SUDDEN - TAKES THE TRAIL AUTHOR : OLIVER STRANGE (1940) EPISODE - 12 & 13

[HLalthazuala]

Ni tam fe a ral hnuin Sudden-a chu tuikhawhthla awmna hmunah a va kal leh a. Tui inkhawhna tawp lui kamah chuan phairuang hmun chu a va pan hnai a, thing leh hnimbukin a kalna lai chu a hliah tlat avangin lui ral lehlam ațang chuan a lang thei lo nghe nghe a. A chung lam a han hawi chho a, tui rawn khawh thlakna lai takah chuan lung tohlawt lian fe, fit thum ai maha hlai tur hi a awm a, chumi lung tohlawt hnuai chu puk kawngka niawm tak hian a lang a. Suddena chuan han enchian a tum ta a.
Lung tohlawt awmna zawn a han thleng a, a awmna bul vel chu ngun fe hian a han en a, Sakawr leh Bawng hniak tam deuh mai chu a hmu ta a, lung chuan tui lo khawh thla chu a lo dan tleu avangin a hnuai zawn chu a huh pawh a huh ve lova. A rin ang ngeiin lungpher hnuai chu puk kawngka a lo ni ngei a, mahse a chhung chu a thim hle a ni. Suddena chu puk chhung ah chuan a lut ta a. A tirah chuan tui khawhthla zawn ațanga ni eng lo lut chuan puk chhung chu a rawn chhun avangin a thim teh chiam lo zawk a, mahse tawte a han kal hnu chuan puk chhung chu veilamah a lo kawi ta a, puk kawina hmun ațanga pen za lai a kal hnuin țawngri a hre ta a, mi pakhat hian, "Pahnih chauha lehkha inden fo hi chu ka nin zawng tak a ni," a han ti a.
Aw lo chhuahna lam chu Sudden-a chuan a va pan hnai zel a. Puk chu veilamah bawk a lo kawi leh a. Chutilai hmun ațang chuan a hma lam hla tehchiam lova mi pahnih lo țhudun, meilum bula lehkha lo dengte chu Sudden-a chuan a va hmu thei ta a. An meichhem avang chuan puk chhung pawh chu a lo lang chiang tawh hle a. Puk hnung lamah chuan eng hi a lo lut bawk a. Mi pahnihte chu an ti ti dun mawlh mawlh a. Eng thu nge an sawi hriatchian tumin Sudden-a chuan a va hnaih phei hret hret zel a. Chutihlai chuan a hnung lamah thawm eng emaw hi a hria a, mahse, engmah a tih hman hmain mi pakhat hian a hnunglam ațangin Sudden-a chu a zuk zuan thut mai a. Sudden-a chu a bawkkhup zawngin a tlu ta a.
Amah rawn zuantu chuan a bawhbet tlat mai a. Sudden-a nghawngah chuan a rek ta vak mai bawk a. Sudden-a chuan amah bawhbettu chu thin thlak mai hi a han tum a, mahse chu pa chuan, "Min rawn pui ta che u," tiin a țhiante pahnih lehkha deng lai chu a sawm ta chul mai a. Anni pahnih chuan an țhianpa chu an rawn țanpui ta thuai a. Sudden-a chuan pakhat zawk chu a dulah a lo chhir sak a, chu pa chu hnung zawngin a tlu a, mahse a lo tho leh thuai a, Sudden-a chu an bawhbet a, an hnungkhirh ta tlat mai a. An zinga pakhat chuan, "Ti kha a ni mai lawm," a han ti a. Sudden-a puakruk pahnih chu a han lak sak a, mei bulah chuan an hruai phei ve ta a.
Mei bul an va thlen chuan Sudden-a hmel chu a lang chiang ta a. An zinga pakhat chuan, "E heu Marshal a ni maw? Min rawn tlawh dawn tih chu lo hre lawk ila chuan thothang țha deuh zawka lo hmuah tur i nih vei nen," a han ti a. Sudden-a chuan, "Ka vui vak lo ve. In chenna hi a nawm hle hi mawle," tih pahin mei bulah chuan a țhu ve ta a. An zinga pahnih, Pocky-a leh Galt-a te chu Mullins-a ruala Welcome khua ațanga chhuak kha an ni tih Sudden-a chuan a hria a. Pocky-a chuan, "Kan chenna hi tuman hre lo se kan duh a, chuvangin, i rawn hmuhchhuah tak mial avangin a pawi viau ang, i tan...," a han ti leh a.

