STORYFB.COM

NUNHLUI DUHAWM BUNG -12 Last Chapter
ZIAKTU : MALI PACH


"Vansangluri,flight 6E 1463...." Pilot in a tih chuan ban ka lo phar a, boarding hma in briefing room ah chuan checking te kan han nei leh a.Khua a nuam lo bawk nen delay chhung pawh a rei khawp mai .

International ah ka thlawk ve zeuh zeuh a,a hmaa kan lo thlawh ṭhinna ho hi a hlat theih em avang leh zan rei tak tak a kan chhuah ṭhin avângin International hi chu ka thlawk peih vak ngai lo a mahse tunah erawh a dan a dang deuh ,Dubai kan thlawh hi chuan darkar 3 leh tlem bak hun kan hmang ngai lo a,mahse chauh erawh a na leh dawn.



Boarding pass kan tih lai chuan nupa tuak ni awm tak inhmangaih hmel em em a an han awm te,inngaihsak hmel tak a an awm lai te chu ka en zui vawng vawng a,hmuh an nuam takzet,ka rilru ah "Amah" bawk a rawn lang leh a.Boarding kan han tih fel hnu chuan announcement te kan han siam leh a.Kan thlawk chhuak ta.Kumin hi ka kum 5 na ani a,kum tawp lamah hian kan khua a haw ka rilruk a, rilru pawh a in peih ve tawh hle in ka hria.

Mumbai hi ka based ani a, ṭhian ṭha tak tak pawh ka nei ve nual tawh.Khawvel hmun hrang hrang ah kalin,hlimna te han hmu ve bawk ṭhin mah ila a tawpah chuan "Amah bawk" ka hre chhuak leh ṭhin.Min duh tu pawh ka tawng ve nual a kan hnathawh pui te ah pawh, passenger te ah pawh min rawn bawhzui an awm chang lah a awm mahse ka thinlungah hian tumah an leng thei lo Amah chauh lo chu.

Dar 11:30 velah immigration te kan han paltlang leh te te a,crew bus ah kan chuang ṭhap a,a zan hmasa ah ka mu ṭha lo bawk nen ka chau reuh khawp mai. Bus chu a ding dat a, Premier Inn Dubai Airport tih a intar kuau a,Airport aṭanga a hlat loh avangin kan thleng har lo.Reception ah chuan key card te ka la a ,"Good evening Miss Vansangluri,Room 714.Seventh floor " Receptionist chuan tiin key card min rawn pe a,ka lo nuih sang.

Lift ah chuan mahni in ka chuang chho a,uniform nen ka la awm bawk a pheikhawk sang ka bun bawk si ka ke chu a kham tawp khawp mai.Ka room tur ka thleng chuan card te ka han vit lut leh a ,room chu a rimtui chem chem a,a fai ṭha bawk si,tukverh lian pui lam pan chuan ka phei a,ka dak chhuak vang vang Dubai Airport Runway chu a lang uar a,Indigo 6E 1464 thlawk chhuak tur ni awm tak a lo awm ve mek bawk.

Ka in bual fel hnua ka mut chuan ruah lah chu a sur nasa em em a,hetiang hmun nuam lutuk ah pawh hian awm ṭhin mah ila rilru chuan kum tam tak liam ta kha a chhui kir leh nge nge ṭhin. Mumbai ka chhuk hma khan tum loh deuhin kan in hmu hlawl a,khatah khan tlângah Mumbai ka chhuk tawh dawn avangin kan kal ṭhinna theihai kung hnuaiah khan ka han kal a,a lo awm ve nghe nghe ani mahse khatah pawh khan rei pawh kan dun ta lo anihkha,hma a sawn ve zel tur te kha a sawi a,rilru nuam taka kal turin min chah bawk anihkha,tunah hian a chanchin hi ka hre ngai lova,ka ṭhiante leh chhungte ho pawhin min hrilh duh hek lo, ka zawh lahin min chhang mumal duh hlawm ṭhin lo anihkha.

Khuma mu chung chuan hmana a lehkhabu min pek "A Thousand Boy Kisses" tih ngei mai chu ka han chhiar leh a,kan dinhmun nen pawh in mil na chen a tam khawp mai,mahse keichu ka hmangaih khan a mah a kha natna huatthlala zet kha tuar a thlang ta zawk si a,ka han chhiar zo chu mittui a ko chhuak nasa em em a,kan nunhlui zawng zawng te ka han ngaihtuah let leh a,zan hun pawh a rei leh duh khawp mai.

Nunhlui ngaihna hi anchhia ani lo.Hmangaihna chi khat zawk ani.Kan lo dam ve tawh a,kan lo hlim ve tawh a,kan lo na ve tawh tih hriatrengna ani.Zan khua a rei chang te,ruah a sur cherh cherh chang te hian kan thinlung kawngkhar a rawn kik a,min rawn tlawh leh ṭhin,zanin zet chu ka ngai ngai zual tak ani.

Ka harh chuan dar 7 a lo ri leh va tawh a,nizanah khan mutna damdawi ka ei tam ngam si lo a ka mu thei lawk lo kha ania,tunah lah ka mut a chhuak em em a.Ka ril lah chu a ṭam em em khawp a.Ka hmai te ka phih fela ka in tih fel hnuah in hnuai lamah crew buffet te ka zuk ei leh a ,dawhkan lian puiah hian reserved for crew tih hi a lo in tar kuau a,midang ho ka hmuh mai loh avangin keimahin ka ei ta ringawt a,an thil siam pawh a tui khawp mai.

Ka layeover chhung a rei deuh dawn avang pawhin phur tak ka ni, ka room ka thleng chiah chu ka phone a ri ve nghal zat Tetea ani, "U....dubai ah chuan i la awm ami?" A rawn ti lang lang,thil min chah leh dawn ani ang.

"Awm e..."

"Perfume min lo hawn..." A rawn ti thum leh dut dut a,a duh khirh bawk sia,a notes zawng zawng nên thawn vek angai ṭhin.

"I khirh thei bawk si,"

"Please ka hmang zo leh ṭep tawh a min lo thawn kha," ka lo chek tlak ,"I mak ka ti,ren ve ta che.A to chi vek ka lo thawn ṭhin che a,"

"Ren tawh ang,min lo lei sak aw....class ka kal dawn," tih leh phone dah a rual a,dek pawh ka ti hman tawh lo.

Mall ah chuan ka kal a,sephora ah perfume chu ka en a rimtui hlawm tak an ni,a notes te thla ka la a ka va thawn chuan a lo en ve nghal zat chutah Clinique Happy ka va hmu nawlh ka la a,ka hnim chhin vang vang.Citrus rim a rawn chek chek a,ka ngaihtuahna ah chu khang kum tam tak liam kha a rawn lang a,citrus rim a nam chek chek ṭhin lai te,ka mit ka chhing vang vang.Hei vang chiah hian ania he perfume pawh hi ka hmang leh duh tawh loh,mahse kum tam tak hnuah a rim ka hre leh a rilru a thar leh vawng vawng.


Ka thil lei tur ka lei zawh hnu chuan keipawh Hotel lamah ka let leh a.Zanah chuan ka insiam leh nghal mawlh mawlh a,Flight a tlai dawn avangin ka hmanhmawh peih vak lo.Boarding te kan han ti fel leh a,zanin ah erawh Flight delay a awm loh avangin a hun takah kan chhuak thei a,ka in luah ah ngei hahdam deuhin ka mu chak tawh.

Mumbai ka chhuk hma khan Pathian hi ka do a,inkhawm chu sawi loh ṭawngṭai pawh ka ṭawngṭai ngai lo mahse U Cobtea'n ka chhuk hma khan room ah a hrangin min kawm a,Josua bung 1 chang 9 ,"Thu ka pe che a ni lâwm ni? Chak tak leh huai takin awm rawh; hlau suh la, zâm hek suh; LALPA i Pathian chu i kalna apiangan i hnênah a awm zêl dâwn alâwm,”tih lai chang kha a chhiar chhuak dap a,kha thu tawi te khan ka thinlung hi a hneh em em a,Lalpa ka Pathian ka lo do ve ngar ngar kha ka bulah a awm reng a,ani chuan kei misual pawh hi min do ve lo a,min lo venghim char char zawk tih te ka hrechhuak thar a.Pathian kha lo do ngam tur ka ni miah lo tih nen lam ka rilru ah chuan a rawn lang a,he Bible chang tawi te avâng hian Pathian khawngaihna leh hmangaihna ropui zia ka hre thar a,rilru erawh la dam lo mahse thlarau ah zawk damna ka chang a,a hnênah ka harsatna te ka thlen a,ka ṭawngṭai tam phah a mahse tun thleng pawh hian ka ṭawngṭai na ah a tan ka la dil sak reng ṭhin ani.




