SECRET OF MIST VALLEY (i love nonster)-17

[jenniferadyshadow]

A rilru khauh tak kha alo chhuak leh tawh anih hi....

Nikhat lek pawh hmulo a, awm har ka tih tehreng nen karkhat lai Jace an min pumpelh hi hriatthiam a har takzet. Engthil chiah nge maw ka lakah hian a duh chiah le? Ka tawt up up a, a mah hmachhawn a engkim zawhfiah chak mah ila chutiang thil ti tur chuan huaisenna ka nei thlawtlo ani. Nuropuiite nupa ka lakah an tha in min ngaih sak thiam viau mahse inah an awm tlem si a, an ni vang chauh hian ka intipachang lui hram hram thei chauh a ni.

Vawin phei chu ka huphurh takzet Pipuii ka khawhar hnem tu ve ber lah nimin atangin Champhaiah an chhung te damlohna avangin a chho daih mai bawk si. Jace hetianga a awm tlat nachhan hi tinge le? Min huatthu emaw, ka lakah a thinrim pawh nise, enge maw tal min hrilh se ka ti tak zet tianga ngawi renga min pumpelh tum ang maia a awm hian minti hrilhhaiin awm Ngaihna pawh minti hrelo takzet.

Jace-te in ka thlen chuan Nuropuiite nupa thutkhawmnaa ka hmu chu mak ka ti ang reng. An chhuah hma hi ka nang khat viau tawh asin le. Pakhuma chu helhkam nei hmel tak hian a vei tawn sek a, nuropuii erawh chu in ngaihtuah mûk hmel takin sofa ah chuan a thu thunga. Min hmuh veleh chuan

"I lo thleng tawh maw june?" Nuihlui tum viau mahse, a Hmela lungngaihna lo lang chuan a hliahkhuh zo vek.

"Ah.. Aw in chhuah daih tawh ka ring a" ka'n ti ngawt a.

"Ah..nia, thil engemaw sawipui che kan duh a,lo thu phawt teh"

Angaihna hrelo ang reng tak chuan thutna min kawhhmuhah chuan ka thu a. Pakhuma chuan a aw a thian kharh a. Thil engemaw sawi nuam vaklo sawi tur hi a ang. A ngawi leh daih chu ka lo nghakhlel takzet. A tawng tawh dawnlo maw ka tih hnu chuan ka lam hawiin a rawn in her a.

"June, helai I rawn kal hi kan lawm viau a, min chhawk zangkhai khawp mai. I chunga pawh hian kan lawm takzet a. Jace tana I inpekna leh I tih sak zawng zawngte hi kan hreseng lo hial zawk anga, I lakah hian lawmthu sawi senloh kan ba a ni". A ngawi leh daih a.

Pakhuma thusawi chuan min Deng dawt a ni ber, chutiang thu ka dawn chu ka in beisei loh em avangin tawng chhuah na chang pawh ka hrelo. A thu sawi dan atang chuan min ban dawn ngei ani tih mi â ber pawn an hrethiam ngei ang. Mahse han in banna tur em a tihsual ka neih awm ka hre hauh si lo a, nge Jace a tan hian ka tling hlawllo zawk? Chutiang ka ngaihtuah ringawt pawn ka hnuk a ulh nghal. Ka mittui tla tur chu dan Tumin ka khap sak sak a.

"Nilo, Jace hi ka kalsan theilo ang" tah aw triau chuan ka ti ngawt a. An nupa chuan lainat hmel takin min en kal a. Nuropuii chuan ka kut a rawn vuan vat a.

