TMLK S2 BUNG-17 NA

[Kennelly Bawitlung]

THINGTLANG MISITI LEH KEI

BUNG-27 NA
ZIAKTU: KENNELLY BAWITLUNG


Nilengin awm a nuamlo chu a ni thawthang mai a, Thanpuii min lo biak hun ka ngaichang reng bawk. Mahse a thehhmeh ang hmak maiin a reh vung vung lawi a, a online bawk silo a ṭhiante nena hun hlimawm tak hmang tura picnic kha an ni bawk nen va biak buai em chu ka inthlahrung ve tum hrang a. Rilru nuamlo leh helhkam nei reng chunga lo nghah thlawk thlawk chu ka tun dinhmuna ka tih theih tawk chu a ni rih e.


Mahse zanriah ei kham thlenga a reh tak vang vangah chuan a ni em em tawhlo tiin ka call ta tho a. Mahse a tlang theilo reng reng. Vawi tam ka call nawn a, a tlang eihlo.


Chutah Vivi-a kha a kal ve tih hrechhuakin ka call ta zawk a, ani pawh chuan a chhang thei bik lawk chuanglo naa a ring avang chuan a hre fuhlo anih ringin ka call nawn leh a. Bei a dawng dawn ta maw tihah Thanpuii aw ngei maiin, "Aw Leen, enteh ka phone hi Swimming pool kianga ṭhutthlengah ka bag chhungah ka dah reng sia, pindana kan let hnuah chiah a awmlo tih ka hrechhuaka, pool an khar tawh sia hawn leh kan zu dil tawp alawm. Pool mawngah pawh hmuh tur a awmlo reng reng ka ui lutuk ala thar ṭha asin le. Ka thlalak ruk ho pawh kha a awm vek a," a rawn ti nghal zung zung a, a chuti vang a ni maw biak alo har em em ni.


"Ava zia lo ve mawle i reh ka ti rengah. Tunah in la zawng ami?" Ka lo ti ve vat a.
"Aih hei a vengtu hi a haw duh tawh sia han awm reng pawh a inthlahrun awm ve bawk nen pindan lam kan pan chho mek. A pawi tak tak a ni ka lak zawh rual khan lo thawn tur che ka nia, tuite kha ka han cheng hmasa khanglang alawm mawle a pawi eee," a rawn ti vawng vawng a, hreawm a tihzia a aw aṭang ringawt pawh chuan ka hre thei.


"Inthiamlo duh suh a hmutu in i chiang bawka ka hmu ve angah ka inngai tawp mai a nia. Thlalak vang kha chuan i hun hman tih nawmloh phah suh aw ka inthiamlo zawk ang," tiin ka hnem ve luam a. "Awi a pawi eee, ka phone chu ah ka van ui tak! Miin an ru a ni hrim hrim ang ka bag-ah ṭha deuhin ka thun thlap a, ka hmute chuan zipper pawh a phui ṭha lutuk. La tu chu an awm chiang a ni," a tihchuan ngaihdan pakhat ka nei nghal a. Mahse a nilo ve thei tho bawk.


"Ka pa chuan a hmu ve che em? Vawiinah engtin nge hun an hman?"


"E aw, ipa tak chuan min hmu lova mahse Kimtei nen zawk khan washroom-ah kan intawk a, mahse intawk zuai ang chauhin biak hman lohvin ka chhuak nghal daih a. Min hre tawhlo turah ka ngai ve ringawt. Chuan hmuh tur an awm vak lo, chaw ei lai kha chuan ka hmu a, ṭhiante nen kan nih avangin hotel leh a chhehvel fan kha an tireng a, ka hmuh dun leh na chu hotel greenhouse-ah khan a nimai. Tahchuan thlate an la dun a, chulaitak chu a nia thla ka lakruk sak ni. Ka phone bo ta hi a ni pawi ta ber chu," a ti leh thlawt a, kei ai mahin pawi a tih hmel zawk.


Kei erawhin thlalak hmuh kher pawh ngai lovin ka ṭhiannu hi ka ring a, a phone bo pawh hi Kimtei nen an inhmuh vangah khan ka ngai hmiah bawk. Khutianglai hotel changkanga thleng leh chawl pha tan phone ruk ngawt thu awm hek lo. Bag-a indah ṭha thlap lehnghal, thil pangngai tak chu a nilo alawm. Bakah Kimtei khan Thanpuii nen kan inkawmngaihzia a hre ve kur a, ka pa pawh a hrilh leh daih tawh maithei. Hotel pawh an chhuahsan vatin ka ring nghe nghe...


"A pawilo ka hre hnem tawk tawh bawk alawm. Ka aiawhin ka nu kha min lo ngaihven sak dawn nia aw," tiin ka chah a, alo inhuam khawp a. Thanpuii talin ka nu a ngaihven thei dawn a a zia tak ala awm.


Ka pa leh Kimteite chu tuna hetia inkawp thut an nih ka ring thei tawh tlat lo. A tira Kimtei nihna diktak kan hriatchhuahte khan a hamhaih leh rilruna lutukin ṭawng pawh a ṭawngkhum theilo ni turah ka lo ngai mai a. Khatiang inbumna lian tham tak, pa berin a tihsual vanga chhungkua kan buai hialna kha ala lap ka tireng a ni.
Engpawh nise thudik chu thup hlen theih a ni ngai lova, lan chhuahni a awm leh nge nge ṭhin.


Engkim chu a chiang thawkhat viau tawh a, rilru leh ngaihtuahna zawng zawng a luah khat ti ila ka sawi sual lovang. Inlengte leh ka chhungte titi vawrhna karah chuan ṭhu ve reng mahila an titi thupui takngial pawh ka hrelo. Mahni ngaihtuahna kawmin ka ṭhu ngawi reng a,
thim chhah mup hian min tuam hlup hlup ni mai hian ka hria a, a ippikin ka chhungril tawt ṭun chu a zia awm theihnan tiin am zet zetin thawk ka han lah leh ngawt ṭhin pek a, awmzia erawh a nei tehchiam lo.


A tawpah chuan ṭhu lui thei tawh ngang lovin inhnuaiah ka chhuk ta nge nge a. Ka nu biak ka han tum uk a, a number pawh chu ka hmet chhuak ran tawh. Ka hrilh vek tawh mai dawn em ni tiin rilru a insualbuai nasa tawh mai si a, a tuarna viau angem? A hma ai khan na ta se tih ringawt chu rilruah a awm a, ka call leh ngam talo chuan phone chu khumah ka theh thla tawp a. Khum mawnga chhuatah chuan ka ṭhu thla hnawkin thawk ka la sek ringawt tawh. Tihtheih ka nei tlem lutuk chu hreawm ka ti em a ni.


Chutiang chuan engtia rei nge ka ṭhut pawh ka hrelo pen thawm ka hriat rual chuan ka hawichhuak vat a. Ramdinate pafa an lo ni. Rang takin ka ṭhutna aṭang chuan ka tho chhuak a, "Eng nge ilo tih a?" a rawn ti zawi sap a, Bawihpuia muthilh tawh vang a ni.


"Engmah tilo e ka ṭhu mai mai," tiin ka nuih lui ngial a, a har deuh zawng a ni. Nau a mut hlan chuan rilru lak pen nan tiin tihfel tur ka lo dap kual nghal a. Bawihpuia puan leh kawr vawiina ka suk la thleh loh chu ka thlep fel ta a.


"Vei i nei," ka hnunglawkah chuan a ding tih ka hre thei. Ka thil tih lai tihzawm mawlh mawlh pah chuan, "I ngaihbel aniang," ka lo ti mai a. Han sawi mai ka hreh chhan pawh ka zak a ni. Ka zak ngawih ngawih.
Engtin nge ka pa, min hringtu ngeiin tun ang kum tawha a nupui phatsanin a fanu rual lek a kawp tih hi ka hrilh ngam ang?


