DÉSESPÉRÉ By: Te-i Mrs Ambrose CHAPTER 8

[Te-i Mrs Ambrose]

DÉSESPÉRÉ
By: Te-i Mrs Ambrose

PROLOGUE:

"Ka hua che"
"Keiin ka hmangaih thung che alawm" tiin a awmah min kuahbet nghal. Ka tal vak, mahse, tal chhuak lo chiang tak ka ni. Thinrim lutuk avangin ka nui tawp "Ka rin che i ring em ni? Nang hian min bum tawh lul lovang" tiin a hnungzang rem lai laiah ka chum pawp pawp. "Vawikhat chiah min ring leh rawh, ka tina nawn tawh ngai lovang che" a rawn ti a, lu ka thing ringawt.

________________________

'Inṭhen ka duh' tih chu ka va thawn a, ka message a chang nge ni a lo seen nghal. 'Ai' tih te chiah hi a lo thleng a, ka thaw hak.

'Kan inkar, kan inngaihzawnna hian keimahah eng ngawng mah a nei ve tawh lo, tawp tawh ang' tih chu ka thawn leh a, chu pawh chu a seen leh nghal.
'Keimahah chuan nghawng a la nei thui khawp mai' tih a rawn thleng a
'eng vang mahin kan inṭhen dawn lo' tih a lo thleng leh nghal.

'Ka ṭhen phal che i ring em ni?'
'I rin chuan i ring sual chiang hle ang'
'Engtikah mah kan inṭhen lovang' a rawn thleng zut zut a ni ber.

'Kan pahnih tan hi chuan eng hmahun mah a awm ve lo' tihngaihna hre lo zetin chu thu chu ka type ringawt.
'Kan pahniha hmahun bak kan hmalamah hian eng thil dang mah a awm lo' tih hi a seen zawh rual deuh thawin a rawn thleng leh nghal. Hepa hian chankhan a hria ka ti dawn nge? Min ti beidawng zawk.

'HMINGTHANSANG' tih chu ka va thawn ta tawp. Min tibeidawng.
'Eng nge Hmingthansanga duatnu, Hmingthansanga bialnu chauh i nih kha' tiin min rawn reply a.

'Ka fiamthu lo a nia' tih ka thawn leh chuan
'I ninawm, ka fiamthu bik lo, miin kan ngaihtuah em em lai chein inṭhen rawn sawi tawh suh' a rawn ti let erh mai.

'Theinghilh ngai suh. Hmingthansanga duat lai inih kha. Chuan i ni reng bawk ang, ka duh em em nu' tih a rawn thawn chuan ka nui ta tawp.

_______________________________________


A rawn nui a, "Khawvela natna awm zawng zawng hi min pek i tum em ni?" a tih chuan sawi tur reng reng ka hre lo. A mitmengah natna langchhuak zozai te hi ka thlensak vek chu an ni si a maw! Tuna ka hmaa ding mek hi a hmaa ka hriat ṭhin Hmingthansanga kha a la ni meuh em?

"Ti nge? Eng vangin nge heti taka na hian min siam, i eng pawi chiah nge ka sawi, i duh loh zawng tih ka nei em ni? Aw... I duh loh zawng ka lo ti palh a ni tiraw ? Tih dik loh leh i duh loh zawng tih ka neih chuan min hrilh la, engkim ka siam ṭha ang" buai ruk hmel zeta a tih chuan lu ka thing nawk nawk.

______________________________________

Ka huat ber lai pawha min hmangaih thu min hrilh ṭhintu kha tunah chuan ka mamawh lai ber leh ka ngaih lai ber pawhin a kiangah ka awm thei tawh lo. Ka hnaih phak a ni tawh lo.
Ani chu ka lak ata hla takah a kal bo tawh, chelh ka duh, mahse ka chelh thei bawk si lo.

"Min huat em em ṭhin lai khan lo bansan che ila, tun dinhmun hi ka thleng lo tur, nang anga min tina theitu hi an piang leh tawh kher lovang. Ka nuna lo lut tawh zinga a hlu ber i ni a, ka nun aṭanga chhuak tur zinga ka ui ber leh lo let tura ka duh tawh ngai lo luh tur i ni" min ti anih kha!

_______________________________________

"Bawihi, ka kut hi chelh rawh, ka thlah ngai dawn lo che tih i hriat kha" tiin min en reng a, a kut chu chelh ka duh alawm, chu aia duh chu ka nei lo. Mahse... mahse tih hi a awm tlat si. "Thildang engmah ngaihtuah a ngai lo, keimah chiah min ngaihtuah la, ka kut hi chelh tawp rawh, min rin ṭhin kha, ka tina ngai dawn lo che.
Nangmah i nih chhung chu ka pawm che, ka duat lai Lalnunmawii kha i la ni reng, a hma ang tho khan ka tan i la pawimawh a, i hlu bawk, i hlutna a bo phah lo. Thilthleng tawh chu thleng tawh an ni. Hmalam hun chiah ngaihtuah chungin ka kutah rawn chelh rawh. Ka hmangaih che, ka hmangaih reng bawk che" tiin ka vawn turin a kut min rawn pe a.

__________________________________________________

Chapter 1



Zinga ka harh chuan ka lu a na bur mai, nimin khan a vawikhat nan ka in chhin pawha ka rin ngai loh zu ka in anih kha, chu pawh tum reng vang ni lovin. Ka awmdan chu hrehawm tak a ni. Ka hrehawmna rawn belhchhan turin nimin lama thilthleng ho kha an rawn lang zut zut a, ka mittui chu a sur zung zung.





Ka taksa chu sawi loh, ka rilru lam thleng hian pawhsawm vek ang maiin a na. Tinge nimin khan Anni khan min tihder a, khatia zu kha min intir kher. Kha zu kha lo in lo tawp ila hetiang thil hi a thleng miah lovang.




Ka na, ka na takzet. Tumah hian min hrethiam lovang. Ka nat rualin ka duh miah loh keimahah mi huatna a rawn awm tel a, anni khan Lalnunmawii mizia zawng zawng zan khat thil thuah min paihsak vek a, huatna ngah em em an ching thar ta ringawt anih hi.





Thilthleng ho lah chu! Ngaihtuah loh tum eng ang mah ila, ka mitthlaah an rawn lang zel mai bawk si. Ka nun chu zankhat thil thuah a chhe vek nimai hian ka hria. Engtin nge khua ka hawi ngam tak ang. Nimin lama thilthleng chu sawi pawh ka sawi ngam lo. Ka na tih chiah ka sawi thei.




3 YEARS AGO




"Sawtiang mipa saw chuan infiamna atan bak a ti lovang che, i duh tak tak hmain bansan rawh" Mampuii chuan a ti bawrh bawrh, ka ṭhianṭha tak mai a ni a, a ṭha ber min duhsak tih ka hre bawk. "Hmingthana hi chu a ṭha, mahse ka duhpui lo che, tuna a rawn bia che pawh hi mak ka la ti reng" tiin Hmingthana te inkhel chu a en a.




Hmingthana hi kan college basketball captain a ni a, an lar tur zia chu in hrethiam mai ang, a inkhelh thiam mai bakah amah a chhe lova, mi hip theihna riau leh zun a neih em avangin hmeichhe lakah a tla na a, miin an duh viau ṭhin reng a ni. Amah lah hian a chhe lo tih inhai hek lo le, a lo ler ve bawk nen kan college ami na ná na hi chu a duh duh a thing a, rei erawh a kawp ngai lo thung.





Hetia ka sawi avang mai hian hmeichhia a khawi duahin in lo ring ang e, mi a kawp ve ngai lova, mahse ka sawi tawh ang khan ngaihzawng a nei rei ngai lo thung. A khat tawkin ngaihzawng a thlak reng a, pakhat a ṭhen a, midang nen hmuh theihin an awm leh nghal mai ṭhin.





Chumi avanga ka ṭhian ṭha ve ber Mampuii hian min duhpui lo a ni. Tunhnai hian min rawn biak a ching a, midang hnenah erawh ka sawi lo thung. A hretu awmchhun chu Mampuii chiah hi a la ni. Kan stream a inang lova, kan inhmu khat viau. Mahse, sports niah erawh ka hmu ziah thung.





Tunah hian 5th sem kan ni tawh a, college week kan hmang mek bawk. Vanduaithlak nge vanneihthlak ka ti dawn ni, Hmingthana nen hian house khatah kan awm a, midang tana hope awm thei tur tingin Hmingthana hian tunah hian ngaihzawng a nei lova, mi ṭhenkhat erawhin mak an ti viau. A chhan chu tun ang boruak hnuaiah hi chuan Hmingthana'n ngaihzawng a neih ngei ngei ṭhin vang a ni.





Inkhelh a zo a, Hmingthana te chu kan house ho awmna lamah an lo let a, an chak bawk a, an hlim hlawm khawp mai, "Ts, inkhelh lai khan i rilru za a za i pe lo tih ka hria" Hmingthana ṭhianpa Liansanga chuan nui deuh chung hian a ti a, Liansanga nui hmel hmutute an tuiral leh khawp ang chu. Liansanga hi ngo ving veng, sam kir ve lam hi a ni a, an ṭhian ho hi an sang ṭha a, amah hi an ṭhian ho zingah tlemin a hniam bik deuh, midang ho bulah erawh a lawr vah tho.





Hmingthana chuan "ka thluakah tu emaw a tang tlat" tiin min lo melh deuh kher a, ka lai em tih phei chu ka hre lo. "A la chhang na che nge?" Biakhlua a ni ve thung. "Ka try mek, min chhan hma chu ka nghak dawn" Hmingthana chuan a ti sup. Chutah min rawn siai kher anih chu. Tinge ka lo en reng le?





Midangin min hmu em tiin ka hawikual a, midangin min en loh danah Hmingthana'n mit min siai kha an hre lo anih hmel e.




"Ts-a hi chu a chhe mawlh lo alawm" Rovi chuan Hmingthana te kal liam hnu chuan midang hriat phak loh tur hian a ti sar sar. Mampuii a ner nang nang. "Khatiang play boy lutuk" a ti hmak. Ka la sawi lo tak e, Hmingthansanga hi mi ṭhenkhat chuan 'Ts' an ti mai a, an remchan ang ang hian an ko mai zel.





Kan sport ni hnihna kan zo a, kei leh Rovi hi veng khatah kan awm a, Mampuii erawh kan veng ṭhenawmah a awm thung. Vawiin ka tlan ni a ni a, Rovi tlan loh ni a ni thung . A zia khawp mai, tihian kan tlan loh ni pawhin kan inthurual ngei ngei ṭhin.





Rovi chu a che muang ka ti khawp mai, "Hmanhmawh ve ṭhin ta che" ka ti hlak hlak, helmet pawh ka khum fel diam tawh a, scooty ka start na a rei tawh viau bawk. "I hnunga chuang tur ka nih hi. Ka chhiat loh a ngai alawm" tiin a hmaiah compact a hnawih mawlh mawlh. A hahthlak ṭhin a nia.





Rovi rawn chuan hma chuan ka hmaah bike a rawn ding ri hrawih. A helmet full face chu a phelh a, nalh zet hian min nuih nghal suk. "Kalsawn teh" ka tih hlak chuan "Ka haw hmain i hmel hi uluk takin ka'n en phawt ang e" tiin a bike hma lam chu a bawh a, chiang zetin min en ngur anih chu. Min ti zak dawn alawm le.





Ka hawikual vak vak. Midangin min lo hmuh vaih chuan e. An sawi leh sep sep duh ang. "Kalsawn rawh, mi titi titamtu nih ka duh miah lo ania" ka ti thawr. Hepa hian min ti lai dawn dawn. Tuin nge hnai zeta mi melh reng ngai. "Ka bialnu i nih hunah an la sawi dawn tho a, kan nih hma pawha kan chanchin an lo sawi lawk tur chu a pawi vak em ni?" tiin a khi suk.





Ka bula ding Rovi lah a reh hmak a, eng tak chu ti maw? "I zam lo anih chu" ka ti nghek ringawt. Ka duh aiin ka ṭawng ring leh sia, ka hmui chu ka hup nghal vat. "I hmaa ka zam chhiat lutuk chuan ka bem thluk theih loh che ka hlau alawm" hepa hi a ṭawngthei dawn riau. "Hmingthansanga duat lai la ni tur inih kha" tia mit min siai khum zeuhin a helmet chu a khum a, a tlanchhuak ta nghal.





Hmingthana a tlanchhuah rualin Rovi chuan min sik hlawk hlawk. "Eng nge in awmzia kha? Awi, nichin khan ka khawng vek alawm" a ti nghal mawlh mawlh, ka thaw hak ringawt. He Hmingthansanga fiam kual mai mai tur hian a zuna uai ka tum lo bur. A hmeichhe dang lo ngaihzawn tawhte angah min ngai tih lah chiang reng. Kei chuan pawnlang lutuka inngaihzawn ang chi te hi ka duh ve lo. Ngaihzawng ka neih chuan ka serious ṭhin a, relationship on off ang kha ka duh ve lo. Kei chuan ngaihzawng nghet leh rinawm em em chiah ka duh.





"Lalnunmawi" tia ka dara min nem sawk chuan "Eng nge Rohlupui" ka ti vin nghek. Ka thin hi a lo chhe ve hle anih hi. "Ka thilsawi kha engmah i hre lo tih hriat reng reng" a tih chuan a thilsawi engmah ka hre lo tak tak. Nuih var varin "A thunawn i pai ṭhin tho kha, sawi ṭha leh mai la" ka la nui var var tho.





"I va han chhe ve tak. Ts-a khan a ngaizawng che mi?" a ti sap. Midangin an hriat ve a hlau a ni ang. "A sawidan kha chu a nia" ka sawi ring bik hran lo. "Awi, chung te chu engtikin nge a hrilh che? Tinge engmah min hrilh ve loh" a ti mawlh mawlh. "Haw phawt teh ang" ka tih chuan phur loh hmel zetin a rawn lawn a, "zanah phone call hmangin ka zawt tho ang che" a tih chuan chhang tawh lovin ka scooty lo tih thih tawh chu ka tinung leh a. Hmingthana ka hmaa a lo din khan ka scooty tihnun vek tawh kha ka tithi ringawt anih kha.





Kawnga kan tlan chhung zawngin Rovi chuan Hmingthana chanchin ngawt chu a sawi. Ani chuan Mampuii ang lo zetin min duhpui viau lehnghal. A hnu phei chuan ka hne ve ta deuh bawk nen "I ṭhiannu hi Hmingthansanga play kual vel mai mai turin min duh a mi? A duh ang chhanna han pe chiah ila, kar khat vel bak min kawp dawn lo. A bialnu dangte a tih ṭhin ang bawkin min ṭhen leh nghal ang a, min ṭhen tukah hmeichhe dang a flirt kual leh nghal dawn tho" ka ti vak. Tlan lai kan ni bawk nen, ka ṭawng ring khawp mai.






"I sawi kha chu a dik viau tho a, mahse lo duh tak tak ta che se.... Kan college a chhelo lutuk tak maiin a duh hlur dawn che a nia, a bialnu dangte a treat ngai loh dante khan a treat vel che ang a" a aw aṭang pawh chuan a phur hmel viau. "I suangtuahnaa cheng lo khan a tak ram hi rawn thlir rawh" ka tih chuan ka darah a beng chawrh mai.





"In in thleng ka va drop ang che" tiin kan in chu ka tlan pel a. Ka nu leh pate pawhin min hrethiam viau ang. Rovi chu an in kawt thleng ka thlah a, ban min vai khum lauh lauh hnuah an inah a lut a, kei pawh inher let lehin kan in lamah chuan ka let phei a.






In ka thlen chuan u Zorema chu a lo bang tawh. U pahnih ka nei a, mipa ve ve an ni bawk. Kei hi a naupang ber niin hmeichhe awmchhun ka ni. Kan upa ber hi Zoremsanga niin mi chuan Zorem an ti mai ṭhin. Ani hi tunah police Officer a ni mek. Ka u chiah hi Zohmingsanga a ni a, a ṭhenin Zohming an tih an laiin a ṭhen chuan Hmingsang an ti thung. Ani ve hi chu tunah Assistant professor a ni mek.





"Naute i lo haw tawh maw?" u Zorema chuan min hmuh rualin a ti nghal dut. Midang hmaah chuan a ṭawngtlem a, a nelawm lo a, a zia a cool raih ṭhin. Ka kiangah ve thung chuan chutiang mizia chu a nei ngai lo. "Imm, Rovi ka thlah kawi a" ka ti ve mai.





"Imm, va inthlak la" a tih leh chuan ka bu nghat a, ka pindan lam ka pan nghal. Ka insil thuak thuak a, va chhuak lehin ka u bulah ka ṭhu tharh. "U Hminga a lo la haw lo mi?" ka tih chuan a bu nghut. "Anih khawiah nge ka nu leh ka pa?" ka tih leh chuan "I rawn haw hma chiah khan an chhuak, ka pu a zual a" tiin min chhang a.





"Ka pu chu a na viau em? Tinge i kal ve loh?" ka ti hliai. "Na lutuk lo" tih teh chauhin min chhang. Ka zawhna chin bak hi chhan min tum lo emaw ni? Zawhna dang zawh tuma ka an mek laiin "Naute, tinge zawhna min zawh reng? Ka lu hi a na, min hmehsak rawh le" tiin a khi deuh sak. Ka ngaihtuah chiang a, ka lo haw aṭang khan zawhna ka la zawt char char.





"Imm, ka lo hmeh sak ang che" tiin phur deuhin ka chhang a. "Chhuatah khan ṭhu thla rawh" ka tih chuan a thuawi zetin chhuatah a ṭhu a, a hnung lamah ṭhutthlengah ṭhuin ka kar a, ka u chu ka ke pahnih inkarah a ṭhu anih ber chu. A lu chu ka hmehsak nghal "U, engtikah nge bialnu i neih dawn a" ka tih chuan a khuh kharh ringawt.





U Hminga a lerh em em laiin ani ve thung chuan hmeichhia han ngaihven vak a nei ngai lo. Keimah leh ka nu chiah hi a nuna hmeichhiaa awm kan ni mai. Kan pahniha kan inzui ṭumte hian a nau ka ni tih hre lovin hmeichhe ṭhenkhat chuan min ngei em em zel a, U Zorema bialnu anga min ngai tawk an awm fo. Keini unau chuan kan nuih tawp mai ṭhin.





"U, eng nge in case khawih mek kha a an. Hma in sawn zel em?" ka ti a, ka u case chungchang hi ka hriatpui ve vek zel. Hetiang lam hi ngaihthlak nuam ka tia, ka u ina case khawih lai a neih tawh chuan ka zawt ve sek sek zel. A chang chuan ka zawhna ngah lutuk ṭhin avang hian ka u pawh hian ngaihtuahna thar a nei leh khauh zel.





"Imm, a hmawr kan bawk ṭep" tiin a case khawih lai chungchang chu a sawi nghal mawlh mawlh. A sawi dan hmangah an ruang chhar chuan a thih hmain s*x a hmang hmasa a nih hmel a, a duhthu ngei nge pawngsual tih erawh chu tualthattu an hriat hunah a hriat mai ang.





Keia lo rin dan vel mai mai chuan a hmeichhia kha pawngsual ngei anih ka ring. A taksa en kha chuan an sual hrep a ang ka ti. "U, hmeichhe kha pawngsual hnua an thah ni ta se, tualthattu hremna hi a nat belh ang em?" ka ti sap. A duh lo chung tualthattu hian a sual anih ngat chuan hremna na lehzual hmu se ka ti.





"Teh maw u, tu emaw in ka duh lo chung min lo sual ve ta se, engtin nge i tih ang?" ring vak lo hian ka ti leh sap. Ka ngaihtuahnaa awm ka sawi leh tawp mai zel. Ka u chu a ṭhungil nghal auh a, ka lama rawn inherin tak run hian min melh zui a.





"Chutiang sawi suh" a ṭawng bul hmek hmuk khawp mai. "Aw, ka sawi mai mai alawm" ka tih pawh chuan a la meng rum viau. "khatiang ngaihtuahna kha i thluak aṭangin paih bo ang che" a tih chuan nui chungin ka bu nghat nghat.






"Ka zawt mai mai che lawm, mahse min chhang tho la" ka la ti ṭalh. "Officer ka nihna theinghilh ṭhakin ka che ang, ka hmuh hmasak berna hmunah ka that nghal ang" rum ula a tih chuan ka u kut chu ka vuan vat. "U ka sawi tawh lovang, ṭha deuhin lo ṭhu leh tawh rawh, i lu ka lo hmeh chhunzawm sak ang che" ka ti ta hliai.





Ka u mood ka thlaksak vekin ka hria. Nuam pawh ka ti lo. Ka u pawh chu a rawn ṭhu ṭha ve leh mai. Fiamthu bak ka thawh tawh lo. A hnu chuan ka u pawh a nui ve thei tawh. Ka u lu ka hmeh zawh chuan choka lamah rawngbawl turin ka phei a.





Ka nu leh pa an lo haw chuan rawng ka lo bawl fel diam tawh. U Hminga rawn haw chuan "Naute, vawiin lamte i hmang nuam em?" zawhna pawh ka zawh ve hmain min zawt nghal. "Imm, nuam lutuk, nang zawk?" ka tih chuan dar chhin akin a nui vur vur.





"Hmm.. in zirlai zingah hmelṭha i hmu anih kha" tiin ka ner nawng nawng. "Kan naute hian min ngai ler sia" tiin lu a thing nghut nghut. A pindan lamah chuan a lut zui a. U Hminga a pindana a luh rualin ka nu a lo lang ve nghal a.





"Naute, chaw ei kan siam nghal mai dawn em ni?" a tih chuan ka bu nghat nghat. Ka nu nen chuan chaw ei kan siam a, u Zorema lo kal chuan min pui ve a, ka u te hi chuan thawh hreh an nei ngai lova, ka chhuang hle ṭhin.





Chaw kan ei lai chuan ka pa pawhin college lam a nawm leh nawm loh te min zawt a, keiin sport anih avanga ka nin thu hahipin ka sawi ve bawk. Ka chhungte chuan min nuih vek hlawm. "Kan Naute hi chuan eng sports mah a thiam si lova, a ning anih hi" u Hminga'n a tih chuan ka melh vak.





"An sports naa va ṭhut hmelṭhat bak engmah a thiam lo" u Hminga bawkin a tih leh chuan "U i sual emai aw" ka ti ta ringawt. Tihian min fiam ve ziah. "Hmingsang, I nau hi fiam reng suh" ka nu ina a tih chuan ka nui var var. U Hminga lah chuan "dawt pawh ka sawi loh kha tiraw Naute Hmelṭha" min ti leh kher.





Ei kham chuan thleng ka sil a, ka u te pahnihin kan eina an tifai ve thung. Ka pindana ka luh chuan ka phone khuma ka dah chu ka la kang a, Rovi missed call a lo tam ngang mai. Ka call let lem lo, a rawn call leh tho vang.






Reels vel ka en laiin Rovi chuan a rawn call leh ta ngei a, ani hi chuan Hmingthana chanchin bak a sawi dawn lo chiang lutuk. "Mi over nu, call khati zozai kha i chhang thei lova" a rawn ti nghal vak. "Ka pindanah ka dah a, pindanah ka lut hman hleinem" dam diai hian ka chhanglet thung.






Ka sawi lawk ang tak takin Hmingthana chanchin chu a rawn sawi ta chiah. Eng tik aṭangin nge min rawn biak ṭan tihte chu min zawt a, vawi khatah zawhna min zawt nghal ṭeuh a, chhan tur ber pawh ka hre lo, ka nui ringawt.






"A eng ber kha nge ka chhan dawn che?" ka tih chuan lehlam ami chu a thaw hawk ri ka hria. "Engtik aṭangin nge a biak ṭan che?" a rawn ti pangai ve ta hram. "Kar hnih kal ta aṭang khan" tia ka chhan chuan Rovi chu a rak vak. Henu ṭhin hi chu aw.





"Kar hnih a!" mak a tihzia pawh a aw aṭangin ka hre thei. "Engmah min hrilh lo amaw? Min hrilh i tum miah lo tihna a nia, i ṭhian angah min ngai lo a ni maw" a ti nghal bawrh bawrh. "Inbengdai la" ka ti hap. "A tir kha chuan eng vak mah a rawn sawi lova, han inhrilh tur pawhin eng vak a sawi ngai lo alawm" ka ti leh nghal zat.





"Anih a bem tawh che em?" a tih leh chuan lu ka bu nghat a, mahse min hmu thei lo tih hriain "Imm, ni li nge, ni nga kalta khan" hetiang lam sawi hi nuam ka ti vak lo asin mawle.





Ka bialpa hmasa ber nen khan high school kan kal lai aṭangin kan inhre ṭan a, higher kan kal chuan ṭhian aṭangin inngaihzawnna kawng kan zawh a, kei chuan amah kha ka ring bur a, min bum thei turah pawh ka ruat ngai lo. A tan ka rinawm em em zel.





Ka kum rualpui te'n Ig leh Facebook te an khawih vek laiin kei ve thung chuan WhatsApp bak ka hmang ngai lo. A chhan pawh ka bialpa hlui Jayden khan khawih a phal ve ngai loh vang a ni. Keia lo ngaih ve dan kha chuan midangin min biak hnem a duh loh avanga Ig leh Facebook kha hman phal lo emaw ka lo ti a, mahse chutiang chu a lo ni reng reng lo.






Kum thum ngawt kan inzui a, keimah tawkah chuan rinawm ka inti ve viau. Mahse ka rinawmna khan a tilawm zo lo nge ni? Kan inṭhen ta tho. A tir kha chuan ka na, mahse a hnu chuan ka inngaihtuah fim a, ka natna te ka inhnehtir duh ta lo. Mahse keimahah Jayden-a min phatsanna khan nghawng thui tak a nei a, tun thlengin ngaihzawng neih ka ngam loh phah.





Kan inngaihzawn kum thumnaah chuan tuna ka ṭhian Rovi hian Ig account ka duh lo chung min hawnsak a, mahse a rei a, account chu tihchhiat ai tiin ka hmang ve ta tho. Jayden khan a hriat tirh chuan a lungawi lo em em a, kan inhauh phah nghe nghe.





Kan inhauh chhan a ho tham bawk a, kan inbe leh thuai, Rovi'n inngaizawng dangte tih ṭhin a sawi chu uksak lem lo mah ila, Jayden-a'n Ig vel khawih min phal loh laia amah zawkin a khawih reng avang chuan a password ka dil ve ta a, a tir chuan a phal mai lo.





Chu chuan keimahah ngaih ṭhat lohna a tuh a, ka awmdan chu Jayden chuan a hrethiam a ni ang chu. A password chu min pe ve ta a. A account a ka luh chuan a ṭhian mipa te nena an chat bak ka hmu lo. Ka thla a muang hman viau.





A account aṭang pawh chuan ka log out ta chuang lo. Mahse ni hnih liam hnua ka Ig a ka luh leh chuan ka meng bial kawk kawk. Jayden-a'n hmeichhe dang a biakna ka hmu ta nual. Chupawh nihnih kalta ami vek. Message chu ka chhiar ta a, ka natpui takzet.





Hmeichhe dang pawh kei min biak ang thovin a be hlawm a, a ṭhen ho phei chu chhiar ka tim zawk, a ṭhen ngaihzawng anga a biak laiin a ṭhen thung chu a flirt kualna vel an ni hlawm. Tlawm ka inti takzet. A message ho pawh chu ka en zo lo. Zankhua in ka ṭap a, ka tlawm hi ka inti vawng vawng mai a ni.





A tuk chuan eng nge ka hriat tehreng pawh ka hre lo. Ig ah bawk ka lut leh a, message ka en chuan zan lama ka hmuh te kha engmah a lo awm tawh lo. Jayden-a'n a delete tih hriat reng reng. Ka nui tawp ringawt.





Chuta ṭang chuan Jayden nen kan inhlat sawt ta viau. Min rawn hnaih a tum chang pawhin ka hlat tlat a, hrethiam lo ang deuha a awm ṭhinte chuan min tihnat bakah tlawm ka inti em em reng. Khang ka lo rinawm vena te khan a lakah awmzia an nei reng reng lo.





A hnu chuan ka pik lutukin Mampui leh Rovi ka hrilh ta ringawt. Ka sawi loh chu, Jayden nen hian college khatah kan kal lo. An hriat chuan an thinrim hle a, Jayden an huat zia chu, ka huat tur ai zawng zawng an haw vek nimai khan ka hre ṭhin.





Rovi chuan tlai lam class aṭanga kan chhuah rualin "Ṭhen rawh" tiin thlalak pakhat chu min hmuh a, hmeichhe pakhat leh Jayden thlalak a ni. Chu thlalak chu Jayden post ni lovin a hmeichhia zawk post a ni a, a comment tute pawh chuan inngaizawng dangte an comment ṭhin dan ang thovin an comment a, comment ho zingah chuan Jayden hming pawh a chuang ve vang mai. An inngaizawng ngei a ni tih phatna tur engmah ka hre ta lo.





A message khang ho zozai kha hmu mah ila, mipa a ni a, 'hmeichhia chu a be ve mai mai ṭhin a ni ang' ka la ti fan kha a nia. Mahse a hnu chuan khang beiseina lem lutuk ka neihte pawh kha a bo ta vek. Zanah chuan ka ṭhen ta ngei a, a number ka block ta nghal daih bawk.





A tuk lamah Jayden chu kan college lamah a lo lang leh hram anih chu! A zak lo kha ka ti ngawih ngawih. Ka ṭhiante chuan an lo hau erh mai a, nithum vel kan college lama a lo kal hnu chuan ka hmu duh lo bawk nen, a beidawng a ni ang chu. A rawn inlan ta ngai lo va, Ig lamah pawh hmeichhe dang nena an thlalak a dah ta fo.




Ka hmuh loh laiin ka na a, a hmel ka hmuhin ka haw hlur bawk, khang hun laia ka awmdan kha hrehawm tak a ni. Amah avangin mipa ka rinna a bo zova, mahni infak thu chang lo se, mi hi chuan min rawn be ve leh nawlh zel, ṭhian ang bakin ka chhuah ngai lo. Keimahah mipa rinna awm zawng zawng kha Jayden khan a ṭhiat fai vek.





