STORYFB.COM

ZU DUHSANGA
By CVL.Awmpuii

Lungáwi lo zetin ka insawh tàu nghawng nghawng a, ka eirawngbàwlna thîrbêlte chu ka ti ri bur bur a. Ka thinrim luatah ṭawng pawh ka ṭawng chhuak thei lo. Ka pasal, ka lungàwi loh chhan ber Lalduhsanga lah chuan min lo zui kual ve sek lehnghal a.

"Ka tihpalh Ṭhiani..." a ti dút dút reng a, ka fian ken lâi hian chhut chawrh maite ka duh. "Min ngaidam rawh" a rawn ti leh a, ka thinrim luatah ka ṭah te hi a chhuak ṭûn tawh. "Naupangho sikul bâng an rawn haw ṭep tawh ang. Engtia lo hmachhawn nge i tum?" elsèn zet hian ka ti salh a, ngaihsak lêm lovin ka thiltih lâi ringawt chu ka tih chhunzawm leh zat a. Hrehawm tih hmêl zetin a rawn thaw chhuak ve hawk mai. "Ka tihpalh, min ngaidam rawh" a lo tih leh chuan "I tih luih anih kha, a mak zozai emai" ka lo ti ve zat a. Ka lungáwi mai dâwn lo tih a hrethiam a ni chêk ang chu reifê min melh vung vung hnù in room-ah min luhsan ta daih a. A awm lo chiah chu ka mittui a rawn hnai nghal kuar mai.

Kan inneih dâwn a ka chhûngte thusawi kha ka bengah a rawn ri nawn tlut tlut a. Zu in mî pasala neih a ṭhat loh zia min hrilh chàmchî anih kha! Mahse an thû zàwm duh lovin ka duhthlanna kha ka dah lian ta zawk a. Zu ngawlvei nupui ka ni ta mai chu a ni sia. Hrehawm ti a rùm vawng vawng châng hi ka va'n ngah tak! Ka chhûngte bulah ka zualko ngam lo va, mahse ka hrehawm tihna te hi an hmuh hmaih bikin ka ring lo. Engmah ka sawi ngai loh avang hian an haider lui ve ni berin ka hria.

Ka mittui rawn luang tùr chu duh lo zetin ka intipaukhauh lui sauh sauh a. A êng záwnga thlîr luih hrâm hrâm ka ngai a ni. Ka pasal hi ka hmangaih a, hmangaih taka nupa a insiam ta pawh kan ni rêng a. Zu hi duhin in nasa ve viau mah se pasal ṭha tak leh a fate tán chuan pa ṭha ber a ni lawi si. A ruih tak tak hi chuan ka haw viau ṭhin a, a rawn harhfîm a, min tih lungàwi dàn hi a hre leh mai zel a. Huat tak tak dâwn a huat hleih theih si loh, lungáwi famkim chuang si lo va min siamtu a ni. Zu a in apiangin a inthlahrung a, a ruih sual châng erawh chuan a thinchhe ve hlek ṭhin. Mahse vawikhat mah kut min thlâk ngai lo va, keimah zawk hian ka ngai theih loh êm avangin ka lo vìn leh bàwng bàwng ṭhin. Nupa ni ta fam chu inhauh leh thu inhmuhfuh loh châng kan nei ve fo a, mahse kan la inṭhen eih lo. Zu a in tih mai loh hi chu sawiselna tùr em em ka hrelo, ka ngaimawh ber erawh a zu in chu a ni miau si a le.

"Apa..." naupangho sikul bâng an rawn haw tih ka hriat rual chuan ka ṭhen sak a. Mahse an pà an hmuh dàn tùr chu ka lo huphurhpui lâwk lutuk. "Apa..." ring lènglàwnga an ti ri ka hriat leh rual chuan "Apa a awm, lo lût r'u" tiin ka lo chhàwn vat a. An sikul bâng te hi kawtkài an rawn thlen aṭangin thâwm an rawn nei ta ṭhin a. An pà a awm dâwn tih an hriat chuan kei min lo hmasa lovin an pà hming an lam hmasa ber ṭhin. Zu ngawlvei pà nei mah se an pà hi kei aiin an ngaina zawk ve teh tlat asin!

Inchhûng an rawn thleng chawpchilh a, an rawn ri lût nak nak mai. Kan chhangchhiat vànglâi pèl tawh mah ila fa pathum, inrual ṭhe ṭhaw han hrinchhuah meuh chu kan ri deuh laih laih reng mai a ni. Kan fa hmasa berah hian hmeichhia neiin a hmingah Lalpekhlui tiin kan sà a, Pekpek kan ti mai ṭhin. Mahse a pà chuan "Bawihpui" a ti kher zel a. Kum 12 lek la ni mah se a upa ber tih takah kan hmang ṭangkai thei ve viau tawh. A chhang chiah hi hmeichhia tho niin Lalremruati a ni a, Ruatruati tih chu mi tam zawk koh dàn ni mah se a pà chuan "Bawihte" tih ngatin a ko ṭhin. A û nen hian kum 2 lekin an inthlau a, kum 10 a ni ve mêk tihna anih chu! An inrual tâwk bawk a, ṭhian dang ngai lêm lovin an inkàwm thei ṭhin khawp mai. Kan fa tlum berah mipa neiin a hmingah Lalrohlua kan sà a, Ahlu tiin kan ko mai zêl a, a pà bawk hian "Duatpui" a ti kher zel a. Kan mipa neihchhun ni mah se a tê ber a nih vâng te pawh aniang a pangchang thiam viau mai a. A û te aiin a la nau ve deuh hlek a, kum 4 chauh a la ni a. Kumin aṭang khan sikul a kal ve ṭan a, lehkha zir peihlo chî a lo ni lehzel nen kan buai thei khawp mai.

"Khawnge Apa chu?" a uniform pawh a thlâk hmâ in Ahlua chu ka bulah a rawn kal nghal a. A mitmeng fiah zet te, a hnar ngul invuah fuh êm êm te, a hmui chhah tap te, mipa fa tih takah Ahlua hi chu a pà chiah chiah a ni mai. "Room-ah a awm, va inthlâk phawt la. A lo chhuak mai ang" ka lo ti vat a, a lo ner deuh nang a. Mahse thuawih tak chuan a va inthlâk veleh mai bawk a. Dik tak chuan a pà zurui an hmachhawn leh tùr hi ka rilru a na ngawih ngawih mai. Naupang mãwl tak an ni hlawm si lo, thil an hrethiam chak bawk si. A pà zu in ṭhin avang hian an rilru nat ve zia pawh ka hrechiang a, thup theih a ni bawk si lo. Zanah kan buai leh lovang tih pawh a sawi theih loh.

