LALRINAWMI By Tmawii (Completed)

Episode nei ho a hlawm a dahkhawmna
TMAWII
Posts: 417
Joined: May 18th, 2018, 8:29 am

LALRINAWMI By Tmawii (Completed)

Unread post by TMAWII » September 14th, 2018, 6:52 pm

LALRINAWMI.

By Tmawii.

Ka story phuailuai ve tak min ngaihhlut sak a, min lo chhiar sak tute zawng zawng chungah thinlung takin lawmthu ka sawi mawlh mawlh e.🙏🏼🙏🏼🙏🏼

Hei, a chhunzawmna ang rengin competition a ni tawh lo bawk a, kimchang deuhin rawn chhunzawm ka tum ve a nia, min lo chhiarsak leh ṭheuh turin ka sawm a che u.A chhiar a nawm zawk na'n ka tawn angin, " Ka," tiin kan sawi tawh dawn nia.

Ka lawm e.
TargetPreview.jpg
TargetPreview.jpg (15.84 KiB) Viewed 17471 times

Chapter - 1
Thlasik a kiang ṭan a, boruak la vawt deuh si leh khawlum lutuk la awm si lovin chu zan boruak thiang nuam tak maiah chuan inkhawm turin ka insiam malh malh a. Ka nu chuan, " Mami, puan mawl bawk hi i bih chhuak leh ṭhin a, hei zat hi puan zeh mahni tah ngei i nei ve a, engtika bih atan nge maw i tih chuan le?" min lo ti barh barh a, kei erawh chu Simple leh tuihnai pangngai ve taka inthuam mai hi ka duh dan a niin, hun pawimawh bik te a nih tawp loh chuan ka inchei uar peih der thung ṭhin lova. Hmai hnawih lam nise, Nevia cream (a hun lai chuan hetiang inhnawih pha chu tlemte an la ni ang, tm) han chulh ve thuak thuak a lungawi mai, hnawihsen hnawih ngâi hauh lo a hmui/heh sensiah mai Pathianin min pek chu lungawi pui thei zel mai ka ni a, ka sam erawh chu kir ni bik si lo hian akawi ngiak a, mam taka khuiha ṭawn beh phei chuan sam ngil emaw tih ve mai theih tur hian a rualrem ve thlap zel a: ka tan chuan incheina hi a ngai hautak lo-in a awlsam lehling phian ṭhin zawk a. Hahmai rual ṭha tak leh zuk leh hmuam tihna hnuhma awm hauh loa var siau mai, hmai tung lam aia bial lam pawl mah zawk, hang ngaihno bei an tih ṭhin aia ngo hret si, Mizo nula-ah chuan a vantlang vel tur feet 5:2" vela sang, ria chum bat mai hi ka ni ve tlat a.

Bible leh Kriatian hla bu kengin ka chhuak ve ta zân zân a. Biak In ka va thleng chu nula an lo la kal tlem hle mai a, nula ṭhutna tlar hmasa ber dawttu-ah ṭhu ve nghalin Khuangpu lam hnaih berah ka ṭhu ve ta ran mai a. Tlaia kan feh kan haw tlai deuh vangin zanin programe hi ka hre lo khawp mai a. Nilaithawhṭan zan a ni a, biak in dar a rik avangin ka kal ve tawp mai a ni. Inkhawm ṭan a hun chuan Chairman a rawn ding chhuak a, tihtur ṭul ang ang te ti Q zungin Kohhran thu puan ngai leh hriat turte Secretary-in a rawn puang a, chutah chuan a ni kan inkhawm chhan ka hriat ve tak chauh ni.

Programe ṭul zual kan zawh thleng chuan Pulpit chu ala ruak ta fo mai a, inkhawm chairman in ṭha a tih ang anga min kaihruaiin fakna hla sa-in kan zai mek a, hla chang- 2 -na kan sak lai chuan Mipa luhna kawngka lam aṭang chuan thawm a rawn awm a, kan hla sak pawh sa zo lo chuan Chairman chuan min tawp pui a, Lo lutthar te lam chu kan hawi rual ta ṭhup a. Lo lut thar te chu mipa hlir pathum an ni a, an paw hlawm thengthawng hle mai, an thawmhnaw leh lu te pawh chu inkhawm dawna han tuaifai ṭhat hman loh a ni tih a hriat hle mai a. Biak Ina an lo luh dawn a an inben faina niawm tak takin a fai nual mai a ni ber.

