STAY CHAPTER 7

[Krystal Vanchhawng]

STAY
CHAPTER 7

◇♡◇♡◇♡◇


LALNUNNEMI POV:

Kumthar tûk nichhuak chu mawi tih hian a hrilhfiah kher lovang,tunkum atana nichhuak hmasa ber thlîr turin tlângah kan chhova,a mawi kher mai,kâwl lah chu mawi tawkin ala sen phût a,tlângte chu chhûm chuan a bawh khat hmur mai a. A chung atanga thlîr chuan Vanram hnaih riau ah te pawh a inngaih thei hial dawn dawn mai.

Boruak chu a thiang hle a,nizan lam an thil hâl vel ala chambâng deuh tihloh chu.


Tumloh deuhin kumhlui kan thlah liam a ni a. Sangtea lakah pawh a inthlahrunawm hle a ni.

Nizan khan ka rilru a nalo ka tih chuan dâwt ka sawi tihna a ni ang. A chhan erawh chu Lalrinkima leh Lisa te inkhata an chênho leh unau annih vang lam ni lovin,khati khawpa chhungkaw inhnaih ni si,thisen a inzawm pawh nilo mah se,an nu leh pa te an inneih tawh miau chuan unau ang chu anni tawh mai a.
Chumi hre reng chunga anla inthlah thei miahlo kha a mak ka ti a,kha khan ka rilru pawh a tina ve det a ni.


Anlo induh hlê ni ah ka ngai hmiah tawh a,khati khawp a an unaunute hovin an duhpui loh chung pawh a anla invuan tlat mai te leh a farnu te țanna âw-kâ a chhuah miahlo te kha ka tan chuan nat lohna chi rual a ni lo.

Ni e,ka rilru ka siam tawh a,ka tana țha tur zawk pawh aniang e. Beiseina tur engmah awmlovin kangfâi rât se,ka tan pawh theihghilh a awl phah deuh mah na. Mahse,a hun alo thlen hian huaitak leh engmah thlenglo ang mai a hmachhawn ava har thin si em.


Ni pawh a liam ve zung zung a,College kal te pawh a hun hnai leh tawh nghal mai a.

Zêploh chuan kal ka huphurh a ni. Sharoni kha engkim ka hrilhfiah a ngai dawn si a. Ani phei chuan a hre châk tawh lutuk phone atanga mi sawi tir mai te a tum a,phone hmanga sawi mai chi a ni si lova.

Sangtea nen pawh kan la inzui ve reng a,min hêl deuh reng a khatia ka inhawn ve deuh hnu kha chuan kan inngaizawng chu a ni deuh mai a. Han in bêm țhat leh lampang pawh kha a awm chuanglo. A awlsam angreng phian lawi a. Ka han pawh ve deuh hnu khan mi han bêm a tum tawh si lova,ni awm khan kan awm ve nghal a ni mai a,tunah pawh inngaizawnna lam sawi vaklo mah ila,kan awmdan atang hi chuan inngaizawng kan ni ni hmiang ka ti mai.


Sawițhat leh ngai turah a ruat lo pawh a ni mah na,kha chen min hêl a,a hma zawng a a sawi ho kha a ring ah ka ngai deuh hmiah.


College te pawh chu kan han țan ve leh a,a hma zawng a Lalrinkima nena inphur thin kha tunah Hmingthansanga nen a kan han inphur min lo hmu ho chuan mak an ti tih pawh an awmdan leh an mitmengah a hriat mai. Mahse,hei chu a ni tur ve rengah ka dah hmiah,Lalrinkima leh Sangtea te hi țhian inkâwmngaih tak an lo ni ve bawk nen,min sawi peih fâl pawh an awm nawk.
A țhen in an țhiandun a chhaih angah te min lo ngai a,Lalrinkima nen țhian kan ni tih hre hlawm hek lo le.


