STORYFB.COM

DEAR JOHN




CHAPTER 1


Ka hma a in lian ve tak leh mawi zeta sak chu ka ena, muangchanga panin kawngka chu ka kik karh karha, ka zâm bawk nen ka khur der der mai, khawpui ah ka la awm ngailova. Ka rin phâk bakin an in a lian hlawma, kan in lakah te chuan ropui tak hi a ni ringawt.





“Nangmah em ni kan ina rawn awm tur chu?"kawngka rawn hawn pah chuan ka awmna tur nu ngei chuan a rawn ti a, ka bu nghat mai. Thingtlang atangin khawpui lamah inhlawh turin mî awmpuiah ka tang dawna, ni e thenkhat tan chuan hna hniam tak pawh a nimahna, ka tan erawh ka chhungte ka chawm theihna tur awm chhun a ni miau sia.







“Lo lut la, kan fanu hi a la sêna, hei hi ania enkawl tura ka duh che, i hlawh pawh singkhnih in kan ti ang, inchhung i chet tel angai dawn a nia, hnaah kan nupa a kal ve ve angai thin sia, kan pa pawh a lo haw tep ang. Tirawh i room turah ka hruai ang che" a tihchuan ngawi reng chuan ka zuia.





An inchhûng vel chu ka en kuala, a zauin bungrua reng reng chu thingtlâng lamah kan hman ngailoh a awm nuk mai, ka room tur chu choka bul maiah a awma, a zau nuam hle bawk. Kan ina ka room ai a zau fe zawk bawk, ka naute ho in hmuse nuam an ti ngawtin ka ring.






“Almerah hi i thawmhnaw dahna tura kan lo lei a nia, in dah fel la. Chuan in tih fai i duh leh tukverh ah sawn chhuak la, bathlarh sir lamah khan bathroom a awm aw" a tihchuan ka bu nghata, “I zawh hunah lo chhuak la, rawngbawl dân tûr vel kan sawi dawn a nia, bawihtei pawh a lo harh ṭep tawh ang" a tihchuan ka lo aw vata.







A chhuah hnu chuan ka thawmhnaw tlêm tê chu phawrhin Almerah ah chuan ka rem ṭha mawlh mawlha. Ka towel chu phawrh zuiin tukverh aṭang chuan chhuakin a sawi na lam chu ka pana, ka awmna zawn bathlar aṭang chuan Aizawl khawpui chu a lang uar bawk, a ropui ngei mai. En vang vangin bathroom ah chuan ka lut ta vata.







Intifai sawk sawkin ka inhru hula, ka towel chu veranda-ah chuan zâr zuiin room aṭang chuan ka chhuaka, “Helam ah hian tlaiah chuan zikhlum leh vawksa hi lo chhum pawlh la, chuan dal kha lo kang bawk la" tiin tihtur ṭul ang ang leh an bungraw ṭhenkhat chu a hman dan te min hrilha, kan neih phak loh vek a nih avângin hriat ka nei tam lo viaua.







Hman ngailoh chuan a hman dan hriat ngaihna awm heklo, min hrilh pah mawlh mawlh a. Chutih lai chuan naupang ṭap ri chu a rawn chhuaka, u Cindy chu room lamah lûtin naute hi a rawn pawm chhuaka, ka rin ai ka nau awm tûr chu a la sên daih mai, kumkhat a tling awrh ang tih tur vel hi a ni a, ṭawng pawh ala thiam hek lo.








“Lo pawm ta che, ka vah chhuah a ngaih ṭhin avangin ania awmpui pawh kan zawn, kan pa lah a hna lamah nitin a kal a ngai sia, bank ah Manager a nia, a buai thei bawk nen keilah hi vah chhuah ve reng ka ngai bawk sia" a tihchuan bu nghatin naute chu ka pawma, min lo duh ve mai bawk.






Min lawmin a nui hak haka, nichina a ṭah nasat nen naute fel tak a nih ka ring. A nui sen sen reuh lehnghâl, a hmelṭha bawk nen ka awm thei tur chu ka lawm zawk phian mai.





