THE DUBAI CALLING BY Thunderboy Chinzah (Completed)

[Ngaia]

dubai calling.jpg (17.3 KiB) Viewed 11470 times

THE DUBAI CALLING - 1
Zomama pa
Khawnuam City
Hmun Khawhar Veng
Zorun Cabin

**************************

Ka nun kawng inkarkik leh inpersan tak tak hi he ka nun tlawm tak pakhat chhung ah hian a inkhungkhawm vek mai si. Thingtlang naupang hnap tawlh pir per thin khan khawvel a Hotel changkang ber ber thlengin a lo luah lum thei a, thingtlang keltil a rawlthar insual hrat satliah ni thin khan, smuggler ho bungraw tam tham tak tak ven sak in, chung mi ten sum tam tak tak seng a an rawih thin, ralthuam nen a chetla thin pawl lar tak, "Valkirie Company" (kan Duhlian tawng chuan Sarzam Pasalthate tih na a ni ber ang chu) ah pawh an chhuan ber pawl leh 2nd in Command hial ka ni phak te khan mi awm hle hle chi ka ni lo tih a hrilhfiah chiang ber awm e. Tlangval hriat tan tirh a ngaihvarungthawn ka neih ve thin (tu'n ka tawng lo haw lo se) thingtlang nula mawngfual er tin ten, hnar bawng hit het, rawng kairual ve tak tak atang a Casino lawnglian(nawmchenna lawnglian) ropui tak tak, lawilo dawrpui atang a thil tha zawng zawng ruk khawm ni awm tak hmang a mawi tak a an chei chhung a ka lo interek hran pui tawh, Scandinavia tlang bawm a cheng nula sambuang mit meng pawl raih mai te, Mexican nula mi hipna ngah chungchuang te, Chinese leh Korean nula vun no leh mam tak tak te, Brazilian nula hnute bu nalh tak tak leh hleitling zet zet mai te leh Russian nula piannalh chung chuang tak te leh hnam hrang hrang nula tam tak, an chung a ka lo zo arpa hluisen khuan liam al al tawh thin na zawng zawng te chu he ka nun zalen tak chep ru zet si ah hian alo inkhungkhawm vek mai si, he minung ram ka chhuahsan hma zawng hi chuan suangtuahna khawvel ah cham in, rilru hian nunhlui chul ram hi a fang nawn leh fo thin dawn zawng a nih hi..

Ka sawi lan tawh ang in ka chawrchhuahna lam chu ngaihtuah let hrehawm khawp in a chhunawmloh hial awm e. Kekawr mawng bel hak leh silipar (slipper) hrui chat nen khan ka hringnun kha a inzawm a, khawpui a chhungten duhsak tak a an fate hak hlui min rawn thawn, ka kamis neih ve chhun lah kha designer in a kilhna awm kim lo tur a a duan emaw ni teh reng, engtik lai mah in a kilhna a kim ngailo. 'Harsatna' tih tawngkam in a hrilhfiah zawh loh khawp a chhungkaw khawsak harsa atang chuan zirna in pawh sang tak kai thlen ve theih hek loh le, mahni mum mum in kan mum a ni ber mai.

A bai daibaw harh a harh tih tak ah tharum sen ngai lam thil kha kan tuipui em em mai a, 'Brazilian ju zitsu' kan hmelhriat pha lo a, 'Japanese karate' lah in kan vangkhua ala lawi ve hek lo. Kan hriat theih chhun chu 'Chinese kungfu', chu pawh hrechiang mumal lo leh mizotawng pai deuh deuh te sawi leh chhawn, KUMFU tih kha ani. Vanneih thlak takin kan khua ah pawih thingzai a inhlawhfa Sanga kumfu thiam(a hunlai chuan Bruce Lee ai pawhin kan ngaisang zawk) chu a rawn inhlawh ta hlauh mai a, engtin tin emaw a hnen atang chuan kumfu chu kan zir ta a nih kha. Kan zir hnem emai fafu thleng pawhin kan zir hial in ka ring.. Kan kumfu zir kha a hunlai khan ka nun a a tangkai dan tur leh ka chhawr nasat tur ala nih reng ka hre phak lo.

Hun alo kal zel a, vanneih thlak takin kum sawmpariat ka nih chuan India sipai, Assam Regiment ah ngat(kan ngaisang veng veng em alawm) ka tling ve ta hlauh mai, pawl hnih pass na certificate pali thil kawp chung in ka lut ve ta nge nge a nih kha(pawl riat ka zir thleng miau silo a, school tih hming chhiat theih a nih avangin pawlriat certificate min siamsaktu school ka thup na a ni e). Happy Valley, Shillong atang a basic training ka zawh hnu ah, training course hrang hrang, Weapons and Tactics, Weapons Handeling, Counter Insurgency, Jungle Training ho te chu ka kal zo leh vek a ni. Central India lam ah chhuk thla zel in, Para Regiment ah min dah a, thla ruk training a hranpa ngat a min neih tir hnu ah India Special Commando, sipai chhuanvawr bik, 'Black Cat' chu ka zawm ta a ni. He tah hi chuan Assault Training kan zir uluk ta ber mai, silai hrang hrang hman dan, a thiah leh rem khawm, chemte nen a insual leh kut lawng a insual te, bomb siam dan leh sut dan thleng in, building lian pui pui luh chhuah dan te pawh kan zir uluk em em mai a ni.

India Special Commando 'Black Cat' ah kum khat ka awm hnu chuan UNO hnuai ah sipai a tirh ni in, Africa tualchhung buai ah min tir lut ta a. Africa ah hian kum hnih zet awm in kan che tha viau reng mai a, reward pawh vawi sawm ai tam kan dawng hman hial a ni. Johannesburg a ka khawsak dan chanchin kimchang deuh chu a remchan dan ang in ka sawi lang chho zel dawn nia. (He mi hnu daih ah hian Kosavo ah tum hnih lai tirh ka ni leh bawk, chu chu nakin lam ah le.)

[Ngaia]

THE DUBAI CALLING -2

Zomama pa
Khawnuam City
Hmun Khawhar Veng
Zorun Cabin



(He thuziak hi Zofa te duai bik loh zia leh hnamdang te el phak ve khawp a theihna nei kan nih zia tarlanna atan a duan a ni e.)

Kei a mimawl thukhawchâng in, heti tak a kei sipai lubawkin zah leh ngaihsan ka hlawhna hmun hi zawng chhungkua a khawsak ho nan ka it vawng vawng mai. Mipui mimir reng reng chuan min zah in, min tih dek mai a, UNO mi leh sa kan nih miau avangin zah kan ni lo thei lo a ni ber awm e. (Tawngkam mawi lo ka hmang em aw? Sipai lubawk te kan ti tak bawrh bawrh a, sipai ho ka dah hniam vang a ni lo a nia. Tih tak em ah chuan sipai pawh ni phak lo, civil mi lubawk ve satliah, thawhchhuah nei mumal lo,chhungte chawmhlawm, chapo ve em em ringawt hi an tam fe zawk). Hmun ralti tawp, buaina in a chiahpiah reng hmun ni a an sawi ah pawh chuan upuk lungmuang laklawh an sawi ang mai in ka thla a muang ve em em ringawt mai, hei hi a ni Johannesburg kan thlen tirh a ka hmuh dan leh ka awm dan chu ni.

Buaina chawk chhuak thintu hel ho lah mawl takin an che duh hauh lo mai, hnunglam a mit nei ang mai a inveng sa ran in an che chhuak thin a, an pawikhawih leh an chetna hnu hma hmu thin mah i la, an hnuchhui a har em em mai a ni, kan pu te ho pawhin luhai map map chang an ngah kher mai. Chutiang boruak kar ah chuan Africa mipui te leh khawvel mipui in beiseina sang tak nen min thlir chu a ni si a, buaina in a tuam vel pawisawi lo mipui te han hmuh chuan an lainatawm in, an buaina ber chu tuk zal sak thuai thuai hlan a nghahhlelhawm duh kher mai. Chet chhuah a tam na na na chuan tawn leh dai hriat a lo tam a, hma pawh kan sawn ve hret hret zel e.

Africa ram a hel ho hi an chet dan a raw va sawt telh telh mai a, Rwanda leh Zimbabwe vel a hel pawl Bokoharam ho tih dan an copy a nih hi an ti mai a, khawpui atang a hla deuh thingtlang lam ah chet chiam an ching hle. Chung an chetna hmun a naupang te chu an man chiam mai thin a, an rilru ah hel rilru chu tuh sakin, ram hmangaihna ang zawngin an zirtir a, chu hel rilru chu an rawn than lenpui ta thin a ni. Hmeichhia te chu an nulat chhuah hma atangin sex lam a hruai luh an ni tlangpui a, nawmchen nan an hmang thin, thihchilh ngamna nun hlutzia an zirtir uar hle bawk. Bomb chak tak tak pai tirin, kawtthler lun lai leh bazaar ah te, shopping mall leh mipui tamna hmunah an tipuak mai thin a ni, mipui te an thlabar in an mangang takzet a ni e.

Hun enge maw chen hnu ah chuan America kutchhuak, Metal Detector kan nei ta hlauh a, kan tangkai pui ta phian mai. Ban pahnih hi kawngsir lehlam lehlam ah inhawitawnin kan han phun a, hnuailam ah wire a thlunzawm a ni, tin, ban pahnih ah hian camera tha zet mai phum ruk a ni bawk. Tichuan wire a zawm zelin, hmun hla deuh hlek, 300yrds vel atangin wire a kan thlunzawm monitor inchhawp chungin kan vil ta thin a ni. Hetiang hi hmun hrang hrang UN Military Force ho awmna ah chuan kan inchhawp deuh vek a ni.

He Metal Detector ban pahnih inkar rawn paltlang apiang te chu Camera chuan lo la in, metal lampang chi, Iron, steel, copper, lead etc. te an taksa ah an lo pai a nih chuan monitor sound chu a rawn ri thin a, monitor ah chuan x-ray thlalak ang deuh hian an pawnlam lang chiang lem lo in, chhungril lam ruhrel chu chiang takin a rawn lang ta thin a ni. Chu chu sniper in kan vil zel bawk a, pawikhawihna thleng tur tam tak chu kan veng thei ta viau reng a ni.

Mizo te hi chu kan vannei khawp mai ka ti thin, kan taksa hi Pathian hian min lo siam fuh khawp mai, Africa khawlum tak mai chu American leh British ho tan tawrh hrehawm tawp a nih lai in, kei ni chu harsatna min thlen lutuk lo, lum ti ve viau thin mah i la khawsak phung min tibuai em em hran lo. Chutih rualin Siberia ram vur hmun ah pawh kan khawsa thei ve leh viau zel tho mai. Kan vun erawh hi chu a pan em avang hian a sensitive em em a, vun natna kan kai hma thin hle. Amaherawhchu, Doctor thiam tak tak ten damdawi tha tinreng nen an vil reng kan ni a, kan dam har lem lo. Tin, tlangram a seilian kan nih avang hian ramhnuai kal leh kham a han lawn te, patrolling a zan tam tak riak a kan chhuah chang pawhin eitheih tur thil han dap mai te kan awlsam em em mai a, hnam dangte'n mak min ti in, kei ni a kar bula kal hi an inchuh ve nak nak thin. Kawng thui tak tak kan han kal chang a vai ngalsang pui pui leh sap palian tak tak te an chauh chhiat viau tawh ah pawh kan lai fei fat zel mai. Kei mizo pa ah pawh a vangtlang ni ve ngawr ngawr, feet nga leh a chanve vel lek hian hnamdang palian pui pui racksack(rawksai) leh silai te hi ka ah chhawk tang tang fo mai.

