Nunhlui Duhawm

[Mali Pach]

Nunhlui Duhawm Bung-1
Ziaktu: Mali Pach

Kan khaw lam pan chuan kan kal zel a, kan khua ka lo tih ve ṭhin ah hian Kum 5 dâwn ka haw tawh lo a, chhan tam tak avang te, Nunhlui Duhawm tâk, hriatreng tawh tur mahse hriatreng atana duhawm mawlh silo Nunhlui tam tak awmna, kan khaw leilung chu ka rap leh ta.

Kan gate ah chuan ka nu leh pa leh unaute an lo ding ṭhap a, an lo nui var var hlawm a, ka nu phei chu a mittui a tling leh pam tawh!.

"E,Bawihte ka ngai tawh lutuk che," ka nu chuan min rawn kuah pah chuan hnuk ulh ṭeuh hian a rawn ti a.

"Kei deuh hian alawm ngai che u, in lo dam tlânga a lawmawm," ka lo ti ve sawk sawk.

Kan in chu a lo la ngai reng a ,thil danglam em em a lo la awm lo, kan unau zinga upa ber U Alawma pawhin nupui alo nei tawh a, a nupui neih pawh khan ka haw lo chu ania,U Asangtea pawh kumin kum laihawl ah khan a hna a lo nghet tawh a,U Cobtea pawh nupui a la nei lo , ani pawh kan khúa-a alo awm lai tak alo nia, ka nau kan naupang ber Tetea erawh MA a kal ve mêk , ani pawh Christmas chawlh hmanga a rawn zin lai tak ani a, kan chhungkua chu kan kim khawp mai. Ka vah te pahnih lah chuan min bawh deuh chial a, phone ah bâk kan in biak ngai loh avangin min la nel vak lo , an la zak deuh chuan ka kut an kheuh an kheuh a.

Chaw te kan ei zawh hnu chuan chhungkua in thingpui sen hang dawm pahin kan ṭhu khawm a.

"I hmel pawh ka hmuh tum ai daih che in ka hmù ṭha che a," U Cobtea'n a tih chuan,"Hmasawn ve zel ka tum tawh," nui seih chuan ka ti a,ka nui lui ani zawk mah.

"Ani pawh tunlai chu a dam ṭhat lai tak," ka u bawk chuan a ti leh a.

"Ka in peih veleh ka va hmu ve ang."

"Ni e, Bawihte Pathian hian kan tán a ṭha lo tur engmah a ruat ngai lo ania,chuvangin nangpawh hma lam i pan zel dawn ania," ka nu chuan a lo ti ve siam siam a.



Zanah chuan ka ṭhiante ho an rawn lêng sap sap a, thil ka hawn sak te chu ka pe hlawm a, an läwm thiam ve hlawm khawp mai.

"Mate, I kal leh dâwn em?" Mami'n a tih chuan,"Kal tawh lo ang,helamah ka awm tawh ang, ka dam fel tawh in ka hria," nui sang chuan ka ti a,ka ṭhiante hmel a min hlimpui zia lang chhuak chu ka hmù thei.

"Naktuk chu tlâng ah lêng ang u," Rini chuan a ti hlut a.

"Nia Sunday tlai a kan leng loh na chin pawh ka hre tawh lo," Nupuii chuan a lo ti ve zat a.


"Kan tleirawl chhuah a apple juice kan in ruk a kan chhungten min man chhuah vek te kha," ka lo tih chuan kan nui ho dar dar a.

"U Alawma hlauhawm theih zia kha, Matei kan sawm chhuah dâwn apianga min check ṭhin te kha," an tih leh chuan nui nasa tawh tâk kan ni.

Kan tleirawl chhuah khan keini ṭhian pali hi kan in zui nasa thei khawp a,kan chhungte hriat loh khan thil sual pawh kan ti ve nasa , apple juice kan in min man hnuah leh lek phei kha chuan U Alawma hi a strict thar em em a, chhuah pawh a phal meuh ṭhin lo anihkha.

"Mate I hmu duh em?" Nupuii'n a rawn tih chuan ka nui hmel chu a ral riai riai a.

"Ka la in peih lo in ka hria," nuih luih tum tâk a ka tih chuan , "A in zuah buk lutuk hman ni ah an in-ah buhfaiṭham ka khawn a, a nu khan thei a lo vêl sak a, min rawn en zuaih a mahse min hria ang pawn a awm lo" Nupuii bawk chuan a ti leh a.

"Ka in peih hun hun ah ka kal ang, tunah chuan a la harsa rih lutuk a," ka kuttin kheuh neuh neuh pah chuan ka ti sep sep a.

Thil dang te sawi in kan nui leh uar uar ṭhin, a chang leh kan hnim ruih a.He ka room chhung aṭanga nui thawm a chhuah loh na hi a rei tawh a,ka chhungte pawn mak an ti hial ang!.

Ka ṭhiante ho chu an lêng rei khawp mai, an haw meuh chuan Tetea bâk a lo meng tawh lo , ka thlah fel hnu chuan keipawh in chung lamah mu turin ka chho a, ka damdawi kum ruk chhung teh meuh thlah lo a ka ei ṭhin chu ka kheh leh mial mial a, mutna damdawi, depression nasa tak tuar te ho in an ei ṭhin ngei mai,MG sang tak ani.He damdawi tel lo chuan mut ka ngam lova, ka thil lo tawn tawh rapthlak tâk tâk ten ka rilru leh ngaihtuahna thlenga hmun thuk tak an la chan avangin ani.

Ka mu ka harh meuh chuan chhun dár 12 a lo ri tawh a ,ka chhungte ho chuan min kaitho hreh anih ka ring, ka hmai te phih a ka in tih fai hnu chuan in hnuaiah ka chhuk a, ka vah te ho tih loh chu an lo awm ṭhap.Inkhawm an bang chiah ani ngei ang an lo nalh hlawm khawp mai.

"E Mate I mutui em?" Ka nu chuan a lo ti nghal var a.

"Aw mutui lutuk e, khawnge Bawihtea te?" Ka tih chuan, "A u te ho nen i pi te in lamah an chho anihkha," ka pa chuan a lo ti zat a.

"I peih hunah chaw te saw va ei ngei ngei rawh," Ka nu in a tih chuan a bulah chuan zawi ngiai hian ka ṭhu thlà a.

"Tlai lamah tlangah kan leng dâwn aw," ham bai bai chunga ka tih chuan ,"E han lêng tâk rawh, ṭhian te kawm tam la. I theih veleh inkhawm pawh i inkhawm ngei ngei dâwn nia," ka pa chuan kuhva ṭhial thuam thuam pah chuan a lo ti ve bawk a,a tui hmel thei ania.

Khawvel ah hian mi vanduai ber emaw in tih chang ka ngah em em a, Pathian a awm lo tih chang lah ka ngah, harsat nâ ka tawrh zawh loh tur khawp a rit ka chunga a lo tlak chang te hian ṭawngṭai turin thu min rawn ṭhin, mahse ka hul tlat ṭhin!.Mahse tlai ngai lo Pathian ,a hun tâk a che ṭhin Pathian nung kan neih zia hi khuarkhurum thim ber a ka awm chang te, ka nat lutuk avanga mahni nunna hial lâk mai ka tum lai zawng zawng te khan ka hnenah a lo awm tlat ṭhin a, kei mi sual leh mi tling lo tâk hi a hun tâk ah min chhan chhuak leh ani.

