STORYFB.COM

NUNHLUI DUHAWM BUNG-9
ZIAKTU : MALI PACH


Puia chuan Aizawl an thleng thu a sawi chu chawhnu dar 2 velah khan ani,ka call ve nghal thuai a.

"Hello...." A rawn ti nghal var.

"I pass aw,ka rinai in i ti ṭha ,"

"Kha,ka tih kha ka pass dawn nang eng nge i result lam te?..." A rawn ti ve nghal zat.

"Aw,keipawh ka rinai daihin ka pass ṭha mahse Mami kha a pass ṭha vak lo a kan ṭhianho ah chuan mahse professor te pawh khan an hrethiam lutuk," ka ti zui luam.

"A ṭha,ka lo haw hunah pass kan lawm dun dawn ania.Tlangah tunlai ṭhangthar ho tih dan takin carpet picnic kan nei dawn ania," a rawn tih chuan phur tak ka ni.

"Motor te i rui em?,Pa Dawnga chu kawng lakah te a buaithlak em?" Tiin ka zâwt leh luam.

"Buaithlak loh e,hei a tlangval lutuk.I pa nen pawh an in be zing khawp mai," a nui pah hak.

"A ngaihtuah em alawm,a rilru ah a awm leh char char ang," ka tih chuan ,"Aizawl chu kan khua aiin a lum zawk,thawmhnaw ka in keng lum sia rin ai daihin a lo lum a," a lo tih zawm zat.

"Kan khua hi chu a vawt em alawm,kan kawmchhak naupang te pawh tukin zing ka thlah zawh che khan tlanga dai khal thla en turin an kal alawm," ka lo ti ve luam.

"College ah khan mipa dang te kha melh lo la,spy ka dah vek ania," a rawn tih leh chuan min hmu thei lo mahse ka hmui chu ka lo peh sawih khum chiam.

"Nangpawh, Aizawl nula khal deuh deuh,no nalh bawk si te kha i lo va hmu tai vel ang e," a lo nui hawk hawk.

"I no nalh fe......" A rawn ti pawr khawp mai.

Thil dang dang te sawia phone kan dah hnu chuan keipawh inhnuai lamah ka nu pui turin ka chhuk thla ve a.

"Vansangzuala hi tunlai chu a awm dan hi a dik lo reng reng," ka nu chuan min hmuh veleh chuan a lo ti nghal hlak hlak.

"Engtin nge a awm a?" Ka lo ti ha.

"A mitmeng hi a dik ngai lo,a mut a chhuak reng a han bia ila a ṭawng a sehchilh tlat bawk a.I u hrilh a ngai,"

"Vengsang lam ho a kawm tam em alawm,tlang veng ho nen khian," ka tih chuan ani tak tak a,an school lama a ṭhiante ho hi kan veng ami an ni lo a,vengsang leh tlang veng lampang phei khi chu ruihtheih thil a tam em em a, naupang te emaw kan tih pawhin zu leh drugs te an khawih a.Ka u te pawh hian an han check zeuh zeuh ṭhin.

Tlaiah chuan Tetea chu a rawn haw har khawp mai,midang ho rawn haw hnuah pawh a rawn haw theih loh avangin ka u te ho chuan zawn mai an rilruk a,thu an rel fel mek laiin a lo lut hlawl,khua pawh a thim chhulh tawh.

"Vansangzual,ngati em em nge?,tunah dar 5 a pel tawh a," ka nu chuan a lo ti nghal hlak hlak.

"Khitah ka kal kawi lawk..." Tia inchung chhoh mai a tum chuan U Alawma'n a au let vat.

"Vansangzual hetah lo kal teh..."

"Kan inthlak phawt..."

"Lo kal teh ka tihchu..." Ka lo phu zawk,ka u chu vin ṭha tak ani.

Tetea chu muangchang fe hian a rawn phei a,kan vai chuan kan lo en ṭhap.

"I awm dân hi ka duh lo reng reng,hetianga awm rual pawh i la ni lo.Zah pawh hi i zak lo ami?" U Alawma'n a tih leh chuan Tetea chu hnuailam a melh ran a,a chhang let mawlh chu ka lo hlau.

"Min han thawk khum teh..." Tih pah chuan a samah chuan a ṭham a, "Hneawm ve sek e..." Chutah a ri nghal chawrh,ka nu nen kan lo ṭe ṭhat.

Tetea'n U Alawma chu kut a thlak let veleh a,buai tak an ni.U Cobtea leh U Asangtea'n an lo ṭhelh ve bawk.U Alawma lah a thinrim tawh bawk si,chutah ka pa chu a tho lawk a kan chhuatnawhna fawng awm chi ngei mai chuan Tetea hnungah chuan a vaw nghal chawrh.Kan ngawi ṭhap a,Tetea lah a ngeng bawk si,thawm pawh a chhuah duh eih lo.

"Naupang sual lutuk.Tunlai i awm dân hi kan hai hleinem,i u khatianga ti ngam tur kha i ni em?.School hi ka ban tir che ang a,home ah ka dah vang vang mai ang che,hrehawm i ti viau ang," ka pa chuan thinrim sai hlawk hlawk chungin a ti a,mak ka ti khawp mai ka pa hi hetiang em em hian a la thinrim ngai lo.Tumah kan ṭawng ngam tawh lo a,Tetea chuan hnuailam a bih ngar a,inchhung boruak chu rit ṭha tak ani.

Chaw ei chu ngawi rengin ka nu nen kan siam a,ka u te ho pawh tumah an ṭawng ngam tawh lo.Chaw kan ei lai te chuan Tetea chuan a ei ve lo ta reng a,"Chawhmeh te kha dahṭha vek ang che u,naupang te te si ka thinrim ê..a la ti ngam a.Chhungte rual pawha ei duh lo te chu engmah dah sak a ngai reng reng lo ania," ka pa chuan chaw ei lai chuan a la ti hluk hluk.

"Bike chahbi pawh hi Asangte kawl zel tawh rawh u .Kan hriat loh lai takin a lo la zeuh a,kan lo in veng reng hman bawk si lo," ka nu in a lo ti ve charh charh.

"High School chauh an la kal a, hetianga awm rual hi a la ni lo reng reng.Camp an neih hunah pawh an sir khi ka ṭhianpa ania ka hrilh dawn alawm,hetiang ten Matric pawh a pass zo lo ang," U Alawma ani.

