KA HMANGAIH THINGTLANGPACHAPTER 1
“Mipa sual lutuk a nihsaw hnaih hauh suh," ka awmna nu chuan a rawn ti sar sara, kei erawhin min rawn rimtu tlangval naupang zawk zawk tawh lo tak, hmel rum tak nelawmna nei reng renglo; mahsela hmeltha tih loh theih miah loh chu ka melh leh zauh zauh thina, midang rawn leng te lakah chuan a danglam fal nalh bawk.
Kei hi Aizawl a piang leh seilian ka ni a, thingtlangah teacher hnathawk turin ka awm dawna, ka thlen atanga a naktuk zan atang in leng ka nei nghal pang mai. Thingtlang lamah chuan an la inrim fo a nih hmel.
Ka nu thiannu chuan misual tak ti mahse ka ngaihven lo theilo, a mizia cool raih chuan engtin emaw hian min ti danglam tlat a nihchu.
“Khawpui nula chu lo char bet hmak ila a tha, chhuah miah loh tur, Valpui i hria maw?" tiin fiamthu chuan an ri dar dar renga, khapa erawh kha chu a tawng tam lem lo khawp mai, midang tawng nak nak karah chuan ka melh leh lo thei thin lo.
“Char bet hmak ang, keiin ka chan loh chuan nang ni talin in chang ve thung ang chu" Valpuia an tihchu ka melh zawka, tlangval chhe zawk zawk chu a nilo, a cher lam deuh. Sam zuah buk deuh tak a ni a, a inhmeh phian lawia.
“Khalaia tlangval kha i hming ka hre ve miah lo, rawn leng ve ta nafam chu i hming min hrilh ve la" tiin ngawi renga thu ka mit la em em tu nisi chu enin ka nui hak haka,midang chuan min rawn en in “Zosangpuia a nihsaw, kan khaw tlangval luck ber, amah hian nula lam hi a ngaihsak lo mai pawha" tiin an nui dar dara.
Kei erawhin Zosangpuia tih ringawt chu rilru in ka sawi mawlh mawlh thung, a kut tang sei thlurh leh hraw hrup, hnathawk nasa tih hriat taka ser awm thleh thluah chu ka hmuh hmaihlo. A tawng tam lo na in ka in leng te zingah ka ngaihven ber a ni lawi si.
“I haw tawh ang u hmiang, a tlai riau mai. Naktuk zanah kan lo leng leh dawn a nia " tiin an tho phak phaka, an rual chuan tho chhuakin pawn thleng chuan ka va thlaha, ngawi rengin an kal liam mai dawn emaw tih laiin “A hnuhnung hnung phungin seh" tiin a hma sa ber chu a tlan thuta, an vai chuan au chungin an tlan liam chu mak ti zetin ka ena, Zosangpuia erawhin an hnungah muangchangin a zui thung,nuih te lam lam an tiza.
“An va hahthlak thin, kan khaw tlangvalte hi an thawveng ruai a nia, khatia in tih thaih kha an la hmang ang tih ngaihna pawh ka hrelo" Nu Chhingi chuan nui hak hakin a rawn ti a, ka nuih a za ve tho. Ka vawikhat hmuhna hlawm mah nise an mizia chu ka lawm chi tak an ni, an bula awm anuam viau in ka ring.
“Tirawh lut ila, mikhual i nia an rawn rim fo ang che. Chutih rualin fimkhur la, mipa hi nel dan tawk thiam a tha, a lehlamah chuan i kawm thiam chuan i tan ui an nei lo ang, mipa thian hi an hlu teh a nia" tiin inchhungah chuan a lut zuia, keipawh chu lut ve nghal thuaiin roomah ka lut zuia, ka nute bia in nuam ka tih thu vel chu ka hrilh mawlh mawlha.
An ni erawhin an hmuhphak loha ka awm chu an la duh vak chuang lo a nih hmel, ka hna hmu pawh kha an lawm viau rualin thingtlanga ka awm angaih thu an hriat kha chuan kal lo mai turin min duh hiala. Mahse khawpuiah chuan zirtir tu tha tak tak an tam bawk nen thingtlanga zirtirtu in daih loh a nat zia ka hre bawk nen ka kal lui ta tho chu a nia.
