STORYFB.COM

ZOREMA
By CVL.Awmpuii


Ngaihtuahna mumal pu hlei thei lovin khumah ka in let tawn sek a, zàn rei tawh tak ni mah se mut a chhuak thei dêr lo. Ka pum chu ka dawm leh vang vang ṭhin a, ka tihsual chu hmachhawn ka huam lo a ni lo va, ka hmachhawn dàn tùr ber ka hrelo lâi hi a buaithlak ta a ni. Ka chapona te chuan a tàwp thleng raka mal ṭan pawh a pawiti lo va, mahse ka chhûngte hmai zahna avang erawh chuan an thû zawm mai chu ṭha in ka hre bawk si. Duhthlan tùr lian tak chhawp sak ka ni a, ka tána ṭha tùr zâwka midangin an ngaih hi ka inhuam lo zâwk chu a ni sia.



Hmeichhia, Nula, ka dinhmun anga dingte chuan midangin min duhsakna kawng zawk hi an thlan vek ka ring a. Mahse ka dinhmun aṭang chuan a danglam tlat si, ka chapo a, ka indah sâng êm êm tih hi ka inpawm mai chu a ngâi a ni. Eng nge ka nih chiah? Chapo thei dinhmunah ka ding rêng em? tih lam ka ngaihtuah thei lo va. Ka ngaihzâwng pawh ni hlei lo, a fa ka lo pai palh liau liau avanga pasal a ka neih chhan tùr hi ka hre map lo a ni e.



Sawmsangi, Nula kum naupang zawk zawk tawh lo ka ni a, ngaihzâwng tih vela buai pha ngai miah lo khan senior lamah vawikhat chêtsual vâng liau liau in nau ka'n pai thâwr pek a, a pawi tih hian a sawifiah zo lo a ni ber e. Ka nau paina pa lah chu! Rui lo ila chu ka mutpui tawp loh tùr mipa a ni. Kha thil thlen aṭang khan thla thum chu a liam leh tawh a, a hunlai khan rui hle mah ila nula khirh leh fekfawn lutuk ni ta chu ka harhfim hnû khan thil thlengte kha a zawng zawngin hre tawh lo mah ila tùn hnû thleng hian ka mitthla ah a la lang uar uar thei.



Nula senior, mahni in châwm zo ve tâwk tak, lu zo veh vawh hi ka ni ve a. Mizo mipa te hi ka hmusit chu ka ti lo va, mahse ngaihnêp châng ka ngah ṭhin. Ka duhkhawp lo êm êm a, ka ṭhian ṭha te phei chu ka duh loh zâwng leh nêp deuha an awm chuan khak mai ṭhin ka ni a. Ka thinchhia a, ka khirh a, ka chapo vei ar bawk a. Mipa ṭhenkhatte phei chuan min ei loh phah rêng a, mahse pawi pawh ka ti hran chuang lo. Min ei lo tute hi chu mipa nêp takah ka ngai leh hmiah mai zêl a. Mipa ve si, hmeichhia lo ei loh vel kha pa ka ti bîk lo. Hetiang ka nih mêk lâi hian ka ṭhian hnaivai leh chhûngte tak tak chuan min nêl in min ngam tlâk leh em em tho a. Ka mize khirh lutuk hi min khak fo bawk. Nula senior lo ni ta chu, ka pasal neih theih loh chhanah he ka mizia hi an puh fo a, a nihna chente pawh a awm ang. Mahse kei chuan ka duh ang mipa ka hmuh loh vang ka ti ve tlat.



Sawrkar hnuaiah hna ṭha ve tâwk tak ka thawk ve a, chhûngte châwm an ngai em em lo bawk nen nula senior intodelh ti a sawi theih chu ka ni ve ta mai. Ka unau fate'n min ṭangkai pui ve êm êm a, sual ve viau mah ila ka vahte chu ka duat ve lutuk tlat. Eng eng emaw hi ka lei reng zel a, anni paw'n min ngaina in hauh an ngaih hun pawha hau bertu ka nih avang hian min zah ve viau bawk. Ka unau kawppuite lah ka phâk ang tâwkin ka duat ve hlawm a. Ka nau, inpui luah nupui, Ṭhatei phei hi chu kan chèn ho vâng hian kan inngaina zualin ka duat ve êm êm a. Mo ai mah chuan laizawn anga enna chen hi ka nei a. Ka duhkhawp loh thil ah pawh ka khak mai zel a. Amah tê hi a fel ve riau a, ka mizia hrethiam takin min dawhthei a. Hei vangte pawh hi aniang, mite beisei phâk bakin kan inmil ve tlat.



Kum 34 ka han kai chho a, chhûngte leh ṭhenawm khawvengte aṭangin pasal nei tùra nawrna ka dawn ṭhin pawh ka kal pèl chho ta daih a. Kum a lo upat ve tawh chu thuhran, che senior chi ka lo ni ve bawk nen kum 28 aṭang khan pasal nei tùra nawrna hi ka dawng daih tawh a. Nula senior lo nih ve tâk tak takah chuan tuman min nawr ṭha peih tawhlo zawk. Pasal nei tur hian min beisei tawh lo a ni ber. Ka mizia chu thuhran nise, ngaihzâwng nei chî ka nih loh chu sawi loh, ka mipa kawp thâwm hi tuman an la hre lovang. Sawi tùr an awm miau lo bawk a. Mahse tùnah chuan nau ka pai ta thut chu a ni sia, an hriat darh tak tak hunah phei chuan mite ka barakhaih khawp ang le.




Kha zàn kha...ka theihnghilh tawh ngai lo vang. Office thilah kâr khat tal tap, chawlh hahdamna hun pawh nei lovin kan buai mawp mawp a. Kan han tifel ta kha kâr tàwp Office chawlh ah intihhlimna ni pah fawmin staff zawng zawng kan picnic ve a. Office hour a nih lem loh hi chuan hnathawkte zingah hian han lem ve mai theite an awm nuk a, hmeichhia pawh an bâng chuang lo. Kei erawh ka fihlim hlauh thung a. Mahse khami ni ber kher kha eng nge ka hriat teh reng ni? Ṭhiante hovin an lem sek tâkah chuan ngaihsam deuh khan ka tlâk ve ta piap a. "In ve rawh, in ve suh" pawh an ti lem chuang lo va, min enliam ve mai a. Vawikhat ka'n tem zeuh kha ka lo in thei ta phian sia, rilru tih thawven nan ti rilru chungin ka in ve ta pap pap a. Khúa a rawn thim a, kan haw dâwn meuh chuan kâi tawh tak ka ni.




Vawikhat mah zu la in ngai lo rui ta chu ka mize ep thawkin ka lang chhuak a ni ber. Ka ṭawng char char a, ka ṭap pur bawk a. Mahni inkhawngihna leh mal riau a inhriatna te kha ka nei chho a. Ka thawhpui, hmeichhia te chuan kawppui an nei fur a, nei ve lo bîk ka ni te kha a vawikhat nan tak meuh hrehawm ka ti ve a. Ka rui lungpuam chu ka nuar ta chiam a ni ber. Ka thawhpuite lah chuan min han nuihzat êm êm a, ka nihna lo puia ka lang chhuak ta chu an nuih a za ni berin ka hria.



Haw dàn tùr an han rêl te chu ka lo ṭeu nghal hlar a, "Min huphurh anih kha, min buaipui duh lo, min kàwm ve duh lo" tih zawngin thû kha ka la ta tlat a. Scooty-a kal ni mah ila ka scooty chuan min haw tîr an tum loh hmêl khawp mai. Ka kawm ve ber Ringi chuan a bialpa nen an bula chuang ve mai tùr chuan min ti a. Ka lo duh teuh si lo, "Mi inngaizâwng kâra mal taka lo awm ve mai mai tùrin Pathian khian min siam em ni?" ti nghek in ka nuar zui leh chiam a. Ka awm dàn chu ka in ten, zahawm loh ka ti viau bawk. Mahse ka rui laklawh tawh bawk nen ka ngaihtuahna a tàwi tup mai a. Ka in thunun thei miah lo anih chu!




"In duh leh min haw san vek rawh u, keimahin hetah hian ka riak thei" ka ti hmak a. Zu lah chu a zawh hma in ka tum emaw tih mai tùrin ka tlâk leh pawp a. A tàwpah phei chuan min dah sawn sak ta tawp a. Ringi chu a phun deuh hlak hlak a, "Vawikhat mah in ve tawh suh, i dose i hre bawk si lo. Vawi leh khatah i in vak a, i zo lo anih kha. Mite pawhin an in ve, mahse an rui lo. Zu in i thiam dâwn loh chuan in ve tawh reng reng suh. A tìrah khan lo enliam tawp lo che ila ṭha tur ania aw" a ti mawlh mawlh a. Ka zu bur inchhawp nuaih chu min lâk sak zung zung bawk a. Min kaihthawh a tum rual chuan ka lo ṭang ṭung a, "Ka duh lo, haw vek rawh u. Ka riak zawk mai ang" ka ti ve ṭung a. Rui viau mah ila ka luhlulna a danglam eih si lo. Min hmin zo dâwn lo tih an in hrethiam ve ta aniang. Ka awm dàn turah chuan ro chu an rêl ṭha leh a.




A tàwpah chuan riak mai tur chuan min pawmpui ta tawp a, tu bulah mah haw duh hek lo le. Scooty-in haw ngawt dâwn ila, min ring zo dâwn lo nasa si. Chuloah hetiang teh nuaih chuan ka chhûngte ka hmu ngam dâwn lo hrim hrim.



