- PicsArt_01-19-07.24.37(1).jpg (67.95 KiB) Viewed 13446 times
Chapter 25
By
Abbra Reo Ririni Khiangte(Pitartei)
He lamah phei chuan zing lam dar 3:21 sorry vek u, ka tlai a..
Ka hmun hriat ngailoh lam pan tur chuan Car chhungah chuan kan nufa chuan kan chuang ve ta ran a, Kha pa khan car a khalh a, front glass ațang chuan kan nufa chu min rawn melh leh zawk zel a, ka khup tha hi a sai dar dar reng vang chuan Jayden a kut chu nghet tak in ka hum sak vak bawk.
"In ril a ţam em?" Broken english zet hian a rawn ti a, lu ka thing nghauh a, nichin te kha chuan zing karah engmah ka eiloh vang in ka pum a ruak a, tunah erawh eng thil nge anih tih ka hriat siloh vang in ka kawchhûng lam hi a inlet but but a, a sa kual rúai reng bawk.
Chil lem dawk pahin pawnlam chu ka en a, building lianpui pui kan tlan pel a, Goa hi țum khat bak ka la kallo, ni sa vul maiin building lian pui pui darthlalang a in bel phui khup mai a chhun en sûar mai te chuan ka awm a ti nuam lo ringawt bawk, Mahse ka tana hlauhawm thei thil pakhatmah a ti miau lo a, huaisen turin ka infuih ru mawlh mawlh a.
Țullo zet in kawngkhar in lock thlap te chuan ka thawk lak a tirang vek.
"Mum, Apa bulah kan kal dawn mi?"
"Maw?" Rang zet hian ka ti hû a, Jayden chuan min lo en ve kiaû bawk!
"Aaaa.. Mamma hna thar turah kan kal dawn a, Jay, fel deuh a awm tur aw.."
"Apa bulah ka kal chak e.." a ti bai bâi a, ka khawngaih reuh kher mai! Mahse ani kha chuan thinrim takin hmeichhe dang alo enkawl kha a sualloh thu min sawi khum hrep a, an lo inpawh tawh bik lutuk leh an lo inhre chiang bik lutuk te, min vin phah nana a hmang te khan min ti na a, tunhma ațang tawh kha hmeichhia vanga min hauh changa ka nat țhin zia hrechiang tu ani a, mahse, min vin hrep tho!
Car a din tak dat ah chuan zawite in thawk ka la a, kan hma ah chuan building lian tham ve fe mai, a hma lam darthlalang chhah țha mi vek a thuam hi alo ding khup a; lut chhuak an awm reng tih hriat zet in a chhûnglam ah chuan mi an awm nual bawk.
"Hemi hmun hi a nia." Nui suk chungin a rawn hawi let a, a chalah thilsen kai vang chuan vai puithiam te hi a ang lek lek in ka hria.
"Chhuak ru le." Pangngai tak chuan a rawn ti a, kei lehkha pawimawh pawh keng hlei lo min chhawr ngawt duh chu mak ka ti leh hnuhnawh a, chhawr mai pawh nilo in ka awmna hmun ațang min la rawn hruai vang vang peih bawk a!
Ka ngaihtuah buai chiam chiam chuan ka hna hmuhchhun hi thawh chakna ka neilo thei mai dawn a ka inhriat vang in kawngkhar chu ka nem hawng a, car chhûng ac dai raih ațang ni sa vul in kawngpui a em sat țha zet leh boruak lum hulh mai a ka kal chhuak chiah chu ka luak a chhuak hlui thei! Ka pum ruah lutuk vang ani pakhat ang!
"Jay.." Zawite in ka au sep a, a banrekah ka vuan a, car hung țha zo chiah kan lam pana palianpui lo kal mek chu ka melh zawk bawk.
