STORYFB.COM

U MUANZUALA (Short Story)
By CVL.Awmpuii



Hlauhthàwnna leh phùrna inchawhpawlh nawkin ka phone chu ka bih a, ka zàm luatah ka thâ te a khûr hial mai. "Hmanhmawh rawh, en vat ta che" ka Nu lah chuan a lo ti ve sek a. Ka awm ang chiah hian a awm ve tho tih ka hria. "Ka lungphû a dik thei lo" tih pahin kan B.A result an dahna Link-ah chuan ka lût zui zat a. Ka Nu chuan a rawn bih ve nghal ṭawk ṭawk bawk a. Ka thai thlà a, ka thai thla zêl a. Ka roll no. ka hmuh rual chuan insûm hman lovin ka khêk nghal raih mai.




"Nu ka Pass" ti chûl in ka Nu chu ka kuah nghal chung chung a. Ka lâwm zia chu sawifiah ngaihna pawh ka hrelo. "Kha...i hlauthawng ve vak vak a, i Pass dâwn tih ka hria alawm" ka Nu chuan a lo ti vat a. Kei angin phûl ve hluai lo mah se a lâwm ve takzet tih a mitmeng aṭang chuan ka hmuh hmaih lo. "I Nu Ahruaii te hrilh ve vat rawh" a rawn ti leh nghal zat a, ihe lovin Nu Ahruaii number chu ka hmet chhuak nghal a. A lo la har lo.



"Nu Ahruai, distinction-ah ka Pass" ka lo ti nghal vat a, "Sangbawih, kan lo hria alawm. Hei i Pa Rama pawh a lâwm khawp mai. Pass lawm dàn tùr kan lo rêl nghal char char mai asin" tiin a rawn nui nghal hak hak a. "Châw kan eikhawm ngei ngei a ngai ang aw" Pa Rama rawn au lùng lùng chu ka hre zui zat bawk a. Ka Nu in min lawmpuina leh an nupa min lawmpuina hi a intluk thuak in ka ring.



"Kan lawmpui lutuk che aw Sangbawih, i ṭhahnemngaihna leh taimakna te Lalpa'n mal a sàwm anih hi. Kan lâwm khawp mai" Nu Ahruaii chuan a rawn ti ṭha leh a. "In zâr liau liau a ni...Nu Ahruai, ka lâwm..." ka tih lâi mêk chuan min lo pawtchatin "Làwmthu sawi a ngâi lo kan tih fo kha, i ṭhiannu tána kan tih theih hnuhnung ber anih hi" a rawn ti halh a. Rilru inhmu tawn takin kan ngáwi dùn ta vang vang a.



Tùnah hian Rintei kha la dam ve ni ngat sela chuan kan awm dûn ngéi ang a. Result te hi en dùnin kan Pass lawm dàn tùr kan rêl leh zawt zawt tawh àwm si a. Ka ngâi thar takzet a ni. "I ṭhiannu paw'n vàn aṭangin a rawn lawmpui ve ngawt ang che" harsa tih hmêl zet hian Nu Ahruaii chuan a rawn ti leh ṭiak a. "A ngaihawm ka ti..." ka lo ti ve halh a, ka mittui a rawn luang nghal zawih bawk. Min kalsan aṭangin kum thum lâi liam ve tawh mah se a hunlâi ang mai khan ka na thar lehin ka hria.



Ka lunghnur hlauvin Nu Ahruaii chuan thu dang min rawn sawipui ta daih a. Ka Pass läwm chungchângte chu rawn sawi luam in chawei khâwm a rawn rawt ta chûk chûk a. "A hautak mai mai" tiin lo hnar sateh mah ila "A lawmawm emai. Chhûngkhat hnaivai leh ṭhian ṭha sâwmin lawmna eng emaw tak chu neih ve a ngai alawm. Chhûngkua in hetiang kan tawn lohna hi a rei tawh" a rawn ti zung zung a. Ka hnial hneh dâwn lo tih ka hriat avang leh a rilru damna tùr ka ngaihtuah avangin ka hnial ta bîk lo.




Kan inbiak zawh chuan room-ah lûtin Pathian hnena làwmthu sawi ṭawngṭaina ka nei nghal a. Ka ṭhiannu ka ngaih luatah ka mittui a'n tla leh ringawt pek bawk a. Kan thian dùn thlalâk, a boral hmâ lawk a damdawiin-a ka riahpuina thlalâk te chu ka en a, mittui dan a harsa. "La dam ve la ka va'n ti tak" ti ṭiakin thlalâk chu ka pawm vang vang a. Ka room kawngkhar a rawn rîk tâkah chuan inhruhul sawk sawk in ka Nu chu ka lo chhâwn vat a.



"I lo ṭap leh tawh a ni maw" a rawn ti hul hak a, ani pawh a ṭap ve tho tih a hmêl aṭang chuan ka hai lo. "Rintei hi chu kan ngâi bâng thei dâwn lo anih hi tiraw..." ti leh sepin ka bulah chuan a rawn ṭhu a. "Engkimah hriatchhuahna tùr a awm zêl, kan bulah awm ve tawh lo mah se a sulhnu te hian rilru a ti thar ṭhin" ka lo ti ve ṭiak a.



Ka Nu chuan "A dam lâi pawh a kan tán malsàwmna a nih tehlul nen a boral hnú lehzel paw'n kan nunah thû a la sawi a, kan tán malsàwmna a ni bâng lo anih hi" a lo ti ve melh melh a. Kan chunga an chhûngkaw ṭhat zia leh kan rulh lêt sèn dâwn loh zia te chu a sawi zui leh mawlh mawlh a. Theihtâwp chhuah a ka zirlai chhunzawm a, an tána fanu ṭha tak ni tel tùrin min fuih zui luam bawk a. A thusawi chu ka rilru ang chiah a ni bawk.




Rintei nen hian middle School kan kal lâi aṭanga inkàwm chho niin chhûngkaw dinhmun inthlau tak chung si khan kan inkawmngeih êm êm a. A hrisel loh avangin a duh angin lehkha pawh a zir ṭha thei lo va. Chung hunlâi chuan theihtâwp chhuahin a hnung ka dàwl sak ve ṭhin a. A dam loh vanga sikul a lo kal theih loh châng te hian an inah tlawhin kan zirlai zawng zawng ka en lêt pui ṭhin a. Pathian zarah kei chu ka vannei a, ka hriselin lehkha thiam thei chi ka lo ni ve hlauh bawk nen ka peizàwn nasa ṭhin hlê. Khati taka inkàwm ta chu kan chhûngte pawh an inhrepawh tawn chho a. Mak deuh mai chu, kan dinhmun a inthlau viau chung hian an inah chuan ka inthlahrung ngai chuang miah lo. Ka tana awm nawm lohna tùr khawpin an khawsa ngâi lo va. Ka chungah an ṭha in an fel êm êm zâwk a. An chhungkaw nun kha Kristian Chhungkaw awm dàn tùr dik tak niin ka hre ṭhin.




Kei chu hmeithai fanu ve mai ka ni a, ka Nu hian thingpui dàwr hlun ve tak kan Vengah a nei a, ka Pa damlai aṭanga kan enkawl tawh a ni a. Nitin kan eikhawp chu kan hmu ve mai zêl. Fanu mal ka lo nih bâkah neihchhun ka lo ni ve bawk nen ka Pa boral hnú aṭang phei chuan ka Nu hian min duat ve êm êm a. Nu zâidam tak ti a sawi tùr ni lo mah se ka tán chuan Nu ṭha ber a ni a. Midang pawisawi záwnga thinchhia ang kha a lo ni lo bawk nen mite ngainat a hlawh ve a, kan dàwr pawh a lùn ve ṭhin hlê. Tùnah hian Nula pahnih a chhawr ve a, ka zirlaia ka ãwl châng chuan ka pui veleh zeuh ṭhin bawk a. Keimahni tâwk ah hmeithai ni mah ila kan in châwm zo tâwk ve viau ṭhin. Mahse Rintei te chhûngkua nen chuan khaikhin chî pawh kan ni chuang lo.




Rintei Nu leh Pa, Nu Ahruaii leh Pa Rama te hi sawrkar hnathawk ve ve niin Rintei û te pawh mahni kè a ding thei ṭhah an ni tawh a. Rintei hi an unau zinga naupang ber niin an tar lam fa a lo ni bawk nen Nu leh Pa leh û te duat rawn a hlawh a, mahse duat sual theih loh kan tih ang chî kha a ni ve a ni chêk ang chu! Sikul kan kal lâi pawh khan buaina a nei ngâi lo. Mite ngainat rawn leh fel tih a hlawh ṭhin a, a dinhmun lo thîka tibuai reng peih ṭhin erawh an awm veleh zeuh zel. Class VI kan nih aṭanga inkàwm chho niin kan inkawmngeih zui ta êm êm a. Ṭhian hi ka ngah lo va, ṭhian ṭha tak ti a ka chhal ngam awmchhun a ni hial àwm e. High School leh Higher pawh kan kal dùn leh thlap a. A fel ka tihna êm êm chu sikul ṭha taka kal thei tùr ni si kha kal hran kan duh loh avangin ka kalna ah, kan chhûngkaw tlin tâwka ka kalna ah khan a rawn kal ve hmiah mai a. A chhûngte paw'n an lo sawi buai eih lo. Chutiang chuan hun kan hmang chho a.




Mahse sawi leh sawi hnú, a bawrhsàwmna te khan Class XII kan nih lâi khan zual lam panin phaiah te pawh in entir in an kal phah hial a. Thisen cancer a lo ni reng tih hmuh chhuah a ni a. A stage a lo sàn tawh êm avang khan beiseina chaurau tak nen an rawn haw leh a. Rei pawh in enkawl zui hman lovin damdawiin an luh aṭanga ni li vêl awrh a liam hnù ah chatuan ram min pansan ta mai kha ania. A nat hun chhûng zawng khan Pathian lakah a vui ngai lova. Pathian tâwk tùra a inpeih zia bâk a sawi ngai lo. Khati taka Pathian thlahlel leh fel anih vang kha a ni chêk ang chu! Pathian pawhin a natna te kha tawrh rei a phal lo aniang a hnenah a hruai ta vat rêng bawk a. A boral sarhu lâi phei kha chuan kan tuar tlâng êm êm a, mahse an chhûngkua kha Pathian lakah an vui chuang lo rêng rêng. Nu Ahruaii phei chuan "Ka fanu kha Lalpa'n a duh ve tho a, nat rei phal lovin a hruai ta anih hi" a ti mai a. Mahse tuar lo erawh a ni hauh lo, Pathian ah an innghat êm a, an tuar chhuak thei zawk ni berin ka hria.




