlen chuan kan thawhpui dang ho chu an lo thleng leh vek tawh, kan veng a hlat bik vang hian kan thleng tlai ber deuh ziah zel.

" Hey, Muanpui, vawihin chu i hmel hmuh ava nuam ve a" kan lo awm khawm laihna lam rawn pan pah chuan Lucy-i chuan arawn ti zang vah, a nui sen sen mai. Lucy-i hi nula hmelchhia a ni miah lo tih ka hre tho nangin vawihin aṭang hian ka hre chiang leh zual. Chutia ṭawngkam pangngai taka min rawn bia leh a rawn nui var var chu kan thawhpui dang te chuan mak an lo ti nasa, a bikin mimii leh opi hian mak anti zual hle tih an hmel aṭang ringawt pawh hian ahriat mai.Mak ti awm reng anni.

" Nia, nizan lamah thil tha deuh ka tawng a" Ka lo ti sam et.

" Anih ka ring, nimin thleng khan i hmel kha hmuh a nawm loh teh reng nen, vawihin chu mithar hlak i ang a lawm" A lo ti ve vat bawk.

Midang pathum te lah chuan keini pahnih chu min en tawn zak zak thung. A ṭawng apiang chu min en zel ni ber in ka hria.

" Nangni pahnih chu, eng thil nge inhriat a? Mimii chuan a rawn ti ta nge nge.

" Nia, eng thil nge thleng hi?nimin chawhma thleng kha chuan inla in khak fek fek sia? " Opi chuan a rawn ti ve bawk. Ahmai erawh ṭawngtam lo chi tih takah engmah a sawi ve lo thung.

" In awm loh hlan khan kan lo inkawm ngeih maw le" Lucy-i chuan min rawn en zauh pah hian ati liam puat. Ka lo nui suk thung.

" Vawihin ka thu hriat ho vang hian ka â zo tak tak dawn in ka hria" Mimii chuan a lo hliai a, a kal sawn zui nal nal bawk. Nia, mak ti awm reng a ni tukin zing atang tawha a thu hriat reng reng hian ala ṭhawng zat zat hlawm miau a.

Dar 11 aṭang chuan kan buai chho ta viau mai, tu mah pawh kan titi hman tawh meuh lo, customer an rawn inluh chhawk zut a a rawn lutna zawngin min dawr lem lo mah se en kual pui an ngai ve zel bawk si tukin mut ka kham lo bawk nen ka chau ngawih ngawih tawh. Customer ho pawh ka nuih ṭha peih vak tawh lo chu a ni.

" Muanpui, lo phei lawk teh" U melo-i chuan min rawn hui lauh lauh, mi kan ṭhu chawl ve hman dawn chauha eng thil chu ni maw ti chung chuan counter lam chu ka pan a.

" Enteh, kan Zomuansanga khan kan nula vanneii kha a duhthu a hrilh a ni awm a, a lo duh ve a ni awm asin, haha anuam e, matei nen phei chuan kan hmu chak tawp a kan sawi reng mai" A bul ka thlen rual rual in a lo ti nghal sawk sawk. Ka lo ip chawih thung. Zomuansanga chuan keimah ka ni tih a hrilh lo phawt chu ania, ka thawhuai mai.

" Ava lawmawm ve" Ka lo ti ve sap ringawt. Dik tak chuan a nuam pawh ka ti lo ami sawi 'nula vannei 'atih hi keimah ka ni tih hre ta se engtin nge a ngaih ang le?

"Nia, alawmawm tawp, inril a ṭam tawh em? Thil ei ang u aw" Tihpah chuan a phone chu la in ei tur a chah nghal zat. Rei vak lo ah a thil chah ho chu an rawn dah nghal mai bawk.

" Mimi, op, lucy, ahma, lo kal ru lem, thil ei phawt ang u" Ati lang lang. A aw rawl hi a lian ve ngawt mai.

Kan thil ei lai chuan ka phone msg ka check a Zomuansanga msg a lo awm vang mai.

