STORYFB.COM

DITE

# Vaclav Havel Airport Prague.
November Ni 2 Tlailam dar 5:30 a ni a, Václav Havel Prague Airport Cezch Republic ah kan awm mek a, Khua a vawtin boruak a nuam fahranlo hle. Kan awmna Prague Airport hi khawpui hmarthlang lam tawp a awm a ni a, Khawpui chhung atanga Km 17 vellai a thui tlan a ngai ani nghe nghe. He thlawhna tumhmun hi a hma chuan " The Prague-Ruzyně' tih a ni thin a. October 2012 khan a hming hi thlak a ni ta a ni. He Airport hming hi Czech Republic Post- Velvet Revolution hunlaia President hna chelh, Czech Republic tih a nih hnua President chelh mektu Václav Havel hming chawia phuah a ni nghe nghe. Thlawhna tumhmun lian leh ropui zet mai, A ruala thlawhna lian 10 raul zet tum theihna a ni nghe nghe.

Indian National Army ka nih avangin Czech Republic a Indian Embassy ah Kum 7 zet liamta khan appoint ka ni a, Ka vanneih a siamin post sawn miahloin ka la awm ngar ngar a, Security Officer niin Commanding Officer in ka awm mek bawk. Nikum mai khan helai hmuna thawk ve tho ka hnampui nula Margaret Sailo nen inneiin kan fa nimai tur thla 5 mi ka nupuiin min pai sak mek bawk. Ka nupui hi nu hmeltha leh nalh tia sawi tur em em chu nilo mahse nu fel leh lu zo vehvawh tak a ni a. MA ( Pol ) a zawh hnuah Law a zir leh a, Ministry of External Affairs hnuaiah Foreign Advocate in a awm a. Kei aiin Kum 2 in Prague ah hian a awm hnuhnung zawk nghe nghe. Nupa hlim tak kan la ni rih a, A nu Damlohna vangin ngaihtuahawm taka a awm avangin chaklo ( weak) leh rittak chungin India ramah Hawng turin a inbuatsaih a, vawiin hi a chhuah tum ni a ni nghe nghe.

Airport a mi zi nuaih nuaih karah chuan Christian Missonary Mr. Robert De Souza hmel ka melh kual a. He Christian pa nen hian Ticket la dunin ka nupui kawng laka a buai lohnan buaipui turin ka duh avangin Fellowship hmang tura a hawng tur ka thurual dun tir tawp mai a ni. Pu Roberta hi Goa lam chhuak ni mahse Protestan kohhran PCI Pastor a ni a, Czech ah hian Rawngbawlna neiin a fanu nen an awm a. Kum 20 chuang lo awmtawh a ni nghe nghe. Nupui Canadian Punjab a nei a, fanu kum 18 mi Díťé tia an koh fanu an nei nghe nghe a.( Dite tih hi Czech tawng a 'Naute' ( Baby ) tihna mai a ni a, apa in a koh duatna a put hlen tak a ni. A hming tak chu Rose Mary De Souza" tih a ni daih thung, keini pawhin, a hming tak aiin a pa kohduatna hming hian kan tilang zel dawn a ni) Dite-i pian avang hian a thisen a chhuak nasa lutuk a ni 2 hnu lekah Pi Anjali hi a boral ta niin an sawi. Amah Pu Roberta sawi danin Khatih lai khan Czech Republic thingtlang hmun kilkhawr tak leh vur tlak tamna deuh hmuna an awmlai a ni a, doctor emaw damdawi lam thiam emaw tumah an awmlo, an buai buai in an buai ve em em ringawt a. An nu hliam tuar mu reng kha Km 120 chuang tehmeuh bawng tawlailra phurh a ngai dawn si a. An in en hlum that a ni deuh ber mai a ti. A hrehawm duh dawn hlein ka hria.

" Mr.Samuel inlo thleng tawh reng a ni maw?" ka hnung lam atang chuan Pu Roberta chuan a rawn ti a. Pa sang zen deuh vun rawng var lutuk biklo, Mahse hmaifang tha deuh mai ruhrel lian ru tak mai a ni. Kan inchibai lawp lawp a " Hei hi Dite ( Baby) a nih hi" tiin a bula ding hmel fai vang mai chu min kawh hmuh a. Kum 6 liamta a ka hmuh bak ka hmu lehtawhlo a, a lo nula ve tawhin a tituai pawh a nalh ve tawh hle. A nu thlalak ka hmuh nen danglamna an nei tlem hmel hle. Jacket leather uk a ngawng leh lukhum sahmul var atanga siam a ha a, lukhum bengkhuh hruai uai diah mai a khum bawk a, muffler tial a ta tur renga siam ni awm hliah hliah a awrh bawk a, " Ka hmu che u a ka lawm hle mai" ti pahin a kut a rawn phar chhuak a, kan nupa chuan kan chibai a. A ti ti barh barh lemlo, a nun a zuai raih a, a kul raih niberin ka hria. Engtiklai pawn apa kutah a dawm reng a. Zawi sap hian a ngaihtur thu a sawi leh thin a. Kan nu chuan a thiam ang tawkin a hnemin kawmhlim a tum a. " Ka vawikhat zinbo sanna tur a ni, Ka zinna apiangah ka hruai ziah thin a, Mahse tuntum chu hun a nei ve theilo hlauh mai a, kan inkalsan lothei silo a, hrethiam teh u" a pa chuan a ti a, kan nui ham ham a. Minute 10 tha zet kan nghah hnuah an chhuah hun a thleng a, an chuanna tur thlawhna lam pan chuan an inzui lut dun a. Dite nen kan hmangaihte 2 thlawhna chhunga an lut tur chu kan vai liam dun lauh lauh a.

"Hmmm... Engtia awm nge i tum?" tiin a mitmeng vai riai mai leh tah tuma men deuh par chu ka besawm nghal vat a, a mittui tla mai tur hruk mawlh mawlh pah chuan " Ka hrelo, Prague ah Lavente Theater ah Enlawkna kan nei dawn a, chumi lam chu ka pan ang" a ti a. " oh Orchestra ah i tel ve elo" tiin a tui zawng niawm a ka hriat chu ka sawipui nghal vat a. A tel ve thu leh Thla thar ah ' Live 8aid' concert an neuh tur thute hlim takin a sawi siam siam a., pawn boruak hik ngut mai kan thleng a, " Engtia hawn nge i tum, kei Embassy motorin min nghak a,,Hawnna i neihloh chuan theater thleng kan thlah kawi dawn che em ni?" tiin ka zawt a, " Nia, Cab kan hmanga, in tih theih chuan ka lawm khawp ang chu" tiin nui sen sen chung chuan min melh a. Chu Indian Portuguest leh Canadian Punjabi thlahpawlh vun mawi leh hmeltha pianthiam zet tleirawl nen chuan Driver in minlo nghahna lam Car parking zone lam panin kan kal dun ta hlawk hlawk a.