"Ka hraite chu an lo haw tawh a nimaw" room aṭanga a rawn chhuah lâi ka hrelo, ka hawi vat a. Naupangho chuan an lo bawh nghal chûk chûk a, ka lo îp chawih mai. Ka rin ang chiahin Pekpeki hmêl a dik lo nghal pang a. "Zu i in" lunghnûr zetin Ruatruati chuan a lo ti nghat a. An unau chuan an inlahrang nghal vat a, Ahlua erawh a tê ber tih takah a pà chu a inpawm tîr nghal thak a. A û te thusawi chu a ngaih pawimawh hmêl ve vak lo. Pekpeki leh Ruatruati an titau nghal a, U Duhsanga chuan an be lumlam viau tak nâ in an chhâng ṭha duh mang tlat lo. "Zu in tawh suh Apa" a malchunga ṭhu, Ahlua chuan a lo ti ṭha veleh a. Ka sawi rêng kha maw...a tê ber pawh hian thil a hrethiam ve lutuk asin. U Duhsanga chuan min en a, ka lo melh ve chiah bawk a. A inthiamlo hmêl ka hmuh chuan ka'n khawngaih leh ngawt pek a! Hmeichhia te hi kan va hahthlak tak!

Naupang rilru thianghlim tih takah zanriah kan ei dâwn chuan kan fate chu an lungáwi leh vek tawh. Chhûng inkháwm kan hman dâwn chuan U Duhsanga chu a tîm deuh tih ka hria. "Mut dâwnah hmang mai ila ṭha in ti em?" a tih lahin naupangte'n an duh si lo. Pekpeki'n ṭawngṭaina a hmang a, "Apa hian zu a nghei theih nan kan lo dîl che a..." a tih chuan ṭum dang ang bawkin ka thin hnûn a vit leh ngut ngut tawh. A pà zu in pual hian ṭawngṭai reng lo mah se hetia zu rim nama a lo hmachhawn châng hian an hrehawm tih a zual ṭhin a ni chêk ang chu an ṭawngṭaipui ziah ta ṭhin a. U Duhsanga pawh hian hrehawm a ti tih ka hre reng, mahse sim tik nî a awm thei chuang lo chu anih hi!

"Ṭhiani...vawiin kha chu ka tihpalh takzet, ka thiam lo tih ka hria. Min ngaidam rawh, min tauh khum tawh suh khawngaihin" ka hnunglam aṭangin min rawn kuah a. Tukverh aṭanga thlifîm rawn thaw heuh heuh chuan engtin emaw riau hian hahdamna min pe. "I harhna a rei tawh em?" ka lo ti daih thung a. Zanriah kan eikham aṭanga rei vak lovah khan a mu nghal daih a. Keiin naupang lehkha ka zirtir thung a. Kan in muttir felna pawh a rei leh deuh tawh. Kei erawh muhil mai thei lovin kan room tukverh bulah ka ding ta reng a, U Duhsanga lo harh lâi chu ka hre miah lo. A mu hnem tawh bawk a, tunah chuan a harhfîm kâk tawhin ka ring.

"Min ngaidam rawh" ka zawhna pawh min chhâng lo chuan a lo ti zawi leh sup a, ka tukhumah a hmuiin a rawn nawr vang vang bawk a. Min ti ṭap a, min ti lungáwi lo va, min ti thinrim a, mahse hetia inthiamlo taka a awm tawh hi chuan ka khawngaih leh tlat zel a. Ka hmangaihna hian engkim a hneh leh vek ṭhin ni berin ka hria. "Khawngaih takin zu hi in tawh suh. A dangah chuan sawiselna tùr che ka hrelo, mahse zu ber hi kan buaina a ni. Naupang hmalam hun tùr ngaihtuah la, zu ngawlvei fa an ni tùr hi i ngaingam bîk em ni? Hrehawm an tih ve zia pawh i hmuh hmaih lo vang, i fate nen hian min hmangaih takzet anih chuan zu hi nghei tawh rawh. A ni êm êm tawh lo" ka ti ta duah a. "Ka hmangaihna che u hi eng nen mah tehkhin ka phal lo" a lo ti churh a. Zu a nghei tùr thû hi ka thlamuan nan vawikhat tal pawh a la sawi ngai lo.

Amah en thei tùr chuan ka inher rem a, min lo melh ve chiah bawk a. "Hetia i awm reng dâwn chuan ka chhuak ang" ka ti hmiah. Thil ṭha ber a ni ang em chu ka hrelo, mahse hrem ve hlak a ngai niin ka hria. U Duhsanga chu a lo meng buai nak a,"Inṭhen thû i sawi em ni?" a phun sup a. Insehruh ṭeuh chungin "Umm..." ka lo ti leh hmiah. Inṭhen chu ka duh dàn a ni tak tak bîk miah lo, mahse kawng dik a zawh theih nana kawng awmchhun ni a ka hriat vang a ni. "Vawikhat mah inṭhen sawi tawh suh, kan inṭhen dâwn lo" a lo ti hmuk a. "Hetia i awm reng chuan kan la inṭhen mai ang" luhlul chhuahin ka lo ti lêt veleh nghat a. Min melh rûn rûn a, a mitmeng chu ka hrethiam lo.

"Zu ka in ṭhin tih hre reng chungin a ni lawm ni min neih? A hmaa buai hauh si lo tinge tunah chu chu kan buaina lian ber a lo nih tâk a? Pathian hmaa kan thutiam kha ka zu in ṭhin avangin kan ti tàwp ang maw? A teuhlo mai. Pathian thû aiin zu kan dah lian a ni dâwn asin" a lo ti mawlh mawlh a. A thusawi chu a dik reng, mahse a thu lâk dàn chu ka haw lutuk. "Pathian hming lam chung siin a duh loh zawngin i awm alawm. Chhûng inkháwm hman rengte pawh hi a sâwtna ka hrelo" beidawng zet hian ka lo ti nghat a. Ka sawi tum tak pawh a ni lo, mahse min dan chêp dàn a hre lutuk chu a rilru tihnat sak ka duh ni berin ka hria.

A sualna chu lo dahṭha ta ila, kohhran inkháwm a ngaih pawimawh chu thuhran, chhûng inkháwm hi a ngai pawimawh em em a. Kohhran leh khawtlângah a kûl a tâiin inhmang lo mah se a phâk ang tâwk hi chu a ti ve zel ṭhin. Mitthi in kal, lumen, thlàn laih tihte chenin pa tlâwmngâi tak a ni lawi si. A sual ang ang hian a fel tih chu ka sawi thiam dàn a ni. Zu a duh lutuk hi a pawi lâi ber chu a ni, Zu Duh-a an tih phah rêng bawk a. A nupui fanaute tán chuan a lawmawm miah lo.

"Ṭhiani...khatiang an sawi ngai lo. Inṭhen pawh kha sawi leh tawh ngai suh, Pathian hmaah kan intiam a, 'Thihna in min ṭhen hmâ zawng' tiin kan intiam anih kha! Thihna in min ṭhen hun a lo thlen hunah chuan kan la inṭhen ve mahna. Mahse chumi a lo thlen hmâ loh chu khatiang kha vawikhat pawh sawi tawh suh. Chhûng inkháwm pawh kan hmang zêl a, kan fate hian zu ngawlvei pà an nei a. Keimah anga rawn ṭhanglian ve tùrin ka duh lo. Chuvangin Pathian hriatna kawngah kaihruai zel ila, kei aia mi ṭha zawkah an rawn chhuak vek mai ang" a ti duah a. Hnial lêt ngaihna pawh ka hre tawh lo. A sawi dik vek zel si, amah ber hi dik lo chu a ni bawk si.