"Fel tur aw, Mamma khan hna a thawh angai a, inchhung kan luh tawh hnuah mahniin pawnah lo va chhuah loh tur aw." Ka ti leh sep a, a bu ve nghat a, ka buai laklawh laiin a lo va kal chhuak ang tih ka hlau hluah hluah, he khawpui tumah ka hriat loh na ah leh phone takngial pawh ka neihlohna hmun ah hian ka hlauh ka hlau a, chuvanga kal chhuak lo tura hrilh thlap chu ka ni!
Mipa chuan min rawn kalpel in darthlalang kawngkhar chu a pawt hawng a, ka va zam tehreng em!
A lu thle zauh in lut turin min hrilh a, a chhungah chuan sap mipa leh hmeichhia te pawh an lo awm ve tho a, Jayden kai chunga kan pen luh ruala darthlalang kawngkhar inkhar thawm siam vang chuan ka kawchhung lam hi a che dawt mai!
"Tunge?" Hmeichhe hmai hnawih nasa zet chuan a rawn ti hlar a! A hmel chu ka ngainat zawng ani lo tawp, chumai bakah a hmai a hnawih nasa in a mitmu a lian kiaû a, a eyebrow a ziah tak belh kuaû mai bawk si!
" Kan hnathawktu thar tur anih hi, agent in min rawn bia a, ka va hruai.." Min hruaitu mipa in a tih rual chuan hmeichhe chuan chik zet hian min rawn en a, vai movie a lam ţhin, in hnawih nasa thei deuh hi ka tehkhin ta ber!
"A thawk thei meuh ang maw?" A ti leh kher a; mahse mipa zawk chuan Hindi pangngai ni silo hian a chhang a, a thil sawi awmzia ka hrethiam ve tawh lo. An inbiak chhung zawng chuan hmeichhia chuan min rawn melh leh zawk țhin a!
" Engkim ti tura ka hrilh che i tih hreh dawn chuan i rawn thawk thei lo ang!" Min panhnai pah chuan a rawn ti a.
"Pawisa i mamawh tih ka pasal hian a sawi a, mahse pawisa i mamawh vang ngawtin ka chhawr thei lo che a, engkim ka thupek i zawm vek angai tel, chu thil chu i ti thei lo anih chuan i kal lehnghal thei ang!" A ti zung zung a, ka thluak ah hian kal chhuak mai tura a min hrilh tu a rawn awm a.
"Ka ti thei ang.." a mitmeng a len tawh sa tehreng nen, a rawn meng kual kâwk a!
"I chiang em?"
"Aw..."
"Helai mipa naupang hi?"
"Ka fapa.. Ka fapa Jayden anih hi, ani hi chuan min tibuai lo ang, hna ka mamawh a.. chuan.." sawi zo lo in thawk ka'n la halh a. "Pawisa ka mamawh bawk.." ka ti hlah a. Hmeichhia chu a nui zui ta sak a, a mitmu lian leh a hnawih ran nasat zet mai chu chet kual râlh in thawk a la a. Sari vel a kaih hnuang lo a, pawnfen sen var mai chhing lam lek lek a feng a, tank top var a ha a, rangkachak leh tlereuh dang a inbel khat chûaih bawk!
"Thawk tur a ka tih che thawh hreh i neih loh chuan sum lamah chuan lungngai suh.." mipa lamah chuan a'n thle leh bâk a, Hindi ni silo vai țawng ni tho bawk si khan thil a sawi leh a. Mipa chuan a phone phawrh in room dang a pan ta nghal a.
"Oh, My boy hetah lo kal rawh i infiampui tur ka nei ania." Rawn kun hniam in Jayden sam ah chuan a rawn chul thuak a.
"Aa.. English a la hrethiam ve vak lo a.."
"Ok.. A pawi lo, He lamah rawn hruai rawh.." a ti leh a, pheikhawk sang aŕ mai a bun a, customer pawh an ngah tawk hle ani khawp ang, hnathawk tu dang pawh an awm nual mai!
