INTANGIBLE WOMAN(M&B) Chapter-8 Becky Rm Renthlei

[Becky Rafa Renthlei]

INTANGIBLE WOMAN (M&B)
(Competition)

Chapter-8

Ka țhanharh chuan keimah chauhin ka lo mu tawh a, Matt mutna hnu khuar kalh avang chuan nizan lama kan chetdan kha ka ngaihtuah rauh rauh a. Ka duh thlanna a ni a, mipa ngaihsak ngai hauh lo kha vawilehkhatah Matt vangin ka nun a in thlak dâwrh chu a nia, ka danglam tawh tak zet a ni.

Matthew hian min duh zia leh kan inhîp tawnna chak zet min hriattir a tum hle tih pawh nizan ațang khan ka hre thei a ni. A nghawng tur ngaihtuah thui duh lovin ka hmaa awm chu ka hmachhawn zel mai aniang chu. A tawpah nà dawn mah ila hlim tak leh thlamuang taka min awmtir theitu chu Matt chiah hi a ni tih ka hria, chuvangin lo hnar emaw pawh ka tum tawh lo.

Muangchânga tho chhuakin bathroom-ah ka lut a, bathtub-ah inchiah vang vangin ka sam pawh fai takin ka su a, nalh thlarh leh mahni inringtawk taka lan chhunzawm zel ka tum a ni.

Ka taksa sil țhûm chu tuiluma ka inchiah chuan a reh sawt sawt a, nizan khan ka la thianghlim tih a hriat khan Matt a'n mak a ti hle a nih kha, ani chuan Josh kha ka mipa kawpah a ngai tlat a, engmah chu min zawt hauh lo naa a țhâwng hle tih ka hria, min la hrechiang zel ang chu.

Ka inbual zo chu ka harh sawng sawng mai, bathrobe ha-in tukverh bulah chuan ka ding a, Matt pawh hi khawnge awm daih le.

Room chhung zau zetah chuan keimahin ka awm renga chhuah ka huphurh tak zet. Kawngkhar inhawng thawmah chuan inherin tray chawia Matt lo lut chu mak ti zetin ka en a!

"Good morning, Hazel" nui var vara atih chuan ka lo nuih let ve sak a.

Kawr naran tak pawbuang deuh leh jeans dum a ha a, a hmelțha tak zet. A tray chawi dawhkana dah pahin "Min lo ngai em? Ka thawhsan vang che khan i lunghnur loh hram ka beisei, keimah ngeiin i breakfast tur siam sak che ka duh a tin ni" a ti leh a.

Mak tia mengphawk hra chung hian ka breakfast tur asiam chu ka en zauhva, a tui hmel em em leh nghal!

"Ngai teh reng mai, ka lawm e" tiin khum bula chair-ah chuan ka țhu a.

"Ei rawh le, ni nuam tak a nih hi sunday a ni a, natuk ațang chuan hna i thawh ve tawh dawn kha, puar deuhin ei la, nizana i hloh tawh chakna kha nei leh turin thil i ei a ngai a nia." nui chungin a ti zung zung a.

Thuawih tak chuan breakfast chu eiin ka ei hnem kher mai! Matt paw'n lawm hmel zetin ka ei lai chu min hawisawn san thei meuh lo. Nuam ka lo ti veng veng thung, nizan avang khan kan inkâr chu a danglam dâwrh a, Matt chuan min duatna leh ngaihsakna a lantir reng bawk.

Kawngka kik ri-ah chuan kan hawi phâwk dun hle a! Donald thusawi chuan ka nuih a ti za tak zet, he house keeper hi a lawmawm ru riau.

"Vawiin hi Apartment chhung ka tihfai hun a ni a, in ei zawh tawh chuan țan nghal mai ka duh, a pawi ka ti ngawt mai Sir," a rawn ti a.

