CHAPTER 17
Muanpuii pov:
Bethani Childrens Home ah chuan min zui thleng ṭhak a. Gate pawnah min dah mai turin ka ti ta ringawt a. Saw pa pui sâwn min tih zah leh ka ring tlat mai. Chuvangchuan, Pa Rema chu min lêt san mai turin ka ti tawp a. Min lêt san hnuah, motor chhung aṭanga nui sûnga min lo en tu chu rum taka melhin, gate chhûngah chuan ka luh san ta hmak mai a. Naupangte, hlim taka an lo infiam ka hmuh takah chuan Kalvari-a'n min rawn zui ve tih pawh ka hre chang leh tawh lo va. An zîngah chuan tel ve in, ka'n infiam pui leh rih a. Kan piah lawk, Tlaizawng kûng hnuai aṭanga min lo thlir rêng tu mitmeng chuan ka nui hmel a thlâk danglam vek thei nia mawle. Mak tak maiin, ka en reng lai chuan a mit rawng, ka thin ti phu dut dut tu kha a inthlak ta daih a. Ka mit vai anih ringin ka mit ka nuai ka nuai ka nuai ta ringawt a.
"Muanpui, naupang ho infiam pui turin i kal em ni? I tih tur ti fel vat vat rawh. Sa pêl tur kan nei ania." Kalvari-a chuan thutak zet hian a ti a. Min ngaihtuah vanga lokal anih ka ring lo rêng a ni. A sa pêl naah chuan tih theih ka nei ve ngut angemaw.
Naupang ho zînga infiam ve, nutling pakhat bulah chuan ka nu hming sawiin, a thlân awmna ka zâwt ta a. "U Nguri khan a fapa tih lovah chuan keini bâk hi chhûngte a neih awm ka hre si lo va. Tunge i nih ve? In in hre ṭhin em ni?" Ka zawhna pawh chhâng ta lo chuan zawhna min lo zâwt lêt ta daih a. "Ka nu hmelhriat ania, a thlân chu khawiah nge a awm?" Ka rilru ang lo puia ka ṭawngkam bul hmuk ṭhin hi chu ka kham ngawt mai. Ka ṭawngkam aṭang hi chuan ka nêl awm vak ṭhin lo a ni. A thlân awmna min kawhhmuhna lamah chuan Kalvari-a nen kan kal ta a. Ka nu, min hringtu ngei chu, a taksa lumna tak ngial pawh ka hriat ve hman loh leh a awkâ ka benga châm hlen tur pawh ka hriat ve hma hauha min mutthilh san ta thlân ah chuan ka ṭhu hnawk a. Thisen zawm kan nih vang nge, in tih paukhauh ka tum vei nen, ka chakna te kha thâwklehkhatah an bo zo vek ta emaw tih mai turin ka zawi ngawih ngawih mai. A thlân lunga a hming mawi taka an ker chu chûlin, vawikhat tal a kut ka vawn châk zia chu ankâ tel lovin chhûngrilah chuan ka hrilh mawlh mawlh a. Van aṭangin min lo thlir ve reng anga, ka tan vênghimtu vântirhkoh a rawn tirh ngei pawh ka ring a ni.
"Ka nu thlân anih kha, a mawi asin." Hnung lam aṭang chuan mipa pakhat hian a rawn ti a. Mm, hei hi ka unaupa chu a ni ngei ang, nau a nei tih hi hria se, engtinnge a awm ang le? "Ehê, Vanêngmawia teh hlawl chu, hei hi inu thlân maw. Helai hmunah hian in khawsa tihna em ni?" Kalvari-a'n hawihhawm taka a biak rual chuan ka hawi phei ve a. A hmel chuan ka lung phu a ti rang leh tlat tawh a, a chhan lah chu ka hre der lo leh nghal a. Tlaizawng kûng hnuaia ka hmuh ngei kha a ni, ka en chian pauh leh ka nu nên in an in anna aiin an in an loh na ka hmu hnem zawkin ka hria. Mahse, ka nu kha thlalakah chauh ka hmu a, a lang lo ruam a awm, an mizia tal a in ang maithei asin.
"U Faka chu i hmuihmul i zuaha ka hai dâwn che alâwm. Engnge in rawn tih dâwn a, helaiah daih daih in lokal." Chu pa chuan nui sâng hian a lo chhâng ve bawk a. Kalvari-a chauh a melh mawle, kei chu melh khat tê pawhin min melh eih lo. "Hmuihmul zuah hi a man ka ti, ka inhmeh tiraw?" Thawveng tak hian alo ti leh zauh a. Engtinnge an in hriat, hetah hian Kalvari-a te hian rawng an lo bâwl tawh ṭhin anilomaw?
