STORYFB.COM

NUNHLUI DUHAWM BUNG-8
ZIAKTU : MALI PACH


Sawi mai tur a hre bik lo aniang min en tlawk tlawk mahse chutah ,"I nakin hun zelah pawh ka tel ve reng dawn alawm," a ti zawi sup.

Kan ṭhiante ho in min lo ko sek tawh bawk nen ka hmui a a fawh leh zeuh hnuah chuan kan chho ve ta a.

Thlam kan han thleng chhoh chuan tui cheng ho pawh an lo awm ve ṭhap tawh a, Hruaipatea'n tapchhakah rul ni maiin ka hria a vun hi a lo hik pawp pawp mai.

"Ehe,khawia rul nge," Puia pawh chuan a ti lut nghal.

"Kan tui chenna bulah a lo awm a,tlem a tlemah min chuk lo chauh alawm,"

"Rul hlai animaw?,a thau ṭha khawp mai," Puia bawkin a ti leh a,lian ṭha tak ani.

Rul chu tap-ah chuan a rawh leh a,a sa chu an dahṭha bawk.Hmeichhe ho erawhin kan ten avangin kan khawih ve lo chiang khawp mai.

"Naktukah chuan zing karah bazar ah ṭhu ang u aw,kan thawh hma viau a ngai ang.Nu Mawii dawr kawtah zawrh kan tum ang a,a lun ṭha lai ania," Rini'n a ti leh zung zung.Kan lo pawm tlang hlawm khawp mai.


Chaw chhun te kan han fak leh hnu chuan thlamah chuan kan la awm khaw muang leh a,titi te vawrhin kan nui ho dar dar.Hruaipatea leh Chhana chu a khat tawkin pawn lamah an va chhuak leh zeuh zeuh ṭhin,zu an in lehpek ani ang,Puia erawh a chhuak ve lo hlauh.

Kan haw chuan Hruaipatea leh Chhana'n an bike hnungah an ṭawn bet a,midang ho zawng erawh kan in phur avangin a ngaihna a awm ve bawk si lo ani.Mami chuan Hruaipatea bula chuan chu a duh tawh loh avangin Faka'n a phur tawh thung.


Haw kawngah chuan a hnungah ka bei thlam a,in be lem loin ngawi rengin kan tlan dun zel a,Nupuii te inah kan lut khawm leh a,kan lawh zat te chu chhiarin a pu chuan an hauh zat te chu min hrilh nghal bawk a,rin aiin an hauh tlem a,lawm hlawm var var tak kan ni.

Ṭhu khawmuang tawh loin kan haw ve nghal thuai a.Kan chhungte'n chaw eiah min lo la nghak ṭhap,ka u nen chuan kan in tih fai hnuah chaw te chu kan ei a.Zanin chu Ṭkp inkhawm a awm lo bawk a,ka u te ho pawh an hmanhmawh lo ani ang an che muang sur sur hlawm khawp mai.



"Nu,naktuk zingah kan zuar dawn a.Kan tho hma leh ang aw ," chaw ei laia ka tih chuan ka nu leh pa in an sawi nawi lem loh laiin U Alawma chuan,"Tel ve duh tawh lo mai rawh, pawisa ka pe mai ang che," a ti a ,ka chhang ngam bawk si lo,ka nu leh pa ka melh nghal ruai.

"Tel ve rawh se,hetianga chhungte pawisa hman sak loa an mahni a an tih theih te hi a ṭha daih zawk alawm," ka pa ani,lawm ru ver ver tak ka ni.

"Kan inah hmang rawh u aw kumhlui thlah zan chu,hmun danga in hman chuan ngaihtuah in na," ka u bawk chuan ti leh a, "Tuman an peih hleinem," ka ti ve zeuh.

"Aw,eng nge an peih reng ang.Dragon kan kawl tlat a," Tetea'n nui ruh ruh pahin a lo ti ve bawk.

"Vansangzual...."U Alawma'n a tih chuan pakhat lah chuan ,"Ani lawm,ka ṭhiante ho pawh an rawn leng ngam reng reng hleinem," a tih zawm zat,dawhkan hnuai aṭang chuan ka kheuh zeuh zeuh a.

"Mi fel lo te chuan min ngaina reng nang,ka thusawi hi min lo hnial ziah suh," U Alawma'n a tih leh chuan ,"Hmun danga kan hman pawn Matei chu a ngaihtuah awm loh ang,hmanni ang kha chu a thleng tawh lo ang," U Cobtea'n a lo ti ve khauh,thil sawi nawi em em nei ngai lo,kan unau inhnial buai pawha a sira lo ṭhu ngawi reng zel mahse thu a sawi ve tawh chuan tumahin kan chhang zui ngai lo.

U Alawma pawh chu a ngawi zui ve ta nghal a.Apple juice ka lo in ve kher kher kha chu inchhir tak ka ni.A ṭhing let a na bawk si chutah chhungte'n min ring loh phah vek a.

Zanah chuan naktuk a kan chhuah dan tur te chu an han sawi leh zung zung a,Nupuii te inah kan in nghak khawm dawn ni awm tak ani.

"Kan hralh zawh loh pawhin Hotel kawtah te kan zuar leh ang a,a lungngaih thlak vak lo,"Nupuii'n a rawn tih chuan kan lo pawm tlang khawp mai.

"I mut a chhuak tawh em?" Puia'n a tih chuan a la chhuah loh thu te ka sawi a .Zanin chu khua a vawt zual deuh nge ka ruhseh a chhuak leh chiam a,puanin ka ke leh ka kut ka tuam luk.Nachhawkna lah a chak vak lo chi chiah kan lo nei bawk si a,ka awm a ti nuam lo khawp mai.

"Ka ruhseh a chhuak nasa lutuk a,ka mut pawh a chhuak thei lo,"Puia bulah ka va tih chuan ,"Ka lo kal ang a,ka lo kuah lum veng veng dawn che ami?" A rawn ti leh a,a chakawm khawp mai mahse thil tih chi pawh ani lo.

"Lo kal lo ang,ka u te an la muhil lo ang,"

"Anih leh ka lo call ang che ,i peih em?" A tih chuan ka peih thu in ka lo chhang ve mai a,mahse a rawn video call leh ta si ,ka hmai ah thil ka hnawih mawm bawk si a,zak ru deuhin ka phel leh lam chiah lang chuan ka be ta a.

"Eng nge khatia i lan kher?" A rawn ti bai bai.