Sudden-a chuan, "A pawi dawn leh dawn loh chu Mullins-a ka la zawt chiang ang," a han ti thlarawk a. An zinga pakhat chuan, "Mullins-a nen chuan in inbe mawlh ang. Pocky, va ko nghal rawh, Sakawr huang bulah a awm kha," a lo ti thuai a. Mahse a țhiante pahnih chuan an lo khak thuai a. Chu pa chuan, "A pawi chuang hlei nem, Mitthi an țawng thei tih kan hre si lova," a han ti leh a. Reilote an han inhnial leh rih a, mahse, Mullins-a ko turin Pocky chu an tir ta nghe nghe a. A va thang hlanin Galt-a chuan Sudden-a puakruk pahnih chu a lo lek tawn vat vat a, "Killer i ni emaw ka ti a, mihring i thah zat chhinchhiah nan puakruk kawm hi i va ker lo ve," a han ti a.
Sudden-a chuan pawi ti hmel tak leh ngui hmel em em ni awm tak hian, "Tuna ka hman laite kha chu ka neihna a la rei lo. Ka puakruk hlui pahnihte chu a kawm ka ker chik nasa lutuk tawh a, a buk a dik tawh lova, mi ka kahhlumte pawh an mit leh mit inkarah kap lovin an mitah tak te ka kap palh ta fo mai a, chuvangin a thar ka hmang ta mai a ni. Dik tak chuan pawi ka ti tehchiam lo, an thi ve thei tho zel," a han ti a. Chu mite pahnih chuan Sudden-a thusawi chu an nuih ve mai a, Sudden-a sawi beisei lo ang takin sawi pawh sawi zawm lovin an ngawihsan ve ta mai a.
A kut an phuarna hrui chu Sudden-a chuan phelh tumin a han insangmar vak a, mahse chuti mai chuan a phelh dawnlo tih a hria a. A theih ang angin a bei zui zel a. A thiltih tum an hriatchhuah loh nan tiin, "Texas ramah in kal tawh em?" a han ti a. Anni chuan lu an thing mai a. Sudden-a chuan, "Ram nuam tak chu a ni a, mahse, Law Officer an tam lutuk deuh niin ka hria," a han ti leh zel a. Thu a sawi lai te pawh chuan a kut chu phelh tumin a bei zui zel a, a insuihna chu tlemin a dul deuh tawh nghe nghe a. An rilru hruai pen tumin Sudden-a chuan thil dang dang a sawi zui zel a. A tawpah chuan a phelh thei ta hram a.
Chutah, "Khai ule," tih pahin Sudden-a chuan pakhat zawk khabeah na zet mai hian a va hnek ta bur mai a. Chu pa chu a tlu ta a. Sudden-a chuan a puakruk chu a va zuan a, a kawm chuan Galt-a lu chu a va chhu leh ta vak mai a. Ani pawh chu a tlu ve ta nghal a. Chutihlai chuan țawngri a hre ta mai a. Tichuan a lo kalna puk thim zingah chuan hmanhmawh zetin a tlankir leh ta nghal a. Sudden-a chuan tuikhawhthla awmna chu a va thleng a, lui chu a kan a, a sakawr chungah a chuang a, Bar 'O' Ranch lam panin hmanhmawh deuhin a tlan tir ta a.
A la kal thui vak hmain rukru ho in Mullins-a, sakawr huang bulah a awm an tih thu kha a hrechhuak a, Poky-a khan Mullins-a chu ko turin a kal kha a ni a, a va thang rei hle bawk a. Sudden-a chuan, "An bihrukna hmun ka va hmu chhuak ta si a, bihrukna dang an zawng tawh ngei ang. An bawng ruksate pawh hruai an duh ngeiin ka ring. Puk ațang khan chhuahna dang a awm ngei awm si a. Khawilaiah tak ni ang maw?" a ti rilru a. Suddena'n chutiang thil hlir a ngaihtuah lai chuan a lam rawn pana sakawr chung chuang lo kal chu a va hmu ta a.
Chu pa chu a lo kal hnai zel a. Reddy-a a lo ni hlauh mai a. Sudden-a chu, "Rukru i hmu em ni?" fiamthu deuh hian a rawn ti a. Sudden-a chuan, "Hmu e. Silver Mane ațanga chhim lamah khan lungbang rawn su zawnga kawr inkham a awm em?" a han ti a. Reddy-a chuan, "Dark Canyon a awm. Ruam chu vawikhat ka zawh tawh a, kan ram hi a pawh theih dawn emaw ka ti thlarawk a, mahse ka hlawhchham chiang hle," a han ti a. Sudden-a chuan, "I han zawh thui deuh teh ang," a ti a, an kalna chu an zawh chho leh ta zel a.