Khawvel ram hrang hrang commando tha ber ber zingah pawh zahpuiawm kan ni ngai hauh lo, kei phei chu ka vanneih asiam in silai hi ka kap dik thei fuk fuk khawp a, sniper a an rin ber zingah ka hming an tarlang ve tlat zel a, khawvel ram hrang hrang sipai tha bik kal khawm zingah pawh he ka Mizo hming ngei 'Zothanpuia' tih hian top five huang a chhuahsan ngai lo. Counter insurgency, bonet fighting leh hmanraw hrang hrang hmang a insual kan trainning fo a, kan trainers te hnen atang a kan zir mai bakah, naupanlai a kan thilzir hrang hrang te kha ka hmang tangkai ta viau a, French Foreign Legion a mi Capt.Djuorkeff-a phei chuan min ring bur hi a ni ringawt mai.

Vawi khat erawh chu ka nun a ka theihnghilh tawh ngai hauh loh tur ka tawng tlat mai a, vawiin ni thleng hian ka mitthla ah a la cham reng thin. Sipai kan ni a, ral bei tur leh ram leh hnam venghim tura sawrkar in a chhawr te kan ni. Hmelma te nen a in ep chang kan tawng fo a, mipa puitling chu inbei in, a vannei zawk zawk dinchanna khawvel ni turah ka lo ngai mai thin a, ka kut tuar a nunna chan tam tak te pawh kha mak tih na leh an laka han inthiamlohna em em ka nei hran lo. An ni ho kha ka thah loh chuan ka nunna zawk hian a tuar dawn a nih loh pawhin, pawisawi lo mi tam tak te dinhmun derthawng ah ka dah dawn tlat avangin ka tih ngei ngei turah ka ngai mai thin. Hemi tum erawh ka beisei loh lutuk thil tawngin, na hi ka ti tawp thei lo a ni.

Johannesburg hmar lam ah Metal Detector veng tura detail kan ni a, Ukrainian Kerimov-a chu kan commander a ni a, silai kah a ngaih thut thulh ah kei chu sniper hna thawk tura detail ka ni. Hemi bial ah hian Pigmies(African mihang hnam chi khat) ten 'Kut'(Festival) an hman lai a ni a, nuam an tih em avangin mipui pawh an pungkhawm tam thin hle. Chuvangin venhimna pawh hun dang zawng ai in kan uluk in, kan fimkhur leh zual em em a ni.

Mi tam takin Metal Detector chu an rawn paltlang tawh a, rinhlelh tur awm ang kan la hmu lo hlauh. Programme pawh an tanna a rei tawh avangin thawm pawh a tha leh tawh hle, chutih lai chuan midum hmeichhe naupang fel tawh tak, tleirawl ve dawn dawn awm rual vel hian puan rawng thim lam deuh hi hnawk niaih a bat in, Metal Detector chu a rawn paltlang ve a, rin loh takin Monitor sound a rawn kiu ta ral ral mai, ralthuam hlauhawm pai a nei ngei tih rinhlelh rual lohin monitor ah chuan signal red a rawn de ta zauh zauh mai le. Hmeichhe naupang chuan Metal detector chu a pel thui ve viau tawh, a hawi kual zak zak a, chutah hlauhawm a hnai lo in a hre ta a niang chu, mipui punkhawmna lam chu a pan ta hret hret mai le. Sir Kerimov-a chuan a enhlatna(binocular) chu la thla in, kap tur chuan min ti ta a.

Ka sniper rifle duhtawk a ka test hnu a ka duh ang thlap a ka adjust thlap chuan ka han tin ta vang vang a, a scope chu her hretin, 500yrds ah chuan ka adjust ta a. Scope atang a ka han bih chuan hmeichhe naupang chu a lang chiang ngei mai, a fimkhur em avang a ni mah na, a hmanhmawh lo kher mai. Hmelma ka that a nih pawhin puitling that turah ka inngai thin a, tun tum zawng a ni tlat lo. Harsa ka tih em avangin ka silai chu ka han la thla a, kan pu hnenah chuan, "Sir, hmeichhe naupang ka kap ang nga maw?" ka han ti leh he haw a. Pu Kerimov-a chuan, "Puia, sipai i nih chuan i tih tur chu order zawm a ni. Tu pawh nise kap rawh, chu chu order a ni e," a ti leh hmuk mai si. Ka silai chu lek kangin ka han tin tha leh a, thaw ka han lak leh halh hnu chuan trigger chu ka kut zungchal chuan a kuai per ta a.

Ka silai barrel hmawr ah chuan silencer tha tak ka vuah avangin ri a chhuah zawi hle, hmeichhe naupang chu eu awrh in a tlu zui hnak a, thihsual tih hriat taka a ke khur dar dar chu scope atang chuan ka va hmu chiang hle. Kan commander pu Kerimov-a chuan a binocular lak thlak pahin ka dar ah chuan mi han beng thak a, "Nang nge nge, i ti tha lutuk e," min ti a, kan zinga pahnih chu naupang ruang va seng hawi a, a ralthuam pai chu fimkhur taka la turin a tir zui ta nghal a.

Kei erawh chu ka thaw hawk a, ka bing mum mum in ka hria, ka thil tawn hi ka duh lo em atin ni. Kan thiante pahnih pawh chu rei thang lo in hmeichhe naupang ruang pawm chung chuan an lo let ta thuai a, kan han enchian chuan Bomb thawkna em em chi a lo pai reng chu ni in, kan sut fel zung zung a, commander chuan set atangin headquarter chu a bia a, report chu a pe zui nghal a. Thiante chuan min rawn chibai sap sap na a, ka rilru a la zing em a, engmah ka ngaihtuahna ah a lut hlei thei lo. Hel ho hian eng rilru nge an put thin ang le? An fin viau rualin, an nun a va rawng thin em! Hetiang naupang, chhia leh tha pawh la thliar hrang thiam vek lo tur tih hriat reng hi pawi nasa tak khawih tir a, thi turin an han tir duh a nia, thumak ka sawi nin theih loh chu a ni reng dawn a nih hi.

Chutiang reng reng chuan kum hnih chhung chu Africa ah khan ka khawsa a ni ber, tum khat chu an hel sipai zinga Women Wing ho nen kan inkap chiam a, an huaisen hrep mai leh nghal a, a tawp ah chuan luhchhuah in kan kahhlum bang zawng chu kan man thei hram. Chuta kan thiante chet dan chu sawi vek lo mai ang, kum khat chuang zet mahni inlum leh nupui fanau te hmu tawh lo a khawsa an ni hlawm bawk a, an tuihalna kawng chu inhriat tho ka ring. Sawi lan vek chi pawh a ni lo, a vankai chaw lo biah buah em mai.

Hun harsa leh khirh tak tawng thin mah i la, hmun ralmuang a awm hnu hian kan ti ti leh kan sawi tam ber a ni fo thin. Heta khawvel ram hrang hrang sipai kal khawm zing a che tha ber pawl leh hming lar ber zinga ka tan vang hi a ni teh chek ang chu, ralthuam nen a che a, pawl ho ang a indin, pawisa tam tham tak tak nen a venhimna thawk tur a an rawih thin company hrang hrang te hmel hriat ka hlawh tan tak ni. A hnu a ka zawm tak Valkirie Company ngei pawh khan min hmelhriat tanna a lo ni reng mai.

[Ngaia]

THE DUBAI CALLING - 3
*********************

Zomama pa
Khawnuam City
Hmun Khawhar Veng
Zorun Cabin



Hun harsa leh khirh tam tak kan paltlang a, ral kara ringrawlh tak meuh a hun kan hman chang pawh a tam narawh e. Kan thiante tam takin an nunna hlu tak chan in, an damchhung ni an vuiliam bawk a. Misual te kut tuar a boral ta kan thiante ruang, an mahni ram lam hawi a kan han vailiam lap lap thin hi chu mipa pawh kan mipa zo meuh thin lo a ni e. "Engtik ah nge kei hi ka hun a lo thlen ve ang le?" tih hi ka in zawhna a ni fo thin. Sipai kan nih chhan ang tak a ram leh hnam leh tanpui ngai te tanpui nan a nun hlantu te han hmuh meuh hi chuan, American hmeichhia ten an pasal te ral ram kal tur ngai em em chung a an ban a vuan meuh a, an in thlah liamna thu,

"When you go home, when you go home;
Tell them of us and say that,
'for your tomorrow, when we give our today."

tih thu mawi tak hi ka hrechhuak lo thei thin lo.

Hlim taka nuih bawk bawk chang ni nei mah I la, kan hun tam zawk chu thawhrimna leh tahna nen kan hmangliam a ni ber e. 'Thinthi a mut mu tuah kan nei ngai meuh lo', ti ila, kan sawi sual tam pui lovang. Chhungte leh mahni ram ngai a lunglen phei chu a teuh lo lutuk, chutiang hun awl nei hman kan ni lo hrim hrim. Basic training lai ai chuan kan Lal zawk fe na a, a hah thu ah chuan kan hah zawk mah awm e. Tiang reng reng a hun ka hmanliam zel lai chuan kum khat leh a chanve ka lo awm ve ta der mai, Johannesburg UN Army Headquarters chuan ka tan lehkha an siam ve ta, mahni ram lam a let turin release ka ni ve ta e. Ka hrehna leh ka chakna a inchen viau in ka hria, mahni ram a hna thawh a, duh hun hun a chawlh lak theihna hmun a awm a, chhungte hmel hmuh fo theih chu ka thlahlel teh meuh mai. Chutih rualin, keini akar min thlamuanpui a, keimahni avang a muanglei a chhun leh zan hmang ve thei, African mipui te ka hmuh chuan an tâna awm reng theih hi ka chakin ka va thlahlel si em! Mahse sipai ka ni miau a, duhthlang ve thei ka ni lo, Pu te'n min tirhna hmun apiang ah ka kal zel a tul si. He lai mipui te hian min mamawh a, an tan a ruat ka nih chuan Pathian in min hruai let leh em em ang.

Min release dawn ni hi ka pian a hnulam a chibai ka hlawh nasat ber tum ala ni hial awm e. UN Army a kan luh hian Unit nei vekin kan lut a, keini Sniper bik erawh unit tinah min pawt kual țhin thung. Hei vang te pawh hi a ni ang, Unit hrang hrang ah hmel hriat ka nei nual mai a, min ui der ve liam liam hlawm mai. Farewell Function kan hman ah pawh thusawitu apiang in ka hming an lam ri a ni ber e, min thlahna thu leh min ui thu an sawi bakah lawmthu min hrilh mawlh mawlh mai. A tawpna ber atan UN Army Headquarters, Johannesburg min awp tu, Lt Gen. J S Lee, South Korea mi chuan inthlahna thu sawi leh in, hnathawk țha lawmman leh Bravery Award (Tangkapui) min hlan a, kutbeng ri a nasa in min lawmpuitu an tam kher mai, he tangkapui hi ka tangkapui dawn ho zinga ka ngaihhlut ber pawl a ni reng a ni.