Chu nu chu kan zui a, pawnlam ațanga a lan ang ngawt ani hauh lo, inchung lam chu rawng uk kharh mai an hmang a, chuan pindan hrang hrang a tam in a reh ruih reng bawk!
" Rose tiin min ko mai dawn nia, rawn hruaitu che u kha ka pasal ania, boss tiin i ko dawn nia." Kawngkhar pakhat a pawt hawng a. "Chenna hmun tur i neilo tih a sawi a, hetah hian i cheng rih dawn nia.."
Ka meng kawk mai! Chenna tur leh zel min pek ka beisei phalo!
"Ka lawm e.."
"Lawmthu sawi a ngailo, pawisa mamawh tak tak tu te leh thawh hreh neilo te hi țanpui nuam ka ti a, chu tih rualin ka thuawih se ka duh bawk." Nui sak pah in a chhunglam ah chuan a lut a.
"Spa ah ka awm tawh, min rawn hruai rawh, ka lo nghak che.." Room pakhat kawngkhar rawn in hawng ațanga rawn pen chhuak chuan Mizo țawng a rawn hmang ta mai! Ka hawi dawrh a, mahse hall lam pan khan a kal zui daih a.
"Ka ngai tawh che..." a tih ri leh a ke pen ri hla tial tial chu ka en zui reng a! Ka Mizopui aw ringawt pawn thlamuanna min pe tawh mai chu ania...
A chhunga kan nufa a kan luh ve chuan Rose chuan chik zet hian min lo en a, ka hawikual thuak a, a zau hran lo a, in chhungah fan a inkhai a, khum zau vaklo leh hlui lam tawh a lo awm a, chuan plastic chair dawr-a an hman hlui tih hriat zet pathum a lo awm tel bawk a. Kan nufa lek chenna atan chuan a tawk lutuk!
"Tah hian i fapa chu a lo awm thei mai ang.. " a rawn ti a, Jayden chu ka en vat a, a lo hawi kual ve rûai mai.
"Aa.. "
"Hna i țan nghal angai dawn, experience i nei bawk silo a, i zir țan nghal a ngai alawm.." a rawn ti a, a sawi dik. Mahse ka fapa he room a kalsan ngawt chu ka ngaingam chiah bawk silo a.
"Jay, hetah hian lo awm i hreh em?"
Min en kiau a; hei ai țha zawk hna ka mamawh zia ka hre thar kuar kuar bawk.
"A duh chuan tv a lo en thei reng ania." Ti ram hmarh pah in tv hlui tawh lam in hunna chu a pan a, ka thawveng huai mai! Tv en pahin khumah hian a lo mu thei a lawm.
Jayden chu khum ah ka hlang kai a, ka hnuk a ulh țun mai, harsatna pakhatmah hrelo in a hun a lo hmang tawh a, hna vang in vawikhat te mah ka la kalsan chhin ngailo; mahse kan pahnih nun khawchhuahna tur atan ka kalsan angai dawn a, he pindan chhung ah hian amah te in hun a lo hman angai ţhin tawh dawn bawk ang.
Cartoon channel a hmet chhuak a, Jayden chuan ngawi ran hian tv lam chu a melh a, min ngen buai a tum miah lo chu a lawmawm rualin min ngen thei dinhmunah ka siam tlat lo a, a fing ka tih tawh kha, thil hi a lo hrethiam ve zung zung zel a; Kun hniam in a chhip ah chuan ka'n fawh sak vang vang a!
" Fel deuhin lo awm rawh aw, ka lo let leh vat ang " ka ti sep a, a bu ve nghat a. Ka chhel a ngai zual ve sauh bawk dawn tih ka hriat belh zat bawk.
"Hei nangmah zirtirtu tur che.. " Room kan chhuahsan rual in hmeichhe pakhat chu min in hmelhriattir vat a. Spa a thawk ani bawk a, makeup a hmang ve viau tho mai!
