NUNHLUI DUHAWM BUNG 6
Posted: May 26th, 2026, 8:43 pm
NUNHLUI DUHAWM Bung -6
ZIAKTU : MALI PACH
Zingah chuan a message chu ka reply ve ta chiah a,nizanah kha chuan reply dan tur ka ngaihtuah mek laiin ka lo muhil daih pek ani.
"Keipawhin ka hmangaih reng ang che ,chatuan aia rei ka hmangaih ang che.." ka ti ve ta ringawt a,ka zak leh hnuhnawh a delete leh te ka tum ut ut a mahse a zahthlak loh,ka hmangaih alawm tiin ka in fuih phur chawp leh vel a.
Ka nu a nuam sam lo bawk nen kan unau ho chuan choka ah kan che suau suau a,chaw te kan ei fel hnu chuan ,"Nang chu i insiam rei thei bawk sia,lo han insiam mai rawh," ka u ten min tih avangin ka lo han insiam a.
Dar 10 velah chuan ka ṭhiante ho pawh an lo thleng ve ta hram a,nizan lama ka sawi kha min zawt zui nasa mai keipawhin phur takin ka lo hrilh leh zat zat a, "Awi Mate,ka sawi kha U Puia hian maw a duh takzet che,i zunah hian a uai hneh tawp..." Rini'n a tih chuan Mami leh Nupuii pawh chuan an lo tui hnih ve zat a.
"Chu chiah,a bialnu hlui te ho kha a ti lang ngai vak lo a,a tih lang ve pawn a chang leh min hide a,a chang leh a bialnu te chauh hmuh theih turin a dah ṭhîn a mahse maw nangchu i ni ve lo,ka u pawhin tukin khan min zawt alawm," Mami'n a tih leh chuan ka zak leh hnuhnawh a,Mami chu Valpuia te ho pawhin Puia status an hmuh chuan kan khua ah chuan kan lar hat dawn anih hi.
"Sawmtea pawn min rawn zawt alawm.." Nupuii chuan a lo ti ve zeuh a mahse Sawmtea leh Puia pawh an lo in hmelhriat tih ka lo theihnghilh daih.
"A ho emai,ka bialpa hlui pawh ani chuang hleinem," ka tih chuan min thlawp hmel hlawm khawp mai.
Biakin kan thlen chuan tlar lai a hma lamah kan ṭhu a,inkhawm a rei reuh khawp mai,ka hawi kual vak ngam lo a Puia te ṭhutna pawh ka hmu thei lo.
"Va in thup thei ve.." biakin sir a kan ding lai chuan Sawmtea hian a lo ti zeuh.
"Thup vak ami?"
"Umm,bialpa i nei lo emaw ka tia.."
"Nia...aaa..ka nei ve..." Ka sawi zo hman lo Puia chuan min rawn kuah thawr.
"Sawmsek,ka bialnu hi biak vak ka phal lo ania aw.." fiamthu hian a rawn ti phawr phawr.
"Be lo e...thil ka zawt mai mai alawm," Sawmtea'n ṭha deuh a a tih chuan ka lo thaw huai mai.
"Thingpui kan lo in dawn..." tih leh min kalpui a rual a,Sawmtea pawh chu engtin nge a awm tih pawh ka hre tawh lo.
"Vansanglur,i va in ti thei," ka awm ṭha hle hle lai chu Hruaipatea pui chuan min ti ringawt.
"Ringawt a che,eng ah chuan nge ka lo in tih theih a," ka ti zui ve pang pang a.
"Ele..Chawngthanpuia status hi khawchhung mi a chanve velin an hmu vek a,"nui keh hui chung chuan a ti a, Lalrini pawh a lo nui uar khawp mai.
"Pitar leh putar number thlengin a nei kim lutuk mahse a status hi maw a bialnu hlui te ah kha chuan an mahni hmuh tur chauh ten a dah ṭhina mahse nang chu I U Alawma chiahin a hmu thei lo,"a tih leh chuan ka bula kal mek chu ka va en leh a,a lo nui sawng mai.
"Awi,ka nu leh pa pawh chuan i nu leh pa pawhin an hmu thei maw?" Ka tih chuan ,"Thei vek e,in zep ṭit ṭet ka peih lo," a lo ti sam et a,keiin puitling ho number ka neih zawng zawng chu ka hide vek a Nu Sawmi kha ka hide theihnghilh mai pawh a.
Kan inah chuan an rawn leng a,ka nu a nuam sam lo bawk nen an ngawi ve dak hlawm a.Thingpui leh chhang kan ei a,mipa ho chuan leng an rawt a mahse ka nu a dam sam lo bawk nen ka kal ve theih loh tur thu ka hrilh a, hmeichhe ho ah chuan Rini chiah kal ve a tum ta bawk .
"Mam ,naktuk ah maw Aizawl chu in kal ang?"
"Aw,zan khat bak kan riak thei dawn si lo a,zing karah kan chhuah ka ring,"
"Keichu ka u puanthan min hawn hi ka duhthu a sam lo lutuk a," Nupuii chuan a lo ti ve niah niah a.
"Aizawl chu thil a to lutuk,U Asangtea phei chu lo kal ve lo se lei pawh kan lei ngam lo ang," ka lo ti ve bawk a.
"Keichu Nu Hruaitei ka chah a ,an rawn lei thiam ve khawp mai," Rini ani.
"Lalrinsangi thil lei hautak zia chu,video call zel angai bawk si,video call dawnin bazar ah signal a chhe thei bawk si amah zawk hi a rawn thinrim a," Puia chuan a lo ti ve bai bai ,Lalrini a nui hak hak thung a.
"Kan in video call a,a net a chhe bawk si a tang reng a,a hmelchhiat theih zia chu maw Mate," Lalrini bawk chuan a ti leh a ,Puia a lo ner nung nung mai.
Mipa ho chu an chhuak ta diak a, "Ka leng rei lo ang,ka haw veleh ka lo bia ang che," Puia chuan a ti sup a,ka lu ka lo bu nghat nghat .
Ka ṭhiante ho nen chuan Christmas kan hmang ho dan tur te kan rel a,mipa ho awm lai khan kan lo sawi theihnghilh a hman ho an rawt leh ngei ang a, urlawk zan leh kumhlui thlah zana kan thil ei ho na tur pawisa tuak nan thil te kan zuar ṭhin a,mahse kumin chu thil dangah kan buai lutuk a kan lo manghilh daih ani.
"Ka pu te huan a serthlum saw a ṭha hlawm sia,ka pu ka lo hrilh ang a kan zuar mai dawn ami? " Nupuii chuan a ti a,kan lo pawm tlang hlawm khawp mai.
"An hauhna zat te kha chiang deuhin zawt la,keipawhin zawrh tur ka lo ngaihtuah ang," Rini ani.
"Lassi tui te siam ila ,kan hralh thei angem?" Mami pawh chuan a lo ti ve nghal zat a.
"Zanah group ah kan sawi ho dawn ania," kan ti ta a.
Tlaiah chuan ka pi in ka nu a rawn awmpui chawt a,Tetea nen eirawng kan bawl bawk, ka phone ri leh ṭhin chu ka hria mahse tomato ka vel laklawh em avangin ka chhang lawk hman loa,mahse le a rawn rik tak sek ah chuan ka va la ta,Puia ani.
"Hello..."
" I thinrim chuan sawi ṭha ve mai la" A rawn ti nghal thawr,mi lah buai em em in kan awm a.
"Hmm,eng vang ngawtin nge ka thinrim ang," ka tih chuan ,"Ka message pawh i chhang duh si lo," a rawn ti leh a.
"Awi naupang chhia pawh kan nih tawh loh hi,ka thinrim hleinem,rawng ka bâwl a, phone pawh ka khawih hman lo," ka tih chuan a lo nui hawk hawk.
"Ka haw tlai reuh sia,i thinrim emaw ka lo tia,anihchuan i thinrim loh chuan a ṭhat chu,keipawh ka thleng tawh aw,rawng kha bawl leh tawh rawh ,zanah ka rawn leng ang," tih leh phone chu dah a rual a,dek pawh ka ti hman tawh lo.
Zanah chuan in leng neuh neuh kan nei a,ka nu a dam sam lo tih hria in an rawn leng hlawm a, hetiang nuaih nuaih kar a in leng neih chu a chi dawn in ka hre lo a Puia chu ka be ta ringawt a.
"Hei,inleng kan nei nual a,lo len chu a chi dawn ami?"
"An haw hunah min lo hrilh la,ka lo hmu zuai ang che,ka ngai che alawm.." a tih chuan ka nui var var mai,min hmu thei lo mai pawh a.
"Mate,hetah hian lo kal teh.." Nu Hruaitei chuan min hui zauh zauh a,Pa Dawnga nen ka nu an rawn kan ve ani.
"Puitea nen hian in ti ve tak tak ami?" a bula ka ṭhut rual chuan a ti a,ka zak lutuk chu ka biang a sen pap pap in ka ring.
"Aaa...aw..ti ve deuh.." ka ti bah niai a ,"E..i pa Dawnga nen pawh kan lo sawi a,kan lawm khawp ania.Ngaihzawng ṭha mawlh mai hi a nei lo ang tih kan hlau a," a ti leh a,sawi tur pawh ka hre tawh lo.
"Nia,keini pawh kan lawm asin,chhungkua pawh kan in hrechiang a,kan in pawh bawk a.Puitea pawh hmundanga a len ai te chuan hetah te lo leng se,inchhungah in kawm tam se.." ka nu pawhin a lo ti ve charh charh a.
"Ni e,Matei pawh rawn leng ṭhin la,nangni leh keini ah te chuan engmah zah tur a awm lo ania," Nu Hruaitei bawkin a ti leh a.
Engmah pawh ka sawi ve ngam lo,ka zak em em a,ka kut ka kheuh ka kheuh ringawt.
Dar 10 velah chuan Tetea nen chiah inhnuaiah kan awm tawh a,Puia pawh ka bia a, a rawn thleng har lo a bike ri ka hriat rualin pawnah ka chhuak a,Tetea ka mitmei ru zeuh bawk mahse a hrethiam kher lo ang.
"I bike hi a ring thei bawk si,in in a hnai tho a eng nge i rawn ken kher zel?" Ka ti hlak hlak a,a lo nui suk suk duh chauh.
"Lo kal teh,ka ngai che," tih leh min kuah a rual a, keipawhin ka kuah let ve nghal a ,a rimtui tak chu a rawn nam leh chek chek a.
"Engtik lai mai pawh hian ka ngai che a,i bula awm hi ka kham thei lo," a ti sup sup a.
"Keipawhin ka ngai che ..."
"Tlângah i kal duh em?" A tih chuan a lam ka hawi chho ha, "Awi ka chhungten min man chhuak palh ang,"
"An la mu lo ami?"
"Tetea a la meng a,"
"Kan hrilh dawn nia," tih leh Tetea chu phone a rual a.
"Tête,i u hi tlângah ka kal pui lawk dawn a,lo la muhil suh aw," a ti zung zung a,chutah phone chu ka lâksak vat, "Tete,kan rei lo ang, kawngkhar lo kalh suh aw,lo la meng char char rawh," ka ti zung zung a.
"Ka u ten an man che chuan min mawhpuh miah suh ang che," a rawn tih chuan ka lo aw ve vat a .
Tlângah chuan kan in phur chho vawk vawk a,thlasik boruak thiang leh vawt var hnuaiah a hnungah chuan ka beng thlam a,arsi lah chu vânah an de sep sep a,khawlai reh ruih hnuaiah chuan amah chu ka thlamuanpui a,hlauh lam engmah a lang lo .
Tlang kan thlen chhoh chuan thli a lo tam khawp a,theihai kung hnuaiah chuan min ṭhutpui a.
"Zan boruak chu a nuam hle mai," van lam en chunga a tih chuan, "Arsi tam zia khi enteh,an mawi hlawm tiraw?" Van lam en chung chuan ka ti ve sap sap a.
"Umm..nangmah ang chiaha mawi an nih khi," a ti sup sup a.
"Min hmangaih reng ang i ti tiraw?" Ka tih chuan ka lam a rawn hawi vang vang a.
"Ka hmangaih reng ang che,Mate..." fiah taka a tih chuan ka ringhlel lo.
"Keipawhin,ka hmangaih hmasa ber i ni a,a tawp na pawh i ni ngei ang," ka tih chuan ka biang tawn tawn ah a rawn vuan a, "Mate, keipawh ka tan chuan ka hmangaih hmasa ber leh tawp ber na i ni,ngaihzawng dang te pawh lo nei tawh ṭhin mah ila ka hmangaih ngai lo a,an bulah pawh he thu hi ka la chhak chhuak hek lo,chatuan rei tur zia pawh ka hria mahse chatuan aia rei ka hmangaih ang che," a tih zawh rual chuan lungchim zetin min fawp a,Kan duhthawh dun ngang mai.
Ka awm a rawn ṭham a,ka vai riai a ka chheh vela hnim leh thingkung che vel te chu an muang riai riai a,mahse ka kekawr rawn phelh a tum chiah chu ka fim kawk a rang takin ka tho nghal a.
"Ka tihpalh aw Mate.." a ti nghal sawk sawk a.
"Aw,thianghlim takin inngaizawng hram hram ang," ka ti ve hlawp hlawp.Ka hai bik lo,tisa châkna avanga a mitmeng de sawr sawr te ,thawk a la ri te pawh ka hai mawlh lo,keimah zawk hi ka insum theih hram hram a ngai.
Hnim ah chuan a mu duai a ,amah ka en reng lai chuan a mutna bul chu a beng thek thek a,a ban a kham phei duai a ka zuk mu ve nghal rawk rawk a.
"Arsi mawi zia khi.." ka tih chuan , "Arsi te khi en la,arsi pakhat chauh chuan zan a ti mawi zo lo a,an tam pauh leh a mawi zual chutiang chiah chuan maw Mate ka hmangaihna che pawh hi thu khat lekin a daih lo,i chezia,i mi ngaihsakna,i dawhtheihna nen a kim chiah," a tih leh chuan vân lam chu kan thlir dun vang vang a.