"Zu chu nghei ang che" ka ti leh hrâm a, "Ka hmangaih che" nui hawk chungin a lo ti ta daih a. Kan inngaihzawn laia a tih ṭhin dàn ang chiahin ka biangah min piai leh vak tawh. "Lalduhsang" ka ti nghal hlar a, "Lalduhawm, ka chhang chhang leh rual i nih kha aw..." uangthuang zet hian a lo ti veleh vat a. Ka duh lo chung min kuah lui a, a uan tâk rengah chuan ka nui veleh tawp tawh.

Zàn ka mengrei bawk nen zingah chuan thawh ka hai pek a. U Duhsanga mutna chu a lo ruak hiang tawh. Choka lama ri rak rak thâwm ka hriat tâkah chuan eirawng a lo bâwl tih hrilh ka ngai hran lo. Muangchânga tho chhuakin ka inphihfai tê tê a, choka a va pawh ta mai lo chuan a chetla vêl chu reifê ka thlîr phawt a. Pasal ṭha tak hi chu a ni mawle, a ṭhat lohna ngaihtuah zui ka tum rual chuan duh lovin ka lu ka thing vat a. Kan inkâr ṭhat lâi hi chuan engmah ngaihtuah buai lo teh ang.

"Min kai tho lo va" ka va pawh rual chuan ka ti vat a, ngainatawm zet hian min lo nuih suk a. "I mutui lâi ka tiharh duh teuhlo mai che, naupangho erawh i kaihthawh tùrah ka dah. Ka kaihthawh dâwn chuan i hriat kha..." tiin a nui zui hawk a, ka lo ṭhen ve sak a. A fate kaihthawh hi a hreh thei ngang ngang lutuk a, an mutui lâi a hmuh hian a lainat tlat zel anih chu! Ṭum khat chu kaihthawh a tum ve ngéi tawh a, a hlawhchham ṭhak. Naupangho lahin thawh an harsat si, "Apa ka la mu duh" pangchang deuh a an tih tawh chuan a kai tho zui thei ngai lo.

Sikul kal tùr an nih avangin ka kaitho zui ta nghal a. Tunlai naupang chu harhvang deuh deuh emaw kan tihte pawh hi zîng thawh hrelo tak tak an ni tlângpui tawh ti ila kan sawi sual lo vang. Mut an duh em em a, sikul kal tùra inkaihthawh pawh a harsa ṭalh ṭalh ṭhin khawp mai.

Naupangho sikula a va thlah hnù chuan hnathawk tùrin a insiam zui ve nghal a. U Duhsanga hi Mistiri a ni a, kan khúa ah chuan a thiam ber pâwl a ni ve a. Kumtluanin hna àwl pawh hi a nei mang ngai lo. Vawiin pawh Vengthar lamah Drawer siam tùr a nei a, a va kal veleh dâwn a ni. A kal dâwn chuan zu rawn in haw lo tùr in kan inchah ve lawm lawm a, a zawm ngei ka beisei.

Chhunah in ka tihfel lâiin ṭhenawmnu a rawn lêng a, U Duhsanga ang pasal a duh ve thû a rawn sawi mauh mai. A pasal a rawn rêl deuh chiam a, fiamthu deuh reuh a sawi anih avangin kan han nui ang bâwk bâwk a.

"In pà te chu a fel ngawt alawm le, a tlangvàl lâi paw'n KṬP hruaitu ni pha chin ngat kha ania. Tunah lah Tual Upa nih a hlat tawh àwm si lo" ka lo ti ve zauh a. Mahse U Rinnungi chuan "Chutiang a ni ringawt lo aw, han chènpui tak tak chuan a khirh teh ania. Thinchhe bawk si, a chîmlîm sia e, a fel mah mah a ni. A hneawm " a lo ti zek a. Za lo deuhin ka lo ṭhen sak ringawt a, sawi zui pui vak chî ni pawhin ka hrelo. "Zu Duh-a te chu, zu hi a duh ani mai a. A bakah chuan sawiselna tùr a awm pawh ka ring lo. Keini ngawt ai chuan in awhawm zawk. Naupangho lahin an ngaina si, kan pà te chu a fate paw'n an ṭih ania. An mamawh te hi an thlen ngam reng reng hlei nem. Ka bulah an sawi phawt a, keiman ka hrilh chauh zel" a lo ti leh duah a. Keini chhûngkua ve tehlul min lo awt anih chu! Keiin an chhûngkua anga chhûngkaw felfai ka lo awt ve thung a. Mihring nih chuan chan tâwka lungàwi mai hi a lo har ania nge.

Zànah chuan naupang lehkha ka zirtir leh a, engtik laiin nge U Duhsanga a lo chhuah hman ka hrelo. A rawn haw leh chuan rui zet hian a rawn haw a. Ṭum dang zawng aiin a in nasa emaw tih mai tùr a ni. Naupangho an lo muhil tawh hlauh zawk a, ka buaipui nghal sawk sawk a. A kawr hâk lâi phelh ka tum chu ka kut a lo bêng per nawlh a. "Min ṭhen i duh thû kha i sawi tiraw? Min ṭhen rawh, haw rawh" min ti khur khur a. A châng leh kan inngaihzawn lâi thil sawiin thinrimna tùr a zawng a. Hetia ruih sual hi a chîng tam lo viau a, mahse a sual a chhuah tak tak hi chuan zurui dang nen an danglamna a awm tam lo, kut min thlâk lo va chu zawng chu a ni mai.

"Khati khan i mu duh em ni?" a kawr hâk lâi bàl zet ka phelh tùr min lo dan zêl avang chuan ka ti ve ta nghat a. "Min ngaihtuah der vêl suh, min hmangaih lo. Kal rawh, min hawsan i châk êm kha haw rawh. Nang chu i fel a, KṬP nula fel kha i nia, zu ngawlvei mai mai pasal ah min nei a. Mite nuihzat i hlawh phah a, hrehawm i ti ngawt ang chu" a ti leh chhur chhur a. Hetia min ṭawngkhum vêl ṭhin hi ania ka huat em em chu, ka rilru a ti na hlê ṭhin bawk. "A hnù a i inchhir lehna tùr thil chu sawi tawh suh" thinrim insehruh ṭeuh chung hian ka lo ti ve nghat a. Tham lo tih hriat lutuk hian min rawn nuih a, "Rova i lo nei zawk lo kha chu i inchhir ngawt ang tiraw? Pastor nupui ni tùr kha zu ngawlvei nupui i ni ta mai si a" a ti leh chiah chu ka insûm zo tawh lo. A chhîp sam buk laiah chuan ka ṭham vak a, "Pangngai taka khawsak hi a har viau em ni?" naupang tih harh hlau tak, vìn ru zet chung chuan ka ti ṭhat a. Min nuih liam vêl mai mai.