" Thil in ei tawh em? Tlaiah ka lo hruai ang che aw? " Tih pahnih te mai chu dar khata arawn thawn daih tawh a ni. Kan buai atalang in keini tunah thil kan ei chauh a ni sia.

" A ngai lo, min lo hruai suh" tih ka va thawn leta, a rawn seen nghal zat anih chu.

" Eng vangin? ka rawn hruai chak che lawm" A rawn tih chuan ka nui var var mai.

" A chhan chu a ngai lo a" Tih ka thawn let leh nghal.

" A chhan chu lawm ka hriat chak" A rawn ti ve leh.

Ka hrilh hma chu min zawh atum emaw ni" Mimii nen kan haw ve thei reng a"

" In pahnih khan ka hruai haw thei che u tihna ania" Ala rawn ti ve ṭalh, a va han luhlul thlak tak a.

" Angai lo tak tak, u melo-i hian a hre thiam vek dawn asin" Ka va ti ta nge nge.

Ka rilru put dan tur a hrethiam ve ta chek aniang chu a rawn 'aw' ve ta hram, " mahse zanah ka rawn leng thung ang" arawn ti mauh mai, chhang lem lo in ka phone chu ka hmet thia ka bagah ka dah leh ta daih.

" Ehh, nuamawm vel ve" Mimi chuan a rawn ti zauh, ka lo signal zauh thung. A rawn uang chhunzawm ta bik em lo.
.
.
.

" Kawngka in kit ri dat dat chu Mimii chuan ava hawng a kei erawh games ka khel thung.

" Muanpui, hei tu nge lo kal hi" Mimii chuan chimawm zet hian a rawn ti a. Ka lei ka lo chhuah khum vak thung.

" Ti khan lo inkawm ru aw, in titi na ka dal palh ange ka lo va mu mai ange" Chimawm zeta tih pahin pindanah a lut nghal tharh.

" Ka bialnu hian min va ngaihsak lo ve a, ka lo leng hi a lawm chiah lo tihna ami? " Ka Phone-a ka games khelh laklawh lai chu a rawn la daih anih chu.

" Lo leng rawh pawh ka tih der loh kha aw, nge i lo len ve ngawt" Ka lo ti ngawt pek. Sawitur hre hek lo i.

" Ka bialnu hi nileng in ka hmu si lo a ka ngai a" Min rawn kuah pah chuan a rawn ti zawi sup. Ka lo mur chuaih in ka hria.

" Min ngai ve lo mi? " Engtinmah ka chhan loh avang chuan arawn ti leh sup.

" Ngai lo pawh ka tia mi? " A kut ben thlawrh pah chuan ka lo ti hlak.

" Ti lo, min ngai pawh iti chuang lo, mahse min ngai itihna angah ka ngai mai ang" Ka biak rawn tawh zauh pah chuan ati a ka lo ip chawih thung. Ngaihzawng ka nei ngai lo bawk nen kan awm dun hian ka lai tut ti ila adik ang.

" Thingpui i in duh em? " Ka ti ta daih.

" Duh lo, hei hi ka duh zawk" Tih leh ka hmuiah a rawn fawp zauh.

" I va mawl tak, mimii a lo chhuak thut thei asin" Zawi si vin bawk si chuan ka lo ti hlar. Awm ang lo lutuk emai a.

" A rawn chhuak lo ang, he tia chance min pek danah a ni kha chu a zei tih ka hre mai" Nuih zat hmel zet chuan ati sup.

" I chhe ve anih chu a" Ka lo ti hlak.

" Eng maw vawihinah chuan ka rawn hruai i duh lohna chhan chu? " Ka kut ka sih niap niap chu rawn man in ati a.

" Aw, u. Meloi'n a hre dawn asin, ka duh bik hlei nem" Ka lo ti hap. A rawn nui suk mai.

" A la hre dawn tho alawm, matei nen an hmu chak lutuk che alawm" Thutak deuh zawk chuan a rawn ti a.