"Mahni inah pawh fianrial hun kan nei thei dawn nange maw Hazel!?" tiin rang zetin ka țhutna ațang chuan min pawt tho a, ka room lamah min hruai pheiin "Inthlakin i mamawh tur la la, pawn lamah hun hmang teh ang" a ti ta a.

"Ngaihdan țha tak a nih chu" tiin ka hâk tur zawngin wardrobe ka hawng a, Matt pawh insiam turin a chhuak ve nghal bawk a.

Kawrbah sen hlar mai hain a chungah jacket dum ka ha, Jeans tight angreng tak ka hâk chuan ka mal chu a phuar țang a. Mahse, hâk nuam lo chu a ni hauh lo, boot dum ka bun leh hnu chuan ka hmai ka chei thuak thuak a, ka bag lain ka inpeih chu a ni mai.

Matt chuan hall-ah min lo nghak reng tawh a, ka inthuam dan a hmuh chuan "Engpawh ha la i inhmeh zel mai a nih hi, Brighton lamah kan kal dawn nia, car chuan darkar hnih tlan a nia" a ti a.

"Darkar hnih maw? Matt a hla deuh lo maw, anih loh pawhin bike-in kal mai ila..."

"Ok, i tih dan dan le. Mahse, chak taka tlan loh tur, i tilui dâwn anih chuan ferari car hi kan keng a ni mai."

"Ok, ka khalh hmasa anga," phur zeta ka tih chuan a nui var var a.

"I duh zâwng leh lawm zâwng hi a mak ka ti a ni, hmeichhe danglam tak i ni chiang alawm Hazel Cade!" tiin pawnlam min panpui ta a.

Bike chu min khalh tirin kan chenna hmun kan pel fel tawh a, Matt chuan ka kãwngah nghet taka kuahin min si thlap bawk nen nuam ka ti hle a ni. Zaidamna, ințhian țhatna, induat tawnna leh hmangaihna chendun thlengin ka chungah a lantir vek a, hmeichhe bike khalh ngaisang lo leh hmu mawh em emtu kha ka phur ta mai chu a nia. Chu pawh darkar hnih dawn lehnghal ka lung tih awi loh chu a duh bik lo hle a ni tih ka hriat hian amah tih lawm leh duat hi ka châk ve phah sawt a ni.

Kawng chu ngun takin ka en a, ka tlanna lam tur chu min hrilh pah zauh zauh bawk a, chumi tih loh chu kan inbe lem lo, min tihbuai a hlau ve deuh pawh aniang. Kan inkâr boruak chu a nuam veng veng tho, inbe lem lo mah ila, kan chhungril nun a inpawh miauva.

Brighton khaw daifem kan thlena kawng bula, 'Brick' hmanga sak in hlui angreng tak bulah Matt chuan ding turin min hrilh a. Kan thawm hriain chu ina cheng niawm tak mipakhat lo chhuak chu a bia a.

"Motor chu i lo peih fel tawh em, Jeff?" tiin a zawt a, an sirah ngawi rengin ka lo ding ve reng thung.

"Peih tawh e, in hnung lamah sawn ka dah a, ka rawn la chhuak ange" tiin in hnung lam pan chuan a kal nghal a.

"Bike hi hetah kan dah ang a, car-in kan kal tawh dawn nia, i chau lutuk ang" ka kawnga kuah pahin a ti a. A sawina hmun kan thleng tawh emaw ka lo ti ve a, khawiah tak chuan min hruai tum chu ni maw?

Jeff tia a koh pain Jaguar car dum a rawn khalh chhuah chuan ka hawihai hle a, zawh erawh ka tum hran lo.

Jeff chu car ațanga lo chhuak tawhin passenger seat lamah alo kal kuala kawngkhar min hawnsakah chuan țhu lut turin min mitmei zauhva. Matt pawh driver seat-ah țhuin glass a tihniam nghal a.

"Bike hi lo dah țha la, kan mamawh hunah ka lo be dawn che nia" tia bân vai zauhvin Jeff chu a hrilh a.