"Nakinah chuan fate kan la nei ve ang a,kan fate ho nen zanah thla bial zan te lawm ṭhin ila,arsi te thlir ho ṭhin ila ," ka ti sep sep a ,a nui ri pawh ka hrechiang khawp mai.
A bul chet ah chuan min pawt phei a,a awm ah ka lu ka nghat a,"Fate kan neih hunah chuan kan fate hian a nu hi an thik ber dawn," nui suk suk in a ti leh ,"Ngati maw?"
"Ka duat bik dawn che sia ka duat loh che chuan i titau bur bur vel ang a," a ti leh a,ka lo nui ve hak hak mai.
Kan haw meuh chuan zan pawh a tlai tawh khawp mai,kan in bulah chuan dim fahran hian ka din tir a, kawngkhar ka luh dawn thleng chuan a tih dan ngaiin min lo thlir leh vang vang a,ka ban ka vai zeuh hnuah chuan thawm dim fahran in inchhungah chuan ka lut a, vanneihthlak takin ka chhungte ho chuan ka chhuak tih an hre lo ani ngei ang,a lo thim ṭhap tawh.
Ka ha te ka nawh a,ka hmai te ka phih fel hnuah chuan ka mu ve ta chauh a,mahse ka kawr leh kekawr lum ah chuan chabet a lo kai ṭeuh mai,ka va in thlak leh sawk sawk a,ka mut meuh chuan dar 12 a lo pel thui viau tawh.
Phone ka en chuan ka ṭhiante ho chuan kan sum tuak na tur vel te chu an lo rel nasa khawp mai,Puia nena kan lan ve loh avangin an lo vui hman viau a,U Cobtea group-ah a awm ve bawk si Puia bulah chuan phone call in kan in bia ti rawh ka va ti ta ringawt a,ani lah chuan ho a lo ti em em a.
"Sachek leh Serthlum chu a hlawk ber ang," Rini ani.
"Naktuk zanah Lalrini te inah sachek siam dan tur kan rel ang," Hruaipatea chuan a rawn ti leh mauh mai.
"Mahse sum lu hi kan engtin nge niang?" Nupuii ani
"Kha kha chu,Cobtea leh keiman kan lo thawh ang a,kan in hralh ṭhat chuan min rul leh ang a,hralh ṭhat loh leh kan ngaidam mai ang che u," Puia chuan a rawn ti ve zat.
"Anihchuan,naktuk zanah kan inah lo kal khâwm vek ang che u,Mami chu a zin dawn a kan hrethiam ang a,midang ho zawng kha rawn kal lo in awm chuan kan remove ang che u ," Lalrini chuan a rawn ti leh a ,"I va in ti thu ve Lalrinsang," Hruaipatea'n a rawn tih zawm zat.
"Lalhruaitluanga ve ziah lah hi,min lo hnial ve ziah suh,"
"Dinsang,i bialnu hi hau ve teh,mi a zah lo pang pang lutuk,"
Dinsanga lah chuan emoji nui keh tuar hi a rawn thawn ṭeuh a, "Hau.." tih ringawt a rawn sawi a ,midang ho chu kan lo nui tliar tliar.
"Mate,i mut a chhuak tawh em?" Puia chuan private in min rawn bia a,group ah chuan midang ho chu an la bengchheng hlawm khawp mai.
"Chhuak lo e,a chhuak tawh ami?"
"Chhuak lo e,ka hla ngaihthlak lai mek hi ka rawn thawn ve ang che aw," a rawn tih chuan ka aw rang khawp mai.
Iris ,Goo goo dolls ho hla chu a rawn thawn a,earphone vuahin ka ngaithla ve nghal a,zan a rei tawh bawk a,ka feel veng veng mai.
"Ka ngaithla chhuak dap e.." ka va tih chuan, "A nalh tiraw?,chuan ka ngai veng veng che.." a rawn tih zawm leh zat a.
Zan a lo tlai tawh bawk nen goodnight wish te kan in thawn fel hnu chuan phone chu ka dah a ka mu meng kar a,mut a chhuak lo kher mai.A hla min rawn thawn chu ka ngaithla nawn reng a,keipawh hian Puia hi ka hmangaih a,a pawn lam ṭhatna leh mawina chauh ni lo,a chhungril ṭhatna te engkim ka hmu a,mi fel tak anih zia pawh ka hrechiang telh telh .Amah hmangaih tur hian thil pek man tam tak a ngai lo ,a hmangaihna leh a chhungril ṭhatna te hian heng thil pek man tam tak tak te hi an khum vek si ani .
Zingah chuan class kan chawl tawh bawk nen ka tho har khawp mai ,nizan ka lo mu har bawk nen,ka thawh meuh chuan dar 8 a lo pel der tawh a,U Alawma leh ka pa office an la chawlh ve loh avangin chaw ei an lo rawt mek a,ka nu pawh tukin chu a tho nuam deuh ani ngei ang choka ah a lo che leh turh turh mai.
"Vansang,i va tho har ve,nula pumpa hetiang tûr ani ngai lo," ka nu chuan min hmuh veleh a lo ti nghal zat.
"Nizan ka mu thei lawk lo a," ham bai bai chungin ka lo ti ve bawk a.
"Vawiin chu Mate,Masiami dawrah min va kal pui lawk rawh aw,ka kawr tur pawh ka dam loh avangin ka la dah lo," ka nu ani.
"A la ṭhui hman dawn ami?" Ka tih chuan , "Aizawl-a kan awm lai khan ka hrilh alawm," a tih chuan ka kal pui tur thu te ka hrilh a,ka kalpui peih loh vaih chuan zanah chhuah a phal dawn lo tih ka hre ve kar a,hla deuh mahse kal pui hram hram a ngai.
Chaw eikhamah chuan Venghlun lamah chuan kan in zui dat dat a, "Sicooty i khalh thiam lo hi chu a buaithlak khawp mai," ka nu chuan a ti leh ṭhin, "Scooty alawm.." ka lo tih zeuh chuan min melh rum khawp mai.
"Auto hmang ve mai ila," ka tih lahin kan bazar-na ah pawisa kan hmang hnem tawh lutuk a tia ,a hmang phal bawk si lo ,Nu Masiami dawr kan thlen hma zawng chu a phun kuit ṭhak.
"Awi ka hah lutuk..." A ti lut zui nghal luam a,thlasik lai ê ti lo chuan a in zap hlup hlup mai.
"Ekhai,i dam tawh a law?" Nu Masiami pawh chuan a lo ti ve hlut ,"Hei ka zia tawh lutuk,mahse kawṭhalo chu a nghawng hi a na lutuk a,ka la fit vak lo anih hi," ka nu chuan a ti ve luam a,dik tak chuan ka nu hi a la nuamsâm em em miah lo ang mahse nu taima ngang,harhvang tak ani bawk nen khum bet a mut reng a ning tawh vang ani pakhat ang.
Kawr te chu ṭhui dan tur te kan han sawi ho leh a,kum dangah chuan thawmhnaw pawh a simple tawpin a ṭhui ṭhin a ,kumin ah erawh lace leh kawrkilh mawi te nen ti ve tawh rawh ka tih avangin ṭhui dan tur pawh keiman ka en sak vek a,a lo duh ve mai bawk.
Haw lamah chuan ka pawisa ka keng ve tho avangin ka nu bulah auto hman ka rawt a,a nuam sam ta chiah lo aniang min hnial lo in a lo rem ti nghal mai a.
"Nu zanah Rini te inah urlawk zan leh kumhlui thlah zan kan hmanna tur in tuakna tur vel kan sawi ho dawn," auto kan chuan laia ka tih chuan," Aw,i kal ve dawn ania,Cobtea te ho nen ami?" A lo ti sam et,rin loh takin.
"Aw ni e,ka U Cobtea leh Puia'n sum lu an thawh dawn a," ka tih chuan ka nu nuih a za ngang mai.
"Aw an pahnih chuan tum tir law law ta che u," a tia a nui khur dar dar mai.
Zanah chuan U Cobtea nen kan chhuak rual a,kum dangah pawh hetiang thil zawrh vel hi kan tih ṭhin avângin kan chhungte pawhin an lo phal ve mai a,ke a kal kan ni bawk a,Puia kan sawm phei a.An inchhung kan luh chuan Nu Hruaitei'n min lo be ve hlut a, "Chaw i lo ei a ngai,nangmah chiahin," a nui pah huah huah ,"Nu,sawm ngei ngei ang che,vawksa kan lei ang a ,a thin tam tawk awm na," Chawngthanpuia lah chuan a lo ti ve duah,rum em em hian ka va melh a,min melh ṭha duh eih lo lehnghal.
"Tehreng mai,Mate, chawlhni ah lo ei rawh aw," a tih leh chuan ka riat nawi khawp mai.
Lalrini te in kan thleng chuan Faka leh Chhana tih loh chu an lo awm ṭhap tawh a, "Cobtea a third-wheel animaw?" Nupuii chuan a lo ti zat.
"Nei ve lo pahnih te hi in sawi rem ve mai chi," Puia chuan a lo ti ve zeuh.
"Nei ve mai dawn mi?" U Cobtea'n a tih chuan kan lo nui thler duai,a inhmeh lo ve em bawk ani chutah Lalnupuii lah a nui ring ring ah a la ṭang zui a.
U Cobtea zak leh bawk si chu a lu thak lo pui a hiat a hiat ta ringawt a."Tih ve vat a ngai ang aw Cobte,i nau pawhin a neih khalh daih che hi," Rini chuan nui pat pat chungin a lo ti ve leh a, "A nui ring emai ,a buaithlak," U Cobtea chuan nui miah loin a ti leh a,a fiamthu tih ka hre reng a, Nupuii erawh a nui ngam tawh ṭhak lo .
Faka leh Chhana an rawn thleng chuan dawhkan kan ril bial ṭhap a,sachek siam dan tur vel te kan rel a,a kar lakah Hruaipatea leh Lalrini an in hnial leh laklawh ṭhin.Naktukah a bawlhlo kan lei ang a,Nilaini ah zawrh kan tum ani.
U Cobtea leh Puia chuan pawisa chu an thawh tak tak a,Dinsanga leh Lalrini an bazar dawn a,Nilaini zing karah siam kan tum ani.
Kan rel fel hnu a sana ka en chuan dar 9 pawh a lo la ri lo a ,kan leng ve ta reng a.
"Urlawk zan chu Cobtea te inah hmang ila?" Hruaipatea'n a tih chuan ,"A chi nang, Lawmdragon-a a awm ve reng te chuan bialnu te pawh kan kuah ngam nang," Puia'n a tih chuan ei loh hmel zetin an lo ner nang nâng hlawm a.
"Bialnu hi chu kan nei bik ṭhin teh e.." Hruaipatea'n a tih leh chuan ,"E...ka sawi ve mai ang aw ," Puia'n a tih leh chuan Lalrini pek chu hre chak ber ber ah a lo ṭang a,"Sawi teh ,sawi teh.." a ti sek sek mai.
Puia chu a nui ta mai mai a ,zanah hian Hruaipatea hi a len pui ṭhin tih ka hria,bialnu ve deuh a nei ani maithei ani.
Kan haw dawn chuan U Cobtea chu Nupuii thlah ve rawh kan tih avangin Nupuii chu a thlah ve mai a,Puia nen chuan muangchangin kan kal a,kan titi pah mawlh mawlh a.
"Chawlhni ah chuan chaw chu rawn ei rawh aw ,ka nu khan a sâwm tak tak che ania," a tih chuan ,"Vawksa thin te kha i sawi vak zel a,ka zak thei e," tih leh a hnunga ben ka rual a.
"Ei ah,eng nge nakina an mo tur i nia,lo hrilh hriat hmasak ve te kha a ṭha alawm," a ti duh leh a,ka ngei reuh zia chu aw.
A tukah chuan ka ṭhiante ho chuan kan thil siamna tur bawlhlo lei turin min rawn sawm chhuah an tum a,mahse ka nu in bel nawt turin min ti tlat bawk si a,ka chhuak ve thei ta lo ani.
"Tete,min nawh pui rawh,mipa tha leh hmeichhe tha chu a in ang lo emai,i nawt na zawk ang,"
"Ka hman bik lo,chhuat ka nawh dawn hi," vin zet hian min ti let erh a.
"Vansangzual,i hre ve viau ang aw,"
"Ka rawn spin mai ang che," min tih leh hnuah chhuat chu a nawt turh turh a .
Inchhung chet ah hi chuan ka nuṭa te ho hi ka fak ve thlawt ,nupui pawh nei dawn se an nupui te chu an vannei viau ang .Engmah han thawh hreh leh han thawh zah hi an nei ngai lo,a hman remchang changin rawng pawh an bawl ve mai a,kei an farnu neihchhun hi ka awl thawng letling zawk.
Midang hi an ni ve em ka hre lo a,ka nu erawh hunpui a thleng dawn hi chuan inchhung zawng zawng hi min tih fai tir a,parda leh cushion case thlengin a su fai duak a,chuan bel hi nawh tlet ngei ngei a ngai bawk.
"Khawnge Asangtea kha,in suk hi lo han zar rawh se," ka nu chuan bathroom aṭang chuan a rawn ti lang lang a,keiin ka u ka lo au ve bawk a.
Ka u chu step ah a rawn tlan thla a,in suk ho chu balbawm lian deuhah hian a dah a inchung lamah chuan a pawm chho zui a .
Tlaiah chuan ka room a ka mut der der laiin Puia hian min lo text a, "Mate,lo chhuak lawk ,in gate bulah ka awm," tih zawng hi a rawn sawi a.
Ka chhuah chuan a bike ah a lo ṭhu at a,min hmuh veleh chuan a bike te chu siam rem te te in ka hma ah tak a rawn ding a, "I mit kha han chhing teh," a tih chuan ka lo chhing ve mai a,chutah ka kutah hian thil eng emaw hi a rawn hmeh bel a,ka en chuan chocolate bouquet ani.
