BHAWLARAM-A THLARAU

Story tawi te te emaw luanliamna emaw post na
LT Muana
Posts: 9
Joined: June 10th, 2018, 8:47 am

BHAWLARAM-A THLARAU

Unread post by LT Muana » June 10th, 2018, 2:52 pm

BHAWLARAM-A THLARAU
- Harishankar Parsaii

Heti ang thil hi a la thleng ngai miah lo.

Dharmraj (Hindu sakhaw rin dana thihna lalpa) hian kum nuai tel teh meuh chu chhiar sen loh mihringte hi an thil tih leh an fakna lehkha neih dan azirin vanramah emaw, hremhmunah emaw an awmna tur a lo rel felsak ṭhin a. Mahse, chutih chhung zawng chuan heti ang thil kher kher hi chu a la thleng ngai hauh lo.

A hmaa ṭhu Chitragupta chuan hming ziahna bu hi a keu a keu a, a tarmit te chu a’n hru fai leh ṭhin a. A tihsual lai reng reng a hre chhuak zo lo. A tawpah chuan a hming ziahna bu keu lai chu a’n khup ṭhuai a. Hming ziahna bu chu rawn lek chhuah leh pah hian, “Lalber, engkim a inchhinchhiah fel thlap a ni. Bhawlaram-a thlarau hian ni nga kal ta khan a taksa a chhuahsan a, tirhkoh (iamdut) pakhat nen kan khawvel hi an rawn pan a, mahse tun thlengin an lo la thleng thei si lo,” a ti a.

Dharmraj chuan, “A nih leh chu tirhkoh chu khawiah nge a awm?” a lo ti boh a.

“Aw lalber, ani pawh chu a chin kan la hre lo.”

Chutihlai chuan kawngkhar a rawn inhawng a, an tirhkoh sawi lai mek chu a rawn lang hlawl mai a. A thawhrimna te, a rilru hahna te leh a hlauhthawnna te avang chuan a hmel chu a lo danglam bawih tawh a. Amah a hmuh rual chuan Chitragupta chuan, “Eheu! Ni khati zat zat khawiah a ni i va thang bo a? Bhawlaram-a thlarau chu khawiah nge?” a lo ti vin nghal hlur a.

Tirhkoh chuan a kutphah pahnih suih zawm chung hian, “Ka pu, zahngai. Eng thil nge thleng ta mai tih hi engtin nge maw ka’n sawi fiah tak ang aw! Bum hian ka la awm ngai miah lo a, mahse kan Bhawlaram-a thlarau zet chuan min bum chiang ngei mai. Ni nga kal taa Bhawlaram-a taksa, a thlarauin a chhuahsan khan a thlarau chu ka lo man vat a, kan chenna khawvel lam hi ka rawn panpui nghal a. Khaw pawn lama thli thaw ṭan chhana ka rawn thlawhpui mek laiin ka kuta ta put chhuakin a pil bo ta daih mai a. Kha’ng ni nga chhung zawng khan khawvel pumah khuan ka zawng chhuak vek a, mahse a khuangcher bo hmiah ringawt mai a ni,” a ti a.

Dharmraj chuan thinrim zet hian, “Mi chhaw pa leh! Thlarau hruai hna thawk reng reng hian i tar ta chu a ni ber a, i chuti chung pawhin putar satliah mai mai thlarau kha i inbumtir thei chu a ni si a le!” a lo ti a.

Tirhkoh chu Dharmraj chibai buk na’n chuan a’n kun a, “Aw lalber, fimkhur thu hlaah chuan fimkhur chi kimin ka fimkhur ve asin maw le. Kum kha leh chena ta ukil ṭha ber ber pawh ka kut aṭang hian an la tal chhuak thei ngai lo a, mahse tun ṭum zet zawng, dawi thil a tel a ni, dawi thil,” a ti zuai raih a.