Midang zawng chu an haw hmasa a, Ringi chuan ka riahna tùr vêl chu min tihfel pui a. Kan picnic na resort hi a ṭhiante ta a ni tho bawk a min biak sak pawh chuan a fel nghal duak mai. Riak lût tak chu an awm zen zen lo nâ in engkim a awm kim vek a. Thil buaithlak lutuk a ni hran lo. Chuloah, riaka awm chilh a vengtu chhûngkua an awm thlap bawk nen a hlauhawm hran lo. Ringi chuan min riahpui a tum viau nâ in haw tùrin ka ti lui ve tlat a. Rui viau e ti lo chuan ka ngaihtuah kim veleh riau lawi a. Amah lam tùrin a bialpa a lo thleng tawh bawk nen keimah vanga an buai chu ka duh bîk lo. Chuloah, mahni a awm a, zu in leh nghek ka châk tlat pek anih chu!



Pai chawn chawn chungin páwn thleng chu ka va thlah ve a, Ringi chuan min ngaihtuah tih a hmelah a lang vek a. Mahse "Ngaihtuah ngai ka ni lo, kei chu pasal ûm daih pawh ni ila ka chhûngte an läwm tawh zawk ang" tiin ka nui uarh uarh a, ka zu in hnathawh anih ka ring ve tawp. Ringi pawh chuan "I chhungte ka hrilh sak vek tawh che a. Engmah lo in belh tawh suh aw, naktukah i haw hunah i chanchin min rawn hrilh leh dâwn ania. I harhfim hunah i zak dâwn lutuk Sawmsang" a ti mawlh mawlh a. Ka lo nui liam mai a, ngaihtuah buai peihlo law law.



An kal liam ta maw tihah chuan ka mutna tur room lamah chuan pai chawn chawn chungin ka va let leh a. A hmuh loh laia ka zu dah ṭhat chu la chhuakin ka in leh ngat a, mahni tâwkah nuam ka ti kerh kerh viau a ni. Eng emaw riau hi ka feel lehnghal a, ka sawi thiam lo. Ka engthawl halh a, ka eng emaw nawm riau anih chu! Ka in ta sa sa, ka zawngchhang zui kher dâwn lo bawk nen zanin chu in nghek mai ang ti rilru chung chuan ka inthlit kerh kerh a. Mahni a awm e ti lo chuan ka inbe mawlh mawlh a, nuam ka va han ti mai mai tak.



Chutia mahni tâwka ka lo tlei ve êm êm lâi chuan thâwklehkhatah ka room kawngkhar chu a rawn inhawng ta thut a, ka phu chiang kher mai. A rawn hawng tupa pawh chu a phu ve dawrh a, "Tunge?" kan inti rual ṭhawt mai. Ka room chu a enkual tê tê a, "Ka Pi, helai hmun hi khatiang tihna hmun tùr kha a ni lo asin" a rawn ti dam ta dap a. Ka zu dah darh nuaih leh ka bottle darh nuaih te chu a melh kual leh a. A âw kâ dam viau mah se a thlawna riak tùr ka nih loh bâkah hetiang hre sa veka min riah tîr an ni bawk nen ka rilru chu a kàwi nghal ringawt a.



"Tunge i nih a? Man châwiin ka riak dâwn alawm. Chhuak teh, mahni hian ka tlei tâwk ania" ka lo ti nghat a. Ngâi pawimawh lo fe in ka zu thlit lâi bawk chu ka thli leh kerh kerh a, lawm lohin ka la nui vur vur zui. Chupa tán chuan ka rãpawm duh ngawt in ka ring. "Ka Pi..." a rawn tih leh rual chuan "I Pi ka ni teivet lo. Enteh, min en teh, ka upat tawh hmel viau ami a" ka ti ta nghek a. Ka zu thlit sa pawh chu in ta lem lo chuan ka dah thla leh chawrh a. Chupa chu thip zet hian ka melh ta ngar a, ka beisei loh zetin a rawn khi ta suk a. "I rui hle a ni maw..." a ti dam leh ruih a, ka zu bur dah hnawk te chu zawimuangin a la khâwm a. A chezia chu ka lo thlir reng a, a aw dam duai leh a taksa hrawl takte chu inhmeh riau hian ka lo hre pek a. Nula hleitling ve tâwk tak ni mah ila a lakah chuan ka tê viau ang.



"Hey..." ka tih chuan a rawn hawi vut a, ka lo en chîk bawk nen hmuh tawhna nei ang tlata ka inhriat chu! "Tunge i nih a?" ka ti leh tawl a, a lo nui suk duh lek chauh a,hmêlṭha ka ti ta tlat pek anih chu! Ka room thenfai hna chu a thawk zui leh mawlh mawlh a, min ngai pawimawh lo riau a ka hriat avang chuan "Heyy" ka ti leh hlar a, a rawn hawi leh rual chuan "Tunge i nih a? Zawhna ka zawh che chu min chhâng ta che. Tunlai Mizo mipa in han intipa kual vêl ṭhin hi chu ka ei hlawl lo che u ania aw. Ṭawng duh loh tih vêl kha a pa lo, tui lutuk " ka ti zui ta erh a. A lo rum deuh nghut a, "Rum nghut pawh a ngai lo" ka lo ti leh hmanhmawh, a lo nui leh huk a. Nuihzatthlak ka sawi tawp si lo.



"Ringi ṭhiannu em ni i nih?" min tih chuan " A ṭhianpa em ni i nih?" ka lo ti ve khauh a. "A va buaithlak e aw..." a ti thûm dût a. "Helai enkawltu hi i nia mi?" ka ti leh hram a, "Ni lo e" tih zawngin min chhâng. Min chhan dàn tâwk lutuk chu ka ngaihdàn a ni lehpek lo va, "Ka zawhna chiah chhâng mah ta che! Anih chuan tunge i nih a?" ka lo ti leh erh a. Hahthlâk min tih hmel leh nuihzat hmel deuh hian a lu a thing a. "He resort neitu hi ka nia. Ringi khan a ṭhiante riak tùr an awm tùr thû ka nau a rawn hrilh a, enfiah tùrin ka rawn kal anih hi. Ka lo rin dàn chuan mipa emaw lo riak dâwn ka tia. Mahse hmeichhia lo ni reng che in, chutah i la rui êm êm zui! Ka beisei loh dàn deuhin ka rawn hmù a" a ti ta duah a.



"Mipa ve si, i ṭawng tam hret" ka lo ti lehpek, a rum leh nghut a. "Hmeichhe ho tak hi chu" a phun hluk ri chu ka lo hre pha si, "Hmeichhia te hi min ti mai mai su aw, min hmusit ve khanglang su. Mizo mipa, hmeichhia te en hniam tlat ho hi in ṭhing" ka ti leh erh a, kawlh tawh sa nen zu in min rawn pawlh chiah phei chu kawlh ṭha têk têk tak ka ni. "Awle ka Pi" ngeiawm fe hian a lo ti pek a. Ka kut chu vêng hman lovin zu bur chu ka va thlawh phei pek a, mahse lo hre lawk ang hrimin a lo thle sawn hman hlauh a. "I va kawlh ve mawle, ṭha te te in thil i sawipui theih loh rêng rêng. Khati chuan i pasal fanaute paw'n an thlamuanpui zo lovang che" a lo ti vei luam a.



Pasal fanau tih ṭawngkam chuan ka hnuk no a rawn ko chhuak leh ta tlat pek anih chu! Dan rual lohin ka mittui chu a rawn dir ta zung zung a, chupa pawh chu a hrilhai hmel ngang mai. "Hey...ṭah i tum ringawt elo?" a lo ti bah nuai a, min rawn pan hnaih rual chuan "Kal rawh" ka lo ti tuarh a. A ding leh chawt a, ka lo ṭap uar sauh a, "I rilru tihnat ka tum miah lo ka Pi" a rawn tih leh chuan"Ka upat tawh hmêl viau em ni a...?" ṭap chung chuan ka ti ta thlâwt a. Min pi zing nalh nalh êm a, ka upat hmêl a ti ngang anih ka ring.



"Aaa...chutiang pawh a ni lo" a tih chuan "Duh duhin pasal nei tùrin min ti tawp tawp a, a harsat ve zia te hi min dâwn pui pha hlawm lo. Duh duha pasal neih theih ngawt pawh a ni lo va, mize inmil te a ngai ve a. Ka duh zâwng ka hmu lo a nimai a, eng nge mi hi an lo buai em em. Ka nung ṭha hle hle lâi rilru hahna leh buaina min siam sak a. An nunah ka inrawlh loh chuan lo ngawi mai sela" ka ti a, ka âng zui ta mawlh mawlh a. Chupa bulah chuan ka inbunruak a ni ber. Ani chuan min en reng a, ka ṭah tâk reng si ah chuan rawn kal hnaiin ka dàr ah chuan min rawn kuah a, eng eng emaw chu a sawi ve, mahse hriat mumal pawh ka nei tawh lo.




Ka rilru let but chu ka'n che chhuak thut pek a, ka fâwp ta hmiah mai. Ani pawh a hamhaih hlê aniang chêt chhuah nachâng rêng a hrelo. Mahse a hnû deuhah chuan min nawr sawn a tum ta a, kei lah ka lo ṭang kawh ve tumhrang bawk si. Inlakhran a tum chu duh lovin ka fâwp lui ngar ngar a, mahse mipa thâ zâwk na nâ nâ chu ka hneh bîk lo. A inlakhran rual chuan "I rui hle anih hi" a ti hluk a, min melh rûn rûn a, ka lo nui heu thung a. "Ka zei ve tho tiraw?" ner nânga ka tih chuan a lo nui leh huk a, min nuihsawh riau in ka hre lehpek anih chu! Ka rilru a va han kàwi tak.