"Rilrua vei i nei tih hre tur chuan ka hrechiang ve thawkhat tawh chein ka hria.
I inthup thiamlo tihchu nangpawhin i hriat kha. Engthil nge nilenga awm nuam lova siamtu che chu? Ka hriat a rem em?" Tiin ka sirah a rawn ṭhu thla ve nghal zat a, min en reng bawk.


A bulah hi chuan inthup tum chu thiltheihloh tluk a nia, ka thiamloh zawng tak a ni bawk nen mi hi a hrethiam leh nge nge zel.


Ka thaw halh a, dawhthei zetin min lo la en ve reng bawk nen ka hrilh duh lova hetia ka awm reng anih chuan a rilru ka tinuamlo zo dawn tih ka hre ve vek a. Phur taka han sawi nghal bawrh bawrh chu a har ṭalh mai.


"Ka pain ngaihzawng a nei a," a tawpah chuan ka ti ta...ka sawi zawh rual rual chuan ka thin zawn hi a na vawng vawng thei hial a ni. Engtin nge a dawnsawn ang tia a hmela ka en chuan a danglam zawk nain rei erawh a nilo.


Min kuah rualin a awmah min bei tir a, "A na viau dawn anih chu," ti supin ka samah chuan a chul heuh heuh a. Engmah min zawh belh lova engmah sawi chhunzawm ka tum heklo. Ṭap chak viau mahila mittui erawh a hul huk thung a, ka hrethiamlo ṭah chhuah hawm hawm mai duh tehreng nen
ka heti tlat lawi si...


Kan mut luh thlengin ka nu ka hrilh huna ka sawi dan turte ngaihtuahin ka hnem dan tur chenin ka ngaihtuah thleng a.
Zanin zet chu ka chhin khat pawh ka chhinglo a tih theih awm e. Ramdina chuan ka pa ngaihzawngnu chu ngaihdan a nei thiam mai anih ka ring engmah min zawt zui ta lova, "In sawi thawl i duh hunah ka awm tih hria la," tih zawng kha a sawi a.
Ṭawngkama inhnem vak ai chuan a chetzia hian a tilang zawk mai ṭhin.


Zing dar 6 velah tho chhuakin ka va inbual harh a. Bawihpuia lo harh hmasain ka tifai ve thuak thuak a. Ramdina lo tho chuakin reivaklo bathroom-a a thang hnuah lo lutin,
"Kan lo han chho hmasa ang," tiin a fapa chu a rawn pawm a. Bawihpuia chu a tho fuh bawk aniang an chhuah dawn thleng chuan a rak niah niah mai.


Zan lamah tlaivar ṭhakin ka inngaihtuah tawh bawka ka ti thei em em ang tia mahni infuih chung tak meuhin ka nu chu ka call ta a, a ring ral ral a, thil phurawm tak chu ava nilo chiang em.


"Aw Mate," a rawn tih fiah kak chuan ka chhing sawk a. A ni hman tur ka tichhe nghal der dawn chu a ni hawt mai a, mahse reilote nat chu a hnua a hlimna tur zawk tiin ka inhnem leh thei mai zawk a.


"Nu, thu thinṭhawng deuh hrilh tur che ka nei a, awih pawh a harsa anga dawnsawn pawh a har viau ang. Mahse i hriat ngei chu a ngai bawk si a, min hrethiam rawh aw," ka han ti hmasa te te a. "Eng thu nge ni a? I thutak hmel bawk sia," tiin a rawn nui deuh hak a, a nui ri te chuan lung a tizing zual ting mai.


"Ka pain ngaihzawng a nei a," harsa ti tak chungchuan ka tichhuak thei hram a. Lehlama mi chu a ngawi ta reng a, a ṭhawng ve hle ni ngei tur a ni. "Ka lo ring suallo chiang anih chu," a rawn ti chhuak hap a, min ti bo angreng viau mai.


"Eng nge i sawi awmzia?" Ka ti let ta he haw a. Chutah tihian min hrilh ta a, "Diktak chuan khatia ipa nen kan inhruai leh hnu aṭang khan thil hi a hma ang khan a pangngai thei tak tak tawhlo. Ni e a tirah kha chuan ka lung ti awihloh hlau takin mi a ngaihsak a, a inchhir ve tak tak niin ka hre bawk. Hun a han liam deuh a, i hriat angin ipa chuan a phone a khawih tamlo tih i hriat kha. Mahse a tihloh dan deuhin phone han sih mual mualte hi a ching ṭan a, zana ka ṭhang harhin bathroom-a a phone hmang ṭawng rite hi ka hre fo bawk a. A phone hi a lock ngai lova ṭumkhat ka hriat chak em avangin a phone chu en ruk sak tumin ka hawng a. Mahse a whatsapp-ah chuan password alo dah a,
ngaih ti ṭhalo zual tur tingin a kalna tur sawichiang fak si lova chhuah a hrat ta bawk a. Ngaihzawng a nei anih ka ring ta ber a, ka na lo chu ti ila dawt ka sawi ngei ang. Mahse a hmaa kan thiltawn avang khan ipa hi ka ring tak tak thei tawh lova, i hlauh ang em ema tuarna chu ka ni hranlo a nia," tiin engkim chu a sawi fai ta kelh a.
A rilru nat ka hlauh vanga ka rinhlehna pawh ka sawi ngamloh laiin ka nu chuan hetiang hian rilru alo pu daih tawh zawk alo ni.


"Anih leh tunge a ngaihzawngnu chu i hria em?" Ka tihchuan kan inbiak tirh ai khan ka thawl deuh huai tawh. "Hrelo, han hmehbel mai tur ka hre tlat lo. Mahse ka la hrechhuak thuai dawn alawm, a hma anga der dep tak kha chu nih ka tum tawh bik hleinem. Min lo ngaihtuah lutuk lo la, i naupailaite kha ngaihtuah zawk rawh in enkawl ṭhat i ngaih kha," a rawn ti dap dap a, a aw chu beisei ai takin a zangkhai lehnghal a. Thanpuii thu min hrilhte kha hrilh nghal vek mai ka rilruk ta a.


Ka han hrilh zawh chuan, "Kimtei kher kher chu ka lo ringlo asin...," a ti zuai deuh raih a, a beiseilo ve hle tih ka hrethiam a. Mahse vanneihthlak takin a dawngsawng thiam hlauh a, "Finfiahna ṭha tak nen emaw mit ngeia ka phawk te anih loh chuan in sawithiam dan tur a haihcham dawn si lova, engpawh chu nise enthlak rih phawt ṭhain ka hria. Nangni pawh inrawn chhuk thei ṭep tawh a, a phat buai theihloh tur khawpa chianga man chhuah phawt ka duh. Min ngaihtuah lutuk lo la, chanchin kan inhrilh leh zel dawn nia," a ti ta charh charh a, ka beiseiloh lutuka chutiang zawnga ka nuin rilru a pu chu ka lawm ti ila ka sawi sual kher lovang.


Huhphurh ang aiin kan inbiak zawh chuan ka zangkhai ta hawk zawk a. Ka nu chu ka ngaihtuah lutuk talo ti ila rilruah erawh a awm reng dawn tho a. Thanpuiin ka aiawhin alo ṭanpuiin a ngaihven thei dawn bawka keichu hrisel taka nau nei tura inbuatsaih chu ka hna pawimawh ber a ni rih. Rilru lo tih hah ve vakin awmzia a nei dawnlo tih ka chiang a, rilru tawt changa sawipui tur Ramdina ka nei bawka ka hun hmachhawn tur chu ka huphurh lutuk ta lo.


