DUHAISAM (DUHLAI ZRPA S2) BY MAWITEI BAWITLUNG (Completed)

[mawitei bawihtlung]

DUHAISAM (DUHLAI ZORINPUIA S2)



CHAPTER 1



“Ehem! Chhelo deuh ve” rawlthar higher zir lai ho bawk chuan kan college kal tur chu min lo chhaih leh peka. Nidangah chuan ka enliam mai ṭhin kha ania ka en liam thei ta tlat lo, an ni ai u fe lehnghâl hetianga min chhaih ziah hi ka duh hauh lo bawk.




“Aia u khatianga chhaih fo kha sim ang che u, nula pawh ni ila nangni ai kan upa tih hria ang che u. In lo tih leh vaih chuan ka ngawi tawh hauh lovang” ka tihchuan an ngawi ṭhapa “Naupang nghal lutuk, nula chhaih rual pawh in la nih loh kha” ka ti leh hrama.




Kei hi Zosangliani ka ni a, Zorinpuia leh Zohmingsangi te fanu upa ber ka ni bawk. Keima tâwkah ka induhtawk ve viaua, nimahsela chapo erawh ka ni ngai lo thung, hêng rawlthar ho erawh hi chuan ṭawng khum loh theihloh turin min nawr miaua, ka ngawi reng theilo animahna.




“Kan fiam duh mah che hi lâwm ta che, i mawng dep tehlul nên hmeichhe in duhtâwk lutuk, keini ai upa pawh nila hmeichhia i nih kha hmei.....chhia....” rawn ti tu chu ka ena. Nidangah chuan ka hmu ngai hauhlo, nge ni a ka en lutuk ṭhin loh avâng khân ka lo hmu ngai lo ni zâwk dawn ni.




A sam chu a buk hle a, a hmaifang chu a naupan ngaihtuahin a pa hrak lehnghâl. A ṭhiante lâk aṭang chuan a awm hrang deuha, duhdah zeta ṭhu hian keichu thatchhiat hmel zet hian min en bawka, a ṭhiante laka ka awmdân ang lo takin ka danglam. Min ti zâm lek lek mai.




Chutah inthing harhin “Ka mawng lam ka sawi lo, khatiangin vawikhat mah min lo chhaih tawh suh u, chutilo chu a pawi khawp ang. Naupang lehnghâl” ti leh hramin amah chu ka melh ngheka, a nui suk ringawt. Ka thusawi chu a ngaih pawimawh hmêl loh viau lehnghâl.




“Nula ṭhing tak i ni, thingtlâng mi i ni ngei ang maw? Ka ṭhiante'n an chhaih duh che kha lâwm zâwk tur i ni, keichuan en pawh ka en peih loh lai che in an ni chuan an en duh che hi inchhuang tur zâwk i ni asin” a tihchuan ka sa phat mai, hlauhna nei hauh lo chuan ka pan hnaia.




A hmaah tak chuan dâk vaha va dingin ka en chho ha a, min lo melh lêt ve ran bawk. “Ṭhing min ti maw? En teh naupang, aia upa zah dân lo zir tawh rawh aw, thingtlâng nula hian nang ang khawpui tlangvâl inla milian satliah hi enga tân mah ka ti bik lo che a nia, zaktheilo lutuk, i nu leh pa in nungchang mawi an zirtir ngai lo che em ni?” tiin ka ṭawng khum zui hlak hlaka.





Ka insûm theihna zawng zawng a tichhia a ni ber mai, thingtlâng mi chu nimah ila hetia hmusit taka min ṭawng khum ṭhin an awm hi ka duh hauhlo. Khawpuiah an awm avânga han ngaihsan chiamna tur ka hre biklo, tribal kephahhlai an ni ve tho tho a, in atam mai avânga eizawnna ṭhatna hmuna an awm avânga an han chapo chiam ṭhin hi ka ti thei ṭhak biklo.




Khawpuiah pawh hian a mâwl tâwk leka inla changkâng hi an lo la tam a nih hi.