Rova lah hi a sawi chhuak ve sek zel, ka nulat laia min hèl tute zîng ami a ni ve a. Kan inngaihzawn lâi thil daih a ni tawh. A ruih châng apianga min tàwng nan a hmang fo hi a khamawm takzet. Rova kha ka bialpa hlui lo ni sela chu ka hrethiam deuh ang a, mahse chutiang pawh a ni chuang bawk si lo. A zuruih hrîk thlâk nan a hmang ni berin ka hria.

"Nang chuan thi pawh ni ila pawi i ti tawp nang, misual lutuk, nupui sual lutuk i nih hi" min ti leh a, ka kâ ka vêng hman lo "Aw thi rawh" ka tih zawh rual chuan ka inchhir nghal vawng vawng mai. Mahse kei ang thova zu ngawlvei pasal nei vete chuan an hrethiam ang. Pasalte zurui in min han tàwng tak tak chu ṭawngkam mawi phuhchhuah hi har deuh mai asin. An zurui naràn pawh tih tawh naklaiin an han rui sual kher zel hi chu, an huatawm ngawih ngawih.

U Duhsanga chuan min rawn melh nghal khúi a, "Ka thi lo vang, zu ngawlvei nupui i ni reng dâwn" a rawn ti leh lawi a. Reifê min ṭawngkhum zui leh a, a ṭawngkam chhe tleuh nan min hmang ti tawp mai ang. Ka chhûngte'n mâkpa atana an duh loh zia te nen lam a rawn sawi chhuak a. Zanin chu a inchhir lehna tùr a sawi zing ta malh malh khawp mai. "Ngáwi tawh rawh, i inchhir palh ange" ka tih pawh chuan a ngáwi duh ṭhak lo. "Ka thih i duh chhan chu pasal dang neih a, kan fate tán pa ṭha tak zawn i duh vang tiraw? A thleng ngai lo vang" a rawn ti ṭha leh vêl a. A chah thlâk thlengin a phun zui bul bul a. A muhil fel ta maw tihah chuan puan ka sin ṭhat tîr a, khumah pawh mu ve duh lovin ṭhutthlengah ka mutsan ka daih a. Reifê ka ṭap leh a, engtik laiin nge ka lo muthilh pawh ka hrelo.

Zîng ka harh leh meuh chuan khumah ka lo mu fel leh diam tawh a. U Duhsanga chu a lo awm tawh lo va, sana ka en a, thawh ka hai leh tawh. Naupangho ngaihtuah chhuak thut in ka inperh tho vat a. An room-ah ka lût nghal a, mahse hmuh tùr reng reng an lo awm tawh lo. Choka ah ka phei a, dawhkàn a lehkha them leh chocolate lo awm chu ka hmu zui zat a.

"Naupangho sikulah ka thlah tawh a, keipawh hnathawk tùrin ka chhuak tawh. Eirawng ka bâwl sa vek a, i duh hun hunah i lo ei mai dâwn ania. Nizàn avang khan ka tihpalh, min ngaidam rawh" ka chhiar zawh rual chuan thinrimna in min rawn tuam leh tup tup tawh. Ka pawt thler a, a chocolate lo dah pawh chu a awm ang angin ka kalsan hmak. Ka haw lutuk, sim tik nî awm si lo va ngaihdam in dîl reng te hi ka kham zozai tawh.

Tlãiah chuan naupangho nen an rawn haw rual a, ka hauh a hlau ani chêk ang chu naupangho a rawn inthurualpui teh tlat ni. Ka eirawngbàwl lâi chuan min rawn melh hrek hrek a, min rawn pawh ngam chiah lo tih ka hria. Naupangho lehkha a zir pui a, ka hriat theih ngei turin fiamthu te pawh a thawh lui nasa. Mahse nizàn a awm dàn avang khan ka lungáwi mai mai tawh dâwn lo. Kan fate min biakna erawh ṭha takin ka chhâng zel a, naupang rilru thianghlim ngang an ni a. A pà nen kan buaina chu an hrethiam ve kher lo vang.

Zanriah kan ei lâi chuan buaina kan tâwk ta tlat mai! U Duhsanga chu a rawn uak ta vak vak mai a, a luak zui chu a ni deuh mai. Naupangho an rãk chèl chûl a, keipawh ka bâng bîk chuang lo. Ka chawei lâi chu thawhsanin U Duhsanga chu ka ban ta vat a, inthlahrung leh hrehawm tih hmêl lutuk hian min lo melh ve ṭawk ṭawk a. "Pekpek, i Pi leh Pu te han ko vat rawh" ka ti sawk sawk a. Pekpeki chu a tlàn chhuak zui nghal a, Ahlua lah a pà awm dàn teh thut avang chuan a lo ṭap nghal ṭuau a. A nau a ṭah vâng ni maw Ruatruati pawh a thlabar vek. Ka Nu leh Pa te chu kan kawmchhak maia awm an nih bâkah an rawn hmanhmawh hlê aniang an lo thleng har lo. Kan thâwm ah ṭhenawm khawvengte pawh an lo lût nghal a. Min rawn buaipui sawk sawk a. Ka pa remruatna in damdawiinah kan inphur phei ta nghal a. U Duhsanga chu a zàwi nguai mai. A awm dàn teh thut chuan min ti hrilhai lutuk a, hlauhthawn vak ngaihna pawh ka hre rih lo.

"Awmi..." a phun sup ri ka hriat rual chuan ka zuk kun hnai a, mahse engmah sawi zui lovin min lo melh ṭawk ṭawk a. A tuar tih chhel luih a tum ni berin ka hria. A pum a dawm avang chuan "A na em ni?" ka lo ti vat a, "Umm...tlemte in" a ṭawng chu zàwi hlê mah se ka hrechiang lutuk. A hmêl landan aṭang lah chuan tlemte mai ni lovin a na hlê tih hai theih a ni lo.

Damdawiin kan thleng a, nurse te'n min lo buaipui nghal sawk sawk a. An chîu a, reilotê ah a muhil zui ta bawrh bawrh a. A awm dàn kan han zawh chian nak chuan eng dang vang ni lovin a zu in a tuar lo a ni. A taksa chau zual tùr vèn nan drip an khai a, min admit nghal hmiah bawk. Kan intihfel zawh chuan ngaihtuahawm lutuk kan ni zui lo bawk nen naupang ngaihtuah tùr an awm si lo va ka Nu chuan min hawsan a. Ka pa erawh in "Ka lo awmpui ve rih ang che u" a ti tlat a. U Duhsanga rawn harh hma chu min awmpui ve ta reng a.

"Heti khawpa zu duh si, Pathian khawngaihna a chang a, a ṭha rei zawk ngawt asin" a ti duh lêk chauh a. Min lainat luatah "In lo innei kher kher hi chu a pawi a ni tiraw? Mipa ṭha deuh tawng tùr i nih vei nen" min ti leh hlawl ṭhin bawk a. U Duhsanga Nu leh Pa te hian fa ang tak takin min hmangaih ve tih ka hria a. Nupa kan inhauh nikhua paw'n ka thlavang an hauh tlat ṭhin. Ka tán tak pawh hmangaih loh an har a, U Duhsanga ka la chelh tlat chhan pawh hi anmahni vang ani pakhat.