Central Park an tih mai hmuna Lavente Theater lianpui mai ding luah kawtah chuan a chhuk a, " Ka lawm lutuk, Pu Samuel, ka hmu che a ka lawm khawp mai" tiin min bia a " I ngaihtuahawm lo ang maw?, engemaw thilah harsatna i neih chuan Embassy ah ka awm dawn a, min rawn be vat dawn nia?" ka ti a " awle, harsatna a awmlo turah ngai ang, kan la inhmu leh dawn nia" tiin min bye bye hnuah Entry gate lam panin a kal kun phei chan chan a. A luh fel hma chu ka thlir zui reng a, " Sir,,a va nalh ve mawle" tiin Sipai Driver Annupa chuan a rawn ti a. Ka bu nghut a. " a vawt emai, Embassy ah Pi Sandi Coffee sa in a chakawm a lawm kal vat teh ang e" ka ti a.,Embassy lam pan chuan kan tlan vang vang a.

Ka office Chair ah thuin Prague khawlai a vur tla seng seng chu ka hnung lam tukverh atang chuan ka thlir a, Ka nupui zin chuan khua a ti har rilru hle mai, Krismas hma in a rawn hawng hman a ngem? A nu chanchin a zir in a rawn hawng hman emaw hmanlo emaw pawh a ni thei boruak in a hrilh ang chu. Rawn haw hman ngei se titen ka rilru ka kawm malh malh a. " Sir, kan hawng tawh mai dawn a sin?" tiin Staff pakhat chuan min rawn bia a, " awle. Keipawh ka hawng nghal a ni mai" tiin ka drower pawt hawngin Silai leh chabi ka la chhuak a, Ka inkalh fel a, Banga ka Over coat khai leh lukhum lum khai chu ka la chhuak a, Bell ka hmet a, Pi Sandi a rawn lawr vat a " kan hawn a hun ve tawh dawn bawk a, Coffee ka lo dawm leh lawk a nge?" tiin ka lo bia a, Ka emergengy signal a rawn de zak zak a, Phone lain control room lam ka be pawp nghal a. " Sir, Indian Airline 7027 Zanin tlai dar 6:00 a chhuak kha Indian Ocean chung zawn ah khawllam chingkuan loh avangin an chesual a ni awm e" tiin Operator chuan min rawn bia a.,ka bing mup a,," i chiang maw?, Confirm nawn leh teh" ka ti nghal vat a " final confirm zo vek tawh e, Zan dar 9:30 ah an signal hmuh zawhloh a ni" a rawn ti leh nghal a. " Infilormation dang kan hmuh vat a ngai, Indian Air Line min thlunzawm nghal teh" ka ti zung zung a, Pi Sandi chu ka bulah Coffee no keng chungin a lo ding reng tawh a " I.A Seventy Tewnty Seven a tla a nih hmel" ka ti bul nghut a. Ka thuthleng ah chuan ka thu hnawk a. Mak ti hmel deuhin min en a zawi sap hian " Pi Margareti?" a ti a min en a, " Aw" ka ti a. A hmui a hup a, a chek tlak tlak a.

Engkim a chiang tawh, thlawhna chu Indian Ocean chunga an thlawh laiin chhum dum chhah tak leh thlipui na takin a nuai a, tek in a khawl a den chhiat vangin an tla ta nia sawi a ni a, Indian Ocean chhungah hian Zawn nghal an ni nangin engmah Blackbox signal pawh hmuh a la nilo. A lan dan chuan thlawhna chu a bung hmawk nia rin a ni. Passenger 430 an chuang a,,Thlawhna hnthawk mi 10 nen tumah la hmuhloh an ni. Ka rilru a chawmawl a, engmah ka sawi theilo. Keimah chauh nilo Indian dangte pawh an dul ruih vek a ni ber. Zan dang chu nise Embassy office chu a reh leh deuh duak tawh ngei ang, mahse zan dang anglo takin kan zi nuaih nuaih a ni ber. Ka office lamah phone call ka dawng chamchi bawk a. Rilru buai nen a hrehawm duh kher mai. Ka chhungte lam lahin tap pur chungin min rawn be sek mai si a. Ka nupi chanchin engmah hriat ka nei bik silo. Chutianga darkar 3 dawn kan buai tawh hnuah ka phone ah Msg ka deliver tlat mai a. Ka en vat a, Ka nupui number a lo ni a, Dar 4 liamta a min thawn daih tawh kha a lo ni a, ka hawng a ka en vat a " Ka hmangaih che...Kan tla ngei dawn a nih hi, Dite kha i lo ngaihven sak dawn nia" tih zawng a lo ni a. An tlak hma, an tla ngei dawn tih an hriat tawh hnua kan nu in a type a nih ngei ka ring. Ka mittui a hnam sawk a. Rilru fim put a harsa kher mai. Mahse, kei anga rilru buai leh thintawt buaipui tur neilo tam tak an awm tih ka hmuin ka hre reng si a, ka intipachang hram hram a. " Sir, Nula pakhat in a hmu duh che" Sandi chuan a rawn ti a, ka chhan hma chuan Dite-i tap par chunga rawn lut ka va hmu a, ka tho vat a, a rawn tlan phei a, ka awmah a bei thlawp a, a tap ta hawk hawk a.

" Engmah tihthei kan neilo, tawngtaina chiah kan tihtheih awmchhun a ni. Engkim a la tawp mailo a nia" tiin ka hnem mawlh mawlh a. Engmah a sawilo, a tap ngat ngat a ni mai. Pi Sandi hnenah chuan thilawmzia ka hrilh a. Min chhuahsan vat a. A hnuah Coffee satha vervawr leh napkin tel a rawn chawi lut a " Bawihi, hriatthiam harsa tak tur a ni a, mahse engmah thil tawp a la awmlo a nia" tiin a rawn fuih ve bawk a. Engmah a la sawilo, a la tap hawk hawk reng a. Ka chan ka ngaihtuah a, ka tuar thiamlo hle mai, Ditei chan ka ngaihtuah ve leh a kei aiin a tuar nasa zawk hialin ka hria. Nu leh pa u leh nau thlamuantu tur a nei ve silo, a nu a boral a, tunah a pa, engvanga kum naupangte ni chunga hetiang thil a tawng hi mak tihloh rual a ni hauhlo. A nat dan tur pawh ngaihruatsak thiam harsa tak tur a ni.

Information hrang hrang in anglo tak tak kan dawng zut a, kan dawn zinga lawmawm lam hriat tur a awm lemlo, Ka nupui ruang leh Pu Roberta ruang chu kan hmu leh a ngem? Nge kan hmulo ang, tuifinriat sangha koham tak tak ten an pet zo vek tawh zawk ang? Tiin rilru avak ruai a ni ber. Khami ni atang a ni 7 zet a liam hnuah pawh engmah thu thar hriat tur a la awm chuanglo. A tlakna zawn nia an hriat atanga Km engemaw zah an zawn hnuah pawh thuthar hriat a la nilo cheu mai bawk si a. Bei adawng ta a ni ber., Ka nupui sunna hun ka hmang der tawh a. Engmah ka ngaihtuah thei tawhlo, Mizoram lama ka chhungte pawhin Mizo danin Ni 7 zawn a nih hnuah a ruang thlahna hun an lo hmang ve bawk a.,Engkim a tawp nita berin ka hria. Chutiang chuan hrehawm ti takin hun ka hmang chho a. India sawr kar in thlawhtheihna a chesual te ruang thlahna leh a hukpuia zawnna hna kharna programme an siam chu kan tawmpui lo theilo si a, rilru na tak chungin he khawvelah tawng leh ngai tawhlo turin ka nupui duhtak chu ka thlahliam ta vung vung a nih chu.

