STORYFB.COM

Ni li lai ka cham ve leh tawh a , dam ni erawh ka nei hleithei lo, nimin lamah kan han in entir a , ka thisen te test in engmah an hmu thei bawk silo a , damdawi min chawh tawp a , dampui in beiseilo mah ila ka ei ve ta chu ania.



"Pute, chhun lamah ilo haw leh dawn em?" tiin ka putea hna kal tur chu ka zawt a , "lo haw ang, ei chak te inei em" ti a min zawh chuan ka neih loh thu in ka lo chhang vat a , ka putea tan a ei tur siam ka duh vang a ni.




Naupang school kal tur nen an chhuak rual a ,kawt thleng Pitei nen thlahin kan vai liam a, ka pitei nui ri te chu aw, heti tak hian ka hahdam pui dawn tih tunge hria ang.


Tukin chu tlem in ka tho dam ve deuh a , "kawnah ka zuk kal lawk ang" pitei hnena ka tih chuan "enge i lei duh a , ka zuk kal zawk ang" lo ti mahse "hawi harh pah ka duh hrim hrim a " tiin ka lo chhanga , "ka kalpui ang che" ati leh erawh ka lo hnial thung.



Kawn lam pan chuan ka kal a , ka pitei leh putea te min hmangaih zia ngaihtuah chuan ka nui leh var var thin. An awm danah ka chanchin pawh hi an hria tih ka hria a, u Mapiana khan a hrilh ngei pawh ka ring, engmah min zawh belh lova, ka awm ang angin min en tawp thung.



Ka pa hnenah engmah hrilh lo turin ka ti a , ka putea erawh chuan nuamlo tih hmel zet hian "atih chi dawn em ni?" ati a , "ka damchhuah theih nan engmah a hriat rihloh angai" ka tih takah kha chuan a sawi loh tur thu a sawi a, nizanah ka pa in alo phone nghe nghe a , hreh tak chungin ka kal loh thu a sawi ta kha ania, ka han tihbuai tawh tehlul nen dawt chiang lutuk ka han sawi tir ringawt bawk a , nuamlo ti viau mah ila tih theih dang a awm rih silo a ni..



Ka Putea te khua hi thingtlang mah nise khaw lian ve tak a ni a , mamawh han lei mai theih tur pawh khawpui lam pan ngai lovin a awm ve vek a , tunah pawh Biryani siamna tur hmanrua pawh anlo nei a , nei kim vek lo mahse an neihsa pawh hian a tui tho tho dawn...



Arsa ka lei leh hnuah inchhung a an mamawh a ka rin te chu ka lei leh nual a , pawisa a pek a duh silo a , heti hian lei tawp ila a tha ber, hei vang hi ania min kalpui ka duhloh nachhan pawh , alo kal ve chuan "a ngailo" ati fai leh vek dawn tih ka hria a ni.



Tho harh viau e tilo chuan ka taksa chu a zawi em em a, ka thâ hi chhungril lamah a khur ru der der bawk, ka thil khai lai chu a tam ve bawn nen kawngah chuan ka chawl chho deuh reng a , min hmu apiangin mak tih hmel deuhin min en leh vung vung zel.



Pitei kuhva tur ka leisak theihnghilh avangin Thenawm dawrah chuan chawlh pahin ka lei kawi leh a , dawr neitunu chuan minlo be luamin "Awmtei tiraw inih kha?" tiin min zawt a , ka nih thu ka sawi hnuah "anihchu, anihchuan tunge maw ni dawn le?" ati leh a , ka tana tangkai vak a nih ka rin loh avangin "vur inei tel em?"tiin ka zawt a , a awmna min hrilh hnuah " Mipa pakhat alo kal a , a hmel atang kha chuan a hlauhthawn hmel khawp mai a , ka ngaih ati thalo lek lek alawm" atih leh takah chuan "Zu rui maw" tiin ka zawt a , mahse "teuh nang, a lan dan chu ka sawithiam chiahlo Officer Lal deuh a nih duh hmel ka ti" atih leh chuan ka nui mai a , pawisa te pe in ka chhuak zui ta bawk.