"Lo in zirtir rawh u.." Rose chuan chiang zet in min zirtirtunu tur chu a'n melh leh a. "A man thiam vat a ngai ania.." a tih zawm leh zat a, hmeichhia chuan a thu a zawm hmel kher mai, bu nghat pahin a nuih a.
Rose a kalsawn hnu chuan thawk ka'n la ham ham phawt a.
" Helam ah aw.." Hmeichhia chuan nui sang chung in ban a phar zauh a, kan luh tirh a hall lamah bawk khan kan let phei a, Jaydena awmna room lam chu ka va hawi let leh țawk țawk a, a chung ah eng em a thleng lo ang chu maw?
" Hei i uniform tur." Counter hnuai ațang sarang a fun hi a rawn la chhuak a.
Ka ban vat a; chumi rual chuan hmeichhe pakhat hian min rawn kalpel a, țullo zet hian ka en zui a, a hmel hmu lo mahila room ațang rawn chhuak Mizo nu kha aniin ka hria, kawngkhar ah a kal chhuak a.
"He mi room lam ah hian aw." Min zirtirtunu tur khan a rawn ti a, hawi let in ka nuih sak a. Mizo nu bawk kha ka va en leh kher a; darthlalang bang chhan ațang ka mihring hmuh vang chuan ka meng nghal kâwk a! Ka sarang fun ken lai chu nghet zet in ka hmer bet a!
Zothana!
Hmeichhia chuan ban a phar va a, chuan Zothana car ngheng a lo ding rûn mai chu a va kuah a! Ka.. Ka nghilh dup mai! Hmeichhia lah chuan ti țhang tih hriat zet hian Zothana kuah chung chuan a taksa chu a'n sawi tel pah a, ka bing mup mup a, ka khawhmuh a phe ruai mai bawk! Hmeichhia zawk in la hrang a hmel ka hmuh theih a a rawn inher ve chiah chu silai mu a kah pawp ang mai hian ka nâ a! Ka tlawm nawn a! Ka â vek bawk!
Zothana'n car kawngkhar chu a hawn sak a, Shirt hring dal a ha a, Cotton kekawr dum hlap a ha bawk, Nunhlimi chu a țhu lut ta tharh a, za lo zet hian ka nui chhuak ta hak thung! An ni kha chuan min rawn hmu ve kher lo ang.. Mahse ka nat ngawih ngawihna tur erawh ka hmu chiang viau e!.
Zothana chu car ah a luh ve hma in a hawi kual thuak a, a hmel landan tak ngul leh ka thlakhlelh ngawih ngawih ţhin a taksa pawh a la pangngai vek.. mahse ka thil hmuh hian min ti na hluah hluah, spa chhung lampang a rawn hawi dawn rual chuan rang lutukin ka inher vat a, ka taksa hi a sa țek zawk thei!
Goa rawn kal ve a duh tlatna chhan te khan kan nufa min ngaihtuah vang tiin a sawi a. Huh! Dawhheh lutuk, Nunhlimi a lo awm ve reng vang zawk ani tih a chiang tawh khawp kha! Ka thil ngaihtuah vang chuan ka nâ zual sauh mai! Engtia rei nge min bum a tum; kei chiah min ngaihsak angin a awm a. Mahse kha hmeichhia kha a tel ve zel thung a! Tunah te hian hotel ah kan nufa khan lo la awm ve ta ila; Nunhlimi hruai tura a chhuah dawn khan eng chhuanlam nge ka bulah a sawi ang!
Ka taksa chhûng chu a tawt țun a, ka chau hlauh hlauh bawk!
"Excuse me!" Min zirtirtu tur khan a rawn ti lang lang a, chil ka lem dâwk a, thawk ka lak zawng te chuan ka khur chhuak dar dár a, Kha hmeichhia in nalh duh vang in spa a pan a, a haw leh lam lehzel pawh a hruai a ngai tawh a. Tak zet chuan! Ka tan engmah an ni tawh lo.. an duh duh danin awm rawh se, kum 5 hmalam daih tawha lo inenkawl tawh an nih kha.. ani a enkawl kha a sualloh thu min hrilh nek tawh bawk kha..
