STORYFB.COM

#prologue

Ka hmalam ral hla taka tlang inbawh thuah zut chu thlirin ka coffee no ka dawm ran a, tlang bawhtu thingkung buk leh hring mawi em emte chu thlir a nuamin mit pawh a ti hahdam sawng sawng hialin ka hria.

Boruak reh leh van pawl thiang kûkte chuan khaw ên lai mah nise eng emaw zawng takin lung a tileng riau a, ngaihtuahna a kal thuiin rilru in hun liam tawh a thlir let zut zut bawk a, amah ah bawk khan a ni 'tawpna' ka siam leh tak ni.

Amah kha.. Ka hmalam hun zawng zawng ka suangtuahpui mipa kha...!

Amah ka hriatchhuah rualin kan hun lo hmandun tawh dante ka hrechhuak leh a, chutiang bawkin tawpna duhawmlo tak kan siam dun laite pawh..

Hmalam thlir reng chung chuan thawk ka la vang vang a, koh kir leh siam that rual nilo kan nunhluite kha a la hrechhuak ve thin angem le..?


LET's LOVE AGAIN


By Ziki nu



Chapter-1



"Sawmi?"
Ka lehhawi rualin ka thiannu Riny chuan min lo chek khum tlak tlak a, "Eng hi nge maw I ngaihtuah thin le?" tih paha min rawn pan hnaiin ka coffee no ken lai chu min laksak sawk sawk a, dar zat en tura min tih chuan tlai lam dar 4 a lo ri lek lek tawh tih ka hre ve chiah.



"Midang hi an haw vek tawh em ni?" tia zawh pah chuan ka dawhkan lam ka pan ve thuai a, min chhang lovin ka thiannu lah chu a che hmawk hmawk a, thinrimna nei ang mai a ni.



Ka bag ka ah fel ve rual chuan "Haw vat vat ang, Ramdinmawia lah hi school ban hunah tak a buai ve ziah ringawt mai" a ti hlak hlak a, thildang vanga thinrim a nih ka ring reng a ni.



"A lo hruai hman dawnlo che em ni?" ka tih chuan "Zarkawtah ka pi ka thlah a ti leh tawh anih kha, bialpa tangkailo lutuk neih hi ka hne" a tia, a inâng thinrim zual mai mai niin ka hria.


"Ka thlah dawn che nia" tiin thildang a sawi leh hma chuan ka nam chhuak nghal dawt dawt.



Riny nen hian Aizawla school pakhatah kan thawk dun a, Elementary school zingah chuan a tha ber pawl a ni ve nghe nghe.



English ka zirtir laiin ka thiannu erawhin Hindi a la ve thung a, kum lamah la upa bik lutuk lo mah se teaching line lamah erawh kei aiin a senior fe tawh zawk.

Ka scooty dahna kan thlen hnu pawh chuan a la âng hlak hlak reng a, "Zarkawt hi a ti reng hrim hrim, kal châk chhan thil dang a nei bak a nilo ang" a tia, a tap mai dawn in ka hre tawh.



"Nakinah i zawt chiang dawn nia, ri hluai zel suh" tiin lo khap ve bawk mah ila awmzia a awm vaklo. Kan veng awmna a inpersan deuh bawk nen ka thlah zawha in ka thlen ve meuh chuan khua a thim lek lek tawh a, mahnia in luah ka nih avangin haw tlai deuh chang pawh hian midang mitmei ven tur a awm lo a, a zia viau.




Inchhung ka luh rual chuan inthlak hmasa lovin eirawng ka bawl nghal sawk sawk a, mahnia awm ta nafam chu a awlsam thin khawp mai.




Thalai inkhawm zan anih avangin han muanchan theih vak pawh a nilo a, chaw ka ei kham hnuah thleng pawh sil hmasa tawh lovin ka insiam nghal a, ka inchung chiah hi kan khaw mi te tho U Mazari te unau in an luah ve a, an ni zara helai hmun pawh hi hria ka ni nghe nghe.




Rin lawk ang ngeiin dar hmasa rik hnu rei vak lo ah U Mazari chuan min lo au lang lang a, hmangmawh deuhin ka chhuak ve nghal bawk.



Ka nawmsam loh deuh vangin inkhawm bana thalai hla zir naah pawh ka tlang ve peih ta lo va, Biak in kan hlat lutuk lo bawk nen mahnia haw pawh ka hreh lemlo.




Inchhung ka luh rualin thutthleng pakhat ka neih ve ah chuan ka thu thla nghal hnawk a, ka in luah hi mahnia awmna tawk chang chang chauh anih vang hian bungraw tam han kenluh theih pawh a ni lo a, thiantha tak takte bak ka hruai haw ngilo a nen pawi pawh ka ti vaklo.