Rintei boral hnú lawkah Class XII board exam ka hmachhawn a, a boralna kha ka tuar ve êm êm mai a. Ka duh ang pawhin lehkha ka zir ṭha thei ngai lo. Mahse Rintei chuan ṭha taka awm a, ṭha taka lehkha zir zui a, ṭha taka Pass turin min duh dâwn tih ka hria a. Kha khan min nawr kal ni berin ka hria. Class XII pawh chu distinction-ah ka Pass ta nghe nghe a. Pa Rama te paw'n min rawn lawmpui êm êm a. An lunglènna kai tho tu erawh ka ni chiang hle. Nu Ahruaii phei chuan min ṭah khum hial a, hnem thei bîk chuang lovin kan result chhuah ni phei kha chuan kan ṭap dùn ta nghek kha ania.



College kal tùra ruahmanna ka siam lâi hian an nupa in an rawn lêng a, ka zirna sènso chungchângah kan nufa in min rawn bia a. Rintei tána an tih theih hnuhnung ber leh an hriatrengna atân ka zirna sènso zawng zawng tum an inhuam thû an rawn sawi ta mai a. A tìrah chuan kan nufa khan kan lo hnial fithla ṭhak a. Chhûngkaw khawsak nuamsa tak ni lêm lo mah ila ka zirna sènso tùr na nâ nâ chu kan thawk chhuak ve a, ka Nu ngaihdàn pawh a lo ni lo nasa. Mahse an rawn lang ta tlut tlut a, "Kan rilru dam nan min pawmsak hrâm rawh u. Sangbawihi pawh kan tán fanu ang a ni a, Rintei kha kan enkawl kham lovin kan la thlahlel em em a. Sangbawihi tána eng emaw tak kan lo tih ve khan Rintei tana ti tlukah kan inngai dâwn a. In dinhmun kan rawn hmuh hniam vâng a ni hauh lo ania. Kan tih ve theih tâwka kan ngaih vang zawk a ni" tiin min tur ta sek a. Kan nufa a kan ngaihtuah fe hnù in kan chunga an ṭhatna te chu kan lo pawm ta kha ania.




Zêp nâk emaw, college kalna tùr sènso kha kan lo huphurh lo ve ngawt a, rinai takin a lo hautak ta zêk a. An puihna tello chuan ka duh angah tak pawh ka kal thei lovang tih tùr hial zawk a ni. Pa Rama leh Nu Ahruaii te chuan ka mamawh piah lamah engkimah min rawn ngaihven ti tawp mai ang. Thil chinchâng hria leh mi vengva tak an ni bawk a. Tùn hnù a ka ngaihtuah lêt hian kan chhûngkaw dinhmun min hriatthiam pui in min ṭanpui ah ka ngai hmiah. Rintei tána an tih theih hnuhnung a an ngai kha ka ringhlel ta tihna erawh a ni chuang lo. Ka mamawh bâk bâka thil ṭha tam takin min vur a, inthlahrunawm viau ṭhin mah se ka tana awm nuam lo lutuk tùra an khawsa ngâi tlat lo lâi te hi awm dàn tâwk an thiam ka ti mai. Zilh ka ngaihna laiah fanu ang takin min zilh a, min fakin min fuih phûr ve reng bawk a. Chhûngkua ang mai kan ni tawh.



College ka kal chhûng zawngin an zârah sum leh pâiah harsatna kan tâwk lo va. Ka Nu sum thawhchhuahte hman pènna tùr awm lo ta chu kan nufa khawsak pawh a ziaawm chho viau a. Kan in te thawm ṭha in a hmâ ngawt ai chuan hmasáwn ve tawh tak kan ni. Kan chunga ṭha viau ta chu kan phâk ang tâwkin ka Nu nen pawh kan ngaihven ve reng a. Dam mawh hritlan an tawh châng emaw ei leh in kawngah pawh nise dàwr nei ve ta chu ka Nu hian an thil ei tùr a thawn ve reng bawk a. Nu fing leh pa fing ngang an ni a, an lo hnar ngai bîk lo. Kan inthlahrun an hlauh vângte pawh a ni chêk ang chu, ka Nu dàwrah hian a thlàwn te pawhin an rawn chàwl ve fo a, pawisa pek an tum a ka Nu in a lâk duh loh chuan an nawr lui ngai bîk lo. Ka Nu eisiam hi an fak ve êm êm a, ei châk an neihin an rawn chah veleh zeuh zel bawk a. Ṭhat leh ṭhat kan in lâwm tawn a ni ber. Mahse kan chunga an ṭhatna leh an chunga kan ṭhatna te chu khaikhin chî pawh a ni lo, kan rùl sêng kher lovang.



Ka B.A result kan hre fel ta chu ka Nu pawh dàwr lamah a lêt leh nghal a. Kan in leh dàwr hi a inhlat lutuk lo nâ in kan dàwr awmna hi a han chhak ve deuh a, hmuh phâk mai chu a ni chuang lo. Ka Nu dàwr kal tùr chu zui ve ka rilrûk nâ in "I Pass ṭha sia, vawiin chu lo awm mai mai rawh. I duh leh Pass lawm nan i lo insu thei tho bawk a" min ti ve ngéi a. "Yes...ka lo awm mai mai ang. Insûk chu a nuam lo emai" uang zet hian ka lo ti var a. Nui hawk hawk chungin min chhuahsan zui ta nghal a.



Ka taimak vang em em pawh ni chuang lovin in a awm mai mai hi ka tih ṭhan loh záwng tak anih vang nge ni tih tùr ka dap sek zêl a. Rei vak lo chu khumah ka tlu zâl ve ngéi a, mahse ka mu rei lêm hlei lo va. Ka Nu sawi ang tak tak khan ka insu ta ringawt a. Machine-ah chhehchhawl thawmhnaw ho chu ka nuai tîr a, ka hman tho bawk a tiin ka inkháwm thawmhnaw chu kutin ka nuai thung a. Pawnchhia leh parda te pawh ka su ta law law a, ka Pass ṭha bawk nen ka thiltih rêng rêng chu tha tho tak hian ka ti a. Mahni tâwkah rilru a hlim veng veng mai a ni.




"Sangbawih" Bathroom pâwn aṭanga min ko thâwm ka hriat rual chuan ka lo eih vat a, ka insûk nuai lâi chu dahin ka va chhuak nghal a. Pangpâr báwr lian zet leh Paper bag tê fel rên ràwn kháia U Muanzuala lo ding nen chuan kan in hmachhawn nghal rân mai. "Awi U Muanzual..." ka ti hliai a, ngainatawm zet hian min lo nuih suk a. "Engtin nge? Engtik in nge i lo haw a...awi" hamhaih zet hian ka ti leh nawk nawk a. Helai hmuna ka hmu teh thut chu mak ka ti êm a ni. A hna vangin nikum aṭang khan Thingtlang-ah a awm char char a. Thla hnih liam ta a a lo haw ka hmu zuai tih loh kha chu tùn hi ka vawikhat hmuh lehna a ni.




"Niminah khan ka lo haw a, vawiinah result in puang dâwn sia ka tia. Pass lawmpuina hlan hmasak ber loh che ka hlau a, a rang a rangin ka rawn kal nghal anih hi" a lo ti zung zung a. Pangpâr leh Paper bag chu min rawn hmehbel nghal chawt bawk a. Ka la pangngai thei lo, "Awi...ka lo beisei miah lo che a..." ka ti nawi niai a, "I lâwm vak nange" a lo tih chuan lu ka lo thing vat a. "Aih chutiang pawh a ni lo, ka lâwm lutuk. Mahse min rawn ṭhawng êm alawm" ka lo ti zung zung a. A pangpâr min pek chu ka hnîm vang vang a, a Fresh a ni bawk sia, min ti hahdam veng veng mai.




"I lo va buai àwm ve a, kawngkhar ka kik pawh i hre miah lo" a tih chuan "Aw...ka lo insu a, lo ṭhu rawh. Thingpui ka lum ang che" tiin a thil min pek chu dawhkànah ka dah zui zat a, a lo ṭhu ve mai bawk a. A rawn lang teh thut chu mak ka la ti tho, "Hna i chàwl rih tihna em ni?" ka tih chuan "Ni thum chawlh ka la" a lo ti ve mai a. "Tih tùr neiin i lo haw tihna nge?" ka ti leh hrâm a, "I Pass lawmpui tùr che in ka lo haw ka tih tawh kha" a lo ti sam leh êt a. A lan dàn hmuh tuma ka va en chuan ngunthlûk fê hian min lo melh a, "Awi chutiang ringawtte chu...tih tùr dang i nei lo em ni?" ka ti ta hliai ringawt a. Min en chîk lutuk a, ka zâm zo vek.



Thingpui ka pêk rual chuan a lo ban vat a, "I ṭhiannu chu a ngaihawm hlê mai tiraw?" a lo ti ve sup a, za lo tih hriat zet hian a ṭhen zui suk bawk a. U Muanzuala hi Rintei û chiah a ni a, mahse kum 6 zetin an inthlau a, an unau ro ro ah chuan an inhrawn nasa bawk nen a dam lâi pawh khan an in ngai fâl êm êm a. Mipa ṭawng tam lo tak ni a ka hriat laiin Rintei kha chuan "A nghal thei lutuk, min tibuai reng zel. Midang mithmuhah hian a zia dik tak a chhuah duh lo mai mai alawm. Mahse U Muanzuala hi chu ka û te zingah pawh ka ngaina fâl a, min duat ber" tiin a chanchin min hrilh ṭhin. An inah khan ka lêng tam ve khawp a, mahse U Muanzuala nen tak hi chuan kan inbe êm êm ngai lo. A puitlingin a ṭawng tam lo bawk nen a zahawm vei khup a, ka nêl lutuk hran lo. Mahse mipa khawsak ṭha leh fel tak ani tih chu ka hre ve tho. Rintei boral hnú hian min rawn be ve ta zeuh zeuh a, ka zirna sènso chungchangah pawh a inrawlh ve tih ka hria. Pawisa te hi min rawn thawn nawlh châng a nei a. Zah viau e ti lo chuan ka hnial ve fo, "Pa Rama te'n min ngaihtuah a, nang lehzel chu heti hian rawn awm suh" ka ti ve nghat a. Mahse a ngâi pawimawh duh dêr lo. Mihring pangngai, zahawmna nei ve tho ka ni a. Ka chapona hian a tlin lo ve lek lek zel. Mahse hnial luih ngam hian a khawsa ngâi bawk si lo. A awm dàn hian min ti hrilhai fo ṭhin.