Zanah chuan hlim takin hun kan hmang a,South Africa a ka awm chhung zawng a whisky kan tauh hawn hnem ber tum a ni hial awm e. A tuk zing ah chuan kan thingrem leh bungraw neih zawng zawng nen Harbour chu kan pan ta a, kan chhuak tur chu min rawn chibai nawn leh sap sap hlawm a, kan chhuak tep tih ah chuan 3rd Infantry Division a mi ka lo duty chhuahpui fo tawh Ukrainian, Honorary Captain kai ta Mr. Kerimov a bawk chu lo pen chhuak in, min rawn kuah chung chung a, ka hnung a ben thak thak pah chuan, "Comrade, God bless you, I will love you until I die. We could see again as if may be!" ti in min thlah ta a, address kim chang kan inpek tho avangin chanchin kan inhrilh zawm zel thei em ang chu maw! Africa leilung hi ka rap nawn leh angem? tih pawh hriat hek lo le, min nghak reng tu lawnglian ah chuan lut in, kan thiante nen a ban invai lap lap chungin Africa leilung chu kan tawlh liam san ta riai riai a.

Africa a ka awm chhung khan inpawmchilhna hi vawi thum chiah ka tawng a, vawi khat chu ka sawi tawh hnu 'Women Wing' ho kan luh chhuah tum kha a ni. Keimah rau rau ah ka inrintawkna ber chu chemte hman leh chelek hi a ni. Bayonet keng hmachhawn pawh ni ila, a fawng tawi zawk chemte keng hian ka zuam em em mai a, tun thleng hian ka la chesual lo bawk. Hei hi a ni Mr. Kerimov-an min chhinchhiah bik em em leh min ngainatna chhan kha, inpawmchilhna ah vawi hnih ngawt a nunna ka chhan sak tawh miau a lawm. Mi sawmhnih bawr vel chu he hmanrua hian minung khawvel atangin a tir liam tlat a ni. Sniper hna ka thawhna lamah khan mi 36 lai ka lo dahtha hman a, confirmed thlap an ni. Thi ngei tur a rin mahse, finfiah theih loh, (Unconfirmed) 20 zet ka nei bawk, ka che chhe lem lo ve.

India ram leilung chu rap in, Maharashtra kan rawn lut ta, thla a muang huai huai mai. Unit ah report kan pek hnu chuan thla thum chawlh hmang tur a chhuah zalen kan ni ta, hun rei cham khawtlai lovin Vairampur atang chuan ka lungkham ram, ka ram neih chhun "Mizoram" ngei chu panin ka rawn haw ta vang vang a. Ka chawlh chhung khan chhungte tân ka va han țangkai nep awm tak! Thingtlang keltil a awm tih takah ram kal a, intih thawven kha ka lungkham ber a ni mai, chawhmeh zawn kha ka hna pui ber a ni ringawt. In a ka awm chang chuan țhiante nen Carrom Board kan pen loh leh ka mu a ni mai, thla thum chhung khan vawi 10 pawh nula rim in ka chhuak awm lo ve. Naupang kilkawi erawh ka peih viau thung, thenawm naupang nawi ho nen hian kan In ah chaw hi kan kil kual put reng mai a, an nu te ho hian an rawn nghak leh far țhin. Ka chhuahvah nikhua a ka haw lam in thil ka hawn sak loh chuan an ngaihdan a ni der lo, hetiang a ka haw tum hi chuan thenawm naupang ho hian kiltin ah min chhuahchhal sup sup tawh mai thin a, zah zel siam a buaithlak thin teh e.

Ka chawlh chu rei lo te chauh e maw ka tih lai in a lo zo ta der mai ka zawm a lo hun leh ta. Mihring kan nih a, ei leh in kan duh a nih si chuan hna thawh loh theih bik hek lo le, phur lo fahran in hna zawm tur chuan ka kal ve leh ta a. Sipai hi chu kan han dâi kim țhin khawp a, VIP Guard a kan țang a nih chuan Hotel nuam ber ber leh VIP car changkang tak tak Air Condition chhungah te kan han chuâng in kan han cheng veng veng a, a hun chhung a liam a, hna dang atan a min detail leh chuan a kar leh lawk ah Bawngchaw phur Sipai motor tawng zet zet chungah te kan chuang leh lawp lawp mai țhin. Kan khawvel hi a zau in kan dai kim țhin bik teh a nia... Haa haha.!

Ka tih mi loh leh eng nge maw then loh na lam ber ni a ka hriat, Ardali(orderly) ah min han dah leh a, ka va han laktlak loh tak, vai ho nen kan culture a in ang lo ropui si, an duhzawng ka lo hre thin si lo. Ardali a ka awmna te hi nupa rek an ni a, kan pu hi direct officer, Short Course a lut a ni a, an la upa lo dun hle. Kum 30 vel bawr an nih ka ring. Ka tlaw em avang khan kapi kha a phun nasa țhin teh e, kan pu khan hnam zia leh chindan hrang nei kan nih thu hrilh in min chhan hram hram țhin. Ka lut leh chhuak reng reng hi pi khan min chik in, min khuahkhirh em em mai a, a chang leh a nelawm in a fel leh em em țhin bawk si, ka hrethiam lo țhin teh e. A thik thu a chhia ni ber khan ka hre thin a, a ngaihna ka hrethiam lo pawh kha a awm viau e. Mahse maw, ka lo hresual hauh lo nia, Pu zinchhuah chang in barrack ah riah loh ka nei ta zauh zauh. Hun a lo kal zel a, an hnen a ka awm tawp lam ah phei kha chuan kapu zinchhuah hun kha kei ai in a nghakhlel fe zawk ta thin a nih kha maw!! Hui ha! ....

**********, **********, *********

(Sipai tan lai ah kan la kual vel a, kan thupui tak chu sipai ban hnu lam tur a nih kha aw.)

[Ngaia]

THE DUBAI CALLING - 4

*********************

Zomama pa
Khawnuam City
Hmun Khawhar Veng
Zorun Cabin



Eng nge maw chen chu mahni ram ah ka han service ve nawk nawk a, heng hunlai pawh hian khawvel ram hrang hrang ah a khat tawk chuan sniper hna thawk tura tirh chhuah ka ni zauh zauh tho mai. Middle East ah khuan ka mikhual lo tih khawp in ka tal tam a, Columbia ram thleng thleng a tirh dawr dawr ka nih chang a awm bawk. Hetiang teh hrep a service nun kawng karkik ka zawh avang hian sipai ni ve si, ka chawlh leh hun tur pawh hi ka sawi lawk ve thei țhin lo. Ka chawlh ve theih hun tur a lo herchhuak chiah tih ah te hian operation order ka han dawng leh tlat pek țhin a, puitling ve ur tawh si hi țap teuh chung hian ka liam leh nge nge țhin. Thingtlang a awm tih takah ka chhungte lah hi hawi harh em em awm hek suh, ka sipai pui te chhuți a an haw fo lai a ka haw ve mai thei țhin lo te chu ka inthlahdah vang ah ngai in, an lung ni lo lek lek țhin a nih kha. Ka hna lamah erawh chuan chawlh ka hman theih loh ho te chu min khawl sak in, allowance ang in hlawh min siam sak ve leh mai țhin.

Hun a lokal zel a, khawvel in a kan bengkhawn leh rapthlak tinreng thlenna hmun Kosavo ram buaina kha a lo thleng ta. An ram hruaitu leh mipui te an mangang a, UNO in theih patawp a pui in, a khai chhuak leh ta a nih kha. Kha buaina ah khan țum hnih lai tirh ka ni a, South Africa a ka hna ngai bawk ka chhunzawm leh ta. American Sniper zinga mi Marlon leh Hendrick te nen khan kan inkawm tam in kan inngai tlang hle, hun harsa leh khirhkhan tam tak kan paltlang ho țhin reng a nih kha, ka ngaihtuah chhuah chang apiangin kha hming pahnih kha ka ngai thar leh țhin.

Kosavo ah kha chuan sniper hna ai mahin counter insurgency lamah kan tal na zawk a, buai zual pui lai phei kha chuan chetna lam apiangah buaina in min hmuak ani ber. Survival of the fittest tih hi kan thupui a ni a, Pathian venna a zara dam khawchhuak țhin kan nih rualin, kan thih leh dam kha kan chet dan phung leh remhriatna in a hril tak meuh meuh a ni. Mipa puitling tawh theuh, nun khawchhuah theih nan a tha leh zung leh remhriatna zawng zawng hmang a inbei kan ni a, chetsual a thiang lo a ni ber e.

Mizoram Police atang pawhin mi enge maw zat Kosavo ah chuan an lo kal ve tih thawm ka hria a, mahse kan tlatna mual a in ang lo bawk nen, mahni thu thu a awm theih ni hek suh, tumah hmu hman lovin ka awm tur hun chhung ka hmang ral a, țum hnih ngawt kal ve mah I la tu amah ka hmu thei ta lo a ni. Pathian ven leh kaihhruaina a zarah Kosavo ram buai a ka hun hman tur pawh chu him leh pangdam takin ka hlenchhuak ve leh ta, ka chetchhuahna hrang hrang te pawh sawi tur tam tak awm mahse, kal kan pur pur rih phawt teh ang.

India ram a ka letna pawh a lo rei ve leh tak deuh hnu chuan Kargil hmun a tirh ka ni leh ta, buaina te leh lian deuh nen he hmun hi chu a inchiah reng a ni hawt e. Pakistan sipai ten a pawng a takin min rawn bawhchilh ngam lo mahse, in ralsai leh silai puak hi chu ngai ah kan nei a ni ber. Cricket ngaihsanna ram ve ve tih takah thil nuihzatthlak deuh, fiamthu a an sawi țhin hi a takin kan tawng tlat țhin. India Cricket Team leh Pakistan Cricket Team an inkhelh țum hi chuan boruak a sang țhin khawp mai, Pakistan lam an chak loh chuan an chak loh rual rualin Pakistan sipai ten silai rawn kap in, bomb te nau deuh ho hi an rawn kap nghal dup dup mai țhin a, bunker a awm loh chang chuan bomb siper a hlauhawm țhin hle. India Team chak lo zawk ah an tan hlauh chuan Pakistan sipai te tih ang chiah hian kan vaichhe thiante ho pawhin an sai nghal zawt zawt mai țhin, an chak lo rilru na inbunruah ve na a ni ang e.

Kargil ah hian ram ri ven ngai a thui em em mai a, ven sen a har hle. Pakistan sipai te ai mah a buaipuiawm zawk chu Pakistan ațang a ramri rawn kân a, helho an rawn luh tir țhin kha a ni. Sipai thuam an inbel ve tawh țhin si lo a, AK-47 Rifle leh bomb chak tak tak te hi lo puanhnuai ru in, an duh na hmun hmun ah pawi an khawih tawh mai țhin a, keini tan lah civil mi nen hriat hran theih ni tawh hek lo. Jammu and Kashmir a cheng te hi Muslim deuh vek an nih ve bawk avangin hmui hmul lah khabe hmul an zuah ve tho si a, an thawmhnaw hak țhin alo in ang bawk nen, chetchhiat fe fe kan nei nawk reng a ni.