Tukṭhuan ei tura ka chhoh chuan Ramdinan min lo enchik ngang mai a, ka hmel hmuh anuam deuh aniang ngaihṭhat hmel tak chuan a awm ve mai bawk a.


"Vawiin chu Fela'n huan kalkawng min siamṭhat pui leh dawn a, kalna tur khu a mumal tawhlo lutuka khua a chhiat deuh chang phei hi chuan lum a hlauhawm ṭhin em mai," ka nu'n a tihchuan, "Ilo chhawr rim lutuk ang nge aw a hmaizahawm," Ramdina'n alo ti thung a, "Ni e nu, a hnial hreh che hian alo aw ve hmiah hmiah a ni ang ti lutuk suh a inthlahrunawm," Mimi-in alo tihzawm ve nghal zat bawk a.


"Amah berin alawm 'Naktukah kalkawng hi kan siam leh dawn nia' a tia, ka lo hnial ve naa a tilui ve tlat sia siam alo ngai ve hrim hrim bawk nen tumah min tihpui thei in awmchuang si lova ka hnial rei duh talo anih kha. A fel alawm makpa hual tha ka lo chhawr ve a nimai a," a tihzawh rual deuh thaw chuan, "Nu leh ringawt zel che hian a!" Mimi-in alo ti hliai a, alai ve deuh niin ka hria rei pawh ṭhu tawh loin a kham nghal daih a.


"Tak takin Mimi, Ruatfela hian a hmangaih hle tawh che niin ka hria. Dawngdawngate unau lahin an ngaina si a, keichuan ka iai lo teh a nia," ka nu chuan a ti tlang rawt a.
Kan chhungkuaah hi chuan zep ṭit ṭet a awmlo a ni ber.


"A hmanhmawh thlak hleinem, bakah ka inngaihtuah chian ve phawtte ka duh a, awlsam takin thutlukna ka siam theilo," Mimi-i kut sil chuan alo ti a. "Ni e, an nufa thum hma hun pawh thui taka hril zel tur ala ni a, hmanhmawhloh a ṭha ngai e. Uluk taka inngaihtuah hnuah chiah thutlukna chu siam chauh tur," ka pu chuan alo ti chuarh chuarh a.


"Makpa atan ka iai lo e ka tihna mai a nia, keipawhin tih tut tut chu ka duh bik chiahlo. A chhungte nen pawh inhmelhriatna hun inla nei mang si lova, sawidunte hi a ṭha a nia," ka nu chuan a ti dam leh tluam a. "Pialrala lah hi naute rual ka chhai e a tia..hahthlak bet but lutuk! I nu Matluangi nuih atih zat em kha," a han tihzawm leh zat a. An hrelo emaw tih laiin ka nu leh ka pu pawh hian engkim hi an lo hre ve vek zel.


"Ni ngawt mai a engti tia naute ṭhiannu lo duh daih chu nge maw anih le, an tet laia a velh ṭap nasat ṭhin tehreng nen," Mimi-i chuan alo ti ve leh a, kei erawh ka lo nui kur kur thung.


"Aaa awm tir ve mai mai teh u. Hmangaihnain ramri a khamlo an tih kha maw...Tleirawl zûna uaite chu na deuh tur asin," Ramdinan alo ti ve khauh a, a tho nghal thurh bawk. "Mipaho tak hi chu aww," Mimi-in a tihzuina chu a chhang tawh hranlo.


Ramdina hna kal hnuah u Ruatfela pawh a rawn thlengthla a, Ramdina nen hian an intiat tawk viau a hnathawh nan chuan Ramdina kawr hi a haksak ve mai zel a.
Meite a zuk zawh hnuah bawngtuthlawh pu chungin ka nu huan lamah an inzui thla nghal a.


"Bawihpuia chhuah harhpui pahin reilote chu dawrah kan han ṭhu ve ang nge," tiin Mimi-i leh ka pu chu kan chhuahsan a.
Kalkawngah Vivi-a hnen aṭangin call ka dawng a, ka rin ang ngeiin Thanpuii aw zawk ka hria.


"Ipa te chu nimin tlai khan anlo chhuak daih tawh a, keini pawh zanriah eikhamah kan haw chho ve tawh ang. Lungngai suh Principal hmel ka hmu peih rih lova chawlh ka la rei alawm i nu chu ka lo buaipui vek dawn a nia. Enteh chuan maw thudang daih, hotel neitupa fanu phaia awm an tihkha zingah alo kal a, a tirah chuan kan hre biklo pool bul velah khan ka phone zawn leh kan va dil a, mahse an tihfai dawn avangin luh an lo phal tawh si lova, kan vannei tawp nula chuan Security te bulah luh tir turin min tia, ka phone chu pool chhung kil deuhah hian kan va hmu a,
a ṭhat theih tawh pawh ka ringlo memoru card ka la hmanglo zui a thlalak pawh a bi vek ang ka ring," a rawn ti zung zung a, a titu lah chu pakhat chiah rin ka nei bawk.


"In vanneih rual rualin a pawi e...i phone a chhiat phah ta daih sia. A that ka present ang che aw," ka tihchuan min han hnial rang khawp a. "Ka ui tho na chu mahse i awm tinuamlo tura sawi ka nilo a nia. Thlalak mawlh kha a nia ka rilru kaptu chu," a rawn ti leh a, a vei ngang anih dawn hi. "A ho lutuk ka nu nen kan inbe tawh a, i phone leina tur chu a man chanve tal ka lo tum ang min pui nasa dawn bawk sia," ka tihchuan a nui hawk hawk a.


"Leenbawih i nau neih hun chu khualṭha thleng turin lo inring ru kan rawn thleng rup dawn a nia," rawn ti no deuh hlawitu chu Vivi-a tih ka chiang khawp mai. "Hei inkhaw rawn zin a sawi renga Ramdina ka hmuchak a ti reng mai i aiawhin ka'n beng ang aw," a tihrualin eng emawh hi a ri thum awk a. Vivi-a na ti awiah thawmin a zawm bawk.


"Rawn zinpui rawh Ramdina ten an lui kalna leh ramvahnaah an hruai anga nuam a ti viau ang. Nangpawh i ngaihawm tawh rawn zin ngei ngei rawh u," ka lo ti ve luam a. "Nia Bawihpuia pawh ka hmu leh chak tawh lutuk, dam chuan kan la rawn zin ang," a ti siam siam a, dawr ka thlen meuh chuan Bawihpuia ka paw bawk nen hah tak ka ni.


"Eeee vawiin chu Bawihpuian min lo ṭhutpui dawn animaw," tiin min lo lakchhawk nghal a, tui ka innghal khawlh khawlh mai.


Tihian u Ckiteho bulah hian awm ila rilru pawh an la peng hneh deuh nge nge ang chu. "In teh turin Zopuii leh a ṭhiannu an lo kal dawn a, an rawn lang ve ṭep tawh ang. I rawn chho hlauh chu a tihzia tak tak a ni," u Ṭhakimi'n alo ti a, a sawi hnu rei vak loah Zopuiite chu an rawn lut ta ngei a.


Keiman ka lo teh a, Zopuii chu hmeichhe ṭawng duh tak a ni lem lova, mahse u Ṭhakimite nen inhre nelsa anni bawka Thangteate nen kan lo inkawm ṭhin bawk nen kan hanin kawm hnu rei vakloah chuan a tlangnel ve ta phian a, Bawihpuia pawh pawmin a chheih ve a, kan Thangvara han vanneih lel lawl zia hi aw engtin nge an tihpui laite khan ka duh lo e te a tihkual ngam zawk le?