" Aih, ka duh lo e a, ka zak e a" Ka lo ti sap.

" Anih chuan tian kan thup char char dawn i tihna ami? " lungawi hmel vak loh chuan a rawn ti hmuk.

" Aih, chutiang lam a ni lo, a la hma em hi, ka zak ve tho lawm, nizanah kan ni ve chiah a" naupang chhia zet chuan ka lo ti nui nui.

" Anih, engtikah nge anni chu hrilh i duh a?" A rawn tih takah chuan hrilhrih loh a rem ti ah ka ngai a ka thawhuai mai.

" Ih, ka hre chuang lo a" Ka lo tih chuan a lu a lo bu ve ta nghat. Eng eng emaw sawi chhunzawm in kan titi vel mai mai, a chang leh kan inhnial leh rih thul tiang em em hian ka hlim ngai pawh ka hre lo e a. A haw dawn chuan duhthaw zet in ka hmuiah a fawm leh te te phawta kan in mangtha ve thei hram.

.
.
.
.

Ni aliam a thla aliam a Zomuansanga nen pawh thla thum dawn kan in zui ve ta reng mai boruak a thlasik deuh ruih tawh a vangin chhun lamah pawh a vawt ve tawh viau mai. Tun kum christmas chu kan khuaah haw ka tum kha ania mah se ahma anga ka phur ang kha chuan ka phur tawh lo khawp mai tian a thleng dawn tih hria ila chuan ka lo haw ve tawh ang te kha ka va ti zawt zawt lo ang maw le. Mahse le mihring te hi chuan kan nuna thil thleng tur hi kan lo hre lawk bik si lo a, ka haw ngei chu a ngai dawn anih hmel. Dawrah pawh christmas bazar ṭan neuh neuh an awm tawh avangin kum laihawl ai daihin kan buai zual leh nghal a, chauh ana thei khawp mai. Zan lamah phei chuan ka mu hma thei bawk nen Zomuansanga pawh a rawn leng reng bik ngai lo a chang phei chuan kan inbiak laklawh laite hian ka lo mut thluk san daih zel leh nghal. Mahse chung hunah te chuan ka chau tih hria in a thinrim ngai lem lo, ka hre chiang tawlh tawlha mipa innghahna tlak anih zia ka hre chiang telh telh bawk. Ka lo tawng lo ang tih hi ka hlau ngawih ngawih thin.

" Muanpui, I chau tawh em? Ka ke a kham tawh rap mai maw le" Lucy-i chuan a rawn ti sa sa " Chau tawh rapthlak,ka ke te hi a bung dawn in ka hria" Ka lo ti ve vat. Kan nui dun kur kur mai. Lucy-i nen pawh kan in ngeih tawh khawp mai, a tira min tih ang kha chuan vawi khat mah min ti leh tawh ngai lo, ṭawngkam na deuha in fiam chang chu awm mahse kan inhre chiang tawh bawka kan haw ngai lem lo, mimii tih lohah chuan ka thawhpui te hoah chuan ka biak tam ber a ni tawh bawk. An chhungkua an harsat loh teh reng nen he tia a inhlawh ve peih pawh hi ka fak ngawt mai. Mi hausa fa ṭhenkhatte hi chuan atih ang hi anti peih dawn lo tih hi ka chiang lutuk tlat.


Chaw chhun kan ei lai chuan kan titi ho nak nak, tun kum christmas an hman dan tur vel pawh an sawi nak nak hlawm mai. Mimii erawh a ṭawng tam lem lo, ka haw dawn avangin amah in a hmang dawna a phur vak lo pawh hi ka dem hran lo, a bialpa nen an inti thiam lo deuh bawk nen an ṭhat leh thuai beisei phawt teh ang. He tiang hian Zomuansanga nen hian inti thiam lo ta ila eng tin nge ka awm ang le ka ngaihtuah zawng ringawt pawn ka huphurh ka mood a off thei dawn emai ngaihtuah pawh ka ngaihtuah peih lo. Tian inngeih tak leh hlim tak hian tuma tih buai loh hian awm char char thei ila tih hi ka duh dan leh ṭawngtainaa ka thlen tam ber a ni hial ang chu.