"Awle tehreng mai Matt, hun nuam tak inhmang dawn nia" tiin inchhung lamah chuan min luhsan ta a.

Matt hmel chu alang dam thlup a, chuti chung chuan mi hîp riauna a neih chu a bo chuang lo.

"Bike i khalh rei tawh sia, a vawt i ti em? Brighton khaw chhung aia hmun reh deuh kalna tur ka hria a nia, kan mamawh tur pawh car-ah Jeff a'n a dah sa vek tawh" Min ngaihtuah hmel zel chuan a rawn ti a.

Ka lo bu nghat ringawt, țawngkam pangai taka min zawt a ni tho nain, a âw-ah chuan min ngaihsakna leh duatna a lang tel tih ka hria a, chu chuan min tihlim hle a ni.

"I chanchin min hrilh teh Hazel" Matt chuan min rawn en zauhvin a ti a.

"Chanchin sawitur teh chiam ka nei lo" tiin, ka pa boral tawh thu leh America ațanga England ka kal thleng chuan ka sawi a, Josh te nupa nena kan in kungkaihna lam erawh chu ka sawi lang tel lo thung.

"I mal hle dawn a ni maw, secretarial course i zawh hnuah Josh hnuaiah hna i hmu nghal mai tihna em ni?" a tih leh chuan, "Hmu nghal mai e, secretary tur an lâk tur thu chanchinbuah ka chhiar a, ka interview ve ta rawih a nih kha, vanneihthlak takin min la hlauh mai a, tichuan nang i rawn lan hma loh kha chuan ka thawk ta reng a ni." Nuisaka ka tih chuan mak ti hmel a pu deuh!

"I nu leh i pahrawn chuan fa engzat nge an neih?"

"Pahnih mipa leh hmeichhia an nia, an hlim khawp mai. Kei erawh ka chhuahsan tak ațang khan ka la mal ta reng a nih hi" ka âw-ah chuan lungawi lohna a ri tel tawh tih ka hria a, chu chu a hrethiam a ni ngei ang min en ta veng veng a.

"Hazel, khawngaihthlak! Ka awm alawm ka veng him tlat ang che, tuma'n an tihnat che hi ka phal lo." Tiin a kut awl lam chuan ka ka bânah atawk zauhva.

Car a tihdin takah chuan ka seat belt chu phelh pahin "Helai hi em ni i tihna hmun chu?" tiin thil chiang sa reng chu ka zawt lui ve țalh a. Bike ka khalhna leh ka chanchin ka sawichhuah vang khan ka lo țang mar țun chu niin!

Car ațang chuan chhukin ka tihrawl kham țhêm țhûm tireh tur chuan ka zi mar vel a, Matt paw'n ka tih ang tho chuan ti vein min en pah reng a.

"Lunch kan ei hma ang a, tichuan kein kan lêng vak mai mai ang chu" tiin Matt chuan car hnunga basket leh wine bottle te chu a phawrh chhuak a, Jeff khan a lo dah sak a ni ngei ang. Puan pakhat chu la in ka lamah a rawn theh phei a, car kawngkhar a kalh fel hnu chuan dil lian lo tak hmuh theihna laia phaitual hnimah chuan țhuthmun kan rem a, hnim chu a ro țhat êm avangin puan chu kan phah duh ta lova.

Ni pawh a tla dawn ruai tawh nain vawt tihna pawh ka nei lem lo. Ka meng chhuak hauh lo nain Matt chu ka bulah a la țhu reng tih ka hria a ni. A taksa lumna pawh ka la hre pha tlat. Lunch kan eizawh khan wine ka lo inhnem deuh bawk nen ka lo muhil daih chu niin, a zia lo hle mai.

Ka mutthilh laiin puan kan ken khan min lo khuh a ni ngei ang, vawt pawh ka tih loh ni. Dîl ațanga thlifîm lo tleh leh thing rim te Matt-a rim nena inpawlh niai chu hriain, ka hnar a verh zar mai a, ka taksa chu ti che in Matt lam hawi chuan ka inlet thak a.