"Ka zak alawm...."a hmui chu min tih sawih khum vak.

"Rawn lang mai mai teh,ka hmu chak che ania," a rawn tih tlat avangin zak deuhin ka lang a,min lo en chik bawk si lai tak ka ni.

"Aw tikhan,i hmelṭha..." A rawn ti leh a awih lo tak ka ni,ka hmai a mawm bawk si.

"Dawt sawi suh,ka hmai mawm zia te hi i hmu lo ami?"

"Mawm loh kha,i hmelṭha khati khan..."

"Mut thilh tum rawh,tikhan ka lo zai pah ," a tih chuan ka lo phur khawp mai.

"Zai tak tak ang che aw,"

"Tak tak dawn e,heihi ka lo sak pui ang," tih pahin a laptop a hla chu a hla a.Iris ,Goo goo dolls ho sak ngei mai chu a rawn sak pui leh a,a zaithiam lo miah lo.

"And i'd give up forever to touch you 'Cause I know that you feel me somehow
You're the closest to Heaven that I'll ever be
And I don't wanna go home right now
And all I can taste is this moment
And all I can breathe is your life
And sooner or later, it's over
I just don't wanna miss you tonight"

Ngawi rengin ka ngaithla a,thiam tak ani.Khumah chuan a ṭhu mu deuh a,a zai pah chuan min lo en leh ṭhin.Nuam ve tak ani Engtik laiin nge ka lo mutthilh pawh ka hre lo ,ka alarm ri chuan min ti harh a,ka phone ka en chuan la hma tak ani,mut hmain ka charge bawk si lo a,ka insiam chhunga tlêm tal pawh a lo luh ka duh avangin ka charge leh te te a.

U Cobtea'n min rawn koh chuan ka lo in peih der tawh,ka phone ka phawi leh hnu chuan inhnuaiah ngawi rengin kan in zui thla a.Nupuii te in hi Rini te kawmthlang lamah lamah a la awm a,ka u nen chuan Puia kan va sawm phei phawt a,chuta ṭang chuan Nupuii te in lam chu kan pan thla hlawm a.

"Nizan kha,i hnar sek sek mai," a tih chuan ,"Ka awih lo e,"

"Ani lawm,phone kha ka la dah phal mai lo a,ka la nghak vang vang alawm,"

"Ka muhil tih i hriat te chuan dah ve vat ta che,"

"Ka phal teuh lo.Tui taka,thlamuang taka i mu lai ka thlir khan ka hahdam sawng sawng,chuan ka ngai em em bawk che," a ti leh a ,min ngaih thu hi a sawi zing ṭhin khawp mai.Keipawh hian ka ngai a, mahse sawi chhuah loh a ka tlak leh mai ṭhin.

Nupuii te in kan thleng chuan kan ṭhian dang te pawh an lo awm ṭhap tawh a,Hruaipatea erawh kawn veng maia awm an nih avangin kan sawm thla thung ang.

Vanneihthlak takin kan duh na tak kan chang hlauh a,serthlum chu kan han chhep leh a,kan buai ve hlawm sap sap khawp mai.Khua a var a,zing ṭawngtai inkhawm kal tur ho ṭhenkhat chuan "Min lo dah hrang ula, inkhawm banah kan lo lam ang," an ti ve bawka,kan phur tlang hle.

Nupuii pu te serthlum hi a pum a lian ṭha bawk a,kan ei tawh chin chu thlum lo pawh a la awm lo.Ṭawngtai inkhawm an bang chuan min lo dawr sap sap a.Kumin ah hian kan khua ah Nupuii pu te chauh hian serthlum an thar a,kum dangah chuan serthlum hi chu midang pawhin an thar fo a mahse kumin ah erawh midang ho chuan tih tham an nei meuh lo.Chuvang pawhin aniang chu kan hralh thei em em a,tlema hausa deuh phei chu Hruaipatea leh Lalrini'n pahnih te an han hnawn a,nuam ve mai mai tak ani.

Thingpui dawrah mahni pawisa ṭheuhin thingpui leh Paratha kân thar kan han ei leh a,zing karah hian a tui zual bik emaw tih mai tur ani.

Chaw ei dawnah chuan haw turin kan insiam sap sap a,mipa ho chuan Hotel kawta dah an va dil a,Hotel neitunu kan mi hriatchian a lo ni bawk nen a lo phal ve mai.Chaw eikham veleh a chhuak lehnghal turin thu kan rel a,kan haw darh ta hlawm a.

"In in hralh ṭha em?" Ka pa chuan a lo ti nghal var a.

"Hralh ṭha ve tho mahse nimin khan kan lo hnem angreng lutuk a,a la awm nual,"

"Khai hnih vel rawn hawn ve ula,ka lo leisak ve ang che u ," a tih chuan phur tak ka ni.

Chaw te kan ei a,kan in seng fel leh hnu chuan chhuak turin ka in ring reng tawh a,U Cobtea inthiar ka nghah leh te te hnuah kan kal chhuak ve leh a.Mak deuh chu ka u te ho hrim hrim hi Tetea pawh ani tho,an chhuah dawn hlek hian an inthiar hmasa phawt zel,a hma zawnga inthiar tum si lo,chhuah dawn veleh a inthiar an tum tlat ṭhin hi a mak ka ti ṭhin,ka nu pawh hian a sawi ve ziah.


Hotel kawtah chuan khualzin pawh an lo awm ve leh nual a, Hruaipatea leh Chhana phur fal pek chuan an motor-ah te chuan an va kal chilh a,kan lo nui lo der der hlawm.

Aizawl lam pan tur nupa te hian panga ngawt min dawr bawk a.Chawhnu a rawn her meuh chuan kan nei tlem tawh khawp mai.Kan ta tur pahnih ka dah hrang bawk a,pawisa pawh ka pa in min thawn nghal thlap.

Tlai dar 4 velah chuan mi an awm tawh vak lo bawk a haw mai kan rawt a,kan hralh bang ho chu Hotel neitunu in min leisak veleh bawk a,a bul vela dawrah te chuan kan hnawn leh a,pali vel chiah a bang tawh avangin Mami leh Rini'n an lei zo ta ringawt.


Zanah pawisa tihfel pahin ka ṭhiante ho chuan Nupuii te ina leng an rawt a ,ka tel theih pawh ka ring tawh lo .U Alawma hi leng chhuak hlauh se,ka ti rilru niah niah.

"Zanah chuan i lo kal ve thei agem?" Ka rilru hria ni awm takin Puia chuan min zawt hlawl.

