DUHTAK SANGPUII CHAPTER-6 BY NUNUI HNIALUM

[Nunui Hnialum]

Chapter - 6



Kan in ka thlenga areh leh dûk mai, inchhung ka lût chu ka pa hmel nelawmloh zet ka hmachhhawn ta ràn mai, a mitmeng alh phat leh rum ùl aṭang chuan lungawilohna anei tih ahriat a lawmlo hle tih alang, engvangtak nimaw ka nu ka en a minen lovin hmalam a en ngar bawk si, ka zu in ve sek nen ka ding zum dúk mai.






Pa, enge nita?" tiin amah hlatru tak si ah chuan ka ding ve ràn a, ka zu rim a hriat ka hlau ve miau alawm, ka in ṭhin tih hretho mahse, palzam leh namnùl lutuk a an hmuh laia lo ruih viau kha ka duhlo.





Ka ṭawng ahriat chuan a inthlahdul ve riai riai a, a mitmeng thim raih a thil awm chu ka chhiarthiamlo, a aw a thian ri khak a "i nau zanlêng chhuak Hmarveng tlangval ho nen anlo inti buai a, misual ho chuan nangmah vanga inau chu sawisa niin an sawi," a ti a, a aw khurh nasat danah a thinrim hle tih ka hrethei.






"Enga!?" ka ti nghek, awiawm loh lutuk keimah avanga ka nau lo sawksak ngawt nachhan tur ka hre awkawnglo. Thilsual leh mipawi ka sawi ka hre heklo, ka nu chuan "a room ah amut khi amah khi va be rawh," alo ti deuh ṭiau a, ka nau room ka pan vat.





Ka nau chu khum ah puan sin lovin alo mu bãm a, akut dinglam lukham in akut veilam achal ah anghat zuar bawk, ka penphei pãwk a a khum tlãngah ahmel hmuchiang thei tur in ka ṭhu thla vut bawk. A hmel ka hmuh chuan chawp leh chilh in ka thinrim nghal, a mitko avung búr a, abiangki aduk chur bãk ah ahmai ah hmeichhe hamna niawm tak in apilh nian a, ahmai a chhahbúr ti ila adik ber awm e.






"Zothan," ka ti a arawn meng duar duar "engvanga sualrawn che maw annih, tute nge annih a?" ka ti nghut a, ka awki pawh anèm fahranlo khawpmai, ka nu leh ka pa pawh anlo lut ve vat, "IB thlang thimlai ah khian mi pathum hian minlo phar dinga keipawh ka ding ve mai a, lo chhuk lawk rawh, an tih vang in Bike hungrem in ka chhuk veleh maia, eng sawi set set lovin pakhat chuan ka bek ah minrawn hnek nghal a, khatia arawn che thut kha ka hamhaih lutuk; mahse, in thingharh in ka hnek lét ve a, chu veleh a ṭhiante pahnih chuan min rawn khawihrawn leh ta ani, pathum anni bawk si a, kei pakhat ringawt tan chuan chét hman ngaihna a awmlo, insualmi ka nilo bawk nen ka zal dér ani," ati hap.






"Chuan," ka lo ti nghut, "zawihnawk a min sawisak hnu ah pakhat chuan 'i u hian anihna hre rawhse, chuan he thil hi warning ani tih lo hrethiam bawk rawhse,' ati a, U enge itih a?" atih zawmzat. Ka nau awhna chhãng lovin ka pa lam en in "damdawiin lam pan aṭul lo em ni?" ka ti a, a khabe tuai puat in alu thing a, "Bazar venga health worker kha kan ko chho a, tikhan azia mai tur ah ka ngai amah pawn chhunglam na anei lemlo," ati a.







"Tu te nge annih i hre thei em, emaw i hriatzawng an awm em?" ka ti leh a, alu thing nghut in, "a thim èm a an hmel ka hmu theilo, pakhat erawh kha chu a aw kha ka hriat hnu ang ka ti deuh," tiin chunglam amelh vang vang.







"Engpawh nise thil anih tur ang ani vektawh bawk a, engmah tihve aṭullo ang, Lawmzual, eng emaw lo tihve te kha ilo tum ngawt ange," ka pa chuan ati a, a hmuhloh in ka ner sak. A chhuahpah chuan "minlo zuilut rawg," ati a akal liam nghal daih.






Ka nu in Zothana a buaipui bawk a, ka nu leh pa te room lam panin ka kal ve nghal, eng emaw min zãwt in min zilh leh ngei dawn tih ka hria, chhanna pêktur erawh ka hrelo takzet ani. Phûrlo fe in ka kal a.