"Mumang i nei țha bawk em?" tiin thawp sat hian min zawt a, "I chau bawk a niang, chêt pawh i che hauh lo mai" a tih zawm leh a.

"Lunch einaah khan wine ka lo inhnem deuh aniang" tih pahin ka țhu chhuak a, kan thil ei chhung zawnga ka inthlah dul dan kha la hre rengin ka nui deuh var var bawk a. Ka rilruah thildang a lo lang thut a.

"Kelly Benison nen khan in la inkawp em?" Ka tih chuan hmel danglam pu deuh hian "Engvanga rawn sawi chhuak nge i nih? Kan inkar a tâwp fel vek tawh" a ti sup a.

"Ka ta midangin min țawmpui an tum hian ka ngaithei vak lo" ka ti salh a.

"Lungngai suh, kei pawh chu chiah chu ka ngaihdan a ni, chuvangin Josh i be tawh tur a ni lo. Gary erawh kha chu i la serious viau lo tih ka hria" ngeiawm lam lek lek hian a ti leh a.

"A țha alawm" tiin cho hmel zet hian ka en a. Nui suk chungin "Kan la hria ang chu"

Engmah sawi zui tawh lovin kan ngawi dun vang vang, Matt mimal chanchin leh an chhungkaw chanchin hi hriat ka nei tlem khawp mai. Mahse, chu lam chu zawh ka tum rih chuang lo.

Kan thil ei vel pai tih nawm nan ke a len vah vel a rawt pawh chuan hlim takin ka lo pawmpui nghal thei mai a ni.

"Helai kan thlen hnu lawkah ka muhil daih a, boruak leh wine vang te pawh a niang. Mahse, i lo ning hle ang a?" ka ti a.

"Ning lo ve a, i bulah țhuin ka lo inngaihtuah bawk a, i hmelțha tak kha ka lo thlir veng veng mai mawle..." nuih za insum zetin a ti ve mai.

Ka bânah kaiin keiin basket ka khai a, ani'n puan chu a kut leh lama kengin kan kal dun a. "A tlai tawh sia, haw a hun tawh ang a" ka tih chuan, "Umh, dar sarih a ri tawh" tiin car hunna lam chu min panpui leh ta a.

A thim deuh raih tawh, thinghnuai vel chu a vawt deuh raih bawk a, hnahthel ro kan rah rik tih mai loh chu thawmdang hriat tur pawh a awm tawh lo. Inngeih taka kan ni hman chu a lo tawp dawn ta, naktuk ațang chuan office-ah kan buai kartluanin ka ring a, ka huphurh hle a ni.

"Ka lo ngaihtuah a" tiin Matt chuan ka darah kuahin alamah min pawt hnaia, "Car thlen nan minute sawmpanga vel kan kal a la ngai dawn a, kan chenna kan pan hmain coffee leh sandwich tal kan mamawh ang, chutiang a nih chuan in kan thlen meuh chuan zan dar sawm vel a ni tawh dawn a ni" a ti a.

Buk nghat pahin Matt darpharh hlai țha takah chuan ka lu lo nghat a, chutia ka tih vang chuan thawk ala ham ham a.

"Jeff-a inah khan zanin chauh chu min riah tir theih leh theih loh engahnge kan zawh mai lovang? Vawiin chu hahdam takin hun kan hmang ta sa sa, muangmar in naktukah haw zawk ila, bike khalh tur chuan kan chau hret a ni" rawt pah titih deuh hian a rawn ti a.

"Engahnge chutiang chuan kan tih mai lovang?" ka lo ti ve sap a.

Car kan dahna hmun kan thlen chuan, Jeff-a in panin hmanhmawh lutuk ni hauh si lo hian kan tlan chhuak ta a. Kawng a thui lutuk lo bawk a, inbe lem lovin kan ngawi dun reng a, Matt erawh chuan kawng chu ngun taka enin chesual lo turin fimkhur takin car chu hnehsawh ru tak siin a khalh a.