Chutah, kan inkhawm hruaitu chuan kan vaia min dintir-in lo lut thar pathum zinga a la valai hmel ber chu kan Pro Pastor thar tur a nih thu a sawi a, tichuan kan ṭhut leh rual chuan thusawi turin a sawm zui ta nghal a. A inthuamna chu Jacket uk leh kekawr buang lek lek niin a pawt ve em avang chuan a rawng dik pawh a hriat fiah theih vak lova, introduce leh thu tlem azawng sawiin Khaw dái pengṭhuama kawng an bo dan leh inah pawh chawl hmasa lova Biak In rawn pan nghal an nih thu a sawi a, thu tam sawi loin a ṭhutna tur lamah chuan a ṭhu paw ta thâng mai a. Inkhawm hruaitu chu lo ding lehin thu tlem a sawi a, " Hei inhmuh ang hian kan pro pastor thar tur hi tlangval a la ni a, nula ho khan ngun deuhin lo thlir ula, a hmel leh hmaifang pawh achhe lova, nimahsela, keimah kaltlang lo chuan tumahin ngaihzawn leh rim awih a ni lovang," a rawn ti fiam pah bawrh bawrh a, nuihza insûm tak chung leh ani lah paw ṭha ve thengthawng bawk si, amah ka va en ve zawk chu anin min lo en ve chiah bawk si nen; mak tak maiin kan mit leh mit chu a intawng ta chiah mai le !!

Tichuan, inkhawm chu kan bang ta a.
Kar a liam a, thla a rawn vei ve zel a.
A hminga KṬP hruaitu lamte lo nih ve si chuan kohhran thiltih leh hnatlang velah kan chhuak tamin, eng kawmiti emaw ber neih ngai nen, a kar lakah hla zir ngai ve reng bawk nen chuan zan awl hi avâng pharh mai a ni. Chutia inhmu fo ta chu inkawm nél chin a awm ve lothei lova, a ṭulna avanga han awmtlân chang a awm pawhin ka rilrua thil awm chu ka ti lang ngam ngai lo. (Keini ang hmanlai mi in tih hunah kha chuan, tlangval inleng kan han nei nak nak a, inleng ho zingah khan duh kan lo thlang ru ve mai a, chutichung chuan mipa-in min hrilh hmasa anih ngawt loh chuan kan in zép ral raih duh ṭhin. Hmeichhia-in mipa bem hmasak leh rîm hi ala awm ve miau lo a ni.hehe) Mahse, thil lo thleng tur hi chu a lo thleng leh nge nge ṭhin, ani pawh chu ka nunah lohtheih loh a a lo luh hun chu a rawn thleng ve ta a ni. Mize inmil tak mai leh tui zawng inang ta chu kan inzui ve ta chawt mai a. Rawngbawlna kawng hrang hrangah inhmang zuiin kan hlim ve ṭhin hle.

Vawi khat chu bial khaw pakhatah bial zaipawlin hla kan zir a, tun thleng hian ka theihnghilh thei lo. Part hrang hrang changtute kha mahni part ṭheuh sa turin conductor-in a sawm a, ding chhuakin mahni part an sa ṭheuh va, a tawp berah "Contralto ho kha, zai ve r'u le," a rawn ti a. Muangchanga dingchhuakin ka hawi kual miai miai a, chutah, " Midang ho kha ding ve ta che u," conductorin a rawn ti leh chu, " Keimah chauh alawm rawn kal, midang an awm lo," tiin ka lo chhang a, ani chuan, " Khai aw, kan zir chhung zawng khan nangmah chauhin maw i lo al hem hem a! I aw hi chu atam ve ngawt mai, Pastor bialkhat zaipawl i al hneh hle mai," min han ti chu. (ka zak ve deuh hehe)