Thui vak lo an kal hnuin sakawr ațangin an chhuk a. An thlang ruam chu hmun biru deuh lai ațangin an zuk thlir leh ta a. Vanneihthlak tak maiin an thlang ruam thing hmun zinga sakawr, a zin phah sa vek dingkhawm chu an zuk hmu ta mai a. Thuam phur sakawr pahnih an hmu tel bawk a. Reilote an thlir hnuin thingbuk hnuai ațang chuan mi pariat an lo chhuak a, Sakawrah chuan an zuang kai ta a. Reddy-a chuan, "Mullins-a a tel ve a nih khu!" a han ti a. Sudden-a chuan, "Tel ve awm tak pawh a ni reng e. Kan sakawr kha va kai la, i zui ve nghal ang," a ti ta a.
Mullins-a te rual zelin tlang chhipah Sudden-a te pahnih chuan an sakawr chu an kaltir zel a. Thui vaklo an kal hnuin an thlang ruamah chuan Bawng khungkhawmna huang an zuk hmu ta a. Mullins-a leh a țhiante chuan huang kawngka chu an hawng dawn ni a hriain, Reddy-a chuan, "Engtin nge kan tih ang?" a han ti a. Huang chhungah chuan bawng sawmpahnih vel tur hi a lo tla mek bawk a. Sudden-a chuan, "I tihțhaih ang. Silaiin zuk kap ila, mahse tam tak emaw kan nih an tih theih nan silai kan hmeh puah veleh kan awmna kan sawn vat anga, hmun dang ațangin kan kap leh vat zel dawn nia," a han ti a.
Tichuan hmun khat ațangin an zuk kap ta a. Silai an hmeh puah veleh ding leh vei lamah an ințhen phawk a, yards nga vel an tlan hnuin an zuk kap leh a. Huang kawngka hawng tura sakawr ațanga mi pahnih chhuk ta te chuan silai ri an hriat veleh sakawrah an lawnkai leh ta thuai a. Sakawr chungchuang pakhat chuan a ban a han vuan a. A dang leh chuan an sakawr thunun tumin an lo buai phili ve hle a. Pakhat phei chu Sudden-a te chuan an zuk kap fuh a ni ang, sakawr ațangin a tla țhelh nghe nghe a. Sudden-a te pahnih chuan an zuk kap zui zel a, rukru ho pawh chuan an rawn kap chho ve bawk a.
Mahse, Mullins-a chuan tih theih an neih loh zia a hriat chuan, "Tih theih kan nei lo a nih hi. Bawng hi i kalsan mai ang u, i tlan thuai zawk teh ang," a hote hnenah chuan a ti ta a, amah chuan hma a hruai nghal a. Sudden-a chuan, "Tlang ram lam panin hmar lamah an tlan dawn a nih khu," Reddy-a hnen ah chuan a han ti a. Reddy-a chuan, "Pakhat khu chu khawthlang lam hawiin a tlan tlat mai! Eng tihna nge ni ta ang," a han ti a. Sudden-a chuan, "Ka rindanin Mullins-a khuan Dumb-Bell a pan dawn a ni ang," tiin a lo chhang thuai a.

Rukru ho an liam fel hnu chuan Sudden-a te pahnih chu an thlang ruamah chuan an chhuk ta a. Bawng huang chu an va thleng a, huang bulah chuan meichhemna hnuhma leh straight Iron chu an va hmu a. Rukru ho thiltih tum chu an hrethiam nghal vek a. Huang chhunga bawngte pawh chu Bar 'O' ta vek an lo ni a. Bawng pathum khela Bar 'O' chhinchhiahna chu Dumb-Bell chhinchhiahna in an lo thlak hman tawh nghe nghe a. Bawng chu an hruai chhuak a, Bar 'O' Ranch panin an khalh ta nghal a.
Ranch an va thlen chuan Ranch neitu Owen-a chu thil awmdan zawng zawng an hrilh ve ta vek a. Silver mane hnunglama puk a va hmuh thu pawh Sudden-a chuan a sawi ta vek a. Sudden-a chuan, "Ka fimkhur tawk lo deuh a ni ang.. Ka chhuah hnu chuan Reddy-a nen hian kan inhmu ta a ni," a han ti a. Owen-a chuan, "In tițha ngawt mai, an hnu chhui a harsa awm hle si a, khawiah tak kal zel ang maw?" a han ti a. Sudden-a chuan, "Sakawr pakhat ip phurh chu ka kap keh a, chuvangin chhangphut an phur tih ka hria," a han ti leh ta a.