"Lehkha hi chu a zir ve ṭhin mahse tunlai tê hi a zia a dang lutuk a.Ṭha deuha hrilh a ngai," ka nu in a lo tih ve chuan tumah chuan kan sawi zawm tawh lem lo.

Hun a liam veleh hret a,Puia te pawh Aizawlah an la awm a naktuk mai ah an lo haw tawh dawn avangin phur tak ka ni.Class kan lak te chuan ka ṭhiante ho chuan ka mood chu fuh an han ti khawp a,mi an fiam an fiam a .

Tlaiah chuan an inah ka peng kawi a, Puia'n lo kal rawh min tih tlat avangin.Pa Dawnga pawh a chemo lak a ngeih viau aniang amah pawh a lo harh ṭha khawp a,a lo titi ve sap sap a.Ka pa a lo awm ve reng a,ka zak ve deuh mahse Nu Hruaitei'n min lo be nghal luam a,thingpui te ka lum sak a,puitling ho zawng chu sitting room lamah an in kawm khawm a,keini Puia nen chuan a room lamah kan tlan chho zeuh.

Paper bag mawi deuh hi a rawn phawrh chhuak a,skincare leh perfume hi a lo awm a.Awi keimah pawhin a ka lei ngam loh te an ni,chutah perfume ka en leh nak chuan ka perfume ngainat ber,decant bak ka lei ngam ngai lo kha ania Clinique Happy sealpack thlap ani.

"Ehe....Awii...." Ka ti hluai.

"I duhzawng ani em?"

"Ni rapthalk awi,mahse a man a to bawk si.Tinge hetiang hian i tih ṭeuh ṭeuh ṭhin," ka lo ti leh.

"Ka inhlawhna te ka dah ṭha ṭhin a,bakah pawisa ka khawl thei alawm," a ti sam et.

"Engtin nge hetiang te ka duh tih i hriat?"

"Rimtui min ti thei em a,citrus rim lam hi i duh anih ka ring a,"

"I van hre thei tak.Ka nu hian a bur hian a hmang ṭhin a mahse keimah tak phei chuan a decant bakin ka lei ngam lo kha ania,"

"An discount a kha pawh kha,i lo inthlahrung phah ang e.Hetiang atan hian alawm ka inhlawh ṭhin.Nuam ka tih zawng ania,min khap thei lo ang," a ti zui luam.

"Hetiang lamah hian ka bengvar vak lo a,bialpa ka la nei ngai bawk si lo ....." Ka tin kheuh neuh neuh paha ka tih chuan a lamah min pawt phei a.

"Het,khatiang rilru kha pu suh.Thil pek in tih sak te hi keichuan nuam ka ti a,engmah ka phut ve miah lo ania.Keichuan i hlim hmel hi hmuh nuam ka ti a,i hlimna thlen tu nih pawh ka duh.Ka hmangaihna ka lanchhuah tir na ah min lo ngaihsak zawk dawn nia," a ti sup sup a.

Kan in en ran a,"Khawvela hmeichhe vannei berah min siam anih hi,ka lawm e aw....." A biang ah chuan ka chul heuh heuh a,chutah a hmui ah chuan dim te in ka fawp a,min chhang let rang kher mai.


Inhnuai lamah kan chhungte an awm ve avangin rei pawh kan awm tawh lo,inhnuai lamah chuan kan chhuk thla ve thuai a.

"Mate,Puitea thil lo hawn che chu i duhzawng ani em?" Nu Hruaitei'n a lo ti nghal var a.

"Awi duh lutuk ringawt...."

"Awi kan buai dun alawm,kan han zawng nasa khawp a," a nui hak hak.

"Eng nge Mate Puitea chuan a lo hawn che a? " ka pa pawh chuan nui sang chungin a lo ti ve bawk a.

"Thil ṭha deuh...." Tih pah chuan ka thil khai chu ka lek va va,midang ho pawh chu an lo nui sang.


Puia'n ke in min thlah a,ka pa erawh a la awm thung.Muangchangin kan kal a,kan in kai pah ran bawk.

"Engtikah nge tlângah chuan kan picnic ang?" Amah ka thlek pah ha a.

"Inrinni ah kan ti dawn ami?"

"Ka hre lo,Inrinni hi chu ka buai thei lutuk a..." Ka lo ti ve niah niah.

"Anih leh zirtawpni ah hian ti ila,"

"Class kal a ngai bawk sia,"

"Kan tlanbo mai dawn alawm,nikhat chiah te chu," a tih chuan ka aw nghal mai lo,ka inngaihtuah fe hnuah ka aw ve ta nge nge.

"Mahse,ka u....." Ka tih leh chuan ,"Cobtea te chu lungngaih thlak loh,min ring tawk ve alawm," tih pahin a awm chu a beng thek thek.

"I va rawn haw har ve,i nau zanin aṭangin an camp dawn a, chaw ei hma a ngai ka tih ka tih kha," ka nu in inchhung ka luh rual chuan a lo ti ve zat a.

"Puia te inah ka kal kawi alawm,"

"Han in thlak vat vat la,behlawi hi lo mal rawh," a tih leh chuan inchung lamah chuan ka chho vat.

Tetea room lamah ka kal hmasa a a lo buai ve khawp mai,a mutbu chu an lo tel than tawh a. "Ṭha deuhin han zir rawh aw,thil sual te kha engmah ti miah suh ang che," a bula ṭhut paha ka tih chuan ,"Khawmaw tho teh ka kawrlum i ṭhut,i lo ṭhut uih vel ang e," a ti nghal zat,kher kher ṭhin hian aw.

"U pawisa min lo pai tir ve teh," a tih chuan ka lo ner nasa khawp mai.

"U Asangtea'n a pe leh tho ang che,"

"Min pe lo ang,ka mark a chhiat em hi,"

"Fel hek lo che,ṭha deuhin awm ve mai ta che nangpawh.I naupang ber a,i sual ber,"

"Ve che,urlawk zanah pawh i ruih em kha aw," min tih chuan ka melh rum nasa khawp mai.

"Ka vawikhat in na ania, khatiang kha ani dawn tih chu hria ila ka in lo chiang viau ang," uar fe hian ka lo ti ve a.