Damdawiinah chuan karkhat dâwn kan awm a. Kan luh dànin a zir lo bawk nen U Duhsanga chu inthlahrun chikimin a inthlahrung ti tawp mai ang. Natna khumah mu mah se lungáwi ang takin ka awm duh chuang lo va. Ka ngaihsakna erawh ka lan tîr reng tho. Chhûngkhat laina, ṭhenawm khawvengte'n min rawn ngaihsak ve reng bawk a. A zuruih pui ṭhinte lah chuan an rawn ti ṭha thei em em khawp a. An rawn lang zing khawp mai. Zu in mi te pawh hi an lo inhmangaih tlâng khawp anih hi. Min hringtu ka Nu leh Pa te chuan an rawn kal châng apiangin an rawn zilh a, fiamthu a lo thawh khum zuk zuk ringawt zel a. Tihngaihna vak an hre bîk lo.

"Naktuk aṭang chuan hnathawk tùrin ka chhuak veleh tawh ang" muthmunah chuan a ti sup a. Damdawiin kan chhuahsan aṭangin ni thum a liam leh tawh a, zu a in rih lo bawk nen a dam chak khawp mai. "La hahchàwl rih rawh, i la damkawr si" ka tih chuan "Hna ka chawlhsan rei tawh si, pawisa a uiawm alawm. Krismas a hnai tawh a, in nufain in mawi lo bîk palh ang" a lo ti duah a. Min rawn kuah zui zat bawk a. "Zu hi in tawh suh aw" ka lo ti hak a, "Muhil tawh ang, naktuk aṭangin hna ka ṭan dâwn si" a lo ti daih. Ka thusawi a zawm leh dâwn lo tih a chiang reng mai.

Kan nun chu a pangngai angin a kal chho leh bek bek a. U Duhsanga pawh a dam fel ta maw tihah chuan a ngai tê bawkin a khawsa leh tawh. Mahse a hma ang em em kha chuan a in nasa tawh lo va, zu a ruih in min tàwng ngai tawh lo bawk. A hma zàna min ṭawngkhum hrep avang khan a inthlahrung tàwp thei lo va, ngaihdam min dil ãwl lo va, zu in pawh a sim duh chuang lo. A in tlêm ta deuh erawh a lawmawm ti tawp mai ang. A châng chuan a ṭhiante hi ka puh lo thei lo, an rawn sâwm chhuak leh ṭhin a. "I ṭhiante hi kàwm tawh suh" ka'n ti leh ringawt ṭhin a. "Ka duh a, ka in alawm. Ka ṭhiante'n min tulh lui ngai lo" tiin a lo ṭan ve hlur ṭhin bawk si. Tihngaihna tak pawh ka hre tawh lo.

Kan hma lawkah hunpui hmachhawn turin kan inbuatsaih mup mup a. Ka phûr rual rualin huphurh tak ka ni. Sum leh pai lam chu ka rilru hahna ber a ni lo va. Ruihhlo tam leh lutuk tùr hi ka huphurh lâwk a ni. Zu ngawlvei chhûngkua a awmte chuan an hrethiam ang. Khawvel chhandamtu lo pianna champhaphâk chu ruih nan, sual rawngbawl nan mi tam takin an hmang leh ang a. Min chhandam chhan theihnghilh ṭhak khawpa harhfîm lovin Krismas an hmachhawn leh dâwn ania. Pawi ta ber chu, chutiangin a tihbuai chhûngkua ah chuan kan tel veleh dâwn lai hi a ni!

Zirtàwpni a ni a, zingah khan min hringtu ka Nu in min lo phone a, "Chhangban ka lei a, naupang hovin an ei ve duh ang ka tia ka lo lei kêp che u a. I hman hunah lo lam rawh aw" a tih avangin naupangho sikul kal hlân chu remchângah la in ka va kal a. U Mawitei a lo awm ve teh mial a, kan han titi leh rih a. Kan pà chungchâng min zawh chuan ka sawi ve mai a. "Naupangtê hian i rawn hmeithai ve ang tih ka hlau " a rawn ti chhuak hlawl mai. Nikum lamah khan zu vangin a pasal a lo sûn tawh a. A tuar hlê nghe nghe, mahse Pathiana innghat tlat mi hi a ni a. Tunah chuan ziaawm tawh tak a ni, a rûkin a lo tuar viau thei bawk a.

U Mawitei bawk chuan "Pasal te'n zu an han duh ber tlat hi chu a manganthlak asin aw...mahse kan hmangaih miau si a. Hrethiam lo ho lah hian 'Ṭhen rawh' min ti thlazen a. An ngaih ang ngawt hi a ni si lo va maw. A tawng lo chuan an hrethiam ve tak tak lovang" a lo ti leh duah a. A sawi ang tak takin, a lo tawng ve tho tu ka ni bawk a, a thusawi chu ka hrethiam khawp mai. "A harhfîm rual hian a inchhir ziah a, mahse a sim thei chuang si lo" ka lo ti hul ve hak a. "Ka hrethiam lutuk che. Keini pawh kha kha kan buaina ziah alawm. Mahse ka tawn ang hi chu tuman tawng ve lo se ka duh. Chuloah in pà zuruih dàn te chu kan pà lakah kha chuan zia tak ani. Kutthlak zawngin a khawsa lo tal a, a zu in tih loh hi chu mipa ṭha tak a ni mawle. Keini paw'n kan ṭhen thei lo va, in pà te ang phei chu ṭhen a harsa dâwn êm asin" a lo ti leh duah a. Kan inkawm rei thawkhat bawk nen a khawharna te pawh min hrilh ve luam a. Ka lainat tak tak a ni.

Krismas chu kârkhat chiahin a dang ta, U Duhsanga pawh kan nufa awh záwng min leisak theih loh hlauvin hna a thawk nasa êm êm a. Chuta kara zu a lo in veleh zeuh ṭhin chu hauh pawh ka hau ngam tawh lo. A hma anga rui nasa a ni tawh ngai lo bawk a, ka palzam lui thei rih khawp mai. Naupangho pawh sikul an chàwl tawh a, mahse inah an awm tam lo. Kawmchhakah, inpuiah an lêng reng a. A Pi leh Pu te'n an duat bâkah inpui nghak, U Duhsanga nau te nupa hi an fel ve êm a. Fa an la nei lo bawk nen an fa ang tak hian min hmangaih pui a, an duhsak thei êm êm bawk. Keipawh ka lêng chho ve reng a, U Duhsanga hna bàn rualin kan inzui haw veleh mai zel.

Ṭum khat chu a hnathawk bâng a rawn rui haw leh vak a. Kan inhau leh ta, a hma ang chiah khan min tàwng leh nghek tawh a. Ka thinin a lo tuar ṭhin si lo, hawsan te nen lam ka rilruk hial a. Mahse kan thâwm hriain ka Nu leh Pa te an lo chhuk a. Min dan bâkah U Duhsanga chu an zilh hrep a, ka haw ta êm bîk lo. Naupangho thlabar mangang hmêl chu ka khawngaih bawk nen ṭap ṭeuh chungin ka awm veleh ta hram a. U Duhsanga bulah erawh chuan ka mu lo nasa, naupangho bulah ka mu daih a. Thinrim rilru na ṭeuh chung chuan ka muhil ve thei hrâm a ni.