SUDDEN - TAKES THE TRAIL
AUTHOR : OLIVER STRANGE (1940)
EPISODE - 13

Chhun khaw lum lai tak a ni bawk a, Sudden-a, Dave-a leh Sloppy-a te pathum chu Marshal Office-ah an țhukhawm a. Sudden-a chuan, "Sloppy, Amos Sark-a an kahhlum lai chuan khuaah i awm ve em?" a han ti a. Sloopy-a chuan, "Drywash khuaah ka awm," tiin a chhang a. Sudden-a chuan, "An kahhlumna hmun chu i hria em?" a ti leh a. Sloppy-a chuan, "A ruang va hmutu chuan an kahhlumna hmun chu min kawhhmuh ve," a ti leh mai a. Sudden-a chuan, "An kahhlumna hmun chu va hmuh ve ka duh a ni," a ti ta a. Sloppy-a chuan, "Kum khat lai a ral tawh si a, engnge hmuh i la in beisei fo?" a han ti a. Sudden-a chuan, "Hmuh ve ka chak mai mai a ni," tiin a chhang mai a. Tichuan an pathum chuan an chhuak ta a.
Dumb-Bell panna kawng thui fe an zawh hnuin Sloppy-a chuan, "Heti lai hi a ni," tiin Amos Sark-a an kahhlumna chu a kawhhmuh ta a. Chutilai hmun chu a fai viau a, kawng sir chhaklamah chuan hnimbuk pakhat bihrukna remchang fahran hi a awm a, kawng bula thing chu kawk chungin Sloppy-a chuan, "He thing bulah hian Amos-a chu bawkkhupin a lo tlu a ni awm e, a pawisa ken zawng zawng pawh a bo vek niin an sawi," a ti a. Sudden-a chuan, "Amah rawk an duh vangin an that tihna a ni ang em?" a han ti a. Sloppy-a chuan, "A ni mai thei, a taksa silaimu luhna ațangin a hnunglam ațanga kah a ni tih an hre thei bawk," a ti leh a.
Sudden-a chu sakawr ațangin a chhuk a, kawng chhak hnimbuk chu a han pan chho a, hnimbuk vel chu ngun deuh maiin a puakruk hmawr chuan a han thai a, tahchuan vaihlo bawm Dar a siam hi a thaichhuak ta hlawl mai a. A chhung chu a hawng a, 'E.K' tih hi a lo inker a, bawm chu a ak a, a țhiante bulah chuan a kir leh ta nghal a. Sudden-a chuan, "E.K tih hming lamtawi ziaktu hi tunge ni ang?" Sloppy-a hnenah chuan a han ti a, Sloppy chuan a lo hre bik si lova. Sudden-a chuan, "Chuzawng, kan hlawkpui vak dawn lo a nih chu," a han ti a. Dave-a chuan, "He kawngah hian veivak vel an tam thei țhin em a, chuvangin tu'n emaw a paih pawh a ni mai thei," a lo ti ve thung a.

Sudden-a chuan, "Sloppy, Lawyer pakhat hming i sawi kha a chanchin i hrechiang em?" a han ti leh a. Sloppy-a chuan, "Slimmy maw? Khaihlum theihna khawp hria ila ka ti ngawt asin," tiin a lo chhang vat a. Sudden-a chuan, "Seth Lyman a ni lawm ni? E... Slimy tiin an ko țhin i tih tak kha mawle. Slimy hi i ngaina vak lo niin ka hria, mahse, Amos Sark-a chuan a ring tlat si a le," a ti a. Sloppy-a chuan, "A ring vak lovang," a han ti a. Sudden-a chuan, "A thurochhiah ziaktu atan a hmang miau si a.." a han ti a. Sloppy-a chuan, "Ka sakawr hi min phurtu atan ka hmang a, mahse ka ring tehchiam chuang hleinem," a la ti țalh a.
Nippert-a chuan vaihlo bawm chu a'n en vang vang a, lu thing chungin, "I chharna lai chu mak ka ti hle mai. Mahse tu ta nge a nih ka hre bik tlat lo mai. Jim, Amos-a thattu zawn chhuah chu i tan pawh a harsa viau mai thei a ni," a han ti a. Sudden-a chuan, "I ti dik ngei ang. A chhunga E.K tih inziak hian beiseina min siam deuh viau a, mahse ka hlawhchham dawn a ni ang. Drywash hi eng ang khua chiah nge a nih chu le?" a ti a. Nippert-a chuan, "Welcome khua ai hi chuan a lian zawk hle a, rura fe fe pawh an tam mai. Sheriff Blick-a an nei a, mahse, Jesse Sark-a thuhnuaiah a kun kumkhua ringawt mai a ni. Va kal mah la, engmah i va hmuchhuak in ka ring lo," a ti a. Sudden-a chuan, "Ka va kal tho tho teh ang," a ti ta a.