Dt. 24th December @ 10:30.
Indian Embassy atangin ka hawng a, Ka nupui boral a tanga thla khat leh ni 22 na chiah a ni a. Krismas eve a nih vangin Embassy boruak pawh a ziaawm viau a vangin Ka nupui boralta hre reng chung leh Nikum lama Krismas urlawk zan hlimawm tak kan hman dun dante hre reng chungin kan flat luah lam pan chuan Embassy motorin ka inthlah tir a. Zan Dar 10 hnulam tawh nimahse Khawlai a teichhuak hmuh tur an la awm zut nghe nghe. Lavente Theater zawn kan tlan pelh lai chuan Dite ka hre chhuak zawk a, "vawiin ah Show an nei dawn tak kha maw" ka ti rilru a, ka sana ka en vat a. Zan dar 10 ah show an tan a, tunah darkar chanve a liam awrh a ni a, a lo berah darkar 2 emaw Darkar 1 1/2 emaw an concert tlangpui thin avangin driver hnenah chuan "Hetah hian ding teh, Min hawnsan mai la, Show ka en ve lawk a nge" tiin ka chhuk san a. Theater lam chu ka pan ding nghal vat a. Gate ah minlo tiding a, Ditei'n Special card ( an chhungte tan seat khat an pe ve thei thin ) a pa tan a tih a pa boral tak vanga min pek chu ka hmuh hnuah " Sir, i tlai thleh a ni" tia nui vur vur chungin min luhtir ta a.

Theater chhung ka luh chuan Bethoven Ballads instrumental nalh em em mai hi an lo play ruai ruai a, ka ticket cabin awmna lam panin step ah ka chho hlawk hlawk a ' Cabin 12' tih intarna kawngka chu zawite in ka nam a, a inhawng a ka lut ve nghal a. Cabin chhungah chuan pitar leh putar hausa hmel tak tak nupa niawm tuak 2 niawm tak an lo thu a, ka lut thawm paqh hrelo ang maiin stage lam ringawt chu an lo thlir a. Steward lo ding zar mai hnenah ka card ka hmuh zauh a. Thutna awl 2 la awm lam chu min kawh hmuh pahin Enlenna te reuh te humbo tham lek tur awm hi min pe nghal bawk a. Thutna awl ah chuan ka zuk thu ve thawr a, ka bula thu pitar hmai tlang chhe vaklo hian min en kal chung chuan " I van tlai ve, i fanu hrilh a hai lutuk tawh ang" a lo ti sa sa a. " ka tih palh lutuk ka..." tiin ka thusawi tur chu sawi tlang leh duhlo in ka tawp san a, a nui var var a, " an thiam kher a sin" a ti leh a, " ka beisei ang chiah a nih chu, ka lawm e" tiin ka thuthmun ka rem tha sauh sauh a, Chung Musician thu tlar thup ten lungkuai zeta an music playna lam chu ka en ve ta nghal a.

"Awle. Tunah 2nd November a Indian Airlines chesual a telve, Kan Pionist Miss Rose Mary De Souza pa Mr Robert De Souza leh a ngainat em em Mrs Margaret Sailo te pualin The Symphony No. 3 , Symfonia pieśni żałosnych an tih bawk Polish Composer ropui Henryk Górecki a phuah kan lo play ang" tiin Conductor chuan mipui thu hmur maite bulah chuan a ti a. Theater chhung chu a reh duk a. Chutah focus light paw phut mai chuan dawhsan a thu nula sam dum kir lek lek thla hninga mai, kawr dum fual hnalh ha, Piano var vuh mai bula thu, a piano chunga Rose senduk leh a var in pawlh bawr let ngat mai chu a chhun ta phut a. Dite a ni tih ka zuk hre nghal mai a. Ka lense chuan en vat a. A hmel chu a dawldangin a mit a tla deuh dak niin ka hria a. Chutah lungkuai fahranin Piano a rawn khap tan ta a. Voilin a rawn pawlh a, Bass in a pawlh leh a, Symphonic music instrument hrang hrangin a rawn zui ta ruai ruai a. Ka hmulthi a ding sung sung niberin ka hria. He hla hi Khawvela Tear Jerk music an tih mai music lungkuai tak leh ropui ber hiala an ngaih a ni bawk a. Theater chhunga thu mipui sang rual dawn thu hmur mai chu an ngawi thuap mai a. Music an play zo a, chutah Dite piano khap nalh em em ri zawi tial tial chord chiah chuan hmeichhe aw nalh leh ropui zet in loud voce hmangin a rawn backup chho a, Piano in a chawm bawk a. Thawk lehkhatah Hmeichhe au chu a reh duak a, Piano khap fan raih leh Voilin muang fan raih mai zui chiah chuan Hmeichhe aw nalh zet chuan " O little town of Bethlehem" tih chu fan elkhiang mawi zet maiin a rawn sa zui nghal bawk a. Thin a phu dup dup a, ka bula pitar thu chu a inhnit faih faih a, ka rawmawl ka pe vat a. " a lungrun em a ni, khu nula khu ka lainat tak zet a ni, a enge i ni?" minti he haw a, " A unty kha ka nupui" zawi sapin ka ti a " oh ka tihpalh" tiin ka biang a mittui luang ngiai ngiai chu min chul sak nghal a. Mipa in ka pa ka ti zo nanglo a ni ber.

Theater ka luh atanga Minute 25 vel zet hnuah Moonlight Sonita ( Beethoven ) leh We Wish you a merry christmas Messiah : Halleluiah Chorus medly hmangin programme an khar a, Hetia music an play chhung zawng hian Dite chu ka en reng a, a chezia reng reng chuan a mahah nghawng nasa tak a nei tih a hriat ngawih ngawih a, a khawhar hmelin a ruak hle ni maiin ka hmu, Thla khat lek liamta a thil thleng chuan engkim ataksa leh rilru ah a thlak danglam niberin ka hria. Ka thutpuite nen kan in chibai liam liam a, steward fel tak tanpuina in cabin atang chuan an chhuak a, kei erawh ngawi rengin ka thu a. Engtia kalzel nge chi ang? Dite i chu ka hmu dawn nge? Ka hmuh chuan boruak a ti hrehawm mai mai a ngem? Hmuh nge hmuhloh tha ang? tih vel ka suangtuah a ni ber. " Sir, kan close tawh dawn a sin" dam dapa Steward in a rawn tih takah chuan phur fahranlo chuan chu cabin lum nuam tak mahse boruak rit churh si atang chuan ka chhuak veta nge nge a.

Theater kawtah chuan ka ding a, kalna lam tur ka la siamfel thei chuanglo, ka rilru a la buai viau mai, car nalh zet hi ka bulah a rawn ding a, a tukverh glass chu a inhawng tial tial a, cabina ka thutpui pitar kha a lo ni a " Tlangval i note chu a rawn la chhuaklo em ni? Minlo chibai sak la, hei hi i lo pe dawn nia, ka ralna nive tehse, zanin chu amah vang liau liau in kha show kha ropui ka tiin ka kallo ang tih ka hlau takzet a ni" tiin lehkha them inthlep hi min hlan a. " Chrismas hlim takin inhmang dawn nia" ti chung zelin kan invai liam ta a. Ka tumloh thil ka tawng a nita ber, hmuh tumlo eltiang mah i la, thu ken tur leh thilpek a dawn tur ka kawl ta tlat mai si a, ka hmuh ngei chu a ngai dawn a ni tiin back stage kawngka lam pan chuan ka kalta a.

