MR. BAD CHAPTER BY MAWITEI BAWITLUNG (Completed)

[mawitei bawihtlung]

MR BAD



CHAPTER 1

MAWITEI BAWITLUNG



“Puipui hetah rawn kal teh” ka ṭhiannu min lo hui zauh zauhna lam chu ka pana, damdawiin a thawk ho lo phu suau suau chu mak ka ti viau a. Thil thleng a awm nge maw ni ti a ngaihtuah chungin ka ṭhiannu lam chu ka pan pheia.




“Enge tinge hetia an phut suau suaua? Thil thleng a awm em ni? Nge damlo serious tak an awm zâwk?” ti a ka zawh chuan a rawn nui haka “Nilo e Evan-a a rawn lêt tawh dâwn a” a tihchuan a ngaihna ka hrelo deuh deuh, tunge chu pawh chu ka hre lo hrim hrim, he tah hian ka thawk ve ṭan dâwn chauha.



Tunge Evan-a pawh chu ka hre lo hrim hrim “Tunge chu chu, mi hausa em ni?” ka tih leh chuan min rawn beng hlaka “Mawli news ve deuh ṭhin la, Evan Rinmuanpuia, he damdawiin neitu te fapa hi, surgery lamah a awm ṭhin a, a thiamna te a tihpun duh avângin surgery lam zir belhin America lamah a awm leh lâwk a, vawiinah hetah a rawn kal dâwna, a nu leh pa in midangte hmaah hmelhriattirna an nei nawn leh dâwn mawle, a chhelo teh ania aw. A fel bawk si” a tihchuan ka ner nâng a.




A chanchin chu ka hre ve tawh, mahse a mah ka la hmu lo bawk nên ngaihdân siam dân tur pawh ka hrelo, ka ṭhiannu lah hi a phûr nasa bawk si. Ka nuih liam tawpa, a ni hi chuan chhelo tih hi a ngah em em a, a chhelo tih te lahin an duh ngai lêm lo thunga. A peih ve ngawt mai, star hi a nei kur zût leh nghala.




Kei hi Laldampuii niin Puipui min ti mai zela, kum 23 na ka hmang mek a, 12 ka pass rualin nurse lam ka training zuia, he damdawiin ah pawh hian ka thawhna pawh ala reilo, thla hnih vêl lek ala ni. Chuvâng ania'ng a neitute takngial pawh ka la hmuloa, ka ṭhiannu erawh keiai a u bawk nên bâkah a thawhna a rei tawha, a hria chu a âwm lo hauh lo.





“A ho emai, ka kal dawn tih tur ka nei” tiin in chunglam chu ka pana, damdawi in chunga awm hi nuam ka tia, hna a awm lêm loh chuan ka chho fo ṭhin. A sanga, khaw thlir a nuam bawk nên rilru hah châng phei chuan in tih hahdam nâna duhthusam a ṭha a ni bawk.





Kawngka chu hawngin ka pên chhuak zuia, rin ang tak takin Aizawl khawpui chu a lo lang pe ut a, vânah chuan Vamur an thlâwk neuh neuh bawk. Phei zêlin vawn chhan vuan chuan a hmawrah ka va dinga, hahdam zetin ka thaw suai suai bawk.




“Min rawn zui ru em ni?” mipa aw rawn chhuak thut avâng chuan ka meng phâwk zui hra a, aw rawn chhuahna lam ka en chuan mipa pakhat sâng zet, suit nêna lo ding zuih leh hmêl tak ngara min lo en tu chu ka hmu nghala, bang chu nghêng in a ke chuan a in rah khalh ut a.



A hmui a chip hmaka, a mit chuan khawilam mah hawi lovin ka lam ngawt a rawn en bawk. A hmêlṭha hle a, mahsela chu zawng ai chuan a thusawi kha ka ngai pawimawh zawk. “Ka rawn zui ru hauh lo che, nangmah zâwk khân min zui zâwk a nilo maw?” ka ti chu a nui suka.



A ke chu siam remin ka lam a rawn pan nghal zat bawk. Zâm lo anga lan tum chuan ka en lêt ve ngara, ka bul a rawn thlen ruala a rimtui inkah rim chuan ka hnar a verh zar mai bawk.