Khang kum thum chhunga rinawm taka ka awm lai khan ani chu a rinawm zo ve lova, mipa dang pawh Jayden an ni lo tih hre reng chungin Jayden ang rilru an put ka ring tlat a, rin loh luih ka tum pawhin ka thei lo, chuvanga tun thlenga ngaihzawng nei ta lo ka ni.





"Ka sawi i hria em?" lehlam ami in a tih chuan ka harh zawk mai. Jayden bawk ka lo ngaihtuah leh tawh. "Eng nge?" ka vin ve nghek ringawt. Jayden ka ngaihtuah tawh hi chuan ka thin hi a chhe hlur ringawt zel.





"I thin hi a chhe ve zek a, chhan let i tum em ka tih anih chu" lehlam ami pawh a vin viau. Mampuii hi kan ṭhian pathum zingah chuan a zaidam ber a, mahse, a zaidam ber pawh hi eng a ni chuang hran lo.





"Playboy lutuk anih kha" ka ti hlak. Mipa ka rin loh sa nak alaiin Hmingthana ngat phei hi chu, ka ring lo lehzual. "Nangte chu a play kual ve phal dawn che emaw ni le?" a tih chuan ka nui hak. "Nui suh, i hmelṭha a, mipa duhzawng tur tak i nia, a play kual vel phal che ka ring lo" pangai tak hian lehlam ami chuan a ti leh. Ka nuih a za zual sauh.





Henu ṭhin tak hi chu a. "Min play kual a phal vang alawm min rawn biak reng ni" ka la nui reng. A ṭhiannu hi eng hmuh chiahin nge min hmuh ṭhin ni. "Hmm, ka awi lo emai, mipa chu ni ila, ka bem ang che, chutiang anih avang chuan Ts-a hian a play lovang che" ava buaithlak ṭhin e aw.





"Anih ka dah mai, thu ropui I sawi tawh chuang lovang" ka ti hlak. "Anih naktukah chuan i bulah ka awm reng ang, Minute khat pawh ka kalsan lovang che. Ts-a awm dan vel ka lo en ang a, a play ang che nge, a duh tak tak che tih chu kan hre mai ang" a tih chuan aw pawh ka pawh tawh hran lo, a chhan chu ai lo tih pawh ni ila, ka bulah a tap chawt dawn tih ka hria. A thusawiah hian a ding nghet thei ania.





Zing ka harh chuan ni a chhuak ut tawh. Thawh ka hai chiang lutuk. Hmanhmawh zetin khum ka thawhsan a, ka hmai ka phih zawhin ka sam pawh khuih lem hlei lovin claw clip hmangin ka kilh khawm tawp, pindan ka chhuahsan zui nghal.





Ka pa chuan ka tho min hmuh rualin "kan naute chuan thawh a hai a ni maw?" nui sang chung hian a ti a, ka la sawi ve lo tak, ka pa hi tunah hian Higher school pakhatah headmaster in a awm mek. Ka nu pawh chuta zirtirtu a ni a, mahse ani chuan aikal a la thung.

"Tu mahin min kai tho lova" ka ti nang nang. "In sports lai te a ni sia, I chauh kan ring deuh a mawle" ka pain dam taka a tih laiin "kan naute kha chuan ṭhut mawi chiah a thiam" rawn tiin u Hminga a pindan aṭang a lo chhuak a. "Naa, khatin min ti ve ziah suh aw" tiin u Hminga chu ka melh nghek.





"Naute khati khan min melh vel teh suh" tiin ka lu a rawn tuai zeuh. Ka u Hminga nen chuan choka lamah kan inzui a, ka nu a lo che mial mial a, u Zorema pawhin hmarcha a lo rawt ve mek. Police officer hmarcha rawt lai hi miin hmu ve ta se.





"Min lo kaitho ve lova" ka ti nghal hliai mai. "A fel ṭhin ania" ka bula ding u Hminga'n a ti leh zeuh. U Hminga'n mi a fiam peih zia hi a. Kei lah ka lo thinrim titih hman ziah lehnghal. "Nu, u Hminga hi ka ning" ka ti vak . Amah ber lah a la nui hawk hawk zui.





"Naute, vawiin i tlan loh ni a ni tiraw? Thlah i ngai dawn em?" u Zorema chuan lo hawichhuak chung hian a ti a. "Ka hre lo, Rovi hi a hman hmat chuan a ngai kher lova" ka ti let ve a. "I ṭhiannu chu zawt chiang la, i kal hmat duh chuan ka lo thlah dawn che ania" a tih leh chuan rang zetin ka room lamah ka tlan a.





Rovi ka call nghal, "Hello" phak chuap hian a ti a. A la tho lo a ni ang. "Vawiin i hman hma dawn em?" ka tih chuan "ka hre lo, ngati nge?" a rawn ti let a. "U Zorema'n min thlah thei dawn a, i hman hmat dawn erawh chuan nangmah nen inthurual mai ila ka lo tia" ka bula pen chu ka la kang a, paper-ah ka thai nauh nauh. Call ka hman lai hi chuan ka kut hi a awm hle hle thei lo.





"Eng nga! U Zorema i ti em ni?" a harh chian hmel tawh khawp mai. "Imm, i hman hma dawn em?" ka ti vak. Chiang zeta ka sawi hnu pawha min rawn zawh leh hram ni. "Ka la thawh loh hi, ka hman hma thei lovang" a rawn ti ve nghek. Kan heti reng mai hi, kan ṭawng nem khat ania. "Aw, anih u Zorema ka lo inthlahtir mai ang" tiin call ka titawp zui a.





U Zorema bulah chuan Rovi hman hma theih loh tur thu ka hrilh a, "Mahse, Bolero ni lovin Bullet in ania" a tih dut chuan ka ner nang nang a, mahse ka bu nghat tho. Midangin Bullet nalh an tih viau laiin kei chuan ka ngaina miah lova, nalh lah ka ti hek lo. Mahse u Zorema'n a khalh tawh hi chuan a inhmeh ka ti em em zel thung.





Chaw ei khamin ka insiam a, u Zorema pawh a insiam ve mek bawk. U Zorema ṭhutna station hi kan college piah lamah a awm a, a hman changin min thlah ve ṭhin.





Ka chhuah meuh chuan u Zorema chu a Bullet chungah chuan a lo chuang vang tawh. Ka kutzungpui tipir vahin ka u chu ka siai zeuh. "I Bullet i lawm em em chhan hi ka hria, midangin Bullet i khalh lai hian i attractive an tih vang a ni tiraw?" ka tih chuan u Zorema chu a nui hawk hawk.





U Zorema hnunga ka chuan rualin a darah ka beng thek a, "tluang deuhin min thlenpui ang che" ka tih chuan "ka phit pui dawn che maw ni le" nui reng chung hian a ti a. "Min phitpui chuan ka zuansan daih ang che" ka ti let a.





Kan tlanchhuak chuan ka u chu ka kuah a. Mahni in scooty pawh khalh ve thei tawh mah ila, midang phurha ka chuan tawh hi chuan ka tim tlat zel a, ka kuah leh nge nge ṭhin. Chuvangin ka hmelhriat ṭhate khalhah lo chuan ka chuang ngai lo.





College kan thlen chuan ka u ka kuahna chu thlahin ka chhuk a, ka chhuk rualin ka bulah Rovi a rawn ding nghal. A hman hma dawn lo emaw ka tia. "Naute, buaina i tawh chuan min lo bia la, ka rawn lang har lovang" u Zorema'n a tih chuan ṭul ka ti lem lo khawp. Mahse ka bu nghat tho. U Zorema'n min thlah tawh hi chuan tihian a sawi ngei ngei zel.





U Zorema a tlanliam hnuin "I hman hma dawn lo a ni lawm ni?" Rovi chu ka melh no lem lo. "In ina ka rawn sawm che chuan ka hawichhuak ngam ngai hleinem, i u kha ka hmuchak sia" a tih chuan ka thaw hak.





"In inah hian mo interview ka rawn nei mai dawn maw ni le. I u hi chu a chhe lo chiang e, a pa si, cool bawk si. Zinga min rawn call khan ka tho nghal a, ka insiam hmanhmawh rapthlak, in aia ka thlen tlai ka hlau a" a tih leh zat zat chuan ka nui ringawt tawh.





"I hnung lama dawr lam kha hawi teh" Rovi'n zawi tea a tih chuan ka hnung lam chu ka hawi a, dawr pawna ṭhutnaah chuan Hmingthana leh a ṭhiante chu an ṭhu a, Hmingthana chuan min lo melh ngur a, a la meng rum em em zui, tih dik loh ka nei emaw ka ti dawn alawm le.





Rang zetin ka hawi let nghal thuai. "Hmingthana te an awm tih sawi hmasa te che" zawi si, vin si hian ka ti a, "In rawn thlen hma aṭang khan an ṭhu tawh, a tir chuan sawti sawn a awm miah lo, in rawn thlen hnu khan a meng dur vek alawm" a sawitu hi a la phur hmel em em zui.




"Ka thiam loh anih loh tawp chu, kal ang" tiin a darah ka nam dat a, ṭha takin college chhung lamah chuan a lut ve mai. Vawiin hian kan sport complex ah kan sport dawn a, naktuk lamah chuan hmun dangah kan sport tawh thung ang.





Kan ṭhian thum chuan kan inzui chawt a, chhunah chuan stall an hawn lam chu kan pan a, canteen thil ngawr ngawr chu kan hne ve tawh. Hetianga stall a thil an siam hi a tui ka ti. Mixed an siam kan nghah lai chuan ka hawikual a, volleyball team ho stall hawnah chuan Hmingthana te ṭhian ho chu an ṭhu ve reng anih chu! Min la en ṭhup zui. Ka zam vek dawn alawm le.





Hmingthana ṭhian ho an nuih vur vur hlawm laiin Hmingthana thung chuan tak ngur hian min en a, ka hawisawn nghal daih. Tinge ka hawkdak em em mai le, mixed an siam zawh chuan daihhlim lam kan pan a.





Thingbuk hlim hnuaiah chuan kan ṭhu a, kan eitur lei chu kan ei nghal mial mial. Kan awmna lamah chuan Hmingthana leh a ṭhiante an lo kal ve a, kan lei ang an lei ve kher zui. Kan piahah chuan an ṭhu a, kan be lova min be bik hek lo.





"Lo thlahtu che kha i bialpa em ni?" ka hawichhuah chuan ka hmaah Hmingthana chu a lo ding reng. Engtikin a dinchhuah a, ka hmaa a lo awm daih ni. Kei ka ṭhu a, ani a ding bawk si nen ka chhoh melh ha mai. "Lo thlahtu che, kha police pa tehhrep kha i bialpa em ni?" a aw a dam lo viau mai.





Chutia ka u a sawi dan chuan ka lung a tiawi lo reng reng. "Police satliah ni lovin Officer anih kha" ka ti hmak. "Alo nih hrep chu a" a awah chuan a ngaihnep zia leh tham loh ka hre thei. "Khati khan tham loh hmel deuh khan ṭawng vel suh" ka aukhum nghek chak lutuk. "Ka zawhna chhanna thung kha le?" a aw rik dan a la ngai reng.





Rovi chuan "U Zorema te chu" a tih chuan a ka ka hupsak vat. "I buai vena tur a awm lo" a aw rik dan ang chiah chuan ka tilet ve. Ka bialpa tia sawi ka tum lo reng reng. Mahse ka u a ni tih a hriat kher a ṭulna ka hre hran lo. A ngaih ngaih hian ngai teh se.





"Ka buai vena tur a awm lo maw" tiin min melh ngur. "Ka buaina tur takah ka buai anih hi. Mi nupui inih hma chu sava thlawk lai i ni, chuan he sava thlawk lai hian ngaihzawng pawh nei mah se, ka ta a la ni tho ang" a tih chuan a awah a inrintawkzia ka hre thei. Ka va han ngei mai mai tak.





A ṭhiante lah chu an la thum huk zui. Ka ṭhiante thung chu an ṭawng lo hrim hrim. Hmingthana chu ka hmaah a rawn ṭhu thla a, chiang zet maia min enin "hei hi hre reng rawh, Hmingthansanga duatlai la ni tur inih kha" a rawn ti anih chu!

[Te-i Mrs Ambrose]

DÉSESPÉRÉ
By: Te-i Mrs Ambrose

Chapter 2

A zam lo lutuk chuan nuih te lam lam a ti za dawn alawm le. "Ka sawi kha hre reng rawh, ka duatlai i la ni khawp ang" a tih leh ngat chuan a hmuh lai ngeiin ka ner nang nang tawh. A zah theih lohna level hi a sang mah mah anih hi.




"Miin chhe lo an ti che emaw, ṭha an lo ti viau che pawh a ni thei. Midang ni lovin Lalnunmawii ka nih hi, midangin an hmuh ang che khan ka hmu ve lo che, kei min rawn chhaih buai chu tum duh suh, i duh chuan hmeichhe dang, i tana inphal tak turte va chhai rawh" ka tihkhum hlak.




"Hmeichhe dang ang i nih loh vang alawm ka mit i lak" a ti duh lek chauh. Hepa hian min ti beidawng titih tawh. "Ka duh chu ka nei ngei ngei ṭhin. Ngaihzawng i lo nei a ni pawhin i ṭhen hun ka nghak mai ang" a ti leh pawh chuan chhan enah ka en tawh lo. Ka thaw hak ringawt.




"Star leh crush tih vel i neih pawhin bansan vek la, keimah chiah min star in min crush ang che, min thei sa" awi, hepa han zah loh zia hi. Ka ṭap thei mai dawn alawm le. Hetiang taka zak thei lo anih hi ka ring ngai lo. A ṭhiante lah an thum leh huk tawh.




"Mawipui, i thei sa anih chu aw" Liansanga chuan a rawn ti a, an in set tliar tliar hlawm. Ral aṭanga kan lo hmuh, kan basketball player class tak tak, cool hmel zette kha hetiang hi maw an lo nih a. High school naupang mizia alawm an la neih le.




Hmingthana chu a thochhuak a, a ṭhiante pawh an tho ve bawk. Engmah sawi tawh lovin a hmaa an lo ṭhutna, volleyball team ho stall lamah an kal leh ta diak. An liam hmain Hmingthana rawn hawilet chuan min kawkin mit min siai khum suk anih chu.




Midang an e dual a, ka zak lutuk ringawt. Ka kun ngar ngar. Tinge khatiang mipa zak thei lo leh inthlahrung lo lutuk khan a hming tea min duh ve tlat ni. Midangin min sawi sap sap tawh dawn anih hi.




"A thikthu a va chhe ve" Rovi'n a ti hliai a, a thikthu chhiat lam ai mah chuan a chapona vang niah ka ngai ber. Hmingthana hian a duh tawh hmeichhia a hlah ngai lo tih mi sawi hmang aṭangin ka hre tawh, tunah min duh thu a sawi a, keiin ka lo duh loh chuan amaha chapona awm ve te a tla hniam dawn, a chhan chu a duh duh thing thei a ni a inti ngam tawh dawn tlat lo, chumi avanga khatianga rawn che kha anih ka ring ber.




"I ngaihtuahna hi a mak thei lutuk, a chapo laklawh vanga khatianga rawn che a nih kha" ka ti hlak. "Kan Hmingthansanga hian tu hmeichhia lakah mah a thikthu a pe ngai lo ania, nangmah tih loh, a duh ve che a ni ang" Rovi chu a phur hmel tawh em em lehnghal.




"Hmeichhe dang chu awlsam takin a bem thlu thei a, a ṭhen hi chuan an bem zawk mah, kei te chuan chhanna ka pek duh loh avangin tikhan a rawn che mai mai anih kha" ka ṭawng dam theihna in min thlawhsan ṭep tawh. "Aw, a thin a chhe ṭan dawn e, sawi tawh rih lo mai ang" Rovi bawkin a ti leh. Nidang ang lo zetin ani ve thung chu a ṭawngkam chhuak a pangai a, phurna ka hre tel thei bawk.




"Khatiang mipa kha chu hnaih lo tawp rawh, ka ṭhiannu hi infiamna tur mai mai i ni lo" Mampuii a ṭawng ve ta hram alawm. "A infiamna tur a ni tih pawh a hriat loh tawp kha" Rovi'n a chhang let ve thung. "A ninawm, topic dang" ka tih hliai takah chuan kan nui ho ta dar dar a.




Tlai lam thleng chuan kan ṭhutna ngaiah kan ṭhu a, chutia kan thut lai chuan kan house a assistant leader lo kalin "Mawipui, chess kha i khel ve ṭhin tiraw?" a rawn ti a, lu ka bu nghat. Ka u te nen hian inah chess kan khel ho ṭhin a, keimah tawkah chuan ka confi ve viau.




"Kan house hmeichhia aṭang hian chess khel tur pahnih chiah kan nei a, i lo ti ve mai dawn em ni ang?" a tih chuan mak ka lo ti tasa mai. Hetiang vela tel hi ka tum ngai miah lo. "midang khel thei ngang an awm si lova, a hminga tel ve mai mai pawh a pawi miah lo" a tih lehzel takah chuan ka lu ka bu nghat.




Ka ṭhiante lah an la phur em em zui. "I chak sa" tiin min beng dun thek thek mai. Indoor anih avangin auditorium lam kan pan a, sport indoor kan tih hi chuan kan college auditorium ah hian kan nei mai zel.




Auditorium chhunga kan luh chuan mipa in volleyball an beng ve mek a, an ball ben a na si, min fuh palh pawh a hlauhawm alawm le. Chess chu volleyball an benna aṭanga sir lam hla deuh taka dawhkan paliah khelh tur a ni a, hetiang anih chuan khelh rei vak pawh a ngaih ka ring lo. Ka lo tling ve zel anih pawhin game 3 vel chiah khelh a ngai ang.




House pali ho chu tute nge intum dawn tih an pawt a, kan house leh yellow kan intum dawn a, ka lut hmasa ber dawn bawk. Midang pawh entu an awm ve far hlawm. "Lawmman I lak loh chuan kan kawm tawh lovang che" uangthuang zetin Rovi chuan a ti a, ka melh ram ram mai.




Vawikhatna chu awlsam takin ka chak mai. Ka ṭhiante chu kei ai mahin an phur a, nuam an tih hmel khawp mai. Tihian house pali aṭang mi pathum theuh kan kan chhuak a, mi 12 ah 6 an tla nghal ang a, tichuan paruk la bang ho hi a intum tur kan inpawt leh ang. Tichuan pathum bang la awmin pakhatna, pahnihna leh pathumna inchuh a ni tawh mai.




Game hnihna kan khelh leh chuan ka tumpui chu ka hmuh ngai a ni lo. Department dang daih anih ka ring. Kei leh ka ṭhiante hian Economics vek kan core hlawm a, department dang hi hriat kan ngah lem lova, kan junior te pawh tlemte bak kan hre lo.




Kan inkhelh zawh dawn lama ka hawichhuah chuan kan piah lam ṭhutna a ṭhu nen chuan kan mit a intawng chat. Ani chuan min lo en reng tawh ni ngeiin ka hria. Tak ngul mai hian min lo en a, min ti zam dawn dawn. Kan mit a intawn avang chuan min siai leh zuk tawh. Hmui phunin eng emaw a sawi bawk a, mahse eng nge a sawi phei chu ka hre lem hlei lo.




"Che ta che" min titu avang chuan Hmingthana ka enna aṭang ka harh zawk, ka va zak reuh tak. Ka ṭhiante chu an dinna hmun aṭangin an lo ṭang ve ngang mai. Ka chak chuan an au chhuak nghe nghe.




Chess hi chu ka u leh pa te nen kan khelh ṭhin avangin keimah tawkah chuan thiam ka inti a, ka confi ve viau. Ka ṭhiante awmna lama ka phei lai chuan ball in ka luah min rawn fu a, leiah ka ṭhu thla tawp a, midang au ri pawh ka hre ruai ruai, ka hai nghal chhulh mai.




"Lalpa leh" tiin ka hmaah tu emaw hi a rawn ṭhu thla a, "I na em?" min tih pawh chuan ka vir vel muai muai maiin ka hria. "Mawipui" rawn ti lehin min pawm kang nghal lawp anih chu. "Rawn zim hut hut lo teh u" ti fiak ṭhatin pawn lamah min pawm chhuak a. Lu ka thing nghut nghut a, ka pangai ṭan ta viau.




Mahse, ka pangai deuh takah chuan zahna in ka luhai te kha a rawn thlak a. "Ka chhuk duh" tiin ka tal nghal vak. Hetia mi hmaa inpawm ka duh lo reng reng. "I lu a nat kha, nurse hnenah ka hruai dawn che" a awah chuan danglam ka hre tel thei. Ani hian min ngaihtuah tihna em ni?




"Mahse ka zak alawm, ka chhuk duh" ka tih leh chuan min enin a kiai suk a, min chhukthlak tir ta hram. Auditorium pawna awm ho chuan min en hrek hrekin ka hria. "A na viau em?" Mampuii chuan rawn tiin min kai a, Hmingthana chu a melh no lem lo.




"Na lutuk pawh ka ni lo. Min rawn fuh thut khan ka hai chhuai mai chauh a, chutia na pawh a ni lo" ka ti zung zung. Engtin nge Hmingthana kha ka hmaa a rawn awm hman ni. Amah hnungchhawn lam zawngin ka kal kha a nia, a rawn thleng chak awm hle mai. Chuan a tu a chuan nge ball min ben per tir reng reng ni, a force a na ropui si.




"Mawipui, i na em" tiin kan assistant leader Rempuii a rawn tlan a, "Na love" nui ro halh pah chuan ka ti a, Hmingthana'n min pawmchhuak kher kher bawk nen, ka zak takzet. "Final i lut bawk sia, i khel leh thei ang em? Nurse room lama kal te i ngai dawn em?" a ti zung zung.




"Na chhia ka ni hleinem, nurse pawh hmuh ka ngai lo, ka rawn khelh chhunzawm ang" ka tih laia Hmingthana min melh dan chu! Lungawi loh hmel deuhin alawm min en le? Tihsual ka nei tawp si lo.




"A ngai lo, nurse hmu turin ka hruai dawn" Hmingmuana chuan a ti ta reng a, ka kutah a rawn kai nghal chat lehnghal. Kan Assistant leader Rempuii chuan phâwk zetin keini pahnih chu min en a, nuam lo ka ti nasa mai. "Kal ka ngai lo" tiin ka kut chu pawh thlak mai ka tum a, a han vawn ngheh em em zia mai chu a.




"I lu a la na ang" a ti tlat a, a over hi ka ti thlawt. "A lu neitu zawk ka nia, i lu a ni lova, a nat leh nat loh pawh i hre lo" ti hmakin a hma aia na zawkin ka kut chu ka pawt leh sawk. Hmingthana lah chuan min melh tur khai mai a, a inti thu hi ka ti ngawih ngawih.




"Chess tehhrep pawh kha khelh a ngaih loh kha, ball in a per leh che emaw a nia nga" lungawi loh hmel zet hian a ti a, ka melh ngar mai. "Khatin min melh suh, hetianga i awm reng chuan nangmah lo duh ru ve ṭhin tute pawh i hnawt ṭiau zo ang" a thusawi chu ṭul lo ka lo ti lutuk. Amah lah chuan a kut hmet ri khepin "Oh, tikhan awm leh si rawh, keimah chiahin ka duh che ang a, thik tur an awm lo a ni mai" a ti leh ang lawi a.




"I thusawi ho tak tak hi chhunzawm tawh lovin ka va inkhelh zawm leh thei tawh ang em?" ka tih chuan nichina a nui hmel kha a ral a, a thutak leh ngur tawh. "Ai, i intihpalh leh ang" tiin nurse min hmuhpui chu a tum tlat. "Ka na lo" ti hliaiin ka ban a chelh lohna lam chu ka phar hliai bawk.




"Khelh chhunzawm chu i duh viau em ni?" a tih chuan ka lu ka bu nghat a, mahse harhchhuak leh thutin "I thu ngaithla tur leh zawm tur pawh ka ni lo. Ka nuna thu neih theihna engmah i nei lo" ti nghatin kalsawn ka tum a, kan bulah chuan Rempuii chu a lo la ding ve reng niin. Kan inbiak chhung zawng khan min lo entawn char char, ka ṭhiante pawh kan bulah an lo la ding ve reng.




"Kal ang u" ka tih chuan an harhchhuak zawk hlawm ni maiin ka hria. Min lo va han en nasa awm hlawm em em ve mawle. "Anih chuan chak ngei ang che" chu aw chu ka hnung lam aṭang a lo chhuak a, tudang ni lovin amah Hmingthansanga bawk.




Kan luh leh chuan kan assistant leader Rempuii chuan ka khelh zawm theih tur thu chu a sawi a, kan house lam ho an thawm huk. Hmingthana pawh a ṭhiante bulah a ṭhu leh vang tawh a, min hmu chiang thei viau ang. Final tur anih avangin tlem chuan ka zam ve deuh.




Game ah chuan ka rilru za a za ka pe a, ka tumpui hmel pawh ka hmu tawh lo. Board ah ka mit a fu chat a, ka chak theih dan tur ka ngaihtuah nghal char char bawk. Volleyball khel ho khan an zo tawh a ni teh chek ang chu. Thawm bengchheng hriat tur pawh a awm tawh lo. Chu erawh ka tan a lawmawm hlei hlei.




"Kan chak ta" an tih riah chuan ka thaw ve ta hram. Ka thil tih tawh naah chak loh ka duh ngai lova, ka chak thei chu ka lawm hle. 'Chak loh ka duh lo' ka tih avang khan chak loha pawm dan thiam lovah min lo ngai ang e, ka chak loh ṭum chuan ka inzir belhna tur nia ka hriatah a hma zawng aiin ka bei nasa mai ṭhin.




"Pawh chawpah chuan I va han khel ṭha ve" kan leader Jb-a chuan a rawn ti a. A rawn kal ve lai pawh ka lo hre ve leh lo pek. Sawi tur ka hriat miau loh avangin ka nui tawp. Jb-a hian English a core a, an department CR a ni bawk, a hmain English hi minor-ah kan la ve ṭhin a, chuvanga hria chu ka ni.




Item dang an tih leh dawn tak avangin keini ṭhian ho chu a hmaa kan ṭhutna lam bawk kha kan pan leh a. "I u in a lo lam dawn che em?" Rovi chuan a ti a, lu thing nghatin "lam lovang, haw lamah te chuan min lo lam ngai loh hi" tiin thing chu ka ngheng ṭha sauh sauh a.




"Anih chuan kan inphur leh mai a ngai dawn a ni maw?" a tih chuan ka chhang buai tawh lo. Ka mit ka chhing daih. "Naktuk chu Rajiv Gandhi stadium lamah tiraw?" Rovi bawk chuan kan ngawih ṭhap laiin a ti leh. Mampuii zawkin a chhang a, kei chu ka mut a chhuak der tawh.




"Anih chuan naktuk chu chhe lo em em a inchei a ngai dawn anih chu. Thla te pawh ka la duh dawn" a aw aṭangin Rovi chu a phur viau tih a hriat. "Lo inchei ve vek ang che u, kan reels nasa dawn a nia" a tih lai chuan Rovi mal chungah ka lu ka nghat a, "ka mut a chhuak riau, ka'n chhing sek ang e, midang an lo kal chuan min lo sawi harh mai dawn nia" tiin ka romol ken chuan ka hmai chu ka khuh a. Rovi chuan ka sam chu a rawn khawih a, chu chuan ka mutchhuak chu a rawn blehchhah sauh.




Min lo sawi deuh nawk nawk avang chuan ka harh a, ka hmai khuhna chu ka lathla nghal. "Ban a hun dawn" an tih takah chuan ka ṭhuchhuak a, ka sam ka chul thuak thuak. "Ka va han mu rei awm em em ve, ka muttui viau lehnghal." tiin ka zimar ṭalh ṭalh.




"Attandance va dah ila, haw ang u" an tih chuan attandance an dahna lamah chuan kan va kal ve a, "Naktukah in peih chuan kan department stall-ah lo kal ve ula, kan inralh thei deuh ka ring" tiin Arema chuan keini ṭhian ho chu min enkual a, "Engzat nge kan hlawh ang?" Rovi ina a tih chuan Arema chuan a melh rum khawp mai.




"Sum men hian i meng kur zel mai, department sum lehzel chu i it lo hram ang u" a tih chuan kan department pui dang attandance dah tumte chu a nui hak hak hlawm. "I va han chhe tak" tiin Rovi chuan a roll number a hrilh a, keini pahnih pawh min sawisak ve bawk.




Mampuii hi chu an driver hian a lo lam mai zel a, tunah pawh an driver chu gate piah deuha a ding leh reng tawh. "Anih Mam, bye bye" tiin a kal tur chu kan vai lauh lauh. Ani pawhin nui var varin min lo vai let ve a, gate aṭanga a chhuah liam hnuin keini chuan kan scooty dahna lam kan pan a. "I mut lai khan Ts-a te an lo kal leh a" Rovi'n a tih chuan "Maw?" ka lo ti hu.




"I muttui sia, ka kai harh duh lo che anih kha, kei chuan a duh ve tak tak chein ka hria" a tih chuan "scooty kha start mai mai teh" tiin a hnungah chuan ka lawn nghal tharh. "Mipa zawng zawng hi Jayden ang an ni lo ania" a tih leh hram chuan ka thaw hawk. Jayden hming an sawi tawh hi chuan chawp leh chilhin ka mood a inthlak nghal hlawk zel. Ka move on san theih loh vang a ni lova, min bum chian em avang khan a hming an sawi hian ka ṭhin a rim thar a, ka tha hi a na viau zel.




Rovi pawh chu engmah sawi tawh lovin a tlan zui a, kan in kawt kan thlen chuan "Naktuk chu ka lo kal hma ang, ka sawi kha aw, lo inchei ve ang che" a tih chuan ka ner nawk. Inchei tih vel hi ka peih ngai hran lo. Amah Rovi lah hi a phur ṭhin hle a, Mampuii nen kan peih lo chung hi min reels pui leh nge nge zel.