"Inhmeh khawp mai, Duhzuala engnge a an zêl. Ka buai lutuka, tlawhna hun pawh ka nei thei tawh lo." Vanêngmawia chuan ti in, mei zial a ṭan nghal a. "A ṭha tawh lutuk, hei Muanpuii hian hetah hian tih tur a nei ni awm tak a ni. I lo puih theih chuan a lawmawm ngawt ang." In la hawihawm tak chuan a ti leh a. Tûnah chuan ka mitah tak min rawn melh fuh ve ta. A hmelṭhain, a zahawm khup mai a, min ti zâm lek lek mai dawn alâwm le.
"Muanpuii maw i hming! Naupangte tlawh tura lokal in ni emaw ka tia. Thildang vang anih chuan puih theihna che u ka nei maithei asin." Nui var var chung hian a ti a, rin aiin a nêlawm ru zêk dâwn anih hi. Tlaizawng kûng hnuaia a mit rawng inthlâk anga ka hmuh kha, ka mit vai mai mai zawk anih dâwn chian hi a. "Ka nu ṭhiannu thlân hi ka rawn tlawh mai mai. A sawi ngun êma, damlohna avangin a tlawh thei bawk si lo va. Chuvangchuan keimah min rawn tîr tawp anih hi." Dawt sawi lo ang hmakin ka nuih sâng a. Kalvari-a lo khi ve suk chuan ka thusawi a awih loh zia a ti chiang viauin ka hria. "Anih chu, ka nu hian ṭhian kawm a thiam a. Ṭhian a ngah phian ania, hriat ngai loh te hi an rawn lang leh zut ṭhin. I nu in a rawn tîr vang vang che anih chuan, an in kawm ngeih hle ang ka ring. Min lo zui ru, thingpui in pahin in chhung lamah inkawm ang u hmiang." A awkâ nêm chu dawn sawn a nuamin, Kalvari-a inla Kalvari zûn uai ai pawhin biak a nuam daih zawk maw le.
Ka nu thlân lung chu melh vang vangin, "ka lokal leh ang," rilru in ka ti rauh rauh a. "Kal ang u, chhâwl te pawh a hâl tawh alâwm. Muanpui, hetianga hmun hlaa min kalpui dawn te chuan in tur te pawh lei lâwk ve tur che ania. Hetiang chuan, ka zui rei peih lovang che." Kan Kalvari-a ṭawng thei lutuk hi chu âw, min zui turin ka sâwm tawp si lo va. "Thingpui tui deuh kan in dawn ania, min lo zui ula." Ka unaupa chuan lo ti ve vatin, ka nu thlân chu hreh ru takin ka kalsan ve ta a.
"Muanpui, ding lawk teh," hnung lam aṭangin Kalvari-a bawk chuan a rawn ti leh a. "Engnge," ti vîn hlarin, ka leh hawi nghal a. Hah tih hriat taka lo thaw hlawi hlawi chung hian, "i mawng nalh zet kha ka hmu reng peih hlei nem. I hmaah ka lokal ve tawh dawn em ni?" Kâwng dâwm meuhin a lo ti leh a. Kawng a chho em em pawhin ka hre silova, rin aiin kawng kal a thei lo riau. Kelkâng an kal pawh khan a ṭhian ten an ning ru viau in ania ka rin ni. "Kal la animai alawm, mipa ve si in tha zo lo lutuk mai," ti niah niahin kawng ka kian a. "Nang berin i tih tlat chuan kan ti lo phal nâng," lo ti leh zauhin, nui vur vur chung hian min rawn kal pêl a. A khawsak phung mak thei lutuk hi ka hrethiam lo ṭhin. Mipa dang chu ni se, a hnungah min kal tîr miah lovang mawle. A pheikhawk bun lah chu, ala in khing lo zui a. Tun ṭum chu hmanhmawh vang anih ka ring tawh lo. A ma duhthu ngeia bun lui a ang ka ti tawh zâwk.
"Hei hi ka room a nia, a piaha in tê ah sawn ka nu nen kan khawsa ṭhin." Ka unaupa chu a room anga a sawi, in lian vak lo chhûngah chuan a lût zui daih a. Kawngka lu chungah chuan 'Father's room' tih alo chuang kalh mai. Ka nu nena an khawsak ṭhinna hmunah ngei chuan nihna thup ngai chungin an lei rah ang ka rap ve a. Ani kha la dam ta se, a fanu hi min hre hrang thei angem le? Ka nu leh pa ten ka pian hlimin min la nge, ka nu hnute ka hnêk hnuah min la zawk. A engamah hre hawt lo chuan, chan chhia ka in ti em em bawk a. Ka nu khan a rûk tak chuan min ngai ve tho in ka ring. Rila rah, theihnghilh hmak na tur thu awm hek suh. Ka unaupa pawh hian thil eng emaw tal hriat alo nei mial maithei asin. Ka ngaihtuahna chuan min ti chak sawtin ka hria. In chhûngah chuan lût ve in, a thingpui siam ngei in in, kan ti ti ta hlawm a. Mak ka tih chu, a che zia leh hawi her reng rengah hian tlêm tala kan in an ka beisei ve tehlul nen in anna pakhatmah kan nei lo. A ni tak e, kei chu mihring pangngai fa ka ni tlat lo va, mak tih viau na chhan tur a awm hlei nem le.