Hmelma sipai nen a indo chuan kan inkap a, kan inveh tawn a, rilru nei zawk zawk kan ding chang mai țhin a, a zia tak pawh a awm viau zawk e. Hel ho(Terrorist) erawh chu nunna thap tak meuh a beih an ngai a, a hahthlak dan a ril in, rilru zawng zawng nen a tan mar pât a ngai țhin. Pawi lian tak an khawih tawh hnu ah an tawm khawmna emaw, an bihrukna ah luhchilh an ngai țhin a, huaisen mai bakah chet ran a ngai hle. Hetiang ho hian mi eng nge maw zat an hreng tlangpui țhin a, va zuan luh rual hian, "Engtin nge ka chet ang? He mihring hi hmelma nge an mi hren lai zawk? Min chet khalh tur a ni lo. Etc." Heng zawng zawng hi second chanve ai rei lo ah thu tlukna siam fel vek hman a ngai țhin a, a hautak hle. Silai ai ah Combat fight tangkai chang a awm avangin eng ang mihring pawh hmachhawn thei tur leh chesual zawk a tang lo tura kan inbuatsaih a ngai bawk.

Tin, building chhung a tankhawh tawh va luhchhuah hi Assault Training nen chuan a inkar a hla em em a, hlauh vang ni lem lo pawh hian tiril hi a khur ru der der mai țhin a, hmun vawt takah pawh hian thlanfim hian min bual pap pap țhin a ni. Assault Party hi mibik ni a an hriat thlan khawm kan ni tlangpui a, "Ka ram leh hnam tan a nun hlan huam ka nih ang in, ka thil tih ah hian ka thih leh dam ah kan pu ten mawh an phur lo ang, ka duhthlanna ngei a ni e," ti in hming kan sign hnan thlap țhin.

Ram pa laileng a hel ho nen a inveh chang kan nei bawk a, hetiang hun hi chet ran ai a fimkhur tul hun a ni țhin. Kosavo ah kha chuan khawpui chhung leh khawram tawh ah te kan inbeih tlangpui avangin puakrang silai ka chelek hnem hle, sniper hna bik thawk tura detail ka nih chauh loh chuan long range rifle ka keng ngai lo. Israel silai siam 'K- Latch' kha ka ngainat zawng tak leh ka hman duhber a nih avangin ka keng ber țhin a, mak min ti țhin hle. Țhiante ho chuan M4-Carbine, M16 leh Uzi te an keng tlangpui țhin. India ramah erawh chuan kan hunlai khan khawvel ramdang silai tha an la chawlut meuh lo a, inpawmchilh thil a hman tur chuan AK-47 ka keng mai a, sniper ka nih dawn erawh chuan .303 Rifle, keimahin ka duh ang tak a ka chei danglam leh ka adjust kha ka hmang mai țhin. Sniper kha chu duhsak kan hlawh deuh bawk a, kan silai duh ang tak, ram dang siam pawh nise thlan min phalsak a, min chah sak mai țhin. Kei erawh ramdang silai siam ka hman duh lem loh avangin India kutchhuak chu ka duh ang taka chei danglam min phalsak a ni.

Vawikhat chu Kashmir vur ram, thlaler ang mai a kawng deuh rul, hnim țo chhun te pawh hniam te te awmna hmun ah chuan kan zingkar patrolling chu hel ho zinga an chhuanvawr ho nen kan intawng tlat mai, an palian hlawm em em mai a, an banbul ringawt pawh ka malpui tiat dawn dawn an ni hlawm. Advance a kal mi Pali kan ni a, silai a rawn puak țhawt țhawt a, ka thiante pahnih chu an vir nawk nawk mai, ka han en chuan damchhuak tura beisei chi rual an ni lo tih ka hria. Inbawihsawm hman ni hek lo, keini la dam pahnih tal hian phuba la turin sahimna kan zawn a ngai tlat. Hnunglam a lokal lah in silai ri hria in, min rawn pawh mai dan turah an buai tlat, set ah min rawn ko chhen ringawt mai. Set atang chuan hmun him a kir vek tur leh set ka on leh hma chu min rawn ngaihven lo a, lo inveng tur chuan ka chah a, set chu ka hmet hlum zui ta bawk a. Ka thianpa Harpreet-a nen chuan kalna tur kan in sem a, kan kal hrang ta nghal a, hel ho chu a tam ber ah mi sawm bak an nih ka ring hauh lo, mahse chanchhe zawk kan nih avangin kan fimkhur a ngai a ni. Hel ho hmuh theih lohna liam ah chuan vak zelin, țan hmun tur duh ang ka hmuh hnu chuan che miah lo in ka bawk ta vang vang a.

Breakfast ei hun vel zet a nih ka ring, khua lah chu a țha phian mai bawk si, ka silai a scope chu la thla in, ka rucksack ah chuan ka ak bo ta daih a, hei hi ka fimkhur vang a ni, hetiang khawțha ah hi chuan nisa in ka scope a rawn chhun tle a nga, a reflect chu hmelma ten an lo hmuh zeuh chuan target țha lutuk ka ni dawn tlat, chu avang a thlawn ka ni reng a ni. Darkar chanve awm vel che miah lo a ka bawh hnu chuan ka pang a kham țan der tawh, chutih lai chuan ka hma sir veilam 200yrds velah chuan hnim a che ta laih mai le. Ka rifle chu load in ka han tin vang vang a, ka thaw lâk hahdam lai tak chuan ka silai chu ka hmet per ta. Ka silai puah ruâl chuan ka target ațang a hla lo te te, hmun thum ah chuan tle zauh ka hmu ta, ka duhthusam ang ngei in hmelma te hian scope lakthlak nachâng an hre lo hlauh tih ka hriat rual chuan ka nui sak a.

Mahse, hriat hmaih thiang hauh lo ka nei nghal, hmelma te hi scope hmang an nih avangin kei ai in an hmu chiang in, an hmu hla thei zawk dawn tih hi. Chumi in a ken tel chu, 'ka awmna hmun ngai ațang hi chuan vawikhat dang leh bak silai ka hmetpuak ngam tawh dawn lo' tih hi a ni. Hmelma mi engzat nge an nih pawh hriat loh in ka awmna hriat tumin uluk takin min thlithlai reng tih ka hre tawh a, mawl tak a chet a thiang tawh lo tlat. Hmun dang țanhmun tur tha ka melh fel hnu chuan uluk takin ka silai chu ka han tin leh vang vang a, hmelma zinga langsar ber chu ka va ralsai leh ta dap mai le. Ka silai kah zawh hnu a ka tawlh liam rualin, hmun dang țanhmun tur a ka hual chu fimkhur theih tawp chuan ka pan zui nghal a.

Ka hisap a sual lo chiang tih hriat zetin ka tawmna hlui, ka chhuahsan tak chu hmelma te silai mu chuan a rawn nawr phut ta sat sat mai. Ka duhna hmun ka thlen hnu chuan thaw ka han la halh halh a, scope tle ka hmuh tawhna zawn chu uluk takin ka mit chuan a zawng leh ta. Ka silai chu vawi thum ngawt chu lai hmun atang chuan ka hmetpuak a, inphenna tur lung lo awm chuan min ti thlamuang ve deuh bawk a ni ange. Ka sir leh lam ah pawh Harpreet-a a ni ngei ang, khat ang reng tak chuan silai chu vawi hnih a ri dat dat a, chumi hnu lawk chuan țe țhawt ri ka hre zui nghal. Ka tawmna hi thlamuanpui tho mah ila, awm reina chi a ni chuang hauh lo. Bihrukna țum thum ngawt ka thlak kual hnu chuan silai pawh vawi thum lai a hmetpuak zawm leh hman a ni.

Ni a chawhnu thlangher țan ta tih thleng pawhin thawm a reh ta hle. Ka lukhum leh kawr chu ka hlip a, hmawlh ah tarin ka piah hnimbuk ah chuan ka hawlh che ta laih laih a, mahse rawn chhawn let tu an awm tawh tlat lo, silai chu a puak leh dat a, mahse ka lam hawi a silai mu lo leng reng a awm tawh lo. Set chu ka han on a, țhiante chu ka ko zui nghal a. Kei pawh chu tho in fimkhur takin Harpreet-a chu ka zawng phei nghal a. Ka faifuk raih hnu chuan ka thluk dan let ling chiah faifuk ri in min rawn chhawn tâkah chuan ka thaw huai mai, Harpreet-a a thi lo ve.

Ka han pawh chu che thei chi zia zâng alo ni tawh lo, a malpui dinglam chu hmelma ten an lo kap sawp nulh mai. A silai ka han en a, ka hlauh ang ngei ngei, scope lak thlak nachâng a lo hre tlat lo a nih chu.! Kan țhiante lo thlen hnu chuan rang takin kan bawihsawm zung zung a, set ah motor kan chah zui nghal a. Kan hmelma te ruang chu kan han zawng khawm a, Harpreet-a chuan mi pahnih a kah hlum bakah ka kah hliam hnu, insaseng tum chu hmu fuh in a lo kap hlum leh hlauh bawk. Hmelma ruang chu pakua lai kan hmu a, pathum chu an hnuk la chat chiah lo mahse, ka țhiante ho chuan hrehawm tuar tir reng an phal rei lo kher mai. Tichuan zing lam a kan țhiante pahnih hel ho ten min kahhlum sak tak te ruang nen chuan Camp lam kan pan ta a.

(Next Episode ah chuan sipai atang ban(Terminate) ka ni dawn. Sipai tawng tak in court martial an tia mi kha.? Dubai kohna kan hnaih zel a nia.)

[Ngaia]

THE DUBAI CALLING- 5

*********************

Zomama pa
Khawnuam City
Hmun Khawhar Veng
Zorun Cabin



Tawn leh dai a tam na na na chuan hriat tawk a mual mual hi kan lo nei ve zel a, harsatna leh hrehawm tawrh pawh hi zirtir chawp ngâi miah lo hiân a lo thiam chawp ve theih zel mai. Manganna ten min chim fo thin mahse, hmalam a kawl eng tur chu ka thlir hram hram thin. Mahni nun ka chhui let hi chuan inkhawngaihna in ka khat a, "Kei hi eng nga ti em em bik nge? Tiang teh hrep tur hi chuan khawvel eng hi lo hmu ve lo law law zawk I la," ti in siamtu chaltauh bur bur chang pawh hi ka ngah mai. Thil tam tak ah vuivaina hmu kiltin mah ila, kei ai a dinhmun chhe zawk leh chan chau zawk te dinhmun ka hmuh a, ka hriat hi chuan ka vanneih zia hi ka hre thar leh nge nge țhin. Eng dinhmun ah pawh ding I la, a vuivai zawng a lak chuan khawvel ah hian lungawina reng a lo awm lo a ni ang e.

Kargil ah chuan kum khat zet ka awm hnu in, țum khat chu border patrolling in kan kal leh a, kan kalna hmun chu a mual a rem in a chhengchhe lem lo khawp mai, mual rem tak tak chu a sebawh khup mai a, thing leh hnim pawh a awm nual nghe nghe a ni. Mual zam rai nuam zet mai chu zawh in, kan thlan a tla zawih zawih mai a, kan sir a mualdung inkhawk sei zet mai chu kan kalna ai chuan a sang hret zawk a, a in ep in a inhnaih hle nghe nghe a ni.