Hun a liam a, Christmas te a rawn hnai leh a,kan khua a haw ka tum avangin ka bazar nasa khawp mai,ka vahte thil tur te ka lei a,ka chhungte leh ṭhiante ho zawng zawng thil tur nen lei hnem tak ka ni,sawi hmaih theih loh Puia leh Nu Hruaitei thil tur pawh ka leisak ve a ,ka let tawh dawn loh avangin ka bungrua pawh a tam zawk chu ka lo han thawn hmasa tawh a, ka chhungte chu tumah min lo hmuak lo turin ka hrilh a,a chhan pawh hna leh thil danga buai vek an nih avangin tih buai loh hram hram ka duh avangin ani.

Airport ka thleng a,a hmaa Puia'n pangpar bawr lian zet nena min lo hmuah lai te mitthla ah a rawn lang leh zut zut a,ka mittui a rawn luang ngiai ngiai a, Mizoram ngeia han haw leh meuh chuan boruak pawh rit ṭha tak ani.

Ka Putea te inah zankhat ka riak a ,a tukah chuan Mumbai ka in luahna bul ami ka ṭhianpa pakhat hi kan khaw ṭhenawmah Christmas hmangin a kal dawn a,a ruala kal a lo remchang hlauh bawk a lawm tak ka ni.Ka ṭhianpa hi Mumbai ka chhuk tirha min lo be tlangnel hmasa tu ani a,keiai kum hnih velin ani in ka hria a naupang zâwk nghe nghe. Engineering College ah a kal ve mek a,tlangval fel tak ani.

"Vs,in khua chu a khaw thlêng kha a rem bawk sia,a tlang lah a nuam bawk si tlawh tu te pawh an tam viau ang a," motor khalh paha a tih chuan ,"Nuam lutuk,kan tleirawl lai chuan tlangah hian tlai ni tla tur kan thlir ṭhin a,zanah te tlângah arsi te kan thlir a,a nuam thei lutuk," ka tih pah chuan kan khua chu ka mitthla ah a rawn lang uar uar a.

"Ka haw lamah ka hman chuan ka lo tlawh kawi dawn che ania,"

"Tehreng mai,lo kal ngei ngei rawh.Khual ṭha thlengin ka lo thleng ang che," ka tih chuan a lo nui hak hak.

Dar 2 velah chuan Timo chuan min rawn kaitho a kan khua kan lut ṭep hi alo nia.Tuichang aṭang khan ka muhil char char a, ka chhungte pawh ka phone nghal thuai a,min lo nghakhlel hlawm khawp mai ,khawchhung kan han lut te chu rilru a tawt a,nunhlui tam tak an rawn kir leh a,ka awm a tawt leh ṭêuh tawh.

Timo pawh a hmanhmawh deuh avangin peng pawh a rawn peng kawi lo a ,ka nu leh pa te'n lawmthu an han sawi mawlh mawlh hnuah a haw lama rawn kal ngei ngei turin ka chah luam.Ka in ngei a ka han haw leh tak ah chuan lung te pawh a chhe ve lek lek.

Kumhlui thlahni a ka ṭhiante'n Puia hmu tura min hruai hnu khan beidawng zetin kan haw leh ta kha ania.Khatah khan ka rilru a ti na em em a,hmasawn zel tur ang a in sawi si kha amah ah khan hmasawnna pakhat mah ka hmu lo a,kha khan ka thinlung a ti na zual takzet ani.

Zan khat room a ka awm laiin ka nu hi a rawn lut a, "Mate,khu in leng i nei ania," a tih chuan ka meng phawk khawp mai.

"Tu maw?" Mak ka ti khawp mai.

"I U Asangtea ṭhianpa Doctor kha," a tih leh phei chuan mak ti tawh tak ka ni, "Ṭha deuhin i kawm dawn ania," ka nu chuan a tih zawm zat.

Inhnuai ka thleng chuan sitting room ah a lo ṭhu a,min hmuh chuan ka u chuan min han in hmelhriat ṭhat tir lehnghal a,sawi tur chu vang rauh rauh tak ani.


"Mumbai chu a nuam em?" Amah zawk chu ṭawng chhuak hmasa ah a rawn ṭang a.

"Nuam ve tho animai,

"Hmanah Doctor ka zir lai hian ka awm ṭhin a keipawh,"

"E....anih chu....a nuam ve alawm tiraw mahse keichu ka hna avang hian ka zin reng zawk a,"

"I kal tawh dawn lo atia i u khan?" Tih pah chuan min rawn thlek deuh ha.

"Aw ,kal tawh lo ang helamah ka awm tawh ang," ka lo ti let nghal var a.Sawi mai tur a hre tawh lo nge kan ngawi zui leh ta reng.

"E...awi..thingpui ka va lum ang aw...." Kan ṭhut vang vang hnua ka tih chuan a lo nui suk a,ka tho zui nghal.

Choka a thingpui ka lum lai chuan sawi tur ka ngaihtuah lawk neuh neuh,a mi uap a na bawk si a,ngawi renga awm chi ani bawk si lo.Thingpui ka va chawi phei lai chuan min lo en kar a,zam ru tak ka ni.Chutah a han in chiah chu ka rilru ah ,"Mipa dang thingpui lum sak ka phal ami?" Puia'n hmana a th kha a rawn lang a,engpawh hi an ti leh ṭhin mah ila a tawpah hi chuan amah bawk hi ka hrechhuak leh ṭhin.

Zosangpuia pawh chu a leng ve reng a,tlangval lian ṭha tak hmai tlang hriam lam ani,a mitmeng chu a nelawm vak lo a,tattoo a nghawng ah leh banah a nei bawk a ,hmeichhia dang ah pawh a tlak nat viau ka ring mahse keimah ah erawh mipa pangngai ve mai ani.

Titi ho te te kan han sawi leh a,ani pawh hi mipa ṭawng tam vak chi a ang lo,sawi tur a hriat loh danah hian.A haw dawnah chuan a mawiah ka kawngkhar thleng ka va thlah ve a,ka u chuan ka hmuh dan te min lo zawt nghal zat.

"Aaa...u khatiang lam pawh kha a lang lo..."

"A fel ania aw,a rawn awm tirh aṭang khan kan inkawm nghal a.Mate,hmalam i pan ve zel angai ania..."

"Nia,ka pan ve mek zel alawm mahse maw u ka rilru leh tihtak zeta ka duh theih loh lakah chuan in ham buai loh law law ka duh a," ka ti chhuak sep sep a.

"Ka hrethiam lutuk che,khati khan zawi muangin in in kawm ang a,Puia pawhin mi ṭha tak i neih hi a duhsak ber che ania," a tih chuan ka thin phu a rawn rang leh zaih zaih,ka ngawi reng a ,chutah ka u bawk chuan ,"Keini chuan i tar ṭhak thlenga enkawl che pawh kan in huam lutuk mahse mipa pakhat vang ringawta i nun zawng zawng chhe tur chu ka phal bik lo a chuvangin nangpawhin zawi muangin i rilru kha siam la.Puia pawha ṭha ve zel ania,"

"Nia,hun te liam zung zung mahse rilru ah hian a liam ve si lo amaw,mahse i sawi ang khan u hmasawn chu ka tum lutuk ania aw,"

"I lo inthlahrung ang e,Sangtea pawh khan i chungchâng min zawh hmasak avang zawkin ania,ka sawi thuak thuak tawh tho a,ani pawh a hmanhmawh lo ang," a tih leh chuan ka riat nawi khawp mai.


A tukah chuan U Chami nen in te kan ti fai a,kan titi ve luam,kan chhungkua kan kim ṭhep ṭhawp lai ani bawk a chhuat mawlh mai hi a fai hman meuh lo.

"Ani,au in min hau...." U Alawma fapa naupang zâwk chuan ṭap chungin a rawn ti bai bai.

"Ngatinge Vanlalruatsanga chu kan hau ang mai mai...."

"Vawiin chu Bawihtea hi a nuam lo deuh nge a tlei lo riau," U Chami pawh chuan a lo ti ve bawk a.

"Ani.....thil in lo lei daih ....."fiah lo deuh a a tih chuan U Chami nen kan lo nui tawp,phakar ve reuh thei tak ani,dawrah kan in zui chhuak ta nge nge.


Kan veng dawr hnai ber a lo in khar avangin kawn veng lamah ka kal pui a,Bawihtea hi a ṭawng duh reuh sia ,a ṭawng fiah bawk si loa mi lawm pawh a hlawh thei khawp mai.

"Vansanglur...." Rawn ti lauh tu lam chu ka hawi Hruaipatea'n min lo nuih ṭhaw mai.

"Ehe ....ka lo haw hnuah ka la hmu miah lo che a," ka lo ti ve hlut,ani tak tak a Hruaipatea bik hi ka vawikhat hmuh lehna ani,Faka leh Chhana te , Dinsanga te ho nen chuan kan in hmu ve tawh a.

"Nia tunlai chu hna kan thawk ngawrh deuh a," a tih chuan min han en chik khawp a chutah ,"I hmel pawh a ṭha e...." Min han tih zawm zat a.