"Ka nu album i en duh em? I nu nena an thlalak te pawh a awm maithei asin." Vanêngmawia chuan kan thingpui inna no seng pah chuan a ti a. Ka phur zawng tak alâwm, ka tellovin engtiang chiahin nge a lo khawsak tih te pawh a hriat theih maithei asin.
Kalvari-a phone hmanga a chhuak tur chuan, mi rawn melh pah zauh a. In chhûng kan luh aṭang khan a ṭawng tlêm riau, sa pêl na tur lamin a rilru a luah khat vang te anih ka'n ring ve ngawt a. Ka nu album chhah tak chu phur ru tho si, hreh rûkna riau nei chung chuan ka en ta a. A fapa sên lai leh a pasal nena an thlalak a lo lang hmasa ber. "Keimah ka nih kha," ka bula ṭhu in a rawn tih chuan lu lo bûk khumin, thlalak dang chu ka en leh ta a. A lanna apiang chu lo sawi zawm zêlin, an lâkna hmun leh a hun nen lam, chiang taka a hriat thu min hrilh a. Ka zawn rûk reng, ka lan ve na chu a awm dâwn lo emaw tih hnuah ka hmu ta hlauh mai. A hmun hma vel engmah hriat theih loh turin alo in chep thla daih leh nghal a. "Ka nau anih kha, kum a tlin hmain min boral san a, kan ngai ṭhin khawp mai." A ti hnîm ruih a, ka nu chuan thi angin min lo sawi tihna anih ngei dâwn hi. Ka hrethiam ta in ka hria, kei hi, ka nu khan min thuk ru anih tih hi.
Kalvari-a phone hmang zo rawn lût lah chu, kan unaua kan ṭhu dun min hmuh rual chuan a ke pen a tawp chat a. Ngun thlûk taka min enin, a lu a thing leh nawk nawk mai. Engtak chu hria ni maw, a lungawi loh hmel em em mai leh nghal a. "Muanpui, tih tur dang a awm tawh loh chuan kan kal tawh mai dâwn em ni." Banga sana inkhai melh zauh pah chuan a ti a. Ka u bula awm la duh viau mahila, he pa hi a hmanhmawh hmel si a, ui chung chungin ka nu album chu ka khup ta a.
Ka u chuan gate thleng min thlah a, "nidangah kan lokal leh dawn ania," thudang sawi tawh lêm lo chuan tiin, kan kalsan a. Kan tlan liam dâwn thleng chuan min thlir zui vawng vawng mai. Ka nu thisen kai ve tho ka nihnaah, amahah eng emaw thawk a awm ve a ni ngei ang. Kan tlân liam hnu, kawng kawi kan thlen rual chuan a ding thut a. Ka lo in ring si lo, hma lamah ka bu dawrh mai. Tlema tlemah ka lu ka sawh lo chauh alâwm le. Thinrim ru zetin ka melh nghal a, na nei ni awm takin a lo ṭhen tlawk tlawk a. A thlan lah chu namên lovin a chhuak leh nghal a, "na i nei em ni?" ti in, a chal ka deh sak nghal a. A lo sa vur bawk sia, ka mangang nghal vek, a laka ka thinrimna pawh a bo nghal duak thei nia mawle. A kut lehlama a pum dâwm chung hian za lo zetin a rawn nui ro hawk a. "Min ngaihtuah ve deuh tihna em ni?" A mitmeng dul ruiha min en pah chuan a ti zuai raih a. Na a nei tih ka chiang, mahse, engatinge hlim hmel put luih a tum tlat zêl le. "Ngaihtuah e, Motor khalh tu i nia, i nat tlat chuan engtinnge in ka thlen theih ang." Ka ṭawng bah nawk nawk hialin ka hria, ka bag ka dap nghal a, ka lu a nat leh huna ei atâna ka tih nachhâwkna chu la chhuakin, mak ti a min en reng lai chuan a kâ ah ka hnawt lût nghal a. A rawn chhak chhuak rang viau mai, tukverhah a chil chhakin, "Muanpui, damdawi khá ka ei ngai lo." Ti leh hlukin tui bottle a ban nghal a, hawng rawk rawkin a in nghal khawlh khawlh mai.
"Damdawi khá te chu a chak ṭha alâwm," ti a a dang pêk leh ka tum chu ka kut min man sakin, rum zet hian min en a. "Damdawi tui lo chu a thawk chak lo, a thlum chi chiah a thawk chak." A ti leh hmuk mai a, damdawi ei a hreh ve hle tih ka hre ta chiah e. Ngaihtuahna ka nuih chhuah pui hak hak a, "digene i duh em?" Nui kar kar chunga ka tih chuan a lu a thing rang viau a. "A tui chi chiah ka dam pui ṭhin" thutak deuh chuan a ti leh a, ka nuih a ti za telh telh mai. A kum upa tawh viau mahse, damdawi ah kher kher chuan, nuapang rilru a la pu reng anih dawn hi.
