STORYFB.COM

NUNHLUI DUHAWM BUNG-10
ZIAKTU : MALI PACH

Zirtawp ni chuan zing aṭang ka helhhawlh a,thawh pawh ka tho hma khawp mai.Class lak lai te chuan rilru ah a lut mawh khawp mai.Ka ṭhiante pawh chuan "Vawiin chu i mood a fuh tlat," an ti an ti a,kan thil tih tum hi ka sawi chhuah chuan U Cobtea beng a thleng ka hlau si a,chuvângin engmah ka hrilh ta lem lo.


Puia nen chuan class banah pawh kan in phur haw leh thlap a ,tlai lama assignment tih ka duh avangin min haw tlang pui a.

"U Cobtea engmah hrilh suh aw,a rûka chhuak tur ka ni bawk sia," ka tih chuan, "Hrilh lo e,kan pahnih chauhin kan hria," a tih chuan ka kut chu a la a,a fawp zeuh a keipawh inchhung lamah chuan ka lut ve ta nghal a.


Assignment ka tih lai chuan Tetea lah in pawisa min lo dil ve sek a,hmanhmawh taka ti ka ni bawk nen ka vin deuh khar khar.Ka u te ho dil duh si lo hi a hna nei lo ber hi mi hi a dil ziah a.Ka neihchhun ang ang ka pe leh nge nge ṭhin.

Zanriah kan ei lai te chuan chaw pawh ka ei tui thei meuh lo,ka chhungril a ti ching cheng awm hian mi a tur et et ani ber.Vanneihthlak lutuk in ka u te ho pawh tumah an leng chhuak lo hlauh,zan rei lama chhuak tur ka ni bawk nen ka u te ho an leng chhuah chuan an zan leng haw nen kan in hmuh hman ka hlauh vang ani.


In hnuaiah chuan TV en chhuanlamin ka tawi khawmuang a,ka chhungte ho an room a an luh diak tawh hnuah pawh rei vak lo ka ṭhu khawmuang leh a ,kawngkhar pui chu an kalh ka hlauh avangin ani.Room ah ka han chho leh te te a,ka hmai chu ka tuai puat puat a ,ka phone a rawn ri ṭat a ,"Gate bulah ka awm tawh aw.." Puia'n a rawn tih chuan dim fahran in inhnuai lamah chuan ka chhuk a,kan kawngkhar hi thawm nei vak chi ani lo hlauh bawk nen awlsam te in ka chhuak a .

Tlang veng lam pan chuan kan in phur chho leh vawk vawk a,zan thla eng hnuaiah thli fim chuan ka sam chu a rawn chhem leng leh siai siai bawk a.A kawngah nghet takin ka chelh a ,ngawi rengin in be lem loin kan tlan chho a.Hnim rim leh zân par rim a rawn nam chek chek bawk nen zanin zet chu nuam tak ani.Kan thleng chhoh chuan thla eng chuan tlang leh a chhehvel chu a chhun eng ruih a,hlauh lam reng reng a lang lo.

Tlângah chuan rin ai takin thli a lo tam a,in te lamah chuan ke in kan chho a, 'ka hah em' tih a khat tawkin min zawt reng a,kan thleng chhoh chuan in tê ah a lut mai dawn emaw tih laiin a hnung lamah chuan min kal pui a,leihlawn chhiat tawh hmel zet hi a awm a lawn tura min tih chuan ka hreh reuh khawp mai,a mawih tawh hmel bawk si mahse ,"Zan dangah pawh kan lawn fo alawm,a la rinawm lutuk," a tih takah chuan a lawn hmasa a a hnungah hlauthawng ru zet chungin ka lawn ve a ,a ri leh tawlh ṭhin,a sang reuh bawk si hlau ru tak ka ni.A lawn chhoh hnu chuan a kut chu min rawn pe vat a,ka vawn veleh min pawt chho hrawk,rangva chung ani bawk nen ring ṭha duh tak ani.


A mawi zia mai chu aw,vanah chuan arsi an de sep sep a ,thla eng chuan kan chhehvel chu a en vek bawk a.In ngheng chial in kan ṭhu dun a, citrus rim a rawn nam leh chek chek a,a kut ṭang nalh tak chu ka khawih pah neuh neuh.

"Kan thih hunah hian Arsi ah chang dun thei ila...." Van lam en chunga ka tih chuan a lo hawi ve vat.

"Arsi a kan chang dun thei anihchuan mawi deuhin kan eng dun ang a.Khawvel mihring te thawnthu hre tu kan ni bawk ang a,tunah pawh khian en la arsi te hian kan thawnthu an hre vek asin, ngawi rengin an eng de sep sep a, inṭhenna a awm tawh lo bawk ang a," ka ti leh sep sep a.

"Mate,kan inṭhen dawn hleinem,khatiang kha sawi suh," ka biang chu a rawn dawm vang vang a

"Nang chan che ka hlauh tluk zetin,i tel lo a dam ka hlau ani,"

"Mate......ka phatsan ngai hauh lo ang che,chutiang ni a thleng anih ngai chuan thihna chauh ni rawh se," a tih leh chuan a hmui ah ka fawp vawng vawng,thu chauh hi chuan a daih ṭhin mawlh lo ani.

Vana arsi leh thla te khian kan in hmangaihna hi min hriat pui a,kan chhehvel a boruak te chu an reh ṭhiap a.Duhthu te kan sam dun mawlh mawlh a ,a tak ram thleng hun tur mawlh mai chu kan nghakhlel a.

Kan haw dawn meuh chuan a tlai angreng tawh khawp mai,kan bike dahna a hlat deuh avangin ke in kan chhuk thla a,a chhuk angreng bawk nen duh aiin kal chak a awl a,kan pahnih chiaha awm e ti lo chuan kan bengchheng thla khawp mai.Mahse chutah kan piah hnim kar aṭang chuan thawm hi kan hre leh ṭhin a,kan ding chiang khawp mai.Kan in melh kar a,ka hlau tih a hriat avangin ka kut chu a hum nghet khawp mai.Chutah a rawn ri deuh ṭual ṭual a,ramhuai ringawt ka rilru ah chuan a awm lehnghal,Puia lah chuan a kal hnaih zel a keiin a hnungah thinphu dep dep in ka zui ve zel,chutah ,"Awi awi awi....ka nu ..." Mipa aw hian a rawn ti ta, phu nasa dun tak kan ni.

"Awi....eng nge a...." Ka au ring khawp mai,chutah kan piah hnim buk kar aṭang chuan Chimawia hi a rawn vak chhuak hlawl,thawh pawh a tho thei lo,ruih hmel tak ani.