Ka huphurh ang nge nge in Sharoni chuan"Tinge Sangtea nen inlo inphurh daih a,chuan Rinkima te nen khan tinge hman zan khan khatia in awm" a rawn ti nghal mawlh mawlh a
"Lokal la,mi awmloh na deuh ah kan sawi dawn nia" tiin inchung lamah chuan kan chho va.


Inchungah chuan kan han țhu te te a,chutah ani hrechâk tawh bawk si chuan tui ka in khawmuang leh te chu a ngai theilo nasa.
Loh theihlohvin ka sawi a ngai dawn ta anih hi.

Lalrinkima nen kan naupan lai atanga inkawm kan nih tawh thu te leh a laka ka rilru puthmang danglam ta te,ani kawngsual zawh ta ka buaipui chungchang te atir tê atangin a bo a bâng awm lovin ka hrilh fai kêlh a,a țhenah chuan mak a tih hmel viau a,a țhenah erawh chuan ka ring reng ah ti ang mai hian a awm a.

"I awmdan atang khan ka ring deuh a,mahse khatiang tak kha chu anih ka lo ring lova" a ti ve leh mai a.

Sangtea nen a kan inkâr pawh ka hrilh ve a,duhsakna te min hlan ve luam a,mahse
"I rilru i bum reng emaw itih lai khan Sangtea rilru pawh i hliam tel daih thei ania" tiin min hrilh ve bawk a.

Keipawh in chu chu ka hlauh a ni. Lalrinkima ka duhna hi ala kiang mai thei si lova,engtin tin emaw beiseina ka chhar leh hlauh ang a,chu chu thil hlu emaw tiin ka vawng leh anga a, mahse chu ka thil vawn,thil hlu emaw ka tih chu khawlai vaivut mai mai ang,thli in a chhem a ral leh mai thin ang hi anih ka hlau a ni.

Engpawh chu nise,kan hma hun tur kan hre lova,,tuna ka nuna thleng ang ang hi pawm thiam mai ila. Alo la thleng tur a țha emaw a chhia emaw hun tawn zel a lungawi hi kan tan vanneihna leh hlimna a ni mai.

Chutia kan pahnih chauh a kan titi melh melh lai chuan kan hnunglam atang hian
"Wow wow wow,tunah khan eng nge ka hriat tâk kha,ka bengchhe ri chu a ni em lo maw aw,țhian țhaber tan a han luanliam mai chuh. Chutah a chan tâk loh vangin a țhianpa ah a țuan leh ta a" tih pahin Lisa chuan kut a rawn bêng chhuak thek thek a.

A rawn lang thut chu ka phu nasa bawk si,a awmdan atang kan thusawi a rawn hre hman tih hriat reng reng,hlauhthawnna chuan min rawn tuam nghal hlup hlup a.

Sharoni pawh chu ka awm ang chiah chuan a awm ve tih ka hrethiam nghal mai. Kan inmelh a,tunah hian țah vak na hmunah awm ila chu ka țap nasa tawh ang. Henu ber kher hian ka thuruk a hriat ka duh hauhlo asin.

"Nge,in thusawi ka rawn hresual" ala rawn ti ham ham a. Ka chhanglêt ngam tawh der si lo.
Ka kâ ka ân vaih chuan ka țawngsual ka hlau ve pakhat bawk si.

"Lalnunnem,hawh sawlaiah sawn va inbe fâl lawk ila" thle bak pah chuan a kal nghal a.

"Awi awi awi,engtin nge kan tih tak ang. A țawngthei sia,a sawi ang tih ka hlau e" Sharoni'n a tih chuan chhân dan tur pawh ka hre bik lo.


Lisa awmna ka va thlen chuan
"Chuan,Rinkima hi ilo duh ve reng a,mahse keimah nen kan ni ta sia" chapo hmel fahran chuan min lo tih khum vel a.

Ka chakna te chu ka'n sawmkhawm a,ka thaw deuh halh a
"I sawi sual deuh lo maw,duh ve reng lo deuh ang. Ka duh țhin tih chu ka pha lo,mahse alo lêt a a inthlâk atang khan keichuan țhian en bakin ka en tawhlo. Chu chu ilo hre ve mai mai dawn nia. I la sawi chhâwn leh nasat hmêl sia,a bak ilo sawi palh takin" tiin a mit takah chuan hlauthawnglo hmel fahran chuan ka melh lêt kal a.