Kawngka inkalh ṭhiap chu mak ka ti reuh hle. Chabi kan dahna ṭhin lam ka pan a, ka lak kan rualin u Hminga'n min rawn call a, ka chhan rual chuan "Naute, in bang tawh em?" a rawn ti nghal, kan ban tawh thua ka chhan chuan "Anih chu, in college lamah ka lo kawi a, i ban tawh chuan inthlak la, zanriah erawh bawl a ngai lovang aw" a tih avang chuan mak ka ti hle.




"Tinge?" ka lo ti ha mai. "I pu a zual a, chu lamah chuan ka nu leh pa te pawh an awm." tiin min rawn chhang a, chhan pawh ka chhang tawh hran lo. "In ka lo thlen hunah engkim ka hrilh ang che, tunah chuan ka dah phawt ang" tih leh dah a rual a, kei pawhin chabi chu hawngin in chhungah chuan ka lut zui a.




Ka inbual zawh hnu deuh lawkah ka u chu a rawn thleng a, "Naute, pindanah khan i awm tiraw?" a rawn tih chuan "Imm, ka lo chhuak dawn" tih leh chhuah ka rual a, ka sam ka hru phei nghal mawlh mawlh bawk. "Ka va inthlak ang a, chuan ka pu te in lamah chuan kan va kal ve dawn nia" a tih chuan ka bu nghat nghat.




"Ka pindanah min lo zui lut nghal teh" rawn lehhawi chung hian a ti a, "Naa" ka ti fan duai, ka u chuan min nuih suk suk mai. Ka u chu ka zui ve tho a, "College lam pana in chhuah hnu deuh lawk khan ka Pu chuan chhungkaw kima chaw ei a duh thu a sawi a, nang pawh message chuan kan rawn hrilh reng che, i lo seen ker kur bawk si lova" a tih chuan ka ner chiam chiam.




"Ka pu a zual i ti bawk sia" a hnu deuha ka tih chuan "Imm, tlai lam aṭang khan a zual leh deuh a, ṭhulh leh an tum zet nangin ka puin chhungkuaa ṭawngṭaina hun te hman a, zanriah kil ho ngei a duh tlat avangin kan ṭhulh leh ta lova" a inthlak pah chuan a sawi mawlh mawlh .




"I pindana ka zui kher che hi a ṭulna pawh ka hre lo e a" ka tih tak daihah chuan "Min zui lo ni la, khang ho kha i hre nang" mit min siai zeuh chuan ka ṭhutna khuma lukham chu lain ka u chu ka va vawm pawp. "Tikhan hmeichhia te hmaah i va inla zei vel ṭhin awm sia, kei chu ka lo zak" ka tihkhum chiam "min ngai ler lutuk anih kha" a lo ti sam et.




Ka u inthlak zawh chuan "Kal ang le" tiin khuma ka ṭhu chu min rawn en a, "I sam kha chu thliin a chhem ro mai ang" a lo ti leh. "A ṭha alawm" tiin ka towel chu ka u varanda-ah ka va pho ringawt. "Tihian inpho rih sela, ka hman hunah ka lo seng ang" ka tih chuan a bu nghut.




Ka u nen bike chuan kan inphur a, "U Bawiha in hrilh ve em?" tiin u Hminga lama va kun pah chuan ka ti a, a bike hnung a sang si, ka rawl vek thei dawnin ka hria. Chuan, u Zorema hi u Bawiha tih bakin keini chhungkua chuan kan ko ngai lo, kei tak phei chuan 'U' tih teh tawp hian ka ko mai ṭhin. U Hminga chuan an hrilh tawh thuin min chhang a.




Ka pu te hi veng dang daiha an awm a, kan tlan rei khawp mai. Ka pu te in kan thlen chuan dar nga leh a chanve a lo ri dawn hnai tawh. Ka pu te inah chuan kan cousin te leh kan chhungte an lo awm kim deuh vek tawh. "Mawipuii te pawh an lo thleng tawh anih hi" tiin ka pi chuan min lo hmuh rualin a ti nghal a.




"Pi" tiin ka pi lam chu ka pan a, ka pu vangin ani pawhin mut a hmu ṭha lo tih a hriat a, a hmel chu a lang dâng hle a, a chauh hmel reuh hle. "I pu pawhin hmuh che a chak tawh ngawt ang" ka pi bawk chuan nui chung hian a ti leh a, ka pi kut chu ka hmer sak vang vang. "Ka pu chu a mu em?" ka tih chuan ka pi chuan "tunah chuan thisen chaw an khai mek a, ani pawh a harhna a la rei lo" tiin min chhang a.




U Hminga te ho nen chuan ka pu pindan lamah kan lut a, ka pu chu a cher ruak tawh a, keini unau min lo hmuh chuan min ban nghal. U Zorema awmna min zawh chuan u Hminga zawkin a la ban loh thuin a chhang a.




Ka pu pindanah chuan darkar chanve dawn kan awm hnuah kan chhuak a, zanriah bawl ngai ang te an bawl zawh deuh vek tawh avangin engmah tih ngai a awm tawh lova, ka cousin hmeichhia te ho nen chuan pindan khatah kan awm khawm hlawm a, kan ri deuh laih laih reng.




Chutia kan awm khawm lai chuan ka phone a lo ri a, ka en chuan Hmingthana a lo ni. Mak ka ti hle, whatsapp lamah hi chuan min lo be leh zeuh ṭhin a, call tak hi chuan min la rawn call ngai lo hrim hrim. Ka ring ral tir ṭhak a, a rawn rik nawn leh takah chuan pawnah ka phone chu ka chhuahpui a.




"Hello, pawimawh a awm em ni?" ka ti nghal thawr. "Lo hawi teh" a tih daih chuan ka hma lam motor kawng lam chu ka en a, motor kawng sira footpath-ah chuan Hmingthana a lo ding reng. A inchei dan ka en a, Basketball a khel zo hlim anih loh chuan a inkhel dawn a ni ngei ang, ball pawh a la pawm vang alawm, "Chuan eng nge?" ka tih chuan lehlam ami chu a rawn nui suk mai.




Ka mit a ṭhat ve avangin a nui hmel chu ka hmu chiang viau. "Ka hmu chak che a" a tih chuan ka ner sawk. "Sawi tur i neih loh chuan ka dah dawn" ka tih deuh hmak chuan "I bialpa la ni mai tur hi ṭha takin min be ve ṭhin la" a rawn ti a, ka va han ngei tak. Hepa bak baka zak thei lo hi ka la hre ngai lo.




"Eng nge i tih?" pangai deuh zawkin amah chuan a lo ti ta daih a, "Chaw kan ei khawm dawn" tiin dik tak chuan ka chhang ve mai. Hepa hi ngei deuh viau mah ila, miin ṭha taka min biak laia uksak lo zeta lo awmsan te, chhan ṭhat loh tih vel kha ka mizia a ni ve lo.




"Engtin nge hetah ka awm tih i hriat a?" tiin ka zawt ve thung a, hetah ka awm tih a hria hi a mak ve reng reng. Ka zawhna pawh min chhang ta lo chuan "Tunge rawn phurtu che kha?" a ti daih a, a hmel a lang dang leh vek tawh. "Ka u" ka ti hmak. Hepa hian eng nge maw a hriat ṭhin ni?




"Anih chuan i ban lo vai la, kan practice dawn a" a tih chuan ka en reng ringawt. "Ṭha taka ka khelh theih nan i ban chu lo vai la" engtin mah ka tih tak si lovah chuan a rawn ti leh a. "Ka dah" tih leh hang up ka rual a, inchhung lamah ka lut nghal daih. A bialnu pawh ka ni tawp si lova, khatia lo ti ngam tur pawh kha a niin ka hre lo.




Ka cousin ho lah chuan "Pawna i mi biak kha kan hria ania" tiin mithmul min sankhum euh euh hlawm, "In inngaizawng ami?" Feli chuan a rawn ti a, ka pha rang nasa mai. "Chuti si" min awi loh hmel zet hian a ti a, "Thil pawimawh a awm a, a lo call a nih kha" ka ti ta ringawt, hemi te hmaah hi chuan thil pawh a sawi hlei theih loh ṭhin, ka sawi ka sawi chuan a hnuah inngaizawng angah min chhuah fel der mai ang.




Zanriah ei dawnah chuan ka pu pawh an rawn pawm chhuak a, ṭhutthleng pakhatah an ṭhuttir a, a dam hmel leh viah tawh. Hetia a nat leh thut ṭhin avang te hian kan ngaihtuah viau zel, mahse veng khata kan awm bawk si lo nen han inkan te hi a harsa ve deuh ṭhin.




Ṭawngṭaina kan neih zawhin chaw ei kan siam nghal a, kan chhungkua hi kan tam bawk a, kan ri luih luih reng. Ei kham lamah chuan ka pu pawh a zia tawh viau avangin kan haw a, haw lamah chuan ka pa car-ah ka chuang ve ta thung a, car-a kan chuan chhungin ka muhil leh hman hram.




Zan rei lamah a ngai tein Hmingthana chuan min lo be leh tawh a, zawhna eng eng emaw min zawt a, ka chhang tho nangin thui deuhin ka chhang ngai hran lo. Anih loh chuan min zuam te ka hlau ve a, min zuam mai loh nan ka theih tawpin ka ṭawngkam hman pawh ka fimkhur ve.




Induh nih ka duh lova, miin min rawn biak hi chuan ka chhang ve mai zel, lo induh tlat ang kha ka mizia a ni ve lo. Chu lo rengah, keimah hian Karma an tih hi ka ring ve a, ka nunah a rawn let leh ka hlau, miin i chunga an tih tura i duh ang bawkin mi chungah pawh ti ve rawh tih anih kha.




*Eng tikah nge min chhanlet ve dawn?* Hmingthana message chu ka chhiar a, ka ner leh nang nang tawh. Hepa avang hian ka ner ka ner mai zel anih hi.
*Hmeichhe dang va be zawk mai rawh* tiin ka chhang let a, *Hmeichhe dang ni lovin nangmah Lalnunmawii, Mawipuii kha ka duh che a* tih a rawn thlen chuan ṭha takin ka be leh thei ta lo.
*Mi i fiam kual ṭhin ang khan min rawn fiam kual ve tum duh suh, ka hman lo* ka phone pawh chu ka hmet na ngang mai.




*Basketball ka practice avang khan ka chau, mi fiam kual thei dinhmunah pawh ka ding lo* a rawn tih let chuan a message chu ka en reng ringawt. Hepa hi a cool viau hran lo, mahse tuna phone a a mizia ang hi a neih awm pawh ka hre ngai love a.




Zing ka harh chuan ni a la chhuak lo deuh a, thawh pawh a nuam khawp mai. Nizan khan ka meng rei hran lova, Hmingthana'n min rawn biak zelna pawh kha ka chhang zuiin ka hre tawh lo.




Rovi min ngenna angin nidanga ka dress nena inang lo zet chuan ka inchei a, mahse ka inchei uchuakin ka hre hran lo. Rovi a lo thlen chuan ka inpeih a ni deuh mai a, kan inah a tlangnel ve tawh bawk a, ka pindanah a lo lut leh nawlh. Min hmuh chuan a kutzungpui pahnih a tipir vah a, "I inchei loh ka lo hlau lutuk a" tiin ka khumah a ṭhu a.




Pheikhawk ka bun mek laiin "Nizan khan Ts-a'n min lo bia a" a tih chuan amah chu ka en a. " I chanchin te min zawt a" a tih leh chuan "Engtin nge i lo chhan?" ka ti nghal vat. "Min zawh apiang ka chhang" a tih chuan "A va han ṭul lo tak" tih bak ka sawi lo.




In aṭanga kan chhuah dawnin Mampuii kan call a, "Kan in aṭang kan chhuak dawn chiah aw" ka ti a, lehlam ami pawh chuan an chhuah ṭep tawh thuin min chhang a. Rovi nen chuan inphurin kan chhuak a, kawng tluanin ka u Zorema leh Hmingthana chungchang hlir zuk sawia mawle.




Stadium kan thlen chuan Mampuii chu a lo awm vang tawh. " In lo thlen tlai ka hlau lutuk" kan lam lo pan pah chuan a ti lang lang. "Kan house ho ṭhutna tur pawh an sawi tawh, kal nghal ang u" a tih zawm leh chuan kan kal a, kan house ho awmna turah chuan Hmingthana te ṭhian ho pawh an lo thu leh vang tawh. Min la en chiang em em zui lehnghal.




"Eng nge in an tak zel? I la kherh thlu nange?" Biakhlua chuan a ti a, tinge ka awm lai khera hetia an tih ṭhin ni? "Ts-a hian chhai thluk theih loh a lo nei ngai a ni maw" Liansanga pawhin a lo ti zui ve zat. Hmingthana chuan chhang lovin min melh rulh ringawt a, keini ṭhian ho chu ṭhutna tur melhin kan hawisawn daih. Spot ṭha kan duh leh dawn miau.




"Lo ṭhu ve mai ula" Liansanga'n a tih chuan "spot ṭha, ṭhut char char theihna tur kan duh, in ṭhutna kha chu ṭhut rengna tur atan kan duh lo" Rovi chuan a ti a, kei leh Mampuii chuan kan pawm viau. Rovi chuan a ṭhut duhna chu a kawk a, chulam chu kan pan nghal.




An football khel chu boring ka ti tawh khawp mai. Mahse, a ṭhenin football an khelh kara intlansiak te, high jump te an tih chu hmuh nuam ka ti viau thung. Chhunlai anih chuan a lum ṭha tawh khawp mai.




"I lo chik ve em? Ts-a hian hmeichhe dang a la hnimhnai miah lo, a hma ang kha chu ni se an ṭhian ho saw hmeichhe ho hian an bawr ve leh luih luih tawh maithei a ni" Rovi chuan a ti khauh. "Tinge Ts-a pawh chu Mawipuii tan hian i duhsak viau mai le" Mampuii'n a ti hlak. "I duhsak loh chhan hi ka hre lo zawk, a duh hmel em hi" Rovi chuan a chhang rang viau.




"Hmingthana vang hian in inhnial titih ziah" ka tih chuan "Mampuii hi lawm, engmah hre lo hian a duh lo bur ringawt anih kha, a lo duh tak tak che chuan ama tan pawh a ṭha zawk daih, hmeichhe tam tak rilru tina tawh lovin pakhatah a bur chat ang a, a nun pawh tun ai hian a ṭhat phah maithei asin" Rovi chuan a lo ti leh a.




Mampuii chu a lungawi lo deuh emaw ni, a ngawi ta reng. Ani hi chuan Jayden nen kan inṭhen avanga ka rilru natzia kha a theinghilh thei lova, Hmingthana ang tana min phal lo viau pawh hi awm lo ka ti hran lo. Lehlamah Rovi ve thung hi chuan Jayden lak aṭang ka move on tak tak thei lo niin a ngai a, ka move on san theih ngei nan tu emaw tawng ngei turin leh chu ka mi tawn thar chu min hmangaih tak taktu ni se tih a duh avangin tunah hian Hmingthana hi min duhsak a ni tih ka hria, a chhan pawh Hmingthana hian min duh tak tak niin a ngai miau.




Hmingthana te ṭhian ho chuan kan lam an lo pan a, kan hnungah an rawn ṭhu a, kan hnunga ṭhute kha khawiah nge maw an kal daih chu ni? Ka ṭhutna chu ti emaw hian a rawn bawh a, "Min ring lo viau em ni?" zawi deuh tak hian a ti a, ka lehhawi chuan Hmingthana chuan ka thutna nghenchhan chu a lo bawh a, a kun tel avangin a hmel ka hmu thei lo.




"Mipa zawng zawng hi kan inang vek lo ania, ka tina dawn lo che, hmeichhe dang angin ka en ngai lo che, nang chu i danglam" ka ṭhut pangai leh hnu chuan a hmaa a ṭawng ang bawk khan zawi deuh sup hian a sawi leh.




"Mipa i ring lo tih ka hria, mahse rintlak ka ni tih fiah ka duh, ka kut hi rawn chelh la, rintlak leh rin ngam ka nih zia i laka ka fiah phal rawh, ka tina ngai lovang che. Khapa teh hrep khan i rinawmna a hmu thiam lo tih ka hria, kei chuan a tih ang khan ka ti ve ngai dawn lo che, min rin zawh pauh leh min rin lehzual zel theihna turin ka awm zel ang. I lakah ka rinawm ve reng bawk ang, i rinawm thin ang khan" a tih chuan ka taksa chhung lamah hian che lawih a awm. A chhan pawh ka hrechiang viau.




(STORY HI A NAUPANGCHHIA PAWH IN LO TI MAITHEI A, MAHSE TUN ANG RENG HIAN A NAUPANGCHHIA LOVANG AW, AN INTAWN TANNA HI ZIAH NGEI A NGAIH AVANGIN A CHEHPAKAI ATANGIN KA RAWN ZIAK TAN A NI HI )

[Te-i Mrs Ambrose]

DÉSESPÉRÉ

By: Te-i Mrs Ambrose

Chapter 3


A chhan pawh ka hrechiang viau, ka thinrim vang a ni. Jayden hming an lam rik hlek tawh chuan ka mood a dang nghal vek ṭhin tih ka sawi tawh kha. Tinge Hmingthana hian Jayden chungchang hi a rawn sawi? Engtin nge Jayden nen kan chanchin a hriat theih zawk.




"Ngawi tawh rawh" ka aw chu a zawiin a chang ṭha viau. Amah ang ngat hi chuan ka nunhlui kha sawi ve lo se ka duh. "Tihthinrim tum chea sawi ka ni lo" a rawn ti a. "Mahse, ka sawi kha, mipa hi kan inang vek lo" a tih leh chuan "In inang lo, nang leh lek phei chu mipa awm tawh ho zawng zawng zinga ka rin loh berte zinga mi i ni" ka ti kha fak.




Mahse, ka sawi zawh rualin ka inchhir leh nghal. Khatiang khan ṭawng ka tum pawh a ni lo. Ka thinrim luatah ka sawichhuak palh a ni. "I thin a rim anih kha, inbengdai rawh" tiin ka ban chu a rawn hmer zeuh a, mahse a rei hran lo. Chutia a rawn tih avang chuan mak ka ti viau. Ka ṭawngkam avang khan a thin a rim ka rin tehreng nen, zaidam taka a la ṭawng thei chu a mak ka ti.




"Engtikah emaw hun min la pek ve theih ngei ka ring" ka beng bulah a rawn ti zawi deuh sup. Engmah a sawi tawh lova, kei chu awm nuam pawhin ka awm lo. Jayden nena kan inkar kha a hria tih a hriat a, hre lo se ka duh asin.




"Ka zun a chhuak, min lo zui teh u" Mampuii'n a tih chuan ka ṭhutna aṭangin ka tho a, Rovi pawh a rawn tho ve nghal thuai bawk. Kan pathum chuan bathroom lamah kan inzui tham tham hlawm a, a ṭhenin stall lam an pan ve deuh reng avangin mi kan inkal pel zut zut hlawm.




Bathroom chhunga kan luh chuan Mampuii chu toilet lamah a lut nghal a, Rovi erawh darthlalangah a inen ve thung. "Thla lakna tur zawng ang u" a tih chuan ka phur teh chiam lo. "Kan ṭhutna hmun kha chu a zia viau tho a, mahse mi an tam ve lutuk a, a zahthlak deuh sia" a tih chuan "Aw, ban dawnah, attandance dah hunah kan la mai dawn nia" tia ka sawi chu a pawm hmel khawp.




Mampuii lo chhuak chuan "stall-ah thil lei nghal daih ang u" a lo ti nghal a, kan lo "aw" nghal thuai. "Tlemin hmanhmawh deuh ang u, relay race an ṭan ṭep tawh ang" Rovi chuan a ti a, Relay race a awm dawn tih pawh ka lo hre ve lo.




Stall lam chu kan pan a, an ei tur zawrh hoah chuan kan duh zawng chu kan lam a, kan department stall lam aṭangin Arema chuan "Stall pawh chu in lo nghak ve duh bawk si lo" a rawn ti lauh lauh, "Naktukah ngei ngei" Rovi chuan a ti let ve bawk. "Promise" Arema bawkin a tih leh chuan promise kan lo ti ve a.




Naktuk chuan kan college auditorium lamah kan sports leh tawh dawn a, chuan a ni nga ni chu closing function leh miss/mister thlan a ni tawh mai a, naktuk na nâ na chu stall nghak ve ila a ṭha ang.




Kan ṭhutna lamah kan va let leh a, Hmingthana te ṭhian ho zinga mi Hruaizela chuan "fel min ti em? In ṭhutna kan lo vensak che u a" a rawn ti a, kei chu ka nui tawp. Kan ṭhutna ngaiah chuan kan ṭhu leh a. Relay race pawh an lo ṭan ṭep tawh.




"Ts, i tel ve dawn lo em ni?" tiin Rovi chuan kan hnung lam a hawi a, "Tel ve lovang" tiin ka hnung ami chuan a lo chhang mai. "In duh ve em?" tiin Rovi bawk chuan hnung lam ho chu a zawt leh. Liansanga chuan "duh ve e" tiin rang zetin a lo chhang a, midang pawh chuan an duh thu an sawi tliar tliar. Ka hnung chiaha ṭhu erawh chuan ka ṭhutna nghenchhan chu a rawn bawh leh tawhin ka hria.




Rovi chuan a thil lei pakhat zawk chu kan hnung lam ho a pe a, kei erawhin Mojito bak ka ken loh avangin pek tur pawh ka nei ve lo. Ka thil lei chu an siam tui ka ti viau, khaw lum nen chuan inrem tak a ni. A chanve vel ka fawp tawh ang tihah ka hnunga mi chuan "Nangmah chauha in i tum em ni? I pum a na ang" a rawn ti a, Mojito avangin ka pum pawh a la na ngai lo e a.




"Mojito pakhat lek hian pum a tina pha awm lo e" ka ti niah niah. "I hnunga mi hian ka in chak ve sia, mi eitur pawh sem lova mahni a an ei chuan an pum a na ṭhin" a rawn tih chuan ka nuichhuak hak mai. Naupang chhia reuh chuan.




"I duh te chuan lei ve mai la" ka ti a, ka la nui reng tho. "I intur lei anih vang khan alawm ka in ve chak" a thusawi avang chuan ka ngawi reng. "A straw hi ka fawh tawh hnu anih hi" ka ti ta sep. Midangin thil min dil hian ka pe lo hreh tlat zel. "A pawi lo" a tih tak zelah chuan ka in lai chu ka pe tawp. Hope a neih phah ang tih erawh ka hlau viau. Nge ni a amah pawh hi hetia pehhel reng lo hian ṭhianah ka siam ve mai zawk dawn emaw ni?




"Nichina i nuih ang khan nui reng ṭhin ang che" intur rawn ban pah chuan a ti a. Ka chhang let tawh hran lo. Dar thum a ri dawn hnai tawh. Football final pawh an khel mek tawh a, football hi chu ka tui hlawl loh avangin en pawh ka en mang lo. Kan hnunga ṭhute chuan naktuka an inkhelh dan tur an sawi a, Hmingthana te ṭhian ho hian Political science vek an core a, tunah pawh team khatah an awm vek bawk nen, an chakna chance a sang viau. An ṭhian ho ngat phei hi chu Mizoram aiawh te pawhin an lo khel ve fo tawh ṭhin. Kumin erawh an final year a nih ve tawh avangin kum dang angin an khel nasa lo zawk a, mahse inkhel lo tawp erawh an ni chuang lo.




SU lama hruaitute chuan attandance a dah theih tawh thu an rawn puang a, Rovi a phur tawh viau. "An kal sap sap hnuah thla chu la ang u aw" a ti a, a lo chak tawh em avangin keini pawhin kan lo hnial hran lo. SU ho awmna lamah an kal sup sup hlawm a, chutih laiin keini thian ho thung chu ṭhutna leh kan mawng an char bet ta emaw tih mai theih turin kan la ṭhu far hlawm.




"Attandance va dah ve ta che u" hnung lam hawi chungin Rovi chuan a ti a, Mampuii hi chuan Hmingthana te ṭhian ho hi biak a chak hmel lem lo a ni ang, a biak ve awm pawh hi ka hre ngai mang lo. "Ni e, kal ang u" an ṭhian zinga a tu emaw ber chuan a ti a, an kal ve ta nghal a.




Rovi chuan a phone chu a lek kang ta va va. Hmun rem lai deuh tur a melh kual nghal vat vat bawk. A duhna hmunah a phone chu a hung a, timer a set leh thlap hnuah kan bulah a rawn ṭhu a. Ani chu a hlim bawk a, a nui sang reng tawh.




Thla chu kan la ho mawlh mawlh a, a chang leh kan lan chhiat em avangin kan nui leh nghek mai ṭhin bawk. Keini ṭhian ho hi chuan ṭhian dang hi kan mamawh ve hlawl lo chu a ni. Kan pathum hian kan tlei tawk ve em em ṭhin.




"SU te pawh an haw ve duh tawh ang, attandance chu va dah ila" ka ti a, ka ding nghal tharh. SU ho awmna lamah chuan kan kal a, attandance kan dah zawhin stadium aṭang kan chhuak a, Mampuii chu an driver in a lo nghah leh reng tawh avangin driver in a lo nghahna lam chu a pan a. Kei leh Rovi erawh kan la haw lo. Rovi'n thla lak a la duh avangin hmun rem lai deuha a thla ka laksak a, min laksak a tih deuh tlat avangin pahnih thum vel chu min laksak ve hram.




Kan scooty dahna lam kan pan a, kan scooty dahna piah deuhah chuan Hmingthana te ṭhian ho chu an lo awm far hlawm. Rovi chuan min sik leh tawh, henu hian an ṭhian ho zingah star a nei emaw ni? A chang leh pangai takin a awm a, a bia a, a chang lahin tihian a awm leh chung zel.




"In hman ve tawh a" Biakhlua chuan keini pahnih min en pah chuan a ti a, Rovi zawkin a chhang a, "Eng atan nge kan hman leh hman loh chu intih a?" a ti tel hram. "In hnunga rawn tlan ve kan duh mai mai mawle" lehlam ami in a chhang sam et. "Ṭul lo reuh ve" ka hriat tawk lek hian ka ti a, engmah phei chu ka sawi tawh hran lo.




Ka scooty chungah chuan ka chuang a, ka tinung nghal bawk. Mipa ho pawh chu an bike-ah an lawn sap sap. Helmet ka khum fel hnuin ka bula ding hnenah chuan "Lo ṭhu kai tawh rawh" ka ti a, rang zetin a rawn lawn kai a, ka tlanchhuak nghal a ni mai.




In ka thlen chuan ka nu bak tumah an awm lo. "Nu ka pa hi a la bang lo em ni?" ka ti a, lo buk nghat pahin ka nu chuan "Vawiin chu teacher hovin meeting an nei a, a lo la bang lo anih hi" tiin min chhang a, "Ka lo pui ang che" ti daihin inthlak hmasa lo chuan ka nu chu ka pui nghal a.




Rawng kan bawl zawh chuan u Zorema a lo haw a, a chauh hmel khawp mai. "U, i va chauh hmel" ka ti nghal, couch a ṭhutthlak pahin "vawiin lamah case thar khawih tur ka nei leh nghal alawm le" a ti mai a, ka sawi loh takin, tunah chuan ka nu nen chokaa awm lovin sitting room-ah kan awm tawh zawk.




"I lo haw chiah em ni?" ka u chuan min thlek zawk chungin a ti a, lu thing nghat nghatin "a rei ve deuh tawh, ka la inthlak lo anih hi" tiin ka ding hluai. "Inthlak lovin ka rawngbawl min pui nghal anih kha" nui var var chungin ka nu chuan a ti a. "Kan naute hi chu a fel anih hi" ka u chuan a ti sup.




"Anih ka va inthlak dawn" tiin ka pindan lamah ka lut a, ka bag ken lai chu ka khumah ka dah a, ka phone charge-in inbual turin bual in lam ka pan nghal. Chhun lamah eng mah ti lo mah ila, ni sensa hnuaiah kan ṭhu deuh chawrh chawrh si a, bal ta riau tein ka hria.


_______________________________________



A tukah chuan kan lo sawi tawh ang ngeiin kan department Stall-ah kan ṭhian ho chuan kan ṭhu ve ta ran hlawm. Drink ṭhenkhat leh cup cake tih vel an zuar a, drinks chu a siamtu bik an awm a, keini ṭhian ho chuan pawisa lo dawn leh kir vel chiah kan ti.




Kan stall awmna lah an sawn a, vawiin hi Basketball khelh ni tur a ni a, basketball khelna tur sir lam deuhah stall chu an sawn a, inkhel ho kan hmu fiah thei dawn ngang mai. Heta an rawn sawn chhan pawh kan college-ah hi chuan basketball inkhel ṭhin ho hi an ngaisang hlawm a, Hmingthana te ṭhian ho an nih ber chu. An inkhel an en chak fur dawn a, inkhelh laia ei tur hnai tea awm chu miin an dawr hnem dawn tih an hriat avanga heta rawn insawn hi an ni.




Basketball khelh a hun dawn hnaihah chuan ballers ho pawh an rawn in warm-up ṭan a, kan house ho chuan jersey dum an rawn ha a, an sang ṭha hlawm bawk a, hmuh hrehawm lo tak an ni. Tuna Hmingthana te ṭhian ho zingah hian Biakhlua hi a sang ber a, 6'4 a ni a, Hmingthana hi chu Biakhlua aiin inches khatin a hniam zawk. Ka hriat viau chhan pawh Rovi hian college kan luh tirh vel khan an height vel mi dangte zawtin keini a ṭhiante hi min hrilh reng ṭhin vang a ni.




Kan house ho chu an khel hmasa ber a, an khelhpui ho chuan an khan lo ngang mai. Awlsam zet zetin kan house ho lam chuan an tilut zung zung. Kei pawhin ka ṭhutna aṭangin a changin ka thlir ve leh zeuh zel.