Chhungkua hi a pawimawh ber ani ti ila ka sawi sual lo ang, chhungkaw ṭha tak min pe a, ka tlakchhiat lai ber pawh a ka tan a awm reng ṭhin chu ka chhungkua te hi an ni!.

Tlaiah chuan ka ṭhiante ho chuan min rawn sawm a, kan han in zui chhuak leh chu thlasik boruak fim leh vawt vâr nen, lung a leng veng veng thei alawm le!.

Tlangah chuan lêng an lo awm ve sap sap a,kan kal phei zel a, ni tla tur lang chiang theih nâ ,theihai kung hnuaiah chuan kan va ṭhu a.

"Hetianga kan ṭhianho kan awm khawm leh theih hi ka ring pha lo reng reng," Rini'n a rawn tih chuan ,"Pasal neih mai tum kan awm hnai tawh lo bawk a, kan awm khawm reng thei ang," Mami'n nui hak hak in a lo ti ve bawk a.

"Keichu pasal neih pawh ka peih lo, Dinsanga hian thawk khat lai khan sawi chhuah a ching a, kan in hnial hrep , a sawi ri ngam tawh lo hrim hrim," Rini bawk chuan a rawn ti leh a, kan nui bâwk bâwk a.Rini hi kan ṭhian zingah chuan bialpa nghet nei awm chhun ani a ,a bialpa Dinsanga nen hian kan tleirawl chhuah aṭanga in kawp ṭan kha an nia, an nghet phian a mahse a bialpa in inneih a sawi meuh chuan kan Rini pawh a lo nasa viau ani awm e.


"Dinsanga zia a zawi bawk si awi i han vin phar tur vel ka ngaihtuah hian ka khawngaih zawk" kan lo ti sap sap a.

"Mate , Zaninah inkhawm banah va kal ila?" An tih chuan ka riat nawi khawp mai."I inchhir ang e aw," Mami chuan a rawn ti khauh mai.

"Kan nat belh leh mai mai ka hlau a.." zawi sep a ka tih chuan, "Nat belh leh chuang tur pawh in awm tawh loh hi," Nupuii'n pawr hlar hian a rawn ti ve a

"Ka la in peih chiah lo a, ka in peih veleh min hmuh pui ngei ngei dâwn ania," ka tih leh chuan an pawm zawng ani vak lo a, min chhang mumal duh hlawm meuh lo.

Ni a liam a kar hial a vei leh hnu chuan Christmas pawh kan hnaih tawh hle a, hla phuahtu in, "Kumpuisul a lo vei chang hian lunglen a tho leh ṭhin," a tih zawng zawng hi ka nei a, kan tleirawl chhuah lai te,nunhlui duhawm tâk tâk te a rawn thar leh uar uar a, ani nen a hlim tak a kan awm lai te mitthla ah a lang a, zan ka mu thei lo chu in chung sang ah ka chho a railing vuan in van lam chu ka thlir vang vang a, ka ngai thar takzet!.

"Zan thim reh tak ngainat awm loh zet hnuai a ngaih reng che hi ka tih theih tawk chauh ani ta si maw, min lainat ve ṭhin ngawt in ka ring....", Ka ti chhuak sep a.....

Hun khan min hruai hrang a,kan hriat miah loin kawng dang min zawh tir a.Kan hlimna te,kan ṭahna te kha lehkhabu keu tawh ang maiin a phek kan thlep a,a tawp kan khar ta.Min kalsan tawh mahse a hmun ruak kha a zau em a,hnawh khat tur reng an awm thei lo.



"Zanin aṭangin Christmas programme kan ṭan tawh dâwn a, Matei leh Tetea te zai khawm te ,inkhawm te kha in ṭhulh lo hram hram dâwn ania," ka pa in chhung inkhawm a hman lai chuan a ti charh charh a.




"Tete, tlangveng ami Biakthansanga fapa te ho nen khan in la inkawm em?" Châw ei lai a U Alawma'n a tih chuan, "Kawm e.." Tetea chuan a lo ti fel et a.
"Kawm tam suh ang che, hman ni ah pawh no.4 ah an ringhlelh kha," U Alawma bawk chuan a ti leh a Tetea lo ner sawk chu ka va hmu nghal.

"A fiah na a awm loh kha," Tetea'n a tih chuan, " Fiahna a awm emaw awm lo emaw kawm tam suh kan tih chuan kawm tam lo mai rawh, naupang in nia in tan a ṭha tur hi chu kan hre zawk," vin deuh hluka a tih leh chuan Tetea lo âng hman zuai chu dawhkan hnuai aṭangin ka va kheuh a ,ani lah pék chu a lo er zawk a, chutah mitmei in ka lo khap nghal thuai a.

Kan upa ber U Alawma hi Sub Inspector ni in, amah hrim hrim hi a hlauhawm chi a lo ni bawk nen, a hna nen pawh a mizia hi a in hmeh viau ,a nau te ho lakah phei chuan a nelawm loh mai bakah ka nu leh pa ai pawh a in ti hlauhawm thiam ania, a nau te ho pawh hian kan hläu reng hlawm bawk .Kan unau hi 5 kan ni ka tih tawh kha U Alawma chhang chiah U Asangtea hi kan khua a sawrkar Department pakhat ah hna a thawk ve mek a, kan milai U Cobtea erawh BD a zir zawh hnu khan Pro Pastor ah a tling ve hlauh a chhim lamah a awm mêk a ,chawlh hmangin a rawn haw ve mêk ani.Kei hi ka hming chu Vansangluri ani a, kum 5 tal tap chu kan khua ah hian ka haw tawh lo hrim hrim ka tih tawh kha,BA ka zawh khan thla ruk vel mumbai ah ka awm a Air hostess ka training a,training chhung a rei loh avangin kan zawh hnu khan kan khua ah ka awm leh a school ah te ka han thawk ve a, MA zir zawm ka tum viau na in ,harsat na hrang hrang a awm avang leh keimah in a ka peih tak loh avangin MA chu ka kal ta lo kha ania.Air hostess tâk kha chu a hnu kum hnih hnu velah ka thawk chauh ani, ka kum pawh ka naupang zâwk zâwk tawh lem lo, kan naupang ber Tetea erawh MA a kal ve mek a,ani hi chu kan chhungkaw black sheep ve ania, a mizia pawh a dang ber awm e.

"Matei pawh nula te in la nia,awm dan mawi leh a awm tawk chu in hrethiam ve turah ka ngai," U Alawma'n a rawn tih leh chuan , "I thu ber emaw I ti ami? Khatiang a rorel zat zat i chak viau chuan in in sak lai khu sa zo vat vat rawh u," Tetea'n a ti pung pung a eng ang pawn hnuai lamah sik ru mah ila awmzia a awm lo chutah, "A nâ, min sik pilh vek tawh ang," ala ti hluk zui a, U Cobtea lo nui chhuak hawk ri in a zui nghal a, U Alawma chu a meng dur tawh khawp mai!.