Keipawh in hetiang dinhmun chêp tawh ah engtin nge khatiang ang dâwt awihawm lutuk kha ka phuahchhuah thiam ka hre hauh lo. Mahse,ka va lawm si em. Ka in chhandam thei hram e. Tunah chuan țawng fimkhur a ngai hle tawh ang.

"A enga pawh chu lo ni se,ani chuan țhian ang chauhin a en char char lai che a rilru dang lo put bik kha i zak ve eih lo maw,ka la hrilh ngei chu a ngai dawn anih hi. Hman zana kut min thlak vang tal pawhin phuba ka la la ve ngei ang" a tih chuan

"A hunlai khan ka zak em ka'n ngaihtuah lawk ang e aw" tih pah chuan inngaihtuah mûk hmel fê chuan ka kutțangin ka hmai ka han vaw deuh kerh kerh a. Chu chuan kan thinchhia-i chu a tih thinrim belh a ni chêk ang chu. Țawng tuma a ân zuau lai chuan
"Ngawi teh,ka han ngaihtuah ngial pawh hian ka zaklo ava nih hmel ve,pawi khawp mai." Ka han ti leh vel a.

Chuta a hmel awmdan chuan tlêmin huaisenna min neih tir leh deuh. Rinkima a hrilh ang tih mawlh ka hlau a ni. Ani hi a kam a tam reuh si.

"Nia,nangni ang chu in zak lovang. Thlahtu bul atanga zahna tlachham sa kha in nia" a tih chuan ka ngei reuh hle. Hmanni atang tawh khan eng nge kan chhungkaw nunah a rawn buai em em. An chhungkaw awh-awm bik fahran loh nen.

"Rinkima'n ka duh țhin tih a hriat chu i hlauh ka ring tlat,a chhan chu nang aiin kei min thlang maithei sia" sawi țhaih deuh titih chuan ka ti a.
Rinkima'n henu ai hian min thlang dawnlo tih chu ka hrechiang viau a,mahse hetia ka sawiloh chuan kan buaina a punlun mai ka hlau a ni.

Thinrim deuh a min melh pah chuan
"I zak law'm ni,keihi min thlang reng dawn. Chuvangin,a rûk a hma lo lak vel te i tum anih vaih chuan a lakah rilru țhalo tak i pu thin tih ka hrilh hrim hrim ang. Ka hrilh i duhlo anih chuan tikhan awm mai mai la,hei bak hian hnaih tawh suh ang che. Amah ah beiseina i hmu anih pawn engah mah lo ngailo mai rawh" min tih khum siah siah anih chu.

Ka thuruk a sawichhuah ka hlauh tluk zetin Rinkima'n min duh tih a hria ang tih hi Lisa hian a hlauthawng a ni tih ka hre reng a,chuvang a khatia in vêng pawh kha ka ni rêng a.
Ti kha chuan a sawichhuak dawnlo tih ka hre ta a,tlem chuan ka thaw a veng ve deuh ta.
.
.
.
Zanah chuan Sawmtea te țhianpa piancham lawmnaah kal kan tum a,mi an sawm nasa ve si a,han hnial ngawt a inthlahrunawm ve bawk si nen,Nitei ka dil in alo phal nasa mai si.

Lalrinkima leh Lisa țhianpa pawh anih tho vangin anni pawh an kal dawn tih ka chiang mai si,chu chu ka kal hreh chhan pakhat a ni a.
"Anlo kal anih pawh in keimah i bulah ka awm tawh alawm,kan awmdun tlat dawn nia" tiin Sangtea khan min sawm ve țang țang bawk a.


Dar 8 velah chuan Sangtea chuan min rawn sawm a,an țhianho hi smart em em ti a han sawi tur an awm awmlo ve bawk a,inchei pawh uluk vak a ngai lêm lo. Tshirt,jacket leh jeans kekawr a ni deuh tawp mai.