Ka pensawn dawn a, ka kaihza tha khur nasat lutuk vang chuan ka'n tawp leh dát a! Mahse ka fapa vang tal pawn ka chak tur ani!
Thawk ka'n la leh vang vang a , Nunhlimi'n nel tawk tawh tih hriat zet mai a kuah thak lai kha ka mitthla ah hian chiang zet in a lang zui ta reng a! Ka taksa chhung nat dan chu sawifiah ngaihna a awm miah lo bawk!
Ka thil zirlai ah pawh rilru ka pe hleithei lo, achang in ipik lutuk in ka thawchhuak leh hak zel a, Zothana ber kher in min bum ţhin hi ka tuar thiam lo ani ber! Hman ațang tawh a ka hmeichhe thik ngawih ngawih leh chu hmeichhia in min lakhran sak a tum ruk ran mipa hmuh dun a, chak tak a la awm thei hmeichhia chu, mi chak tawpkhawk a ni hial ang! A nat dan a dang a, tun hma thil a ngaihtuah let loh theih loh a, zing lama Nunhlimi a lo buaipui a sual viau loh thu sawi a min vin ta hrep pawh khan min ti na tawk tawh viau asin! An inkuah lai ka hmu a, Nunhlimi room ațang rawn chhuak in a biak kha a ni leh zel bawk a, a ngaih tawh thu te anih kha a sawi tel!
" Miss Zo?"
"Aaa.. Ka tihpalh.." ka ti sep a, mitmeng dur khai mai hian min lo melh a, "I rilru pe rawh." A ti ram leh hmarh bawk.
Rilru pangngai put tum in thawk ka'n la vang vang a, mahse Zothana leh Nunhlimi awm zui dan tur ka ngaihtuah tel tlatna chuan rilru fim min puttir thei der lo! Kan nufa kal chhuak ta daih kha a ven phah hawk ang a, ani nen khan hun thawl nuam tak an nei thei bawk ang chu!
Chawhnu dar 2 rik dawn ah ka zo a, rang lutuk in Jayden- a mutna room lam pan chuan ka tlan nghal rawk rawk a, kawngkhar dimte in ka nem hawng a, khum a ka fapa lo muhil ngat mai ka hmuh rual chuan ka thaw huai thei!
Kawngkhar chu nemphui lehin ka pan hnai a, tv ah chuan oggy hi a lo la chhuak reng a, ka off a, Jayden lo muhil ve ngat mai chu ka panhnai a, a biang ah dimte in ka hmuiin ka nawr a, A nunkawng bumboh țan dan tur lah ala hrethiam ve der mai bawk silo, ka thawh loh ruala nghei mai thei kan ni tlat tawh a, keichu rethei deuh pawn ka awm thei mai dawn a, ka țhanlen chhoh dan ani miau bawk, mahse ka fapa, retheihna dinhmun vawikhat pawh la tuar ngailo tu hi engtinnge ka enkawl chhoh ang, a zirna tur te engtinnge ka ngaihtuah sak anga, a thil awh zawng te ka leisak zung zung theih ang!
A lu lam khum ah chuan ka țhu hniam thla ve a, a lu chu amah tih harh hlau zet in ka chawikang a, ka malchungah ka nghat a, a thaw ri ve sek sek chu ka ngaithla ran a, Mamma chiah hi a neih awmchhun ani tih a la hrethiam pha ve lo a, Mamma pawn amah chiah hi a nei a, amah venghim thei tu awmchhun pawh Mamma chiah hi a ni tawh bawk.
Pindan kawngkhar rawn in hawng ri rak ah chuan ka hawi chhuak nghal dawrh a, Rose pasal kha a rawn lut anih chu!
