STORYFB.COM

NUNHLUI DUHAWM BUNG-11
ZIAKTU : MALI PACH


Ka u te an awm ve bawk nen kuah deuh hnâp chu ka chak a mahse chu em chu ka ti ta lo,a pangpar min pek chu ka la a,lawm tak ka ni.

"Min va surprise chiang ve...." Ka tih chuan an lo nui ṭham ,"Kan hrilh duh lo che alawm," U Asangtea'n a tih chuan kan nui dar dar.

Puia hmai kan en chiang chu a lo khem nuaih,a kut pawh a lo tuam var luk mai.Chutah ka en duh a ti deuh nge ,"Heihi chu a hma a ka tih pem na zawk kha ania, a septic a kan kal hmain ka tuam sawk sawk a," a tih chuan a kut chu ka chul sak heuh heuh.


U Cobtea AICS ah te kan va dah fel hnu chuan keini pawh ka Putea te inah rei lo tê kan lut kawi leh a,zan riak loin chaw eikhamah chuan kan chhuak lehnghal a,chaw pawh kan ei hma khawp mai.Naktukah U Asangtea Office kal ngei ngei a ngaih avangin ani mahse chauh chu na ve duh tak ani.Puia nen a hnungah kan ṭhu a,U Asangtea'n motor a khalh thung.

"Puite,i pa chu eng ala ang thei lo ami," ka u in a tih chuan ,"Aw ang thei lo,Matei a lo haw chuan palai tirh te kha an sawi a,tun aia a nat zual hma tak tak hian," Puia'n a lo tih zawm zat.

"E,kan ti ngei ngei ang.Kan farnu neihchhun ania,a lâwi na tur kan ngaihtuah hian a ngaihtuah awm dawn bawk si loh,kan pa te pahnih duhthusam a lo ni bawk nen kan ti ngei ngei ang," ka u chuan a lo ti ve hlut.

"Palai tur pawh kan ti fel thlap tawh," Puia chuan a lo ti ve zeuh.Phur tawh tak ka ni.Ka u sawi ang tak tak khan Nu Hruaitei leh pa Dawnga te lah an fel bawk si,in nel sa, in hre chiang sa em em kan ni bawk nen ka tan chuan pasal neih vat vat chu chakawm tak ani.

Sialsuk thlen hma chu ka muhil kuit ṭhak a,thingpui in tura kan ding chuan ka harh ve chiah ani.Thingpui te kan in a,zunram te kan thiar zawh hnuah kan tlan leh a.Ka u lah chuan hla lungkuai deuh deuh a play a.Puia nen hmana carpet picnic kan neih ni a kan hla ngaihthlak Bryan Adams When you love someone tih ngei mai a play lai chuan Puia nen nghet takin kan in kai a,tukverh aṭangin thli fim a rawn thaw lût heuh heuh bawk a.Khua lah chu a vawt ṭha bawk a,kan hun hman liam tak te kha ka chhui kir a,ka lung a leng vawng vawng mai.Kan duhthusam pawhin a tak ram a chang ve ṭep a,arsi kan thlir zana kan duhthusam zawng zawng te kha ka ngaihtuah a keimah in ka nui leh thin.


Serchhip kan thleng chuan mutchhuak in min rawn zem chiai chiai a, Puia chuan a dar ah ka lu min nghah tir a,ka muhil ta siai siai.Thlawhna ka chuanna ka chau deuh nge ka mu tui khawp a,mumang lah chu ka'n nei tam khawp a.Ka mumangah chuan Puia hi ka hmu a, tlangah theihai kung hnuaiah hian ni tla tur hi a lo thlir vang vang a , lungngai tak hmel a lo pu a mak deuh chu a bula kal hnaih ka tum khan ka kal thei reng reng lo a.In biak pawh kan in be lem lo,ngawi rengin kan lo ding dun ngar ngar a.Ka harh chuan harh chiang tak ka ni,kan khua kan lo lut tawh a,Puia chuan,"I va mu tui ve,kan thleng hunah chiah kaihthawh che kan lo tum a," a lo ti nghal var.A hmel chu ka en vang vang a,min lo nuih var var mahse ka mumang khan ka rilru chu a luah zui rauh rauh....

"Ka mumangah ka hmu che," ka tih chuan a lo nui suk suk, "Min ngai animaw?"

"Ih,ka hmuh dan che kha a mak lutuk," ka tih leh chuan zawhna mitmeng in min en a.Chutah,"Ni tla tur i lo thlir a,i lungngaih hmel lutuk a.I bula lo kal ka tum khan ka lo kal thei lo reng reng," ka tih zawm zat.


"Mumanga Ni tla tur thlir hi a ṭha lo an ti tlat Upa te khan," ka u lah chuan a lo ti ve bawk a,ka rilru chu nuam lo tak ani.

"Engmah ani lo ang,mumang mai mai alawm...." Puia'n a tih pawh chuan rilru chu la nuam lo tak ani.Ka hmu chiang bawk si a, mumang ka harh chhuah hnua chiang taka ka sawi fâk theih awmchhun ani ngei ang.

Puia te in kawtah chuan kan ding a inchhungah te kan va lut ve,Nu Hruaitei pawhin min lo be luam,ka nu leh pa te pawh an lo la leng a,Pa Dawnga erawh a lo mu bâm a,ka hmuh hnuhnung ber nen chuan in thlau tak ani. "Nu Hruaite thil ṭha tawk ka lo hawn che u ania,naktuk lamah ka rawn dah ang,"

"Awi,kan va lawm dawn tak, naktuk tlaiah chaw lo ei rawh aw...." A lo ti ve nghal hlut.

Ka nu leh pa te chu an rawn chuang ve haw nghal a, "Puitea in rawn thlah hmasak kan ring a ,kan lo nghak che u alawm.Mate kan ngai tawh lutuk che a ,in chau awm mange," ka nu chuan a lo ti luam.

Ka unaute ho pawhin min lo la nghak ṭhap a,ka bungrua te chu an han thiar lut zung zung a.Ka thil hawn sak te ka pek chuan an lawm thiam ve hlawm khawp mai.Zan te a lo rei tawh bawk nen ka chau tawh khawp a,mut hma chuan tui lum in ka inbual leh te te,vawt ṭha têk têk tak ani.

Puia nen pawh kan in be zuai a mahse rei kan in be tawh lo thung.Ka mut chu a rawn chhuak siai siai a kar loah ka lo muhil daih mahse mumang mak tak ka nei leh a,motor kan chuan laia ka mang ang chiah chiah kha ka mang leh a,mahse Puia nen chuan kan lo in hnaih tawh khawp a,a mittui tla chu chiang takin ka hmu a,ka lo hruk sak a ngawi rengin kan in en vang vang a,a lungngai hmêl mawlh mai chu ani,chutah ka harh chhuak leh hlawl,ka thin phu lah chu a rang em em a,sana ka en chuan zing lam dar 3 alo ri der tawh.Puia chu a mu tawh tih hre mah ila ka va text ta tho a,a last seen pawh phone kan dah hun vel daih kha ani.

