LUNA ILENA CHAPTER - 20

[Lalnunmawii manuntei]

LUNA ILENA


BY


Lalnunmawii Manuntei



Mahruaii chu ka melh ngawt ngawt, kan inkawm a zeng pawh a ni lo, U Hlima te nen vengkhatah an awm a, ṭhian an ni bawk, class khatah kan awm a kan inhmelhriat ve a ni mai a , a thu min hrilh chu awih tur nge awih loh tur pawh ka hrethiam hauh lo.





Ka na te kha a lo thar leh a , keimah ka inkhawngaihna te chu a hma ai zawngin a nasa tawh zawk, ka beisei loh lam tak thil ka hriat vangin ka thinlung chu a mangang ru tak zet, " thil lian tham tak ka ti sual a ni, ka va lo â rei ve, tinge min hrilh daih tawh loh?" Ka hma a mi chu mittui nen ring lutuk chuan ka au khum tawn tawn a , ani lah ngawi rengin min khawngaih hmel zet chuan min en kal thung.




"Engtin nge ka hrilh theih ang che, i hmangaih mi â ang mai a awm khan zep turin min ti a sin, ka ṭhian a nia, a duhthusam chu ka zep pui a ngai tlat; mahse, tunah i hre tawh a lawm, i nat ang bawk khan ka na ve a sin" kan in awm hnaih em avangin a mit bial kal kara mittui chu ka hmu chiang hle.




Ka insut hlawp hlawp a , a thil sawi hi a tak nilo se, ka tun hun pawh hi ka mumang mai mai ni se ka ti tak zet , chu erawh a thleng ngai lo ang, a tak ngei a ni tlat a.




Ka bul vela mi te chu ka hmu phe ruai tawh, ka thil hriat khan min ṭhawng em a tin ni, mahni rila rah fate chu kan hmangaih ṭheuh emaw ka lo ti ṭhin a, ka lo ring sual duai a ni, mihring kan inang loh zia pawh ka hriatchhuah phah, ani khan ral hla tak aṭangin natak tuarin min lo thlir ṭhin dawn chu nia, ti mai a kal tur chuan ka phal lo, ama kã ngei aṭanga thudik hriat hi ka la phut fan.




Zualbawihi leh Matei an lo thlen chuan rang lutukin min lo pan nghal thuai, ka â vekin ka hria, tiang ang nu ṭha leh rilru tluang tak ni a ka lo hriat khan a fapa nunna a la mai chu nia, mipa naran a la ni lo zui duh tak chung a ka thlah liam tak ngei kha a ni.




" Mawite tuar hram hram rawh , ani chuan i hlimna tur a duh vangin a kalsan che sin, kha mi zan a lo kal zan khan thudik hrilh che a tum a; mahse, nangmahah hmangaihna mitmeng de sawr sawr kha a hmuh tawh loh thu a sawi a , ka bulah lo kalin a ṭap a sin, mahse, tunah chuan nangmah hnem tur chein i kiangah Sir Samuela a awm a lawm" min hnem tum viau mahse ka lung a ti chhia in min run hle.




Class pawh kal ta lo chuan min haw pui daih a , ka zia phah chuang lo, zia a hnekin a zual zel si.




An inneihna dar ri lo hre zawk ta ila ka dam deuh tur, thihna hi zawng a tawp chiang em a ni, dawt thu a min ṭhen khan ka na tawk viau emaw ka tia , a thih thu hriat meuh chuan ahma ai zawngin ka na, ka rilru leh ngaihtuahna thleng hian ka dam lo, ka dam thei mawlh lo.




Natna hlauhawm ber thihpui chu ni ngat se zawng tuar dan ka thiam ngei ang, damdawi hlauhawm lutuk over dose a thihpui mai chu, tuartu tan chuan a na em a ni.




A ruang ṭah turin ka kal a rem ve ṭeuh si lo, ka roomah chuan ka sun a , Samuela'n a hriat erawh ka duh lo, lo hre tehreng pawh nise pawi tihna ka nei hran lo, ka lo hmangaih ṭhîn kha nia, min dem bik miah lo ang.




Nitin mai chuan ka sun a, ka rilru leh taksa a dam thei lo, ka hun tawn mek hi ka ngaihtuahna mai mai a nih ringin in thin harh ka tum fo, a tak ngei a ni tih ka hre thar leh ṭhin.