A ngai tê tê in zîng khúa a lo vâr meuh chuan a inthiamlo leh hlê tawh. Ngaihdam min dîl chàmchî, "Sim chuang si lova ngaihdam in dîl fo hi awmzia a awm lo" ka ti ve ta nghat a. A ngáwi reng a, hnathawk tura a kal dâwn thleng pawh chuan ka be ṭha duh lo va. Ka buaipui duh miau loh avangin amahin a inbuaipui vek a. A kal ta maw tihah chuan naupangho nen kawmchhakah kan chho leh a, nizàn lama U Duhsanga awm dàn te kha kan sawi zui a. Ka pa pawh a lungawi lo ve khawp mai. Mahse han tih vak ngaihna erawh kan hre hlawm chuang lo.

Tlãiah chuan harhfim in a rawn haw a, ka be ṭha duh lo chung pawhin min be lui ngat ngat a. Zîng lam ai ngawt kha chuan kan boruak a ziaawm tawh. Naupanghovin an bawh reng a, eirawng ka bâwl laiin an lo infiam ṭe chèl chûl a. Chhûngkaw felfai tak ni bîk lo mah ila kan hlim ve ṭhin tho chuan ka hria.

"Min si suh" min rawn kuah tùr chu ka lo tawlh sawn hmak a, a lo nui hawk mai. "Thinrim tawh suh, ka tihpalh" tiin min rawn kuah lui leh ngat a. "A mak emai" beidawng zet hian ka ti ta thlawt a, "Min ngaidam rawh aw...i duh ang hian ka awm thei ṭhin si lo. Ka lo ti ṭhang tawh sia, sim ngawt hi a harsa ve a" a lo ti ve mawlh mawlh a. "Ka ṭawngkhum na ṭhin che tih pawh ka hria..." a rawn tih leh lai mêk chuan a ruih laia a ṭawngkam dengkhawng tak takte kha ka bengah an rawn ri nawn leh tlut tlut a. Ka tilui thei thlawt lo, "Aw i inthiamlo takzet anih chuan zanin chu min si lovin mu teh" ka ti ta thlawt a. Ka inlâkhran tâk tlatah chuan min tilui bîk lo. Min hmachhawn zawngin a rawn saisir a, min sik hlau tak chung siin a insiamrem a. Min thlakhlelh hmel zeta min melhna te chu ka haider lui hmiah.

Zîng ka harh chuan a lo tho leh daih tawh, a la hma viauin ka hre bawk si. Ka va tho chhuak ta tho a, tha tho zet hian choka ah a lo che surh surh a. Min rawn hmuh rual chuan ngainatawm zet hian min rawn nuih leh tawh. Ka lungawi tawh emaw a ti a ni chêk ang chu! "Thingpui in rawh aw" a tih chuan "Ka duhlo" ka lo ti hmak a. Fridge chu hawng in tui ka in ta zawk a. A ngei tùr tâwk lek hian thingpui chu keimahin ka insiam leh nghat a. Min en zui reng tih ka hria, mahse tihnat lêt ka châk ve tlat anih chu!

"Duhawm" thingpui ka in lâi chuan a rawn ti sup a, "Ṭhiani" tih hian min lo mai zel a. Mahse thil serious anih chuan ka hming pangngai hian min ko ṭhin. "Eng nge?" ka lo ti bak hlak a, mahse lungawi hmêl zet hian min lo thlîr vung vung a. "I sawi duh chu sawi ta che mawle" ka lo ti bak leh hlak a. Ka nulat lai kha chuan zaidam min ti ṭhin lutuk, mahse tun hnu hian ka hun tawn te'n a zir bawk aniang ka lungàwi loh chuan ṭek ve thei tak ka ni.

"Thinrim lovin ka thusawi tùr ngaithla phawt rawh" a lo ti hmuk a. A titau lêt zawk emaw tih mai tùr a ni. Mahse a hmêl thutak zet avang chuan ka pal lui ngam bîk lo. "Sawi la" dam deuh zawk hian ka ti ta a. A ngawih leh vung vung hnù ah "Zu nghei ka tum" a rawn ti chhuak hlawl mai. Ka bengchhe ri anih ringin "Maw!?" ka lo ti hu a, "Zu nghei ka tum, ka nghei ngei bawk ang" a tih leh takah chuan ka hriat sual mai ani lo tih ka nemnghet ngam chiah.

"I ti tak tak em?" beiseina sâng tak nena ka tih chuan ka kut a rawn chelh vat a. Ngainatawm zeta min nuih in "Nang leh ka fate vang hian zu ka nghei ang. Zu ngawlvei pasal i neih ka phal tawh lo, ka fate pawhin zu ngawlvei pà an neih ka phal tawhlo" a lo ti nghet charh a. A mitmeng aṭang chuan a ti mai mai lo tih ka hria. A thutak em em a, tumruhna ka hmu tel bawk. Ka lungáwi lo min thlêm nana sawi satliah a ni lo tih ka hria. Khang hun chhûng zawng khan hetiang thû hi vawikhat pawh a la chhak chhuak ngai lo. A tum tak tak anih chuan a ti hlawhtling ngeiin ka ring.

A hna kal tur chu hlim takin kan inthlah a, "Tlãiah ka lo bazar ang, i chawhmeh duh ber vawksa rêp kan hmeh dâwn ania " tiin min thlah a. Ka hlim lutuk chu ka khi ṭhaw reng mai. Kawmchhakah kan lêng chho lehnghal a, ka phùr luatah kan chhûngte lakah pawh ka zêp thei lo. Ka pa pawhin "Ekhai, Duhsanga'n chutiang rilru a pu anih chuan a nghei tak tak thei mai ang" a lo ti ve hluai a. Nghei a tumna rilru ringawt pawh chuan min ti làwm hlawm êm asin.

In ka la tihfel loh avangin ka haw leh vat a, naupangho erawh ka kalsan thung a. Keipawh ka intihfel zawhah ka lêng chho veleh tho ang. Chhuat ka nawh laiin phone call ka dawng a, ka number hriat ngai loh aṭangin a ni tlat. "Hello" ka tih rual chuan mangang zeta ṭawng thâwm ka hre nghal a. A thu rawn sawi avang chuan ka thâ a khûr nghal vek thei. "Awle awle kan lo kal nghal" ti sawk sawk in ka tlàn chhuak nghal a. Ka chhuat nawh lai pawh chu a awm ang angin ka kalsan tawp.

Inpuiah chhovin chanchin chu ka Nu leh Pa te ka hrilh ve nghal a, ka thlabar luatah thil awm dàn pawh ka sawifiah hlei thei lo. Mahse anni pawhin phone call an lo dawng ve chiah hi a lo nia. A rang rangin damdawiin lamah kan tlân phei ta nghal a. Naupangho pawh ka ngaihsak thei tawh lo. A hnathawhna ah U Duhsanga chu thi in a lo luak a, nikhaw hrelo in a lo awm zui mai hi a lo ni a. Damdawiina an hruai nghal a, a ngaihtuahawm viau a ni àwm e.