Chutia ngawi reng a kan kal lai chuan a hma lam a kal te chu rak țhawt in, silai a ri ta nghal chur chur mai. Kan commander capt. Kuldeep-a chu țeng zet in a au nghal tuarh a, "Hnunglam ah arang thei ang ber a tlan let vek tur," a rawn ti tuarh tuarh a. Chutih ruâl chuan min lo lambun tu te chuan ruang chaicheh min thlak hnan tih hriat zetin hmalam ațang a kan sir dung tluan leh hnunglam chen chuan an au chul a, silai an hmet puak tuarh tuarh mai bawk a.

Ka han hawi kual vel a, kan chan a chauh zia ka hria, kan tlan let a nih vaih chuan hmelma tan duhthusam a target langsar kan ni dawn tih a chiang reng. Ral ram a hmelma nen a intawhchilh thil ah chuan Pu te an awm hleithei tawh lo, kan sahimna turin kan remhriat dan dan a kan chet a ngai tawh. Capt. Kuldeep-a chu ka hnung chiah a kal a ni a, a au ri avang chuan silai mu pawh kan lam hawi chuan a rawn sur hnem phah hle. Chutah Capt. Kuldeep-a tlan let tur chu ka han au thawt a, ka silai chuan amah chu tin zui nghal in, "Tu mah kan tlanlet nghal lovang, nang pawh rang takin bawk nghal rawh, tlanchhiat I tum lui a nih chuan keimah hian ka kap ang che," ka han ti a. A bawh duh mai loh avang chuan ka silai chu ka han load nghal rap a, a bawk hniam ve ta ruai ruai a. Kan commander ber a bawh ve takah chuan, "Mahni awmna ah bawk hniam nghal vek rawh u, tumah tlanchhiat loh tur," ti in ka han au zui that that a.

Mahni awmna theuh a țang chuan theih tawp in kan kap let a, hel ho pawh an buai ve ta hle, hnim kar a bawk phek vek kan nih avangin min rawn hmu thei mai tawh bik si lo, kan zing a mi paruk an kah hlum tawh te ruang chu an rawn kap che leh lawp lawp țhin. Zawi zawi a kan hnungtawlh pah hret hret lai chuan hmelma te awmna lam ah chuan whistle a rawn ri ta raih raih a, rei lo te hnu ah chuan silai ri pawh chu a reh zui ta diak a.

Kan zing a mi ka sikimese thian kawm ngeih tak Lepcha chu mi sawmhnih vel hruai a counter ambush turin kan tirchhuak tawh kha ania, chutia silai a rik zawh rual chuan min rawn au zui ta raih raih a, an lo luhchuah darh vek tawh a lo ni. An rin lohna lam atang a ambush let an han tawk thut chuan helho pawh a barakhaih in, an ralthuam thenkhat leh an thiante ruang pawh chu hlawm hman lo in, hniak pherh vungin an lo tlanchhia a lo ni awm e. Hmelma te ruang chu kan han dap khawm a, mi pakua lâi kan lo kaphlum ve reng mai, hliam insaseng thei pawh an awm nual ta ve ang. Camp lam atang chuan kawng hnai ber ah motor an rawn tir a, kan thiante ruang leh hmelma te ruang nen camp lam ah chuan kan let zui ta a.

A tuk ah chuan Capt. Kuldeep-a chuan chunglam a report pek tur chu a ziak a, JCO chin chunglam chu a ko khawm bawk a. Kei a hming a Non-Comission Officer bel ve țawng țawng chu mak tak mai in min ko tel ve tlat mai, a report ziah chu a han chhiarchhuak a, siamthat ngai a awm tak thulh ah kan hriat ang ang te thawh tlang turin min beisei a lo ni. JCO kal ve ho te chuan sawisel tur an hriat loh thu chu zah tak chungin an sawi tliar tliar a, mahse ka ngaihdan a ni ve tlat lo. Huaisen taka beitu sipai te chanchin leh an hamthatna tur ziah lan reng a awm ve lo, a ma kaihhruaina hnuai a kan chet dan leh a hamthatna tur chu a ziak kur nguai a ni ber e. Midang zawng ten an sawi tur ang an sawi zawh hnu chuan kei chu min rawn râwn der ve ta, muangchang chuan dingchhuak in ka han salute a. 'Sir, nang chu kan hotu lu ber I ni a, officer lian tak leh dinhmun awh awm tak a ding I ni. 'I report ziah kha dawt a ni e' ka ti hauh lo, mahse nangma chanchin leh I rorel dan ai a ziah lan phu zawk hi an awm ka ti. Thahnemngai tak leh huaisen taka beitu, I naute zingah nunna chan hial te an awm a, hliam tuar an let zut bawk. Kan hriat tlan theuh ang in I command-na hnuai a sipai huaisen tak tak te avang a dinhmun tha chang thei chauh kan ni. Ka ngaihdan min zawt ta rau rau bawk a, kei chuan khang mihuaisen te kha chawimawi an phu ka ti a, hamthatna lian ber dawn hi an phu ka ti, an chanchin tha lam leh an chetdan huaisenthlak tak tak te kha ziak lang tel la ka duh a ni' ka han ti a.

"Thurawn lakna atan a ko che ka ni lo, ka report ziah min pawmpui tur a ko chauh che ka nih hi I hre na nge?" a rawn ti ta khui khui mai a, ka beisei loh lam daih in thil a kal ta tlat. Mahse, ka ngaihdan ka sawi laklawh tawh. 'Ngaihdan sawi turin min sawm a, ka sawi ve mai a ni e' ti in ka chhang a.

"Chuti chu ka report ziah I pawm lo tih na a ni maw? Eng ang ah nge I lo in ngaih a? Ka tih dan tur min hrilh turin ka chung a mi em ni I nih?"

'I chung a mi ka ni e, tih thu ka sawi hauh lo. A hmun a kal leh boruak engkim hria a tawng tu kan ni a, nang chuan hamthatna dawn belh lo pawh ni la I dinhmun hi a awh awm tawh sa hrim hrim, nangmah indah țha in, I nau te tan report tha tak ziak la ka duh mai a ni.'(Captain chu a thinrim hmel ta ngei mai, duhamna hian chin tawk lem a lo nei lo a ni ang e, mahse dawih aw ka chhuah duh bik lo.)

"A ni tak maw! A hmun a kal zing a mi ngei I ni a, inbeihna hmun a min kah tum tu ngei kha I ni tak e. Report ah ka lo la ziak tel reng reng hleinem, ka ziah lan avang hian explanation call I tawk ngei dawn tih hi I hre chiang ti raw?" ti in a nui lui vei suk a.

"I thu vek alawm, a pawi ka ti khawp mai, lo tlanchhiat tir che I la pen nga pawh I pen hman ngut a nge maw chu? I nunna hum nan ka lo vau che chu ka tih palh der ani' ka han ti let ve sak a.

"Ka nunna I hum maw? Tlanlet I la ka thi ngei dawn tih I chiang em ni?"a rawn ti leh a.

'Tlanlet tur a I order zawmtu te chan chu I hmuh ve reng kha, vawi tam pen hman awm lo in an let tawp tawp mai a ni lawm ni?" ka han ti a.

Thinrim hmel tak a min melh khui chung chuan, "A tawk e, ka ziak ngei ang" a ti bung nghut a, keipawh chuan, 'Ziak ngei ang che', ti in ka chhang a, midang ngaichang lek lo chuan a room chu ka chhuahsan zui ta nghal a.

Kan captain chuan a lo ziak ngei aniang chu, ni thum hnu lek ah chuan unit headquarters a in report tur a kohna order chuan min rawn deng zui ta nghal a, kan captain pawh chu kal ve nghal tur a koh tel a ni. Rokhawlhna eng eng emaw avangin kan advance headquarters ah chuan motor kan in daih lo hle mai, loh theih lohna avangin Capt. Kuldeep-a nen chuan motor pakhat ah kan chuan tlan a ngai ta. A hma lam a lo inhmuh thiam loh tawh sa nen, motor pakhat a chuang dun chung a unit headquarters kan han pan chu sawi tur avang duh hle, driver nen an inbiak tih loh chu kawng tluan in kan inbe miah lo mai.

Engtin tin emaw kan thlen zan chu ka hmang liam ve mai, thian hlui te chuan min lo lawm in, min lo ngai phian mai leh nghal a, ka rilru ipik țun pawh a chhawk zangkhai phian mai. A tuk khua a lo var a, office țan hun a lo nih chuan Room orderly tur ka nih hre rengin ka insiam mawlh mawlh a, ka sipai thuam famkim ka inbel hnu ah chuan ka medal(Tangkapui) dawn ho zawng zawng chu la chhuakin, ka kawr hma ipte chungah chuan ka khai uai ta far a, inringtawk hmel tak chuan kan CO office lam chu ka pan ta zan zan a.

CO room ka han lut chu an lo kim tawh kher mai, kan SM(subedar major) atang a chunglam zawng chu an lo kim vek mai a, kan wing commander Capt. Kuldeep-a ngei pawh chu a lo thu vang tawh mai. Ka luhlul a chhuak lak lawh, a tu a mah, kan CO thleng chuan ka salute hmasa duh bik tlat lo, min lo hmu hmasa apiang chuan ka medal tar tlar ho chu en in, an thut hmun atang ding chhuak zelin salute an lo pe that that a, kan CO ber pawh chuan dingchhuak meuh in ka medal chu a rawn salute ve ta a. Chutah kei chuan harchhuak thut ni awm takin kan CO chu ka salute ve ta a.

Chutia kan in salute hnu chuan kan vai mai in kan ngawi ta thap a, eng vang a Inquiry chu la a, thu min zawt thuai thuai lo nge an nih ka hrethiam lo hle, bang bo zet chuan ka Takam chem bo hawi vel mai mai a ni ber e. Kan ngawih thap lai chuan khawng em em in kan pu te ho chu an rawn ding ta suau mai, kawngka lam chu ka han thlir zui ve vat a, min duhsak a, min lo chhuang ru em em thin tu Brig. N M Gupta chu a lo lut hlawl mai. Kan chanchin ziahna file an put up chhoh zel chu hmu in, hearing neihna chu rawn hmang ve turin a lo kal vang vang a lo ni awm e.

Brigadier a țhut fel a, tui te a in zawh hnu chuan kan CO chuan hearing a țan ta, Capt. Kuldeep-a chu a han zawt hmasa a.

"Captain, Zothanpuia chuan kah tum che in silai a chelek tak zet maw? I report pek hi a dik chiah em?" a han ti a.
Capt. Kuldeep-a chuan engkim thil thlen dan chu a sawi ta zar zar a, a sawi zawh hnu chuan mak ti hmel em em in an hawi ka ho hlawm mai. Brig. N M Gupta chuan min koh dan thin ngei a min ko in, "My Boy, heng an thusawi ka hriat zawng zawng hi a dik em?" ti in min han zawt a. Kei chuan awlsam zetin, "Sir, a dik ngei a lawm," ka lo ti a.

Mak atih mai bakah a hmel ah chuan thinrim hmel a lang tel ta bawk. "Ka lo ring in, ka lo chhuang em em thin che a, ral that tur I nih hi ka hria, I that fo reng bawk, mahse, thawhpuite em chung a ralthuam lek duhna rilru I neih ka lo ring ngai hauh lo. Engvang a Captain chu kah tum nge I nih? Eng ang fakau a nasa in nge I lo huat a?" min ti ta khur khur a.