“Hetah hian ka kal hmasa zawka, i rawn lût lai pawh kha ka hmu che. Engvanga min zui ru nge i nih? He damdawiinah hian i thawk dawn a nih chuan min zui rûk hi sim ang che, ka hmeichhe duhzâwng i ni hauhlo a nia“ a rawn tihchuan ngei zet hian ka ena.




Engtin nge chutianga min rin chhiat theih zâwk? Mipa zak theilo tak a nih dâwn hi, “Enteh ka pu, min hriatsual a nilo maw? Ka duhzâwng i ni bik hauh lo a nia, i zak ve em? Hriat pawh ka hre ngai lo che a, he damdawiinah hian i chhûngte an awm em tih pawh ka hrelo, mahsela i hmelhriat miahloh khatianga puh kha chîng leh tawh suh ang che. I inthuam dân aṭang chuan i pângngai ve hmêl teh lul nên chapo tâwk leka hausa hi in lo tam a nih hi” ti kherin kalsawn ka tuma, ka bânah chuan a rawn vuan nghâl chat bawk.




Ka lamah a rawn kûn hniam ruai ruai avâng chuan phâwk zetin ka lo ena, engthil nge tih a tum ka hrelo. Mahse ka lungphu chu a rang nghal dawt dawt mai,a mit chu a uk pawh a nilo, a dum deuh kak hian ka hria. Ka hmui a rawn hnaih telh telh avâng chuan ka nam data “Eng thil nge tih i tum?” ka ti nghal ṭhat chu a nui haka.




A ding chhuak leh ruai ruai bawk, a ka nurse lukhumah chuan rawn khawih zauhin “I dangdai hle mai, ka duh chi tak. Mahse mi zui rûk hi chîng tawh hauh suh, kan in hmuh leh vat ka beisei” tiin a kalsawn zui ta daih chu ka en zui vung vunga. Tunge ni ang, zêp loh chuan a hmêlṭha thlâwt a, mahse a chapo mah mah a nih kha.




Thâwk la hakin ka insiam ṭha sawk sawka, ka ṭhiannu in min rawn call ve chiah bawk “Khawiah nge i awm, damdawiin nei tute'n an fapa mi hmelhriattirna an nei dâwn ka tih kha, kalkhawm vek tur rawn kal vat rawh, kan tlai ange” a rawn tihrual chuan ka chhuh vat tur thu hrilhin keipawh chu inhnuai lam pan chuan ka kal zuia




Khapa kha ka hmu tawh miah lova, tu tak chu ni ang maw. Feli bul ka thlen chuan “Enge i lo tih ziah, Evan-a hmuh châk tawh nâk a laiin, bâkah midang te pawh an kal vek tawha. Kan tlai chuan a zahthlâk dâwn lutuk kal vat ang” tiin min kai kal dâwr dâwra, ngawi reng chuan ka zui ve zel bawk.




Hospital hnuai hall inhmuh khâwmnan a an hman ṭhin ah chuan kan lût a, dawhsanah chuan hospital neitû te tih hriat tak chu an lo ding ṭhapa, an pa ber chuan thu alo sawi mek bawk.


“Ka fapa hi lo chhuak sela, a ni hi helai hmunah hian a thawk tawh dâwn a, kan ai a enkawl tawh ang. A ni hi tûnah chuan India ramah pawh a ṭha pâwl ti a in hriat mêk kha ani e, Evan Rinmuanpuia” ti a a puan dap dap lai chuan mipui zîng aṭang chuan mipa pakhat hi min hnungchhawn zâwnga dingin dawhsan lam chu a pana.




Ka hmuh hnu a ang riau lehnghâl, chutah a rawn hawi chhuak chiah chu ka meng kâwk mai. Sawpa saw maw? In chunga ka hmuh pa kha a ni chiang lutuk, Lalpa leh! Ka biak dân lah kha a mawi lo ropui bawk sia, mahse a mah pawh khân min biak dân a mawi bik hleinem.