Ka mumang vang nge ka harh telh telh lehnghal a,Puia lah chu rilru ah a awm zui veng veng a.Thil ṭha lo a thleng dawn em ni? Nge mangchhia mai mai.Ka thin lah chu a rawn phu leh zawk zawk ṭhin ,khawvar hnuah chuan ka muhil veleh chauh a,ka harh leh meuh chuan dar 9 a lo pel der tawh,ka chauh an rin avangin min kai tho duh lo anih ka ring.Inhnuai ka chhuk chuan U Asangtea hna kal tur nen chuan kan in hmu zuai a,ka nu nen chauh chuan kan awm leh a.

"Nu,mumang mak deuh ka nei a..." A lo hawi vut a.

"Puia hi ka hmu a mahse ka hmuh dan kha a mak lutuk a in ang chiahin vawihnih ka hmu..." Ka nu hmela ngaihthat lohna rawn lang chu ka hmu chawpchilh nghal ,"Engtin nge i hmuh a?"

"Tlângah hian a lo ding a,ni tla tur hi a lo thlir vang vang a.A lungngaih hmel lutuk,ka hmuh hnuhnungna zawkah khan a mittui te kha a luang ngiai ngiai a," ka tih chuan ka nu chu meng phawk tak ani.

"Engtin nge vawihnih i hmuh theih?" Mak tih hmel tak ani.

"Kan rawn haw lam khan motor ah ka muhil a chutah chuan ka hmu a,chuan nizana ka khuma ka mut tawh hnu khan a ngai ang chiahin ka hmu leh a,"

"Awi ,a va ṭha lo ve.Hmanlai upa te khan mumanga ni tla tur thlir liam hi a ṭha lo an ti asin.Ka ngaih a ṭha thei lo,tukin lam Dawnga hi a ṭha vak lo em ni aw..." A ti zui vang vang.

"Nu thil ṭha lo a thleng angem ka hlauthawng e....hrehawm ka ti bawk si," ka ti leh sep sep.

"Thleng lo turah ngai ang,mangchhia mai mai ani ang.Rilru nuam deuhin awm rawh," min tih zawm ve zat mahse a hmelah chuan a rilru a nawm loh zia ka hmu thei.

Tlaiah chuan Puia te inah ka thil hawn pe turin ka kal a,mahse pa Dawnga chu nidang zawng ai a lo tlangval a,min hmuh chuan ka kut chu nghet takin a chelh vang vang a,engmah a sawi lem lo mahse ṭawng chu a tum ve nasa chuan ka hria.

Nu Hruaitei chu anti tarnish bengbeh leh ngun leh kurta suit ka hawn sak a,hetiang lampang hi a ngaina tih ka hria a,lawm pawh a lawm thiam khawp mai.Pa Dawnga pawh kawrlum leh lukhum lum te,mawza lum te ka hawn sak ve a,an lawm thiam hlawm khawp mai.Puia pawh ka thil hawn ka pêk chuan a nur var var a,sana te chu an bun chhin vel a,tshirt te chu a ha chhin a,inhmeh tak ani.


Chaw ei tura min sawm tlat avangin ka ei leh ta nge nge.Tlaiah chuan Nu Hruaitei nen eirawng te kan han bawl dun a,ka mumang lam reng reng kha rilru ah a awm tawh lo,Pa Dawnga pawh nidang zawng ai a harh ṭha a,mang chhia mai mai anih ka ring.

Puia chuan Pa Dawnga chu buhhawp a barh a mahse hawp tlem tak ani.Thei leh thei lo hian a rawn ṭawng chhuak a,"Mate,palai chu kan lo tir ang aw....." Harsat hmel fe hian a ti a,ka rilru a na ve takzet,ka lainat lutuk a.

"Tehreng mai,i dam hman ngei ngei a ngai ania aw," ka sawi zo hman hram ka mittui chu a rawn tling deuh pam a,ka hnuk a ulh ṭun bawk.

Chaw kan ei lai te chuan kan titi siam siam a,Nu Hruaitei mawlh mai hi a fel a,mi a duhsak thei bawk si.Ka chawhmeh duhzawng te thleng hian a hre vek tawh a,saum bawl leh bai thak ka ngaina tih a hria a,chaw eia min sawm apiangin a siam hluah ṭhin.

Puia'n chaw eikhamah chuan min thlah a,rei lo te a rawn lut a,thingpui te ka han siam sak leh hnu chuan min haw san ve ta nghal a.

Palai hmel pawh kan hmu har lo,Pa Dawnga dinhmun ngaihtuah chung zelin March thla tawpah in neih pawh kan ti thlu a, inbuatsaihna hun pawh thla khat erh awrh chiah kan nei anihchu.Keipawh ka result te a chhuak a, ṭha takin ka pass ve a.Ka certificate pawh Mumbai a chhuk tawh kher lo in post office aṭangin min rawn thawn a, Puia lah chuan a lawm nan tiin Pangpar bawr lian ṭha zet min han pe leh a.A pangpar min pek ho hi ka room ah ka khawi leh ṭhin a mahse a ṭhen chu an lo vuai hman tho bawk.

Nupuii ka din pui dawn a,ka ṭhiannu Grace pawh kha kan inneihna a min tel pui ve turin ka sawm bawk a lo kal ngei a tum thu min rawn hrilh bawk.Puia erawhin Hruaipatea a din pui dawn thung a,U Cobtea dinpui duh viau mahse ka u ani bawk si,Hruaia a dinpui dawn ta ringawt.

Valentine's Day chuan kan khua a thingpui dawr changkang ve ber ah min hruai a,zanriah kan ei dun a.Zanah tlângah kan han chho a,arsi te kan han thlir leh a, "Kan duhthusamin a tak ram an chang thei ṭep tawh a,i hlim ve em?" Ti a min zawh chuan amah chu ka en vang vang a.

"Hlim lutuk.Ka phur tawh lutuk. A chang phei chuan ka awih lo zawk lek lek,"

"Nia...hun hi an kal chak bawk si a,kan fate nên thla bial zan te kan lawm thei ṭep tawh ania," a nui pah suk suk.

Thli fim a rawn tho heuh heuh a,kan han in kuah leh ngawih ngawih ṭhin.Khang kum liam ta zawng zawng ah khan tumah ah kan la pel he lo a,rinawm takin kan awm ṭhin.Ka tan chuan ka bialpa hmasa ber ani bawk a,engkim mai kha a vawikhatna vek an ni a,inchhirna tur pakhatmah ka nei lo.Kan chhungte pawhin kohhran dan puitling kan tlin leh tlin loh te min zawt a,kan tlin thlap thuin kan chhang a,an lawm hlawm khawp mai.

February thla tawp lamah Nupuii nen Aizawl lamah kan bazar a,lei tur neuh neuh a tam bawk nen,Puia te pawh kan chhuk aṭanga a ni hnihna ah an lo chhuk thla ve a,Hruaipatea te motor an keng a haw rual kan tum nghe nghe.