"Ehe...awi eng nge hetiang te i tih duh.." ka ti chul a,ka chocolate duh ber ber te an la ni zui.
"Pangpar zawk pek che ka tum a,mahse chocolate i ngaina sia.."
"Ka lawm e aw,awi an mawi hlawm si.." ka ti chul a,min nuih min nuih a.
"Lut rawh ,keipawh ka kal lehnghal ang,zanin chu ka rawn leng hman dawn lo a, mahse ka lo bia ang che," a tih leh chuan min rawn be ngei ngei turin ka hrilh a,keipawh inchhungah chuan ka lut zui a.
"Ale...va dawng lian bik ve," Tetea chuan min hmuh rual rual in a lo ti zat.
"Mate,i piancham ani bawk si lo," U Asangtea pawh chuan a lo ti ve nghal zat.
"Pianchamah kher an in pe ngai hleinem," ka lo tih chuan ,"U Vs,ka duh ve aw.." Tetea ani.
"Ka phal bawk lo," ka lei ka chhuah khum zeuh bawk a,a lo ner nung nung mai.
Inchung lamah ka keng chho a,ka dressing table hmaah thla te ka lâksak a,ka nui reng mai.Hetiang feelings ah la awm ngai hek lo,ka khi deuh reng mai ani.
Zanah chuan ka ṭhiante chuan naktuk zinga inhmuh khawm dan tur te an rel zung zung a,Mami pawh a rawn haw tawh a a lo tel ve theih tawh ka ring.
Puia chuan dar 8 velah min rawn call a,ka pickup vat. "Mate..." A rawn ti thum dut a.
"Umm,i chhuak em?"
"Chhuak lo a mahse ka chhuak ṭep,Hruaia te inah kan leng dawn a,leng hma ka rawn be lawk che,"
"Haw har lo la,"
"Har lo ang,lo la meng rawh aw,"
"Awle,ka lo nghak ang che.." ka tih leh hnuah chuan phone chu kan dah chhunzawm ve nghal a.
Puia hi ka tleirawl chhuah aṭanga ka hmêl duh ka tih tawh kha,ngaihzawng atana min sawm na pawh ka tan chuan chhan harsa lo tak ani.Inhmangaih tur pawh hian hun tam a lo ngai miah lo,kan ngaihzawng te kan duh tak tak chuan keichuan rei lo ah hmangaihna a rawn piang ve nghal ka ti.Ngaihzawng dang ka la nei ngai lo a,Puia hi a hmasa ber ani,ka tan chuan heng thil ho te min tih sak ṭhin te hi a hlu a,a vawikhatna vek anih avang pawhin a feelings hi a nuam ngawih ngawih.
Puia nghah chhungin inhnuai lamah ka nu leh pa Tv en na ah chuan ka zuk ṭhu ve reng a,ka pa hi thingpui ngaina ngang ania,a bulah hian flash in a inchhawp tawp ṭhin, "Mate,ka thingpui hi a zo dawn tlat,min va lum lawk la.." a tih chuan ka tho tharh a ,choka lamah chuan ka zai phei rat rat a.
Choka ka va thleng chuan Vansangzuala hian chocolate a lo ei mial mial a,min hmuh chuan a phu zawk lehnghal a.
"Vansangzual,ka ta i la animaw?"
"A teuh lo mai.." min en zuk zuk paha a tih chuan pakhat a keih thla leh pawp.
"I chak dawn lo aw. Nu....Vansangzuala hi ka thil a la ru," ka ti lang lang a.
"Nu....U Puia'n chocolate tam tawk a pe a,pakhat chiah ka ei sak ve a ,a uikawm lutuk,"a ti let pang pang a,chutah a hnungah chuan ka chum sak pawp.
"Awi,in mak unau lutuk,naupang chhia pawh in ni tawh lo,Vansanglur nangpawh ei tir ve mai ta che,lian deuh i rawn pawm haw ṭun ṭun a," ka nu chuan a rawn ti phei hlak hlak,Tetea chuan ngeiawm zetin min han melh lehnghal a.
Tetea nen hian kum 3 in kan in thlau a,kan thil duhzawng vel hi a inang thei khawp a,naupang chhia taka han in hauh vel pawh hi kan la hrat viau .
"Vansangzual nangpawh eng nge khatah i tawm reng,lehkha han zir rawh,pawl i sawn theih loh vaih chuan i zak khawp ang ," ka nu in Tetea zawk a tih chuan min melh dan ang chiahin ngeiawm zetin ka lo melh ve a,choka aṭang chuan a chhuak rang khawp mai.
Dar 10 velah inchungah ka chho a,phone ka en chiah chu Puia message leh missed called a lo awm leh nual tawh,ka call let nghal thuai a.
"Hello..."
"I mu tawh ami?" Lehlam ami chuan a rawn ti dut dut a.
"Mu lo deuh,inchungah phone ka lo dah daih a,"
"Hei keipawh ka thleng chiah,"
"Naktuk zing kha Hruaia te inah anih kha aw,an veng a laili ber a,zawrh pawh a awlsam ang," Puia'n a tih chuan phur tak ka ni.
"Ka lo lam ang che.." a tih zawm zat a.
Ka mut fel hnu chuan group-ah naktuk chhuah dan tur vel kan rel a.Zing dar 4 ah thawh tur an ti hem mai.Hmeichhe ho chuan hma kan tih thu kan sawi tliar tliar a.
"A hma lo,a bawlhlo vel tih chhung nen,zing karah a ṭhen kan zuar hman ang a,zingkara kan hralh bang chhunah kan zuar leh ang," Hruaipatea chuan a rawn ti leh a.
"Cobte,Nupuii va lam mai rawh aw,Mami chu Faka nen an rawn in thurual thei ang a,Lalchhana hi chu duh leh Faka te rualin rawn phei mai rawh.Matei leh Puia chu chiangsa ania," Lalrini chuan a rawn ti leh zung zung.
Midang chuan an hnial hran lo ani ang engmah an sawi nawi lem lo.Zing thawh hma kan ngaih avangin kan mu hma ṭhep ṭhawp hlawm khawp mai.
Ka alarm ri chu ka hre leh ṭhin a,ka mut a la chhuak bawk si ka lo chhing leh ṭhin chutah ka kawngkhar hi an rawn kik dat dat a,ka va hawn chuan U Cobtea a lo ni.
"Dar 4 a ri ṭep ania,midang ho chu an tho vek tawh,insiam ve vat rawh," ka u in a tih chuan ham bai bai chungin bathroom lamah chuan ka lut a.
Sunscreen leh hmui rep damdawi ka inhnawh leh hnu chuan ka sam chu sang deuhah ka ṭawn a,mut kham lo deuh chungin ka u nen chuan inhnuai lamah kan in zui thla a.
Puia chuan gate bulah min lo nghak a,U Cobtea'n Nupuii a lam chhungin keiin kan in kawtah kan lo nghak a.
"Zing tho hlim hmel pawh i pe tha khawp mai," a ti thum dut dut a.
"Ka mut a chhuak.." ka lo ti ve bawk.
Khua lah chu a la thim ṭha khawp mai .Vanah chuan zing lam arsi an phe sep sep bawk a.
"Lo kal teh.." a tih chuan a ban chu ka vuan vat a.
"A vawt sia,ka lo kuah lum ang che.."
A awm ah chuan ka bei hle hle a,nuam ve mai mai tak ani.
"Ka kuah bo vek thei dawn che anih hi," fiamthu a a tih chuan ka lo nui hak hak a.
Kan ṭhiante ho pawh an rawn lang har lo,an bike thawm kan hriat rual rual in kan in thlah nghal a,ka u chu awm ve lo se ka kuah char char ang.
Kawn Veng lam pan chuan kan in zui diah diah a,a la hma ve bawk nen keini ṭhianho tih loh chu mihring hmuh tur pawh an la awm lo.
Sachek chu belpuiah kan siam hluah a,hmeichhe ho in phuihnam kan lo mal a,Lalrini leh Hruaipatea a kar lakah an han in hnial leh bap bap ṭhin a,kan lo nuih pui nasa thei khawp mai.
Dar 6:30 velah chuan sachek pawh a hmin ṭha var var tawh a,Hruaipatea te inkawtah kan ṭhut pui a,Lalrini leh Hruaipatea chu a au tu ah an ṭang a, "He lamah sachek tui sial em em mai,a ei tawh ten an zawngchhang em em mai kan nei e," Hruaipatea chuan a ti lauh lauh a.
Zing karah chuan a chanve aia tam kan hralh nghal a,rin ai daihin an rawn lei nasa a.
"Cobte,pawisa kha nangman kawl zel rawh," kan tih chuan ka u chuan pawisa bag chu a ak nghal sawk sawk a, "Midangin an kawl chuan a buaithlak tumah ka ring lo,pawisa nawi kir dawnah an buai thei bawk si a buaithlak," Hruaipatea chuan Lalrini melh zeuh zeuh pah chuan a ti a.
"I zak em Lalhruaitluang,nichinah te kha chuan a rawn nei nawi em anihkha," Lalrini chuan a lo ti pawr ve hlar.
Chaw ei tûrin kan haw darh a,chaw eikham lamah zawrh leh kan tum a,kan rinai takin kan hralh ṭha a,nuam ve duh tak ani.
"Tukin chu,i nu a mangang hman alawm," ka pa in chaw ei laia a tih chuan a chhan kan lo zawt sap sap a.
"Matei han khaihthawh a tum a ,a lo awm si lo a ,i Nu Hruaitei rawn lut in Puia a rawn zawng bawk a,in tlan dun emaw kan ti hman alawm," ka pa chuan nui hak hak in a ti a,ka phone ka lo silent daih a,min lo biakna pawh in ka thlen hnuah chauh ka hmu kha ania.
"Cobtea lah nidanga tho har ngai lo kha a tho har a ti deuh aniang a han kaitho a,a lo awm bik si loa,kan rawn phone khan chanchin kan hre chauh alawm," ka pa chuan a lo tih zawm zat.
"Thil tih tur in neihin ngawi rengin ti tawh suh u,engmah pawh in sawi lawk bawk si lo a,tlem a tlem ah kan in zawng mualpho lo chauh anih kha," ka nu chuan a lo ti ve hlak hlak.
"Awi a hrim hrim in,ka nu te pawh pasal nei rual pawh ka la nih loh hi,mi in ring chhe emai aw.." ka ti ve hlak hlak a,ka u te ho nuih a lo za,U Alawma pawh a nui ve suk suk mai.
"A ṭha,khatiang tur kha, ngaihzawng neih te chu in kum nen pawh a in rual tawh a,pasal neih lam rilru kha chu la put miah lo tur," U Asangtea pawhin a lo ti ve bawk.
Chaw eikhamah chuan U Cobtea nen bawkin kan in zui chhuak leh a.Ka u nen hian kum zawna piang kan ni a,kawng engkimah pawh kan in thurual thei khawp mai.
Puia te in kan thlen chuan Nu Hruaitei'n zingkara thil thleng te chu mittui tla phunga nui chungin min lo hrilh ve a ,"Awi Mate,Puitea bula ka sawi phei chuan a lawm lo rapthlak,phone in la thei si lo a,Cobtea kha be lo phei ila kan mangang dawn lutuk," nui uar uar chungin a ti a,an lo mangang hman tak tak viau ani ang.
"Ruk ngai lo in Matei te chu a hun takah ka nei chat mai ang," Chawngthanpuia lah chuan a ti lung lung a,Nu Hruaitei lah chu a lawm ber ber ah a lo ṭang a.
"Phone kha silent tawh suh u,thil pawimawh a awm in a buaithlak," pawn kan chhuah rualin U Cobtea chuan a ti a.
Phone hi silent mode a a awm loh hi chuan group leh thil dang neuh neuh a a rawn ri sek hi ka ning ṭhin a,ka lo silent leh nge nge ṭhin a,ka u in a sawi takah chuan ka siam ṭha nghal thuai a.
U Cobtea'n Nupuii a lam chhungin Rini te inah kan lo nghak a,Dinsanga pawh a lo awm der tawh.
Ka u te pawh an rawn thleng har lo,an rawn thleng chuan an rawn chhuk leh te te a.
"Ka pu in serthlum in zawrh dawn chuan Christmas leh Kumthar inkarah zuk lo ula min tia,pawihmualah," Nupuii'n a tih chuan kan lo phur hlawm khawp mai.
"A tih chi ngawt ang,28 ah hian kal ila," an tih leh chuan phur tawh tak kan ni.Nupuii Pu te pawihmual hi hla deuh mahse a hmun a nuam em em a,sangha dil te pawh a awm in ka hria.
"Kan picnic nghal animai," Rini'n a lo ti ve bawk a.
Faka te ho an rawn thleng takah chuan kawn veng lam pan chuan kan in zui leh diah diah a.Zing ka tho hma bawk nen ka lu te chu a rit luk a,ka mit a kham em em bawk.
Hruaipatea te in kan thleng chuan a ngai te te in mipa ho chuan meizial te an han zu khawmuang leh a.Hruaipatea meizial zu zo chu a au leh lauh lauh a,kawng kal ṭhenkhat ten an lo fiam zuk zuk pah bawk a.
"Ehe,Mate saw Thlawihmeltha-i.." Mami'n a tih chuan Thlawihmeltha-i kan lam pana rawn kal mek chu kan lo en nghal ṭhap a.
"A hmel saw chu a ṭha ve thlawt alawm,a hnute a lian bawk si," Nupuii pawh chuan a lo ti ve bawk a chutah ka hnute ka en ve vat,in mawi hleih va va tak ani.
"Ahh tikhan ti tawh suh u, Matei a hmelṭha zawk fe," Lalrini chuan a lo ti ve zat.
Thlawihmeltha-i hi U Asangtea te nen an inrual vel ka ring,a hleitling em em a,a hmelṭha bawk.A tleirawl chhuah tirh khan kan khaw ṭhenawmah pasal a nei thut a,mahse kum tam pawh an in nei hman lo heti hian a rawn haw leh a.A fanu pakhat a awmpui bawkin ka hria.