Ka bula a awmdân lo ang takin nui sângin midang hmaah chuan thu a sawia, amah a inring tâwk tih a hriat hle bawk. Master of surgery, ka phun sapa. A thiam hle ang tih ka hria, India ram meuha hriat phâk chu Mizoram tân pawh tûnah chuan doctor ṭha tak kan neih belh leh dâwn tih a hriat.



Ka lo en reng lai chuan ka lam rawn hawiin a nui suka, ka ṭhiannu chuan min rawn ṭhâm vak mai. “Kan lam a rawn hawi a nia aw, min nuih vêl. A star che a niang” a rawn ti su su chu a bânah ka sik nghâl vata, “Sawi pawh sawi suh, ka zui ru emaw a tia, a mah a ni tih ka hre lo hrim hrima. Ka mipa duhzâwng pawh a nilo, a chapo mah mah” ka lo ti chu ka ṭhiannu chuan a duh lo nasa mai.




“I hriatsual a niang, a ni te chu a felin biak a nuama, a zaidam lutuk alawm. Vawikhat chu kan inbe ve tawh, mipa fel leh hmêlṭha, chhelo leh hausa bawk si a nih saw, vanlalperfectlutuka a a nihsaw” a ti duah chu ka lo ner vak thung.




“A mit saw a kalh in ka hria” ka bân chu a ri nghal thlawpa. Ka au ṭhat rualin mipui chuan kan lam an rawn hawi ṭhup a, ka zak lutuk chu ka hmui hnuai petin Evan-a lam ka va hawi lai chuan a lo nui leh suk tawh.



“Lalnunfel nangmah vâng vek a nih hi, ka zak lutuk” tiin ka hawi kuala, midang pawhin Evan-an thu a sawi leh tâkah chuan min rawn ngaihven tawh lo hlauha, ka thaw huai bawk.



“Enge a mit a kalh bawk lo, nula ten an in chuh rawn a nih saw aw, bem thlûk theihloh a nei lo ang an ti hial ṭhin a sin. I mak emai, sawtiang mi saw tu nu leh pa pawhin an it rawn a nih saw, hausa leh Doctor thiam lutuk lehnghâl, ka bialpa ni se chuan ka in chhuang viau ang, ka hnar kua hian vân lam hlir a hawiin ka ring” a ti chu over ti lutuk hian ka ena.




Midang an rawn chhuah tâk phak phakah chuan kan inzui chhuak zuia, “Nurse Puipuii chu enga tinge kha ti vaka i rawn aua, i na em ni?” Doctor Kima chuan kan lam rawn pan pahin a rawn ti a, a nui sâng bawk. Min bem a, tûn thleng ka la chhâng lo, amah a fel a hmelchhia pawh ani chuang lo, mahsela ka duhzawng a ni tlat lo.



“Na lo e Feli hian min beng peka, chuvang a lawm. Thil dang a awm lo” kan tihlai chuan Evan-a kha kan lam panin a rawn phei tih ka hmu nghâl zata, in chungah ka lo ṭawng khum hrep bawk nên ka hmu châk lo chu kalsawn tumin ka inhera, “Enge i tih dâwn? Saw Evan-a a rawn kal a nia, en teh a rawn kal tak tak” Feli chuan tiin min man bet tlata.




“Kha Doctor Kim in lo ṭha maw? Inhmuh loh chhûng a rei ve ta hle mai, kan damdawi in pawh nangmah ni a zârah mite fak a hlawh hle tih ka hria a nia. Kha tute nge?“ rawn ti tu chu tunge a nih ka hailo chiang hle, en loh theih tawh hek lo le alam hawi chuan ka inher riai riaia.




Evan-a chuan min lo en leh ran tawh, hepa hian eng thil nge a hriat ni. “Ni e, i rawn haw chu a lawmawm khawp mai, surgery lam Doctor hi kan la nei chhe si a, nang i rawn awm chu a lâwmawm hle mai. Tûn angah nau pai zai hlum an tam lutuk avângin Mizoram Doctor pawh kan hmingchhe nasa si a, nang i rawn awm theih chuan a ṭha viau ang, nurse Feli leh Puipuii an nih hi” tiin keini chu min inhmelhriat tir zuia.