Dinthar veng lamah ka Putea te inah kan thleng a,vawiin hian mo kawr vel en kan tum a,Puia leh Hruaipatea'n min lo sawm phei a,4 wheeler a kal kan ni bawk a traffic a jam nasa bawk nen hneawm duh ngar ngar tak ani.Zarkawt lamah chuan kan va en a,dawr pakhat ami chuan ka mit a la nghal chat a,midang ho pawhin ṭha an tih thu an lo sawi ve sap sap.

"Awi kha kawr kha,a nalh bawk sia mahse ha nalh thei vak an awm lo a.Nangchu kha i inhmeh khawp mai,i mawng a chhing bawk sia i kawng a fek nalh bawk si,i ta tur awm hliah hliah ani," dawr neitunu chuan a lo ti ve luam.

"Kha kha animai,Matei te chu fuh ve chaih chaih em," Puia chuan a lo ti ve bawk a,kan nui ho dar dar.Mo kawr chu kan inneihni atân kan book fel ta diam a.Lawi kawr tur atan ready-made kan lei a, puan pawh kan lei nghal nghe nghe.Nupuii chu pheikhawk kan leisak bawk a,Puia chuan min pek sak tlat lehnghal a, inthlahrung awm duh tak ani.

"Pawisa ka nei alawm...."

"Ka pe dâwn keiman,i duhzawng thlang ve rawh,"

"Aaaaa....a ngai lo tak tak..." Min han melh rum leh vel a,kan thlang ta nge nge.

An thil tur kan han en ve chuan an han khirh dun em em khawp a,an coat hak tur pawh an order ta ringawt.Smart shoe an lei ve bawk a, Hruaipatea chu a inthlahrung ve deuh ngei ani ang a man han pek ve a tum a Puia lah chuan a lo phal lo,kan nui kan nui a.Zungbun tur kan en chuan kan hming bul kan in koh dan ve ve,M leh P tih chu ker tel tir kan duh a,chupawh chu naktuk lamah a lam theih chauh dawn a rangkachak niin a design te phone ah Ai in dawr nghak tuten min han hmuh tir a ,a mawi khawp mai.Thingpui dawrah te kan han chawl leh a, Hruaipatea'n thingpui leh Paratha leh chhangban awmna dawr khera chawlh a duh avangin bazar chungah kan chawl a,an thil siam pawh a tui khawp mai.


"An thil siam a tui tui nen,ka hritlang dawn nge ka ei tui vak lo," Puia chuan a ti nuah nuah a,kan chhuak nasa bawk si a a hritlang dawn anih ka ring.

Kan bazar zawh chuan U Cobtea an hostel ah kan va tlawh leh a,eitur te kan ken sak a,kan inneihni hmang tura chawlh a dil fel thlap tawh thu te a sawi a,kan phur tlang hlawm ani.

Haw pawh kan haw tlai ngang mai,kan haw kawngah hritlang damdawi te ka lei sak a,ei khalh hmak se a dam hma zawk ka ring.Kan thil lei hi te chu kan han phawrh a a tam ve khawp mai ,a zawng zawng kan la lei lo zawk a ka nu leh U Asangtea'n ka puan chhawm tur vel te kar thar lamah leh langin an en ve thung dawn a,kan in buatsaih ve mup mup tawh ani.Ka Putea chuan ka dressing table chhawm tur min tum sak dawn a,a design ka duh ang te kan han en a kan ri deuh chul.

A tukah chuan chaw hma lamah tih tur ang ang te kan han ti zung zung a,kan zungbun tur lah chu kan han inhmeh dun khawp a,phur vet vet tawh tak kan ni.Puia te erawh an coat ṭhui tir kha karleh lamah chiah an zo hman dawn a ,kan khua a lo thawn mai turin thu te kan han ti thlu leh a.Chawhnu her ah kan chhuak a,Puia lah chu a hritlang ta nge nge a,a hrawk ah hritlang chuan a man a,thil pawh a ei tui meuh lo.


Kan inneihni pawh a ni telin kan hnaih ve hret hret a,kan chhungte an phur bawk nen rilru hi a hlim veng veng mai.Puia nen erawh kan in hmu khât deuh a,a hritlang kha a la na deuh a,a khua te a sik a damdawiin lamah te an han kal a,dengue emaw rannungseh anih ka ring,a inentir ni kha ka nu te Aizawl chhuk ni chiah a lo ni bawk nen ka kal pui hman ta lo a, Hruaipatea nen an han kal ta in ka hria.


Ni a liam a,inneih thil tur buaipuiin kan buai bawk nen Puia nen pawh kar khat dawn chu kan in hmu tawh lo .Ka message lah hi a chhang ngai lo a,a buai anih ringin ka en liam ve mai a mahse tlai khat Nu Hruaitei'n min rawn call a ,"Mate,tunlai in in ti thiam lo ami?" Ti a min zawh chuan ka bang bo khawp mai,a chhan ka zawt nghal thuai a.

"Tunlai chu zu a in nasa lutuk a,a dawr lah a hawng ngai si lo a,in in ti thiam lo nge ka tia.I nu te phei chu ka la hrilh duh lo," a tih chuan mak ka ti khawp mai,ka ngaihtuah let a han in tih thiam lohna kan neih ka hre bawk silo.

"Inah a awm tiraw? Tlaiah ka lo phei dawn ania," ka tih zawh hnu chuan ka ngaihtuah let neuh neuh a.Ka chungah lungawi lohna tur a neih awm ka hre bawk si lo a,rilru a kap nileng a.

Tlaiah chuan Puia hmu turin ka va kal a,Nu Hruaitei chu a rilru a hah hmel khawp mai. "Chaw a ei duh si lo a,a buaithlak lutuk.Han be rawh in in hauh si loh chuan,han hau hrep rawh," a lo ti hlak hlak keipawh inchung lamah chuan ka chho ve nghal.

A room a ka luh chuan chair ah thatchhe zetin a lo ṭhu a,zu um a lo dawm ran a,ka rilru nat zia chu aw.....

"Tinge? Hetianga i awm a?.Ka message lah min chhang duh si lo a ,i buai anih ringin ka lo be duh lo che a mahse Nu Hruaitei'n min hrilh a,mawh eng nge awmzia?" Ka thinrim ve deuh bawk nen ka ṭawng pawh a nem lem lo khawp mai.Reitawkfang a ngawih hnuah chuan.... "Inṭhen ang...." A rawn ti zawi sup a.Chu thu a sawi lai chuan ka mitah pawh min en lo,amah chu ka en leh ṭhin a ka hrethiam lo takzet.

"Engvang ngawtin maw?, Chawngthanpui,kan inneih nan kar tam a awm tawh lo a,engkim kan tih fel vek tawh hi ," a au in ka au ani ber.

"Ti hian engkim tawp rawh se Mate..." A tih leh chuan ka va kal hnaih a amah sawi deuh nawk nawk pah chuan ,"Timaw? Hmeichhe dang an awm em ni?.Eng vangin nge kan inṭhen ang?" Ka ṭap nghal hlawp hlawp.