"Mawh...pawisa chu...." A ti leh tawh,ka nau anih na angin ka khawngaih leh ṭhin bawk si ,han sual ve ngang ngang ṭhin viau mahse nau te nge nge hi chu an bulah hian kan rilru hi a nem leh hma ṭhin viau.U Alawma nen pawh hian han in hau leh pung pung ṭhin mahse ka u hian a tuk velah hi chuan ṭha tak hian a be veleh ṭhin a,a inthiam lo leh deuh ṭhin tih pawh ka hria.

Pawisa chu kan in pe leh ta nge nge a,thu ṭha te ka hrilh ve luam chutah ,"Ve che ah,kal teh...Mi buai lai lai in," tih pahin min nam chhuak rawk rawk.

"Awi Vansangzual,khawi pawisa kha lo la leh nghal rawh..." Ka ti chul a,anih lah chuan kawngkhar a kalh hmak.

Kan kum a lo in thlau em em bawk si lo a,chutah hmeichhia ka lo ni kher bawk nen hian Tetea hi chuan mi hi a hlau lo thin khawp a,ka thusawi ve te hi chu a beng pakhat ah a lut a lehlamah a chhuak lehnghal ang chutiang vel chu ani.

"Tetea pawh hei kan hma lawkah board exam in hmachhawn dawn a,zanin aṭangin in school-ah camp te in nei dawn a camp in neih chhung zawngin ṭha takin lehkha zir la,thil sual te kha han ti lo la i nu leh pa leh u te ho in in lamah beiseina sang tak nen kan lo hrilh dawn che a min ti beidawng lo hram dawn ania.Chuan i tan bang lovin kan ṭawngṭai ziah bawk tih hria la,nangpawhin chu chu hre reng chungin fel takin i nun i han hmang dawn ania," ka pa chuan chhung inkhawm kan hman lai chuan a ti charh charh a.

Ka nu leh pa leh U Asangtea ho in Tetea chu kan thlah a,kan hnung-ah bike in U Alawma'n min lo zui ve bawk.Kan naupang ber anihna ah hian ka u te ho pawh hian an ngaihtuah em em a,han hau peih viau ṭhin mahse an duhsak em em thung a,Tetea pawh hian chu chu a hriatthiam vat ka beisei.


An school awm na kan thleng chuan midang ho pawh an lo awm nual a,U Alawma chuan a ṭhianpa chu a va be nghal vat a,Tetea chungchang a sawi pui dawn anih ka ring.

Kan haw dawnah chuan kan motor bulah ka pa in Tetea chu a lu chunga kut nghatin a ṭawngṭai sak leh a,midang ho pawh kan lo maimitchhing ṭhap.A luh dawnah meuh chuan a lo hawi let vang vang a,a lung a leng ve reuh ngawtin ka ring.A kut a rawn vai zeuh a,kan lo vai let ve sap sap.


Haw kawngah pawh chuan Tetea chungchang ngawt chu kan sawi leh a,kan ngaihtuah tlang ani . "Hmanni a ka hlap aṭang khan ka inthiam thei reng reng lo a,amah pawh hi a zal deuhin ka hria," ka pa chuan a ti nuah nuah.

"A ṭhat na tur vêkin alawm i tih,ani pawh Pathian zarah eng êm a han ti lo ang," U Asangtea'n a lo ti ve bawk.


Tetea awm ta lo chu inchhungah ka buai a zual a,hauh ngai rengin awm mahse inchhungah hi chuan a ṭangkai ve a a ngaihawm ve reuh khawp mai.Friday ah chuan Puia chuan kawng pengah min lo nghah thu a sawi a,nidang zawng aia nalhin ka in thuam a.Ka nu lah chuan ka kal dawnah ka inchei a ti deuh nge min thlek leh ṭhin mahse engmah a sawi ta lem lo a.Ka bag ah chuan eng eng emaw ka ak ṭeuh bawk a,ka chhungte hriat hlau takin ka vuan deuh reng bawk mahse tumah chuan engmah an sawi hran lo.

Kawng peng ka thleng chuan ani pawh a bag chu puar ṭha tak ani.Min lo nuih var var a,a tih ṭhin dan ang bawkin mawi min tih thu a sawi leh hmasa ber.Hetiang thil ho te anga lang si mahse a dawngsawng tu tana dawnsawng nuam em em mai nitin min hrilh ṭhin mahse ngaia neih mai a har,rilru hi a hlim veng veng zel.

Kawn vengah thil eng eng emaw kan lei kawi leh a,rambo polythene in kan in khai bawr khawp mai .Tlang veng lam pana kan in phurh chhoh lai chuan kan hmelhriat te hmuh ka hlauh avangin ka biru leh chawih chawih ṭhin mahse vanneihthlak takin tumah kan hmu lo hlauh.Tlang kan thleng chhoh chuan kan kal ṭhinna theihai kung hnuaiah ngei chuan puan ka phah hluai a.Eitur kan keng te chu kan han phawrh leh a,thei leh chips vel ani.Thla te kan han la leh a,thla a la thiam lo lutuk te chu kan han in hau leh hlak hlak ṭhin.

"Aaa..Mate,i thla a chhuak hnem lutuk palh ang tawk tawh mai rawh se," a ti nuah nuah.

"Ken dan tur ka hrilh ang che khan keng la,che tawh suh," tih pah chuan ka lo in pose leh mawlh mawlh.Ani lah chuan thuawih takin a hmet veleh mai bawk a.


Thlalak ka en chuan a ṭhenah ka dinglam a ti lang tam em em a,a ṭhenah ka ke a cut daih bawk a.A hmeh hnem ve tehreng nen laktlak tak chu pathum vel bak a awm lo.Thla te chu ka lâksak ve a, "Aw ti khan i hmelṭha,sir lam kha han hawi teh," ka tih chuan ṭha deuhin a sir lam chu a hawi a,pa tak ani.Kan pahnih a thla min laksak tu an awm bawk si lo a,kan in selfie tluk tluk ringawt.Ka biangah a rawn chuk zeuh a,kei lahin ka lo click fuh em em lehnghal a ,a mawi reuh phian.

"Nuam i ti em?" Ka kutzungṭang tuai neuh neuh pahin a ti a.

"Ti rapthlak.Carpet picnic hi chu ka chakna a rei tawh a..." Ka lo ti ve nghal zat.