"Hmmm...i over...." Ka nui pah hak hak.

"Lo ngaikawi suh,i hmelṭha ka tih khan i kal hma aiin ka hmu ṭha che ka tihna,i kal hma te kha chuan mitthi kal thei ang velin i dâng a,i cher bawk si..." A tih zawm nghal zat.

"Awi,kan hna kha in maintain reng ngai ania,a tih zia tak tak ani"

"I hmu tawh em ?" Min tih leh chuan ka nui hmel chu a ral leh nghal riai riai.

"Hmu tawh e, vawikhat mahse (ka ngawi dat a) ka hmu duh tawh hrih lo,a awm dân a hmel engkim mai khan min ti na," ka tih chuan ,"A pawi em ani,damdawi pawh a tirah khan a ei duh mai lo a mahse a hnuah kha chuan a ei ta in ka hria.Kei lah hna ah ka buai sia ka hmu ngai meuh lo,hmu tura han kal lahin ngawi rengin kan ṭhu tlawk tlawk a,a nuam duh vak lo a," a tih leh chuan Bawihtea'n min lo tur sek sek tawh avangin nakinah kan in hmu dawn ania tiin kan in kal san a.

Bawihtea chuan chocolate a ngen a mahse a nu in pek vak a phal bawk si lo a thil dang thlang rawh tih dawn lahin thlang tur a hre bawk silo, chocolate chu rilru nuam lo deuhin ka lâksak ta ringawt,a u zawk ta tur pawh kan laksak ve nghal a,inah an in thik leh dawn bawk si.



Zanah chuan number hriat loh hnen aṭangin message ka dawng nawlh, "Hi" tih tawp hi ani,a dp a lang lo a mahse a whatsapp name aṭang chuan Doctor-a ngei kha ani in ka hria,"Zosangpuia" tih tawp hian a hming chu a dah a.

"Hello..."

"Keimah Zosangpuia,ka number hi lo save ve rawh aw..." Emoji pawh dah lem lo chuan a rawn ti a,ka save tur thu a ka hrilh hnuah ka mu zui ta daih a.

Zanah hian mumang neih hi ka hlau ṭhin a,Mumbai ka awm chhung khan zan zawn a Puia mumanga hmuh chang te ka nei ṭhin a,rilru a hrehawm duh em avangin mumang neih pawh huphurh tak te in ka huphurh ṭhin.

"Bawihte...awi....engtin nge kan tih dawn?" Ṭap chunga rawn ti tu chu U Chami ani in ka hria,ka tho nghal thuai a,U Alawma te room ka va luh chuan U Chami hi a lo ṭap deuh pur a,Bawihtea chu U Alawma'n a lo pawm bawk a,a hnar ah chuan tui ril eng eng emaw a lo chhuak nuaih bawk a chhuatah lah a luak a lo baw nuaih,ka unau dang te pawh an rawn lang har lo.Bawihtea chu a rawn luak leh bâwrh a,a hnârah chuan a rawn chhuak tel a a thawk a buai nghal der,U Chami a sirah a lo ṭap chel chul bawk a,a mangan thlak duh khawp mai.

"Tete,ka nu leh pa zuk ko vat rawh," ka tih chuan Tetea chu a chhuak nghal vut.

"Damdawiin kal vat angai anihkha,motor ka lo zuk la chhuak ang," U Asangtea pawh chuan a lo ti ve bawk a.

Ka nu leh pate pawh an rawn lang har lo,Bawihtea chu luak tur a lawi pawh a nei tawh lo.U Chami chu ka insiam pui zung zung a, "Ti vat vat rawh u,hei a awm dân hi a dik miah lo mai," ka nu in a tih chuan kan che buai nghal vek. Chutah a u zawk a lo harh ve a,U Cobtea'n a lo pawm nghal vat.

"Mate,va insiam rawh Asangtea nen khân an zui rawh u," ka pa in a tih chuan ka room ah ka va lut a,kawrlum ka va ha nghal sawi sawk.

Room ka chhuah rual chuan U Alawma te pawh step-ah an lo in pawm thla mek a,Tetea leh U Cobtea'n bag an lo khai ve bawk,Ruatsanga chuan min ngen a tum deuh a mahse U Cobtea leh Tetea'n an thlem fe hnuah a lungawi ve ta a.

Damdawiin lamah chuan chak thei ang berin kan tlan chho a,kawng lakah phei chuan meng pawh a meng peih tawh lo nurse ho chuan min lo buaipui nghal sawk sawk a,doctor kan han phone lawk an tih avangin Bawihtea chu khumah an lo mut bam a.

Minute tam a ral hman lo,Zosangpuia chu hmanhmawh em em in a rawn tlan lut a,Bawihtea bulah chuan a rawn kal nghal vat a,a lungphu te a ngaithla a,a mit te chu a keu sak a,a pum te chu a han hmeh sak a.

"Luak danna khan lo jection phawt teh u," Nurse pakhat bulah chuan a ti a,an hmanhmawh hlawm khawp mai.

"A pum lam anih hi,admit in ngai ang, Gastroenteritis vang anih hmel," a tih chuan a hlauhawm êm tih te kan lo zawt nghal thuai a.

"Hlauhawm loh e,a thil ei ngeih loh deuh a nei ani maithei.Heihi naupang ah hian a nasa a,ti hian treatment te a kal ang a,a zia mai ang," a tih chuan kan lo thaw huai.

"Mate,naktukah hna thilah zin ngei ngei ka ngai bawk si a,I U Chami hi riah pui mai ta che," U Alawma'n a tih chuan ka lo aw nghal sawk sawk .


U Asangtea leh Zosangpuia chu an han in be leh luam a,keini erawh mutna vel phah in kan lo buai khawp mai.Bawihtea chu luak danna an jection avangin a luak tawh em lo a,a muhil siai siai.Ka u te pawhin min let san a,U Chami nen chuan kan mut pawh a chhuak lo.

"Mamawh in neih chuan min lo be dawn ania," ka mitah tak en chungi'n Zosangpuia chuan a ti a, "Tehreng mai,ka lo hrilh nghal ang che," ka tih chuan a lu a bu nghut a,a chhuak ve nghal .

U Chami chuan zingah chuan chawlh a dil a,an lo rem ti ve mai.Kan khaw damdawi in hi khaw ṭhenawm ho pawh an rawn kal ṭhin avângin a lun viau a,tunah pawh naupang ward chu khum ruak pakhat chiah a awm.Zosangpuia chuan zing lamah min rawn tlawh leh a,Bawihtea a luak leh em tih te min zawt a vawikhat a luah leh thu te,nurse in a jection leh thu te kan hrilh a,sawi tur em em hi a hre ngai lo.



"A thisen hi kan test ve hrim hrim a ngai a,test lawk ang aw," nurse in a rawn tih chuan Bawihtea chuan a lo hlau khawp a,a mên deuh par.



"A na deuh dawn a,lak hnem a ngai deuh dawn a ,lo man deuh mai rawh u," Nurse in a tih chuan Bawihtea chu a a nu nen kan vuan bet nghal thuai a.Bawihtea chu a ṭap tuarh tuarh a,hmuh pawh a hrehawm khawp mai,Nurse lah chuan vawihnih ngawt a vit nawn a,naupang vein hi chu a te bawk si a,hmuh fuh hi a har ve deuh bawk ani.


Nurse in an chiu zawh chuan a nu nen kan han thlem veleh a,a hnuah chuan a muhil ve ta nge nge.Ka nu leh pa te pawh an rawn lang har lo, "Mate,in lamah i thawmhnaw hak thlak tur te han la la,hei kan awm lai hian," ka nu chuan a ti zung zung a,keipawh ka tho tharh.


Step ka chhuk laia min tawk zawnga rawn chho vang chuan ka ke pen a tawp chat a,ngawi rengin ka lo en a.Sweatshirt a hma a ka pêk ngei mai kha a ha in,beanie dum a rawn khum bawk a mask a vuah chung pawn ka hai lo,ka hai mawlh lo.Min hmu chiah chu ani pawh a ding ve chawt ,"Eng ....nge... i tih dawn?" Ka ti bah deuh niah,ka dang lah chu a la awk em em a.

"Damdawi ka la dawn...."a tih ri chu zawi sep sawp tak ani,ka mitah pawh min en ngam lo.

Chutah kal leh mai a tum chuan ,"Chawngthanpui....gate bulah ka lo nghak ang che aw,in be lawk ang," ka tih chuan a ding leh dat a, "Mate......" Tih chiah a sawi hman ,"I haw dawn ami?" Zosangpuia'n ka bula rawn din paha a tih chuan Puia chuan a melh ve zawk a chutah ,"Ka kal ang e...." Tih pah chuan min rawn kal pel thuak a engmah pawh ka sawi hman tawh lo.

"Aw...haw zuai ang," Puia kalna lam en zui vawng vawng chunga ka tih chuan ,"Ka lo thlah ang che,rem i tih chuan..." Ka bula min chuan a tih zawm zat.