"Awm lo e,mahse inṭhen ka duh,"

"Aih ka duh lo, hmeichhe dang an awm bawk siloh chuan eng vângin nge kan in ṭhen ang mawh?".... ṭap nasa tawh tak ka ni.

A hmai chu a tuai pâwk a chutah ,"Kan in ṭhen a ngai,Mate.Min hrethiam rawh," a ti zawi leh sup.Ka hrethiam lo kher mai,kan inneihna turin kar tam a awm tawh lo a,min ti hrilhhai takzet a ni.

"A chhan chu hriat ka phu ve lo em ni?,mawh a chhan tal te chu hriat ka phu ve lo ami?"

"I tan vek anih hi,min hrethiam rawh Mate.Heti hian tawp mai ang," a ṭawng kam lah chu a dam thlup a chutah zu chu a tlâk leh pawp.Ka thinrim bawk nen a zu no chu ka beng thla sawk a ,chhuatah a keh darh nghal nuaih.

"Min hmangaih kha....nupui atân pawh min duh a ,kan inneih huna kan awm dan tur pawh phur takin kan sawi dun kha ,tinge hetianga i awm tlat a?"

"Engmah i hre lo...." A tih ri chu zawi sep sawp tak ani, "Eng nge ka hriat loh chu min hrilh ta che?,karleh lawkah man pawh kan inhlan tawh dawn a," a au in ka au ,ka in sut hlawp hlawp bawk.

"I bialpa ,i pasal ni mai tur hi mi tenawm ka nihhi,i hria em?.Mate,min kalsan zawk rawh," a awki pawh a rawn san ve ta.

"A chhan engmah i sawi bawk si lo,bakah ka ṭhen dawn lo che ,min khawngaih lo ami?.I tello in engtin nge ka awm?",amah chu ka sawi deuh nawk nawk a.Chutah a dawhkan a lehkha chu min rawn pe a ,"I hmu em? " Vin taka a tih chuan a lehkha min pek chu ka lâksak nghal thuai a chutah lehkha ka chhiar chiah chu ka mang vek a,ka thin pawh a hma aia rangin a rawn phu dawt dawt a.Ka khur nghal hlawk hlawk,ka tluk mai loh nan chair chu ka vuan bet ṭang ṭang a.

"I hmu em?" Ka tan hian a awlsam bikin i ring em?" A au in a rawn au a ,mittui in ka khawhmuh chu a rawn ti fiah lo a,lehkha chu ka en leh ṭhin. Chawngthanpuia HIV positive maw,Lalpa ka va hrethiam lo em....

"Engtin nge i kai theih?,hmeichhe dang vang em ni .Mawh min hrilh rawh hmeichhe dang vang em ni?" Mumal lo zeta ka tih chuan a lu a lo thing a.

"Anih loh chuan eng vang nge sawi rawh?" Ka ṭap chhuak leh hlawp hlawp .

"Ka hre lo..." A tih chuan awm ngaihna reng reng ka hre lo ,hmeichhia vang anih si loh chuan tun hnaiah thisen pek ngai khawpin a dam lo bawk silo,chupawh lo ni dâwn tehreng se tunlaiah damdawiin lam an fimkhur tawh a,thisen thianghlim lo dawn aṭanga kai chu ani thei dawn bawk si lo.

"Haw rawh,ti hian engkim tawp rawh se.Mate nang chuan he natna hi kai theihna chance i nei ve lo," a tih leh te chuan ka mang vek a,ka mumang mai mai nise ka va ti tak em.


"Ka ṭhen dawn lo che Chawngthanpui,he natna hi ka kai ve thei tho asin, damdawi te i ei ang a mawh...."


"I thei lo, thianghlim takin kan inngaizawng a.Doctor in min hrilh vek tawh.Damdawi pawh a awm ka hria mahse Mate ka dam leh tawh ngai dawn lo asin..." a tih chuan a beidawn zia ka hre thei kei lah ṭap tur pawh ka awm tawh lo,ka awm chu hnawh tu awm ang mai hian a sak em em a,ka hnar lah chu a thip hlur bawk a.

"In ṭhen lo ang mawh, khawngaih takin...." Ngen ngawl tak ka ni.

"Ka hmangaih vang che anih hi,tinge i hriatthiam duh miah loh a," chutah nem deuh zawk hian ,"Ti hian kan in kar chu tawp rawh se,va haw rawh," a tih zawm zat .

Sawi tur pawh ka hre tawh lo,ngawi rengin ka ding a,ka mit aṭang chuan mittui a rawn luang leh ngiai ngiai bawk a.Ka ngaihtuahna zawng zawng te chu an mang vek.Chutah zu chu a bur chuan an tlak leh pawp a,ka na ....Lalpa... ka na ani.Tinge hetiang hi kan chungah a thleng bik,thianghlim takin kum tam kan inngaizawng a,kan inneih hun tur te duhthu kan sam dun ṭhin mahse khang zawng zawng kha engmah lo maiah an chang dawn ta maw,Lalpa ka phal thei mawlh lo,ka hmangaih thinlung vur ang a vawt hi min tih nem sak leh hram rawh.

A room aṭang pawhin ngawi rengin ka chhuak a,inhnuai ka chhuk chhung te chu rei tak ani.Nu Hruaitei chuan chanchin te min lo zawt vat a,ka hmelah chuan thil dik lo a awm tih a hre nghal ,"Tinge,Mate a hau che ami,Khawnge keiman ka han hau ang," ti a Nu Hruaitei kal mai tur chu ka lo vuan bet chawt a,"Nu Hruaite......." Tih chiah ka sawi ,ka kuah thlawp a ka ṭap zui nghal hawm hawm.Ṭap nasa tak ka ni,ka aw rawl tawp tawp in ka au a, Pa Dawnga pawh thei leh thei lo in kan lam a hawi ,Nu Hruaitei chuan a chhan min zawt mawlh mawlh.

"Ka rilru a na lutuk Nu Hruaite,"

"Mate,a chhan sawi rawh a lo lerh em ni?" Ka lu chu ka thing sawk sawk a, "Anih si loh chuan ngatinge?,"

"Inneih a duh lo a, inṭhen a duh a," a lo chek tlak a.

"A va nikhua lo ṭhin tak Chawngthanpuia hi chu, Khawnge keiman ka han hau ang nge ," Nu Hruaitei'n a tih chuan ,"Aih Nu Hruaite, tunah chuan engmah zawt hrih suh,nakinah animai," ka ti bah deuh nawk nawk,rei pawh awm lo in ka haw phei a.Kan in leh Puia te in inkar thui ka tih ber ṭum ani ngei ang,kawtah chuan ka nu hi a lo ding a, min en deuh vang vang a, "Vansanglur eng nge i mit te chu a sen vek a? Eng nge awmzia?" Min melh phawk khawp mai,inchhungah ngawi rengin kan lut dûn a chutah insum thei ka awm leh tawh lo,chhungte bul alo ni bawk nen ka ṭap chhuak leh hawm hawm a.