Mutthilh pawh alang meuhlo, ka room ah ka tei vut vut a, Zothana'n sawisak rawn atawk chu mak ka ti, keimah vang nikhan an sawi a, keimah vang nise engnge achhan ni ang, achhan ni thei tur lah chu ka ngaihtuah ngial pawn ka hremai thei lo.







Baby-i ka ngaihtuah chhuak thut, ani vang hi ani thei angem, tlai chaw ei lai pawh in a pasal hluiin alo tlawh tur thu leh inphenna tur mipa a mamawh thu asawi tak kha, Baby pasal hlui chuan eng emaw hriatruk neiin kei minlo bitum ani ngei ang; mahse, kei min kal kàna ka nau chunga aṭuan chu amak ka ti. Kei min hmufuh lo in ka nau chungah aṭuan ani thei angem? ka ngaihtuah chianga tlaia Baby thusawi nen khan ka hmehbel lo theilo, hmelma ka neihàwm ka hrelo atinni, chubãk puhtur ka hre tlatlo.





Baby ka ngaihtuah chhuah tãkah chuan vawiin tlaia chaw eia alo kal ve ngawt dan kha ka la hrelo, alo tlanchhe tak tak emaw ni; mahse, zana haw kha ahreh leh chuang hauh silo a, a pasal hlui chu hlau tak tak nise amaha awm kha hlau tur anih zawk nen. Thlenga rêng pawh hian enge maw ahriatni athil tihdan hi min hmehbel atum deuhreuh in ka hria, ka iai lemlo na in rilru chhungril ah hminlohna riau ka nei tlat, midang hnen ah sawidawn ila sawichhuah tur erawh ka hrechuang hauh silo.






Zing dar 1:00am thleng ka menga ka ngaihtuah nasa ngang ani, engpawh nise Pathian kannei a, thudik chu hun in ala rawn herchhuahpui em em ang tih ka ring tlat.





Ka mu a mumang makdeuh ka la neizui, tu emaw nen hian hnim hringdup hmunah kanlo awm dun a, chu hmuah chuan mihring dang anaawmve ngailo emaw tihtur in mihring hmel leh thawm ri va hriattur avanga ahmun chu afai in nuamtak ani, chulai hmuna ka awmpuinu chu Baby alo nia; mahse, a aw erawh Sangpuii ani daih thung, maktak ani; mahse, chutia kan awmdun reng lai chuan tu emaw hian aduhlo chung in achhipsam aṭang hnuh haw alo tum a, Baby pawh aṭang nasa aban rawn phar a min rawn en kiau in 'U Lawmzual,' ṭap ṭiau hian arawn ti, zing takah ka mumang vang chuan ka harh hlawl ani.





"Ka mut hma a thil ka ngaihtuah nasat lutuk vang aniang," ka ti ringawt. Vawiin chu Sunday ani bawk a, nizan ka mutam lo nen mut mai mai ka tum deuh, inkhawm erawh ka tumruh ve viau. Nge 'inkhawm lovin ka nau ka awmpui zawk ang aw,' ka ti rilru nuah nuah.






Thlenga'n inkhawm tur in minrawn sawm a, keipawh inkhawmloh tawp chu tiin ka insiam, ka insiam zo sitting room a ka chhuak phei chu Thlenga'n "i lu kir dan kha i zuah buk mah mah ṭep," ati a, ka nersak "mipa sam anihhi ti hian style vak angailo," ka ti a, ka nu in thawhlawm min pek hnu ah biakin lam panin kan chhuak a.






Nizan a Zothana'n sawisak atawh dan te ka hminga anlo vau dan te, pakhat mai nilovin pathum in an khawihrawn dan te chu kalpah chuan ka hrilh ve malh malh a, mak ati hle ringawt, "ava mak ve," akhãt tãwk in ati leh hluai ṭhin, nia keipawn mak ka ti Baby pasal hlui ka rinhlelh thu erawh ka sawi lemlo, amah hmutawh leh hria azeng pawh ka ni lova lo puh ve ngawt chu dikin ka hrelo ani.








Ka inkhawm tluan ve zak, a tawp khãrna hla ah chuan ka hla duh deuh mai leh min dek em em ṭhintu hla ngei chu kan thu hriltu in a thlang a ka lãmchhuak teuh asin aw. Inkhawm ban chuan Thingpui an in sap sap a, kei zopa hian Thingpui hi chu ka hmaih phal reng renglo, lãkve tum in Thlenga nen kan kal a.







"Sir, i hmanhun ah ka record bu min enpui thei la ka van ti e," inthlahrung taka titu lam chu kan hawi a, Lawmsangpuii ani, kan bulte ah alo ding ve ràn chu niin Puan plain peach rawng leh kawr ṭhui mawltawp simple deuh aha bawk a, asam sei angreng tak chu athlah hnianga ava mawi reuh tak, Thlenga chuan "tinge a, thiamloh inei em ni?" alo ti a, Sangpuii abu nghat.