Ka pa alo in rawlh vat a "Tete khatiang khan aia upa te an chhang ngai lo, Alawma pawh puitling an ni ve tawh a an tan a ṭha leh ṭha lo thliar thiam rual an ni tawh," ka pa chuan a ti charh charh a.Tetea'n U Alawma chalak thei ang ber a a melh leh hnuah chuan tumah kan ṭawng leh tawh lo.

Inkhawm tura kan chhuah meuh chuan dar a ri leh der tawh a, a hma a kan tih dan ṭhin angin kan in sawm khawm leh dial dial a.

"Doctor thar a rawn awm kha , Matei nen hian kan sawi rem dâwn ami?" Mami'n a tih chuan ka ṭhiante ho chu an han nui awr awr a ,"Ka peih teuh lo mai, ka nâ duh tawh lo ka naute.." tih lai tlar kha ka sâ pah deuh ngei bawk a, inkhawm kal tur ê ti lo chuan kan nui ring hlawm khawp mai.

Kan ṭhianho a biakin a kan han ṭhu tlar ṭhap an hmuh leh meuh chuan ṭhenkhat lo in hrilh ru tawk an awm a, ṭhenkhat hlim hmel deuh a min lo en an awm nawk hlawm bawk a, hetianga kan ṭhianho kan kim leh thei mai hi a hrechiang tu tan chuan thil mak tâk pawh ani.

Christmas urlawk zanah chuan ka ṭhiante ho in Nupuii te ina hmang ho an rawt a mahse tlai aṭangin ka nuam sam lo tlat pek a,ka ruhseh a chhuak nasa bawk nen min sàwm na pawh ka hnar a, tel ve tur a min duh thu te chu group ah an rawn sawi tliar tliar hlawm a.

Ṭhuthleng sei ah ka vah te nen a heater kan ai lai chuan inkhawm bâng ho pawh an lo haw a , kei lah khua a vawh deuh hlek chuan ka ruhseh hi a chhuak nasa thei em em a, damdawi in min chhawk theih map loh chang a awm a, puan in ka ke leh kut te ka tuam luk ṭhin.

U Asangtea te ṭhianho an rawn lut hlawl a, an rawn ri lut nghal hlut , kei lah ka lo in tuam bur sitting room chhak lamah chuan an ṭhu khawm a.

"Mate thingpui va lum sak lawk la, hei biakin ah kan rawn in lo a," a rawn tih chuan phur lo ru tâk chungin choka lamah chuan ka phei a.

Ka siam zawh hnu chuan tray ah ka thingpui dah ho chu ka va sem a, a ṭhiante ho chuan min lo fiam sap sap hlawm a, ka hmelhriat sa deuh vek an nih avangin ka zak vak lem lo, a tawp ber a thingpui ka pek pa chu a hmel pawh ka lo en lem lo a mahse a kut a Rose tattoo in chhu chu ka hmù chiang hle , a hmel pawh en lem lo chuan choka lamah ka lut leh mai a.Thingpui no te chu U Asangtean a rawn dah lut a, keipawh rei ṭhu tawh lo in in chung lamah chuan ka chho a.

Ka ṭhiante ho chuan min rawn video call a, an rawn nui ar ar hlawm a, an hlim hmel hlawm khawp mai fiamthu te an rawn thawh a, a chang lahin an han hram tlahawlh leh em em a.Phone kan dah hnu ah meuh pawh mittui tla phungin,pum nâ tawkin ka la nui ka la nui thei.

Christmas ni ah chuan ka inkhawm ve thei a, inkhawm banah ka ṭhiante ho chu kan tih ṭhin dan angin kan inah an rawn lêng leh dial a.Sitting room thlang lamah chuan kan in kawm khawm a, kan bengchheng leh tawh viau, rei tawk fang kan awm hnu chuan U Asangtea te ṭhianho bawk an rawn lut leh a, keini ai mah chuan an bengchheng zawk a, mipa e ti lo chuan an rawn ri lut nghal hlut ani ber.Kan la ti ti zawm reng a, chutah "Mate , lo kal teh..." U Asangtea'n a tih chuan ka va kal vat a, "Heihi kan ṭhianpa Zosangpuia Doctor anih hi," ti a min in hmelhriat tir pa chu phawk deuh tak hian ka melh chho ha a, ka ṭhiante ho chu ka va melh ve zawk a, hman ni khan min chhaih zeuh hlawm a,ringhlel tak chunga ka va melh lah chuan keimah ai a phawk mah hian an lo meng hlawm a, ka u lah chuan min han in chibai tir leh nghal a, a bân leh kut velah chuan tattoo a awm nuaih a ,nizana thingpui ka pek pa ngei kha anih hi.Doctor ve si tattoo te han neih ka ti rilru nghal neuh neuh.

"Hmm, ka u hi i ti ho thei emai ah.." a dár a ben pawp pah a ka tih chuan, "Sangte heihi ka nau Vansangluri ania Mate kan ti mai zel a, Vs tih te pawn a koh theih," a tih leh chuan zak tawh tâk ka ni.

"Ka u....." Ka ti vin hlar a, ka u lah chu a lo nui sawng duh chauh chutah min mitmei zuk zuk lehnghal a, be ve turin min phut tih pawh ka hria.

"Sangtea ve ve maw in nih?" ka ti chhuak deuh phawng.

"Ni chiang.." ka hma mi chuan alo ti thum dut .Ka lu ka lo bu ringawt han sawi mai tur ka hre tawh tlat lo ani.



Ka ṭhiante ṭhut nâ lam pan chuan ka va kal thuai a, nuihza in sum hmel tak hian an lo awm ṭhap a "U Asangtea bulah thil sawi in nei animaw?" Ka va ti sar sar a.

"Nei lo, kan chhaih fiam mai mai che alawm, doctor-a ber phei chu chiang deuh a ka vawikhat hmuhna," an tih chuan, "Ka zak lutuk, ka u lah hi in lâk zei a tum thei si," ka biang sâ pap pap dawm pah a ka tihchuan ,"A zia ve reuh em kha Mate doctor chu," Rini chuan a lo ti zeuh, ka ṭhiante ho chuan min chhaih zawm char char ti ila ka sawi sual awm lo e.

Christmas leh kumthar inkar pawh thil danglam em em thleng lo chuan kan hmang liam a, kumhlui thlahni ah chuan ka ṭhiante bula hman ve ngei chu ka tum tawh a, tlaiah chuan tlangah kan leng a ni tla tur en liam tur a kal kan ni, nula leh tlangval lêng an lo tam khawp mai.

"Mate kan zung lawk dawn," tih leh ka ṭhiante chu an kalsawn diak a.

Ni tla tur sen chek mai chu ka en a ka lung a leng kher mai, thli fim a rawn tho heuh heuh a, ka sam chu ka hui leh ṭhin, "Kumhlui hian kan nunhlui vawi tam liam pui mahse nang erawh i liam ve silo.."

"Ni tla tur hian tlang a liam san a, a tukah a rawn tlawh leh ṭhin.Mahse nang chu i liam a,i lo kir leh tawh silo.." ka ti chhuak sep sep a.


Ka ṭhiante an rawn let leh chuan in sum zo lo in ka ṭah khum vak a, tih ngaihna vak an hre bîk lo, ka hnungah an chul a, an mittui an hru ve zeuh zeuh bawk a....

"Lo kal rawh, an inah kal ang, i hmuh ve ngei ngei tawh a ngai," Nupuii'n a tih chuan chhang thei ka awm lo.