Kan kut pêk loh chi ani tawh lo, Feli lah hlim tih hriat tak in a chibai zawng te chuan a nui vur vur renga, mi â a ang tak tak. Ka kut a rawn vawn chuan phu zawkin amah chu ka en leh kara, a mitmeng tak deuh ngar chuan min lo en leh tawh. A awmdân hi ka hlau riau mai lehnghâl, hnaih loh dân ka zawn hrâm hrâm a ngai a ni.



“Ka kal dâwn, a nih phawt u” tiin ka kut ala vawn reng chu pawt deuhin ka kal zui hlawk hlawka. Feli pawh chuan min rawn zui ve vat bawk, “Enga tinge khatia i awm tlata, hmêlṭha i ti ve chiang lutuk” a rawn ti leh chu ka thaw ta haka.




“A nilo, nichinah in chungah kan inhmu a, amah a ni tih ka hreloa ka vin hrep a lâwm“ ka ti chu a mit mu chu a rawn pâwt chhuak lo chauh a ni. Mak ti lutuk hian min ena “Evan nên khân in inhmu maw? Ka âwih theilo, engtin nge i tih?” a rawn ti zuia.




“Amah ka zui emaw a tia, ka zui loh thu ka sawia chu zawng chu. Amah kha a ni tih ka hreloa, min rawn phone hma tê khân ania kan inhmuh” ka tihchuan a au deuh vaka, a kâ chu ka hup sak vat bawk, mâwl thei lutuk. Miin kan lam an rawn hawi ṭhup tih ka hriat avângin staff room-ah chuan ka luh puia.




“Awi a bia che maw? A nuam em? Keichu min be ngai vak lo, chubâkah helamah a awm tam lo ka tih kha, a rawn haw khât lutuk. Tûnah erawh a tum ber a zo tawha, helamah a awm hlen tawh dâwn an tia, bialnu chhelo deuh mai a nei an ti lehnghâl. A ni erawh MA zir lai a la nia, MLA fanu an ti bawkin ka hria” a ti duah chu ngaihven duh tawh lovin damlo ho enkual an ngai leh dâwn nên Doctor Kiman min rawn ko leh ṭep tawhin ka ring.




Room aṭanga kan chhuah lai chuan nurse Hluin nu pakhat a lo vin lai ka hmuh avâng chuan ka ner zui naka, an hauh ngun tawh nên in entir tura rawn kal lo hauh a hmang hi keipawhin biak hrep ka châk ṭhin. La thawk reilo mah ila ka thawh chhûng ringawtah pawh a damlo hau lai pawh ka hmu ngun mai.



“U Hlu, a hrelo an nia ṭha deuh khân a hrilh theih mai loh em ni? Kan hna a nih hi, damlo te, rawn inentir tur te kan lo puih hi nurse hna tur chu a ni tih i hria in ka ring, ka pi enge i mamawh?” tiin a lo hauh mek nu chu ka ena.




U Hlui lungawi lo hmêl chu hmu reng mah ila midang an rawn kal bawk nên min be lo in a tâwp leh riha “I fel hle mai Doctor Thana hmuh ka duha, khawi lamah nge ka hmuh theih ang, a hnêna in entir tur ka nia” a tih tâkah chuan doctor Thana office lam chu ka kawh hmuha, kalna tur ka hrilg pah bawk.




“Mami ka lâwm lutuk aw, tunge i hming min hrilh thei angem?” a rawn tihchuan nui var varin “Laldampuii ka nia, Puipui tiin min ko thei ang, a nih ka pi ka buai rih sia ka kal san phawt ang che, hetah hian phei la bo na tur a awm lo a nia, kawngkhâr hmasa ber kha hawng tawp rawh” tiin ka kalsawn zuia.





U Hlui phun hluk pawh ka hre reng, nurse ve si midang te a biak dân leh a chhâwn dân hi a mawilo ka ti ṭhin. Chutih rual erawhin senior zawk an nihnaah erawh zah ve an ngai bawk si a, lo be vak ila buaina a chhuak emaw a nia nga, keimah bawk an dem tur ka ni tih ka inhria.