"Pa Rama leh Nu Ahruaii te nen pawh kan lo inbia a, i Nu kha a lunglêng ngawt ang" ka ti halh a, "Rintei hi chu kan ngâi tlâng alawm" a lo ti ve sup a. Ngáwi rengin a thingpui in lâi chu ka nghak a, a ṭawng loh chuan sawi tùr ka hre bîk bawk si lo. Ka phone lah Bathroom-ah ka hnutchhiah daih bawk si, ka awm dàn chu lài tak a ni ringawt. U Muanzuala chuan a lo hrethiam a ni chêk ang chu "Inthlahdul teh" a lo ti hluk a, thinrim a sawi erawh a ni lo, mahse a ngainatawm miah lo.




"I lo lêng rih dâwn nge i haw lehnghal dâwn?" ka ti tawl pek a, ṭawng sual inti lutuk in ka hmui chu ka pet nghal zeuh a. U Muanzuala chu a lungawi loh ka hlauh tehlul nen a lo nui huk a, "Nula tak tak i nih ve tawh hi, lài huih reng suh" a ti sup a. Chiang êm êm mai hian min rawn melh siah a, zâm tak ka ni ringawt. A awm dàn hi hriatthiam loh châng ka nei ve ta fo mai. Min ngaizâwng chu ka ti dawt ngam bîk lo va, mahse ngaihbel theih tùr hian a khawsa zing ve ta viauin ka hria. Nau angin min ngaihsakah ka ngai lui zel a, chutiang chu ni ngei se ka ti hlê bawk.




"Tak taka U Muanzual, ka lâwm lutuk aw. Keimah vanga sum in sèn nasat tawh nen lawmpuina thilpek lehzel min rawn ken sak a, ka lâwm takzet" thutak zawk hian ka ti ta hluai a. "I thilpek dawn chu hawng nghal la" a lo ti sup a, dawhkàna Paper bag ka dah chu min rawn mitmei zauh bawk a. A thingpui lem zawnga a hrawk bâwk che ralh chu ka lo melh daih thung a. Eng nge maw ka hriat teh hrep ni.




Paper bag ka hawn rual chuan "Awi" ka ti hluai a, "A to àwm si...a ngâi lo asin. Hetiangte chu a..." ka ti leh nawk nawk a. Bawm chhûnga sana, 'Titan' tih inziak gold rawng chu ka melh leh a, thilpek hlu tak ni mah se pêk lêt leh mai ka duh. "U Muanzual, ka la thei lo vang" ka tih chuan "Bun chhin teh, i inhmeh dâwn lutuk " a lo ti sam êt thung a. "Awi mahse..." ti a sawi buai leh ka tum rual chuan a rawn che ta vut a. Ngáwi rengin sana chu a la chhuak a, ka kut a rawn chelh rual chuan ka lo phu uih mai. Min bun tîr mual mual a, ka kut la chelh reng chung chuan min rawn melh a, "I inhmeh" tiin a ṭhen leh suk a. Phawk deuhin ka lo melh thung a, ka lan dàn chu a nuihzatthlak viau in ka ring.




Min bun tir ta bawk nen sawi buai ngaihna a awm tawh si lo, lâwmthu ka hrilh ta ringawt a. Thilpek min pe tawh lo turin ka ti zui zat bawk a, "Kha chu ka thû ni rawh se" a lo ti duh lêk chauh a. A lawmawm rual rualin ka haw tak tak a ni.




A haw tùr chu pâwn thleng ka zui chhuak a, zàna a rawn lên leh tùr thû a sawi kher chuan min ti hrilhai lehpek hlê. "Eng nge i lo tih dâwn?" ka ti hu a,"Pass lawmna kan nei ang" a tih chuan "A ṭul lo emai a" ka lo ti vat a, ka lei ka vêng hman leh tawh lo. U Muanzuala chuan min melh ta rûn rûn a, "Awle" a ti ta hlauh mai. Awm nuam huai tur ka nih laiin ka inthiamlo hnuhnawh viau lehnghal a. "Ka Nu leh Pa te'n i puala chawei khâwm an rawt a. A hun leh nî tùr an la sawi chiang lo na in tùn kâr chu a nih hmêl a. Lo hnial s'u aw, an rilru dam nan tal pawh" pangngai tak hian a ti leh duah a. "Nia an lo sawi a. Kan lo ngaihtuah dâwn ania" ka lo ti ṭha ve mai bawk a. A kal mai tawh dâwn emaw ka tih laiin min rawn hnaih leh thut a, inrinna hun pawh awm lovin ka chalah chuan a hmui a rawn nawr tâwk a, hun reilotê mah nise ka ni huih mai.




"Ka lo kal leh vat ang, anih phawt" tiin ka sam chu a tuai leh zeuh a, a kal liam lâi pawh hre hman lo khawpin ka hamhaih. Ka chal chu ka han tawk de de a, U Muanzuala khawsa zia chu mak ka ti tak tak a ni. Nau anga min en vangah ka la ngai lui tho. Ka lakah rilru dang pu tùrin ka dah ngai lo va, a hmeichhe duh záwng chi pawh ka ni dâwn lo hrim hrim. Mahse a che zia chuan engtin emaw riau hian min fan tlat bawk si. Ngaihtuah buai duh tawh lovin ka insûk lâi chu ka va su chhunzawm ta daih a. Rilru ah erawh a awm zui veng veng tho.




Ka Nu a lo haw leh meuh chuan eirawng ka lo bâwl peih fel fiam tawh a. "Tlãiah khan Muanzuala dàwrah a rawn kal a. I Pass lawmna pualin shawl min rawn pe ve ngéi a, lo hnar chî vak a ni bawk si lo, ka la ta ringawt a. A fel ngawt mai Muanzuala hi chu" ka Nu chuan a rawn ti lût bawrh bawrh a, ka lo ka ho mai. Ka Nu lehzel pawh thil a lo leisak a, a lawmawm rual rualin a zahthlak zozai khawp mai. "Keipawh thilpek min lo pe a" ka ti ro halh a, zêp chî ah pawh ka ngai lo. Ka sana bun lâi phei hi chu a la hmu dâwn tho tho a, hrilh tlang vek law law kha a ṭha mai. Ka hrilh ta rêng bawk a. Ka Nu chuan a fak zui lehpek hlê a, mahse kei ang thovin zahthlak a tiin inthlahrunawm a ti ve tho anih hmel.



Zànah ka beisei lâwk loh lutuk in ka ṭhiante an rawn lang hlawl a, "Ka ṭhiante" tih lemah Rintei ang em em chuan kan inzui nasa hlawm lo va. Mahse a awm tawh loh hnù a college ka kal pui ṭhin, ka kawm ve berte an ni. Puii leh Bsa te an ni a, an pahnih bâk hi Rintei hnù ah kha chuan ṭhian ti a sawi tùr ka nei em em lo.



"Pass lawm ang u" tiin eitur an rawn inken ṭûn mai a, "In lo kal dâwn tih in sawi lâwk si lo va, sawi lâwk ula chu ei tùr ka lo siam tùr ania" ka lo ti ve hliai a. "Siam siam a ngai hlei nem, hei kan rawn keng ṭeuh alawm" Bma chuan a lo ti vat a. An thil rawn kente chu ka en kual a, Momo te, Chicken Drumstick te, Spicy noodles te, in tùr an rawn keng bual bawk a. An rawn keng hnem tak tak a nih hi. "Awhaww...hetiangte chu in sum sèn ngai lovin kei paw'n ka siam sak thei reng che u asin mawle. In rawn ti hautak mai mai a ni" ka nu pawh chuan a lo ti ve vat a. Mahse an ngaih pawimawh vak hmel loh.



Zanriah kan eikhamna a la rei lo tlâng bawk nen thil ei hma chuan choka lamah kan inkawm ta melh melh a. Ka nu erawh chuan sitting room-ah TV a en thung a, min rawn ngaihven vak lo. Dár 9 a rik tâkah phei chuan zing thawh hma a ngai ti a chhuanlam siam in min mutsan ta daih a. Sitting room lamah chuan insawn pheiin TV chu kan en zui ve nghal daih bawk a. Ril a lo ṭam veleh deuh tawh bawk nen kan thil ei turte pawh chu kan ei nghal a. Hmalam hun sawi a kan thil tih chhunzawm tùrte kan sawi liam liam tâkah chuan ngaihtuahna a tawi leh ta tup mai. Tih châk ka la ngah a, a theih phawt chuan lehkha hi zir chhunzawm zel ka la duh. Mahse tunlaiah zirna a hautak tawh si a, kan zir sàn poh leh insènso na tùr a tam ve zel a. Hna ka zawng ve tawh mai ang nge ka zir zawm leh ang tih hi ka sawi lawk mai thei tlat lo.



Ka ṭhiante haw hnu pawh chuan reife ka inngaihtuah a, ka rilru chu a kual a kual a, a ngaiah bawk a let leh zel a. Ngaihtuahna ropui tak chu ka nei lem lo khawp mai. Ka nu puih ve tawh ka duhna leh lehkha ka zir zawm duhna chu a inchen thuak mai. Pa Rama te'n min enkawl chhunzawm inhuam viau mah se an kuta innghat ngawt thei kan ni lo va. Rintei nen ṭhian ṭha tak lo ni tawh ṭhin mah ila amah ber a awm tawh si lo va. Ka rinchhan ngawt thei tawh lo.