"Ka lo dawr ve ang che u," a rawn tih chuan Nupuii chuan min lo sik zeuh a,Hruaipatea chuan a lo be ve luam.
"Tunlai chu in va rawn leng khat ve," Puia melh chunga a tih chuan Puia hmel chu ka en vat a,amah pawh en lo chuan ,"Leng chhan tur awm tawh hek lo," a lo ti hluk.Lalrini leh Nupuii tui in lai mek pawh chu an rawn phuh ṭhawt mai.
Mahse Thlawihmeltha-i chu a la nui sang a, "Thingpui tui deuh ka lo lum ang che u rawn leng rawh u," a la ti hram,zak thei lo chu ka ti ve deuh.Ka lo ner nak a,Puia Rini'n min rawn nghawk zeuh,ka in siam ṭha leh nghal thuai a.
"Hei, Matei Thingpui lum hi tunlai chu a tla na deuh zawk aniang," Lalrini'n nui hak hak chungin a lo ti ve a, Thlawihmeltha-i pawh a nui tawi tek tawk hle.
Engmah pawh sawi zui tawh lo chuan pawisa te a pe a,a kal ve lehnghal mai a.
"I lo dam ṭhin maw,aw di hlui..." Hruaipatea chuan a sa pah rat rat,ka lo melh rum viau.
"Vansanglur khati khan min melh reng reng suh aw," fiamthu a a tih chuan lei ka chhuah khum vak ringawt.
"A zak lo reuh e.." Mami'n a tih chuan Lalrini leh Nupuii'n an lo tuihnih zat.
"Matei a hmelṭha daih zawk," Lalrini'n a tih chuan , "Hmelṭha daih zawk.." a awki ang chiahin Puia chuan a lo ti ve bawk a.Kan lo nui dar dar.
Sachek pawh kar loah kan hralh zo a,kan hmel pawh a chuai hlawm tawh khawp mai.
Kan pawisa hmuh zat te chu kan han chhiar a,Puia leh U Cobtea pawisa kan hman sak kan dah hrang bawk a,chumi tello pawh chuan kan pawisa hmuh chhuah chuan ar pum hnih man chu a daih var var a,a la bang zan bawk.
"Tikhan,Puia nen kha chuan kan thawhbelh ni mai rawh se,min pe kher duh suh u," ka u in a tih chuan an lo lawm hlawm khawp mai.
"Apple juice la ve ang i," Lalrini chuan hmeichhe ho hriat tham lekin a ti a,hetiang lam hi kan tih ngai loh avangin a tirah chuan kan aw hreh khawp a,mahse a sawi a sawi takah chuan kan phur tawh hlawm khawp mai.Hmeichhe ho chuan a rukin pawisa kan in thawh khawm leh a,naktuk mai anih tawh avangin Lalrini kutah kan dah ta bawk a.
"Naktuk zan chu engtin nge ni dawn?" Hmeichhe ho in kan tih chuan ,"Hruaipatea te inah hian kan hmang mai dawn ami nge Lalrini,"
"Keichu Lalrini te in bak ka thleng thei lo ang,kan ti zawk mai dawn ami?" Ka tih chuan min lo hnial lo hlawm khawp mai.
"Nia kan inah ti mai ang u,a pi bak a awm dawn lo a.Mipa ho khan chhunah ar lei tur te chu lo ngaihtuah ula, hmeichhe ho in frozen food lam te kan lo en ve thung ang a," Lalrini chuan a ti leh zung zung a.
Hmeichhe ho in frozen lei na tur te chu ka han la hrang leh a,"Lalrinsangi kha a lo hlep leh hram ang e,Cobte chhut thlap rawh," Hruaipatea'n a lo ti zat zat a.
"Ve ziah a che Lalhruaitluang,nang ang ka ni lo aw,"
"Cobte,a zat tur chiah chiah kha pe rawh,"
Chutah Hruaipatea lu chu a ri nghal pawp, "Ka ning tlat Lalhruaitluanga hi,tikhan min ti bik ziah suh aw," Lalrini chuan a ti pang pang a, "Hahaha...Laldinsanga hi ka va khawngaih tâk.." Hruaipatea'n a tih chuan Dinsanga pawh a lo nui ve ta ringawt.
Zanah chuan hmeichhe ho bik chuan kan group ah Apple juice kan in dan tur vel te kan rel a,um 2 ngawt kan la a,naktuk zanah mipa ho ai thleng hmasak kan tum ani.
"Mate, naktuk zan chu Beer chiah in ve i phal em?" Puia'n a rawn tih chuan keipawhin Apple Juice ka in ve dawn tho alawm tiin ka lo phal ve mai a,mahse kan thil tih tum hi chu Puia pawh ka hrilh ngam lo,a phal dawn lo chiang lutuk a.
Urlawk ni ah chuan chhunah ka nu Venghlun lamah a a kawr ṭhui te ka va lam pui leh a,a mawi khawp mai.Haw kawngah chuan zanin a kan hun hman dan tur te chu ka sawi zung zung a, "I u ten an phal dawn em ni," a tih chuan ,"Min sawi sak ve la,in fate an nia.Eng nge an thu thu a in awm ziah," ka ti pang pang a.
"Chu lam ani lo,an ni chu an puitling tawh a,nu leh pa te pawh hian fate rawn chin te kan neih ve a ngai alawm.Nang phei chu an farnu neihchhun i nia,an khuahkhirh ṭhin che pawh hi a awm lutuk," ka nu bawkin a ti leh a.
"Lalrini te inah alawm,a hla hleinem," ka tih chuan aw min pawh chiah lo mahse a phal tih ka hria.
Tlai chaw ei lai chuan U Cobtea ka sawi tir a,U Alawma'n ṭul lo a ti leh pek khawp a.
"Matei te chu kan inah hmang zawk ula," a tih pawh chuan, "Kan sawi fel vek tawh alawm,chu lo ah pawisa te pawh zanin atan te hian alawm kan in tuak," ka ti niah niah a.
"Lo haw har suh ang che,i lo haw har chuan ka rawn hruai dawn che ania," ka u bawkin a tih leh a.
Chaw kan ei zawm mawlh mawlh lai chuan , "Nu keipawh rei lo tê ka chhuak lawk dawn aw," Tetea ani.
"Han chhuak rawh mahse rawn haw har lo ula,i u sawi ang khan," ka pa chuan a lo ti charh charh a.
Zanah chuan U Cobtea hman hmain ka chhuak a,Puia pawh be ta lo chuan Lalrini te inah chuan ka kal tlang nghal a.Ka thleng chuan hmeichhe ho chu an lo awm ṭhap tawh a,Lalrini chuan a room lamah min hui zauh zauh bawk a.
"Lo kal ru,ti vat vat ang u,mipa ho rawn thleng hma in," tih pah chuan Apple juice chu a thli a,dispo cup a lo in tum thlap bawk.
Ka vawikhat in na ani bawk nen a tirah chuan tui lo ka ti khawp mai ,mahse Lalrini pek chuan a sehhmeh tur nen zawng zawng a lo in ring sa diam a,sehhmeh nen chuan a tui ka ti ta phian lawi a,no 3 lai chu ka in hman.
"Awi keichu engtin mah pawh ka la awm lo," Nupuii'n a tih chuan ,"Nakinah zan rei deuhah kan in leh dawn ania,um 1 kan in zo ṭep," a ti leh a.
No 1 ṭheuh kan in leh a,puar laia in kan nih avang nge ka rui pawhin ka hre lo mahse Apple juice chu tui tak ani.
Puia te an rawn thleng chuan an rawn ri lut ham ham a,mahse le a rei telh telh a hmeichhe ho chu kan in melh leh hrek hrek ṭhin.Ka lu a rawn hai muai muai a,mahse a nuam tawk khawp mai ka awm dan chu.
"Zanin chu i awm dân ava mak ve.." Puia chuan min rawn thlek leh ṭhin.
"Hmm, engtin vak nge ka awm?" ṭi ru zeta ka tih chuan thlek takmeuh hian min lo thlek a, "I mitmeng kha a mak,i ṭap ami?" A ti heu mai,min rawn thlek hnai ang reng bawk sia,ka tho ah a nam chhuak ang tih ka hlau chu ka lu ka thing mat mat a.Mahse Lalrini khan a rim a na lo a ti in ka hria.
"Nakinah thil ka pe ang che aw," a tih chuan keipawhin a thil tur Aizawl ah khan ka lei sak ve ngei a mahse ka ken theihnghilh daih tih ka hrechhuak.
"Awi,i thil tur pawh ka lei asin mahse ka rawn keng theihnghilh daih.." ka ti zui niah niah a.
"Engmah a ngai ve kher hleinem,nakinah ka pe ang che," a tih zawh rual chuan ka hmui ah chuan a rawn fawp zeuh a ka lo ip chawih mai.Vanneihthlak takin eng rim mah a hre lo aniang engmah sawi zui lo chuan pawnah ar an va puah a.
Hmeichhe ho chu inchhungah fiamthu te thawhin kan nui ring ṭhin khawp mai,Lalrini Pi lah a inkhawm daih a,keini ṭhianho ah erawh inkhawm kan awm lo thung.
Eitur kan peih fel meuh chuan dar 11 a lo pel leh reng tawh.Mipa ho pawh ka u tih loh chu a khat tawkin Lalrini room-ah an in luh chhawk leh reng tawh a,U Cobtea erawh ṭhuthlengah games a khel a Nupuii nen an ṭhu dun ran mai.
Eitur kan ei lai chuan Hruaipatea leh Chhana chu an kai ṭha khawp a midang ho erawh an pangngai hlawm viau.
"Lalrinsang,ka hual tak i ei leh ta." Hruaipatea'n a ti leh hluk hluk a,Lalrini lah lo duai duh bik lo ,"Ve che,i hrawk châk châk nên aw Lalhruaitluang," a ti zui pang pang a.
Thil kan ei zawh ah a hmun te kan seng fel zawh hnuah chuan Lalrini chuan hmeichhe ho zawng chu a room ah min ko hrang a,um 1 dang a rawn la chhuak leh zal zal a.Mipa ho kha chuan meizial te an zu a,an titi tui bawk a an rawn luh kan ring lo.
"Kha ti vat vat ang u.Beer hi tlem telh ang u ," a tih chuan a rawn thli nghal sawk sawk a.No 2 vel kan in hmu chuan Mami chuan ka luak a chhuak lutuk a tih avangin a duhtawk der a.
"Mate,nangmah khan in zo tawh nichin khan i in tlem ber," Nupuii'n a tih chuan ,ka duh lo ti na hman pawh a awm lo min rawn thlit zo nghal vek.
Thil kan lo ei zo chiah bawk nen ka luak chu a chhuak hlui a,ka lu lah chu aw hai ṭha mem mem tak ani.
Lalrini khumah chuan eng khaw sawi set set lo chuan ka bawk thlawp a,Nupuii pawh keimah ang tho in a kai ṭha khawp mai,ani phei chu chhuatah a mu nuai a.
Chutah Puia rawn lut te chu ka hmu phe vek ,"Eng nge awmzia?" Puia'n a tih hluai ri te chu ka mang hriat ruai ruai chutah "Vansanglur,eng thil nge i tih?" Tih paha min rawn sawi chiah chu ka uak nghal ṭhawt chutah ka insum hman lo ka luak zui bawrh bawrh.
"Ehe,ngatinge?" U Cobtea tih ti te chu hre mah ila ka luak bawrh bawrh.
Ka duh tawka ka luah hnu chuan zawi ngiai hian ka mu leh a, Chawngthanpuia'n min melh rum em em tih pawh ka hre reng.Lalrini leh Mami'n ka luak chu an rawn thian a,ka inthlahrung bawk si mahse tih theih ka nei bawk silo.Ka zawi vek ka che thei lo reng reng .
"Engtin nge khatiang ten i haw ang a?,ka u in a hriat vaih chuan a pawi viau ang aw," U Cobtea'n a tih te chuan ka rilru chu a rawn hah nghal zawk zawk.
"Ka lu a hai.." ka ti chhuak sep a,ka uak zui nghal mahse luah em chu ka luak tawh lo.
"Hai ve bawk ang chu ,Lalrinsangi pawh eng nge khatiang te i pawlh," Puia'n a ti vin hluk hluk a.
Dar 12 a pelh hnuah pawh chuan che chang peih ka la awm lo,Nupuii phei chu a chatthla fel der tawh.
"Puia paw haw mai rawh," Hruaipatea'n a tih ri te chu hre vek mah ila ka che peih thlawt lo ani.
"In in thleng hma thleng ka pua ang a,in in luh dawnah kan kuah lut mai dawn ami?" Ka u bula a tih chuan min melh rum dun khawp mai.
"A mipa zawk pawh hetiang hian ka awm a," ka u in a tih chuan ka zak chem chem.
Puia'n min han paw tur te chu ka luak a chhuak bawk si,amah lah a zei lo bawk si a samah te chuan ka ṭham leh vak ṭhin.Ka u phone hmang thawm te chu ka hria a ,ka chhungte ho chu an lo la meng vek dawn tih pawh ka hria.
Puia hnungah chuan ka bei thlam a,ṭawng pawh ka ṭawng peih tawh lo,ka ṭawng vaih chuan ka luak nghal ang.Kan gate luh dawnah chuan dim fahran in min nghat a,U Cobtea nen chuan min kuah lut a.Lalrini leh Mami'n min rawn zui ve haw bawk.
Step min chhoh pui lai te chuan ka pum aṭang hian a rawn in pump a,ka luak chhuah zia mai chu aw.Vawikhat mah ka in tawh lo ang ka ti rilru pah mawlh mawlh.Chutah kawngkhar chu ka u in a hawng chiah a kei ka in sum hman tawh lo ka luak leh bawrh a.
Ka chhungte ho chu an rawn thleng phei rang viau.
"Eng nge awmzia?" Ka luah bawrh bawrh laia ka nu in a tih chuan ,"Kha juice an lo in ve anihkha," U Cobtea chuan zawi sep sawpin a ti a,ka uak bawrh bawrh ri tih loh chu midang chu an reh nghal ṭhap.