"Ka hre bik lo,U Alawma a chhuah loh chuan ka thei lo ang,"

"Vanlallawmawma hi chu aw,a hlauhawm hre hru bawk si," a tih chuan ka lo nui hak hak.

"I lo kal theih hram chuan lo kal la,i theih loh chuan kan haw hunah ka rawn hmu zuai ang che,"

"Aw,ka lo sawi leh ang,"ka tih chuan kan in kawt kan thleng leh der tawh.


Zanriah kan kil ṭhap lai chuan ,"Mate,chhuak tawh hrih suh aw .Duh aiin i chhuak nasa,Tetea pawh" U Alawma'n a tih chuan ka hnual nghal ngawih ngawih.

"Chawlh lai te ani ve a,hneawm ve sek..." Tetea lah chuan a ti khur khur.

"Naupang te te si hi mi hi i chhang let ziah.In chhuak nasa lutuk,bike lah hi i la chhuak ve ziah lehnghal," U Alawma bawk chuan a ti leh a,keichuan dek pawh ka ti ngam lo.

"Ve chiam chiam a che.Lo buai ve vak ṭhin suh," a tih leh chuan dawhkan hnuai aṭangin ka kheuh ru zeuh.

"Vansangzual,i u anih hi khatianga ṭawngkhum tur kha i ni em?" Ka pa chuan a ti vin ve ṭhak.

"A hneawm alawm,a nunah khan buai mai rawh se.Engtik lai pawha min control tum,ka hne lutuk," tih leh kham a rual a,U Alawma a lo ding hluai.

"Eng maw i sawi?" Tih leh Tetea awm a ṭham chu a rual a.

"I hneawm..." A la ti ṭalh ,Vansangzuala pawh hi ngawih ve mai mai tawh tur ania.

"Zah pawh hi in zak lo ami?,nu leh pa kan awm ve reng laia khatianga te in awm,Vansangzual hetah lo kal teh," ka pa ani.Pa zaidam tawpkhawk ani a,a thinrim lai hi keiphei chuan ka hmu khât khawp mai.Vawikhat kan naupan deuh laia Tetea nen kan insual hian kan kutah hmawlh in min vuah a,khatah khan Tetea'n ka hnar min hnek thi sak avangin ka pa kha a thinrim em em a,khami bak kha chu thinrim taka min hauh a neih awm pawh ka hre tawh lo.

"I u thusawi zawng zawng kha dik lo pakhat mah a awm lo,nangmah ni hmangaih tu anih hi.Khatiang rilru sual leh luhlul zet kha vawikhatmah pu tawh suh.Chhuak suh ang che," a tih zawm zat,Tetea lah inchung lamah a phun chho hluk hluk a.

Midang ho erawh kan ngawi zui ṭhap,ka u te hian ka pa hi an zahin an hlau em em a,U Alawma meuh pawhin ka pa a thinrim tawh chuan engmah a sawi ngam tawh ngai lo.

Chhuah dil chi ni tawh hek lo,engmah ka sawi ngam ta lo a.Ka ṭhiante bulah pawh ka kal theih loh tur thu te ka hrilh a,kan lo dil pui ang che an tih pawhin ka pa a thinrim em a,ka ngam lo ani.Mahse U Cobtea chu a chhuak ta tho in ka hria,ani hi chu U Alawma pawn a khap ngai lo.


Puia chuan min rawn be zeuh zeuh a,an zawh hunah rawn kal zawk a tum anih hmel.Mahse ka nghak rei reuh khawp mai,an zawh fel meuh chuan dar 10 a pel thui viau tawh,in leng neihna hun pawh a ni tawh lo.

"Lo kal lo mai rawh,a tlai tawh emai,"

"Ka hmu lawk duh che alawm Mate,"

"Ka mu tawh..."

"Gate ah ka lo ding ang,rei lo tê tak tak," a ti leh tlat tawh,a luhlul mai bawk sia,min hmu lo a haw chu a tum lo viau ang.

Chutah U Cobtea chu inhnuai ah lo la awm rawh ka tih chuan ṭha deuhin a lo duh ve mai a.Pawn ka chhuah chuan a lo vawt var mai,gate bulah chuan a lo ding leh ran a a hmêl lah chu ka la hmu ṭha êm em a,a sam chu a awmze nei lo zet hian a thur sung a,a bul ka thleng chuan min lo nuih suk suk a,ka lai chhe leh tawh khawp mai.

A bul ka thleng chuan min kuah nghal thawr, keipawh amah chu ka kuah let nghal vat a.A rimtui tak chu ka hip vang vang a,rimtui tak ani, citrus rim a nam chek chem a,thli fim a tho heuh heuh bawk a,kan awm dan chu nuam veng veng tak ani.

"Ka pu haw nawlh dawn che mawni le," a tih chuan amah chu ka en chho a.

"Ka duh bawk lo,ka rei hman lo ania," ka tih zawm zat.

"Vawikhat ka chuk zeuh che ang a ,chuan i chho dawn ania.Rawn hmuh hrim hrim che hi ka duh a," tih leh ka hmuiah chuan a rawn fawp vang vang a.A tawp dawnah ka hmui hnuai lam a pet leh vak a ,ka lo eiah leh ṭhat.

Ka lut zui ve nghal a,min en liam leh tete hnuah a bike thawm ka hre ve leh chauh ani.

Ni kan hmang liam a,kumhlui thlah ni ah chuan chawhma lamah inchhungah ka che a,tlai lamah Puia te ho nen tlângah ni en liam ve kan tum a,chhun dar 12 velah chuan ka inbual hman sar sar tawh.

Tlaia ka ṭhiante'n min rawn sawm chuan U Alawma a awm lo hlauh a,awlsam tein ka chhuak a.Puia ten kawng chhak lamah min lo nghak a,tlang veng lam chuan kan in phur chho leh vawk vawk hlawm a.

Ni tla tur lang chiang theihna theihai kung lam pan chuan kan tlan zel a,nula leh tlangval leng pawh an lo tam khawp mai.Woofer an keng tawk an lo awm bawk a,famta Pi Lalsangzuali hla "Kumhlui" tih kha an play a,a rui phur deuh te chu an han lam leh a.Kan khaw ho hi chu kan in daih thei ania.

Ni tla tur chu kan thlir ṭhap a,Puia chuan Ka darah a rawn kuah tharh a ,midang ho nen kan awm na a in hlat deuh avangin tu mitmei vak ven tur a awm lo bawk nen keipawh chuan min kuahna pawh chu pawi pawh ka ti vak lo.