Zàn ka mu ṭha lo bawk nen zingah chuan thawh ka hai pek a, ka nu kaihthawh ngai hialin ka awm a. "I mu rei tawh mah mah, tho tawh la. I dam sam lo zawk emawni " a rawn ti sawk sawk a. "Dàwr ah i kal tawh dâwn em ni?" la mu zawi nguai chung hian ka lo ti ṭiak a. "Awi awi awi" tiin min rawn melh vak phawt a, "Ni a tláng sàn tawh êm hi, dàwr te chu ka hawng daih tawh. Dár 10 a ri tawh dâwn alawm, i reh rei ta lutuk a, i chanchin ngaihven tùrin ka lo haw anih hi" a ti ta zung zung a. Chutiang em em a rei ka mu hem mai chu keipawhin mak ka inti. "Ka va'n mu rei êm êm ve" la tho chuang lo chuan ka ti leh hram a. Ka room tukverh rawn hawn kual pahin ka nu bawk chuan "Tho tawh reng ta che, nula pui hetiang chen chen mut chu a dik thei lo" a lo ti leh vat a.




Ka tho ve ta ṭuah ṭuah a, ka la intha zo lo êm êm zui a, ka mu sil ṭhûm mai. Room aṭanga ka chhuak mai tùr chu a thu rawn sawi avang chuan ka ding leh chawt a. "Zingkarah khan i U Muanzuala a rawn kal a, a hnathawhna a a let leh hma in rawn mangṭha che a tum a. Nang lah chu i lo la mu thlurh thlurh mai sia, kaihthawh che ka tum lah khan a phal tlat si lo va. Choka dawhkànah khan i thil tùr a dah a, eng nge a nih phei chu ka hre lo, ka lo en lo hrim hrim a" ti mawlh mawlh a. A thusawi chu a ngaihtuah zui lem lo tih hriat tak hian ka room tukverh inkam ṭha hlei thei lo avang chuan a phun zui nang nang a.



Rang zeta chhuakin choka ah chuan ka phei tlang nghal a, dawhkànah chuan paper bag lian ve pangngai tak hi a lo awm ràn mai. Ka va en nghal zat a, sling bag dum, simple leh changkang ru zet si hi a lo nia, en reng reng pawhin a to dâwn tih a hriat reng mai.



"Eng nge a lo pek leh che a?" room aṭanga ka nu lo chhuak chuan a rawn ti a, ka la phu awk zui. Ka thil ken lâi chu a rawn hmu chawpchilh ve nghal mai aniang, "Muanzuala chu a...a ṭul tawh kher lo asin mawle. Zingah lah khan sawi buaina hun awm eih lovin a rawn dah tawp a, a inthlahrunawm zozai mange" a ti leh nghal vawng vawng a. Sawi zui vak ngaihna pawh ka hrelo, a lawmawm a, mahse ka zak ru leh chem chem tawh. "A duat ve ngawt mai che, nau ang tak tak hian a en ve che in ka hria" ka nu bawk chuan a rawn ti leh a. Chhang lem lovin ngawi rengin room-ah ka va lut leh nghal a, sling bag pawh chu ka la zui zat bawk a. U Muanzuala chêt dàn chu lawmawm viau mah se a em em ka ti ve tlat tawh.



Whatsapp-a va text mai ka tum lâi chuan a message a lo awm reng chu niin! "Nizàn ka lo kal i duh loh chhan kha midang lo kal tùr an awm vang lek a lo nimaw. Mahse a pawi lo e, ka lo kal a, i lo la muhil sia. I thil tùr dah in ka let leh ta anih kha. Ka hnathawhna lam pan tùrin ka chhuak dâwn chiah" a lo ti duah a. Nizàn ka hun hman dàn a lo hre kilh kelh chu mak ka ti kher mai. "Thil min pek hi ti tawh suh aw" ka va ti thawr a, ṭawngkam thiam loh nen mawihnai zawka sawi dàn ka hre hlawl lo a ni. Ka message chu pakhat chiah a in tick a, a hnathawhna lamah a let leh tawh anih chuan motor a khalh vêl mêk anih ka ring.



U Muanzuala thiltih dàn chuan nilengin ka awm a ti nuam lo, ka nu dawr nghak ka pui ve tak nâ in rilru ka pe hlawl si lo, vawiin chu ka ṭangkai nep khawp mai. Rilru in kap ṭunin ka awm a, U Muanzuala chu call a, hrilhfiah tawp mai te ka duh a, mahse ka ngam bawk si lo. Rintei boral hnù a min ngaihsak dàn hi nau ang chauhin ni zel hram rawh se. Ngaih kawih loh luih ka tum ngar ngar a, mahse mi ã hlawm tawp lo tán chuan a har. Ka number a lo neih ve ringawt dàn te, min rawn biak hmasak ber zàna "Rintei u Muanzuala, ka number hi lo Save rawh" a rawn tih ve tawp dàn te kha ka ngaihtuah let a. Aizawl-a a awm chhun a a lo kal ve sek ṭhinte, min be tam viau lo chung pawh a min biak dàn awmze nei zet zet ṭhinte chu ka ngaihtuah rauh rauh a, thawpik lutukin ka'n thaw chhuak hluai ringawt zel a. Ka awm dàn tak pawh hi ka hrethiam tawh bîk lo.



Zànah chuan ka lo ngaihtuah mêk laiin min rawn call ta thut a, ka phu nasa bawk nen ka la lo ṭep a ni. Mahse thil awmzia sawina hun remchang tiin ka la ta tho a. "Quarter ka thleng chiah a, indah fel hmasa lovin ka rawn be nghal che. I message ka hmù a" a rawn ti nghal sup a. "I thleng tluang chu a lawmawm e" ka lo ti ban chalh ringawt a. Min rawn be ta chèng a, a hmaa sawi tùr ka lo ngaihtuah vak vak te kha an bo nghal duak mai. "Ka ngaihawm ve tho em?" a rawn tih chuan ka meng tal tawp a, ka ṭek chhawk in ka hria. A rawn tih dàn teh tawl chuan min ti hamhaih viau bawk. Ka aw ka lo thian kharh ringawt a, ka awm dàn hria ni àwm tak chuan a rawn nui ta huk huk a.




"Zingah khan i va tho tlai reng reng ve" a rawn tih chuan "Ka mu tlai lutuk a" ka lo ti vat a, tho tlai ṭhin ang hrima min hriat chu ka duh bîk lo. "Min ngaihtuah nasa lutuk a, i mu thei lo anih kha" a rawn ti leh siah a, ka zam leh nghal vek tawh. Mahse inthununin "Thilpek min pe tawh suh ka tih kha ka ti tak tak ania aw. A inthlahrunawm, chuloah a zahthlak. Ka mamawh chu ka lei ve thei alawm" ka lo ti zung zung a. Tuna ka sawi loh chuan nakinah ka sawi ngam tawh dâwn si lo.



Engtin tak min rawn chhang let ang maw ka tih rilruk mêk lâi chuan "Kan tih theih reng reng pawh min tih sak tlat tute nunah hian kan pawimawh thawkhat viau tih hriat tur" a rawn ti teh daih a. Thu khuh deuh siin a tana ka pawimawh zia rawn sawi a tumna a ni tih chu ka hai bîk lo. "Nau angin min en tih chu ka hria a..." ka tih lâi mêk chuan "Hriat sual i neih vang anih chiah chu" a rawn ti ta khauh a, ka ngawi chiang kher mai. Ka hlauh ang ngei ngeiin eng emaw tak chu a lo awm chiang anih hmel, mahse ka ring duh chuang lo. Thil nih dàn tùr a ni lo bawk.



"Anih ka dah phawt ang, ka buai tlat" tiin ka Phone chu ka hmet thi ta daih a, min rawn call leh lo hlauh. Mahse zanrei lamah a message a rawn thleng ta thung a, "Eng nge tih zawm zel i tum?" a rawn ti a, ka ngaihtuah fe hnu ah chhan lohah ka tlak hmiah mai. Thil a punlun ang a, ka hlauh ang thil hi a thlen ka duh lo. Ka tán chuan Rintei Û anih bakah ka û ang ve tho a ni a. Ka lakah rilru dang a neih pawh a thiang lo ka ti ve tlat.



Thawhṭanni tuk a ni a, Pa Rama te nupa an rawn lêng hlawl a, ka pass lawmna chawhlui kil ho an sawi kha an lo ti tak tak a. Ka nu nen min rawn sawipui a, "Naktuk hi sawrkar chawlh te a ni bawk a, remchang kan lo ti khawp a. In nufa in harsatna hranpa in neite a nih lem loh chuan naktuk hian châw chu eikhawm ta mai ila. Sangbawihi te result chhuah aṭang pawhin kar khat a liam leh der tawh a, a lawmna tih tlai lutuk kha a ṭha lo" Pa Rama chuan a ti dap dap a. "Engtin mah lawm kher a ngai pawh kan lo ti hlei nem. Kan lo läwm tâwk tawh viau asin. In sènso na tùr a tamin a hautak mai mai alawm. Chuloah a zah te pawh a zahthlak" ka nu chuan a lo ti ve luam a. Mahse Nu Ahruaii chuan "Ruai ṭheh ang bung bung kha a ni dâwn chuang hlei nem. Kan chhungkhat laina, ṭhian hnaivai te kan sâwm ang a. Nangni'n in lo sâwm ve bawk ang a, kan vaite chuan mi 50 pawh kan tling chuang nang" a lo ti ve tlat a.


Reife kan han ngaihtuah ho hnu chuan an nupa an ṭang nasa bawk a, kan hnial leh thei ta ngang lo. Naktuka ka pass lawm chu kan rel thlu fel a ni ta der mai. Nu Ahruaii lah chu a phur nghal em em a, "Inthlahrunna tùr engmah a awm lo ania. Kan duh dân a ni zawk a, kan lawm viau zawk ania. Kan theihtawpa Sangbawihi duat hi chu kan tih tùrah kan ngai hmiah. Kan tán fa ang tho ania, mihrang pawh in ni lo va. Mi pawhin mak an ti lo vang, an hrethiam vek ang" a ti sar sar a. "Muanzuala pawh hrilh ve nghal vat ang, a phur viau ang a sawi ve nasa si" Pa Rama chuan a lo ti zauh a, U Muanzuala hming a rawn sawi rik tâkah chuan ka beng a lo verh kher mai. Hman zàn bâk kha min rawn be leh ta bîk lo a, ka ngaihtuahna ah erawh a awm zui rauh rauh thung.