End of chapter-6
ZIAKTU : MALI PACH
Zingah chuan a message chu ka reply ve ta chiah a,nizanah kha chuan reply dan tur ka ngaihtuah mek laiin ka lo muhil daih pek ani.
"Keipawhin ka hmangaih reng ang che ,chatuan aia rei ka hmangaih ang che.." ka ti ve ta ringawt a,ka zak leh hnuhnawh a delete leh te ka tum ut ut a mahse a zahthlak loh,ka hmangaih alawm tiin ka in fuih phur chawp leh vel a.
Ka nu a nuam sam lo bawk nen kan unau ho chuan choka ah kan che suau suau a,chaw te kan ei fel hnu chuan ,"Nang chu i insiam rei thei bawk sia,lo han insiam mai rawh," ka u ten min tih avangin ka lo han insiam a.
Dar 10 velah chuan ka ṭhiante ho pawh an lo thleng ve ta hram a,nizan lama ka sawi kha min zawt zui nasa mai keipawhin phur takin ka lo hrilh leh zat zat a, "Awi Mate,ka sawi kha U Puia hian maw a duh takzet che,i zunah hian a uai hneh tawp..." Rini'n a tih chuan Mami leh Nupuii pawh chuan an lo tui hnih ve zat a.
"Chu chiah,a bialnu hlui te ho kha a ti lang ngai vak lo a,a tih lang ve pawn a chang leh min hide a,a chang leh a bialnu te chauh hmuh theih turin a dah ṭhîn a mahse maw nangchu i ni ve lo,ka u pawhin tukin khan min zawt alawm," Mami'n a tih leh chuan ka zak leh hnuhnawh a,Mami chu Valpuia te ho pawhin Puia status an hmuh chuan kan khua ah chuan kan lar hat dawn anih hi.
"Sawmtea pawn min rawn zawt alawm.." Nupuii chuan a lo ti ve zeuh a mahse Sawmtea leh Puia pawh an lo in hmelhriat tih ka lo theihnghilh daih.
"A ho emai,ka bialpa hlui pawh ani chuang hleinem," ka tih chuan min thlawp hmel hlawm khawp mai.
Biakin kan thlen chuan tlar lai a hma lamah kan ṭhu a,inkhawm a rei reuh khawp mai,ka hawi kual vak ngam lo a Puia te ṭhutna pawh ka hmu thei lo.
"Va in thup thei ve.." biakin sir a kan ding lai chuan Sawmtea hian a lo ti zeuh.
"Thup vak ami?"
"Umm,bialpa i nei lo emaw ka tia.."
"Nia...aaa..ka nei ve..." Ka sawi zo hman lo Puia chuan min rawn kuah thawr.
"Sawmsek,ka bialnu hi biak vak ka phal lo ania aw.." fiamthu hian a rawn ti phawr phawr.
"Be lo e...thil ka zawt mai mai alawm," Sawmtea'n ṭha deuh a a tih chuan ka lo thaw huai mai.
"Thingpui kan lo in dawn..." tih leh min kalpui a rual a,Sawmtea pawh chu engtin nge a awm tih pawh ka hre tawh lo.
"Vansanglur,i va in ti thei," ka awm ṭha hle hle lai chu Hruaipatea pui chuan min ti ringawt.
"Ringawt a che,eng ah chuan nge ka lo in tih theih a," ka ti zui ve pang pang a.
"Ele..Chawngthanpuia status hi khawchhung mi a chanve velin an hmu vek a,"nui keh hui chung chuan a ti a, Lalrini pawh a lo nui uar khawp mai.
"Pitar leh putar number thlengin a nei kim lutuk mahse a status hi maw a bialnu hlui te ah kha chuan an mahni hmuh tur chauh ten a dah ṭhina mahse nang chu I U Alawma chiahin a hmu thei lo,"a tih leh chuan ka bula kal mek chu ka va en leh a,a lo nui sawng mai.
"Awi,ka nu leh pa pawh chuan i nu leh pa pawhin an hmu thei maw?" Ka tih chuan ,"Thei vek e,in zep ṭit ṭet ka peih lo," a lo ti sam et a,keiin puitling ho number ka neih zawng zawng chu ka hide vek a Nu Sawmi kha ka hide theihnghilh mai pawh a.
Kan inah chuan an rawn leng a,ka nu a nuam sam lo bawk nen an ngawi ve dak hlawm a.Thingpui leh chhang kan ei a,mipa ho chuan leng an rawt a mahse ka nu a dam sam lo bawk nen ka kal ve theih loh tur thu ka hrilh a, hmeichhe ho ah chuan Rini chiah kal ve a tum ta bawk .
"Mam ,naktuk ah maw Aizawl chu in kal ang?"
"Aw,zan khat bak kan riak thei dawn si lo a,zing karah kan chhuah ka ring,"
"Keichu ka u puanthan min hawn hi ka duhthu a sam lo lutuk a," Nupuii chuan a lo ti ve niah niah a.
"Aizawl chu thil a to lutuk,U Asangtea phei chu lo kal ve lo se lei pawh kan lei ngam lo ang," ka lo ti ve bawk a.
"Keichu Nu Hruaitei ka chah a ,an rawn lei thiam ve khawp mai," Rini ani.
"Lalrinsangi thil lei hautak zia chu,video call zel angai bawk si,video call dawnin bazar ah signal a chhe thei bawk si amah zawk hi a rawn thinrim a," Puia chuan a lo ti ve bai bai ,Lalrini a nui hak hak thung a.
"Kan in video call a,a net a chhe bawk si a tang reng a,a hmelchhiat theih zia chu maw Mate," Lalrini bawk chuan a ti leh a ,Puia a lo ner nung nung mai.
Mipa ho chu an chhuak ta diak a, "Ka leng rei lo ang,ka haw veleh ka lo bia ang che," Puia chuan a ti sup a,ka lu ka lo bu nghat nghat .
Ka ṭhiante ho nen chuan Christmas kan hmang ho dan tur te kan rel a,mipa ho awm lai khan kan lo sawi theihnghilh a hman ho an rawt leh ngei ang a, urlawk zan leh kumhlui thlah zana kan thil ei ho na tur pawisa tuak nan thil te kan zuar ṭhin a,mahse kumin chu thil dangah kan buai lutuk a kan lo manghilh daih ani.
"Ka pu te huan a serthlum saw a ṭha hlawm sia,ka pu ka lo hrilh ang a kan zuar mai dawn ami? " Nupuii chuan a ti a,kan lo pawm tlang hlawm khawp mai.
"An hauhna zat te kha chiang deuhin zawt la,keipawhin zawrh tur ka lo ngaihtuah ang," Rini ani.
"Lassi tui te siam ila ,kan hralh thei angem?" Mami pawh chuan a lo ti ve nghal zat a.
"Zanah group ah kan sawi ho dawn ania," kan ti ta a.
Tlaiah chuan ka pi in ka nu a rawn awmpui chawt a,Tetea nen eirawng kan bawl bawk, ka phone ri leh ṭhin chu ka hria mahse tomato ka vel laklawh em avangin ka chhang lawk hman loa,mahse le a rawn rik tak sek ah chuan ka va la ta,Puia ani.
"Hello..."
" I thinrim chuan sawi ṭha ve mai la" A rawn ti nghal thawr,mi lah buai em em in kan awm a.
"Hmm,eng vang ngawtin nge ka thinrim ang," ka tih chuan ,"Ka message pawh i chhang duh si lo," a rawn ti leh a.
"Awi naupang chhia pawh kan nih tawh loh hi,ka thinrim hleinem,rawng ka bâwl a, phone pawh ka khawih hman lo," ka tih chuan a lo nui hawk hawk.
"Ka haw tlai reuh sia,i thinrim emaw ka lo tia,anihchuan i thinrim loh chuan a ṭhat chu,keipawh ka thleng tawh aw,rawng kha bawl leh tawh rawh ,zanah ka rawn leng ang," tih leh phone chu dah a rual a,dek pawh ka ti hman tawh lo.
Zanah chuan in leng neuh neuh kan nei a,ka nu a dam sam lo tih hria in an rawn leng hlawm a, hetiang nuaih nuaih kar a in leng neih chu a chi dawn in ka hre lo a Puia chu ka be ta ringawt a.
"Hei,inleng kan nei nual a,lo len chu a chi dawn ami?"
"An haw hunah min lo hrilh la,ka lo hmu zuai ang che,ka ngai che alawm.." a tih chuan ka nui var var mai,min hmu thei lo mai pawh a.
"Mate,hetah hian lo kal teh.." Nu Hruaitei chuan min hui zauh zauh a,Pa Dawnga nen ka nu an rawn kan ve ani.
"Puitea nen hian in ti ve tak tak ami?" a bula ka ṭhut rual chuan a ti a,ka zak lutuk chu ka biang a sen pap pap in ka ring.
"Aaa...aw..ti ve deuh.." ka ti bah niai a ,"E..i pa Dawnga nen pawh kan lo sawi a,kan lawm khawp ania.Ngaihzawng ṭha mawlh mai hi a nei lo ang tih kan hlau a," a ti leh a,sawi tur pawh ka hre tawh lo.
"Nia,keini pawh kan lawm asin,chhungkua pawh kan in hrechiang a,kan in pawh bawk a.Puitea pawh hmundanga a len ai te chuan hetah te lo leng se,inchhungah in kawm tam se.." ka nu pawhin a lo ti ve charh charh a.
"Ni e,Matei pawh rawn leng ṭhin la,nangni leh keini ah te chuan engmah zah tur a awm lo ania," Nu Hruaitei bawkin a ti leh a.
Engmah pawh ka sawi ve ngam lo,ka zak em em a,ka kut ka kheuh ka kheuh ringawt.
Dar 10 velah chuan Tetea nen chiah inhnuaiah kan awm tawh a,Puia pawh ka bia a, a rawn thleng har lo a bike ri ka hriat rualin pawnah ka chhuak a,Tetea ka mitmei ru zeuh bawk mahse a hrethiam kher lo ang.
"I bike hi a ring thei bawk si,in in a hnai tho a eng nge i rawn ken kher zel?" Ka ti hlak hlak a,a lo nui suk suk duh chauh.
"Lo kal teh,ka ngai che," tih leh min kuah a rual a, keipawhin ka kuah let ve nghal a ,a rimtui tak chu a rawn nam leh chek chek a.
"Engtik lai mai pawh hian ka ngai che a,i bula awm hi ka kham thei lo," a ti sup sup a.
"Keipawhin ka ngai che ..."
"Tlângah i kal duh em?" A tih chuan a lam ka hawi chho ha, "Awi ka chhungten min man chhuak palh ang,"
"An la mu lo ami?"
"Tetea a la meng a,"
"Kan hrilh dawn nia," tih leh Tetea chu phone a rual a.
"Tête,i u hi tlângah ka kal pui lawk dawn a,lo la muhil suh aw," a ti zung zung a,chutah phone chu ka lâksak vat, "Tete,kan rei lo ang, kawngkhar lo kalh suh aw,lo la meng char char rawh," ka ti zung zung a.
"Ka u ten an man che chuan min mawhpuh miah suh ang che," a rawn tih chuan ka lo aw ve vat a .
Tlângah chuan kan in phur chho vawk vawk a,thlasik boruak thiang leh vawt var hnuaiah a hnungah chuan ka beng thlam a,arsi lah chu vânah an de sep sep a,khawlai reh ruih hnuaiah chuan amah chu ka thlamuanpui a,hlauh lam engmah a lang lo .
Tlang kan thlen chhoh chuan thli a lo tam khawp a,theihai kung hnuaiah chuan min ṭhutpui a.
"Zan boruak chu a nuam hle mai," van lam en chunga a tih chuan, "Arsi tam zia khi enteh,an mawi hlawm tiraw?" Van lam en chung chuan ka ti ve sap sap a.
"Umm..nangmah ang chiaha mawi an nih khi," a ti sup sup a.
"Min hmangaih reng ang i ti tiraw?" Ka tih chuan ka lam a rawn hawi vang vang a.
"Ka hmangaih reng ang che,Mate..." fiah taka a tih chuan ka ringhlel lo.
"Keipawhin,ka hmangaih hmasa ber i ni a,a tawp na pawh i ni ngei ang," ka tih chuan ka biang tawn tawn ah a rawn vuan a, "Mate, keipawh ka tan chuan ka hmangaih hmasa ber leh tawp ber na i ni,ngaihzawng dang te pawh lo nei tawh ṭhin mah ila ka hmangaih ngai lo a,an bulah pawh he thu hi ka la chhak chhuak hek lo,chatuan rei tur zia pawh ka hria mahse chatuan aia rei ka hmangaih ang che," a tih zawh rual chuan lungchim zetin min fawp a,Kan duhthawh dun ngang mai.
Ka awm a rawn ṭham a,ka vai riai a ka chheh vela hnim leh thingkung che vel te chu an muang riai riai a,mahse ka kekawr rawn phelh a tum chiah chu ka fim kawk a rang takin ka tho nghal a.
"Ka tihpalh aw Mate.." a ti nghal sawk sawk a.
"Aw,thianghlim takin inngaizawng hram hram ang," ka ti ve hlawp hlawp.Ka hai bik lo,tisa châkna avanga a mitmeng de sawr sawr te ,thawk a la ri te pawh ka hai mawlh lo,keimah zawk hi ka insum theih hram hram a ngai.
Hnim ah chuan a mu duai a ,amah ka en reng lai chuan a mutna bul chu a beng thek thek a,a ban a kham phei duai a ka zuk mu ve nghal rawk rawk a.
"Arsi mawi zia khi.." ka tih chuan , "Arsi te khi en la,arsi pakhat chauh chuan zan a ti mawi zo lo a,an tam pauh leh a mawi zual chutiang chiah chuan maw Mate ka hmangaihna che pawh hi thu khat lekin a daih lo,i chezia,i mi ngaihsakna,i dawhtheihna nen a kim chiah," a tih leh chuan vân lam chu kan thlir dun vang vang a.
