STORYFB.COM

SCHIZOPHRENIA: Lalhmingliani Leh Kei

Story by, khiangte Hmar Laltanpuia @Hringnun Guru

"Ka fapa, Hmangaihna hi tawpna hlimawm a ni vek Kher lo asin." Zoliana (Rinsiama Pa)

Chapter -4

"Chhe sâwn hlawm hian! Thinrim ha chang ka thial bawp bawp reng a. "Mike, tu mihring phiangsen nge maw chu an nih chiah le? Hmingtei kha khawih an tum vaih zawngin," ka han ti a.

Mike-a roomah chuan khun khân tak chuan kan thu dun khar tawh a, Mike-a chuan kan thil tawn chungchang chu a nu leh a pa'n an hriat a hlau hle a.

Mike-a chuan hnuai lam han bih vang vangin a kut khing hnih chu a bawp chungah chuan a'n vilhvalak than a. "Ma muan, Stephen an tih kha laitla khat an tih Hmingtei thisen pui a nih kha. Tharum ngaina leh mihring nun chhe lutuk mai a nih kha.

"Ka tum hnih hmachhawnna a ni ta. Kha mi tum, a khing khat chauha mi han tham tih loh leh tunah kha tia ka han hmachhawn leh takah khan mihring luhlul a nih zia leh pawisak nei lo a nih dawn zia hi ka hmu thiam deuh deuh ta zel zawng a nih hi.

Kei chuan, "E, ka tum hnihna i tia law?Mai mai chuan! Engtin nge an rawn lan a, a hma in an awm silo a," ka han ti leh a. Keipawh chuan Ka kekawr chu ka bengfai pah thak thak reng a.

"Muan, a ho e mai, mu hil daih ang! Eng to zui lutuk duh suh," tiin a inlet thawk a mi mutsan ta daih a.

A tuk khua a han var chu ka thiana hnenah chuan zankhat chauh chu va lan leh ngat ka duh thu ka'n hrilh thar leh ngat a. A ni erawh chuan uluk tak hian min en a,"Muan, miin damlai hremhmun hi an sawi a nih chuan Hmingtei nun hi a ni ngei ang," a ti a.

Mike-a nghawng an rehna chu kaihbu khak ang lek zawng a ni lo tawp ang tih hriat turin Vur chuan a dep a dep leh pek Mai thin bawk a, a nu-in a chhan a han zawh lah chuan, "ka mutna-ah ka delh sual deuh a nia'ng," a ti mai a.

Tuk thuan kan ei kham a, Mike-a nen chuan Verandah-ah bawk chuan kan tâp dun leh khar tawh a. Mike-a chu a nghawng han dawm vung vung pah chuan a khaw ram chhimbuk hawi lap lap reng thin a.

Chutia ngaihtuahna kawm khaihlak Kar chuan tiin Kuhva leh zialte chu kan han ei-in kan han zu bawk a. E'nge maw mi hrilh nghakhlel ru tak chung chuan ka thiana hàwi lam chu ka thlek ve vang vang reng thin bawk a.

Nakin deuhah chuan Mike-a chuan, "Intifai ila hmar vengah Kan pe tek chhuak phei dawn nia, Saizama va hmu vat teh ang," tiin a meng sen ram ram reng a. A awmdanah chuan nizan thil thleng khan a lung a dum tehchiam bik lo niin a lang tlat a ni.

Mahse kei chuan, "Ka thian, tu mah i pun rih lo teh ang. Mi'n hrilh teh, an paliana kha Hmingtei unau pianpui a nih ngai si chuan eng thil awmzia nge ni ngai hi? A chepa kai atangin ka hrethiam duh tlat a ni," thahnem ngai tak chuan ka han ti a.

Chutia ngenngawl taka ka tah awh tak rengah chuan Mike-a pawh chuan he thu hi min hrilh ve ta a.

"Chutih zawngah chuan ka vaibel tih tlukin ka hre ve nual a ni.

"Lalhmingliani, a pa pu zamlova leh khang mi, Stephen paliana, Freddyte unau thum nen, an ni ho inkungkaih kual dan leh eng inzawmna nge an neih?

Hmingtei, he hmeichhe hmel duhawm Tak leh thinlung dek thei tak tur chunga heng unau thum te an han invilika an inlek dan te reng lah hi, zawhna chu a awm a ni," Harsa zet chuan a'n ti a.

Kei chuan, "Hmingtei kha, hmeichhe duhawm Tak, mahse a nun phung leh khawsa zia, keini min lo dawn sawn dan te reng atang khan erawh danglam Tak a ni, tin a hmel ka hmuh Khan natna leh hreawmna nasa tak enge a nih ka hriat siloh, chhungril lungchhiatna na tak ka hmu tel tlat bawk a ni. Eng tiang chiaha nun duh awm lo chu nge a lo neih? Ka'n ti ve leh ta bawk a.

Mikea chuan, "A then a zar chu i hriat ták kha, chhim veng ho intih bil chhoh dan, politics ruih chilh thu leh kohhran maksak chungchang te.

"Hmingtei hian ngaihzawng a nei han ti dawn ila, inngaizawng ang nilo thian tha tak angin bul an tan a ni zawk mah ang.

"A hming pawh ka hrilh tawh che kha, Lalrinsiama Bulldozer maicham mi leh sa a ni ve lo." tiin tun hma thil chungchang chu min hrilh tan ta a.

Mike Zochhuana pov:

Kum 2014 ramtuk thla a ni a, tun Kum hi pawl sawm ka zir kum intanna tur a ni a, vanneih a siamin pawl kua hi ka pass teng teng chauh mai lehnghal a. Kum 17 lai ka ni ve ur tawh. A chhan chu pawl ruk leh pawl sarih hi ka beih nawn vang a ni.

Admission hmaa neih tur counseling session ti zote chuan school ep maia awm pi Lalrinpuii thingpuidawr-ah chuan inthun puarin hun an tumtawi leh hlawm a.

Ka pa chuan kan Principal hnenah chuan document pawimawh leh tul thil te chu a hrilhin a en tir mek reng zel a, chutih lai chuan kawngkhar-ah chuan hmeichhia counseling session ti ve tho tur ni awm tak a pa ni ngei tur nen hian rawn inzuiin an lo lut ve mek bawk a.

Chu nu inthuam Dan chu a mak hle a, khua a lum tehreng nen chuan puan dum hian a inkhuh hlen mai a, a hmel chu a lang mang hauh lo.

A inthlahrun hmelin a inkiltawih hle a, a pa chu pa pumraw tawi bing lit let, a fanu kut zaizira a'n bia chu a kut sei tak leh Kak deuh thu Mai chu a langsar ta hle nghe nghe a, a kawng kal chu a kal bu deuh lak lak a, chal ngawlh han mai leh tarmit fim vuah ra mai, meng deuh he he reng hi niin, a vervêk hmelin pa khirh khan tak zawng a ni ngei ang.

Tin, he pa hi pu Zamlova an tih Lalhmingliani pa, khami, kha zan Hmingtei ka rimpui Che zan hmasa bera Kan hmuh kha a ni" Mike chuan ama thusawi mek chu an pawtchat a.

"A fanu chuan a pa chu a tihkhai hle ang tih a hriat mai a, tiin a chhunzawm leh nghal a,"engkim a kawi a ngilin a thu a zawm zat zat thin ang tih lah an awmdan hawiher atang mai pawh chuan ka lo hmu thiamin ka lo thlir thiam nghal vek a ni.

"Nangpawn i tawn hmasak ber tuma a chhungril lungchhiatna i hmu ang bawk Khan," tiin an pawtchat leh a.

Chutah chhunzawm lehnghal in,"Ka pa nen chuan kan inzui chhuak ta a, midang ang bawkin pi Rinpuii thingpuidawrah chuan kan va inhnawh puar ve leh ta a.

School tan ni atang hian ka chhunzawm leh Mai ang, zirlai zingah chuan khaw dang mi ni awm ang tak tak tur hmelhriat loh hmel thar ka hmu nual a ni.

Orientation Kan han nei ta chu kan Mizo subject latu sir Duhtea chuan inhmelhriat tirna hun te a'n nei a, chhim veng rawlthar Rinsiama hnu ah chiah chuan hnung lama mi roll number 15 hmeichhia hi a rawn ding veleh a. A hming chu Lalhmingliani a ni a.

Chu nu chu a tawng zawi hle a, sir Duhtea pawh chuan 'louder' a han ti ta nghe nghe a. Amah chu kan en nghal thap nghe nghe.

Kha mi ni, counseling session laia hmeichhia, puan duma inkhuh hlen ka hmuh kha a lo ni reng a, mak deuh maiin ka hmuh tum khatna ang chiah khan puan dum hian a la intuam hlan reng a, a hmel chu a kun deuh dai a, chutah uluk zawk chuan ka'n thlek leh a.

Lalhmingliani chu hmel tha ka ti ta hle mai a, hmel nu zam mai, a hnar chu a zum reuh hle a, a vun a ngoin a mit hmul a dum kalh kalh hle a, chutah kei chu mi rawn en a, ka lo thlek uluk em avâng chuan a sen ap ap a.