"Ni tla tur hian kumhlui te liam pui mahse nang erawh liam ve lo la,ka ta ni reng rawh aw..." Ka beng bulah chuan a ti sup sup a.Ka lu chu ka bu nghat nghat a.

"Aw tikhan a nalh lutuk," kan hnung lam aṭanga Rini'n a tih chuan kan hawi vat a,a phone in min lo tin ran mai.

"Khatia in awm lai tak kha a mawi,che tawh suh u," kan hnung lam aṭanga a rawn tih leh chuan Puia nen chuan che tawh lo in kan hma lam chu kan en ran a,ka darah min kuah a keiin a kawngah ka kuah ve thung.


Ni a tlâk fel chuan an lo au dur dur a, Hruaipatea leh Chhana an lo over fal leh a,mittui tla zawih zawih chungin an han zai leh a.Kan in daih thei ania.


Zanah chuan Nupuii te ina hman a rem leh tak loh avangin Rini te inah bawk hman kan ti thlu leh a.Mipa ho erawh kan sa ei tûr an buaipui dawn avangin an kal hma hlawm khawp mai,ka ṭhiante ho in min rawn sawm chuan U Alawma'n rem a lo ti leh vak lo a ,ka ṭhiante ho chu a han hnim leh den den a.

"Urlawk zan ang khân awm miah suh ang che u,inkhawm te pawh inkhawm ve phawt tur ania," a ti zui hluk hluk.

"Mate,lo haw har lo la,i u thusawi ang khân thil ṭha lo kha ti tawh miah lo ula," ka nu inkhawm kal tur pawh chuan a lo ti ve bawk a.

Phur fe in kan in zui chhuak a,class kan kal peih loh thu te kan sawi zui sap sap.

"Kum a thar hi chuan class kan kal har tawh dawn silo a,ka peih lo lawk.Result in a han zui nghal ang a," Rini'n a tih chuan ,"Keichu ka dam loh avang khan ka zir mumal thei ta si lo a ,ka in hope sang duh lo law law," ka lo ti ve nghal thuai.

"Aaaa...zanin ah na na na chuan khatiang kha sawi tawh hrih lo ang u,enjoy em em phawt ila," Mami'n a tih chuan thil dang te kan sawi leh a,kan nui ring hlawm khawp mai.

Rini te in kan thleng chuan ar chu an lo talh fel der tawh a,"Vansanglur,i bialpa nep zia hi,ar lu pawh zu vuan ngam lo a,"Hruaipatea'n a lo ti nghal lung lung.

"Min melh kur bawk sia,a hmui a zum bawk si.Ka hlau pawh ani lo,ka rap alawm," Puia'n a lo ti thum ve dut dut a.

A bawlhlo vel hmeichhe ho chuan kan han siam zung zung a,kan siam zawh hnuah chuan cooker ah on maitheih turin kan dah ran.A la hma ve deuh bawk nen ride an han rawt leh a.U Cobtea chuan in lama lo awm a thlanga ,Nupuii pawhin a lo tui hnih ve zat chutia ka u ber a kal ve dawn loh chuan kal ve chu ka tim deuh a,mahse Rini'n min sâwm tak sek sek ah chuan ka tho ve ta nge nge.

"Nupui,nakin deuhah awm i tih hun velah lo on mai rawh aw," Rini chuan chhuah pah chuan Nupuii chu a chah zui lang lang.



A hnung berah kan tlan leh a,thlanmual veng lamah chuan an kal zel a,veng hmawr lam kan thleng a duh ai chuan kan tlan thui mah mah tawh.

"Khawnge kan kal dawn?" Ka va ti lang lang a,"Nupuii pu te pawihmual piahah khan," a rawn ti lang lang hla ka ti khawp mai.

Chutah mipa ho chu an in tlansiak leh pek a,hlau tak ka ni Ka thawk a chham lek lek,ka ṭe chul a,Dinsanga leh Rini kan tlan pelh lai pawh chuan Lalrini chu a hnungah a lo ṭe ve nasa khawp mai.An bike lah chu a khat tawkin an han Rev leh vak vak a,a ring ṭha hlawm bawk si,thli a tam bawk nen ka sam te chu a chhem leh dawr dawr.

Pawihmual piah lamah chuan kan ding hrawk a,a hma lamah ka va bawh rawk rawk.

"Awi,khatiang em em a chak khan vawikhat mah min tlan pui tawh suh,ka hlau lutuk," ka thin dawm pah chuan ka ti zui hlak hlak.

Kan kal hla khawp mai,khaw ṭhenawm pawh kan thleng thuak a.Mipa ho chu kal hrang deuhin thil an va ti ru ser ser hlawm a,zial an zu khu hlat hlat a mahse meizial pangngai rim chu a nam lo.

Puia pawh chuan a pak ve vang vang a,mahse lo hauh emaw lo thinrim bik reng ka duh loh avangin ka hmu lo der tawp.

Kan ngaihzawng te hi thil sual an tih te hi duh lo viau ṭhin mah ila mihring ve tho an ni a,an ṭhiante'n an bula an lo tih ve zel chuan U Cobtea te ang law law an nih loh chuan an tan insum te a lo har a,hriatthiam chin pawh ka neih ve ang ngai in ka hria.

Ka bula a rawn kal chuan ka lo en reng vang nge a hnar a tuai zauh zauh a, a mit meng chu a bui leh luk tawh.

"Zanin chu dar 12 thleng awm ve rawh aw," a tih chuan ,"Timaw?" Ka lo vat.

"Kumhlui nang nen kan thlah liam ang a.Kum a thar rualin ka bulah i awm ang a,kumthar pawh nangnen kan ti zel ang chu..." A nui pah ruh ruh.

"Hruaia,let dawn ila.Cobtea te an lo hrilh hai lutuk ang,"Hruaipatea te lam pan chuan Puia chuan a tih zawm zat.

Kan let leh lam chuan kal lam ang em a chak chuan tlân tawh lo mah ila keichuan chak ka la ti khawp mai.

Rini te in kan thleng chuan ka u leh Nupuii chuan games an lo khel a,an lo in vin hlak hlak.

"Awi, Mate Cobtea tlaw zia hi.Ka hnungah zel a kal a,misual kah ve nachang pawh a hre lo," Nupuii'n ka hmêl a hmuh rual chuan a lo zung zung.