"Reilote châwl lawk ila, a zia deuh hunah kan kal leh mai dawn ania." Ṭha tak chuan ti in, seat nghêngin a chhîng ta vang vang a. A hmanhmawh viau emaw tia, a pum alo nat rûk vang anih dawn hi, sawtah pawh khan a ṭawng tlêm em em ni. "Kalvari, engatinge mi hlim thei tak anga lan i tum tlat zêl a?" Ka ti ta thlâwt, na a nei anih chuan, thup kher lovin lan chhuah tîr ve mai se. Hetianga a awm hian, a hlim phah tak tak awm tawp si lo. "Hei hi ka nihna a ni, nui hmel hi chhûngril na lutuk thup nan ka hmang ṭhin. Chu chu mi chak tak te tih dan a ni." Peih loh hmel taka min chhangin, a mit chhîng reng chung chuan a nui lui leh hrâm a.
"Sa chu kan pêl tak tak dâwn em? Engtinnge ka lo awm ve dâwn? Piangthar ṭha tak ka la ni ve si lo va." Inthlahrung ru tak chuan ka ti leh a, a rawngbawl dan ka hria a, rinna chak tak neih loh chuan hneh theih an nih loh zia pawh kei aia hrechiang tu an awm lovang. "Joshua 10:25 ah khân engtinnge a inziah kha'h. 'Hlau suh ula, zâm hek suh u; chak tak leh huai takin awm rawh u, in hmelma in do zawng zawng chungah LALPAN hetiang hian a ti zêl dâwn a ni e,' Joshua'n Israel fate hnêna a sawi kha hre reng rawh. Kha thu kha Pathiana rinna a nghah zia lantîrna anih kha. A rin Pathian kha tuna kan Pathian biak hi a ni tih hria la, Amor mite Pathianin a hneh tîr vek ang khan tunah pawh hian min hneh tir ngei dâwn a ni tih kha ring tlat la, chu chu i chakna lo ni bawk rawh se." Chiang taka min en chung chuan a ti a, a pum na kha a dam ta vek nge mawni, na nei ang pawhin a awm leh tawh lo. Hepa hi ka tana Vântirhkoh, chung lam ami in a rawn tirh a ni hial lo maw le. A hun takah ka mamawh ṭhin em em thu ṭha leh hriatreng tlâk min hlui zêl a.
A na a zia tawh aniang, min tlan chhuah pui leh thei ta e. Mahse kan tlân thui hman lo, kawng chho ah chuan motor a tlân hleithei miah lo mawle. "Ka duatlaii hi a chau tawh aniang, reilote châwl leh lawk mai ang hmiang. A hahdam hnuah kan tlân par par tawh dâwn ania." A kut lehlama a dar hmet nuap nuap pah chuan a ti nuah nuah a. A neitu ka ni lo va, sawi theih nei ve hek lo, a motor hahdam hun kan nghak animai aniang chu. Kawng chho tlân a zo lo anih te chuan motor dang ken mai tur ania.
"Siakmawi, Riakmaw valêng iangin riahna tur ka vai, bawih no, tih hla kha i hre ngai em?" nui ruh ruh chung hian ati a. Min en ṭha duh lovin, steering a chûl a chûl mai. "Chutiang hla a awm ngai lo, ka hming nilo pui hian min ko ziah tawh suh." Ka ti chang fak a, a car chhe thei lo anga a sawi, kawng chho tlân pui theih miah loh aṭanga ka chhuak tur chu min pawt ṭhu leh hnawk a. "Anih chuan, Kalvari hawi zawngin ti ila. Aw ka ṭhuva, lungpui keh kâra mi, khâm chhawrdawha awm, i hmel min hmuh tir la, i aw min....." Ka ning lutuk chuan a sawi zawh hmain a kâ ka hup sak ta ringawt a. Thehmeh ang hlauh, a reh ta hmak mai. Ka kut lâk thlâk ka tum chu nghet takin min vawn sak zui a. "Nakinah Solomona'n Seba Lalnu a chhai danin ka la chhai dâwn che ania. Tûnah chuan tih tur kan nei, ralthuam ṭha ber ber, Davida ralthuam ai pawha bawn zawk kha phawrh chhuak la. A sâw raltiang tlânga thu kan chham ang kha chham leh thei turin ṭawngṭai ang che." Tiin ka kut chu a fawp leh zauh a, a si sup leh ta nghal a. "Kal ang aw, Zion tawlhpahrit aṭangin kan lokal e. Gehena meipuiah kan tlawh liam zawt zawt dâwn che u." Kan tlan chhuah rual chuan tiin, a phur thak leh hlê tawh. Eng tiang chiaha hlauhawm nge kan hmachhawn leh dawn ka hre lo. Mahse hei erawh ka chiang, hnehna chu Lalpan a chang leh ngei dâwn tih hi.