" Muanpui, naktuk chu kan nula vanneii kha ka hmu thei tawh dawn ni awm tak a ni" Kan thil ei na vel kan tih fel sang sang lai chuan u melo-i chuan ka bengbulah a rawn ti sa sa. Ka lo theihnghil daih naktuk hi Sunday ania, chuan Zomuansanga te inah chaw kan ei dawn a nau leh u melo-i kan hrilh ni tura kan tih kha a ni. Lalpa! Eng tin nge ka lo theihnghilh theih le? U melo-i ka en chuan a hmel chu a phur sarh mai.

" Ava lawmawm awm ve" Ka lo ti ringawt.

" Nia, ka phur tawh teh mai ania, kan Zomuansanga lah hian a care mai sia maw, matei sawi dan phei chuan zantin deuh thaw arim ṭhin ni awm tak a ni" a ti leh sap. Midang ho chuan keini pahnih titi chu min ngaihsak lem lo tih hriat fe in an phone an sik mial mial thung.

" A hrim hrimah he tiang khawp hian kan hmu ve chaka a bialnu reng reng pawh hi lo kal ve duh tawh mai awm, thla thum lai a ni tawh tho sia, Zomuana bulah min hmel hriat tir tawh rawh ka tihlah in i hre sa reng alawm minti mai zel sia, ka ngei thei ania" Ati leh hlawih hlawih. Kei erawh nuam ti lo fe in ka bula thawmhnaw in khai pakhat chu ka khawih ka khawih ringawt. Customer an rawn luh takah chuan ka lawm lutuk hi ka zuang chhuak lo chauh va kal in ka lo chiau au thuai thuai. U melo-i pawh counter lam panin a kal zui ve nghal mai bawk.
.
.
.

" Mimi, tian a ṭha em? " Ka kawr hak chu ka en leh thuak a vawh tawh em vangin cotton ke kawr tlema ka mal phuar deuh ka haa boot bunin highneck ka haa a chungah over coat ka ha leh tawp.

" A ho emai, u melo-i anih kha i hmuh tur e, chuan a nau hmeichhia nen a ho emai, kei ka awm bawk anga, a vawh em hi a ho mai mai" Ngaihsam hmel zet chuan a lo ti liam puat.

" Ngawt a che, i ngaih ang ngawt kha a ni lo aw, u melo-i hian eng tin nge a ngaih ang le min lo duh lo mai anga" Ka rilru tak tak a ni. Min lo duh lo ang tih ka hlau.

" Aw, a u naunu pawh a ni hlei nem, ani ngaihdan khan kawng ro a su awm lo emai Zomuansanga hian a duh hiam hiam che emai" Ka dara rawn ben thek thek pah chuan a rawn ti vei lar lar. Ti hian ati ve ziah Zomuansanga hian a duh dan em em che hi nangmahah hian enge maw a hmuh bik ni hi min ti ve ziah zel. Ka phone chu a rawn ri ral ral Zomuana a nih tawh ringin ka pick vat a lo ni chiah bawk.

" Nau, in kawm chhakah ka awm, lo chho ula, car ka lo turn a nge, ka lo chhuk lo mai ang" Ka pick rual chiah chuan a rawn ti sup.

" Aw le" Ka lo ti ve mai bawk.

" Kal ang, a rawn thleng tawh anih chu" Mimii bulah chuan ka ti a, ka bag chu la in kan chhuak nghal.

Kan kawm chhak kan thlen chhoh rual chuan a car chu a lo turn fel ve chiah bawk. A car aṭang chuan a rawn chhuak zui vut. Min hmuh chuan a nui suk. Cotton dum a haa a, a chung lamah hoodie ha leh in a chungah cotton jacket dum tho a ha mawl leh tawp bawk, amah a palian bawk nen a in hmeh ka ti hliah hliah.