"June, I kalsan lo ang tih kan hria a lawm, mahse Engtia rei nge hetiang vang hian I tawrh dawn. Keini chuan hetianga rei tak tak a awm hi kan lo hriat tawh avangin dawnsawn dan leh hma chhawn dan pawh kan thiam viau tawh a ni. Keini chu a nu leh pate kan ni a, Eng ang pawhin awm se kan hmangaihin kan chhawmdawl zel ang. Hmeichhe dik leh fel tak I ni a I kalsan biklo ang tih kan hria, mahse tuna ilaka a awm dan hian ati buai chein ati mangang viau che a ni tiraw? Hetiang hian engtia rei nge a awm ang? Engtiang chiah a mangangin nge a siam che anga, Engtia nâ in nge a awmtir ang che tih hi kan hrebiklo a ni. June hrethiam hram rawh, hetianga beiseitur awmlo laka I hun I khawhral tur hi kan phallo che a ni. Jace tan hian I Theih tawp I chhuah tih kan hria a, kan phullo takzet. Mahse heng avang hian I hun tha lo lam maiah I khawhral ang tih hi kan hlau a ni. Khawngaihin hriatthiam tum la, helai hmunah hian lo kal tawhlo mai rawh. Ti chuan hmalam I pan thei zawk anga, I hlawh bakah pawisa pawh kan pek belh ang che. I thatna tur atan kan ngaihtuah zawk tih erawh min hriat sak hram ang che"

Nuropuii thu sawi chu ka hriat sual zawk ni hram se ka van ti em! Anihloh pawn ka mumang ni zawk se ka ti ngawih ngawih. Engtin nge hei leh chen hi ka thleng tawh a ka bansan theih mai an rin zawk le? Engtin nge hetiang zawng hian a ngaih pawh an ngaihtuah Theih zawk ni?.

An nupaa ka chhanna beisei taka min en reng chuan a tak anih zia chu sawi ngailoin a hai Theih mawlh silo. Ka lu ka thing nghek a, ka mittui chu dan tum mah ila a sawt chuanglo. Karkhat chhung hmu tawhlo mah ila, ka hnaih ah a awm tih tal ka hriat hian ka thla amuang asin. Mittui tling pam chuan ka melh ngai chu ka melh ngawt ngawt a, tawng pawh ka tawng chhuak thei lawk lo.

"Jace hi bansan turin min duh tihna mi?". Ka tawng ri chang chang ani mai, ka aw te chu a lawi zo vek tawh. Lainat hmel tak chuan Nuropuii chuan ka Kut chu a hum nghet zual sauh a, chu chuan minti thlamuang zo chuanglo.

" June"

"Ka theilo.. Ani khan min mamawhlo anih pawn keichu a telloin ka awm theilo a ni"
Ka thu sawi chu pawm hram se ka ti takzet.

"June, Jace hi hunthawl I pek a ngai a ni. Keini chuan nang hi hetah awm reng thei la tih hi kan duhthusam zawk a ni. Mahse Jace hian I hmangaihna leh I laka a thinlung putte, a mamawh zia che hi a in hriat duh siloh chuan I tan hian a harsa dawn em asin, hun thawl in mamawh ve ve a ni. A rilru pawh a thlak leh maithei asin. Nghak hram rawh. Helai hmunah hian I tan hmun a awm reng tih erawh hre reng la, tunah chuan hun thawl pe phawt rawh"

A sawi dik a ni. Mahse harsa ka van ti dawn em! Rei fe kan ngawih hnu chuan "Amah biak phawt ka duh a ni" ka ti chhuak thei hram a. Nuropuii chuan beidawn hmeltak chuan min en a,

"I thu le, I lungdamna tur anih chuan biak han tum chhin teh, mahse I hlawhtling kherlo maithei ania" a ti sap a.

Ka tho vat a Jace a room lam chu ka pan vat a. Kawngkhar chu ka Kik dat dat a chhang tu an awmlo, a aia nasa lehzual chuan ka Kik nawn leh a, thawm engmah ka la hre chuanglo. Beidawn tumlo zet chuan ka chum a ka sawi bawk a thehhmeh rehin a reh tlawk tlawk ani ber.

"Jace khawngaihin lo hawng hram teh"

A rawn hawn pawh ka bei sei tawh chuanglo. Darkar khat dawn kawngkhar chu hawntir ngei Tumin ka bei tawh a, ka hlawhchham a ni. Beidawng zetin kawngkhar hmaah chuan ka ding ngar a

"Jace khawngaihin"

Ka Dara rawn khawihtu lam chu hawiin zawimuangin ka in her a. Nuropuiin chuan mittui tling pam a minlo en ka hmuh chuan ka lungchhe thut chu insum zoloin ka tap khur nghal hlawk hlawk a, minlo kuah vat a. Ka tap zualpui reh thleng chuan min kuahin ka hnung a beng thek thek a. Ani hi ka nu tih lohah chuan ka ngaina ber ang, atang chhungah hi chuan ka thla amuang veng veng thin.