An chak a ni ngei ang, kan house ho lam thawm chu a ṭha viau. House dang an intum leh a, kan house a tui vel sem ṭhintute chuan kan stall lamah lo kalin drinks chu an rawn lam a, eng nge ka hriat ni, drinks tam tak nena an kal lai chu ka en zui reng. An drinks rawn lei chu a inkhel zo chiah Hmingthanaa te ṭhian ho chu an pe a, a petu te chu 3rd semester lam deuh vek an ni a, an laih hmel hlawm kher mai.




Kan players ho pawh chuan an lo la ve mai a, an chak bawk a, an nui vur vur hlawm. House dangah pawh hian players ṭha chu an awm ve tho a, mahse state aiawh te a chhuak pha ho chu kan house-ah an awm deuh vek a, chuvang te pawh chu a ni ang, Hmingthana te ṭhian ho chuan an huphurh loh hmel hlawm khawp mai.




"Sports zawh lamah chuan tuna kan hmelhriat kan hmuh zeuh zeuh ṭhin ang te ho pawh hi kan hmu khat tawh awm sia" Mampuii chuan hma lam en reng chung hian a ti a, ka ngaihtuah a, kei pawhin dik ka ti viau. Sports zawh lamah chuan zirna lamah kan insawrbing leh tawh ang a, keini 5th semester lam chuan major subject chiah kan neih tawh avangin department dang nen kan inchiahpiah leh tawh lovang a, kan department bik ho kan inhmu reng ang a, department dang chu kan building a awm ho leh canteen vela kan tawh ho bak kan hmu leh vak tawh dawn lo.




"A ninawm leh ngawt ang" Rovi pawh chuan a ti ve a. Kei chuan engmah sawi ve lo mah ila, ka ṭhiante thusawi chu ka pawm viau. "Arem, kan awm ve avangin in hlawk pah ta em?" Rovi chuan intur siama lo buai mek Arema chu a bia a, ner deuh suk chungin "hlawk a ni mai e" tiin pakhat zawk chuan a chhang a. Arema hian Rovi a ngeih lo vang ni lovin an innel lutuk vang zawk a ni.




"College miss tur atana Mawipuii tel ve duh lo hi ka ui" Arema chuan a ti zeuh. "Chutiang ka duh teuh lo mai" ka lo ti hlak. "Ni e, miss an thlan tur zingah hian tel ve duh sela chuan crown chu a ta a ni mai" lehlam aṭang tu emaw hian a lo ti a, kan en chuan Jb-a a lo ni. "Theitui kha pakhat in ka lo duh ang" a ti leh nghal zat bawk.




"Kha, i hria maw, miss a i tel ve duh lo hi chu mi ṭhenkhat chuan pawi an ti viau asin" mithmul kan euh euh chungin Arema chuan a ti a, "a zahthlak e a" ka ti ringawt. Mite hriat nih ai chuan lowkey deuha awm hi a nuam zawk daih. Mi mit fukna nih reng hi thil nuam anih pawh ka ring lo.




Jb-a intur la zo chuan pawisa min rawn pe a, a nui deuh reng a, Jb-a hi hmeichhe duh deuh tur ang chi a ni a, ṭhenkhat ina Korean vibe an tih ang deuh kha a ni. Ngo ving veng, sa pawh ṭha ve tawk tak niin a sang ve hle a, ani hian Volleyball a ve beng/khel ṭhin a, a tel tawh chuan mi mit a la viau zel, a nuihmel hi a cute pui daih a, mi tamtak luan ralna tham chu a ni ve.




"A stall a ṭhute hian in zir anih hi, vawiin chu drinks pawh a tui" tia nui leh sukin a kalsawn a, "kan college a kal mipa tam zawk hi chu an ler viau hlawm anih hi" Mampuii chuan a ti hlak. "Nang ang em em a mipa ngei ngah hi ka la hre lo. Mipa zawng zawng hi i ngei deuh vek ni maiin ka hria" Rovi'n a tih chuan a malah ka lo sik hlak.




"Mipa hi rinawm miau hek lo" tiin Mampuii chuan a chhang mai. Tlai lam dar hnih dawn velah chuan basketball khel ho pawhin final an khel dawn tawh a, kan house ho in warm-up mek ho hmelah chuan zam hmel hmuh tur a awm hauh lo. A hmaa jersey dum ha khan tunah chuan a var an ha tawh a, an hmuhnawm tham leh viau.




Hmingthana nen kan mit a intawk leh chat tawh a, a kiai suk a, basketball court lam hawi nghalin ball chu a tilut nghal zat. An inkhelh an tan chuan Hmingthana chu lut ve nghal lovin a la lut lo ho ṭhutnaah chuan a ṭhu a, a phone phawrhin eng eng emaw hi a hmet kual nauh nauh. Eng vanga hepa hi en zui reng ṭhin nge ka nih pawh ka hre lo e a.




A hnu chuan a bengah a phone chu a chuktuah a, ka phone a lo rik chuan ka en a, Hmingthana hming a lo lang va mai, amah chu ka va en leh nghal a, a hmui phunin eng emaw hi a rawn sawi a, mahse engmah phei chu ka hre hran lo.




Ka phone chu ka chhang lo phawt. A rawn call nawn leh pawh chuan ka la chhang chuang lo. A vawi thumna atana a lo call leh chuan ka chhang a. "Induhnu" a lo ti nghal thawr. "Ngawt a che" ka tih chuan "Vawi khatnaah hian i pick nghal duh ngai lo" a lo ti leh a.




"Sawi duh i neih chuan sawi rawh" ka tih deuh hmak takah chuan "duhsakna min hlan ve la" a rawn ti a, mawi zetin a rawn nui bawk. "I mamawh kher emaw ni?" ka tih chuan lu a bu nghut nghut. "Anih best of luck" tiin call chu ka hang up a, ani pawh chu a nui leh suk suk tawh.




Hmingthana ka lo en leh ṭhin avang chuan ka awm pawh a nuam tawh lo. A hnu phei chuan basketball court lam pawh chu ka hawi duh ta lo. Hmun dang chu ka en kual vel daih. An inkhelh zawh dawn lamah chuan ka en leh ta tho a, chutah chuan an captain Hmingthana pawh a lut leh vang tawh a, kan house lam ho point chu a sang tawh hle. A hnu chuan rin lawk ang nge nge in an chak ta a.




Midang chuan an lawmpuina thu an hlan sap sap hlawm a. "Duhsakna min hlantu cial tak avangin kan chak mai mai alawm" Hmingthana'n a tih chuan a ṭhiante'n a darah an beng dat dat hlawm.




Zan lamah chuan ka rin loh lutuk tak maiin Hmingthana te ṭhian ho an lo leng a, ka nu te'n min lo koh khan mak ka ti hle anih kha. Ka nu leh pate chuan rei lote an bia a, pindan lamah an luhsan a, u Hminga chuan assignment check tur a neih avangin pindanah a awm a, u Zorema erawh ṭhut pindanah a ṭhu ve reng.




"Thingpui ka lo lum ang che u aw" tiin ka ṭhutna aṭang ka tho a, Hmingthana chuan u Zorema chu a melh leh zeuh ṭhin tih ka hria, a lungawi hmel vak lo zui. Hepa pui hian ka u hi ka bialpa emaw a la ti reng emaw ni?




U Zorema chu rawn ding chhuak vein "Naute, kei chuan ka duh ve lo mai aw, tikhan i ṭhian ho hi i lo kawm dawn nia" tiin a pindan lamah a phei a. Kei pawh choka lama lutin thingpui ka va lum a, thingpui nena sitting room lam ka pan chuan min lo en ṭhap hlawm.




Thingpui chu ka sem hlawm a, an ep chiaha ṭhutnaah chuan ka ṭhu a, "Rin loh deuhin in lo lang thut a" tumah an ṭawng lem loh avang chuan a ṭawng hmasaah ka ṭang a. "keini pawh kan lo inring bik hleinem, kan tlangvala pui hian lo len a ti deuh thut a" tiin Liansanga chuan min lo chhang a.




"Officer kha i u em ni?" Hmingthana chuan chik zeta min en chunga a tih chuan ka bu nghat. "A hmaa ka zawh che khan min hrilh tur che alawm," a aw rik danah chuan min dem deuha ka hriat tlat chu. "Ka bialpa angah i ngai hmin hmak anih kha" tiin ka chhang ve mai. "Bialpa i nei lo tih hriat chu a nuam hle mai" tih pahin thingpui chu a in nghal khawlh.




Ti ti han vaivir tu tur pawh an awm lova, kei lah ṭawng bawrh bawrh mi ka lo nih bawk si loh avangin sawi tur kan tlachham tlang viau. Thingpui an in zawh chuan an inna no kan seng a, choka lamah ka va luhpui leh. Thingpui no chu ka sil nghal sawk sawk.




Ka va let ve chuan an ṭhian ho chuan eng emaw hi an lo sawi mial mial hlawm a, ka awm tih an hriat veleh an ṭhu ṭha nghal vat. "Vawiin lamah in inkhel chau awm sia" ka tih chuan "duh zawngte hmuh nan chuan chauh pawh a sawi theih loh" Hmingthana chuan a lo ti zeuh. "Ni e, nangmah a hmu che a, a chauh vena te pawh kha an dam fel nghal hmak" Biakhlua chuan a lo ti ve bawk.




"Inti awm ang lo thei emai" ka ti thla rawk. Ka ṭhian pangai pawh an nih si loh avangin sawi tur ka hre mang lo reng reng. "Pawnah mei kan va zu lawk ang" tiin Biakhlua leh Liansanga chu an inzui chhuak a. An tactic vel chu a naupanchhiatthlak ka ti tak tak.




Hmingthana nen chauh chuan kan ṭhu ta vang mai a, ka zam deuh riau. Inleng hi ka nei ngai lova, hetia an rawn leng thut pawh hi sawi tur pawh ka hre lo. Hmingthana chuan ngunthluk zet hian min en a, min tizam vek mai dawnin ka hria.




"Mawipui, ka duh che" zawi deuh tak hian Hmingthana chuan a rawn ti a, hmai chhana chutiang thu min hrilh vang chu nge, dawnsawn dan ka thiam meuh lo. Phone kaltanga induh thu inhrilh leh a tak, hmaichhan ngeia induh thu inhrilh lo danglamzia ka hre ve chiahin ka hria.




"A hma pawhin ka lo sawi fo tawh ṭhin, ka hmuh tirh che khan ka mit i la nghal a, hriat chian che ka chak a, I chanchin ka ngaihven a, ka hrechiang chho zel che a, ka hriat chian pauh che leh ka duh zual zel che" a hmelah chuan dawt sawi hmel ka hmu lo.




"Khawngaihin hun ṭha min pe ve turin ka duh che, min fiah la, i tan englai pawha awm reng ka duh? Nangmaha rinngam lohna awm zawng zawng kha ka tihrehsak che I phal em?" tiin chiang zetin ka mitah a melh a, a mitmengah chuan mahni inrintawk lohna ka hmu theiin ka hria.




"ah, hmaichhana chutiang han inhrilh tawp te chu a" ka ti nawi niah mai. Awm dan tur pawh min ti hre hleinem le. "Tunah min chhang turin ka ti dawn lo che, mahse vawikhat tal lo inngaihtuah ve chhin la" a rawn tih chuan ka bu zeuh ringawt tawh. Awm dan tur ka hre lo, ka pindana awm daih mai ka duh.




Kan pahnih chuan kan ngawi deuh reng a, "Keimah min ring ngam lo pawh a ni maithei, mahse, hmeichhe dang angin ka ngai ve lo che ka tih tawh kha, ka fiam kual lovang che" kan ngawih deuh vang vang hnu chuan a rawn sawi leh hram.




"Chutiang lam chu sawi tawh rih lo teh, awmdan tur ka hre lo, hmaichhanah i sawi reng bawk sia, ka awm thiam lo" ka ti thlawt. Hmaichhanah hetiang anga chiang hian tu mipa mahin ka pian tirh ata min la bem ngai lo.






Hmingthana chu rawn nui sukin "Nangmah berin i duh loh te chuan" tiin engmah a sawi zui ta lova, awm a nuam ve ta deuh. Mahse, ka ṭawngkam khan a nuih a tiza deuh emaw ni, a khi leh suk suk zel. Kei pawhin ka ngaihtuah chiang a, ka zei loh hmel ka inti thar ngawih ngawih. Zei deuh anga lan ka duh a ni hran lo. Mahse, tuna ka chhan dan kha chu mi zei lo lutuk, mi nuih tiza zawnga zei lo kha ka ang ka inti.




A hnu deuha Liansanga leh Biakhlua chu an rawn lut a, rei pawh an ṭhut hmain "kan va haw tawh mai dawn em ni ang?" an ti a, Hmingthana a buk nghat nghat takah chuan an ding a, kei pawh ka ding ve nghal. "La leng ve rih ula, a la hma alawm" ka ti mawi ve a, hetiang ṭawngkam hi chu inleng nei ten an hmang ve ṭhin tih ka hria a, ka hmang ve tawp mai.




"Zan dangah I phal chuan kan lo leng leh dawn nia" Liansanga chuan tiin an kal a, an hnungah chuan ka zui ve dat dat. Kei hi hmeichhia ah chuan a sang pawl tak ka ni ve a. Mahse, Hmingthana te ṭhian ho bulah chuan ka lang te vek thei.



Kawngka thleng chuan ka va thlah ve a, Liansanga te chuan an bike awmna lam an pan nghal mai a, Hmingthana erawh a ding chut, ka lama rawn inherin "Min fiah dawn nia, i fiahna ka paltlang zo lo anih chuan ka rawn be buai tawh lovang che" a ti a, a bike awmna lam chu a pan ve ta nghal a.



_____________________________________________



__________ZAWMNA____________



Hmingthana te ṭhian ho haw hnu chuan kawngka ka kalh a, ka pindan lamah ka lut ta nghal bawk. Ka ngaihtuah chian pauh leh an lo leng kha mak ka ti tulh tulh. Ka beisei loh lutuk vang te pawh a ni maithei.





Ka phone ka en chuan kan house group-ah naktuka closing function kan neih turah keini ṭhian thum ho chu usher tur zingah kan lo tel ve a, ka phur lem lo khawp. Kan ṭhian ho group-ah pawh chuan an lo sawi mek a, ka va ṭawng ve chuan *a rawn lang va ta hram alawm* Mampuii chuan a lo ti nghal a.





Naktukah usher ho chuan kawr var hak tur tih thu vel chu an sawi a, min lo ruat ve kher kher chu pawi ka ti. Ṭhut ve der der te kha nuam ka ti asin le.





Private message ka dawng a, ka ṭhiante nen kan ṭawng tui em avangin en pawh ka en lo, kan nawi zawh meuh chuan a lo tlai ve duai tawh. Message lo thleng kha ka en chuan Hmingthana hnen aṭangin a lo ni.





Message chu ka open a, *Ka thilsawi kha lo ngaihtuah zui la* tih leh *Muttui* tih hi a ni a, hepa hi a taka a ṭawng thui ang aiin message ah a ṭawng bul viau zel. A chang chuan a thinrim ta emaw tih mai theih turin a message a tawi fel ṭhin.





Ka seen tih a hriat chuan typing... tihih a rawn chhunzawm a, *Ka message i seen har hle mai* tih te mai hi. Insawifiah ka ba pawha ka hriat lem loh avangin ka chhanglet hran lo. *Induh viau zel suh* tih a rawn thleng a.
*Ka bialnu hual* a rawn tih tel hram avang chuan sticker hmel chhe deuh hi ka va thawn a. Ani lah chuan Love per chhuai sticker hi min rawn thawn let leh ngat anih chu.
*Muttui* tih ka thawn ta daih a,
*Ka bialnu hualin i rawn sawi si a, ka muttui ang* tih a rawn thleng a, ka chhang zui tawh lo.




Hmingthana hi phone a a mizia leh a taka a mizia hi a inperhsan ka ti viau ṭhin. Tin, a ṭhian ho kianga a awm lai leh amah chauha a awm lai mizia pawh a dang leh hlawk tho. Phone a a mizia aṭanga han teh mai chuan ṭawng bung, chapo hmel lam leh zam lo deuh angin a awm a. Englai pawhin a ni kher lo.. A chang chuan a nuihzathlak a, mi hnial a hrat a, a tam zawkah thung erawh chuan a ṭawng bung a, a lan chapo hmel vek ṭhin.





A ṭhiante kianga a awm lai chuan zah hre vak lo leh mahni indahsang ang takin a awm leh bawk, mahse amah chauha ka hmuh lai hi chuan mipa dawhthei tak leh insum thei tak, ngainatawm tak angin ka hmu ṭhin.





College kan thlen chuan auditorium lam bawk kan pan leh a, auditorium chhungah kan luh chuan midang usher ve turte pawh chu an lo thleng deuh vek tawh. Ṭhutna kan rem dan tur te min hrilh hnuin kan dinna tur ṭheuhah kan ding a, college zirlai ho pawh an lo thleng ṭak ṭak hlawm.





Keini chuan an semester wise in an ṭhutna tur kan lo kawh hmuh zel a. Hmingthana te ṭhian ho lo kal chu ka hma lama ding Mampuii chuan an ṭhutna tur a lo hrilh ve teh mial a, Hmingthana te ṭhian ho a be ve chu mak pawh ka ti zawk.





Tunah hian stage hnungchhawn zawngin kan ding a, midang lo lut ho chu ṭhutna tur kan lo kawhhmuh zel. Hmingthana te ṭhian ho ṭhutna chu ka dinna aṭang chuan an langsar khawp mai. Hmingthana lah chuan hmui phunin "I nalh lutuk" a lo ti a, ka nuih tawp. Hepa hi kawm a nawm phian dawn hi a.





Zirlai leh zirtirtu te pawh an thleng kim thawkhat tawh viau a, hun pawh an ṭan tep tawhin ka ring. Keini pawh kan ṭhu ve thei tep tawh ang chu. Kan ṭhutna tur zawn velah theuh kan ding hlawm a, mahse ka ṭhiante nen erawh vawiin chhun lam chu kan ṭhu ho thei dawn lo anih hi. Afternoon session lamah chuan ṭhut ho ngei kan tum thung.





Hun an ṭan chuan ka ṭhutna turah ka ṭhu a, usher ho chu kan ṭhutna a lawr deuh bik avangin nuam pawh ka ti lo. Hunserh an hman zawhin item awm ang ang an inko nghal zel a, boruak a zangkhai bawk a, hun pawh a ral ve zung zung.





Lunch dawn hnaihah chuan keini ṭhian ho chu kan ṭhutna aṭangin kan tho a, inhmuhna tur kan sawi lam kan pan nghal bawk. Kan inhmuh chuan a hma pawha inhmu tho si kha kan han innuih leh rih. "Tunge usher zei ber?" tiin Rovi chuan mit hmul a kan euh euh.





"Usher a ngai tawh lo tur pawh ho thil nuam a ni" phar deuh hluai pahin Mampuii chuan a ti a, kei pawhin thlawp zetin ka bu nghat nghat. "Kan pathumin kan ṭhu ho duh dawn tih pawh an ngaihtuah lova, min usher tir vek ringawt a" Rovi a lungawi lo thar pek.





Mahse, kan pathum chuan kan nui vek tho a, chaw chhun ei tur chu canteen lamah daih kan va lam a, nidangah chuan stall hrang hrang an hawng a, chhun thil pawh a hran paa lei a ngai ngai hran lo, mahse, vawiin erawh closing function a nih avangin tu mahin stall an hawng tawh lova, canteen lamah kan va lam phah ringawt.





Canteen leh auditorium awmna hi a inhlat ve a, kal deuh hrep a ngai. Tunah canteen aṭangin kan let thla mek a, Hmingthana te ṭhian ho lo chho mek nen chuan kan intawk a, an ṭhian ho chuan mi an nuih vur vur hlawm, a hmaa ka hmuh ang pawh khan ka hmu tawh chiah lo.




"Mawipui, ka chik che a, Ts-a i en dan hi a dang riauvin ka hre tawh" Hmingthana te kan kal pelh hnuin Rovi chuan a ti a, "I ti awm lo e a" ka ti chiam ringawt, mahse ka inngaihtuah a, nidanga ka en ang ngawt kha chuan ka en tawh lo tih ka hria, ka duh ve ta deuh e ka tihna a ni lova, a hmaa ka ngei ang khan ka ngei tawh lo, eng tikin nge Hmingthana ka ngainat lohna te leh ngeina te kha an bo pawh ka hre lo, zawi zawiin ka nem ni berin ka hria.





"Kei chuan ka duhpui miah lo che" aw ki dam vak lovin Mampuii chuan a ti a, "ringawt zel a" Rovi chuan a ti deuh hmak. "Nang pawh hi, Ts-a i ṭan thei riau mai, a lo thlem vel che hi a ni lo maw? Mawipuii tihpui tur chein a lo bia che a mi" Mampuii chu a lungawi loh hmel viau ringawt tawh.





"Min va puh mak ve, Mawipuii hian a nunah mipa dang seng ve se tih hi ka duhsak, nang chuan a nunhluia awm reng turin i duh anih kha, a hma khua ngai ber awm ziazangin i awm a, a hmakhua hi i dawnpui tak tak pawhin ka hre lo" Rovi pawh a thinrim hmel ve tawh viau.





"Amak, keimah avang hi chuan buai ṭhin lo teh u" ka ti hlak ringawt. Ka ṭhiante pahnih rilru inang lo lutuk hi chu an inhnial phah ziah. An pahnih chuan an ṭawng tawh lo tawp a, kan boruak chu a pik churh mai. A nuam pawh ka ti lo.




Chaw chhun kan ei hnu pawh chuan kan boruak chu a la dik thei lo. "Mipa pakhat lek avanga han buai, a mipa ber lah chu kan tan tumah a la ni lo zui, kan ṭhian ho inkar tichhe thei tham tur khawpa mi pawimawh pawh ni lo avang khan thinrim tawh lo teh u" beidawng zet chuan ka ti ringawt.





Tlai lamah chuan kan ṭhian ho boruak pawh a ṭha ve tawh viau. Ṭhian ho inkar ber a buai tawh hi chuan a lo hrehawm ṭhin em a, kan boruak a pangai leh chu nuam ka ti viau.





Ban a hun chuan Mampuii chu a kal hmasa a, a ngai te tein Rovi nen scooty awmna lam kan pan hnak hnak, kan scooty hunna bulah chuan Hmingthana chu amah chauhin a lo ding a, min hmuh rual chuan a tih ṭhin dan ang bawkin a kiai suk.





"Awi, min lo nghak lawk rawh, ka va zung leh lawk dawn" tiin Rovi chu a kalsawn nghal daih a, engmah pawh ka sawi hman lo. Lai zetin ka ding ringawt. Dinna ngaia din reng theih ni hek lo. Scooty awmna lamah chuan zawi muangin ka pen a, Hmingthana'n min en reng avang chuan "I ṭhiante khawiah nge?" ka ti ringawt.





"An haw tawh, ka lo nghak che a" a tih chuan a chhan tur awm pawh ka lo ngaihtuah thiam lo. "Ka lo thlah ang che" Hmingthana chuan tiin a lu a han hiat zeuh ringawt a, a lai deuh emaw ni. "Hawna tur ka nei sia" ka ti ringawt. Ka zam ve deuh riau chu le.





"Anih zan lamah ka lo bia ang che" a tih leh chuan ka chhang tawh lo. Amah ka hrechiang ve deuh zel a, hmeichhia ina an duh viau ṭhin chhan kha ka hre chho ṭanin ka hria. A hmel a ṭha vuak tia sawi tur ni mang si lova zun nei ru zet mai te, a mizia leh hawiher velah hian hmeichhia te hi an lungliam ṭhin anih ngei ka ring.




Lu thing nghat nghatin "Min lo hnaih tawh suh, kei chuan i duh ang chhanna ka pe thei dawn lo che, chuvang chuan midang zawng leh zawk tawh rawh" ka ti thawr. Ka hnaih telh telh chuan kei pawhin duh hun ka nei dawnin ka hria. Lo duh ve ta ila, a infiamna atan mai mai min hmang ang a, chu lo rengah, ṭhiante'n min duhpui loh ngaihzawng neih chu thil hrehawm tak a ni. A la tawng lo chuan in hrethiam kher lovang, mahse a lo tawng tawh tute chuan a nawm loh zia leh kan dinhmun hrehawmzia in hre ve tho ang. Kan ṭhian leh ngaihzawng inkarah duh thlan a ngaih chang a tam a, a tu a ve ve pawh tihhrehawm leh tihnat kan hlau a, a chau ber chu keimahni kan ni ziah. Chuvang chuan Hmingthana hi chu hnaih lo tawp ila ka tan a ṭha ang.





"I thilsawi tawh ho hi chu ka zawm zel ang ka lo ti rilru ṭhin a, mahse tuna i sawi kha chu ka hre lo ni mai teh se" a tih chuan ka meng deuh kawk ringawt. Khatianga min chhan pawh kha lo ka ring lo hrim hrim.





"Thildang, nangmah kuah tur che te , i lam rawn pan tur chein leh thildang duh i neih chuan min hrilh la, ka tihsak vek ṭhin ang che, mahse tuna i sawi kha chu i ka aṭanga chhuak mah ni se, ka zawm lo mai ang" a ti leh duah. "Duat tur chea min tih phei chuan ka duat ngawt ang che" tih zawm leh hramin engmah ka sawi hmain a kalsawn ta daih. Ka dinna ngaiah ka ding reng ringawt.





"Eng nge in lo sawi?" ka hnung lam aṭanga Rovi'n a lo tih chuan ka lehhawi nghal a, "Tinge i lo kal hman thawt thawt" tiin a banah ka chum nghal vak ringawt. "I zei lo si, chance ka pe ve che u anih kha" a tih chuan ka ngei reuh tak tak.





"Hmingthana hi tinge min duhpui em em a?" ka tih chuan "A hmelṭha a, ka ṭhiannu tan te chuan mipa hmeltha bak ka duhpui hleinem" tiin a nui deuh har har, "dik tak chuan, Ts-a hian a duh tak tak che niin ka hria a, hmeichhe tan chuan kan mi duhte aiin min duhtu an hlu zawk an tih fo hi" a ti a, chu thu kher chu dik ka ti ve viau.





"Mampuii'n min duhpui lo si, hetianga kan ṭhiante'n min duhpui loh em em ngaihzawng neih chu thil nuam pawh a ni ngai lo" ka ti hap. "Engmah pawh hre lovin a duhpui lo ve hlur ringawt che anih kha" Rovi chuan a ti hlak. "Chu lovah kei pawhin a lakah eng feeling mah ka neih loh hi, haw ang" tiin scooty chu ka start a.





Rovi pawh rawn ṭhut kai pahin "Feeling te chu a in-develop chho zel mai dawn alawm" a ti sam then. "Aw, ngaihzawng te han nei phawt la, ka ngaihzawng tur chu kan la buaipui chauh dawn nia" tiin ka tlanchhuak a.





Sports kan zawh hnu chuan a ngai ang bawkin zirna lamah kan insawrbing leh tawh a, a nuam zawk zawk lo khawp mai. Hmingthana te ho nen hian building khata kan awm loh avangin kan inhmu khat khawp mai. Keini in Economics kan core laiin anni ṭhian ho ve thung chuan Political science an core thung a, kan inhmu lo chu a lawmawm ka ti dawn nge pawh ka hre lo.





Ngaihzawng dang a neih thu hriat tur a awm ngai lo, kan inhmuh changin a ṭhiante thlengin ṭha takin min be hlawm ṭhin a, mi ṭhenkhat phei chuan min sawi sap sap tawhin ka hria, ka lo ngaihbel pawh a ni thei tho.





Sports kan zawh aṭang khan thla khat vel lai a liam tawh. CAT a hun dawn tawh a, tupawh mai chu kan ṭang tlang em em vek. Hmingthana chuan a khat tawkin whatsapp lam aṭangin min lo be leh nawlh ṭhin a, a thiltih turte min rawn hrilh thlap a, a ngaihzawng ang hian min cheibawl ni maiin ka hre ṭhin.





Mahse, englai pawhin min rawn be tlut tlut lova, ka nin dawn ṭepah chuan a reh leh veng veng zel. A hnu feah min rawn be leh nawlh ṭhin a, a tir chuan a awmdan avangin ka ngei dawn dawn, induh hun a hre riau a, mahse, a reh rei ve tak tak tawh chinah chuan a message hi tum loh deuhin ka lo nghak ru leh ṭhin.





Ka awmdan chu keimah ngei pawh chuan ka duh miah lo, ka duh chho dawn niin ka hria, a theih hram chuan Hmingthana hi chu duh loh ka duh. Mahse mihring hi kan nun ngeiah pawh hian kan thu lo si a le, kan duhthua mi va duha duh lo thei kan ni si lova, a ni telin Hmingthana chu ka duh chho ve zel niin ka hria.





Ṭha taka min rawn biak changte hian nuam tihna chin ka nei tawh a, a thiltih tur min rawn hrilh thlap thlapte chuan awm a tinuam veng veng tawh ṭhin. Mampuii chu eng vak mah ka sawipui ngam lo, Rovi erawh ka hrilh ve zeuh zeuh ṭhin a, ani chuan min phurpui viau zel.




CAT 2 (continuous assessment test) kan ṭan leh a, lehkha ka zir ngawrh ve deuh a, ka phone pawh ka khawih khat khawp mai. Ka phone ka khawih ve chhunah chuan message pakhat hi ka zawng ru ngei ngei a, mahse ani erawh a tih ṭhin dan angin a reh leh hmak tawh. A chetdan hi ka ngei ṭan dawn dawn. Hetianga induh leh tho tur si chu min lo biak loh law law mai tur hi a nia.





CAT kan zawh ni chuan Rovi nen kein kan haw a, a hla viau na a, kan ban hmat tho avangin kein kan kal tho, nizan lamah kan lo rel fel tawh a, kan lirthei kan keng lo ve ve a, kea haw kan tum sa hrim hrim a ni. Dawr pakhatah Rovi nen chuan kan chawl a, kan chawlhnaah chuan midang an tam lutuk lem lo.