Mahse le, a hmai vun ngo tak chu a ti nung sen hlar maiin an pawlh takah chuan a vun nalh zia chu ka hmu thiam ta deuh deuh mai zawk a ni. A heh te chu a vam hiam si a.

Mahse, sawi tak angin Lalhmingliani chu a intaltan tlat a, a inkiltawihin thian tumah pawh chu a kawm ve ngai lo a, amah chauh hian a awm melh melh thin a, a hlimchhhawn a la ni nen a lakah tu naupang hawklak mah chu han ninhlei deuh an awm rih lem lo.

Mahse Mahse, hun han kal hlek se, he hmeichhe maksak tak leh mi phar vak lo tak, duhawm ru tak si hi tu naupang phurthak kai deuh emaw chuan an la tibuai ngeiin ka ring tlat a ni. A landan leh nungchangin zir miau hek le!

Chuti reng reng chuan nitin School-ah chuan hun a hmang thin a ni. Class khat kan ni nen kei chuan Lalhmingliani chu langsar ka ti thin lo thei lo.

Kan class a mi tho a hming chu Rinsiama ka tih kha, a ni hi naupang nungchang tha leh fel deuh mai hi a ni a, a ni erawh hi chu a rualpawl tawk vel hian a khawsa a, tin a pian a thain thahrui ngah tak hi a ni a, pawl riat kan zir atang tawh khan kan in pawl rual chho ta zat zat zel a, sport hi a thei em em mai a, mahse kei ang thovin lehkha hi a timi bik vak lo. Kei aiin kum khat in a u nghe nghe a kum 18na a hmang mek a ni.

Mahse, a theih zawng sports thilah chuan school ti hmingtha tu hi a ni ve zat zat thin a, an chhungkua hi chhungkaw khawsak hnuaihnung ve thin tak niin a nu hian a boral san tawh an ti a, kan veng veng lai hi an ni lo a, a ni hi chu Lalhmingliani te nen khan veng khat an ni thung.

Tin, chhim veng rawlthar tho, an hming chu Freddy-a, Nunsiama leh Zolawma te an awm bawk a, keini ai chuan an nau deuh thung. Tin, an ni hi Saitual khuaah pawh mi zahpuiawm lo pu Taia fate an ni a, an neinung-in mi hriat hlawh an ni a, pu Taia hi politics ruihchilh bur mai, pa ti deuh huau huau leh englai pawha ka sen reng khawpa kuhva ngaina tia hriat thin a ni.

Heng an hausakna te pawh hi an chapo pui ve thin hle a. A fate pawh hi an hawi deuh larh vek a ni.

Lalhmingliani khawsak dan leh nun zia chuan a ruk tein mi hip hret hret zel a, a mizia nungchang chu ka ngainat chi a ni tlat a ni.

Mahse le, sawi tak angin pu Taia fate zinga mi Freddy-a an tih khan Lalhmingliani chu a inti tatu hle niin sawi a awm ta tlat mai a.

Tin, an ni Freddy-a te unau thum pawh chu Lalhmingliani laka an khawsa zia te chena hai theih ni ta hek lo, tin veng khat an lo ni a, eng inlaichinna nge an lo neih tawh ang tih lah rin dan engmah ka nei hek lo.

Tumkhat chu kan chhun chawlh lai a ni a, kan classmate tho Muankima chu kan thutna lamah chuan hmanhmawh deuh hian a rawn lang a, "Saw, saw, an insual ringawt a nia," a rawn ti ta mai a. "Tute maw? kan lo ti ha ha hlawm a. "Rinsiama an sual rawn a nia," a han ti leh a. Hmanhmawh pheléngin keini chu chu lamah chuan kan tleh phei ta nghal vat a.

School compound thlang deuh, Khiang thing ding bula phul rai Hmun zawk chu a lo ni a, Rinsiama chu pu Taia fate pathum chuan an lo bawr laih laih reng a, piah maiah chuan Lalhmingliani ngei mai kha mangangin a lo khur ve hlawk hlawk mai bawk, hlau thlabar mangangin a tap zawih zawih mai bawk a ni.

Chutah le, kei ni chuan pu Taia fate chu kan han pawt hrang ta a, Zirtirtu-te hrilhah chuan kan han vau zui ta bawk a,

Chutah, chu mi lai chu remchangah chuhin Freddy-a chuan hnehsawh tih hriat reng reng hian Rinsiama chu a han kawk zui thuai thuai Mai a.

"Lalrinsiam! Hmingi hi lo kawm ve malek tawh suh, a bulah hian ka hmu leh che a nih chuan kut ka thlak nasa ang che, tun erawh i vanneih a Siam ni rawh se, hrereng poh nang Che." a han ti a. A awki chu hmuhsitna na hlir a ni a. Rinsiama erawh a nui mai a, engmah a sawi ve lem lova.

Lalhmingliani, Hmingtei tia kan hriat zui tak lam chu kan han en ta thap a, chuveleh Freddy-a khan Hmingtei chu a kutah hian a va mansak ta chawt Mai a, "Vawikhat mah he pa hi be tawh miah suh, A nih loh a hnu i pa ka hrilh ang a, nang chu a vuak hrep loh che a tâkah," a han ti zui leh bawrh bawrh mai a. Hmingtei chu a intih neitu hmel kher Mai a. A lan danah ngawt zawng a keipui sa hauh hlur ni berin a lang tlat a ni.

Chutah, Rinsiama chuan chet a thawh lawk a, School lam panin a kal ta daih a. Chu veleh, Hmingtei chu hlau mangang zet hian a tap ta a, a kuta inti neitu taka man rengtu Freddy-a chu han enin, "Min thlah rawh," tih leh a kut thin vak chu a rual a, hmanhmawh zet hian Rinsiama chhohna lam School pan chuan a tlan chho ve nghal chawn chawn a.

Keini thian za chuan middle school atang tawha school chhuanvawr ni zat zat thin Rinsiama chu kan han kawm hnai chimlim ve ta a. Hmingtei nen an karah e'nge âwm? Pu Taia fate kha i hlau lo a mi? kan han ti a, Rinsiama chu a ngawi mai mai a, a hmel zaidam tak leh pawisawi lo tak chu min hmuh tir tlat a ni.

Thil awmzia hriat tuma kan han chhimbu dawi viau chung pawha engmah min hrilh duh tak chuan loh avang chuan kan zawt lui zel duh ta bik lo.

Chumi hnu atang chuan Rinsiama chu ka kawm hnai ve ta zauh zauh reng a, veng hran mah ni se an chenna In- ngeiah te chuan va chuangkai ve ta foin, tin Hmingtei chungchang kha ka ngaihven tel tlat bawk si a.

Mahse, ka thian Rinsiama chu engmah sawi pui chi a ni hauh lo, engmah min hrilh tha duh ngai tlat lo a ni. Tin, Hmingtei hmel kha ka zawng ru nasa thin hle reng a, mahse khaw laiah a hmel hmuh tur a awm ve ngai hauh lo a ni.

Football hi kan khel nasa a, tualchhung tournament leh zone intihsiakna angah te, School sport nikhua ilo te hian Kan kultai ve nasa thin a.

Tumkhat chu School thil ni lo, a veng/khua ang zawnga Tournament lo awm tur kaihhnawih-ah chhim veng leh kan veng chuan friendly football match kan neih tum a ni a, hei hi hma lawka Rulchawm Zone Football Tournament lo awm tur atana kan inbuatsaihna inkhel a ni a, chumi tum chuan sport Minister a lo kal dawn nghe nghe a, veng tin chuan theihtawp chhuahin Kan hmanhlel tlang hle reng hlawm a.

Zirlai mai la ni mah ila infiamna ti thei pawl kan nih ve avângin veng hminga koh zinga tel phak hi ka ni ve tlat thin a.

Chutia, inkhel tura khelmual kan han luah takah chuan field ko chhak thutna awmna lama hmeichhe aw ri lochhuak chuan mi thawng dawt mai a. Ka han hawi chho chu Hmingtei ngei kha a lo ni a, hemi tum hi chuan a inthuam pangngai ve hle a, t-shirt var hain jean pawl hi a ha a, a va han mawi chiang tak!

A thiante chuan an veng tlangval ka thian khelmuala inkhel mek Rinsiama chu an lo ko chel chul reng hlawm a, a khat mawi tawk chuan ko chhak lamah chuan kei pawh chuan ka mit ka han len chho leh pek thin a.

Inkhel chawlh a han ni a, Hmingtei te lam bawk kha ka'n hàwi leh a, ka thil han hmuh chuan mi ti sa ta deuh phat nghe nghe a.

Pu Taia fa chapo zet zette kha an thiante ni ngei tur nen, Hmingtei-te thian za kiangah chuan an lo rak bengchhengin an lo ninhlei hle reng hlawm a.

Hmingtei chu a bik tak hian Freddy-a ngei mai khan a han pawt a han pawt leh thin a, Hmingtei chuan hreawm ti zet chuan a thiante chu a han bekbawr sar sar hlawm a.