"Kan pass lawmna chauh ala nia, nakinah hei ai nuamah hian ka la hruai ang che," a tih chuan ,"Helai hmun hi nuam ka ti ber,kan pahnih tan hian a special em em bawk a," ka ti sep sep a,kan mu dun rial a,khua lah chu a thiang ṭha bawk si,a phone ah hla a play a a awmah chuan ka bei hle hle,a thawk la ri pawh hrechiang tak ka ni.

A playlist ho mawlh chu ka rin loh lam daih ani hla lungkuai lam deuh hlir ani hlawm.A music taste pawh rin loh lam daih ,mi lungleng mi tak a lo ni ve dawn anih hi,ka ti rilru neuh neuh a.


Bryan Adams When You Love Someone a rawn play chiah chu , keipawhin ka lo ngaihthlak fo tawh ṭhin ani a.A tir music lunglen thlak tak aṭang chuan ka lo hre nghal.Thli fim a tho heuh heuh a,tuna kan awm dan ,music zawng zawng te chu a in rem vel vek mai.

When you love someone
You'll do anything
You'll do all the crazy things
That you can't explain
You'll shoot the moon
Put out the sun
When you love someone....zawi te te in a sa ve sup sup a,keiin ngawi rengin a zai chu ka lo ngaithla a.

Hmangaihna tuipui fawn chuan min len delh delh a,ka pil riai riai.... Hmangaih nih nawm zia te ka hre nawn leh a.Hmangaihna hi mi tam tak ten an lo nat puia ,an lo chhiat pui pawh hi ka dem hauh lo,a ril em a hmangaihna hi chu sawifiah zawh rual alo ni lo e.

Ka kut chu nghet takin a chelh a,amah ka han en chuan min lo en ve kar."Ka hmangaih che aw...." A ti sup a.

"Keipawhin...." Tih leh min rawn fawh a rual a,kan duhthawh dun lehpek khawp mai.Ka awmbawr chu a rawn ṭham nawk nawk a, vawiin chu a hun leh a hmun in a lo zir bawk nen ka lo dawh ve zel a mahse a hnuailam a rawn khawih veleh chuan ka harh kawk a ,"Aih...ka duh lo," tih pahin ka tho nghal sawk sawk.

Ka insiam ṭha zui mawlh mawlh a,ani lah chu a mu zangthal duai a,meizial a tan zui mawlh mawlh.

"Lo tho rawh thil ei tawh ang," amah chu ka sawi dat dat a.A thinrim emaw ka ti hial,min chhang bawk si lo a.


"I thinrim ami?"

"Aih,rim lo e.." tih pah chuan a rawn tho a.

"Mate,min ngaidam rawh aw,ka lo insum hman lo ṭhin a.I duh lo chung chu engmah ka ti dâwn miah lo ania," a ti sup sup a, "Ngaihdam min dil a ngai hleinem.Ka haw miah lo che ania," a biangah chuan ka vuan a.

"Ka insum tawh ngei ngei ang.Ka duh lutuk avang zawk chein anih hi aw,ka tan chuan harsa deuh ṭhin mahse ka insûm hrâm hrâm ang,"

A biangah chuan ka va fawp zeuh a,"I nupui ka nih hunah ka engkim a engkim hi chu i ta ani dawn alawm," a beng bulah chuan ka ti sep a,ani lah chu a lo nui suk suk.

Chawhnu her ah chuan kan eitur keng te chu kan ei a,kan rin aiin a lo tam leh bawk si chu naupang school bang tlanga lo leng ve te chu kan han pe leh rih a.

Haw tura kan insiam mek lai chuan bike horn a rawn ri tuarh tuarh a, ka'n hawi phei nak chuan kan ṭhiante ho chu an lo au nasa khawp mai.An rawn in zui phei diah diah a,a phur fal deuh Hruaipatea leh Chhana phei chu an bike hma te an han chawi kâng leh ang lawp lawp a.

"Vansangluri han in tih theih zia hi," kan bul an rawn thleng chuan Hruaipatea'n a ti thawr.

"Ngawt a che,in tih theih chhan tur pawh zuk awm nghal lo chuan,"


"Khatia in awm vel hrim hrim kha i in ti thei.I hmelah khan a lang vek.In over dun bawk si," naupang chhia zetin a ti leh a.Ka lo ner khum nasa khawp mai.

"Nidangah chuan hetiang hi chu a tih zen zen chi loh ang," U Cobtea'n a lo ti thum ve dut a ,a lam chu kan hawi ṭhap.

"In in hmuh duh pawhin,class ṭhulh lo zawngin," a tih zawm leh.

"Kha kha kha,in hria maw.Awi Cobtea takngial pawhin over a ti ve che u anih hi," Hruaipatea'n a tih chuan a hnungah ka sik vak.

"Eiah...Vansanglur.Kha i over zia kha maw,"

"I lo kal ve chak vang ka hre vek.Puia'n a sâwm ve si lo che rilru na i nih kha," ka tih chuan a duh lo khawp a.

"Awi Mate, Lalhruaitluanga hi maw a phun char char,a chang leh lo call che u a tum thul kan khap bet hram hram alawm," Rini'n a tih chuan Hruaipatea chuan a lo pha ve nasa khawp mai.


"Awi ka u kha nuam lo ka ti e...." Puia bula ka tih chuan , "A ṭul lo a ti deuha a tirah pawh khan mahse i u hi chuan mi hi a ring ve a,ka bulah pawh tun bak hi chu class tlânbo zawng chuan tih pui tawh suh a ti alawm," a lo ti ve bawk a.

Ka u hi chu fel ve thei tak ani mahse a ngaihdan a nih loh chinah chuan ka ti lui ngam lo hrim hrim .Ka u mahnise fel hi ka ti ve thlawt,a bialnu te hi an vannei ngawt ang kan ti ṭhin.

Kan haw a in kan thlen thleng pawhin ka u chuan engmah a sawi zui lo hlauh lawm tak ka ni.Ka pa lah chuan "Vawiin eng nge class te a nuam em ?" a lo ti nghal var a,office a bang chiah ani ngei ang a lo la in ha ap mai.Chutia ka pa in a tih avang chuan ka u lah chuan a âw a lo thian kharh kharh a.

"Aw... nuam... lutuk..." ka ti ban deuh charh. Ka u in engkim a hre bawk sia,a nuam duh vak lo deuh chu ani.