Doctor Kima nên chuan in zui leh in damlo te chu kan kan kuala, jection ngai ṭhen khat chu amah in tilo in keimahin ka jection hlawma, a ṭhen te erawh beiseiawm tawh lo te an awm ve hlawma. An chhûngte bula chanchin sawi pawh a hrehawm ka ti ṭhin, keimahin sawi ngai lo mah ila Doctor bula awm reng tih takah kan hrelo theilova, an chhûngte ṭap ri hian min ti tâwt ve ṭûn zel.




“Nurse i van hmêlṭha em em? Keipawh ka nulât hunah nangmah anga hmêlṭha nih ve ka duh” hmeichhe naupang thisen cancer avânga damdawiina a rawn awmna pawh rei tawh tak, keipawhin vawitam ka lo hmuh tawh ngei chuan a rawn ti a.




“Ni e, nula hmêlṭha tak i la ni dâwn a lawm tiraw? I dam vat vat a ngai a nih chu,” tiin ka nuih sâng a, nui mah ila chhûngril lamah erawh amah lainatna in ka khat thung, amah a chhe chakin Doctor Kima pawh hian beiseiawm a awm vak loh thu a sawi a nih kha, cancer kher kher hi chu a nunrawng mah mahin ka hre ve ṭhin.




A nu pawhin hlim takin min lo be bawrh bawrha, an fanu an hmangaih zia ka hria a. A dam nân a theih tâwp an chhuah zia pawh ka hre bawk,mahse mihringte hi chuan nunna leh thihnaah hi chuan thuneihna kan neilo êm a, Pathiana in nghah mai loh chu engmah tih theih vak kan nei miau loa.




“Chhun chaw kan ei dûn dawn em ni? Ka treat ang che” Doctor Kima chuan a rawn ti a, ka sana chu ka en zauh bawk. “Aaa Feli nên khân ei kan lo tuma, ka ei san chuan a lâwm lo lutuk palh ang” ka tihlai chuan a rawn nui haka, “Min hlau ta mai em ni? A hma ang khân awm leh rawh, ka thusawi kha chu ka sawi ve mai mai ah min ngaihsak la, hetia ka bula awm hrehawm ti ang maia i awm hian nuam ka ti bik lova, ṭhian ang talin min en thei ka ka duh, i ṭhiannu chu kan sâwm ve mai dawn a lawm” a tihleh tâkah chuan ka hnial ta biklo.



Ka pawisa ka khâwl thei a nimai a lawm, a mahin min treat peih phawt a hnu, ka tân chuan a lawmawm viau ngei ang.


Feli sâwm pheiin damdawiin piah restaurant kan chawlh fo ṭhinna a kal tumin kan inzui dam dama, kan chhuah dâwn lai chuan Evan-a leh hmeichhe chhelo zet chu an rawn inzui lût hlawla, kan in tâwk hlawl hlawm bawk nên kan ding ṭhap hlawma.



“Kal hmasa rawh u, hei lunch ei kan tum a nih hi. Kha Jenny in pa i rawn ṭawi âwm dâwn a nimaw?” Doctor Kima chuan a ti a, Evan-a rawn hruai nu chu Jenny tihna a nih hmêl, a bialnu chu a nih a ring nghal bura, a incheina chu an to tih a hriata, amah pawh a chhelo hle bawk.




“Nia a rawn haw tâkah chuan hmeichhe dangte hian an lo zar leh chung ang tih ka hlaua, ka rawn vêng dâwn a nih hi. Kha nurse hmêlṭha i va hre ve” tiin keini lam chu an rawn hawia, Evan-a chuan engmah a sawilo a, min en ngur thung.



“Nia hei an hmêlṭha dûn a sin, pakhat zawk zawk hi bem thlûk tum ve an ngai, nupui ka mamawh ve tawh a lawm” ti a nui huk hukin ka dârah chuan a rawn kuaha, mi hmuh laia lo dahthlak sak chu ka duh lo bawk nên ner ru sakin ka awmsawn deuha.