Ka thusawi avâng chuan a rum nghata, rawn ding ngilin min chhuk bih ta rûn mai. Ka rin ai daiha a lo len khanglang chu le, mahsela hlau duh bik lo chuan ka melh lêt ngara “Nang hmeichhia zahna châng hrelo, mipa hlauhna châng pawh i hre nange ka khawih hrep zâwk dawn che emaw ni” tiin min melh ngura.




Ka ṭhiante chu rawn in rawlh vatin “Sangpui kal ang u, mipa an nihkha. Keini ai nau mahse hlauhna châng hre teh, kal mai ang u an lo tih leh tawh leh Police ah kan report tawh dâwn ania” an rawn tihchuan ka bula mi chu a nui haka.




“Police maw? Ka hlau hleinem, tûnlai hmeichhia hi in in lu ling ta mah mah, hmeichhe thlavang hauh anat tawh mai avanga FIR in han ti sek te hi sim rawh u, hmân aṭang tawhin mipa hnuaia kûn tur, hmei a kara chhia in nih hi, in duh chuan Police chu han pun ula mahse min man theilo anihchuan in chantur ngaihtuah hmasa ula” a tihchuan ka rap lek lek tawh.




A inchei dân a awm dân aṭang hian mi rethei zawk zawk chu a ni dâwn lo tih ka hria, tin, a ṭhiante ang mai maia vau zâm theih lah a ni dâwn lo tih pawh ka hre chiang viau.



“In lo ti leh a nihchuan kan ti tawh khawp ang, kan dikna a ni. Aia upa zahna châng pawh hrelo” ti a kal mai ka tum lai chuan min pawt lêt thutin bangah chuan min nem chilh rawka. Ka hmai bul chetah chuan rawn kûn hniamin chiang tak chuan min ena “I ṭawng tam ta mah mah, hmeichhia i nihna chu i hre hle mai maw? I hriat ang khân mipa ka ni tih hi hre bawk la, ka duh loh thleng thleng min nawr palh hlauh ange, kut ka thlâk hreh dâwn hauh lo che ania” tiin ka nghâwng chu na vak silo hian a rawn hmer chata.




Midang lah chuan min pui ngam tawh derlo, rum taka en bâk chu tih theih ka neilo. Chutah min thlah thutin a inhera, “Kal nal nal rawh u, hmeichhe ṭhing zet kutthlak duh tur khawp chuan ka nêp lo” tihluka min hnungchhawn zawnga a ding lai chu rum taka enin ka in hûm ruh sauh sauha.



Chutah a inrin loh lai chuan a kekawr chu pawtthla thutin ka ṭhiante chu ka tlanpui zuia, kan tlân liam hma a ka hawi lêt chuan a kekawr a pawt chho lai leh a ṭhiante'n an nuih vak vak chu ka hmu hman hrâm a.



Min rawn ûm zui ka ring kha a nia mahse min ûmzui lo hlauh, mipui an awm vâng te pawh animahna, kan din hnuah ka ṭhiante chuan min hau mawlh mawlha “I huai ṭhin lutuk, naupang mah nise kan hneh dâwn hauhlo ania, an lian hlawm ropui si. Mipa an nihkha hlau ve tawh ang che” Siampuiin a tihchuan ka ner saka.




“Awi a pa ka lo tih nên a boxer ah khân barbie lem a awm daih maw le” Marami chuan a rawn ti ve bawka, kan ṭhian li chuan kan nui vak vak mai. Keipawhin dik tak chuan a awmdân kha ka hlau ve tho, mahse a ṭawng duh dân kha ka ngei êma hmeichhe tiha mawilo khawpin ka che zui a nihkha, a chawh ve chiang emai.




“In la pa deuhin barbie a la lâwm a nih kha” ka ti ve chu ka ṭhiante chu mittui tla phungin an nuia “Mahse keichu hmelṭha ka ti e, min bem se chuan ka aw duh hial ang. A naupanna lam chu ka en teuhlo khatiang khawpa hmelṭha te chu keiai naupang pawh nise ka duh tho tho, tak takin tunlai naupang hi an hmêlṭha bik e, keini lah hi kan chul rup bika, ṭhang thar rawn chhelo sâwt lutuk hian kan hmêl pawh kan sit rum rum dâwn a lawm” Marami bawk chuan a rawn ti leha.