Ei tur chu kan chah a, a lo thlen chuan kan ei nghal. Chutia kan ei lai chuan ka bula ṭhutna hi tu emaw chuan a pawtchhuak a, a ṭhu nghal bawk. Ka en chuan Hmingthana a lo ni reng. Mak ka ti takzet , engtin nge hetah a lo kal theih. Rovi ka en chuan mak ti hmel pawh a pu ve lo, a lo nui vur vur. Hmingthana chu ka en leh a, ngun zet hian min melh a, nidanga ka hmuh hmaih ṭhin a ṭhatna te chu ka hmu chiang kher mai. Miin an lo duh viau ṭhin pawh hi a awm ka ti hliah hliah tawh.




A lo lang hlawl chu ka hlim hman, mahse ka thil ngaihtuah chhuah avang chuan ka nui lai chu ka tawp a, ka thin a rawn rim a, Hmingthana chu ka melh nghek ringawt.

[Te-i Mrs Ambrose]

DÉSESPÉRÉ
By: Te-i Mrs Ambrose


Chapter 4


"I thin a rim em ni?" tiin zaidam tak hian min bia a, ka chhang duh teuh lo mai. A duh hun hunah min induh khum a, a reh hmak a, a rawn lang leh thut ṭhin a, ka lung pawh a awi zozai tawh lo. 'Ka duh che' min ti tawhtu zingah chuan a la induh thiam ber.




"Ka Duatlai la ni tur nu hi a thinrim em ni?" a ṭawngkam a dam thlup reng. "Biak pawh min be suh" ka lo ti hmak. Hmingthana chuan min en reng tih ka hria, mahse ei tur chu ka eisan hmak. Rovi chu ka be leh zeuh ṭhin a, Hmingthana erawh a awm ve tih hria ang pawhin ka awm duh lo.




"Mawipui" ka sir lam aṭanga a rawn tih deuh dut chuan rum tawk hian ka melh a, "dawhkan lo kil ve tur che a kan sawm lai che pawh ka hre lo" ka ti hmak. "Washroom lamah ka va kal lawk teh ang" Rovi ding tawh hnenah chuan "La kal suh" ka ti deuh hmak. Rovi lah chu a ding laklawh tawh bawk si, pawsi lai zetin a ding reng ringawt.




"I duh chuan ka rawn let hunah min hau mai dawn nia" tiin min kalsan daih, a kal pawh a ni lo, a tlan a ni mah zawk. Ka eitur ka ei zawh tawh hnu chuan fian pawh la dah thla lovin ka hum reng. Hepa chungah hian eng vanga thinrim ve em em nge ka nih le? Ka titau tihna zawk emaw ni?




"Tihdik loh ka nei em ni?" tiin Hmingthana chuan ka ṭhutna chu a lamah a pawt hnai deuh a, midang tu mah chuan min care lem lo. Ka chhang lo hrim hrim, hepa lakah hian ka titau ngam tawh anih chuan ka lo duh ve tawh hle tihna a ni mai ang em? "I lung tih awi lohna ka neih chuan sawi la, engkim ka siamṭha ang" ti lehin ka kut a ka ken lai fian chu a rawn la a, thlengah chuan a dah nghal bawk.




"Hey, min be ve tawh la, ka chetdan eng ber khan nge i lung ti awi lo, sawi la, i lung tiawi lo tur zawngin ka che tawh lovang" tiin ka kut a rawn chelh a, ka phih let rang kher mai. "I duh duh huna i biak a, i duh hun apianga i rehsan tur pawh ka ni lo" ka ti hmak. Hmingthana chu a rawn nui chhuak hawk a.




"God, chu thil tih lo chu lungawi lohna i la nei em?" a tih chuan ka lu thingin "tikhan induh reng rawh, tunah pawh hian reh leh hmak la, min rawn be tawh suh" tiin hnuai lam ka melh ngar ngar. "Min en teh" a tih chuan ka en duh teuh lo. "Ka tihpalh, ka rehsan tawh lovang che" a rawn ti a, ka kut bawk chu a rawn ban leh, ka tihdan ngai ang bawkin ka pawt let leh.




"I reh leh reh loh hi eng atan mah ka ti lo" ka ti leh. "Sorry, a thleng nawn tawh lovang, lungawi lo tawh lo la" tiin ka khabeah a dawm a, amah en thei tur chuan min kuai dak a, "dawra awm kan nih hi" tiin a kut chu ka vaithla nghal vat. Mahse, amah chu ka en ta tho.




Amah chu ka en a, a lungawi hmel hliah hliahin ka hria. "Tun aṭang chuan ka rehsan tawh lovang che" a ti leh ngat. "Ka reh chhung khan min lo ngai ve a ni maw" a tih chuan ka ner sawk. "Titau rei thei nu, lungawi har bawk si" a hmelah lungawi hmel leh hlim hmel kha a la ral lo reng reng.




"Tikhan ka bialnu i ni duh tawh ang em? Tunah chuan ka tan thlem ngaihna che a vang lutuk" tiin pawi sawi loh hmel zet hian min melh a "i bialnu nih ka duh thu ka sawi reng reng lo" ka ti a, ka hawisawn daih. Tinge nichin te khan ka lungawi lohna kha ka lantir kher le? Tunah chuan ka duh ve a ni tih hi a hre tawh ngei ngei ang.




"Aw, a pawi lo, ka nghak mai ang che,
ka laka titau ngam tur khawpin min ngaina ve tawh tih ka hria, min haw lo a ni tih hriat hrim hrim pawh kha a nuam e" a tih chuan ka hmui ka tisawi zeuh ringawt. Hepa lakah hian tinge hetia ka awm tak le? A ni tel maiin mipa dang aia a danglamna ka hmu hnem zual tulh tulh. Mipa zawng zawng hi angkhat ang vekin ka lo ngai ṭhin, tunah chuan Hmingthana chu chung mipa ho lakah chuan a danglam fal nalh tawh.




"Ka bialnu ngei titau ka va han thlem chak tawh em? I tihtauh hunah chuan i lungawi hma ka pawm ang che a, i duh duh ka tihpui ṭhin ang che" a tih chuan zahthlak zawk khawpin a thilsawi ho kha ka mitthla nghal a, a hmeichhe duat nih chu thil nuam tak a ni ngeiin ka ring.




"Ka bialnu nih duh ve tawh mai la ṭha tur ania" a tih chuan "i chhe mai e a, ngawi tawh rawh" ka ti hlak. Hmingthana chu a nui suk suk mai.




Rovi rawn let leh chuan "awi, a hahdamthlak lutuk, eiturah hian ka duh loh zawng a lo tel khanglang alawm le" a ti a, nichin khan a pum a na emaw ni le? "Nangni pahnih chu, in va inṭhut hnaih sawt ve" Rovi'n a tih leh takah chuan Hmingthana khan a lamah ka ṭhutna a pawt hnai a ni tih ka hre ve leh hnuhnawh a, ka ṭhutna chu ka sawn hla deuh nghal.




Rovi chu a nui vur vur reng, "in inhmeh hle mai" tiin min siai zuk zuk. "Engtin nge hetah i lo kal chat theih a?" hrechhuak thutin Hmingthana chu ka en a, mithmul kan euhin "i rim ka rawn chhui" a ti mai a, ka awi loh lutuk avang chuan ka hmel ka siamchhe hram.




Dawr aṭanga kan chhuah chuan Hmingthana chu a rawn kal ve zel a, ding datin "khawi lai thleng nge rawn kal i tum?" ka ti a, amah ka en nghal zawk, "In in kawt thleng" a tih chuan "a ngai lo" ka ti chiam. Ka hmui ka hup vat, Hmingthana chuan min nuih suk suk a, "Ka thlah duh che" a tih leh chuan engmah ka sawi tawh lo. Ka hnar phal loh vang zawk a ni mahin ka hria.




"Nangni pahnih chu khati khan ka hnungah lo ti ti ula, kei a hmaah ka kal ang, motor vel a tam si, kawng a zau vak lo bawk nen, in hmaah ka kal ang" tiin a pen nghal mai a. Hmingthana chuan ka banah chelhin motor tlan lohna lam zawkah min kaltir a, ani ka bul chetah a kal ve bawk.




Kan kal dan vel te leh kan awmdan chu ka ngaihtuah a, high school kal lai inngaizawng te pawh kan ang ka ti lek lek. "Vawiin lam i chhang ṭha em?" a rawn tih chuan amah chu ka melh zawk a, ani pawhin kal pahin min lo en ve reng chu niin, ka mit ka lasawn rang lutuk.




"Ṭha ve pangai reng, i chhang ṭha zawk em?" ka ti let ve a, chutia ka zawh let ve chuan "keini chu nimin khan kan zo tawh a" a lo ti mai, "oh, anih i leng thawveng vel mai mai em ni?" ka ti leh nghal zat. "I awmna ka hria a, ka rawn pan che" tia min chhan chuan mak ka ti lutuk. "Engtin nge i hriat a?" tiin amah chu ka thlek leh zawk tawh. Ani erawh a hma lam enin a kal ve tawh thung.




"Henu te reuh hian min hrilh" tiin kan hmaa Rovi kal chu a kawk a, ka chek tlak ringawt. "Ts, i kam a dak viau chuan eng thil ṭha mah ka tihsak tawh lovang che" tiin Rovi chu a rawn lehhawi a, Hmingthana pawh chuan "min zawttu hi dawt hrilh ka hreh vang a nia, ka kam a dak lo" a ti ve vat.




Kan kal muang hlawm bawk a, ka hah em em hran lo. Kan in thlen hma kawi kan thleng tawh a, Hmingthana chu melh leh zawkin "I kein i rawn kal ve char char sia" ka ti a, ani chu veng dang daiha a awm a, a bike a keng bawk si lo, a rawn kal ve vang vang peih pawh chu ka chhuang letling zawk viau mai.




"I tan te chuan" tiin ka chal chu na lo tein a rawn pen a, ka melh nghek. "I thin te lah hi a chhe ve reuh zek a" tiin ngun zetin min en a, "duh leh a chhe ve ang chu, ka mizia thup vel ka peih teuh lo mai" ka ti hlak. Ka thin hi chu a chhe ve a, mi bula zaidam ber awm ziazanga lan ka tum lo, chuvang erawh chuan englai pawhin mi ka vin rengin ka thin a chhe hlur reng ṭhin tihna a ni hauh lo thung.




"Ka duh che" a tih daih chuan ka hmai a sa nghal vekin hria, min duh thu chu a hma pawh khan a sawi tawh ṭhin, mahse tun ṭum chu a dan a dang lutuk mah mah. Keimaha awm a awm ve tawh vang te pawh a ni mahna.




Kan in kawt kan thlen dawn chuan "Anih ka va letsan ang che u" tiin let nghal mai a tum a, "Thingpui te i rawn in kawi duh lo em ni? Tui vawt tal pawh" ka ti a, a rawn kal thui ve bawk si a, a let leh nghal mai tur chu ka ngaingam chiah lo.




"Kan inngaihzawn hunah ka rawn in dawn nia" tia min siai sukin a let nghal a. Rovi chuan min sik leh tawh. "A ṭha ve a ni tiraw?" a tih laiin Hmingthana kal chu a rawn lehhawi leh a, "Ka rehsan tawh dawn lo che, i thu ber dawn nia" tiin min kawk a, a kal leh nghal mai. Kei chu ka nui deuh var var tawh.




"Khiang rah tla i ang emai, khawi lut ang" tiin ka banah a rawn kai a, kan in lamah chuan min penpui nghal. Inchhung kan luh chuan a ngai te bawkin ka nu chiah a awm leh tawh. Ka nu hi chu a inpe zo thlawt alawm. Kan tet deuh lai khan min enkawl hman loh a hlauh avangin a zirtirtu hna chelh ve pawh midang a aiin a kaltir a, kan lo puitling cho ve zel a, awmpui lak duh lovin amahin inchhung a vawng fai leh vek a, sekrek zawng zawng hi amahin a khawih tih theih tur a ni. Ka nu hi chu ka chhuang ve thlawt.




"In chhang ṭha em?" tiin ka nu chuan min lo zawt dun var a, Rovi nen chuan kan khi dun ṭha mai, "in tiṭha a ni ang maw?" a tih leh chuan kan bu dun nghat nghat. "Nu, ka pindanah kan va lut lawk dawn a nia" tiin Rovi chu ka kai a, ka pindan lam kan pan nghal.




"Zanin chu chaw lo ei la" inthlak pah chuan ka ti a, "Min sawm har ka lo ti reng a, i thawmhnaw min lo hawh ve teh, ti hi chuan ka mawi tet tut emai" tiin a vir kual vel a, ka ei lo leh ngang mai. A inthlakna tur chu ka pe ve a. Ka insil zawhin insil turin a lut ve a, kan inthlak zawh chuan kan chhuak nghal. Tih ngai awm ang apiang kan ti a, a la hma bawk a, zanriah chhum a la hun loh avangin leh tihtur dang a awm rih loh avangin kan ṭhu ta hle hle.




"Vawiinah Ts-a nen khan eng nge in lo sawi?" Rovi chuan zawi te hian a ti a, min en chiang viau mai lehnghal. "Chutiang lehzel hriat lo tum suh" tiin hnai set sawta min bih avang chuan ka nemsawn nghal. "I va sual ve a" tiin min rawn ṭhut hnaih leh nghat.




"A beng vir thlak em alawm." ka ti daih. Kan thil sawi ho kha chu ka sawi ngam teuh lo mai a, Rovi bulah ka titauh thu ka sawi a ni ringawt dawn asin, chu pawh ka bialpa ni lo lakah lehnghal. "Zanin chu ka lo riak dawn, in inbiak ka ring tlat" phur hmel zet hian a ti ta daih.




"I chhung te dil la, an phal chuan kan riak dun dawn nia" ṭha takin ka lo ti ve mai. "Tunah ka'n hrilh nghal ang e" tiin a kalsawn a, a hnuah Rovi chu ka bulah a lo ṭhu thla leh a, "An phal, zanin chu ka veng tlat dawn che" tiin min rawn kuah a. Kei pawhin a lo riak tur chu nuam ka ti viau.




Tlai lamah chuan kan pahnihin eirawng kan bawl dun a, ka nu chu kan awltir thung. Rovi hian ei siam a thiam a, kan ina chaw a rawn ei dawna eirawng a bawl te hian tui an ti viau zel.




"Mawi, kei chu ka zak leh si e, i u te an awm ve dawn sia" a ti leh daih tawh a, a eisiam lai erawh a chawl chuang lo. "A ho e, ka u te chu i u te ang tho alawm an nih" ka ti awlsam then. "U angin ka en hleinem, mipa angin alawm ka en" a tih chuan a hnungah ka beng vak ringawt.




"I u Zorema phei hi chu ka star teh mai a nia" a tih leh chuan engtin mah ka chhang lo. "Ka ti tak tak a nia" a tih leh takah chuan "Aw, induhtir tum la, a lo duh tak che leh kan monu i ni mai dawn alawm" ka ti a, Carrot chu ka hmawm nghal zat.




"Amah ka hmuh hian ka zak a, engmah ka ti ngam tawh ngai lo, engtin nge ka induhtir theih ang a?" a ti deuh ṭiau mai. A lo duh viau tak tak emaw ni? "Ka lo sawipui dawn che em ni?" ka tih chuan "Ai, min lo duh ve loh chuan tuna ṭha taka min biak ṭhin ang te hian min be duh tawh lo palh ang" a ti leh deuh tlat.




"Anih ṭawngṭaina lamah ka lo hlan mai dawn che nia, sawipui i duh bawk si lo" ka ti hap ringawt. "Min lo duh ve se chuan in inah ka rawn mo ang a, engkim kan ti dun vel ṭhin ang a tiraw" kan ngawih deuh reng hnuah phur zetin Rovi chuan a ti leh a, kei pawhin a phurawm hmel ka ti viau.




Zanriah kan bawl zawh dawnah u Hminga a lo haw a, "In ṭhian dun ina ei in siam rim hi anih hi pawn aṭanga ka hriat, rimtui ka tih deuh kha" chokaa rawn luh pawhin u Hminga chuan a lo ti lut nghal bawrh bawrh. "I ei ṭeuh dawn nia" ka lo ti a, buk nghat nghat pahin "In ṭhian duna in siam a ni bawk si a, ka ei ṭeuh lo phal teuh lo. Rovi, chaw hi rawn ei ziah la a ṭha ang" a tih zawm zat.




Rovi'n rawng min bawlpui tawh hi chuan kan inah chaw a rawn ei dawn a ni tih kan chhungkua chuan kan hre vek zel. Ka pa pawh a lo haw a, ani pawhin Rovi chu a be ve luam. A tawp berah u Zorema a rawn haw a, tunlai chu case maksak zet khawih tur a neih avangin a rim thei khawp mai. Kan test lai anih avang khan engmah ka zawt hman ngai lova, hriat chian ve chu ka chak khawp mai




Chaw ei dawnah chuan chhungkaw ṭawngṭaina hun kan hmang a, zanin hi u Zorema hun hman zan a ni a, Rovi chuan u Zorema chu melh pawh a melh ṭha ngam ngai lo. Chhungkaw ṭawngṭaina hun kan hman zawh chuan ei kan siam nghal a.




Zanriah kan kil chuan Rovi chu a zak tih ka hria, chaw a lo ei khat a, a hmaa high school vel kan kal lai kha chuan tuna a zah ang hian a zak tehchiam ngai lo, mahse kan lo upa ve zel a, nulat tlangval awmzia kan hriat chhoh ve takah chuan hetia a zak pawh hi ka hrethiam viau, mahni star te hmaah tunge zam lo ngai ni.




"Rotei chu kan inah hian chaw lo zei ziah la a ṭha ang, i rawngbawl a tui thei si" ka pa chuan a ti a, "Ni e, kan monu hi ni la a ṭha ang" ka nu ina a tih ve chuan ka chaw bar ka ṭhulh nghal, ka nu chuan Rovi nena kan thusawi kha a hria emaw ka ti hman. Rovi ka en ve chuan ani pawhin a chaw bar lai a ṭhulh chiang viau.




"I u Zorema hi i duh mai lo em ni? Hminga pawh hian ngaihzawng a nei lo a nia" ka nu bawk chuan Rovi'n chaw a bar lai takin a ti leh a, Rovi chu a khuh bawrh bawrh mai. "Awi, ka tihpalh lutuk" a khuh bawrh bawrh a zia deuh hnuin Rovi chuan a ti nghal a, kei pawhin a tui in tur ka laksak chu ka pe ve nghal vat bawk.




Ei kham chuan Rovi nen kan seng leh zung zung. Keiin thleng ka sil a, Rovi'n hmun a phiat ve thung. "Rovi, thingpui ka chhuang a, a so chuan i lo va sem nghal mai dawn em ni?" ka ti a, Rovi chu a bu zeuh. "A sen vekin em ni?" tiin Rovi chuan min zawt a, "aw" tiin ka chhang vat.




Rovi thingpui sem zo a lo luh leh chuan thleng pawh ka sil zo ve ṭep tawh. "I u in min be leh tawh ania" tiin phur hmel zetin Rovi chuan min lo pan a, "Engtin nge a biak che?" ka tih chuan "ka fel zia te a sawi a, chuan, vawiina kan test ka tih ṭhat leh ṭhat loh te min zawt" tiin min chhang a, nuam a tih hmel takzet.




"I u hian min duh ve se aw, hmeichhia hi a care lo ṭhin bawk sia, kei chu min han care bik em em mai se" tiin duhthu a sam kual vel a. "Nakin deuhah a room-ah kan kal ang a, tuna a case khawih lai chanchin hi kan zawt dawn nia" ka ti a, "Ka zak e a" a tih deuh hmak chuan "lo kal ve mai mai rawh, ka tihdan ziah a nia, ani pawhin mak a ti dawn lo, a thilsawi i lo ngaithla ve mai mai ang" ka tih takah chuan aw min pawh ve a.




Dar riat rik dawnah ka u kawngka chu ka kik karh karh. Lo lut tura min chawn chuan ka hawng a, Rovi ding tlat chu a banah ka chelh a, pindanah ka pawt lut ve nghal. Ka u chu a laptop bihin a lo ṭhu a, "Naute, eng nge ni ta?" tiin a min rawn en a, Rovi a hmuh chuan "eng nge ti ta?" a ti ṭha leh ngat.




Ka u awmdan chu ka lo chik viau a, danglam a awm pawhin ka hre hran lo. "U, i ti mak e, I pindana ka lo luh te chuan ka sawi tur i hre ve reng" ka ti a, ka u pawh chu a khi suk mai. "Khumah hian lo ṭhu ve mai rawh u" ka u chuan a ti a, Rovi hi awm lo sela chuan ka thua ka ṭhutna a rei tawh ang.




Rovi chu ka kai tlat a, khuma ka ṭhutpui te chuan a zam viauin ka hria. "U, i case khawih mek chanchin kan hre chak a, kan lo kal anih hi" tiin ka u lukham pakhat chu ka la a, Rovi ka pe nghal, mak min tih hmel deuhin lukham chu a lo la ve mai a, kei pawhin lukham dang chu ka la leh a, chu erawh keimahin ka pawm ve ta thung. Ka u thilsawi hi lukham pawm chunga ngaithlak a nuam ka ti.




Ka u chuan a case khawih mek chanchin chu min hrilh a, a case khawih mek hi nimin piah deuha naupang ruang an chhar chungchang kha a ni a, a chhungte chuan a bo thu a hma lam deuh khan an lo report tawh a ni awm e. Report a awm aṭanga ni thum hnuah naupang chu a ruang an chhar a, chu pawh bawlhhlawh paihna hmunah daih lehnghal.




A taksaa hliam hmuh tur a awm mang lova, a nghawngah erawh hruia an rehna hnu a lang khulh thung. Naupang an thah tak hi kum 8 bawr vel lek a ni a, hetia an that mai hi a chhan tur awm pawh ka hre lo. Tualthattu hi a nunrawng ka ti ngawih ngawih.




"Eng nge in thlen chin?" tiin ka u chu ka zawt leh, "tunah chuan eng mah hriat theih pawh kan la nei lo, naupang nu leh pa hi an inṭhen tawh a, a nu phei chuan pasal dang a nei leh tawh zawk. An thah tak naupang hi a nu bulah a awm a" tiin a sawi chho a.




"Naupang pa diktak hi kan ringhlel viau dawn na a chu, a fapa hi a hmangaih viau niin mite hian an sawi vek a, a nupui nen an inṭhen hnu pawhin a fapa hi chu a ngaihven zui reng a, an in lamah pawh kar tawpah a hruai haw fo ṭhin bawk, naupang thi ta nu takngial pawh khan a ringhlel lo. Tu ber hi nge rinhleh tur tih hriatthiam a har khawp mai" ka u chuan a ti charh charh.



Mipui lam lah hian police te demna thu an post deuh sek tawh a, naupang khawngaihthlak tihna case pawh chhui chhuak thei lo tiin police ho an dem thu an tlangaupui nasa. Police ho hian an duh loh avanga case hi chhui chhuak lo lui pawh an ni lova, case kal lai chu chhuichhuah ngei tumin theihtawp an chhuah ve a ni tih hi an hre lo der nge tih pawh ka hre lo. Chu lo rengah, case hi nikhat thil thua chhui chhuah nghal theih a ni reng reng lo. An duh dana thil a kal loh avang maiin Police an dem nghal luai luai ringawt hi chu a dik lo a ni.




Ka u pindan aṭanga kan chhuah meuh chuan dar kua a ri ṭep tawh. Ka pindanah kan lut a, Rovi nen chuan khumah an ṭhu leh nghal. Case kal lai lah chuan ka rilru a la luah ngut ngut zui. "I phone kha han check teh" Rovi'n a tih chuan ka phone ka charge lai chu ka phawi a, whatsapp a ka luh chuan Hmingthana message a lo awm leh vang tawh.




A message chu open nghal lovin thil dang ka enkual a, "engmah ka hmu lo e a, eng chu nge ka check ang?" tiin Rovi chu ka en. Ani lah chuan "Ts-a message a awm leh awm loh en turin alawm ka tih che" a ti daih anih chu. "I va han chhe tak" tiin Hmingthana message chu ka open a.




Dar riat pelh hnu deuh lawk khan message chu min lo thawn a, ka u pindan lama kan awm lai khan a lo thawn a ni ang. Zan lama a thiltih turte chu min rawn hrilh a, a ṭhiante nen an chhuah tur thu leh a rawn let leh hnuah min rawn biak tur thu a sawina vel a ni.




Dar kaw rik dawnah *ka message i la seen thei lova* tihte
*Biak che ka chak tawh* tih te,
*Ka haw ṭep tawh a* tih te leh a tawp berah
*ka haw hunah chuan ka message i seen tawh ka ring a, kan inbe dawn nia* tih hi a lo ni a, nuam ka ti veng veng.




*khawiah nge in len a?* ka ngaihtuahnaa rawn lang thut chu inngaihtuah buai lovin ka zawt nghal hmiah. Amah a online tawh loh thung avangin ka message chu a in double tick hran lo.




"Khi vur vur lo khan min hmuh ve ta che" tiin Rovi chuan ka phone ken lai chu min rawn chhuh a, "Awi, lo bem leh ta che se, i nihpui duh tawh ang em?" a ti a, a zawhna chhanna chu ka hre lo. Mahse ka duh lohna ai chuan ka duhna hi a rit tawh zawk tih erawh ka chiang ngang thung.




"Ka hre lo" ka tih sap chuan "Nangmah duhtu che hi tibeidawng reng suh, i tihbeidawn hlen chuan a hnuah eng ang pawhin hnaih leh tumin leh a beiseina thim tawh chu tien sak leh tumin bei mah la, i thei tawh lovang tih a hlauhawm ania.




I duh ve chuan nang pawhin inngaihtuah chiang rawh, beiseina tih khawtlai hian rah ṭha a chhuah khat a nia, nghaktu hian a nghah chhuah zawh loh chang a tam, 'min nghak alawm' tih avang khan innghahtir reng suh, anih loh chuan a kalsan hunah che inchhirin um leh mah la, i hmu tawh lovang, emaw, nangmah lo midang a lo nei thei. Chuvang chuan mi innghahtir reng hi a ṭha ngai lo" a ti duah. Kei pawhin dik ka ti viau.






_____________________________________






ZAWMNA




Hmingthana chuan dar kua leh a chanve velah min lo reply a, *ka bulah tu hmeichhia mah an awm lova*
*tu hmeichhia mah kan va rim lo bawk*
*ṭhian hovin kan ride mai mai* tiin a rawn thawn tel a, ka nui leh sang tawh.




*Min ngai ve tho em?* a lo tih chuan chhan mai dan tur pawh ka hre lo. Ka inngaihtuah vang vang hnuah *ka ngaih awm che pawh ka hre lo* tiin ka va chhang a. A seen rang kher mai.
*Kei chuan ka lo ngai viau che asin* a rawn tih chuan ka biang a sa deuh hat hatin ka hria.




"I va han zei lo tak". Rovi'n a lo tih thut chuan ka phone chu ka thlauh chiang khawp mai. Khumah tho a tlak avangin engtin mah a awm lem lo thung. A rukin Rovi chuan ka phone a lo bih ve reng chu niin. "I va han â reuh tak" tiin ka phone chu ka chhar a, ani lah chuan ka zei loh thu a la sawi nuah nuah.




"Dawt ka sawi duh lo a ni mai alawm" tiin ka rilru dikdak chu ka sawi. Kei chuan dawt han sawi vel ai chuan thil hi a nihna ang tak taka sawi ka duh zawk. "Awi, inbe leh tawh mai teh u, engtin nge a duh theih zawk che ni?" Rovi'n a tih daih chuan ka va han melh rum tak.




"Khatin min melh suh, ker kawr a che" min la ti zui. "Awi" tih bak sawi tur pawh ka hre lo. Min thinchhiat khalh ni maiin ka hria. "Inbem vat ula, ni vat zawk rawh u, Ts-a pawh ka va hrilh nghe nghe teh ang" a tih chuan rang zetin "A ṭul teuh lo. Ka sawitir che emaw a lo ti vel ang e" ka ti chiam.




"Chu lovah, Mampuii hian min duhpui lo si" ka ti leh. "Mampuii bialpa tur ni lovin I bialpa tur chungchang thu anih hi, i rilru puthmang a pawimawh ber" tiin ngun zetin min en. "Mahse, ṭhiante'n min duhpui miau loh chuan a nuam hleinem" tiin ka phone chu ka tuai neuh neuh.




"Mampuii hian i hma a ngai tak tak anih chuan i duh zawng chu a duhpui ve tur che a ni. Engkimah i duhzawng a tihpui chein a duhpui vek kher dawn lo che, i tana ṭha lo tur anih chuan a dang ve mai ang che. Mahse, tun dinhmunah hian han ngaihtuah chhin la, Ts-a sualna leh ṭhat lohna a hre lovang.




A play boy tihte mai mai, a tawn hma ami vek che an ni, tunah chuan hmeichhe dang pawh a hnaih tawh lova, a insiamṭha a ni mai lo em ni? A hma ang kha chu la ni se, tun ang thleng thleng hian a bawhzui dawn lo che, a duh tak tak avang chein tun thleng hian a la ngaihvenin a be mai ṭhin che anih hi.




Mi pawhin an sawi hat tawh a, amah pawh mak an tih phah viau hi. A hmaa a mizia ang kha a ni tawh lo .Play kual vel mai mai che a tum ka ring lo. Mampuii pawhin a hmuthiamin ka ring. A la duhpui lo ṭal che a, a chhan a ṭha te anih ngawt loh chuan i duhdan kalpui ngam rawh, ani pawhin i awm tinuam lo khawpa a duh lohna a lantir a, a chhan fak sawi tur a hriat si loh chuan a ngaipawimawh tak tak lo che tihna a ni mai. Kan mi ngaihpawimawhte chu an hlimna kan duhsak ṭhin a nia" a ti duah. Sawi ve tur reng reng ka hre lo lehnghal.





Zirtawp ni a ni a, College chawlh a ni nghe nghe. Kan ṭhian thum chuan bazar kan tum a, zan lama kan lo rel fel vek tawh a ni. Inrinni hi chuan mi an tam thei lutuk a, a theih hram chuan zirtawp tlai lam velah hian ka bazar sa mai ṭhin.