Damdawiin kan thlen chuan Doctor-in min lo be nghal a, Aizawl-ah a rang a ranga inphur chho turin min ti a. Engmah ka ngaihtuah thei lo, ka pa in engkim a buaipui vek a. U Duhsanga bâk ka rilruah a awm thei lo, min kalsan hlauhna in ka khat a. Ka thisen kal lai te hi an ding ṭhuap maiin ka hria. Ka thlabar tih piahlam a ni.

Synod Hospital, Durtlangah kan inphur chho a, kan indah fel meuh chuan khúa a thim fel dêr tawh. Damdawiin lût hlim hlawt e ti lo chuan ICU-ah kan lût nghal pang a. ICU chu kan hrethiam tlâng vekin ka ring. Ka zâm a, ka inti paukhauh lui thei lo. Ka ṭap pùr a, ka Nu pawh a ṭap tho. Inhnem tùr chuang bîk kan awm lo. A chhe ber thleng tùr anga ka ngaihtuah châng apiangin ka thâwk a pik a, ka thi thei mai dawnin ka hria.

A tûk aṭang chuan kan chanchin hriaiin kantu neuh neuh kan nei ve ta reng a. Min rawn ṭawng thlamuan liam liam tak na in U Duhsanga dinhmun chu a ngai reng a, ṭhat lam kan pan lo va, chhiat lam kan pan chuang bawk lo va. Kan ngai reng chu a ni deuh mai. Engtiklai paw'n hmu reng thei lo mah ila hmuh hun tùr an siam ang chhun chhun chu âm takin hun ka va hmang ṭhin a. Engmah hrelo a natna khuma kan hmangaihte an han mu bal mai chu a hrehawm tih hian a sawifiah zo lo.

A kutah chelh in ka phun sep sep reng a, ka ṭap reng bawk a. "Lo harh chhuak tawh la, i fate nen kan ngai tawh che" tih bâk ka sawi thei ṭhin lo. Nikhaw hrelo in awm mah se kan ṭawng a hre thei tlata ngaihna hi ka nei a. A hnù deuhah chuan ka be reng zel a. Ka hmangaih thû ka hrilh fo bawk. A châng leh ka hau a, "Insiamṭhat i tum a, hetia han awm tlat mai chu" tiin ka tàwng leh vak ṭhin a. A châng leh ka ṭawngṭai sak a, lo harh chhuak tawh se ka ti ngei mai.

Urláwk nî a ni a, ICU kan awm aṭangin ni li a liam ta! Kan dinhmun a la ngai reng a. Doctor sawi dàn chuan zu a in nasat avangin a pumpui a lo chhe em em tawh a. A thin a ṭhat loh bâkah a kal a ṭha lo va, a mît a lo liam bawk nen rawn harh chhuak leh pawh nise mi pangngai a pha tawh lo mai thei. Hmeichhe âwm nêm tán chuan intih paukhauh luih tum paw'n a harsa lutuk. Min hringtu ka Nu kuah chungin ka ṭap nghek a, ka chan tùr ka dâwn thui ngam lo.

Tlãi lamah chuan Doctor a rawn kal leh a, "Chhûngkua in ko khâwm ula, rilru dam takin thlah fel tawh mai ta che u. Kan tih theih phâk bâk a ni tawh a, a taksa ah hian eng damdawi mahin hna a thawk thei tawh lo. A hnuk la chah lohna hi mi nung a la nihna chu a nimai e" a tih chuan awmngaihna ka hre tawh lo. Engtik laiin nge naupangho in damdawiin chu an lo thlen ve pawh ka hrelo. Ka pa in a rawn hruai diah diah hlawm a. An pà hmu tùr chuan a va hruai lût a. Kei erawh ka rilru a hel rih tlat. U Duhsanga chu ka hmu duh rih lo, ka thin a rim a, mahni inkhawngaihna in ka khat a. Rawn harh chhuak ngat sela chu ka ànkhum nasa ngawt ang.

Ka pa chuan "Awmi, intipachang hram hram rawh. A tàwp nan Bawiha chu va hmu veleh rawh. A kal tùr chu va thlah liam rawh" Insûm ṭeuh chung chuan a rawn ti nghet charh a, ka dàr ah min rawn bêng thak thak bawk a. Ka thlah liam loha a kal tùr ka ngaihtuah rual chuan tirh nawn ngai lovin ka va lût ta nghal a. "U Duhsang...lo harh tawh rawh" ka ti leh hrâm a, a kutah ka chelh a, ka la thlah phal reng reng hlei nem. A nun siamṭhat a tum chho ve ṭan chauh a. Heti teh thut chu a rang lutuk a ni.

"Bawihte...rilru dam taka a kal theih nan thlah fel tawh mai rawh" ṭap khûr dar dar chungin ka Nu chuan ka dàr ah a rawn vuan a. A lo luh ve lâi reng reng ka hrelo. Harsa hlê mah se rilru ka siam fel a ngai tih ka hria. A kal dâwn tho tho anih chuan hrehawm deuha kal tir ka duh si lo, mahse ka thlah phal chuang bawk si lo. "Nu..." tiin ka Nu chu ka ṭah khum leh vak phawt a. Ka phal thlawt lo a ni e, mahse thlah a ngai si.

"U Duhsang...rilru dam deuhin kal rawh aw...kan fate chu ṭha deuhin ka lo enkawl ang" tiin rilru dam chuang si lo chuan ka thlah fel ta a. Ka thusawi chu keimah ngei pawhin ka pawm lo, mahse ka tih a ngai si a ni.

Thlahna thû ka sawifel hnù aṭanga rei vak lovah chuan a kal ta tak tak a. A tak ram kan han thleng ta tak tak chu ka kehchhe vek a ni ber. Awmngaihna ka hrelo a, ka awm dàn ber pawh ka hrelo. Nurse te chuan an rawn buaipui nghal a, ruang ti a an sawite chuan ka phal thei thlawt lo a ni e. Ka ṭap vak vak a, ka bul vela awmte chu tute nge an nih pawh ka hre hlawm lo. Mihring a chang tawh lo tih hre mah ila ka pawm thei lo va, tawrh dàn tâwk lah ka thiam hek lo.

Ambulance ri muai muai a kan chuan luh lai te chu mumang ang mai ni hian ka hria. Ka Nu leh Pa bakah ka ṭhiannu leh ka unaupa in min chuan pui tih chu ka hria, mahse in kan thlen lâi pawh ka hrelo. Ka ṭap rawng rawng a, Ambulance aṭanga kan chhuah hnù chuan ruang an rawn la chhuak veleh a. Ina an zâwn lût tùr ka hmu chiah chu ka harh kawk maiin ka hria. "U Duhsang...in kan thleng tawh ania harh rawh" tiin ka au a, min chhâng thei bawk si lo. Kan in chu an lo singsa fel vek a, kan nupa khuma an han zalh chiah chu ka tliak hnawk mai. A âwm ah chuan ka bawh a, ka ṭap a, tho turin ka ti a. Min chhâng si lo, nâ tih hian ka awm dàn chu a sawifiah zo lo a ni ber e.