Phone kan dah hnu chuan ka in ngaihtuah neuh neuha, bialpa ka lo nei ve nual tawha. Mahse ka bialpa pawh nilo ka vei ang hian tumah ka la veilo, vawikhat inhmuhna ah induhna a awm thei tih hi ka ring ngai lem lo va, mahse keimah ngeiin a taka ka tawn takah chuan ka ring nghet ta bur mai.
A mit khur thuk lam mah mahse thuk lutuk tih tur nilo a mawi tawk leka awm te, a mitmeng thim raih leh pa ru riau te kha reilo te ka en chhung pawhin ka hmu hman vek nia.
A tawng tam ve lo nangin ka lakah a thawk na ber lawi kha mak ka tilo theilo, tlangvalin nula chu rim tur a ni ngai a. Keiin ka lo vei nghal ringawt chu ka inthiam lo hnuhnawh, mahse rilru leh thinlung hi a control theih miau siloha.
Khaw chhung hmun thenkhatah chuan patling in kawm khawm au ri hriat tur a la awma, khawpawn hmun thengthaw deuh lai atang chuan tlangval guiter nena zai ri hriat tur a awm bawk, thingtlang boruak chu a nuam dawn riau hian ka hria.
An hun hman dan tur ka ngaihtuaha, reilote mah nise a nawm ka ring ringawt, a mizo nun bik ngawih ngawihin ka hria, khawpuiah chuan hnamdang tihdan kan copy tam tawh zawk bawk nen thingtlang zonun zemawi hmuh tur la tamna nge nge hi ka lung kuai tu tak a ni.
Ka room tukverh atang chuan thlaeng a rawn lut raiha, current ka on lo bawk nen a nuamin khauchher leh perhpawng hram vel nen chuan ngaihthlak a nuamin a hahdam thlak riau hian ka hria a, pasaltha kan ngaihthlak thina an hunlaia awm ve ang mai ah khan ka in ngai.
Tawngtaiin ka in ngaihtuah zuia, hmelhriat ka la nei vak lo nangin ka tlangnel nghal mai thei chu amak zawk, a hrim hrimin khawpuiah chuan min hre sa tu bak in min be vak ngai lo kha a nia, thingtlangah erawh khawi ah pawh vak chhuak ila ka hmelhriat loh pawhin an zirtirtu thar ka nih leh nih loh bakah chanchinte min lo zawt sawk sawka, min hmutu apiangin min be bawrh bawrh bawk nen ka tlangnel hma ni berin ka hria.
An polite ka tilo theilo, tleirawl chenin nel taka min lo biak na khan an khua a teacher hna thawh pawh hi a ti hrehawmin ka ringlo. Ka theih tawp ka chhuah pui ngei ang, he khawtlang in zirna lama hma an sawn leh zual nan ka theihna zawng zawngin puih ve ka tum tur a ni ti chuan ka infuih sauh sauh va.
ZAWMNA..
A tukah chuan school ah chuan kal in inhmelhriatna neih nan ka hman pui phawta, middle school ah ka thawk dawn bawk nen naupang an fel fai tawha a nuam phian mai, chutih rual erawhin in lak nulat tlangval an hre ve tawh an ti bawk nen an buaithlak hmel riau mai lehnghal.
Heta thawk tur a an tih zirtirtu an lak dang kha an sawi dan ah thingtlanga thawh an peih loh avangin khawpui lamah an dil kawp a ni awma, helamah zirtirtu in daih lo in an awm leh vek si dawn a nih hmel. Diet training lo chu an pawm duh tawh lo nen zirtirtu pawh pali chiah kan awm dawna, in daih loh ana viau ang le.
Mahsela ka huphurh em em chuang lo, zirtirtu ho chu kan titi nak naka, English la tura min tih avang chuan hnial lovin ka pawm ve maia, school luh tan tir a ni nen class pawh la em em lo in zirlaiho ball beng chu kan en thapa.
“Kha miss Nunu kan lo rim dawn che, sir Hluate hian an phal emaw chu" nizan lama rawn leng Valpuia te ho chu an rawn lang leh thapa. Sir Hlua te pawh chuan an phal thu a lo chhang ve zatin kan bulah chuan an rawn thu zuia.