"Ih....ka ṭhianpa kha...." Ka ti ringawt,a hrethiam aniang a lo khi ve suk a.

"Lo kal rawh,coffee tal ka lo lei sak ang che," a tih tlat avang chuan rilru nuam lo deuhin muangchangin ka zui a.


Damdawiin kawta canteen ah chuan min luh pui a,coffee pahnih chu a rawn chawi phei a, hmanhmawh ru tak ka ni,Puia mawlh mai kha ka hmu khât bawk si a,a haw hman mawlh ka hlau.

"Zaninah i riah pui leh dawn em?" Min tih chuan ,"Riah pui ang,U Chami kha ka riah pui ve loh chuan a chau lutuk ang," ka lo ti ve nghal zat.

"Nichin ami kha ami?" A tih chuan amah chu ka en vat a,ka mitah min lo en reng.

"Aw....." Ka tih ri chu a zawi ṭha khawp mai.

"Puih i duh chuan eng kawngah pawh ka pui thei reng che ania," ka lo nui ringawt a,sawi tur mai hi ka hre ṭhin lo ani.

"Min lo be hreh lo la...." A tih leh chuan ,"Tehreng mai ," ka ti ve sep a,ka tho nghal tharh ani pawh a tho ve nghal a,counter lamah pawisa te a pek hnu chuan ngawi rengin kan zui chhuak.

"Ka lawm e aw...." Nui sang a ka tih chuan a lo khi leh suk ,"Ka tih tur ve reng anih kha ," a tih zawh rual chuan kawngkhar aṭanga Puia rawn chhuak chiah ka hmu ve nghal a.

"Zosangpui....ah Sangte a ka kal dawn," tih pah chuan hmanhmawh zetin gate lam chu ka pan nghal sawk sawk a.

Gate pawn ka thleng chuan Puia pawh a rawn thleng har lo, "Chawngthanpui....." A lo hawi vat a,ka kal hnaih nghal thuai.

"In be lawk ang ..."

"Sawi tur ka nei lo Mate...."

"Aih keiman ka nei alawm....mawh rei lo tê tal..."

"Mi in an hmu che ang e," min tih te chuan thinrim tak ka ni.

"Pawi ka ti hleinem,mawh khawngaihin in be lawk ang," a lo tho chhuak hak,chutah "Lo kal rawh ," tih leh damdawiin gate piah a hmun fal deuhah chuan min phei pui a.

"I dam ṭha em?" Amah en ran chunga ka tih chuan a lo a lo bu nghat a.

"Pui.....bul kan...." Ka sawi zo hman lo ,"Nichin a doctor kha ...in va in hmeh ve..." A nui pah hak.


Ka lu ka lo thing nar nar a,"Pui,nangmah nen hian bul kan ṭan leh thei lo em ni?"

"Aih ....." Ti a min chhanna chuan min ti beidawng zual tak zet. "I unaupa,i ṭhian ṭha tak angin min en tawh zawk rawh,"a tih zawm zat.

"Ka ngai che Chawngthanpui.....ka ngai ngawih ngawih che...." Amah chu ka va kuah thlawp,mi an awm leh awm loh pawh ka pawi sa hek lo.A lo ṭang ṭung a,mahse ka thlah duh mai bik lo.A kut in hum ruh ṭawlh ṭawlh te chu ka hmuh hmaih lo,chutah a thin lah chu a phu ri dawt dawt.

"Khatianga awm tur kha kan ni tawh lo,kal tawh rawh keipawh ka kal dawn," tih leh in lak hran a rual a,ngawi rengin min kalsan nghal hmawk hmawk.A hnung lam chu ka thlir reng a,"Ka thinlung hian a hlat thei si lo che anih hi,i hmun ruak lo zau zia hi aw..." Ka ti chhuak sep a,helmet pawh khum lem lo in chak fahran hian a tlanchhuak a,vawikhat pawh a rawn hawi let lo.

Ka mit aṭangin mittui a lo luang leh ngiai ngiai a,han kal mai nachang pawh ka hre lo pen hnih vel ka pen tihah chuan ban tha chak zet hian a lamah min pawt hrawk a,harh chiang tak ka ni "I beng a chhet ami?" Motor khalh tu lah chuan pawr fe in a lo ti ve bawk a,Zosangpuia chuan rum fe hian motor khalh tu chu a lo melh a.



"I ṭha em?" Ka mit a min en ran paha a tih chuan ka mittui chu a rawn luang leh ngiai ngiai a,muangchangin a rawn hru a.

"Ka thlah ang che," fiah ṭha zeta a tih chuan zui mai nachang pawh ka hre lo,chutah ka kut ah a rawn kai lawk a,min kal pui nghal dawr dawr,hnial thei ka awm lo reng reng.

A motor a lakchhuah lai chuan a sirah ngawi rengin ka lo ding a,tinge le beidawn san mai hi har ka tih em em le?.Amah ka hmuh apiangin beiseina ka leh ṭhin a mahse chu chuan a hma aia beidawnna min thlen leh si.

Kawngkhar chu min rawn hawn sak a,kan chheh vela mite chuan min en duh em em lehnghal a,ka ṭhu thla hnawk a,ṭap lo tura ka insum nasat zia mai chu aw.....

A tlanchhuak mai bik lo kan han ngawi dun vang vang a.Chutah ,"Hahdam deuhin awm rawh aw," a rawn ti chhuak sup,ka lu ka lo bu nghat nghat a

Minute 5 vel kan han ṭhut vang vang hnuah chuan ,"Kal tawh rawh...." Ka ti chhuak sep a,ani pawhin engmah a sawi tawh lo ,a in khalh chhuak ve nghal a.Ngawi rengin kan ṭhu dun a,a ding dat a,ka harhchhuak leh zawk kan in kawt kan lo thleng reng tawh.

"Ka lawm e aw...." Ka ti chhuak sep a .

"Mamawhna min neih chuan ka awm reng ka tih kha aw..." Chhuah mai ka tum chuan a rawn ti leh a,a lam ka hawi vat kan mit chu a in tawng fuh chat a.Han sawi mai tur ka hre lo,ka lu ka lo bu nghat a,rang takin ka chhuak nghal.


Inchhung ka luh chuan U Cobtea'n chanchin te min lo zawt luam a,ka hrilh zung zung hnuah inchung lamah ka chho a.Kan khua a ka awm leh meuh chuan natna ngai bawk a rawn let leh a,a tello nun dan ka thiam tawh viau emaw ka tih laiin ka lo la thiam hauh lo anih hi.

Khuma ngei renga ka ṭhu lai chuan ka phone ri hian min ti harh zawk a,Timo a lo ni.

"Hello,Vs hei in khua ka rawn thleng ṭep,ka rawn kawi lawk ang," a rawn ti lang lang a.

"Lo kal ngei ngei ang che,inah ka awm alâwm "

"Hei khawchhung ka la rawn lut lo deuh,ka thleng hunah ka lo bia ang che ," a rawn tih chuan keipawh ka tho tharh a,in te chu ka han ti fel leh thuak thuak a ,rilru la peng tu atan pawh a ṭha ve hrim hrim.

Timo pawh a rawn thleng har lo,kan han in hmu leh chu kan ri deuh hlut,thingpui te ka han lum sak leh a,fiamthu a duh bawk si a kan han nui leh bâwk bâwk ṭhin.

"I rawn chhuk tawh dawn si lo a,in hmuh pawh a khat tawh dawn hle mai," a tih chuan ,"Nia,i la rawn zin leh dawn nia,nakinah mamawh te ka neih chuan ka rawn chah nasa dawn che ania aw," a lo nui hak hak.

"E tehreng mai....Nangpawh lo in enkawl ṭha zel rawh , ka'n kal ang e,a tlai hma in,"a sana en zeuh chunga a tih chuan U Cobtea hi inchung aṭangin a rawn chhuk thla ve mek a , "E i lo kal animaw,chaw ei ve nghal rawh aw," a lo ti ve luam a.

"Aih ei lo ang,hei ka kal lehnghal a.Hmanni khan ka rawn lut hman si lo a,ka rawn tlawh lawk anih hi," a tih chuan a ding nghal uai,pawn thleng te chu ka va thlah ve a.

Inchhung ka luh chuan U Cobtea chu Puia ka hmuh thu te ka hrilh veleh luam a, "Mate,beisei tawh lo zawk rawh.Hman ni khan an inah ka va kal a,ka va kawm a.Pathian thu te ka va hrilh luam a,hma pawh a sawn ve hret hret chuan ka hria mahse i hriat atana ka duh chu a beisei awm tawh loh,nangpawhin beiseina nei tawh suh," ka u chuan a ti charh charh a.

"Beiseina tlem te hi ka la nei ve a,mahse ani telin he ka beiseina neih ve châng châng hi a bo ve mek anih hi,"

"Beiseina i neih tam pauh leh i beidawnna a zual zel ang chuvângin theihnghilh rawh chu ka ti lo ang che mahse a lakah beiseina nei tawh suh," U Cobtea meuhin a ti ve ta chu ania,ka tan chuan beisei tur engmah a awm tawh lo.