“Kha i kuah lai kha a ṭhat khawp kha, bem hmiah rawh. A chhelo hle lehnghâl” ka awm ve reng laia chutiang an sawi chu nuam ka ti miahlo, u Kima pawh chu ka haw lek lek mai.



“Kal vat ang u, thil kan ei dawn chuan lêt leh vat kan ngaih kha” tiin Feli chu ka kaia, ka chhuahpui nghal zat bawk. Ka awm nawm loh sa nên khâ Evan-a lah khân min en reng bawk si a, awm an tinuam lo zual.



Restaurant lam pan chuan kan inzuia, Feli leh u Kima an in be mawlh mawlh a, kei erawh ka ngawi reng thung. Thu sawia, titi ve vak vak hi ka zia a ni ngailova, ka ṭawng tlêm min tih phah ṭhin rêng bawk.




Ka nu leh pa an thih aṭang phei kha chuan ka pu te'n min enkawla, an ni bul tih lohah chuan ka ṭawng tam ngai lo viau. Bakah ṭawng tam lutuk pawh mi pawi sawi a lo awl bawk nen ṭawng tlêm na na na hi chuan mi pawi kan sawi tlêm deuh an tih ṭhin kha.




Eitur chu chahin noodles lam hlir chu ka chaha, thil dang ka ei ngai meuhlo. A ṭhen te phei hi chu hnamdang thil kan siam tam tawh a vâng hian bâwl hlo an telh hi tui ka ti ṭhin lova, ka ei loh châng lah a tam.



Ngawi reng chuan kan order a rawn thlen rualin ka ei nghal mawlh mawlha, an ni pahnih erawh an la ti ti mawlh mawlh renga. Sawi tur an hre lutuk chu mak ka ti zâwk, in ngaizawng se an in hmeh viauin ka ring.




“Saw mite bawk chu” ti a ka lo phun sap laiin kawngka ah chuan Evan-a te pahnih bawk kha an rawn lût leha, enge an hriat ni. Vawiin chu khawiah pawh an awm nimaiin ka hria, a mah ka ngei bawk nen ka hmu châk viau lo, min zui ru te kha a ti vêl a, tûnah chuan amah hlir hi kan kalna lam apiangah a rawn kal ve zêl zâwk chu a nih hi.




Kan piah dawhkân chu kilin waiter chuan a pan zui vata, thil an sawi dun mawlh mawlh renga. A hmeichhia chu a nui leh har har ṭhin, an inhmeh hle bawk, inkawp tur tak hi an lo awm ve chiang a lawm. Evan-a pawh chu nu lam hawi chuan a nui renga, keimah min biak laia a hmêl nên kha chuan a dang hlawk bawk.



A bialnu a nia, hmêl hmuhnuam lo chu a hmuh tir duh bik lo aniang. “Vawiin chu ka lo va haw mai dâwn a nia, zânah ka duty dâwn si a, reilote tal mut ka duh. Min lo hrethiam mai rawh u” tiin ka thil eizawh chuan pêk mai ka tuma, u Kima chuan min lo dang nghal vat mai.




“Keimahin ka pêk sak ang che ka tih tawh kha, tikhan va haw rawh. Zân i duty dâwn chuan muttam i mamawh a nihchu, ei man chu keimahin ka rawn pe mai ang, thlah te i ngai em?” a rawn ti zung zunga, Feli pawh chuan haw mai tur chuan min ti ve bawk.




“Taxi ka la mai ang, a nihchuan ka kal ania aw” tiin ka chhuahsan zuia, Evan-a te pawh en tawh lêm lo chuan pâwnlam chu ka pan hlawk hlawka, taxi vânneih thlâk lutukin dawr kawtah chuan a lo ding hlauha, ka be nghal vat bawk.




Chuan man a in ang lo ṭhin nên a châng chuan a tlâwm lam zawng hian ka haw tlai phah ziah lehnghâl, ṭhu lûtin kan in awmna lai chu ka hrilha, damdawiin aṭang hian kan awm hlat lêm loh avângin a châng chuan ke in ka haw mai zela, mahsela ka pu in min ngaihtuah ṭhin avângin taxi ka la tam ta thunga.