Chu veleh, Freddy-a chuan Hmingtei chu a han kuah leh ang nawk nawk thin bawk a, a rak pah ham ham reng a, chutih lai chuan referee chuan inkhelh tan a hun thu a rawn sawi leh ta a.

Kar thar a han nih chuan a ngai bawkin School kan han lut veleh ta hlawm a. Chumi tum chuan ka thian Rinsiama hmel chu a rawn dik ta hauh lo mai a.

A chal ding lam chu a pawng deuh larh a, a duk deuh raih bawk.

Ka rin dan mai mai chuan kha tia an veng nen friendly match kan neih zawh hnua thil thleng kha a nih ka ring a ni.

Hmingtei leh ka thian Rinsiama-te hian eng inzawmna emaw tak nei niin ka ring tlat tawh a, tin pu Taia fate hian an awmdanah an thik hle tih thup rual a awm si lo a.

Ngati nge a? tiin a chal chu ka han kawk a. Rinsiama chuan ngawi rengin uluk zet chuan a Ngaihtuahna mi han kawmsan hmasa zet a.

Kei chuan, "In insual leh tawh a ni maw? Ka han ti leh ta a, chutah a hmai chu a thim nghal khap khap a, chutih lai chuan piah deuh gate pawn lam atang chuan Freddy-a khan a hma lama kal mek Hmingtei chu a lo au be phei awl awl reng mai bawk a.

"Hmingte, Hmingte, Lalhminglian! Chutah, Hmingtei chu a'n lehhawi a, Freddy-a chuan han pan hnai ruakin, "ka hrem Che hian i theng thawng a dek hran vak hran lo a ni maw," tiin Hmingtei chu a kutah a han vuan lawk a, a lamah chuan a han pawt hnai leh rawk mai a.

Lalhminglian! Rinsiama kha a rukin zawng reng reng suh." a han ti zui leh hrep mai a. Hmingtei chuan engtin mah a chhang lo.

Chutah, Hmingtei chu a hnungah chuan han nam zui leh dawrhin, "Kal rawh, lut vat rawh, Rinsiama lakah hian i mit i len a nih leh vaih zawngin ka hai lo tih hre Kar ang che." thih chhechham takzet hian a han ti zui leh hrep mai a.

"Eng inkar chiah nge maw an neih ve reng reng le? Ka han ti ta sap a. Rinsiama hmel chu ka'n en a, khaw dur tak ang khup thawpik hmel hi a pu roh lehnghal a.

"Thianpa, min hrilh teh khai, heng mite khaw eng han zah loh em em dan hi ka ngaithei vak hleinem. Hmingtei hi tu chiah nge a nih? Eng ang chhungkua nge an nih a? Freddy-a sawn a duh lo tih a hre ve reng awm tho si a," ka han ti a.

Rinsiama chu thuk tak atang hian a rawn rum chhuak ta hawk a. "Mike, menah tlak duh suh. Keiin ka ching fel vat dawn alawm," a ti mai a. Kei chuan, "Hmm, nang lah hian engmah mi hrilh tha duh a zeng pawh chu a ni silo," Ka han ti a.

Rinsiama chuan uluk zet hian, "Ka hrilh thei rih lo che, Mahse hei erawh, vawiin hian palh thut thilah ka kianga lo ding tur mi pakhat ka mamawh dawn a, nang hi ka tan i ding thei a ngem? mi han ti ta a.

Kei chuan, "Chu! Eng buaina nge ni leh ta! Hmingtei vang bawk em ni? Ka han ti a.

"Amah avang a ni lo. A ni hi puhmawh tur engmah a awm lo, a thiam loh a awm lo. Freddy-a khan insual puia mi cho hi ngaiah a neih deuh reuh a, Hmingtei'n min ngaina hi a hrethiam ru deuh roh a, a lawm lo a nih ber hi. Keiin ka duh emaw duh lo emaw mi kar luih tho a tum thu mi hrilh tlat a ni," a han ti a.

"Chhe hiau leh! Hmingtei nena in inkar thu hi mi hrilh that duh dawn phawt zawngin le! Ka ti ve ta vat a.

He Pa lalrinsiama nen hian pawl riat Kan nih lai atanga inpawl rual chho Kan ni a, tuna he thu, Hmingtei nen an kar chungchang ka han hre ve chauh hi thil mak tak a ni a. A ni nena kan inkawm hnaih ve tak hi a tulin Chung lam rorel dan te pawh a ni ngei ang.

Class neih lai chuan Hmingtei chu ka thlek zauh zauh reng a, sir lam atang chuan Freddy-a-te unau thum pawh khan uluk lutuk hian Hmingtei leh Rinsiama-te chu an lo melh dun ve kha kha reng bawk a.

Hmingtei chu a rilru ah hlauhthawnna e'nge maw tak nei ni hian a lang a, a thaw leh hawk thin a, hma lama thu Rinsiama chu a thlek vang vang reng thin a.

An han awmdan atang reng khan Rinsiama thu min hrilh kha ka ringhlel hauh lo.

Pu Taia fate chuan eng thil tenawm emaw tak chu phiar tum an nei a ni.

Chapter- 5

"Rinsiam! Rawn chhuk rawh! Mipa i ni na nge? Chu mihring kam chhe ri chu a kham thawkhat ang tih a hriat ngawih ngawih a, "Mike, chu i hria em? Min ko reng tawh a nih chu," Rinsiama chuan a han ti a.

Hmingtei chu ka han melh a, ka hmu ve hauh lo. "Khaw nge Hmingtei kha? ka han ti a, "Pi Puii dawrah a nia'ng chu," a ti a.

"Awle, a nih leh Freddy-a chu a fare-in i cho reng reng em? Ka han ti a. "Hmm! He thil hi ka ning a ni. Pawl kalsual ho kianga tâp ve tak reng mai hi ka kham a ni," Rinsiama chuan a han ti leh a.

Chumi tuma ka thian Rinsiama thu chhah chhuah chu thu mawi hnai a chhuah chhuah loh a tumkhatna a ni hial ang.

Kei chuan thlang lama ka thian Rinsiama au rengtu aw bengchheng reng chu ning zet hian, "Aw le, ti hian i ti ang. In fare turin ka ti che u nga, na lua awm lovin i khawih dawn nia," ka ti ta khawl a.

Muangchang chuan school thlanga phul hmunah chuan kan inzui thla ta a. Chutih lai chuan chhak deuh atang chuan Hmingtei khan hlauthawng mangang zet hian min lo thlir reng chu niin. Chu pawh chu pawi sa lovin thinrim inseh teuh chung chuan kan chhuk thla ta zel tho a.

Freddy-a-te unau thum chu rin ang ngeiin Khiang thing bulah chuan an lo thu thap a. Freddy-a chuan min rawn hmuh veleh, "I rawn chhuk ngam chai a ni maw? tiin kan lam chu a rawn pan nghal thar thar a.

Chuveleh kei chuan ka ban ka phar thut a. "Ngawi ru, Freddy tha deuhin sawi ang u, buai kher hi a tha lo a nia," ka'n ti ngawt pek a. Chutia han inhramkaih em chu ka tim leh roh si ni tur a ni.

Rinsiama chu a lo chek hlak a! Hlau lo lutuk mai hian Freddy-a chu a han en kal a. "Freddy, mi cho ngun em mai a, a fare-in ti ang aw? a han ti a.

Freddy-a chuan a chil a chhak nghal sawk a, "A fare i tia law? tiin Rinsiama chu a kawr awmah a han tham nghal ngawt pek a. Chu veleh, midang pawh chu an rawn tho nghal sang sang bawk a.

Kei chuan ka ban phar lehin, "Duhtawk r'u, Sir ka ko dawn a nia," tual dawih aw tuau chuan ka han ti leh a.

Chumi-te unau thum chu nui hak hakin, "A ve Che chuan, lo ngawi hmiah ringawt rawh mihring! Nge ni in rawn inphungbawm tumhrang ve deuh emaw ni? an han ti a. Chutih pah chuan kei tiamin min khawih tum chuan an rawn hnai zui ta mai a.

A fare-in awmzia nei ta hek lo. Chu veleh, rang lutuk hian Rinsiama chuan a âwma tham mektu Freddy-a chu a nakah a khup chuan a han do ta ngheng mai a, Freddy-a chu a thlep nghal chawih a, phulah chuan a let zui nghal ngal ngal mai a. Chu veleh, a unau dangte chuan Rinsiama chu an rawn bawh ve nghal thuai a.

Rinsiama chu an hnek rawn ta siah siah reng mai a. Mahse le, ka mit hmuh chu ka ringhlel hial a.

Rinsiama chuan thle tawn zawk zawk reng chung chuan amah beitu-te lamah chuan zam hauh lo hian a kuttum chu a thlawh ve thuai thuai reng mai a.

Hemi tum hian ka thianpa insual thiam zia leh thahrui neih zia hi ka mit ngeiin ka hmu ta a ni.