“Tikhan tlai lam hi rawng bâwl hma angai lova, dar thum velah bâwl la a tawk chauh ang. Zing lam erawh office kal a ngaih dâwn avangin i thawh hma a ngai dâwn a nia, a hahthlak mai theia. Mahse ka sawi tawh angin i hlawh hi a tam thung ang" a tizuia, amah zawk in engkim chu a sawia, kei erawhin engmah ka sawi lem lo.







Ni e ramdanga awm nen ka hlawh a chhe em em biklo, Mizoramah phei chuan a awmpui hlawh ang chuan ka hlawh sang ber hialin ka ring, thlakhat ah singhnih lawih ka hlawh dawna, chuvang a nia hahthlâk dâwn mahsela ka thlan chhan ni, ka naute school an la kal bâkah ka nu a chak tawh lo nen kei chu rim takin thawk mah ila pawi ka tilo, ka chhûngte ka châwm theihna tur a nihchuan engpawh ka timai ang chu.







U Cindyi chuan rawngte chu a vawikhatna a ni bawk nen min bawlpuia, kan che dûn mawlh mawlh mai. Naute lah chuan in hmu chauh e tilo in min nelin min ban deuh renga, u Cindy pawh chuan mak a tih hmel viau mai “I rawn kal hma khân awmpui kan lo nei ve tawha, a duh miah lova chuvang a nia a chhuah leh chhan, nang chu a duh zâwng tak i ni a nih dawn kha, i rawn awm tûr chu ka lawm hle mai. Nau enkawl chu a hahthlak sia, min awm chhâwk thei tur chu ka lâwm takzet" a tihchuan ka rilru chuan mak ka ti viau mai.





Keini lamah kha chuan nute khan an mah niin an fate enkawlin midang kha chuan an pawm zeuh zeuh chauh kha ania, mahse hna thawh an ngaih vang pawh a nimai thei a, ka lo buai ve na tur a awm lo. Hlawh ka neihna tur a ni a, sawi buai ka tum lo,naute hmingte chu min hrilh mawlh mawlha. Puipuii a inhmeh phian mai, a chum reuh bawk si.






Pua in ka awi paha, ka naute ho ka awm fo avangin nau awm vel hi chu ngaiah ka neih tawh. Reiloteah Puipuii pawh chu a muhil zuia, u Cindy min endanah min ring tawk hle tih ka hre thei, a chhuah lawk tur thu sawiin nau a harh leh tiin a hnute siam tûr a dahna lai chu sawiin a siam zât tur nen min hrilh hnuah a chhuak zuia, engtak chu tih tum nimaw.







Amah a sa a ṭha in a hnute pawh a ṭhat hmel viau sia, nestogen an hnêk tîr daih chu mak ka ti. Ṭha viau mahse nu hnute tui ai bakah nauin an ngeih a awm lo, a hrisêl bawk an tifoa, kan khuaah phei chuan hnute tui an neilo tawp a nih loh chuan nestogen an hnêk tîr ngai lo, hetah chuan sum an nei pawh a nimahna, naute tui taka muhîl sâk sâk chu ka ena, a duhawm takzet.







Dar li vêlah u Cindy-i pawh chu a rawn haw a, naute pawh hnute ka lo pe fel vek bawk nen a tlei phian mai, mak deuh chu ka bulah lo a awm duh tlat lo. A nu pawhin mak tih hmêl deuhin min en ringawta, “A thawhna a la reilova chuvang ania'ng" ka ti ta ringawta, a rawn nui hak mai.







“A pawilo, a nel che a a duh che chuan a lawmawm daih zawk a lawm. Awm a hahthlak ve reuh lutuka, tikhan lo awm rawh u ka va in tifai lawk ange, kan pa pawh a rawn haw ṭep tawh ang" tiin an room lamah chuan a lût zuia, naute pawh chuan a ngên miah lo, a tla mial mial mai. A kal thei sawih sawiha, chungin thui erawh a kal duh miah lo thung.