"Tute nge?" Ṭawng seh chilh deuh nawk nawk a a tih chuan Puia nen kan in melh nghal chutah in tiam rual ni awm hrim hian in kai chung chuan kan tlan thla dawr dawr mai.Kawng a chhuk bawk si a tawp lamah phei chuan a lum in kan lum thla a,kan han nui dun nasa em em lehnghal a.Chhuatah chuan kan mu zangthal huang a,van lam chu kan thlir a kan thaw chhuak hlawp hlawp mai.

"Awi ka hlau lutuk....." Ka tih chuan ,"I tlu na em?" Min lo ti nghal var a,ka nat vak loh thu chu ka hrilh ve nghal vat.Khatia kan tlan thut chhan pawh Chimawia zurui khan keimah ni kan ni tih a hriat kan hlauh vang ania,a hriat vaih chuan kan khua ah hre lo an awm leh dawn lo a,tunah pawh a ṭhiante ho in an haw san vek ani ang.


Chabet te kan han in then sak leh hnuah chuan kan haw ve ta a.Ka chhungte ho chuan ka chhuak tih an lo hre lo hlauh ani ngei ang kawngkhar pawh a pangngai ang chiahin a lo la awm.Ka room a ka chhoh chuan insil turin bathroom ah ka lut a chutah ka khup leh kut chu a lo pilh hrup mai,tlângah kha chuan ka hmu lo reng reng.

A tukah lah chuan ka sil khawp a,chet vel pawh a harh ṭalh mai.Ka nu lah chuan cushion case leh parda vel suk tur a rawn dah hnur bawk a,Tetea pawisa pe in ka in tih pui thei hram.

Hun a kal ve zel a,kan in kar chu a dam dup a,Tetea pawh 1st division ah a pass ve hlauh a,kan lawm hlawm khawp mai.A pass te chu ṭhen rual ṭha te nen kan han lawm leh a,kan hlim viau.


Exam te kan han nei leh a Puia nen pawh exam chhung chuan kan in hmu khât khawp mai, zan rei tak tak thleng ka meng a ,eitur min rawn pe khat tawk reng bawk.Exam kan zawh ni chuan chaw ei khawm an rawt leh a mahse keichu U Alawma'n a phal ve tak loh avangin ka kal ve ta lo.


"Ka ngai che asin,ka hmu chak che e," Puia'n a rawn tih chuan a tlai tawh khawp mai.Venglaiah an leng tih ka hria Hruaipatea'n group ah an thlalak a rawn dah a, Thlawihmeltha-i pawh a tel,min lo biak har avanga thinrim sa ka lo ni bawk nen ka chhang duh lo a,min lo call thul a hnuah phei chuan ka phone chu ka switch off ta daih a.Mahse le kan in kawtah chuan bike a rawn rev leh vak vak mai ,amah ani tih chiang takin ka hre bawk si ka u chuan rei lo ah thawm a rawn nei ta ngei a,ka muhil der tlat a kan nih nih kan ni tawh ang a animai tichungin ka mu lui ngat ngat.

"Ava beichheng mai mai tak," U Alawma'n a ti bul bul ri chu hre chiang tak ka ni.

"Tunge maw i nih le,min ti mu thei lo reng reng mai," a zuk ti lung lung,chutia ka u in a tih takah chuan a thawm chu a reh ta ṭhiap a,ka u chuan engtin emaw a zuk ti leh a chutah a hma aia ring mahin a rev leh vak a a tlanchhuak ri te chu ring tak ani.

"Zan danga a rawn tih leh chuan ka zuk chhuk tawh ang," ka u chuan a rawn ti lut bul bul.

A tukah pawh phone ka on duh mai lo a,bathroom a ka ha te ka nawh fel hnu chuan ka mu ṭha leh sawk sawk,class kal a ngai lo bawk nen ka mu rei lui ngar ngar a,ka nu in pawn aṭanga min rawn auh chuan ka tho chhuak ve nghal thuai a,chutah kawngkhar ka hawng chiah chu Chawngthanpuia hi a lo ding heu mai, "Nu Manun kan rei lo ang,ka hmang duh ngei ngei sia," Chawngthanpuia'n ka nu bula a tih chuan bang bo tak ka ni,ka nu lah chu inhnuaiah a chhuk thla nghal daih a.Chawngthanpuia leu luau chuan min han melh rum em em a,keipawh chuan melh rum tak ka ni.

"I phone kha i va hmang ṭangkai lo ve..." A tih chuan ka lo ner kual nasa, "Khatin ner vel suh ," a tih zawm zat.

"I phone zawk kha i hmang ṭangkai thlawt lo,haw rawh ka hmu peih lo che," ka tih leh chuan a lo thaw chhuak hawk,ngei tak ka ni hetia a lo la thinrim ngam zawk hi.

"Eng nge khatia i thinrim vak?,"

"Eng nge ka thinrim vak loh ang?," in melh rum ṭha dun tak kan ni.

"I thinrim chhan kha a ho e Mate...." dam deuh zawka a tih chuan ka lo sa phat.

"Ho hleinem le,venglai-ah in leng a,ka biakna che pawh chhang hman lek loin anihkha i awm,"

"Hruaipatea kan leng pui alawm,"

"Thlawihmeltha-i pawh a tel ve kha,"

"Aaa chutiang pawh ani lo, Thlawihmeltha-i....ahhh ni lo(ka lo melh rum viau) Tlanchhuahi ṭhiannu ania,a lo awm ve anihkha," a tih chuan ka hmui ka lo tih pawrh khum vak.


"Ka be peih lo che haw rawh," ka tih chuan luhlul hmel zetin min han melh a, "Ka haw awm lo," tih chu a chhanna ani.

"Mawh thinrim tawh suh...." A tih zawm zat.

"Ka hmu peih thlawt lo che,haw rawh.In biak pawh ka peih lo ,aaaaa, inṭhen mai ang," ka ti bah neuh nawk nawk.

"Ka duh lo,ka ṭhen dawn lo che,"

"Keiman ka duh alawm,ka ṭhen che.I bialnu angin min ngai mah la ka bialpa angin ka ngai tawh lo che," ka sawi zawi hman ṭawk min rawn fawp thut anih chu,kei lah ka lo ip chawih.Ka room ah chuan min nam lut nghal rawk rawk a, a duhthawh zia chu ka awmbawr te chu a ṭham nawk nawk a,kei lahin theih tawpin ka lo chum ve bawk mahse mipa na na na chu ka hneh lo khawp mai.

"Duh tawk rawh ka chhungte an rawn lut ang," thinrim taka inlak hran hrawk paha ka tih chuan ka thaw chhuak hlawp hlawp,thinrim tak ka ni.

"Ka hua che...Ka haw lutuk che Chawngthanpui...." Ka ṭap chhuak nghal hlawp hlawp.

"Mate ,min ngaidam rawh... khawngaihin,"a tih pawh chuan ka chhang duh mai lo,min rawn kuah mai a tum chuan ṭang nasa tak ka ni.