"Nuropui ka beidawnsan theilo ang"

"Ka hria lawm I beidawnsan loh vang pawh hian minti thlamuang asin"

"Tinge tiang hian a awm? Min ring thei mai lo em ni?"

"June a ring ngei ang che tih ka hria, tihnat che a duhloh vang zawk aniang"

"Tianga a awm hian ka na daih zawk asin, ka hrethiamlo kan inhmun hnuhnun ber kha chuan Eng kim kha tha vek angin alang si a, hmalam kan pan dun zel dawn amaw ka ti a, mahse..."

"A la hunlo pawh ani mahna, keini pawn tuna a awmdan hi chu kan hrethiam biklo" amah vek chuan

"Engoawh nise, intihharh tum hram la, vawin chauh chu minla pui thei angem?"

Kan boruak rit tak chu thlak a tum niin ka hria, a Eng zawnga thlir a hmasawn turin min duh ani tih ka hria. Keipawh tianga awmreng hian hmasawnna min thlen dawnlo tih hi pawm a insiamthat ka ngai ani. Jace hi ka bansan dawn tihna erawh ani hauhlo.

"Anih chuan enge ka tih ang?" Ka ti chhuak ve ta a. Ani chuan nui var var a step a min kaih thlak pahin

"Vawin tlai hian I pakhuma'n a staff te chawhlui kilpui a tuma, an company staff te nena inpawh tlan leh zual Nana a tih ania, ei in buatsaih leh inte hi tlema a lan mawi theih nan pangparte khawithat a duh a. I hriat angin office ka chawl ngawt thei silo a, pui lah a zin lai ani bawk nen, I kutah engkim ka lo dah ngawt a. I ti thei ang tiraw?" Mawihnai takin min zawt mahse ka kutah engkim a dah zia a thu sawi dan atanga chuan a hriat vek a, hnial chi Anilo tih pawh.

"Awle, pi puii chu ka tluk kherlo ang, mahse ka theihtawp ka lo chhuah ange" ka tih chuan lawm tih hriat takin a nui var var a.

"Anih kan chhuahsan ang che, hmeichhe chak tak I ni kha, I tha ang tiraw?"

'Aw' tih nan ka lu ka bu nghat a.

Jace nen chauh a awm chu mahni a awm nen a lêm chuanglo. A awmve reng ani tih ka ngaihtuah reng loh nan ka theihtawpin ka inti buai lui ngar ngar a. Tlai lama pakhuma te dinner eina tur buaipuiin ka che char char a. Pi puii awmloh hriat loh tur khawpin ka theihtawp ka chhuah a. An ei duh zawng an sawi miau loh avangin fridge a thlai awm ang ang chu ka siam kim vek a ni mai. Fridge a sa awm chu ka la chhuak a, hmmm... Hei hi a tawpna tur, duh aiin sa lah chu a lo khal a Chan a har phian leh nghal. Hemi ka tih zawh chuan inah hawin ka hahdam thei ve tawh ang. Jace a awm ve reng tih hre chunga awmlo ang maia ngaih Luih tum pawh hian min ti hah takzet. Ka Kut thip zawk chuan ka ngaihtuahna Ata min hruaichhuak zawk. Ka kutzungchal chu ka lo zai niin a thi duh em em leh nghal. Hliam te tham deuh pawh nei mang ngailo ka nih avangin ka rap lutuk chu ka te that a. Ka Kut chu ka lekkang a a thite chu chhuatah a far thla nguai thei ka rap takzet.

"I tha em? A na em?"