Hun chu an kal veleh a,Valentine's Day dawnah chuan Puia chu Aizawl lamah a pa in check-up pui turin a hruai leh a,class hi a chawl deuh reng a mahse kan professor te ho pawh hian an hrethiam viau zel.Valentine's Day ni ah chuan pangpar bawr lian ṭha zet ka dawng nawlh a, Puia'n a lo order sa diam hi a lo ni,pangpar ka vawikhat dawnna ani bawk nen ka za cheng a,awm dan pawh ka thiam meuh lo.Thla lah ka lâksak ngun mawlh mawlh tawh,a changin amah te chu ka zuk video call leh a,nuam tak ani.

"A mawi lutuk..." Pangpar keng pah ran chunga ka tih chuan ,"Nangmah ang chiah a no set leh mawi em em a nih kha," a rawn tih chuan ka lo lai chhe khawp mai chutah ,"Tikhan,i ṭhi awrh laia locket kha keimah angah lo ngai la,i bula awm ve reng angah min lo ngai la...." A rawn tih zawm nghal zat.

A rose min pek mawlh chu a fresh a ni bawk nen nakinah ka room a ka hung turin ka khawi daih ang.

Kan in ngai thei khawp mai,an cham rei an rin loh laiin rin ai takin an cham rei leh a, zanah hian kan in video call ṭhîn a.Ka assignment tihna bulah te hian phone hi ka dah a,ngawi rengin ka assignment ti lai min lo thlir ṭhin a.Zan mut dawnah nen lam kan in video call a,tun ṭum a zin chu ṭum dang zawng aiin ka ngai bik in ka hria.


Tetea te pawh exam an ṭan tawh a,a chhang ṭha em tih kan zawh hi chuan "Chhang ṭha lutuk," a ti mai zel a,dik tak tak ang maw.Ka nu phei chuan a awih lo lutuk a,"Aaa ...a fail ang,a thiam lo ang a ,a inthlahrungin ka chhang ṭha a ti mai mai ani ang," a ti deuh tlat bawk a.Kan unau hi lehkha thiam thei lo kan ni miah lo a ,mipa ngat phei hi chu an tih ṭhat duh tak tak te chuan an rilru te hi a chak a,Tetea pawh ṭha taka a tih ngei ka beisei.


Puia te chu March thla tirah an rawn haw a,ka ngai tawh bawk a,a lo haw ni chuan zing aṭangin in ka ti fel a,zingkarah chawhma hna ka zo hman der.Chaw ei khamah ka inbual leh sawk sawk a,an in lamah ka phei ta nghal a,

Tun ṭum chu Nu Hruaitei a tel ve lo a,an lo thleng hma aṭangin an inah ka va tap deuh chawt a.Nu Hruaitei chu a titi leh siam siam ṭhin,"Mate,in nei tawh mai ula.Kan chhung kan tlem bawk si a,a khawhar thlak thei lutuk a," fiamthu thu tak deuha a tih chuan chhang dan tur mai ka hre lo.

"Nia,han graduate ve phawt ila..." Ka ṭawng ban cherh chawrh khawp mai.

"Ni e,in graduate veleh palai kan lo tir nghal ang,i Pa Dawnga mawlh mai hian a nghakhlela,i pa bulah phei chuan an graduate hma hian innei se heta ṭang pawhin a kal thei tho alawm atia mahse i pa zawk kha a inthlahrung tlat a," a tih zawm zat.

Hetiang lam thil puitling in khunkhan deuha min sawipui hi chuan awm dân ka thiam lo ṭhin, ka zak deuh chawih ṭhin a,sawi tur pawh ka hre tawh ṭhin meuh lo.

Puia te pawh chawhnu lamah an lo thleng a, tun ṭum a zin chu engmah min hawn lo turin ka ti a ka inthlahrung vang pakhat ani.Pa Dawnga pawh rinai takin a a ṭha a,doctor phei chuan hmasawn a lo ti khawp a,kan lawm hlawm em em ani.


"Nu kha le kawrmawi tur,chuan Matei pawh kha le..." Puia'n a tih chuan thil min lo hawn lo tur khan ka chah nasa viau asin mawle,a tan hian phurrit ka ni ang tih ka hi ka hlau ṭhin a.

"Awi i ti mak thei e,min hawn suh ka tih mawlh mawlh kha," zawi tein a beng bulah ka ti ser ser.

"Enchhin rawh,a rawng kha i inhmeh dawn lutuk a ka kalsan thei thlawt lo alawm,"

Ka'n en nak chuan kawrfual ,a senno par chiai hi ani mipa ah chuan hmeichhe thil nalh hre thei tak ani.Nu Hruaitei chu kawr suit nipui laia hak nuam tur deuh a hawn sak bawk a,mawi kan tih thu kan han sawi chiam a.

Nu Hruaitei'n chaw ei rawh min tih tlat avangin ka nu te chu ka va phone vat a,an ni lah chuan rem an lo ti ve mai bawka.Puia inbual chhung chuan Nu Hruaitei nen alu te kan lo vel a, "Mate,eng nge i ei chak?" Tia min zawh chuan ,"Bawl thak deuh ka ei chak,"

"Bawng kambawl kan nei alawm, ka'n chhum ang aw.Tui deuhin kan bawl dawn ania," a tih chuan phur tak ka ni,Nu Hruaitei hi chuan thil bawl neuh neuh hi a thiam tih ka hria a,hmar tih takah a bai thak siam phei chu tui ṭha tek tek thei tak ani.

Puia inbual zo pawh chu kan bulah a lo ṭhu ve reng a. "Nu,ka pa chu hma a sawn lutuk a.Hetiang renga hma a sawn chuan a dam vat ka ring,"

"Ni e,eitur ṭha apiang hi leisak ila.Pawimawh ber chu a rilru hi tih hah loh hram hram tur,mihring dam ṭha pangngai pawh kan taksa kan pawnlam dam viauin hrisel viau mahse rilru ber a hah a,a nat chuan kan chhe rawih rawih zel ania.Chuvangin nangpawh,fel takin i awm zêl dâwn ania," Nu Hruaitei'n a ti siam siam a.

Chaw kan ei lai te chuan chawhmeh min suah sak mawlh mawlh a,a chang phei hi chuan a chhungte hmai ka zah deuh ṭhina mahse ani lah hian eng vak ah mah a ngai ngai lem lo .