Pakhat zawk chu a ke lehlama han pet thuaiin pa khat dangin a rawn hnek mek chu a lo thlek sawn san vat a, buai map loa han inher rem nghalin kutthlak tum leh mektu chu amah zawk chuan a hmaiah tak chuan an duk leh siah mai a.

Pakhat rawn tho leh mek chu a ke vek chuan a darah han chhir leh burin pakhat leh chu a kawngah hian a han kuah a, chutah thlang lam awih-ah chuan a bin thal tawp mai a, rang lutuk maia han tho nghal vatin pakhat rawn tho leh mek chu rem lutuk mai hian a chalah a han hnek dak leh awrh mai a.

A bana han vai leh vakin a keah chuan a han kawkalh pah bawk a. Chiang lutuk mai hian chu pa chu leiah a thal veleh nghal hawl hawl mai bawk.

Kei chu siali khawmawiah ka lo takam chem bo din ve reng ringawt a.

Mei kawh meuha ka thian Rinsiama a han chet ve takah chuan a tu a mah chu hlauhawm thama che thei awm ta hek lo.

Rinsiama chuan Freddy-a chu han pan hnaiin a kawr awmah chuan a'n tham ve ta a, chutah a lamah chuan a'n phih hnai sawk mai a, aw khur hlawk hlawk chung hian, "Freddy! Hmingtei hian nga tan mah a ti niau nuau lo a che! Bansan tawh mai la i tan a tha tur a ni."

"Tin, tumkhat pawh nang ni unau hian zar buaiin ti nawmnah leh tawh suh ang che u. A theih chhung chu ka venghim tlat ang," aw hriam vawt raih chuan a han ti a.

Hmanhmawh takin School lam pan chuan kan tleh chho leh ta nghal vat a. Ka thianpa chu bathroom lamah ka hruai nghal thuai a, "I va che nalh kher em! ka han ti a. Rinsiama chu a thaw ve hawk hawk thei hial a ni.

Kei chuan, "I hmai-te kha phih thlan dai rawh, kan zirtu-ten an hre palh hlauh dah a nge," tiin ka rumol ken chuan a uniform bal lai lai chu ka han hruksak mawlh mawlh a.

Hemi tuk atang hian mak deuh maiin Hmingtei hmel chu a rawn hlim siah reng a, puana a inkhuh hlen thin pawh kha a ti ngai ta hauh lo.

Freddy-a-te unau thum erawh an ti duk tawh a, mi pakhat ve mai laka dawl zawra an han zawr ta chu an zak unau ve hle ni tur a ni. An hmel hmai duk deuh chur maite chu hmusit zet hian ka lo melh kawr zel a. Nuam ka ti phian mai.

Mahse le, kei, Hmingtei leh Rinsiama, keini thian thum chuan hlim ni hmel Kan hmu ve tan dawn chauh emaw tih lai chuan a zual za pui vai len hlo.

Ni hnih vel awrh chauh chu kan thian thum chuan kan inkawm khawm ve hman a ni a, a tuk leh atang chuan zirlai hmel thar pumraw lian ur mai, han en mai chuan insual tur reng a duan ni mai âwm hi a ni. A hming chu Stephen Ruatdika a ni tih a hnuah ka hre veleh a ni.

Rinsiama sawi dan chuan Stephen-a chu tu dang ni lovin kan thian nu Hmingtei u naupa a ni a, a kut hrawl zet mai te chuan keini ang mi chak lo deuh hi chu min han nawk vaih se zawng Kan tawp der a ni mai!

A hmai chu engti lai mai pawh hian a khem deuh reng niin an sawi a. A ni hmaa han ding zo reng tumah hi an la hmu lo. Insual hrat em em mai hi a lo ni a.

Hmingtei chu a tawt ru teuh a, he mihring hi a uanau thisen zawm ngei mah ni se, tunge a nih a hre chiang ber tu a ni ngei ang, chu chu a hmel landan leh awmdan atang te hian a Chiang a ni.

A hnua ka hriat leh danin Pu Taia fate chutia ngui leh tlawm taka an han awm ta leh hmel hmai duk chaka a pa-in a han hmuh takah chuan thil awmzia a han zawt ta ni ngei tur a ni.

Freddy-a-te unau thum chuan an lehkha zirnaah Hmingtei beisei-tu a awm thu leh insual thiam leh kutthlak na tak a nih thu te chu an han hrilh ta ngei ang a.

A leiko zawnga zualko Kher lah an thiam thil a ni si a, pu Taia thinur ta chuan Hmingtei unau pa Stephen-a, lehkha zir lam reng reng ngaihtuah lo insual ngawt ngaihtuah chu School-ah chuan rawn tir lut ta mai tihna a ni ngei ang.

Pu Taia hi politician a ni a, thil a lo ti thei a, an veng chang nilo Saitual khua-ah kher hian pa challang a lo ni si a, a ni han tih thinrim hi thil chakawm tak pakhat a ni lo ve reng reng a.

Tin, Hmingtei-te chhungkua hi pu Taia hian langsar takah pawh a thu hnuai tlat nghe nghe a, Hmingtei pa Pu Zamdailova hi contract te nau eng eng emaw te sihmuha thawh tir thinin a lo duhsak kum tin ve thin si a, a fapa Freddy-a'n Hmingtei a ta hauh em em chhan pawh hi a chiang ta a ni.

Pu Zamlova te chhungkua hi tun hma chuan chhungkaw vantlang ve mai an ni thin a ni awm a, fanu an han nei a, an fanu Hmingtei hi a han nulat leikan ek ek chhoh tak atang hian pu Taia duhsakna leh in thian thatna-te chu an dawng awl ta lo hi a lo ni.

Ka thianpa hnenah chuan ti hian ka han zawt a, "Pu Taia leh Hmingtei pa inthian that chhan chu Hmingtei vang hi a ni ngei a nga ti raw? Ka han tih zawm a.

Rinsiama pawh chu a insûm theihna-in a tlin ta bik lo ni ngei tur hi a ni a. Hun rei tak chhung a lo up beh tawh a chhungrila a pai, man tam tak tur thuruk tha tha chu min hrilh ve ta a.

Rinsiama Pov:

"Mike, pawl kal sual ka ti mai, hetiang ngaihdan nei pheng tlat ho hi engtia awm thei nge maw an nih le? Kei leh Hmingtei tan chuan hmelma ang chauh an ni ta a nih hi.

"I hriat ang khan Hmingtei-te chhungkua hi chhungkaw khawsak nuam tak zawng an ni ngai hauh lova, tin keini nena in thenawm Mai hi kan ni a,

Pu Zamlova hi a hma chuan Presbyterian kohhran mi leh sa a ni a, mahse mi phunglung chi leh ngaihdan hrang nei kawh bur mi hi a ni a, fa hi panga lai a nei tawh a, mipa hlir an ni. Mahse, an vanduai em em mai a, Hmingtei pian ve hma hian a fate pathum ngawt mai chu an thi vek mai a.

"Pu Zamlova chu a thinurin a lungni lo thin hle a, a vanduaina te avâng chuan Pathian hnenah a vuivai ve nasa thin hle a ni. Stephen-a hi a upa ber a ni a, a ni lah hi nu leh pate tana han innghahna tlak niin a lang si lo. Kohhranah-te hial chuan vui vai hla a nei chho ta reng mai a.

"A ngaihdan âtthlak tak takte chu kohhran nena in mihran phahna hial tur khawp chuan a punlun chho ta zel a ni.

"Amaherawh chu, hetih lai hian Bulldozer maicham hi chhim vengah hian an la lian hauh lo na, Pu Taia kher an khaipa ber a ni tlat si a. Pu Taia hi hriat angin a khawsa theiin a hmui ngil em em mai si a, politics khelh a lo thiam vei nen an kohhran mite tan malsawmna thlentu a ni ngawt mai si a ni.

"Pu Zamlova chu engtin tin emaw pu Taia pawlte chuan a rilru an thlem hmin ta a, tichuan Bulldozer maicham kohhranah hian an chhungin an in chhung lut ve ta rawih Mai a ni. Amah pu Zamlova sawi dan chuan hetih lai hian Pathian a zawng nasa em em mai a, a ngaihdan chuan Pathian hi pakhat chauh a awm a.

"Tichuan le, he pawlah hian a zawn Pathian pakhat chauh chu hmu niin a insawi a ni.

Chutah le, Mak tak maiin a kum leh chuan a ruka a awh em em thin fanu an hring chhawm zui leh ta mai a, Bulldozer maicham kohhran chu Pathian nungin a uap kohhran thianghlim ni ngeia a hriatna te chu a zual phah hle nghe nghe a ni.

A fanu chu a sen tet atangin a ar kho khuh nghal hmiah a, thlarau thianghlim fa hrin en tak te hian a en tlat a ni.

khuahkhirhna chi tin rengin a tuam vel a ni ngawt mai a. a han leikang deuh a, naupang lian ve tak a han nih chhoh takah chuan a fanu lo hmel duhtu an awm ta a, tu dang niloin pu Taia fa Freddy-a ngei hi a ni.