"Nia nakin i tih chhung khan eng nge thleng dawn i hriat loh kha!" Mami'n a lo ti ve bawk a.

Ka ṭhiante ho chuan hmanhmawh takin min kal pui nghal a, min kalpui dawr dawr ti ila ka sawi sual lo ang.Rini nen kan in phur a a speed pawh a ti sang khawp mai. Ka mang vek a,ka ṭah nâ ka hnar a thip hlur bawk.

Kum tam tak ka lo nat pui, ka thinlung a ser nung awm reng tawh tur, vawiin ni thleng a mipa dang ngaihtuah leh thei tawh lo a min siam tu ka hmangaih hmasa ber leh tawp nâ ni tawh tur hmù tur chuan an in gate ah chuan kan ding ṭhap a, ka ṭhiante chuan kawngkhar chu an han kik dat dat a, chutah Nu Hruaitei aw ngei mai chuan min rawn chhawn a kawngkhar in hawng ri in a zui nghal zat a, min hmù chu phawk lutuk hian min en a, "Awi Mate I rawn haw ani maw?" Tih pah chuan min rawn kuah thlawp a kan han ṭap dun leh lawp lawp a, "Awi min hrethiam teh u, ka in sum zo thlawt lo ani,"a ti mawlh mawlh a.

"Rawn hmuh kan duh a," Ka ṭhiante ho in an tih chuan ,"Nu a awm tiraw?" Rini chuan a lo ti ve zat a.

"Han hmù rawh u,a room ah a awm ang," tih leh inchung lamah chuan a pawh in min pawt chho a.

"Khatiang hmel kha hmuh miah suh, hlim hmel put tum hram hram rawh," Mami'n a tih chuan a room kawngkhar bulah chuan kan ding ṭhap a, let leh mai te ka duh rum rum ,mahse tuna ka hmù lo anihchuan hmuh tâk tâk ni ka nei dâwn lo tih ka hre ru ve reng bawk.Kawngkhar an kik a chhawn tu a awm lo chutah kawngkhar chu a lo in kalh lo hlauh.Ka ṭhiante ho chuan in hnuaiah min chhuk san a, kawngkhar chu a in hawng riai riai a ,a room chu a lo thim khup a, ka kal phei zel a, khumah lah chuan tumah an mu bawk silo,khum bul a kan thlalak lo let phung te, damdawi kawr leh zu bur tam tak te nen a room chhung chu a ṭawp takzet, a hma a ka hmelhriat ṭhin room nen kha chuan danglam tâk ani.Chutah a room parda chu ka va keu a, balcony ah chuan awm an awm ngei ani, tukverh pawh chu a lo in kalh lo a, zawi muangin tukverh ah chuan ka chhuak a.Chair ah thatchhe zet a lo ṭhu in , ni tla tur a lo tlir dauh dauh a, ka pen ri pawh a la hre lo ani ngei ang , hawi pawh a la rawn hawi lo, a che eih lo ti ila ka sawi sual lo ang.

Pen hnih vel lek kan in kar ah a awm tawh tih ah chuan ka ke pen chu a tawp chat a, a kut in hum ruh chu ka va hmu nghal a, "Mateeee.." âw tham tak zawi tâk si hian a phun chhuak sup a, ka mittui chu a rawn luang leh ngiai ngiai a, a thusawi kha ka bengah chuan a ring lutuk....

"Tinge hetiang hian i awm?" Ṭap pur a ka tih chuan ka lam a rawn hawi a, "Mawh min chhang rawh tinge?" A ai a ring mah hian ka ti leh a.

"Hmalam ka pan zel ang i ti anilawm ni? Tinge hetiang a ka hmuh che?" Ṭah tâk meuhin ka ṭap tawh.

Ka bulah chuan a ṭhu ngawi ngul a, min chhang lo a, hma lam a en ngar a mahse rei tawk fang a ngawih hnuah chuan...

"Ka tihpalh..." zawi sup hian a ti a.

"Chu thu bawk chu maw i sawi leh dâwn?" Amah en ha a ka tih chuan ,"Ṭap tawh suh, i tah ka phal lo ka tih kha, I mittui te kha keimah vang mai mai in ti tla duh tawh mah ta che," zawi sup a a tih leh chuan ka mittui chu a luang zung zung a, a hma a ka hriat ṭhin Puia kha ani tawh lo, a sam a lo zuah buk vek a ,a hmui hmul pawh a lo zuah a, a hmel ah chuan nelawm nâ pakhat mah ka hmu lo.

"Hmalam pan rawh ka tih kha, hma lam I pan loh chuan mi hnungah i awm reng ang nunhlui in tih buai tir mah ta che," a ti sup sup a.

"Kan in ang chiah anihchu,hmalam kan pan thei lo ve ve," ka lo ti leh hlar a.

"Kum ruk zet chu ni tla tur pawh kan thlir dun tawh lo a tiraw?" A tih chuan ka va kal hnaih sauh a.
A mit aṭang mittui tla pawh chu ka va hmu chawpchilh a,ni tla mai tawh tur chu ngawi rengin kan thlir dun a, ni chu a tla leh ta!.Mahse a ngai ang bawkin Nunhlui te chu a liam pui ngei mai mahse ani erawh hi chu a liam ve silo!.



(Flashback)

"Vansangluri kha, lo hawi leh lawk se," awi saw mihring pa min tih zah ṭhin zia hi chu aw....

"A lo hawi duh lo vêl ah! Ding vei ding vei..." a la ti lauh lauh a, kan college gate bul vêla lo awm ho mit chu keimah ah a fu ṭhap tawh.

"Puia hi chuan tih zah dan che hi chu a hre ve alawm," Mami'n nui hak hak a atih chuan ,"Awi kan ina a rawn leng leh hun hun ah thingpui ka lum tawh lo ang," ka lo ti hlar a, ka tih theih tlem lutuk chu ka in ngei zawk.

"A ruk tak chuan nuam i tih em kha!,forever crush kha ani ve a tiraw?" Rini chuan min nghawk zeuh zeuh pah hian a ti a.

"Ka crush peih tawh lo ṭep," ka tih chuan an lo nui dar dar a.

College kan ṭan ni hmasa ber ani a, kan khua ah kan ṭhianho chu kan kal vek a,ka u min chhang tu chiah U Cobtea ṭhian ṭha ber Chawngthanpuia ani min lo chhaih zawr zawr tu kha! .Ka u te hi kan senior te chiah an ni a, an ṭhianho hi chuan kan ṭhianho hi min chhaih peih ve hrim hrim .

"Tikhan min au vak vak tawh suh, min ti zak thei lutukz" canteen kawt a kan phei lai a Puia lo ding a tukhum a ka va beng chuan an lo nui ṭhâ hlawm a.

"E kan college a hmelṭha ber i nia, khatia tih kha chu i phu ve hrim hrim, " a lo ti leh zat a.

"Cobte vawin chu ka thlah dâwn ania" a tih leh chuan ka u chu a lo khi suk duh chauh a( ka u hming Cobtea hi Jacob tih nâ ania Cobte ti in kan ko vek ani, kan unau zinga sap hming nei awmchhun ani bawk).

"Ka u in a hmu palh ang che u," U Cobtea chuan a lo ti thum dut a.