Kum hial arawn vei ve takah chuan chutia mipa leh hmeichhia inkawm ve ta reng chu induh thute sawiin kan inpawh ṭha ta hle a, an lo thlen zana a awmdan chu heti hian a sawi chhuak ve ta hlawl a: C-a chuan, " Khatia Aizawl aṭanga kan rawn chhuak kha Champhai chu hma deuhah tluang takin kan rawn lut a, thingpui inpaha chawl zawkin kalkawng chanchinte kan zawt a, tlaichhe lovin leh khawthim hma ngeia rawn thleng turah kan inngai a, kan rawn tlan tluang thawkhat viau e, kawngpui a chhe ve deuh em zawk a. Kan tum ram pawh kan tlan tawh darkar ngaihtuah chuan hnai ve hle tawhin kan ring a, kan hlim ve viau mai. Mahse, kan hmaah chuan kawngpui chu lian ve tak takin thlur thum laiin a lo peng ta sung mai a! Tlailam te a nih tawh avangin han zawh mai tur lah an awm mai si lova, dik ber a kan rin chu zawhin kan tlan ta zel a, thlen hun fe tawh a kan ngaihah pawh khua alang ta hauh si lova, ngaihṭha vak lovin kan han ding leh rênrâwn a: engpawh nise kan tlan tawh darkar chhutin khaw thlen hun fe ni tawha kan hriat avangin kan pén ṭanna kawngṭhuam kha pawh tumin kan inher a, kan rawn let leh ta a ni.

Hun a tawt tak em avang khan intihfai leh lan mawihnai lam reng reng kha kan lo ngaihtuah tawh lo va, kan programe duansa kha bawhpelh hlen hlauin inah pawh lut hmasa lo khan kan rawn bantlang ta tawp a. Ka thih loh chuan inkhawm hi ṭhulh ka duh ngai lo va, lan mawi loh ai chuan inkhawm loh ber hi ka hlau fo zawk ṭhin a. Ihmaw...ban dawn lam hnaih a inkhawm hruaitu thusawi vanga min rawn en, kan mit leh mit han intawng chiah mai aia mak tih kha ka la nei ngai lo asin ! Keimaha nghawng a neih nasat dan kha ka la hriat ngai loh leh tawn ngai loh a nih avangin ka ṭek sawk ni ber hian ka inhria a, a hnu-ah kha chuan ka rilru-ah a ruk tein, 'Lalpa'n ka kawppui awmmi amah kan biakna inchhung ngeiah min pe ta ni-ah ka ngai nghet hmak mai a ni.' Chutih rual erawh chuan engmah pawiti lem lo a ka rawn luhpui tak mai ka thuamhnaw leh vaivut kai paw thur mai ka hrechhuak kha, khuka khuk ral chem chem theih nise ka va'n ti tehreng em!! Chu pawh ka la hmuh ngai hauh loh leh hriatloh chhingkhual lanu mai ka tan a la ni rih nangmah vang ngei kha a ni si a. Nang khan engtin tak min ngai ve ang che maw? tih ringawt mai kha ka ngaihtuah zui rauh rauh reng a ni. Nang lah kha engmah hrezui awm hmel khan i awm duh der si lo va, a engamah hma khan ka va hah nghal si tak em!" tiin min hrilh malh malh mai a. Ngun taka lo ngaihthlak sakin lehlam hawi deuh hian a rukin ka nui var var a, engmah phei chu ka sawichhuak ve ta lem hlei lo va. Hun lo kal zelin kan inkawmin rawngbawlna ki hrang hrang kan thawk ho ta zel a, thil tawn nuihzatthlak fe fe lah kan ngah ve bawk.

Ṭum khat chu, vanduaithlak deuh maiin kan khuaah mitthi an awm ta tlat mai a, thih pangngai ni lovin Sarthi a ni nghe nghe a. Chumi chu post mortem ngai niin champhai lama Doctor an lo thleng har si, nghah chhung leh programe pawimawh zual tih chhung a rei viau mai a. Mitthi vui turin Pastor a awm loh avangin C-a chungah a tla miau mai a, kan mitthi lah kha mi zawng zawng a barakhaihin hlauhawm an ti em em hlawm mai a, zan dar 8:30 ah chuan hunserh kan hmang thei ve ta hram.a. Chaw ei tura ina ka haw kha kal leh lohvin ka chawl muang nghal a, chutihlai chuan ka ṭhiannu leh C-a chu hmanhmawh em em mai hian an rawn tlan lut rawk mai a, ka bánah min kaiin min chhuahpui ta hlawk hlawk a. C-a chuan, " Ka hawikual a ka hmu si lo che a, pastor a awm si lo; keima'n ka vûi a ngai a, hetiang hi vawikhatmah ka la tawn loh avangin tih ngaihna ka hre lo reng reng a, min finchhuah a min puih tlat loh chuan ka pâmṭul thei mai ang, phat mai te ka duh rum rum mai, engtia tih chi nge sawi vat vat ta che," a ti ta he haw a. Amah hi hemi lai hian kum 25 chauh a la ni ve bawk.