Sudden-a chuan a țhiante a hrilh dan chuan Drywash khua chu hmuh chak ve hrim hrim ni awmin a lang a, mahse, a rilru tak chuan Amos Sark-a thattu zawn chhuah a inbeisei deuh a ni. Drywash khuaah chuan Amos Sark-a țhiante pawh an awm ve ngeiin a ring tlat a. Thui fe a kal hnuin thing hmun zau vak lo hi a va thleng ta a, chuta a awm lai chuan a piah hla fe a sakawr chungchuang chu a hmu ta a. Thingbuk phenah a biru vat a, reivaklo hnuah sakawr chung chuang chu a lo lang chiang a, Sark-a a ni tih Sudden-a chuan a va hre thei a.

Jesse Sark-a chu Drywash pana kal ve tho a nih avangin hnung deuh fe ațangin Sudden-a chuan a zui ve ta a. Sark-a chuan zuitu an awmin a ring lo aniang chu hnunglam pawh a rawn hawi miah lova, Sudden-a chuan harsatna tawk miah lovin Drywash khua chu a va thleng ve ta a. Sark-a chu kawtthler lian berah chuan a kal phei zel a, Sudden-a erawh chu kawtthler tawntirh sakawr tawlailir phenah chuan a chawl ta phawt a, Sark-a chu a enzui zel tho a. Jesse Sark-a chu Drywash Hotel kawtah chuan sakawr ațangin a chhuk a, Hotel-ah chuan a lut nghal thuai a.
Sudden-a chuan rei deuh a han nghak rih a, tichuan Hotel chu a pan ta nghal a. Pawn ațangin in chhung chu a va bih chhin phawt a, Sark-a hmel a hmuh loh avangin a lut ve ta a. Bar nghaktu hnenah chuan in tur a han lam a, amah pawh chu a sawm ve nghal bawk a. Chutia an țhut dun lai chuan mi pakhat cher deuh mai, a hmui zawna rin kham phei ang lek chauha heh pan hi a lo lut a. Bar nghaktu chuan, "Mr Lyman, enge i duh le?" a lo ti thuai a. Chu pa chuan, "Sark-a a awm em?" a han ti a. "Room No 7 ah a awm," tiin a chhang mai a. Chu pa chuan engmah sawi tawh lovin in chhawng lamah chuan a lawn chho ve ta nghal a.
A chhoh veleh Sudden-a chuan, "Pawi ka ti mange, zanin chu Hotel-ah hian thlen ve ka tum a, No 7 hi ka Number vannei a ni ve tlat si a...." a han ti a. Bar nghaktu chuan, "A pindan zawmpui No 6 a la ruak tho asin, inkhelh chang pawhin atir ațanga man nghal mai chu a tawp thlengin vanneih a har zawk fo niin ka hria," a lo ti a. Sudden-a chuan, "I ti dik viau mai, khawnge," tih pahin a spur chu a phelh a, "Thawm dim nachang hre lo khawpa dan hre lo chu ka ni bik hlei nem," nui chung hian a han ti a. In chhawng lamah chuan a lawn chho ve ta a. Suddena'n inchung a han thlen chuan pindan tamfe hi a lo intlar phei thluah mai a, kawngkhar chungah chuan number a lo inziak vek bawk a.

Thawm dim em emin Number 6 pindan kawngkhar chu a hawng țhem țhem a, pindan chhunga a luh veleh chuan bang lam a pan phei vat a, banga beng si chungin a han ding a, pindan lehlama an thusawi te pawh chu a hre thei ta a. Pindan lehlama awm Lyman-a, (Slimy-a) chuan, "Bar 'O' chuan an ringhlel ta che maw? Thil fel lo tak a nih chu," a'n ti a. Sark-a chuan, "Tih theih engmah an nei lo, min khawih ngam bawk hek lovang, an cho rual ka ni lo," a han ti a. Lyman-a chuan, "Mullins-a chu a che khawlo hle a nih chu, Owen-a sum ei dan kawng țha tak a nih tehlul nen," a han ti leh a.
Sark-a chuan, "A vanduai deuh a ni, kan Marshal phiangsen....." a han ti hman chauh a, Lyman-a chuan, "Engvanginnge Bar 'O' țhiana a awm hma khan Marshal chu i țhiana i lo siam loh? Laww-man ho reng reng chu sum leh paia tih lungawi theih loh an awm hlei nem. A tih dan tur keiman ngaihtuah a țul ta a nih hi. I lu hi i nghawnga invuah atan lo thildangah țangkaina a nei miah lo a nih hi," a ti ta a. Sudden-a chuan Lyman-a thusawi chu Sark-a chuan a huat viau a lo ring deuh a, mahse Sark-a chuan, "Seth, i thluak ang thluak ka pu ve lo a ni. Mahse, Mullins-a kha Marshal-a dah kan tum lai khan tuna kan Marshal hian a rawn lan ta tlat si a..." a han ti a.
