PSYCHIC VOLUME _Chapter-3

[April Hmar Liverpool]

PSYCHIC Volume _3

Bung Thumna



inspector chuan "imm, thil mak ve tak chu ani. Midang pawh nangmah chauh nilo, he pastor hi a thih lai, zan dar sawm leh minute sawm thum inkar bawr vel a hmun dang a hmu tu pawh an awm asin, chu pa phei chuan a thlalak te nen lam alo nei lehzel a"



zorema pawh chuan mak a tiin a hrilhhai hle mai a. "Imm, engpawhnise va haw leh tawh rawh, a awmzia ka lo chhui chiang dawn nia, thlarau nge anih a i thil hmuh chu a tak ngei zawk? mahse mamawh hun a biak pawh reng theih turin awm la" tiin a inleng nen chuan an intinsan leh ta a.



Rinpuia chuan "sir, ngaihdan pakhat ka nei, heng pastor thlarau ni awm tak hmu te hi an rui anih loh vek pawhin an hmuh sual emaw anmahni lam hi rilru lam buaina nei te pawh an ni maithei ani" a han ti a, inspector chuan "rina, a thlalak nen lam a neitu pawh a awm tih kha theihnghilh lo ila" rinpuia chuan "ka hria alawm, mahse heng mi te hian intihlar an duh vang mai mai niin ka hria, a thlalak neitu ni a insawi pawh khan a thlalak neih kha amah pastor niloin midang pastor nen a in ang ve tak thlalak zawk te pawh an ni thei asin, tin thlalak kha edit a nilo ang tih a sawi theih miah loh" a han ti a, inspector chuan "imm, chuti anih chuan kan finfiah thei alawm" alo ti a, rinpuia chuan "ni e, kan finfiah phawt anih loh chuan awihsak mai chi niin ka hre ve lo ani" alo ti ve bawk a.



Chutiang a a thihna an chhui zui mek pastor k.lalngaihawma thlarau ni awm tak hmu ni a rawn in sawi te avang a an ngaihtuahna ngun tak a an sen mek lai chuan mi pakhat dang a rawn lang veleh hlawl mai bawk a, a hma a mite sawi dan ang thovin pastor k.lalngaihawma ni ngei tur chu a thih zan, zan dar sawm leh minute sawm thum inkar ah an awmna veng ah a hmuh thu a rawn sawi veleh ta tlat mai.



Chu pa sawi dan chuan pastor chu a hmu a, mahse a en liam ve mai a ni awm e, mahse a tuk ah chuan midang ang bawkin chanchinthar ah chuan pastor pakhat chu hotel pakhatah thi a chhar anih thu chu an rawn puang ta a, chu pa chanchinthar a mitthi an chhar ni a an rawn tarlan hmel a han hmuh zet chuan nizan mai a a mi hmuh pa ngei kha a ni tih a hria a, mahse thil mak tak a awm, khatia kha pa zan dar sawm leh minute sawm thum inkar a a hmuh pa ngei mai kha zan dar sawm vel bawrah bawk thiin an lo chhar reng anih chu. Chu thil chuan mangang tak leh hrilhhai takin a awm tir a, mitthi chuan phir pui emaw unaupa emaw a nei anih te chu a han ring a, a ngaihtuahna chu a buai in a mangang takzet ani.



Police lam pawh chuan an thu dawn te chu an bawhzui nghal thuai a, pu k.lalngaihawma chhung te hnenah chuan pu ngaihawma chuan phir pui alo nei reng em tih te, unau pianpui, ama hmel hmai nen a in ang tak midang an awm em tih te chu an han chhui zui leh ta a, mahse pu ngaihawma chuan phir pui alo nei hauh lova, unau amah nen a in ang tak pawh chu alo nei hauh lo lehzel mai.



Chumi mai chu ala nilo cheu, khami zan a pastor thla ni awm tak hmu tu ni a insawi te kha an kawm chiang leh vek a, mahse an ni chuan an thil hmuh chu hmuhsual emaw ruih vang emaw a nilo a, an mit ngei in an hmu a, dar zat pawh chiang tak a an hriat thu an sawi ve tlat mai ani.