"Haw rawh.Kan in ṭhen tawh ti hian.Ka chhungte'n min ringhlelh hmain chhuak vat rawh," ka tih chuan engmah sawi lo in zawi muangin a chhuak a.Ka room a chhuahsan thleng chuan a rawn hawi let lo.


Tukṭhuan chu ei loh aiah ka ei ve hram a,mood a fuh lo bawk nen ka thin pawh chhe tak ani.Ka nu lah chuan tih tur a han sawi hnem khawp a ,peih lo viau mah ila ka tih ngei ngei a ngai dawn bawk si.Kan inchhung a zau ṭha bawk si a,chhuat nawh hi ka hne ber ania,ka tha chu a thô lo kher mai,"Kha ti hnelh hnelh a i nawh ten a fai nang," ka nu lah chuan a lo ti ve sek ,chhang pawh ka chhang let peih lo.


Zan mut dawnah chuan ka phone chu ka on ve ta chiah a ,Chawngthanpuia chu ka rin loh deuhin a reh hmak mai.Mahse mak ka tih na rilru ringawt pawh chu duh lo tak ka ni.Tih tur em em ka hriat loh avangin Laptop ah series ka en ta daih a,rin ai takin ka en tui a ka mut meuh chuan dar 2 a lo pel reng tawh.

Ka phone chu mut hma in ka han en leh zuai a , Chawngthanpuia chuan status a lo nei va a,darkar chanve liam ta ami vel kha ani,a status lah chu kan pahnih thlalak a ang bawk si,ka en ang nge en lo ang ti a ka in ngaihtuah lai chuan a status chu ka hmet ta , kumhlui thlah ni a ni tla tur kan thlir dun lai ani hla a dah tel bawk a,Coldplay-The Scientist kha ani.Ka mut pah dawn chuan earphone ah a status a a hman hla ngei chu ka ngaithla ve a,a hma pawhin lo ngaithla tawh ṭhin mah ila zanin a ka ngaihthlak leh chuan min deh dan a dang zar mai.

"Come up to meet you, tell you I'm sorry
You don't know how lovely you are
I had to find you, tell you I need you
Tell you I set you apart" ka ngaithla nawn mawlh mawlh a,ka ngai khawp mai.Zan a rei tulh tulh a ka harh telh telh thung.Ka mit ka chhing vang vang a,a nui hmel bawk a rawn lang leh ṭhin ,biak ka chak ka phone te chu ka han lek leh zuau zuau ṭhin mahse biak loah ka tlak ta nge nge.Kar khat lai chu in be lo in hun kan hmang ta,in lo be lo han tih khan amah hi chuan min rawn be ṭhîn a mahse ka chhang ngai lo,amah hmuh ka hlauh avangin ka chhuak ngai lo a,hman ni zan a status a min hman zan khan a tukah ka ṭhiante ho lahin kan ṭhat leh ṭhat loh te min rawn zawt a,mahse tumah kha ka chhang ta lem lo kha ania,an ni nen pawh kan in hmu khât viau.



Zanah lah series ka en zan tin a,ka mengrei thei viau,dar 3 ka thleng zak zak.Ruah lah chu a sur cherh cherh a,Puia hla ngaihthlak ṭhin te chu ka mut dawnah ka ngaithla zantin a,ka ngai ve veng veng zel.

Zingah chuan lu na lukin ka tho chhuak a,
"Mate,hei i Nu Hruaitei te va pe lawk rawh aw,i pa Dawnga khan a ei chak thu a sawi a,i pa in zing zing ah a zuk zawng a," choka a ka luh chuan ka nu chuan a lo ti nghal zat,maipawl ani.

"Ka van peih lo tak,Tetea a awm lo ami?" Ka tih chuan ka nu chuan min lo melh rulh a
, "School a kal dawn alawm,va pe mai mai rawh," a tih zawm zat ,phur lo eng ang mah ila ka kal leh ta nge nge, Chawngthanpuia ka hmu hreh lutuk chu kal muang tak ka ni.

"In awm em?" Kawngkhar kik dat dat pah a ka tih chuan Nu Hruaitei'n min lo chhawn nghal thuai a,ka lut ve nghal.

"E..Nu Hruaite hei pa Dawnga thil tur ka pa in a lei sak a,"

"Aw ,Mate ava lawmawm ve,i pa nge nge a va fel thei tak aw.I pa Dawnga khan nizan khan a ei chak thu a sawi nuah nuah a," Nu Hruaitei chuan a ti luam.

"Lo ei ṭeuh rawh se,ka kal leh nghal mai ang,"

"Thingpui tal in ve rawh,"

"Aaaa Nu Hruaite,in lo ang...."

"In rawh in rawh ,kan in dun dawn ania.Puitea pawh a rawn tho ṭep ang," a ti nghal zung zung hnial na hun pawh a awm tawh lo,min pawt ṭhu rawk rawk.

Thingpui kan in pah chuan a titi leh siam siam a,nizan lama Puia'n zu a ruih haw te chu a sawi siam siam a,a rilru a hah hmel reuh khawp mai.

"Mate,in in ti thiam lo nge.Awi Hruaia leh Faka'n an rawn thlah a, ka thin a rim bawk sia amah kha chu a rui em em lo mahse nidangah khatiang khan a awm ngai si lo a,tunlai tê hi a zia hi a mak lutuk a," a tih leh chuan ka nui tawi tâk tâk khawp mai.

"Nia....kan in ....." Ka sawi zo hman lo, Chawngthanpuia chu choka ah a rawn lut heu mai,min hmuh chuan a phu uih lehnghal.

"Puite ,kha thingpui kha lo in thlit ve rawh," Nu Hruaitei chuan a lo ti nghal sawk sawk a,kan in melh chiang khawp mai.

"Vansanglur misual nu..." Naupang chhia zet hian min han ti leh a,awi he mihring pa hi chu a nu a awm ve reng a,Nu Hruaitei nuih a lo za.


"Khatin an ti ngai lo.Hei i pa in maipawl a ei chak a min rawn pe anih hi aw..." Nu Hruaitei'n a lo ti zat.

"Hmmmmm....Vansang min lo nghak rawh aw,ka lo thlah ang che kan in thiar lawk ang ," a thingpui lah chu a lem nghal vek,a sat tehreng nen.

Haw san chi ni tawh hek lo a inthiar chhung chuan ka ṭhu ve ta reng a,rei vak loah a rawn chhuak a,min pawt tho deuh dawr dawr ,Nu Hruaitei lah chuan min lo nuih hak hak.

"Mawla....." Pawn kan thleng rual chuan a hnung zangah chuan ka chum pawp mai.

"Ei ahhh..."

"Helai thleng hi lo kal rawh,ka kal dawn," kal mai ka tum chu ka kut ah a rawn vuan nghal zat.