Hun a liam a,Tetea leh U Cobtea pawh an awmna lamah an han liam leh a,Bawihtea pawhin dam takin damdawiin a chhuah san tawh a,a khat tawkin Zosangpuia hian min rawn be leh ṭhin a mahse rilru erawh la peng lo tak ani.Puia pawh khami ni damdawiin-a ka hmuh bak kha ka hmu leh tawh lo.


Chawlhni zinga inkhawm tura ka insiam mawlh mawlh laiin ka ṭhiante thawm ka hria a,ka room an rawn lut nghal zat."Mate,khawi lipstick ka lo inhnawih," Rini chuan a rawn ti lut nghal zat.

"Mate,doctor chu eng nge chanchin?" Mami ani.

"Aaaa engmah pawh a awm lo,in be satliah...." Ka tih chuan an lo eh dual.

"Tikhan lo ti suh u,chutiang eh na tur engmah a awm lo," ka lo ti ve pang pang.

"A awm ve chiang e,i rilru kha pek han tum la.Vawiin te hian a lo inkhawm agem le?" An han tih zawm zat a.Kan kum a naupang chhe zâwk zâwk tawh bawk si lo a,mahse kan che zia hi chu la naupang thei tak ani.


Biakin kan thleng chuan kan tlai deuh bawk nen a hmalam awl laiah chuan usher ho chuan min han ṭhut darh tir a,kan chhehvel ami te chuan mi hi an en duh ṭhin riau hian ka hria.

Mak tak maiin thusawi tu lah chuan Josua bung 1 chang 9, "Thu ka pe che a ni lâwm ni? Chak tak leh huai takin awm rawh; hlau suh la, zâm hek suh; LALPA i Pathian chu i kalna apiangan i hnênah a awm zêl dâwn alâwm,” tih hmang chuan sermon a rawn nei a, "Mihring te hian hun harsa tak kan tawk ṭhin a,kan zam chhe leh mai ṭhin mahse maw tlai ngai lo Pathian ,kan Pathian nung hi engtik lai pawhin kan bulah a awm reng a,hlauhna leh lungngaihna ruamah pawh awm mah ila Lalpa kan Pathian hian min thlahthlam ngai reng reng lo,kan bulah a awm tlat ṭhin," ti a thusawi tu in a sawi chuan keima tan a sawi emaw tih mai tur ani.

"Sam 37 chang 5, I awm dân tûr chu LALPA chungah nghat la, Amah chu ring la, aman a ti vek ang,tih anih ang khan kan awm dan tur zawng zawng te hi Pathian bulah hian thlen ila,tunah chhanna hmu nghal lo mah ila maw Pathian hian a hre reng a,a hun takah chhana min pe leh ṭhin mahse Pathian min chhan dan hi mihring te hian hriatthiam loh chang kan ngah em em a,kan duh dan ang a min chhan loh chang te hian kan thin a ur ṭhin mahse ka unau duhtak Pathian hian i nunah kha aia ṭha zawk,i dilna aia ṭha zawk pek che a tum tih hria la,Pathian min hruaina zawng zawng te kha han ngaihtuah let la vui thei kan awm hauh lo ania," a tih leh te chuan ka lo ip chawih chawih a,mahni leh mahni ka in hre ru rauh rauh a,ka harh kawk kawk nimai in ka hria.

Inkhawm kan ban te chuan ka ṭhiante ho an han titi barh barh lai te chuan sawi tur pawh ka hre ve lo , "Mate,in inah noodles chhum ila," an tih chuan phur vak lo mah ila ka ti lang duh lem lo.

"Chali dawrah kan lei mai dawn ami?,midang hi chu an nei chikim lo thei lutuk a," Nupuii'n a tih chuan kan lo pawm tlang hlawm khawp mai.

Biakin kawtah chuan U Asangtea te ṭhianho hi an lo ding ṭhap a,Zosangpuia lah chuan min han en chiang mai mai khawp a,ka melh zawk bak chu ka en rei duh lo, "Mate,thingpui tui tawk lo lum rawh aw,hei ka ṭhiante ho nen hian kan lo in ang," a tih chuan Mami chuan min lo kheuh zeuh.

"I u hi a zei riau..." An nui pah kar kar.

"A mi uap a na thei lutuk a,lo kal lo mahse pawi ka ti lo asin le," ka ti zui niah niah.


Noodles te chhum a kan rik laih laih laiin ka u te pawh an rawn thleng a,an thawm a ṭha leh tawh khawp mai.Thingpui chu ka lum fel diam tawh a,ka ṭhiante chuan "Va sem phawt la,i sem zawhah kan in dawn ania," an tih deuh tlat avangin tray ah chuan thingpui chu ka va chawi phei a,chutah ka u te ṭhutna ka thleng phei hman ṭep "Kha......."an lo ti rual dual, chhuatah chuan ka tlu thlawp a,thingpui no chu pathum vel a keh a,a sa ṭha bawk si .Zosangpuia chuan min rawn kaitho nghal thuai a,"Asangte,first aid a awm em?" A ti nghal zung zung,na ka tihna ai mahin ka zahna a zual a,ka ṭhiante ho lah kil khatah an lo nui tet tet,Lalrini lah chuan kutzungpui min lo hmuh zeuh zeuh.

Ka kut chu a khai kang a,rin ai takin a thi duh lehnghal ka u in first aid box a rawn lâk chuan lapua in a han hru thuak thuak a,damdawi eng eng emaw a hnawih bawk a,a tuam nghal sawk sawk,doctor nge nge hnehsawh tak ani.

Ka ṭhiante ho chuan chhuata ka thil tih buak te chu an han ti fai zung zung a,Bawihtea motor lem ka lo pal hi ania,engtin nge ka hmuh loh theih zawk ni.

"Thingpui khan a buak hnem hman che em?" Min tih chuan ka lu ka thing sawk sawk, ka kut lah chu ala vuan reng a chutah ka harh chhuak nghal zawk ka la sawn nghal vat a,ka zak bawk si hrehawm duh tak ani.

"Naktukah damdawiinah rawn kal la,kan dressing ṭha dawn ania," a ti thum leh dut mai, "Aaaaa....a ngai tawh lo ang ....." Ka ti bah deuh niah.

Ka ṭhiante bul ka va thleng chuan an lo nui deuh ṭhaw a, "Ka han inthlak lawk,ka ban nuaih mai," tih pah chuan inchung lamah ka tlan chho nghal hlawp hlawp.

Ka han in sil nghal thuak thuak a,ka han in enchiang chu ka khup pawh a lo duk chur a,a dang chu ka kut tih loh hliam em em ka nei hman lo.Inhnuai ka chhuk thlak leh chuan ka nu ṭawng ri barh barh ka hre nghal zat.

"Chhuarah no hman loh a tam khi han la rawh," min hmuh rualin a lo ti nghal zat.

Thingpui te chu ka han lum ṭha leh a,U Chami'n a va sem tawh thung ,ka sem ngam tawh tlat lo ani.

"Naktuk chu dawrah rawn leng ula," Nupuii'n a tih chuan ,"Matei chu damdawiin lamah a kal dawn," Mami'n a lo ti ve zat.

"Kal pawh a ngai tawh lo ang,hetiang te chu a dam leh mai ang,"

"Dam mai lo ang,glass them te a lût thei,a thi duh bawk si ,kan lo kal pui ang che," an la ti tak ang ṭalh a,min sawi rem chu tum ngar ngar tak an ni.

A tuk tukṭhuan ei khamah chuan Lalrini leh Mami chuan min rawn sawm ta nge nge,sâwm tak te a min sawm tlat avangin kan han in zui chhuak leh ta nge nge.Pawn kan chhuak chiah tih ah ka phone a rawn ri ve nghal zat , ka'n en nak chuan Zosangpuia tih hi a lo lang kalh ka ṭhiante lah chu an lo khi ṭhaw a.

"Hello..." Ka tih ri chu zawi sep sawp tak ani.

"Sanglur hei khaw ṭhenawmah meeting kan nei dawn a,ka kal ṭep a kan neih hmain lo kal la ka lo dressing ṭha ang," a rawn ti thum dut dut a,min koh dan ber kher lah chu ,tumahin min ko ngai lo asin le.


"Aaaa....nia...aw ...." Ka ti bah deuh nawk nawk,han chhang mai dan tur kha ka hre tawh tlat lo.

"Ka lo nghak dawn che nia," tih leh phone dah a rual a,ka phawk angreng zawk khawp mai.


"Eng nge a sawi a?" An tih chuan ka lo ner nang a, "Sanglur min rawn ti ringawt,ka u khan min koh dan tur vel kha a hrilh ve vek sia," ka tih chuan ka ṭhiante chu an lo nui kar kar a,hetiang ber kher hi chuan tumahin min la ko ngai lo ani.