"Tinge? Ka duh tlâk loh viau em ni? Ka ṭhing nge ka hmelchhia nge ka îtawm loh em ni?" ka ti tâwn tâwn a, ka ṭap leh ringawt tawh. Chupa chuan nui vur vur chungin ka biang chu a rawn khuap a, "I harhfim hunah eng mizia tak nge i put ang awww?" a ti sup a. A hmêl chu ka hmu ṭha lehpek tawh hle a, a biang chu lo khuap ve in ka kâ aṭanga chhuak thei pawha ka rin loh thû ka chhak chhuak ta khawl mai. A meng buai nghal nak a, "I rui takzet anih hi" a ti leh a. Mahse ngai pawimawh lo fe hian ka lamah chuan ka pawt hnai a, "Min mutpui rawh" ka ti nawn leh sak a. Ka thusawi in a zir bawk nen ka zu in hnathawhte pawh aniang ka taksa chu a lum pup pup a. An sawi ṭhin angin hmeichhia te hi kan ruih tawh chuan kan lo sih hnip takzet anih hi.



A ṭawng tùr a kâ a rawn âng zuau chu ka lo fâwp leh hmiah a, min chhâng lêt lo mah se nuam ka va han ti tak. Chutia a hmeichhia zawkin ka fawh luih tâk ngawng ngawng ah chuan a ṭang rei thei ta bîk lo va. A bâk zawng chu hriat mumal pawh ka nei tawh lo. Chiang taka ka hriat tâk erawh ka hmêlhriat ngai pawh ni lo lakah ka thianghlimna ka hloh a, a tih luihna tel miah lohin a ti luitu zawk ang thawthang ka la ni zui tih hi a ni. Zing ka harh rual khan amah pawh kai tho ta lêm lovin ka chhuahsan ta nal nal kha ania. Ka kumin chaldelh tawh viau mah se pawisak nei lo tawp ka ni bîk lo va, ka inchhir in hrehawm ka ti hle nghe nghe a. Thla khat tal tawp kha hmuh theih khawpin ka mizia a danglam ta rêng bawk a. Mahse ngai ka awh chho leh dâwn chiah tihah ka râi tih ka'n hrechhuak lehpek a. Khapa kha a rawn inlãr zui leh zat bawk nen ka nau pai thû chu zêp hlen theih a ni dâwn chuang lo bawk a tiin ka ṭhian ṭha ve ber Ringi chu ka hrilh ta tawp a. Kha zàn ka hmanpui tâk kha a ṭhianpa unaupa a lo ni veleh chhâwng bawk nen an chhûngkaw chungchâng te pawh a lo hre nual a, mi hrilh fai ta kelh a.




Zorema chu an unau zinga upa ber niin ngaihzâwng pawh ngaihsak em em hran lo hna a insawrbing bur chî hi a lo nia. Mahse ngaihzâwng nghet pahnih khat erawh chu a lo nei ve zuai tawh a ni àwm e. Pakhat chu a rawlthar hlim hlawt ami a ni a, pakhat leh chu a tlangval tak tak hnu ami a ni. Chunu nen chuan a kum têl an inzui a, mahse kum kalta lawk khan an inṭhen hlen ta a ni àwm e. An inṭhen chhan ka ṭhiannu in a rin dàn a sawi chu - A hmeichhia zawk khan Zorema hna ringawt buaipui ṭhin leh an inngaihzàwnna boruak ngai awh reng kha a ning takzet a. Mipa dang a duh ang tak an rawn lan rualin a ṭhen ta mai niin a sawi. Ringi chuan min hrilh ta zel a.





Zorema chu mi inchengvawng ve tâwk tak, kum naupang chhe zawk zawk tawh bîk lo a ni a. Keini aiin kum hnih thum vêlin a û awrh ang. An chhûngkaw innghahna ber chhûngkaw khâi dingtu a ni ve a. A Nu leh Pa te thû a awih in a zah hlê bawk a. Chu chu a ṭhatna chen a awm rualin ṭhenkhat chuan nu leh pa te hnuaia awm lutuk a nihna chu a nupui neih theih loh chhanah an puh ve châwk bawk. Tlangval senior tawh uaih e ti lo chuan a Nu leh Pa te thû a kàwi a ngilin a la zawm duam duam reng a. Thil ṭha lo chu a ni miah lo, mahse a ṭha ber lo tlat a ni. Eizawnna lamah pawh an theuneu lo viau a, a Nu leh Pa Officer pension ve ve an ni a. Chutiang aṭangte pawh chuan aniang sumdawnna bul a ṭan ve a. Picnic spot te, dawr te, an nei nual a. Hman zàna kan picnic spot kalna ber kher kha a ṭhut hmun, a ngaihven ber ṭhin a lo ni àwm a. Vanduai thlâk ka ti kher mai.




Ringi chuan "A mawhphurhna tlanchhiat san duh tùr chî a ni lo, chuvang chuan a nei ngei ang che. Lungngai reng reng suh, thlamuang deuh khan awm rawh" tiin min hnem ve bawk a. Mak deuh maiin ka fa lo piang tur ka ngaihtuah loh vang pawh ni lovin a rilru hel zawkah ka ṭang ta tlat a. Mi ina mo va nih a, ka nulat zalenna, mahni ina duh ang thala ka awm theihna hralh kha ka duh ta tlat lo anih chu! Ringi bula ka sawi chuan min khak viau nghe nghe a. "A senior thlâk lutuk, ngaihzâwng nghet pawh i nei chuang lo nei risk pawp mai rawh. Hetiang hi chu risk vek tur. Chuti lo chu lèn tar chiah i hmabâk. Nakinah i chhungte tán hnawksak i la ni vat mai ang" min ti erh a. Mahse min hmin zo chuang lo, hmêlhriat pawh ni hlei lo a fa ka pai avanga neih kha ka la hreh tho anih chu. Ka tihsual a ni tih erawh ka pawm thlap.



Tichuan, ka râi thû chu Ringi puihna nen ka nu leh pa te beng a thleng ta a. An zak a, hrehawm pawh an ti ve lutuk. Mahse nasa takin min hau miah lo, ka senior tawh a, min lo beidawn pui ve takzet tawh ani tih ka ring thiam nghal mai. Min han zilh ve bawk mah se zak lo tur te'n min fuih ta zawk a. An rorelna in Zorema te beng a thleng ta nge nge a, insawirem a, inneih an lo duh mai anih chu! Mak ka ti em em a, Zorema pawh chuan a lo hnial miah lo emawni ka ti hial. Ṭha te te in sáwn man kan inpe ang a, kan fel mai turah ka lo ngai kha ania. Ka râi na pa in min nei duh a, lawm viau tur ka nih laiin ka lâwm thei der si lo.



Khatia kan chetsual tâk hnu khan Zorema hi ṭum hnih chu ka hmu leh a. Ṭum khat chu bazar ah ania, min hmu ve lem lo. A ṭum hnihna erawh kan Office bulah ka hmu hlawl a, min lo hmu ve chiah bawk a. Zahna leh hrehawm tihna kha chu a awm ve hman det a, mahse min rawn nuih suk a, engmah thleng lo anga a awm tâkah khan ka awm ve ta hmiah kha ania. Chumi ṭum chuan ṭawngkam hnih khat chuan kan inbe ve nghe nghe a. "Hetah eng nge i tih?" tih vêl bâk khan kan inbe ta lovin ka hria. Chu zawng chu kan pahnih inkâr chu a ni deuh mai.


Ka Phone rawn ri ral ral chuan ka ngaihtuahna aṭangin min kai harh zawk a. Caller ID ka en a, ka number hriat ngai loh aṭangin a ni. Zan dár 12 a ri ṭep tawh a, tùn ang huna hriat ngai loh number aṭanga call dawn chu pawimawh viau turah ka ngai nghal ringawt a. "Hello" pangngai tak chuan ka ti a, "I muhil lâi ka rawn ti harh che em?" a rawn ti dŭt a, a aw aṭang chuan tunge anih ka hre thei mai lo. "Ti harh lo e, ka la muhil lo zawk a. Eng nge ni ta?" ka lo ti vat a. "Min hria em?" a rawn tih leh chuan " Hre miah lo" ka lo ti leh mai a. A sawi duh tak a sawi nghal mai lo chu ka lo ning hman lehpek tawh. A reh deuh vang vang a, an rawn call sual emaw ka ti hman hial. Mahse "Keimah...Zorema" a rawn tih tâk supah chuan ka insangmar nghal ṭeuh mai. Ka lo ngaihtuah lâi tak ni mah se ka beisei lo êm a ni.



"Eng nge ni ta?" ka ti leh thei hram a, ka thin lah chu a rawn phu rang nghal dawt dawt zui a. Engtin nge maw ka number te hi a neih theih rêng rêng ni? "Sawmsang, naktukah hun ãwl i lo insiam thei ang em? Inbiak kan ngai hle a ni" a rawn ti dam ruih a. A thu rawn sawi chuan ka tiril a ṭham er er mai. Ka ngawi reng a, lo dawnsawn mai dàn tùr ka hre lo. Ka ngaihtuahna a ngawng chhû mai. "Hun rei tak pawh a ni lo vang. Hun ãwl chu lo insiam ta che aw? Heihi ka number ania, i hun neih dàn min lo hrilh la, ka lo insiamrem dâwn ania" a rawn ti dam leh ruih a. Ka lo thaw deuh hak ringawt, inbiak chu kan ngai takzet alawm. Mahse ka inpeih chiah em? Ka hmu hreh tlat pek anih chu!




"Ka hman ka va'n ring lo" ka lo ti ro halh a, naktuk chu a rang mah mah a ni. Mahse Zorema chuan "Anih chuan zàn lamah in inah ka rawn kal mai dâwn em ni?" a rawn ti lehzel a, ka tlanchhiatsan theih ka ring ta hauh lo mai. "Ka lo hrilh ṭha leh ang che" ka ti ta ringawt a, a rawn ṭawng leh hma in Phone pawh chu ka ti tawp nghal daih. Zâm viau tùrin ka naupang chhe zawk zawk tawh lo. Mahse ka tán chuan a vawikhatna ania, a harsa ve a nimai.