Ka tan pawh thiam lo inti a han phatna hun a awm tawh lo. " A tlai tawh si, thu han thluaithlumna hun a awm loh hi, zâm suh. Bible chhiar la, ṭawngṭai bawk la a tawk mai," ka lo ti liam.puat a. Ani lah chuan, " Engtinnge ka ṭawngṭai ang, vanram a kai hmel bawk si lova," a lo la ti zui. " Um, Vanram.leh hremhmun ngaihtuah a ngai lo. A chhungte tan thlamuanna dil sak la, lei chu leiah, vaivut chu vaivut vekah a kir leh ta...etc..ti mai rawh," ka ti ve leh a. Chutah mitthi in chu kan thleng ta nghal a. Beisei ai mahin hun a hmang puitling thei a, thlanmual lam panin kan chhuak ṭui ta nghal a. Kawngah chuan ka ṭhiannu nen chuan ka bânah min kai/vuan ve ve tlat mai a, kei lah pek chuan ka hlauh vangah an ngai emaw tiin, " Ka hlau miah lo a nia, min vuan tawh s'u; kawng a chep si kalrual chu a buaithlak." tiin tal chhuah phet ka tum a. Anmahni kan hrechiang chu an lo hlau nasa mai zawk chu niin, chumi vanga min kai tlat chu an lo ni reng a. "A hlau chuan ka thin rawn dek rawh u, ka hlau lo mai ni lovin ka thin hi a phu ve lo hrim hrim a nia." ka ti a. C-a'n ka thinphu a rawn dek chu a lo danglam ve miah si lova, ka ṭhiannu pawh chuan rawn dek ve-in mak an ti dun ngei mai.

Kei hi Nu leh Pa aṭanga hlauh hre vak lo, thla an tih te phei hi chu a awm pawh ring ṭha duh hauh lo hi ka ni ve a. Ka nu khan heti hian min hrilh ṭhin a, " Mami, thla hlauhawm ber chu i thlahlim kha a ni mai, kha pawh kha i awm ang chauh zelin a awm thei a, i chetdan ang zel chauha che thei niin nangmah khan i thunun tlat a ni, chuvangin, thla hi hlauh mai mai tur a ni ngai lo. Pathian ringtu tan hlauh tham a awm lo a nia," ti a min hrilh kha ka pawm bur mai a ni. Sual tura thlemna a luhna remchang tak tak leh ngaihtuah hmul hun remchang chu kan tawng hnem ve ngei mai, mahse, min enkawla min venghim ṭhintu Pathian zarah thianghlim.leh felfai takin kan inkawm chho ve zel a, kan chhungte leh midang mit tikham turin kan awm ngai lo. Eng tak kan hma hunah lo thleng zel ang maw? ...

End of chapter 1



Link:
BBcode:
HTML:
Hide post links
Show post links

TMAWII
Posts: 417
Joined: May 18th, 2018, 8:29 am

Unread post by TMAWII » September 16th, 2018, 5:11 pm

LALRINAWMI.

Chapter 2

By..Tmawii.
Ni 16/9/'18


Chawlhni zan kan inkhawm chu tlar hmasa berah ka ṭhu a, Ani chuan inkhawm a hruai ve thung a.

Eng engemaw ngaihtuah kualin muthlu hauh si lo hian ka kun reng a, inkhawm hruaitu lam.pawh ka lo en hauh lo mai a. Inkhawm ho tan chuan inkhawm hruaitu en loh hi thil har angreng tak a ni zawk awm e.

Chuta inkhawm kan bang chu ding takin ka haw nghal nal nal a, " Nu, ka lu a nâ, ka mu nghal aw," tih leh khuma lawn chu ka rual nghal zat a. Ka mu fel nghal der a.

A hnu rei lo teah chuan kan kawngka chu rawk kik kauh kauhin ka nu chuan alo chhawn a,

" Ka pi, Khaw'nge Awmtei?"