In ka thlen chuan pitei pawh alo insu mek a , a tlai leh deuh tawh avangin ka thil lei te chu ka siam nghal sawk sawk a , pitei in a hmuh erawh chuan "awi, i lei hnem hlawm emai a inthlahrunawm" ati niah niah a , ka chhang duh tawhlo, kan sawi kan sawi anga , a inthiamlo leh mai mai zawk dawn tlat.



"Taka, Awmte damdawi kha i ei maw?" atih chuan ka eilo tih ka hre leh chiah "ei nang, kan ei nghal ange" ka ti a , kan chaw ei na rei ve deuh tawh mahse a pawi em lo turah ka ngai. Vawt ka tih leh deuh tak avangin nachhawkna chu ka ei tel leh bawk a , fel viau mahse damloh reng ringawt pawh chu thil nuam tak a ni biklo.


"Enge siam itum a, ?" atih leh chuan "Biryani mawle" ka ti a , "a hmanrua te hi a to awm hlawm si" a ti leh hram "aho lutuk pawisa ka ngah alawm" ka tih chuan min en vang vang a , "i putea nge i nû i an zawk pawh ka hrelo e a" atia, ka lo nuih ringawt.



"A zawng hmu ta a ngem le?" ti pahin dawhkan kil chuan alo thu a "engmaw?" ngaihsak vaklo a ka tih chuan "nichin khan mipa pakhat alo kal a , a bialnu nge a unaunu nge maw ni a zawng a " atih leh chuan ka thil tih lai ka tawp chawt a , "engtik khan" ti a rang zet a ka zawh chuan "ilo thlen hma deuh lawk khan, amah kha ka khawngaih tlat anihchu, a beidawn hmel bawk si a , a hmel pawh atha" ati leh zel a , unaupa a ni thei mai angem tih chu ka ngaihtuah ru rauh rauh mai. Mahse nupui a nei fel vek tawh anga, helai hmun alo thlen nachhan tur ka hre bawk silo.


"Ava khawngaihthlak" tiin ka thil tihlai chu ka tih chhunzawm leh a , mahse "Ririni ati in ka hria" atih leh takah chuan ka awm mai mai thei tawhlo "animaw? Chuan engtin nge ilo tih a , khawi lam panin nge a kal" tiin ka zawt nghal thuai a , "ka hre lo, ka insuk lai khan ania, ka lo ûk sâk hman lutuk lova , ngati nge a? " tiin min zawt let a , chhang lovin "Pite khawi lamah maw a kal" tiin ka zawt tha leh "ka hrelo chhak lamah khian a chho mai thei" atih hnuah "pite ka chhuak lawk anga, lo vil mai rawh aw" tiin ka tlanchhuak zui a , min au zui lawm lawm mahse ka chhang hman tawhlo.



A kalna tura ka rin lamah chuan ka tlan chho a , ka taksa ala chak bawk silo tlan chak erawh a har khawp mai, kawng kal han biak mai tur lah chu an vang em em a , ka hah lutuk chu ka thaw leh hlawi hlawi thin.



"Mipa pakhat alo kal em? Sang deuh ania , palian deuh" tiin in pakhatah chuan lutin ka zawt ta tawp a , nichin deuha alo kal thu a min chhan hnuah a kalna lam ka zawt leh a , "kan lo en zui miah lo" ti a min chhan chuan ka hnual rawih thei.



Unaupa ngei anih chuan he khua a in zawng zawngah hian a kal ngei dawn tih ka hria a , pakhat tê pawh a hmaih dawnlo, chuvang in keipawh chu in tinah lut lo mah ila ka zawh te apiangin alo kal thu chu an sawi zel a , "nichin deuhah khan" ti a min chhan zel danah ka tlai hret a nih hmel.



Scooty pakhat lo tlan ka hmuh chuan ka lo phar vat a , a din ruala mak tih hmel zeta min en chuan "ka pu, kawnah min phur thla ve thei angem?" ka ti a , min la hmu ngai dawn bawk silo a , atan chuan amak ve ngawt ang.


"Khawngaih takin" ka tih leh takah chuan "kawn ka thleng dawn lova, mahse lo chuang rawh" ati ta hram a , hmanhmawh zet chuan ka chuang zui ta nghal. An khua hi a len ve reuh avang hian ka tan zawn ngaihna a awm lova, kawnah lo chang tawp ila a fuh ber ang.