Lyman-a chuan, "Chu pawh ni se, Marshal-ah chuan tupawh lo țang ang hmiang, i kut ațanga pawisa an dawn ruk tho chuan an thuhmun vek a ni. Hmeichhe lakah chuan i che țha tel em?" a han ti leh a. Sark-a chuan, "Kan inkawmngeih viau, nawr hmanhmawh vak erawh chu ka duh lo a ni," a han ti ngawt a. Lyman-a chuan vin deuh mai hian, "Nawr hmanhmawh i tum a, i hlawhchham ta a ni lawm ni? Dawt min hrilh tum khanglang suh. Welcome khuaa thil thleng reng reng hi ka hre vek," a ti ta a. Sark-a chuan, "Hlawhchham angin ka lang rih a, mahse ka thu zawng a la awih thovang," a han ti leh hram a. Lyman-a chuan, "A awih ngei ngei tur a ni ang, I thil va tih dan chu atthlak tak a ni. Tun chinah chuan thil atthlak tak takin i ti tawh tur a ni lo, i tih leh chuan......," a ti a, an han ngawi dun rih a.
Reife an ngawih hnuin Sark-a chuan, "Taka, Seth, i office lo kang palhin emaw, i chungah thil engpawh lo thleng palh ta hlauh ang se, kan lehkha...." a han ti țan chauh a, Lyman-a chuan, "Ka office aia hmun him zawkah ka dah vek, ka țhian, vanduaina ka lo tawh hlauh chuan a pawi thui thei viau ang..... Jasse Sark-a tan....," a ti a. Sark-a chuan, "Eng hunah pawh i lo thi thut thei a, chuti a nih si chuan...," a han ti țan leh dawn chauh a. Lyman-a chuan, "Ka thih chuan ka buaina a tawp tihna a ni ang. Nang erawh chu i buai ve țan dawn chauh tihna a ni thung ang chu.... pawisa i rawn keng em?" a ti leh ta zel a. Sark-a chuan, "Ken chu ka rawn keng a, mahse, hmuh harsa tak a ni tawh. Mullins-a leh a hote an bo phei chuan sum hmuhna a vang lehzual tawh ang," a han ti a.

Lyman-a chuan, "An hna an bansan rih mai tur a ni lo. Owen-a chu lo nawr chep rih zel se, bawng pawh ruksak zel bawk rawh se. Tuar peih loh a la nei anga, a Ranch chu man takin kan la leisak mai dawn a ni. Mary Gray-i chu a che țha hle a ni awm a, a sum dehchhuah sa chu țawm theih dan kawng a awm ngang lo a ni maw?" a han ti a. Sark-a chuan, "Awm miah lo. Marshal leh Davea'n khuaa mite chu Mrs Gray-i lamțangah an siam vek a ni," tiin a chhang a. Lyman-a chuan, "Mrs Gray-i hi huaisen tak, thiltithei leh hmelțha tak niin ka hria. I thiltih tum țha taka i tih zel zawngin i la vannei hle dawnin ka hria. Tun ai hian kum sawmhnih velin la naupang ila chuan....." a han ti a. Sark-a chuan, "Enge i tih ang?" a lo ti thuai a.
Lyman-a chuan, "Ka naupang si lova, sawi kher pawh a țul lo. Tunah chuan kan sawi tur kan sawi zo tawh bawk a, Dumb-Bell-ah kir leh tawh la a țha ang," a ti ta a. Sark-a chuan, kir leh nghal mai chu a tum lo viau aniang chu, "Ngawi teh, Seth, intihhlim ve pawh ka duh a, ngiat i ngah lutuk deuh lo maw?" a han ti a. Lyman-a chuan, "Ka ngiat che a ni lo, thu ka pe che a nih chu," a ti ta hmiah mai a. Reiloteah kawngkhar chu a ri ta nghal thuai a. Pindan chhunga la awm Sark-a chuan Lyman-a chhuak tawh chu, "Midang thisena nun tum, vangvat ang mai! Engtik niah emaw chuan i taksa bawlhhlawh zawi rawih khawpin i nghawngah ka la rek ang che mawle," tiin a hau zui a, amah pawh chu a chhuak ve ta nghal a.