Bazar kan thlen chuan lei tur em em kan hre leh chuang hran lo. Kan tei kual vel mai mai a, a khat tawkin cosmetic dawrah kan lut a, Rovi leh Mampuii'n make-up an en laiin kei ve thung chuan bakhilh cute deuh deuh hlir ka lo en thung. Ka pumrua nena inmil lo zetin thil cute ka ngaina tlat pek.




Tun ṭum chu chhungkaw mamawh tur bazara chhuak ka nih lem loh avangin lei tur vak ka hre lo. Mahse, thil ho te te erawh ka lei ve nual a, perfume bawm te chi te pawh ka lei ve leh bawk.




Kan ṭhian thum hian ngaihzawng kan nei lo vek a, kei chu a hmain Jayden nen khan rei tak kan inkawp ve hman a, Rovi ve thung hi chuan star a ngah hle a ni mai a, ngaihzawng erawh a nei ngai hran lo. Mampuii pawh chutiang deuh tho chu, a ngaihzawng nei ve te hi a tluang lo kan ti dawn nge, rei an inkawp ngai lo.




Chuvang chuan bialpa te nena len ho tih ang hi kan nei ve ngai lo. Kan pathum hian kan inzui ṭhap ṭhap zel mai a, mipa ṭhian kan kawm vak ngai lo bawk nen, kan bulah chuan mipa hi hmuh tur an awm ngai mang lo reng reng.




"Thil ei tawh mai ang u" Mampuii chuan a ti a, eina tur kan han ngaihtuah chawp leh rih. "Aw, ka hria, Ts-a nu hian dawr a hawng thar a, an thil neih ho pawh a tui hlawm lutuk, tah chuan va ei ang u" Rovi chuan a rawn ti hlut. "I va hre ve" ka tih chuan "eitur tui awmna hriat lamah chuan number 1 ka ni tih in hriat kha" tia min chhangin a mithmul a kan euh euh mai.




Mampuii'n a hnial lem loh avangin Rovi dawr sawi lam chu kan pan a, pawn aṭanga en mai pawh chuan a chhung lam chu nawm hmel tak a ni. Kan va luh chuan mi pawh an lo awm ve nual a, an restaurant chu a fel fai em em hi a ni tawp.




Kan ṭhut fel rual deuh thawin menu min rawn pe nghal a, ka en chuan Hmingthana'n nui sangin min lo en reng tawh. Hetah a awm pawh ka lo ring reng reng lo. "Ts, i va inhmeh lo ve" Rovi chuan a ti hliai reng a ni. "Nia" tih chauhin Hmingthana chuan a chhang a, min en leh zawkin a kalsawn a.




Menu kan bih lai chuan Hmingthana chu a lo let leh a, hmeichhe upa lam, hmel ṭha zet, a hmel en pawha zahawm hmel hliah hliah nen an ding dun a, Hmingthana chuan "Nu, hei hi ka ṭhiante an nih hi" tiin keini chu min rawn kawhhmuh a, Hmingthana nu lah chuan nui sangin "In va fel ve, rawn chawl ziah ru aw, in vawikhat rawn kalna em ni?" tiin zawhna min zawt nghal a, a nelawm hmel lutuk.




Mampuii chuan a lo chhang a, Hmingthana nu chuan nui sangin "In vawikhat rawn kalna te a ni bawk sia, a free vekin in ei dawn nia" a tih chuan ka meng deuh awk. An thil neih ṭhenkhat ho hi chu an to ve hlawm fu sia, chutia a free a ti mai chu mak ka lo ti deuh a ni.




A thlawn chuan a inthlahrunawm thu Mampuii chuan a sawi leh zat a, kei pawhin a inthlahrunawm ka ti. "Ni dangah a man te chu in la pe zawk dawn nia, ka fapa ṭhiante chu ka fate ang in nia, in duh duh ei rawh u" a tih tak tlatah chuan kan hnial ta lem lo .




Hmingthana lah chu fel hmel zetin a nu bulah a ding ve reng a, Mama's boy hi a ang ka ti lutuk. A nu chuan kan duh duh chah tura min tih hnuin a kalsawn a, Hmingthana pawh ka bulah rawn ṭhuin "In duh duh in ei dawn nia" a rawn ti ve a, "A inthlahrunawm reuh e" ka lo ti sep. "I rawn lawi hunah pawh a free vekin I ei ṭhin dawn tho a, tun aṭanga a free-a lo ei chu a pawina a awm dawn em ni?" a tih chuan zak tak ka ni.




Ani lah chuan "Ka nu pawh khan hmelṭha a ti lutuk che" a la rawn ti leh sup zui. "Eng thil chiah nge i hrilh a?" ka tih chuan "Eng thil vak mah, ka duh thu che leh min duh ve rih chiah loh thu ka hrilh a" a tih chuan phâwk zetin amah chu ka en a, ani lah chu a la nui mai mai zui.




"I â em ni? Tinge chutiang te i hrilh a" sawi zawi viau mah ila, a hre thei a ni tih hriat zetin a rawn nui a, "a ngainat phah sauh zawk che" a ti duh lek chauh. Ka ṭhiante chuan "Eng nge i ei ve dawn" tiin min rawn zawt a, sawi tur mai pawh ka hre lo. A thlawn tiin Hmingthana nu khan a sawi tawh bawk sia, thil man to ka ei ngam teuh lo mai.




Tlema man tlawm ve deuh chu paper-ah chuan ka ziak a, ka ziah zawh rualin Hmingthana chuan a la a, "Keimah ngeiin ka rawn serve leh ang che u" tiin a kalsawn a, a kalsawn rualin "In va inpawh hmel tawh ve" Mampuii chuan a lo ti nghal, a lungawi hmel vak lo lehnghal.




"A hma ai kha chuan inpawh ve tawh e" ka ti sap. Min duhpui lo ṭhin sia, hrilh pawh ka hreh. "I lo duh ve tawh te hi a ni lo maw?" tiin chik zetin min melh a. "Chutiang chu nakin lamah in sawi leh dawn nia, thil ei inti tui lo palh ang" Rovi chuan a ti zung zung. Mampuii pawh chuan engmah a sawi belh leh ta lo.




Ei tur a lo thlen chuan ka meng deuh awk. Kan thil chah ang pakhat mah a rawn thleng reng reng lo. "I rawn dah sual a ni ang, hetiang engmah kan chah lo" Hmingthana en pah chuan ka ti hap. Tuna thil a rawn dah ho hi chu a tlawm dawn lo tih hriat reng reng.




"Allergy tih vel emaw, ngainat loh zawng in nei em?" a tih daih chuan ka va han melh rum tak. Rovi chuan engmah allergy kan neih lo thu a lo hrilh a. "A ṭha anih chu. Ka nu khan a hranpa liau liauin a siamsak che u" a tih chuan engtia han awm tur nge tih pawh ka hrethiam lo. A lawmawm viau na a chu, a inthlahrunawm deuh mah mah chu a ni.




"A inthlahrunawm e, a thlawn pawh tih tawh nak a laiin" ka tih niah niah chuan "I nu tur tho a nia, khatia i awm reng te chuan" tiin min siai suk a. Dawra an buai ve deuh avangin a kalsawn a.




An thil rawn dah ho chu a tui hlawm takzet. A nuam lo kan ti viau na a chu, ei tur tui nge nge chu nuam lo ti chung chung pawhin kan ei zo vek mai alawm. Kan chhuah dawn chuan counter-ah Hmingthana nu kha a lo ṭhu reng a. A hranpain kan eitur a lo siam emaw ni le.




Koh mai dan tur ka hriat loh avangin ka han ding leh rih "Pi" ka tih chuan nui chungin "Nu Sangte min ti mai dawn nia" a ti a, "Oh, kan lawm lutuk aw, in siam tui sia, kan lawm lutuk" ka ti bah deuh nak. "A va lawmawm ve, In lo kal leh ṭhin dawn nia" la nui reng chung chuan a ti ve a, keini ṭhian ho pawh chuan kan nuih var var mai.




Kawnga kan kal laiin Rovi chuan Hmingthana nu fel a tihzia leh hmelṭha a tihzia te chu a sawi mawlh mawlh a. Kei pawhin fel ka ti khawp mai. Lei tur em em kan neih tawh lem loh avangin haw kan tum a, kan scooty dahna lam kan pan a, la haw nghal mai lovin Mampuii lo hruaitu tur chu kan nghak leh rih a.




"Mawipui, Ts-a hi i duh ve em ni?" Mampuii'n a lo tih chuan ka lehhawi nghal a. Ani chuan chiang takin min en reng a, eng rilru nge a put pawh ka hrethiam lo. "Imm, duh ve deuh" ka ṭawng ring hran lo. "Mipa zawng zawng zingah Ts-a ber kher maw" a lungawi loh hmel ngang mai, a ner deuh suk zui.




"Tinge maw Ts-a pawh hi i duh loh viau ni" Rovi chuan a ti hlak. "Khatiang mipa kha engtin nge i duh theih a? Hmeichhe â tak i ni em ni? I bialpa hmasa hnen aṭang khan eng zirlai mah i zirchhuak nange?" min ti erh mai anih chu.




"Insum ve deuh rawh" Rovi chuan a ti hmak. Garage-ah kan awm a, ṭawng rin vak pawh a chi loh. "Ṭhiante'n an duhzawng lo duhpui lo tlat hi ṭhianṭha tihtur pawh a ni lo. A tana ṭha lo tur kawngah chuan i dang thei. Mahse, chutiang anih lem loh chuan ṭhiante awm tinuam lo thei khawp khan che tawh suh" Rovi bawk chuan a ti leh.




"Nang lah hi, Ts-a ti deuh reng mai, play boy lutuk anih saw" Mampuii chu a aw ki a sang chho viau. "Tunah sawn en ta che, play boy hmuhin i la hmu em ni? Mawipuii bak tu hmeichhia nge a buaipuia i hriat, i hriat phawt chuan sawi rawh, i sawi anga play boy chu ni se, tun thleng thlenga Mawpuii hi a la bawhzui i ring em ni?" tiin Rovi chuan dam deuh zawk hian a chhang a.




Mampuii chu a ngawi deuh vang vang. Amah rawn hruaitu tur a rawn thleng nghal a, engmah pawh sawi lovin car chhungah chuan a lut a. An tlanchhuak lai chu ka en reng. "Eng nge a hriat ni" Rovi chuan Mampuii te tlan takna lam thlir chung chuan a ti deuh vang vang.




"A duhpui loh viau chhan che pawh hi ka hre lo. A ngaihtuah vang che a ni pawhin ka hre lo. Ngaihtuah tak tak che chu ni se, Jayden lak aṭanga i move on hlen theih nan mi tu emaw i tawn chu a duhsak ngei ang che" Rovi chuan a ti leh. Amah zawk chu a insawi thinrim dawnin ka hria.




"Ka nat leh a hlauh vang anih kha" ka ti ringawt. Jayden nena kan chungchang a sawi kha chuan min ti na ve det. Hmingthana ang lo duh pawh ni ila, khatia a sawi kher kher kha chuan nuam lo min tihtir khawp mai. "A thilsawi te kha chu engah mah ngai duh suh" Rovi chuan ka awm dan chu a hrethiam a ni teh chek ang chu.




Scooty a chuan ka tum mek laiin Hmingthana'n a rawn call hlawl. Tun hi a vawi thum rawn call-na chiah a ni. Ka chhan chuan "In haw taw em?" a rawn ti nghal a, haw kan tum mek thua ka chhan chuan "Kei pawh dawr aṭang ka chhuak tawh a" a rawn ti a, chhan mai dan tur ka hre lo.




"Khawi lai hmunah nge in awm?" ka ngawi deuh reng vang chuan nge maw ni a rawn sawi nawm leh. MC hnuaiah motor an park-na hmuna kan awm thu ka hrilh a, ka sawi zawh hmain "khawi ka lo be ve lawk" tiin Rovi chuan ka phone chu a rawn ban a, a tir aṭang khan ka phone bulah a beng a lo dawh ve reng chu niin.




"Mawipuii hi thlah i chak em ni?" a ti nghal thawr mai. Lehlam ami chuan engtin nge a tih pawh ka hre lo. "Lo kal rawh, vawiin chu ka scooty zawkin kan rawn inphur a, min lo phurhchhawk ve lawk mai rawh" a tih chuan ṭul lo ti lutukin ka melh hrep. "Imm, lo thleng vat vat rawh" a tih leh hnuah phone chu a hang-up a.




"Vawiin chu Ts-a inthlahtir mai rawh" a nui ang vur vur a. "A ṭul lo lutuk emai aw" ka tih chuan "a lo thleng ṭep ang" a ti daih a. "Mampuii thusawi kha a dik lo ni tih i fiah dawn nia, Hmingthana hi Jayden ang a ni lo. A hma pawhin Mampuii hian Ts-a a duh loh thu a lo sawi fo tawh a, a play mai mai che a ring bawk a, a dik lo a ni tih i hailang dawn nia.




Nang pawhin Mampuii hi ngai chang reng suh, i rilrua awm kha kaltlang pui hmiah rawh. Ts-a hi i duh ve anih chuan i duhna chu pawm ngam turin ka duh che. Mipa zawng zawng an inang lo a ni tih i hriat kha. Beiseina tihkhawtlai hian thinlung a tina ṭhin a nia. A beiseina che hi tihkhawtlai sak reng suh" tiin ka darah ka hmer zeuh.

[Te-i Mrs Ambrose]

DÉSESPÉRÉ
By: Te-i Mrs Ambrose


Chapter 5



Hmingthana a lo thlen chuan ka zak lek lek. Inthlahtir chak ngawih ngawih anga min ngaih te ka hlau. Rovi lah chuan inla zei tawkin "Anih tikhan in lo inthlah mai dawn nia, ka kal hmasa a nia" tih leh a scooty a tlanchhuah chu a rual a.





Hmingthana chuan min en deuh vang vang a, "Dik lo a awm em ni?" a tih chuan ka ngawi deuh reng. "Ka thlah tur che hi i duh vak lo em ni?" ka chhan loh avang chuan a lo ti leh. "Chutiang lam pawh a ni lo" ka ti ve ta nge nge. "Miin i rilru natna tur zawnga thilsawi an nei em?" tiin chiang zetin min en a, ka zam vek thei.





"Thil dik lo a awm chuan min hrilh la" tiin ka darah a rawn chelh a. Amah chu ring turin min duh hmel viau. "Ṭhian buaina mai mai mawle" ka ti hap. "Keimah vang a ni em?" a tih chuan ka meng deuh kawk. Mahse, lu ka thing a.





"Dawt hi ka ngaina lo a nia" a nui hmel phena a thutakzia chu ka hmu thei. "Min hrilh duh lo anih pawhin dawt min hrilh kher suh" a tih leh chuan a thinrim ta emaw ka ti hman. Amah chu ka en zawk a, mahse thinrim hmel a pu hauh lo.





"Engtik niah emaw chuan i nuna thilthleng ho tê te te chena min hrilh vek theih ka beisei. Hlimna lam emaw, natna a ni emaw, lungawi lohna te chena min hrilh ngam vek hun ka lo nghak ang" ti lehin min rawn din hnaih nghal ruak a, ka dar pahniha chelhin ka chal a rawn fawp deuh vang vang anih chu. Ka awm dan chu a mak ka ti, ka thla a muang hliah hliah anih chu.





"I ṭhiannu khan kei hi min ngaina lo tih ka hria alawm" min thlah hnu chuan a ti a. "Eng tin?" ka ti sep ringawt. "Min en ṭhin dante chu mi â ber pawhin an hrethiam ang, min ngaina lo tih ka hria alawm" a ti mai. "Ka ṭhian kawm ngeih ve berin a ngaina lo che tih i hria a, mahse min la hnaih tho sia, i tan a tlawmthlak i ti lo em ni?" tiin amah chu ka en reng.





"Amah kha ni lovin nangmah hi alawm ka duh che, i ṭhiannu in min ngainat loh avang mai maia ka kiansan che chuan ka duh tak tak lo che tihna a ni mai" a tih chuan ka nuih ver ver. Sawi leh tur pawh ka hre tawh lo. Tunah chuan hepa hi ka ring ngam tawh takzet tih ka hria.





"Mampuii chuan Jayden anga min rinawm loh san a, min phatsan thuai a ring a, chuan...min fiam kual peih tawh loh hnuah min kalsan ang tih a ring a" ka tih chuan "A hnai lo" a ti nghut. "I rinawm chhung chu kei pawh i tan ka rinawm ve zel ṭhin ang. Hmeichhe dang ang i ni lo ka tih fo tawh ṭhin kha. Ka fiamkual mai mai ngai dawn lo che" a rawn ti leh a, ka nui leh var var tawh.





"Mipa zawng zawng hi kan inang vek lo a ni tih fiah nan min hmang rawh, ka bialnu ni rawh, i lo rinawm tawh ṭhin ang khan i tan ka rinawm ve i phal em?" a tih chuan a sawi teh thut em avangin ka lungphu a chawl deuh det nimai hian ka hria. Ka hmai a sa hat hat a, eng chhanna nge ka pek ang?





"Mawipui" tiin a kut min rawn pe a, he a kut hi ka vawn chuan a bialnu ni tura min sawmna kha ka pawm tihna a ni ang. Ka rilru a buai lutuk, ka rilru lam chuan a kut chu vuan turin min duh a, mahse lehlamah ve thung chuan hlauhthawnna ka nei tlat thung. Awlsam taka min kalsan theih dawn laiin kei chuan ka thei ve dawn lo, inngaihzawnna avanga nat leh ka inhuam lo a ni ber.





"Min ring rawh, ka tina lovang che" ril deuh ruiha a tih chuan ka mit ka chhing tawp. Tunah hian a kut hi lo chelh duh lo ta ila, a hnuah ka inchhir ngeiin ka ring. A hnu chuan ka thaw hap a, ka thinlung duh dan hi zawm tawp ka thlang. Ka mit ka meng riai riai a, Hmingthana chu ka en reng.





"Hmeichhe dang anga chak ka ni ve lova, ka der thawng a, hmeichhe dang chuan i ngaihven lo pawha an lungawi theih mai laiin kei thung chuan ngaihsak ka phut a, min hne thuai mai thei.. Chutiang anih dawn chuan tunah hian bul min ṭanpui lo law law turin ka duh che. Mi ka rin tawh chuan ka ring deuh bur zel a, tihnat ka awlsam a nia, min fiam mai mai suh ang che" tiin ka hrilh.





"Ka duat ngawt ang che" tiin lu a bu nghut a, "ka fiam mai mai lovang che" a tih leh zat chuan ka nuih ta var var. A kut chu ka chelh ve ta a, ka chelh rual chuan nghet zetin a lo hum nghal. "Ka ning ngai dawn lo che, nang duat theitu che nih leh ngaihsak theitu che nih chu ka tan chawimawina ang hial a ni" a tih chuan a ban puamah ka beng deuh chawrh mai.





"Garage aṭanga bul han ṭan mai chu" tiin Hmingthana chu a nui suk suk. Keipawh ka nui ve tho, kan bul ṭanna hmun hi a romantic lo ve em a ni. "Kan inngaihzawn ni te a ni si a, ka va thlah tawh ang che, vawiin chu hahdam deuhin awm la, nidang aṭang chuan I bialpa hian i chauh rak thlengin ka ngaihvenin ka ngaihsak ṭhin ang che" a tih chuan ka nui hak hak.





Hmingthana chuan a bike chu a tinung a, kei erawh chuan amah chu ka en reng. A tir aṭang khan a chhia ka ti ngai lo, mahse a mizia vel avang khan ka duh ka ring ngai lo kha a nia, mahse hmahun hi kan lo hre lo si a le, ka duh pawha ka rin ngai loh mipa kha ka bialpa a ni ta der mai chu a ni sia.





"Lo chuang la" tiin Hmingthana chuan a kut chu min rawn pe a, a kuta chelhin a bike hnungah chuan ka lawn a, kan tlan chhuak a, Hmingthana chuan a bike a park man chu a pek fel hnuin garrage aṭangin chak vak lovin a chhuak a, motor kawng kan thlen hma chuan a ding dat.





"Duati, min lo kuah rawh le" tiin ka chhan hmain ka kut chu amah chuan a rawn la a, a kawngah min kuahtir nghal hmak. A hnung lam aṭang ka nui deuh var var a, amah hian min hmu thei se chuan ka lai zawk viauin ka ring.





Hmingthana bike-a chuan chu a khalhtu vang hi nge ni nuam ka ti em em. A kut ka vawn rual khan keimaha hlauhthawnna awm ṭhin kha a reh nghal vek. Mipa hi ka ring zo lo viau emaw ka ti a, mahse Hmingthana erawh ka ring viau nge? Keimahah eng hlauhthawnna mah a awm hauh lo.





Kan in kawt kan thlen chuan ka chhuk a, Hmingthana chuan ka kal mai tur chu ka kutah a rawn chelh a, amah chu ka en vat, "Ka bialnu" tiin min en reng a, a nui deuh suk bawk. Ka laih zia chu a hre chiang ve viau ang.





Hmingthana lah chuan engmah a sawi zawm lova, "Ka bialnu" a rawn ti leh. "Ka bialnu i ni ta mai hi a mak ka ti" tiin amah pawh chuan a awi loh hmel lutuk. "Zanah ka lo bia ang che" a tih chuan ka bu nghat nghat ringawt. A hmel ka hmuh tawh hi chuan ka lai em em zel.





"Kal tawh rawh" min tih chuan rang zetin kan in lam panin ka kal nghal. Inchhung ka luh chuan ka thaw deuh hluam hluam mai. Ka hmai te chu a rawn sa nghal vek. "Naute i ṭha em?" ka hmaah u Hminga a rawn ding a, "Imm, ka ṭha" ka ti a, ka kutin ka inzap hliau hliau.





"I sen vek alawm" rawn tiin min rawn hnaih leh deuh a, "A lum em vang anih hi, ka va insil teh ang" tiin ka pindan lam ka pan nghal daih. Ka pindana ka luh chuan ka bag chu khumah ka nghat a, bual in lamah lutin ka hmai ka phih nghal mawlh mawlh. Darthlalang hmaa ka inen chuan ka biang chu tai ṭha tak a ni. Hmingthana bula ka awm lai khan hetianga a sen loh hram ka beisei.





Bual in aṭanga ka chhuah hnu rei loteah ka phone a lo ri a, ka en chuan Hmingthana a lo ni. Ka phone chu ka en vang vang ringawt. A hnu deuhah chuan "Hello" ka ti ta sap. Lehlam ami chu a ngawi deuh vang vang a, a lo call sual anih ringin dah mai ka tum hman tawh.





"Ka duatnu" a rawn tih takah chuan a lo call sual lo a ni tih ka hre ta chiah. Ka zak leh em em tawh. "Imm" ka ti sep. Jayden nena kan inngaihzawn lai pawh khan tun ang em em hian ka zakin ka lai hma ngai lo. Tinge Hmingthana a nih avanga ka zah a ka laih em em reng mai le.





"Hmuh leh che ka chak" a rawn tih chuan "kan inhmuh zawh chiah kha" ka lo ti a, "in in kawt aṭangin ka la tlan chhuak lo, in in ka la thlir reng" a tih chuan ka meng phâwk viau. "Tinge i la haw loh a?" ka ti hliai. Hmun hla tak a thlen tawh ka lo ring a nia.




"Tlansan che ka la hreh" a tih chuan ka ngawi reng. "Haw tawh la" ka ngawih deuh vang vang hnu chuan ka ti chhuak hram. Duh ve tawh viau mah ila, duh deuh anga lan chu ka la hreh ve, anih loh chuan min hmuh dan a dang vek palh ang. "Imm, anih min ngaih thu sawi phawt la" a tih chuan lei ka chhuah zeuh.





"Ka dah dawn, tluang takin in in i inkhalh thleng dawn nia" tiin ka hang up nghal daih. Inngaih thu inhrilh te hi ka tih lohna a lo rei ta bawk a, sawi tur anga ka inngaihtuah zawng te hian ka awm thiam lo. A rei deuh hnuah chuan ka la sawi ve mahna.





Inbual turin bual in lamah bawk ka lut leh a, ka chhuah meuh chuan zanriah bawl a hun dawn tawh. Choka lam ka pan a, ei ka rel nghal mawlh mawlh. Chaw ka chhuang a, keimah chuan ka che rak rak. College kan chawlh ni hi chuan ka nu hi awl ve ngei ngei ka duh ṭhin.





Chawhmeh tur ka chan laiin u Hminga a lo lut a, "I lo buai em?" tiin ka bula ṭhutthleng chu a pawtchhuak a. "Buai hran lo, ka bawl hma bawk a, hmanhmawh chuk chuka engmah tih a ngai lova" tiin ka chhang a. "Kan naute hi a lo fel ber anih hi, ka lo pui ang che" tiin chemte dang a la a, chawhmeh chu a rawn chan ve nghal.





U Hminga'n min puih lehzel takah phei chuan zanriah chu kan bawl zo hma khawp mai. "U, min pui bawk sia, zanin chu a tui ngawt ang" tiin nui var var chungin ka u chu ka en a, "ka nau tak hi chu a" u Hminga'n lu thing chungin a ti nghut thung. "Eng nge, a ni alawm, i ei ve chak tawh em? Kei chu ka ril a ṭam tawh" ka ti a, ka ril pawh a ṭam tak tak tawh reng bawk.





"I bawl engpawh ka ei chak reng zel alawm" tiin u Hminga chuan ka biang a piai hlak. "Naupangte pawh ka nih tawh loh hi" ka ti nang nang mai. A chang chuan u Zorema leh u Hminga hian min naute chei leh tlat zel. "Nang te chu kan dam chhunga kan naute tur alawm i nih" a tih chuan ka ner ringawt a, engmah ka sawi zawm tawh lo.





Zan lamah chuan zirtawp zan a ni bawka tiin lehkha zir ka tum hran lo. Zirtawp zan hi chuan ka awl em em zel, lehkha hi ka bih chhin vak ngai lo. Ka nu leh pate bulah ka ṭhu ve a, tv-a an en ang apiang chu ka enpui ve zel.




Thil hrechhuak thutin ka u Zorema pindan lam ka pan a. Kawngka ka kik chuan lut turin min lo chhawn a, a pindan chhungah chuan lutin a khum lam ka pan nghal. "Naute, hriat chak i nei leh tawh em ni?" nui chungin ka u chuan a ti a, ka lu ka bu nghat nghat.





Ka bula u Zorema lo ṭhu chuan "I hriat chak chu eng nge?" a ti nghal a, "Naupang case kha i chingfel tawh tih ka lo hria a, min hrilh ve rawh" tiin lukham chu ka la leh zat a, ka pawm hle hle. Ka u chuan min nuih suk suk phawt. "U, ka nghakhlel tawh ania" ka tih leh takah chuan,



"Tualthattu chu naupang te pa kha a nia" a ti hmasa te te, mak ka ti takzet. Anih ka lo ring chhin miah lo. "A van mak, engtin nge i rinhlelh theih zawk a" ka ti hliai. "An chanchin vel ka chhui khan naupang pa nunhlui lam te thlengin ka hai let a. A nupui hlui kha a hmangaih ṭhin lutuk a, a nupuiin mipa dang a biak ṭhat te, mipa dangin an biak ṭhat hlek te hian a thikthu chhiat luat vangin a nupui kha kut a thlak fo ṭhin.




A hnuah chuan ngaihdam a dil leh chiam mai zel. Chutiang mizia nei chu a ni a, mipa dang an lan loh hrim hrim chuan hmangaih theih tawpin a nupui hlui kha a hmangaih thung ṭhin. Chutiang chu an nih avangin chuan a nupui hian a tuar thei ta ngang lova. A ṭhen ta a ni" a ti dap dap a, kei chuan ka lo rap zawk. Hmangaihnaah hi chuan thikna chu a tel ngei tur a ni a, mahse chutiang em em a thikthu avanga han kal sual mai chu, a rapthlak zawk.




"Tichuan, naupang kha a pa in lama a awm laia bo a ni a, thil ka ngaihtuah chiang a, a pa kha khatiang mizia pu kha anih avangin ka ringhlel chho ṭan a, a fapa kha a nu laka a thinrim luat avangin a that a ni thei mai ang em tih tein ka zeldin kual vel a, a nupui duh em em mai khan pasal dang a neihsan ta si a, chutiang vel chu ka ngaihtuah kual a.




An ṭhenawm ho chuan zan lama naupang pa a inkhalh chhuah ziah thu te, an fapa bo zan aṭanga chutia a awm tawh ṭhin thu chu min hrilh a. Ka va zui ruk chuan a fapa ruang kan chharnaah khan a kal a, a ṭap ka hmuh takah chuan ka rinhlelhna pawh a kiang deuh.




Midang lakah ka mit ka len leh ṭan a. Thu thar hriat mai tur a awm loh avangin naupang ruang chharna lam ka pan a, finfiahna kan hmuh hmaih a awm ka rin avanga chu lam chu pan ka ni. A hnuah chuan a dan ngai te bawkin naupang pa kha a lo kal leh a. Kei erawh min hmu lo thung.




A tih ṭhin dan ang bawk khan a lo ṭap leh a, kalsawn mai ka tum hnu chuan a thilsawi chu fiah vak lovin ka hre ta a. Pawi a tihzia a sawi hnua a fapa in amah ni lo a nu pasal thar fel a tihzia te, a ngainatzia te leh pa tiha a koh ṭhin thu a sawi khan a pa chuan a nupui hlui laka a chet ṭhin dan ang khan a chungah a che leh a. A fapa naupang te a reh chu a lo rek na deuh a ni ang. A rek hlum ta mai a ni" a tih chuan engmah sawi tur ka hre lo.




A hnu deuhah chuan "Anih tinge naupang nghawngah khan a pa kut hnu a lan miah lova" ka ti a, ka u chu ka en kiau mai. "Khami tlai tualthahna thlen tlai khan a pa hnathawk bang hlim chuan a fapa chu a hruai haw a, a inthlak hman lo. A fapa a infiamkual pui a, chhun lamah hna an thawhnaa a rubber glove lo bun kha a phelh lova" a tih chhan eng zawhna mah ka nei tawh lo. Ka bu nghat nghat ringawt.