Mut nghal mai chu chakawm viau mah se zingah ka hman leh dawnlo tih hria in ka chaw eina te chu ka sil leh hram a, hunbi neia hna han thawh chuan zingah duh chen chen a mut theih tawh siloh a, tho hma falua thin lo mah ila tlai takah a thawh theih loh.





Dar 8 : 30 a rik chuan khumah ka mu fel der tawh a, ka nu ka be dawn em mawni tia ka ngaihtuah lai mekin ka u Mama hnen atangin call ka dawng a, ka inkhawm leh khawmloh te min zawh hnuah ka pawisa dinhmunte min zawt leh a, school ah hian thla thum awrh chauh ka la thawk bawk nen in hrang han luau takah chuan mamawh eng eng emaw lei tur a lo awm ve nual bawk nen, keimah ka inbuaipui thei tihloh chu ka chhungte hnena han hlanchhawn tur vak pawh ka nei rihlo.



Ka u chuan ngaihtuah an ngaihloh thu leh ka hlawh chu a theih chin china khawl zel turin min chah a, an dam that leh thatloh te ka zawh hnuah ka nu pawh be ta lem lo chuan kan inmangtha a, ka puansin lai chuan invurtha sauh sauh mah ila chhungte nena han inbiak hi chuan lung a leng ve rauh rauh zel a, mutthilh leh mai hi a harsa riau zel.



Kan khuaah pawl 12 thleng chiah a kal theih avangin ka patea te hnenah college zawm turin ka liamthla ve rawih kha a ni a, Pathian zarah lunglen em em pawh hre lo in an bulah chuan ka khawsa ve nawk nawk a, nitin class kala ka chhuah avangin inrinni bikah hi chuan tihtur ka ngah thin khawp a, kan vengchhung a lian lutuk lo bawk nen thian pawh ka nei harlo.


Kar lovah thla a ral a, kum hial a vei hnuah kha chuan ka chenpuite nen pawh kan inhrechiang tawh hle a, ka patea hi pa thinchhia leh tawngka vin tak a nih laiin nutei erawh zaidam tak a ni thung a, an fanu upa zawk U Ruth-i hian puan a thui thin a, a nau zawk u Mami erawh Kolkata ah lehkha zirin a la awm thung.


U Ruth-i buai zarah a puan thui pui pahin eng eng emaw a bulah chuan ka lo zir ve a, eizawn nan hmang ve lem lo mah ila mahni kawr thuina tur khawp chu ka thiam ve hman a, ka lawm khawp mai.



Kum khat ka awm tlin hnu, kan khuaa Christmas ka hman hnuah Aizawl ka let leh khan ka thiannu Rinfeli hnen atangin a cousin Rinsangzuala'n min duh ve deuh thu ka hre zui a, Rintea chu kei aiin kum khat in a naupang zawk a, mahse a pumrua en chuan naupang zawk hmel pawh a pu chuanglo.
Ka thiannu cousin anih vangin rualpui en pawhin ka en vaklo a, ka star hmasak zawk tih erawh chu phat pawh ka tum chuanglo.
Chutianga min duh ve thu hriat takah chuan boruak danglam a lo awm chho ve hret hret a, inkhawmna leh KTP hla zir naah lah ni se kan inmelh fuh chuan kan lai chhe nghal ngawt zel a, rei fe chu in be manglo in kan in hêl a ni ber.




Rinfeli hnen atangin hmeichhia han be hmasa chi a ni vaklo tih hre mah ila ka be hmasa duh bik miau silo a, a tawpah chuan min rawn be ve ta nge nge a, a tirah chuan kan la inthup dun viau mai.



Mahse kan induh tawn tih kan hre ve ve miau a, kan inbe zingin thikthu te kan han tihchhiat ngam chinah kha chuan rilru kan inpe tawn tawh hle tih pawh hai theih a ni ta lo va, thla hnih ngawt kan inbiak hnuah ka chhang ve ta nge nge kha a nia.



Kan inngaihzawn hnuah pawh a hmalama kan lo inkawmngeih sa avangin engkim tih a awlsam tawh a, kan inhrechianin sawi hreh leh tih hreh vak a awm tawhlo a, nuam ka ti zawk daih.




Veng khata awm ta nafam chu rei lo te ah kan chhungte beng pawh a thleng ve thuai a, Rintea chhungte anglo takin ngaihzawng neih kawngah chuan an zau ve vaklo. Min hau lo naa, khual chan ka la chang deuh bawk nen chutianga vengchhung lehnghala ngaihzawng ka nei mai chu min hmuhdan a dan phah lutuk ang tih ka hlau ve tho bawk nen, pawn lama kan inhmu zeuh zeuh tih loh chu leng tur pawhin ka sawm ngai lo a, a ni pawhin a duh ka ring chuanglo.