Chitragupta chuan, “Lalber, leiah khuan chu thil chu a hluar hle awm tak asin maw le. Miin an ṭhiante te thil an thawn a, chu an thil thawn chu kawng lakah rel-a hna thawkhoin an lo hup bo a. Bawm chhunga mawza inthawn te hi Railway Officer te hian an lo bun ang nawlh a. Bungraw phur chi rel-ah te hian thil hi a rel pindan chawp te hian a nia a bo fo ni! Chu mai pawh a la ni lo, pawlitik pawl hruaitute hian eptu pawl hruaitute hi hnawh bo na’n an han tantir thul. He Bhawlaram-a thlarau pawh hi eptu pawl hruaitute zinga a tu emaw ber hian, a thih hnu khan thil sual ti turin a lo thukru reng te hi a ni mai lo ang maw?” a ti a.

Dharmraj chuan Chitragupta chu nuihsawh hmel zet hian a’n melh a, “Nang pawh hian chawlh i mamawh tawh a nih hi. Bhawlaram-a te ang mi lak tlak loh lutuk kha a tu chuan nge maw lo chhawr ṭangkai se i tih reng reng ni?” a tih khum ta erh a.

Chutih lai chuan Naradmuni (Hindu-ho rin dana an Pathiante inkara palai hna thawktu) a lo thleng ve hlawl mai a. Dharmraj lo ṭhu ngawi reng chu enin, “Engti zia nge Dharmraj, i va ṭhu nguai ang reng ve? Hremhmun lama awmna tur hmun indaih loh vanga buaina kha a la kiang thei na nge?” a rawn ti a.

Dharmraj chuan, “Kha harsatna kha chu a kiang daih tawh e. Hremhmunah sawn nikum kum mai khan mistiri thiam fe mai a lo lut alawm. Contractor, sum tam tak nena building derdep zet zet sa ṭhin pawh an awm ṭeuh a. Contractor-ho nena inthuruala kum eng emaw zat atana sum ruahman sa lo fanghma no ei mai mai chi engineer ropui tak tak pawh an lo thleng chho nual a. Overseer, thlarau MR hlawh thlahlel em em mai chi pawh an kat nuk mai. Chu’ngho chuan rei lo te chhungin hremhmunah in te chu an sa tlar ṭhet ṭhut hman alawm. Chu vangin, kha’ng harsatna kha chu a kiang tawh a, mahse, harsatna sut kian harsa zet mai kan tawk ve leh ta thung a. Bhawlaram-a tih hming pu mi pakhat chu ni nga kal ta khan a thi a. A thlarau chu he kan tirhkoh hian a rawn hruai mek laiin, kawng lakah chu thlarau riangvai chu a rawn inbumtir pek a, a tibo ta ringawt mai zu nia. Ani hian a thlarau tihbo chu khawvel pumah a zawng chhuak a, zu hmu zo chuang der loa le! Heti ang hi thil kal dan a nih chhoh zel zawngin sual leh ṭha hi thliar hran theih a ni ngut tawh na maw chu le,” a ti charh charh a.

Narad chuan, “Income tax an tih te hi bat a nei a ni mai lo ang maw? Chu’ng vang te chuan an lo hreng khawtlai mai mai te a ni ang ka ti,” a ti a.

Chitragupta chuan, “Income a awm chuan tax te chu a awm tur alawm. Pachhe tawp khawk ve ngang kha a ni a,” a lo ti a.

Narad chuan, “Kan thu chu a harin a phurawm ang reng phian lawi si a nih chu. Khawi nge, a hming leh a chenna hmun mi’n hrilh teh. Leiah chuan ka zu kal ve chhin ngat teh ang,” a ti ta a.