Ka rilru a lang hmasa ber Ringi ka va hrilh leh tê tê a, ka va râwn a ni zawk mah ang chu! Hmachhawn dàn tùr hre hek lo le. Ringi chuan hmu ngei tùrin min lo ti nasa mai a, "Pehhel hlen theih a ni dâwn chuang lo. Chuvang chuan inchinfel vat kha a ṭha. I rilrua awm zawng zawng kha zêp nei lovin sawi ve ṭhuai la, i hmin lohna te pawh sawi vek mai rawh. Tùn atan chuan in pahnih tana ṭha ber chu inbiak tam a nimai" a rawn ti duah a. Ka lo hreh kher mai, mahse a sawi dik tho bawk si. "Awle, min lo ṭawngṭaipui rawh aw" ka va ti teh ngawt a. A nuih a lo za ngang mai, "Zâm ngai lo Sawmsang ṭang ta che" a rawn ti a. Thinrim hleih theih a ni bawk si lo, läwm viau lo e ti lo chuan ka nui ve ta ringawt a.




Zorema chu ka va text ta nge nge a, tlãi office bân lama hun ka neih tur thû ka va sawi a. Min lo châng reng emaw tih mai tùr a ni, ka message chu a hmu rang kher mai. "Ka rawn lam ang che" a rawn ti vat a, "A ngai lo, a hmun lo sawi la, ka lo kal thei" ka va ti ve nghal a. Mahse "Ka rawn lam ang che" a rawn ti leh hmiah a, a luhlul ve dâwn hle in ka hre ta. Va hnial leh hram ka tum uaih uaih a, mahse pawi ka ti ta lo law law mai.



Ka Office kal chu hna ah rilru pawh ka pe hlei thei meuh lo, tlai lam huphurhna hlirin ka khat a. Hnathawh a sawt duh lo kher mai. Dár 4 a lo rik chuan Office kan bâng fel ta, Zorema hnen aṭangin Phone call ka dawng zui nghal zat a, kan bân hun a hre nghal chat emaw tih mai tur a ni. Páwn a min lo nghah thû a rawn sawi a, "Ka lo chhuak dâwn chiah" ka lo ti ve mai bawk a. Ka chhuak tùr chu Ringi a lo la awm ve a, "Good Luck" min lo la ti khanglang zui, nuih a za duh lo kher mai.



Minute tam a liam hma in Zorema Car-ah chuan ka ṭhu fel ta der mai. Inbe em em lovin kan in khalh chhuak ta nghal a, khawiah nge min kal pui dâwn pawh ka hre lo, ka zawt mai hreh ve tho bawk si ka ngawi ta reng a. "I ril a ṭam em?" a rawn tih chuan ka la phu zuk zui a, "Ṭam lo e" ka lo ti mai a, a ṭam reng sia. Office bân veleh a thil ei hi ka tih ṭhan dàn ania, mahse tun ṭum chu a rem ṭeuh lo tlat. "Ṭam" han tih mai kha ka duh bîk bawk lo nen ka in hrem dâwn anih hmêl.


Kan ngawi leh vang vang a, Traffic Jam-a kan tàn lâi chuan kan kalna tùr chu ka zawt ta tawp a. "Kan inah" a tih chuan ka phu chiang kher mai. "Ekhai" ka ti hliai a, ka melh nghek a, a lo hawi chuan mitmeng dam thlup hian min lo melh thung a. "I sawi lawk lo va" ka ti chhum hmak a, "Min zawt si lo va. Chuloah ka chhûngte'n an hmu ve duh che a..." a lo ti fan ruih a. Kan hmaa motor a chêt zui tâkah chuan a tlan zui veleh nghal a. "A tih chi loh emai, ka duh lo" ka ti thâwr a, sawi mawi vak ngaihna ka hrelo a ni. Min rawn melh leh zeuh a, "Hahdam la, hlauhawm a awm lo. An hmu ve zuai che ang a, a bâk chu kan pahnihin kan inbia ang. Chu zawng chu a nimai" a ti a. Mahse ka la hmin thei chuang lo.



"Heti hian sawifel law law zawk teh ang. In ina kal chu ka duh reng reng hlei nem. Ka duh lo, ka duh miah lo" ka ti leh mawlh mawlh a, ka thinrimna chu thup pawh ka tum hran lo. "Inah kan sawifel dâwn ania" a lo ti veleh tlat a, ka lungawi lohna chu a haider hmiah niin ka hria. Han thinrim zui dâwn viau mah ila a awka a dam thlup bawk si, tihngaihna tak pawh ka hre tawh bîk lo. Reilote hnu ah an in chu kan thleng ta nghal a, ka ṭang nghal ṭung mai.



"Enteh, Zorem, ka duh lo. Ka duh miah lo, ka Inring reng reng hlei nem" ka ti leh hram a, hahdam hmel zeta min melh in "Ka Nu leh Pa te bak an awm rih lo va, ka unaute an lo haw hman chuan an awm ve mai thei bawk a. A bâk chu kan nula te pahnih an nimai. Lo kal rawh, lût ang le" tiin a kut chu ka hma zawnah a rawn lek chhuak a. Ka thusawi a hai der hmiah chu sawi loh a ṭawngkam a dam thluam mai bawk sia, tih luih a harsa ngang mai. "Zorem..." ka ti fan leh raih a, ka kut chu nghet zet hian a rawn chelh ta thung a. "Inringtawk la" ti supin an in lamah chuan min mai phei ta a. Doorbell a hmeh lâi te chuan ka ṭawng ve thei tawh lo hrim hrim. Hetianga ka awm vawikhatna hi a ni.



An inchhung kan lût chiah chu min lo chhàwn vat hlawm a. A chhûngte nen chuan min inhmelhriat tîr nghal zung zung a. Engkim chu mumang ang mai hian ka hria ti ila a dik ber ang. Ka zâm luat ah engtin tin nge ka awm pawh ka hre lo. Mahse ṭha takin min lo dawngsawng a, a Nu leh Pa te chuan min be nghal mawlh mawlh a. An zawhna ṭhenkhatte chu Zorema zawkte chuan min lo chhàn khalh a. Mak ti takin ka en leh haw ṭhin, ka chanchin a hre hnem lutuk tlat! A hnu deuhah chuan a unaute pawh an lo haw a, an fate nen an ni duah hlawm mai. He inchhungah hian mi engzât chiah nge maw chêng ni? Kan luh tirh ai khan kan ṭhahnem tawh lutuk tlat. Naupang ringawt pawh paruk lâi an awm a, min inhmelhriat tîr hlawm ve bawk mah se hriat kim an har lutuk. Kan ri nghal nuaih nuaih a, naupangho lah chuan "Anute Anute" min tia, min ngaina nghal hlawm zek lehnghal a. A lawmawm viau rualin ka thâwk an ti pik lek lek mai.




A hnu deuhah chuan Zorema chuan "Room-ah kan han chho lawk" tiin a room lamah min chhoh pui ta a. Mi zi nuaih nuaih kara awm chu nuam ka ti vak lo mah ila a bula a fala awm chu ka hreh ber asin mawle. Mahse hnial theih ni hek lo le, ka zui chho ta nge nge a. An in lah chu zau viau e ti lo chuan bungrua in an hnawh khat hneh hle a. An chei mawi thiam ngang mai.



A room kan lût chiah chu hahdam hmel zet hian a thaw huai a, "Lo ṭhu rawh, bathroom ka'n hmang lawk" tiin a khum sira couch chu min mitmei a, bathroom-ah chuan a lût zui nghal a. A room chu mipa room tih takah thil han inchei mawi emaw in tar mawi emaw a awm hran lo va, mahse a zau thawkhat in a felfai khawp mai. Hmeichhe zakzum tak ang mai hian tim zetin ka lo ṭhu a, haw vat vat ka châk ber tawh.



Phone phawrh ka tum chiah tihah chuan bathroom kawngkhar chu a rawn ti khep a, ka dah lût leh zal zal mai. "I hahdam loh hmêl hle mai, min hlau suh engtin mah ka ti dâwn lo che" tiin ngainat awm zet hian min nuih a. Mahse ka hahdam phah der lo. "Min thlah tawh la" ka ti sep ringawt a, ka rilrua awm hmasa ber a ni miau a ni, haw ka châk ngawih ngawih tawh. Ka ril lah chu a ṭam tawh bawk si. Thingpui te kha lo in ve hle hle ila a ṭha nimai tùr ania, mahni ka in hrem a ni ringawt. "Kan la inbe dâwn chauh alawm" Zorema lah chuan a lo ti awlsam then a. Keimah ang lo takin a hahdam hmel bîk ṭhin khawp mai.



Ka bula a rawn ṭhut rual chuan ka lo phu leh uih pek a, tleirawl zakzum rual pawh ka ni tawh lo tiin ka lo insangmar hram hram a. Mahse a harsa hret chu a ni. "Keimahah hian i hmin lo riau in ka hria a, a harsa ang tih chu ka hria. Mahse nupa a insiam mai tur kan ni a, kan fa lo piang tur tán tal pawh hian min ngainat tum hram hram ang che aw" a rawn ti dam ta thluam a. Ka taksa lo ṭang ṭeuh chu a hai bîk lo aniang. "Inneih lam kha ka lo hawi ve miah lo asin" ka ti ta tawp a. Ringi sawi ang khan ka rilrua awm te hi sawi chhuah ve vek chu ṭha in ka hria. Tùn baka hun remchâng hi a awm tawh kher lo vang. Ka thusawi chuan a ṭhawng ve viau aniang a meng buai ve nak a, mahse a insiam ṭha leh rang khawp mai.