Ka mittui chu engtik laiin nge a tlak hman ka hrelo,ka biang huh tuai hul tawk pah chuan ka tahnuih hak a, ka hnar a ping nghal vek bawk nen ka thu chhuak leh hluai a, thawk ka la vang vang ringawt.




Kum 4 lai liam tawh mah se ka ngaihtuahna atang hi chuan a liam ve tak tak ngei ngai dawnlo naih hi.






Tho chhuakin tui ka va in khawlh khawlh a, ka mut that leh hnuah pawh chuan ngaihtuahnaah thil dang a la leng chuanglo.


'Tawn leh ka nuam ngei e aw.. Rawllai ka Di te kha' tia Pu t Lalnunzama'n a lo phuah te kha 'a ni mang tak e' tih mai a awl ve ta hle a ni. Han intawng leh chiah ila a bulah chuan engnge ka sawi ang le..


Rilru in nunhlui bak a chhui thei silo a, amah vanga ka chenpuite nena kan inkhak buai laite chu tullo puiin ka hrechhuak a, thenawm khawvengten ka patea te hnenah Rintea te ina leng zing viau ang te in min lo sawi thin hi a lo nia, ka patea thinrimin min vuak laite ka han mitthla zui a, khami tumte khan rilru na viau e tilo chuan Rintea kha then tumna pawh ka nei chuanglo reng reng.



Kan inkawp rei tulh tulh a, a ni anga min dawhtheitu mipa kha ka la tawng ngailo, ka tawng leh kher angem pawh ka chiang chuanglo.


Inhmuhthiamloh leh inhauhna kan neih apiangin a tlawm zawka tan a hreh ngailo a, ka thiamlohna ngei ngei ah pawh a ni kha chuan ngaihdam min dil mai thei zel a, inthen a duhloh zia leh nupuia min neih ngei a tum thu a sawi lai te kha aw..




Thawk ka la leh hluai a, nunhlui ngaihtuah chhuah changa hnar ping veka tah hian awmzia a nei thuilo hle tih hre chungin ka la bansan thei derlo lehnghal a, kan inkar kan tihtawp hnu khan engnge a tih zui zel tih takngial pawh ka hre tawh lo. A tuipui leh thiam em em music erawh a chawlhsan loh hram ka beisei.



....



Ka phone alarm ri ral ral chu meng manglo hian ka off a, zing thawh hi chu harsa ka ti ve ngar ngar thin khawp mai.



Tho mai loving phone ka han en hmasa leh te te a, Riny hmen atangin message a lo awm leh vang tawh.


°Vawiin chu chawhnu lam kan chawl tho bawk a, bazarah min kalpui rawh aw, Ramdina'n a thianpa a lo hruai ve dawn bawk a° a rawn ti a, ka peihlo ti mah ila min hruai luih a tum leh tho in ka ring.
Chhang lem lo chuan ka tho chhuak a, ka mutna te ka siamfel hnuah thingpui lumin vawiin lama ka class neih dan tur te ka en a, naupang nawi deuh kan kilkawi avang hian a tirah phei kha chuan in buatsaih dan ka thiam teh vaklo a, mahse thawhpuite zarah ka tlangnel tawh bawk a, ka duh ang thlapin zirtirna ka pe thei tawh a, nuam ka ti bawk aniang harsatna ka nei rih lemlo.




U Mazari hnena chabi ka dah lai chuan a thleng sil lai chawl meuha min rawn enin "Bialpa hi I la nei leh miahlo tiraw?" a lo ti teh daih a, nui chunga ka neihloh thu ka sawi chuan min nuih let sen sen chung hian "Thianpa Aldrina nau in chhelo a lo ti viau che a ni awm e, inkhelh thiam a la ni zui a, a hmel pawh a tha lutuk ania" a ti duah a, U Aldrina chu kan branch KTP OB ni lai a ni a, U Mazari te nen an Inkawm nasat avangin ka hre ve tawh viau nghe nghe a, mahse a nau chu ka hmuh awm pawh ka la hrelo.




"Helamah a nau chu a awm ngai nange?" ngaipawimawh vaklo chunga ka zawh chuan a hahawlh zawng tak ka zawt tih hriat lutukin a kut chu a hru hul nghal sawk sawk a,
"Ih e mate, Nunpuia chu Aizawl FC ah pawh a khel ve char char thin a, tunah chuan ODISHA ah a khelin ka hria, mizo footballer hlawh tam panga zingah chuan a lang pha vai vaiin ka ring, ruihtheihthil lakah a fihlim a, hlawh tha tak a nei bawk a, chhuah reng reng suh" a ti zui mawlh mawlh a, keichuan ka sana ka bih sek tawh.