"Vanlallawmawma han mengrum tur vel ngaihtuah chuan thlah chu a chakawm lehzual hle mai," a ti leh kher a ,ner nasa tawh tâk ka ni.

"Awi min thlah awm lo emai a, mi zingah tikhan min au vak vak tawh suh ang che," ka tih pah chuan ka melh rum tawh viau.

"I hmelṭha anih mai chu," ngeiawm zet a a tih pah chuan ka sam a rawn chul thur vek a,phone ah lah hian min rawn biak zeuh zeuh hi a ching a,ka chhang aiin ka chhang let loh hi a tam zawk ang.

"BA kan zawh hunah engtin nge kan awm hlawm ang?" Nupuii'n a tih chuan,"Keichu Air hostess ka training chak, certificate neih hrim hrim ka duh, hlawh a ṭha sia MA kal leh nghal duh pawn a in su buai dâwn lo a," Ka lo tih chuan ka ṭhiante ho chuan a zirna man hautak zia te chu an lo sawi zawm nghal zat a mahse keichu khatiang ah kha chuan ka lungngai lem lo,ka u te pahnih in hna an nei tawh a, ka pa pawh Pathian zarah a la pension em lo a ,ka duh apiang min tih sak ve ṭhin avangin tuna kan sawi lai pawh hi ka ni duh pawh ti ila a pawisa neih zawng zawng pawhin min zirtir duh hial ang.

Chawhnu lam class chu kan la rei ang reng hlawm khawp mai ,khua a lum bawk nen kan in zap kan in zap hlawm a ,chutah Mami chuan a bag aṭang acid a rawn phawrh zal zal a, kan han liak ru zeuh zeuh bawk a.Kan first day mah nise tih neuh neuh tur a tam bawk nen,kan bang hma lem lo khawp mai.

Haw lamah chuan tumahin scooty kan keng loh avangin ke in kan haw ṭham ṭham a, "Awi saw Chhimi!, thil min zawrh leh ngei ngei ang," ka tih chuan kan hma a Chhimi a sumdawn bag nen ngei a thawveng zet a rawn phei chu kan en nghal ṭhap a, Chhimi hi a hming diktak chu Hlimpuii ani a mahse a sam a buk sia ,chalsam chhah deuhin a nei a, a mit meng a lian bawk nen,chhimbuk a an em avangin Chhimi tih hi a lo chhuak ta ani.

"Vansang,Vs hmelṭha nu, bag thar ka la ṭeuh tawh ania," kan zawn a rawn thlen chuan a rawn ti lang lang a, ka bula ding Nupuii chuan min rawn keuh zeuh a, ka sawi reng kha maw!.

"Awi pawisa pawh ka nei lo," ka ti dek dek a, "I U Asangtea nen kan in tawk a, ka lo lei sak ang a tih kha," a ti leh nghal zat a.

Kan en sak leh ta nge nge a, Chhimi hi a hmel en ai hian thil nalh a hria a, a bag lâk thar ho pawh a nalh leh tawh hlawm khawp mai.

"Heihi engzât man nge?" A sen nalh zet hi ka khai chhuak va va a.

"2000 ania 1800 in I la dawn nia," a tih chuan to ka ti khawp mai.

"La rawh la rawh, I u te an hlawh hnem emai,ka leisak ang a ati vek alawm," a tih leh chuan a sen mawi zet chu ka la a, Nupuii chuan a dum pakhat chu a la ve bawk a ,ani nen hian bag hi kan läwm ve hrim hrim a,Mami leh Rini hi chuan an läwm ve lem lo.

In ka thleng chuan ka nu leh ka pi hi maian hih pah hian an lo titi siâm siâm a, " E Mate I lo bang tawh animaw?" Ka pi chuan min hmuh chuan a lo ti nghal var a.

"Nia hei kan ni vawikhat nâ mah nise eng eng emaw an sawi kual nasa lutuk a," an bulah chuan zawi ngiai in ka va ṭhu a .

"Mate eng nge in college te chu a nawm hmel em?" Ka nu pawh chuan a lo ti nghal var a.

"Nuam ang,mahse U Cobtea te ṭhianho hi nitin ka hmù dâwn sia,ka peih lo lawk," ka lo tih chuan an nui dun hak hak a.

"I U Cobtea te ṭhianho zawng an phawk hlawm si a,I u tâk phei hi chuan a in hmeh lo ania a ṭhian kawm te pawh hi," ka nu chuan ka pi nen a min melh kual pah chuan a ti a.

Ani tâk tâk a, ka u hi kan unau zingah pawh a nungchang a ṭha ber a,tleirawl sual pawh nei lo ani a ,a ṭhian kawm ṭhin ho hi chu a naupang tet aṭanga a kawm te an ni bawk a mahse ka u nungchang ṭha, ngawichawi lutuk hian a inhmeh lo tawp, Chawngthanpuia te ang rawlthar an nih aṭanga sual leh phawk lutuk ang te nen a ka U Cobtea te an han in kawm khawm ṭhin hi chu thil mak tâk ani.Zu leh ruihtheih thil dang an tih dâwn pawhin an bulah ngawi rengin a lo awm ve mai ṭhin ani awm e.

Kan sawi lai mekin ka u chu choka ah a rawn lut hlawl a,"Teh ṭhap cheu chuan!" a ti thum dut a, a la lai em em zui.

"Hmelchhe sawi chu sawi aiin koh a hnai" nui pat pat a ka tih chuan,"Hmelṭha in ko chhuak zawk anih hi, ka hahchhiau ngun ka ti reng a, mi pathum ngawt in min lo rel vang anih hi," fridge hawn paha a tih chuan kan lo nui kar kar hlawm a.

"Nu U Asangtea hi a lo haw ṭep angem?" Ka tih chuan ka nu chuan min lo melh rulh a, "Pawisa I dil leh dâwn animaw?" A tih chuan ka lo nui tawp , kan in man chiang ve em ani.

"Chhimi kan haw lamah kan tawk a, bag min zawrh a, U Asangtea'n lo thlang rawh se min ti aniang," ka tih chuan.

"Vanlalnunsanga lah hi thil ṭul lo deuh deuh hi a lei che a, ka sawi ngun tawh lutuk, mamawh chauh hi lei tur," a ti leh ṭan tawh ,a sawi thui tâk tâk hma in inchung lamah chuan ka chho ta daih a.

Step a ka u lo chhuk tur chiah nen chuan kan in tawk a,"U bag chu ka la aw, 1800 man," ka ti lang lang a

"I va la tlawm ve,pahnih te kha laksak ta che,"a tih chuan ,"Pakhat lek pawh hi ka nu in ṭul lo a ti lutuk.." ka nui pah kar kar a.

"Duh I neih chuan min hrilh zel dawn nia," a tih leh hnuah chuan inchung ka thleng chawpchilh a.

Ka u te ho ah pawh hian U Asangtea hian min duat em em a, hmeichhe awmchhun ka ni bawk nen, midang ai a ka nalh loh leh ka neih ṭhat loh hi a hläu em em a,rual min awh pui tu ber ani hial ang.