A thihni la la khan apain a nu thiltih engkim a hrechhuak ta vek a ,a nupui mahnise Police kutah a dah a, ani pawn a tuar hle a ni tih mi sawi aṭang ka hre ve bawk. Rinzuali nen ṭangrualin a fapa damdawi an lo pe ṭhin a, khami ni a min lo be tu pawh kha Rinzuali tho a ni, hmeichhe thil tih atan chuan a rapthlakawm zawk.



"Damdawi kan pek apiangin a taksa a zawi vek a , a ngaihtuahna te chu a buai mup mup ṭhin, a bul vel a mite pawh a hre mumal hlei thei lo , mi â nen thuhmun reng an ni" zam hauh loin UHlima nu te chu an inpuang a, nu ṭha tak emaw ka lo tih kha ka ring sual duai mai.




Christmast hlim takin ka hmang ang ka tih pawh ka pumna chhuanlamin inah ka tawm ngawt ngawt a , ka ṭhiante leh ka chhungte tih loh chu tumah ka hmu peih lo, Samuela pawh tiamin.




Lungmawi en turin kan kal ang kan tih pawh ka ṭhulh takah chuan an tum bik lo, an kal tum chhan ber kei ka ni tlat a , ka ṭhiante tan lah kal chi ziazâng a ni lo.




Ka phone ka khawih lohna chin pawh ka hre lo, " phone i khawih nasa lutuk i kut nen a inchar bet ange " an ti fo ṭhin a, tunah chuan khawih chu sawi loh en pawh ka en peih meuh tawh lo.





Kum thar ruai ṭheh lai a ni a , ka chhungte chu ruaiṭheh turin an kal vek a , keimaha awmin ka nunhlui ka chhuikir a , hlimna pakhatmah min thlen lo, lungngaihna bak hmuhchhuah engmah ka nei lo.





Kawngka kik ri kerh kerh vang chuan ka ngaihtuahna ka kawm lai chu ka tawp chawt, "tun ang hunah tunge maw ni le?" Ti niah niah chung chuan inhnuai lam ka pan nghal tharh.




Thawm dim deuh chuan ka hawng a , ka ṭhiante pahnih hmel ka hmuh meuh chuan ka nui ver ver.




" Phone call chhan nachang te hi hre ve rawh, engatan nge i phone kha i tih?" Zualbawihi ang hlawih hlawih chu ka nuih tlawn ta ringawt.




"Ka silent daih " ti ngat ilang chuan a sa leh zâk ang. "Tinge Samuela i biak duh loh a , i phone kha check teh a lo call na che a tlar ṭhup ang, i rilru a na a , i tuar hle a ni tih a hria, a hrethiam vek che, biak duh loh nan hmang miah suh, i inchhir lutuk palh ang" Matei pawh chuan min ngaihtuah takin a lo ti ve siam siam a , ka na te chu ka zia lutuk tawh; mahse, engmah tih chakna ka nei lo, keimahah hian kim lohna riau ka nei tlat a ni.




Samuela chu ka zah lutuk, engtin pawn min ti se engmah ka sawi ve lo ang, ka dik lo hul hual tih ka hria.




Kan ṭhianho chuan kan ri chel chul a , pathum chiah kan awm nain kan inchhung chu riin a khat a ni ber mai.




"Ka chhungte bulah ruaiṭheh tur angin ka insawi vek tawh, hetah kan lo tlang leh sia ka rila ṭam lutuk, enge maw ei tur a awm mial em?" Phone khalh niap niap paha Zualbawihi'n a tih chuan engmah ka ei bik loh thu leh spicy a awm thu hrilhin inhnuai lamah kan inzui tla diah diah hlawm a.





Ka chet peih loh vangin an mahni remhriatna hmangin an che ve zung zung a, an che lai chu ka en mawl tawp.




Chet ṭhan lohna a chet chu eng anga nula senior tan pawh hian a harsa ta ve ang, pasal la nei tur kan ni a, ka huphur zawng tak a ni.




Table a Zualbawihi phone dah chu a rawn ri lang lang a , en tum em em pawh ni loin ka mit sir zuk a, phone screen a hming lo lang chu ka hmu zuk a, ka lehhawi rang kher lehnghal.

( Mistake a awm leh nual maithei, ka hmu phe leh ṭhin, min chhiar sak leh tho dawn u nia.)