"Nakinah chuan fate kan la nei ve ang a,kan fate ho nen zanah thla bial zan te lawm ṭhin ila,arsi te thlir ho ṭhin ila ," ka ti sep sep a ,a nui ri pawh ka hrechiang khawp mai.
A bul chet ah chuan min pawt phei a,a awm ah ka lu ka nghat a,"Fate kan neih hunah chuan kan fate hian a nu hi an thik ber dawn," nui suk suk in a ti leh ,"Ngati maw?"
"Ka duat bik dawn che sia ka duat loh che chuan i titau bur bur vel ang a," a ti leh a,ka lo nui ve hak hak mai.
Kan haw meuh chuan zan pawh a tlai tawh khawp mai,kan in bulah chuan dim fahran hian ka din tir a, kawngkhar ka luh dawn thleng chuan a tih dan ngaiin min lo thlir leh vang vang a,ka ban ka vai zeuh hnuah chuan thawm dim fahran in inchhungah chuan ka lut a, vanneihthlak takin ka chhungte ho chuan ka chhuak tih an hre lo ani ngei ang,a lo thim ṭhap tawh.
Ka ha te ka nawh a,ka hmai te ka phih fel hnuah chuan ka mu ve ta chauh a,mahse ka kawr leh kekawr lum ah chuan chabet a lo kai ṭeuh mai,ka va in thlak leh sawk sawk a,ka mut meuh chuan dar 12 a lo pel thui viau tawh.
Phone ka en chuan ka ṭhiante ho chuan kan sum tuak na tur vel te chu an lo rel nasa khawp mai,Puia nena kan lan ve loh avangin an lo vui hman viau a,U Cobtea group-ah a awm ve bawk si Puia bulah chuan phone call in kan in bia ti rawh ka va ti ta ringawt a,ani lah chuan ho a lo ti em em a.
"Sachek leh Serthlum chu a hlawk ber ang," Rini ani.
"Naktuk zanah Lalrini te inah sachek siam dan tur kan rel ang," Hruaipatea chuan a rawn ti leh mauh mai.
"Mahse sum lu hi kan engtin nge niang?" Nupuii ani
"Kha kha chu,Cobtea leh keiman kan lo thawh ang a,kan in hralh ṭhat chuan min rul leh ang a,hralh ṭhat loh leh kan ngaidam mai ang che u," Puia chuan a rawn ti ve zat.
"Anihchuan,naktuk zanah kan inah lo kal khâwm vek ang che u,Mami chu a zin dawn a kan hrethiam ang a,midang ho zawng kha rawn kal lo in awm chuan kan remove ang che u ," Lalrini chuan a rawn ti leh a ,"I va in ti thu ve Lalrinsang," Hruaipatea'n a rawn tih zawm zat.
"Lalhruaitluanga ve ziah lah hi,min lo hnial ve ziah suh,"
"Dinsang,i bialnu hi hau ve teh,mi a zah lo pang pang lutuk,"
Dinsanga lah chuan emoji nui keh tuar hi a rawn thawn ṭeuh a, "Hau.." tih ringawt a rawn sawi a ,midang ho chu kan lo nui tliar tliar.
"Mate,i mut a chhuak tawh em?" Puia chuan private in min rawn bia a,group ah chuan midang ho chu an la bengchheng hlawm khawp mai.
"Chhuak lo e,a chhuak tawh ami?"
"Chhuak lo e,ka hla ngaihthlak lai mek hi ka rawn thawn ve ang che aw," a rawn tih chuan ka aw rang khawp mai.
Iris ,Goo goo dolls ho hla chu a rawn thawn a,earphone vuahin ka ngaithla ve nghal a,zan a rei tawh bawk a,ka feel veng veng mai.
"Ka ngaithla chhuak dap e.." ka va tih chuan, "A nalh tiraw?,chuan ka ngai veng veng che.." a rawn tih zawm leh zat a.
Zan a lo tlai tawh bawk nen goodnight wish te kan in thawn fel hnu chuan phone chu ka dah a ka mu meng kar a,mut a chhuak lo kher mai.A hla min rawn thawn chu ka ngaithla nawn reng a,keipawh hian Puia hi ka hmangaih a,a pawn lam ṭhatna leh mawina chauh ni lo,a chhungril ṭhatna te engkim ka hmu a,mi fel tak anih zia pawh ka hrechiang telh telh .Amah hmangaih tur hian thil pek man tam tak a ngai lo ,a hmangaihna leh a chhungril ṭhatna te hian heng thil pek man tam tak tak te hi an khum vek si ani .
Zingah chuan class kan chawl tawh bawk nen ka tho har khawp mai ,nizan ka lo mu har bawk nen,ka thawh meuh chuan dar 8 a lo pel der tawh a,U Alawma leh ka pa office an la chawlh ve loh avangin chaw ei an lo rawt mek a,ka nu pawh tukin chu a tho nuam deuh ani ngei ang choka ah a lo che leh turh turh mai.
"Vansang,i va tho har ve,nula pumpa hetiang tûr ani ngai lo," ka nu chuan min hmuh veleh a lo ti nghal zat.
"Nizan ka mu thei lawk lo a," ham bai bai chungin ka lo ti ve bawk a.
"Vawiin chu Mate,Masiami dawrah min va kal pui lawk rawh aw,ka kawr tur pawh ka dam loh avangin ka la dah lo," ka nu ani.
"A la ṭhui hman dawn ami?" Ka tih chuan , "Aizawl-a kan awm lai khan ka hrilh alawm," a tih chuan ka kal pui tur thu te ka hrilh a,ka kalpui peih loh vaih chuan zanah chhuah a phal dawn lo tih ka hre ve kar a,hla deuh mahse kal pui hram hram a ngai.
Chaw eikhamah chuan Venghlun lamah chuan kan in zui dat dat a, "Sicooty i khalh thiam lo hi chu a buaithlak khawp mai," ka nu chuan a ti leh ṭhin, "Scooty alawm.." ka lo tih zeuh chuan min melh rum khawp mai.
"Auto hmang ve mai ila," ka tih lahin kan bazar-na ah pawisa kan hmang hnem tawh lutuk a tia ,a hmang phal bawk si lo ,Nu Masiami dawr kan thlen hma zawng chu a phun kuit ṭhak.
"Awi ka hah lutuk..." A ti lut zui nghal luam a,thlasik lai ê ti lo chuan a in zap hlup hlup mai.
"Ekhai,i dam tawh a law?" Nu Masiami pawh chuan a lo ti ve hlut ,"Hei ka zia tawh lutuk,mahse kawṭhalo chu a nghawng hi a na lutuk a,ka la fit vak lo anih hi," ka nu chuan a ti ve luam a,dik tak chuan ka nu hi a la nuamsâm em em miah lo ang mahse nu taima ngang,harhvang tak ani bawk nen khum bet a mut reng a ning tawh vang ani pakhat ang.
Kawr te chu ṭhui dan tur te kan han sawi ho leh a,kum dangah chuan thawmhnaw pawh a simple tawpin a ṭhui ṭhin a ,kumin ah erawh lace leh kawrkilh mawi te nen ti ve tawh rawh ka tih avangin ṭhui dan tur pawh keiman ka en sak vek a,a lo duh ve mai bawk.
Haw lamah chuan ka pawisa ka keng ve tho avangin ka nu bulah auto hman ka rawt a,a nuam sam ta chiah lo aniang min hnial lo in a lo rem ti nghal mai a.
"Nu zanah Rini te inah urlawk zan leh kumhlui thlah zan kan hmanna tur in tuakna tur vel kan sawi ho dawn," auto kan chuan laia ka tih chuan," Aw,i kal ve dawn ania,Cobtea te ho nen ami?" A lo ti sam et,rin loh takin.
"Aw ni e,ka U Cobtea leh Puia'n sum lu an thawh dawn a," ka tih chuan ka nu nuih a za ngang mai.
"Aw an pahnih chuan tum tir law law ta che u," a tia a nui khur dar dar mai.
Zanah chuan U Cobtea nen kan chhuak rual a,kum dangah pawh hetiang thil zawrh vel hi kan tih ṭhin avângin kan chhungte pawhin an lo phal ve mai a,ke a kal kan ni bawk a,Puia kan sawm phei a.An inchhung kan luh chuan Nu Hruaitei'n min lo be ve hlut a, "Chaw i lo ei a ngai,nangmah chiahin," a nui pah huah huah ,"Nu,sawm ngei ngei ang che,vawksa kan lei ang a ,a thin tam tawk awm na," Chawngthanpuia lah chuan a lo ti ve duah,rum em em hian ka va melh a,min melh ṭha duh eih lo lehnghal.
"Tehreng mai,Mate, chawlhni ah lo ei rawh aw," a tih leh chuan ka riat nawi khawp mai.
Lalrini te in kan thleng chuan Faka leh Chhana tih loh chu an lo awm ṭhap tawh a, "Cobtea a third-wheel animaw?" Nupuii chuan a lo ti zat.
"Nei ve lo pahnih te hi in sawi rem ve mai chi," Puia chuan a lo ti ve zeuh.
"Nei ve mai dawn mi?" U Cobtea'n a tih chuan kan lo nui thler duai,a inhmeh lo ve em bawk ani chutah Lalnupuii lah a nui ring ring ah a la ṭang zui a.
U Cobtea zak leh bawk si chu a lu thak lo pui a hiat a hiat ta ringawt a."Tih ve vat a ngai ang aw Cobte,i nau pawhin a neih khalh daih che hi," Rini chuan nui pat pat chungin a lo ti ve leh a, "A nui ring emai ,a buaithlak," U Cobtea chuan nui miah loin a ti leh a,a fiamthu tih ka hre reng a, Nupuii erawh a nui ngam tawh ṭhak lo .
Faka leh Chhana an rawn thleng chuan dawhkan kan ril bial ṭhap a,sachek siam dan tur vel te kan rel a,a kar lakah Hruaipatea leh Lalrini an in hnial leh laklawh ṭhin.Naktukah a bawlhlo kan lei ang a,Nilaini ah zawrh kan tum ani.
U Cobtea leh Puia chuan pawisa chu an thawh tak tak a,Dinsanga leh Lalrini an bazar dawn a,Nilaini zing karah siam kan tum ani.
Kan rel fel hnu a sana ka en chuan dar 9 pawh a lo la ri lo a ,kan leng ve ta reng a.
"Urlawk zan chu Cobtea te inah hmang ila?" Hruaipatea'n a tih chuan ,"A chi nang, Lawmdragon-a a awm ve reng te chuan bialnu te pawh kan kuah ngam nang," Puia'n a tih chuan ei loh hmel zetin an lo ner nang nâng hlawm a.
"Bialnu hi chu kan nei bik ṭhin teh e.." Hruaipatea'n a tih leh chuan ,"E...ka sawi ve mai ang aw ," Puia'n a tih leh chuan Lalrini pek chu hre chak ber ber ah a lo ṭang a,"Sawi teh ,sawi teh.." a ti sek sek mai.
Puia chu a nui ta mai mai a ,zanah hian Hruaipatea hi a len pui ṭhin tih ka hria,bialnu ve deuh a nei ani maithei ani.
Kan haw dawn chuan U Cobtea chu Nupuii thlah ve rawh kan tih avangin Nupuii chu a thlah ve mai a,Puia nen chuan muangchangin kan kal a,kan titi pah mawlh mawlh a.
"Chawlhni ah chuan chaw chu rawn ei rawh aw ,ka nu khan a sâwm tak tak che ania," a tih chuan ,"Vawksa thin te kha i sawi vak zel a,ka zak thei e," tih leh a hnunga ben ka rual a.
"Ei ah,eng nge nakina an mo tur i nia,lo hrilh hriat hmasak ve te kha a ṭha alawm," a ti duh leh a,ka ngei reuh zia chu aw.
A tukah chuan ka ṭhiante ho chuan kan thil siamna tur bawlhlo lei turin min rawn sawm chhuah an tum a,mahse ka nu in bel nawt turin min ti tlat bawk si a,ka chhuak ve thei ta lo ani.
"Tete,min nawh pui rawh,mipa tha leh hmeichhe tha chu a in ang lo emai,i nawt na zawk ang,"
"Ka hman bik lo,chhuat ka nawh dawn hi," vin zet hian min ti let erh a.
"Vansangzual,i hre ve viau ang aw,"
"Ka rawn spin mai ang che," min tih leh hnuah chhuat chu a nawt turh turh a .
Inchhung chet ah hi chuan ka nuṭa te ho hi ka fak ve thlawt ,nupui pawh nei dawn se an nupui te chu an vannei viau ang .Engmah han thawh hreh leh han thawh zah hi an nei ngai lo,a hman remchang changin rawng pawh an bawl ve mai a,kei an farnu neihchhun hi ka awl thawng letling zawk.
Midang hi an ni ve em ka hre lo a,ka nu erawh hunpui a thleng dawn hi chuan inchhung zawng zawng hi min tih fai tir a,parda leh cushion case thlengin a su fai duak a,chuan bel hi nawh tlet ngei ngei a ngai bawk.
"Khawnge Asangtea kha,in suk hi lo han zar rawh se," ka nu chuan bathroom aṭang chuan a rawn ti lang lang a,keiin ka u ka lo au ve bawk a.
Ka u chu step ah a rawn tlan thla a,in suk ho chu balbawm lian deuhah hian a dah a inchung lamah chuan a pawm chho zui a .
Tlaiah chuan ka room a ka mut der der laiin Puia hian min lo text a, "Mate,lo chhuak lawk ,in gate bulah ka awm," tih zawng hi a rawn sawi a.
Ka chhuah chuan a bike ah a lo ṭhu at a,min hmuh veleh chuan a bike te chu siam rem te te in ka hma ah tak a rawn ding a, "I mit kha han chhing teh," a tih chuan ka lo chhing ve mai a,chutah ka kutah hian thil eng emaw hi a rawn hmeh bel a,ka en chuan chocolate bouquet ani.
"Ehe...awi eng nge hetiang te i tih duh.." ka ti chul a,ka chocolate duh ber ber te an la ni zui.