"Solomona khan Seba Lalnu a hmuh khan..." A tih lai mêkin, "ka ning, inngaizawng pawh kan nih loh hi. Min bialnu chei ringawt suh, ka kut i fawp ve ringawt lehnghâl." Ka kut a fawh chu hrechhuak leh hnuhnawhin ka vin hlak hlak a, ka kawr chuan ka hru nghal nawk nawk mai. Raltiang tlâng a kan thu chham te atia, a thusawi awmzia ka hrelo reng reng.
"Hmangaihna patling kawng kan zawh chho ṭan ang chu. Min hnar lo mai rawh, i Vântirhkoh angin min ngai tawp la, i ti sual lovang, âw Halleluiah." Thawveng tak chuan ti in, a si tel kher leh nghal a. Tihngaihna tak pawh ka hre tawh lo, ka Vântirhkoh ni turin ka duh tho bawk si a. Mahse, he 'Mahse' hi a awm leh ṭhin, ani chu Pathian fa ania, kei chu Thim fa. "Ramhuai nena inngaihzawn i duh em ni? Kalvari kawngah i hruai thei tak tak ang maw?" Rilru a luah hneh em avâng chuan ka ti ta ringawt a. Lo bu nghutin, "hla ah pawh ramhuai ka ngaizawng tih a awm kha. Engahnge kan theih loh bîk ang. Bâkah ka senior tawh si, nupui tur zawng du du rual pawh ka ni tawh lo. Zawn vak ngai lovin, ka khawih phakah i awm tho a, anilo'm ni." Mit ko san zuk in, min nuih tlawn vel a. "In duhna leh inhmangaihna pawh ala pian loh hi." Hnar dan kawng dang ka hriat tawh loh avâng chuan ka ti leh ta ringawt a. "Chutiang te mai mai, no khatin a that vek," awlsam deuh hian alo ti liam puat a. "Chutiang ringawt a ni thei lo, induhna leh inhmangaihna tel lovin a inngaihzawn theih loh" ka ti leh hrâm, min hnial tawh lo se ka ti ngawih ngawih. "Chuvang tak chuan alâwm, hmangaihna patling kawng kan zawh a ngaih." Mi pawh en tawh lêm lo chuan a ti sam leh êt mai. Hei vang hi anih chiah hi, U Hriatpuii'n non-mihring alo tih deuh kher ni. A tawnah hian thil harsa engmah alo awm lo anih dawn hi. "Anih tak chu," ka tih san ta ringawt a, "ni reng e, chuvang chuan i hmangaihna min khilai a ngai." A ngawi tawh dawn emaw tia, a eizawnna hi a haiin ka hria, a ṭawng theih dan em em hi lawyer ah ṭang zawk se la, hnehna a chang ngun ngawt ang mawle. "Engngpawhnise, Muanpui, kha lam biahthu kha chu nakinah kan sawi leh dawn ania. Tûnah chuan a ram leh a felna zawng hmasa phawt ang aw. Kan kalna hmun tur kan thleng ṭep tawh a. Chuvangchuan, kan thlen hma in Pathian hnênah inhlan tharna neiin, ṭhahnem ngai takin ṭawngṭai rawh." Thutak deuh chuan a ti leh ang lawi a, a chângin a uang thuang em em a, a zia hi ka hrethiam lo.
Fakzuheha pov:
A ṭawngṭai ve ta aniang a chhîng uluk ve em mai. Tûnah chuan min hnar lo bawk a, ka hmangaih theih nân theihtawp ka chhuah ang. He kawng hi amah ka duh vang leh ka ngaihzawn vanga thlang ka ni lo va. Ka hmangaih Apuii leh Ka chhûngte min ngenna avâng chauha zawh zawk ka ni. A chhungte'n ngaihdam an rawn dil dan khan ka chhûngte lung a ti chhe hial kha ania. Palai tirh nghal ut ut te an rilruk bawk a. Mahse, inngaihzawn nawmna pawh chên hmasa lova inneih nghal rikngawt kha chu ka pawm chiah lo a ni. Chuvanga hetia zui reng hi ka ni bawk a, mumangah Apuii khan min ngên ve kher lo se chuan tunah pawh hian sa pêl pui turin ka sâwm kher lovang. Mit chhîng chunga urhsûn taka a ṭawngṭai lai chu en vawng vawngin, "hei ngei hi a ni, ka vênhim tur chu." Ti in ka phun chhuak hiala, a hmelah sawisel tur a awm lo. A mizia pawh a zia chho hret hret a, mahse thim fa anga a inngaih tlatna hi ka paih bo sak hma chuan a thinlung min pe dâwn lo tih ka chiang a ni.