"Kan palaite'n an lo sawifel tâwk lo deuh em ni?" a tih chuan pangngai takin ka melh ngam ve ta chauh a. "Chutiang lam pawh a ni lo. Zorem, tlang deuhin ka sawi mai ang. Naute nen hian min ngaihtuah duh reng reng suh, ka enkawl thei mai ang. I mawhphurhna lâk kher a ngâi lo ania. Inhre ngai pawh kan ni lo va, kha zàna thil thleng lah kha ka bulṭan a ni a, ka thiam loh a ni bawk a. Chuvangin lo buai ve na tùr i nei miah lo ania. Thil ṭha lo lehzual a thlen hma in heti hian chingfel ila ka duh. Ka zahawmna ka la humhim ve nan sáwn man min pe tawp ula, a bâk chu rawn buai duh suh. Zalen deuhin i nun hmang rawh. Inneihna hi thil serious tak mai ania, kârah fa a awm dâwn vanga thutiam kan hlen theih loh tur tiam kha ka duh lo. Chuvang chuan kan inkarah thil tak tak a awm hma hian tàwp ang" ka ti ta duah a. Ka thusawi chu eng ang takin nge a dawnsawn dâwn hrethiam lo mah ila ka rilru dik tak a ni ve miau bawk si a. Min duh lo va, ka duh bîk lo bawk a a hriatthiam hram ka beisei a ni.



A ngâwi ta reng a, sawi zui tur hre tawh bîk lo ta chu kan ngawi ta tlawk tlawk a. A hnu deuhah chuan "Chu chu i duh dàn maw?" a rawn ti ta sup a, ka lo aw vat a. Ka inrin hma in a rawn ding ta hluai a, "Ok. Ka thlah tawh ang che" a ti a. Ka dul a rawn melh zeuh chuan ka ṭim ve sawk in ka hria. Inhnuaia kan chhuk leh chuan puitling ho deuh chauh an lo awm tawh a, min thlah tur thû Zorema'n a sawi chuan min lo mangṭha sap sap hlawm a. An fel hmel hlawm khawp mai. A Nu leh a Pa te chu upat ve hmel deuh tawh mah se mi inchengvawng tak an ni tih a hriat hliah hliah a. Min ti ṭha hluak lo nâ in an sual hran lo.




Zorema nen chuan kawngtluanin kan inbe ta lo. A ngâwi ngul a, ka thusawi ah khan sawi sual ka nei emawni ka ti hial. Mahse ka ngaihdàn ka sawi ve a nimai a, ka inthiamlo lutuk duh bîk lo. A duh leh a ngaih ngaihin min ngai mai rawh se pawi ka ti lo. Pasal em a han neih tur chuan ka inpeih lo ve êm a ni.




Kâr thar kan chuangkai a, ka beisei loh dàn lutuk in thil a thleng ta tlat. Khatia kan inbiak takah kha chuan min hrethiam in eng inneihna mah a thleng lo turah ka lo ngai mai a. Mahse a ni lo, palai an rawn kal leh chuan kan inneih ni tur zawng zawng sawi rem a ni ta vek mai. Min ṭhawng tih piahlam a ni. Ka lungâwi lo takzet a, ka chhungte nen kan sawiho pawh chuan ka lawm loh zia ka tilang nghe nghe. A hmeichhia zawk ka ni a, lâwm hlê tur ka nih laiin ka hrehawmna in ṭanna turah ka ngai tlat a. Ka theih anga ka hnial pawh chuan ka Nu leh Pa te chuan thu tàwp an siam vek tawh tih a chiang reng mai. Chu mai ni lovin an dawhtheihna in a tlin ta bîk lo aniang min khak viau nghe nghe a. Ka Pa ṭawngkam phei chu a na lek lek hial a ni.



"A hmeichhia zawk lehnghal tinge i hel tlat? Eng anga nuamsa a khawsak nge maw i tum le? Kan en liam rei ta deuh che niin a lang. Thil in tisual a, hetiangte hi hmeichhe mualphona a nasa zawk tih i hrethiam lo em ni? Zorema zawk mahin neih che a hreh lo va, lawm a hnekin i duh loh zia mawlh i sawi la, i lan tîr bawk a. Duh chu ni ngat sela rawn ngaihsak miah lo che in tlangval angin a la khawsa thei reng asin. I rilru hi a mak emai, engmah sawi buai tawh suh. In inneih ang, chu chu thu tàwp a ni" a ti ta nghut nghut a. Hnial luih ngam chi a ni tawh lo.



Kâr a liam a, thlà a liam leh meuh chuan Zorema nupui ka ni ta der mai. Ka rilru a hrehawm em em a, ka zalenna chhuhsak ang hian ka in ngai tlat a. Kan inneih nî te chu hlim lo tak hi ka ni ringawt. Ringi'n min din pui a, "Nui ve deuh hlek la" min ti sek nghe nghe. Kan thu chham te chu ka chham liam vêl mai mai a ni, ka ngaihtuah hlei thei thlawt lo. Zorema pawh a hlim bîk viau lo aniang, a nui hmel hmuh tur a awm mang bîk lo. Mahse lem a chang thiam khawp mai, a ṭhiante'n an fiam te chuan a nui der thiam vêl khawp mai. Amah ber chu ka haw deuh tlat a, a hmêl ka hmuhte chuan ka luak a chhuak hlui thei. Kha zàna ka lo rui kher kher kha ka inchhir thar leh ngawih ngawih mai a ni.



Zàn dár 11 a rîk leh meuh chuan a room-ah kan nupa chauhin kan awm ta ran mai. Ka lakah beisei a neih ka ring lo ve tawp a, ngaih ṭhat lohna emaw zamna emaw pawh ka nei hran lo. "Va inbual hmasa la" ṭhutthlenga ka ṭhu zawi ngiai chu min rawn bia a. Ka mit ka chhing vang vang a, ka lung a chhe tlat. Engkim hi a thleng rang mah mah a ni. Zalen taka nula anga awm kha a rem tawh dâwn lo va, kan ina nuamsa deuha ka awm ang khan ka awm thei tawh dâwn si lo. Mi mitmei vêng rêng rêng a khawsak ka ngai tawh ang a. Zorema hian a lo zir lo a nih ngat phei chuan inhmangaih vanga innei kan ni si lo, ngaihzâwng te min la neihsan ang a. Ngaihtuah thui ngam chi pawh a ni lo.



"Sawmsang, i muhil em ni?" Zorema chuan min rawn sawi che dat a, ka meng chhuak thei hram a ni. "Ka va inbual ange" tiin ka tho ta nalh a, ka mamawh tur ang zawng zawng chu la khâwmin bathroom-ah chuan ka lût zui nghal a. Darthlalanga ka hmêl ka hmu chiah chu ka mittui a rawn baw nghal zawih mai, mahni inkhawngaihna in ka khat ta tlat anih chu! Hetiang rilru hi ka la pu ngai lo asin. Ka dul lo puar ve lek lek tawh chu ka chûl leh a, ka rilru hian a chhe ber a ngaihtuah hman hial. "Pai tlang che ka lo thlang kher kher hi a pawi a ni" ka phun sep a. Ka ṭawngkam leh rilru vang chuan ka inchhir chawpchilh lehnghal. Pathian pawi ka khawih a, a lungawi lo zawka ka ṭang leh daih chu ka inthiamlo hnuhnawh leh kher mai. Mahse ka lâwm hlawl si lo a ni.



Bathroom-ah chuan rei fe ka awm a, ka che chak hlei thei thlawt lo a ni. Darkar chanve vêl zet ka awm hnu chuan Zorema ngaih ka ti ṭha lo a ni chêk ang chu, a rawn kik ta karh karh a, "I ṭha em?" a rawn ti a. Chhan loh ngawt chi a ni si lo, "Ka lo chhuak ṭep" ka lo ti ṭha ve mai a. Ka hmanhmawh ve ta deuh bawk a, ka va chhuah chuan khumah ṭhu in Phone a lo khawih mual mual a. Min rawn ngaihsak lo hlauh chu lâwm tak ka ni. Bathroom-ah chuan a lût zui ve ta nghal a. A inbual chhûng chuan ka lo mu sawk sawk a, a ṭhut lohna lamah khan ka mu ve ṭhuai a, a pawi êm lo turah ngai ang.



Bathroom aṭanga a rawn chhuah chuan reilote hnu ah a rawn mu zui ve nghal a. Keini chauh hi inneih zàna insi miah lova mu kan ni mai thei a ni. Kan inneih chhan kan hrechiang dun bawk a, nupa ang taka khawsak lam chu a lang lo ve ve anih hmêl.


Zingah chuan ka tho hma ve viau emaw ka ti a, Zorema'n min lo thawh khalh daih tawh chu niin! Room aṭanga ka va chhuah chuan an lo ri laih laih tawh a. Ka pasal ni ve ta chu ka zawng ru nghal a, mahse a Nu, ka Nu ni ve ta chuan "Nimin lama kan bungraw hawh te an dah fel a, an lo haw leh ṭep tawhin ka ring" a lo ti vat a. Min lo be nghal sawk sawk a. Choka ah chuan ka chet pui ve nghal sawk sawk a. An chhûngkua hi an hung ve hrim hrim bawk nen che kan tam bawk a, a hahthlak lutuk hran lo.