"Khel dun ang i ti tlat bawk sia,block blast bak ka khel ngai lo ka tih kha," ka u chuan a lo ti ve nuah nuah.

Arsa pawh an lo ti hmin diam tawh a,ei dâwn tê ah kan ti lum leh sek a,tui ve tak chu ani.Dar 12 a rik dawnah chuan pawnah mei kan chhem a kan ṭhut bial laih a.

"Pui,lo phawrh la.." Chhana'n a tih chuan Puia chu inchhungah a lut leh a,bag lian ve deuhah hian thil eng eng emaw hi a rawn khai chhuak ṭeuh.

"Eng nge a?" Ka tih chuan a nui suk suk a min chhang lem lo chuan a phawrh a,rocket leh halphuh tih te a ni nawk.

"Ehe,khawi ami nge?" Rini pawh chuan lo thlek ha ha pah hian a lo ti ve bawk a.

"Mi kan chah," an ti mai a,kan khua-ah hian halmawi leh halpuah hi a hming chuan an khap ve a mahse lo ti tawk pawh an awm leh ṭhin.Kum dangah pawh Puia te ṭhianho hian hetiang hi chu an nei thei tawp .

"Mate,rocket hi nakinah kan hal dawn nia,van sangah mawi tawkin a phuh chho dawn ania," Puia'n a tih chuan ,"Halzit kha tunah hal ang i," ka lo ti ve vat.

Halzit chu hmeichhe ho in kan hal a,kan bengchheng hlawm khawp mai.

"U Pui,halphuh kha min lo pe ve,"Naupang hoin an lo tih te chuan an in kawm kim thlapin a pe leh a,an ngah viau ani ang.

Dar 12 a rik dawnah chuan veng dang aṭang pawhin halpuah chu a khat tawkin a lo puak leh ṭhin.Chutah kan chhiar rual dual dual a,12 chu a ri ta, Puia'n Rocket pakhat chu a ti puak ta chuai,van sangah chuan a thlawk chho vang vang a,a hnuah nalh deuh hian a rawn eng ta a mawi tak ani.Midang ho pawhin an lo lawm hlawm khawp a,an lo au dur dur. Hruaipatea'n an hal ve leh nghal a,mawi tak ani.

"Kumthar chibai aw..."Puia chuan min rawn kuah pahin vân lam hawi chho vang vang chungin a ti a.

"Kumthar chibai..." Ka lo ti ve sep.

"Hruaipate han ti puak leh teh..."kawmchhak lam aṭanga Nu Sawmi'n a lo tih chuan Hruaipatea chuan pakhat chu a ti puak leh a mahse a hma mi a tluk lo deuh.

Ka kumhlui thlah zan hman tawha chuan a la nuam ber awm e.Puia nen kumhlui kan thlah liam a,amah nên bawk Kumthar kan chuangkai leh a.Nimin mai a kan hun hman kha nikum tih a lo ngai tawh a,nikum kha ka tan chuan kum chhinchhiah tlak ber ani ang.Ka nunah a vawikhat na atan ngaihzawng ka nei a,ani nen chuan ka la tih ngaih loh tam tak kan ti a,ka tan chuan kum chhinchhiah tlak tak ani.

A kut chu nghet takin ka chelh a,he mipa hian a zun a uai lo thei lo in min siam ani.A hmangaihna ah hian ka lut thuk tawh lutuk a,ka pil riai riai anih ber hi.Ngaihzawng atana min sawm ni te kha nimin lawk emaw tih laiin thla tam tak a liam tawh a.Hmangaih te nen hi chuan hun leh ni te hi a rei lo a ,an kal zung zung ani ber.Hmangaihna hian hun leh ni a thliar lo,an chezia leh nungchangin a zir phawt chuan hmangaihna hi chu rei lo tê ah a lo piang ṭhin.

Kan ṭhiante awm na aṭangin min kal hrang pui a,Rini te kawmchar thim laiah chuan kan in dinchilh ran a.Bangah chuan min nam bet rawk rawk a, duhthawh takin min fawp a,ka nghawng te chu a rawn nul leh thuak thuak a, keipawh chuan ka duhthawh ve khawp mai mahse Hruaipatea aw thian kharh kharh ri ah chuan kan in thlah nghal thuai a, "Ngawng ngawng cheu chuan..." A ti hmuk chutah ,"Haw dawn ila,kan tlai lutuk ang," a tih zawm zat.

"Kan lo kal ang..." Puia'n a tih chuan Hruaipatea chu a kal ve nghal mai a, chutah ka hmui hnuai chu na fahran hian a rawn seh leh a,ka lo ṭe ṭhawt.A nui ri hak a,keiin rum em em in ka lo melh a.

"Lalhruai lo kal teh..." Kan chhuah phei hnuah chuan Hruaipatea chu ka va bekbawr sar sar.

"Ka u bulah khan engmah sawi miah suh aw,a chi miah loh ania," ka ti sar sar.Ani lah chu a hmui a pet sawi a pet sawi duh lek.


Kan haw chuan ka chhungte pawhin min hau lo hlauh mahse U Alawma'n min thawk khum rawh a ti leh tlat pek a,ka'n thawk khum hrep kha.

Puia nen pawh kan in b lately hey Googlee rei lo ,an ni chu Hruaipatea te nen khân thil an la ti kawi in ka hria ka mutsan ta ringawt a.

Zingah chuan inkhawm turin ka insiam a Puia blazers min pek kha ka ha a,ka inhmeh khawp mai.Ka tawk thlap lehnghal a,ka ta tur ni awm reng ani.

"Tu kawr nge?" Ka nu lah chuan inhnuai ka chhuk thlak rualin a lo ti ve zat.

"Keimah..."

"Khawi ami nge a,Asangtea i lei tir leh tawh ami?" A ti zung zung.

"Teuh lo ...mi min pek .."

"Hmm..hmm..khatiang kawr man to hmel lutuk kha an pe lul lo ang che," ka nu chuan a ti leh kher.

"Awi, Chawngthanpuia min pek anih hi," ka ti ve ta nge nge.

"I inhmeh tur a va hre ve," a nui ve huah huah.

Ka ṭhiante pawh chuan ka kawr chu ka inhmeh zia te an sawi ve luam a.Puia'n min hmuh chuan ka kawr chu a rawn thlek hmasa ber a,"I va mawi ve..." Min ti sup.

"Ka kawr hian min chawi em alawm," ka nui var var.

"I inhmeh tur hi chu ka hre ve alawm.Mahse nangchu engpawh i inhmeh vek," min ti leh a ka lo nuih var var mai.