Reipawh ka din hma chuan Negro palian zet mai kawrlum chhah zet mai ha kut phah hrawl hrup mai chuan kawngka a rawn hawng a, Musician ho chu inthuamlumin an rawn chhuak thliah thliah a, a then chuan min melh eihlo, athen erawh chuan min thlek deuh ha ha thung. An chhuak nual tawh a, Dite i hmel ka la hmu mailo a, Pa upa hmel lam deuh Voilin tum zinga mi pakhat rawn kal chu ka lo ti ding a " ka pu Pionist nula kha a kal tawh em ni?" ka lo ti chawt a, min melh deuh vung vung a " Conductor nen an rawn kal tep ang" a ti bung nghut a, a kal sawn lehnghal daih a. Chutih rual deuhthaw chuan Kawngka ah chuan an conductor kum 40 vel hmelpu chalthui lam deuh ring sei etawt tak mai leh Dite chu an rawn chhuak dun a, eng emaw hi Czech tawngin an rawn sawi chhuak nawk nawk a. Dite min hmu chu a ding chat a " oh Mr.Samuel i lo la awm elaw? Khua a vawh vawh nen minlo nghak em ni?" aw zang vah hian a rawn ti a, " nia, thil hrilh tur che ka neih bakah hei" ka ti hman chauh a, " oh uncle Sama maw? Danny Anthonkove ka ni e, i tunu hi talent a neitha a nia, naupangte si hetiang taka ropui a nih hi, chhunga hle rawh, taka i nupui vangin pawi ka ti khawp mai" tiin conductor chuan min rawn chibai nghal vat a. " ka lawm e" ka ti ngawt a, " Miss Souza ka kalsan mai ang che u, thlah i ngaih dawnloh hi" tiin a vah kuah a, a biangah a fawp zauh a " Nina leh naupang minlo biak dawn nia, Krismas chibai ka buk a nia" Dite chuan a ti sap a, Kun khau khau chungin Car parkna lam pan chuan a kal khan khan a.

" a ropui hle mai, khatiang tak kha i nih ka lo beisei lo a" ka ti ve ngawt a, a nui mai a, " taka hei i lehkha tur cabina ka thutpui pitar in min pek a ni a, Tin, Krismas chibai a buk bawk che" ka ti lehnghal zat a, ka kuta lehkha inthlep ka ken chu a la a, a hawng a, a mittui a hnam nghal tial tial a. " engthil nge ni a?" ka ti vat a, lehkha chu min pek pahin " Mrs Rebecca a nih dawn chu" a ti sap a. Ka lehkhapek chu ka en a, lehkha awzawng a lo nilo Swiss bank cheque euro singkhat lailak theihna a lo ni a, " Wow Rebecca Queen of Alsavin Island maw?" ka ti hu a. A bu nghat a, " Ka in ah nge kan kal ang, bar ah?" a rawn ti tham tiak a. Ka ngawi reng a. " Bar a kal chu ka phur lemlo" a ti leh sap a. " ka flat ah kal mai ang aw, i in a kan kal chuan i pa sulhnu a tam awm si" ka ti a. remti tih hriat takin a bu ngat a. Taxi rawn tlanlai chu ka lo hui zauh a, kan bulah a rawn ding a " Royal Boutigue Residence, 207 Palace road " ka tih hnuah Taxi chuan kan tlan ta vang vang a.

Ka flat luah hi a hming ang deuh khian Mi challang leh hausa tak tak ramdang mi leh tualchhung mi zin vak leh hnathawk a awmte tana luah hawh a nih vangin a nuamin a class pawh a sang hle. Duh chuan mahni a eisiam theih a ni a, a duhlo tan chuan order theih a ni bawk. Engkim buaipui tu tur an awm vek nghe nghe. Ka flat luah ka ti takna a, ka nupui in a luah ka fin ve zawk a ni mah. Hetiang ang flat ropui leh changkang ah hian ka khawsa ang tih ka ring phak ngailo hrim hrim. India sawrkarin 50% a tum ve a vangin to uchuak takin kan luah biklo ang a ni a. Kan senso pawh a sang lua biklo. Chhawng 12 a sang a ni a, chhawng 9 na a Flat number 014 ah kan khawsa a ni.

Security ( Gate keeper ) Molchove kum 60 vela upa mihang putar chuan nui vur vur chungin minlo welcome a, ka buk khum nghat a, Ka kalpui chu a thlir zui dauh dauh tih chu kawngka darthlang thla atang chuan ka hmu thei a. Reception desk kan thleng a, " Honey mail dawn ka nei em?" tiin nula lo ding hnenah chuan ka ti a " nei pawn ka hrelo" a ti a, a nui sen sen a. Lift bulah chuan Roy a lo ding a " Happy chrismas Mr.Samuel" a lo ti a. Dite chu a ke ler atangin a enchhuak dap niberin ka hria. Ka chhan hnuah lift kawngka chu min kian a, rang taka rawn lutin " in va buai awm ve? I hun i hmang pelh tlat" tiin ka flat floor number chu a hmet zauh a. Ka ngawi reng a, a chezia chu a danglam in Dite hmuh lai chuan zei thlap a thil tih a tum tih a hriat kher mai. Ka flat kan luh dawn chuan " Zanin chu mikhual ka nei nual dawn a, Snack tam tawk ka duh dawn aw" tiin tip ka pe zauh a, " Marry Christmas Mr Samuel and you too" tiin Dite chu a siai pah zauh a. Engmah sawi tawhlo chuan inchhungah kan luhsan ta daih a.

Ka flat luah ah chuan Indian Kristian chhungkua 4 vel leh Embassy a ka thawhpuo te bakah Sipai 3 leh Dite an awm a, Kan thu bial a, kan ti ti ho laih laih a, Indian politics leh thildang kan sawi ho ber. Manmohan singh a sawrkar hunlaite, Modi sawrkarin India a sawpkual dan leh hmasawn na zuan nasat ziate, Gandhi Family chungchangte, Kumthar a Election neih tur chungchangte kan sawi kual a ni ber. Chutianga kan ti ti karlak ah chuan ngawi renga kil khata tu Dite chu ka va melh zauh zauh thin a, engemaw tak ngaihtuah a nei niberin ka hria. A Tablet chu a hai neuh neuh reng a, a bengah Music ngaithla tih hriat takin a invuah tat bawk a, kan ti ti engmah hrelo a ni tih a hriat hle. Chutiang a zan rei tak thleng kan ti ti hnuah kan thian thenkhat chuan hawn a tum ta hlawm a, kan in mangtha liam liam hnuah Dite insiam malh malh lai chu ka va hmu a, Zan ka ti nangin zing lam a ni deuh mah zawk awm e, " khawnge i kal dawn?" tiin ka zawt a, " ka hawng dawn," a ti thawp sat a. " oh motor i nei chuang hleinem" ka room ah khan mu la, naktuk ah i hawng dawn nia" ka ti a. Ngawi reng chuan a bungrua themlem tak chu a ipte ah a khung malh malh a, a rawn hawi chhuak a " Mr.Samuel ka thian ten min rawn lam dawn a lawm, min ngaihtuah duhsuh, engkim chungah ka lawm e" tiin min rawn pan hnaia ka biang vawt thlur maiah chuan min rawn fawp zauh a, zawi sap hian " Happy Christmas" a ti a. Tichuan engmah sawi leh tawhlo chuan Ka flat kawngka atang chuan a penchhuak ta hnak hnak a. Chu chu Kum 3 hnua Dite ka hmuh tawpna ber tur ni a ni dawn tih ka hre reng renglo. " Naupang khawngaihthlak tak a ni" tiin ka phun sap a.