"Nu a fair lo lutuk,khawvel hi a fair thlawt lo," ka nu kuah paha ka tih chuan kan thawm a ring bawk nge U Asangtea chu step ah a rawn chhuk thla ve nghal.

"Nu eng nge awmzia?" Bang bo hmel zeta a rawn tih chuan ,"Hei ka hre bik lo,Puitea hmu tura a chhuak kha ti hian a rawn awm ringawt a,"

"Nu,ka rilru a na,ka na lutuk Nu......." Ṭap nasa tak ka ni.

"Eng nge a chhan? Puitea nen in in hau em ni?"

"Nu....." Ka ti leh ngawih ngawih ṭhin han sawi ṭan dan tur ka hre lo a ni.

Chutah ,"Ehe, ngatinge a?" Tetea class bang pawh chuan a lo ti ve bawk a,ka nu chuan ka hnungah a chul heuh heuh.

"Nu,kan inṭhen...".

"Awi,eng nge in awmzia?"

"Kan inṭhen,nu ka ṭhen duh lo asin,"

"Tunah engkim kan ti fel vek tawh a,karleh lawk hi i man hlan ani tawh a,eng nge awmzia?" Ka nu chu a thinrim deuhin ka hria.

"Ka va kal dawn..." Ti a U Asangtea chhuah mai tum chu kal lo turin ka lo ti chul a,a chhan sawi tura min tih te chuan ka sawi mai thei lo,harsa tak ani.

"Nu.......ka ṭhen duh lo asin.....mahse maw amah khan inṭhen a duh a ,a chhan pawh (ka ngawi leh vang vang,ka chhungte chuan min lo ngaichang ṭhap) hiv a lo positive a......" Ka ṭap zui leh hlawp hlawp.

Kan inchhung chu a reh tlawk tlawk a,tumah che chang eih pawh kan awm lo,Tetea takngial pawh ngawi rengin a lo ding a.

Chutah , "Awi Mate,ava mak dawn ve," ka nu pawh chu a hamhaih ve deuh a niang a ṭawng bah neuh nawk nawk.

"Nu,ka na lutuk......"

Sawi mai tur an hre lo,ka u chu ka bulah a rawn ṭhu thla a,ka hnungah a rawn chul a,"U....ka ṭhen duh lo....." A lam hawi paha ka tih te chuan ka u mitmenga min khawngaih zia lang chhuak pawh chu ka hmuh hmaih lo.

Tlaiah pawh chaw ka ei peih lo a ,khumah ka mu a inchung chu ka melh tlawk tlawk a.Ka rilru hi a na lutuk a,ka taksa leh ngaihtuahna thlengin a buai zo.Ka chhungte Tetea tih loh zawng an rawn lut a,ka pa chuan ,"Mate,naktuk ah damdawiinah i thisen kan han test tir ve hrim hrim dawn ania," a tih te chuan ka chhang lo, "Ni e,test hrim hrim chu a ngai," U Alawma'n a tih chuan ka rilru in ka ṭawngṭai a HIV positive ka nih ve theih nan,ka lo ni ve hlauh anih chuan Puia pawhin inṭhen a ti tlang bik lo ang ka ti rilru neuh neuh a.Zanah pawh ka nu in ka room ah min riah pui a, chhingkhat te mah ka chhing lo.

"Lalpa khawngaih takin min positive tir ve hram rawh,ka bialpa ka hmangaih em em telloa nun hman hi ka zuam lo asin,Lalpa ka ngen ngawih ngawih a che," ka ti chhuak sep sep a.


A tukah chuan U Asangtea leh ka nu leh pa te nen damdawiin lamah chuan kan kal a,"Lalpa, he natna hi min pe ve lo anihchuan ka be leh tawh ngai lo ang che.I awm tak tak anih ngai chuan khawngaihin he natna hi min pe ve mawlh ang che," ka thisen an lak lai chuan ,ka rilru in ka ti mawlh mawlh.


Darkar chanve vel pawnah kan nghak a,tumah in be mang kan awm lo kan ngawi ṭhap a,chutah min rawn ko lut ta,ka tho tharh a,ka chhungte ho nen chuan kan va lut a.

Doctor chuan min lo nuih sang a,"I result a ṭha ê aw..." Min tih chuan ka hnual nghal rawih rawih ,ka rilru chu a tawt mup mup a beiseina tlem ka la nei ve a mahse beidawn thlak tak ani.Ka nu chuan kan chanchin te a lo hrilh zung zung a .

"E hman ni a tlangval lo kal kha animaw?,kha a pawm thiam loh hmel khawp mai.A hritlang khawsik rawn in entir kha thisen test turin kan ti a,a tirah phei chuan dengue emaw rannungseh turah kan ngai ,khami avânga test kha kan nia.A kai chhan lah a hre bawk si lo,mahse a sawi danah khan kha Hmeichhiat mipat na ah lah ka fihlim a ti bawk si,hetiang case hi chu a vang viau a ,a vanduai ve em anih kha," doctor chuan a ti zung zung a,ka na ,ka na ngawih ngawih.

In lama min haw pui te chuan ṭawng thei ka awm lo.Min biak lahin ka chhang lo a,ka rilru in Pathian ka dem a,Puia khan hetiang natna vei tur khan tih sual a nei lo asin,tlangval fel zu leh ganja ruih bâwk bâwk chang te chu nei ve ṭhin mahse damdawi em a khawih ka hre bawk si lo.Ka thinlung hi a rum vawng vawng.

Chaw pawh ka ei peih lo a,zana room a keimah a ka awm lai chuan Hruaipatea hi a rawn lut hlawl a, a hmel ka hmuh rual chuan thil engkim a hre tawh tih ka hre bawk.

Ngawi renga a ṭhut hnuah chuan ,"Mate...hman ni khan ka inentir pui a,(a ngawi leh dat) thisen test tura an tih avang khan a test a mahse khatiang khan rin loh lam daihin a positive tih kha an lo hrilh leh ta sia.A tirah kha chuan keimah bakin ka hre lo. Pathian a dem a, nangmah a ngaihtuah bawk che a,ka ṭhianpa hi hrethiam rawh aw," a tih chuan ka mittui a luang leh ngiai ngiai a.

"Ka hrethiam thei ngai lo ang Hruaia, Pathian hi a awm tak tak pawhin ka ring tawh lo,"

"Chutiang sawi suh.Pathian chu a awm ngei alawm,mahse a rorel dan hi mihring te hian kan hrethiam lo ṭhin a," a tih chuan a lam ka hawi vat,"Hriatthiam hi a har rêng asin,Puia khan positive tur khan tih sual a nei em?,mawh min chhang rawh..." Ka au leh tuarh tuarh a, "Thudik tak min hrilh rawh aw,kan inngaihzawn lai khan,nilo Mumbai a ka awm lai khan hmeichhe dang mut pui a nei em?" Ka tih chuan a lu a lo thing sawk sawk.