"Ka pu tah hian ka lo chhuk ang" ka tih chuan "kawnah iti emaw ka tia" ti nang nang in a ding ve mai a , "heihi kan in ania" ka tih leh chuan "awle" tih zawngin min chhanga , a hmel atang chuan mi pangngai angin min hmu lo tih a hriat theih.



In chhung ka luh rualin pitei in ka kalna minlo zawt vat a , min ngaihtuah thu te pawh a sawi nawk mai , ka chhang a mahse ka thusawi erawh a hrethiamlo tih hriat zet hian "engtin maw?" ati hâ a , "lawk aw" tiin pindan lam ka pan zui a , ka phone chu la in ka on vat bawk. Helai ka thlen chhoh atang khan ka la switchoff char char a , unaupa chu alo kal anihchuan minlo phone nasa tawh ngawtin ka ring.


"Pite, ka phone hi a thi leh zel a " tiin ka chi ai tawh lutuk chu minlo pui vata "khawi ka lo en ang" atih chuan ka pe ve mai bawk, "Pite, a nun theih loh chuan i phone ah khan ka simcard kha lo vuah la, unaupa kha minlo call sak dawnnia, kâwnah khuan ka lo zuk chang ang, ngei ngei in aw pite" tiin pindan atang chuan ka chhuak zui a , "Awmte, in bengdai phawt la , ka kalpui ang che" ati leh a , unaupa chu a haw hman ka hlau zek zek tawh.



Kawn a ka chân chuan Aizawl panna kawng pakhat chiah a awm a , min hmuh ngei ngei ka ring tlat a ni "keimah in ka kal" ka tih lai mekin "Pu Ramdina te in a ni em?" anlo tih avang chuan ka hawi let vat a , ka chi ai em avangin unaupa âw pawh ka lo thliar hrang thiamlo a ni.


"Unaupa" ti sap in amah chu ka en reng a , min hmuh avanga unaupa hmel a lawmna lo lang pawh chu hmuh hmaih theih pawh anilo "Duati" atih hnuah inchhungah alo lut zui a , ka biangah te chuan khawih in "i tha em? I damtha tiraw? Nâ engmah ineilo tiraw?" tiin zawhna min zawt mawlh mawlh a , mittui tling pam chunga ka lu bu nghat nghatin "ka tha vek" tiin ka lo chhang ve bawk.


"Lo thu rawh u, i Putea kan be lawk ang" Pitei in a tih takah chuan "unaupa thu phawt la" ka ti a , thutthlengsei awmna lam chu pan pui in "tui i duh em?" tiin ka zawt nghal bawk.


"Duhlo, kan haw vat angai" atih chuan "ka haw thei rihlo unaupa" tih zawngin ka chhanga , mahse "i haw ngei ngei angai, i pa a tha vaklo a" hreh hmel zeta a tih chuan "maw? Engtin nge a awm a" ka ti a , ka buai leh nghal ruai tawh.


"Hahdam phawt la, ngaihtuah awm lutuk chu anilo a mahse tunah ICU ah a awm mek" ati leh chiah erawh ka awm chhung chu a tawt pup pup a , ngaihtuah zui ngaihna pawh ka hrelo.


"Kal ang unaupa, tunah kal ang" tiin ka ding hluai a , ka bulah chuan lo ding ve in ka dar tawn tawn ah chuan a vuan a , "hahdam phawt la, i putea te kan be phawt anga kan kal dawn nia" dam deuh hian a ti a , Pitei in chhungah alo lut ve chiah bawk nen in thing harh thuai in "pite, ka pa atha vak lova, ka haw angai a , putea chu alo haw dawn em?" ka ti nghal zung zung.


"Alo haw mek ang, engtin chiah nge a awm a" pitei in atih chuan "ka hrelo ICU ah a awm a , keimah vang vek a ni" ka ti a, unaupa chuan min rawn kuahin "nangmah vang anilo, nangmah vang a nilo hrim hrim" ati leh mawlh mawlh.



"I putea alo thleng tep ang" atih hnu rei lovah putea pawh alo thleng zui a , unaupa nen chuan in bia in chanchin te chu a hrilh a , keini erawh pindan lamah awm in pitei in ka thiamhnaw te chu min siam sak mawlh mawlh.