Sangtea nen chuan intiam rual ang mai hian kan inthuam dan lah chu a inmil phian a,kan pheikhawk rawng tihloh chu a bak zawng rawng a inang vek.
Kan inhmu chu kan nui ve ve tawp.

Bike a rawn ken avangin tlem in a vawt deuh a,a jacket chu phelhin min sin tir a,vawt a tih ve dawn tehlul nen. Mahse,hnial lovin ka la ve mai. An phal a min pe tawh a,vawt ti a ha duh reng chung a lo hnial ve țang țang ang kha ka ti ve lem lo. Kan mamawh a an phal anih chuan kan dawng mai tur a ni.

A hmun kan va thlen chuan anlo ri deuh luih luih tawh a,heipawh hi ka kal peihloh chhan pakhat zingah a tel. Anni chu engpawh lawm se,Party an ti zel a,zû leh ruihna dang a tel zêl bawk nen,nuam pawh ka ti lo.

Thilpêk te kan han pe ve a,midang ho awmna lam chu panin kan phei a. Lalrinkima te pahnih pawh an lo la thleng lo anih hmel.
Engah nge maw anni ringawt pawh chu ka ngaihtuah le aw,mahse ngaihtuah loh a har ve em asin.
Kha leh chen i kianga i hlimthla ang mai a zui thin tu che leh i duh rûk thin kha,vawileh khata theihghilh tum chu sunhlu kunga theihai rah tir tum ang vel a ni.


Sangtea chuan a sawi ang chuan ka bulah a awm tlat a,min chelh tlat bawk. Ka bo ang tih hi a hlauh hmel thei ania.

Bathroom hman lawk ka duh vangin Sangtea chuan min va kalpui a,kan lêt leh chuan ka mi hmuh duh mah se ka hmuh châk em em siloh te pawh anlo thleng tawh anih hmel.

"Inlo thleng a" Sangtea chuan biak bik pawh nei lovin a va ti a,chutah kan lam an rawn hawi phei a,Lalrinkima mit chu Sangtea bân ka vawnna ah chuan a fu chat a,ka hmu sual nge ka hrelo a ner deuh sawk ni mai hian ka hria.

Lisa min melh dan lah chu "ka sawi kha hrereng ang che" tih na ni mai hian ka hria. A meng thîp râm mai. Engtin nge maw Lalrinkima pawh hian a nihpui reng peih ni. Pawilo,ni âwm tawk te te hi an awm ve nia.

An piancham lawm lah chu an han che over khawp a,couple dance te an la rawn ti.
Tunge jeans kekawr nen inthuam țup a lâm suah suah ngai. Hahthlak hlawm lutuk. An mawl ang ang hian an chhaw a.

Sangtea nen chuan khâwr deuh hian kan lâm a,kan piah chiahah Lisa te pawh inngeih hmel fahran in an lâm bawk.

Hetia taksa si chêt a han lâm vel hi Sangtea nen hian kan la khâwr deuh țuț a,ani chu a zah deuh vang pawh a ni maithei a,mahse keichu ka zah vang em em pawh niin ka hrelo.
Lâm zeiloh nen kan piah lawkah mit tikham khawp a lâm lungrun lo awm bawk nen.

An hla play lah chu Ngurthangvela hla ala ni zui,a hot bawk si nen,khawia couple dance nen mah khan a lâm rem theih reng reng loh.

Kawppui thlak tur an la ti ve leh ta lam a,kan hnaih berah Lalrinkima te an awm avangin ani nen chuan kan in man ta chat a,Lisa leh Sangtea pawh.

Lâmpuite kan thlak chiah chu an hla play an rawn sawn ta daih a. Hla ril râih mai Ed Sheeran 'Perfect' ngei mai kha an rawn play a. Ka sak lai te pawh ka hrechhuak rum rum alawm.

Lalrinkima nen a han lâmdun chu ka thiamlo hle a,lâm rem deuh hla ni tawh mah se ani nen berkher chuan ka ti țha thei meuhlo a chha chu a ni.