Zanah chuan lehkha zir tur em em kan la neih loh avangin ka diary ah vawiin a ka hun hman dan vel te chu ka ziak a, rilru pe deuh a ka ziah laiin ka phone chu a rawn ri ṭat a

"Naktuk ah, Nupuii leh keiman acid thak leh thak lo chi kan pai ang a, Mami leh
Matei'n Mamate leh thei te sen lian chi zawk kha in pai ang," Rini chuan kan ṭhian ho group a a rawn tih chuan an rawn nui tliar tliar hlawm a.

"Second day aṭang chet bawn I vàn tum," ka va tih chuan Emoji nui keh tuar lem hi a rawn thawn ṭeuh a Lalrini pek chuan.

"Naktuk chu senior ho building lamah te kan va lêng ang chu," a rawn tih leh tâk ah chuan kan zah thu midang chuan kan lo sawi sap sap a.

"Puia ka hmu palh ang,keichu ka kal peih lo," ka va tih chuan,"Dinsanga ka hmu duh sia,min va kal pui hram hram ang chu," Lalrini pek chuan a la rawn ti hram .

"Naktuk ah kan sawi ṭha dawn nia," Nupuii'n a tih chuan naktuk a kan kal dan tur te chu kan sawi a.



Zingah chuan ka alarm ri reng reng ka lo hre hauh lo, ka nu in ka kawngkhar a rawn chum ri bur bur a,phak tawkin ka va hawng a.

"Em em che chuan, dár 8 a rik dâwn tawh hi,tho thuai rawh,"a tih chuan hmanhmawh zetin bathroom ah ka lut nghal a,phone ka en ve hman meuh chuan ka ṭhiante ho chuan stand ah min lo nghak ṭhap tawh a,hmanhmawh deuh a ka in siam sawk sawk hnuah ka kal ve thei ta hram.

"Awi I va hman har tâk,auto lah hi an tlan chhuak vek tawh sia taxi hi in con mai ang u," Mami chuan a lo ti nghal zung zung a.

"Ka alarm ri ka hre miah lo a,ka nu lahin dár 8 rik dawnah chiah min kai tho a..."

"Chuang nghal vat ang u, Principal in class a rawn la dâwn lehnghal," Nupuii'n a tih chuan kan in hnawh lut nghal zung zung a,hmeichhe pakhat chuang ve a lo awm avangin a hnungah chuan kan in hnawh khawm a,kan zing a te ber Mami chu Rini chuan a pawm ṭat bawk a,a hma a chuang chu Venglai lam ami kan senior chiah, hmeichhia la upa lo tâk ani nghe nghe.

College pawh chu kan thleng thei ta hram a, kan tlai lo chiah chiah ,kan class kan thlen chuan keimah ni deuh chiah thleng lo kan lo awm tawh a,kan ṭhutna tlar hnung ber pan chuan kan in zui phei ṭham ṭham hlawm a.

"Vansangluri kha Chawngthanpuia'n a rawn zawng nasa mai," kan len piah chiah a sir ber a ṭhu Nununa'n a rawn tih chuan ka lo ner sak a.

"Awi a pawimawh awm lo emai,min chhaih leh duh vang bâk ani lo ang,"

"U Puia hi chuan a ngaihven ve tak tak che in ka hria.." Rini'n a lo tih chuan ka lo ner nâng nâng a.

"Ka cousin ,tet te aṭanga cheng ho kan nia ka hrechiang ve alawm,lerh hi chu lerh viau mahse hmeichhe dang bulah hi chuan a in duh thiam thei teh ania," Rini bawk chuan a ti leh a ,eng em em ah pawh ka ngaih loh laiin ka ṭhiante ho chuan an han sawi phur nghal em em a.



Rini leh Puia te hi pa te in unau an ni a,Rini nu hi Rini kum 5 pawh a tling hmain a boral a,a hnuah a pa hian nupui dang a neih avangin Puia nu hian Rini hi a enkawl deuh tawp a,a chhan chu an nu hrawn a ṭhat vak loh vang pakhat ani,mahse tunah chuan Rini leh a U Tluangtei chu in pui ah a pi bulah a pi ten an awm pui tawh a,Puia te ṭhenawmah chiah an awm .Puia pa leh ka pa pawh hi ṭhian ṭha tak an ni a,kan in pâwh em em ,an pahnih ah hian in ṭhian ṭhat nâ tâk tâk ka hmù ṭhin.An nupui leh fate thleng hian kan in pawh em em vek mai ani.

"Puia te chu dam veng ami Ṭhazuali nen khan an in hmeh ka lo tia," ka tih chuan, "Awi Ṭhazuali khan a rawn birh tluk tluk reng alawm,Puia pawn a tawp a tawp ah a chhang ta anihkha," Rini chuan a ti zui a, Principal a rawn luh tâk avangin kan sawi zawm tawh lem lo.

Principal chuan rin ai tâkin class chu ala rei a, kan ṭhianho chuan zan lama pai ruk tur ho kan sawi te chu kan ei ru zeuh zeuh hlawm a,mamate leh acid mawlh hi ani in hmeh chu.Kan hmaa ṭhu Reubena te lah chuan an kut an rawn dawh ve zuk zuk a, tunlai ṭawng takin kan skew hlawm khawp mai.

"Va lut nghal ang u," rawn ti tu avang chuan kawngkhar lam chu ka va hawi vat a, Chawngthanpuia te ṭhianho bawk chu niin.Break kan nei dawn chiah a,kan in khung fel lai mêk ani.

Kan ṭhutnâ lam pana an ṭhianho rawn in zui lut duah duah chu kan hmaa ṭhu te ho pawh chuan an en duh hlawm khawp mai,senior most em chu la ni lo mahse kan khua ah na nâ nâ hi chuan hre lo mang an awm lo ang.

"Awi min rawn ti zak leh dâwn ta.." ti a ka lehkhabu a ka lo in hliah lai chuan ka ṭhiante ho chu an lo nui tet tet a.

Ka bulah chuan a rawn ṭhu nghal chat a,ka ṭhiante ho chu a tawlh phei tir nghal sap sap a,U Cobtea a awm ve bawk nen ka zak ṭhin ania.

"College week kan hmang hunah in Department ai awh a miss turin ka ziak lut dawn che," a rawn ti nghal thawr ,kei lah ka huat tawk a lo tling leh em em .

"Cobte vawiin chu ka thlah tâk tâk tawh dâwn ania," a tih leh chuan ka u chuan , "Hmm I peih mai mai zawk e a," a lo ti thum dut duh chauh!.

"Chawngthanpui zak lo viau suh aw,I lerh lutuk,bialnu I neih kha," Rini chuan kan sir a compact in hnawih mawlh mawlh pah hian a lo ti ve bawk a.

"Vansangluri te chu a suak ani ve lo a," a tih chuan hrethiam lo deuh chuan kan lo en ha a,a kut chu ka koki ah a rawn nghat tharh a.

"Aw nangni pawh Barbie lei dawn ta ula, a suak nge a tak in thlan zawk ang?" A tih chuan ei lo deuh hian kan lo en hlawm a.

"Zanah ka lo bia ang che," tih paha ka biang a rawn piai zeuh hnuah chuan an chhuak ta a.A ti zahthlak thei ania Chawngthanpuia hi chu ka u awm ve reng laiin khatiang khan a khawsa duh ania.
"Ka sawi kha,I bulah chuan a dang vek zel ka tih kha," Rini chuan min rawn nghawk zeuh zeuh pah chuan a ti a,Nupuii leh Mami pawh chuan an lo tui hnih ve nghal zat bawk a.