Pa Rama te nupa haw tùr chu páwn thleng kan thlah a, "Engmah lo ngaihtuah buai s'u aw. Midang sàwm khâwm kha lo ti tawp ula, a bâk chu kan ngaihtuah vek tawh ania. Ngaihtuah hah tùr engmah a awm lo, tih fel sa vek angah ngai rawh u" Pa Rama chuan a ti leh dap dap a. A sawi dikin ka ring, engkim ruahman felfai sa a kan ngaihdan min rawn zawt mai mai an ni te'n ka hria.




Zànah chuan ka ṭhiante ka hrilh kual ve a, "Ṭhiante" tih lemah Bsa leh Puii te bâk sàwm tùr ka hre chuang lo. Min lo phùr pui thiam khawp mai a, an rawn kal ngei ngei tùr thû an sawi nghal bawk a. Ka sàwm ve chhunte an hman dâwn hlauh chuan a ṭha a ni mai. Ka Nu pawhin a ṭhiante pahnih thum vêl chu a sâwm ve a, kan chhung dangte chu thingtlang lama awm deuh vek an nih avangin an remchàn hlawm loh hmel a. Mahse ka pawiti em em hran chuang lo. Chhungte tih hian chhungkhat laina hi kan ngah lo khawp a, kan inhrepawh tawn ṭha vak lo bawk a. Ka nu nen baihvai taka kan awm ṭhin lâi kha ka ngaihtuah chang apiang hian kan chhungte hi ka haw tlat zel. An hnen aṭangin puihna kan dawng lo ve êm bawk a, ka va beisei ngawr ngawr vang ni lovin an mak ka ti ve êm a ni. Kan nufa tán chuan Rintei te chhungkua hi an hlu ber ka ti ve tlat.




Zing dár 10 vêl aṭangin Nu Ahruaii'n min rawn Phone sek tawh a, "Tih tùr em em chu a awm chuang lo nâ in lo phei vat ula, kan lo inkawm ang a" a rawn ti a. Ka sawi hmaih loh tur chu Nu Ahruaii hian min ngaina ve em em a, phone-a kan inbiak pawh hian nufa ang maiin kan inbia a, darkar chuang fe inbiak ṭum te hi kan nei ṭhin. Nu ṭawng duh ve tak, mi pawi sawi lem lo, ṭhian duh tak ni ah ka ngai mai a. Chutiang chu midang hmuh dàn pawh anih ka ring. "Ka biak che hian Rintei bia angah ka inngai a, ka lunglen min hnem ṭhin" a ti a, a lunglen hnemtu tal ka lo ni ve thei pawh chu ka lawm.



Dár 11 velah kan va thleng ve thei ta hram a, eirawngbawl ho puih kan tum lah in an phal bawk si lo. Inkawm khawmna ah chuan ṭhu khawm in kan titi ta daih a. Rintei Û te fa hovin "Ani" tiin min lo bawh nghal chung chung a, an in a lut chhuak ve reng ta chu Rintei aiawhtu ka ni hawt mai a. A vahte hian min ngaina ve em em a, ka tán pawh vahte ang mai an ni. Ka infiampui nghal a, ka nu leh Nu Ahruaii chu an inkawm nghal bawrh bawrh a. Kan ri ve chel chûl mai.



"E hei Muanzuala pawh a lo thleng ta alawm" Nu Ahruaii'n a rawn tih hluai tâkah chuan a hawina lam chu ka hawi vat a, U Muanzuala nen chuan kan mit a intawng nghal siah mai. Min nuih suk a, nuih let ve ta mai lo chuan ka hawisawn ringawt a, a chhan pawh ka hrelo, ka lài huih anih chu! Ngaih pawimawh loh hmêl zet hian naupang ho chu ka infiampui leh ta daih a. U Muanzuala chu a kal mai ang ka tih rilruk laiin kan infiamna takah chuan a rawn kal ve nghal ringawt a, naupangho lah chuan "A pate" tiin an lo bawh nghal chung chung mai sia. A thil hawn sak te chu a sem nghal a, melh pawh ka melh ṭhat ngam loh lâi chuan "Anu Sangbawih, khale i ta ve tùr " tiin dark chocolate hi ka hma zawnah a rawn lek va a, hawi loh theih pawh a ni tawh lo.




Ka nu te ho mitmei ka vèn tehlul nen min rawn ngaihsak lo hlauh a, U Muanzuala min koh dàn lah chu ka duh der lo. "Kha" ti a a chocolate ken lâi la tùra min rawn mitmei leh tâkah chuan tim dai hian ka ban a, "Ka lawm e" ka ti sep a. Ka zak thar ta em em ringawt hi ka hrethiam thlawt lo. "Tinge 'Anu' i tih? Ani tùr alawm" naupangho zinga upa ber chuan a lo ti hu a, naupang rilru thianghlim kâ aṭanga chhuak mah nise a puitling viau a ni. Chutah U Muanzuala chuan "Anu a la ni dâwn alawm" tiin min rawn melh a, a nui suk bawk a. Ka sa chhuak pup mai, a sawi key hi man lo ka ni bîk lo. Chiang fek fawkin sawi lo mah se ka man pha ve vek. Thil dang a sawi zui hma in Nu Ahruaii chuan a rawn ko hrang ta hlauh a, ka läwm zia chu pui tak a ni.




Ka ṭhiante pawh tlai lamah an rawn thleng ve thei ta hram a. Nu Ahruaii leh ka nu te chuan an lo be nghal bawrh bawrh a, an ti tlangnel thiam khawp mai. U Muanzuala pawhin midang awm lâi chuan awmze nei deuh deuhin min ṭawngkhum ta bîk lo va, ka thaw buai tak nâ in a lo awm ve hrim hrim hian boruak rit a keng tel tlat. Puii lah chuan "U Muanzuala pian fuh zia hi chu aw" tiin min rawn hrilh ru sar sar reng a, hnê tak ka ni. Bsa nen an inkarah ka ṭhu a, ka ngaihbel nge pawh ka hrelo, U Muanzuala chuan Bsa chu a rawn melh leh rûn rûn ṭhin a, a huat hmel ti dâwn ila a ni thei chiah si lo. Ngaihtuah buai lo law law ang.




Pa Rama'n hunserh min hman sak a, thu ṭha tak tak min fah zui bawk a. An tán mihrang ka nih loh zia leh fanu ang taka min en thû a sawi uar hle a. Ka zir lehna tùr ah pawh an inhuam viau thû a sawi nghe nghe a, mahse bawhzui chi ah ka ngai tawh lo. Zanriah kan ei kham a, kan intihfel meuh chuan dár 7 a lo ri thuak tawh a. Ka ṭhiante haw tùr chu páwn thleng ka va thlah ve a, Bsa lah chuan uang thuang deuh hian min kuah thuak thuak a, min chhaih pah reng bawk a. A tih ṭhan dàn a ni a, ngaih kawih theih lamin min fiam lo tih chu kan hrethiam tlâng vek ang.



Ka thlah fel inchhung ka lut leh tur chu U Muanzuala a lo ding reng a, kan in hmachhawn ta siah mai. Ka la phu dawrh zui a, mitmeng hriatthiam harsa zet hian min melh a, "I lo awm tih ka hrelo a" ka ti nawi niai a, thil sual ti man chhuah ang maiin ka ṭi dak ringawt mai. "Bsa kha i ṭhian nge i bialpa?" a ti nghut a, ka melh vat a, a thutak ngang mai. "Tinge a kuah thuak thuak che?" a ti leh nghut a, a lo lungawi lo ve ringawt in ka hria. "Ka ṭhian" ka ti ṭha ve mai a, ka dang a la ro huam zui a. "Mipa ṭhian lakah chuan fimkhur tùr " a lo ti tawi leh tuk a, "Kan infiam ve dàn anih kha" ka lo ti vat a. "Taksa insi lo zawnga infiam dàn a awm" a lo ti bur mai. A lungawi lo tak takin ka hria. Ka melh kar a, a hawisawn duh bîk ṭhak si o, "A ho emai" ka ti ta ringawt a. "A lehpek ah chuan chin tâwk hre tawh ang che" a lo ti leh kher a, ka sa ve phat mai.




Hnial pang pang inpeih at hian ka melh nghal khai a, mahse a mitmeng dam thlup chuan min thunun leh ta tlat! Ka sam chu rawn tuai zeuh in "Hmeichhia chu hmeichhia in ni a, mipa chu mipa kan ni. I hmakhua ka ngaih vanga sawi ka nih chu" a ti dam thluam a, nau angin min zilh ni berin ka hria. Mahse tunah tak hi chuan unaupa, naute hauh ti na deuh, ham strict deuh hi ka tehkhin ber. Ngawi rengin inchhungah chuan min luhsan leh nul nul lawi a, a awm dàn hi hriatthiam a har ve thlawt. Chuloah a lo haw ta sek te hi a mak, hna ah an buai ve lo emawni.




Ka nu nen chuan dár 9 velah haw kan tinzawn ve thei ta chauh a. Nu Ahruaii'n min la thlahlel ve êm a, kan awm rei ta deuh kha ania. Engkimah min buaipui vek chu sawi loh, pass lawmna thilpek ka dawng nual bawk a. An chhungkua hian ka phû lohin min duat ti tawp mai ang. Kan khawsak dinhmun a inthlauh tehlul nen an chhungkaw mi ang chiahin min chei bawl a, an chungah eng thil ṭha mah ka ti pawh a ni lem si lo. Pathianin an chhungkaw kaltlang hian mal min sàwm ni berin ka hre tawh.



Kan haw tùr chu U Muanzuala'n "Ka thlah ang che u" a ti tlat a. Ṭul ka ti lo rapthlak lutuk, mahse ka boruak hrethiam ve hlawm lo ta chu an lo pawm thliam hlawm a. Hnial bur theih ni tawh bîk hek lo le, ka nu nen chuan min thlah ta poh a. Kawngtluanin ka nu nen an titi a ni ber, kei chu awm ve lo ang mai ka ni. An titi ka zawm ve peih bawk si lo, anni pawhin min ngaihsak vak bîk lo bawk a. U Muanzuala lah chuan ka nu hahawlh zawng sawi a thiam si a, ka rin ai daihin an lo inkawm thei.