Rawngbawl ka zawh takah chuan Puipuii chu pawmin ka infiampuia, a ni pawh a nui ve nasa mai. Chutia kan lo rak chel chûl lai chuan kawngka chu a rawn ri raka.






“Ilo haw tawh a nimaw?" u Cindy tawng avang chuan nau pawm chung chuan ka hawi phei ve a, mipa ruangam lian zet rawn lut chu ka en renga, a pheikhawk phelha a rawn hawi chhuah rual chuan min melh fuh nghal chat mai. Lalpa leh! Mipa hmeltha lutuk leh mitmeng tawrh har zet chuan min rawn en renga, tunge a nih ang?



“Felfel hei hi ka pasal John Zohlimpuia, Mapuia a nih hi" a rawn tih takah chuan harh chhuak zawkin ka va pana, “Hi, Lalrinfeli ka nia" tiin ka kut chu ka pe a, muangchang chuan min rawn chelhin a kalsawn zui daiha, a va han nelawm loh hmel em em.






Ka en zui vung vung ringawt, u Cindy chuan min nuih sakin “A chau deuh a nih kha. Bank dawr hi an tam thei sia, a hahthlak viau ang, tikhan lo awm rawh u kan va buaipui ange" tiin an room lam chu a pana, an naute hmelṭhat em em chhan chu a nu leh pa an lo hmelṭha em a nihkha, mahse u John kha a nelawm loh hmel ka ti takzet.







A mitmengte lah kha a rum ṭha bawk si, naute chu infiampui leh in a ni pawh a khêk chûl mai, naute ka ngaina bawk nên ani lah a fel bawk si ka ngaina viau mai.






Darkar chanve hnu vêlah an nupa chuan an rawn chhuaka. “Papa" tiin Puipuii chuan a pa chu a lo bana, u John-a pawh chuan a lo pawm nghal nawlh mai “Vawiin lamah i lo fel em ka fanu duat, i u ilo tibuai viau a nimaw?" tiin keichu min rawn melha, a mi melh dan chu ka hrethiam hauh lo. A rawn haw tirh mitmeng nen kha chuan danglam tak a ni.






“Felfel chaw ei ilo siam mai dawn em ni? Ka ṭhiante inhualnaah ka kal a ngai dâwna, naute hi ilo awmpui leh mai angai ang, i pawi ti em?" a rawn tihchuan ka lu ka lo thing vata, ka rilru erawhin an nupa chuan mak ka ti viau mai. Ka awmna a la rei hauh lo, mahse an inpawh loh hmel ka ti.







Ngawi reng chuan chaw ei chu ka siama, an in be hauh lo. Puipuii u John-an a lâwm ri bak chu hriat tur a awm hauhlo, nupa ve si in be tam lo tak chu an ni, an ruala chaw ei tura min tih tlat avangin chaw chu kan ei tlanga, Puipuii pawh a nu chuan chaw chu a barh pah paha.







Thleng ka sil mawlh mawlh lai chuan an nupa chuan nalh taka incheiin an rawn chhuaka, an inhmeh hle lehnghâl. An sâng nupa bawk nen inchei pawh an inhmeh viau mai, “Felfel kan kal dawn a nia. Bawihtei chu kan rawn haw hma chu lo mutpui la haw hunah ka rawn hruai mai dawn a nia" u Cindy in a tihlai chuan ka bu nghat ringawt.







An chhuah hnu chuan in chu tifel leh sawk sawkin Puipuii chu room lamah ka luhpuia, a nu pawh a nu leh pa awm lo chu a sual phah lem lo, ka khum bula ka dah incheina vel chu a khalh mial miala. Ka en reng mai, u Cindy khan a hruai ve ka ring a nia, engpawh nise a mah awm turin a lawm min awmpui ni, keichuan sawi theih ka neilo.






NGAIHNAWM HMEL IN TIHCHUAN LIKE LEH COMMENT MIN LO HNUTCHHIAH SAK LEH ṬHEUH RU AW.