" In va nalh ve" mimi nena min en chung chuan ati zauh. Ka lo nui sak thung, atih ve dan hrim hrim hei chu, kawr thawl hnek hnawk pawh ha mah ila i va nalh ve minti ve ziah zel, mahse a nuam ka ti hle ṭhin thung. Ka ṭhutna tura car kawngkhar min hawn sak chuan mimii a lo ner nasa mai.

" In over lutuk aw, ka awm ve reng hi, khatia in tih dawn chuan ka lo kal ve miah lo ang" a lo ti fiamthu hlut.

" I bialpa kha kan sawm ve mai dawn mi? " Zomuana'n a lo tih zauh chuan a lo melh hrep. Tun ṭum a bialpa nen an inti thiam lo hi an daih rei reuh phian leh nghal a. Eng tak chu an intih buai chhan ni maw, tu mah mah in min hrilh duh mang si lo.

Kan tlan kawng tluan chuan ka zam em em ringawt, ka ti tih pawh ka hriat loh lai in ka lo thaw leh hawk thin. Chutia ka tih apiang chuan Zomuansanga chuan ka kutah a rawn hmer vang vang zel. Ka huphurh tih a hriat vang in min hnem ve naah ka ngai.

Car ding ri datah chuan kan thleng tawh tih ka hre thiam mai. Car aṭang chuan ka chhuak vata kan hmaa in lian tak ding luah chu ka thlek deuh vang vang.

" Wow! i bialpa hi a hausa tih chu ka hre tho a chu, tiang em em an nih ka lo ring hlei nem" Mimii chuan a rawn ti sa sa. Ka pawm zawng tak tiang em em anih ka lo ring lo reng reng. Kan in nen ka teh khina ka insit ta riau mai.

" Lut ang u le, an lo nghakhlel tawh teh mai che u nia" Ka kut rawn hum pah chuan ati sup. Haw leh mai te ka duh rum rum mai .
Mahse, eng mah sawi lem lo chuan min kaih ang ang chuan ka zui ve ta mai. Mimii chuan kan hnungah min rawn zui ve bawk.
Door bel pawh hmet lem lo chuan kawngka chu a hawnga kan lut zui nghal mai. An inchhung chu pawnlam lan dan ai a changkang zual em em leh nghal. In chhunga bungraw awmte chu an man a to hlawm hle ang tih mimawl ber tan pawh a hriat thiam theih mai. Tah hian an unau chauh chuan an kawsa chu a ni awm sia khua a har duh awm mang e.

" Choka lamah an la awm a ni mai thei, lo ṭhu rawh u, ka va ko a nge" tih leh choka lam ni ngei tur chu a pan phei nghal.

" An in chu a, he tianga in nuam hi Aizawlah hian a awm thei ang tih pawh ka lo ring ngai hlei nem, lo kal teh he ta ṭang hian khaw en a nawm dawn hi" Mimii chuan tukverh pakhat zawna din pah chuan ati a ka va pan ve vat. Ka va en ve chuan khaw thlir chu a lo nuam viau tak mai. Chutia engmah ngaihtuah lo a kan lo thlir kual lai tak chuan ṭawng ri ka hre thut mai ka phu dawrh nge nge.

" Khaw maw kan nula vanneii chu" U melo-i ngei mai chuan a rawn ti phei lang lang. Mimii nen chuan kan hawi rual ṭhawt.

" Ehe! Nangni pahnih chu hetah te enge in rawn tih dawn? " U melo-i chuan keini pahnih min hmu thut chu mak ati hle tih aṭawng bah deuh nawk dan aṭang chuan a hriat mai.

" Melody, mate, hei hi ania ka sawi hmeichhia kha" tih pahin Zomuansanga chuan ka darah a rawn kuah thak. Ka lo ip chawih thung. U melo-i mak ti hmel mawlh sawn ka awm ati nuam lo.