Tin, an zing a a fiahna pawh neitu, pastor thlalak nen thlap a neitu pawh chu a thlalak neih te chu uluk tak a en dik sak a ni ta a, khami zan a mi ngei kha ani em tih te, siamchawp a ni em tih te, tin thlalak a mi pastor ni ngei a lang chu midang pastor hmel hmai ang tak an lo ni zawk lo maw tih te chu an han chhui chiang leh dap a, mahsela chung mi te thil tawn leh thil hmuh chu an fiamthu hauh lo ani tih chu police te hmuhchhuah ani leh ta tlat mai.



An thawmhnaw hak in ang chiah chiah te chuan thudik ngei an sawi niin a lantir tlat si ani. thlalak chu a tak ngei ni chuan a lang, mahse chutiang a thlarau vak vel chu a thla pawh lo lak fuh ngei ani tih han pawm ngawt mai chu harsa an tihpui em vang ani rih zawk mah awm e.



Inspector chuan a lu chu a dawm vang vang a, chutah harhchhuak thut ni awm fahran chuan "rinpui, crime scene thlalak ho kha rawn la teh" a han ti a, rinpuia chuan hmanhmawh tak chung chuan crime scene thlalak ho chu a han la nghal thuai a, inspector chuan uluk fe hian pastor ruang thisen nen a inchiahpiah nuai mai chu a han thlek vang vang a,



chutah pastor thih zan a pastor thalak lo la fuh tu thlalak chu ngun tak chuan a han en fiah veleh a, chutah inspector hmelah chuan engemaw thil fel hlel deuh a awm ni ngei tur ani, "imm, thil ni thei ani a, thil ni thei lo ani bawk tih ah bawk hian zeldin a tul leh dawn anih hi, thil reng reng mai hi a chiang fak thei reng reng lo hlawm mai" tiin a han rum nghat a.



rinpuia chuan "sir, eng chungchang nge? alo ti thuai a, inspector chuan "rina, hei thlalak pahnih hi ngun deuhin en rawh, pastor thuamhnaw hi han en teh, coat suit dum ve ve an ha a, hei a ruang a a landan leh thlalak pakhat zawk a a landan te hi an in an lohna hmuh tur a awm meuh lo chu a ni, tarmit a bun hi a thihna hotel room a dawhkan chung a tarmit ngei kha niin a lang lehzel si a"



rinpuia chuan "sir, thil dik lo a awm tihna a mi? Alo ti hu mai. Inspector chuan "nilo rinpui, thil a dik lutuk zawk anih hi, mit ngeiin thlarau thlalak kan hmu ve ah in ngai mai ang" Rinpuia chuan "chu, thil a diklo tawp zawk anih chu, thlarau hmuh hi thil pangngai lo tak a ni asin sir"



inspector chuan "nilo rina, pi vanhmingi kha ka hrilh che kha ila hria em? hei min rawn biakna pawh text hmangin a ni, call pawhin min rawn bia alawm, kan pastor nupui pi vanhmingi hi a fate leh chhung ten rilru lam a damlo tiin sawi mahse, ka hnen a a thusawi tak te kha a dik ngei niin a lang tan dawn tlat.



"a pasal, pastor k.lalngaihawma thihna hi dawi thil leh thlarau nen a inkungkaih thil niin ka hre tan ta riau, alo sawi dik ngei pawh a ni zawk maithei asin" Rinpuia chuan mak tih hmel fe a a pu chu en in "sir" a han ti a, inspector chuan "enge thil dik lo a awm em ni? Rinpuia chuan "sir, tun a i awmdan kha mi ang lo leh rilru lam buaina nei i ang lutuk, sir ti teh, i inthing harh teh ang, heng thil mak lam ringawt hi i buaipui lo ila, misual hi i man vat zawk teh ang"



"sailova hi misual ani, pastor ngaihawma thattu ani, min bum mai mai ani, dawt a sawi a, inphat mar mai mai a tum ani, chubakah hetiang a kan awm kan awm zawngin rilru lam buai ho awmna lamah hian kan hotu te hian min la tir liam leh duh tak tak mai ang, sir ngaihtuah ve mah teh, kha, hman kum tawhah hmeichhe pakhat christinai thih dan chungchang kan chhui chiam tawh kha,