Ka ṭhiante hi ka fak ve thlawt ani,Puia avanga ka rilru nat em em lai khan min en liam tawp a,ka biak ngai loh chang zawng zawng pawh khan min haw ngai lo a,ka tan ṭawngṭai an ṭhulh ngai lo .Tunah pawh Puia ka la theihnghilh lo tih an hria mahse ka hma khua an ngai em em a,an ṭhiante ve ve mah ni ila kan tan khawvelah beisei tur a awm tawh lo hi an hrechiang a hemi avang pawha mipa dang min sawi hmuh ṭhin te pawh an ni.Ka rawn haw tirh pawh khan Puia hi hmu ve ngei ngei turin min ti anih kha,khatah pawh khan an ṭhiannu hi min hrechiang em a,amah a beiseina nei tawh lo tura min tih avang tih pawh ka hria.

Damdawiin lamah lah chuan min han kal pui tak ṭalh a, Mami'n Nupuii dawrah min lo nghak a,Lalrini nen kan han in phur chho a,an lo buai hlawm khawp mai Zosangpuia chu a lo ṭhu run a min hmuh veleh kan lam a rawn pan ve nghal vat.

"Keiman ka dressing sak ang che," a tih chuan a hnungah kan zui det det a,a thawk tu ṭhenkhat chuan min lo en duh khawp mai.

"Sir,ka lo ti dâwn ami?" Nurse pakhatin a rawn tih chuan ,"Keiman kan tih sak," Zosangpuia chuan a ti thum dut a, Lalrini'n min lo sik zeuh.

"Dressing ngei ngei angai hetiang hi chu, damdawi ka hnawih sak che hi i hawn nghal ang a,ni 2 hnuah i hnawih dawn ania," ka kut tuam ṭhat mawlh mawlh pah chuan a ti a,a kak chu rinai takin a lo thuk a min han hmuh tir chuan ka rap reuh khawp mai.A kut pawh a dam khawp mai,uluk taka a tuam lai chu tum lo deuhin ka lo en vang vang a,ka rawn hawi chho thut nen chuan kan mit a in tawng chiang khawp mai,rei lo tê ka han in melh vang vang a,ka mit ka la sawn nghal vat.



"Coffee ka treat ang che aw...." Pawn lama kan in zui chhuah laia ka tih chuan a lo khi ve suk.

"Nidangah min treat dawn ania,ka kal a hun ṭep a," a sana en zeuh paha a tih chuan ka lo bu ve nghat nghat.

"Anihchuan....ih...kan kal mai ang aw...." Ka ti ban deuh charh.

"Awle,lo in enkawl ṭha rawh aw Sanglur..." A tih leh chuan kal mai ka tum tawh chu ka ding leh rih ,"Matei...." Ka ti zeuh a a lo khi leh suk.

"Awle,lo in enkawl ṭha rawh aw Mate....." An ti nawn leh sup a,mi lah chu a ti lai em em a.

"Awle....Zosangpui,ka lawm e aw...." Ka nuih let ve sak a,kan kal vang vang.

"Awi Vansanglur,a va han pa mai mai tak," Lalrini lah chuan scooty chuan laiin a ti deuh reng a.

Nupuii dawr kan thlen chuan Lalrini chuan an sawi leh tak tak a,tlemin an sawi uar leh deuh hret bawk a.

"Nurse in rawn tuam sak a tum pawhin ama tuam ngei kha a duh bawk a,Sanglur a ti nghut a...." A tih chuan a nui zui uar uar.

"Mate,eng nge i ngaihdan?" Min tih chuan ,"Ngaihdan pawh ka nei lo,khatiang in ngaihtuah ang kha chu keichuan ka ngaihtuah miah lo,ka rilru hi a in peih tak tak thei lo," ka tih chuan an hlim hmel pawh a ral leh riai riai.

"Mate,i tan vek anih hi aw....hman ni a hmu tura kan duh em em chhan che pawh kha maw beisei tur a awm tawh lo tih kha hria la kan tih avang ania," Nupuii ani.

"Ka hrethiam lutuk alawm mahse maw kan mi hmangaih leh duh ngawih ngawih te hi theihnghilh an lo har anih hi,beiseina tlem ka thinlung kil khata la awm hi a ral thei si lo," hnuk ulh ṭeuhin ka ti a ,kan ngawi vang vang hlawm a.

"Ani pawhin i hlim reng a duh ania,engkim vang khan a in thiam thei ngai lo a.Mumbai i awm chhung te khan i chanchin hi min zâwt leh ṭhin a,ka hrilh duh lo che anihkha," Lalrini'n a tih leh chuan ka thinlung a na thar vawng vawng.


"Hman ni ah damdawi a la tur Bawihtea damdawiin awm lai khan ka hmu bawk a ," ka tih chuan ka hmuh dan zawng zawng ka sawi a.

"Ka van khawngaih dun tak cheu em...." An han ti vang vang a,an mittui an hru leh zeuh zeuh ṭhin.

Chhunah te chuan thingpui dawr ami kan chah a,kan han ei leh a rilru tawt zualpui a reh leh a, ṭhiante bulah ka awm bawk nen haw dawnah meuh chuan rilru pawh a hlim leh var tawh.


Hun a kal a,Zosangpuia nen pawh kan in kawm nel ve tawh viau a mahse ngaihzawng ang erawhin ani lo thung.Zanah a rawn leng zeuh zeuh a kei erawh ka chhuak khat viau,inah ka tawm a a chang leh U Alawma te in sak ah ka zuk kal leh a,ka hun hman dan chu nitin mai hian a ngai put ani.


Puia erawh a chanchin ka hre khat khawp mai,khaw khata awm reng si in damdawiin a ka hmuh bak kha ka hmu leh ta miah lo a, ka ṭhiante leh chhungte'n a chanchin an sawi ngai lo a,rilru ah erawh a la awm ve reng.

Zosangpuia rawn len dawn zan chuan ka nu leh pa te ka pu te inah an leng a, Bawihtea te unau in an zui ve bawk,ka u te nupa leh U Asangtea te nen chauh chuan kan awm a,sitting room a kan ṭhut ṭhap laiin doorbell a rawn ri ral ral a,ka lo chhawn nghal vat.

"E,Sangte lo kal rawh..." U Asangtea chuan a lo ti nghal var a,Zosangpuia chu ka bulah a rawn ṭhut nghal chat.

"Ka rei em?,dam lo emergency an rawn lut leh thut a,ka en leh lawk a," a tih chuan ,"Rei lo e,a la hma tho alawm," ka lo ti nghal var a.

"Sangte,Aizawl lamah chuan engtikah nge i awm leh ang?" U Asangtea ani.

"Ka hre lo le,hei ka buai pui mek a,ka nu hi amah chauhin a khawsa bawk sia mahni in ngei aṭanga awmpui ka duh a,"

"Khawi khua ah nge i awm ṭhin?" Ka lo tih chuan ,"Kolasib lamah a nuam lutuk," a lo ti ve nghal vat.

"Tikhan lo inkawm ru,inchung lamah hna ka hâwn ṭeuh a,ka han ti lawk ang," tih leh U Asangtea chu thawh a rual a,U Alawma te nupa lah inchung lamah an chho daih bawk si,Zosangpuia nen chauh chuan kan ṭhu dun ta ran a.

Sawi tur lah hi a vang thei bawk si,thingpui lum sak nan a la hma ka ti ve laklawh bawk nen rei vak lo chu kan han ṭhu ngawi leh reng a amah zawk chu ṭawng chhuak hmasa ah a rawn ṭang leh a,"I mut a chhuak tawh em?" Thum deuh dut a a tih chuan ,"Chhuak lo e,zan mut hi chu ka harsat ang reng a,"


" Thingpui ka va lum ang aw," ka tih zawm zat,thawh mai ka tum chuan ,"A la hma alawm," a lo ti leh vat.

"Aizawl lamah chuan engtikah nge i awm theih i rin?" Amah en ha paha ka tih chuan ,"Ka hre lo le, lehkha pawimawh tur ang kha chu ka submit fel tawh a,mahse a rei ve duh lutuk a.In khua ah la awm rei vak hman lo mah ila ka awm tawhna ah chuan khaw nuam ber pawl ani ang," a ti ve luam.

"I nu chu hman ni khan U Asangtea khan a sawi a,a zia lo emai,"

"Nia,ka nau te nupa kha an lo awm hlauh a nilo se kan chhan hman lo ang,"


"Ti daih ila Tattoo i van ngah em em...." Ka tih chuan a lo nui hak.

"Neih ka chakna a rei tawh a ,doctor zir lai kha chuan a rem bawk si lo a,ka hnungah pawh ka nei asin," a tih chuan ka deuh hô hian ka en a.

Chutah a kawr a phelh ta sawk sawk a,a hnunga tattoo chu min en tir a vântirhkoh thla lem lian zat hi ani,mahse a mawi reuh lutuk.