“Ilo inla upa ve deuh em ni? Nangpawh ṭhang thar tho i nihkha, insit na tur a awm lo emai, kal vat ang u College kan tlai dawn lutuk” tiin hma chu ka hruai zuia, khapa hmêl lah kha ka mitthla ah a châm reng lehnghal, ka huat lutuk avâng nge pawh ka hrelo, chutia ka mitthla a a châm tlat chu ka thinte hi a rim hlur mai.




Thingtlâng nula ṭhing min ti vela, ka ngaisang bik tawp silo a. Hmuh leh pawh ka duh tawh lo, khatiang mi chapo lutuk, naupang lehnghâl a hmêlṭha mahse a nungchang a vâng hrim hrim pawh khân a hmelchhia.




College kan thlenga kan ri leh nuaih nuaih tawh mai, “Sangpui kha hei ka lo ken che a” kan college mister chu rawn kalin chocolate min rawn pe a, SU a ni bawka duhtu pawh a ngah ve viau, mahse engvang nge mawni min duh thu min hrilh nulh a nihkha. Kei erawhin bialpa han nei turin ka la in dah chhin lo hrim hrim, bâkah ka nu leh pa hian mipa laka fimkhur tura min hrilh tam êm avâng hian hnaih tumna ka neilo.




Tûnlai ah phei chuan a hmei a pa hian rinawmna neilo, in sawi rinawm hi kan tam êm a, ngaihzâwng avânga rilru nat kha ka peihlo a ni ber mai. Hetia awma single mai mai hi nuam ka ti zâwk.



Lâksak loh chu a mawi lo bawk nên SU a lo nihna ah pawh ka zah ve bawk si avâng chuan ka lâk saka, ka ṭhiante lah chuan an aw an lo la thian vak vak zui. An over thei ania, nihpui rawh lah hi an ti ziaha, mahse ka duh miahloh nihpui kha ka theilo.




Min duh viau mahsela ka pawm theilo a ni ber, min duhna avâng erawh chuan ka lâwm a, mahse keichuan rilru ka pêk theih loh tur lakah a dera inzawmna siampui ka duhlo. A mah kha hlim mahsela a rei anga rilru ka neih theihloh miau chuan kha a hlimna kha rilru natna leh ka lakah beisei sâng si mahsela ka pêk theih miahloh tur duhna rilru in a chên chilh anga, chu chuan hmelma ah min siam thei tih hre reng chung chuan bul ṭanpui ka duhlo.





Ka ngaihzâwng tur chu rilru ka pêk theih tur ngei, keimahin ka ngaihpawimawh theih tur ni ngei sela ka duha, ka duh theih miahloh tur tih ka hriatsa ka nihpui khân keimah ngei pawh ka intichhe tel dawn tih ka hai bik hauh lo.




“Ka lâwm lutuk aw, mahse hetiang hi ti tawh lo la ka tân pawh anuam lo a, i thil neih ei sak che ka ang ka ti ṭhin a, chuvang chuan khawngaihin rawn ti duh tawh suh” ka ti sapa. A ngaihthlak hmêl vak chuang lo.



Ni lêng chuan college lamah ka awma, ka ṭhiante erawh an bialpa te nên lên an duh avângin min haw san mai tur in ka ti kha ania. Kei erawh ka nu leh pa in ka lakah beiseina an neihsan êm avângin an beiseina neih hi tih thlawn ka duh ngailo. Ka pa têt tê aṭanga min fuiha, kan unau leh ka nu tâna theih tâwp chhuaha hnathawk ṭhintu hi ka zah a ni.