" Hi, kan in hmu thei chu alawmawm hle mai, Zothansangi ka nia, zothan min ti thei ang" hmana Zomuansanga rui lo buaipuitu nula khan nui var var in a rawn ti a, a kut a rawn phar chhuah chu ka lo vuan ve vat bawk.

" Hi, Thlamuan " Ka ti chauh tihah Zothani chuan min rawn tawng khalh in " Ka hria lawm, mama hian athuku ru rei ngang ngang bawk che a, i hmel atha hle mai" A lo tih leh zung zung chuan ka sen ṭan ṭan hial in ka ring. Hmeltha em em tia sawi tur ka ni lo nang in chhia tia sawi tur ka ni bik chuan ka inhre lo mahse, chutia hmai chhana min fak takah chuan ka lo zak hle thung.

" Chuan nang chu; mimii I nih ka ring" Mimii lam hawi chuan ati leh a, mimii chuan 'aw' tih nan a lu a lo bu nghat.

" Ka awih thei lo zawk Zomuansang, min va han ti zak tak" U melo-i chuan lungawi hmel chiah lo chunga sofa-a thutthlak hnawk pah chuan ati a, keini pathum chu min en kar bawk.

" Ti nge a u meme? " Zothani'n a lo tih chuan u melo-i chu a lo thaw hak.

" Eng mah, he pa hi minti zak lutuk, kan nula vannei kan tih kha Muanpuii hi a lo nih si chuan, kan dawra thawk nula I u hre tu ka tih kha amah hi lawm, chuan kan nula vanneii chanchin kha a bulah te hian ka lo sawi vak vak vel a, a... min va ti zak tak Zomuansang" a kum nena inrem lo zet chuan a ke te chu chhuatah chuan a per vak vak mai. Kei erawh nuam lo ka lo ti nasa. Zomuansanga ka va en ve chuan hriatthiam loh hmel zetin a chal a lo ti chuar nang thung.

" Awi, Muanpuii, ka tihpalh ka awm dan zet chu a, ka va zah puiawm tak, ka duh lo che ka tihna a ni lo ania, he pa vang vek hi, ka thusawi ho kha engah mah ngai miah suh aw, ka sawi ve mai mai anih kha" A rawn ti zung zung. Chutia a tih takah chuan ka lo thaw huai mai. Min duh lo ta emaw ka tia ka hlauhthawn zia chu a.

" A ho lutuk, keima thiam loh alawm" Ka lo ti ve vat.

" Niang chu, min hrilh ve mai tur che hi nia, nangpawh kha lalmimi, min hrilh ve tur che lawm, i hre ve reng sia" Mimii en pah chuan a ti hlar.

" Ngawta che chutiang in eng mah ka hre lo reng reng, chu tiang in sawi ṭhin tih pawh ka hre lo hrim hrim" Mimii lah in a lo ti ve bawk. Kan pathum chuan kan in ena kan nui ta hawk hawk. Zomuansanga leh a nau erawh an hawi lawl lawl mai. A awm tho mai kan nuih chhan hre ve hek lo i!

" Zothan, chaw ei chu ka siam zo tawh aw" Choka lam aṭang chuan nula pakhat in a rawn tih takah chuan kan ngawi ṭhap mai.

" Aw le, kan lo phei ang" atih chuan nula chu choka lamah bawk chuan a lut phei leh nghal.

" Ti ru, a tlai mai dawn in rawn thleng deuh chauh nangin ei nghal mai ang u" Zothani chuan ati nghal var. Mi dang pathum chu choka lamah an in zui lut nghal sang sang. Ka kal ve tur chu Zomuansanga chuan ka kawr hnungah a rawn pawt vak anih chu.

" Enge? " Ka tih chuan ka hmuiah a rawn fawp zauh. Ka lo phu zuk thung.

" I va mawl tak, hun lo thei lutuk aw" zawi ang reng tak vin bawk si chuan ka lo ti hlar.