"khami tum khan christinai thlarau bia ang a i insawi avang leh a thih dan chu mahni intihlum nilova a pasal in a that ni a i sawi avang khan rilru lam buai awmna ah thawn liam kan ni lo chauh tawh anih kha, khatiang thil khan tunah min tihbuai leh a tum mek ani, nilo, khatiang thil kha a thleng nawn tawh tur anilo ang"



Inspector chuan zuai zet hian "imm, kha thu i rawn sawichhuah takah chuan ka la hrereng mai, christinai kha amah a intihlum anih kha ka ring thei lo ani, a pasal kuttuar emaw kha anih ka ring tlat ani" Rinpuia chuan "imm, a thlarau pawh i bia a tiraw? alo ti a, inspector chuan "kha zawng, thudik tak hre lo zawk la i tan pawh a tha zawk ang" rinpuia chuan "sir, i be tak tak em? Christinai thlarau kha i hmu tak tak em?



Inspector chuan "rina, nangpawh victora thlarau boruak a a thamral lai kha i hmu tak tak em? An han ngawi dun ren rawn a, chutah inspector bawk chuan "he thil hi thlarau hnathawh emaw dawithiam thil tih emaw anih theihna lai a awm in ka hria"



rinpuia chuan "lalpa leh! sir, rilru buai nih i duh tak tak em ni? Mi in an lo hre riau riau palh a nge a" inspector chuan "rina, he case avang hian kan buai ru mek chu anih ber hi maw, misual kan la man thei lo a, pastor thih dan hi kan la chiang thei hek lo, tin khang voice record te kha kan zirchiang viau na chungin tualthattu ni a ngaih leh a victim inbiakna inpersan lutuk mai te kha thil pangngai a ni lo ani. khatiang a tualthattu leh a mi thah tur inbiakna inpersan deuh kha i hre tawh ngai em? Khang te, hei tunah mi hrang hrang mi pa thum ngawt in pastor thlarau ni a ngaih theih tur an hmu a ni a, pakhat phei chuan a thlalak nen lam, a finfiahna nen lam a nei thlap nghe nghe a ni a"



Rinpuia chuan "sir, rilru buai ang leh thluak buai ang a awm chu ka duh miah lo ania" inspector chuan "imm, rilru buai ang leh thluak buai ang a kan lan hi a tul hmel si anih hi" alo ti a, rinpuia chuan "sir, ni e dawt ani chu ka tilo, mahse he pa, he thlarau vakvai pa hian tunah min rawn tihbuai that leh a tum niin ka hria, ni e, ka hria alawm,



'christinai kha thah ani tih kan han hrechhuak a, mahse kha thil kan buaipui avang khan rilru buai awmna ah kan luh phah thelh a, tin a hnu leh ah keini police te chauh nilo, doctor freddy leh dr hriatpuia te nen thleng pawh a kan buai leh tak zia te kha" inspector chuan "rinpui, kha pa lianzuala ang a inlan christinai pasal victor vanlalpianga thlarau boruak a thamral ta kha i hmu tak tak em? Keiin christinai thlarau bia ni a ka insawi ang chiah khan nangpawh Khan victor vanlalpianga thlarau boruak a a thamral lai kha i hmu tak tak em?



Rinpuia chu a ngawi reng a, "sir, khami tum khan ka a zo ta emaw ka inti hman hial asin, mahse sumo a a chuan pui te nen lam, khaw chhungah ngei pawh ka mi hmuh pa chu ka finfiah a ka um zui zel a, a tawp ah christinai pasal victora alo ni reng ani tih ka hmuchhuak ta anih kha" tiin inspector nen chuan uluk tak chuan hun kal tawh chu an chhui kir ta dauh dauh a.



File hlui te chu haiin sulhnu hlui leh chanchin hlui an thlek let leh chu a tul ni ngeiin a lang ta, christinai pasal, a nupui thattu a ngaih victor vanlalpianga kha a chanchin an chhui zui zelna ah amah kha khawchhak lam unau kan tih burma mizo kan tih ang hi a ni a, he lai mizoramah chhung leh khat a nei lem lo ni a hriat ani,



tichuan christinai nen khan an innei a, an nupa karah chanchin neuh neuh sawi tur a thleng ve fo thin bawk a ni awm e, tichuan christinai kha khaw pawn a building ruak pakhatah in awkhlum a hmuh a ni a, mahse inspector remruata hian christinai chu in awkhlum nilovin thah anih thu a sawi tlat thung, a thattu pawh a pasal victora ngei chu niin a ngai ani.