" Â ..Nu ka lu a na deuh a, ka mu," a ti ta nih kha; a la muhil lo mai thei a ni ka nu chuan alo ti nghal zat a.

C-a leh a ṭhianpa chu kan bed-roomah lo lut pheiin min rawn en a; ka lo muhil der hmak thung a. Ka inkhawm ve ngei si avang leh ka en duh miau loh avang khan min rawn chhui nghal hi a ni awm a.

"Awmte, lo tho teh, hei C-a nen kan lo kal tawp a nia, an in em pawh pan hmasa thei lovin min nawr tlut tlut mai a, eng nge maw a hriat ni?" U Saia chuan a ti bawrh bawrh a.

Tichuan, peih vak lo leh nguai deuh hlek chung chuan ka tho chhuak ve leh ta mai bawk a. Inrinni a kan anhnah la kha ni a sa si a, chumi bakah vau a luite-ah kan cheng zui a, thawmhnaw pawh ti ro chuang lo va haw leh ta mai kha kan ni a. Ka zo vak lo ni tur a ni. Ka lu na areh thei tlat lo mai.

Tho chhuakin tap meilum aipah chuan kan ṭhu kual ve ta ṭhap a, C-a chuan, " I nuam lo a nih chuan inkhawm lo khan mut lum ve mai tur a nia, i hritlanv dawn te hi a nia'ng e? Engahnge ṭha taka i sawi ve mai loh, min ti thlaphang hman alawm, Biak inah lah khan min en duh der bawk si lo va," a ti chhuak ta phawng a.

Ka nu leh U Saia an awm ve bawk si a, ka lo zak ve khawp mai a. " I thih loh chuan inkhawm rawh, min ti si a, ka ṭhulh ngam hleunem," ka lo ti zuai raih a. Ka nu ho chuan an nui ta dar dar a. Rei lo te-ah ka pa te ṭhufual pawh a rawn thleng ve ta nghal a. Chumi zan chu rei leng lovin an haw ve ta nghal a.

Ka mut hmunah chuan tihian ka ngaihtuah zawm ta mai mai a.

"Hepa, vawikhatmah ka la hmuh loh leh hriat ngai loh hi ka duh te mai chu a ni a, a thu min hrilh ho te kha a rintlak em ang chu maw, inkhawm laiin ka en lo tih thlengin a lo hre vek a nih si chuan min lo chik ve viau chu a niawm phawt mai a. Khatiang thu te chu ka nu leh a ṭhianpa awm lai chuan sawichhuah bik loh mai tur a nia, a mizia hi amakin a frank mah mah em aw..." tiin ka ngaihtuah zawm ta mai mai a.

Tunlai ang hian mobile phone te ala awm ve lo va, mahni inhmuh leh a remchan loh chang a lehkha han inthawnte kha kan inkawmna ber chu a ni ve mai a.

Chutah pawh ani chu rawngbawltu serhhran ngat niin tlangval dangte angin ala zalên lo zui a, kawng hrang hrangah chetzia leh engkimah fimkhur angai bik reng bawk si a ni.

Amaherawh chu a nihna chu engpawh nise, mizo tlangval, nupui neih hmabak ve tho a nih avangin len leh nula han rimte chu tihlohtheih chu a ni ngawt bik lo thung.

Tumkhat chu a dam lova, ka tlawh a beise ve khawp mai a, mahse ka ngam ngang si lo kha kan huanah ka lut a, Lakhuihthei hmin ṭan tawh zinga a pum ṭha ber chu lo-in pek ve ka tum a.

Ka han ngaihtuah chiang a, ka ngam leh tak ngang loh a vangin ka lawhna kung, a hnah buk hnuaiah chuan ka thawlh leh ta mai a, engmah ti ta lemlo chuan puan ka ṭhuisan ta mawlh mawlh a.

Ka rin loh deuh maiin ka puanṭhui lai mit chu ka hnunglam.aṭangin tu'n emaw ni a rawn hup thut mai a; ka phu nasa ngei mai.

Insiam rem paha ka'n ennak chuan amah C-a ngei chu lo niin ka hamhaih letling hle mai a, min chhal bawrh bawrh pah chuan, " Eng nge i ngaihtuah a, ka thawm.pawh hre lo khawp a i awm theih chu le," a rawn ti a.