"Sir, a mah leh kan zavai a nun khawchhuah theihna tur atân a kah tum ka ni," Ka han ti a. An hrethiam lo telh telh mai.

"Kah I tum avangin Captain chu a dam ta hlauh zawk I tihna a ni maw?" meinei zet hian min han ti leh a.

"A order ka sut tir theihna awmchhun a ni a, sut lovin kaltlang pui tir ta ila, a order zawmtu hmasa mi paruk ruang in thawn let rual khan a ruang pawh hi an khua ah in thawn kir ve daih tawh ang. Captain mai bakah mi engzat ruang nge in thawn haw tel ang tih pawh hriat a ni lo, a hranpa in Captain hi huatna ka nei lo ve," Ka han ti a. Pu ber tawng leh hma chuan Captain chuan lo tawng khalh in, "Eng dinhmun ah pawh ding I la, silai a min tin, leh I load hial phei kha chu dan hma ah thiam I chang thei lo hrim hrim. Ka thi ngei dawn tih pawh I chiang bik em ni?" a lo ti a. Pu Gupta chuan, "Nang Captain ui cho kha, thusawi turin hun ka pe lo che, lo ngawi chip cham rawh," a rawn ti hrawk a, a tawp chiang ngei mai.

Chutah Pu Gupta chuan chiang leh zual a min melh run chung chuan, "My Boy, in operation kal tan tirh atanga a tawp thleng in thil thlen dan zawng zawng kimchang takin min han hrilh teh le," a han ti a, kan pu te zawng chuan hriatchian châkin an beng an rawn dawh țhup a ni ber mai. Capt. Kuldeep-a pawh ka zah duh tawh bik lo, patrolling a kan kal lai helho țhahnem takin min lo umbush dan ațang a țan in, Capt. Kuldeep-a rorel dan te, a rorel ang a tlanchhe hmasa mi paruk an rawn kah hlum nghal dan te, kan tlanchhia anih chuan min umbush tu te tân target langsar lutuk kan nih dawn avang a kan thih hnem tur zia te, chumi thlen tir loh hrâm ka tum avang a Capt. Kuldeep-a chu silai a tin ka nih dan te, a order ka sut tir theih dan awmchhun a nih dan te chu ka han sawi par par a. An vai mai chuan mit tla lo lek in mit thlir thap mai. Beng dawh hu chungin chilthli thlauh lo chauh in min ngaithla a ni ber e.

Rei lo te chawl zawk a thaw ka han lak zet hnu chuan Pu Gupta bawk chuan, "Ambush na hmun in chhuahsan hnu chuan Captain nen hian in inbe tha chhunzawm ta lo tihna a ni maw?" ti in min zawt zui leh a.

Kei chuan chhang leh in, 'Sir, biak that loh pawh a awm lo, chung lam a report a rawn pek tur a ziah tawh sa thlir ho na hun a JCO ho a koh khawmna ah pawh, an zing a tel ve turin min la sawm thlap, a report ziah ah kan chungchang reng ziah lan a awm lo. Tun a hetiang boruak kan thlenna chhan hi ka chhan dawn chuan a hma lam chanchin thleng a ka sawi lan vek a ngai dawn a ni,' ka han ti a. Pu Gupta chuan, "Sawi vek tur a hun pek I ni e," min ti leh ta a.

Ti hian ka chhunzawm leh ta, 'Ambush kan han tawh thut khân kan chan a chhe em em a, mahni awmhmun ah țheuh bawk phek vek tur a ka au tuarh tuarh hnu chuan bawk phek vek in theih patawp in kan kap let ve zel a, zawi zawi a hnung tawlh pah zel turin ka signal zauh zauh reng bawk a. Nimahsela, hmelma ten min kah nasat em avangin kan chan a țha teh chiam thei rih chuang lo. Chutih lai chuan kan Havilder huaisen zet mai, Mr. Lepcha chu mi sawmthum vel hruai a tawlhkir hmanhmawh tur leh, a rang thei ang ber a helho hnunglam atang a counter ambush rawn nei tur chuan ka au nghal a. Keini ambush huamchhung la chhuahsan lo te chuan nasa takin kan lo kap let ve char char a, chutih lai chuan Mr. Lepcha leh a hote chuan hnunglam atang helho te chu huaisen taka rawn bei in, an rawn umdarh ta vek a, mi tam tak dam in kan rawn chhuah theih phah a ni.'

'Capt. Kuldeep-a report ziah thlir ho na ah khan sawm ve ka nih ang in ka tel ve a, a report ziah ah khan a ma chet țhatna leh a hamțhatna hmuh theih dan bak a ziak ta si lo, diktak chuan naute thlazar hnuai a biru leh dam khawchhuak a nih hi, kan inkah chhung zawng khan faktlak a a chetna awm leh, naute tân a thlamuanpui tlak a nihna reng ka hmu lo. Nunna thap meuh a beitu, kan sipai huaisen tak tak te hming leh an hamțhatna tur reng a lang ve lo tih ka hriat khan, ngaihdan sawi tura min sawm veleh mi huaisen te chetdan chu ziak lang ve tur leh, amah chu dinhmun tha sa anih avang a inziak tel ve lo turin ka ngen a, chutia ka ngenna chu ka rinloh dan zawng tak mai in a ngai haw ta em em mai a, a report ziahsa chu siamțha leh in, a nunna ka humhim sak nan a amah ka vau chu "Min thah a tum" ti zawng a la in, in hnen ah tihian report a rawn thlen chho ta a ni e,' ka han ti a. An ngawi ta vang vang hlawm a.

Chumi hnu chuan kan Lt. Col. Pratab Singh chu a rawn tawng chhuak hmasa ta ber a. "Anih leh Captain silai a I tin lai khan, a order chu sut duh lo in kaltlangpui ta se I kap duh tak tak ang ngem?" ti in min zawt ta a. Kan Lt. Col. Pratab Singh te leh kan Captain te hi Gujarat mi ve ve an nih avangin an ințan ru viau ang tih pawh ka hria.

Kei chuan, "A order kha sut duh lo in min zawm luih tir vek dawn anih chuan ka kap ngei ang, Captain nunna leh sipai pakhat nunna hlutdan hi a inchen vek a ni, mi tam tak kan thih dawn ai chuan ka kap ngei ang," ka ti ve ta ngat a, bang tur a ka indah tawh tho avangin tumah ka zah duh tawh bik lo.

Lt. Col. chuan "Chu a chiang reng a lawm, tualthah tum dik tak I ni a, I tawngkam ngei in a nemnghet a, eng dan mah in a chhan thei lo che, I service chu terminate tur chiang bal a ni e," a ti zui nghal a.

Pu Gupta chuan, "Colonel, a nunna atan a ti a ni a, thiamna chin chu a nei asin," ti in min lo chhan a, an ngawi leh ta thap mai. Chutah kei chu min rawn en in, "I tân unit ngai a service zel chu a him tawh lo in a hrehawm dawn a, Captain hnenah hian thupha châwi in ngaihdam dil la, tichuan I service zawm zel theih nân I unit ka sawn sak ang che," min ti ta a. Kei chuan, 'Sir, a țul lo ve, ka thusawi ațang khan in thu tlukna tur chu siam u la ka pawm e. Captain hian a nunna kan humhim sak avang hian kei leh a sipai te hnenah lawmthu sawi mawlh mawlh tur a nih lai in, a let ling in ngaihdam ka dilna chhan tur awm reng ka hre lo, ka dil buai lo mai ang e. Tin, Unit min transfer sak pawh ni la officer chin chu an inhria in an ințan țhum a, "Dikna hailang ngam, mihuaisen" tih ai chuan, "Pute khing ur ur ngam mi chapo, misual," ti in min kawk zui zel tawh dawn, sipai nun ah hi chuan dikna in hmun a chang ve lo, kan thiamna ngei ah pawh pute kan khing hneh thei chuang lo, tih chu I hriat vek tho ka ring. Termination Order in siam ka ring a, ka pawm bawk e," ka ti ve ta salh a. A thaw chu ala halh a, luhlul min tih hmel hle. "I thu ni rawhse" a ti chuai ta raih a.

Chumi hnu chuan Capt. Kuldeep-a lam ah an tuan ve ta thung, a chet dan zahpuiawm an tih zia te chu sawi chhuak in, an ankhum bawih bawih hlawm mai. Hruaitu ni tlak a an ngaih loh thu chu a ri zing teh e, a report ziah pawh chu cancel sak in, Patrolling a kal ho zawng zawng te report kimchang tak a ziak vek tur a tih ni se, an ziah zawng zawng lak khawm hnu ah chuta tang a, report dik zawk siam leh chu an thu tlukna a ni ta. Capt. Kuldeep-a pawh a thil tih dan dik loh avangin Departmental Inquiry lak ngai hranpa pawh an ti lo a niang chu, increments kum 4 chhung atan bond sak anih thu chu Brigadier chuan a hrilh nghal hmak bawk a, a hmel pawh a ngui ta ruai mai, a khawngaihthlak let ling hial zawk in ka hria.

Chutah an ngawih thap lai chuan Brig. N M Gupta hnen ah chuan, "Sir, thu sawi duh tlem te Captain sap hnen ah hian ka nei a, inhriat lai hian sawi min phalsak hram ta che?" ti in ka han dil a, a ni chuan, "Phalsak I ni e," ti a min chhan hnu chuan an ngawi ta thap a. Chutah Capt. Kuldeep-a lam chu hawi in, 'Sir' ti pawhin ka ko duh bik tawh lo.

"Mr. Kuldeep, ka hmel hi chiâng takin han en teh, Aryans thlah hmel a lang lo va, India ram a hnam hrang hrang te hmel ang ka pu hek lo. Hnarngul hniam leh bang chhah, biangki sâng Mongolian thlah dik tak ka ni tih I hmu ang. Keini Mizo te hi British in min rawn awp khan 'Divide and rule' policy hmang a țhen darh luih a awp beh kan ni a, chu chuan kan ram chu hmun hrang hrang a min bei tir in, unau pianpui dik tak te pawh inhmu turin international boundary kân fo kan ngaih phah asin. Hmasang ațangin Mizo te hi Indian kan ni ngai lo a, kan ni ngai hek lo ang. Tih luihna avang a khua leh tui a seng luh chawp kei pawhin nunna chan huam a thahnemngai tak a India ram leh mipui te tan ka bei thin a nih si chuan, nang Indian dik tak zawk hian engvangin nge I theih ve loh? Hmelma hma ah hian thihna tawk turin vawi engzat nge ka zuan luh tawh? Ka ral thah chanve zat pawh hi ila penchhuak ve em ni? (Ka medal ho chu kawk in) heng te hi I hmu em? Hei hi i duh ve em? Hei hi, hei pawh hi, hei pawh hi....? Heng te hi ka dil a ka neih ah I ngai em ni? Hmingțhatna dik tak chu mahni insawithiam a pute hnen ațang a dawn chi a ni ngai lo, lo dawng pawh nise hlutna a nei hek lo, thi leh thau pawlh a nunna thap a hlawhchhuah chi anih hi. In ngaihtuah harh rawh, I naute'n thih pawh hlau lo a huaisen taka an beihna te chu haider sakin, engmah tih nei ve lo ber khan hmingțhatna zawng zawng pumbilh tumin I bei duh a maw? Zak ngawih ngawih tur I ni."