Chhun thingpui inhmain haw turin kan chhuak a, Zopuiite pawh kan ruala chhuakin kan kalna lam erawh a in anglo thung. U Malawmi dawrah school bana Dawngdawngate ei tur ka lei kawi sak chuan Rdi nen kan inhmu hlawl a, ka hmuhlohna rei tawh zia chu. Kan inbe ve hlut a, Aizawla Nurse a training thu leh chawlh an lakthu te chu ka hre chawp ve ta zel a, a hma ai khan a sa a ṭha tawh a, a hmel a engin hmuh a nuam hle bawk.


"In naute chu ava han duhawm em em ve,
a lian bawk si apa a chhun hle mai," tiin a piai a piai ve a. "I cham rei dawn em?" Ka tihchuan, "Cham reilo ang kar leh tluan hi ka cham anga ka chhuk thla ve nghal ang," alo ti a, an inpengah min chhuk thlak san a.


In ka thlen chuan Ruthi alo awm kur a. Mimi-i nen thingpui lo chhuangin an kawlbahra chhumna tui chu alo thli mek a.


"Awi awi awi! Ruatfel! Ava zia lo tak em!" kawmthlang huan lam aṭanga ka nu rawn ti chul ri kan hriat rual chuan thlanglam tukverhah kan va dak chhuak nghal ṭhap a.


"Nu tinge a? Eng nge thleng?" Tiin kei chu ka au a, "Hei i u Ruatfela a lum daih a, khu huan mawng a khu a mu reng mai Mate inpa rawn ko mai teh!" Ka nu chuan a rawn ti ta mai a, hmanhmawh deuhin Ruthi i leh Mimi-i an tlanchhuak nghal a.


Keichu ka chhuk ve talo mai han tlan ve par par thei ka nihloh bakah Bawihpuia ala mu bawk silo.


Tukverh aṭang chuan ka zu thlir a, Ramdina hoin huan mawnga u Ruatfela lum chu an zu buaipui a, ana vaklo a ni ang a ding ve leh mai a. A inbengfai thuak thuak a, thingpui in a hun tawh tho bawka an rawnin zui chho ta hlawm a.


"Patlingpui si han lum tup tup mai chu a," rawn lut hmasa ber Mimi-i chuan midang hriat theihloh tur tawk vel hian a rawn ti sup sup a, u Ruatfela hmel ka hmuh phei chuan ka nuih aza tulh tulh lehnghal.
"Lung rah pial hi chu hlauhawm a, fimkhur i a ngai ṭhin teh mai a nia. I na lo hlauhva a vanneihthlak tak tak a ni," ka nu chuan a ti a. U Ruatfela chu a zah ve hmel kher mai.
A zah viau pawhin a âwm ve reng, bialnute nu hmaa mark score tum laia patlingpui han lum tup tup mai kha chu mipa ka ni inti ve tan chuan a zahthlak loh a takah. U Ruatfela phei chu palian leh ṭawngtamlo chi a ni kher bawk nen nuih hi a tiza ngawih ngawih.


Tlaia chaw ei ve nghal tura ka nuin a sawm ngial pawhin a sawm hlawhtling theilo a zak thlu ve ngang ni tur a ni a haw chho nghal daih a. Zanahte hian alo leng ngam em ang chu maw naktukah a haw tawh dawn bawk sia.


A zahnate dah ṭhain a rawn leng ta ngei a, keini pawhin a chetchhiatna chu kan sawi lang duh tawh hranlo. Mimi-i nen pawh a theih ang anga chance pek ve kan tum a. Kan inah hi zawng inkawmfalna hun hi a awm thei meuh lo inleng hi kan nei ve reng zel si a, an inkar thu han sawidunna hunte nei thei se kan duhpui hlawm nen. Hun remchang chu ala awm ve leh mai ang.


Ka nuin reilote min lo biain chaw ei kham hnulawkah ka pa chu a zinna aṭanga haw anga insawiin in a thlen thu a rawn sawi a, dawt a sawi tih kan chiang nufa tawh mai si a. Ka nu tan tak pawh a pasal uire san tu nena inkhata chendun chu a harsa ve viau ang. Mahse a mit ngeia hmuh a duh kher bawk si a, a lungdamna tur anih phawt chuan a duh ang ang chuan ti sela a ṭha vek mai.


Mut dawnah engkim chu Ramdina ka hrilh ve leh ta vek a, "A duh ang tak chuan enthla sela, mit ngeia an in phawk hnuah chuan ipa tan pawh phat ngaihna a awm tawh dawn lova, inṭhen atih pawhin a sawibuai thei tawh lo ang," alo ti ve hmiah a. Ni e, inṭhen nghal vang vang se tihchu ka duhdan chiah pawh a ni. Tun dinhmunah chuan chhungkaw kehdarh tih khan rilru a luah thuk ber tawh rih lo tlat a ni.


A tukah Pialrala hmanraw zu lei pawh a rawn haw a, zankhat a chama a tukah a phei lehnghal. Keini heta awm nghet zawk chuan dawr luah tur chu kan zawn sak ṭan bawk a. Kan dawr thlen hma khian garage pahnih chu a mal din a, a te zawk chu a neituten motor dahnan an hman ṭhin avangin a lian zawk chu luah tura an siam a ni zawk hrim hrim bawk nen Pialrala inpeih vela luah lut turin kan inrem thei ta a, kan inbiak fel zanah thlalakte kan va thawn vea a lung a dum bawk a niang kungzungpui lem pathum hi a rawn thawn a, engmah a rawn zawt belh tawh lemlo bawk.


Ka nu leh Thanpuii pawhin ka pa chu an mitmei dun reng a, ka nuin a ringhlel tawh tih a hrethiam nge ka pa chu tunlai a chhuah tawh ngailoh thu leh inah lehkhabu a chhiar mai mai ṭhin thute ka nu hnen aṭangin ka lo hre ve zel a. Kimtein Thanpuii a hmuh aṭang khan keipawhin ka hre dawn tih a hrethiam nghal anga chuvang chuan ka pa pawh fimkhur turin a chah tih hriat reng reng.


Chuan mak leh deuh chu Thanpuii leh anu bazarin ka patea fanu Rinrini leh Kimtei coffee dawra an chawl dun lai a hmuh thu min rawn hrilh a, thlalak pawh min rawn thawn nghe ngeh a, henu hi chu a rintlak ṭhin ngawt mai thlalak hi a ngaipawimawh a.


Kimtei leh Rinrini chu thlalak aṭang ringawt pawh chuan a inngeih hmel hle a. Kan ina Kimtei awm lai khan Rinrintei unau nen hian an inkawmngeih hman viau khan ka hria a, an inhmu fuh anga an chawl dun tepawh anih theih laiin ngaihdan danga rilru han put chu loh theihloh ka ti mai.
A chhan chu Rinrinte unau mizia ka hrechiang em a, Kimtei nen an inzawmna pawh hriatchian leh zual ka chak khawp mai.


Chu erawh Thanpuii tan han zawn chhuah ngaihna vak a awmdawn lo. Ka nu aṭangin tihdan kawng a awm thei maithei thung.


Ka nu nen kan inbiak leh hmasa berah chuan, "Kimtei kan ina a awmlai khan Rinrinite unau nen hian an innel em? An rawn lang zing em?" Ka ti a. "Aw an inkawm thei phian a, Rinrinite unau pawh an rawn leng ve fo mai. Dinpuii tak hi chu a rawn leng khat," alo ti a. "Kimtei leh Rinrini coffee dawra an chawl dun lai Thanpuiin a hmu a, an la inkawm chhunzawm zel em tih vel Rinrini emaw Dinpuii hnen aṭangin hriat lo tum la," tiin ka chah a. Aw chu a ti a, Thanpuii zawk a ṭangkai leh dawna ka hriat avangin ka va be leh a. Phone thar ala lei loa anu phone a hman ṭawm riha a buaithlak khawp mai.