"Nei lo,mut pui chu sawi loh hmeichhe dang chanchin hi a thawi pawhin a sawi ngai lo.Ihmaw Mate,tuna kan rin tak ber chu kumhlui thlah zana kan in sual buai kha i hria em? " A tih chuan ka lu ka lo bu nghat nghat, "Khatah khan Puia khan pem lian ve deuh a neih kha a kutah,amah lah kha an sawisa nasa ber a,khatah khan tu emaw ber thisen aṭang khan a kai ani ang mahse a khawih tute ho kha kan hmu hman vak lo a.Keini ho kha chu kan na em em bawk si lo,pahnih in an khawih rawn a ,Venglai ho nen min tam hneh bawk sia," a tih chuan ka mit ka chhing sawk.

"Hruaia khawngaihin min ṭhen lo turin lo hrilh ve teh....a tello in engtin nge ka awm tak ang?" Ngen tak tê in ka ngen a, "Tunah chuan keini pawh min hmu duh lo,an ina ka kal pawn room ah a in kalh hnan tlat a.Nu Hruaitei lahin a tuar thiam bawk si lo,aaa..hmuh an hrehawm lutuk," a ti zui nawk nawk.


Rei pawh a awm tawh lo,min haw san hnu chuan kan thlalak te ka en a, thlalak ah chuan kan hlim a mahse a takah erawh kan kehsawm mek anih si hi.

Nu Hruaitei lo kal pawh chuan min rawn ṭah khum chiam a,kan inneihna tur pawh thu chiang a la awm thei lo.Puia chuan inneih chu a duh lo bur a,keichuan neih ngei ngei ka duh thung si a.Rin loh deuhin zankhat chu a message ka dawng a,inhmuh a duh thu min rawn hrilh a, phur takin ka insiam nghal mawlh mawlh.Ka chhungte bulah chuan ka chhuah lawk tur thu ka hrilh a,min ngaihtuah hmel hlawm khawp mai mahse ka hmelah dan chi ka ni lo tih an hrethiam nge tumahin engmah an sawi zui lo.


Kan in gate bulah a lo ding a,hoodie dum ha in lukhum a khum bawk .Ke chuan ngawi rengin kan kal dun a,in be miah loa kal kan ni bawk nen kan thleng hla hman viau venghlun lam kan thleng tawhin ka hria streetlight eng châng châng hnuaiah kan ding dun a,kan in en vang vang.Chutah min kuah leh vang vang a ,"Ka phatsan ngai lo ang che ka tih kha hre reng rawh," a rawn ti chhuak sup a,a lam ka hawi chuan a mit aṭangin mittui a lo luang a,keipawh ka bang bik lo.

"Min ṭhen chu i tum tawh lo tiraw?" Beisei nei zeta ka tih chuan min en vang vang a,a mit chu a la sawn duh eih lo.


Chutah,min kuah na chu a phelh a ,kan inneih zungbun tur ngei a kan lei chu a rawn phawrh a "Heihi la rawh ,in mangṭha na thil pek angah min ngaihsak dawn ania,"a tih chuan zungbun chu min rawn pe a,chutah " Ka hmangaih che asin, thianghlim takin kan inngaizawng a, he natna hi i kai ve lo ngei bawk a, chuvangin nangchuan min kal san zawk mai rawh.I tan vek anih hi, I hlim nâ ai a duh ka nei lo, Mate," a tih chuan ka mit aṭangin mittui a rawn luang leh ngiai ngiai a,a ngawi dat a,"Tawpna mumal tak ka la siam pui loh che avangin tunah pawh helai hmunah hian ka hruai che anih hi," a tih zawm zat.


"Min kalsan suh khawngaihin, keichuan I
tawrh ang zawng zawng kha ka tuar ve thei vek khawngaihin min kalsan suh, ka hmangaih che," Ṭap hlawp hlawp a ka tihchuan ani erawh chu a ding ngawi ngal a, chet pawh a che eih lo.

"Mawh, khawngaihin inṭhen lo ang, engtin nge ka awm ang?" Ka tih leh chuan min rawn en ve ta nge nge, "Ka thuawih rawh, nangchuan he natna hi i kai ve lo a,i nun ti chhe tu nih ka duh lo , ka hmangaih vang zawk che anih hi," a tih chuan ka ṭap chhuak hawm hawm tawh, kan dinhmun
harsa leh khirh zet hi hrehawm ka va ti kher em.

"Kei ai tha leh fel I la tawng leh em em ang, Mate....." A rawn tih chuan ka kal hnaih vat, "Aih nangmah hi alawm ka duh, Mawh min
hmangaih ve ngai miah lo ami? mawh ka
hmangaih che min tih lai zawng zawng te khan l lo ti tâk tâk ngai lo ami?
Chawngthanpui min chhang rawh, min
hmangaih takzet chuan khawngaihin min
kalsan suh....." ṭap hlawp hlawp a ka tih chuan a hmai tuai pawk pah hian a tho chhuak hawk a.



"Ka hmangaih che, ka hmangaih lutuk che he natna hi l kai ve ka duh loh vang zawk anih hi , ka tan hian a awlsam bîk I ring ami?, ka tan hian asin harsa nang tluk a hmangaih hi ka nei lo asin, he natna hi kai ve ta la mi in an sawi dan tur zawng zawng che pawh ka ngaihtuah vek hrehawm ka ti a chutiang chu thlen tir ka phal lo anih hi, I thianghlim nâ tur zawk anih hi," a tih chuan a au hian a au a.

Ka ṭap nasa zual sauh, hetiang dinhmun khirh tak a ding tur hian tih sual kan nei in ka hre bawk silo,thianghlim takin kum tam tak kan in zui a mahse ngatinge Pathian pawh hian hetiang natna hi a pek bîk le.Ka rilru chu a rum vawng vawng a, kan inneih nan kar tam a awm tawh lo mahse hetiang dinhmun ah hian kan ding ta si.

"Ka tihpalh,min ngaidam hram dawn ania na taka ka siam che avângin," a ti zawi sup a,"Pui...Ngaihdam ngaiin i awm hleinem,mawh min ṭhen suh aw," ngen ngawl tak ka ni, "Kal rawh, min kal san rawh, mi tenawm ka nih hi ....kal zawk mai rawh Mate," a tih ri chu zawi viau mahse hrechiang tak ka ni.Zan thim reh tâk hnuaiah chuan ka ṭap ri avangin a rilru thlak a tum phah lo a, zan thim chu a thim zualin a reh zual ngawih ngawih.Kalsan harsa ka va ti kher em.

"Kal rawh le....." tih pah chuan min kuai her a, ka hnungah chuan a rawn nam dat a.Ka zawi vek tawh, ka hmalam kawng thim ruih te chu mittui avangin ka hmù phe vek a, ka hnung ami lah chu thehmeh an sawi ang mai hian a reh a, awm ve lo ang mai ani.


Ka mang vek, khawi lam nge ka pan ang tih pawh ka ngaihtuah thei lo, muang changin ṭap hlawp hlawp chungin ka kal ve zel a, ka hnung ami lah chu a ding ngawi reng a, min chelh a, min auh let a tum hek lo!.Kan in lam ka pan em tih pawh ka hre lo, kawng peng ka thlen dâwn chuan ka va hawi let leh a, a din dan ngai chiaha dingin a hmai a lo hup vang vang a,keimah ang tho in ani pawh ana ani.