"Mahni inhaivurna khan I ram hi a chawichhuak lul lo ang. I thlah te tân he ram hi chen zelna tlak a nih theih nân nangmah ngei khan thahnemngai takin thawk ang che, I vawiin hun hman hi I fate naktuk hun a lo herchhuah theihna tur a ni tih theihnghilh suh. Kei chu maw, India ram mi ka ni reng emaw, ka ram leh hnam hi mahni ke a ding thei a independent a hmu anih pawhin a lem chuang lo, ka awmna hmun apiâng ah ka chi liahna ram leh hnam tân theih tâwp ka chhuah zel fo ang. I hmalam hun ah mi tha ber lo ni thei ngei turin duhsakna ka hlan a che,' ti in ka thusawi chu ka ti tawp ta a. An vai mai chuan an ngawi thap a, an hawi hrek hrek hlawm mai. Chutah Brigadier hnen ah chuan, "Sir, kan zo tawh tiraw? Ka kal tawh a nge," Ka ti a, a lu buk nghat pah in, "Naktuk ah I order chu an rawn pe dawn che nia, lo nghak hrâm ang che," a ti a, ka inher zui ta nghal a.

Kawngka ka chhuah hma chuan an vai a ding vek in, ka medal chu an rawn salute leh sap sap a, ka chhuah rualin Brigadier N M Gupta țawngkam chu ka hre zui chiâng khawp mai. "India ram chuan a sipai huaisen leh thaber zing a mi a chân ta," a ti chuai raih a.

Chutiang teh nuaih chu ka boruak tawn ni mahse, ka thawveng ru phian ta mai. Zankhat chu Army camp ah chuan ka riak ve leh ta a, a tuk zingah dam tak a tho in, tukthuan eikham hnu ah chuan meizial zu in ka mu zal ar ar a, ka lo muhil zui chek a niang chu, Dak runner chuan min rawn sawi harh nawk nawk in lehkha ip chu min pe a. Ka han hawng thuai a, ka chhiar zui nghal, ka Service Termination Order chu a lo ni ngei mai, ka document chu a rang thei ang ber a Dak ah rawn thawn an tum thu rawn ziak lang nghal in, ka pawisa khawl sa bakah bonus ka hmuh hrang hrang leh allowance ka neih te, ka leave salary te chu ka account a rawn thun a nih tur an rawn ziak tel bawk a. Ka tho vat a, ka thawmhnaw neih tam lo tak chu ka thingrem lian ah chuan khung khawmin ka insiam zawh veleh chempui tah hriam hunchhung pawh nghak khawtlai tawh lo in Army hmun chu ka chhuahsan zui a, thiante ho chuan mittui tling țeuh in min bye bye lap lap a. Train Station lam chu pan vat in, Mizoram lam pan a haw tur chuân Train hmasa ber ah ka rawn chuâng ta vang vang a. Tunah chuân sipai ni tawh lo in, sipai atang a băn, Terminated ka ni ta e. Kan nu leh pa ho ruâl, hmanlai sipai țawng takin, 'Kawt marsial' an tia mi kha..?

*************************

(Next episode ah chuan Valkyrie Company hnuai a SWAT Unit ka zawm chhoh dan kan luhchilh dawn nia)

[Ngaia]

THE DUBAI CALLING - 6


Zomama pa
Khawnuam City
Hmun Khawhar Veng
Zorun Cabin

***************************

Mizoram a kan In ah ngei chuan duh hun hma a koh let leh ngai tawh hauh lo chuan ka cheng ve ta vang vang a, thingtlang khua tih takah hnathawh tlangpui a in ang put a, rual awh pawh a na lo nge nge e. Thla thum vel a liam hnu chuan sipai ka lo nih ve tawh na ațang a ka la dawn let ve theih thil te chu ka dawng kim ta vek mai. Thingtlang a kut hnathawh a, sawhthing leh buh hmun thlawh chu ka nitin hna a ni ve ta mai, taima nih hi tlin ka inti lem lo, mahse engmah thawh hreh ka nei hauh lo thung a, nitin kawl a nichhuak chhiar a feh țhin pawh chu hrehawm ka ti hauh lo. Chutih lai mek erawh chuan ka pa chuan ngaihdan dang a lo pu daih thung, tuk khat chu tukthuan kan ei lai in, chu a duh dan chu a sawichhuak ta a. "Mampui, I hriat ang hian kan chhungkaw zing a hawiharh ber, vak zau leh mi ningkhawng hre ber I ni a, hetia hna kan thawk ho dial dial hi țha lo ka ti hauh lo, amaherawhchu ngaihtuahna dang ka nei tlat mai a, I zawm thei ang e maw chu le?" a han ti a. Kei chuan, 'Ka pa, eng lam nge ni a? Fa te tan a ngaihtuahna nasa tak I sen hnu a ruahmanna I neih chu thil chhe lam a ni lo ngei a nga, zawm theih loh thu a awm nang, han sawi hmasa phawt la mawle," ka han ti a.

Ka pa chuan, "Hei I hriat angin, kan chhungkua chu heti mai hi kan ni a, tun a pawisa tlem a zawng I lo khawl sa hi kan hman zawh chuan mi hnuai a inhlawhfa chung a thlawhhma enkawl leh hi kan hmabak chu a ni mai. Chuvang chuan heti zawng hian ngaihtuahna ka lo seng a, tha I tih zawng te a ni ang nge maw chu! I hna bansan tawh pawh ni la tawng I rawn thiam haw tal a lawm hei, mi hnuai a inhlawh ngai lo a thlawhhma kan inenkawl theih nan I sum khawl la awm ang ang hian sumdawng la ka duh a ni. Fimkhur takin awm la, rilru nei taka thil I tih chuan kan chhungkua hian kan chhawr tangkai ngei in ka ring tlat a ni," a han ti dap dap a. Ka ngaihtuah vang vang hnu chuan, 'thlawhhma enkawl lam a min awl thei dawn a nih chuan ațha viau tak ang chu, kar thar lam ah hma lak tan dan tur ka lo ngaihtuah dawn nia,' ti in ka chhang a, kan chhungkua a kan ngaihtuah ho hnu chuan țha kan ti tlang ve khawp mai. Kar thar kan chuankai tak hnu chuân kan district khawpui Champhai ah chuan ka phei ta nghal a, incheina thawmhnaw zawrhna dawr lian deuh deuh ho chu be kualin, Aizawl lam ah ka tlang thla leh a, tah pawh chuan dawr hrang hrang ka be kual dum bawk. Tichuan bul țanna turin Kathmandu lam pan chuan ka liam thla zui ta vang vang a.

Incheina thawmhnaw duh uluk chi tih tak ah, ka thawmhnaw supply ho pawh chu kar lo ah ka pe zo ve ta zung zung zel mai, stock pawh ka nei hman ngai meuh lo, Pathian thatna zar ka zo ve zel a ni e, kei misual hian.! Kathmandu mai ni lo in Lucknow thleng a zuk kal pawh ka nei ta fo mai, hah in rim ve viau thin mah I la hah ka sawi phal meuh lo. Tiang reng reng a hmun tin kar tawn zak zak chung chuan kum khat chu ka hmang zo ve ta mai, ka chhungte pawh mi hnuai a inhlawhfak ngai lo in ka siam ve thei a, nuam ka ti ta phian mai. Thlawhhma lam a hun tam zawk an hman theih avang te pawh a ni ang nge, kan chhungkaw thawhchhuah pawh a pung ve thur mai, mi te dinhmun phak lem lo mah I la, kan chhungkua chu kan hlim veng veng mai a ni.

Chutiang a sumdawng a ka vahvelna ah chuan țum khat Lucknow ka kal chu Bazaar ka panna kawng ah ka beisei hauh loh ka tawng ta tlat mai, sipai ka nih lai a section khat a ka awm pui tawh hnu, ka thian kawm ngeih em em Ranjeet-a nen kan in hmu nawlh mai, min ngai tih hriat fahran chuan mi zingah min rawn kuah chung chung a, mipui tamna hmun Bazaar kawng e ti lo chuan kan phul ri le lu mai, lunghlui lam lam te pawh a ti leng rum rum thei alawm mawle. Ni tak e, ka la sawi hauh lo, Ranjeet-a hi Lucknow tlangval ngei a nih tak kha maw!

Chanchin eng eng emaw te in zawt pahin restaurant pakhat ah chuan kan chawl lut dun a, nunhlui eng eng emaw te kan sawichhuak nual mai. Engti tih a he lai hmun a inhmu teh nawlh nge maw kan nih le? tih min zawt a, ka sumdawnna lam avang a zin ka nih thu ka hrilh lai chuan a lo bu nghat nghat a. "Chuti a nih chuan hei ka awm lai a nia, hotel a thlen kher a țul hleinem, kan inlam ah innghat phei I la a țhat dawn chu. E tak a! I lehkha tur pawh pathum lai ka kawl tak a sin, rawn thawn mai ngaihna ka hre lo che a, ka dahtha char char a lawm," a ti a, Ranjeet-a mizia atang hnial in awmzia a nei dawn chuang lo tih ka hriat avang chuan ka aw ve ta mai bawk a. Ka thlenna hotel ah chuan let leh in, ka thawmhnaw chu kan va la sawk sawk a, Ranjeet-a te in lam pan tur chuan kan liam zui ta nghal a.

Ranjeet-a te in kan han thleng chu a au le lu mai, a nu leh pa leh farnu te chu a au khawm a, inhmelhriattirna min neih pah chuan, "India sipai tha bik commando ho zing a a tha ber pawl, thu dik tan ngam avang a hna zawng zawng chan vek ngam khawp a mi ropui mikhual in nei a nih hi," ti in a au lar lar a. Min sawina chu 'em em a,' tih chin nei mah I la ka tan chuan a hahdamthlak leh ling phian mai, Ranjeet-a chhungte chuan min zah em em bakah min ngaisang hmel kher mai, inthlahrun ngai hauh lo in ka awm theih phah ta hlauh zawk a ni.

Tlailam boruak chu a nuam ta kher mai, chhun khawlum uap pik cherh churh te chu a reh a, Ranjeet-a nen chuan an balcony ah chuan thu in kan ti ti a, a farnu in thingpui min rawn pek lai chuan a tho vut a, a room ah lut in, reilo te hnu ah chuan envelop pathum lek va va chung chuan a lo let a, ka hma dawhkan ah chuan a rawn theh thla țhak a. A kawm a address ka han hmu chu ka hrethiam lo hle, Oslo atang a lokal daih a ni tlat. Kan han hawng a, ka han en chuan UN Military a ka awm lai a ka hrawn fo tawh hnu, Mr. Kerimov-a hnen atang a lokal a lo ni, mahse a ni kha chu Ukrainian a ni bawk si a, eng nga ti teh daih nge maw ni, ka bo hu mai. Sipai a tang a chawlh tawh thu leh, company pakhat 'Valkerie Company' a zawm tak thu a rawn ziak nual mai, a hming pawh dah bo rih in, 'Mr. Youri Gushev' a nih tak rih thu a rawn ziak bawk. An pawl zawm tur a min duh thu leh ka tan hmun a awm reng tur thu a rawn thai lang tel bawk a ni.