Hun a kal zel a, victora pawh chu zawn a ni a, mahse a awmna hmun leh a hnu an chhui tawpna ah zel chuan victora chuan identity hran alo nei zel a, nupui alo nei zel bawk. Mahse a awmna hmun a piangah chuan a awm nghet ngailo a, hmun hrang hrangah a insawn kual zel ani.



Tin, a nupui te chu mahni intihlum emaw thih dan pangngai lo deuhin an thi zel a, nupui pathum neiin mahni intihlum ni a ngaih vek an ni. A tawp a tawpah victora awmna chu va nang ching ngei dawn in police te chuan an inhria a, mahse victor vanlalpianga chu a thih tawh thu an lo hrilh ta tlat mai. Tichuan victora thlan ngei pawh chu inspector remruata leh rinpuia te chuan an va tlawh ta nghe nghe ani.



Mahse hun rei tak a liam leh hnuah rilru lam a damlohna nei ni a insawi, thil rapthlak tak leh tihbaiawm tak tak tawng thin ni a insawi putar Kum uai thla lam ni tur hi a rawn lang hlawl mai a, inspector remruata bawk chuan chu pa leh a kaihhnawih thil a hriatthiam har tak tak chungchang te chu a chhui leh ta a, mahse a tawp a tawpah chuan chu pa, putar rilru lam harsatna nei ni a insawi chu kum tam tak liam tawh a mi a nupui thattu ni a ngaih a hnu an lo chhui zui hrep tawh leh a thi tawh ni a an lo ngaih victora ngei kha alo ni reng tih an hrechhuak leh ta ani.



Mahse chumi ah chuan ala tawp mai lo, victora chu rinpuia mit hmuh lai ngeiin boruakah a thamral mauh mai si a, chuti anih chuan victora thlarau chuan an ni inspector remruata te chu a rawn chhui let ve ta thung tihna em ni ang? Victora kaihhnawih thil reng reng mai chu hriatthiam a har in dawi leh thlarau lam nen a inkungkaih tlat niin a lang a, chiang tak leh fiah taka thil awm zia tak chu hmuh theih a ni mai lova, hriatchhuah theih lah ani ta lo ani. An rin dan leh chhui dawn dan te, an zeldin thu hmang a an ngaihdan te chu an thil rem khawm leh hriat te an ni ta mai awm e.



Inspector remruata chuan ngun tak chuan thil awmzia chu a ngaihtuah dauh dauh reng a, tun tum ah pawh hian chiang tak leh fiah taka thil awmzia pharh mai theih niin a lang tlat lo ani, an ngaihtuahna leh an zeldin thil te chauh chu an hmuhchhuah an la mi mai a, pastor thattu ni a han rinhlelh theih ber tur sailova chungchangah lah chuan thil a hnawk chho zel niin a lang si a, thu hretu dang an rawn lang zel a, pu ngaihawma chu a thih lai vel bawrah a thlarau a chhuak anih ngawt loh chuan a rual in hmun hrang hrangah a awm kual thei tihna ani ngei ang.



mahse chu thil chuan an investigation leh an ngaihruatna te chu rilru buai te leh damlohna nei te ngaihtuahna ang chauh ah a chantir ta a ni ber awm asin, chung thlarau leh dawi chungchang te, thil mak tak tak te leh hriatthiam har tak tak te chu a makna leh hriatthiam a har na te tellova a nihna tak haichhuah chu an tih makmawh ni ah an ngai si a, mahse a mak tulh tulh a, thlarau chu mit ngei a hmuh anih thu te hial an hre leh ta zel si a, awih loh ngawt chuan kawng ro a su tehchiam lo niin a lang si a, han awih ngawt dawn lah chuan mi rilru buai nih leh hotu lam te pawh in an pawm pui ve hauh loh tur thil ani si a, tin misual chu an hriatchhuah phah kher a ngem? engtin nge hma an lak zel ang?