"Kan rawn zui ve ang che u" Putea'n a tih chuan "naupang ho an ngaihtuah awm lutuk eng em kan tilo ang" tiin tha deuh chuan ka chhanga , an han ngaihtuah chian takah chuan ka thusawi chu dik in an hre leh deuh nge "enge maw a thlen chuan a rang lamin minlo hriattir dawnnia" tiin unaupa zawk chu a en a , chutah "ka tunu hi ngaih ngam takin i kutah ka dah ania" ati zui leh "min ring rawh, a chungah thil pawi a thlen ai chuan keiman ka tuar vek mai ang" tiin Unaupa chuan alo chhang a , ka putea pawh a duhthu a sam aniang a khi var var mai.



Kan chhuah dawn chuan "naupang ho kha minlo biak ru aw, Pite lukham hnuaiah khan thil ka dah kha aw" ka ti a , pitei chuan "engthil maw?" ti mahse ka chhang zui tawhlo, ka ban ka vai lauh lauh a , kan awm ho chhung reilo mahse ka tihbuai zia te chu ka ngaihtuah a , chung lam ami hnenah malsawmna tam tak vur turin ka ti mawlh mawlh mai.



Unaupa chu midang tâ a ni tawh tih ka hriat chian vang nge biak te chu ka inthlahrung tlat tawh a , nichin mai a kan awm danah kha chuan ani pawhin min la thlahlel viau emaw tih mai tur a ni, tunah erawh a ngawi reng a , min biak a chakloh chu thuhran nise min hua emaw tih mai tur a ni.



Ka chauh deuh avangin ka muhil zui vat a, ka harh leh meuh chuan Aizawl khaw daiah kan lo awm leh der tawh "dar engzah nge" ti a ka zawh chuan "Dar 11 a ri tep, i mutui em?" tiin min zawt a , ka muttui thu a ka chhan hnu ah minlo en zawk a , reilo te tak tak a ni , "engtin nge ka awmna i hriat a?" ti a ka zawh chuan "Police ka nihhi" tih zawngin min chhang a , a nihna ka lo theihnghilh hman alawm le.



Hospital lam panin kan tlan a , in a chawl hahdam phawt turin minti mahse zan in la la a ka pa hmuh ka duh avangin ka lo hnial a ,a tawpah chuan ka thu angin kan awm leh ta nge nge anihhi.


Damdawiin kawtah chuan Saia'n minlo hmuak a , min hmuh rualin min kuah nghal thlawp mai" ka hriat loh in khawiah mah kal tawh suh ang che" ati a , "awle, ka kal tawh lovang min thlah phawt teh ka thaw hleithei lo" ka tih takah chuan min thlah ve mai a , a hmelah ala lungawi chiahlo tih hre mah ila ka nuih var var tho.


Ka pa awmna lam kan pan lai chuan ka hreh ru takzet a , mahse ka bula mi te bulah erawh ka tilang lo thung. Nu fakmawiin min hmu rualin minlo pan vat a , a mit a mittui tling pam chunga "khawiah nge i awm daih a , ka ngai lutuk che alawm" atih chuan ka hnuk a ulh ve lek lek mai.


"I pa saw va hmu vat rawh" ti leh in a mittui a hru a , damdawiin khum a engmah hrelo tih hriat zeta mu mêk ka pa lam chu panin ka tah chhuah loh nan ka in sum ngar ngar bawk.


"Pâ" darthlalang lian zet atang chuan ka ti sap a , "a bulah i kal vat dawnnia" unaupa in atih chuan "unaupa, tisawn engmah a hrelo ami? Enge a awmzia" tiin ka lo zawt vat thung.

"Hria e, tunah chuan a muhil rih a , ziaawm lam a pan ve zel" tiin Saia zawk chuan minlo chhang a , ka hmuh tum angin hmulo mah ila , ziaawm lam a pan hrim hrim chu ka lawm a ni.


"Min kalsan lovang tiraw?" ka tih leh chuan "a teuhlo mai" tiin unaupa chuan minlo kuah a , a âwmah chuan beiin ka tap hawm hawm mai, "Ngaihawm" tih ri ka hriat rualin ka inla hrang thuai a , ka mittui te chu hru sawk sawkin ka pa awmna lam bawk chu ka en leh thin.