Kum thar ni chu thil danglam em em awm lo in kan hmang liam a,a tuk ruaiṭheh ni ah chuan Puia chuan ka sweatshirt pek kha a rawn ha chhuak a,anih pawh chuan inhmeh tak ani.

Ruaiṭheh tlaiah chuan khaw pawn lamah kan leng a,nuam pawh kan ti viau.Chhan leh Hruaipatea chu an in signal leh ṭhin a,an thil tih tum pawh ka hria .Chhana chuan hnung lam aṭangin Puia chu thil eng emaw a rawn pe ru zeuh a,Ganja anih ka ring.

"Eng nge a?" Tih paha ka thlek dâk dâk chuan a ipte hnung lamah a dah zeuh a,chutah a ban rawn pharin ,"A bo daih..." A ti zui zat, naupang â deuh turah hian min ngai a,ka hmu ve reng sia.

"I ipte hnung lama i dah kha,ka hmu hman vek,"

"Aaaa...engmah ani lo,"

"Engmah anih loh chuan ka lo en chhin," a lu thak lo pui chu a hiat a hiat a.

"Nakinah chuan i la â vek dawn anih kha," ka ti leh a,a lo nui hawk hawk.

"Ka ti dâwn lo,lo kal rawh..."a tih chuan dek pawh ka ti hman tawh lo,min pawt dawr dawr a,"Khawiah nge in kal dawn?" Lalrini'n a lo ti lang lang a, Chawngthanpuia pek kawng thlang lamah min pawt thla dawr dawr,"Khutah....aniang....." Ka ti bah niah.

"Awi eng nge i hriat a,kan kal bo ang e," a ban a chum dat dat pah chuan ka ti hlak hlak.

"Chance kan nei dawn," a tih chuan ngei tak ka ni.

"A tâwk,ding tawh rawh,kan chhuk thui tawh lutuk," ka tih chuana ding duh mai lo mahse a hnu deuhah chuan a ding ve ta hram, "Ehe,ka kal sual," a tih chuan ngei zetin amah chu ka melh a.

"Eng nge, Khawnge min kal pui i tum hrim hrim a?,awmze nei lo in min kal thlak pui hlawk hlawk a,"

"Helai hi ani in ka hre bawk sia," a tih leh chuan melh rum tawh tak ka ni.

"Aih a hma pawhin kan kal ṭhin alawm,"

"Tu nen,i bialnu hlui te nen maw?" Ka lo ti pawr ve hlar.

"Bialnu hlui leh hlui chiah lo te nen," a lo ti zeuh ,hah engtin nge a sawi ngam zawk.A hnungah chuan ka chum pawp pawp.

"A na ....A na, Vansanglur," a ti chul a.

"Chutiang ho nena in kal na ṭhin ah chuan min hruai lul lo ang,chho nghal ang," tih leh kal mai ka tum chu min pawt let rawk rawk .Chutah a kutzungṭang chuan ka hmui chu a chul riak riak a,min fawp leh thawr mai.Eng ang pawhin lo ṭang ve sateh mah ila mipa tha na na na hi chu hneh pawh a lo har deuh ani,a tawp lamah phei chuan ka chhang let ve leh ta nge nge kha ania.

Ramhnuai e ti lo chuan kan duhthawh dun khawp mai,a mal chungah chuan min nghat rawk rawk a,thawk a rang lehnghal zaih zaih.Ka nghâwngah te chuan a nul leh thuak thuak a,ka awm bawr a rawn ṭham chuan ka lo ṭang ru ṭeuh a chutah a hrethiam nghal ani ngei ang a kut chu la sawn vatin ka biangah chuan a rawn vuan a min fawp lehnghal mawlh mawlh.Ka nghawng chu na zet hian a fâwp a,a vawihnih na ah phei chuan ka ngik chhuak faih.

"Ehe,ava lang chiang ve," a tih chuan kan in la hrang nghal thuai a,"Eng chu maw?" Ka ti ha,ka nghawng chu a kawk zeuh a,chutah a phone a phawrh a camera a on a min entir nak chuan ka nghawng chu dik ṭha tak ani.Lian deuh hian a dik chur a, "Awi engtin nge ni dawn?" Ka tih chuan min nuih ruh ruh a, "Hetiang em em a lian a han siam che," ka tih te chuan a nuih a za tawh khawp mai.

"Aw khatiang em em kha ani dawn tih ka hre bik hleinem," a ti thum dut dut a,ka sam ka thlah pawn a hliah phah chuang lo, Nupuii scarf ka awrh haw sak mai ang,ka ti ta ringawt.

Kan chhoh lamah chuan ka lo pua ang che min tih tlat avangin min paw chho a,fiamthu te a thawh a,za em em in ka nui leh a."I rih tehreng nen,nui vak vak suh ka thlauh daih mai ang che ," a ti zui hluk hluk.

"Aw eng nge ,fiamthu i thawh zel anihkha,"

"I hlimna siam tu nih ka duh si alawm," a ti sam leh et ,"I va in la zei," tih leh a lu ah chuan a in rin loh lai takin ka nam bu lawp a chutah ani lo in ring tawh si lo chu kawng thlang lamah let thla nghal tual,thui lo te chu kan lum a.Nuih a za bawk si ,thinrim bawk si ka ṭe thla chul a ,thingkung pakhat bulah hian ka thal thla huang ani pawh ka bulah chuan a rawn mu ve a,van lam en chuan kan nui dun uarh uarh.

Kawng chhak lam aṭang chuan kan ṭhiante thawm pawh kan hre nghal thuai a,min rawn hmuh chuan an han phawk hlawm khawp a,ka u phei chu a lo meng nur khawp mai.

"Vel tak cheu hian aw....." Hruaipatea'n a rawn ti hluk.

"In che sual ta emaw tih laia," Rini'n a lo tih chuan ,"Lalrinsang i rilru ava hmul ve," Puia'n a lo ti zeuh.

"Khatianga che sual kha kan ti bawk leuh.In au thla lung lung sia kan rawn chhuk khan thawm ri nawk nawk kan hre bawk sia ," a tih zawm zat chutah Puia'n min lo kaitho a,kan ṭhiante ho lah chuan min kaihthawh pawh an tum hlawm lo,min en ṭhap ringawt.