Inspector chuan rinpuia hnenah chuan "rina, pi vanhmingi kha rilru lam a damlohna nei ni khan sawi mahse kawm chian ka duh ta kher mai, keimah ngei hian hmaichhanah ngei kawm ka duh ani". A han ti a, rinpuia chuan a pu rilru tur chu hrethiam in "sir, ka hrethiam lutuk che alawm. Mahse pi vanhmingi hian heng thil thleng te leh boruak in lumleh dan vel hi alo hria a, keini ang bawk in ngaihdan leh zeldin alo siam ve tihna ani mai alawm"



Inspector chuan "nilo rina, kan pi hian thil hi a hre ve deuh tak tak a ang riau ani. A chhan chu khatia a pasal thih hnu a tuk leh zan ah khan khatia a pasal thihna chu dawi thil emaw thlarau lam thil ni khan min rawn hrilh tlat si a, a pasal chu dawi hlum ani a tihna anih ber chu, ka awih lo khawp asin, mahse hei a hnu leh maiah kan pi thusawi ka bengkhawn sak tak lem loh te chu alo ni thei mai awm mange ti a han ngaihruat theih turin thil a thleng chho ta zut mai si a, pu ngaihawma thlarau hmu ni a insawi mi pathum ngawt mai an lo lang ta hlawl mai anih hi.



"Tin, kha voice record a pu ngaiha leh vanlalsailova te inbiakna inpersan lutuk chungchang te kha ka han ngaihtuah hian a nihna tak chiang tak a hmuh har tak ni si, chumi chu a ni ngei ang ti a han zeldin tur tam tak awm si in thil hi a kal tlat mai a, Evidence meuh pawh kha a chiang viau ni a a lan lai khan a chiang lo tlat a, tin sailova hian dawt sawi hmel emaw phuahchawp hmel emaw a pu hauh silo a, a inpuang hauh tlat silo nen. A thah anih loh thu a pha tlat mai si nen"



Rinpuia chuan "sir, heti zawng hian khaikhawm mai ila rilru pawh a hahdam berin ka hria ani". A han ti a, inspector chuan "imm, khaikhawm dan tur hi hriatthiam a har ka ti asin" alo ti a, rinpuia chuan inrintawk hmel tak chung chuan "sir, hemi thilah hian thlarau lam leh thil mak tak tak dang chu a inrawlh ngei ni a lan na hi i pawm mai ang. Mahse, chutiang a rilru buai leh thluak buai ang mai a miin min ngaih zui mai loh nan erawh kan fin thiam ve mai a tul niin ka hria.



"a makna lam ringawt leh thlarau hmuh chungchang te kha chu i ngaihven duh lo mai ang. Heti hian ka han khaikhawm dawn chhin ang aw? a han ti a, inspector chuan "imm ni e, keipawh hian thil mak anihna leh thlrau lam thil anih hi ka ringhlel hran lo. Mahse pi vanhmingi thu min hrilh mawlh kha ani.



"A makna te, thlarau hnathawh anihna te chu kan pawm dawn anih si chuan pi vanhmingi sawi, a pasal chu dawi ani tih thu kha kan pawm a tul dawn tihna a ni ngei ang a" Rinpuia chuan "sir, kha zawng thup bo vang vang chi zawk a ni asin, pi vanhmingi hi rilru lam damlohna nei anih kha, a thusawi awihawm loh lutuk kan pawm mai anih chuan hotu te lam atang pawhin mak tih kan hlawh lutuk palh ang, nichin a ka sawi tak rilru lam buai ni a mi ten min lo hmuh theihna lak atang a fin thiam kan mamawh ka tih kha tun hi a hun tak chu ani. Ka han sawi a nga lo ngaithla chhin mah rawh" tiin rinpuia chuan an hnuchhui dan chu a han khaikhawm ta a.