" Enge, tlaia ka hmuh aṭang tawh che khan kha tia tih kha ka chak tawh, a rei loh em kha khatiang in fawh pawh anih loh kha" Choka lama min nem phei dat dat pah chuan ati hluk.

Chaw ei lai chuan hmeichhe ho chu kan titi nak nak hlawm a, Zomuansanga erawh a khat tawkin a rawn ṭawng ve zauh zauh ringawt. An nula pawh kha kan rual in a ei mai a, a fel hmel viau bawk. Ei siam pawh a thiam khawp mai ka ei ṭeuh mai. Nichina kan nuih chhan Zothani'n u melo-i a zawh chuan u melo-i chuan ka bula a thilsawi ho kha an sawi chhawng tak taka an nui dar dar mai, Zomuansanga ka va en chuan min lo en ve chiah bawk nen a rawn then sak mai.

Kan ei na vel chu hmeichhe panga te chuan kan ti fai sang sang Zomuansanga erawh khaw nge a kal ka hre lo. U melo-i ho chuan min fiam leh zuk zuk ṭhin tih vak ngaihna ka hre bawk si lo chuan ' in ho emai' ka lo ti leh ngawt zel pek a chu chu an ni ho lawmah a tlaa kan nui ho leh dar dar ṭhin.

" Mate, ti khan in pa li khan lo tih chhunzawm mai ru aw, nautei hi eng emaw hmuh tir duh ka nei a" Kan nuih dar dar lai chuan kan hnung lam atang Zomuansanga chuan a rawn ti thawp sup.

" Aw va kal rawh muanpui, kan lo ti thei alawm" zothani chuan nui var var pahin a rawn ti a.

" Awi! mate, kei chu ni ila aih ka ti hrim hrim nang ai pawn a ko duat ania aw, a koh dan kha i lo hria em? Naute te ati vel, kei chu ni ila ka lungawi teuh lo, tiraw mimii, sangte nangni ni ula in lungawi angem? " U melo-i chuan ati vei lang lang.

" Lungawi teuh lo kei chu" Sangtei leh mimii chuan an lo ti ve vat bawk. U melo-i chu ti fuh inti zetin Zomuansanga chu a mit a siai kum zauh.

" A upa ber ve si, mawl mawl lo la a ni mai" Zomuansanga chuan a lo tih hluk takah chuan an vai mai chuan za em em in an nui ta dar dar.

" In chhe dun emai a, kal vat mai teh u" U melo-i bawk chuan a rawn ti leh. Zomuansanga chuan ka banah kai in choka aṭang chuan min chhuahpui nghal. In chung lamah min kai chho dat dat min kaih ang ang chuan ngawi reng in ka zui ve mai bawk. In chung zawl kan thlen chuan khua athim tawh bawk nen a vawt var mai. Ka hnunglam aṭang chuan ka kawngah a kut pa hniha min rawn kuah in ka darah a lu a rawn nghat chial bawk. Min rawn kuah chiah chu a taksa lumna chuan min ur nghal ham ham mai.

" Hei, enge min hmuh tir tur chu? " A kut lo hum let pah chuan ka lo ti sap.

" Eng mah tian ka kuah chak che a" lo ti sup in ka dar chu a hmuiin a rawn fawp pah zauh bawk.

" Hei, i va ho tak, thil kan tih fai kha i hmu ve reng tho sia" Ka lo ti nang nang. Tak tak alawm eng mah anih loh chuan min koh loh ve mai tur ania.

" Min ngai ve lo mi? " naupang chhia zet in a rawn ti hluk anih chu.

" Ngai ve tho e" nui hak pah chuan ka lo ti a. A rawn rum nghut thung.

" I nui min ngai lo tawp tihna anih kha" a rawn tih leh chuan ka lo nui ta hawk hawk. Naupang chhia emai a kum 27 lai ni ve tawh si a tihtauhna ho zia hi.

A hmel en tur chuan ka in siam rem a, min kuahna a lo thlah thawl ve mai bawk. A hmel chu ka ena ka la nui reng tho.