"Kan lum thla alawm," Puia'n a tih chuan ,"In che na lutuk a,in lum thla zawk ani lo maw?" Hruaipatea'n nui kur kur chungin a lo ti bawk a

Puia chuan min beng fai thuak thuak a,kan chhoh leh lamah te chuan ka nghawng chu a khat tawkin ka hliah reng a.U Cobtea mawlh mai hian a hmuh ve ka hlau .Nupuii chu a rukin ka hrilh sar sar a,min nui kar kar hnuah chuan a scarf chu min awrh tir hlauh.


Christmas leh Kumthar vuakvet chu kan hmang zo ta der a,ka nu in ka nghawng ka tuam chhan min zawt leh ṭhin a sam pawhna a ka in tih kang thu ka sawi ta ringawt a,a awih ve leh mai bawk.Class pawh kan kal leh ṭep tawh a.Keiphei chu in lamah ka buai thei khawp mai.Ka leng chhuak khat khawp a,Puia nen pawh kan in hmu khât viau.A zan leng haw hi rei lo tê kan in hmu zuai a,tunlai chu Hruaipatea te in lamah an tap deuh chawt a,kan inah pawh a lo leng khat viau mahse kan inkar erawh a la ngai reng.


Class kan ṭan ni chuan Puia chuan a ruala kal turin min duh viau a mahse ka ṭhiante ruala kal chu ka thlang ta zawk a,college ah kan in hmu dawn ania kan ti ta kha ania.

Period tinah chuan eng em em mah kan ti lo,result chhuah hun tur te an sawi a Professor ṭhenkhat phei chu rei lo tê an awm a,an chhuak lehnghal daih zel.

Chhun chawlh chuan canteen ah kan chawl a mahse eng em em an lo la nei lo a.Rice plate 1 ṭheuh kan ei a ,kan puar ve viau tho mai.Puia te chu ka zawng ru deuh a mahse an semester ho chu hmuh tur an awm reng reng lo a,ka hawi kual ka hawi kual a.

"Zawn nei i vân ang," Rini'n a tih chuan ,"Nei em em chuang lo," ka lo ti ve mai.

"Aih i nei, Chawngthanpuia i zawng chiang lutuk," min tih leh ka nui tawi tâk tâk khawp mai.An ni ho lah chuan min nuih kar kar a.

Haw dawnah chuan gate bulah an lo ding ṭhap a.An lo nui leh dar dar tawh.An bulah chuan kan va kal ve nghal a.

"In va induh hlawm ve a," Lalrini'n a tih chuan, "Professor in min hau alawm," an lo tih chuan a chhan te kan zawt leh a ,"Kan ti ṭha vak lo hlawm a,kan Department ho,"

"In zir ṭha peih lo em alawm," Rini ani.

"Zir ṭha e mahse kan zir ṭhat tak kha a lo chhuak leh si lo," Hruaipatea'n a tih chuan kan lo ner nâng nâng mai.

"Awi,in zir ngai lo,in leng in leng a.Kha kha animai,in fail phei chuan semester leh ah in tlak loh chuan in graduate ve dawn lo animai," Rini chuan a lo ti leh pang pang.

"Eeee...lungngai reng reng suh kan graduate ngei ngei dawn," Hruaipatea'n ngeiawm takin a lo ti ve bawk.

"Kal ang u,kal ang u.Khatiang sawi sawi lo khan,"Faka'n a tih chuan kan in phur nghal sap sap.

"Hruaia te inah chuan ami?" A tih chuan midang chuan an lo âw ve sap sap.

"Ka rei hman lo ania aw," ka lo ti ve khar khar.

Hruaipatea te in kan thleng chuan a ni chauh a lo awm a.Chips te kan han ei ho leh a.Mipa ho chuan ML an khel ho leh a,an ṭang thei bawk si.

"Cobtea kha kha,i thi dawn..." Hruaipatea'n ṭang fe hian a ti lawng lawng a.

"Ka thiam ve vak lo a..." U Cobtea chuan a lo ti ve nuah nuah.

"Aaaa...ka rank a hniam leh vek dawn," Hruaipatea'n a tih leh chuan kan lo nui hak hak.

"Vawiin class te a nuam em," Puia'n games khelh mawlh mawlh paha a tih chuan, "Nuam ve tho ,result pawh keipawh ka beisei sang lo.Ka dam loh lai ani bawk sia,ka zir mumal thei si lo a," ka lo ti sep sep.

"I pass em em ang.Cobtea pawh Professor chuan a ti ṭha atia,"

"U Cobtea te chuan lehkha a zir peih alawm,"

"Keipawh ka fail lo ang.Mahse ka ti ṭha lutuk lo ang.Zanin chu ka lo leng ang aw.."

"I lo leng ṭha duh lo ka ti reng a ..."

"Min sawm ngai bawk si lo a..." A tih chuan ka hmui ka lo tih pawrh khum tarh a.

Kan haw har vak lo,ka u te ho hna kal pawh an lo la bang lo a,choka ah rei lo tê ka ṭhut leh hnuah inchung lamah ka chho ve ta daih a.Puia a lo leng dawn bawk nen tlaiah chuan ka in bual leh sawk sawk a.

Zanah chuan a lo lang har lo ,kan chhungkua kan kim ṭhep ṭhawp laiin a lo lut a,a lo lai lut ve deuh a,a hnar a rawn tuai lut zauh zauh a.Kan lo en ṭhap laiin ka bulah a rawn ṭhu tharh.

"Puite,i pa chu vawiin lam eng nge i pa a an? Ka pa chuan a lo ti nghal vat a.

"Nimin lam ai kha chuan a nuam ve deuh,"

"Chemo chu lak pui vat a ngai dawn anih saw,a taksa a fit lo telh telh ang a chemo a la thei lo mai ang tih pawh a hlauhawm,"

"Karleh hian kan kalpui leh ang.Tukin chu chaw pawh a ei ve peih a,"

"A ṭhat hlauh chu.Kei hi ka hna ah ka buai deuh bawk nen ka lo lang hman meuh lo a," ka pa chuan a ti leh charh charh a.

"Pa Dawnga chu a zia lo emai,han dam ṭha leh vat se,inkhel en pui leh te pawh a chakawm alawm ," U Asangtea'n a lo ti ve luam.

Titi dang te kan han sawi leh luam a,Puia pawh mi hrang ani lo a a tlangnel ve khawp mai.Thingpui te ka va lum leh a,U Asangtea chuan min lo fak veleh luam.