Tetea aw ang deuh ka hriat chuan ka meng riai riai a, engkim mai chu ka mang hriat vek ani ber. "U, heta hi a awm..." tih ri te ka hre nawk, ka unaute ho hmel chu fiah lo riai hian ka hmù a, U Asangtea chuan min rawn pawm tho nghal a, "Mate, I harh em?"Tih pah chuan min rawn sawi nghal mawlh mawlh a.


Ka harh chiang leh meuh chuan khua pawh a lo var kuar tawh a, ka room ah ka lo mu tawh ka hawi kual a, ka chhungte ho chu an lo thu ṭhap mai.

"Nikhaw hre lo in I lo let reng a nizanah khan," ka nu chuan ṭap pur hian a lo ti a.Ka melh ngai chu ka melh leh tlawk tlawk.


Ni e, ka nâ ani, ka nâ lutuk hi sawi fiah
ngaihna ka hre lo zawk.Ka â thei mai dâwn ten ka hria.Ka mittui chu a rawn luang leh ngiai ngiai a, min biak pawh chuan tumah chu ka chhang lo.Min khawngaih hmel tak a ka chhungte'n min melh tlawk tlawk te chuan mi â ang mai hian inchung chu ka melh a, ka mittui erawh a la hul thei chuang lo.


Tawpna tâk tâk kan siam ta chu ani si amaw!...... Ka hmangaih, a va nâ vawng vawng tâk em.Engmah hian min hnem zo lo.Mi â ang mai in ka awm a.Kan inneihna pawh thu leh awm lo a ṭhulh ani.Ka ṭhiante an rawn leng pawhin ka be ngai lo a, min biak pawhin ka chhang ngai hek lo.Zan ka mu thei lo a,thil ka ei thei lo bawk a, rei lo ah ka taksa in a tuar phah reng bawk a,drip te kan han khai leh rih ṭhin.

Ka thinlung ti na tu ber chu i mitmeng kha a ni.Min hmangaihna in a khat a,mittui in a bual a, mahse kha mitmeng kha min kalsan tumna in a khat tlat bawk si.Kan inkuah a,kan ṭap dûn a,kan inhmangaih thu kan sawi mawlh mawlh a.Mahse chu kan inkuahna ngei chuan inthlah zalenna kawng min kawhhmuh ta si.


La dam ve ve siin ka sun che a.I thawk la ri ka hriat phak lohna aṭangin ka hmangaihna che hian min ei chhe zo a. Ka kawchhung a ruak a,ka mitmeng a buai a,ka nui hmel a chuai zo ta.Mihring nung chunga ruang ang mai ka ni.

Hmangaihna hian min ti na a mahse natna hian min hmangaih tir thung si,a hma aia nasa in ka hmangaih na a zual a,ka ngai a,a rei telh telh a ka pawm thiam lo tulh tulh a.Ka huat theih loh che avang hian ka na zual a.Min bum in hmeichhe dang avanga min kalsan chu ni la tun ai hian ka pawm thiam ngei ang mahse nang chuan min hmangaih em a,i natna ang ka kai ve i phal lo a,chumi avang chauh chuan min kalsan i thlang ta zawk si anih kha tiraw ka hmangaih.Min hmangaihna hi maw ka tan chuan hriatthiam a har em zawng anih hi.


Nikhat inbual tur a bathroom a ka lut, ka awm rei lutuk ka nu min rawn ngaihsak tura lo kal, ngaihṭha lo in kawngkhar a lo chum vak vak te chuan ka thil tih tum chu tih ka tum ruh tawh hle a.Ka ngaihtuah na zawng zawng pawh chuan a tawp a thleng vek.Ka nghawng a hrui in vet phei chu ka vuan ran a, ka mit ka chhin rual chuan a thim vek a, engmah ka hre zui lo.



Ka meng riai riai a, ka hnar leh ka ah te chuan pipe ni awm tak hi a in zam tup a, ka che thei lo a, ka awm na chu hriat pawh ka hre lo.Monitor eng eng emaw a ri bawk a "A rawn harh ami?", Hmeichhe aw in a tih chuan ka bul an lo thleng vat a.Ka mit chu a rawn keu a, ka kut te chu engtin emaw hian a ti kang nghal zung zung a."Aw hei a rawn harh, a chhungte kha va hrilh rawh" a tih chhunzawm nghal zat a.


Ka nu hmel chu ka hmu hmasa ber a,chiang lo riai hian ka hmu a chutah ka chhing leh vang vang a ka meng leh chuan a hma ai chuan ka hmu chiang deuh tawh ṭap zo hlim tih hriat takin a mit leh hnar chu a sen hlar a, ka ṭawng theih loh avangin ka sam ah chuan duat hmel tak hian min chul heuh heuh a."Awi Bawihte.." A in hup zui nghal ,"Ka pi , l mittui tih tlak loh hram hram tum rawh aw, a rilru ti nâ thei emaw a rilru no theih nâ tur kha chuan awm lo hram rawh aw, a harh vek tawh a zanin hi kan en chhin ang a naktuk ah
chuan ventilator vel pawh hi hman angai tawh lo ang," hmeichhe aw in a tih ri chu ka hre leh a.Ka mit ka lo chhing vang vang a.


"Puia kha a haw tawh ami?" Chu aw chu U Asangtea aw a ang ka ti.Ka muhil vang vang kha ania, ka la meng chhuak peih lo a ka muhil emaw a la ti anih ka ring.

"Aw, haw deuh chiah...." U Cobtea ani in ka hria. "An khawngaih thlak emai, engtia han tih chi nge ni dâwn le?.Hetiang ringawt te chuan an nunna pawn a tuar a hlauhawm," ka nu in ka sam chul hliau hliau pah hian ati ve bawk a, ka bulah a ṭhu tih ka hre thei nghal mai a.

"A pawi emai, Puitea pawh ka lainat lutuk, a tuar hle anihkha a hmel pawh a tla vek alawm. Matei ava hmuh te khan a ṭap nasa lutuk, Dawnga boral nâ ala rei bawk silo ," ka pa ani.

Eng chen nge ka mut tawh ka hre lo a, eng
chen nge helai hmunah hian ka awm tawh tih lah ka hre hek lo, ka hriat zawng chu ka room bathroom ah ka nunna lâk ka tum tih ani.Thihna ah hian hahdamna a awm ringin anihkha ka nunna pawh lâk ka tum mahse
eng vang a thi lo nge maw ka nih le?.Khawvelah hian natna bak ka tuar lo a, hetiang em em hian mihring rilru hi a nâ thei tih pawh ka hre ngai lo.Engmah hre lo a awm vang vang kha ka chak a, ka thlarau chan tur pawh ngaihtuah lek loin anihkha thutlukna pawh ka siam .