"Pangpar zawk pek che ka tum a,mahse chocolate i ngaina sia.."
"Ka lawm e aw,awi an mawi hlawm si.." ka ti chul a,min nuih min nuih a.
"Lut rawh ,keipawh ka kal lehnghal ang,zanin chu ka rawn leng hman dawn lo a, mahse ka lo bia ang che," a tih leh chuan min rawn be ngei ngei turin ka hrilh a,keipawh inchhungah chuan ka lut zui a.
"Ale...va dawng lian bik ve," Tetea chuan min hmuh rual rual in a lo ti zat.
"Mate,i piancham ani bawk si lo," U Asangtea pawh chuan a lo ti ve nghal zat.
"Pianchamah kher an in pe ngai hleinem," ka lo tih chuan ,"U Vs,ka duh ve aw.." Tetea ani.
"Ka phal bawk lo," ka lei ka chhuah khum zeuh bawk a,a lo ner nung nung mai.
Inchung lamah ka keng chho a,ka dressing table hmaah thla te ka lâksak a,ka nui reng mai.Hetiang feelings ah la awm ngai hek lo,ka khi deuh reng mai ani.
Zanah chuan ka ṭhiante chuan naktuk zinga inhmuh khawm dan tur te an rel zung zung a,Mami pawh a rawn haw tawh a a lo tel ve theih tawh ka ring.
Puia chuan dar 8 velah min rawn call a,ka pickup vat. "Mate..." A rawn ti thum dut a.
"Umm,i chhuak em?"
"Chhuak lo a mahse ka chhuak ṭep,Hruaia te inah kan leng dawn a,leng hma ka rawn be lawk che,"
"Haw har lo la,"
"Har lo ang,lo la meng rawh aw,"
"Awle,ka lo nghak ang che.." ka tih leh hnuah chuan phone chu kan dah chhunzawm ve nghal a.
Puia hi ka tleirawl chhuah aṭanga ka hmêl duh ka tih tawh kha,ngaihzawng atana min sawm na pawh ka tan chuan chhan harsa lo tak ani.Inhmangaih tur pawh hian hun tam a lo ngai miah lo,kan ngaihzawng te kan duh tak tak chuan keichuan rei lo ah hmangaihna a rawn piang ve nghal ka ti.Ngaihzawng dang ka la nei ngai lo a,Puia hi a hmasa ber ani,ka tan chuan heng thil ho te min tih sak ṭhin te hi a hlu a,a vawikhatna vek anih avang pawhin a feelings hi a nuam ngawih ngawih.
Puia nghah chhungin inhnuai lamah ka nu leh pa Tv en na ah chuan ka zuk ṭhu ve reng a,ka pa hi thingpui ngaina ngang ania,a bulah hian flash in a inchhawp tawp ṭhin, "Mate,ka thingpui hi a zo dawn tlat,min va lum lawk la.." a tih chuan ka tho tharh a ,choka lamah chuan ka zai phei rat rat a.
Choka ka va thleng chuan Vansangzuala hian chocolate a lo ei mial mial a,min hmuh chuan a phu zawk lehnghal a.
"Vansangzual,ka ta i la animaw?"
"A teuh lo mai.." min en zuk zuk paha a tih chuan pakhat a keih thla leh pawp.
"I chak dawn lo aw. Nu....Vansangzuala hi ka thil a la ru," ka ti lang lang a.
"Nu....U Puia'n chocolate tam tawk a pe a,pakhat chiah ka ei sak ve a ,a uikawm lutuk,"a ti let pang pang a,chutah a hnungah chuan ka chum sak pawp.
"Awi,in mak unau lutuk,naupang chhia pawh in ni tawh lo,Vansanglur nangpawh ei tir ve mai ta che,lian deuh i rawn pawm haw ṭun ṭun a," ka nu chuan a rawn ti phei hlak hlak,Tetea chuan ngeiawm zetin min han melh lehnghal a.
Tetea nen hian kum 3 in kan in thlau a,kan thil duhzawng vel hi a inang thei khawp a,naupang chhia taka han in hauh vel pawh hi kan la hrat viau .
"Vansangzual nangpawh eng nge khatah i tawm reng,lehkha han zir rawh,pawl i sawn theih loh vaih chuan i zak khawp ang ," ka nu in Tetea zawk a tih chuan min melh dan ang chiahin ngeiawm zetin ka lo melh ve a,choka aṭang chuan a chhuak rang khawp mai.
Dar 10 velah inchungah ka chho a,phone ka en chiah chu Puia message leh missed called a lo awm leh nual tawh,ka call let nghal thuai a.
"Hello..."
"I mu tawh ami?" Lehlam ami chuan a rawn ti dut dut a.
"Mu lo deuh,inchungah phone ka lo dah daih a,"
"Hei keipawh ka thleng chiah,"
"Naktuk zing kha Hruaia te inah anih kha aw,an veng a laili ber a,zawrh pawh a awlsam ang," Puia'n a tih chuan phur tak ka ni.
"Ka lo lam ang che.." a tih zawm zat a.
Ka mut fel hnu chuan group-ah naktuk chhuah dan tur vel kan rel a.Zing dar 4 ah thawh tur an ti hem mai.Hmeichhe ho chuan hma kan tih thu kan sawi tliar tliar a.
"A hma lo,a bawlhlo vel tih chhung nen,zing karah a ṭhen kan zuar hman ang a,zingkara kan hralh bang chhunah kan zuar leh ang," Hruaipatea chuan a rawn ti leh a.
"Cobte,Nupuii va lam mai rawh aw,Mami chu Faka nen an rawn in thurual thei ang a,Lalchhana hi chu duh leh Faka te rualin rawn phei mai rawh.Matei leh Puia chu chiangsa ania," Lalrini chuan a rawn ti leh zung zung.
Midang chuan an hnial hran lo ani ang engmah an sawi nawi lem lo.Zing thawh hma kan ngaih avangin kan mu hma ṭhep ṭhawp hlawm khawp mai.
Ka alarm ri chu ka hre leh ṭhin a,ka mut a la chhuak bawk si ka lo chhing leh ṭhin chutah ka kawngkhar hi an rawn kik dat dat a,ka va hawn chuan U Cobtea a lo ni.
"Dar 4 a ri ṭep ania,midang ho chu an tho vek tawh,insiam ve vat rawh," ka u in a tih chuan ham bai bai chungin bathroom lamah chuan ka lut a.
Sunscreen leh hmui rep damdawi ka inhnawh leh hnu chuan ka sam chu sang deuhah ka ṭawn a,mut kham lo deuh chungin ka u nen chuan inhnuai lamah kan in zui thla a.
Puia chuan gate bulah min lo nghak a,U Cobtea'n Nupuii a lam chhungin keiin kan in kawtah kan lo nghak a.
"Zing tho hlim hmel pawh i pe tha khawp mai," a ti thum dut dut a.
"Ka mut a chhuak.." ka lo ti ve bawk.
Khua lah chu a la thim ṭha khawp mai .Vanah chuan zing lam arsi an phe sep sep bawk a.
"Lo kal teh.." a tih chuan a ban chu ka vuan vat a.
"A vawt sia,ka lo kuah lum ang che.."
A awm ah chuan ka bei hle hle a,nuam ve mai mai tak ani.
"Ka kuah bo vek thei dawn che anih hi," fiamthu a a tih chuan ka lo nui hak hak a.
Kan ṭhiante ho pawh an rawn lang har lo,an bike thawm kan hriat rual rual in kan in thlah nghal a,ka u chu awm ve lo se ka kuah char char ang.
Kawn Veng lam pan chuan kan in zui diah diah a,a la hma ve bawk nen keini ṭhianho tih loh chu mihring hmuh tur pawh an la awm lo.
Sachek chu belpuiah kan siam hluah a,hmeichhe ho in phuihnam kan lo mal a,Lalrini leh Hruaipatea a kar lakah an han in hnial leh bap bap ṭhin a,kan lo nuih pui nasa thei khawp mai.
Dar 6:30 velah chuan sachek pawh a hmin ṭha var var tawh a,Hruaipatea te inkawtah kan ṭhut pui a,Lalrini leh Hruaipatea chu a au tu ah an ṭang a, "He lamah sachek tui sial em em mai,a ei tawh ten an zawngchhang em em mai kan nei e," Hruaipatea chuan a ti lauh lauh a.
Zing karah chuan a chanve aia tam kan hralh nghal a,rin ai daihin an rawn lei nasa a.
"Cobte,pawisa kha nangman kawl zel rawh," kan tih chuan ka u chuan pawisa bag chu a ak nghal sawk sawk a, "Midangin an kawl chuan a buaithlak tumah ka ring lo,pawisa nawi kir dawnah an buai thei bawk si a buaithlak," Hruaipatea chuan Lalrini melh zeuh zeuh pah chuan a ti a.
"I zak em Lalhruaitluang,nichinah te kha chuan a rawn nei nawi em anihkha," Lalrini chuan a lo ti pawr ve hlar.
Chaw ei tûrin kan haw darh a,chaw eikham lamah zawrh leh kan tum a,kan rinai takin kan hralh ṭha a,nuam ve duh tak ani.
"Tukin chu,i nu a mangang hman alawm," ka pa in chaw ei laia a tih chuan a chhan kan lo zawt sap sap a.
"Matei han khaihthawh a tum a ,a lo awm si lo a ,i Nu Hruaitei rawn lut in Puia a rawn zawng bawk a,in tlan dun emaw kan ti hman alawm," ka pa chuan nui hak hak in a ti a,ka phone ka lo silent daih a,min lo biakna pawh in ka thlen hnuah chauh ka hmu kha ania.
"Cobtea lah nidanga tho har ngai lo kha a tho har a ti deuh aniang a han kaitho a,a lo awm bik si loa,kan rawn phone khan chanchin kan hre chauh alawm," ka pa chuan a lo tih zawm zat.
"Thil tih tur in neihin ngawi rengin ti tawh suh u,engmah pawh in sawi lawk bawk si lo a,tlem a tlem ah kan in zawng mualpho lo chauh anih kha," ka nu chuan a lo ti ve hlak hlak.
"Awi a hrim hrim in,ka nu te pawh pasal nei rual pawh ka la nih loh hi,mi in ring chhe emai aw.." ka ti ve hlak hlak a,ka u te ho nuih a lo za,U Alawma pawh a nui ve suk suk mai.
"A ṭha,khatiang tur kha, ngaihzawng neih te chu in kum nen pawh a in rual tawh a,pasal neih lam rilru kha chu la put miah lo tur," U Asangtea pawhin a lo ti ve bawk.
Chaw eikhamah chuan U Cobtea nen bawkin kan in zui chhuak leh a.Ka u nen hian kum zawna piang kan ni a,kawng engkimah pawh kan in thurual thei khawp mai.
Puia te in kan thlen chuan Nu Hruaitei'n zingkara thil thleng te chu mittui tla phunga nui chungin min lo hrilh ve a ,"Awi Mate,Puitea bula ka sawi phei chuan a lawm lo rapthlak,phone in la thei si lo a,Cobtea kha be lo phei ila kan mangang dawn lutuk," nui uar uar chungin a ti a,an lo mangang hman tak tak viau ani ang.
"Ruk ngai lo in Matei te chu a hun takah ka nei chat mai ang," Chawngthanpuia lah chuan a ti lung lung a,Nu Hruaitei lah chu a lawm ber ber ah a lo ṭang a.
"Phone kha silent tawh suh u,thil pawimawh a awm in a buaithlak," pawn kan chhuah rualin U Cobtea chuan a ti a.
Phone hi silent mode a a awm loh hi chuan group leh thil dang neuh neuh a a rawn ri sek hi ka ning ṭhin a,ka lo silent leh nge nge ṭhin a,ka u in a sawi takah chuan ka siam ṭha nghal thuai a.
U Cobtea'n Nupuii a lam chhungin Rini te inah kan lo nghak a,Dinsanga pawh a lo awm der tawh.
Ka u te pawh an rawn thleng har lo,an rawn thleng chuan an rawn chhuk leh te te a.
"Ka pu in serthlum in zawrh dawn chuan Christmas leh Kumthar inkarah zuk lo ula min tia,pawihmualah," Nupuii'n a tih chuan kan lo phur hlawm khawp mai.
"A tih chi ngawt ang,28 ah hian kal ila," an tih leh chuan phur tawh tak kan ni.Nupuii Pu te pawihmual hi hla deuh mahse a hmun a nuam em em a,sangha dil te pawh a awm in ka hria.
"Kan picnic nghal animai," Rini'n a lo ti ve bawk a.
Faka te ho an rawn thleng takah chuan kawn veng lam pan chuan kan in zui leh diah diah a.Zing ka tho hma bawk nen ka lu te chu a rit luk a,ka mit a kham em em bawk.
Hruaipatea te in kan thleng chuan a ngai te te in mipa ho chuan meizial te an han zu khawmuang leh a.Hruaipatea meizial zu zo chu a au leh lauh lauh a,kawng kal ṭhenkhat ten an lo fiam zuk zuk pah bawk a.
"Ehe,Mate saw Thlawihmeltha-i.." Mami'n a tih chuan Thlawihmeltha-i kan lam pana rawn kal mek chu kan lo en nghal ṭhap a.
"A hmel saw chu a ṭha ve thlawt alawm,a hnute a lian bawk si," Nupuii pawh chuan a lo ti ve bawk a chutah ka hnute ka en ve vat,in mawi hleih va va tak ani.
"Ahh tikhan ti tawh suh u, Matei a hmelṭha zawk fe," Lalrini chuan a lo ti ve zat.
Thlawihmeltha-i hi U Asangtea te nen an inrual vel ka ring,a hleitling em em a,a hmelṭha bawk.A tleirawl chhuah tirh khan kan khaw ṭhenawmah pasal a nei thut a,mahse kum tam pawh an in nei hman lo heti hian a rawn haw leh a.A fanu pakhat a awmpui bawkin ka hria.
"Ka lo dawr ve ang che u," a rawn tih chuan Nupuii chuan min lo sik zeuh a,Hruaipatea chuan a lo be ve luam.