Lo lawm lo ngawt thei ka ni der mai silo, mahse kan nufa awmna tur room ah duh duh a a luh chhuah chu ka rem ti hauh lo ang!
"A muhil a mi?" A rawn ti a. A thuamhnaw hak a thlak tawh a, kurta fual hnulh a hak chhan a a dulkiar luah mai chu a langsar nangiang bawk.
"Aw.."
"Lunch i ei tawh em?"
"Aih..."
"Va ei rawh, chuan i hna tur a awm bawk." Room chhung hawi kual thuak pah chuan a ti a.
"Ka fapa hi.."
"Miss Zo, hnathawk lai i ni tih in theihnghilh suh." Ti fuk pah hian min rawn melh a. A sawi dik ! Ka dinhmun ah phei hi chuan midang aia thawkrim tur bik ka ni leh zel bawk.
"Ka rawn chhuak ang." Ka ti a, he dawra hnathawk dangte hak ang kawrfual navy blue khup khuh țawk mai, taksa phuar zet ka ha a,
"Ka nupui khan min koh dan tur a hrilh tawh che in ka hria." Kut ka hum ruh ta nghek mai!
"Ka rawn chhuak ang,.. Boss."
"I Boss ka ni, hrereng ang che." A kal chhuah hma chuan a rawn ti leh hram a. A kal chhuak chiah chu ka thawchhuak ve hawk a! Min hnuaichhiah dawn tak zet!
Jayden chu ala mu tui tho a, ka kalsan leh ngei ngei angai bawk. Khum lu a lukham lo awm chu a taksa bulah chuan ka dahhnai a, midang va pawh ve tur chuan room ațang chuan ka kal chhuak a, kawngkhar lock mai ka tum chu ka meng nghal kâwk mai!
Lock a awm lo, ka tih awmzia chu lock na pangngai tak tak a awm lo, handle invuah chu herh in a inkhar nghet thei mai a, mahse lock dawn tak tak in a theih loh.
Khum a Jayden la mu ngat mai chu ka en leh zawk a, he pindan ah hian kan nufa hian kan him meuh a ngem!
Mahse zanah te chuan dawr hi an khar anga, midang an rawn luh em chu ka ring lo a, mahse hnamdang karah lehnghal pindan kawngkhar kalhphui loh chung a mut ngawt chu a him zo a ngem! Engpawh nise sum tlem te tal ka thawk chhuak phawt a nga, he ta ka riah luh a ngaih loh vat ka beisei!
Chaw chhun pawh tlem te tak tak chiah ka ei a, nichin a ka zir kha tih tham a nilo a, mahse Rose pasal in a sawi dan chuan customer ka nei nghal der mai bawk si.
"Ka zirtir ang che khan tila engmah harsa a awm lo, i customer in ti tur a hrilh ang che kha țha takin ti la, massage tak tak pawh a ngai lo mai thei, thu i zawm țhat chuan pawisa i hmu hnem dawn a, i tan vek anih chu!" Min zirtirtu nu khan a ti zat zat a, massage room bik lam pan chuan min hruai pah zel a.
Pawn lam ațanga a landan ang aiin a zau a, a reh raih a, music play ri pawh mit chhin vang vang a ngaihthlak chian a hriat theih tawk lek ani bawk.
Kawngkhar pakhat zawnah a din dat rual chuan thawk ka la hawk a! Min rawn en ve chiah bawk.
"Fapa i nei tawh kha, zam lutuk suh, pasal nei tawh tan phei chuan thil harsa a ni lo." A rawn ti a, ka bo deuh hû mai!
"Lut rawh le.." a ti sep a.
"Ka customer tur hi mipa nge anih hmeichhia tih ka hre thei angem?"