"Bawihte, Mate min hria em?" Ka nu in a rawn tih chuan ka meng riai riai a, a hma a ka awm nâ ah kha chuan ka lo awm tawh lo mahse ka awmna chu ka room ani chuang lo!.

"Mate, i harh tiraw?" U Asangtea'n min ngaihtuah deuh hian a lo ti ve bawk a.

Ka lu ka lo bu ringawt ,ka chhungte ho hmel chu ka en kual a Tetea tih loh chu an lo kim ṭhap.

"Kar 2 dâwn chu damdawiinah I awm tawh a, I harh chiang tawh tiraw?" Ka pa in atih
chuan ka lu chu ka lo bu leh a, ka ṭawng peih thlawt lo ani.

Damdawiinah chuan thlakhat dâwn kan awm a, kan chhuah dâwn ni ah chuan psychiatrist hian min kawm leh a, damdawiin ka awmchhung hian vawi engemaw zah min kawm a, hma ka sawn pui phah pawn ka hre lo.

"Rilru na hi chu dam leh tur pawh hian hun hi a duh rei ve alawm tiraw?" Doctor in a tih chuan hnuai lam ka en ngar a.

"I hmangaih em em khan a natna ang I kai ve a hlauh vangin a kalsan che a,nangpawhin I hmangaih anihchuan eng vangin nge thihsan chu l tum?. Khawvel te chu fight ve angai alawm, I hmangaih anihchuan nangpawn a nat I phal bîk lo ang chu tiraw?.I thih san leh lek phei chuan tun ai hian a nat zual phah ang a, nangpawn chu chu I duh lo ang chu tiraw?" A tih leh chuan, "Aw duh lo...” ka lo ti vat a.


"Khawvel ah hian kan hmangaih tâk te, kan
duh ngawih ngawih te hi kan ta an ni thei kher lo a,keipawhin i tawng ang hi ka lo tawng ve tawh a mahse chhan dang vang zawkin. Tunah nang te chu a natna vei ang kha i vei ve lo zawk a, nun bul ṭan ṭhat leh nan pawh i la upa lo bawk a, a hmangaih em che avangin leh nun bul ṭan ṭha leh tura a duhsak vang zawk che in a kalsan che a. Nangpawh in a hmangaihna I chhan let ve theihna awmchhun chu a duhthlan nâ pawm sak a, ṭha tak a nun hi ani asin," Doctor chuan dam thlap hian a ti leh a.

"Kha natna kai tur khan ka bialpa khan tihsual anei hleinem,keichuan a natna ang kha kai ve pawh ni ila pawi ka ti hleinem, chu chu hmangaihna ani zawk lo em ni?, ka thinrim bawk nen ka ankhum bawrh bawrh.

"Hahdam rawh,hahdam rawh.I bialpa khan tihsual engmah a nei lo,a kai dan zawng zawng a sawi danah lah khan a vanduai vang liau liau in ani a.A nih tur ang zawng zawng ani tawh a,nangpawhin chu chu i pawm thiam a ngai.I bialpa in a hmangaih zia che kha,keipawhin ka hria.Hmanni ah kan in kawm a,a nun kha a beidawng ngawih ngawih asin,i lakah a in thiam thei lo a mahse a duhthlanna kha duhthlanna ṭha zawkah a la ngai.Chuvangin nangpawh in pawm thiam zir la,i nunna lak te kha ngaihtuah tawh reng reng suh.Zingah ni thar a chhuah apiangin nun thara eng turin hun ṭha kan nei leh ṭhin.Chuan i tih ngei ngei tûr chu Ṭawngṭai thlah thlam suh," a sawi zawh rual chuan ka lo ner nak.Ṭawngṭai tih an sawi apiang hian ka thin a rim a,Pathian ka dem nawn leh ṭhin.


Damdawiin pawh kan chhuah san a,ka nun chu nitin a ngai in ka hmang a,pawn ka chhuak ngai lo va.Inah ka awm chawt a,phone leh thil dang pawh ka khawih ṭha peih meuh lo.Zan alo thlen hian ngaihtuahna a kal thui ṭhin khawp mai a,kan nunhlui tam tak te kha ka chhui kir leh a,ka awmah min rawn hnawh leh vak ṭhin.Damdawiin ka awm laia psychiatrist kha hmeichhia ve tho ani a,a thusawi pakhat ka beng a ri reng chu ,"Zingah ni thar a chhuah apiangin nun thara eng turin hun ṭha kan nei leh ṭhin",tih thu tawi te hi.

Puia chanchin ka hre ngai lo a,ka hriat zawng chu damdawiin ka awm lai khan Pa Dawnga a boral a,Puia pawh a rawn kal ve zuai tih chiah kha ani. A number a thlak a,a ṭhiante zawng zawng pawh a thlah fai vek ani awm e.Hruaipatea te leh Rini te ho chu an rawn leng ṭhin a mahse ka ṭawng tam peih lo bawk nen tunah phei chuan rawn lang khat tawh tak an ni,ka room ah ka tawm a,biakin phei chu ka hmuh lohna a rei tawh.U Cobtea a kal leh tawh a,ka chhungte ho in min biakna pawh ka chhang tawi thei khawp mai.

Hun leh ni te hian kan ngaihtuahna hi an liam pui ve si lo,ka hriatreng na ah lah a hming ka thai reh thei si lo.Ka thinlung hi a la rum vawng vawng a,ka nun hi a beidawng takzet.


Tlang kamah kan inṭhen chhan hi a lo thang chiam a mahse vanneihthlak takin Puia natna tak hre si lo in,a dam loh thu in a thang a mahse ṭhenkhat chuan rindan tawk an nei tho ang.


Zan mut dawnah chuan mutna damdawi chu pahnih ka ei ṭhin a a chang phei chuan pathum ,pali te ei chang ka nei.Chutianga ka ei chuan a tukah nileng ten ka mu ve thei a ,mahse ka chhungte erawhin an rem ti lo khawp mai.


Hun leh ni a liam zel ang hian kan rilru natna pawh a ni telin a kiam ṭhin an ti a mahse ka tan chuan ni thar a rawn chhuah apiangin ka rilru a thar emaw tih mai tur ani a,kan hlim thla te ka thlir leh ṭhin.Ka khawvela a tel ve loh ni aṭang khan ka khawvel a chuai a,mu leh mal pawh ka nei thei meuh lo.


"Mate,ka ṭhiannu pakhat hi nau a nei dawn a, school-ah a aia kal tur a duh a.Han kal ta che..." U Asangtea'n chaw ei laia a tih chuan ,"E...a ṭha tak ang Mate,han kal ngei ngei rawh," ka nu pawhin a lo ti ve bawk a.

Phur lo viau mah ila ka chhungte'n kal tura min tih luih tlat avangin ka kal ve ta a.A tirah chuan a hrehawm ka ti viau a mahse thla meuh ka thawh takah chuan rilru a la peng ve a,naupang bulah nitin hun ka hmang a.Mahse nikhat lek pawh amah ngaihtuah lo in hun ka hmang ral ngai lo.


End of chapter-11