Thawm a rehfel hnu rei vak lovah Sudden-a chu Bar lamah a chhuk thla leh ta a. Bar nghaktu leh mi pakhat hi an lo țhu dun a, pakhat zawk chu pa tawi te bial hmam mai, mit zim sin sen hi a ni a, a kawr âwmah chuan Sheriff Badge a tar bawk a. Sudden-a chu a hmuh veleh, "Mikhual i ni ang maw?" a lo ti nghal vat a. Sudden-a chuan, "Ni e, Sheriff i ni ang maw?" a han ti ve a. Chu pa chuan, "I ring dik chiah, ka hming chu Blick a ni a, ka chanchin i hre ve tawh țhin em?" chapo hmel deuh hian a han ti a. Sudden-a chuan, "Mikhual mai ka ni a, chinchang engmah ka la hre ve lo," tiin a chhang mai a. Blick-a chuan, "Cowboy i ni maw?" tiin a zawt leh a.
Sudden-a chuan, "Ni e, mahse, tunah hi chuan chawlh ka la ve rih lawk a ni. Intihhlim duh tan khawi nge pan ila țha ber ang le?" a han ti nghal zaih a. Sheriff chuan, "Square Deal pan la, i nihlawh ber ang. Intur țha, nula hmelțha leh infiamna chi hrang hrang a tam ber a ni," a han ti a. Sudden-a chuan, "Square Deal chu nangma ta a ni maw?" a han ti a. Sheriff chuan, "Ni e, mahse, ka ta a nih vang maia fak ka ni lo. Tiraw.. Tom?" Bar nghaktu hnenah chuan a han ti a. Tom-a chu a lo bu ve nghat a, mahse Sheriff hmuh lohin Sudden-a chu a mit a han siai khum sak a.
Sheriff chuan, "Dik leh fel taka engkim tih hi ka thupui ber a ni. I rawn tlawh ve ngei dawn nia," a han ti a, a chhuak ta a. A chhuah hnu chuan, "A thusawi kha dawt vek a ni. Square Deal chu Slimy-a nen an ințawm a, an saloon-ah chuan pawisa pawh va man mahla, an nula rawihte chuan an chhuhsak leh vek thovang che. An chhuhsak theih loh che pawhin pawnah midangin an lo chang tho dawn che a, zu țha lo an pe che pawh a ni zawk mai thei," a han ti a. Sudden-a chuan, "Ka lawm e, i thusawi chu ka hre reng ang," a ti a, a chhuak ve ta a.

Drywash kawtthlerah chuan mi an tam hle mai a. Sudden-a chuan kawngkhar pakhat ațanga mi pakhat lo chhuak hi a va hmu a, Galt-a a ni tih a hriat veleh a zui ta nghal a. Thuife a zui hnu chuan Galt-a chu in pakhatah hian a lut ta a. A luhna kawngka luchungah chuan, 'S. Lyman' tih hi a lo in tar bawk a. Marshal chuan thil tum thar aneih avangin chu in chu a kalsan ta a. Saloon pakhatah a va lut a. Dawhkana țhu chungin a ipte ațang chuan Amos sark-a an thahna hmuna a chhar vaihlo bawm chu a hma dawhkanah chuan a dahchhuak ta a. Chutah vaihlo chu a han zial a, vaihlo bawm chu ngaihsak awm hmel a hmuh loh avangin a chhuak leh ta thuai a.
Saloon dang a fang kual leh ta zel a, atawpah chuan hlawhchham rilru deuh tak chungin Square Deal Saloon-ah chuan a lut ve ta nge nge a. Saloon chhungah chuan mi an lo tam kher mai a, pindan laiah chuan dawhkan leh țhutthleng an remkhawm a, a sir lehlam chu lamna turin an tiruak a, lehlam chu inkhelhna hmun atan an siam thung a. Sudden-a chuan inkhelhna hmun lam chu a pan phei a, chutihlai chuan mi pakhat kum sawmli vel hmelpu, ruih hmel tak mai hian, "Len, he saloon-ah hian pawisa ka paih tam tawh hle a, zu No khat man pawh min pe phal lovang maw?" dawhkan nghaktu hnenah chuan a lo ti a.
Len-a chuan, "Kan dan chu i hria alawm Lumpy, bat a thiang lo," a lo ti a. Sudden-a chuan Lumpy-a chu a va hnaih a, "Tirawh.... ka khilai ang che," a han ti a, dawhkan awmna an pan dun ta a. Lumpy-a chuan, "Khamkhawp ka in lohna a rei tawh teh asin, hman deuh khan....," a ti a, a thusawi lai chu a tawp chawt a, makti awm deuh maiin Sudden-a chuan a vaihlo bawm ken lai chu a en ta reng mai a. "Amah kha chu i niin ka hre si lova, mahse a vaihlo bawm kha a nih loh vek pawhin a ang chiah i nei ve tihna a ni tal ang," a ti ta a.