Zanah a room balcony ah kan ṭhu chhuak a,zan lam khua chu a la vawt surh a,ka in kuangkuah hlan."Vawt i ti ami?" Ka beng bulah a rawn ti sup sup a.

"Ka rinai a vawt reuh.Vawt hi ka tuar thei lo ve hrim hrim a," chutah a room lamah chuan a va lût leh a,rei lo te hnuah a rawn chhuak leh a hoodie hma phel hi min rawn hak tir hlun a,keipawhin ka lo ha ṭha ve nghal sawk sawk.


"Tikha chuan a lum tawh ang,"

"Tlaia i nu thusawi kha hre reng rawh aw.An rilru ti hah zawngin awm lo la,fel deuhin awm reng rawh aw," ka ti sep sep.

"Umm..fel zel ang boss in i tih te chuan," a nui pah ruh ruh a.

"Min lo thlah la....nangpawh i motor chuanna te i chau palh ang," ka tih chuan ka hnung lam aṭang chuan kuah vang vang a.

"Ti hian lo awm ve tawh mai la,zantin in thlah ngai leh ṭhin hi a hrehawm emai," a ti thum dut dut a.

"Hun leh ni te chu a kal chak alawm,nangpawh nakum lawkah i graduate ang a,keipawh a kum leh mai ah ka graduate ang a,nghak hram hram ang,"

A bulah hian ka thla a muang a ,ka hlim a,kan awm dun reng lai pawh hian ka ngai vawng vawng zel mai ani.

Inhnuai lam kan chhuk chuan ka nu leh pa pawh an lo awm leh reng tawh a,"Matei hi ka va thlah lawk ang," Puia'n a tih chuan kan in zui chhuak ve nghal a.

"Arsi mawi hlawm zia khi aw..." Van lam en chunga ka tih chuan ani pawh chuan vân lam chu a hawi chho ve vang vang a.

Thla chu a sen bial rûih a,khua a thiang ṭha bawk nen nalh vawng vawng tak ani.

"Star gazing ka chak,tlângah thla bial zanah kan pahnih chauhin," kal pah chuan ka ti chhuak sep sep a.

"Kan ti ang,i duh ang apiang chu tih sak zel che ka tum ang," a lo ti let nghal var a.

"Thla khi a la bial chiah lo a,thla bial zanah chuan ti tak tak ang aw," ngenngawl deuha ka tih leh chuan ,"Tehreng mai,kan ti ngei ngei ang (a phone a phawrh zui a,eng nge maw hi a en vut vut) ,ni 7 ah thla a bial dawn anih hi,Zirtawp zanah," a tih chuan phur tak ka ni.

Ngaihzawng ka neih hma aṭanga ka lo chak ṭhin,kan ngaihzawng te nena arsi thlir dun.Hmun reh tak leh thawveng takah,zan boruak fim leh vawt var hnuaiah arsi thlir dun ila,duhthu te kan sam dun ang a.Kan pahnih chauhin....


Kan in kan thleng chuan a lo lut ve zuai a,U Cobtea a lo awm hlauh a,an han in be veleh luam a.Thingpui te ka lum sak leh hnu chuan rei vak pawh a awm tawh lo,kan in thlah fel leh hnu chuan keipawh inchung lamah ka chho ve ta nghal a.


Vawiin hi Tetea te exam zawh ni tur ani a, tlaiah an hruai chhuah theih dawn a.Eng tak ang ve ang maw.Amah kan zawh lah hian ka thiam vek a ti mai zel a,an zirtir tute hnen aṭang pawhin complain kan dawng ngai lem lo mahse an luh tirh khan meizial an lo zu ru a ka nu leh pa pawh an school ah an han kal nghe nghe mahse khata ṭang khan engmah complain kan dawng leh tawh lo .U Alawma pawhin a ṭhianpa kha a khat tawkin a zâwt reng a,"A fel lutuk lehkha pawh a zir ṭha" tih chu kan chhanna dawn ṭhin ani a,kan lawm ve viau.Tlaiah chuan ka nu leh pa leh U Asangtea'n an han hruai chhuak a,a luh hma aiin a sa pawh a ṭha a,an camp chhung khan chawlhni vawihnih chauh an rawn haw a,ka nu leh pa te hi chuan thla hmasa Inrinni hmasa berah khan an han thlawh a,kei tak phei chuan a luh dawn bak kha ka hmu leh tawh lo a.

"Tete,i ti ṭha maw?" U Cobtea pawh chuan a lo ti nghal zat.

"Aw,ti ṭha mahse SS kha kan zir fuh vak lo a mahse ka pass tho ang,"

"E,a ṭhat chu subject dang i tih ṭhat tho chuan.Kha camp chu i ngeih hle mai i sa pawh a rawn ṭha ve deuh alawm," U Cobtea'n a tih leh chuan ,"Alu leh dal kan ring char char a,Chawlhni ah chiah sa kan ei bawk sia.Vawksa ka ei chak tawh lutuk," a tih zawm zat.

"Eee...kan chhum hluah dawn ania,a rep kha fridge ah ala awm alâwm," ka nu chuan a lo ti nghal var.

Chaw kan ei lai chuan ka pa chuan kan unau chu min zilh mawlh mawlh a,"Pathian zarah unau pawh in rual ve a,kan awm loh hnuah pawh inhmangaih takin in lo awm tlang zel tur ani.Tetea leh Matei a naupang zual pahnih te pawh in u te hi zah thiam ula,u zawk te pawhin in nau te hi thlahthlam lo ula.Alawma leh Asangtea chu hna in nei tawh a,in ngaihtuah awm tawh loh, Cobtea pawh ka ngaihtuah chuang lo ani chu a hlawhtling ngei ngei dawn tih ka hria.Matei leh Tetea te mawlh mai hi,rilru nei takin awm ula.Matei pawh pasal a ṭha a chhia te i la nei ve ang a,i nuṭa te ho hi tumah thlahthlam lo la.Hmeichhia chu mâk chhiat tawk thei reng in ni,chutiang hunah chuan in nuṭa te bulah bawk ani in tluk luh dawn chuvangin i u te ho thu hi a kawi a ngil in zawm la,thu ṭha an hrilh che pawhin haw lo la.Puitea nen pawh in inkar kan hre vek a kan ring tawk bawk che u a,thianghlim taka awm zel tur aw pasal i neih hma loh chu.Tetea pawh rilru nei lo deuha i awm chuan hrehawm ti tur chu nangmah i ni," ka pa chuan a ti charh charh,tumahin kan chhang lo.