Ka ṭhiante chuan pa sawrkar hna thawk hlir an neia, an nun pawh a nuam viau mai. Kei erawh thingtlâng a seilian niin ka pa pawh kuthnathawk mi mai a ni, mahsela ka zahpui ngai lova, rual awtin min siam ngai hek lo. Ka nu nên theihtâwp chhuaha an beihna hi keipawhin lo tih chhiatsak ka duh bik lo a ni ber mai.




Class 1 ka nih aṭangin pakhatna dinhmun ka luah chho ngar ngara, ka nu leh pa zâr ka tilo theilo.


Ka pi leh pu bulah ka awma, putea te pahnih pawhin min duat viau mai. Pute Remrema phei chuan nupui neiin an indang ve tawha, pute Bawiha leh pute Tlangpuia nên kan panga in kan awma, min duat bawk nên ka nu leh pa hmuh phâk loha awm pawh hrehawm ka ti em em lo.





Zânah chuan kan vêng dâwrah ka zân ei tur lei turin ka chhuaka, zan dangah pawh ka kal fo avângin ka hlau lêm lo. Dawra ei tur ka lei zo ka haw leh chu ka hmaah tak rawn ding an awm avâng chuan ka phone ka en lai chu dah in ka hawi chhuaka, chutah mipa sâng zet lo ding chu a hmêl ka hmuh chian theih loh avângin hlauthâwng deuh tak chuan ka en kara.




“Tunge i nih?” tiin ka aw khûr tur chu ka vêng hrâm hrâm a, mi thah hmang a ni angem tihte chu ka hlau riau lehnghâl. Tûn angah tualthah hmang an tam tawh si a ka hlau riau mai “Tunge ka nih a? Tukina a kekawr i pawhthlak sak kha ka nih hi” rawn tihmuk tu avâng chuan ka thaw deuh huai mai.




“Kalsawn rawh ka haw duh ania” ti a kal pelh mai ka tum chu min dang tlatin ka dar tawn tawnah chuan a rawn vuana, “Teuhlo mai phuba ka la dâwn” tiin ka kekawr chu rawn pawh a tum ta mai.



“Hey i mâwl ami? Enge i hriata, min pui ru min pawng” ka sawi zo hman lo ka kâ a rawn hupa, keilah insûm ka tum der lo. A samah chuan ka kehsak nghal ngawng ngawnga, a ni pawhin min kêk ve ta mai.




“Min thlah rawh hmêl a, min thlah nghal rawh” tiin ka au ṭhat ṭhat a, a sam a sei ve bawka ka kêk nghet ngei mai. “Hmeli min thlah rawh chuti lo chu ka hnek ang che” a tihlai chuan mipa thâwm a rawn awma, “Wow helai chu hei ks a nih hmêl, bawiha kalsan teh maw kan lo buaipui ve tawh ang chu. I khawih tumna a lo hnar ve animaw? Kan lo pui ang che” tih aw rawn chhuah rualin kan inthlah zawka.




Ka hlauthâwn ang ngeiin maw? Mipa pahnih lo ding reng ka hmuh chuan ka in seh ruh ṭeuh a,“Enga ks a? Ka ni aw zâwng lo, min rawn hnaih hauh suh u” ka tihlai chuan an nui hak haka. An awmdân aṭang chuan tlangvâl fel tak an nih hmêl loh khawp mai, hepa vâng vek hi a ni.




A hming ka hre der silo “Ks a nilo, kalsan rawh u” a rawn tih avâng chuan ka en haw a, tûnah khân min chhan tihna em ni? A mak zâwk a lawm le, mahse chutia a pui duhlo ringawt pawh chuan min ti thaw huai thei.




“Enga i sawia naupang? Kalsawn nghal rawh, aia upa zahna châng i va hrelo ve, kan khawih hrep che i duh loh chuan kalsawn nal nal rawh” tiin keichu min rawn khawih mai an tuma, a mah bawk chuan lo dangin a hnungah min din tira.




“Tikhan ka hliahah khân awm la, rawn hawi chhuak miah suh. I mit kha chhing rawh, thâwm bengchheng i chhuah chuan miin an rawn hria anga an ngai diklo ang che” a tihchuan a ngaihtuahna thui zia ka hre mai. Ni e a sawi ang tak tak hian hmeichhe khaw lo tak ah min ngai ang tih a hriat sa veka, hnial duh bik lo in ka mit ka chhinga, chuveleh thil ri sawk sawk ka hre zuia.