"Pui, Kimtei high school kal lai emaw a school kal lai hrim hrima ṭhian kawm ṭhinte min zawn chhuahsak thei angem le?" Ka va ti tawng a, a harsa viau maithe mahse a ṭul miau si a.


"E awi teh daih chuan a. Engvengah nge an awm kha?" A rawn ti a, chulam daih ka ngaihven chu a hamhaih ve deuh naa min zawt buai bik ta chuanglo a. An veng leh in awmna bakah anu damdawiin awmna thleng chuan engkim ka hrilh a, "Ka nuin ka pa chu chang se nangin Kimtei hi enthla chhunzawm zawk mai la ka duh. Inthlahrunawm viau mahse nanglo chu rin ngam ka neihloh bakah ṭhiandang ka neilo tih chu i hriat ve tho kha," ka han ti leh rih a.


"Ka hria alawm min ring tawp rawh min puitu tur ṭha deuh ka nei alawm," alo ti zangkhai leh bik vah mai a, kan inneihni ah khan ka ṭhianah alo ṭang talo ang tih la hlau hnuhnawh tawh viau...


Chutiang chuan awmhmun aṭangin rilru ka lo seng ve nasa ṭhin a, ka nu leh inkarah erawh engmah danglam ala awm rih lova, Thanpuii pawhin ka thil chah chu ala bawhzui mek a, dawhthei taka lo nghah deuh tawp chu ka tih theih awmchhun a ni rih.


Chutih laiin Thangteate inneihni a hnai ve zel a, Zoremthanga chu nupui nei tur zawk ang mai hian a phur hurh reng a. "Lalruthi lo in ring rawh Thangtea leh Zopuiite zawhah keimahni next," an rawn lenkhawm zan chuan a ti hem mai a. Victor-a a awm ve reng sia Ruthi-i a meng no lo nasa ṭhin teh e.


"Ni e, ni daih rawh u in inhmeh alawm," Victor-a lah chuan ala ti ta deuh deuh a, Ruthi-in ṭah chhuak hmel a put laiin Rema erawh a khi sung thung.


"A rualte hian a theih mai loh mawni kan pa hi a hmanhmawh tawh sia keini pawh tih ve vat mai kan duh," u Cki'n uangthuang zet hian alo ti a, chuveleh, "Kan u Cki phakar zia hi senso zawng zawng Thangteaten an tum dawna remchanga lak a tum. A tleirawl chhuah hlim ang chiah khan u Cki hi chu ala Chalâk reng," Malawma'n alo tih zawm zat a. Rilru pawh an la peng hneh bawka boruak a nuam dar dar viau mai.


"Kan neih hun a hnai tawh sia i zam em?" ka dul chul pah hian kan mut hnuah Ramdina chuan a ti thum dut dut a.
"Zam ve tho e...mahse Pathian zarah dam takin kan nei ve leh ang chu," ka lo ti a.
"Tun ṭum chu nangmah chhun em emtu che fanu nei ila ka ti ngawt mai. An duhawm dun dawn si a," a ti sup sup a.
A nau han duh dan em em hi chu aw..an unau hian an duh vekin ka hria.


"Bawihpuia birthday pawh a hnai tawh hle mai tiraw. Kar loah ala rawn ṭawngthei vat anga, kal lah kan inzirtir nasa ṭhin bawka a bawkvakte hi a chak tawh si, mipa naupang rawn ni vat vat sela ka ti," tiin a rilrua awm eng eng emaw sawiin a phun sup supa ka mal khamin ala muhil daih zui. Ava han zialo ṭhin tak.


A muhil lai chu ka thlir reng a, hetianga chianga a hmel thlirna hun hi ka lo inpe ngai miah lo a, thlir nin alo har ngang mai.
Bawihpuia hian a chhun bawka apa ang hian ala rawn hmelṭhain a palian anga, chumi piah lamah apa ang chiaha mipa rinawm leh ṭha rawn nise ka duh a. Ka fate pa amah ani hi ka lawmzia han sawichhuah leh chuan vak ngaihna ka hrelo. Ka lawm a ni tawp mai. A chhan pawh amah ang mipa hi khawvelah pakhat chiah a awm si a, engthil ṭha nge maw ka tih a ka tana Siamtu'n alo ruat ve tawp hi mak tih chang ka ngah mai.


Amah aia mipa ṭha, famkim leh hausa hi he khawvelah hian tam tak an lo awm ve pawh a ni mahna, ka hmuhtheih chin leh hriat chinah amah tluk zo tur reng ka mit hian a hmu lo a, amah aia hmangaihthlak ka thinlungin a tawng hek lo.


A tello a hringnun hman chu boruak tello a thawk tum ang vel hi a ni a, Tui tello a Pangpar khawi nun tum leh Ni tello a khaw êng beisei ang hi a ni.

Chûngte chu thil theihloh anih ang bawkin a tello a damchhung hun hman chu ka tan chuan thiltheihloh tluk ve tho a ni.


Ka ngaihtuahna zawng zawng hi chu hria sela chuan awm ngaihna hi ava han hrelo dawn tak. Ka sawi chhuak dawn der si lova.


Thangteate inneih ni thlen hmalawkin Bawihpuia kum khat tlin lawmna chu buatsaih kan tum a, fa hmasa ber a ni bawka lawmsak ngei ngei chu kan tum bur ti ila a sual lovang.


Zingah cake ka han order a, naupangho rual nen kan ni dawn bawka theitui leh sem tur dang pawh kan lei tel a. Tlaiah pa Chhuana chaw eiah kan sawm a, a farnute nufain thla thar aṭangin an rawn awmpui dawn a ni awm a, vanneihthlak takin puanṭhui mi alo ni leh zel a. Pa Chhuana hnenah min lo sawisak turin ka chah a, kan indaih sawt tawh anga buai pawh a na lutuk tawh lo deuh ang.


Zopuii chu kan zingah tlangnel ve se kan tih avangin kan sawm tel ve a, a ṭhiannu nen khan lo kalin khaw lian lutuk loa chengho chu ka nute nen pawh an inhre sa a, Ramdinaten an tihpui nasa bawka an ṭhianho zingah chuan a tlengnel phian a, Zuala erawh ka nu in a biak ṭum khan Aizawlah alo zu chhuk daih a ni awm a, Thangteate inneih ni ah pawh a awm ve dawn talo tihna anih chu.


Mimi-in cake a han lam a, Pialrala pawh Bawihpuia birthday ni chiah cham turin a rawn haw zuai a, awmloh a hlau em a ni. A pian hlima motor control theih a leisak kha tunah a pe dawn chauh a, lukhum hmathlawk leh hanawhna a rawn leisak bawk a, a ha a ṭo dek deka nawh hmat tir a tum leh pek bik khawp mai. A pawi lo e, kan dah ṭha leh rih phawt anga a nimai.


Tichuan Bawihpuia piancham hmasa ber chu chhungkua leh ṭhenrual ṭha te nen hlim takin kan hmang a. Rilru kilkhatah ka nute an awm ve reng bawk a, ka fapa ni pawimawh erawh hlim taka hman ral ka tum tlat thung. Frame-a dah turin thlate pawh kan la a, kan hlim tlang viau chuan ka hria.


A hnulawkah Thangtea te inneihni in a zawm lehnghal chu a ni deuh mai a. Ramdina pawh ṭhiana ṭang tur a ni bawka a buai ve ṭhin khawp mai. Kan khuaa pasal neiho thuamchhawmah hian a kutchhuak pakhat tal hi chu a tel ngei ngei ang.


Thangtea takngial pawh an inneih hma zan chuan a zam ve thawkhat a ni ang a hai deuh chhah mai alawm. A ṭhianten an buaipui vek a Rema kut nghal chuan a chetdan leh ṭawnglaite chu Video in a lo record pek a, Zopuii an hmuh tir leh duh maithei a ni.