Zanah chuan ka nu leh pa te dam lo kan in an lêng a,ka u te ho nen kan awm a, TV kan en ṭhap lai chuan ka nau Tetea chu step ah a rawn chhuk a,helmet a khum ran bawk ,bike chahbi a la tur chiah chu ,"Vansangzual khawnge kal I tum a?" U Alawma ani, Tetea chahbi ban tum uk pawh a kut a la thlà leh hna hna a.

"Khitah Vengchhak-ah ka han kal lawk," tih paha chahbi ban leh mai a tum chu.

"Chhuah a ngai lo," U Alawma chuan a ti chang leh fak mai ,Tetea chu a lo ner nghal sawk a.

"Ka rei lo ang," ti a kal mai a tum chu U Alawma chu a tho uai a, "Tete chhuak lo mai rawh,lehkha han zir rawh," U Asangtea'n nem deuh zawk chuan a lo ti ve bawk a, Tetea chuan U Alawma chu a melh ngur a.

"Ka chhuah leh chhuah loh ah hian lo buai ve ziah suh,mipa ka nia ka duh duh naah ka lêng thei," a tih chuan U Alawma chuan a kut a phar nghal uai a.

U Cobtea nen ngawi rengin kan lo en a,U Asangtea chu an bulah a va kal nghal thuai a,an inkarah a va ding nghal uai , "Han chho rawh," U Asangtea'n Tetea bula a tih chuan, bike chahbi chu chhuat a vawm thlak pawp pahin inchung lamah chuan a chho a,U Alawma lo che leh zâwk chu U Asangtea chuan a lo man bet ve nghal chawt a,buai tak an ni.

Kan bula an lo ṭhut chuan U Alawma zawk chu ka thlek dek dek a,a meng rum ul a biak pawh biak ngam chi pawh ani lo, "Vansangzuala hi hetianga a awm zel chuan misual tâk ah a la chhuak ang,tun aṭang chuan en liam mai mai tawh loh a ṭha, " a ti charh charh a,tumah ṭawng ngam kan awm lo,kan ngawi ṭhap a,hetiang hunah tâk hian ka nuih hi a za tlat ṭhin pek a,nuihzat chhan em em nei silo hian ka nuih a za em em a,ka in sum nâ lamah ka pum a na vek tawh.

"A ri in nui law law la ,I thawl hawk mai ang," ka bul chiah a ṭhu U Cobtea'n a tih chuan U Alawma chu a rawn hawi phei zawk a, "Nuih zat tur a awm loh hi," a tih chuan ka nuih chu a zà zual sauh a, a ri meuhin ka nui chhuak uar uar a,ka u te pathum chuan a ngaih nâ hre lo zet hian min en hlawm a,U Asangtea leh U Cobtea phei chu a hnuah an nui ve ta ringawt!.

Ka nu leh pa an lo haw chuan U Alawma chuan Tetea awm dan vel a duh loh thu vel chu a lo sawi nghal mawlh mawlh a, "Rawlthar an nia, engkim tih chhin chak hunlai kha athleng ve a,Alawma pawh I nau ania in naupang ber ani lehnghal a en liam chin I neih deuh a ngai, nunkawng sual a zawh chu keini pawn kan hlau lutuk.Hetiang a in khuahkhirh leh lutuk chuan nakinah in lam a thlahlel lo ang a,nang ni pawh palzam chin a la nei ang che u.Mipa a nia,zan a rei lo te han lêng ve lawk te chu thil pawi ani hleinem," ka pa in a tih chuan ka u te chu an lawm vak loh hmel hlawm khawp mai.

"A ṭhian kawm ṭhin te hi mi fel ni hek lo,khatiang zawng a in ṭan zel chuan Vansangzuala khi a la sual khawp ang.Tun a in sawi ang phei kha chu a hriat laiin sawi reng reng suh u," U Alawma ani , "Eee..hauh a ngaih te chuan I hau ang a,kawng dik lo a zawh pawhin I hau ang ,kan ṭan vang ani hleinem,in hi nuam lo tih nâ anei ang a pawn lam a ngainat zawk kan hlauh vang ania.A zawng a zà a khuahkhirh lutuk kha a ṭha lo ka tih nâ zawk anihchu," ka pa in a tih chuan an la sawi zawm nasa khawp mai.In chung lamah ka chho ta daih a.

Tetea hi kan naupang ber ani ka tih tawh kha, a ngeng em em a,a ṭhian kawm ṭhin te hi an fel vak lo tih kan hria ,ka u hlauhthawn chhan pawh ka hrethiam viau.Keipawh hi min khuahkhirh em em a,hmeichhe awmchhun ka ni bawk nen,lêng chhuah mai mai te hi ka u te ho phal loh thil ania,U Asangtea hian min duat em em a mahse a phal loh thil ah chuan ka nawr lui ngam lo ,U Cobtea erawh sawi nawi leh phal loh a nei ve hran lo.

Room ka thlen chuan ka dawhkan bul a ka phone charge chu ka phawi a,sofa a thatchhe zet a ka phone ka en chuan ka ṭhiante ho chuan vawi 5 vel zet hi min lo video call a,an rawn call leh chiah tih ah chuan ka la ve ta vat a,ka ṭhiante ho chu Rini te inah an lo awm khawm ṭhap mai, "Mate lo kal ve rawh group te kha en ta che," Rini chuan a rawn ti lang lang a.

"Awi ka u te ho an awm vek a ka chhuak thei lo," ka tih zawh rual chuan phone ah Puia hi a rawn lang a.

"Saron vengah Vansangluri a in duh ber an ti," a rawn ti nghal zat ,"Lo kal ve rawh.." a rawn tih leh chuan ka ner nâng nâng a.

"Eng nge Vanlallawmawma kha I hlau ami?" a rawn tih leh chuan room ka khar ṭhat leh ṭhat loh ka en nghal vat a,a lo in khar ṭha hlauh!.

"Awi I awm ve avang hrim hrim pawh khan ka peih lo e a," fiamthu a ka tih chuan a lo meng nur nasa lutuk.

"Hei Chawngthanpuia hian a sawi reng che a,a bialnu a ṭhen zo chiah," Nupuii'n a rawn tih chuan ka hô hian ka lo en a,Nupuii hmel alo lang nghal zat ,"Ka lo bia che,lo en rawh," Puia chuan a hnung lam aṭang chuan a rawn ti leh lang lang a.

"Lerh deuh ka be peih lo," ka tih chuan ka ṭhiante ho chu an lo "Ehh.." dual.

"Mate hei zanin chu a in la thu tak ve tehmai ania aw," an rawn tih leh chuan ka nui ve ta nge nge a,a chhan pawh Chawngthanpuia a in la mitâk tur vel ka ngaihtuah hian a in hmeh lo ka ti khawp mai.Rei lo te ah chuan kan ti tawp a,tukverh-ah chuan ka dak vang vang a,khua a ṭha in vàn pawh a thiang khawp mai ,arsi mawi deuhin an eng sep sep bawk a.Kan kawmthlang lam chu ka zuk thlir a lang thei lo mahse in pakhat chiah hian a hliah a,ka ṭhiante ho chu an awm ngei awm sia,ka lung an ti leng,nitin in hmuin in zui ṭhin mah ila ka ngai em em vek ,ka chhungte hi strict bîk lo phei se chu tunah hian an bulah ka awm ve ngei ngei ang.