Jeff chenna hmun kan thlen chuan ka ril a țam hle tawh a. Nu thau ang reng tak hi lo chhuakin min lo welcome vat a, riahna tur kan duh thu leh ei leh in lam pawh kan mamawh thu Matt chuan a hrilh nghal zung zung a.

Inchhungah min hruai lutin, "Step-ah khan chho ula, kawngkhar lo lang hmasa ber kha a ni mai Matt, Jeff chu khawpuiah a kal lawk a, riah induh mai theih thu a sawi lâwk vangin pindan pawh ka lo buatsaih diam tawh e" a ti fel than a, nu fel tak chu a ni tih a hriat theih mai.

Kan lunch tui tak min siamsaktu kha amah hi a ni ngei ang tih pawh ka hria, ka ril a țam deuh bawk nen ka ni deuh nghulhin ka hria, chawlh hahdam ka mamawh tak zet a ni.

"Sandwich leh wine chu minute sawm hnuah ka lo dah chho ang" tiin Jeff-a nupui niawm tak chuan min hrilh a. Step-ah chuan Matt chu zui chhovin kawngkhar chu kan hmu ve nghal mai a, tuiluma inbuala khuma mut vang vang ka châk tawh kher mai.

Chu pindan chu a nalh mai bakah a nawm hmel hle a, Matt bul ațang chuan kal sawnin khum bed-sheet nalh zeta inkhuh chungah chuan ka țhu a. Mahse, pindan kan ințawm dawn tihna emawni le!? Ka thil ngaihtuah avang chuan ka buai ru ta viau mai, mudun tawh tho mahila pindan pakhat ințawm chu ka duh hauh lo.

"Khawiah nge i mut ve ang?" Matt lam hawia ka tih chuan a lo ner sawk a.

"Hetah tho hian mawle Hazel, vanduaithlak takin pindan awl pakhat bak an neih loh thu Susan kha'n a sawi tlat a lawm. Ka mut ve mai a ngai dawn a ni" a ti hmak a.

"Sofa-ah tal pawh sawn i mu thei alawm" tiin tukverh bula sofa inhûng chu ka melh zauhva.

"Ka chau tak zet a nia, inhnial nan hun khawh ral lo teh ang, i duh lo chung chu khawih luih tumna che ka nei lo a nia" tiin a kawr chu a hlîp a.

"A țha lawm" ti ve hmakin leh lam ka hawi a, chutih lai chuan kawngkhar chu rawn kikin Susan-i chu tray chawi chung hian a rawn lut a. Matt chuan alo pan thuai a, a tray chawi chu lâksakin dawhkan hniamte-ah chuan a dah ta a. "I ti lawmawm e, a tui hmel hle mai Susan"

"A lawmawm a nih chu, inthlâkna in mamawh tur chu wardrobe-ah khan ka dah kha" tiin min rawn melh zauhva, ka zak ru chem chem nia. Matt-a nula kawp pakhatah min ngai tih a hriat hliah hliah bawk nen ka awm a nuam lo hle a ni.

"Mamawh in la neih chuan min rawn au vak mai dawn nia" Susan-i chuan a la ti zui a.

"Hazel?" tiin Matt chuan tray lam chu a bûk khum nghat a; tray-a eitur awmho chu ka lo enkual a, sandwich, salad leh wine te chu a tui hmel hle mai. A bulah chuan toothbrush leh toothpaste inpack thlap a lo awm tel bawk a.

"Thildang mamawh tur kan neih pawh ka hre tawh lo ve a" tiin Susan chu ka nuih a, thil hrethiam tih hriat tak hian a nui sâng lehnghal a, ka lai tak zet a ni.

"Chuti anih chuan ka kalsan tawh ang che u, hlim takin hun inhmang dawn nia" tiin a chhuak ta a.

" I sen țan țan alawm le" Matt chuan ka bula lo țhut thlâk pah chuan a ti a.