"Tunlai chu in va rawn leng khat ve," Puia melh chunga a tih chuan Puia hmel chu ka en vat a,amah pawh en lo chuan ,"Leng chhan tur awm tawh hek lo," a lo ti hluk.Lalrini leh Nupuii tui in lai mek pawh chu an rawn phuh ṭhawt mai.
Mahse Thlawihmeltha-i chu a la nui sang a, "Thingpui tui deuh ka lo lum ang che u rawn leng rawh u," a la ti hram,zak thei lo chu ka ti ve deuh.Ka lo ner nak a,Puia Rini'n min rawn nghawk zeuh,ka in siam ṭha leh nghal thuai a.
"Hei, Matei Thingpui lum hi tunlai chu a tla na deuh zawk aniang," Lalrini'n nui hak hak chungin a lo ti ve a, Thlawihmeltha-i pawh a nui tawi tek tawk hle.
Engmah pawh sawi zui tawh lo chuan pawisa te a pe a,a kal ve lehnghal mai a.
"I lo dam ṭhin maw,aw di hlui..." Hruaipatea chuan a sa pah rat rat,ka lo melh rum viau.
"Vansanglur khati khan min melh reng reng suh aw," fiamthu a a tih chuan lei ka chhuah khum vak ringawt.
"A zak lo reuh e.." Mami'n a tih chuan Lalrini leh Nupuii'n an lo tuihnih zat.
"Matei a hmelṭha daih zawk," Lalrini'n a tih chuan , "Hmelṭha daih zawk.." a awki ang chiahin Puia chuan a lo ti ve bawk a.Kan lo nui dar dar.
Sachek pawh kar loah kan hralh zo a,kan hmel pawh a chuai hlawm tawh khawp mai.
Kan pawisa hmuh zat te chu kan han chhiar a,Puia leh U Cobtea pawisa kan hman sak kan dah hrang bawk a,chumi tello pawh chuan kan pawisa hmuh chhuah chuan ar pum hnih man chu a daih var var a,a la bang zan bawk.
"Tikhan,Puia nen kha chuan kan thawhbelh ni mai rawh se,min pe kher duh suh u," ka u in a tih chuan an lo lawm hlawm khawp mai.
"Apple juice la ve ang i," Lalrini chuan hmeichhe ho hriat tham lekin a ti a,hetiang lam hi kan tih ngai loh avangin a tirah chuan kan aw hreh khawp a,mahse a sawi a sawi takah chuan kan phur tawh hlawm khawp mai.Hmeichhe ho chuan a rukin pawisa kan in thawh khawm leh a,naktuk mai anih tawh avangin Lalrini kutah kan dah ta bawk a.
"Naktuk zan chu engtin nge ni dawn?" Hmeichhe ho in kan tih chuan ,"Hruaipatea te inah hian kan hmang mai dawn ami nge Lalrini,"
"Keichu Lalrini te in bak ka thleng thei lo ang,kan ti zawk mai dawn ami?" Ka tih chuan min lo hnial lo hlawm khawp mai.
"Nia kan inah ti mai ang u,a pi bak a awm dawn lo a.Mipa ho khan chhunah ar lei tur te chu lo ngaihtuah ula, hmeichhe ho in frozen food lam te kan lo en ve thung ang a," Lalrini chuan a ti leh zung zung a.
Hmeichhe ho in frozen lei na tur te chu ka han la hrang leh a,"Lalrinsangi kha a lo hlep leh hram ang e,Cobte chhut thlap rawh," Hruaipatea'n a lo ti zat zat a.
"Ve ziah a che Lalhruaitluang,nang ang ka ni lo aw,"
"Cobte,a zat tur chiah chiah kha pe rawh,"
Chutah Hruaipatea lu chu a ri nghal pawp, "Ka ning tlat Lalhruaitluanga hi,tikhan min ti bik ziah suh aw," Lalrini chuan a ti pang pang a, "Hahaha...Laldinsanga hi ka va khawngaih tâk.." Hruaipatea'n a tih chuan Dinsanga pawh a lo nui ve ta ringawt.
Zanah chuan hmeichhe ho bik chuan kan group ah Apple juice kan in dan tur vel te kan rel a,um 2 ngawt kan la a,naktuk zanah mipa ho ai thleng hmasak kan tum ani.
"Mate, naktuk zan chu Beer chiah in ve i phal em?" Puia'n a rawn tih chuan keipawhin Apple Juice ka in ve dawn tho alawm tiin ka lo phal ve mai a,mahse kan thil tih tum hi chu Puia pawh ka hrilh ngam lo,a phal dawn lo chiang lutuk a.
Urlawk ni ah chuan chhunah ka nu Venghlun lamah a a kawr ṭhui te ka va lam pui leh a,a mawi khawp mai.Haw kawngah chuan zanin a kan hun hman dan tur te chu ka sawi zung zung a, "I u ten an phal dawn em ni," a tih chuan ,"Min sawi sak ve la,in fate an nia.Eng nge an thu thu a in awm ziah," ka ti pang pang a.
"Chu lam ani lo,an ni chu an puitling tawh a,nu leh pa te pawh hian fate rawn chin te kan neih ve a ngai alawm.Nang phei chu an farnu neihchhun i nia,an khuahkhirh ṭhin che pawh hi a awm lutuk," ka nu bawkin a ti leh a.
"Lalrini te inah alawm,a hla hleinem," ka tih chuan aw min pawh chiah lo mahse a phal tih ka hria.
Tlai chaw ei lai chuan U Cobtea ka sawi tir a,U Alawma'n ṭul lo a ti leh pek khawp a.
"Matei te chu kan inah hmang zawk ula," a tih pawh chuan, "Kan sawi fel vek tawh alawm,chu lo ah pawisa te pawh zanin atan te hian alawm kan in tuak," ka ti niah niah a.
"Lo haw har suh ang che,i lo haw har chuan ka rawn hruai dawn che ania," ka u bawkin a tih leh a.
Chaw kan ei zawm mawlh mawlh lai chuan , "Nu keipawh rei lo tê ka chhuak lawk dawn aw," Tetea ani.
"Han chhuak rawh mahse rawn haw har lo ula,i u sawi ang khan," ka pa chuan a lo ti charh charh a.
Zanah chuan U Cobtea hman hmain ka chhuak a,Puia pawh be ta lo chuan Lalrini te inah chuan ka kal tlang nghal a.Ka thleng chuan hmeichhe ho chu an lo awm ṭhap tawh a,Lalrini chuan a room lamah min hui zauh zauh bawk a.
"Lo kal ru,ti vat vat ang u,mipa ho rawn thleng hma in," tih pah chuan Apple juice chu a thli a,dispo cup a lo in tum thlap bawk.
Ka vawikhat in na ani bawk nen a tirah chuan tui lo ka ti khawp mai ,mahse Lalrini pek chuan a sehhmeh tur nen zawng zawng a lo in ring sa diam a,sehhmeh nen chuan a tui ka ti ta phian lawi a,no 3 lai chu ka in hman.
"Awi keichu engtin mah pawh ka la awm lo," Nupuii'n a tih chuan ,"Nakinah zan rei deuhah kan in leh dawn ania,um 1 kan in zo ṭep," a ti leh a.
No 1 ṭheuh kan in leh a,puar laia in kan nih avang nge ka rui pawhin ka hre lo mahse Apple juice chu tui tak ani.
Puia te an rawn thleng chuan an rawn ri lut ham ham a,mahse le a rei telh telh a hmeichhe ho chu kan in melh leh hrek hrek ṭhin.Ka lu a rawn hai muai muai a,mahse a nuam tawk khawp mai ka awm dan chu.
"Zanin chu i awm dân ava mak ve.." Puia chuan min rawn thlek leh ṭhin.
"Hmm, engtin vak nge ka awm?" ṭi ru zeta ka tih chuan thlek takmeuh hian min lo thlek a, "I mitmeng kha a mak,i ṭap ami?" A ti heu mai,min rawn thlek hnai ang reng bawk sia,ka tho ah a nam chhuak ang tih ka hlau chu ka lu ka thing mat mat a.Mahse Lalrini khan a rim a na lo a ti in ka hria.
"Nakinah thil ka pe ang che aw," a tih chuan keipawhin a thil tur Aizawl ah khan ka lei sak ve ngei a mahse ka ken theihnghilh daih tih ka hrechhuak.
"Awi,i thil tur pawh ka lei asin mahse ka rawn keng theihnghilh daih.." ka ti zui niah niah a.
"Engmah a ngai ve kher hleinem,nakinah ka pe ang che," a tih zawh rual chuan ka hmui ah chuan a rawn fawp zeuh a ka lo ip chawih mai.Vanneihthlak takin eng rim mah a hre lo aniang engmah sawi zui lo chuan pawnah ar an va puah a.
Hmeichhe ho chu inchhungah fiamthu te thawhin kan nui ring ṭhin khawp mai,Lalrini Pi lah a inkhawm daih a,keini ṭhianho ah erawh inkhawm kan awm lo thung.
Eitur kan peih fel meuh chuan dar 11 a lo pel leh reng tawh.Mipa ho pawh ka u tih loh chu a khat tawkin Lalrini room-ah an in luh chhawk leh reng tawh a,U Cobtea erawh ṭhuthlengah games a khel a Nupuii nen an ṭhu dun ran mai.
Eitur kan ei lai chuan Hruaipatea leh Chhana chu an kai ṭha khawp a midang ho erawh an pangngai hlawm viau.
"Lalrinsang,ka hual tak i ei leh ta." Hruaipatea'n a ti leh hluk hluk a,Lalrini lah lo duai duh bik lo ,"Ve che,i hrawk châk châk nên aw Lalhruaitluang," a ti zui pang pang a.
Thil kan ei zawh ah a hmun te kan seng fel zawh hnuah chuan Lalrini chuan hmeichhe ho zawng chu a room ah min ko hrang a,um 1 dang a rawn la chhuak leh zal zal a.Mipa ho kha chuan meizial te an zu a,an titi tui bawk a an rawn luh kan ring lo.
"Kha ti vat vat ang u.Beer hi tlem telh ang u ," a tih chuan a rawn thli nghal sawk sawk a.No 2 vel kan in hmu chuan Mami chuan ka luak a chhuak lutuk a tih avangin a duhtawk der a.
"Mate,nangmah khan in zo tawh nichin khan i in tlem ber," Nupuii'n a tih chuan ,ka duh lo ti na hman pawh a awm lo min rawn thlit zo nghal vek.
Thil kan lo ei zo chiah bawk nen ka luak chu a chhuak hlui a,ka lu lah chu aw hai ṭha mem mem tak ani.
Lalrini khumah chuan eng khaw sawi set set lo chuan ka bawk thlawp a,Nupuii pawh keimah ang tho in a kai ṭha khawp mai,ani phei chu chhuatah a mu nuai a.
Chutah Puia rawn lut te chu ka hmu phe vek ,"Eng nge awmzia?" Puia'n a tih hluai ri te chu ka mang hriat ruai ruai chutah "Vansanglur,eng thil nge i tih?" Tih paha min rawn sawi chiah chu ka uak nghal ṭhawt chutah ka insum hman lo ka luak zui bawrh bawrh.
"Ehe,ngatinge?" U Cobtea tih ti te chu hre mah ila ka luak bawrh bawrh.
Ka duh tawka ka luah hnu chuan zawi ngiai hian ka mu leh a, Chawngthanpuia'n min melh rum em em tih pawh ka hre reng.Lalrini leh Mami'n ka luak chu an rawn thian a,ka inthlahrung bawk si mahse tih theih ka nei bawk silo.Ka zawi vek ka che thei lo reng reng .
"Engtin nge khatiang ten i haw ang a?,ka u in a hriat vaih chuan a pawi viau ang aw," U Cobtea'n a tih te chuan ka rilru chu a rawn hah nghal zawk zawk.
"Ka lu a hai.." ka ti chhuak sep a,ka uak zui nghal mahse luah em chu ka luak tawh lo.
"Hai ve bawk ang chu ,Lalrinsangi pawh eng nge khatiang te i pawlh," Puia'n a ti vin hluk hluk a.
Dar 12 a pelh hnuah pawh chuan che chang peih ka la awm lo,Nupuii phei chu a chatthla fel der tawh.
"Puia paw haw mai rawh," Hruaipatea'n a tih ri te chu hre vek mah ila ka che peih thlawt lo ani.
"In in thleng hma thleng ka pua ang a,in in luh dawnah kan kuah lut mai dawn ami?" Ka u bula a tih chuan min melh rum dun khawp mai.
"A mipa zawk pawh hetiang hian ka awm a," ka u in a tih chuan ka zak chem chem.
Puia'n min han paw tur te chu ka luak a chhuak bawk si,amah lah a zei lo bawk si a samah te chuan ka ṭham leh vak ṭhin.Ka u phone hmang thawm te chu ka hria a ,ka chhungte ho chu an lo la meng vek dawn tih pawh ka hria.
Puia hnungah chuan ka bei thlam a,ṭawng pawh ka ṭawng peih tawh lo,ka ṭawng vaih chuan ka luak nghal ang.Kan gate luh dawnah chuan dim fahran in min nghat a,U Cobtea nen chuan min kuah lut a.Lalrini leh Mami'n min rawn zui ve haw bawk.
Step min chhoh pui lai te chuan ka pum aṭang hian a rawn in pump a,ka luak chhuah zia mai chu aw.Vawikhat mah ka in tawh lo ang ka ti rilru pah mawlh mawlh.Chutah kawngkhar chu ka u in a hawng chiah a kei ka in sum hman tawh lo ka luak leh bawrh a.
Ka chhungte ho chu an rawn thleng phei rang viau.
"Eng nge awmzia?" Ka luah bawrh bawrh laia ka nu in a tih chuan ,"Kha juice an lo in ve anihkha," U Cobtea chuan zawi sep sawpin a ti a,ka uak bawrh bawrh ri tih loh chu midang chu an reh nghal ṭhap.
End of chapter-6