An mak khawpa heng ho hi naupang mai an nih lai atang hian ngaihzawng leh mipat hmeichhiat lam thleng hian an fing var hma em em mai a, tin, an chawma an hrai nia an hriat hi chu an keipui sa hauh hlur zel mai thin a ni, an inti tatu em em mai thin a ni. A ni Hmingtei lah a duhawmin a parmawi dawn chauh Mai si a.

Kei chuan, "Mahni ta-a thikthu pe chhe hle si hian midang ta-ah erawh an inti zau hawih leh viau si tia sawi ka hre tawh tlat a ni," ka lo ti ve bauh bawk a. Rinsiama chuan, "Ni ang chu. Biak In-ah te hian 'Amen, Amen' an ti tlawrh duah asin.

Kei chuan, "Hmm, heng pawl ram thlarau rui sual ho, heng kawng dik lo zawh ho hian an inti neitu viau a nih chuan Hmingtei nun chu nun kawlawk anchhedawng nun Mai zu ni dawn a! A va awhawm loh dawn rua em! Ka han ti a.

Rinsiama chuan, "Kum 5 lek kan nih atang hian Hmingtei nen hian a rukin kan inkawm thin asin.

"Hmingtei awm tleitu a hming chu nu Zomuani a ni a, nu Zomuani chuan thian kawm tur a rukin a zawnsak thin asin, a tete atanga a pa in a khuahkhirh nat em avâng hian thian pawh a kawm an phal ngai lo a ni.

"Mahse, inthenawm hnai mai Kan nih avangin nu Zomuani hian an In-ah te hian pu Zamlova te nupa awm loh laiin min ko phei thin a, min inkawm tir thin a ni.

Heti em ema hmingtei pu zamlova te nupa in an khuahkhirh hi sakhuanna kal dik lo nena inkaihhnawih thil vang niin mi tam tak chuan an ngai a ni.

"Hmm, chuan a nih Freddy-a ve thung kha, an inkawm ve ngai lo a mi?

"Kawm ngai meuh lo. A ni hi chu sawi tak angin Hmingtei a nulat chhoh deuh hnu atanga lo lang hi a ni zawk mah ang. Tisa takin a ni a ni hi zawng Tisa takin. Tin, tuna thil awmzia i han hmuha i han hriat atang te reng hian Freddy-a hi chuan a nawm a maka duh duh a chin kual hi a tum a ni a, a dik tak chuan nawmchenna ang chauhin a ni a en ni.

Kei chu ka thaw hawk a, "A lo nih tak chu a! A zia lo hle mai. Hmingtei nun hi mangchhia chauh a nih dawn hi," ka ti ta a.

Rinsiama chuan, "A ma fanu, a rila rah ngei pawh nun pangngai lova chhuah duh tu, heng avang hian pawi a la ti dawn khawp! A pathian biak dik lo avang hian Pathian tak tak hnen hi a la thleng khawp ang le," a ti leh a.

Kei chuan, "Hmm, a naupan chhung zawngin khuahkhirhna hnuaiah a tal tlei i ti a, tunah pu Taia lakah a fanu chu sum leh dinhmun thatna duh avangin a ti bawrhbang tihna a ni leh ber a, a fanu rilru tur leh zalenna chu a hmeh mih sak hmiah tihna a ni mai a," ka lo ti ve leh a.

Rinsiama chuan Hmingtei hian ka bulah a sawi thin a."Kei chu milem ang chauh ka ni. Engmah ka ti ve ngai lo, ka eia ka mu ka School a, ka inkhawm a chu zawng chu a ni. A ti a ni.

Ni e, School thlengin pu Taia fate lah hian an lo ti buai reng vei bawk nen, puan duma a inkhuh hlen thin te hi a awmzia i hrethiam tawh mai em?

"Nia, kei pawh hian chhia leh tha ka han hriat chhoh ve takah kha chuan Hmingtei nunah hian inrawlh hi ka tum tawh ngai bik lo, bansan kha ka duh thin takzet a ni.

"Tin, chu lo rengah pu Zamlova te nupa leh Stephen-a-te hriat loh va a ruk a rala inkawm thin tih takah rilru neih ran a tul a, a chhungte mit mei ven reng a tul a, a hahthlakin a hreawm tam mai mai, tin he pawl kal dik lo lak ata hi ka inthiar fihlim vat a tul ka ti a ni.

"Mahse le, Hmingtei chuan min lo thlahlel nasa hle tawh chu niin, chutia hmun danga insawn kan tum thu ka han hrilh ta chu a tap ta ngat ngat mai a ni.

"Tin, kan insawn kha a tul tlat si a, pu Taia leh pu Zamlova-te khan kan inkawm thin tih an hriat chuan kan chhungkua-a an thinur mai kha kan hlauh vang a ni pakhat bawk a.

"Ka pa hian Hmingtei-te In-ah lengin kan inkawm thin tih hi a hre har khawp a, a han hriat ve takah khan min khap ta nghal vat reng a ni.

"Tichuan, hun rei zawk a liam hnu Kan insawn chhuah daih tawh hnu chuan Hmingtei awm tleitu nu Zomuani kha kan In-ah a rawn lang hlawl mai a, keimah ngaia Hmingtei a tah reng thu te, kawm tur a neih tawh loh avanga hreawm a tih thin zia te chu min rawn hrilh a.

"Chutia Hmingtei rilru no chhuak ta chu kan mi suaksuala-te chuan an han ngaimawh em em khawp Mai lehnghal a ni awm a. Hmingtei tan engmah hrilh ngam ni ve hek lo. Engtin chiah nge an insawngbawl zui ka hre lo.

Tumkhat chu Hmingtei chu a inkhawm kal tur ka hmu fuh hlauh mai alawm. , a hmel ka han hmu kha ka thinur kher asin.

"Namen lovin a cher a, a thu thel a, a hmui a dang bel a, puan dumin a inkhuh hlen a, kha ta tang chiah khan puan dum a inkhuh hlen hi a ching chho ta a ni.

Kei chuan, "Hmm, rapthlak zawk hian! An chhungkua-ah chuan eng thil chiah nge thleng ta zel ang le? Freddy nen hian nupui pasalah han infawm ta pawh ni se, an rula raw neih deuh Mai Mai lekin a nia ka rin ni. Heng mite nun dan hi a tih awm tlat a ni. Mihring pangngai nun phung a ni lo, Hmingi pawh hi Ran ang chauhin a ni an en ni" Ka han ti veleh a.

Ni e, a dik chiah reng a, school naupang tam tak karah, hmeichhe duhawm tak pakhat chu a lansarh belhchhah Turin mipa naupang Pathum chuan an chhaih buai reng a, an ti nawmnah reng a, mipat hmeichhiat lam thlengin an thup silo a, midang nun nena khaikhin ralah chuan a danglam em reng a ni.

Mike Zochhuana pov:

Chutia kan lo titi tui lai tak chuan le, kawngkhar chu a rawn intheh hawng thut a. Mit meng sen em em mai hian Stephen-a kha a rawn lut ta chheu chheu mai a.

Chutah, a hnung-ah chuan Freddy-a-te unau thum kha an rawn lang zui ve zat bawk a. Eng khaw sawi lo chuan, "Rinsiam le, i ngam loh val kan lo hruai e. Dan ngaiin School compound thlang lamah bawk aw niang? an rawn ti nghal ngawt a. An faifuk pah vel ruai bawk a.

Chutah, Stephen-a chu lokal hnaiin rum mangkheng hian mi han melh a, a hmel bumro pui mai leh khem nuan mai chu a ngainatawm loh kher mai.

Kei chu zam zet hian ka meng kun lap lap a, chutah ka thian Rinsiama lam chu a'n melh veleh ngawt ngawt mai a, Rinsiama chuan zam miah lo hian a lo enlet ve kal thung a.

Chutah le! Stephen-a chuan rim lutuk mai hian, "Hmela leh! Ka lakah luhlul i chhuah ve ngam chai a ni maw? tiin a tho ta thut a, chutah thinrim thirchhe rum aw teng rút ri chuan, "Rawn chhuak rawh! tiin a kut chuan a'n hui pawp a, pawnah chuan a chhuak zui ta nghal a.

Freddy-a chuan ten hmel zeta Rinsiama chu han en kual velin, "Thui! I ngam dawn lo a nih tehreng chuan Hmingtei sawn eng hreawmna nge nang vang hian a tawrh ang tih i hrethiam chiah a nga maw? He mihring hnaisailova hian Hmingtei kutthlak Mai a harsat loh zia a hre ber zinga mi ka Nia sin," a han ti zui leh teuh mai a.

Chu veleh, Rinsiama chu a insûm hman bik lova, "Hmm, hman ni khan ka hrilh chiang viau si che u a, in la duhtawk lo a ni maw? Tiin a tho ve ta nghat mai a, Freddy chu en in thih ngam lu pu hmel meuh hi a han hmuh ve ta a. Chuveleh a hmun ngaiah insual tur bawk chuan kan inzui thla leh ta hlawk hlawk hlawm a.