"A na em?" Ka tih chuan a lo nui suk,a hnung chu inthlahrung deuh hian ka khawih pah bawk a,a lian ṭha ve em ani.

"Na e mahse ngai ah ka nei tawh," a ti zo chiah ti ah chuan U Chami a rawn lang hlawl phu nasa dun tak kan ni.

"Awi......" A rawn ti hluai,a han in hup chawt chawt a.

"Engmah kan ti lo ania," ka lo ti sawk sawk,a nui tet tet a.

Zosangpuia ka va en chuan a kawr a lo ha ṭha diam tawh a,U Chami ani hlauh zawk a midang daih te an ni ang tih hlauhawm tak ani.

"I U Alawma'n thingpui a duh a rawn lum sak ka tum a," a tih chuan ka tho ve nghal vat a,"Khawi ka lo lum ang keiman,thingpui pawh kan la in lo," tih leh choka lam pan ka rual a,U Chami pawh chuan min rawn zui lut ve nghal a.

"Eng nge in lo tih a?" Tih pah chuan a nui leh kar kar.

"A tattoo min hmuh tir a,a lian rapthlak,"

"Amak reuh e,a hmel ṭha sia a pa lian bawk sia ,doctor lai te ani ve a Tattoo han neih tlat," U Chami bawk chuan a ti leh a ,"Nia keipawhin mak ka ti ve deuh..."

"Mahse Mate,Tattoo hi chu a addict ve theih alawm,kan ṭhiannu pasal pawhin a nei nual a,na viau mahse an nei leh zel tho," a tih chu a dik hmel viau,a hnung ami phei kha chu a lian ṭha bawk si.


Thingpui so hnu chuan U Chami'n U Alawma in tur an room lamah a keng chhoh sak a,Zosangpuia pawh thingpui ka chawi phei lai chuan ngawi rengin a lo ṭhu a chiang fahran hian min han en bawk a.

"Thil hrilh tur che ka nei a ," a tih chuan a lam ka hawi thuai a,thingpui a han in leh te te chutah ,"Ka...." A sawi zo hman lo ka nu te leng an rawn haw a,Zosangpuia pawh chu an rawn be ve nghal luam.

"Nakinah ka hrilh mai ang che," zawi te hian a ti sup a,ka nu te biakina pawh ṭha takin a chhâng a,leng pawh a leng rei ve reuh khawp mai.

A haw dawnah chuan kawngkhar thleng ka va thlah a,"I thil sawi tur kha i sawi hman ta si lo a,tunah min hrilh mai la," amah chu ka melh chho deuh ha.

"Nakinah zan dangah ni rawh se," tih pah chuan ka biang a rawn piai zeuh a in hmeh lo ka lo ti viau,a la khi suk suk lehnghal a.



Zanah chuan inchung sangah arsi thlir turin ka chho a.Mahse arsi an lang meuh lo,van laizawlah chuan thla chu chhûm hian a hliah ruih a,khua pawh a dur ṭha khawp mai.Ka rilru ka kawm a,mi hian move on an tih hi eng tak nge le? An hmangaih ngawih ngawih an ṭhen tak te kha an theihnghilh hmak nge?.Tunah pawh hian nikhat lek pawh amah ngaihtuah loh chang ka nei ngai lo a,ka drawer a box pakhat phei hi chu a thil min lei sak ho dah nan ka hmang a,ka hawng ngam ngai lo kha ania.Hlimna te neiin rilru pawh han hlim ve viau dawn ṭhin mahse a tawpah chuan amah bawk ka ngaihtuah leh a,move on hi ka thei ve lo anih ka ring.


Nikhat Bawihtea nen Inrinni zingah kan bazar dun a,lei tur ka nu in min ziah chhuah sak dul a kan bawr reuh khawp mai.

"Ani ...ani,saw dawidawiin awm laia min sawt sawt ṭhin kha ka hmu,"Bawihtea'n fiah vak loa a koh na lam ka hmuh chuan Zosangpuia lo ni rengin,eng eng emaw a lo in khai bawr ve ṭeuh a,thei zuartu pitarte chu pawisa a pek hnuah a rawn hawi chhuak a min hmuh chuan a rawn khi ve suk mai.Bawihtea nen kan lam pan chuan a rawn kal a ,"In va tho hma ve," a rawn tih chuan ,"Nangpawh..." Ka lo ti ve nghal var a.

"Inrinni ah hi chuan zing karah ka bazar ṭhin a.Kha naupang fel chu ava tlangval ve a," tih pah chuan Bawihtea lu chu a rawn chul sak a chutah a Apple khai lai chu a pum hnih a rawn phawrh chhuak a,Bawihtea chuan a tirah chuan a lak hreh hmel khawp a mahse la tura ka hrilh chuan a ban ve ta vat a, "A lawm e....." Fiah lo taka a tih chuan kan lo nui hak hak.

"Thingpui in ila...." A tih chuan ka lo hnial bik lo,bazar chhungah chuan kan han in zui lut leh a, Bawihtea chu a kai ve bawk si a,bazar nu ho a phawk zual deuh phei chuan "Awi chhungkua in ang diah diah lutuk" nui har har chungin an lo ti ve bawk a,keini erawh kan lo nui mai mai .


Eitur te chu a han chah zung zung a,Bawihtea lah chuan a lo nel sa bawk nen a be luam a an han in be vel chu pafa te pawh an ang ve tak tak a,a sirah ka lo nui ka lo nui a.

Thingpui dawr aṭanga kan in zui chhuah chuan ,"Scooty dahna thleng ka lo ah sak ang che," a tih deuh tlat avangin ka bazar bag lian lutuk chu a an hak leh a,hnial ve sateh mah ila awmzia a awm lo chutah ,"Scooty kan keng lo a," ka tih chuan a lo hawi vut.

"I in ak rit bawk si,ka lo thlah ang che u," a tih zawm zat,pawi ka tih em em loh avangin keipawhin ka hnial duh ta lo a.

A motor a kan thlen chuan bag chu motor seat hnungah chuan rem deuh hian a rêm ât a,seat hma kawngkhar hawn mai ka tum chu min lo hawn khalh vut,Bawihtea pawm chung chuan ka ṭhu lut ve nghal thuai a.

"Ka transfer order kha an rawn approve tawh a,thla lehah chuan Aizawl ah ka awm tawh ang," a tih chuan a lam ka hawi vat a,kan mit a in tawng chiang leh khawp mai.

"I va ngaihawm dawn ve...." Ka nuih deuh sang a.

"Ka nu dinhmun te kha ka sawi vek a, rin ai hma daihin an lo approve leh ta sia," a tih chuan kan tlan chhuak chawpchilh a.A nu hi hman ni deuh khan a lo stroke a,mahse amah hi chuan semi stroke atia a ,a thisen a sang thut a kha khan stroke te nau a lo siam ani awm a,a nau lahin pasal a nei tawh bawk si a Zosangpuia tan chuan ngaihtuah a na ve ngawtin ka ring.


Kan in kawt kan thleng chuan ka nu pawh kawtah a pangpar a lo buaipui leh tawh a ,a rawn hawi nghal vut ,U Asangtea vawk chaw pe zo ni awm tak pawh vawkchaw ṭin khai chungin a lo hawi ve vang vang.Zosangpuia chuan ka bag te min han lakchhuah sak leh a.

"Ehe Sangtea teh hlawl chu," ka nu pawh chuan a lo ti ve luam.

"Hei bazar ah kan inhmu fuh a,an in ak rit sia ka lo thlah lawk anih hi,"

"Thingpui lo in rawh..." Ka nu pawh chuan a lo ti ve nghal var a.

"In lo ang bazar ah kan lo in tawh a,zan lamah ka rawn leng zawk dawn ania," a tih leh hnu chuan ka u nen an han in be leh luam a.

"Kan lawm e aw...." A kal dawna ka tih chuan ,"Lawmthu sawi a ngai hleinem,zanah chuan rawn ka rawn kal ang," tih leh tlanchhuah a rual a.

Chaw ei lai te chuan ka chhungte chuan Zosangpuia fel an tih zia an sawi luam a,an ui dawn thu te chu an sawi luam a, "Biak a nuam bawk si,dam lo awm se zanlaiah pawh a rawn tlan dawr dawr a.A hma kan doctor kha chu tiang lamah khan koh kal a har bawk sia," ka nu chuan a ti luam a,midang ho pawhin an lo tui hnih ve bawk a.


Zanah pawh inkhawm banah a rawn kal a,kamis dum a ha a,kekawr dum a ha bawk a misual deuh a ang a,a hmel a nelawm bawk siloh a hrechiang lo tan chuan a hlauhawm ngawt in ka ring.Ka chhungte pawhin an lo be leh luam a,nel pawh an in nel ve tawh khawp mai.