Lehkha dang chu kan han hawng leh a, chung lehkha pahnih ah erawh chuan ka chanchin hriat a beisei thu leh, an pawl zawm ve tur a tih takzet a min sawmna te, an mamawh chhanna dik tak ka nih a rin thu te a rawn ziak nual bawk. Tin, an company chungchang chu tlem a rawn sawi zau bawk a, mahni a inrelbawl an nih thu te, venhimna leh chhanchhuah hna thawk tur a hmun hrang hrang a an kal chhuah thin thu te, mimal hausa leh company mai bak ah sawrkar thenkhat te pawhin an rawih thin thu te a rawn ziak nual mai. Behchhan sawrkar nei a khawsa an ni lo va, under cover a hmun ral ti tawp ah pawh khawsa thin an nih avangin mahni inrintawk leh ngaihtuahna fim sen a ngaih nasat thin zia a rawn sawi chip chiar khawp mai. Hetiang a command leh thupek khauh tak hnuai a khawsa lo a, mahni remhriatna hmang ngei a zalen tak a chetchhuah hi ka lo chak thin kha chu a ni ngei mai. Mahse, kan chhungkua kan dam tlang a, kan chantawk a kan lungawi rih em avangin ka chel a ziat tawh hran lo a, zawm ve han tumna leh chakna pawh ka nei hauh lo.

Ranjeet-a chuan, "Zawm I tum emaw, tum lo emaw, ti khawp hian I chanchin hriat duh in a rawn ngaihven che a nia, an company chu zawm tum hran lo mah la I chanchin chhia țha tal chu kan hriattir let ngei tur a ni," a tih tlat avang chuan Mr. Youri lehkha tur chu ka ziak ve ta nge nge a. Sipai atang a ban ka nih tawh thu te, zalen taka hun ka hman thin tawh thu te chu hrilh in, an pawl zawm chakna erawh ka neih lem loh thu te chu ka ziak kawi ve nual a, fel ka tih thu leh ka ngaih țhin zia ka ziak lang tel bawk a, a tawp ah chuan Mizoram a ka Address diktak chu chiang takin ka ziak lang ta a ni. A tuk ah chuan Ka bungraw lak tur dap khawm in ka chhuak a, chumi pah chuan Lucknow tual lai a Dak bawm lian sen vur mai ah ngei chuan lehkha ip chu ka thlak ta a. Ranjeet-a te chhungkua chu an lo fel bawk nen, a tir a ka cham tum hunchhung ang ai a ni thum ngawt a rei ka cham belh ta nghe nghe a ni,chu mi hnu chuan Mizoram lam pan in ka lo haw chho ve leh ta nge nge a.

Mahni in pawh luah lum lutuk hman lo chuan sumdawng te nau in ka tei chhuak deuh reng mai, Ranjeet-a nen a kan inhmuh tum a Lucknow ațang a ka haw hnu lawk ah chuan Mr. Youri hnen atang bawk chuan lehkha chu ka hmu leh ta a, mahse ka chhiar liam puat tih mai loh chu sumdawng a mi dawr bungrua supply reng reng in ka buai em a, chhan pawh ka chhang let ta lo. Tin, ka rilru ah chutiang lehkha ka dawng a ni tih pawh ngaihtuah hman lek lo chuan ka phar buai ve bawk atin ni.

Ka sumdawnna chu tluang khat ve viau thin in ka in hria, ka hah pui viau na in nuam ka ti phian mai. Mahse, mihring te'n kan beisei ang diak diak in thil a thleng ngai lo a ni tih tichiang turin ka sumdawnna ah harsatna lian tak ka tawk ta tlat mai, rilru a va han hah duh thin map map em! Kum 2000AD hma lam deuh kha chuan kan incheina tlangpui hi a hmei a pa in Western Dress a ni a, chumi chu remchang ah la a sumdawn nan a hmang ve ta pawh ka ni reng a ni. Kum 2000AD kan han chuan pel chho a, thil thar tam tak leh chin dan thar a lo chhuak a, thangthar lo chhuak zel chuan style hran an rawn duh ta, khawthlang lam thawmhnaw kan ngaihsan thin chu hnuchhawn hret hret in, China lam chhuak leh Korean Top lam pang kan ngaisang in kan inbel chho ta thut mai, chu chuan ka sumdawnna ah chuan nghawng liantak nei in, ka thawmhnaw lak ve te'n hralh a tla tawh tlat lo. Khawchhak lam thawmhnaw leh bungrua han ngaihven tur lah in ka dai loh lam ram a nih mai bak ah, ka tawng thiam ho tangkai lutuk lohna lam ni tur ah ka ngai tlat, tih ngaihna dang ka hre ve tawh lo, kei mimawl thluak hian hma lak dan thar a ngaihtuah chhuak zo ve tawh lo ve.

Ka ngaihtuah nasat poh leh ka bei hi a dawng a, ka thinrim hian min siamtu bawk hi ka chaltauh leh ngawt mai thin. 'Ka nu leh pa lak ah hian ka vui tihna ni lo in, eng ah nge Pathian hian mi hausa tak karah min lo pian tir loh le? Duh duh nei thei ah lo piang ni I la hetiang a rilru hah reng reng a awm hi ka ngai lo tur.! Midang nen kan inkarah thu chhia/țha nei in, thinrim in mi kut ka thlak emaw, tual hial lo that ta pawh ni I la, Jail bang rei tak chhung ka zut dawn der si lo, dan hre mi(ukil) lâr leh thiam kan tih tak tak te kha ka pa sum neih hre ran in ka ai awh a lal hma a din an inchuh sup sup dawn asin. A nih loh pawhin Minister lian fapa ah tal lo piang I la, ka pa VIP rohlu hmangin nuam takin ka khawsa ang nga, tunge misual ti in chil min chhak khum ngam ang? Mi dang tan harsatna thlen sak in buaina siam ching pawh lo ni teh reng I la, case min siam sak tu tur police te kha ka pa laka tlaktlum loh leh transfer hlau reng reng a khawsa te kha emaw an ni ngei a nga, ka thiamna kawng min zawn sak char char in, thiam lohna nei lo leh fihlim kha ka ni leh thuai zel mai dawn si.

A nih loh vek leh Engineer lian tak fapa tal han ni thei I la, khawi lai emaw development sum te kha thiam takin ka pa'n a sawkkhawm a nga, department file ah chuan kawngbo awm miah lo in a dik tir leh thlap a nga, a ipte a sum lut hmang chuan nuam takin ka khawsa ve der der mai tur. Mipui te'n rinthu in a dik lohna sawi ru sep sep țhin mahse, chung te tih lungawi dan mai mai chu ka pa chuan a haihchham awm tawp si lo. Pawisa tam tak kawng a bo tir tâk zing ațang a tlemte khan school emaw, damdawi in tal a han din a nga, mipui te'n an chhawr țangkai miau chuan a dik lohna tam tak te kha an sawi reng peih leh hauh lo ang le. Kei in kan neih sum hmang in nuamsa takin, ka duh lam lam kawng ka zawh tawh mai tur, ka pa damdawiin ropui tak sak chhung ah chuan thihni nghakin ka mu reng bik lawng chu maw!

A la nih loh fo pawhin Department Director emaw, Secretary lian tak fapa ah tal lo piang hlauh I la, ka pa in a hlawh phu loh a in ropui a sak chhungah chuan nuam takin ka cheng veng veng mai tur, hmingțhat duhna avangin ka pa chuan a hlawh zawng zawng a rulh vek ngai khawpin loan te pawh lo la teh reng nise, kan chhungkaw mamawh tawk ai a tam hret hi chu department sum a ziak bo hnehsawh dawn tih ka hai lo, a hnuai a thawk te hlei hlei khan ka pa sulhnu pawr lai chu chulmam zawh loh mawlh an hlau dawn a sin.

Police Officer lian fapa nih te hlei hlei hi nuam hian ka van ring tak! Kan thawh ve ngai hauh lo in hnathawh tur kan neih a piang te chu ardali(orderly) ten an rawn thawk zo vek a nga, police indaih lohna nasa tak karah pawh ka Pa chuan sawrkar phalsak chin bak kha a rukin police sawmthum chuang zet zet te hnathawk in a chawr hum hum a nga, thuneitu leh sawrkar hruaitu ten hre ru reng mahse an beng an chhu ngawng lui tlat a nga, anih loh pawhin, "Tih ngaihna tak pawh a awm lo a ni e, dan lek vak theih a ni lo," ti in an tha en liam vel mai mai ngei awm si. Department Promotion Course neih lai phei chuan promotion loh hlau reng reng in course kal ho te khan ka pa hnen ah pawisa tam tham tak tak kha an rawn pem buhbel nawk nawk emaw a ni a nga, "department thil a ni e," ti in sawrkar lam a inkuangkuah leh then a nga, chutiang atang a ka pa hausakna hmang chuan thawveng takin, ek nei lo len in ka leng veh veh mai tur..!'.. Mahse, duhthusam mai a ni e, kei zawng thingtlang pa, loneimi fapa kha ka ni tlat.

Chutiang thu lawi lo vel mai mai ngaihtuah chuan beidawng leh thinrim țun chungin hun ka hmang a ni ber mai, eng kawng pawh hi han zawh ve thin mah ila ka tan chuan a tawp leh turh mai thin, ka chhungte kiang ah chuan hna chu ka thawh pui ve leh ta nawk nawk a. Nikhat chu khua a nawm loh em avangin kan feh chhuak lo, in ah chuan eng eng emaw sek rek khawih in ka buai ve hle, ka thawmhnaw te chu thlep țha in ka bungrua te chu ka rem fel a, ka thingrem ka han chingfel tur chuan tum loh deuh in a sir a lehkhathawn ka dawn ho ka rem țhat chu ka ti darh ta nuaih mai, muangchang chuan ka han rem fel leh nghauh nghauh a.

Lehkhathawn tam tak zing a envelop sendang tharlam deuh ber chuan ka mit a la tlat, ka rem fel pah chuan ka han enchiang a, Mr. Youri hnen atang a ka lehkha dawn hnuhnung ber kha a lo ni. 'Ka chhiar uluk fum fe hman lo tak e,' ti in ka han chhiar nawn leh a, an pawl zawm tur chuan min la sawm ngawrh ngang ngang hle mai maw?" ti in ka nui sak a. Nileng mai chuan Mr. Youri lehkhathawn ka chhiar chuan ka rilru a luah ngut ngut reng mai. Tlailam thleng a ngun tak a ka ngaihtuah hnu chuan thutlukna ka siam ta, "Eng thil tha nge maw hetia tawm churuk reng ringawt chung hi chuan ka beisei ang le? Khawi atang mah a thlawn a dawn tur ka nei lo, hmasawn ka duh a nih chuan ka chet chhuah a ngai a lawm maw le," ti in Valkerie Company zawm tur chuan rilru ka siam fel ta a, Mr. Youri hnen a thawn turin lehkha chu ka ziak ta mawlh mawlh a. Mi pangngai ni a inhriat ve si a hmasawnna awm hauh lo a hun hman reng hi ka ngaihdan a ni ve hauh lo, a tha lam emaw, tha chiah lo a nih pawhin hmalam pan tur a ke pen tum hi hmasawnna rahbi hmasa ber chu a ni reng reng e.

***************,,,, ****************