"Ilo kal maw?" unaupa in atih chuan "nia, ilo thlen thu ka hria a " Ngurteiin atih chuan unaupa bawk chuan "i hah mai mai alawm" tih zawngin a chhang a , a chhanna chu tawi viau mahse a ngaihtuah zia ti lang tu a ni si.


"Hah love, Ririn i tha maw?" tiin keimah zawk chu min rawn bia a , min be lo se ka tih tehlul nen, "tha e, ivan fel fe" ka ti tha ve mai a , tunah ka boruakah leh lek phei chuan ka biak chakloh zia chu rapthlak tak a ni.



"Zanin ah chuan i lut thei dawnlo , naktuk kan nghah angai" Saia'n atih chuan ka pa kut vawn ka chak tawh tehlul nen ka hnual rawih a , ka hmelah alo lang chhuak nge ni "Duty te ka lo bia ang, mahse rei tak erawh a luh theih dawnloh ania, a rei berah minute 5 a niang" Ngurtei chuan ti in a kal sawn zui a , rei pawh kan nghah hmain alo let leh vat bawk.


"Ririn, minute 5 aw" atih hnuah min hruai hrang a , ICU room a an hak thin te chu min hak tir hnuah "minute 5 anihkha aw" ati leh a , ka lu bu nghatin ka luhsan ta a.


Khum bul vela khawl hrang hrang awm ka hmuh te chuan ka rilru a ti na a , kalbo lo ila hetiang hian ka pa hi a awm kher angem? Tihte chu ka in zawt mawlh mawlh, khum bulah chuan thu in ka pa kut chu ka vuan a , sawi tur tam tak nei mah ila engmah ka sawi theilo.



Ka pa kut ka vawnah chuan ka chal ngatin ka tap a , ka pa nen a kan hun hman te , ka naupanlai atanga tun hun thleng chuan ka ngaihtuahna ah a inlar zut zut mai "ka tihpalh aw pâ, min ngaidam rawh" tih bak chu engmah sawi theih ka neilo, ka tap a, ka mittui tla te chuan ka pa chu an harh tir thei chuang silo.



"Duati, chhuak ang le" unaupa in a tih chuan ah chu ka en vat a , engtik laiin nge alo luh pawh ka hrelo reng reng "unaupa" ka tih chuan "umm, a harh leh vat ang, tunah chuan chhuak phawt ang aw" ti leh in ka tho tur chu minlo pui vat a , ka pa chu kalsan har ka ti takzet a ni.



ICU kan chhuansan chuan ka thinlung na lutuk chu thu hnawkin ka tap a, unaupa chuan minlo buaipui vat bawk, "duati atha leh vek dawn" ti a ka kut alo vawn chuan "i khuasik anihhi" ati leh a , ka hriselna pawh chu ngaihven hman ka nilo, keimah avanga ka pa natna zawng zawng te kha ka tuar let nimaiin ka hria a , ka pa ka lainat leh khawngaih lutuk chuan minti nâ a ni."I tha em?" unaupa in atih chuan ka mit deuh sulh tawh a , ka khaw hmuh a phe ruai ruai a , min au zui mawlh mawlh mahse a thim mup a , engmah ka hre zui tawhlo.



Ka harh leh chuan damdawiin khumah ka lo mu a , pindan chhungah chuan ka chhungte chu an kim biai a , Ka thiante Lawlai leh U Mapiana bakah unaupa leh Ngurtei chen chuan an awm vek a ni, ka harh rual chuan "Saia" ti sap in tui ka duh thu ka hrilh a , unaupa zawk chuan minlo pe vatin "i tha em Duati, engtin nge i awm? Na inei em?" atih mawlh mawlh hnuah "nû, doctor kha va ko rawh" ati leh a , mahse "ka awm hi mawle" Ngurteiin alo ti vat bawk.



Ka BP te a check laiin unaupa chuan ka kut vuanin ka khum bulah chuan athu tlat a , Ngurtei mitmeng ka veng bawk si, tumah lah chuan an hrethiam bawk silo ka nî chu ka ko ta ringawt a , "enge ni Mambawih" tia minlo pan chuan "lo kun hniam teh" ka ti ta tawp a , unaupa mak tih hmel chu ka hmu hman hram.