Zorema te lo haw hnu chuan tukṭhuan kan ei ta nghal a, in lêng neuh neuh kan nei zui leh a. Zêp nak emaw kan ri luih luih bawk nen ka hah, ka thâwk te a pik a, ka chau nghulh mai. Thingpui pawh kan lum zing malh malh viau mai a, hlim hmel put luih reng ngai chu ka hnê hlur tawh mai. Ringi pawh a rawn kal veleh a, chawhnu lamah chuan room-ah min inrem fel pui ta daih a. Mi zi nuaih nuaih kan tawm bosan ta daih chu ka thaw huai mai. Ringi bulah chuan ka âng zui hlak hlak a, min hrechiang bawk nen min lo nuih tawp. Kan inrem fel zawha kan chhuak leh tùrte chu ka huphurh ṭun a. "An haw rem hma chu room-ah hian tawm bo reng mai ka duh" ka tih chuan min lo khak ta hlak a. "Awi Enteh maw Sawmsang, tlang deuhin ka sawi tawp ang. Lo ngai haw kher lo la, ka duh ai chuan i ti ve mah mah ṭhin aw. Zorema tán pawh a hrehawm lutuk ang. Chuloah an chhûngkua an fel ropui si, ṭhat chhuah tum ve hram hram teh. I vanneihna te hi chhiar thiam la ka ti ngawt mai. A engamah hma in i hel nghal char char a. A ṭha ka ti miah lo" a ti ta duah a. Ka ngawi ta dâk mai. Sawi chu a sawi dik ngei alawm, mahse a harsa ve êm ani.



Ka nun chu a kal chho ve mawp mawp a, Pathian zarah ka dam ṭha tih loh chu han hlim viau na tùr ka hre miah lo. Kan inneih aṭanga kar hnihna ah chuan Zorema'n naute dinhmun a hriat duh avangin check up tùrin min hruai a. Thil ka ei ṭha lo em em a, râi no luak chhuak ka nei hnuhnawh a, ka nun hlim loh lutuk vangte pawh aniang ka pawr fap mai a. Ka hmêchhe ngawih ngawih hian ka hre ṭhin. Naute erawh a lo ṭha hlauh a, mahse Doctor chuan thil ei ṭha tùrin min chah nasa khawp mai. Damdawi eng eng emaw, ka luak chhuak tireh tùrte min chawh nual a. Kei ai mahin Zorema chuan a ngaithla uluk emaw tih mai tur a ni. Doctor lah chu zawhna a zawt peih mai bawk sia, ka hnê lek lek.



Kan in entir zawh chuan Office-ah let tawh lovin min haw tlang pui nghal a. Kan pahnih chauha kan awm hi chuan kan ṭawng tam lo ṭhin hle a. Kan ṭawng ve chhun pawh min biak hian a ni deuh mai. Kei chuan ka be hmasa khat khawp mai. Ka lung a la awi famkim thei lo va, mahse a hma ang em em kha chu ka ni tawh bîk lo. Zorema chuan min ngaihsak zia chêt zia in a lan tîr mawlh mawlh a. Ṭawng tam lo mah se min ngaihtuah ve hle ani tih chu ka hrethiam tawh. Kan chhûngte lahin min ngaihven em em reng a, a tîra ka lo huphurh ang em em kha chu a ni bîk lo tih ka hmu chho zel a. Mahse an mitmei ka veng ṭung reng zel hi hrehawm ka la ti ngawih ngawih.



Ka nau paiin thla nga hmêl a rawn hmu chho chiah chu ka dul pawh a puar mar pat tawh a. Upat lama nau pai ve ka lo ni bawk nen ka Doctor chuan in dim tùrin min chah ãwl lo va. Keipawh theihtàwp chuan ka in dim ve a, ka in tha zo lo angreng bawk si a ka nau pai chu ka hah pui ve viau mai. Office erawh ka la chawl duh bîk lo va, nitin ka la kal ve zak zak a. Zorema hna kal tùrin min thlah ve mai zel a. Picnic Spot a enkawl bakah khan an sumdawnna lamah ṭan a la chho leh ṭan a, ani pawh a buai thei khawp mai.



Ṭum khat zàn kan mu tur chu eng nge a hriat tehreng ni, zan dang zawnga mu ṭha mai zêl kha ka dul puar lah tawh chu a rawn khawih a. Ka lo ṭang nghal ṭeuh mai, "Hahdam rawh, kan naute hi ka be lawk duh mai ania" a ti sup a. "Ka hlîm dâwn aw" ka kawr hmawr chu a rawn ban a, a mitmei in min râwn pah bawk a. Chuti na nâ nâ chu ka lo bu ve nghat mai bawk a. Ka kawr hâk lâi chu ka âwm zawnah rawn hlim chhovin ka dul puar lah tawh chu a hmui in a rawn nawr chilh vang vang a, a beng a dawh zui nghal bawk a. "Apa a ngai anih hi" a tih chuan insûm hman lovin ka lo nui chhuak hak a. "Ka naute, lo chhuak vat vat teh. Ka duat dâwn teh mai che ania" a ti thum leh dŭt a. Engtin emaw riau hian nuam ka ti ta tlat anih chu!



"A hahthlâk ṭhin em?" ka dul zawn aṭang chuan min rawn melh chho a, "Hahthlâk lo e" ka lo ti ve mai a. "A rit ve tawh bawk si a, chêt a ti harsa ngawt in ka ring. Office i kal bâk hi chu inchhungah chuan che tam suh aw. A theih phei chuan che lo law law ka duh ṭhin. Ka chhûngte paw'n an phût miah lo che ania. I hahdam kan duh ber a, naute hrisel tak min hrin sak la kan duh ber" a ti duah a. A âw ah chuan min duatna âw hre tlatin ka inhria a. Chu chuan min ti pangchang tlat pek a, ka mittui a hnai nghal kuar mai. Zorema ka tawn aṭang hian ka awm ngai loh dànin ka awm nasa tawh takzet.



"A harsa hlei nem" ka lo ti thei hram a, Zorema chuan "Harsatna i neih chuan min hrilh hreh lo la, ka chhûngte hi i chhûngte ang chiahin en rawh aw. Tunah chuan chhûngkua kan ni tawh tih hria la, rilru hrehawm deuh te'n i lo awm palh hlauh ange. Pasala min neih i hreh zia kha ka hria a, i hrehawmna belhchhah ka duh miah lo ania" a ti dam leh thluam a. Ka insûm thei tawh thlawt lo, ka lo insût ta hraih a. A rawn hawi chhoh rual chuan hamhaih zet hian "Ka ti na che em ni?" a ti hluai a, a rawn tawlh chho zui zat bawk a. "I pum ka ti na em ni? Ka lo khawih lutuk deuh aniang a" a ti leh mawlh mawlh a. Ṭap chung chuan ka lu ka lo thing nawk nawk a. Zorema inlahrang tur chu ka kuah ta ringawt a, ka ṭap chhuak nghal hawk mai. Ka ṭah chhung zawng chuan ka sam a lo chûl hauh hauh a. Zànin kan awm dàn chuan min ti lungchhe ngawih ngawih mai a ni. Keimah ka inkhawngaih aia nasa khan ka khawngaih ta tlat anih chu!



Ka ziaawm hnu chuan ka zak leh hnuhnawh viau a, mahse Zorema chuan min hrethiam khawp mai. Zawhna min zawt tawh lo va, ngawi rengin min kuah hle hle a, chu chuan min thlamuan riau lehnghal. "Hmeichhia chu râi lâi hian in rilru a no a, chhan awm lova ṭah tawpte hi in chîng ṭhin an tia. A lo ni tak tak aniang" amah chuan a phun sup sup a, ka ṭah chhanah khan ka râi no rilru a lo puh fel diam anih hmêl. Zawhna min zawt zui lo chu ka lâwm takzet bawk. Han sawi zui vak ngaihna ka hre dâwn bîk si lo.




Ka rilru chu a ni tèlin a inthlak ve hret hret a, Zorema che zia engkim chuan min hneh vêl vek tawh. Khami zàn aṭang ngat phei kha chuan ka pawh zual em em a. Chu chu a lo hai bîk lo aniang ka dulte pawh inthlahrung miah lovin a khawih ve bawrh bawrh ngam tawh a. Ṭawngkam a min fiam zuk zuk pawh a chîng chho ṭan a, kan in ngam ve tawh khawp mai.



Ka nau paiin thla sarih hmêl a hmuh a, kan in check up leh chuan harsatna kan nei ta tlat mai. Doctor sawi dàn chuan naute lung phû chu a dik lo va, Test chi hrang hrang min neih tîr hnu chuan lung ṭha lo tih kan hre ta a. Lo hring ta tehreng pawh ni ila dam khawchhuahna chance a awm lo tluk ani tiin min hrilh a. Ka pai tlang anih chuan keima tán pawh a ṭhat loh tur thû min hrilh nghe nghe a. Insawiselna hranpa ka nei bawk si lo,a thusawi chuan min ṭhawng tih piahlam a ni. Chhûngte nen lo in râwn khawm tùrin min ti a. Rilru a buai duh takzet.




Kan chhûngte'n an han hriat takah chuan an hnim ve ruih mai a. Thutlukna chu kan nupa kutah an dah a, eng thuthlukna pawh siam ila, min pawm pui tur thû an sawi a. Kan nupa boruak a ziaawm chho ṭan chiah a, kan inpawh chho ve dâwn chiah a ni a. Chutiang harsatna in min han tuam leh chu lung a zing duh takzet. Zorema chuan ka duh dàn min zawt a, kei chuan pai tlang ka thlang hmiah mai. Kan vànneih thei ve tlat tih chu ka ring a, mahse ka beiseinq erawh beitham tak a ni thung. Zorema pawh a rilru hah zia ka hai lo va, mahse inti pachang in min hnem tu zawkah a ṭang hram hram a. A rilru buai ve zia erawh ka hrechiang viau mai. Doctor pawhin kan duhthlanna chu min zah sak a, mahse beiseina min neih san pui loh zia chu a ṭawngkam hman duh dàn aṭangin kan hrethiam ve vek a. "In rilru nawm nana hnem vak che u ka tum hran lo. Nakina in beidawnna khúa tur a sei mai mai dâwn a. Mahse in duhthlanna chu ka zah sak che u a. Theihtàwp kan chhuah tlâng dâwn ania. Pathian tán theih loh a awm lo va, inhlan tam mai ang u" a ti a. A rilru tur chu ka hriatthiam pui ve khawp mai.