"Awle, i remchan hun hun ah minlo pan dawnnia, ka hman reng aw," damdap in Thlenga'n ati ve bawk. Lawm hmelndeuh hian anui var var a, amit ah tak ka en chhukràn, a nuih záwnga a bianhsum lang kalh leh aha uingho zum mawizet langchiang em em si te chuan ati hmelṭha ka ti, ka en vawng vawng nia.







Ka mit ah minrawn en a, mitmenga thup buai nei hauh lova ka lo enreng tih ahmuh chuan amit ala sawn vata, a hmai asen nghal vek, Thlenga nena ṭawng anni bawka aṭawngchhuah zawng te chuan ahmui akhur thei nia. Ka enchik lutuk chu ka inthiamlo lehsi hmundang ka hawi daih.







Khawi aṭanga lo kal nge tihpawh hriatloh in Baby arawn lang ve nawlh a, ani hi zawng nula pianfuh tihtak ah a nalh lehpek viau, ka hma ah arawn ding a, a tùm deuh bár, "ngaihsak lo si," midang hriatve loh in ati zawi sap a, ṭhiante awmve lohna lam ahawi nghal daih bawk.






Sangpuii'n an miss chu alo be var a, rinai daih hian henau hi afel ka ti ṭhin, mi biangbiak athiam ka ti amah naupang viau hian aṭawngkam erawh a felfai thlap zel.





"Taka, Advertisement an chhuah tawh asin chawhnu khan, nakin ah ka rawn thawn ang che," ati a, ka nau chungchang a hrelo ani maithei, ka hmuh hian ka haw ru deuh tlat, thu chiang hrelo mah ila, amah lo puhtur ka hre tlat silo; mahse, atana biak hrehawm lutuk a lo awm run erawh a tumlo.






Tleirawl nulat tlangval hrechho ṭan ho chuan minhan en duh hlawm khawp a, tleirawl ho lah chuan lai fe fe in minlo melh zak zak a, rawlthar lam nise Baby chungah an mit a fu ṭhup a, remlo chunhin kan lam anrawn kal a, kan zawn an rawn thlen in arawn khuh deuh kher zel, anuam ve ania.





Kan din chhungzawng Sangpuii ka hmu leh ta miahlo a, ka lo zawngru ani chêk ang chu, 'tleirawl zùn ah maw i uai dawn a Lawmzual, i tlinrei meuh angem? amah pawh ila hrechiang silo,' ka ti rilru a, Baby ti ti pawh ka ngaithla liam tawp.






"Sunde Sikul ka kal dawn silo a ka haw maidawn," ka va ti sur sur a "keipawh ka hawdawn," a rawn ti, Baby a ṭhiannu in alo koh vang in akalsawn a, a awmloh hlan ka chãng ani deuh mai. A khual zawk e tilo hian mi hi akhualchei deuh tlat zel zawk a, bakah tun atan chuan hnaih tamloh ṭha ber in ka hria.








Inlam panin kan haw a "Makima hi ala zin reng em ni?" ka ti a, thãwk khatlai kan inkawm avang khan keimah tak pawh hian ka mihrang enlo, kan ṭhian zinga mi ah kan ngai ve hmiah tawh. "Aw, a inhlawh an tia, a awmrei hle mai," Thlenga pawn ati ve mai, ani hi mistiri helper ah aṭang ṭhin a, pawisa pawh anei nual in ka ring, mi hnuaia ni sensa tuara inhlawh ai chuan mistiri zui te chu hlawh aṭha daih zawk bakah an hna hi hna hrãm a awm ngai lo, inchhungdai ani zel.







Dawr ah zial lei oah kan duh vang in inlam pawh kalzui lovin dawrlam kan pan a, ahla vaklo dawr kan luh dawn chuan asir kil aṭang chuan eng emaw aran ri rawk rawk a, kan hawi vat mipa thinrim in hrosa thawm rawn chhuak in hmeichhe aw tliangral hian tìmna awm hauh lovin arawn haulet.







Chutah, mipa tleirawl hmelchhe lemlo tak hi chu pindan angreng deuh aṭang chuan arawn paichhuak nawk nawk a, "zawngi i chaklo ang ve mai mai ache," arawn ti chhuak nghut nghut a abek athi ser ser a lungawiloh hmel hle makti zet in kanlo en, chutah thingzai bung keng in Lawmsangpuii ngei mai chu arawn chhuak ta, asam ahnawk deuh niai a, a kamsir athi deuh sar sar ka rinloh lutuk a arawn chhuak nawlh chu mak ka ti hle, ka ang phuau ngei ang; mahse, an hmelhmai landan ah thil awmzia tur ang chu ka hrethiam ruak.