After 3 Years.

" Good morning sir, I room ah nula pakhat in a nghak reng tawh che" tiin Denise ka Private secretary chuan ka office kal chu minlo welcome vat a " Eng a? ka office ah ka awmloh laiin tunge i luh tir a? I dang zolo a maw?" ka ti nghal hlur a, " englo a nia sir, ka dang chung pawn a lut lui tlat a lawm" a ti bah nuaih a, ka room kawngka chu a kau deuh a, tlem ka nem kau a ka office chhunga thu chu tunge hre turin ka bih dak dak a. Nula pakhat Jeans kekawrbul ha tai mai, leather jaket hnawk hmel deuh ha a, Boot khup thleng deuh thaw a sang bun zaih mai bawk a ni a, a sam chu color hrang hrang a tial buai niberin ka hria, a bengah earphone a infuah bawk a. Duhdah deuhin visiting revolver chiar ah a thu a, a inthen hlauh hlauh a. " tunge ni phiangsen chu le?" tichungin ka lut zui nghal a, ka lut thawm pawh hrelo niawm tak chuan a thutdan ngaiin a thu reng a, " Hei, Miss tinge thupek hmuloa hetilai hmunah i luh ngawt mai le?" ka ti lut nghal bawng bawng a, engmah hrelo awm tak chuan a thutdan ngaiin a lo la thu ta reng a.

" Ka biak che chu i hria em?" tih pahin a darah ka zuk khawih a, Sunglass dum lian hlup mai a buna a rawn dak a, a nui var var a " Wow longtime no see Mr.Samuel" tiin Dite chu a au ta hlut a, a ding a, min kuah nghal chuk chuk a, " ka ngai thei lutuk che a, Czech Republic ah ka rawn tlawh dawn che a, i lo insawn daih a. Nimin ah Cairo hi ka rawn thleng ve hlawl a nih hi, hetah i lo awm reng tih ka hre bawk a, ka hman velah ka rawn tlawh che a nih hi" a ti nghal bawrh bawrh a. Ka hma a ding naupang duhawm deuh nithin tuna Hippie ho thuam ang maia inthuam nula chu ka en reng a, mak tihna in ka khat a ni ber. A hmel a danglam ve tawhin a upa hmel ve sawt a, a biang a ki deuh van tawh a, a dawldangin a kareh a lang zau lek lek bawk a. En mai chuan Indian thisen kai a anglo a, Europe mi awmtha duhlo a ang ber. A hmel upa ve sawt chuan a tilang hmeltha zual sauh emaw tih tur a ni a, a sunglass a lak thlak hnu phei chuan a lang duhawm lehzual. " Mak i va tiawm ve?" a ti hu a, ka kawngka a mak tihmel deuha ding Danise chu ka signal zauh a, " Nia, heti teh hlawl a ka hmuh che ka ring phaklo a ni" ka ti a. Ka thutna ah ka thu a, Khang kum 3 chhung khan khawnge a talbo tih zawh chu ka chak viau nangin engmah ka zawt duh lemlo. A tawng siam siam a, Cairo boruak lum ziate, mahse nuam a tih ziate a sawi hlut a. " Enge Cairo ah inrawn tih dawn reng reng a?" ka tih chuan a ngawi vang vang a tukverh lam chu thlirin " Ka thiante nen kan zinkual vel mai mai a, kan rawn thleng ve tawp a nih hi" a ti liam puat a, ka ngaih atha zanlo, a chezia leh hmel a mit val duk deuh lek lek te chuan eng emaw titakin awm an tinuam chiahlo. " Concerto" ka ti ngat a, " Kum 3 ka chawl tawh" " oh khami zan kha last moment tihna maw?" " aw" kan ngawi dun reng a. " I pa chuan hriase" ka tih chuan a thutna atanga thoin " A ni hriat leh hriatloh engahmah ka ngailo, He khawvelah keimah chauha min hnutchhiah bik hi an thiamloh a ni. I mood fuh deuh hunah kan inhmu leh dawn nia" tiin chhuah tumin a inher hmak a " Dite ngawiteh ka sawitum i manlo a nih kha" ka ti pawhin kawngka lam a pan zel a. "Tura Palace No.237 @ Rhoda Island" tiin ka address ka sawi zauh a, a ding det a, chumi hnua a rawn lehhawi a, mittui luang ngiai avanga eyebrow dum kawi niaih mai hruk pahin " ka lawm e" tiin a phun sep a, a chhuak ta nghal a.

A chhuah hnu chuan ka rilruah a awm ta reng a, Khang kum 3 chhung khan engthil nge a chungah thleng a, enge a tih ang? Khawiah nge a teihawi ang? Music a play talo a nih si chuan enge a tih ang? A khawsa zia kha Missionary fanu chezia a ang lo kher mai. A mitmeng dul raih mai khan thil tam tak a tawng tih a hriat thei ruau chuan ka hria. Tunlai khawvelin a tuam thalaite in lehlo mumal pawh neilo a zinkual chiam chiam thin zingah a tel ni ngeiin ka ngai a. Ka ngaihtuah zawng ngawt pawhin ka tim sung sung thei zawk hial a. A chhuah dawna a thusawi " keimah chauh a awm turin min kalsan" a tih lai tak kha ka khawngaih zualna a ni. Pu Roberta nen khan a hranpa a in belbulna kan nei hranlo, Kristian a nih avangin ka inhmelhriat a ni mai a, Ka nupui nen khan an in hmelhriat tha a, Rawngbawlna kawngah pawh an thawk dun nasa ve thin hle tih a ni mai a heti taka a fanu in ka rilru a luah a, ka fanu ang maiin a awndan in ka rilru a tina chu mak ka ti a. A ni pawhin vawitam pawh kan inhmulo a nih laia ka awmna chin hriain ka office ah hial a rawn lang hlawl chu mak ka tive hrim hrim bawk a ni. Chutiang vel ngaihtuah chuan ka thu reng a. A hnuah Ambassador hoa meeting turin Meeting hall lam panin ka kal zui ta nghal a.

Cairo ah thla 3 emaw chauh ka la awm a, Mahse Event lian tak tak kan buaipui hman nual, Dite rawn lan hnu lawkah India Exnternal Affairs Minsiter Anna Kumble a rawn zin avangin kar khat dawn kan buai a, chumi hnuah Coccaine vangin Embassy ah kan buai chiam bawk a. Chutiang chuan eng emaw neuh neuh kan tawk reng bawk a, hunawl pawh ka nei tamlo kher mai. Chutianga hun ka neih loh hnua ka awl deuh avangin Chawlh lain Ka awm mek a, Cairo chhim lam a Nile lui kama Resort ah ka hun ka hmang dawn emni ang aw ka ti a. Programme ka duan lawk dan tur ka hisap mek lai chuan ka Flat phone chu a rawn ri ral ral a ka pickup vat a " Hello Maj.Samuel CO Indian Embassy Cairo" ka ti a, " Major kan tihbuai che avanging ngaihdam kan dil hmasa a che, Cairo Central Police Station atangin a nia, Captain Aslim ka ni, Hei Indian nula in tawhsual a tawk a, Embassy lam kan biak a duh silo a. I leave hmang kan rawn tibuai lawk duh che a ni" a rawn ti a " Rose Mary De Souza" ka ti nghal vat a. " Aw..I hman chuan kan lo kawl sak che aw" tiin kan inbiakna a titawp a. A thu rawn thlen hmangin ka hruai an phut tih ka hrethiam mai a, Motor lachhuakin chak takin Central Police Station lam pan chuan ka tlan ta nal nal a.