"Ka u hi a fing ber, i case khawih lai i chhui chhuah theih avangin ka lawmpui a che" tiin ka kutzungpui ka tipir vah a. Ka u pindan aṭang chuan chhuakin ka nu leh pa bulah bawk ka ṭhu leh a. Ka pindan lam ka pan meuh chuan dar sawm a lo ri dawn hnai tawh.





Pindana ka luh chuan ka mut a chhuak titih der. Zirtawp zan hi chuan ka mu hma ṭhin a , tunah pawh ka pindan ka thleng chiah a, ka mut a rawn chhuak nghal em em ringawt. Ka khuma ka mut hmain tiin ka va intifai leh phawt a, ka hman meuh chuan khuma lehthlak tawp a, muthilh nghal mai ka duh.





Ka duh ang ngei chuan khumah chuan ka mu nghal a, ka muthilh dawn ṭepah ka phone, dawhkana ka dah chu a rawn ri a, peih lo zetin ka ban a, ka chhang nghal tawp. Hello pawh ti lovin "Mm" ka ti ringawt. Lehlama mi chu a nui riin ka hria.





"Ka duatnu, I mu tawh em ni?" a rawn ti a, "Mm" ka ti leh ringawt. Ka mut a chhuak bawk a, zah tih lam kha chu a lang lo hrim hrim. "Ka ngai bawk che sia, i muthilh hma chu ka hang up dawn lo ania" a tih leh chuan "Mm, tikhan i ngaithla reng dawn a mi?" mutchhuak aw zet chuan ka ti a, ka harh thei hlawl lo.





"I thaw ri mai mai pawh kha ngaithlak ka chak" a tih chuan mutchhuak viau e ti lovin ka nuichhuak hak. "Min ngai ve em?" a rawn tih chuan "Mm" tih bakin ka chhang lo. "Ka duatnu hian min lo ngai ve bawk sia, tui deuhin mu rawh aw" a rawn ti a, a ṭawngkam chu a dam thlap a, hriat a hahdamthlak takzet. "Imm, nang pawh" ka ti let a, ka phone erawh ka hang-up lo. Hmingthana'n ka duatnu min tih hian nuam ka ti. Lehlam ami chuan a khat tawkin "ka duatnu" a rawn ti leh ṭhin a, ka muthilh lai pawh ka hre lo.





Zinga ka harh chuan ni a lo chhuak tawh a, thawh ka hai tih ka hre nghal mai. Tun hnai chu thawh ka hai deuh reng mai. Ka bula ka phone lo let reng mai chu ka la kang a, data ka on rualin message a lo thleng zung zung. Zan lamah Rovi'n message min lo thawn nasa a, Mampuii erawh a reh veng veng thung.





Mampuii ka ngaihtuahchhuah takah chuan ka awm pawh a nuam lo. Ka tana a ṭha ber min duhsak ṭhintu kha a ni a, hetia kan inhmuthiam lo ta mai leh kan inhmuthiam lohna chhan mipa ka ngaizawng ta mai chu nuam lo ka ti lek lek.





Mahse, Hmingthana message ka hmuh hnu erawhin ka nui leh ang ver ver lawi a. Mampuii pawh hian a hriatchian hunah chuan min la rawn pawmpui ve mah na.





Hmingthana chuan zingah ka thawh hma khan min lo wish daih tawh. Kei pawhin ka wish ve leh nghal a, ka ni hman chu a nuam viauin ka ring. Nizan lamah pawh message min lo thawn ṭeuh tawh. Nizan kha chuan ka phone ka check lo hrim hrim kha a nia.





*Hmingthansanga duaitlai i ni tawh* tih te
*Ka duatnu, eng nge i tih* tih te
*Eng nge i tih ang le? Ka message i seen thei si lova* tih te
*Ka ngaihven a, ka care tehreng che nen*
*nang chuan eng atan mah min la ngai ve si lova* tih te a rawn thawn nawk. A message chhiar chuan ka nui var var reng mai.





A message ka en lai reng chuan message dang a lo thleng a, ka en nghal. *I tho nuam em?* tih a rawn thawn a, a nawm thu chuan ka chhang nghal. *Vawiin chu chhuak ila, i peih em?* tih chu a rawn thleng leh zat a.





*Khawiah nge kan len ang a?* tih ka thawn let ve a. Lendun erawh chu a chakawm ka ti ve reng. *I duh duhna hmunah kan leng dawn nia, hmuh che ka chak a* tiin min rawn chhanglet a. *Duhna hmun em em pawh ka nei hran lo* tiin ka va reply ve leh.
*Ka lo hruai ang che* a tih chuan ka inngaihtuah vang vang, a hnuah chuan aw ka pawh ve ringawt.




Midang zawng aia ngaihven leh ngaihsak ka duh bikzia ka hrilh a, tunah chuan a la tir vang nge ka hre lo, min ngaihven a, min ngaihsak viau bawk a, a hnuah tuna a awm ang zel hian a la awm chhunzawm ang em le? Tun ang reng hi kan nih chuan kei chuan ka duh bur dawn tih ka hria, ka duh viau a, kalsan thei lo khawpa ka duh huna min nin mai ka hlau.




______________________________________________




ZAWMNA




Ka va chhuah chuan eirawng an lo bawl fel diam tawh. Nuam pawh ka ti chiah lo. Ka pindana ka awm lai kha chuan Hmingthana nen kan inbiakna chiah ka lo ngaihtuah a, ka nu eirawng bawlpui ka ngai tih pawh ka ngaihtuah thleng pha lo.





"Nu, min lo kai tho ve mai lova" tiin ka nu bulah ka ding a, ka u te pawh chokaah an awm a, min nuih dun vur vur mai. "I mut am duh deuh ka ring mawle, i hman hun apiangin min awl tho alawm" ka nu pawh chuan min nuih ve var var tho.



Ka nu bulah chuan zawi deuh sap hian "Nu, vawiinah ka chhuak leh thei ang em?" ka ti a, ka nu chuan zawhnaa khat mitmengin min en. "Ṭhian te'n chhuah an rawt let thut a" tiin dawt ka sawi ringawt. Ka u te an awm ve sia, ka nu bulah Hmingthana chanchin chu ka la sawi ngam lo.





"I pa dil la, a phal chuan i chhuak mai dawn alawm" ka nu chuan a ti then. "I phal te chuan ka pa pawhin a phal dawn tho a" ka ti leh. "Kan ngaihtuah ṭha dawn nia" a tih chuan ka bu nghat nghat.






Ei kham chuan ka nu bulah ka tap deuh chawt. A fala thil sawipui ka duh. Ka u te nen hian inpawh ve viau mah ila, ka ngaihzawng neih thu hi hrilh ka la hreh. Ka nu erawh engkim min hriatpuitu a ni a, hre ve ngei turin ka duh bawk.





"Sawi tur i nei a ni maw?" ka nu chuan a ti a, mit hmul a kan euh bawk. "Imm, ih maw nu, ngaihzawng ka nei a" tiin lei ka chhuah zeuh. Ka zak ve deuh reng. Engkim min hriatpui turin ka nu hi ka duh ṭhin, zep eng emaw kan neih chuan a hnua buaina kan tawh hunah chhungte pawhin min puih ngaihna an hre lovang, chuvang chuan chinchang engkim hrilh vek ka thlang ṭhin.





"I duh ve hle a ni maw" ka nu chuan nui chungin a ti. Engtin vak nge maw ka lo awm le. "Ih, vawiinah pawh chhuah kan tum a, i phal ang em?" tiin ka nu chu beiseina a khat mitmeng nen ka en. "I chhuak ve dawn nia, mahse mipa hi nel lutuk loh tur an nia, kan taksa hnaihah awm tir tam loh a him ber.





Kan mi nel leh hriatchian deuh anga kan ngaihte lakah pawh hian fimkhur fo a ṭha, nang pawh nula i ni tawh a, ngaihzawng pawh i nei ve bawk ang. Mahse, i ngaihzawng tan a zuam theih turin awm ngai suh, in inngaihzawn lai chuan a mipa pawhin nuam a lo ti a ni maithei.





Mahse, in inṭhen hnuah chuan i lo zuamawm ṭhin em avang khan i hnung lam aṭangin a nuih duh ang che, mipa zawng zawng an inang vek lo na a chu... fimkhur tluk a awm lo. In inngaihzawn lai chuan zahawm thei ang berin awm la, i ngaihzawng nen in inkarah pawh daidanna ṭha tak siam la, chu chu pelh tir tum suh" ka nu chuan a ti duah. Kei pawhin lu ka bu ve nghat nghat bawk a.






"Hmeichhia hi chu awlsam tea mualpho thei reng kan ni a, mipa aiin kan nun kan uluk zawk a ngai ṭhin. Vawikhat i mualpho tawh chuan chu chuan i dam chhung a daih ang che. Miin i chanchin an ngaihven ang a, tuna i nun ni lovin a hma lama i lo dai sual tawhna an hriat chuan chu chu an tehna tur che a ni reng tawh dawn. Chuvang chuan i nun hman i fimkhur a ngai a nia.






Ngaihzawng te pawh i nei ve tawh a, hei hi i hriat reng a ngai, mipa leh hmeichhia chu inhip tura siam kan ni a, kan inhipna pawh kan inhnaih pauh leh a nasa, chuvang chuan i inven reng a ngai, hmeichhe tan chuan thianghlim ngeia pasal neih hi tum tlat tur.





I thianghlim loh chuan i pasalin a hmuh dan che a dang vek ang. Tum vang reng leh duh vang ni lova thianghlimna hloh ta an tam, chung te chu kan dem theih an ni lo. Mahse, a tam zawk erawh chu an duhthlanna avanga an thianghlimna hloh an ni.





Chutiang hmeichhia te chu an thianghlimna laksaktu te ngei pawh hian nupui atan na duh leh chuang lo. Nupui atan chuan a thianghlim a nge nge hi an duh tho. Chuvangin inngaihzawn lai chuan 'kan la innei dawn tho alawm' tih vanga thianghlimna hi hloh tum loh tur.





Thianghlim chung ngeia pasal i neih theih chuan i pasal pawhin a zah phah sawt ang che a, i pasal tan i hlu zawk ngei bawk ang" a ti leh dap dap a. Kei chuan ka lo ngaithla kar.





Keini Mizo te hian s*x education lam hi inah kan inhrilh khat deuh a, ṭawng mawi lo ni lo se, thingtlang lamah phei chuan thil zahthlak anga ngai pawl an awm ṭhin. Hetia mahni in ngei aṭanga zirtirna engmah an hmuh loh avangin a ṭhen chuan thianghlimna hlutzia an hrefiah tawk lo ṭhin.





Mahni in ngei aṭang hian s*x education lam hi inzirtir tam a ṭha. Hetiang inzirtir ṭhin hi thil zahthlak a ni lova, kan mamawh ngawih ngawih zawk a ni. Tun aia tam hian nu leh pate hian chhungkaw hnenah hian s*x education hi inzirtir tam ila, tun ai hian s*x hman kawngah pawh kan fihlim tlang zawk ngei ang.






"Vawiinah pawh mi mit tikham zawng te khan va khaw sa lo ula, Mizo te hi chuan hnam changkang tih dan hi zir ve ṭhin mah ila, kan hnam a inupat hleih ang bawkin kan va zir te hnam kan ang thei ngai dawn lo.. Mizo kan ni reng tho a, Mizo society in a huam chin te hria ula, vantlang hmuhah zahawm takin in va awm dawn nia" a tih leh chuan ka bu nghat nghat.






Ka pindan lama ka luh leh chuan ka insil thuak a, ka hak tur ka ngaihtuah nghal char char. Ka phone a lo rik chuan ka ban a, Rovi a lo ni. Ka chhan rual chuan "Nizanah biak theihin i awm lo" a rawn ti nghal hmak. Biak zawm leh pawh a inthlahrunawm alawm le.





"Nizan kha chuan phone ka khawih lo hrim hrim a, sorry" ka ti sap. "Chu pawh ni se, tun thlengin ka message i la seen lo" a lo ti leh. Tukin kha chuan Hmingthana message bak ka check lo reng reng. "Tihpalh" ti ti ta ringawt. Thiam thu sawi tur ka nei lo.





"Eng nge Ts-a nen chuan in an?" a rawn ti a, hethil hi a hriat chak vang emaw ni le message pawh min lo thawn le. "Eng nge kan an vak ang a?" ka ti let daih. "Sawi ṭha mai mai teh, ka hre chak a nia, ka kalsan hnu che u khan eng eng te nge in tih?" a rawn ti leh tawh. A hre chak ngang a ni ang.





"Min thlah mai a, chuan...." tiin ka ngawi deuh vang vang "Lalnunmawi, over lo teh, ka hre chak tawh a nia" insum theih loh hmel zet hian a lo ti a. "Kan inngaizawng tawh" rang fe hian ka ti a, lehlam ami chu a au deuh ṭhawt mai.





"I ti tak tak em?" a ti chul mai. "Imm, vawiinah len chhuah kan tum a" tiin ka hak tur ka en zui nghal mawlh mawlh. "Chung te chu nizan lam te khan min hrilh ve ta che, Bialpa nei nu" a rawn ti kher a, huat enah pawh ka en lo, ka nui tawp.





"A nuam e, keimah hi bialpa nei zawk ni awma mawiin a ni ka hlim ni ... Ka lawmpui che u e, in lennaah chuan min hruai ve ula" a tih chuan a ri meuhin ka nui tawh. "I va han sual em em ve" a rawn ti leh zat. "Nalh deuh khan inchei ang che, bialpa nena len nikhuaa awm dan te i la thiam em?" ṭawngna hun pawh min pe lovin amah chu a rawn ṭawng nghal char char.





Ka thawmhnaw hak tur ka lak zawhin Darthlalang hmaah ka ṭhu a, "Mampuii hi engmah ka la hrilh ve si lova" a hnu chuan ka ti hap. Kan intithiam lo deuh bawk nen, hetiang thu hi hrilh leh ta ila, engtin nge a ngaih ve ang le?





"Ka sawi tawh kha, i hmakhua a ngai ve tak tak a, a ṭhianṭha tak anga a ngaih che chuan i duhthlanna chu a zahsak ve ang che, amah kha chu lungkham rih lo la, i bialpa nena leng tur in nih kha" tia min chhan chuan ka thaw hak.





Make-up ka hman ngai em em lem loh avangin ka hmaiah chuan sunscreen ka hnawih tawp a, lip-gloss sen deuh chek chek ka hmang bawk. Mit lam erawh hnawih nuam ka tih avangin eyeshadow leh mascara ka hmang ve a, ka lungawi tawk em em ringawt.





"Nuam deuhin vawiin ni chu va hmang ang che u, i haw hunah ka hnenah rawn in report theinghilh lo la" a tih chuan ka in report tur thuin ka chhang a. Call chu kan titawp nghal a. Ka sam ka curl leh te te hnuah ka thawmhnaw hak tura ka lakchhuah sa chu ka inbel a, pheikhawk ka bun leh a, ka hman a ni der mai.





Hmingthana message a lo thleng a, ka en chuan *ka lo chhuak chiah, lo insiam la* tih hi a lo ni a, a seen tawha ka rin lem loh avangin ka chhang let ta lo. Rei ve deuh fe ka nghah hnuin a rawn call a, "In in kawtah ka awm tawh a" a lo ti a. "Imm, ka lo chhuk ang" tiin ka hang-up nghal daih.





Ka va chhuah chuan a bike nghengin a lo ding renh tawh a, min hmuh rual chuan khaw dang hawi lovin a lama ka pen hnai zel chu min en reng. Hetiang mitmeng nena min en reng anih chuan zah luat avangin awm dan ka thiam lo mai ang. A bul ka thlen rualin "Min en reng lo la" ka ti sep. "I mawi lutuk" a tih chuan ka nuih ver ver a, "Nangpawh" ka ti let ve a.





"Khawi lamah nge kan len ang?" ka tih chuan "i duhna hmun apiangah ka hruai ang che" tiin min chhang a, len duhna em em pawh ka nei hran lo. "Len ka duhna pawh ka hre lo" ka tih chuan "anih chuan kan inkhalh chhuak tawp ang a, i duhna hmunah kan ding mai dawn nia"
a tih leh takah chuan ka hnial ta lo.





A bike-ah chuan a lawn a, a hnungah ka ṭhu kai ve vat bawk. "Duatnu, min rawn kuah rawh" a tih chuan tim zetin a kawngah ka va vuan a, ka kut chu a rawn hum vang vang hnuah a thlah a, kan tlanchhuak nghal.





Kan tlan deuh char char a, a hnuah chuan dawr pakhat kawtah hian min dinpui a, ka chhuk ve nghal mai. Hmingthana chuan a bike a hun ṭhat hnuin ka kutah a rawn kai a, dawr chhungah chuan min luhpui a.






"Lei tur i nei em ni?" ka tih chuan min rawn en a, kei chuan ka en reng tawh thung. "Aw" tih chiahin min chhang. "Mawite, nizana ka chah che kha lo la la" a tih chuan eng tak chu chah ang maw ka ti rilru neuh neuh.






"Hei hi a a ni maw i Duatnui chu" tiin Mawitei a tih chu a nui deuh var var a, "Mawiteii ka nia, Ts-a first cousin" tiin min rawn chabai a, "Mawipuii ka nia" tiin ka chibai let ve a. A nelawm hmel hi ka ti ngawih ngawih.






"A chanchin chu ka hrilh ṭeuh tawh che kha, rawn la vat mai rawh" ka bula ding chuan a ti hluk. "I inla thu si, ka rawn la dawn reng... Ka biak avangin Mawipuii hi a ral dawn pawh ni hlei lo" tiin Mawitei chu a kalsawn a.






Hmingthana chuan ka kut a chelh chu a tuai heuh heuh a. "Ka Duatnu" a tih chuan a lam chu ka hawi a, a mitmeng mawlh mai chu, min fiam kualin ka ring hauh lo. "Ka Duatnu tiha koh che hi a nuam ka ti... Hmingthansanga Duatnu" a tih leh chuan ka nuih tawp tawh.






Mawitei rawn let leh chuan bawm pakhat, te ve tak, mahse sei ṭha si hi a rawn keng a. Hmingthana'n a lak raulin "Khatiang kha kan chah zen zen lo a nia, a to ve viau ang" Mawitei chuan a ti a, a nui sang bawk. "Ka hria" ti hmukin Hmingthana chuan a phone hmangin a scan a. A man an inhrilh chuan a bawm a tet ang aiin a to ka ti.





Dawr aṭang chuan kan chhuak a, Hmingthana chuan "Picnic type-in Orchid Garden (Nauban huan) lamah kan va leng dawn em ni ang" a ti a, ka bu nghat nghat. A nu restaurant lamah min kalpui phawt a, lut ve tura min tih chuan ka zah thuin ka chhang tlat a, min hrethiam ve a ni ang chu. Min tilui bik lo. A bike bula amah nghak tur chuan min ti a.





A rawn chhuah leh chuan bag pakhatah hi a rawn khai chhuak a. "Ei theih lo i nei lo tiraw?" a tih chuan ka bu nghat. "He hi keng lawk mai rawh aw" ti lehin a thil khai lai chu min pe a, a bike bawk chuan kan inphurchhuak leh ta a.





Nauban huan kan thlen chuan midang an awm vak lo. Ṭhutthlenga ṭhut ka duh loh avangin thingbuk hlimah kan ṭhu a, a boruak chu a nuam hle. Hmingthana chuan ka kut zungṭang karah a kut a rawlh a, a nui leh suk suk zel.





"Ka bialnu i ni ta mai chu a ni sia" a tih chuan ka nui ve ringawt. "Hmeichhiaah chuan ka bem rei ber i la ni" a tih chuan ka nuichhuak hak. "Tinge i nu i puih lova, nimin lamah pawh i pui reng sia" ka ti ta daih. Anih loh chuan a ṭawngkam ho te te avangin ka lai reng mai ang.





"Nimin kha chuan ka pain min hrem a, ka nu dawrah min thawhtir anih kha" a tih chuan mak ti zetin amah chu ka en. "Tinge i pa chuan a hrem che?" mak ti deuh tak chuan ka ti leh. Hmingthana hi sport man anih avangin zuk leh hmuam thilah a fihlim vek tih ka hria, damdawi tih vel phei chu a ti ngai dawn lo tih ka chiang.





"Zanah ṭhian hovin racing kan nei a, min manchhuak a" a tih chuan ka thaw deuh huai thei. "I lo hlauthawng deuh em ni?" a tih chuan ka bu nghat nghat ringawt. "Ka Duatnu" tiin Hmingthana chuan min kuah vang vang ringawt a, a hahdamthlak takzet. Hetiang tak hian mipa ka hnaih leh theih pawh ka ring ngai tawh lo kha a nia.





Rei ve deuh kan awm hnuah Hmingthana'n ei tur a lak ho chu kan ei a, ka ei tui leh viau tawh. "I nu siam bawk em ni?" ka ti a, lu a bu nghut. "I nu hian ei siam a thiam e" ka ti hliai. A thilsiam vawi hnih ka ei tawh a, tui ka ti dun em em.






"Kan inneih hunah chuan nitin ka nu ei siam i ei ṭhin dawn nia" a rawn ti sup a. Ka thil ei lai ka hak ṭep. Heti hian a ti ve deuh ziah. Kan inngaihzawn aṭang ni hnih em pawh a la liam lova, mahse chuti chung chuan inneih a sawi kai tawh chu a nia.






Thil kan ei zawh chuan ka puar bawk a, mut er er mai ka chak. Hmingthana chuan "I puar viau em ni?" tiin min rawn melh zawk a, ka bu nghat, "I nu ei siam thiam lutuk vang vek" ka ti tel hram bawk.






Rei deuh fe ka ṭhut hnu chuan "ka mal ngheng khan mu mai rawh" tiin ka darah a rawn chelh a, a tha a rawn pe deuh a, a hnuah chuan a mal nghengin min mut fel tir der. Ka sam chu a rawn khawih a, ka mut te pawh a tichhuak lek lek.





Hmingthana hi kan inngaihzawn hma aṭang pawha ka lo biak ve fo tawh ṭhin anih vang nge maw ni inngaizawng tir pawh kan ang ka ti lo. Rei tak lo inkawp tawh kan ang ka ti mah zawk. Chu lo rengah, amah Hmingthana hian min treat dan a thiam em a, ka laih ngei ngeina tura ka rinah pawh ka lai chhe em em hran lo. Tunah pawh a mal nghenga ka mut reng hi.





Hmingthana chuan ka kut chu a rawn la a, thil vawt deuh thler chu ka kutin ka feel thei. Ka kut ka en chuan bracelet sin nalh zet mai hi min lo buntir chu niin. "A nalh lutuk" tiin ka ṭhuchhuak nghal. "En chiang deuh rawh" min tih avangin bracelet chu a hma aia uluk zawk mahin ka en leh a. Tuna a bracelet min buntir hi silver rawng a ni a, chain karah chuan pearl te tak te te, a khat tawkin a awm a, pearl mum tinah chuan letter pakhat a inchhu vek. Khawi aṭanga en ṭan tur nge ka hre lo.





Ngun deuh zawkah ka en takah chuan Hmingthansanga hming ka hmu thei, letter chu a la zawh loh avangin ka en leh a, ka hmuhchian takah chuan ka nui tawp. *Hmingthansanga duatnu* tih a inziak chu niin.





"Hei hi min buntir ve rawh" tiin a bun ang chiah chiah chu a rawn phawrh leh a. Bracelet chu lain a kutah chuan ka buntir a, "Engtikah nge i siamtir hman a?" ka buntir pah chuan ka ti a, "zan tir lamah Mawitei kha buaipui turin ka ti alawm, hetiang bracelet hi an chah thar thu a sawi a, chuan ka duh ang ka chhuttir a" a tih chuan amah chu enin ka nui var var.





"Ka bunlai hi en chiang ve rawh" a tih chuan ka en ve a, ka nui leh tawh. A bunlaiah thung chuan *Mawipuii bialpa* tih a chuang ve thung. "A hma chuan hetiang thil hi ka ti ngai lo. Ka tan pawh a hmasa ber a ni. Ka nuna i rawn lan aṭang khan zawi zawiin min thlak danglam a ni ber. Tuna ka bun mek ang te hi ka bunin ka ring chhin ngai lo. Ka nunah danglamna nasa tak i thlen a ni.




Ka tan chuan i hlu takzet. Kan inngaihzawn hmaa i titauh te khan duat taka thlem che ka chak ṭhin, i titauh loh lai pawha duat em em che ka chak reng ṭhin bawk, chuan tunah chuan chutiang chu ka tithei vek tawh bawk a" tiin ngun zetin min en a, a thilsawi avang chuan ka hlim a, ka hmai erawh a sa leh hat hat tawh. "I awmdan zawng zawng hi nangmah duat min tichaktu vek" a ti leh a, ka biang a rawn chul bawk. Hepa hian min chhaih vel hi nuam a ti ve hrim hrim nge pawh ka hre lo e a.

[Te-i Mrs Ambrose]

DÉSESPÉRÉ
By: Te-i Mrs Ambrose


Chapter 6




Kan let leh lamah chuan Hmingthana hnungah ka bei hle hle a, a nuam takzet. Heti tak hian mipa pakhat avanga ka hlim ka ring ngai lo. A bulah ka thla a muang a, ka hahdam viau bawk. Amahah hian hahdamna ka hmu a ni ber.




"Duatnu, muhil suh aw" tih pahin a kawnga ka chelhna chu a rawn vawn hnan a, "muhil lovang" ti chungin ka la chhing reng tho.





"Duatnu, kan thleng" a tih takah chuan ka meng chhuak a, kan in kawt kan lo thleng reng tawh chu niin. "Kan va tlan rei lo ve" tiin zawi muangin ka chhuk a. "Thingpui lo in la" ka tih chuan a lu a tuai zeuh a, "Nidangah ka rawn leng zawk ang. Mizo te tih ṭhin dan ang ngeiin ka rawn rim ang che" a tih chuan ka nuih tawp.






Lut hmasa tura min tih avang chuan ka inhersan a, ka ngai ve dawn riauvin ka hria. Ka lehhawi leh zet a, amah chu ka en a, mahse ka sawi mai thei lo. Ka la pensawn lo hrim hrim bawk a, kan la indin hnaih viau. Amah zawk chuan ka kuta rawn chelhin "Ka lo ngai viau ang che" a ti a, ka kut a hmer vang vang hnuah a thlah a, "Kei pawhin" tiin rang zetin ka hawisawn a, ka kal nghal nal nal bawk.






Zan lamah chuan ka inkhawm ve a, kan ban chuan ṭhalai lama kan hruaitu U Madika chuan "Mawipuii chu i fel ṭhin hle mai" min rawn ti a, min nuih vur vur bawk. U Madika hi chu hna nei tawh a ni a, amah a hmel a chhe lova, kohhran lamah a lo inhmang bawk nen nu ṭhenkhat chuan an fanu pasal tur atan an duh viau zel.





"Karleh lamah hian ṭhalaiin inhlawh nan motor sil kan tum a, lo tel ve la" a tih leh chuan "Ka lo tum ve dawn nia" ka ti ve mai. Rovi nen kan kohhran a inang lova, kan vengah hian naupang te kan nih lai aṭanga awm kan ni lova, pawl sawm ka zir laiin kan rawn insawn ve chiah a, ṭhian ṭha em em tia han sawi tur ka nei lem lova, thil tihkhawmnaah pawh hian ka tel lo leh zeuh ṭhin. Hetia a mimal takah min sawm tawhnaah erawh ka tel lo ngai lo.





U Hminga leh u Zorema te ka bula an lo kal hnuin U Makdika chu a kalsawn a, kan unau thum chuan kan inzui haw dial a. In kan thlen chuan a tlai ve deuh tawh. "U thingpui in in duh ang em?" tiin ka u te pahnih chu ka en a, lu an lo thing dun nghut. "Anih ka va inthlak mai dawn" tiin an mi chhan zuina pawh ka nghak tawh chuang hran lo.





Ka inthlak zawhin ka chhuak leh a, ka nu leh pa te pawhin in an lo thleng ve tawh. "Nu, thingpui in duh ang em?" tiin ka zawt a, "A sen hangin lo lum rawh aw" ka pa zawk chuan a ti a, hetia ka zawh kher chhan chu a changin thingpui in lova mut nghal mai an duh ṭhin a, a changa an in leh ṭhin vang a ni.





Thingpui lum turin choka lamah ka lut a, ka phone ka ah chu ka phawrh a, Rovi te pawh an bang tawh a ni ang, vawiin lam chanchin min zawt leh chung tawh. Hmingthana nen pawh kan inbe zeuh zeuh. An ṭhian hovin an leng tih a rawn sawi a, an lenna hmun aṭang pawha min rawn bia chu ka tan thil nuam lo a ni miah lo.





Thingpui chu ka nu leh pa ka pe a, midang inleng kan nei lo hlauh a, ka hahdam phah viau. Thingpui an in chhung zawngin an bulah ka ṭhu ve a, an in zawhin no ka khawm a, choka lamah bawk ka lut leh. No chu ka sil zung zung a, ka chhuah leh chuan ka nu leh pa chu ka mangṭha a, ka pindan lamah ka lut zui nghal.





Rovi chuan *Message hi chuan inhrilh chhung a rei si, inhrilh kim a har bawk si, Naktuk tlai lamah ka rawn leng ang* a ti a, ka pawm zawk tak a ni. Hmingthana nen pawh chuan kan inbe ve reng a, nuam ka ti a, lehlamah erawh chuan Mampuii a la reh veng veng avangin ka awm a nuam famkim thei lo.



______________________________________





Rovi chuan min rawn call a, ka chhan rualin "In in kawtah ka awm tawh, min lo hruai la" a rawn ti a, a ṭul lo hi ka va han ti tak. "Lo lut mai mai rawh, u Zorema leh u Hminga an awm lo ve ve" ka tih takah chuan a hang up zui a. A rawn luh chuan vei a neih loh hmel kher mai.