Rilru lam a hahdam miau si lovin ka hlim lovin thil ka ei ṭha lo êm êm a. Ka chhûngte chuan min fuih ãwl lo va, mahse hlim luih a, thil ei luih chu har tak ani. Kan dinhmun in a zir tâk loh vàng nge ni Zorema nen pawh kan inhlat ta riau hian ka hria a. Ka lo ngaih ve dànah chuan harsatna chu kan paltlang dun ang a, kan tuar chhuak mai thei turah ka lo ngai a. Mahse hun eng emaw aṭang khan Zorema chu a inlahrang deuh ta tlat hian ka hria a. Ei tur ṭha leh naute tana ṭha tùr chu min rawn lei fo lawi a. Kan inpawh chho ve ṭan chiah kha a ni si a, mahse tùnah chuan kan nupa inkar pawh sawifiah theih si loh hian a buai ru riau a ni.



Zan khat phei chu ka beisei loh lutuk in zu rim a rawn nam haw a, a rui chhe viau lehnghal. A thawmhnaw pawh thlâk ṭha hlei thei lo khawpin a awm a, ka lo pui vat a. "Inṭhen i duh em?" rui viau e ti lo chuan a rawn ti fiah fak a. Ka hamhaih luatah ka melh reng ringawt a. "Inṭhen i duh tawh em?" a rawn ti ṭha leh a, a ṭawng ka hre sual chu a ni hauh si lo. "Zorem" ka ti ringawt a, ṭawng chhuah ngaihna pawh ka hre lo. A zu ruih vangah puh dâwn ila a ṭawng a fiah viau bawk si. "Ka bulah hian i hlim bawk si lo, inṭhen pawh chu a ṭha zawk ang" a rawn ti leh a. Min bia pawh a ang tawh lo; amah chuan a phun nimai hian ka hria.



Chumi zan chuan ka muhil mang lo a tih theih ang. Zorema erawh a chatthla a ni chêk ang chu, a muhil bawrh bawrh a. A muhil hmel chu ka thlir reng ringawt mai a ni. Ka mittui a rawn luang leh pap ṭhin bawk a, inṭhen chungchâng mawlh khan ka rilru a tihah a ni. A tîra neih duh lotu zawk kha ni mah ila inṭhen a'n sawi ri chiah chu ka nâ tih piahlam a ni. Inṭhen tur anga ka inngaihtuah ringawt pawhin ka nghilh dup mai.



Zingah chuan engmah thleng lo ang maiin a awm leh lawi a. Inṭhen lam reng reng a sawi leh tawh lo. "Nizànah khan zu i rawn nam haw a" keimah zawk chuan ka lo ti a. "Ṭhiante'n min nawr lui ve tlat sia, ka hnial hneh lo va. Lem hnih khat ka'n tem ve zuai anih kha" a lo ti ṭha ve mai a. Mahse a ruih dàn em em kha lem hnih khat ringawt chu a ni thei lo. "Zorem" ka ti leh hluai a, sawi chhuah mai ka tum ut ut nâ in ka ngam leh ta thlâwt lo va. "Engmah" ka ti leh ta ringawt a. Ani pawhin min zawt zui bîk lo. Hna ah ka kal tawh rih lo bawk nen a hna kal tùr chu páwn thleng ka thlah a. "Nizàn ang kha chuan ka awm tawh lovang" a tih chuan ka ngaih a ṭha leh ringawt tawh.




Chhunah Ringi a lo lêng a, tunlai kan dinhmun a hre ve vek a, buai viau mah se min rawn ngaihtuah bâng lo va. A chungah hian lawmthu sawi sèn loh ka ba. Thil ningkhawng min hrilh tu ber hi a ni ve a, ka pasal chhûngte laka ka khawsak dàn chungchângah pawh min vengthawng êm êm a. Hauh ka ngaihna ah min hah hreh lo va, ka thlavang pawh a hauh na viau ṭhin.



Midang an awm lo ta maw tihah chuan "Nizànah in pa ka hmù" a tih chuan " Khawiah?" I lo va sawi lo thei zawk" ka lo ti vat a. "Engmah ka zêp dâwn lo, tlang deuhin ka hrilh ang che. Nula pakhat nen an rawn inphur a, lo hrilh nghal che kha ka tum uaih uaih a. Mahse lo lên ka tum tho avangin hmaichhana sawi ka thlang ta zawk a" a ti ta mawlh mawlh a. Nizàna inṭhen a sawite kha ka ngaihtuah let a, ka thin hnun hi a na sawk maiin ka hria. "Tùnlâi in ṭha vak lo tiraw?" a rawn tih leh chuan zêp chi ah pawh ka ngai lo, ka rilru a lo tawt ve bawk nen ka hrilh tlang ta vek a. Ringi chuan a thiam ang tâwkin min hnem ve a.




"I ngaih tih ṭhat loh ka tum vanga hrilh che ka ni lo ania aw. Mahse ngaih ṭhat viau chu a tih chi chuang lo anih chu. Zorema nen chuan inbia ula, sawi fel rawh u" a ti a. "Biak dàn tùr ka hre lo alawm. Chuloah, nau ka pai vang chauha min nei a ni bawk sia. Naute dinhmun a ṭhat loh tâkah chuan inṭhen a pawiti lo aniang. Nizàna inṭhen a sawi chhan pawh kha bialnu a nei aniang" ka lo ti ve halh a. Thil dang rinhlelh tur ka hre hlawl lo a ni. Ka ṭah te lah chu a chhuak hlur lehnghal a.




Ringi chuan "I rilru kha kal thui lutuk lo se. Nupa in ni tawh a, ṭha deuhin bia la sawi fel rawh u. Dik tak chuan nang pawh a tîr lamah a dawh char char che a, a dawhtheih êm kha! Tunah hian i hun a inṭan ve chiah tih hria la, theihtâwp chhuah rawh. Ngawi renga i ngaihtuahna vah kual tîr vak vak lo khan tlang takin sawi pui la, a sawt zawk ang" a lo ti leh duah a. A sawi anga tih chu huphurh viau mah ila a sawi dik reng mai. A tîr phat aṭangin Zorema chu inphah hniam zawk ah a ṭang char char tawh a. Tunah chuan ka hun a ni ve tawhin ka hria.




A hna bâng a rawn haw chuan ṭha takin ka lo chhàwn a, an hna chungchângte chu ka lo zawt a, ṭha deuhin min lo chhâng ve mai zel bawk a. Zànah chuan Ringi thû min ràwn ang khan tlang takin ka rilru buaina chu ka zawt ta tawp a. A ruih laia a thusawite chu sawi chhawng in ka rilru hrehawmna te chu ka thlen ta vek a. Zorema chuan min melh ta vung vung a, "Ka bulah hian i hlim lo viau niin ka hria a..." a ti fan ruih a. "Bialnu chu i nei tiraw?" ka lo ti thung a. Ka beisei loh zet hian a lo nui huk a, "Hmutu che u an awm alawm, car-ah in inphur a, i rawn ruih haw zan khan a la ni zui. Inṭhen i la rawt zui a, Zorem ka rilru i tihah lutuk " ka lo ti leh mawlh mawlh a. "Bialnu ka nei miah lo, ka neih lohna hi a rei tawh lutuk zawk" tiin a lo nui leh huk a. "Inṭhen chungchâng kha chu...?" rawn ti leh in a insehruh nghal ṭeuh a. "Ka tihpalh, ka thian lo takzet. Mahse ka ngaihtuah vang zawk che ania. I rilru ka hmin thei thlawt lo niin ka inhria a. Min hmangaih let thei ngai dâwn lo ni a ka hriat avangin ka ruih lâi chuan ka lo sawi chhuak palh anih dâwn chu" a ti dam thlap a. Hmangaihna thû a sawi chu ka bengah a lo ri ring fâl ngang mai. "Eng nge i sawi awmzia?" ka tih chuan " Ka ngaihtuahna hi i luah khat hneh tawh viau anih ber chu! Ka hmangaih che hi mak ti suh. A tìrah chuan induhna satliah ah ka ngai mai a, mahse zawi zawiin i tum ni miah lovin ka thinlung i hneh a. Ka lak aṭanga i inlakhran pauh leh ka hnaih châk sauh che a. Chutiang rilru chu i pu ve thei ngai dâwn lo niin ka hria a. Naute chungchâng kan hriat hnû ah ngat phei kha chuan beiseina ka nei chaurau tawh hle a. Zawi zawia hlat che ka lo zir mai chauh a ni" a ti ta duah a.




"I mãwl lutuk" ti halhin a âwmah chuan ka chum dat a, "Ka lo rin ve dàn chuan naute vang chauha min nei i ni bawk si a. Naute dam chhuahna chance a tlêm avang khan i inlahrang angah ka ngai a. Hmeichhe dang, i hmangaih tak i tawn takah phei chuan min thlauh thlak pawiti miah lovin min ṭhen i duh ah ka lo ngai nghet hmiah zawk asin. Nau pai tlang ka thlan khan ṭha takin kan fight dun ang a, kan beiseina tlem tê neih hi kan vànneih pui ka ring tlat asin" ka ti a. Nizan lama ka awm dàn te chu ka ngaihtuah let a, ka lung a chhe thar a. Ka ṭap titih nghal der mai. Duat zet hian Zorema chuan min lo kuah vat a, ngaihdam min dil ta mawlh mawlh a.