Zam viau mahse a tukah chuan smart zaih hian Biakinah an ṭhiandunin an ṭhu ta vang a. Ramdina zawk chu keia mit chuan a hmu ṭha zawk tlat pek a, pasalte nge nge a awm ve tho mai. Mikhual nula an awm ve nual bawk nen tlangval emaw te kha an lo ti reu reu ang tih a nia ka hlauh ni. A nilo rapthlak mai siah.


Zopuii pawh a nulianin a hleitling zeh zawh bawka a mokawr hak chu inhmeh tak a ni.
A ṭhiannu leh Thangtea chu an intiat tawk viau a, Ramdina leh Zopuii an intiat tawk leh em em bawk a. Mahni size lo ve ve ṭhianah an hmanga an han din hote chuan an inrualkhailo nuaih maia nuihte lam lam a zat chu a.


Bawihpuia chuan apa lah chu a hmuchiang bawk si a ban ar ar a, koh tum ni awm tak hian a khek leh tuarh tuarh ṭhin a, ava han zahthlak duh mai mai tak nausen dang chu awm ve tho mahse kan fapa ang em ema au ring chu an awm chuanglo. A fapa aw tih a hre ve aniang chu Ramdina pawh a insum thei nganglo a rawn hawi leh zuk ṭhin a, kan ṭhutna hi a fuhlo deuh chu a ni.
A hnunglamahte lo ṭhu ila apa hi a hmu theilo tawp tur a nia...chhuahpui daih mai chi nge mawni.


Mi lah chuan min endeuh ṭhup tawh ni mai hian ka hria a, eng sawi set set lova Ramdina chu va pawm tir thawr mai ka duh rum rum hman a ni. Mahse vanneihthlak takin ṭhalaiho hla rem chu a enduh ta khawp a, a ngawi hmak mai.
"Khawi tikhan pawm mut ka lo tum ang," tiin Mimi-in a rawn la ta hlauhva, hnara hlit phawi ang huai mai alawm maw anih le. Reivaklo hnuah a muhil ta ngei a, programme zawh thleng chuan ka ṭhu hahdam ve thei ta hram alawm.


Pawnah thlalakna hun a awm leh a, Zopuii chuan pheikhawk flat tawp hi a bun a, chutichung pawha Thangtea aia ala lawr deuh avangin thlalang chhung zawng chuan a khup a tawma ka va han khawngaih ngar ngar tak laipuitu lah an tam mai bawk sia.


"Thangvara meuhin nupui a nei ta chu a nia kan ṭhianhova kan lakpui ve ngei ngei angai," Malawma'n a ti miau si a, kan va inrem leh a, Ramdinan a bula ding turin min lo pawt hnai vat a. Bawihpuia ala muhil a, Mimi-in a paw ta anih kha.


Thlalakpui tur ho dangin min la en ṭhup zuia a zahthlak zia ka lo theihnghilh hman ṭhelh alawm. "Lo zu haw hmasa ula zuk mu rawh," thlalak zawh chuan a ti sup a, ka aw ve mai. "Thlalak dawnah nula ho saw i bulah din tir miah suh," ka tihchu Thangtea'n alo hre pha aniang, "Leen in pa hi a single em min zawt renga a chalah hian nupui a nei tawh tih ziah sak mai teh," a rawn ti hlut a, anih vel ka ring.


"Thlamuangtakin inah zu mu hahdam phawt rawh hei ka zungbun hi ka lo hmuh zel mai dawn alawm," tiin a nui var a. Ka rit tawh bawk nen mipui huhang chu ka zo vak lo bawka in kan thlen rual chuan Bawihpuia ka muta keipawh a mu ve nghal daih.


Ka rilṭamin min tiharh a, ruaiṭheh hun ṭep tawh mahse ka nghah theih ka ringlo chaw chu ka va bar ta ṭalh tho a. Phone-ah kan thlalakho min rawn thawn ṭhenkhat chu ka en mai mai a, kan ṭhianhova kan lakpui leh an nupa thlalak bik chu ka status ve ngei a.
Kan inneih khan ka status ah pawh ka hmang ve lo tih ka hrechhuak a. Innei an awm apiang hian kan inneihni min ti hrechhuak ve ziah. Lungte a ti leng thar leh riau ṭhin.


"Leen insiam ṭan ila kal a hun mai dawn," Mimi-in alo tih takah chuan ka va insiam a, ka zun chhuak zing tawh lutuk hi ka ning ber mai. Achang chuan diaper han hren tawp maite hi ka chak ṭhin. Zana mut kan tuma harsa tawkin mut a han chhuak ve ṭan a zun chhuak bawkin min tiharh leh a ṭah chhuak ṭuna zung tur ka kal tauh chang hi ava han tam tawh tak. Naupai hi chu an lo pian hun nghahhlelh laite hi a nimai a nawmna lai chu. A bak chu a nawmna sawi tur engmah ka hrelo.


Chaw kan ei dawn chuan kan in zawngkhawm hlawm a, Andrew-a leh u Cki pawh chawhmeh suah lamah chuan an induhsak thei ṭhin khawp mai. Kan kil hova, Thangteate chuan an la ei hman lo a ni ang kan ei san ta mawp mawp mai.
Victor-a pawn kan bulah a kil ve a, Thlengthlengite hian khawnge an ei ve ka hre hauhlo. Pialrala chu a ṭhiante bulah a tap deuh chawt thung.


Ka chaw ei pawh ka ei tui leh pek khawp a, Ruthi-in, "Ala ngaihawm dawn e nakina en let turin video kan la ang nge," a tia a kham hmasa ber bawk kan chaw ei laite chu a rawn la kual a, Victor-a pawh ala chuang thei khawp mai a enlet leh tur a ni sia.


"Leen, insum deuh i ngaih kha aw," Andrew-a chuan a rawn ti a, ka lo theinghilh hman ṭep alawm le. "Awi a hreawm dawn e duhtawka chaw pawh han ei theihloh mai chu keichu raipuar hi ka peih leh lo," u Cki'n
alo ti zauh chu Andrew-an a melh rang teh e. "Dik chiah mai nau neih lah hi nunna thâpa neih ang vel a nia, ngaihtuah chian hian keipawh ka hlau tlat zel," Ruthi-in alo ti ve thung a. "In ti in tia nga a hunah chuan inpuar leh pup tho ang," Rema'n alo ti deuh nghut a.


"Fa chu a tlem berah pathum tal neih ka duh," Victor-a'n alo ti ve leh zauh a. Ruthi-i chuan a huphurh leh lo tawh viau ang chu.


Inchhungah Ramdinate chuan an paliin a hnuhnunglamah an ei ve a. Zanah pawh keichu a haw hmalamah ka ṭang a, inah hahdam deuhin ka ṭhu vel mai mai.

Ka pu chu a mu lut tawh a, ka nu pawh alo haw har lo Ramdina erawh ala rawn haw hman velo a ni ang a reh vung vung mai.


Mimi-ite nufa in Bawihpuia an len kawipui thunga hahdam deuha ka ṭhut mai mai laichuan Tea leh Samson-an Pialrala chu an rawn kuah lut a, "Engtizia nge?" Ka lo ti hiai a, "Aaa kan dang zo lo zanin chu eng nge maw a hriat ni a in vak mai," Tea zawk chuan hahthlak tih hmel zet hian a ṭhianpa phun nuah nuah chu a melh zawk a.


"Ava han in hnem awm em em ve mawle, a pindanah hruai thla nghal mai ula keichuan ka buaipui thei dawn si lova," ka tihzawh rual rual chuan a ṭhiante kuahna aṭangin a tal chhuak a, amah pawh chuan a ding hleithei meuhlo zawng a ni.