"Unaupa hi kalsawn tir rawh, Ngurtei a awm ve bawk si" ka tih chuan "chu lam ngaihtuah angailo" ti ringawtin min chhang a , nu Fakmawii bulah chuan kal nghalin enge maw hi ava hrilh a , chutah an pahnih alo kal phei in min en ngawih ngawih mai, an chetdan chu mak tiin ka lo en tlawk tlawk ringawt.


"Bp leh HB chu a tha a , engtin nge in hrilh dawn nge ka hrilh dawn?" Ngurtei in atih chuan a ngaihna ka hrelo khawp mai , "enge awmzia, ka pa chungah" ka tih lai chu lo pawt chatin "engmah a thlenglo, i pa chu tha , zingah khan alo harh a, vawiin ah ward lamah kan insawn ang" unaupa chuan alo ti a , ka lawm zia chu aw... "Tunah a hmuh theih em? Kal ang u" ka tih chuan min en thap a , enge maw sawi hreh nei hi an ang ka ti ber.



"Ririn" nu Fakmawiin atih chuan "keiman ka hrilh ang" unaupa bawk chuan ati a, an awmdan vel chuan ka ngaih a ti tha thei tawhlo "eng thil nge thleng a, ka pa chung chang anih siloh chuan keimah hi em ni?" Ka tih chuan an ngawi thap a , "ka cancer ve ami?" Ka tih erawh chuan "a teuhlo mai" an ti rual leh thap ang lawi a , an awmdan chuan minti lawm lo lek lek tawh.


"Anih chuan unaupa sawi ta che, ka sawi ang itih kha" ti a unaupa ka en chuan "Duati, mak ti lutuk lo la" ati hmasa te te a , a thusawi tur ngai changin amah chu ka en reng "pâ ka ni dawn a " tiin a ngawi leh dat a ,hei hi animaw minlo hrilh hreh em em hlawm ti a ka ngaihtuah lai mekin "ka fâ i pai mek, tunah hian thla 1 mi nau i pai a , chu chu ka fâ a ni" ati chu mak tih avangin ka kâ hau ringawt.


Ngurtei chu ka en vat a , chutiang a awlsam lutuk a asawi chu mak ka ti a ni "a awm anglo emai" ka tih chuan ka rilru an hrethiam nge ni "Ngurtei nen an innei hleinem" ka nî in alo ti vat a , mak ka tih zia chu aw, "nula ka nih hi aw Ririn" Ngurtei nui pah a alo tih leh phei chuan ka mak tih a zual a , unaupa chu en in "enge awmzia" ka ti ta ringawt.


"A thui lutuk nakinah kan la sawi dawnnia tunah chuan in enkawl phawt i ngai" ati a , mak ka ti lutuk ringawt, khang hun chhung khan nau ka pai tawh tih engtin nge ka hriat miah loh theih zawk le, lo hria ila chuan engkim a danglam phah anga, hetiang thil teh nuai hi kan tawnglo mai thei a ni.


"Naupai haw chi hi an awm ve hrim hrim a , chung zingah chuan i tel ve vang anihkha i dam theih reng reng loh " Ngurtei bawk chuan a ti leh a , lawm tur nge tah tur zawk pawh ka hrethiam rihlo a ni, ka thil tawn hrang hrang te hi hlimna nge lungngaihna ka la thliar hrang thei tlat lo.


"Ka lawmpui lutuk che thiannu" mittui tling pam chunga Lawlain atih chuan "ka lawm e , chuan ka tihpalh" ka ti sap a , min lawmpui em em rualin u Mama a hrechhuak dawn tih ka chiang a ni, "ei tur ka va la lawk ange" tiin a chhui nghal a , u Mapiana leh Saia'n an zui ve bawk.


Ka chhungte ho pawh chu an chhuak ta sap sap a , unaupa nen hunthawl min pek an duh vang te pawh a ni mahna. Kan awmdan chu a lâi khawp mai a , ka zak a , nuam ka ti tho bawk si.


"Ka lawm e aw Duati" unaupa in atih chuan "engvangin maw?" ka lo ti vat "harsa takin tha takin ilo pai a " ati leh a , ka nuih var var tak na a chu ka pa hi alo harh chian hunah a thup reng theih dawn siloh a , engtin nge kan awm zel ang tih bawk chuan minti buai leh tawh.