Kan kalna hmun tur, Ngaizel a hotel pakhat kawtah chuan ka din pui a. Tukina Father Joseph-a ka dil, tui thianghlim chu ka jacket iptêah ka ak ṭha sawk sawk a. "Amen," zawi tê hian a rawn ti chhuak sap a, a duhawm thar riau te'n ka hria. "Muanpui, I va inhlan rei em em ve. Jail tanna khawp thil sual tih i lo nei reng anilomaw." Ti in, ka fiam ta zeuh a, a ngai haw dawn emaw tih laiin, "ha aiah ha ka lo ti ṭhin a. Sual chu ṭhatnaa thungrulh a ngaih zia ka hriatthiamna ala rei lo êm alâwm." Nui sen sen chung hian a ti ta reuh a, a nuih zawnga a biang sum lang kalh chu ka vawikhat hmuhna a ni hial ang. Thlir nin ava har ṭan ve, het, Vala hi ka tuiral ṭan tihna em ni? "Ti hian kan ṭhu reng dawn em ni?" A tih chuan ka harh zawk a ni ber e. Kalvari kawng zawh kan ngaih tak kha mawle. "Nangmah vang," ti hlukin, ka hmanraw dahna, ka tawlh loh ip ngei mai chu ak chhuakin ka chhuk san ta daih a. Kan hma lawka hotel lian leh changkang tak, 'VAUBE' tih fiah taka in ziak kalh chu ka en reng a. "Vaube hotel, an sawi fo ṭhin kha animaw," ka bula rawn ding pah chuan ti in, a sam a ṭawn ṭha mawlh mawlh mai.
"I inring em?" A dara kuah pah chuan ka ti a. Min chhoh melh kiau in, "bei ila," a aw a ti puam chawp ve vel a. A mitmeng hi chu a rum ve hrim hrim a, hrechiang lo tu tan chuan a nêlawm loh ve mawle, mahse, a hrechiang tu tan chuan a zûn phurh ti na zual tu a ni tlat. "Min melh rum dan hi ka duh chi, ka favourite colour," ti in ka nuih vur vur a. Lo chek hlakin, "keichu JCB," a thinrim leh thut nge mawni, ka kut chu min paih thlâk sak nghal a. "JCB," ti a phun chhuakin, hotel chu ka pan pui ta a. Rilru ah a JCB sawi chu a châm teh tlat a, ber kher chuan, kan haw hunah JCB ka lei sak chiang ang chu âw. Mark score a ngai tlat, Vawk pu pawhin Hotu-a chhang tur a siam theih chuan kei, a chi chak hmel zawk hian engvanginnge ka siam theih loh bik ang. "Tiam tlat e," kan tih theih nân, JCB lei hmasak phawt a ngai dawn anih hi.
Kawngka chu pawh hawn mai ka tum a, chhûng lamah alo in kalh tlat mai. Buaina an neih avangin an khar tih ka theihnghilh daih alâwm le. Ka phone la chhuakin, min rawn be tu number ah chuan ka call leh ta a. Min chhân rual chuan, kawngka min hawn sak hun kan nghah thu ka hrilh hnu reiloteah kan inbiakna pawh ti tawp lo chuan a rawn hawng nghal a. Parda an zar phui vek bawk sia, light an on bawk si lo. Chhûn êngah pawh an hotel chhûng chu a thim khup mai. "Ka rin aiin in lo thleng hma a, thingpui in in hmasa phawt duh em?" Ti in, ṭhutna tur min kawh hmuh pah bawk a. Ka kal pui nu chu melh zauhin, "kan hna kan zawh hunah kan in zâwk dâwn ania." Ka ti ta ringawt a, a in duh chiah lo aniang, min lo mitmei nasa êm mai. "Aw le, lokal ru, a room ah kan kalh hnan tawp a." Tih leh thawh a rual a, nula fel tak a ni, mahse, an hotel chhûng chu midang hi an awm ve miah lo emaw tih mai turin a reh duk leh nghal a. In chunga min chhoh pui a tum lai chuan a phone a rawn ri leh rih a. "Min lo hrethiam lawk aw, a rei lovang," ti in a phone chu min chhân aan leh ta a. "Aw Caesar, hei an lo thleng chiah a," min melh zeuh pah chuan a ti a. Chu veleh phone chu min rawn pe nghalin, "a be lawk duh che," a ti dam leh thlap mai. "Aw, Fakzuheha, nilo, Fakzuala ka ni e," phone min pêk rual chuan ka ti ve nghal a. "Caesar ka nia, Hotel neitu kha." Lehlam ami chuan a rawn ti thûm dût mai. "Mmm ka hria e," chhum bung taka tiin, Muanpuii lo hawi kual nasa lutuk chu mitmeiin ka khap nghal a. "Ka nau kha in kutah ka dah tawp ania. Khatianga a buaina kha a rei tawh a, a khawsak dan kha khawngaihin lo thinhrik lo hram rawh u aw." Ngênngawl tak chuan a rawn ti leh a. "In thinhrikna hi Kalvari danah a awm ve hlei nem, lungngai suh, kan theihtawp kan lo chhuah dawn ania. A bak chu Pathian thu thu a ni e." Ti in ka chhâng ve a, "Aw le, Zualbawihi kha ka lo be leh lawk ange." A tih chuan phone neitu chu ka pe lêt leh a. An inbe rei lo, a phone dahin, "chho ila," ti a hma a hruai lai chuan, in chung aṭangin thâwm mak tak a rawn chhuak a. Zualbawihi pawh phawk taka mengin a ke pen a tawp chiang hle.