Ka mit pawh chhing ta lo chuan hlauthâwng zetin ka meng chhuaka, an khawih rawn a nih ringa kha râwlthar ka en chu amah zâwk chuan chu mite pahnih chu a lo hnek thlu dera, a kawr chu a lo siam ṭha mual mual chu niin.




Mak ka ti lutuk chuan engmah pawh sawi lo leh zâwt lo chuan ka en reng ringawt. “Hey nula senior nu khati khân ding reng lo khân min rawn zui rawh, vawikhat mah min ngam lutukin ṭawng tawh suh ang che. Midang ngam tawp silo” tiin ka mit zâwnah chuan a kut chu a rawn ti ri kerh kerh a.




Ka harh chhuak zawk mai, ka en chu a ni pawh a hmui vêl chu a lo thi ve ser sera, “Rawn kal rawh ka lo thlah ang che” tiin min kaisawna, nichinah khân ka sual thiam ang tâwkin min ti lêt ve mai mai tih ka hre chiah, tûna a mi khawih te ang khân min khawih ve sela chuan ka bui chêr chur dâwn a nih kha.




“Khawi i hmui kha ka lo hru ang” ti a ka rawmawl ka phawrh chu min lo dangin “I hnap hrukna te a ni ange ka duhlo” a rawn ti anihchu! He mihring chimawm leh sual zet hi engtin nge ka hmuh fuh zel ni.



“Hnap hruk nân ka hmang ngailo, dawh mai mai teh kha a thi a tam tawh ania” ka tih tâkah chuan in pakhat sumhmun thim laiah chuan a ṭhu a, keipawh chuan ka hnaih nghal vat bawk. Êngin a hmai a chhun avâng chuan a hmêl chiang takin ka hmu theia, a hmui mai nilo a mitbul pawh a lo vûng ve deuha.



Pahnih an ni miau a an khawih fuh loh chu ka ring lo hrim hrim, a hmui chu chhêm pahin ka hruksaka, a thi duh phian lehnghâl. A mah pawh en lo in a hmui ringawt chu ka ena, chutah ka hru zo ka hawi chhuakin min lo en reng tih ka hriat chuan ka hawisawn vata.



A naupan anga en a har riau mai, eng emaw ti taka mi siamna a neia. A mi uap a na ru riau lehnghal, ka thaw haka, “A zo kan in a hla tawh lova, a nih mangṭha phawt. Tin, vawikhat mah hmeichhia sual tawh suh ang che” ka tihchuan a nui haka “Min cho tawh miah suh, ka thil tih theih chu i hmuh kha. In inthleng ka thlah ang che, kha keimah avângin ks emaw an ti lehnghâl che a, i haw vat chu angai ang” tiin ka bulah chuan a rawn ding leha.




Ka hnial duh ta biklo, zânah chuan mahni a vah chhuah tam loh a him a nih hi. Mahse ka la vah chhuah leh tho chu ka ring, kan khua ah kha chuan hetiang a tlangvâl sual hi an awm ngai lo mawle. Thingtlang nawm ve na pakhat ani, zu rui an awm pawhin hmeichhia ti buai zawngin an awm ve ngai lova, mipa leh mipa in tibuai erawh an awm ve fo thung.




Kan in a hlat lêm loh avâng chuan step bul thleng chu inthlah tirin “Kan thleng tawh e, lêt tawh rawh” ka tihlai chuan kan in chu a en vung vunga, chutah nui sukin kan in bul chiah inah chuan a lût ta mai. Enge a awmzia “A nih muttui aw nula senior nu” a la rawn ti zuia, awi a va zak lo tak..




Miinah a lût ringawt nia, nge ni a keihian hepa hi ka lo hmu ngailo ni zâwk dawn ni?

ZAWMNA....