"Mipa ka nih hi buaipui ka ngailo. Hetah ka riak dawn," ti ban charhin a jacket a phelh sawk sawka ṭhutthlengseiah chuan a bawk thla nghal thlawp a. "Tinge a heti em ema a rui ka la hmu ngailo," Teate ṭhiandun en pah chuan ka ti a. "Kan hrechiang biklo, chaw ei khamah nu Matluangi dawrah kan ṭhu renga, rei pawh kan ṭhulo amah hian kal a rawt vuta dan kan tum pawhin a inlui zela a chhan kan zawh lahin engmah a sawi ṭha duh chuang bawk si lova," Samson-a chuan a ti charh charh a. An pahnih pawh chuan an in ve thoa Pialrala ang em em chu anni lo thung.


"Ava zia lo tak, engpawh chu nise in rawn thlaha a lawmawm kan lo buaipui ve tawh mai dawn nia," ka ti var a, a pindana hruai thlak chu an han tum lehngial a, "In va ninawm sek e ka hnek bur dawn cheu a mawn le!" Alo ti zek a, an beidawngin an chhuahsan tak ngawt kha.


A rim lah chu a han na khawp mai a. Heti ringawta in muttir chu ni theiin ka hre silo, a pheikhawkte chu ka han phelh sak a, "Hmangaih," zawi zet hian a rawn ti thum dut a, "Keimah i u Leen-i zawk," ka tihchuan, "Eee," ṭha tak chuan a ti ve leh mai a.


"Chaw i ei tawh mi?" alo tihchuan, "Ei tawh e," ka ti mai a, "Eng nge i hmeh?" a tihzawm leh zat a, "Arsa te, bai te a tam mai," ka ti ṭha ve leh mai bawk a. "Vawksa u ei em?" A ti leh zel a, "Ei nang vawksa ka ei ngai hleinem," ka tihchuan, "Keipawh ka ei lo, ka ei hlawllo," pawr deuh hian a rawn ti a. Che sawn chuang silo chuan a ṭawng ang zuah zuah a.


"Tinge i va inhnem em em ve..?" a pheikhawk ka phelh zawk chuan ka ti a.
"Hmeichheho hi inlo mak e...," a ti ringawt.
Mahse a chhan tur awm ang chu ka hrethiam ruak tho. "Eng nge kan mak vakna?" ngawihsan ta mailo chuan ka ti ve leh zel a, a ṭawngṭha duh dawn riau hian ka hria.


Mahse min chhan hmain Ramdina alo haw thut a, a nau a dawn hmuhchuan, "Tinge kha kha?" A rawn ti deuh hu a. Ka lo hrilh chuan, "Khawi tho rawh i pindanah zu mu rawh," tiin a kuai tho a, an inkuah chhuak tur chu, "U keichu maw..hmeichheho hi ka hrethiam theilo reng reng," a ti nuah nuah a, pakhat lahin, "I thluak ila hmang nasa tawklo anih chu," alo ti liam puat a.


"Lo thlir reng rawh u ka chhuah dawnlo reng reng," a ti leh chher chher a, a thusawi chuan mu leh mal pawh a nei meuhlo.


A pheikhawk leh jacket keng chuan ka chhuk ve a, khumah an lo inmut fel tir chiah, "Khawnge ka phone?" Tiin a indap nghal ruk ruk a, a jacket a a phone chu pein meng mang hleilo hian a hmet ang châwt châwt a.


A duh a hmet fuh ta mawh tihah a dah thla tawp a, a hla ngaihthlak lah chu, 'I zun ngaih lungleng vang hian maw' tih daih a nia...a chin dan ngaite bawk.


'Thinlai a na ka naute, val dang vanga min hau mai hi' tih lai chang phei kha chu vawithum ngawt a play nawna a sak pui ziah bawk. Alo hetih vang hi a nimaw...hahthlak ṭhin a nia aw...


"Inlengho an ṭin darh tawh em?" Ramdina inthlak lai bula ka tihchuan, "An la awm nual, an ṭin har hlawm lovang. Khawnge Bawihpuia?" Tiin a hawikual thuak thuak a.
Mimi-in a lenpui tih ka hrilh chuan, "Eheh chu kan va free ve," a ti deuh hlut a. "I ho e a va inbual vat mai teh," tiin a towel nen ka nawr chhuak a.


"Kan ding nasa lutuk a ninawm, mipui zi hut hut nen ka chau ve nghulh mai," a inbual zo rawn lut chuan a ti nuah nuah a, a pajama kekawr a inthawlh sawk sawka a sam pawh hru hul hmasa lo chuan khumah a bawk nghal thlawp a, "Leenbawih...reiloteee min lo hmet lawk la," a rawn tihchuan a pangchang aw deuh riau a nui rah rah chungin khumah chuan ka lawn kai ta tho a.


"I fapa awmloh hi chu a hriat bawk maw.." mei nei zeta ka tihchuan, "A awmlai chuan ka chang ve silo chea, chance lak thiam angai," a ti ve mai bawk a. Zep ṭit ṭet lo khawp mai. Kan hanin hmet ta ngei a, kan teber a awmloh hi chuan a patling ngailo.


Zingah pawh mothar thingpui lumin turin kan zu leng a, Zopuii chu mawng a zangin a zei hawi riau a Thangtea chhungte pawn an lawm hmel khawp mai.


Tlaiah an nupa in kan inah chaw an rawn ei dawn a, zingah pawh hmundangah chaw an ei a, eina tur pawh an la nei ve zel anih hmel.


Nizan kan tlangval mu chu tlaiah a rawn tho chhat chhat a, ka nuin a zilh nghal malh malh mai. Ani penṭawng chuan a chhan pawh a chhang peihlo ham bui bui chungin a ṭhu tum vuau a, ka nu a ang zo ta maw tihah chaw ava eia mu turin a chhuk lehnghal daih.


Kan nupa tuak tharte pawh an lo thleng a, Chaw ei ala hun mai lo bawka Malawmateho lo leng chuan Zopuii bathroom luh hlanin, "Nizan chu i che ṭha em? Ti rawh ka tih ang khan i ti em?" Zoremthanga chuan a ti deuh sur sur a.
An beng an dawh hnai hlawm hle tawh.


"Teuh nang, engmah pawh kan tilo ka inbual laiin alo muhil daih alawm," Thangtea chuan a ti nghut a, a ṭhiante nuih aza ngang mai. "Iva han nep tak a muhil der mai mai tih hre ta che," Malawma'n a ti hlut a, "Tunge lawi ṭhat zana muthilh der pawhin hnar thlurh thlurh duh ang," lungawiloh hmelfe hian Thangtea bawk chuan a ti leh a, Zopuii rawn chhuak lah a bangbo hmel bawk si kan lo nuih deuh ṭhaw hlawm a.


Chaw pawh an ei ve ṭeuh chuan ka hria, an leng ve ta reng a, Zopuii chu kei ang thoin titi vawrh thiamlo chi a ni ve a, nuamlo erawh a tih ka ring hranlo. Mahse Ramdinate ṭhianho uangthuang lah chuan Thangtea pawh an ti phawk zo ka ti mai, "Nu-i," tia Zopuii a kohte chuan an ri leh huk ṭhin a. Zopuii lah alai chhe thei bawk sia mitmeiin ka khak leh zauh ṭhin.



Ni khat chu Thanpuii hnen aṭangin call ka dawng ta a, beisei sang tak chunga ka chhan chuan, "Kimtei chu an veng hluia high school a kal laiin i cousin Rinrinite unau nen khan classmate an lo ni reng ṭhin alawm. Engtin tin emaw an Zirtirtu hlui ka be pawp thei hlauhva, an inkawm ve ṭhin anih hmel," a rawn tihchuan ngaihdan ka nei thiam ta uarh uarh a.