Zanriah kan kil dun a, Police station atanga ka va hruai hnuah a inbual a, nilengin a mu a, a muthilh hlanin ka bazar a, a inthuamna tur ka thiam ang tawkin ka lei sak a, Tlai dar 7 ah phak luaiin a rawn tho a ( Egypt ah hian nipui lai chuan keini zan dar 7 angah hian Ni a la tlalo chawk thin) Shower ah a inbual hnuah reitawk room ah a inkhunga ei ka peih hnuah dinner ei turin kan thudun ve thei ta hram a. " Enge i an, i tha maw?" ka ti a, " ka tha a lawm" a ti ringawt a, ka be chhunzawm lem talo a, Kan ei dun mawlh mawlh a. Kan eikhamah kan mahni chet chetin kan che dun lehnghal malh malh bawk a, " Ka tibuai che a min hrethiam dawn nia, tunah chuan engmah neih ka nei rih silo a, ka thawhchhuah leh hunah heng thuamhnaw man hi ka rul leh dawn che nia" a ti thawp sat a. Ka nui mai a. Engmah ka sawi duh biklo a. A hnu ah Televison hma ah thu in BBC news kan en dun a, " Errrh..tinge hna i kalloh a" a rawn ti leh a, " ka chawl a" " tinge" " ka chawl ve lawk" " Vacation programme i set ka tibuai che em?" " tibuai lo e,,plan ka nei lemlo naktuk lamah erawh Golf khelh ka lo tum rilru deuh a, mahse kalsan thei che ka nisilo a, ka thulh leh mai ang?" ka ti a " oh chupawh ka ti buai lehta a ni maw" " nilo minti buailo" ka ti a. " ka lawm e, nanglo chu chhungte dang ka nei silo a lawm le" a ti zuai raih a. Ka en a, min en ve kal a, " ka lawm e, keipawh nanglo chhung dang ka nei bik hleinem" ka ti let ve mai a. Chutiang chuan zan chu kan tumtawi ve mai bawk a, ka khumah ka riah tir a, kei Sitting room a couch chungah ka mu thung. Zing dar 2 velah pawh a la muhil lo tih ka hria. A vei tawn sek a. Thawm a dim em em bawk silo a, kei ralkhel dar ngaichang renga hun hmang thin chu ka harh ve deuh reng thin bawk a. Kan mutlem dun hle.

Artui kan rim nam chem chem chuan ka muhil min ti harh a, uluk takin puan minlo sin tir a ni ngei ang, ka thu chhuak a. Choka lam ka thlek dak dak a.,Headphone vuahin ka sipai tawnzau ramrawng a ha a, Paijama ka leisak, dul hnak in a ha bawk a, ka hmu tih a hrelo a niang a zai rat rat a, a lam pah auh auh bawk a. Ka tho a, choka lam ka pan a, min hmu chu a headphone a la thla vat a, " Goodmorning" a lo ti vat a, ka nuih sak a " Mr.Samuel va insil la, breakfast ka lo siam ang che" a lo tinghal zung zung a " vawiin chu i sam rawng thlak a ngai" tiin Bathroom lam ka pan san nghal a. Ka va let leh chuan Omlet leh sertui bakah toster leh Jam a lo chhawp dal a " heng hi i siam nge pawnlam ami i order" nui chungin ka ti a " hey ka siam vek a nih hi" tiin a nui a, ka enkual dan dan hnuah breakfast chu kan ei tan ta a.

" Enge Bathroom i pan dawna i sawi kha?" tiin chhang ei chung chuan a ti a " i sam color thlak a ngai" ka ti a, a nui a, " pawisa ka neilo ka tih kha, a hrim hrimin Saloon awmna ka hrelo" a ti a. A thil ei chu a thial niau niau a. Ka phone ka phawrh a, " hello Danise Beuty Saloon bia la, vawiin ah ka flat ah rawn tir ta che" ka ti a. Phone ka dah hnuah minlo en reng chu " enge harsatna i nei em ni?" ka ti a. A nui var var a " heng hi eng vanga ti nge i nih?" a ti a " Kan la chhui chhuak dawn nia" ka ti awlsam et a, a nui var var a. Ti ti pah chung zelin Break fast kan ei a. A chetsual dan ka zawt ta a. " Ka thiante nen pub ah kan kal a, kan pub len hlan hian kan thlenna Motel ah kan kir leh a, Khang ka thiante 3 khan min hria rui nge ka hrelo ka harh leh chu ka thuahnaw leh ka pawisa zawng zawng a bo vek a, Manager hnenah ka kal vat a, Zingah an chhuah thu leh an driver in Airport thleng ava thlah thu a sawi ta mai, ka thian ten min phatsan a ni tih ka hriat chuan room ah ka lut a, ka tap ta ngat ngat a, Manager chuan eiturte min pe in Police hnenah min hruai a. Tichuan ka rawn biak tirta che a ni, i number ka hrelo nangin i address kha ka sawi hnuah i profile an chian thlap a an rawn be tachauh che a nih kha" tiin a sawi a, a thiante laka a lungawiloh thu leh khang Hippies ho nen khan Jamaica ah inchhar an nih thute a sawi a. Ka lainat rilru hle " A nih khami zan i chhuak kha engtin nge i awm tak a? Vawi tam tak contact che tumin ka bei thin a in flat ka rawn kal hnuah I chhuahsan tawh thu leh i bungrua i hralh vek tawh thu anlo sawi ta si a. Embassy a thawk zawng zawngte ka inform vek bawk a. Kan hriat hnuhnun ber chu Czech Republic i chhuahsan tawh tih leh USA ah i awm tih zawng a ni ta a ni" tiin amah ka ngaihven dan ka sawi ta zung zung a. Ka thusawi chhung chuan min en kar a, ka sawi zawh rual chuan a kun a, hnuai lam a melh kar mai a. Rei vaklo hnuah hetiang hian a sawita a.