Kan inkawt kan thleng a, kan chhuk nghal mai ang chu ka tih laiin U Muanzuala chuan "In veng ṭhenawmah thil lam lawk tur ka nei a, Sangbawihi hian min lo lam pui lawk se ka va ti ve. Mahni a va kal tawp ai chuan a khawhar thlak loh deuh ang" tiin ka nu chu a rawn a. Engmah lo sawi ve nachang pawh ka hrelo, a rawtna teh thut chuan min ti hamhaih hle ringawt a. Ka nu lah chuan "Va kal rawh u, kei chu ka lo mu ang" a lo ti var a, a chhuk ta tharh mai sia. "Kan reilo ang" U Muanzuala chuan a lo ti ve vat a. Ka nu inchhunga a luh rual chuan ka harh chhuak ve chiah a tih theih ang, ka melh nghal vat a. "A va ṭul lo tak" ka ti hap a, U Muanzuala erawh a lo nui suk thung a.




"A hmaah hian rawn insawn la" a tih chuan "Ka haw ve nghal zawk ang" ka lo ti vat a. "I nu ka dil vek tawh kha, a phal vek tawh" a lo ti ve sup a, min la nuih ruh ruh zui a. "Awi U Muanzual..." ka ti hliai ringawt a. "A hmaah chuan rawn insawn rawh" a lo ti veleh sup a. Ka haw nghal anih chuan ka nu'n zawhna a lo nei ngei dâwn si, a thû ka awih phawt a ngai. A hmaah chuan ka va insawn ta tawp a. "Reilo ang aw, tih tur ka la nei bawk si. Chuloah ka chau lutuk" ka ti nghal zung zung a. "Thil va lam zuai ringawt alawm. Eng vak nge i lo beisei?" nghal zet hian a lo ti kauh a, ka zak nghal chem chem mai.




"Aaa...chutiang lam pawh a ni lo. Ih eng lo, rei ka duh lo ka tihna mai ania" ka ti buai nûai a, insawifiah vak ngaihna pawh ka hre chuang lo. U Muanzuala lah chu a lo khi suk suk a, "I beisei ang khan ka awmpui mai tùr che ania" rawn ti leh zeuh pek a, ka beisei phak bakin a nghal tlat hepa hi! "Vawiin chu ka lawm takzet. Pa Rama leh Nu Ahruaii te chungah hian lawmthu sawi ngaihna pawh ka hrelo. I chungah pawh ka lawm, thil min pe fo a, ka läwm thiam lo ṭhin si. Û nei lo mah ila ka tán chuan u i ni" ka ti ta daih a. Thudang sawi ka duh tawh êm vang a ni. Ka thusawi tàwp lam chu a helh deuh aniang "Nau ang i ni ve lo" a lo ti khauh a, ka û anga ka en zia hre kher se ka tih chhan pawh a awm dàn hi ka hai bîk tlat lo a ni. "Ka û i ni tho tho" nui hak hak chung chuan ka ti lui ve tlat a, a lo rum nghut mai.




"Sangbawih, i haider theih map loh tùra ka khawsak hma hian pawm mai rawh" a rawn ti thûm ta chhak a, ka nui tàwp chiang kher mai. A lo nui suk tawh thung a, "Eng maw tih zawm zel i tum a?" a rawn ti leh daih lawi a. "Ka zir zawm zel ang a, ka nu tán theihtawp ka chhuah zel ang" ka lo ti ve mai a. Zir zawm chu ka tum tak tak em tih phei chu ka la inngaihtuah fe a ngai ang. "Ka la nghah leh deuh che a ngai dâwn a nimaw" a rawn ti ril leh ruih a, zanin chu a thup tawh lo ngang mai. Min lo nghak ṭhin reng reng emawni?




Ka ngawi ta reng a, ani paw'n engmah a sawi tawh bîk lo. A ṭhiante in a tih lah chu kan thleng har hrep lehnghal a, darkar chanve dâwn kan tlân leh tawh a, a ngawi rûn tawh bawk si. A tawpah chuan ka zawt ta tawp a, "Kan thleng ṭep tawh em? Kan kalna tùr chu?" ka ti ta tawp a. "I haw duh viau tawh em ni?" a lo ti khauh thung a. "A tlai tawh alawm. Chuloah ka nu khan min lo ngaihtuah ang, kan rei ta mah mah sia" ka lo ti ṭha ve mai a. Chutah a motor chu turn in min let pui nghal hmiah a. "Eng nge a awmzia?" ka tih hu chuan " Kalna tur ka nei tak tak hlei nem" a lo ti heu mai. Atthlak tih hmel zet hian amah pawh a nui tawp a, "Awi...i ti àwm ang lo ve e" ka ti hlak a, a bâk sawi zui vak ngaihna pawh ka hre chuang lo. "Ka'n phur kual châk mai mai che mawle" tiin a nui leh suk suk a, a la lungawi hmel em em zui a. Ngam deuh chu ni ila ka chhip sam buk laiah chuan ka kek hrep duh ang, ka haw lutuk tawp a nimai.




Ka âng zui hlak hlak a, eng ber nge ka sawi pawh ka hre tawh lo. "I ti àwm ang lo emai" ka ti sek tih erawh ka hria, ka lungawi lo ve êm bawk a ni. Chauh naklaia motor-a in tlan kual pui hrep kha, thil ṭul miah lovah lehnghal. Ka nu dawt a la hrilh zui a, a lawmawm fahran lo. Kan in kan thleng leh chiah chu motor chu ka hawng nghal rawk tawk a, "Ka lawm e" a'n ti ngawt pek a, ka hawi leh he haw a. Ngainat awm zet a min lo nuih in "Min ṭawngkhum ve pang pang ngam ta alawm. Ka hlauhawm bîk loh zia i hre chho zel ang" a lo ti ril ruih a. Meng buai nakin chhan pawh chhang tawh lo chuan ka chhuak ta nghal daih a. Ka sa chhuak pup pup mai. "Muttui aw Nau-i" min tih zuina pawh chu ka chhawn tawh lo hrim hrim.




Ka muthmunah ka ngaihtuah zui nasa mai a, phat rual lohin ka laka a rilru puthmang ka man thiam tawh si, awm dàn min ti hre hlawl lo. Thup nei miah lo va ka laka a khawsak zui chiam ka hlau a. Ka û ang baka en chu ka duh lo bur, mahse ka thei kher ang em? Ka rilru buai lutuk chu ka inlet tawn sek a, a laka ka rilru puthmang hi a danglam ve tial tial ang tih ka hlau. Tunah pawh sawi thiam theih si lohin a ṭawngkam eng emaw hlekin ka kawchhung a khawih che zel ania. A ching zawngchhang anih ngat phei chuan ka hnar zo kher ang em?





Ka hlauh ang ngei ngeiin U Muanzuala chuan engmah a thup buai ta lo. Nitin min rawn be ta tlut tlut a, ka chhan let lem loh pawhin a thiltih te a rawn sawi thlap thlap ṭhin a, nin ai mah chuan ka rilru a tihah tawh. Chiang takin engmah sawi dawt lo mah se hma a rawn la chu a ni deuh ber tawh. Ka nu leh a chhungte'n an hriat ka hläu em em a, eng angin nge an ngaih ve ang? Ngaihtuah pawh ka ngaihtuah thui ngam lo. Nu Ahruaii phei chuan hmeichhe ṭha tak a lo hual sak ve kiau thei a, kan inhmu chhia ang tih mawlh ka hlau a ni.




"In inkawtah ka awm, lo chhuak la" a message ka chhiar zawh rual chuan ka meng phawk vak a, ka lung a rawn phu rang nghal dup dup mai. Kha zàn aṭang khan thla khat lâi a liam leh tawh, chawl map lovin zantin, tuktin, nitin min rawn bia a ni hawt mai a. Ka haider mai zel a, mahse zanin chu hai der theih a nih hmel tlat loh. "Haw rawh" tih zawngin ka chhang let a. A hna ah te hian a buai ve zozai lo emawni, tun hnai a rawn haw sek mai. "Lo chhuak phawt la" a rawn ti veleh ṭung sia. Mahse chhuah ka tum chuang lo, hrelo der ila, chhang duh tawh lo ila a haw ve mai ang ti rilru chungin ka mutsan lui a. Mahse minute tam pawh a liam hma in kan kawngkhar a rawn inkik ta dat dat a, ka Nu in min lo la chêt khalh zui!




Room aṭang chuan an thâwm ka ngaithla kar a, "Muanzuala teh hlawl chu! Engtik in nge i lo haw? I va rawn lang tlai teh thut ve" ka Nu in a tih ri chu ka hre nghal a. Sana ka en chuan dár 10 a ri ṭep tawh. Ka chhuah loh chuan a haw ve mai ka ring kha ka ring sual hle ani. Zan a rei tawh bawk nen ngampa deuha a rawn kal ṭhuai ngam chu mak ka ti hrim hrim tawh. "Sangbawihi biak lawk ka duh a, ka message min chhang let lo va" a tih chuan khûk ral daih mai ka duh. Chutiang thû ka nu bula a sawi teh tawl chuan min ṭhawng ngang mai. "E aw anih chu, ka'n ko ange. Lo ṭhu rawh, a la muhil lovang" ka nu pawh chuan a lo ti ve mai bawk a. Mahse a aw ah chuan mak tihna ka hre ve thei tlat.




Ka lo insanmar ṭeuh lâi chuan ka room kawngkhar a rawn ri ta chiah a, "Sangbawih, i u Muanzuala a lo kal a, a be duh che. I la mu lo tiraw?" ka nu chuan a rawn ti lang lang a. Chêt chhuah lohna chi ni pawhin ka hre tawh lo. Tîm leh lungphu dawt dawt chungin ka room kawngkhar chu ka va hawng a, ka nu nen kan in hmachhawn nghal ràn a. A mitmeng aṭang chuan U Muanzuala haw hunah zawhna chhan tur ka ngah dâwn hle tih ka hre thei.