Ka phone pawh chu en ta lo chuan bathroom ah in sil turin ka lut a, ha te ka nawh fel a, skincare te ka tih fel hnu chuan zan pawh alo tlai leh tawh viau.Mut pah a ka phone ka en chuan Puia message chu alo awm tak tak , "Ka single ta e.." tih zawng hi ani....

"Hmm eng nge chu chu I rawn sawi?" Ka va tih chuan, "Aw ka rawn bem dawn che," a rawn ti thawr mai ,a zam lo mai bawk sia.

"Awi,I va zak lo..."

"Vansanglur ka ti mai mai lo ania," a rawn ti leh a reply pawh ka reply peih tawh lo.

Zing ka thawh chuan a la hma angreng khawp mai ,ka nu chuan choka ah thingpui a lo in mêk a,a bulah chuan ka va ṭhu ve a, thingpui ka duh leh duh loh min lo zawt nghal zat,zing thawh hlim ah hi chuan aw pawh hi a pawr duh khawp mai,pawr tak a ka chhang chuan "I tho fuh vak lo ami?" Tiin min rawn thlek pah ha a.

U Alawma hi inchung aṭang a rawn chhuk thlà a,ka nu nen chuan kan lo melh phawk khawp mai,a tho hma em em ngai si lova tunah dar 6 a ri vel chauh ania."Tukin chu eng in hria ni maw? I nau lah a rawn tho chhuak hlawl a," Ka nu in a tih chuan, "Vengsang lamah in vit an awm an rawn tia, ka han chho ve nghal ang e," ka u in a tih chuan ka nu nen kan lo meng phawk hra a.

"Awi Mama tu te nge? A va rapthlak thei tâk kan tunlai khawvel hi chu," ka nu chuan a ti nghal chiam a.

"Ka la hre chiang chiah bîk lo,Pu Neihzova te in bul chiah te kha an ni awm e," a tih pah chuan thingpui ka nu in a rawn thlit chu a lem nghal vek a,a sâ a ti lo emawni!.

Hmanhmawh takin ka u chu a in siama, ka pa pawh rei lo te ah a rawn tho a,ka nu chuan thil thleng mêk chu a lo hrilh nghal zung zung a ,"Mama fimkhur deuhin aw," tih pah chuan ka pa chuan U Alawma dar chu a beng thek a.

"Ni e,han fimkhur viau rawh,chanchin te min rawn hrilh leh dâwn nia," ka nu pawh chuan a lo ti ve a,ka u pawh chu a in khalh chhuak chawpchilh a.

"Kan tunlai Khawvel hi zawng a rapthlak emai,thihna hial a thleng ang tih pawh a hlauhawm hle mai," ka nu bawk chuan ati leh a,thil hlauthawng hma,dawih em em,a vei tawh vei ngut ngut chi ka nu hian a hlau leh khawp ang,a dawih phah leh vek bawk ang.

"Thih chu a thi em lo aniang, kan khaw group ah pawh an la rawn sawi lo emai," ka pa chuan a phone tuai nauh nauh pah chuan a ti nuah nuah a.

"Mate nangpawh fimkhur hle ang che,tunlaiah misual hian khaw eng pawh an sawi tawh lo ania," ka nu bawkin a tih chuan inchung lamah ka chhoh san daih a.

Ka tho hma bawk a ka in peih hma khawp mai. "U..U Vs châw kan ei dawn.."Tetea chuan ka room kawngkhar chu a lo chum dat dat a.

"Ka lo kal nghal," bengbeh beh ṭhat sawk sawk pah chuan ka tho ve nghal thuai a.

"In ban veleh lo haw tlâng nghal ula,kan khawvel hi a him tawh lo emai," ka nu bawk chuan a ti leh tawh.

"Ka u chuan chanchin a la rawn sawi lo ami?" U Asangtea chuan châw hmuam ṭawn chung chuan a lo ti ve bawk a.

"Sawi lo, an buai deuh aniang," ka pa chuan a lo ti charh charh a.

"Mate, class bân velah haw nghal rawh aw Tetea pawh," U Asangtea'n a tih chuan door bell a rawn ri ral ral a.

Kan lo chhawn sap sap hnu chuan Puia leh Faka hi an lo lut hlawl a,Chawngthanpuia chu a rawn ri lut nghal hlut ani ber!.

"Ehe in hmelchhiat lai ka lo nang fuh ani maw? Mahse kha Matei chu a ṭha teh sawr lutuk," a rawn ti lut nghal bawrh bawrh a,ka chhungte ho chuan ngai ah an nei tawh ,an lo nui mai mai a mahse keichu ka lo zak leh tawh nasa.
"Puite I Pa a awm em?" Ka pa in a tih chuan, "Aw awm e,mahse a in sawisel leh deuh hlek a,a in entir ang," thutak deuhin a ti ve ngei a.

"Anihchu, nimin lam pawh khan a sawi nuah nuah a,office lama ka buai lutuk loh chuan va kal pui ila a ṭha ang," ka pa bawk chuan a ti leh a.

"In va hman hma ve," U Cobtea pawh chuan alo ti ve ta ringawt a.

"Chawngthanpuia hi lawm,a phi sek a" Faka chuan a lu tuai nauh nauh paha a tih chuan,kan nuih ta ringawt hlawm a!

Châw ka ei kham chuan ka ha te ka nawt nghal sawk sawk a,class kal dawn ni ah hi chuan ka u te a hman hman hian ka nu an lo pui ve lawp lawp a,kan chawlh ni hi chuan kan unau hian kan awl ngai meuh lo thung.Ka nu hi nu taima tâk tih tur zawng reng chi alo ni bawk nen,keipawh hmeichhe awmchhun e ti lo hian a theih tawpin min chhawr.


Ka nu leh pa in kan in gate thleng min lo thlah hnu chuan stand lam panin ka kal nghal a,ka ṭhiante ho nen a kan in nghah ṭhin na ah chuan. "Ka rual in lo kal rawh," stand ah chuan Chawngthanpuia hi a bike ngheng ât in a lo ding pek a,kei ai khan an chhuak hma ngei a, ka u leh midang ho chu ka hmù ve miah lo.

"I vàn zak lo tâk,ka ṭhiante ka nghak," ka ti bâk hlar a.

"An kal daih tawh," a mit ko san ak a a tih chuan,ka meng kawk a,phone ka phawrh a,ka ṭhiante ho chu ka call nghal zat.

"Rin,eng nge awmzia?,in kal tawh ami?" Ka va tih chuan motor ah an chuang tih hriat takin an ri rawk rawk a.

"Aw,Kha U Puia rual khan lo kal mai rawh, min vau nasa lutuk a,kan kalsan tawp che anihkha," a rawn ti lang lang a,ka bul a thatchhe zet a ding pa chu ka melh rum khawp mai.

"Lo chuang la..." a bike hnung thlek zeuh pah chuan a ti sup a ,ti fuh in tih hmel zet hian a mitmeng lah chu a chalak a.

End of chapter-1