"A hmasa berah chuan pastor chu thah niin a lang a, crime scene a a landan te, tin postmortem result a a landan te kan hriat vek tawh kha. Tichuan keini in investigation kan tan ta a, tualthattu ni a rinhlelh chu tudang an nilo, police hnen a rawn thlen tu vanlalsailova ngei hi ani, sailova chu rinhlelh anih theihna lai evidence kan nei a, pu ngaihawma fanu nen an inlaichinna pawh kan hria a, tin pu ngaihawma nen inkar thalo tak an neih thu te, tin a lakah pu ngaihawma a thinur in a lungawi lo thin hle tih te, tin khami zan khan pu ngaihawma chuan a awmna hmunah a koh kal ngei theih nan tawngkam pangngai lo takin a bia ani tih pawh amah sailova ngei in a sawi a.



"tichuan pu ngaihawma awmna hmun a va thlen chuan zan dar sawm bawr anih thu pawh a sawi a, pu ngaihawma thih thu a rawn report khan zan dar sawm leh a chanve a ni. Chumi dar sawm leh minute sawm thum inkar ah chuan kha laiah khan midang awm an awm ve lova, pu ngaihawma thattu ni a ngaih theih tur midang an awm lo tih pawh sailova ngei in a sawi ani.



"Chuti anih chuan pu ngaihawma thattu ni ngei a lang chu sailova chu a ni ta ani. Tichuan tualthattu chu sailova chu ani tih a lan na dang a awm leh ta zel a, sailova ngeiin an inhnial thinrim chiam thu a sawi a, tichuan pawnah minute hnih khat chauh a va chhuak a, mahse a va lut leh chu pu ngaiha chu hliam pui tuar a alo awm thu a sawi a, han ngaihtuah ve mah teh sir, tualthat tu hi hum hram hram kan tum a ang ka ti ber tawh zawk. Voice record a awm a"



inspector chuan "chu tak chu alawm thil a buai zawh tak nachhan chu, i han khaikhawm zawng zawng te kha a tir a mi pangngai tan pawh a hmuh thelh theih hauh loh tur an ni alawm. Mahse voice record a thil awm khan mak tih tawngkam leh dawi tih tawngkam te, thlarau tih tawngkam mai nilo mit mgei a hmu ni a insawi te leh a finfiahna thlalak te chu a rawn pian chhuah tir ta zel anih hi.



"I khaikhawm dan chuan case hi a hmawr kan bawk dawn anih chuan kan ti fel thei ngei alawm, mahse heng thil mak leh thlarau lam te hi kan Thai bo a ngai dawn tihna ani a. Kha voice record kha kan tichhia ang tihna anih chu, kha thil kha he case a thil mak hmasa ber ani si a, tichuan misual chu sailova hi ani tihna a ni ang a, mahse amah sailova ber hi a inpuang duh silo a, a thil tih a nih loh thu in a tang ve tlat a, mahsela hei erawh hreh tak chung a kan kal tlang pui mai erawh a tul dawn tihna a ni tawh mai, tin sailova ngeiin a sawi dan atang a a landan ah pawh khan court chuan sailova ngei chu misual anih an ringhlel bik hauh lovang, mahse voice recorder kha kan tihchhiat a tul ang"



Rinpuia chuan "chu sir, thil mak te chu kan thaibo vek dawn tihna a niang maw? a han ti a, inspector chuan "ni chiah e, thlarau hmu ni a insawi te chungchang hi darh vak lo sela, tin pi vanhmingi chungchang pawh hi darh vak lo mai rawh se" rinpuia chuan "chu zawng sir, eng ang pawhin darh mahse mi tumah in an awih chuang lovang, intih lar tumna leh pi vanhmingi ngei pawh rilru lam damlohna nei a ni a, chuvang chuan an ni thusawi hi chu court chuan a pawm ve lo tawp ang. Dawi tih te, thlarau tih te, thil mak tih te chu lemchanna leh intihlar duhna thil mai mai ani"



Inspector chuan "imm, an ni chungchang hi chu ngaihven duh lo mai ila, tin voice recorder a inbiakna mak tak kha dah bo bawk ila, sailova ngei hi misual ber a chu anih duh hmel tho bawk a a tha ani mai". rinpuia chuan "sir, voice recorder kha tihchhiat chi a nilo, tarlan ngei a tul zawk. sailova hi court in thiam loh a chan tir anih chuan sailova pawh hian a luhlul a chhuah reng duh bik lovang, thudik chu ala puang em em ang"