"Thinrim tawh lo la,ka ngaih tehreng che nen.Nikhat lek pawh i tello chuan a rei lutuk," a ti thum dut dut a.

"Min thlah rawh ka kal dawn," ti a kal mai ka tum lahin ka banah a man bet ṭung bawk si.

"In be ṭha tawh ang,"

"Ka duh bawk lo,"

"Keiman ka duh alawm,Mate min ngaidam hram rawh," ngen ngawl tak ani.

"Zu te i lo in nasa animaw?" Ka melh rum viau.

"Ka rilru a na ve a....." A nui suk suk .

"I va zak lo....."

"Ani alawm,chuvang chuan kan in biak ṭhat leh ngei ngei angai," ka lo ner nasa.Awlsam deuh a nem mai chu ka tum lo.

"Tlaiah ni tla tur kan thlir dawn ania,"

"Ka lo kal awm lo,"

"I lo kal awm chiang,"

"Tunah pawh khua a duai em em a,tlaiah phei chuan ruah a sur tawh ang,"

"A teuh lo,khaw dur na lam saw en la,min hel leh ngei ngei dawn," ka lo thaw chhuak hak,tih ngaihna tak pawh ka hre lo.

"Aaaa ka hman lo ang rawngbawl te ka ngai,"

"Ka rawn kal ang a,ka sawi fel vek mai ang.Lo in ring ang che,"

Kan in kan thleng tak avângin chhang pawh chhang tawh lem lo in ka luh san a.Ka nu la vawk chaw pe zo pawh ka luh hnu rei vak loah a lo lut a,pawnah a ṭawng deuh barh barh a,a rawn âng lut leh ngei ngei dawn anih hi ka tih laiin, "Tlaia inchhuah dawn chuan chhunah che zung zung ang che," a rawn ti thawr,ka unaute dang an awm ve mang bawk si lo,mak ka ti hmel a hmuh chuan ,"Puitea khan min lo hrilh a, khatiang tur kha ania,kan bulah hian a sawi thlap thlap zel a," ka nu lah chuan a la ti tak deuh deuh.


Engtin tak sawi ang maw,pâwna ka nu in a biak kha a ni ngei ngei ang.Chhunah pawh chuan ka che nasa leh tawh khawp mai.Tetea te school an lut tawh bawk nen buai thei tak ka ni,U Cobtea a awm hlauh zawk a mahse ani chu eng eng emaw a chhiar ṭhin a,ka nu te hian an tir duh vak lo.

Tlaiah chuan dar 5 velah a rawn lang heu mai,ka pa a lo haw tawh bawk a an han in be leh luam."Mate,han kal pui rawh, han kal pui rawh.Zanin chu inkhawm zan ani lo bawk a,chaw ei hma a ngai dawn hleinem," ka pa pawhin a lo ti ve bawk,inchung lamah ka han chho leh te te a,ka in en thuak thuak hnuah kan in zui chhuak leh ta nge nge .

"Awi,eng ti tûrin nge min hruai chhuah a ka chhungte kha chuan ni tla en tur mai mai a chhuah kha an phal teuh lo," ka ti khar khar.

"Venghlun-ah thil lam kan ngai ka ti," a tih chuan melh rum tak ka ni.

"Kan ngai tak tak,ka pa thil tur ania," a tih leh chuan ka hrethiam ta chiah,ka nu leh pa pawhin an lo phal em em chhan kha hei vang chiah hi anih dawn hi.

"Chute chu nangmah pawhin i lam thei reng a,"

"Lam thei e mahse chance kan nei animai alawm ti hian," a tih leh chuan a bike bulah kan in din chilh ran.Han lawn mai lah chu ka hreh ve bawk si,a kut min rawn pek takah chuan ka lawn leh ta nge nge.A hlat thei ang berah ka ṭhu a mahse a rawn rev vak hma lamah chuan ka bawk phei rawk rawk,a nui suk tih pawh ka hria.Ka kut chu a kawngah a suih hmiah a,engmah sawi tawh lo in Venghlun lamah chuan kan in phur phei a.Kan kalna tur hmun kan thleng chuan parcel lian vak lo hi ania,a hma a dah a tum chuan ka khawngaih ve deuh a,ka ken sak ta tawp.Venghlun aṭang tlang veng lamah kan in phur chho leh a,field bul aṭang awlsam te in a luh chhoh theih ani.

Puia sawi ang tak tak in chhun lamah kha chuan khua nuam lo viau mahse tlai lamah erawh khua a rawn thiang reuh khawp mai.Theihai kung hnuaiah bawk chuan kan ding dun leh ran a,ni lah chu a lo tla ṭep tawh a,a mawi lehpek tawh khawp mai.Kan ngawih dun vang vang hnu chuan ṭawng chhuak hmasa zawkah a rawn ṭang a, "Ka tihpalh aw...." A ti zawi sup,ka la ngawi reng a,amah pawh ka en duh lo kan hma a ni tla mek lam chu ka hawi ngar a.

"Hman ni zing pawh khatianga rawn chet kha ka tum lo,aaa... i ngaihdan ang kha engmah a awm lo ania.Tlanchhuahi leh Hruaia lengna ṭhin te kha an in kawm bawk sia," a tih leh chuan a lam chu ka hawi ve vat a,min lo en vang vang.

"Message pawh i chhang thei lo," ka lo ti bung nghut.

"Aw message pawh kha,games kan khel a ,aaa ka thiam loh tak tak anihkha mahse kan in kar ti chhe thei zawng chuan ka awm miah lo aw," a tih zawm zat.

Sawi mai tur pawh ka hre lo mahse ka rilru chu a hma ai chuan nem tawh tak ani,chutah a phone a hmet nghal mual mual ,"Hei en rawh tumah ka be lo," ka hma takah a phone chu a rawn lek va.

A tirah chuan ka en duh mai lo a mahse a tawp a tawpah ka en sak ve ta.Min lo la pin vang a 'Ka bialnu' tih ngatin min han save a,group eng eng emaw ah a awm a,hmeichhe message hmuh tur chu a awm zeuh zeuh mahse a rei tawh hmel hlawm khawp mai,a status an rawn reply na te ani nawk.Thlawihmeltha-i message ka zawng a,ka hmu mai lo chutah ,"Khawnge ,Tlanchhuahi message?" Ka tih chuan ,"Ka block na a rei tawh," a lo ti fel then amah chuan phone chu a rawn la a,a blocked na te chu min han hmuh tir leh a a sawi ang tak tak in nikum lam khan a lo block daih tawh hi ani.


"Chuan tikhan min ring thei em?" A mit ko a san ak a,ka lo ner leh nâng nâng.

"Kan ṭha tawh tiraw?" A rawn tih leh chuan ,"Ṭha animai....." Vin hlak hian ka ti a,a lo nui leh hawk hawk.