Ka biang sa hat hat chu ka kuta dawmin "Min ngaihdan tur kha amawi fahran lo a lawm, i khum țawmpui reng țhintu ka ang tlat" lungawi lo âw taka tiin ka tum hmak a.

"Midang ngaihdanah buai duh suh, khawiahmah an sawi chhuak lovang, lo sawi pawh ni se ka veng him ang che" ti a, min pawt thovin "Ei ang le, ka ril a țam ve tawh viau a nia" tiin chair-ah chuan min țhut tir a, amah pawh a țhu zui ve mai a. Plate a eitur ka chhawp mawlh mawlh lai chuan Matt chuan noah wine sen chi chu a lo thli ve thung a.

Ka zam deuh riau mai, ka kutte chu a thlan dap a, ngaihtuah hlek lo chuan wine no chu lain min lo enreng a ni tih hre chungin ka in ta pawp a, sandwich chu ka țhial zui nghal a. Matt chuan a wine in hlek hlek pah chuan min en reng bawk nen ka zam zual sauhva.

"Oh, awle..." tiin ka zamna ka aw a lang tur chu thunun hram hramin sandwich, a zât ve chauh ka la ei hman chu plate-ah dah lehin, "I ei chhungin bathroom lamah ka lo va intifai ang" ka ti a.

"Wine kha in leh la, i plate a mi kha ei zo rawh, zanlaiah i ril ațam anih chuan adang a awm tawh dawn lo a nia" tiin a ei chhunzawn mawlh mawlh a, kei pawh chuan thuawih takin ka plate a ei tur awm chu ka ei zo ve ta vek a, wine pawh no thum lai ka in a, ka lu a hai deuh chiai chiai lehnghal bawk nen inbuala mut vang vang ka châk tawh ber a ni.

"Saw lamah sawn" tiin khum piah lama kawngkhar lian vak lo chu min kawh hmuh a, "I inbual hlanin tray vel hi ka zuk dah ange" Matt chu tho ve nghalin kei pawh bathroom-ah ka lut nghal a.

Bathroom chu a lian lo hle a, shower hmang chuan inbualin ka ha pawh ka nawt fai nghal a, Matt chu a lo kir thut thei reng tih hriain under-wear vel ka sufai thuai thuai a, towel dahnaah chuan ka zar ta a. Thawmhnaw inbel hauh lo hian bed room lamah chuan lut lehin ka thawmhnaw chu wardrobe-ah ka khai a, mutkawr hring dal raih lo awm chu inbelin ka ha tawk chiah lehnghal, light ka off a khumah chuan muin ka inlukhup ta daih a.

Matt chuan he hmuna riah hi alo duang lawk vek tih ka hre mai, engkim ka mamawh tur mutkawr chenin ka hâk tawk chiah a awm leh zel a, mak ka ti lo thei lo! A lo kir thawm bengkhawn chuan ka beng ka chhi deuh hra a, a rei hle mai. Nge, kei hi min lo kalsan daih zawk! Hlauthâwng zet hian ka țhu chhuak hlawl a, ani hian infiamna hmanruaah lek hian min lo hmang mai mai a ni thei a ngem?

Minute sawm dawn thim zinga ka țhut tawh hnu pawh chuan Matt-a thâwm reng reng ka la hre ta chuang lo. Ka rilruah thil chi hrang hrang lutin mangang ru deuh tak hian thâwk ka la ham ham a, ka hriat chian hauh lo mipa ringin ka chhuahpui a, nizana kan mutdun vang khân ka lo ring em em a nih kha.

Kei hi ka lo â tak zet a ni.

Matt hian ka chungah enge tih a tum? A vawikhat nan mahni inkhawngaihna avangin ka mittui chu a luang ta zawih zawih a, ka pa boral hlimchhawnah tih loh chuan kan in ka chhuahsan pawh khan ka țap lo, rilruna zetin ka insut ta hlawp hlawp a...

©<++++[BeckirafARenthlei]++++>®