"Chutiangte chuan bialnu nghet an nei ngei ngei" ka lo ti chu min nerkhum nang nang a, "Nei se la a beisei dawn che em ni?" a tih leh lai chuan lo pawt chat in "Ka tlai dawn, bazarah kan kal kawi dawn a mamawh in nei em?" ka ti ta daih a, "Neilo mai, vawiin ah chawhmeh min lo thawn dawn a, I lo lam kawi ve zawk dawn nia" a lo ti let var a, an in atanga ka chhuah chuan ka duh aiin ka tlai mah mah tawh.



U Mazari hi chu min awm tleitu ve tak tak ania, tunah lah kan nula ho lehdial dial a, ka nelin a ni pawhin min ngaihsak bawk a, ka patea te ina ka awm laia ka harsatna tawhte leh ka rilru natna te, Rintea nena kan chungchang thlengin a bulah chuan ka sawi ngam a, ka tan hi chuan a hlu viau a ni.



School ka thlen chuan Riny pawh a lo thleng tawh a, a ni berin min thlen khalh tawh hi chuan kan hma viau tawhlo tihna a ni mai.



1st period ka neih avangin reilo te ah class la turin ka chhuak leh nghal a, chawhnu lam kan chawlh avangin lunch pawh bazar lama ei law law turin kan inbia a, dar 12 velah ka scooty in Riny nen chuan kan inphur chhuak a, inhmuhna tur an inhrilh lawk aniang kan thlen ve chuan Ramdina leh a thianpa chu an lo awm reng tawh.




Bazar tak tak hmaa thil ei an rawt avangin thil ei tur chuan kan kal hmasa a, Ramdina thianpa Sawmtea lah chu ka tawng Tu huatthu nilo se la, mipa pangngai emaw ni dawn ka tih laiin a nula deuhin ka hria, min melh zuk zuk reng a, a tawng no em em mai bawk si, Riny pawhin a la hrechiang vak biklo aniang a en leh vung vung zel a, Ramdina bana a kuah deuh chawt zel chuan ka thiannu mit chu a tikham ve deuh pawh a ni mai thei.



Pheikhawk dawrah kan lut hmasa a,kan thianpa thar lah chu a han khirh em em khawp a, hmeichhia ang maiin Ramdina bulah chuan a tum bur reng a, hmui kawh luau in ania a awm tak tak, dawr nghaktu nu pawhin ngaihdan dang deuh a nei nge a nui ru leh tat tat thin chu ka hmu reng a, ka thiannu chuan a hmu ve em ka hre lo.




Darkar chuang fe kan vahkual hnu chuan ka thiannu pawh a inkhai bawr tawh khawp mai. Kan haw dawnah ka thiannu chu Ramdina phurhah chuan ve tawh a duh si a, Sawmtea lahin tum bur chungin a lo phallo ve bawk a, an inmelhrum hnai thin khawp mai.




"Kan lo kal dun a, min thlah leh a ngai" Sawmtea chuan a ti tlat a, Riny lahin rum fe a melh chung hian "A bialnu ka nih hi" a ti ve hmak bawk a, boruak chu tha viau lo mah se ka nuih a za deuh tlat a, a ruka ka lo nui ru pat pat chu Ramdina'n mangan hmel fe hian min rawn melh leh thin a, a tawpah Sawmtea chu "Keiman ka thlah dawn che nia" ka ti ve ta ngawt a, la lungawi zanlo mah se a hnial lui tlat biklo.




Sawmtea ka thlah zawh chuan ka haw tlang ve nghal a, U Mazari te ina ka luh chuan Jacoba'n min lo pan hnai vatin a toys thar neihte chu min lo hmuh nghal zat a, mipa naupang tih takah a thawm a na in a ri phat phat reng a, khawhar erawh a hnem viau zel.



"Khalaia ka dah hran kha i nu in a lo thawn ve che a, lo thu rih rawh kan zikhlum tharte pawh i hawn ve dawn nia" U Mazari chuan a lo ti zung zung a, a la phiar lai chu a laklawh deuh anih ka ring.



Buai viau e tilo chuan a tawng siam siam reng tho a, "Mate, Nunpuia chu a hmel pawh a tha reuh asin, pa lian deuh mai hi a ni bawk a, I u Aldrina ai mahin a lian zawkin ka hria" a ti leh tawh a, U Aldrina aia a len chuan pa lian ve tawk tak chu a ni ngei ang, mipa sang leh lian chu ka duh a, mahse 'mahse' tih a la awm!









........
A thupui leh Chapter 1 atang chauh pawh hian a thawnthu kalhmang chu in hrethiam ruai ruaiin ka ring... A ngaihnawm chho zel turah han ngai ve leh tawp phawt ila, in chhiar duhzawng anih chuan comment te min lo hnutchhiahsak ve leh dawn nia u aw..... ☺
Show post links
Top