"In sawi fiahna hun awm miah lo in min thinrim khum bur bur a," a nui pah ruh ruh.

"Eng nge khatianga i rawn chet vak.Zanah phei chuan khatiang khan rawn ti tawh reng reng suh,ka u in nangmah i ni tih a hriat vaih chuan kan tân a pawi thei dawn a nia,"

"Yes boss,ti tawh lo ang," a tih leh chuan ka lo nuih ta ringawt.

Puia nen hian in an deuh deuh na hi kan ngah khawp a,ni tla tur thlir dun te,arsi thlir dun te hi ani pawhin nuam a ti a,van nalh deuh chang te hian a status ah hian a rawn hmang veleh zeuh ṭhin.Sky lover an tih ang kha ka ni ve a,ani pawh hetiang tho hi ani.



Hun chu a kal ve zel a,class te kan han ṭan leh meuh chuan Puia te pawh senior most an ni ve ngei tawh a,lehkha zir tam turin kan in fuih awl lo,dam chuan kum thar maiah an graduate ve tawh dawn a.Aizawl ah a pa an check up zeuh zeuh bawk a,a rawn haw chang lahin thil pakhat tal min lo hawn ngei ngei thin.Kan duhthusam te pawhin nitin maiin a tak ram min thleng pui ve hret hret a,a awmdan leh chezia ah te chuan sawisel tur pawh ka hre lo.


December thla kan thleng chuan ka chhungte chuan chaw eiah an sawm a,ani lah chu a phur khawp mai.U Asangtea nena choka a salad kan siam laiin a rawn lut a,ka u pawh chuan a lo be ve luam.

"Makpa hual chu,naktuk Inrinni te ania vawk in khu min siam pui la a ṭha ang," ka u chuan fiamthu a a tih chuan Puia lah chu a phur phur ah a lo ṭang a.

"E,tehreng mai.Ka hnehsawh alawm vawk in sak te chu," phur deuh hian a lo ti a,ka u nen chuan kan lo nuih nasa.

"Perek pakhat pawh i chhu ngil thei lo ang e," ka u in a lo tih te chuan a lo ṭang ve nasa khawp a, "U Asangtea chu min va ngai tlaw e aw,chutiang te chu Man tân te chuan thiam loh tur pawh a awm hleinem," a lo ti zui bai bai,kan lo nuih nasa mai.

Chaw ei lai chuan ka bulah a ṭhu a,ka chhungte ho chuan an be siam siam a U Alawma pawhin a be ve luam mai,ka nu pawhin chawhmeh te chu a suah sak mawlh mawlh.Chutah kham mai ka tum ka tho uk tawh chu ka dinglama ṭhu ka nu chuan na em em mai hian min lo kheuh hlak,min han mitmei zui zeuh, keilah chuan a ngaihna ka lo hre lo khawp a,chaw te chu min han khawrh belh leh ,"Ka pua....." Ka sawi zawi hman lo, "Puite inthlahrung suh aw,ei ṭeuh ang che," ka nu in a tih pah chuan min han melh rum em em a,ka hrethiam ve nghal chaw te chu ka han ei ṭha leh a.

Chaw eikhama thleng ka sil lai chuan ka nu chuan min hau hlak hlak ,"I nikhua lo thei lutuk,eng nge kham san daih te i tum?.A zak ve a nga sin," a ti hlak hlak, keipawhin mawl ka in ti leh hnuhnawh khawp mai.

Zanah pawh a leng ve reng a,ka u te ho nen inkhel an en ho a,an bulah ka lo ṭhu ve reng a thingpui te ka va lum sak leh a,vawihnih ngawt chu a in hman .Inkhel an en zawh meuh chuan zan pawh a lo tlai leh viau tawh, "Lo chhuak duh lo mai rawh,a tlai tawh emai," kawngkhar bulah chuan kan in dinchilh ran a.

"I puar em?"

"Umm,puar lutuk.I thingpui lum pawh a tui ," a tih zawm zat.Ka hmui a a fawh zeuh hnuah chuan kan in mangṭha ve ta a.


Christmas a hnai ve zel a,kum dang ang tho in ka nu te nen Aizawl lamah kan bazar leh a,Puia te phei chu a pa chemo khai a ngaih avangin kar hmasa khan an kal tawh.Pa Dawnga taksa a lo chak vak lo bawk nen Christmas pawh Aizawl ah an hmang a,ka lung a leng thei khawp mai.Ka ṭhiante ho nen kan hmang ho a, ṭhiante zingah chuan han hlim ve viau ṭhin mah ila hlimna hi a kim tak tak thei lo.Kum thar pawh Aizawl lamah an hman a ngaih hmel a,zanah chuan kan in video call ṭhîn a kei ai mahin a lung a leng ṭhin a,Aizawla hunpui hman chu nuam lo a tih zia te a rawn sawi a.Kumhlui thlah ni chuan tlângah ka ṭhiante nen ni tla tur en liam turin kan kal a, Puia pawhin min rawn video call ve nghe nghe.

"Mate,a hma a kan kalna Aizawl peak ah khan mahni te in ni tla tur en liam turin ka kal a,ka lung a leng," a rawn ti thum dut dut a,ka ṭhiante ho lahin an lo fiam nasa.

"Kha lai kha, Chawngthanpuia lung len tlang kan ti dawn ania," Rini'n nur uar uar chungin a ti a,pakhat lah a lo ner nasa khawp .

Ni tlak liam thleng chuan kan in bia a,ka khawngaih reuh khawp mai.Zanah pawh Aizawl lamah chuan thil an hal nasa viau aniang a video te min rawn thawn a,keini Nupuii te inah kan hmang ho a,tlem chu kan hal ve.

Kum a thar a,an ni pawh an lo haw har lo,an lo haw ni chuan class kan la ṭan loh avangin tlai lamah an in lamah ka va phei ve a,Nu Hruaitei chu a lo buai hmel khawp a, rawng te ka va bawl pui leh a.Aizawla Christmas hman a nawm loh zia te Nu Hruaitei chuan a sawi ve luam, "Awi,nuam lo tak ani,kan khua ka ngai vawng vawng alawm.Puitea lah nizan aṭangin a haw chak tawh a za cheng bawk a," a nui pah hawk hawk chutah ,"Haw te a tum leh ut ut ṭhin,a pa hi tun ṭum chu a la na lutuk a,keimaha lo haw pui kha ka zuam si lo a," a tih zawm leh nghal zat.


"Nia,hunpui hi chu mahni khua ngei a hman tluk hi a awm lo,"

"Awm lo reng reng,a nawm loh chhan em em sawi tur awm lo mahse boruak a nei ve vak lo a,kan phun kan phun alawm," a tih zawh hnu lawkah Puia chu choka ah a rawn lut a,a sam chu awmze nei lo zet hian a thur seng a,a hmel chu ṭha tak ani.