Kan chhungte ho hi chuan min ring em em vek a, Puia nen hian a khaw lo zawnga kan awm hi an ring lo hrim hrim chu chu keipawh hian ka hre ve kar a,an rinna hi tih chhiat sak loh hram hram ka duh ani.

Zanah chuan assignment ka tih laiin ka phone a rawn ri ṭat a ,"Ka ril a ṭam i ti sia eitur ka lei sak che a, pawnah ka awm," Puia ani.Dar zat ka en chuan a lo tlai leh duai tawh a,ka chhungte ho pawh an meng tawh pawhin ka ring lo mahse inhnuai ka chhuk chuan U Asangtea hian TV a lo la en a, "U, Puia'n eitur min leisak a,pawnah sawn a ding a ka va lam lawk aw,"

"Rei lo la aw,a tlai tawh hi," a tih zawh rual chuan pawn lamah chuan ka chhuak a,kan in gate bulah chuan a lo ding leh ran tawh a.

Polythene ah hian eng nge maw hi a khai ṭeuh a,a ṭhen chu foil ten a in tuam.Kan en nak chuan Momo leh arbawp tih te,eng eng emaw a ni.

"Awi,hetiang em em a ngai hleinem...ka ei zo seng lo ang,ei dun ang," ka ti nghal luam.

"I rawn sawi khan Tlang vengah ka han tlan chho nghal a,momo an lo la nei hlauh a.Arbawp kha chu ka siam sak che anih kha,a dang pawh kha en la ,"a tih chuan ka en ve vat a.Sausage leh meatballs tih te an ni hlawm.

Ka hawng sawk sawk a,arbawp pakhat chu ka pe a ,kan in gate bang ngheng chuan ka ṭhu thla nghal rawk rawk.Ani pawh a rawn ṭhu ve nghal a,awi a arbawp siam chu tui tak ani.Ka ei lai chu min en reng a,min han nuih leh suk suk ṭhin a.

"A dang ho pawh hi hawn ṭhen ve la..." Ka tih chuan a lu a lo thing nar nar.

"I ei tûrin alawm ka lei,han lut tawh rawh i chhungte'n an ngaihtuah ang che," a tih chuan ka tho nghal thuai a.

"Ka lawm e aw...." Amah chu ka kuah leh vang vang.

"I tan te chuan...." A tih sup hnuah chuan ka hmuiah a fawp zeuh a mahse rei kan in fawp lo thung.Inchhung ka luh chuan U Asangtea chuan momo pakhat min ei sak ve a, keipawh inchungah ka chho ve ta nghal.


A tukah chuan class kal turin ka insiam a ,Tetea a awm tawh bawk nen zing lamah chuan min awl hneh viau.Puia chuan kawng pengah min lo nghak a.Min hmuh rual chuan min lo nuih leh var var.

"I va mawi ve..."

"Nangpawh..."

"In class mipa ho te hian an lo melh tai ang che ka ti," a nui pah ruh ruh.

"Kan inngaizawng tih an hre vek aw.Tumahin min melh pelh lo ang," ka tih leh hnu chuan a kut chu min pe leh a a tih dan ngaiin a bike hnung chu a rawn ti hniam deuh a,keipawh ka lawn ve vat.

Chhun chawlh hma period chu principal in a rawn la a,kan la rei reuh khawp mai.Note copy tur lah chu a han tam em em a,chawhnu ah last period ka nei dawn lo a chutah chuan ka ṭhiante ho nen library a copy kan rel ta ringawt.Thil kan ei hman ṭawk ani,Puia nen pawh ral khat aṭangin kan in hmu zuai a,a ban a lo vai zauh zauh a,kan in hmu zui tawh lo.

Banah chuan Puia te pawhin last period an lo off ve a,mahse Hruaipatea te ho nen leng an rawt avangin rei pawh awm lo in min kalsan a.Ka ṭhiante ho nen chuan library ah note chu kan copy a ,titi paha ziak kan ni bawk nen kan ti sawt lo khawp mai.Kan zawh meuh chuan college ah chuan Professor ṭhenkhat chiah an lo awm tawh a,khua pawh a tlai ruih tawh.


Ke in kan haw ṭham ṭham a,kan college thlang deuhah hian inhau hlak hlak thawm hi kan hre leh ṭhin a.Hmeichhia leh mipa an ni ngei in kan hria.Kan zuk thleng chuan Phisuka leh Kimtei hi an lo in din chilh ran a,Kimtei zawk chu a ṭap in ka hria.An zawn kan thleng chuan ,"Kimte, ngatinge i ṭap ami?" Rini chuan a ti nghal thuai a .

"Lo buai ve suh u, " Phisuka lah chuan a lo ti hluk ,kan in melh kual ralh ralh a.

"In rualin ka lo haw ve dawn,"Kimtei chuan a mittui hruk zeuh paha a tih chuan ,"Khawiah mah i kal dâwn lo aw Lalrinkim," Phisuka lah chuan a lo ti ve khur khur.

"I hming ka lam ri dawn lo ka tih kha..."Kimtei ani,a vin ṭha khawp mai.

"Ka hming i lam emaw lam lo emaw,a lo piang hunah tunge a pa ti se engtin nge i tih ang ," awi an au dun lawng lawng ani ber.An thinrim hmel bawk si,ka ṭhiante ho nen chuan a khat tawkin kan in melh leh ralh ralh ṭhin.

"Ka sawi lo mai ang,min lo tibuai tawh suh.Ti hian engkim tawp rawh se," tih paha Kimtei kal mai tum chu a samah a ṭham sak a keini ho lah chu kan lo ṭe dual.


"Hey,Phisuk thlah vat rawh.Ka u ka phone mai ang aw,hmeichhia kutthlak theihna dan pakhat mah i nei lo," ka ti chhuak hlak hlak,a chet dan chu ka mil loh zawng tak ani.

"Lo in rawlh ve suh u ka tih chu," tih leh kan lam pana rawn kal a rual a,ka ruih hmel bawk si a ruk tak chuan ka hlau ve.

"I u chu phone ta che,ve mai mai a.Midang buaina ah lo in rawlh suh u,ka khawih hrep duh mai ang che," min ti chher chher tawh.