Chutah le, kan thawm hriat chu a rawn hnai zêl a. In chung chhohna step tawn tirh aṭang chuan, hmeichhe pakhat rawn eu thla in, a kut leh ke hmang chuan step ah muangchângin a rawn vâk thla ta a. Tumah che châng ngam kan awm lo, chu nu chuan tudang melh lovin keimah kher min la melh kuau zui a. Ramhuai mei nei ni lovin, ramhuai gymnastic bawn tak a ni. Min rawn hnaih zêl takah chuan ka awmpuite pahnih chuan ka ban leh lam leh lamah min kaiin, au chhuak ngam chiah si lo hian an chîk dun nghar nghar reng a. "Ngawi teh u, Beast Master ka va ang ve," an hlauhna tih reh tumin ka'n uang leh rih a. Ka thusawi chu hria ang pawhin an awm lo. Chu nu lah chu kan hmaah tak, kûn ngur hian a rawn ding zui a. Hlauhna pakhatmah ka nei lo, sawi tawh angin, Sangtei te ho ramhuai hmuh ṭhin ang kha chu ka hlau, ka zêp lo. Mahse, keia ramhuai hmuh ve ṭhin hi chu hlauhna pakhatmah ka nei ngai lo. Mahse, an mit rawng inthlak vek khawpa min melh hian ka râp ve deuh ṭhin. Tûnah pawh chutiang chuan min melh mek, engtinnge ka tih dâwn a chilthli a tla duah duah zui ania.
"Engtia tih zêl tur nge?" Muanpuii aw ka hriat takah chuan ka in thing harh a. Pathian thu ka hnêna lo thleng, Jeremia 2:15 "Sakeibaknei vânglaite chuan rûm khumin, A chungah aw an chhuah a, A ram chu an tiṭiau zo ta, A khawpuite pawh luahtu nei lovin a kâng fai ta." Tih chu chham chhuakin, "engahnge Pathian i cho, i cho rual loh i cho chhuah avangin i chungah hremna nasa tak a thleng dawn. Nang, ramhuai bawlhhlawh, ṭhatna reng reng nei lo hian he taksa chhûngah hian engmah tih theih i nei lovang." Ti ṭhuai ṭhuaiin, tui thianghlim chu ka la chhuak nghal a. Chu nu chuan Thinrim taka min melh chung chuan, "ka lo nghak reng che alâwm, kei aia thiltithei zawk nen in in hmachhawn ṭep tawh." A la ti chher chher mai, A khawngaih rawngbawl hna ka thawh chinah hian ramhuai kawchhunga lût tam tak inbeihna mualah kan luh pui tawh a. Khâng hneha awm ta te kha, hremhmun aṭangin an rawn chhuak leh ṭhin. Tuna a sawidanah kha chuan he ramhuai pawh hi a hmaa indona muala ka indo pui ṭhin te zing ami a ni tih a chiang maiin ka hria.
"Duati, engnge i rawn tih ve dâwn? I unau te bei tur hian he mihring, zu hmuna chatthla ṭhin hian a hmin ta che em ni?" Muanpuii nuih var var chunga a ti chu kei Krista bawih inti ngam hian na ka van ti sak sak êm. A ha dum zia leh a thaw rimchhiat dan aṭang hian ramhuai chak ve tawk tak a ni tih a chiang hle leh nghal a. "That tur che in ka lokal, Lilith hming hawh tu leh kha mu anga thla zâp thiam pawh kha ka la that em em ang." A zâm chhe mai dawn emaw tih laiin Muanpuii chuan huai takin a ti ve ta piap piap mai. Khap tumna ka nei hran lo, a that tak tak dawn pawh ni hlei lo. A chunga khatiang thil a thlen avanga sawi a ni tih ka hria alâwm. A thusawi chu a beng verh zâwng tak ani anga, chu ramhuai nu chu za taka nui chhuakin, Muanpuii chu a hmaiah chil a chhâk khum ta mai a. Chêt dang a lâk leh hmain step ah chuan ka nam thlu nghal a. A âwmah delh bet nghalin, ka kut leh lam chuan, tui thianghlim chu a hmaiah ka theh nghal ṭhawt ṭhawt a. A tal nasat lutuk chuan amah lo zawk, he taksa neitu zawk hi ka tina ang tih ka hlau si. Muanpuii leh Zualbawihi te chu a ke lo man bet turin ka tîr leh ta a. Rang takin an che ve nghal a, tui thianghlim bawk chuan a hmaiah ka theh nawn leh a. Na ti a a au vak vak lai chuan, a kâ ah ka leih lût bawk a. "Hnehna chu Lalpa ta a ni, nang ramhuai sual tenawm, he taksa chungah hian thuneihna i nei lo. Tho leh Nazareth Isua Krista hmingin chhuah san nghal rawh." Theihtawpa ringin ka au a, a kâ aṭangin chil phuan a rawn chhuak nghal bawrh bawrh mai. Na a tawrh avangin a chau tawh hle a, a tha a zawi hle tawh tih ka chiang ngam tak ah chuan, ka dar ah pu in in chungah ka chhoh pui zui ta a.