Kei chu Stephen paliana avang chuan ka zam nasa em em mai a, "Rina, lawkin midang i pun mai teh ang," Ka han ti a, "Ni lo Mike, ka tih ngei a ngai. Chuti lo zawng Hmingtei chan tur hian mai an pawh a tluk kher lovang.

Chutah, han ding datin ngun tak chuan mi han en a, "Mike, ngaithla teh, Khang ka hrilh tak che let tam Tak kha a ni Hmingtei tawrhna hi," a han ti a.

Kei chuan, "Rina, pawisak engmah an nei dawn lo ka hria. Hmanrua emaw tal ken a tul a ni," zam zet chuan ka han ti leh a. "Mike, thil dangin a tibuai che a nih chuan min zui lo mai rawh, min ngaihtuah suh ang che," tih leh kal a rual ta nghal a.

Stephen-a leh Rinsiama chu an inhnek dun siah siah reng a, an kut chuan an inveng tawn reng bawk a, an inhnek leh thin bawk a, chuti reng reng chuan an inchhaih pah reng bawk a.

A thiam a zawngah chuan a tu zawk mah chu han filawr zawk an awm mai thei lo.

Mahse le, rin loh zawk Rinsiama tha chu a fei zawk ta tlat mai a. Stephen-a chu a chau titih ta der Mai a. A thaw lak dan atang reng chuan rei a daih hauh tawh lovang tih a hriat si a.

Chu veleh, Freddy-a-te unau thum kha an rawn che ta thut thung a, Rinsiama chu an han bawh rawn leh ta mai a, pakhatin a ban leh lamah man betin pakhat chuan a rem chang lai laiah kut a lo thla mawlh mawlh mai bawk a.

Freddy-a ve thung chuan a ban lehlam chu a lo vuan bet ve ngar ngar bawk a, kei pawh chu ka che ve ta thut a!

Rinsiama tih rawn tute lam ka pan mek tih chuan nghet em em mai hian Stephen-a khan kevawr thawh khawp hian ka kawr nghawngah a rawn tham chawt mai a, hei hi a khing khata mi tham ka tih kha A ni. A chau viau tawh emaw ka ti a, mahse a kut tha chu a la chak kher Mai.

Chutah chiang lutuk hian thlang lamah chuan mi han theh thla zui leh ta hawn hawn mai a.

A tha tawpa mi paih thla a ni bawk a, lung lo awmah chuan ka ngal char dinglam chu ka zu vaw chawrh mai pek a. Ei ah! A na lutuk! tiin ka te chhuak thawt a. Chutah le, an thawm hre phak vek hek i. Theihtawp chhuah chuan ka bawkvak chho leh nghal hram hram a.

Mahse le, hun rei a inrial hman lo na chungin mi pa li zet an ni bawk nen, ka thiana chu a hmai thisenin a bual vek khawp hian an lo khawih hman tlat tawh a ni. An kut ram tak han elh tliak tur khawp hian chakna chhete chauh pawh han awm se ka thian pa hian heti takin a tuar lo tur.

Freddy-a chuan Ka thianpa leia tlu sawp reng chu chil han chhak khum thawtin, chutah a nakah chuan ran thi sawng chhuih tak hian a'n chhuih zui leh nghek mai a. Chutah, hlauthawng zet hian an insaseng bo zui ta hlawm a.

Kei chuan theih tawp chhuah hian ka thianpa lam pan chuan ka bawkvak phei zel a.

Chutah, ka thianpa kiang ka va thlen chuan ka han sâwi a, chutih pah chuan ka aw rawl tawp hian, "Min pui ru! Min pui ru! A thi tep a nia! Tah hmuam aw ruai chuan ka ti chhuak ta rawng rawng a.

Chapter- 6

Ka thian Rinsiama chu nikhua hre lovin a awm si a, thisen a hlauh nasa si nen, hmanhmawh tak chuan damdawi In lam kan pan pui ta nghal a ni.

Chu thil thleng avang chuan kan School-ah chuan sawi sep sep a tam ta hle mai a, Hmingtei pawh chu a hma ang bawk khan puan dumin a inkhuh leh hlen reng tawh a, a kawng kal te reng chu hnuai lam a bih tlat a, a thian tumah a hnaiha awm hmuh tur an awm ve ngai lo a, amah zawk chu a intaltan leh zawk pawh a ni maithei.

He puandum hmanga a inkhuh hlen tawh hi chuan Kan hriat pui ve siloh a nun Kan hmuh theih chin leh lamin a phuar vang te pawh a ni ngei ang.

Kei chuan han biak lum lam ka tum a piang lah chuan Freddy-a te unau thum khan min rawn khap ziah mai lehnghal a.

Khatia kan zirtirtu ten thil awmzia an han chhui chiana keiin thil thlen dan ka han hrilhfiah tak bawk-ah khan Stephen-a chu School atanga hnawhchhuah a ni zui ta nghal a. Freddy-a te unau thum erawh a pa pu Taia a nih vangte pawh chu a ni maithei.

Tun thleng chuan School-ah an hmel an la lawn lan ve zat zat zel chu a ni si a, a ruk tak chuan ka thin ur thin hle a, ka thianpa tan rorelna dik thleng ngei se ka duh a, Mahse, engmah tih theih erawh ka nei silo.

Chu a chhapah Freddy-a te unau thum chu an inlulin a zual tulh tulh zawk tlat Mai a, pu Taia lah chu a khat mawi tawk hian kan School-ah chuan a rawn Chuang lut zut reng a, kan Principal room atanga a chhuak lai hi ka hmu ziah mai a ni.

'Hei hi a ni maw a chan hai zawk leh chhantu nei ve lote nun chu' tiin ka rilru a na thin hle a ni.

Chawlh kar khat dawn ka thian Rinsiama'n School chawlh a lak tak hnu chuan a chanchin duhawm lam hriat tur a awm ve ta a. Dam that lam a pan chhoh zel thu ka hre ve ta.

Tumkhat chu Holiday niin Rinsiama chu ka va tlawh a, ka beisei ai daihin a hmel hmuh a lo nuam tawh a.

Thu tam tak kan sawi dun a, ka rilru nat thute, ka thinurna te, hringnun hi fare lo ka tih thu te ka fah ve nasa hle a, a ni erawhin engmah a sawi zui duh lo, a ngawi reng mai a, mipa cool tak a nihna zia kha a paih phah chuang hauh lo a ni.

Chawhnu her a han nih chuan Chaw ei ve nghal tur chuan Pa Zoliana chuan min char ta tlat mai a. Kei pawh chuan lo hnar duh lem lovin ka nu ka phone a, chhim venga ka thiante In-ah chaw ka ei tur thu chu ka hrilh ta a.

Zan a han ni a, Pa Zoa bawk chuan riak ve nghal tur chuan mi han ti leh a. "Hei, i thian pa hi a dam chho tan chu a ni a, School pawh Kar lovah a rawn zawm veleh mai thei tawh dawn a. Zanin chu hetah riah pui ve mai rawh. A khua hi a har thin a, pafa chauh kan ni si a," bahlah deuh chuan a han ti a.

Kei chuan pa Zoa chu ka lainat hle a, banga chhungkaw thlalak intar chu han enin, "Ka ngai thin ngawt mai. Hun te hian a liam pui zel mai chu a ni si a," a han ti leh a, a nupui boral tawh chungchang a ni tih ka hrethiam mai a.

Thlalaka hmeichhia chu ka thian Rinsiama nen an in ang hle a, an mitmeng thuhnuairawlh tak te, an hmui pan fip thlar mai te, an khabe kual lang sar larh mai atang te.

Chumi zan chuan thianpa Rinsiama khawhar hnem nan chuan' tiin ka riak ve ta rawih Mai a. Thil tam tak kan sawi dun a, Hmingtei nen an inkawm thin thu atang bawk chuan han tan lehin Hmingtei chu a ngaiin a hmel hmuh a thlahlel ve hle thin tih ka hre thei a ni.

Zan dar kua a pel tih chuan information Mike atang chuan mitthi an neih thu an rawn puang ta thut mai a. Chuveleh, Rinsiama chu a han thuchhuak vut a, "Kal rawh le, in ha la khawhar In-ah chuan i kal ve ang" a ti ta mai a.

Kei chuan, "Rina, mitthi chu i hriat zawng a ni em? ka han ti a, "Aw hria e, veng sirah deuh sawn an awm, a kum a tam ve tawh a, thil âwm lo pawh ni suh," tiin kawr lum chu a ha mawlh mawlh a.

Room chhungah chuan pa Zoa chu rawn lutin, "Mama, i la nuamsam zan lo em mai, kal lo mah rawh. Keimah ka va lan chuan a tawk mai," a rawn ti a.

Mahse, Rinsiama chuan, "Nilo ka pa, chutin kal loh ngawt a tha lo. Thalai kan ni a, ka kal ngei a ngai," a ti ve tlat bawk a.