THE LONE LADY...
Khami zan kha khawvela ka hun tawn tawh zingah ka khawhar ber zan a ni hial awm e, Concert nei turin kan inbuatsaih tawh laklawh si, kan conductor ( a instructor nibawk) in ka telloh a hlau bawksi, phur lo fahranin ka insiam a, kapa chu ladam se ka kawr hak tur min ngaihtuahsakin ka inbel lai minpui ngei a nga, chhuang takin min thlir bawk a nga, chutah a pathian hnenah min hlan nghal bawk ngei ang. Tichuan mahni inring tawk takin kan inzui chhuak a nga. Cabin pakhat ka duhber tana seat ka hauh theihna card hum chung chuan ka biangah dawmin ka chalah a hmui a chuktuah ang a, hlim takin stepah chuan achho ngei ang. A nihloh vek pawn Christmast eve a nih avangin a kohhran mite tan sacrament a buatsaih sak ang a, Khawvel sual thangmek tan mittui tla pur in a tawngtai a nga, a fanu concert neitur tan tawite in a dilsak ngei emaw a ni anga. Chumi hnuah tawngtai duhte tawngtai lehin, thlerah Pathian a tih fapa pek a nih zia leh chu khawvel tana enna rawn thlentu chanchin chu kutdawh leh misual vak vai, Zu rui kal theilo emaw hnenah a hrilh leh phawt a nga. Police nen inbakkaih na tenau emaw an nei ngei bawk ang...( " engvangin" ka lo tivat a) " aaa Jail tang te mass buatsaih a dilna lamah an thu a inhmulo leh ngei ang ka tihna a ni, tichuan hmanhmawh takin ka show nang hman hram tumin a rawn tlan a nga, a holi bible kara a card zeh a titla lo a nih hlauh chuan ka show tawp lam a rawn nang tawk a nga, a nihloh a card a ti bo palh a nih emaw show a zo tawh emaw a nih chuan i lo dinna hmunah khan thlasik khawvawt hnuaiah ka ngainat em em ice-cream a lo keng khur dat dat ang..." a nui seih seih a, a pa chanchin a zeldin thu mai mai a sawi lai pawn a hmel ah apa angainat zia a lang thei a ni a, a huntawn tur hrehawm turzia chu ka hrethiam in ka hmu tlang uar uar a ni ber.

Nia.. Khang kha ka suangtuahna khawvel mai mai a ni a, Atak ah chuan ama min thlansak tur ningei a ka rin kawr ha turin darthlalang hma ah ka inbel a, keimah leh keimah ka in en a, min ena min fuih tur hmel ka hmulo. Mahni in concert neihna tur hmun ka pan a, khawhar takin Hall chhungah ka thu a, Ka pa tana ka hual cabin lah chu a aiawh tura ka beisei leh ka rinngam chuan a luahlum ta bawk silo nen ka taplo ang tiin ka infuih sauh sauh a. Show a kal zel a, minute khat danah chu cabin lam chu ka thlir thin a. Kha pitar 2 leh an pasalte hmel bak hmuh tur ka nei ngai silo. Ka pa thutna tur ningeia ka ruat chu a ruak huai reng a ni ber. Beiseina ka neih tawhlo, ka show tan hma lawkah ka beiseiloh thil a thleng a, nang ka hmuh che a ka lawmzia leh ka pa ka ngaihzia kha mak ka ti hial zawk taplo turin ka indang theilo.... Show ka neih chhung zawng khan nang leh ka pa in min thlir reng niin ka hria a, ka mithla ah mahni hmasail tak ka nu leh pa hekhawvel a min hnutchhiahtute hmel ka hmu reng bawk. Show a zo a, ka beiseiloh deuh ka hmu.. Ka pa min nghahna thinah ka hmu thut che kha ka lai lek lek zawk hial a ni. Chumi hnuah i inah min hruai a, ka pa hmelhriat kan Indianpuite nen hlim taka hun hmanpui min tum ngei a, mahse a flop a ni ber. Ka mood ah ka chenglo. Ka thiante bula awm mai ka duh ta a, i inlengte hawn ruala min lam turin ka thianpa ( a bialpa ve deuh ) ka hrilh lawk a. Tichuan ka chhuah san ta che u a nih kha..

Tichuan, ka thianpa chuan a thiante bulah min hruai a, ka rin leh ka duh em em thin chuan min bumin min hria rui a, ka thianghlimna chu min tih bawrhban sak an tum ta a. Ka pa Pathian chuan min awmpui a ni chek ang helai hmuna ka rawn zui zel takte khan min rawn tanpui hlauh a, tichuan an ni ho rual chuan khawvel zauzawk ka chuan kual ta a ni. Ka contactna, ka e-mail, ka Facebook account engkim ka deactive ta vek a, tumah ka hmelhriat hluite nen inbiak ka duhtalo a ni. USA ah kan kal a, Kum 1 dawn kan vak kual a, chumi hnuah Africa ramah kalin Asia ram kan rawn lut lehta a ni. Hetia kan zin veivah lai hian engkim ka nun a inthlak a ni ber. Ruih hlo ka khawih a, mipat hmeichhiatna tih chauhloh chu he khawvel a nawmsip bawlna hrang hrang chu ka chen kual veta a ni. Hmun hrang hrang a kan vahkual na ah hian ka talent hmang chuan mipui kan hipkhawm a sum kan siam thin bawk a ni. Chutianga hun ka hman takah chuan ka pa leh nang engkim ka theihnghilh ngai hauhlo a, zan tin ka mut dawn in Khami ni rapthlak tak a kan thlalak ho kha ka en thin...

A tap lai hmel chu ka en a, ka lainat kher mai, ka thuthnaih sauh a, ka lamah ka pawt hnai a, ka awmah beiin a tap ta hawk hawk a. He hmeichhe naupang khawhar leh vanduai tak hian min hneh in ka taksa rilru engkim min hneh veng veng a ni ber. A sam chu ka chulsak hauh hauh a, ka thlem duhlo, duhtawkin tap rawhse, hetia a tah bawrh bawrh hian a thawl hawk ka beisei pui vang zawk a ni. A tap nasa zual a ziaawm tan a, a inhnit faih faih a, ka chul hauah hauh reng a " Mr.Samuel." " eih enge ni, i kiangah ka awm e, tap bawrh bawrh rawh, an bei fair lo takzet a ni, hetiang hmeichhe naupang duhawm amah chauh a he khawvel zau taka cheng turin an kalsan hi an thiamloh tawp a ni" tiin ka be mawlh mawlh a. " Nilo ka pa chu dem suh" a ti lehlawi si a. " Mr.samuel ka ngai thei lutuk che a sin, ka pa angin ka ngai che a, ka thian angin ka ngai che a, ka hmangaih angin ka ngai thin che a sin.. Ka pa boral hnuah khan mal ngawih ngawihin ka inhria a. I office a ka rawn kal a i awma ka bei thlawp atang khan ka tan i hlu a, i kianga ka awm chuan ka thla a muang suai suai a ni tih ka hreta a. Mahse, keimah ang thoa kalsan lungngai leh rilruna i nihve avangini kianga awm thlahlel tak chung siin ka kiansan hret hret ta zawk che a nih kha" tiin tahaw par chung chuan a sawi niap niap a. " keipawn ka hmangaih che a lawm, ka kiangah awmla, engtik lai mahin min kalsan tawh suh ang che, i kalkian ka phal tawh ngailo ang" tiin ka kuah nghet sauh sauh a.

Chu chu kan inkar boruak lo alh chhuah dan a ni.,Parloura tanga an tirh Tuai 2an rawn thlen hnuah phei chuan kan boruak a zang tawh hle mai. " I pasal" " i nupui" min ti deuh chhen reng a, kan in en a kan nui ringawt zel a. Amak lo e, An kalsan tak an hmangaihte inkara hmangaihna lo piang chu an hrethiam ngei ang tih ka ring tlat a ni. A sam kan thlak a, ka hmuh hmasak ber nia a sam put ang ngei khan kan thlak lehtawh a, Khawtlhang thlai zinvak kual reng nun chen ho anga awm ka remti tawhlo. Engkim thlak danglam a nih theihnan ka hmangaihna leh ka enkawlna a mamawh a ni. Chumi ti tur chuan ka inhuam a, ka hlawhtlin ngei ka ring tlat bawk a ni.