"Min lo ngai em?" A rawn ti lut thawr thawr,ka lo mit mei nasa ani lah chuan a hrethiam duh der lo.Ka bulah chuan a rawn ṭhu thla ve nghal zat.

"Thil ṭha deuh ka lo hawn che," a tih chuan ka lo hnial vat ,"Awi in zin apiangin min lo hawn ziah suh ka tih kha,i â thei e," ka lo ti zui hlak hlak.

"Hmangaihna hi chuan mi hi a lo ti â vek zel anih hi," a nui pah ruh ruh,sawi zah leh sawi hreh vak hi a nei bawk si lo,Nu Hruaitei lah chu a nui ring ber ber ah a ṭang a.

A room ah min chhoh pui a,kan in chah ngun bawk a tun ṭum chu lehkhabu min lo hawn a,lehkhabu chhiar hi nuam ka ti ve a hun ka neih hi chuan ka chhiar ve nasa ,'A Thousand Boy Kisses', Tillie Cole ziah hi ani.Ka chhiar chak zawng tak ani bawk a,ka lawm khawp mai.

"Engmah min lo hawn suh i ti ziah a,Aizawl kal ve chhunah te chuan thil te kan hawn sak ve chak che a," a ti zui bai bai.

"Engmah min lo hawn lo pawh ni la nangmah dam taka i rawn haw te chuan chubak duh ka nei lo," a lo nui ruh ruh a.Nu Hruaitei chuan chaw ei ve nghal turin min sawm luam a mahse tun ṭum chu ka hnial ve tlat.


Kan dam a,nun a hlim bawk hi chuan hun leh ni te hi an kal ve zung zung a,kar loah Puia te pawh an Graduate ve ta reng a,an ṭhianho chu an pass vek a.Puia chuan zir zawm zel a tum loh avangin kawnah motor silna hawn a rilruk a.Kan khua ah hian Venghlun lamah chuan pakhat a awm ve a mahse an regular loh em avangin an hlawk tur ang pawhin an hlawk lo a,Puia chuan a ti fuh phian maithei ani.

Keini pawh hman ni lawkah kan kal emaw tih laiin senior most kan ni ve ta reng a,kan ṭhian pali in nitin kan in zui a,class banah Puia'n tih tur a neih loh chang chuan min lo hruai a,chutiang chuan nitin hun kan hmang ṭhin.

Zankhat a dawr luah tur en tûra kan kal kan haw lam chu Venglai leh kan veng inrinna hmun reh deuh lai ah hian tlangval rual an lo awm khawm laih laih a,helai hmun hi thil sual tih nan tak an hman ṭhin avângin Puia pawh chu tlan chak deuh turin ka lo tur ve sek mahse pakhat chuan a rawn au lauh, "Ding suh aw..." Ka tih pawh chuan a ding lui hram.

"I bialnu kha,kan lo chang ve tawh mai dawn ami?" Pakhat chuan a rawn ti chher chher a,Puia erawhin engtin mah a chhang lo.

"Chawngthanpuia ami?,hun remchang a la awm fu thei lo a,a hma in min hnek ve khanglang hepa hian," Phisuka chuan zu no hum ran chung chuan a lo ti ve chher chher bawk a,buaina a chhuah hlau tak ka ni.A hma a keimah avanga Puia'n a hnek aṭang khan Puia hi a mil vak tawh lo a,Phisuka hi mistiri ni in khaw dangah hna te a thawk kual nasa a,an la in hmu fuh leh mai lo anih ka ring.

"A rei tawh emai khatiang......" Puia'n a lo tih leh chuan pakhat chu thinrim hmel tawh tak ani.

"Rei vak ami?,ka hnek hi chu i la ba hrim hrim," a tih chuan ,"Tlan chhuak vat rawh ka hlau ania," a hnung lam aṭangin ka lo ti ve ser ser,hlau tawh tak ka ni.

"Nakinah i ṭhiante awm loh hunah khan aw mipa leh mipa te chu," Puia'n a tih chuan a rawn nam deuh sawk a,ka lo ṭe nghal chul, "Phisuk,hnek rawh hnek rawh.Khatiang naupang te te," a hnung ami te lah chuan an lo ti ve bawk a, "Kal ang ,ka hlau ania," ka tih leh takah chuan bike chu a ti nung vut vut a,"I duh tak tak chuan mal leh mal in kan ti dawn ania," Puia ani.

Chutah Chawngthanpuia bike aṭanga chhuk thlak mai a tum chu ka lo pawt nasa ,"Kal ang,ka duh lo ania," a au in ka au.A rawn ṭhu ṭha leh vat a, "Ka bialnu awm loh hunah kan la ti khawp ang," a bike chu a ti nung zui a.

"A va nep tak...." Hnung lam ami te lah chuan an lo ti dur dur,"Tlan vat rawh...." Ka lo ti sek.Kan in tur fe hnuah a tlanchhuak ve ta hram.

Kan in kawta kan ding chuan ka hau nghal mawlh mawlh, "Zan dangah te in lo in ti buai ang e aw,a zia lo emai.Nangpawh en liam ve mai ta che,rui lo hai lo a awm zawk i nia," ka ti hlak hlak.

"Mipa tan hi chuan en liam mai mai hi a harsa ve a,han lut rawh," a tih leh chuan hmanhmawh hmel tak ani.

"Hey haw nghal rawh ,i va kal leh vel ang e an tam bawk si," ka tih chuan a lo nui suk.

"Kal lo ang,Hruaia te inah kal leh lawk ka ngai a," a tih chuan rilru nuam lo deuhin ka luh san a,inchhung ka luh rualin a tlanchhuak ri ka hre nghal zat.



A tuka ka class bang min lo hruai chuan amah chu ka lo en chiang deuh a,hliam leh pem vel ka hmuh loh avangin ka thawveng huai.

"Min va thlek nasa ve," a ti thum dut dut a.Chutah ,"Ka in sual lo," a tih zawm zat,ka lo nui hak.

"Ka rilru a nuam lo alawm nizânah pawh khan,"

"Hruaia te inah ka kal dawn ka tih kha tak tak alawm,mahse a la ngeiawm viau chuan vawikhat na na na chu ka la hnek leh ang,"

"Mipa ho hi chu aw,tlawm hi in van hreh thei tak," ka lo ti ve hlak hlak.

"Kha kha chu mipa chiahin kan hrethiam ang.Mipa tan hi chuan a tha nat thlak alawm," a tih zui zat.