Zualbawihi chuan a room ah min hruai lût a. A khum hnawk nuai chu Muanpuii'n lo siam ṭha sawk sawkin, a zawh hnuah muangchangin ka mut tir a.
Parda te chu hnawl tawmin, light kan on bawk a. A kawchhûnga ramhuai awm hi a rawn chêt leh hun tur kan hriat loh avangin a kut leh a ke te chu kan phuar sak nghal sawk sawk a. "A ni telin a chak anih dâwn hi le, nidangah chuan room kawngka a rawn hawng thei ngai lo." Zualbawihi'n a hmai hruk fai sak pah chuan a ti siam siam a. Ramhuai chak tak anih avangin beih rei a ngai maithei. Mahse, kan beih rei pauh leh Pathian ropuina kan hmuh belh zêl si a.
A muthilh lai chu remchângah la in, ka awmpuite pahnih chu ka ko hrang a. Pathian thu thianghlim chhiarin, A puihna kan mamawh zia leh chakna dila ṭawngṭai nasat kan ngaih zia chu ha hîpin ka sawi a.
Hermon daifim Zion tlangtea tla ṭhin ang hi a ni: Chutah chuan LALPA'n malsawmna thu a pe a, Kumkhuaa nunna tur chu (Sam :133:3) a inziak angin Zion tlanga Hermon daifîm lo tlâk hun nghakin, a hmaah kûnin kan ṭawngṭai ta a. Kan ṭawngṭai zo chiah tihah, kan ramhuai beih bawk chu khumah lo ṭhu chhuakin, min lo nuih vur vur mai. Tui thianghlima a hmai ka thehna kha, a pilh phung bawk sia, a sam thur lutuk leh a ha dum ṭhut te chuan, hun rei tak chhûng a inbual tawh lo tih a tilang chiang hlê a. "Hneh theih loh nun nei tu kan Pathian hian min awmpui tih ka chiang, he ramhuai hian hnehna a chang ngai lovang." Tih leh thawh ka rual a, ka awmpuite pahnih pawh chuan min rawn pui ve vatin, a kut kan phuar nawn leh ta a. Mahse, kan phuarna chu a nghet lo deuh nge mawni, a khum a rawn che dawt dawt a, tukverh leh kawngka pawh a rawn inhawng ṭhuai mai. A kut phuarna chu awlsam tak hian ati chat a. Nui vur vur chunga min en in, a kawr fual bal tak chu muangchângin a hlîm chho a. Engthil nge tih a tum ti a ka ngaihtuah lai chuan, awmze nei taka min melhin, ka hmuh lai ngeiin a ka a kawm ta pawk pawk a. "Hrep tak chuan," ti in ka chil ka chhak ṭhuai a. Hurna Thlarau sual, khawvela ka ten ber te zing ami ka vawikhat beihna a ni.
Chuti taka min hlau lo chu ka thin a rim ve ta a. Bible keu in, Isaia 14:12-15 chu ka chhiar khum a.
Aw nang, Babulon lal, zîng êng, Vârparh Arsi inti, Vân aṭangin i va tlahniam ta êm! Hnam dang titlâwm ṭhîntu, Tihtlâwm i nih ve tâk hi: Vânah ka lâwn ang a, Pathian arsi chung lamah khian hmâr tâwpa Pathian tlângah lalṭhutthlêng ka hûng ang. Chhûm chung lamah ka han chho zêl ang a. Chungnungbera tlukah ka insiam ang, i ti vei a. Mitthi khuaah an namthla ta a che, A khuar thûk laiah chuan. Ka chhiar zawh hnuah, chu ramhuai in kawm mawlh mawlh lai lu chungah chuan ka Bible chu ka nghat chawrh a. A thiltih lai tawp hmakin, na tiin a vial nghal ngawng ngawng mai. Hnehna puangin, tunge a nih sawi turin ka vin ta hrâwk hrâwk a. "Holmes, Holmes ka ni," ṭap chung hian a rawn ti chhuak a. "Holmes maw!" Muanpuii'n a rawn ti ve nghal. A meng phawk lutuk chuan ka ngaih a ti ṭha lo dawn dawn mai.