Ka chawlh lak chhung chuan Cairo hmun nuam hrang hrang kan fang dun a, hlimna in kan khat a ni deuh ber. Zial zuk, Ganja zuk, cocain hip leh pilss ei a bansan hnuah phei chuan a hmel a inthlak danglam chakin a kum upat hmelthatna a rawn parvul tan a, chung hmelmawina chawm nung turin ka hmangaihna leh enkawlna chuan a awmpui zel bawk a. Kan kaldunna ah pawh tumah kan ngailo kan hlim em em reng a. in ah kan awmin kan Inkuah a, kan in fawp a, kan infiam a, sex erawh kan la hmang dun hauhlo thung. Kha kum 3 chhunga khatiang nun hmang chunga a venhim theih kha, tun huntawite chhung hian ka ti chhiah sak theih tlatlo a ni. Ka theih ang tawkin apa lo kaihhruaina lam hawi kawng dik zawh turin ka puih ngat ngat a ngai a. Ka theih tawpin ka pui ngat ngat bawk a ni. Bible ka chhiar pui a, nikhatah vawi 3 tawngtaina ka neihpui thin bawk a. Nupa kan nih hun tur kan sawi dun a, fa kan neih huna an nun khawlo tur kan ven dantur kan sawi dun thin bawk a. Kan suangtuahna khawvelah kan cheng dun a, kan hlim veng veng a ni ber.

Office ka kal san leh tawh a, Chu ka office kal hmasakna ber ni ah chuan thu lawmawm tak ka dawng zui bawk a. India ramah National Security Director ni tura transfer ka nih thu a ni. Ka nu leh pa leh ka unaute nen ram khatah hnaite ah kan awm thei dawn ta tih ka hriat chuan ka lawm em em a. Hawn thuai thuai a, Dite hrilh ka chak talzet tawh a ni.

Office banah flat ka thleng chu eitud rimtui tak rimin minlo hmuak a, ka hmangaih hmeltha chuan ka hmuiah fawp chungin minlo lawm a, a kutah kaiin " thu lawmawm tak ka rawn hawn e" ka ti hlut a " wow engthil nge ni a?" a lo ti a. " Kan ramah kan hawng thei tawh dawn" ka ti a. A nui ve ngei a, a hmel erawh adanglam deuh tih ka hmu a " i hlim ve meuh nange?" ka ti a, " ka ngai dawn hle che a nih chu" a ti ta daih a " ehe i kal ve dawnlo em ni?" " ka ram a nive hleinem" " i ram a nihlohna a awm hleinem" " khua leh tui nihna kala nei ve lo a" a ti ta a. A nitak a, Indian a pa nimahse a nu chu Canadian Punjabi a ni a, a pianna hmun lah Czech Republic daih a ni bawk si, Ka phone ka la chhuak vat a, Embassy a advocate Arjun Anavad ka be nghal a. A niin thil tih dantur leh kawng min kawhhmuh hnuah " I pawm thei dawn a nih chuan kan Innei ang a, tichuan Indian chu i nive thei dawn tihna a nih chu" ka tih takah chuan a nui a, kan infawp ta vang vang a.

15th December @ Lengpui Airport. India, Mizoram.

Ka pian ka seilenna ram kum 20 chuang mah ka rah tawhlohna hmun leilung chu ka rap lehta ngei mai a, Boruak ka hip vang vang a, ka dam sawng sawngin ka hria Ni 20 a ka nupui ni mai tur Miss Rose Mary De Souza chuan ka kut ah kaiin " I hlim hmel kher mai" tiin min en ha a. Tichuan inkai ral ral chung chuan Lengpui Airport chu kan chhuahsan dun ta a. Lengpui Airport pawn kan chhuak chu ka farnute leh ka la hmuh ngai loh naupang an lo ding tlar pat a. An au dar dar a, kan inchibai lawp lawp a. Ka nupui nimai tur hmeltha leh pian thiam zet mai chu an bial lat lat a, Mizotawng ka zirtir thenkhat chu kat naka lamin an nui dar dar reng a. " Sir, Bag hi khawnge kan dah ang?" tiin ka body guard atana sorkarin min pek Hariana tlangval sang zet mai Arvin chuan a rawn ti su su a, " Hey, naupang ho khan Mr.Arvin hi pui teh u" ka va ti a. Phur takin an motor rawn ken lamah kan phei ta dam dam a.

Ka u fapa motor ah Dite, Arvin nen kan chuang a, Kum 20 chuang Mizoram ah motor ka khalh tawhlo tih reng hriatloh khawpin ka khalh mar ve a, kan tlan pelh kawng mam pur mai leh Ngaw chhah tha tak tak te chuan Dite leh Arvin chuan ropui an tiin an hawi nasa dun ha ha hle mai. Kan ram tlangram kan humhalh that avanga boruak inthlak danglam zia ka ngaihtuah chuan ka chhuangin ropui ka ti takzet a ni.,in thlen hlan ka nghak hlel kher hle mai. Vawi engemaw zah kan din hnu ah Aizawl khawpui kan lut tan a,,Boruak a danglamin mi veivak hmuh tur pawh an tam hle tawh a, Dite chuan min melh zauh pah chuan " Ka awm duhna tur tak hmun a nih hi mawle" a ti sap a, ka u fapa leh Arvin pawh engemaw in hrilhfiah in an ri bawrh bawrh reng bawk a. Nuam an ti tak tak nge ka hrelo, an tawngka lamah Amazing an ti deuh reng thung.

Ka nu leh pa kum 80 pel tawh ve ve kiangah ka nupui 2-na tur ka hruai thleng chu ka hlim khawp mai, an mahni phak ang angin an lo lawm thiam ve a,,Dite pawhin tarchhia an nih avangin a namnul bik hauhlo a kuah a, lawm avangin a mittui a dir zung zung bawk. Ka nupui leh Mr.Roberta hriatreng nana ka siam thlan tlawhin kan kal a, chu thlan-ah chuan ti hian tawifel takin ka ziak a.
" Tuman bengchheng siam suh u, Ka nupui duhtak leh ka thiantha tak te chhamang an zal e" tiin a hnuaia. Ka nupui duhtak Margareth Sailo tih leh ka thian hnaivai tak Rev.Robert De Souza.,Dt.2.12..... Khan Thlawhna chesualah an boral" tih zawng ka ziah tir a. Ka duhthisam ang thlapin an lo ziah bakah kan In kawt hmun thalai tak an luah bawk a, Delhi lama Milem ker thiam in a ang thei angbera an ker Ka nupui lim leh Rev.Roberta Holy Bible kenga Nihliap hawl lai nalh taka ker a ding luah bawk a. An an lim hi 4fit laia sangin ka ker tir nghe nghe. Chu thil chu Dite a hmuh chuan min kuah a,,a tap ta hawk hawk a.

" Mrs Sailo,,ka lawm e, khawvela thil hlu ber min hnutchhiah a vangin" " ka pa i fanu hi ka khua a har tawh biklo a sin" tiin a phun sep a.

The End...


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***