"Enge i ngaihtuah" atih chuan "engmah , ngati nge nupui kha ineih loh a " tiin ka zawt a , nakina min hrilh tur thu kha sawi mahse ka hre chak tawh em a ni "pâ ka nih hunah ka hrilh ang che" ati teh tlat a , ka hriat châk tawh tehreng nen "ila ni har dawn" ka tih pawh chuan "ei châk te inei em?" tiin thu dang chu a sawi daih a , chhang duh lovin leh lam ka hawi hmak thung.


A nui ri ka hriat chuan amah chu ka en leh rih a , a bulah hi chuan ka titau rei ve thei thlawtlo a ni "min en la" atih chuan leh lam chu ka hawi lui ngar ngar a, "Duati, anih chuan ka sawilo mai ang" atih erawh chuan ka en leh ta nge nge.


Ka kut chu vuanin heti hian min hrilh a , "ka ngaihtuahna sâng tam tak ten thlan bîk nih inchuh in a tha thei ang berin tan rawn khawh thin mahse, atawpah he a kut ka vawn mek nangmah bawk hi a ni, a ngaihtuah a , a suangtuah leh thin chu, midang tam tak tan thlan bik nilo mahla ka thlan bik erawh nangmah chiah a ni"


A thusawi awmzia chu hrethiam vek lo mah ila, ka hriatthiam chin erawh ka hlimpui a , chu chu ka duhtawk viau a ni.


"Unaupa, ka pâ kha" ka tih leh chuan ka kut tuai hleuh hleuh pah hian "a pawm vek tawh, engthil pawh thleng se kan awm dun theih na tur a nih phawt chuan hma alak zel tur thu a sawi a , rilru hahna tur engmah a awm tawhlo, chuvang chuan hahdam deuhin awmla, i pum chhunga kan naute lo piang tur choh kha i ngaihtuah dawnnia" ati a , a thusawi lai chuan mittui tling pam chung hian amah chu ka en reng a , khang hun chhung zawnga ka mittui tla te kha ka nat vang a ni thin a , tunah erawh ka hlim vang a ni tawh thung.



"Ka lawm e aw unaupa " ka ti sap a , ka tah insumna lamah ka hmui a khur der der bawk , "lawmthu sawi tur an awm anih chuan keimah hi ka ni, ka hmangaih che Duati" tiin ka hmuiah a rawn fawp zeuh a , "keipawn ka hmangaih che unaupa" ka tih hnuah min rawn kuah a , nghet zetin ka lo kuah let ve bawk.



Hun harsa tak tawkin mittui tam tak lo tlah tawh mahse , tun hun hi ka ngaihlu a , hun kal tawh avanga buai ai chuan tuna ka hlim ang hian engtin nge ka hlim reng theih ang tih hi ka ngaihtuah zawk a ni. Unaupa kiangah chuan engkim hi a dam dap a , a hlimawm a , a thlamuanthlak hliah hliah thin. Lalpa, unaupa anga mipa tha min pek avang hian ka lawm e.


A tawp ta.....



(Ka thawnthu min chhiar sak tute zawng zawng chunga thinlung takin lawmthu ka sawi mawlh mawlh e, he thawnthu bik phei hi chu ka regu lo em em a , thla tam tak ka chawlhsan bawk a , chuti chung chunga min ngaihhlut saka tun thlenga min chhiarsak tute in zavai mai hian ka lawm zia hi sawi ngaihna ka hrelo hial zawk a ni.Thawnthu thar nen ka lo let leh vat dawn a , minlo chhiar sak leh ngei turin ka sawm tak meuh meuh che u a ni e. Chuan youtube channel hi ka buaipui ve a , khawngaihin minlo subcribe sak theuh turin ka sawm in ka ngen tak meuh meuh bawk che u a ni. Ka in dah dan hi (Pie sangtei) tih tho in a ni e aw.. Ka lawm lutuk em em vek e....)....


Whatzapp group lama mi te hnenah khan sei tawk ka dah tur thu kha ka sawi a , ka thuthiam ka va han hlen tak, a sei bawk aniang a tawp hmak mai alawm...(belh leh zuai)