"Mipa,nang chuan mipa i chang dawn." A nui sak a." Ka zirtir ho che kha chu he ta mipa rawn kal ho hian an mamawh tak tak lo a, aaa... i țan a nga, i hrethiam mai ang." Kawngkhar nem hawn pah chuan a ti a, pindan chhung chu pawnlam ang lo tak in a lang eng sar a, enkawl uluk tih hriat zet in a fai sar mai, kawngkhar ațang a lang kim thei lo chiah ah khum a in hung a, ka pen lut a, khum chung a mipa lo bawkkhup ka hmuh rual chuan ka zam lutuk leh ka hreh lutuk chu ka tawt tup tup a!
Kawngkhar a khar phui tur chu a ban ah ka vuan ta chawt a! Khum a bawk mek mipa sawn thuamhnaw a inbel reng reng lo!
"Ka ti thei lo ang..." ka tih rual chuan a kut chal chu a hmui ah a nawr si vat a. Bengchhen a duh lo tih a lang reng.
"I fapa ngaihtuah rawh.."
"Mahse.."
"Pasal nei tawh i nih kha, bul i țan dawn chuan harsa mahse reilote ah pangngai takin i awm mai ang." A rawn ti sar sar a, ka thawk lak a sak kher mai!
" Hei hi i tan pawisa thawhchhuah dan awlsam ber anih hi.. i taksa i hlan dawn pawh anilo.." a rawn ti leh a, spa a thawh hi a him lo an tih chu ka hre tawh țhin a, spa a thawk tur ang a phai a an hruaithlakte chhanchhuah lah an awm nawk zel bawk! Tuna ka hna hi a himlo kher em tih chu ka chiang ngam rih lo, mahse mipa taksa khawihsak chu ka duh lo!
"Duhthlang thei i nih loh kha.. " a rawn ti leh a, a kut ka vawnna chu a rawn phelh a. "A harsa zawng in ngai mahta che.. i fapa kha ngaihtuah tel tlat rawh." A rawn tih leh takah chuan hreh chung chung in ka tih angai tih ka hria a, "Jayden kha min lo va ensak lawk rawh aw.."
"Aw le.." nui sak chung in kawngkhar chu a rawn khar phui a! Kawngkhar hmachhawn zawng chuan ka la ding reng a, mit ka chhing a, ka rilru in ka țawngțai ru mawlh mawlh a, Ka mit chhin rual chuan Zothana hmel chiang lutukin ka hmu a! Ni e.. Ani hi ka mangan chang apiang in kawlphe ang a chakin ka ngaihtuahna ah a rawn lut ţhin.. Mahse ani chu Nunhlimi nen hun nuam tak an hmang ngei ang! Ka ngaihtuahna vang chuan ka thawchhuak leh hak a! Ka tan leh ka fapa tan ka ti thei em em ang!
Khum lam pan chuan ka pen phei a, Vai a nilo tih hriat zet in a vun a var fai sar a, a secret part lai tak tak chiah towel varin a inkhuh bawk.
" I rei hle mai!"
"Ka tihpalh, aaa.. Ka.. ka țan nghal mai dawn mi?"
"That's upto you!" A rawn ti fuk a, a aw phawi ah chuan British lam mi chawlh hmanga Goa rawn pan anih ka ring ve tawp.
A taksa a hnawih tur oil chu ka kut ah ka bun chhuak a! A taksa ka khawih hreh lutuk te chu ka kuttha a rawn khur chhuak dar dar a! Ka hreh vang ngawt in ka tilo thei der mai bawk silo...
Hriatna thazam ti danglam tawk lek a oil sa deuh veng veng mai chu a taksa ah chuan ka chulh kual a, keimah zawk hi ka tîm lutuk hi ka ip chawih chawih thei! A hnungzang a thazam kal chho lai ka hmeh chhoh lai chuan amah zawk chu a rawn thawchhuak ta ham ham a! Tlanchhuah vang vang mai hi ka duh a, ka țah te hi a rawn chhuak țun thei mai!