Chitragupta chuan hming ziahna bu chu a’n keu a, “ A hming chu Bhawlaram-a a ni a. Jabalpur khuaa Ghamapur veng, kawrte kama in tlabal zetah an chhungkuain an cheng a. Nupui pakhat, fapa pahnih leh fanu pakhat a nei. Kum lamah chuan 65 a kai tawh a. Sawrkar hna a thawk ṭhin. Kum nga kal ta khan a pensawn tawh a. In luah man hi kum khat chhung zet chu a pe thei tawh lo a. Chu vangin in neituin hnawhchhuah mai a tum a. A hnawhchhuah hmain Bhawlaram-a chuan in mai ni lo, khawvel a chhuahsan ta a ni. In neitu hi in neitu fekfawn tak a lo nih hlauh phei chuan Bhawlaram-a thih hnu-ah khan a chhungte hi a lo hnawtchhuak tawh lo ang tih a sawi theih loh. Chu vangin, a chhungte zawnga i vah kual ve fe chu a ngai mai thei a ni,” a ti a.

*****************************************

Lungchhe vankaia nufa lo ṭap keuh keuh a hmuh aṭang chuan Narad chuan Bhawlaram-a in chu a zu hre thei mai a.

Kawngkaah dingin ring leng lawng hian, “Naraian” a’n ti a (‘Naraian’ (na-ra-ian) hi Hindu Pathian pakhat, Shiv-a kohna hming a ni a. Narad hi Shiv Pathian ringtu a ni a, “Naraian” tiin a Pathian hming hi a lam reng mai ṭhin e an ti). Hmeichhe naupangin a lo hmuh chuan, “Ka pu, kal zel rawh,” a lo ti a.

Narad chuan, “Kut ka dawh hlei nem. Bhawlaram-a chungchangah eng emaw han zawh fiah lawk che u ka’n duh mai chauh a nia. Bawihte, i nu rawn ko chhuak lawk mai ta che,” a ti a.

Bhawlaram-a nupui chu a lo chhuak a. Narad chuan, “Ka pi, Bhawlaram-a natna kha eng nge ni kha?” a lo ti a.

“Engtin nge ka’n sawi ang aw? Aw, a... a natna chu retheihna kha a ni ber mai. A hna aṭanga a pensawnna kha kum nga zet a ni tawh a. Chuti chung chuan pensawn hlawh a la hmu thei reng reng lo mai a. Ni 10 - 15 chho vel hian dilna chu a thehlut ve ziah a, mahse chhanna a dawng ngai lo. Chhanna a dawn chhun lah chu, ‘I pensawn chungchang hi ngaihtuah mek a ni,’ tih chauh a ni a. Kum nga chhung zet chu kan tlereuh neih chhun te hralhin kan ei ṭawk ṭawk a. Chutah, bungbel lamah kan ṭuan leh a. Kan inhralh kawt leuh a, mei alh kan en a ni ber tawh a. Chhungril lama uaitu lungngaihna khan a uai thlu a, a tawp a tawpah chuan a ṭam hlum a ni ber mai,” a ti a.

Narad chuan, “Eng nge i tih tak ang ka pi? A kum lah kha khati zat chauh mai kha a la ni si a,” a ti a.



“Chutin ti ma ta che ka pu. A kum kha a tlem tawh hlei nem. Pensawn hlawh kha thla tin cheng 50 - 60 vel emaw hmu zel thei ni se eng eng emaw thawkin engtin tin emaw kan khawsa ve nawk nawk thei tur kha a ni a. Mahse engtin nge kan tih chuan ang, kum nga zet a hna aṭanga a chawlh hnu-ah pensawn hlawh naia sen pawh a hmu miah lo a nia,” Bhawlaram-a nupui chuan a ti a.

Chuti ang thu lungchhiatthlak ngaihthlak reng chu nuam a tih loh avangin Narad chuan, “Tu emaw han ngainat fal deuh bik, a rilru han luahtu bik deuh te an awm em?” a’n ti a.

Bhawlaram-a nupui chuan, “Ka pu, a fate hi a rilru luahtu chu an ni mai,” tiin a chhang a.

“Ni loin maw le, in chhungkaw zinga mi ni lo, entirna’n... ih... hmeichhia tu emaw...,”

Chu nu chuan thinrim hachang ṭhial rap rap chung hian Narad chu a melh ta khai khai mai a, “Hram tlahawlh viau lo mai teh. Mi naran ni loin puithiam lai i nih hi. A dam chhung zawng khan hmeichhe dang reng reng a ngaihmelh chhin eih lo tih hi hria ang che,” a lo ti bak hlar a.