In ka thlen chuan ka pi chuan min lo chhâwn thuaia, zâna ka duty dâwn thu leh mut ka mamawh thu ka sawi chuan engmah sawi lo in mu vat tur chuan min ti a, an ni hi awm lo se chuan hetiang dinhmun hi ka thleng thei hauh lovang.




Ka room-ah chuan lûtin ka inbual fai leh phawta, chumi hnuah inthlâk in ka mu zuia, ka harh leh chuan a tlai duai tawh mai. Chaw chu ei sawk sawkin damdawiin lam ah bawk chuan ka kal leha, lir a tam bawk nên ke chuan ka kal leh ta tawpa, jam a tân reng ka ninga, taxi la ila chuan ka thleng har leh viauin ka ring.




Damdawiin ka thlen rual in midang chu ka pui ve nghala, zân lam hi chu tlêmin kan âwl ve deuha, chuvâng chuan kan in daih ve viau zel. Hna a awm rih lêm loh avângin coffee nên chuan in chunglam bawk chu ka pan leha, a lo thim khap tih ka hriat chuan ka nui nghal ver ver bawk.




Pên chhuakin Aizawl khawpui êng uar chu ka thlira , vânah chuan arsi an lang tuar mai bawk nên vanlam hawi chuan ka nui var vara. “Nu, pa min ngaihtuah miah suh u aw, tûnah chuan in fanu hi ka puitling ve tawh lutuk ania, hna te pawh ka nei ve tawha. Ka pi leh pu pawh ka châwm ve thei tawh ania aw“ tiin ka phun sap sapa.




Ka coffee ken chu ka tem pah hlak hlak bawk “Nang leh bawk maw?” tih ri rawn chhuak avâng chuan ka sir lam chu ka ena, mipa ruangâm ka hmuh rualin kalsawn tumin ka che a, mahsela ka tlai tlat. Ka bânah kut lum thur thurin a rawn vawn rualin ka ding chata.




“Hetah hian engvanga rawn kal ziah nge i nih? Nang hian min zui ru tak tak em ni?” a rawn tih leh tâkah chuan Evan-a tih ka hre nghal, ngaihdan mâwl mang zet a lo nei leh tawh a nih hmêl.



“En teh, ka zui ru peihlo che. I awm hma aṭang tawhin hetah chuan ka kal ṭhin, khawngaihin min thlah teh. Nang zui ru tur che chuan min ring suh, vawiinah khân i nihna pawh ka hre hauh lova, hetah i awm tih pawh ka hre heklo” ka tihlai chuan a rawn nui haka.




“A nimaw? Min zui ru lo chiah maw” tiin ka bânah chuan a rawn chûl riak riaka, ka thâwk a sak nghâl ṭalh mai..



“Eng...thil nge tih i tum?“ ka tih laiin a nui leh haka “Engmah nang hian min ngaizawng tlatin ka hria, mahse hre rawh. Ka hmaah hian rawn lang sek suh, ka hmeichhe duhzawng i nilo ka tih tawh kha, ka tân chuan i bawp a tâwi mah mah” a rawn ti chu ka ter nghal ât mai.



“Ka bawp hi a tawi lo aw, i bawp kha ka awt bik reng reng lo, tin hmuh che hi ka châk bik vak lo a nia, ka hmaah hian rawn lang lo la kan inhmu lo mai ang”tiin ka melh kha kha a, kalsawn ka tum chu alamah min pawt dawrhin a âwmah chuan ka bei titiha, ka lung a phu nghâl dawt dawt mai.




“Kan la fiah ang, i sawi ang chuan i awm ange maw chu, in elna hi ka lawm zâwng tak” ka bengbula rawn phun supin a ti a, a kalsawn zui nghal bawk. Kei erawh chêt sawn mai nachâng pawh ka hrelo, kha mipa kha a â tawh a nih dâwn kha, zak theilo lutuk mai.



A NGAIHAWM IN TIH ZÂWNG TUR A NIHCHUAN LIKE LEH COMMENT MIN LO PÊK SAK ULA, TIN FB HE MI LINK CHUNGAH KA GROUP LINK KA DAHA, MIN LO JOIN SAK VE ṬHEUH DAWN NIA AW