Khawhar In chu kan va chuangkai ve ta poh a. Thil tam tak ka hriain ka vengvat phah hle nghe nghe.

Thingpui lumna lamah-te chuan ka tâp ve hraih hraih zel a, ka thianpa Rinsiama chu an veng tlangval-te chuan an ngaisang ruin an chhuang ru ve hle tih an awm dan hawi her atang chuan ka hre thei mai a ni.

"Nia, a ni hi zawng a dam emaw damsam meuh lo pawh ni se khawhar In kal leh thlan laih, khawhar In riah nen a thulh khat khawp, lehkha zir lai zingah chuan a ni ang hi an vang teh asin.

"Infiamna lamte hi a ti thei a, kan veng tlangval chhuan filawr a la nih ngei hi ka beisei tlat asin" ka bula pa valai pakhat thu chuan a han ti a. Kei chu veng hran a mi a thian ka ni tih a hriat vanga chu thu han sawi pawh chu niin ka hre deuh a ni.

Ka thiana kiangah chuan ka thla a muang ve em em mai a, khawvar thleng rak chuan mitthi chu kan lumen ve ta a ni.

In-ah kan haw ta a, thlan lai tur chuan kan insiam veleh ta nghal a, hemi ni hi inrinni a ni.

ka thian Rinsiama chu ka ngaisang tawlh tawlh mai. Heti ang taka tlangval tlawmngai leh mizo nun ze mawi chhawm nung tlattu hi Mizo society hian a mamawh tak an ni reng a ni. Pu Taia fate erawh zan lamah khan an hmel ka hmu ve hauh lo mai a, tin, Hmingtei hmel pawh ka hmu chuang lo.

Thlan laihna-ah chuan kei chu tlangval leh pa ho chuan min infiam chhawk zauh zauh reng hlawm a, "Khawi nge, khual khua tlangval chu tlawmngaihah kan veng tlangvalte khan han el cho in awm reng em? Tiin an veng tlangvalte chu an han cho pawrh fiam vel a, kei chu khaw dang mi emaw min ti niin ka hria.

Kei pawh chuan nuam ka ti ve hle a, mahse kalphung mak deuh mai hi an nei pek a, ka la hmel hriat ngai âwm pawh ka hre hlei lo.

Thlan laih lai chuan tawngtai na (hun serh deuh roh ti Mai ila) hun kan nei thlap pek a, a ruk deuh chuan ka thian Rinsiama chu ka han kheuh ru a, a ni chuan an vengah hi chuan Bulldozer maicham kohhran mi leh sa an thih reng reng hian hetiang a hun hman hi a tul ta thin niin min lo hrilh a , YMA lam pawn an aw e liam sak Mai mai niin mi hrilh nghe nghe bawk a. Mak ka ti hle a ni.

Ka thian Rinsiama chu thlan lai chuan a lut ngun malh malh thin hle mai a, thing tuai han sah tul a awmin a hmahruaiah a tang zat zat a, val upate pawh chuan engkim maiah chuan a bul tantu-ah zel an ruat deuh tawp ni hmiang ka ti mai a ni.

Lei kan han chek tan dawn a, Rinsiama chuan hma a hruai a, leivung paih a hun a, Rinsiama bawk chuan hma a hruai zel a, thlan ko rual rem lo lai han chhun rem tul a awmin Rinsiama vek chuan hma a hruai a ni ber mai. Tlangval tu mah amah han hma khalh hman chu an awm meuh lo a ni.

Nakin deuhah chuan thlan laite in tur thingpui chu nula ho chuan min rawn hlui ta thliah thliah hlawm a. An zingah chuan Hmingtei pawh a tel ve nghe nghe a. Puan in a inkhuh tawh lova pangngai takin a inthuam a, a hmel nu zam mai leh a vun mawlh chu amah ti langsar tu tak a ni. Nula dang zawng zingah chuan ka mit a la nghal nalh mai a.

Pu Taia fate pawh kha thlan lai tura thlan feet thum dawn kan laih tawh hnu-a rawn lang ve chauh kha an ni a, thlan kotlangah an hram zawt zawt reng a, an ninhlei em em reng a, leivung te chu thlan chhungah an lo ti lut thul.

Val upate pawh khan an han khak leh deuh thin tak nã a, mahse an ni chuan engah a zeng an ngai duh a ni lem hlei lova.

Ka lo chhinchhiah khiau a, tum khat mah thlan khura an lut lai chu hmuh tur an awm eih lo a ni. A ruk tak chuan ka lo hmusit ru hle a ni.

Chutia nula ten thingpui min rawn hlui tak dan dan hlawmah chuan Freddy-a khan a changtupa ber emaw inti-in nula-te chu a lo chhaih vei leh zawrh zawrh pek hlawm a, a bikin Hmingtei chu a nakah-te a khawi khawi emaw laiah-te chuan a kheuh a kheuh thin a, a samah-te chuan a pawt a pawt a.

Rinsiama chu ka han en a, a lawm hauh lo tih ka hria. An ni Freddy-ate unau thum lah chu rawlthar hawk lak dang te nen an ninhlei em em reng mai si nen, ninawm ka lo ti ru kher mai.

Hmingtei chu a kuah ang thuak thuak thin a, tlangval lung fing chin deuh leh Val upa thenkhat-te erawh chuan Freddy-a chu nin hmel zet hian an lo melh ralh ralh hlawm a.

Chutia Hmingtei a pawh phar tak rengah chuan Hmingtei chuan a ning thlu ta ngang ni tur a ni. Thawklehkhatah Freddy-a sakhmelah tak mai chuan a khuang char ben ta chawrh mai a, Freddy chu a tum loh deuha a thlek tak sawk asin le. Ka lo ti rilru a.

chutih pah chuan, "I ninawm zozai takzet Freddy, zakthei si lo! Thing bawk si! A rim lutuk avanga tap lek lek chung chuan Hmingtei chuan a ti zui a.

Chuveleh, Freddy-a chu zah a hnekin a thinrim dawn dawn zawk ta mai a, "A chutia hmeichhia te te in kut mi han thlak vei le! tiin Hmingtei sam chu a han tham ta mai a. Hmingtei chu a te that a.

Chuveleh, Rinsiama chu a tho zawk a, Freddy-a kut chu hneh sawh zet hian a va phih sawk mai a, "Freddy, nungchang mawi hre ta che, hmeichhia-te i khin ngam a" a han ti a. Freddy-a chuan Rinsiama pawh chu kut thak hnawih tum chuan a tin titih leh ta mai a!

Chutah le, rawlthar hawk lak bengchheng nuai nuai reng pawh chu an ngawi ta thap a, Freddy-a leh Rinsiama inhmachhawn ran chu an thlek ta thap a.

Rinsiama chuan, "I ngam phawt chuan mi han khawih la, ka mihring hlauh loh ber i nih hi," a han ti ta khar khar mai a, Freddy-a chu a tim leh deuh si ni ngei tur a ni.

Chutah, val upa-te chuan, "Duhtawk ru, zakthlak lutuk mai, in zak lawm ni? Freddy, nang pawh awm mai mai rawh, Rina hi cho cho suh, i cho ziah ringawt mai," an lo ti ta a. Kei chuan Freddy-a unau dangte chu ka han en a, hnuai lam an lo bih ngât hlawm a, an lawm teh chiam lo tawp tih ka hre thei Mai a.

An han awmdan mai mai chu ka lo run kher mai a, "An va han ngengin an va han luhlul khanglang ve maw le! tia han hnek sawk hlawm chu ka lo chak hle a ni.

Nula-te pawh chu ngui deuh chung chuan an haw ve leh ta a, keini thlan laite pawh chuan Rinsiama leh Freddy-a chu han melh tawn ru ralh ralh reng chungin thlan chu kan laih chhunzawm veleh ta a.

Thlan kan lai zo a, In-ah haw-in kan han inthlak fel a, kan inbual fai a, chutah kei pawh chu kan In lamah ka haw ve leh ta a.

Thawhtan ni a nih chuan dan ngaiin School kan kal leh ta a, ka thian Rinsiama leh Hmingtei hmel pawh hmuh tur a awm ve leh ta. Kan pathum chuan kan inkawm khawm veleh thei ta.

Mahse, Freddy-ate unau bawk kha kan tana hnawk an ni leh thin. Mahse, Rinsiama hi Hmingtei veng himtu a ni a. Hmingtei ti thlabar thei thil leh ti mangang thei thil a piangah Hmingtei tan a ding zel tlat a. A luhlul dan chu ka ngaisang tlat tawh a, ka thian a ka siam thei hi ka lawm hle nghe nghe a ni.

Kar tawp kan han hmang zo a, a kar leh thawh tan ni a lo thlen chuan School kal turin ka insiam peih leh at tawh a. Mahse le, hemi ni atang hian Rinsiama leh Hmingtei-te hmel chu hmuh tur reng reng a awm ve ta hauh lo mai a.

Mi tu mah chuan school an rawn kal loh chhan hria an awm lova, Freddy-a te unau thum pawh chuan a ruk tak chuan Hmingtei chu an mitmei ru nasa hle tih ka hria.