" Hei, i naupang chhia emai aw, ka ngai che tih i hria lawm" Ka tih takah chuan a rawn nui ve suk. A hmel thla eng in a chhun chu ka en deuh vang vang a ka hlim a ni, hetiang mipa ṭha Pathian in min lo tawn tir hi a hnenah lawmthu sawi mawlh mawlh tur ka ni in ka hria.

" Nau"

" Immmmm" ka lo thluk duah kher.

Chutah a hmel chu a rawn thutak sawt " Min hmangaih em? " A rawn tih chuan ka lo nui suk.

" Kei chuan ka hmangaih lutuk che tih i hria tiraw?" A rawn ti thawp sap.

Ka mitah tak rawn in a thaw chhuak leh ham ham phawt a chutah rawn sawi chhunzawm leh in "Ka rilru na leh beiseina reng reng nei tawh lo beiseina min petu i ni a.Rilru hliam leh bumna tawk tawh he thinlung damna pe leh tu ka tana mi pawimawh i ni tih hi hria la.Ka nunah hian i pawimawh ber tih hria in, ka hmangaih lutuk vang che a ka thikthu a lo chhe deuh anih pawh in min hmangaih lutuk vangin a thikthu a chhia anih hi lo ti la, min nin vangin min kalsan tum ngai suh aw" Ka bianga a kut khing hniha rawn dawm pah chuan a rawn ti ril ruih.

" vana arsi te khi ka laksak thei kher lo ang che mahse,i hlim na tur anih dawn phawt chuan engkim tih sak che ka duh thung, eng lai pawhin hlimna ka pe thei kher lo che, ka ti na ngai lo ang che tih pawh ka thiam thei kher lo che,mahse i hlimna tur in nitin in ka theihtawp ka chhuah thung ang" a rawn tih zawm leh sup.ka lo nui var var thung.

" Teuh lo, ka kalsan phal teuh lo che, ka hmangaih che tih i hria alawm" Ka hmai a vawna kut lo chelh ve pah chuan ka lo ti ve sap.

" Ka lawm e, min kalsan pawh tum mahla ka tibuai tho ang che" a rawn ti ve leh sup. Chutah rawn kun hniam in ka hmuiah duhthaw zetin a rawn fawm ta ngawng ngawng ka lo chhang let ve vat bawk. Reife kan in fawh hnuah kan inthlah ve thei hram a tu ve ve pawh chu kan thaw a rang dun kher mai.

" I hria tiraw?min kalsan pawn ka ti buai zel dawn che tih" A awma min kuah beh thlawp pah chuan ati leh sup. Ka lo nui var var thung.

" Minti buai lo mah la keimah zawk hian ka rawn ti buai ang che maw le, hmeichhe dangte kha min han kawp san tum na teh, ka nasa viau ang" Dak deuh ha chung chuan ka ti ve a. Min rawn en chhuk in a kiai suk mai.

" A thleng ngai lo ang tih i hria alawm, because you've got this second hand heart right" Ka chala rawn fawh zauh paha a tih chuan ka lo nui var var mai. Chutah min kuah leh vang vang a ka him hliah hliah in ka lo hre thung.


Kei kum 20 chuang dawn ngaihzawng pawh nei ngai lo in, kawng sira zu rui ka hmuh mipa kha ka bialpa ni in hetiang khawpa hlimna hi ka tawng bua ang tih tu mihring hian nge ring bik ang. Zomuansanga ka nuna a rawn luh dawn vang hi a ni mahna kha leh chen kha Pathian khian ngaihzawng tur min lo pek ve loh. Tu in nge kha coffee dawra rui thu bu luk luk kha hetiang khawpa mipa tha hmangaihna ngah leh thlamuanpui awm a ni tih hi ring thei teh lung ang ni. Mi ten zu rui sa tliah mai mai a an ngaih hmuhnawm thlira an thlir liam mai mai kha ka nuna mi pawimawh ber a lo ni ta si a.


****************

The End