Sudden-a chuan ngaihsak awmlo hmel takin, "Hetiang vaihlo bawm nei ve hi i hria a ni maw?" a lo ti satliah ve mai a. Lumpy-a chuan, "Tunhma kha chuan ka hre țhin a mahse ka hmuh lohna a rei ta khawp mai," ti in a chhang a. Sudden-a chuan, "In chhung boruak hi ka kham tawh em a, pawnah chhuah a ni ka duh ni, i lo kal ve duh em?" a ti a. Lumpy-a chuan a no dawm lai chu a tlak thuai a, pawnah chuan an chhuak dun ta a. Kawtthler thimlai an thlen veleh Sudden-a chuan, "He vaihlo bawm neitu hi khawiah nge a awm tih hre thei dawn ila chuan Dollar sawmhnih ka chawi duh ang," a ti ta a.
It tih hriat deuh hian Lumpy-a chuan Sudden-a Dollar sawmhnih Note ken lai chu a'n en a. Chutih laia sum a mamawhzia chu, theih nise, a thlarau pawh Dollar sawmhnih chuan a hralh duh ngei ang. Tichuan, a thil hriat ang ang chu Sudden-a a hrilh ve ta a. Tunhma kum hnih vela Bently khuaah Ezra Kent-a a lo hmelhriat tawh thu leh Ezra Kent-a chu khawiahnge a awm tak tih pawh a hriat tawh loh thu Sudden-a chu a hrilh ta vek a.

Lumpy-a chuan thil a zep țhen deuh ni ngeiin Sudden-a chuan a hre tlat a. Bently khuaah chuan Lung in a awm tih a hre bawk a, chuvangin, "Ezra Kent-a chu Bently khuaah chuan engti tura kal nge a nih?" tiin a zawt lui ta țalh a. Lumpy-a chuan, "A țhianpa, Jesse-a nen lung inah an tang dun a ni awm a. An hmel landan maw? Jail chhungah chuan an inang tlang deuh vekin a hriat mai a, an hmel put dan chu ka sawi thiam meuh lo. Pa lian lam deuh an ni ve ve a, an inkawmngeih hle a ni awm e. A tu a mah chu ka hmu ngai ta lo reng reng a ni," a han ti a. Sudden-a chu a lungawi tawk ta bawk a, Dollar sawmhnih chu Lumpy-a a pe a, Hotel-ah a kirsan leh ta a.
Khua a var dawn țep tawh tihin Sudden-a mutna pindan chu pawnlam ațangin an rawn kik ta dawt dawt mai a Sudden-a chuan a va hawng a, Bar nghaktu chu a lo lut ta a. Sudden-a hnenah chuan "I dinhmuna ding chu ni ila chuan he khua hi ka chhuahsan thuai ang. Pindan hnunglamah hian i sakawr thlunna in panna kawngka a awm ve thova, in phena i kal zel chuan tuma hmuh lohin khua hi i chhuahsan thei mai ang," a rawn ti ta mai a. Sudden-a chuan, "Engtizia nge ni ta mai a?" tiin thil awmdan chu a han zawt chiang a.
Bar nghaktu chuan tualthahna a awm a ni tih a hrilh ta a. Sudden-a chuan, "Inhnamhnawihna engmah ka nei ve si lova..," a han ti a. Bar nghaktu chuan, "Chuvang tak chuan alawm ka rawn hrilh che, Square Deal Saloon ațanga i chhuahpui lai hmutu an awm tlat a ni. Saloon i chhuahsan hnu khan khawiah nge i kal?" a ti a. Sudden-a chuan, "Lumpy-a kha a ni maw thi chu? Pawnah khan reilote kan ding dun a, Hotel-ah hian ka lo kir leh nghal mai a ni. Ka thil hriat duh tak min hrilh avangin Dollar sawmhnih ka pe nghe nghe asin," a han ti a.
Bar nghaktu chuan, "Ama chemte ngeia vihhlum a ni a, a ipteah pawisa pakhatmah a ak lo a ni awm e. Tunah hian Sheriff an kaitho mek a ni. A thiltih duh țhin dan ka hrechiang bawk a, chance i nei miah lovang," a ti a. Sudden-a chuan, "Ka tlanchhiat mai chuan thilsual ti-ah min puh ngei dawn asin," a han ti a. Bar nghaktu chuan, "Puh pawh an puh ang che chu, mahse, i tlan bo chuan .... i nunna i chhanhim dawn tihna a ni. He khua hi zawng ka hrechiang tawh em a nia," a ti ta a. Bar nghaktu thusawi chu dik hlea a hriat avangin Sudden-a chuan lawmthu a hrilh a, pindan hnung lamah chuan a put chhuak ta a. Sakawr in ațangin a sakawr chu a la chhuak a, khua chu tuma hmuh lohvin a chhuahsan ta a.

ADVERTISEMENT CLICK CLICK