Ni e, an zia a ni nitin ve reng reng a, eng lai mai pawha Hmingtei mit mei reng thin hi an ni hrim a. Mahse, sawi tak angin Hmingtei venghim tu dik tak zawk chu Rinsiama hi a ni tlat a. Heng zahna khaw hmu lo unau thumte lakah hian ven a tul zawk tlat a.

A tuk leh ni pawh chuan Rinsiama leh Hmingtei hmel hmuh tur chu a la awm ta chuang lova, Freddy-a te unau thum pawh chu an nun khua a nguiin tum dang angin an phar vâk lo hle a, kei chuan chu chu pawi ka lo ti lo nasa hle thung.

A tuk leh ni nilai ni leh ninga ni thleng chuan Rinsiama leh Hmingtei chanchin reng reng chu hriat tur a awm lo ta zui zel a.

Freddy-a te unau thum chu an nguiin an lungngai hle tih ka hria a, hemi atang erawh hi chuan eng thil emaw tak thleng a awm ang tih an awmdan zei atang khan a hriat theih ta hle a ni. Eng thil tak chu thleng maw?

Inrinni a han nih chuan ka thiana chanchin chu ka ngaihven zui ta a. Chu ta ka thu hriat chuan mi thawng viau na-in a ruk erawh chuan ka hlim hle si.

Rinsiama pa pa Zoliana chuan a fapa chu ninga ni atang tawh khan a tlanbo daih mai niin a sawi a, a pa hnenah engmah a hrilh lem hran lova, a thuamhnaw tlem a zawng kengin a pa pawisa ip a cheng singkhat awm chu a Kim lo bawk a.

Tichuan le, a tuk ni-ah chuan Hmingtei pa pu Zamlova chu hmanhmawh pheléng hian pu Zolianate in-ah chuan a rawn tleh thla ta a.

"Zolian, i fapa hi khawiah nge a awm? hlauthawng thinur tak chuan a rawn ti a, pa Zoliana chuan a hriat bik loh thu leh zan hmasa lam atanga In-a a awm tawh loh thu a lo hrilh a.

Pu Zamlova chuan, "Hmm, ka hrethiam ta mai e, Lalhmingliani nen an tlan bo a ni ngei ang" A ti ta a.

Ka thian Rinsiama chu ka call tluk tluk reng a, message ka thawn awl lo.

A hnu fe-ah ka message chu a rawn chhang ta chauh a, chu ta a thu min hrilh dan chuan Mualphenga an chhung-te hnenah an tlan bo thu min hrilh a, Hmingtei nen niin an inru ni ngei tur a ni.

Ka thu hriat chu mi tu mah hrilh leh lo tur leh a pa hnenah tak ngial pawha thlen lo tur chuan min chah ta a.

Hemi tum hian Hmingtei pa Pu Zamlova chu a thinur hle reng mai a, a fanu leh Rinsiama-te tlan bona chin hria apiang hnenah lawmman tha tawk tak pek a tiam thu te a sawi darh chiam mai a ni awm e.

Chhim veng pum deuh thaw chuan Rinsiama leh Hmingtei-te tlan dun thu chu kar lovah an hre ta hlawm a. Mi chuan mak an ti hle a, Hmingtei leh Rinsiama chu an tum hma nun leh eng inkungkaihna nge an lo neih tawh engmah an hriat ngai si loh thu te an sawi hlawm a.

Thenkhat thung chuan a ruka Hmingtei nun hreawm ru tak chu an hria ni ngei tur a ni. Chutia an veng tlangval chhuanawm pawl tak Rinsiama nen an tlan dun tih an han hria pawh chu kei tiamin pawi an tih hmel bik fahran lo kher mai a.

Pu Taia pawh chu a hmel chhe tak lan dan chu dam thlup reng tho mahse, a chhungril erawh a zakin pu Zamlova chungah chuan a thinur hle ang tih a hai theih si loh.

Pu Zamlova te In-ah chuan mi an bawr khawm lat lat reng thin a, keipawh hian chhim veng lamah hian Rinsiama pa mahni chauha awm ta chu a khawhar loh nan ka va tlawh ve fo thin reng a.

Pu Zoliana chu ti hian ka han zawt a, "Pa zo, Rinsiama khatia thi lek leka an nghaisa kha i lung hi damin ka ring hauh lo" ka han ti a.

Pa Zoa chuan, "Hmm, ka thih ni thlengin ka vawng reng tawh mahna. Mahse, tih theih kan nei silo a, pu Taia leh pu Zamlova khin chu kei ni tan tih rual a ni si lo a ni" A han ti a. A chhungril chu a na hle tih ka hmu thei a ni.

Chutah, pa Zoa bawk chuan, "Kan veng tan hi chuan an ni chhungkua hi chu Pathian te nau hi an ni ringawt mai a.

"Tin, an mahni kohhran bil Bulldozer maicham hi a chhawmdawl hi a ni ngawt bawk a, kohhran biak in tha leh changtlung tak an neih theih chhan te, tunah phei chuan hei an kohhran member pawh an pung ve zel a, hemi veng chhung ah na na na hi chuan an lalin mi pawimawh tak pawh an ni.

"Kan veng chauh nilo Bazar-ah khian dawr lian tawk tak an neih thu ka hre bawk a, chu mai nilo veng hrang hrangah In hmun lo ram an nei thleh thluah a, keini ang pafa rek chauha khawsa tan hi zawng a tera han ter phak chi ziazang an ni tlat lo a ni.

"Mahse, heng a mi len chhan tam takah hian a thawh rim vang leh a finna chu thuhran nise, Sawi darh chi phei zawng a ni miah lova, heng pata ram a ngah lutuk danah te reng hian thil felhlel lian tak erawh a awm a ni.

"Tin, hemi bial tu MLA nen hian an inhnim hnai hle bawk nen, thenkhat sawi dan phei chuan kan MLA pu Lianhluna hian pu Taia sum hi a ban buai ve fo mai' an ti tlat a ni. Heng campaign a neihna atan leh thil dang, ama mimal thilah hial pawh pu Taia sum hi a belbul ve fo thin niin an sawi tlat a ni.

"A dik tak chuan hetia a fate an han inluling thin viau pawh hi thil âwm lo chu a ni bik hauh lo alawm. Mahse, an nunah entawn tur a tam lem lova, tin khawtlâng tan mi tangkai leh chhiat tawh nikhua a tlangval tlawmngai tia sawi tur an ni lem lo.

"Heng veng chhung tana a thil tih that tam tak te, tin an kohhran tana a thawh hlawk zia te han thlir hi chuan pa ngaihsan awm tak zawng a ni e, kei ngei pawh hian pa ropui tak niin ka hria.

"Mahse, pawi ka tih em em chu kohhran rindan leh kalphung pangngai lo tak an nih thuah te, politics a ruihchilh dan tha lo tak te hi a ni.

"Inthlanpui leh MLA inthlan ah te, tin tualchhungah party hruaitu tur inthlan te, VC inthlan te, hengah Mai Mai pawh hian a mawi thlu lova a sum chet lâk hi a hreh reng reng lova, mi harsa zawk te hnena buhfai bag han sem mai hi chu a tih dan ve reng reng a ni a.

"Dik lo taka sum khawih ching pen tih thu vel hi chu he lai angah an ni tan zawng thil ho lam tak a ni tawh zawk hial ang chu?!

"A corrupt rukna hi lang silo hian a hriat theih tlat a, tin tunah keini chhungkua nen buaina kan han nei leh ta chu a ni a. Ka fapa leh pu Zamlova fanu hetia an han tlan bo ta mai pawh hi pu Taia helh ber tur a ni dawn chiang a ni" tiin pa Zoa chu a inbunruak ta teuh a.

Kei chuan, "Hmm, Hmingtei leh Rinsiama inkarah hi zawng, chutia Rina leh Hmingtei, an khaw loh vang thu niin a lang tlat lo miau a. A dik tak chuan he nula khawngaihthlak awm tak nunah hian Pathian chuan Rina hi a tir lut a ni zawk.

"A sen tet ata an fanu an enkawl chhoh dan, eng harsatna chiah nge Hmingtei hian a tawh Kan hre lo. tin pu Taia fate Hmingtei laka an han inluling lutuk te reng hi dik chauh chuan dan pawh hian a en liam mai mai loh tur thil niin ka hria. Rina leh hmingtei chu tluang takin awm se, Pathianin veng tlat se ka ti ngawt mai.

Pa Zoa chu rilru hah tih hriat tak hian a han thaw halh halh a, a chal chu a han dawm vang vang a.

"Ka hlauthawng ru tlat a ni. Pu Taia hian thil tha lo tak a ruk hian a ruahman mai duhin ka ring tlat a ni," a han ti a.

Kei chuan uluk tak chuan ka beng chu ka han chhi a, chutah pa Zoa darah chuan han vuanin, "Lungngai mah ta che Pathian a awm a lawm. Pathian chuan a la rul let ve em em ang" tiin ka han tawng thlamuan ve ta a.