Inspector chuan "mahse Rina" a han ti a, rinpuia chuan "mahse enge? alo ti vat a, inspector chuan "khang voice recorder chungchang te kha tualthattu sailova ukil hian a fiah lohna a hmuh thelh bik hauh lovang" a han ti a, a ngawi leh vang vang a,



rinpuia chuan "sir, kha mi chungchang kha chu sawi chhuah nachang a hre lo tawp ang, sailova hi tualthattu fing tak a ni emaw kan lo ti a, a fing vak lo ani tih a thusawi dan zawng zawng ah khan a chiang ani. Mi fing tak chu nise a thusawi dan zawng zawng ah khan amah hi tualthattu ni ngei a lang chu ani tih a inhrethiam ngei ang. Dawt sawi a thiam lova, a mah rinhlelhna atang hian a thiam loh a awm lo ani tih a inpha thei hek lo" Inspector chuan "chumi tak chu ani he pa sailova hi misual anih ka rin lohna chhan chu ni, thudik tak a sawi ani mai a, a tih a nilo a ti bawk a" alo ti leh a. Rinpuia chuan "sir, chutiang thil ah kan buai leh dawn anih chuan a ngaiah bawk dawi tih te, thlarau tih te, thil mak ah bawk kan let leh dawn asin" alo ti a.



Inspector chuan "imm, heng thil mak te hian min run riau mai, thil mak te hi luh chilh law law ka duh ta rum rum mai" a han ti a, rinpuia chuan "nilo sir, kei pawh in mak ka ti ve tho alawm, mahse thang ani. Kha pa, victor vanlalpianga thlarau khan thang a valh mek zel ani. Ngaihtuah ta che, thlarau thil tih hi mihring pangngai hian engtik ah mah a finfiah ngailo ang.



"Chuvang chuan keini hi kan buai zel zawk a nga, nakinah chuan a duh ang ngeiin keini chu rilru lam buai leh thluak buai ang a ngaih kan la ni thuai dawn, chumi hunah chuan rilru doctor te hnenah thawn liam kan la ni ang, hman kum christinai thihna kan chhui tum a a hmawr kan bawk dan ang chiah khan thil hi a thleng leh ang, mahse khami tum kha chuan engtin tin emaw rilru buai awmna kha kan pumpelh ta hlauh zawk mai pawh a, kha thil a puitlin theih tak loh kha tun tumah a rawn thar thawh leh a ni, he pa victora hian keini hi rilru buai ho awmna ah min thawn liam a tum a, rilru leh thluak buai ang ah min chhuah a tum ani" Rinpuia aw ka chu a Chiang in a fiah kalh kalh thin kher mai.



Inspector chuan "rinpui, khami tum, christinai case kan buaipui tum khan thudik avang in nge thudik tawk lo avang a khatia rilru buai awmna a thawn liam kha kan nih? A han ti a, rinpuia chuan "sir, ka hmuh dan chuan thudik leh thudik lo a hriat theih tawh loh, mahse hei erawh ka rindan ani ve tho, thlarau tihbuai in kan awm ani tih hi.



"Thlarau hnathawh a ni miau a, mihring pangngai tan hi chuan a nihna tak hmuh a har anih hi. Kan dikna avang a rilru buai ni a ngaih kan nihna lai a awm thei ang a, kan dik tawk lohna avang a rilru buai ni a ngaih theih kan nihna lai pawh a awm tho bawk awm e, ka sawi awmzia chu i hrethiam em? Mitthi tawh thlarau i bia tih thu kha nangmah ngei pawh in thudik ngei ani tih i chiang bik lo niin ka hria, i sawi tha duh ngailo a, mahse keimah ngei in ka han tawn ve takah chuan i rilru tur awm ang chu ka hrethiam ta ani, thlarau i biak chungchang kha thudik anih leh a nih loh kha i chiang ngam tlat lo ani tiraw? Kei pawh khan victora thlarau boruak a thamral ta ka hmuh khan ka thluak chu a buai zo ta emaw ka ti ve tho alawm, mahse ka thil tawn leh hmuh kha a dik lo ka ti phal bik silo a, mahse keimah ngei pawh hi ka inringhlel deuh tho bawk si a"