Ka nu hnen aṭangin Kimtei leh Rinrinite chu an la inhmu zeuh zeuh ṭhin tih ka hre leh zel a. Engkima a hnar kaitu chu a chiang ta reng mai.


A hmaa Kimtei birth certificate diktak thla ka lak kha en letin vawiin hi Kimtei birthday alo ni leh zel a, ka nu hnena ka va hrilh chuan, "Hei ipa pawhin tlaiah ka ṭhiante inah chaw eina tur ka nei e a tia, zanin hian engkim hi tawp vek tawh rawh se," a rawn ti charh charh a. Ka pa chhuak tur chu Thanpuii nen an zui ru dawn a ni.


"Puitling a nia khatianga inzep ṭit ṭet rual pawh a ni tawh lo. Nangpawhin tihbuan buan angailo. Nangmah leh ka pa inkar a ni ringawt tawh lova, kei leh ka pa inkar, ka fate leh ka pa inkar bakah ka pasal leh ka pa inkar a ni vek tawh. Chuvang chuan hmaichhanah zawt la, phatna tur a awm tawh chuanglo a chiang tawh lutuk," tiin ka chah mawlh mawlh a.


Nilengin thim hun ka nghak ti ila a dik ber ang. Ka helhhawlh a, ka awm mai mai theilo a ni ber. Ramdina pawhin ka awmdan chu mak a ti a, ka hrilh ve ta vek mai. "Inu chu nu chak tak a ni in paltlang thei em em ang," a ti ve a, ni e bum hmang kan man chhuak dawn a, a hun lo thlen hun tur chu ka nghak mek a ni.


Tlai dar 5 velah Thanpuiin min lo text-in, "Kan chhuak chiah," tih hi alo ni a, ka lungphu te chu phu rang dup dup tak a ni. Chaw kan ei laite chuan rilruah a awm tlata ei pawh ka ei hleitheilo ka che reng reng chu ka hmanhmawh tut tut tawh a. Darkar khat a liam tawh a, engtik lai pawha phone call dawng thei reng ka ni sia lo in rinlawk chu ka duh ber a ni.


Tihtur ka zawh rualin Ramdina ka hrilh a mahnia ka awm duh zawk ringin min rawn zui ve talo a. Pindan chhungahte chuan ka vei kual zek a, darkar khat dang aliam leh mai dawn tawh tihah Thanpuii hnen aṭangin call ka dawng ta, "Aw Hello, eng nge chanchin," ka tih laiin eng emaw hi a ri deuh rawk rawk a.


"Nu-i i ngaih ang kha engmah a awmlo, anu damdawi bill ka peksak avanga a lawmthu sawinan zanriah eipuiah min sawm mai anih kha," titu chu ka pa aw ngei a ni. Thanpuii chuan an inbiak dan chu hre ve se min duh tih ka hrethiam nghal mai a, a ngawi ta reng.


"Anih chuan engvanga dawt min hrilh kher nge inih? I ṭhian hmu tur angin i insawi si a?" Ka nu a ni, a aw erawh ala dam thlap mai. "Kimtei anih vangin ka zep mai angai alawm. Min ngen nasa sia vawikhat chauhte chu a pawi pawh ka ring lova hriatthiam tum hram teh," a tihchuan ka pa chu ngen ngawl hlein ka hria...


"Eeekhai, a ni em em tawhlo. Khati khawpa chianga ka man chhuak chung cheu pawhin ila pha buai dawn a maw? Pangpar te kha enga tan nge? Ṭhi te kha? A ni chaw eia sawm mai mai che chu khang inngaizawnghoina an inpek ṭhin kha engvanga pe nge inih?" Ka nu pawh a puak keh ve tak tak ta niin ka hria. Awm hmunah ka lo ṭang ṭeuh thei.


Chutah zet zawng ka pa chuan phat ngaihna a awm tawhlo tih a hria a ni teh chek ang chu, "Nu-i ka tihsual palh liau liau a ni min ngaidam rawh, ka tumlawk hauh lovin ka inbat thuk palh ta anih hi. Khawngaihin min ngaidam hram rawh engkim ka siam ṭha ang," tiin ngaihdam a dil ta mawlh mawlh a. Chutih lai tak chuan, aw dang hi ka hre leh ta tlat. Tu tih ka chiang viau bawk.


"Tunah heti hian i nupui bulah ngaihdam dila bul ṭan ṭhain kei min thlauhthla ang maw? Engtin nge naute hi enkawl se min tih?" A rawn ti hmarh hmarh a, chu zet chu leh.


"Mi tenawmpa! I va han ṭawng em em ve! Engtin nge nang ang mihring bawlhhlawh lutuk hi kumkhat ka lo ṭawmpui theih zawk che?" A tih zawh ruala ri deuh sawk chu eng nge tih ka hre thei mai a, ni e, ka nuin ka pa a beng.


"Ka tihsual palh a ni, Nu-i min ngaidam hram rawh pasal tlaktlailo tak ka ni," intiamlo aw zeta ka pain a tihchuan, "I tihsual hma khan vawikhat tal pawh i fanu nen hian min hrechhuak em? I intiamloha ngaihdam min dil hmain vawikhat tal kan tun dinhmun tur hi i dawn chhin em?" Aw khur zawih zawih chunga ka nuin a tihchuan a natna lo ṭawmpui ve ang mai hian keipawh ka mittui alo luang ve ngiai ngiai a.


"Hetiang leh tur si chuan engah nge i tihsual? Ngaihdam tlak pawh inih hrep loh hi. Ka hre reng tawh ang, ka damchhungin ka haw reng tawh ang che. Kan inzawmna zawng zawng pawh zanin hian ka chhu chat nghal a, Leen-i pawh i fanu angin i chhal thei tawh lo ang. Vawikhat pawh i hmel hi hmuh leh ka duh tawhlo. Ka ten lutuk che hi uak tuarh tuarh mai ka duh," ka nu chuan a ti ta sak sak a, a natna khang hun chhung alo pai rukte kha tunah chuan a au chhuahpui thei ta.


"Ram lehkha pawh kha iduh duh dana thlak kual theihna chanvo pakhat mah i neilo, a tam zawk chu ka ta a ni a, ka ram leh ka neih zawng zawng hi ka fanu tan ka dah vek dawn. Tunah chuan mihrang kan ni tawh, he in pawhin i ta bik emaw ilo tia nge. I hmel ka hmuh peih loh vang chauhin zanin hian ka chhuak anga, ka neih zawng zawng pawh ka la let leh vek ang. Hre rawh, i damchhungin kan nufa chunga i thiltih vang hian ila inchhir ve ang," a tihchuan a ri deuh sawt sawt a, call chu in cut zuiin engkim chu a chiang thawkhat viau tawh a ni.


Pindan chhung chu a reh tlawk tlawk a, he hun lo thlen ni hi a awm dawn tih hrereng chungin hun hmangin inbuatsaih ṭhin mahila a hun alo thlen zet chuan a nat dan a dang chuang silo.


Ka chhungkua ka lo tih ve ṭhin chu zanin hian chiangtakin a kehchhia a, zawh belh leh tur chuang pawh awm tawh lovin muangchangin a thamral a. Chupawh mi pakhat tihsual vangin.


Ani chu ka pa tia ka lo koh ṭhin, min chawi liantu, ka mamawh leh engkim min phuhruksaktu ka pa ngei a ni si a. Hetiang hi kan chhungkaw chungah a thleng ang tih reng reng ka dawn pha ngailo. Damchhung daih tur chhungkua ka nei emaw ka lo tive ṭhin a, chu erawh beiseiloh tawp tur, thleng thei tawh ngailo tur a ni tawh si a. Engkim hi Siamtuin awmze neiin a thlen tir ṭhin an ti a, hei hi eng nge a awmzia ni ta ang?


***************