Heihi ania mipa hi chu an mak ka ti ṭhin alawm an han in tih buai ve te hian tlawm zawk a ṭan hi an hreh lutuk a,kut a chin fel an tum tlat ṭhin te,an tha a na tlat zel te hi a mak ka ti ṭhin hmeichhia chu han in ti buai pawh ni ila kan in chhang a,tlema nasa deuh an han in sual a,mahse hmeichhe tam zawk hi chuan kut khera buaina chinfel kan tum ngai lo bakah tlawm zawka ṭan pawh kan hreh ngai lo.


Hun a kal ve zel a,Puia pawhin a dawr thar te chu a luah ve tawh a,kawn lai taka awm anih avangin a lun reuh khawp a,sumo driver ho in an pan nasa a,amah pawh a buai ve thei viau.Keini pawh lehkha zir tur a tam tawh em avangin kan in hmu khât khawp a,class banah hian ka tlawh kawi zeuh zeuh a,a motor silna bulah ka lo ṭhu ve reng ṭhin.

"Pasal hna nei lo i duh bawk si lo a,kan in neih hunah meuh chuan pawisa pawh ka ngah tawh viau ang.I man tur pawh ka khawl zel ania," a tih chuan a nui pah ruh ruh a.

"Min nghah char char a ngai dawn anihchu,"

"Nghak char char dawn e,kan phur tawh teh ania kan chhungkua chu," a tih leh chuan ka lo nuih ve ta ringawt a.



Hun a liam a kum thar kan chuang kai a,final exam kan neih lai vêl chuan Puia nen pawh kan in hmu khât khawp mai .Tunlai chu Pa Dawnga a nuam thei chiah lo a Aizawl lamah te Puia chuan min han chhuk san leh lawp lawp a.U Cobtea pawh Aizawl lamah AICS ah B.D zir turin exam te a zuk pe ve a,Puia nen an rawn haw rual nghe nghe ,an rawn haw leh meuh chuan exam pawh kan lo zo fel der tawh.Exam pawh ka chhang ṭha ve viau chuan ka hria.Grad Dinner kan neih ni chuan Puia'n min thlah a,"I lerh vaih chuan aw,i mawi bawk si," a ti nuah nuah a,kei ka lo nui mai mai thung.

Khang kum 3 chhung rei loh zia te,ka ngaihtuah let neuh neuh a,kum 3 chhung a ka nun hlim zia te,harsatna leh buaina neuh neuh pawh tawk ve bawk ṭhin mah ila ka nun ka hman liam tak chhunga hun nuam ber leh ka hlim ber lai ani.Puia nen pawh thianghlim takin kan la in zui ve reng a, thleng thui lek lek chang lah kan ngah mahse thianghlim taka pasal neih ka duh avangin kan in sum hram hram ṭhin.

Kan result a rawn chhuah chuan kan ṭhianho chu first ah kan pass vek a,kan lawm khawp mai.Graduation day ah chuan kan ṭhianho pawh kan nalh khawp mai ,kan chhungte pawh an rawn kal ve a,Puia chuan Rose Bouquet lian zet min rawn pe bawk a,Rini pawh Dinsanga chuan a pe ve nghe nghe.Kan ṭhiante pahnih chuan kan bouquet chu thla te an han lâk pui leh lawp lawp a,kan nui ho har har.

"Tunah chuan kan in nei thei ta...." A rawn ti sup a.

"Thil ka training phawt dawn," ka tih chuan a lo meng nur nasa khawp mai.

"Eng maw?"

"Air hostess..." A ai nasa in a meng nur.

"A rei lo training chhung, certificate neih hrim hrim ka duh a.Tuna thawh nghal loh pawhin a theih vek,"

"Khawi hmunah?"

"Mumbai ah," a lo meng nur deuh a,mahse min hnial tawh lem lo.

Air hostess te hi chu an hlawh pawh a ṭha tih ka hria,tunlaiah phei chuan pasal nei tawh tan pawh a thawh theih reng tawh a,ramdang,hmundang fang kual theihna chance ania.Bakah mahni invawn reng a ngai dawn bawk a,ka nu leh pa chu ka sawi pui tawh a,min rem tih sak ve mai.

Puia chhungte leh ka chhungte chuan inneih an duh thu an sawi leh ṭhin a,a chhan pawh Pa Dawnga dinhmun a hniam ve hret hret avangin ani.Palai rawn tirh an tum chuan Air hostess ka training phawt duh thu ka sawi a,Puia chuan min han hnial leh dawn viau a mahse a tawpah chuan a lung pawh a awi ve ta nge nge.Chuan ka sawi hmaih theih loh U Cobtea pawh B.D zir tur chuan a tling ve hlauh a ,ka nu leh pa te pawh an lawm khawp mai.A kal dawn ni ah Kohhran Upa ten an rawn thlah ve thlap.

Keipawh Mumbai lamah chuan U Asangtea'n min kal pui a, institute ṭha ber ber te kan han be kual a, a tawpah private pakhat hi kan zuk hmu a,course chu thla 6 chhung a nih thu te min hrilh a,hostel an provide nghal avangin ka u pawh chuan chu chu a ti thlu nghal a.Ka u in min let san a, ṭhian pawh ka nei har lo Northeast lam mi Naga ani nghe nghe a hming pawh Grace ani,Kristian ve tho a lo ni bawk nen Sunday ah te chuan kan va inkhawm ve ṭhin.Puia lah chuan min rawn be awl lo a,min ngaih thu te a rawn sawi cham chi ṭhin keipawhin ka ngai a,hmuh pawh ka chak tawh takzet.

Tlai khat chu a motor silna ah a kut a tih pem thu te a rawn sawi a,thlalak te min rawn thawn a rinai a kut pem lah chu a lian a,tuam rawh ka tih lahin "Tui khawih reng a ngai sia,a na mai mai zawk," a ti deuh tlat a,a rawn in ti pangchang vel thei lutuk a,ral khat aṭang hi chuan tih theih hi ka nei tlem ṭhin bawk si.Christmas ah pawh ka haw thei ta lo chu ania mahse thla leh lawkah hian ka haw tawh dawn bawk a,phur vet vet tawh tak ka ni.Vai rama Christmas hman meuh zawng lung a leng duh khawp mai,Puia leh ka ṭhiante,ka chhungte ho zawng zawng chu ka ngai vek ani.He lamah chuan Christmas boruak ang kha engmah a awm ve lo a,hrehawm tih hian a sawi fiah zo lo ang.

Kumhlui thlah ni ah pawh min rawn video call a,a phone aṭang chuan ni te chu kan han thlir liam dun a ,ka ṭhiante ho pawhin min ngaih thu an rawn sawi sap sap.Zanah chuan Puia chuan Ka message a reply thei lawk lo a,Lalrini te ka va be thul tumah chuan min chhang thei lo,dar 11 dawnah chuan Rini chuan min rawn call back ve ta nge nge ,ka la rang kher mai.

"Hello....Mate,"

"Awi tinge?,tumah in biak theih loh a,?" Ka tih chuan lehlam thawm chu a ri leh deuh nawk nawk,mipa au lung lung ri te ka hria.