" Nangmah," han tih mai ka tum zet nain ti ta lem lo chuan, " Ka puanṭhui lai hi....." ka tih takah chuan dim mang hauh lo hian ka biang taisen sa hlar maiah chuan arawn piai ta vawt mai a, a naaa tih rawih rawih pah chuan ka chum.let ve ṭang ṭang a.

" I phut nasat dan leh hamhaih nasat danah khan i ngaihtuah chu ka hre reng a, 'Nangmah' i tih ringin ka lo lawm ve hman em em a, kan pahnih chauh a kan awm lai na na na hi chuan inzêp reng bik teh suh," tih pahin ka biang a piaina taisen tat maiah chuan dimte bian min rawn fawh sak ta zauh a.

Nui var var chunga amah enlet chungin, ka puanṭhui lai dah meuh chuan chhuatah kan in umkual ta zak zak a.(nuamawm reuh e😊)

" Ka dam lo i hrereng a, min kan duh si lova, vawiin chu ka tho harh bawk a, in huana Lakhuihthei hling nei lo chi kha ka ei chak em a, ka rawn phei ta mai a ni; a chhan tak tak erawh chu i hriat ve tho kha...." tih pahin kawngka lam chu a hawi nghal zat a.

A hawina lam ka'n en ve chuan ka nu alo haw mek chu niin, ṭhenawmte puan bân mek sinior bit zeh tur a zuk thlansak lawk a ni.
Ka nu hi kut themthiam tak.mai niin Puan zeh chi hrang hrang hi a thiamin a tah reng mai a. Mi puan pawh kan tah hlawh nasa hle bawk; khanglai huna sum la hlutzia ngaihtuah kir hian kan la lut ve nual chuan ka hria, Puan khat kha ₹ 200 in kan tah ṭhin.

Keimah ngei pawh hian ka nu ka chhunin Cl-3 kan zirlai hian ka kutchhuak hmasa ber Mufler/scarf kan tih mai, a laia phiar âwng a inthuah, a lehlam.lehlam hmawr zum deuha phiar a, a hmawr lehlam kha a phiar âwng a va thun.luh mai chi, suih chawp ngai lo a awlsam taka complete sa thlap mai kha; a û ṭhianpa U Ramliana hnenah ₹ 30-in ka hralh ve nghe nghe.

Puanṭhui pawh hi zirchawp miah lo va ka thiam tawp a ni a, ka leng haw kha puanthan leh bakcheh la-in ka zai nghal hmiah mai a, hak tlak pangngai tak a chhuahin keimah ka inzir chho zel a, eizawnna a hmantlak khawpin ka thiam ve ta mai a ni.

Ka nu chuan, " Kha C-a, i lo leng thei tawh a ni maw? Mami lah hi i ṭhianpa va kan ve la, kan tih pawhin a ngam tlat pek lo a, a tum ve zuau hman ṭhin a, a ṭhulh leh nge nge ṭhin. I damkawr ei atan huana Lakhuihthei te khu zuk lo ula, ei ta che u, thildang pawh kan neih ve loh hi," a rawn ti nghal a.

Kan thusawi lai hre ve hman ni mai awm hian a a thu rawn sawi chuan a rawn phawk nalh tlat a ni.

Tichuan huanah chuan lutin a hma ni a ka lawhsa ken leh ngam loh chu kan la a, ka tihdante chu sawiin kan nui bawrh bawrh a.

Hun a lo rei a, a chhan ka hriat si loh hian ngei chiam mai chang ka nei ṭhin a,ka khamin ka hne hluah hluah ni ber hian ka hre mai ṭhin. Amah erawh chu ka hrilh ngai chuang lo va, chutiang hun a rawn thlen chang chuan keimah hian hreawm ti takin ka tuar a, inkhawm leh thiltih tlan a ngaih chang pawh hian en loh hram dan leh pumpelh dan mawlh hi ka zawng a, mahse, chutianga ka awm erawh chuan min tih lungawi dan hi a thiam em em a, eng hun.leh hmun pawh nise min care thiamin min ngaihsak em em ṭhin a ni.

Zana ka inkhawm bâng hi hmanhmawh taka tlan hawin ka mu nghal fo a, ṭumkhat chu ka u mipa hian, " Mami, C-a hi i hmangaih lo tlatin ka hria, nei leh lo mai rawh aw," a ti phut mai a. Chutah kei lah pek chuan rang deuh mai hian, " Maw a u...mahse ka duh alawm," ka'n ti liam puat a. Tlanghriat chiah khan palai inremna kha awm rih lo mahse, chhungkua ve ve erawhin kan lo sawi ho ve vek tawh thung a ni.