"Zanin chu ka inkhawm hman hlauh a," a tih chuan a lam ka hawi ve vat a,"I va fel ve,kei zan lam hi chu chawlhni zan tih loh hi chu ka inkhawm vak lo a,"

"I fel tho alawm," a ti thum leh dut a,ka pa chuan TV ah inkhel a en bawk a, Zosangpuia pawh chuan a en ve ta reng a ka pa in a ṭan zawng te a zawh chuan ,"Arsenal ka ṭan," a lo ti ngei a,ka pa lah chuan a fiam zui hlut ,"United te ṭan zawk tur alawm,lo leng ziah rawh ,kei inkhel hi ka'n en nasa khawp a,ka ṭhianpa ka inkhel en pui ṭhin ber lah a boral ta sia inkhel en pui tur hi an awm ta vak lo a," ka pa in a tih chuan rilru ah Puia a rawn lang lehnghal zâwk a,amak thei ania thil ho te te ah pawh hian amah hriat chhuahna tur hi a lo awm leh ṭhin.

Zosangpuia pawh chu rinai takin a leng rei a,ka pa nen an han titi dun nasa khawp a an titi pawh a in rual viau.A haw dâwnah chuan kawngkhar thleng ka thlah leh a,hman ni a sawi a tum lah kha amah lah hian sawi a tum ta silo a,a pawimawh lo aniang chu tiin ka zâwt zui ta lem lo.


Thla thar te kan han chuangkai leh a Zosangpuia chuan Aizawl a chhuk hma tlanga leng puiah min sawm a, Chawlhni tlaiah kan han leng dun a,Puia nen kan kal ṭhin na lo lamah khan ka kal pui a a chhan pawh khalai hmun kha chu Puia nena kan hmun liau liau anih avangin ani.

"Mate,a hma a thil hrilh tur ka neih che kha tunah hian ka'n sawi ang aw," a tih chuan a lam chu ka hawi ve vat a.

"Sawi la...."

"Ka duh che a,ka bialnu ni turin ka sawm che," a ti deuh phawng,min ṭhawng bawk si ka meng deuh kawk a, ṭhian ṭha kawmin ka lo kawm ve char char a, hetiang rilru hi a put pawh ka lo ring lo a mahse ka ngaihtuah let hian a awm dânah mak tih deuh chang chu ka nei ve ṭhin.

"Awi Zosangpui......"

"Ka ti tak tak ania,naktukah Aizawl ka chhuk tawh dawn a tun hi sawina hun remchang tak ani pawhin ka hria," a tih leh chuan ka hamhaih mai bakah ka rilru a na.

"Mahse......(Ka ngawi leh dat a) I tan a fair dawn lo asin,"

"Eng chu maw?" A tih leh chuan ka mittui chu a hnam ṭiam ṭiam a.

"Ka thinlung ,ka rilru pum hi i chang vek thei dawn si lo a,"

A lo nui hak a mahse a nuih a zat hmel loh viau thung, "Ihmaw...ka chunga i ṭhatna te engkim hi ka hmuhhmaih lo mahse maw ka tan chuan i ṭha mah mah ani...." Ka tih zawm leh zat.


"I thinlung chanve nei tu tal nih pawh keichuan ka duh asin," a tih leh lek phei chuan ka mittui a luang nghal zâwih a.

"I tan a fair dawn lo asin,duh leh hmangaih dang nei reng chung si a ka ngaihzawng i nih chuan maw i tan hian a fair hlawl lo," min rawn kal hnaih ruak a,ka bianga mittui chu a rawn hru zeuh a.

"Ka lo nghak ang che aw," a ti zawi leh sup ,hrehawm ka ti bawk si he mipa ka tana mi ṭha tak sawiselna tur engmah ka hriat loh khawpa mipa fel leh ṭha thinlung hi ka phu mawlh lo asin.

"A rei dawn asin,kum 5 kum 10 vel pawh nise min nghah i in huam em ni?" Ka tih leh chuan ,"Ka nghak ang che,i rilru na te a dam fel vek hunah tuna ka thusawi hi ka sawi nawn leh ang," a ti nghet charh mai.Sawi mai tur pawh ka hre tawh lo,ka phu lo lutuk a,keimah leh keimah te chu ka in hua a.

"Ka phu lo ngawih ngawih che asin Zosangpui...."

"Chutiang ka ngaithla duh lo,ka sawi kha hre reng la ka hmanhmawh lo ania ka lo nghak ang che," a ti nghet charh a amah ka en chuan min lo en ve reng a,ka va han phu lo tak che em! Kei aia ṭha tam tak i tan chuan an han tam dawn nen aw....ka rilru chuan a ti vang vang a.

Hun leh ni a liam a, Zosangpuia chuan a khat tawkin min rawn be reng a mahse keichuan biak tam ka duh loh avangin a message pawh ka chhang ai ka chhang loh a tam zawk ang.Puia nen kan in hmu ngai lo a,hetianga mipa dang ka biak te hian ka rilru hi a in thiam thei ngai lo a amah phatsan ta ang riak ah ka in ngaih phah ṭhin.



Tlai khat chu Rini hian min lo call a,ka inbual daih avangin a missed called chu a lo tam khawp mai chutah ka call let nghal thuai a.

"Hello..." Ka tih rual rual in, "Mate,Puia nen in awm dun em?" A rawn ti thawr amah leh chu a hlauhthawn hmel bawk si .

"Awm dun nang,"

"Awi,a chhuahna a rei tawh sia,phone a la duh bawk silo.A bike a khalh chhuak bawk sia,Nu Hruaitei a mangang lutuk a," a rawn tih leh chuan phone chu ka hmet tawp vat a.

Hmanhmawh takin ka insiam sawk sawk a,inhnuai lamah chuan ka tlan thla dawr dawr,ka nu leh U Chami chuan min lo melh phawk khawp mai, "Khawnge i kal dâwn?.." ka nu min zawhna pawh chhang tawh lo in scooty chahbi ka la sawk sawk a,a tlân in ka tlanchhuak nghal.

Tlang veng lam pan chuan ka tlan chho zel a,ka rilru ah hmun pakhat chiah a rawn lang a.Tlang pawh ka thleng chho har lo,ka tlan phei zel a ,theihai kung thleng hma chuan scooty chu ka hung ṭha sawk sawk a,a tlân tak meuhin ka tlan.

Ka rin ang ngeiin theihai kung hnuaiah chuan a bike ngheng at in zial a lo zu khu hlat hlat a,hmalam a en ngar bawk.Ni pawh a tla fel tawh a mahse kawl chu a la sen ruih a,a bulah chuan ka va tlân phei hlawk hlawk.

Ka thawm a hriat rual chuan a rawn hawi ve vut a,ngawi rengin min lo thlir a.

"I nu i ti mangang alawm," a bul ka thleng chuan ka ti nghal hlawp hlawp.A khi suk a,min chhang lem lo.

"Mate....min lo tawng kher kher hi i vanduai ani tiraw?" A tih ri chuan min ti na ani.

"Aih,engtin nge vanduai ka in tih phal ang?Min ṭhen tura i thutlukna kha vawiin ni thleng hian ka la pawm thei lo asin ,nangin min venhim i duh a ,keiin nang venhim che ka duh thung asin ,tinge engmah i hriatthiam loh, " ka tih ri chu ring ṭha tak ani.



"Mate,natna tenawm leh ṭihbaiawm tak ka vei tawh hi .Dam reng chunga mitthi ka ni tawh asin,nangchu nunna i ni a,i par vul lai tak anih hi.Ka hmangaih che asin ,ka hmangaih ngawih ngawih che.Chuvanga kal tir ta che pawh ka nih kha ,min ngaidam la min hrethiam hram rawh aw," a tih leh chuan ṭap nasa tawh tak ka ni.


Kan in en vang vang,ka ṭap nasa lutuk chu ka in sut hlawp hlawp a,ani pawh a mittui luang chu ka mittui kar aṭang chuan ka hmu thei.

"Khawvelah hian kan rem thei tawh ngai dawn lo a mahse thihhnu piah lamah tal chuan kan rem ve thei tawh ang chu..."a ti leh sup.

"A tawp nan ka hrilh nawn leh ang che aw...I tan,i tan chauhin ka damchhungin ka rinawm reng ang.Khawvelah chuan kan tân hmun a awm ve lo anih pawhin vanram ah tal kan in tawng leh theihna tûrin Pathian pawh ka dil ang...."



Ani nena kan nunhlui kha Nunhlui Duhawm lo zet mah nise keichuan ka theihnghilh phal lo a,ka damchhung zawngin ka theihnghilh leh tawh ngai lo ang.Kan Nunhlui lungchhiatthlak tak tak karah khan hlimna tam tak a awm ve bawk a,ka thinlungah hian khang hun zawng zawng kan hman liam tak kha a cham reng tawh ang a,tih dam theih loh sernung a ni reng tawh ang.Keichuan a tawp thlengin kan nunhlui zawng zawng kha 'Ani nên' anih avangin 'Nunhlui Duhawm' ka la ti fan ani.


A Tawp Ta .....