Ani lah chu engah mah ngailo ang mai hian mi thehvir ang lâwp lâwp a,ka thin a rim țûn tawh. Kan piah a Lisa lâm ve lah chuan mi rawn melhrum nasa tawh mai si.

Ka hmaa ding pa chu rum deuh hian ka han melh a min lo nuih suk duh chauh. Mahse,eng nge thleng hi. A On/Off na ka zu hmeh palh a ni ngei ang.
Lalrinkima chuan a awmdan chu thlâk thut in ka kâwngah chuan nghet fê mai hian a rawn chelh a,a kut pakhat zawk in ka sam ka hmai zar tu chu a rawn tikiang bawk a. A awmdan teh thut chu mak ka tih em vangin ka han en deuh hau a.

Chiang fê mai hian min lo melh a,a mitmeng lah chu 'harhfimlo hmelțha mitmeng a sexy' an tih ang zawng zawng hi ka han hmu. Tawrh har fahran a min melh pahin a kut ka kâwng a chelhna chu tinghet in amah hnaih thei ang berah min pawt hnai a.


Chutah a kut pahkhat chu rawn phar chhuakin ka sam chu ka bengah a rawn zep a.
A lathla leh mai dawn emaw ka tih laiin ka biang chu a chûl thla riak riak a,mak ka ti bawk si,ka hamhaih bawk si chuan chêt nachang pawh ka hre lo,dan pawh ka lo tum chuanglo.

Ka mitah chuan lungrun fahran in min melh a,he mitmeng hi ani lawm ni a lak atanga ka lo beisei thin mahse ka hmuh ngai si loh kha. Tunah tak hian hun hi a ding țhuap ni maiin ka hria.

'I never knew you are the someone waiting for me'
('Min lo nghak rengtu chu nanghi ini tih ka lo hre ngai lova')

tih a in play lai chuan a kut chuan ka heh chu a rawn tuai a,ka beng bulah hian zawitê in
"I hria em,chu chu"ka sam kârah chuan a rawn ti sup a.
Ka mit zâwn a rawn thâwk lum deuh ham ham pah chuan ka heh hnuailam chu a tuai leh a. A thaw lum ham ham leh a thawrim dang lek lek te chu kan awmdan nen chuan a inchawih vel vek ni mai hian ka hria.

Ka lung hi a phu nasa lutuk a pawk chhuak mai dawn. I hria em atih chu eng ber hi nge,a hla thû chu nge ka lungphu hi. Lisa hian thil lo sawi a nei a ni mai ang em.

Engmah ka ti theilo,tunge kan bul hnaiah awm tih leh min en em tih pawh.

A chêtdan chuan min țhawng lutuk chu ka khawng vek ni mai hian ka hria.

Chiang kelh kawlh a min en na chu melh lêt kuau chungin "E e engmaw" ka ti bah nuaih a

Chutah rawn kûnhniam in mi rawn fawh a tum ta mai,tum ti ila,a rawn kûnhniam riai riai a,ka mit takah min melh pah chuan ka hmui a rawn si țep.

Kan dinna chung zâwn light chu a rawn êng phut ,kan piahah chuan Glass a keh ri chuai bawk,ka va hawi phei chu Lisa chuan waiter chu alo vîn hrep bawk a.

Chu chuan tui vawt a theh țhawt ang maiin min ti harh nghal kâwk thei.

Midang mit chu kan pahnih ah chuan a fu țhup a.
Ka thiltih âtthlak zia ka ngaihtuah chhuak zawk a,kan piah lawkah ka bialpa awm reng laiin hetah mipa dang ka lo fâwp țep chu a ni si. Engtin nge ka tih theih,ka chhe vek. Ka zak lutuk chuan Lalrinkima chu melhin
"I thiamloh vek" tiin ka tlanchhuak nghal a. A thiamloh vek ani biklo tih pawh ka hria,mahse tih mai tur ka haihchham em a ni.

☆☆☆☆☆☆☆