"Phisuka te ṭhianho in Puia te an rawn ti buai a,Venghlun lama kan kal tur kha ,an in sual nasa mai . Hei Puia pawh thisen a chhuak nasa reuh lutuk a,kan buaipui mek," a rawn ti zung zung a,ka hlau nghal cheng.

"Awi,amah chu nikhua te a hria em? A zia lo e,ka be thei bawk si lo," ka ti nghal chung.


"Hria e, mahse a in hliam nasa amah ber hi an rawn bei a,"a rawn tih leh phei chuan ngaihtuah tawh tak ka ni.

"Nakinah ka rawn bia ang,ka hlauthawng e...." Ka ti leh vang vang.

"Hlauthawng suh,engtin mah kan ti hmasa hleinem,Hruaia leh Mami in phur kha an lo ti ding a , khata kan va ding ve kha an rawn pawr nghal em em a," a rawn tih zawm leh.

Ka ring Puia te chuan an ti buai hmasa dawn lo,ka thinrim leh hlauthawng lutuk chu chhuatah ka vei sek,Gracei pawh chuan min lo men pui ve reng a a khat tawkin sap ṭawng hian ,"Engkim a ṭha leh mai ang," a ti sep sep .

Darkar chanve hnu velah chuan ka phone chu a rawn ri ve ta,la rang tak ka ni."Mate,kum thar chibai," a rawn ti nghal var a,dar 12 a lo ri ve chiah.

"I na em?" Ka ti nghal vat.

"Na ve deuh tho e," a rawn ti thum dut dut a chutah ,"Duat ka ngai," a tih zawm zat.

"Awi a pawi e,in sual loh hram dan te ngaihtuah ve tur ania," ka tih chuan ,"An nep emai,mal leh mal pawh a mi pawh cho lo," a rawn ti hluk hluk.Ka lo chek tlak.

"Insual hrim hrim kha a ṭha hleinem,kha tunah pawh i na viau anih kha," ka tih chuan a rawn nui hawk a mahse na a ti ri in a zui nghal zat.

"Nuih pawh i nuih theih loh kha,"

"Lo haw vat la .Duat ka ngai ania," pangchang zeta a rawn tih chuan ,"Haw ṭep,kar khat bak a ngai tawh lo,"

"Ka lo dam hman tak leh tuna min duat ai min duat mai dawn ania,"

Ka lo nui hak a, "Nui suh aw Vansanglur ka ngai tawh che ania,muah han ti teh..." A rawn ti pek a ,ka nuih mai mai laiin ,"Ti vat rawh,thla tam tak chhung ka dawng tawh lo a,ka hmui pawh an khawro lutuk," a rawn ti leh a ,vei fahran ṭhin hian.

Ka ṭhiannu hriat hlau tak chuan bathroom ah ka va lut leh ang rawk rawk a, "Muah..." Zawi sep sawp tak ani.

"A ring lo e...." A rawn tih leh chuan ,"Ka ṭhiannu a awm ve reng alawm,a hre palh ang," ka ti ser ser.

"Vawikhat chiah," a tih leh avangin ka han muah leh a, "Ti ve nghal rawh...." Ka tih chuan ring tawkin a rawn Muah pek a, "Awi Chawngthanpuia zah loh zia hi," an tih ri pawh ka hre nghal,Lalrini anih ka ring.

Eng eng emaw sawiin phone chu kan ti tawp a.Ka ngai reuh khawp mai,awm dun thei ila chu han duat ve te pawh ka chak.Mipa pawh hian hmeichhia ang tho hian duat te an mamawh ve a, ngaihsak te pawh hi an ngai ve lutuk.Puia pawh hi ka phak ang tawk chuan ka ngaihsak ve a, hmuh hlan mawlh ani ka nghahhleh.



Kan haw dawn hma ni chuan ka ṭhiannu nen kan bazar a,Puia pawh tshirt leh sana tih vel ka lei sak a.Ka ṭhiante ho ta turin anti tarnish bengbeh leh ṭhi vel te ka lei sak ve thung.Ka chhungte ho thil tur nen kan haw meuh chuan kan bawr haw khawp a,kei ai mahin ka ṭhiannu a bawr haw zawk a,keichuan thil lian tham vak ka lei duh lo a a chhan pawh Flight ah a buaithlak thin avangin ani,kan bazar na hi kan thlenna veng aṭanga a hlat deuh avangin ui chung chung in Taxi kan la a,fare pawh to ṭalh ṭalh tak ani.


Kan haw dawn meuh chuan ka Ṭhiani nen pawh kan in kuah vang vang a,in hmu leh ngei ngei turin thu te kan han tiam a, indigo a haw tur kan nih avangin Flight direct a awm bawk si lo a, Kolkata thleng chu kan la chuang dun thei.Zing kar ah kan Flight anih avangin zanah pawh kan mu thei lo a,kan titi zankhua.Mumbai chu kan chhuahsan ta,ka mu thlu nasa lutuk a,nizan lam ka lo mu lo bawk nen kan harh meuh chuan kan lo landing dawn mek hi ania.Kolkata kan thleng chuan kan Flight kan han nghak dun leh a,ka Ṭhiani zawk chu ka mangṭha hmasa a,ka ngai reuh khawp mai.Thla tam cheng dun hman lo mah ila kan in ngaina em em a,thu a ṭha a chhia kan in hrilh bawk a,kan in hmu leh dawn ania ti chul chungin kan in mangṭha ta ani.

Thlawhna kan han chuang leh chu Mizoram a ka haw dawn avang nge ka phur surh surh khawp mai ,tukverh bul ka chang hlauh bawk a.Lawm tak ka ni,kan flight chhûng zawng chuan Air hostess ho chezia te chu ka lo en ve kar a, certificate te hi han chhuak vat vat se,thawh ve min ti chak zek zek.

Ka mu ka harh chuan a lo tlai leh tawh khawp mai, chawhnu lam a lo ni tawh a,Mizoram chu kan lo thleng der tawh.Tukverh aṭang chuan ka thlir vang vang a,ka za cheng mai.Ka u te pahnih,U Asangtea leh U Cobtea'n airport ah min lo nghak dawn a,U Cobtea pawh naktuk lamah AICS lamah a lut leh tawh dawn ani.


Airport aṭanga ka chhuah chuan ka hawi kual deuh a,ka u te pahnih pawh ka va hmu nghal min lo nuih sang a mahse ka hmuh tum loh deuh pakhat ka hmu tel tlat,Chawngthanpuia chu Bouquet lian ṭha tak keng chungin a hnungah a lo ding a,min lo nuih var var mai.


"Welcome Home Mate....." Tih sup pah chuan a Bouquet ken lai,Daisy par chu min pe a.......



End of chapter-10