Ka room-ah chuan lûtin lehkha ka zir leh te te a, zanin ka thil tawn chu ka ngaihtuah neuh neuha. Khapa kha a hming takngial pawh ka la hrelo a, mahse min puihna avâng kha chuan ka lâwm viau thung.




Khatianga kan awm hnuah phei kha chuan min puih duh kha ka ring lo hrim hrim, chubâkah tihbuai chi a ni tawh in ka hrelo. Duh chu nise min thing phar hrep thei dâwn a nihkha.




Zîngah chuan hma zetah tho in ka room veranda-ah chuan chhuakin ka zi mar ar ara, hâm buai buai chunga ṭhenawmte in lam ka hawi chu kha pa bawk khân min lo nuih sawng a nihchu.



“Sakawr hâm i ang hle mai” a rawn ti zuia, rum zet chuan melhin “Nu Mapuii te inah i riak ringawt elo? I va han zak lo ve, ngatinge mi inah i riah ve ringawt?” ka tihlai chuan a nui suka.



Chutah in lam chu en leh kherin “Hei hi maw? Engah nge ka riah lo ang” tiin a rawn nui leh sâwng a. Chhut thlûk tawp mai ka duh tawh, ngam ngat ila chuan ka vawm phei awk tawh ang.



A ngawi mai dawn emaw ka tihlai chuan “Hei hi kan in ania ka pi” no hlek hluak chuan a rawn ti a. Ka meng phâwk nghal vak mai, kum nga vêl chu ka pite bulah hian ka awm tawha. Hepa hi ka hmu ngai hauh lo, chutia kan in a ti chu mak ka tilo theilo.



“Engtin a? Dâwt min hrilh miah suh, kum nga chhûng ka awm tawha. Ka hmu ngai lo che” ka tileh chu a nui leh vur vura, “Ram dangah ka awma ka pi, min hmu har viau ang” a rawn ti leh chu ka ngei ngei mai, engvanga ka pi pawh chu min ti sek nge maw a nih le?




Pitar ni turin ka hmêl leh ka kum pawhin ala phulo hrim hrim, “I pi rual ka nilo, nang naupang nghal zet kha” ka kuta kâwk chunga ka tihchuan a nui leh hawk hawka. Ka ngei lutuk, a hmêl leh a nungchang hrim hrim saw ka ngei fai vek.



“Naupang ka ni bik silo va, min ngai naupang bawk si a, inla upa deuh chu naupang chuan ka pi ka tihmai loh che in” a rawn ti leha.



“Nang” ti a seh chilh deuh naka kâwk chung chuan thil dang sawi duh lo chuan ka chhuah san ta daiha. Ka pi lo che mawlh mawlh chu puiin thingpui chu ka in leh phawta “Vawiin aṭang chuan i putea te inthlah tir tawh lo vin ṭhenawm tlangvâl a lo haw tawha, in college leh an sikul a inhnaih tho a, a nu ka be tawha in phur ṭhin ula a ṭha ang. Ngura pawhin a hnial ka ring lo” a tihchuan tu a sawina nge ka hre mailo.




“Tunge chu chu?” ka ti chu ka pi chuan hahthlâk tih hmêl tak hian min rawn en a “I pa Ruata te saw mawle, an fapa kha Goa lamah hun eng emaw tichhung a awm bo a, a lo haw tawha. Chu nên chuan ka tihna a nihchu, in lo inhmu hial tawh em?” a tihchuan ka harh chhuak zawka.




A nihchuan kha tlangvâl nghal zet kha Ngura maw? Ka nui haka, a hming chu a va hmanlai reuh tak, a châk lo mai mai ang chu. A hming ka hre tawh bawka khatianga min tih leh vaih chuan a nasa lo khawp ang.




“Hmu tawh tukinah khan ka hmu a, mahse ka hmu ngai siloa rûkru emaw ka ti ṭep a” ka tihchuan ka pi chu a nui hak haka. “A nu leh pa hian helama zirtir ai an duh zâwk aniang a têt tê aṭangin a awm bo a, i tân pawh hriat a har ve ang. Vanrongura ania Ngura an timai zel a, amahte saw a hmêlṭha a sin, a têt tê aṭangin lawm a hlawh teh ania, a fel hle bawka. Chuvang ania amah nên kalrual ula ka tih” a tihchuan ka thaw haka.