"Kan lo mãwl dun êm anih chu! Kan ngawih theih luatah kan lo in hrem rei mah mah a ni. Tùn aṭang chuan engah mah insûm ka tum tawh lo ania. Ka duatna che te leh i laka ka rilru puthmang te pawh che zia in ka lan tîr zel tawh ang. Nizan avang kha chuan ka tihpalh takzet" a ti a. Nizan chungchâng a sawi leh takah chuan hmeichhia kha hrechhuak leh zawkin "Tunge?" ka ti leh ngat a, "Kan ṭhianpa nau, pasal nei tawh anih kha. Lungngai suh, hmeichhe dang lakah chuan ka fihlim chiang lutuk. I tán a hmasa ber ka ni ang chiah khan ka tán a hmasa ber i ni" a lo ti duah a. A thusawi tawp lam chuan kan hun lo hman dun tawh kha min ngaihtuah chhuah tîr a, ka zak leh chem chem mai. A lo hrethiam a ni chêk ang chu ka zahna belhchhah tùrin min fiam zui leh kher a.




"Hmeichhe dang laka insûm thei hlê si kha hmeichhia zurui lakah ka tlâwm ania, i îtawm ve thawkhat aniang" uangthuang deuh taka a tih chuan ka lo chum ṭaih a. Lungawi hmel zet hian min kuah ta hlê hle a, ka thawveng ta huai mai.



Zorema chuan ṭha takin min enkawl chhunzawm a, Doctor min ràwn sak reng a. Ka tana ṭha tùr leh ṭha lo tur chu min thliar sak zung zung ṭhin a. Ka rilru hahna te a ziaawm chho tawh bawk nen naute hrisel tak ka hrin chhuah theih nan theihtawpin ka hriselna pawh ka vawng uluk ve a. Doctor chuan "Hmasawnna em em lo mah se i stable viau mai a, hetiang reng anih chuan chance a awm ve thei tlat ania" a ti a. Chu chuan kan nupa pawh phurna thar min pe a, kan in enkawl uluk zual sauh a.




Ka nau neih hun chu a lo thleng ta! Tupaw'n kan huphurh vek a. Mahse Zorema zawk chuan min ṭawng thlamuan char char a, engpawh thleng se Pathian remruat ah pawm ila, tawrh dàn kan thiam ang tih chu kan inhnemna a ni. Nau vei pangngaiin an vei ang chuan ka awm ve vek a. Naute dam chhuak miah lo tur hring chhuan tur anga ka inngaihtuah zawng ringawt pawh chuan ka ngai ngam lo. Ka rilru a nâ a, intih harh luih a, intih paukhauh luih ka tum hram hram a. Zorema chuan min thlamuan tih piahlam a ni, ka bulah a awm char char a. Ka taksa nâ te min chhawk zangkhai thei lo mah se hahdamna tam tak min pe tlat.




A tàwp tàwpah chuan naute ṭap ngaih ngaih ri ka hre ta! Ka taksa chu a chau nghal nghulh a, ka mit deuh sulh mai. Harh luih ka tum pawh chuan ka harh mai thei lo va. Ka hriat leh hmasak ber chu Zorema âw a ni "Lo harh vat rawh...fanu duhawm deuh kan nei ania..." a tih ri chu chiang lo ruai hian ka hria a. Min be mawlh mawlh a, a thusawi chu chiang fakin hre thei lo mah ila ka harh ve telh telh a. Chu chu a lo hria aniang, "I harh tiraw?" a rawn ti a. Ka meng riai riai a, mahse ka lu a rawn hai leh avang chuan ka chhing leh rih a. Zorema chuan "Thisen i hloh hnem deuh hlek a, chuvangin khatiang khan i awm anih kha. Hlauhthawn tur a awm lo ania aw...naute pawh ngaihtuah awm lutuk a ni lo ania" a lo ti leh zung zung a.




Darkar khat vêl zet a liam leh chuan ka harh pangngai ve thei ta! Ka chhûngte an lo awm kim ṭhap a, kan ṭhian hnaivai te ho pawh an lo kim khawp mai. Zorema chu naute chanchin ka zawt nghal a. Kan fanu chu NICU-ah an lo dah lût nghal hi a lo nia. Doctor sawi ang tak tak khan nung dam in hring mah ila dam khawchhuahna chance a lo tlêm hle a. Zorema erawh chuan beiseina a nei tlat a, Doctor leh nurse te pawhin theihtawp min chhuah pui a. A lung lam fel lo chu an enkawl zui nghal a, nau piang hlim a lo ni bawk nen an tán chuan enkawl pawh a harsa viau ta ve ang.



Ṭawngṭaipuina kan dawng nasa êm êm a, chungte vang te pawh chu aniang mak tak maiin thlamuanna hi ka nei tlat a. Ka pasal lahin min duat em em reng a, ka lo inhliam nasa ve bawk nen ka che hlei thei ṭhin lo va. Ka zun dâwn leh inthiar dawnin min pui vek a. Ka intihfai dâwn thlengin min pui a, zahah pawh ka la hlei thei lo.



Kan fanu vanga Pathian kan auh nasat chu sawi loh midang aṭang pawhin ṭawngṭaina kan dawng nasa bawk a, thla hnih dâwn damdawiin a kan awm hnu chuan kan chhuak ve thei ta. Kan fanu erawh a dam famkim ta tihna a ni hauh lo va. Mahse kan Doctor ber ngaih chu a ṭha riau tawh a. A lung ṭha lo erawh dam hlen thei lo tluk a ni tawh dâwn a. Mahse kan in enkawl ṭha anih phawt chuan harsatna lian tham kan tawh loh kan beisei a ni. Chhûngkua, ṭhenrual ṭha te kan lâwm êm êm a. Damdawiin aṭanga kan chhuah ni phei chuan naute thar läwm nan châw kan eikhawm hluai nghe nghe a.




Zorema chu ka thlir ṭhin a, kan bulṭan dàn te ka ngaihtuah a. Ka rilru kawih ṭhin zia leh ka in dah sàn zia te chu ka ngaihtuah let a. Tùnah chuan ka zakin phû lo ka inti ngawih ngawih tawh. Nu dinhmuna ka'n ding chho chiah phei chu ka rilru puitling vek tawh emaw ka lo tih kha ka lo puitlin tâwk loh zia ka hre thar a. Inzir reng ngai mihring kan nih zia chu ka hre chho mawlh mawlh a. Awmze nei lova ka rilru ka lo ti buai vak vak thin te kha ka pasal laka ka intuk luh tâkah chuan keimah pawh ka thâwl ve ta hawk bawk a. Thil ngaihtuah buai vak vak tawh lovin ka sawi chhuak mai zel tawh a. Ka pasal chhûngte pawh ka chhûngte ang tak taka ka en theih tak chinah chuan pasal neih chu nuam ti tawh tak ka ni. Awmze nei lova lungkham lo neih vakte kha a lo va'n ho tak.


Kan fanu, Lalchhanhimi lah chu hrisel lo viau mah se a felin ama tâwkah a lawmawm ve êm êm mai a. Zorema hian nau khawih a lo thiam zek a, kei ai mah pawhin a ti thiam zawk emaw tih mai tur a ni. Kan chhûngte lahin min lâk chhâwk reng a, an lâwm bawk si. Nau sual tak a lo ni lo bawk nen ka hahdam letling ta phian mai.



"Fa hi engzât nge neih i duh?" Zorema chuan min zawt hlawl a. Kan fanu a muhil siai siai tawh bawk nen ka hnunglam aṭang chuan min rawn kuah a. Vawiin khan kan in check up leh a, ka dinhmun a ṭha vek tawh a, Chhanhimi pawh a ṭha viau mai. Zorema zawhna chu ka la ngaihtuah loh lam tak anih avangin "Kan thû lo e" tih ringawt in ka chhâng a. "Chuloah ka upa tawh bawk si, nau pawh ka pai leh thei dâwn emawni?" ka lo ti leh hliai a. Kum 35 tana nau pai chu a harsa ve tawh khawp ang. Zorema chuan "Kan vawikhat tihna ah pawh i pai nghal tho alawm" Nui vur vur chung chuan a lo ti pek a. Ka va han zak tak. "I mak" ka ti hlak a, "Kan upa ve ve tawh, chuvang chuan a theih lâi hian ṭan lâk vat vat a. Neih zung zung ṭha ka ti " a lo ti lehpek a. A thusawi nem ngheh nan ti ang hrimin min rawn fawh chhunzawm nghal zat a. Ka lo chhan let ve rual chuan rawn duhthawh zual sauhin ka âwm bâwr ah a bur nghal chat a.




Chutia rei tâwk fang ka taksa a khawih kual hnu chuan a mitmeng in min rawn râwn thlap a, ka lo buk nghat tâkah chuan ngaihngam takin chêt a lâk chhunzawm nghal zat a. Nupa kan nih hnu a kan khawsak dunna hmasa ber a ni a, a bâk chu ka ruih zan kha a ni leh mai a. Lo chhan let dàn vak ka thiam lo, mahse a mipa zawk na nâ nâ chu min kaihruai hnehsawh khawp mai.



Kan bulṭan dànin duh thû sam lo mah se nula senior a lêng tlang ṭhak tùra inngai kha mipa ṭha lutuk ka tawng hlauh a. Hmeichhe chapo leh mahni in duh tâwk ve tak, mipa pawh engah mah ngai em em lo khan mipa hmangaih ka nei ve tlat tawh a. Zorema chuan mipa ṭha a nih zia min hmuh tîr bâng lo va, chu chuan mipa ka lo rin dàn ṭhin chu zawi zawiin a ṭhiat fai vek a. A hmangaihna chuan tlawmna nun min neih tîr a. A tlawmna chuan hmangaihna thinlung min neih tîr a. Kan nakin hun tùr hre lo va, ngaihtuah buai vak pawh ka duh lo. Tuna kan hlimna ah hian ka lungawi em em a. Ka tán pasal ṭha a ni ang chiahin nupui ṭha tak nih ka tum ve zel tawh ang.



A TÀWP TA.