"Teh maw, i u awm loh hi chuan ka duh duhin ka tal ngam a, mahse a awm hian a nuam ka ti ru ve veng veng zel bawk si" a ti sar sar. "I kherh ngat ngat dawn nia" ka tih chuan "Kherh theih te chu ka chak alawm, mahse tum leh lo ngaihtuah lawk ang hian a awm theih loh ṭhin. Ka bul hnaihah a awm tawh hi chuan ka zam chhe vek zel alawm" a ti hap. A dik ve rengin ka hria, kan duh zawngte bula kan awm tawh hi chuan tum angin a awm ngawt theih loh.





"Thingpui hmeh tur ka rawn keng a, ka bawl ang a, nangin thingpui i lum thung ang, chuan in pahin Ts-a chanchin chu i sawi ang" tiin Rovi chuan ro a rel zat zat.





Choka lamah kan inzui a, thingpui ka chhuan laiin ani chuan a ei tur rawn kente chu a bawl a. Thingpui ka siam zo chiah tihin u Hminga leh u Zorema an lo haw a. "E, Rovi a lo leng anih hi" u Hminga chuan Rovi a hmuh rualin a ti nghal.





"In duh ve em?" lai zetin Rovi chuan a ti a, u Zorema pui lah chuan "I phal chuan kan lo ei ve ang chu" a ti dut. A chhangtu hi u Zorema kher a ni sia, Rovi chu a lai chhe leh ang chu. "Anih lo nghak lawk rawh u, thingpui ka lum belh ang a, kan in ho dawn nia" ka tih takah chuan u Zorema leh u Hminga chuan ṭhutna tur an pawtchhuak ve ve a, an ṭhu zui a.





Thingpui ka lum zawh chuan dawhkan lamah ka chawi phei a, kan zavai mai chuan sawi tur pawh kan hre mang hlawm lo. U Hminga hi a ṭawng hnem ve bera a ni mai. Rovi chuan engmah a sawi lo. U Zorema hi awm lo sela chuan a ṭawngtam ber a ni ngei ang. U Zorema lah a ngawichawi bawk si nen, kan buaithlak tlang a ni e.





"Engtikah nge Enternal exam hi in neih dawn?" u Zorema chuan a ti a, Rovi'n chhang mai se ka tih avangin kei chu ka ngawi reng. "Kar hnih thum hnu velah chuan kan exam tawh maiin ka ring" a hnu feah Rovi chuan a chhang a, a chhan zawhin ka malah a rawn sik vak anih chu.





"In va graduate teuh tawh ve, semester khat in kal leh chuan in graduate tawh mai dawn anih chu" a thingpui in pahin u Hminga chuan a ti a, kei pawhin ka ngaihtuah a, Pathian zara kan dama, kan graduate ve thei te anih chuan kan zir zawm loh vek pawhin hna te kan zawng ve duh dawn sia, hun hi a inher chak ngawt mai.






Thingpui in zawhin ka u te chuan an hna khawih zawm ngai an neih thu sawiin an pindan ve veah an lut a. Keini pawh kan eina kan sil zawhin pindan lamah kan inzui nghal daih. Khumah chuan kan ṭhu a, "A chehpakai aṭangin ka hre duh aw" phur tawkin Rovi chuan a ti a.






Thil thlen dan vel chu ka hrilh a, a changin a ṭhen sung a, a changin a hmui te a hup thul. A over hi ka ti reuh tak tak a ni. Bracelet chungchang vel ka hrilh chuan ka sawi zawh hma hmain ka kut a rawn la a, "Ka lo chik reng reng hleinem, a va bei cute ve" tiin ka bun lai chu a thlek deuh vang vang.





"Ngaihzawng neih te min ti chak ve vek alawm, i u lah hi a hopeless ropui si" tiin a tum nghal hmak. "Ngaihzawng a la nei ngai hleinem, han be ve reng reng la, beidawn nan tal pawh" ka tih chuan min beng vak. "Beidawn nan han intisak kher" a ti nang nang mai.





"A ni alawm le. Mi hopeless kan tih deuh te pawh hi kan duh zawng an nih chuan an lakah hian beisei kan nei lo ti chungin a ruk tak chuan eng emaw tal hi kan beisei ve reng ṭhin. A ral aṭang ringawta kan duh te lakah pawh hian beisei tur eng emaw kan nei ṭheuh. Kan beisei ngam loh tak tak chuan kan bansan nge nge zel.





Chutiang ni lova, beisei ka nei lo ti chung sia kan la duh ve reng chuan eng emaw beisei ruk kan la nei tihna a ni mai. Mi beisei bo lutuk te kan beisei tawh loh chinah chuan kan bansan mai zel a nia. Nang pawhin be ve chhin la, chuta beisei tur i hmuh loh chuan harsa mah se, midang i zawng mai tur a ni.





I hlutna hmuthiam lotu lakah chuan eng ang pawhin I hlutzia lantir tum ṭhin mah la, a hrethiam ngai chuang lovang. Chuvang chuan nangmah hluta, ngaihsak tu tak tak che zawng zawk rawh.





U Zorema hi ka u mah ni se, a rilru puthmang ka hrethiam bik lova, hmeichhe lam chungchangah ngat phei hi chuan eng mah sawi tur ka hre lo. Tlem chuan i tan a zahthlak mai thei, hmeichhe tana mipa biak hmasak te chu mipa ṭhenkhat hmuh dan che chu a dang nghal dawn tih ka hria.





Mahse, tuna mi hi chu ka u anih avangin ka chiang. A hmuh dan che a dang lovang" ka ti dap dap.
"Ka u chuan a hmuh dan che a thlak lovang, i va be ringawt dawn, zahthlak vak a awm lo. Chutah beisei tur i hmuh loh chuan midang i zawng dawn nia, i ṭha a, mipa hmu zo lo pawh i ni lo" tiin a darah a hmer vang vang. Ka ṭhiannu a ni a, ka u a duh tih ka hre bawk a, an inngaihzawn chuan a lawmawm dawn lutuk. A tan chuan a ṭha ber ka duhsak. Mahse, ka u hian a hlutna a hriatthiam lova, a ngawihsan reng anih chuan thlah turin ka ti ang. A chhan chu a nat reng ka phal dawn miau lo.





College kan kal leh tawh a, Mampuii erawh a lo la thleng lo. Rovi nen chuan Gate kawtah kan lo nghak a. Tun thlengin Rovi nen min la be lo ve ve a, keini pawhin kan be hek lo. Phone kaltlanga thil sawi fel ai chuan hmai chhana sawifiah kan duh vang zawk a ni.





Mampuii chu a lo thleng ve ta hram a. Min hmuh chuan a nui deuh sak mai. A lo chhuah rualin a lam chu kan pan a. "Misual ho, vawikhat mah min rawn be lo" tiin a inkuangkuah than. "Hmaichhana engkim sawi kan thlang a" Rovi chuan a ti a.





Kan pathum chuan kan class neihna tur lamah kan inzui ho a. "Mi te in rawn biak ka ring ve a nia" a tih leh chuan "keini pawhin kan ring ve tho alawm" Rovi chuan a ti leh then. Class-ah chuan kan ṭhu ho ta dial a.





"Thil hrilh duh che ka nei a" ka ti sap. Mampuii chuan zawhna mitmeng nen min rawn melh a, a beng bulah zawi tein Hmingthana nen kan inngaihzawn thu chu ka hrilh a. Mampuii chu a ngawi deuh vang vang. "I duh viau te chuan ka pawmpui lo thei hleinem che, kei chuan i nat ka hlau a, chuvanga duhpui lo mai che chu ka ni. Mahse, i hlimna dal erawh ka duh lo, ka tum bawk lo. Bul in ṭan tawh ta sa sa, i rilru nawm lohna tur engmah ka sawi tawh lovang" a tih chuan ka kuah vang vang ringawt.





"Lalnunmawi, min that mai dawn, min thlah teh" Mampuii'n a tih chuan nui hak hak chungin ka thlah a. Ti hi chuan ka awm pawh a nuam famkim tawh ngei ang. "Engtik khan nge in lo nih hman a?" tiin Mampuii chuan min rawn en a, kei chuan thil thlen dan vel chu ka lo hrilh ve a, a lo ngaithla ve kar mai.





"Tihian bialpa i nei ve leh ta mai chu a nia, a mak ka la ti" a tih chuan Rovi chu a bu nghat nghat. "Kan ṭhian ho zingah chuan Mawipuii hi a lo ler ber anih hi" Rovi'n a tih chuan ka ner nang nang a, amah Rovi leh Mampuii erawh an nui dun vur vur thung.





Zirtirtu a lo luh takah chuan kan ngawi ta ṭhap a. Kan zirtirtu lah chuan assignment min la pe zui. Ka ning thlawt. Kan HOD (head of department) pui hi chuan CAT (continuous assessment test) zawh hian assignment hi min pe ngei ngei zel.





Zirtirtu a chhuah chuan ka thaw huai thei. Class kan neih loh avangin room kawta ṭhutnaah kan ṭhian thum chuan kan ṭhu vel mai mai. Lunch hun a la nih loh avangin canteen lam kan pan peih lova, kan ṭhian thum chuan kan inngheng deuh ar ar hlawm.





"Kan graduate hunah eng nge tih zawm in tum?" ka ti a, Mawipuii chuan "kei chu, competitive exam hi pek ve hrim hrim ka duh" a tih laiin Rovi thung chuan "la kal zawm ka duh" a ti thung. "Kei pawh kal zawm leh mai ṭhain ka hria. Master te hi dam chuan han zo ve phawt ila, teaching line lama kal ka duh a" ka tih chuan





"I class chu a nuam lo thei ngawt ang. I lo zaidam zawk zawk bawk si lova" nui chungin Rovi chuan a ti a, a banah ka bensak ringawt. "Zirlai te lakah chuan tun ang reng hi ka ni dawn lo. A sual lakah chuan ka sual tho ang" ka ti a, kei chuan hna sang hi ka duh em em hran lo. Mi zirtir thei tu nih ka chak ber.






Lunch ei a hun chuan canteen lam kan pan a, mi pawh an lo awm leh ṭeuh tawh. Nidang zawnga kan hmuh ṭhin Hmingthana te ṭhian ho erawh canteen-ah hmuh tur an awm hauh lo. Ka hnual ve deuh. 5th sem kan nih tawh avangin kan core subject chiah kan zir tawh si a, department dang nen kan inhmu khat a, Hmingthana te nen phei chuan building khatah kan awm lo bawk nen, lunch hun lai hi kan inhmuh ve theih hun chu a ni mai.





Ei tur kan lam zawhin ṭhutthleng awlah kan ṭhu a, "Vawiin chu Ts-a te an reh hle mai" Rovi chuan a ti a, kei chuan engmah ka sawi lo. "Naktukah kan hmu leh nawlh mai ang. Bialpa neii hian a bialpa a ngai ang e" Mampuii'n a tih chuan "Ni chiah mai, chu lovah a bialpa te an awm chuan keini hian kan chang lo palh ang, chuvang chuan an awm loh hi a ṭha a ni" Rovi chuan a lo ti ve bawk a.





Chutia lunch kan ei lai chuan kan bulah Jb-a kha a lo ṭhu ve nawlh. "Ka ṭhut ve a rem em?" a tih chuan "Rem lo pawh ni se i ṭhu tawh reng alawm" Rovi chuan a ti a, Jb-a chu a nui deuh vur vur mai. "In ṭhian ho zinga i tet ber chhan ka hre ta chiah, i lo ṭawng theih em vang anih hi" a tih chuan Mampuii nen kan nui dun hak hak.





"Nui reng reng suh u, ka lungawi miah lo a nia." Rovi'n a tih chuan kan nui lai chu kan tawp ve ta hram. "Ei tur ka va lam ve lawk ang e" tiin Jb-a chu a tho chhuak a. "Jb-a hian a duh deuh tlat chein ka hria. Kan luhtirh phei kha chuan a biak ṭhat ṭhin em che kha. Mahse, ngaihzawng i nei tih a hriat hnu khan a reh ta vang vang kha a nia" Mampuii chuan a ti a, kei chuan min duh awm pawhin ka hre lo.





"Het, lo duh suh se, a lo duh anih pawhin 'No Vacancy' kan Ts-a Duatnu anih hi" Rovi'n a tih chuan ṭul lo ti zetin ka lu ka thing nghat nghat. Jb-a chu a rawn let har lo. A khat tawkin keini ṭhian ho chu zawhna min zawt leh zeuh zeuh ṭhin. Jb-a hi mipa cool em em chu a ni hran lo. Mahse, ṭawngtam ti a sawi tur pawh a ni chuang lo. An department ho chhuan ve em em mai kha a nia, sawi awm tawk pawh a hre khawp mai.





Tlai lam class-ah chuan ka zawi ngawih ngawih tawh. Ka mut te hi a chhuak viau. Kan zirtirtu lah chuan a sawi tui mai bawk si. Mutthluk a rem si lova, ban ka chak tawh tak zet.





A tawp a tawpah chuan kan haw ve thei ta hram. Gate pawn thleng Mampuii kan va thlah a, kan invai lauh lauh mai. Mampuii te tlan liam hnu chuan Rovi scooty park na lam kan pan dun a, ka la zawi deuh viau tho. Vawiin ka tlan loh ni a ni chu a lawmawm ka ti. Rovi hnungah ka'n bei hle hle mai ang e.




Rovi lah chuan a scooty chu tinung ta mai lo chuan a bulah chuan a han inen ṭha leh rih. Lip balm a inhnawih mawlh mawlh a, ka ner nang nang a hmuh chuan "Scooty khalh laia hmui hil rep rupa awm ka duh teuh lo" a tih chuan chhan pawh ka chhang lo.





Kan bulah chuan bike hi a rawn ding a, ka lehhawi chuan Jb-a a lo ni. "Vawiin chu ka lo thlah ang che chu" tiin a helmet chu a phelh a, a nui deuh vur vur bawk. Ka chhan hma deuhin "Ka bialnu chu keimahin ka lo phur mai ang" tiin ka bulah bike dang a rawn ding ri deuh hrawk.




Hmingthana hmel chu a lang rum lam lek lek. Rawn thleng hlim hlawl si engtin nge Jb-a thilsawi kha a rawn hriat hman ni. Jb-a chu a nui deuh suk a, "Anih ka va tlan hmasa mai ang e" tiin a helmet a khum leh a, a tlanchhuak ta nghal a. Hmingthana nen kan inmelh ta reng. Vawiin chhunga ka vawikhat hmuhna a ni.





_________________________________





ZAWMNA






Hmingthana chuan "Keiman ka thlah ang che" a ti a, a bike chu a tithi nghal a. "Vawiin chu i ṭhiannu hi ka lo thlah leh mai ang" ti leh zatin Rovi chu a melh a. Rovi chu a bu nghat nghat. "I inthlahtir mai dawn em ni?" hrechhuak thut ni awm chuan min lo zawt ṭha leh a. Lu ka lo bu zeuh ringawt.

"Anih ka tlan hmasa dawn" tiin Rovi chuan a scooty chu a start a, rei lote hnuah a ban min vaikhum zeuhin a tlan ta nghal a. Hmingthana chu a bike aṭangin a chhuk a. Min rawn din hnaih a "I dam lo em ni?" tiin ka chal a rawn khawih a. "I pang lah a sa si lo" a tih leh chuan "Ka dam alawm, ka zawi mai mai, ka mut a chhuak" ti a ka chhan chuan a nui deuh suk mai.

"Ka duatnu, mut duhnu" tiin two wheeler kan park na piaha ṭhutthleng awm lam chu min panpui a. An ban deuh vek tawh avangin mi hmuh tur pawh an awm tawh mang lo.

Ṭhutthlengah chuan min ṭhutpui a, a darah nghengin mit ka chhing nghal. "Muhil suh aw, ka thlah haw tlai lutuk che chuan i chhungte'n mak an ti ang" a ti a, chhang lovin ka bu nghat ringawt. Tlai lamah khan ni sa vur si lovin a uap deuh churh mai a, kha khan min hmet zawi zovin ka hria. Zanah ruah a sur ka ring, a uap emai.

"Vawiin nilengin ka hmu lo che" ka ti a, amah pawh ka en peih chuang hran lo. "Kan zirtirtu in extra class a la a, kan chhuah meuh kha chuan dar khat a lo ri tawh a, canteen-ah in lo awm tawh lova" tiin ka kut chu a rawn chelh a, ka kut zungtang karah chuan a kut zungtang chu a rawn rawlh leh tawh. "Rei lo te ṭhu ila, ka thlah dawn che nia" a tih chuan ka bu leh nghat nghat.

"Duatnu, haw tawh ang aw" a tih chuan ka harh a. Ka lo muhil hman emaw ni le. Hmingthana chuan min pawt tho a, min nuih deuh suk suk reng. A bike chu a tinung hmasa a, la lawm kai lovin ka bulah a ding reng. "Kan tlan chhuah hunah ka hnungah i bei leh dawn nia" a tih chuan ka bu nghat nghat. Hmingthana chu a hawikhual thuak thuak a, tumah a hmu lo a ni ang chu, ka biang a rawn fawp zeuh, kei pawh ka nuih var var mai.

A bike ah chuan a lawn a, a ngai te bawkin a kut min rawn pe leh, kei pawh a hnungah chuan ka lawn ve nghal. A sawi pawi ngai lovin a hnungah chuan ka bei a, "Muhil suh aw, i tla palh ang" a tih chuan "Mm, mut loh ka tum ang" ka ti ve a, kan tlanchhuak ta nghal a.

Kan tlan chak hran lova, a hnunga ṭhut chu a hahdamthlak hle. "Duatnu, thil ei i duh em?" a tih chuan "Ai, duh lo... Khaw uap lutuk khan min hmet zawi, in thlena, ka khuma mut nghal ka duh" ka tih chuan a taksa a che dat a, a nui anih ka ring.

A din rual chuan ka meng chhuak a, "ka rin aiin kan thleng hma" tiin ka chhuk a, "Zanah min lo bia ang em?" tiin ka en a, vawiin chu nilenga ka hmuh loh vang kha nge ka hmuh lai ngei pawh hian ka ngai. "Min ngai deuh em ni?" a tih chuan ka bu nghat nghat.

Hmingthana chuan a lama min pawt hnaiin ka chal a rawn fawp deuh vang vang a. "I duh phawt chuan zing lam dar khat tlangah pawh ka rawn bia ang che" min thlah hnu chuan a ti a. Kei chuan hmuia infawh vel aiin chala infawh hi a romantic ka ti zawk a, a thlamuanthlak ka ti hliah hliah ṭhin bawk.

"Min lo biak theinghilh suh aw" ka tih leh chuan a bu nghut nghut. "Ka ngai che" hmaichhan ngeiah chuan a ti a, chhang lovin ka nuih sen sen ringawt. "Sawi ve la" a tih chuan "I kal hunah ka sawi ang" ka ti a, mak tih hmel zetin min en reng. "Ka kal chuan engtin nge ka hriat theih tawh ang a?" tiin min zawt a, "I hre mai ang. Tlan hmasa rawh, ka lo thlir liam ang che" ka tih chuan min en vang vang hnuah a bike chu a tinung a. A tlanchhuah rualin ka phone ka phawrh a, ka call nghal.

Amah ka en chuan a ding dat a, a phone chu a phawrh a, ka lam a rawn hawi nghal. Engmah sawi lovin phone chu ka bengah ka chuktuah reng. A lo chhan chuan "Hmingthansang, ka ngai che" ka ti a, lehmah ami chu a rawn lehhawi a. "Min ngai ve" a ti sup. "Imm, ka ngai che, ka ngai lutuk che, min lo biak loh chuan ka lungawi miah lovang" tiin ka phone chu ka dah nghal daih. Ka hlim a ni, Hmingthana hian ka nunah hlimna a thlen nasa lutuk.

In chhung lama ka luh chuan mutchhuakna rau bawk khan min man leh tawh. Choka lam ka pan nghal a, ka nu leh u Zorema an lo awm a, u Zorema ka hmu hlawl chu mak ka ti deuh. "Naute, i lo bang tawh elo?" u Zorema chuan a ti a, ka bu nghat nghat.

"I va nawm loh hmel ve" min ngaihtuah hmel zetin u Zorema bawk chuan a ti leh a, "Tlai lamah khan a uap lutuk a, ka zawi vek" ka tih chuan ka nu leh u chuan min nuih dun suk suk mai. "Lo va mu la, ei dawnah kan lo kai tho dawn che nia" an tih chuan ka hnial buai peih lo. Lu ka bu nghat a, ka pindan lam chu ka pan zui a.

U Zorema chuan min lo zui a, "U eng nge ni ta" ka tih chuan "kal rawh" tiin min nam kal dat dat. Kan pindana kan luh chuan ka pheikhawk ka phelh a. Ka inthlakna tur lain bualin lamah ka lut daih. Bual inah chuan ka inthlak a, ka hmai ka phih zawhin ka chhuak a. Khumah ka mu zui nghal.

U Zorema chuan ka chal a rawn dek a. "I pang chu a dai anih hi. Puan i sin duh em?" a tih chuan ka duh thuin ka chhang a. U Zorema chuan puan min sintir hnuin ka luah a rawn chul a, "tui deuhin mu rawh aw" tiin ka chalah a fawp leh. Ka nuih nghal var var. Kan chhungkuaah chuan a naupang ber ka ni bawk a, ka awm te a nawm loh hlek chuan min ngaihsak em em vek zel, chu vang chuan kawng ṭhenkhatah ka panchang leh tlat zel. Hmingthana lakah ngei pawh pangchan hi ka chak em em zel.

U Zorema chu a chhuak zui a, mit ka chhing a, ka meng leh. Ka phone a hla chu ka play a, ka muthilh dawn laiin phone chu a lo ri a, ka en chuan Hmingthana a lo ni. Ka lak rualin "in ka thleng tawh" a rawn ti a. "I van thleng hma" ka ti ringawt.

Kei ang em em a mut duh hi Hmingthana hian a hriat pawh ka ring lo. "Eng nge i tih a?" thawm a ri leh deuh sat sat ṭhin a, a inthlak anih ka ring. "Ka mu a" ka tih chuan lehlam ami chu a rawn nui deuh hawk. "Muttui le ka duatnu" a rawn tih chuan "Nangpawh" ka ti a, a mu ve dawn lo tih ka hre leh nghal a, "A ngai leh lo" ka ti vat. Hmingthana nen chuan rei pawh kan inbe zui tawh lo. Ka muhil chu a ni nghal mai.

Ka kawngka an lo kik avang chuan ka harh deuh reuh. Tu emaw hian min rawn sawi zui bawk, "Naute, i harh em?" tia min sawi leh takah chuan ka meng a, U Zorema chuan min lo sawi harh chu niin. "U mumang ka nei nuam asin" ka tih chuan ka u chu a nui suk. "I tho peih em? Chaw ei loh a ṭha lova" a tih chuan ka mit ka nuai a, ka bu nghat.

"Imm, lo tho la, chaw kan ei dawn nia" ti lehin u Zorema chuan min chhuahsan a. Kei pawh tho zuiin ka zi mar ṭalh ṭalh. Ka pindan chu light ka tieng a, pawn lam chu a lang thim deuh vek. Bual in lamah lutin ka hmai ka va phih thuak thuak.

Ka chhuah chuan ka chhungte chuan dawhkan an lo kil far tawh. "Kan naute pawh a lo tho alawm" ka pa chuan a ti a, a bula ṭhutthleng awlah chuan ka ṭhu nghal. Ka nu zawk chuan ṭawngṭaina a hun a hmang a, a ṭawngṭai zawhin chaw chu kan ei zui nghal. "A thim tawh sia, a tlai em?" zawh ber pawh ka nei hran chuang lo.

"Tlai love, khua a dur zawk anih hi" ka pa chuan min chhang a. "Mut a van tui dawn" ka ti a, zan ni leh vat vat se ka ti. "Kan naute hi chuan mut a kham thei dawn lo anih hi" u Hminga chuan a ti a, ka bu nghat nghat.

Chaw ei kham chuan thleng ka sil a, ka sil zawh chuan ka pindan lam ka pan nghal. Zan dang ai zawngin chaw kan ei har a, chuvang chuan ṭhu hahchawl lem lovin ka zir tur chu ka keu nghal. Nakinah chuan Hmingthana biak duh dawn avangin lehkha ka zir thei tawh lovang.

Current a thih thut ka hlauh avangin ka phone pawh ka charge a, lehkha chu ka zir mawlh mawlh. Darkar khat leh a chanve dawn ka en hnu chuan ka phone charge chu ka phawi a, Rovi leh Mampuii chu group-ah an bengchheng dun leh viau tawh. An inhnialna lah a ho, Jb-a chungchangah an lo inhnial vel chu niin.

Ka online tih an hriat chuan *Bialpa hi i nei ber, online thei reng reng lo mai* Rovi chuan min ti a, bialpa ka neih tak vanga group a lut lo pawh ka ni tawp si lova. *Chu chiah, bialpa nei nu hi a, keini pawh hi min be ṭha peih tawh lo anih hi* Mampuii'n a ti ve thung.

*Bialpa ka neih hma pawhin group-ah ka rawn lut tlai ṭhin tih in hre ve reng* tiin ka va thawn ve a, thildang an sawi zawm daih. An phakar hi ka ti tak tak. Hmingthana message ka chang ru deuh a, mahse min lo be lo hrim hrim. Eng nge a tih ang tih te chu ka ngaihtuah neuh neuh. Group-ah pawh chuan ka ṭawng tui thei tak tak lo.

Dar sawm rik dawnah Hmingthana message chu a rawn thleng ve hlawl a. En pawh ka en peih lo. A khat tawkin message chu a rawn thleng leh ṭhin. A hnu chuan ka en ve ta nge nge a.

*Duatnu*
*Duatnu, sorry ka buai lutuk a*
*I online reng sia, i thinrim em ni?*
*Ka tihpalh, thinrim lo la*
*Keima duatnu, Duati, min chhang la* tih te a ni nawk. A eng a mah chu ka chhang lo. Nidang ang chu ni se lungawi lohna tur ka nei hran lo. Mahse zanin erawh tlai lamah khan ka hrilh vek a, a buai dawn pawhin a hma khan min hrilh thei ve reng.

A message ka seen zone avang chuan Hmingthana chu a awm a nuam lo a ni ang. A rawn call a, ka chhang chuang lo. A rawn tih nawn tak tluk tlukah chuan ka la a, mahse ka ṭawng lo hrim hrim. "Duatnu, titau tawh lo la" dam tak hian a rawn ti a, ka chhang miah lo.

Min nin thuai chu ka hlau ve tho. Mahse a laka pangchan vel hi nuam ka ti ṭan miau si, duat taka min biak a, min thlem te hian a nuam ti ṭhin a, hetiang reng hi nih ka duh. Mipa ṭhenkhat tan chuan ngaihzawn ka harsa in ngaihzawn ka hahthlak mai thei. Mahse, ka sim thei miau bawk si lo. Inngaihzawnna kawngah chuan kan zia kan thup a, keimahniah inzahna a awm reng chhung chu kan la inpawh tak tak lo tihna a ni a, chutiang inngaihzawnna chuan hahdamna tak tak a thlen mawh ṭhin.

"Ka tihpalh, min be ve tawh la" a tih leh pawh chuan ka la chhang duh lo. "Duatnu, sorry" a rawn ti leh. "I buai dawn chuan min hrilh sa ve mai la, i message ka chang ve char char a" ka ti ve ta nge nge. Pawn lamah lah thil a thaw vuk vuk tawh a, chhiatna a thlen dawn lem loh chuan thlamuang taka mutna tham chu a ni tawh.

"Kan tihtur kan zawh nghal mai ka ring a, ka rin aiin kan buai rei a" a tih chuan "Eng nge in tih?" ka ti let a. Lehlam a mi chu a ngawi reng. "Mawh, eng thil nge in tih?" ka tih leh chuan "Racing" a ti a. Phone chu ka dah nghal hmak.

Hmingthana chuan a rawn call leh a, ka chhang duh lo. Ka titawp nghal hmak zel. Racing a nei kha ka duh lo a ni lo, a nun a ni a, a thiltih thin zawng zawngah inrawlh ka tum vek hran lo. Kan inngaihzawnna a la rei lova, ka duh ang anga control tumna ka nei ngai lo.

Racing chu a hlauhawm tih ka hria, a tel ve loh pawh ka duhpui bawk. Mahse chutiang anih avanga vau vel a, tel lo tura hrilh nghal tut tut ka tum lem lo. Ka chetzia leh awm dan aṭanga ka duh lohna lantir kha ka duh tawk, ani pawhin a duh chuan keimah avangin a racing neih ṭhin pawh a ṭhulh ve mai turah ka ngai.

Mahse, chutiang em pawha ka tih hma hauhin a racing neih ṭhin avangin dawt min hrilh nghal a nia. Hetiang kan nih chuan nidangah lehzel engtin nge kan awm ang, thil ho te teah dawt min hrilh reng dawn tihna em ni? Hetiang a nih dawn chuan kei chuan ṭhen mai ka duh. Mipa rintlak leh rinngam theih tur ka duh, dawt min hrilh tu tur ni lovin.

Hmingthana chuan message leh call in min rawn biak chhawk reng. A hnu chuan ka inngaihtuah vang vang hnuah thutlukna ka siam thei hram. Tun anga thil ho thamah pawh dawt min hrilh anih chuan hmahun a êng tak tak chuang lovang. Chuvang chuan ṭhen mai ka thlang zawk.

*Inthen mai ang* tih ka va thawn a, a rawn reply rang kher mai. Mahse chhan let erawh ka tum lem lo thung. Kei chuan mi rin ka harsat a, Hmingthana erawh ka ring hle anih kha . Mahse, ka rin ang a lo ni lo nge? A racing neih pawh sawi duh lovin dawt min hrilh a thlang a, dawt a tel tawh chinah chuan thil hi a dik thei tak tak thei tawh lo. Chuvang chuan kan thlen thui hmaa inṭhen hi kan tan a ṭha zawk a ni.