Engtiklaiin nge Jace chuan ka bul alo thlen ka hre hauhlo. Engtiklaiin nge ka mittui a rawn tlak pawh ka hrelo ka Kut vang chu ani hauhlo. Jace karkhat lai ka hmuh tawh loh min hre tawh lo ang maia awm kha tunah ka hmaa min ngaihtuah taka a rawn in lan hi ka awih lo zawk a ni. Engtin mah ka chhang theilo. Mittui hnam par chuan ka en ngawih ngawih ringawt. Ka Kut dimte a a fawp vawng vawngte chuan ka lung a ti chhe zual sauh. Ka ngawih reng vang a ni ngei ang, min rawn en a.

"Tap tawh suh, ka awm I ti nuamlo ania, a tuam na tur leh damdawi hnawihtur ka'n la ange"
Damdawi la tur chuan a kal zui nghal a. A lo let leh pawh chuan ka awm ngai chuan ka la awm ta ngar a.ka Kut chu a tuam malh malh a, Eng mah pawh ka sawitheilo. Min tih dan ang ang chuan ka lo dawh tawp ani mai.

"Tinge sate I Chan reng reng, nangmah leh nangmah I in Tina anih hi, tiang hi khawih tawh reng reng suh en ta che, I in hliam phah hi" a ti ram hmak a... Tinge min vin vak pawh ka hrelo, ka duh vang a in hliam ka ni bik tawp silo a.

Amah vek chuan "kan zo tawh e, a thuk lutuk lo hlauh a, Kut hmawr anih vangin a thi a chhuak duh anih hi hlauthawng suh" min thlamuang tum zet chuan a ti dam diai a. Thawklehkhata a inthlak thut theih dan pawh a la ngai reng.

Kei chuan ka Kut pawh ka ngaihtuahlo, a hmel leh taksa tla ta deuh chuan ani ka mit la zawk chu. A mitkhur thuk ta deuh te, a mit hnuai a dark circle lang kalhte, a hmui leh khabe bawr a hmul to siar siar te leh a sam pawr deuh fapte chuan ka thinlung a Khawihna takzet. Hlim tak leh nun nuam takin awmse chuan tiang hmel hi a Pu hauhlo ang. A hmai khawih ka tum chu ka Kut a lo man vat a, a mitmeng fim kak a chiang zeta min en chung chuan "ti suh" a ti hrawk a. Ka Kut chu dahthlain min hnungchhawnin room lam pan chuan a in her nghal a.

Tlawm leh zah pawh ka dawn tawhlo. Eng anga nasa pawn zawldawh ngai mahse pawi ka ti lo. A hnunglamah chuan ka kuah thlawp a, ka hlauh ber chu min kalsan kumkhua ang tih zawk hi a ni. A nun atanga hian min paih chhuak lo se, min pehhel reng lo bawk se ka duh takzet. Ka tan chuan a ni hi ka nun a peng pakhat ani tawh a, ka thingthla ngawt theilo a ni. Chu chu hrethiam hram se ka ti takzet. Ka Kut chu la thlain zawimuangin a rawn in her a, ngawi reng chuan min en vawng vawng a. Kei chuan Engtin nge min tih dawn tih ngai changin ka lo thaw dêp dep thung.

"Haw tawh rawh.. Engmah khawih zawm tawh lo la, in Tina tawh suh ang che. Ka nun ata hi kalbo turin ka duh che a ni"

Ka chhanlet hma chuan room lam pan chuan a kal nghal a, room a luh thleng chuan ka en ngawt ngawt a. Engkim a tawp vek. Chhuatah chuan ka thu hnawk a, engmah pawh ka ngaihtuah mumal theilo.

Engtia rei nge chhuatah chuan milim ang maia ka thut pawh ka hrelo. Tunah chuan ka pawm thiam angai takzet, Jace hian min mamawhlo a ni tih hi ka awm chemte hmawrzum a vih ngawr ngawr ang mai a na chu ka chum dat dat , ka nâ a ni. Ka in ti pâ chang lui a, ka mittui chu hru hulin he in hi ka chhuah san vat anih loh chuan ipik lutuk vangin ka thi thei hial ang...

Huizz ka rei ngar ngar hle mai. Ka type sa a bo vek avangin ka type tha leh a ka lo tiam tawh bawk si che u a, min hrethiam hram ru. Minlo nghah fan fan Naah erawh lawm thu ka sawi mawlh mawlh e.