Zankhua in ka mittui a hul thei lo va, ka taksa chu a chau pawhin ka hre chuanglo. Ka harhfîm ve tial tial a, ka rilru erawh a hah telh telh thung si. Kan fate pathum hmêl chu ka thlîr diat diat a, Pekpeki leh Ruatruati chu thil hrethiam rual an ni tawh a. A pà ruang chungah chuan an lo insût ve hraih hraih a. Ahlua ka thlîr leh a, a pà hmai a lo tuai ve reng a. Mahse ṭap hmêl erawh a pu ve chuang lo. Kan nufa zà awm dàn tùr chu ka ngaihtuah a, "U Duhsang...ka duh lo, lo tho rawh engtin nge kan nufa hian i tello in kan awm ang" tiin ka ṭap chhuak leh ta hawm hawm a. "A pawi emai Bawiha...chhûngkaw tihlimtu ber i nih kha mawle...i nupui fanau te ṭah tir i phal ngai loh kha" tiin ka Nu a lo ṭap ve bawk a.

Ṭhalai ho zâi ri te chuan ka ṭah an tichhuak zual a, kan lusùnna min rawn ṭawmpui a. Kan mangang lusùn min hnem tura rawn kal khâwm mi tlâwmngâi te chuan natna min thlen a. A tuar te chauh lo chuan an hrethiam lo vang.

U Duhsanga chu kan thlah fel ta! A lei taksa thlah mah ila ka thinlung hian engtikah mah a thlah ngai lo vang. Thlanmual aṭanga kan lêt hnù chuan mi ṭhahnem takin inah min lo la nghak a. U Mawitei ka va hmu chiah chu ka kehchhe vek. Thei leh thei lo hian ka va kuah a, ka ṭap leh nghal hawm hawm mai.

"U Mawite...engtin nge ka awm dâwn ka hrethiam lo" tiin ka ṭah khum a, min hnêm thei bîk a awm chuang lo. A hlauhthawn ang chiah kha kan nufa chungah a thleng miau si a ni. Min ṭah pui a, ka tawrh dàn tùr chu ani hian a hrethiam ber ang. Inchhungah chuan min kai lût in min hnêm mawlh mawlh a. "Hmalam hun engmah ngaihtuah suh, awm tawp rawh. I nun nunin nung tawp la, Pathian kutah innghat tawp rawh" a ti mawlh mawlh a. Tun dinhmunah chuan ka thlamuanpui ber rih tlat a ni.

U Duhsanga min kalsan aṭanga thla khat tal tap chu mumalin ka khawsa lo ti ila a dik ber ang. Châw ka ei thei lo va, ka fate tán takngial pawh ka inti pachang lui thei lo. A tel lova ka lo nêp zia ka hre thar a. Zu ngawlvei mai mah nise chhûngkaw pà, ka pasal ka innghahna a nih zia ka hre thar a. A hun tàwp dàn ka ngaihtuah lêt châng apiangin ka na thar ṭhin.

Kan zàn hun hnuhnung berah te khan min thlahlel takin min kuah a duh a, kei lah chuan ka lo hnar anih kha! Hetiang hi a thleng dâwn tih hre ngat ila chu khami zàn khan lo rui thle mai mai pawh nise ka kuah tlat ang a. Min thawhsan pawh ka phal lo tùr ania. Zu nghei turin rilru a siam fel tê tê a, a zu nghei dàn chu hetiang hi a nih ka ring hauh si lo. Zu a in tih mai loh kha chu sawiselna tur a awm lo asin mawle.

Kan vui liam nî a Pastor thusawi kha ka hre reng ṭhin, "Duhsanga hi pa ngainatawm tak a ni a. Kohhrana a kûl a taia inhmang tam tak ai pawhin a chhûngkaw tán chuan pa ṭha a ni. Mahse buan hneh loh a nei ve tlat a, kha khan a nun a pawt tàwi ta niin ka hria. A buan hneh loh kha han hneh ngat ta sela chu pa ṭha tàwp tùr a ni. Helai hmuna lo kal te ka fuih duhna che u pawh heihi a ni, kan ṭhatna tam tak kara kan chhiatna pakhat lekin kan nun a tichhe vek ṭhin hi a pawi. Tlang takin sawi ila, 'A zu in hi a nimai a' tiin Duhsanga chanchin hi a hre tute chuan in sawi ve vekin ka ring. Mahse kha a ṭhat lohna pakhat lek khan a nun a pawt tàwi a. Helai hmuna lo kal te hi chuan rilru i siam fel teh ang u" a ti anih kha.

A thusawi kha ka pawm thlap a, zu ka huatna a zual em em bawk. Kei chang ni lovin zu vanga hmeithai ta hi chhiar sèn pawh kan ni àwm lo e. Mihring chu ṭha famkim kan awm lo va, mahse mahni tâwka ṭha thei ang bera nun ve hi chu kan tih tùr a ni.

Zu vâng ni kher lo pawhin kan la thi dâwn tho tho a, mahse Mizoram-ah chuan zu hi kan nunna pawt tàwi tu pakhat a ni tih hi chu kan pawm a ngai, haider luih theih lah a ni hek lo. Zu in a nghawng, a tuar tu te bawk hian chu chu kan hrechiang a. Kei ngei pawh zu vangin naupangtê in ka hmeithai chho dâwn chu ania. Mahse Pathianin min enkawl ngeiin ka ring a, a kutah ka innghat tawp mai a ni.

Ka fate vangin ka inti chak lui hram hram a, hunpui lo thlen dâwn apiang erawh chuan ka rilru a na thar ziah dâwn tih ka hria. Kan nufa tán theihtawp a chhuah a, Krismas nî a kan mâwi loh kha a hlauh tehlul nen Krismas nî ah ngei chuan a ruang kan thlah liam ta kha ania.

Pathian rorel dàn hi ka hrethiam lo va, ka hrehawm luatah vawi tam ka tàwng ṭhin bawk. Mahse ka rilru a chiang ta em em chu U Duhsanga kha zu nghei tuma insiamṭhat a tum veleh a hnenah min lâk sak ta a. Mi ṭha tak a ni si a, a hnen thleng lo tùra a ui avangin a ṭhat lâi berin a la ta aniang tih chu ka rin dàn a ni. Chu chuan nitin ka inhnem ṭhin a. Chhûngkaw pà ber min lâk sak tu khian kan chhûngkua ah pa chan rawn chang a duh a, pa nei lo tán pa a nih zia a rawn lan tîr zel ka beisei a. Ka fate pawh a kutah ka kawl tir hmiah a. Naupangtê in hmeithai mah ila Pathian khian min ensan lovang tih ka hria.

A TÀWP TA.

(He thawnthu hi...Zu in a tih buai chhûngkua, chhel taka tuar tawh tute leh tuar mêkte, Zu vànga nupa ṭâng ṭhen te, Zu vànga hmangaih ber chân te tán bîk liau liau ka hlàn e. In harsatna te hriatthiam pui vek lo che u mah ila, Pathianin a hriatpui reng che u ania. Chhel takin aw)