“Naupang ho kha in zingah kan tel ve dawn" Kimbawiha an tih pa leh Rengpuia chuan tiin volleyball an benna lamah chuan chho in an lut zuia, an tlangnel hle tih a hriat. Ka thawh hma pawhin an kal fo a nih ka ring, keini erawhin an che vel chu kan en thapa.
“Awi awi in va han thiam lo ber, Kimkawplawr ti ringawt kha chuan engtikah mah i chak pui lovang, tel ve tawh suh tihlah hian i tel ve ziah lehnghal" Valpuian a tihlai chuan kan lo nui haka, an thian ho an in ngamtlak hle tih a hriat.
“Tinge Kimkawplawra i tiha?" ti a ka zawh chuan an nui leh haka “Aw...bialnu pakhat chiah a nei theilo, ‘Inthen palhin rilru a na duh, chuvang chuan pakhat then palha rilru nat lohna tur angai' a ti miau a, pakhat a thena tikhan a ngaihzawng dangte a be leh nghala, babe tih ringawt pawh 10 vel a nei, engtin nge a kawp sen zawk ni" an tihchuan ka lo ner nang nang mai.
A bialnu te pawh chu an vahan mawl awm em em, chutiang zat zat a bum thei chu ka mipa tih chi tak. Ka awmdan an hrethiam nge “Lungngai suh, a lerh tih lohah chuan a fel a nia, kan tifiam mai mai a nihkha.Bialnu a thlak zut zel sia chuvang chuan a nei tawk zel mai mai a lawm, a in lak luck ve na a nia, a bialnu te phei chu an hmeltha ngai chuang miah lo" Valpuian a tih leh lai chuan pakhat chuan a lo khapa.
“Tikhan ti vak thin suh, nang pawh i dan loh kha" Tepuia chuan a rawn ti ve zata, an in chum nghal awk mai. An va han indim lo ber, engmah sawi silo in ka lo nui khur char char ringawt, an thian ho mizia chu ka lawm zawng tak an ni. Thian atan an tha hle in ka ring bawk.
“Taka Valpui i lu i met sual an tia, khawi maw kan lo en chhin" ti a Valpuia lukhum ta daih chu an phawi sak thuta; chutah ka nui chhuak nghal hawk mai. A chhip sam buk zet siin a bek ve ve chu a kawlh rula, phone a sam meh dan maksak an rawn post thin ang chiah, amah lah chu a tum nghal bur mai. Amah a lu a tung lam chi leh a sa pan chi a ni bawk nen a inhmeh letling phian lehnghal.
“Khawi, ka meh pawh a nilo kan Darthlawia ka meh tir peka, a thiam tawp silo. Pathlawi thiam neilo meh tir ka sim chiang khawp a nia, ka meh kawn dawn leh a chi bawk silo" tiin a phun hluk hluka, ka lo nui ve char char ringawt.
Fiamthu nen an ri leh huk zela, an titit kotlangah kan dak thap ti ila a dik ber ang. Zosangpuia erawh vawiin ni lengin ka la hmu lo, enge a tih ve ang le.
School ah te hian lo kal ve se tihte chu ka ngaihtuaha, engvanga ngaihtuah tlat nge ka nih tih hi ka inhrethiam biklo, reilote chhunga ka hriat chupawh min ngaihven em em miah lo tu heti taka ka hmu chak hi ka hrethiam tawh bik lo.
“Awi leh!" ka au tuar mai, Kimbawiha chuan ball chu school naupang lu ah tak a vuak pera, a nilah puitling in a tha neih zawng zawnga vuak per a ni bawk nen a thal tawp mai, midang chuan an buaipui sap sapa, a rawn thut chhuah takah chuan ka thaw huai mai, a lu chu a hai ve chhain ka ring.
“Mawla naupang dim thin rawh, i dar pawh an la thlen that loh kha, mahni tiat pui tum lawlh lawlh zel suh" tiin a thiante chuan an hau zuia, an inthiam lo ve deuh te pawh a niang.Kimbawiha lah chu a nui vur vur ringawt, khatiang em em a na a naupang han vuak per kher chu, anaupang tan khan a na viau in ka ring,amah lah chu a la hawi vual vual zuia.
(ZANKHAT DAN ZELAH EMAW DAH KAN TUM ANG AW, ZIAH ZAWM TLAKA NGAH CHUAN FB AH COMMENT MIN PEK VE DAWN NIA)