“Pi putea te chuan min thlah mai sela, chutia hmelhriat ṭha pawh nilo mipa lehnghâl in phurh tir te chu a” tiin ka phun niah niaha. Khapa nêna in phurh maw? Kan inhnial reng anga eng kan nih hi ka ring lo.




“I putea te an hnaah an buai si a, a remchâng a lawm. Bâkah a fel ka tihkha, nau angin en la a ni pawhin a duh lutuk ang, kan va kal nghe nghe ange an tho tawhin ka ring, rawng chu nangmahin lo bawl mai rawh” tihleh chhuah chu a rual zuia. Biak hman pawh a nilo, ka en reng ringawta.




Huiham! Ka pi hi chu a thu a duh bawk nên hnial rih lo phawt mai teh ang, kan insual tawh êm bik nâng. Mahse ka phur hlawl lo, naupang ṭawng thei lutuk bula chuan chu ka châk hlawl lo a ni ber mai.


Ka pi rawn lêt leh meuh chuan a tlai duai tawha, a va ṭawng leh vak a nih ka ring. A lên tawh hi chuan a ṭawng duh bawk nên a tum ang hunah hian a rawn lêt ngai lo rêng rêng.



“Ngura chuan a duh kha, vawiin aṭangin in kal rual anga haw lam erawh a ṭul leh taxi i rawn hmang thei tho a” chaw ei lai chuan a rawn ti a, enga? Chupa chuan a lo duh amaw?


“Eng maw i sawi nu? Bawihtei chu ṭhenawm tlangvâl i va biak sak em ni?” Pute Bawiha chuan a rawn ti a, ka pi chuan a biak thu vêl chu a sawia, putea te pawh chuan an hnial biklo. Kei erawh ka phur lo ngei mai, kan lo inhnial sa bawk nên han in phurh leh tur chu ka ṭhiante'n min lo hmuh phei chuan.....ka sawi thui peihlo zâwk.




Chaw eikham ah chuan ha te nawtin ka bag la chuan ka chhuak zuia, ka pi in min rawn zui ve bawk. Ṭhenawmte kawta bike bula lo ding ka hmuh chuan ka ner saka, a ni erawhin a phone a en mual mual thung.



“Kan hman e, Ngurte i hman hrâm chuan i u hi haw lamah pawh lo nghâk thei la a lâwmawm viau ang. Misual a tawn palhte hi kan hlau ṭhin bawk si a, in aṭangin College a hla deuh bawk nên” a ti nghal bawrh bawrha. Vanrongura chu a bu nghata, a chhâng lêm lo.




Chutah a phone chu dahin min rawn en zuia, “Lo chuang la” tiin a helmet khumin a tinung zui vut vuta, ka huphurh ru ngei mai. Muangchang chuan ṭhu kaiin ka pi chu ka vai zauha, fimkhur deuha tlân tur chuan alo ti ve char char thunga.





Chutah ka pi hmuh phaklohna kan thlen rual chuan a tlân vung thuta, ka kuah nghâl rawk rawk bawk “Hey tlân muang rawh, i hria em? Min accident pui i tum em ni tlân muang nghal rawh” tiin ka au phei rawng rawng a. Engah vak mah a ngailo tih a hriat.



Chutah kan college kawta a din rual chuan rang zetin ka chhuka. Ka ngei ngei mai, “Tlan muang rawh ka tihkha i hrelo em ni? Engvangin nge i tlân chak vak vaka, i mâwl em ni? Motor te rawn tlân tlang thut se kan chhe vek thei asin” tiin rum zet zet chuan ka ena.




Ngai pawimawh lo tih hriat tak hian min la tlânsan daih zuia. Chapo leh induhtawk tak chu ani ve in ka hria, a la chawh khawp ang mawle, naupang tête lehnghâl.