Narad chuan nui chung hian, “I ngaih dan chu a ṭha hle mai. Khati ang ngaih dan ṭha neih kha chhungkaw ṭha zia a ni ngai e. A nih leh ka pi, ka kal tawh mai ang e,” a ti ta a.

Pitar chuan, “Ka pu, puithiam, mi dik i ni a. Kan pa pensawn kan hmuh theih na’n hian eng emaw tal chu min tihsak thei hram lo’m ni? Ni eng emaw zat chhung chu he’ng naupangho chawmna hi a daih thei dawn si a,” a ti ṭawk ṭawk a.

Narad chuan a khawngaih ta hle mai a. “A..., ka pi, keini ang puithiam rethei satliah thu hi tu’n nge maw han awih chuang ang le. Helai vela biak buk neia han inkulh lah ka ni ve bawk si lo a. Eng pawh ni se, sawrkar pisa lamah chuan va kalin ka theih tawp ka va chhuahsak ve hrim hrim dawn che nia,” tiin a thlah ta a.

*************************

Narad chu sawrkar pisaah chuan a va kal a. Pindan hmasa bera lo ṭhu babu pakhat hnenah chuan Bhawlaram-a chungchang chu a va thlen a. Ani chuan Narad chu ngun taka lo en chung hian, “Bhawlaram-a khan dilna chu a rawn thehlut ngei a, mahse a dilna kha a delh beh loh avangin a thlawk bo ta a ni awm e,” a lo ti a.

Narad chuan, “Unaupa, lehkha delh behna chu in ngah hle awm si a, chu’ng chuan engati nge in delh beh mai loh?” a’n ti a.

Chu babu chu a nui suk a, “Puithiam ngang i ni a, he khawvel kalphung hi i hre thiam ve chiah lo a nih dawn hi. Dilna lehkha te chu lehkha delh behna pangngaiin an delh bet ve ngai hlei nem. En teh, saw pindana \hu babu saw va be ta zawk che,” tiin babu dang a kawhhmuh a.

Narad chu babu dang hnenah chuan a va kal leh a. Ani chuan babu dang a lo kawhhmuh leh a. A lo kawhhmuh babu pawh chuan babu dang a lo kawhhmuh lehchhawng a. A babu biak reng reng chuan babu dang an lo kawhhmuh ta zel mai a. Babu leh officer 30 lai hnena a kual a kual hnu chuan officer tirhkah pakhat hian, “Ka pu, heti takin engati nge i buai i buai kual duh ni? Kum tluan pawhin vir kual vir kual mah la eng i ang thei chuang lo ang. Chu ai chuan pu ber saw va hmu vat la, i va tihlungawi zawh phawt chuan i hna chu a fel a ni nghal mai,” a lo ti a.

Narad chu an pu ber pindanah chuan a va kal a. Pindan pawnah chuan tirhkah pakhat hi a lo muthlu a, chu vangin lo chelh khawtlaitu nei miah loin pu ber pindanah chuan a lut tlang nghal a. Inhriattirna lehkha pe lut hmasa loa lo lut a’n hmuh chuan pu ber chu a lo sa nghal phat mai a. “Hei hi sakhaw biak buk emaw i ti ta mai em maw ni, khatia i rawn pawngpaw pen luh tak thlurh thlurh mai le. Engati nge inhriattirna lehkha i rawn pek luh hmasak loh?” a lo ti khur khur mai a.

Narad chuan, “Engtin nge ka rawn pek luh theih ang? I tirhkah kha a muhil daih alawm,” a ti a.

Pu ber chuan, “Eng nge i duh reng reng a?” a ti leh a.

Narad chuan Bhawlaram-a chungchang chu a sawi ta a.