"Matei hi chuan a lum tui thei ania,ka ṭhiante ho pawh hian a Thingpui lum an in chak avangin an lo kal kawi ṭhin alawm," a tih leh chuan Chawngthanpuia chuan min lo kheuh zeuh.

Ka chhungte ho chu an mu fel ta diak a,Puia nen chauh chuan kan awm tawh.

"Mipa dang thingpui i lum sak ka phal ami?"

"Lo la kawi suh ...."

"Mi bulah,Vansangluri thingpui lum ka in dawn bik,tih ten ka lo in tih theih tawh nen aw," a nui pah ruh ruh a,a fiamthu tih ka hria.


"Nangmah hi i special ber alawm....." Ka tih chuan min lo en vang vang.


"Keipawh ka tan hian i special alawm..."

"Mahse tunlai chu min ngai lo..." Pangchang fe in ka lo ti a.

"Hmundangah pawh leng ṭhin mah ila,ka thinlung chu i bulah a awm reng alawm..." A nui pah leh ruh ruh .

"Aizawl i kal leh chuan in cham rei angem?"

"Rei ve deuh maithei tun ṭum chu" ka hnual nghal rawih rawih , huphurh tak te in ka huphurh.Kan khua a kan awm tlang reng lai pawhin ka ngai a, hmundang daiha min awmsan tur chu ka ngai leh dawn khawp mai.

"Nakinah kan inneih hunah chuan kan pahnih in ka pa te kan hruai ang a,ka nu in in a lo nghak ang a,"

"Inneih hi i sawi ve ziah a.Hna te kan neih loh te chuan kan fate rual awt ngawih ngawt in kan siam dâwn asin," ka lo ti ve sap sap.

"I lungngai anihkha,nangchu hna pawh i thawh pawh ka phal lo ang,inah kan fate i lo enkawl ang a.Keiman hna te ka zawng ang a," a tih chuan ka lo hnial vat.

"Hnathawk loa awm ka duh teuh lo.Pasal te chawmhlawm nih ka duh teuh lo," ka ti ve pang pang.

"Teuh lo,ka nupui leh fate chu ka chawm zo dawn ani ringawt.Ka nupui chuan in lam ṭha takin lo enkawl se chu bak engmah a ngai lo," a ti veleh a kan sawi zawm luam.

Hmathlir thui tak kan nei ve a,inneih ngei pawh kan tum.Nei ta ila ka tihsual ka ring lo.A chhungte lah ka chungah an ṭha em em a.Duhthu te kan han sam dun luam hnu chuan rilru pawhin pasal neih min ti chak ve ruai thei hial.

A haw dawnah chuan pawn thleng ka va thlah leh a ,zan dang ai a leng rei deuh avangin rei pawh kan in be tawh lo.A tih ṭhin dan ang bawkin ka luh dawnah chuan min fawp leh vang vang a,inchhung ka luh fel dawn thlengin min lo en liam a.

A han haw fel hnu hi chuan ka ngai leh veng veng a, inngaizawng dang te hi hetiang hian an awm ṭhin em chu ka hre lo mahse Puia nena heti tak mai a kan in thlahlel ṭhin te hi mak ka ti.Kan in ngai ngawih ngawih a,inzui pawh kan inzui nasa.Kan ina a lo len loh leh an inah te ka va leng a,Nu Hruaitei'n laphiar te min zirtir ṭhin a,a hma zawng aiin kan in pawh a,kan chhungte pawn min sawisel ngai lo.

Aizawl an chhuk ni chuan zing karah ka va thlah ve a,an cham chin tur a hriat loh avangin ani pawh ṭum dang zawng aiin a phur lo,thil ka lo hawn ang che min tih chuan ka lo nui leh var var a.Hmun dang deuha a kal chang pawh hian thil ho te te hi min hawn ṭhin a, chocolate phei chu dawng hnem tawh tak ka ni.

Keipawh chhunah chuan class ka kal a,kan result an lo tar chhuak a kan va en ve vat rinai daihin ka ti ṭha a,Chawngthanpuia pawh a ti ṭha reuh khawp mai.U Cobtea chu an class ah a ti ṭha ber a,ani hi chu a rilru a chak bawk a zir vak lo pawh nise a ti ṭha leh phian zel.

Chhunah chuan nidang zawng aiin College chu ka ning ngawih ngawih a,haw thuai thuai a Puia biak mai mai ka chak tawh .Ka ṭhiante pawh chuan min chhaih leh ṭhin a,"Puia awm loh avangin i mood a dik lo riau," an ti an ti a,dik pawh a dik ve ang.

U Cobtea te ṭhianho chuan gate ah min lo nghak leh a,mahse ka ṭhiante ho chuan ke a haw kan duh zawk an ti hlauh,ke in kan haw ta ṭham ṭham a.

"Mate,ka rinai daihin in nghet a," Mami'n a tih chuan ,"Keipawhin ka rin ai daihin kan nghet ka ti," ka lo ti ve sap.

"Nia,bakah Nu Hruaitei pawh hian a tia,an lawm zia vel hi a sawi ṭhin a,hmeichhe dang ho nen kha chuan zu te an in ho a.Nu Hruaitei hian in inṭhen hi a hlau lutuk," Rini'n a tih leh chuan ,"Aaa mahse keipawh ka fel bik hleinem," ka lo ti sep.

"I fel alawm le,Puia hi en la amah te chu a la fel famkim dawn lo mahse in inngaihzawn hma ai khan tunah a lêt in a fel zâwk ania,mipa hi chu kaihruai tu an neih hi chuan hma an sawn zung zung," a tih zawm zat.

"Chu chiah,hmasawn duh miah lo te hi chu awm ve bawk mahse khang ho kha chuan an hmeichhe duh tak tak an la tawng lo angah ka ngai," Nupuii'n a lo tih leh chuan ka ngaihtuah zui neuh neuh.

Ni e, inngaizawng ve satliah tawp hi an awm a mahse keichuan khatiang kha ka thiam ve lo.Satliah deuh leh kalpah deuha neih hi ka duh loa.Ka vawikhatna mah nise ka fimkhur ve a,Puia hi ni kher lo se ngaihzawng hi ka la neih kher ka ring lo.Keichuan inngaihzawnna hi ka la thutak a,la naupang viau mah ila ka neih ve tak ro ro ah chuan ka ngaihzawng kha eng ang mi pawh nise hmasawn a ngaihna laiah ka fuih ang a,chutah tak chuan kan ngaihzawng te'n min hmangaiha min duh ve tak tak anihchuan an in siamṭha ve ngei ang.


End of chapter-8