"Eng nge i rawn tih dâwn?" a hmazawna ṭhu thla hnak chung chuan ka ti tawi tâk a. Ka nu khan min mutsan nghal daih a, ka zah vang peih lo. U Muanzuala chuan min lo melh run run a, "I lakah hian eng fiamthu mah ka thawh hauh lo ania" a lo ti ve nghut a. "I sawi awmzia ka hrelo" ka ti ve tlat tak nâ in "Ka duh che tih hi haider tawh suh" a lo ti hmiah mai. "Ka hnar che tih hi haider tawh bîk suh" tham lo fe hian ka lo ti ve nghat a. Khawi aṭangin nge huaisenna ka neih zawk pawh ka hrelo, ka kâ aṭang chuan a rawn chhuak ve tawp a ni ber. "I rilru puthmang hai der suh" a lo ti veleh hmiah a, kan in chhang tawk ngang mai. Mahse U Muanzuala lakah hian rilru pelhe put ka tum hauh lo.




"Tun ang hun hi lên hun pawh a ni hlei nem, a tlai tawh êm hi" ka lo ti daih a, thinrimna tùr leh tirh haw na tur ka zawng a ni ber. "Kan in pawh thleng hmasa lovin ka rawn pan hmasa che a, i lawm vak lo ani maw" za lo tih hriat zet a ṭhen suk chung hian a lo ti sup a, ka ip nghal chawih mai. Tunah hian Aizawl a lo thleng chiah a, min rawn pan ding nghal tihna em ni? Ka melh vak ringawt a, hahdam hmel fe hian min lo melh thung a.




"I ṭhiannu kha la dam se ka ti ngawt mai" a rawn ti leh daih a, Rintei ngaihtuah chhuak tih hriat zet hian a ṭhen suk a. A hmelah leh mitmeng ah chuan lunglenna ka hmu chawpchilh nghal a, thup pawh a tum lem lo tih a hriat reng mai. "La dam sela chuan tùn ang êm hian ka buai a ngai lo tùr ania. A damlai khan huaisenna lo nei ila, i rilru hneh pawh a awlsam deuh tùr. Tunah chuan mahni a ka beih a ngai a, harsa ka ti" a rawn ti leh duah a. Min bia pawh a ang lo, amah leh amah a inbia ni berin ka hria.




"Eng nge i sawi awmzia?" bo fe hian ka lo ti ve khalh a, Rintei chungchâng a nih avangin hriat ve chu ka phû in ka hria. U Muanzuala chuan "Kan in-a a rawn hruai hmasak ber ni che aṭang khan ka ngaihtuahna i tibuai nghal asin! Ka hmelṭha tih zawng tak i ni a, ka chhinchhiah nghal che. Mipa ka ni a, ṭha tih zawngte chu ka nei ve ṭhin. Mahse ṭha tihah a tawp mai zel a, nang pawh chutiang mai tur chuan ka ngai che a. Mahse i lo lêng tam tial tial a, Rintei hnen aṭangin i chanchin ka hre hnem tial tial bawk a. Ka vei ta tlat che a. Ka nau khan hrilh tùr che in min nawr nasa ṭhin asin! Mahse 'naute ṭhian êm chu' tiin ka ngai zam lui zel a. A reh ve mai ka ring ṭhin. Mahse a zual ta telh telh a, a boral hnù ah ngat phei chuan neih che ka tum bur tawh. Bulṭan dàn ka thiam lo va, mahse i hriatthiam tâwk tur chuan ka khawsa ve thawkhat in ka hria a. Duhthlanna chu i kutah a awm alawm. I duh zawng pawh zawm ngam lovin awm suh ang che" a ti ta duah a.





A thusawi zawng zawng chu mak ka ti kher mai, min ṭhawng takzet! Khang hun chhung zawng zawng khan min lo ngaizawng ru ve reng tihna chu a ni àwm si a. A sawi tâkah chuan ngaisang taka Rintei'n a chanchin min hrilh ṭhinte kha ka ngaihtuah let a, awmze nei vekin min lo hrilh ṭhin tihna chu a ni phawt a. Mak ka ti kher mai.



"U Muanzual..." ka ti hap ringawt a, sawi zui tùr ka vàn viau. Min lo nuih suk a, "Ti hi chuan ka thawl ta bawk mai. Chêt zia in lantir fo mah ila ṭawngka hian ka la sawi chhuak miah lo va. Zanin taka huaisenna ka nei hi ka läwm" hahdam hmel zet hian a lo ti sup a. "Ka û angin ka en che" ka ti thei hram a, "Ka nau angin ka en lo che" a lo ti veleh. Min lo duhna ah hian sawi theih nei lo mah ila a rem lo, a tih chi loh a ni tawp mai.




"I ti àwm ang lo emai" beidawng zet hian ka ti leh halh a, "Ka chhungte pawh ka la hrilh thuai ang, i rilru ka hneh hunah" a la ti ta deuh deuh. Ka zuam teuh lo mai. A nu leh pa te min ngaihdan tur ka ngaihtuah phei chuan a tih chi loh a ni tawp. "Tuna kan awm dàn hi a tâwk " ka lo ti ve tlat a. Mahse ngai pawimawh lo tih hriat zet hian a tho ta hluai a. "I duh i thlang ang a, min thlang ngei bawk a. Huaisenna chiah i mamawh tawh" a ti a. Ka melh reng lâi chuan "Ka'n haw ve tawh phawt ange, ka awm chhung chu ka rawn lêng ang" ti lehin min chhuahsan zui ta nul nul a. A kal dawna a thusawi avang chuan ka hah nghal ṭun thei.



Theihtàwpin U Muanzuala chu pehhel ka tum ta ngar ngar a, mahse zantin lo lêng ta chu a harsa ngang mai. Kan pahnihin kan awm fal ngai lo hlauh zawk a, ka nu meng chen chiah a rawn lêng ṭhin a. Eng nge a hriat pawh ka hrelo, kei ni lovin ka nu a be uar em em a. Kei chu a haw dawna min mangṭha ṭhin tih loh chu kan inbe tam lo khawp mai.



"I Û Muanzuala hian a ngaizawng che tiraw?" ka nu chu ka melh nghek a, ka chawei lai ka hak lo chauh a ni. "I ti àwm ang lo emai" uar zetin ti mah ila chik zet hian min lo melh a. "Hetiang hi chu ka hrethiam ve vek ania. Nau ang chiah chuan a en lo deuh che ani" a lo ti leh vang vang a. "A awihawm loh lutuk, kan in unau ve alawm" ngaihsam hmel deuh hian ka lo ti var a. Mahse a awih hlawl lo tih ka hre thei. "In inkar hi sawi dawt si lovin ka hriatthiam theih dàn tùrin min sawi hmawr hmuh fo aw" a tih leh chuan "Engtin maw a lo sawi ṭhin a?" ka ti vat a. Ka lungphu a rang nghal dawt dawt mai.




"Sangbawihi chu i neihchhun ve liau liau a ni si a, i pawi ka sawi ang tih a hlauhawm. Makpa chhungkhung a awm a ṭul pawhin kan awm ve lawp lawp tawh mai aniang chu' te a ti zuk ṭhin a. A dang pawh a tam mai" ka nu chuan a lo ti zung zung a. Ka zahna leh ka thinrimna chu ka inchen thuak a. "Awi U Muanzuala chu" tiin ka tho hluai a, ka chawei pawh a ti tui nek lo ve. Ka nu lah chuan "Chiang fek fawk a hriat ka la duh ang aw" a lo la ti ve tlat a. Sawi tùr awm lo ta chu chhanna pawh ka pe chuang lo.



Zànah chuan U Muanzuala chu ka va call a, ka va hau thawr pek a. A lo nui suk suk duh lek chauh a, "Ka nu bulah khatiang zawng khan vawikhatmah lo sawi tawh suh. A zah pawh a zahthlak alawm le, inngaizawng pawh kan ni lo va. Ka duh miah lo ania" ka ti hlawih hlawih a. "Mipa angin min en ve chhin la, a dik a nimai" a rawn ti duh lek chauh a, hauh chuan kawng ro a su lem lo khawp mai.



Inrinni tuk a ni a, kan ṭhian hovin kan chhuak ho ve ngéi a, Bsa leh Puii te nen kan ni leh deuh tawp mai. Chhuah ho kan tumna hi a rei tawh a, ka remchàn loh zel avangin kan ṭhulh ta reng kha ania. Mahse tun ṭum chu hun remchang ka nei ve ta hlauh a. Bazar-ah kan inzuichhuak ve mai mai a. Puii kan bazar pui a ni hawt mai, thil lei duh a lo ngah em em mai a. Bsa nen chuan kan chhuah dàn ngai ngaiin kan la awm a, Puii erawh a inkhai bawr khawp mai. Puih kan tum lah in a duh tlat si lo. Bsa erawh chuan a paper bag pakhat chu a khaisak lui ta tho a. Ani pawhin a hnial tawh bîk lo.



MC-ah thil ei tùrin kan lut a, mahse ka beisei loh lutukin U Muanzuala ka hmu thut a, hmeichhe pakhat nen thil an lo ei dun a. Min rawn hmuh ve hmaa petek hman ka tum tehlul nen min rawn hmu hman hram a. Mahse a hawisawn leh nghal vat a, min hrelo der ni berin ka hria. Chuti na nâ nâ chu tiin an thil eina ah chuan ka lut lui ve ta sak a. A chhan pawh ka hrelo, nawr luih ka châk tlat anih chu! Engah mah ka ngai lo angin ngai se ka duh hlur mai. Dawr chhungah chuan kan inhre lo der tluan chhuak parh a. Puii chuan U Muanzuala chu a lo la hre ve si biak a tum uaih a, kan inkhap thei hram kha ania. Eng nge ka hriat tehreng ni Bsa chu ka nek deuh sek a, a ṭawng apiangin ka nuih a zat loh paw'n ka nui zel a. A mimal takin ka be sek bawk a, U Muanzuala min lo mitsir leh reng ṭhin chu ka hmuh hmaih bîk lo. Eng emaw takah ngai se ka ti ni berin ka hria. A hmeichhe hruai nu bula a nui hmêl te chu ka hmuh hmaih bîk der si lo. Kei min duh ber angin lem a chang vêl a, min fiam kual mai mai niin ka hre tawh.