Pu ber chuan, “Puithiam i ni a, office kalphung i hre ve lo a ni maithei. Bhawlaram-a thiam loh kha a nia. Unaupa, helai pawh hi in sakhaw biak buk ang tho kha alawm a nih. Thilpek pek leh thawhlawm thawh te pawh a ngai ve ṭhin alawm. Bhawlaram-a chhungte i hria a. Hei a dilna lehkha hi a thlawk leh ṭhin a, rawn delh beh a ngai a nih hi,” a ti a.

Narad chuan a rilru te tein, ‘Hetah pawh chuan lehkha delh behna bawk chu kan harsatna bulpui a ni leh ta tho a nih chu,’ a ti roh roh a. Pu ber chuan, “Unaupa, sawrkar pawisa chungchang ngang a ni a, pension case hian office sawmhnih vel zet a paltlang a ngai ṭhin a ni. Chu vang chuan a tlai ṭhin alawm. Thu ngai reng hi hmun sawmhnih velah, vawi sawmhnih vel buaipui kual a ngai ṭhin a, chumi hnu-ah chuana fel thei chauh ṭhin a ni. Pensawn awm zat zat hi stationary-ah a kal ral a ngai bawk a. A..., duh chuan tihfel hma theih dan kawng chu a awm tho a, mahse,...” a ti a, a’n ngawi vang vang a.

Narad chuan, “Mahse, engtin?” a lo ti thuai a.

Pu ber chuan nui ruh ruh chung hian, “Mahse, a delh behna tur chu a ngai si a ni. I hre thiam lo mai mai a ni. Entirna’n, he i ṭingṭang te chi te hi Bhawlaram-a dilna lehkha delh beh na’n chuan a hman theih ang chu. Ka fanuin rimawi tum a zir ṭhin a. Hei hi ka hawn mai ang e. Puithiamho ṭingṭang ri hi a mawi thei si a,” a ti a.

Narad chuan a ṭingṭang chu a ui ru khawp mai a, mahse a hmela eng mah lan chhuahtir lo tura insum hram hram chung hian a ṭingṭang chu dawhkanah chuan a dah a, “La mai ta che. A pension order chu a theih anga rangin min tihchhuahsak hram dawn nia,” a ti ta a.

Pu ber chuan hlim nui vun vun chung hian Narad chu ṭhutna a’n pe sauh sauh a. Ṭingṭang chu kil khatah dahṭhain tirhkah kohna dar a’n hmet ri a. Tirhkah chu a lo lut a.

Pu ber chuan, “Babu zinga an hotupa ber hnenah khan Bhawlaram-a case awmna file kha va la teh,” a lo ti a.

Rei lo te hnu-ah chuan tirhkah chuan Bhawlaram-a dilna lehkha za nufa zet awmna file chu a rawn chawi lut a. Chutah chuan Bhawlaram-a document pawh a tel a. Pu ber chuan file-a hming inziak chu a’n en a, a tihchian na’n, “Ka pu, a hming kha tu nge i tih kha?” a’n ti a.

Narad chuan pu ber beng chu a ṭha vak lo tih a hriat avangin ring leng lawng hian, “Bhawlaram” a ti a.

Vawilehkhatah file kar aṭang chuan aw hian, “Tuin nge mi ko? Dakpu em ni? Pension order kha a chhuak tawh em ni?” a rawn ti a.

Pu ber chu a phu zawk a, ṭhutthleng aṭang chuan a let thla tawp mai a. Narad pawh chu a ngaihna hre loin a hawi he haw hman a. Mahse thil awmzia a hre thiam leh nghal thuai a. “Bhawlaram! Nang hi Bhawlaram-a thlarau i ni ang maw?” a han ti a.

Aw chuan, “Aw, ni e,” a rawn ti a.

Narad chuan, “Kei hi Narad ka ni a, nangmah hruai turin ka lo kal vang vang a nih hi. Vanramah an lo nghak mek che a ni,” a’n ti leh a.

Aw chuan, “Ka kal dawn lo. He ka pensawn hlawh dilnaah hian ka tang tlat a. Hetah hian ka rilru a bei tlat a ni. He ka dilna hi ka kalsan thei lo,” a lo ti tlat a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)