"I duh leh min khawih la,i case chu a rit ve khawp ang," amah melh kar chunga ka tih chuan thinrim hmel tawh tak ani.Mami'n ka kut a rawn kheuh zeuh zeuh a,ka thinrim ve em a ni.Mipa in, hmeichhe derdep zawk leh chak lo zawk te chunga hleilenna an lek hi keichuan ka haw ngawih ngawih a,ka ngawi mai mai thei lo ani.

"Ve lutuk che chuan,hmeichhia..." Tih leh min rawn hnaih chilh nghal ruak.

"Zawnga....." Rawn ti fiak ṭhat tu lam chu kan hawi nghal ṭhap.Puia chu hmanhmawh zetin a rawn phei hlawk hlawk chutah eng khaw sawi set set lo in Phisuka chu a hnek nghal ṭhuai.Chutah Hruaipatea te ho leh ka u te ho chuan an lo ṭhelh nghal thuai a.Hmeichhe ho chu kan lo rak chul.

"Mate ,kut a thlak hman che em," Puia chu thinrim hmel tak ani,kut min thlak hman loh thu ka lo sawi vat.A thaw chhuak hlawp hlawp mai.

"Chawngthanpui ve khanglang che hian,i la hre dawn alawm," Phisuka lah chuan a lo ti ve pung pung a,Faka leh Chhana'n an man bet a.An la in melh rum khawp mai.

Kimtei chuan a inthlahrung zia te chu a lo sawi ve sep sep a.A ṭap deuh par bawk,an in hauh chhan erawh a mimal thil deuh avangin hmeichhe ho chuan engmah kan zawt zui tawh lo.Phisuka pawh mipa ho in haw tura an tih avangin phun hluk hluk chungin a kal ve ta hram.

An in hauh chhan chu rin dân ka nei thiam nghal ruak a,Phisuka hi an nu nen nikum khan kum tir lam khan ani ta in ka hria an in ṭhen a mahse an inṭhen chhung khan Kimtei nen hian an in zui kan hmu leh zeuh ṭhin a langsar tak pawn an in zui ngai lem lo.

"Nau ka pai a,ti tla turin min ti a ka ti tla duh bawk si lo a," mipa ho in an bike an lak lai chuan a lo ti sep sep a, "Ti tla duh reng reng suh,tualthat ang i ni dawn a," kan lo ti ve luam.

"Min zep sak tlat rawh u aw.An nu nen khan an inṭhen chiang tawh emaw ka tia mahse an lo in be lungleng leh bawk si a.Keini lah hetiang hi kan lo ni hman bawk sia," a tih leh chuan kan khawngaih hlawm khawp a,tuma bula sawi lo tûrin kan lo in tiam ve sap sap.

Kimtei chu Chhana'n a phur haw ta ringawt a.Puia nen chuan haw kawngah pawh kan in be tlem khawp mai,a reia reiah chuan a rawn ,"Lo hmu lo phei che ila chu a khawih duh mai dawn che anih kha," a rawn ti chhuak hlawl.

"Kimtei kha a samah a ṭham a,ka thinrim em anihkha," a ding hrawk a.

"Mate,khatiang kha chu thleng tawh suh se aw,i thinrim chhan kha chu ka hrethiam lutuk mahse i chunga thil ṭha lo a thleng ka hlau ani," ka lam rawn hawi pah chuan chiang fe a min en pahin a ti a.

"Thleng tawh lo ang,chuan ka lo zawh theihnghilh daih che a a khawih na che em?" Ka han ti ṭha leh rih a,thil kha a thleng deuh puat a hetiang zawhna chang pawh hi ka lo hre mai lo ani.Chutah a khi suk a,"Amah kha en la,khawih pawh min khawih ve hman loh kha..." A nui pah hak.

"Chuan ka chungah chuan lungawi lohna i nei lo tiraw?"

"Ka nei ṭep a mahse ka biangah hian min muah zeuh la .Ka lungawi nghal ang," kan bulah chuan awm an awm em tih chu ka en nghal zak zak a chutah tumah an awm tak loah chuan a biang dinglamah chuan ka fawp zeuh.

In ka thleng chuan ka nu leh U Chami'n choka ah rawng an lo bawl a, "E.. Mate,in bang chiah ami?" U Chami chuan a lo ti nghal var a.U Chami hi U Alawma an tleirawl chhuah aṭanga inngaizawng an ni a.A hna avangin Aizawlah a awm mek a,khuaa a rawn haw lai hi chuan ka u nen pawh an in hmu zing ve ṭhin khawp mai.

"Aw bang chiah,note copy tur a tam lutuk a," an bulah chuan ka va ṭhu thla ve a.

"Cobtea hi a la rawn haw ve lo ami?" Ka nu pawh chuan a lo ti ve bawk a.

"Nupuii a thlah aniang,"

"Han in thlak la,hei zanin tlai chu i U Chami'n chaw a rawn ei dawn a,chaw kan ei har dawn lo ania," ka nu chuan a ti charh charh a,keipawh inchung lamah chuan ka chho ve nghal thuai a.

Chaw ei lai chuan U Alawma chuan U Chami chu a duhsak thiam ve reuh khawp mai,chawhmeh a suah awl lo a, a ngaihzawng bulah chuan a lo zei ve hret hrut viau anih dawn hi.

"Engtikah nge palai lam te hi?" U Asangtea'n fiamthu a a tih chuan , "Awi,ka hna hi a buaithlak lutuk a.Hei i u nen pawh hian kan sawi ṭhin a,kan ngheh phawt loh hi chuan transfer dil hi a har lutuk a," U Chami'n a lo ti ve siam siam.

"Eee Pathian a hun takah rem a ruat mai ang.Mihring te hian kan nghak thei lo ṭhin a,nghak ila kan Pathian te chu tlai ngai lo Pathian alawm," ka nu chuan a ti ve bawk.


Ni a liam leh a,ka rilru ah chuan Zirtawp zan bak a awm tawh lo, Puia nen pawh rem kan ruat ve nasa tawh.Ka thil tih chak zawng ho tê pawh hi phur takin min tih pui a tum ve zel a.A bula ka awm chang lahin min tih hlim loh hlauin fiamthu te a thawh a ka hlim loh mawlh mai hi a hlau ṭhin.He mipa ka tana mi special em em hmangaihna leh duatna dawng thei a ka awm hi khawvela hmeichhe vannei ber ka ni hial ang.


End of chapter-9