"Vawiinah khan eng nge in tih?" a message chu ka hmu lo der hmiah. "LALRUATSANG" ka hmingpumin min rawn ti leh kher a, ka la chhang duh chuang lo. Vawiina ka thiltih hre tùrin ka engmah a ni lo va, a tán lah pawimawhna a nei dâwn hek lo. Minute 30 vel hnù ah chuan a message bawk a rawn thleng leh a, "In inkawtah ka awm, rawn chhuak lawk teh" a rawn ti anih chu! Ka tho nghal uaih a, tunah dár 11 a ri dâwn tawh a, ka chhuak lo anih chuan a rawn lut hreh leh dâwn miah lo tih ka hria. Mahse ka hmu duh bawk si lo. "Inah ka awm lo, kan lêng " ka ti ta ringawt a. "Rawn chhuak vat mai rawh, nge ni a ka rawn lut leh zawk dâwn " awih lo zet hian a rawn ti leh. Min dan chêp dàn a hre lutuk chu ka haw hlur mai.



A rawn luh tak tak ka hlau bawk si, ka va chhuak ta nge nge a. Kan inkawtah chuan a car ngheng in inkuangkuah hlun chung hian a lo ding rûn a, ka va pan phei chu chik em em mai hian min lo la en zui! Ka zâm a, ka thâ te chu a khur hialin ka hria.




"Eng nge i rawn tih dâwn? Zàn a rei tawh êm hi i hre ve lo em ni?" ka zâmna thup tum tak chuan ka ti hlak hlak a. "I awm dàn hi a mak emai, tun ang hun..." ka tih leh lâi mêk chuan min rawn kuah thlawp a, ka lo phu awk mai. "Hey..." ti a inlakhran ka tum rual chuan min lo kuah nghet sauh a. "Min thlah rawh" ka ti fiah fak a, "Tihian awm lawk ang" a lo ti ve sup thung a, ka sam a rawn fawh zui vang vang tâk ah phei chuan ka che sawn ngam tawh eih lo.



Chutia reife kan awm hnu chuan a inlahrang ve ta hram a. Kan mit leh mit a intawng nghal siah mai. "Sangbawih" a ti ril ruih a, a aw rik dàn leh a mitmeng zawng zawng chuan min ti zâm vek nia mawle! Ka biang chu a rawn chûl hauh hauh a, min aikaih aniang chêtsawn nachâng reng ka hre tawh lo. "Ka atchilh viau che ani..." a ti zawi leh sup a, ka lo phun sep ringawt a, eng nge ka sawi ber pawh ka hre chuang lo. A lo khi suk a, "Mipa angin min en ve chhin reng reng tawh teh" a ti a, ka hmu hmelṭha hrep lehnghal. "Vawiin kha..." a tih leh chuan ka harh chhuak zawk a. Ka inlahrang nghal a, a lo inring bîk lo bawk nen min man hman lo.




"Bsa te nen khan kan lêng ho a, ka tán chuan ṭhian satliah pawh a ni lo" ka ti kher a. Hmeichhe dang a neih reng laia nei lo bîk anga awm chu ka duh miah lo. Ngai kàwi se ka ti ngawih ngawih a, inngaizawng pawh kan ni tawp si lo. Ka awm dàn hi ka hrethiam ta hauh lo mai. "Ka rilru chu i hrethiam a, i rilru ber i hrethiam lo anih kha" U Muanzuala chuan a rawn ti ta chiah a. Min rawn ban a tum leh rual chuan ka lo tawlhsawn leh vat a. "I bialnu chu a hmelṭha khawp mai" ka ti ta kher a, ka meng nghal awk a. Ka rilru a awm ang ang ka sawi chhuak ringawt chu pawi ka va'n ti tak! Ka hlauh ang ngei ngeiin "Thik duh suh, kan thawhpuinu mai anih kha" nui ruh ruh chung hian a lo ti a. Ka kut vaiin ka thaw hluai ringawt a, sawi ṭeuh ka tum a, mahse eng ber nge ka sawi ang ka hre bawk si lo a ni.




U Muanzuala chuan min pawt hnai lehin ka kawngah chuan min chelh ta salh a, kan inhnaih mah mah a ni. "Nawr luih i ngai tlat" tih leh min rawn fawh a rual ta mai! Ka hamhaih luatah hnar nachâng pawh ka lo hrelo. Ka lo dawh mawl tawp a, a tán chêt a awlsam phah sawt a ni chek ang chu duhthawh leh min dim ru zet si hian min dawp ta vang vang a. Min thlah chiah chu ka thaw nghal hak mai, "Ka bialnu i ni tawh" a ti thum chhak a, ka za uaih thei nia mawle. Ka chalah chuan dim zetin min fawp leh vang vang a, a chêt dàn engkim chu ka lo hnar zo lo a ni ber.




Ka kàwnga la chelh reng chung chuan vawiina a hun hman dàn te chu a sawi sup sup a. A insawifiah a ni ber. Nizanah khan a lo haw tawh a, vawiin khan hna pawimawh a neih avangin min rawn hrilh lo ta law law a. Zanina rawn lên chu a tum tho a ni àwm e. A chhuahpuinu kha an thawhpui a nihzia leh hna thil vang baka inhmu an nih loh thû te chu a sawi luam a. "Min hrelo der alawm" ka lo ti hmanhmawh, ka sawi hman tawh si! Ka lo tihtauh rukna ka sawi chhuak ringawt chu pawi ka ti ngang mai. Mahse U Muanzuala chuan lungawi hmel zet hian min melh ta vung vung a, "Bsa te nen in rawn chhuak ho kher a, ka lungawi vak bîk hlei nem. Chuloah rawn biak luam che kha i ṭhiante nen in awm lâi chuan ka duh bîk lo va. Nang paw'n min rawn be bîk lo va, ka be lo ve che a nimai" a lo ti dam thluam a. "Keite chu hmeichhia ka nih hi, engvangin nge ka biak hmasak ngawt ang che" ka lo ti hlar a. "Hmeichhe ho tak hi chu a" a phun hluk a, ka melh rum ngang mai. Min nuih tlawn ta ringawt a.




"Hmeichhe ho tak hi chu zùn in ngah" a'n ti leh ringawt pek a, "A hrim hrimin vawiin khan lo bia che pawh ni ila min chhang ṭha duh lehpek lo ang a, ka zahna tùr khúa a sei mai mai" a tih leh chuan sawi dik ka ti tho bawk si ka lo nui hak a. "Zahte chu i inhuam ve tawh mai aniang chu" ka ti ve kher a, "I va in ngaihlu reuh tak. Mahse a ṭha, i tán chuan ka zak mai aniang chu" a lo ti zawi sup a. Mitmeng tawrhhlelhawm deuhin min melh leh tawh! "Tikhan min melh tawh suh" ka ti nghat a, "Tawrh a har viau a ni maw...?" min lo chhaih leh hman tawh. A âwm ah chuan ka chûm ṭawk a, nâ ti àwm ang takin a'n awm kual der vêl a. A va han nghal tak e aw.





Ka inrin hma in ngaihzâwng nei ka ni ta der mai! A tìrah khan ka la pawm duh lawk lo va, mahse a mak lutuk. U Muanzuala chu a zei ka ti dâwn nge ka rilru hneh dàn a hre riau a, ka hnar thei ta bîk ngang lo a ni ber. Ka tán chuan mipa ṭha tàwp a ni a, phû loh malsàwmna a ni.



Kan chhungte'n kan inkar an hre vek tawh a, amah berin zep duh hek lo le. A sawi dànah a Nu leh Pa te phei chuan an lo hre lawk ru reng tawh a ni àwm a, a lo hrilh zeuh tawh a. Mak pawh an ti hran lo. Ka lawmna leh vànnei ka intihna em em chu chhungte aṭangin dodalna engmah kan tâwk lo hlauh! Mahse Pa Rama leh Nu Ahruaii te lakah hian ka lài huih zel a. A hma ang khan ka pawh thei tawh lo, ka zak tlat zel. Ka tana awm hrehawm tùrin an awm pawh a ni lo va, ka pehhel zawk zel a ni ber.



A engamah hma in U Muanzuala chuan inneih a sawi nghal sek a, "A la hma" ka tih lahin "Ka nghak rei tawh che. Ka tán a hma ve lo" a lo ti mai zel a. Mahse pasal neih em chu ka la tum chuang lo. Ka rilru a la inpeih loh bakah tih châk tam tak ka la nei ve a, ka Nu enkawl te pawh ka la duh. U Muanzuala pawhin min han nawi viau mah se min hrethiam em em lawi a. "I inpeih hun ka nghak thei" a ti mai zel a. Pa Rama leh Nu Ahruaii te lah mo lawm an inpeih at reng emaw tih mai tùrin ka Nu bulah hian chutiang lam hawi chu an sawi reng zel a. Ka Nu hian chhanna mumal tak pe ngat sela chu kan innei maiin ania ka rin tawh ni!


Lehkha zir chhunzawm tawh lem lovin Private Sikulah ka thawk ta daih a. Ka thawh hma hian ka nu ka rawn bakah U Muanzuala ka rawn ve thlap a. Zir zawm ai chuan an lo thlawp khawp mai. Mahse zir zawm ka duh anih pawhin an inhuam em em a. Keimah berin hnathawh ka duh zawk ta thut kha ania. U Muanzuala phei chuan "Zir zawm kha a rei mai mai. I duh ang thalin hna thawk la, kum khat vêl i nu châwm la kan innei ang" a ti hmiah mai a. Ka nuih liam mai tak nâ in pawi ka ti em em tawh bîk lo. Ka nu pawh a hmin viau in ka hria a, "Pasal chhia a ṭha min la neihsan dâwn tho tho a. Keini akara min lo duh der tu an awm hi i vànnei lutuk. Muanzuala a nih phawt chuan ngaih ngam takin ka thlah thei ang che" a ti ve tlat a. U Muanzuala pawhin kan inneih paw'n ka Nu kan ngaihven zui reng tùr thû a sawi fo a, ka ringhlel hauh lo.



Ka hun kal tawhte ka ngaihtuah let a, thil ṭha ka tih bîk vak ka hrelo. Mahse heti em em a Pathian malsàwmna ka dawng hi vanneihna pawh ka ti phal lo. A malsàwmna liau liau a ni. Ka hmalam hunah eng thil nge lo thleng zel dâwn hre lo mah ila tuna ka malsawm dawn zozai te hi ka theihnghilh tawh hauh lovang.


A TAWP TA.