Vawikhat chu bial khawmpui hmang turin khaw ṭhenawmah kan kal a, bial zaipawlin hla kan rem dawn nghe nghe a. Mikhual thlenna tur pawh an lo ruat fel diam tawh a; engtizia kher nge maw ni kan thlenna tur a lo inang tlat mai a.

Kan va thleng ka han hrechiang chu engmah sawi lovin ka ṭhiannu Maveni ka sawm a, vengthlang lama ka hmelhriat Pu Denga te inah kan zuk thleng ta ngawt pek a nih kha.

Chawlhni tlailamah chuan ka hriat hauh lohvin Chaw eiah an lo sawm reng chu niin. Chaw ei hun dawnah chuan an han ko a, a lo chhuk thla chuan min hau/fiam nghal bawrh bawrh a, " Nangmah i kal ve vangin ka thawmhnaw ṭhenkhat pawh suk loh leh nawh mam lohin ka keng a, i lo tlanbo daih si a, kan thlenin tlangval bawnghnute ka sawr chhawk a, anin ka thawmhnaw nawtin a sufai ta ngawt alawm, a tihchi loh ṭhin lutuk," a ti mawlh mai a.

A chang hi chuan min nupui chei mah mah hian ka hre ve ṭhin a; ka zak ve fo mai.

Tlai chaw ei kan siam a, Vawksa, Zo-ar sawhchiar leh therhlo tam tak nen; chawhmeh an lo siam tam nasa mai a.

Chawbel bulah min ṭhuttirn lehlamah kan thlenin tlangval a ṭhu ve thung a, ka sir dinglam chiahah C-a ṭhuin a dawtah ka ṭhiannu Maveni a ṭhu bawk a. Kan thlenin nu chuan duhsak takin Bekang um uih hi min rawn chhawp hnai sat sat mai a; Zawngṭah nen.

G-a hma a mi chu ngawi rengin bekang chu ka nawr sawn deuh a, tichuan kan ṭawngṭai ta a. Ṭawngṭai zawhah kan thlenin nu bawk chuan, " Marin, bekang kha ka chhawp che u emaw ka tia , awi ka haihawt lutuk hi chu aw....".tih leh C-a hma tak maiah chuan a rawn chhawp leh ta chiah mai chu, Min nghawk sawk pah hian ring lêng lâwng hian, " Sawi ta che," a rawn ti deuh tuar mai a.

Keia zak lahin haider pah hian zawi te-in, " Engmaw? U Cte." ka han ti chu, " I hre reng, i hre vek, ka chawhmeh duh leh duh loh pawh ka hrilh vek tawh che kha; haider lo la a ni mai." a'n ti mai chu aw...khuk chem chema khuk ral daih kha ka va han chak tak em ! Bekang dahsawn pahin zawite hian, " Nu sang, min hrethiam rawh, bekang hi a ngaina lo a niang," tiin ka riat nawi ta niah niah a.

Kan thlenin te chuan nui ṭha chung hian min en ta he haw hlawm a. Kha mi ṭum tluka ka zah leh anin min zahpui loh si zia kha aw.

Khata ṭang khan ania kan bial khawdang ho pawhin min hriat darh tak ni. Kabzhn thlenin tlangval khan a hmain min lo imaita va tawh si a; ngawi mai mai duh bik hek lo.

Pheikhawk leh Kamis thar a neih ṭum mawlh kha a nuihzat thlak, a neihsa kha nalh ka tih leh tih loh min zawt a, nalh ka tihzâwng tak a nih thu ka lo hrilh mai bawk a. Aizawl akal khan keiman nalh ka tih vangin a neihsa ang deuh chiah chiah kha a lo lei leh chu niin. Ka fak beisei ve em em khan a rawn inbel a, kei lahin chawhnu inkhawm ban thlengin ka lo fak ta si lo a.

KṬP ṭawngṭai inkhawm banah arawn peng zui a, " Ka Pheikhawk leh Kamis hi a mawi i ti lo em ni?. Nilengin min fak miah lo va, a thar ka lei pawhin nalh i tih vangin ka neihsa rawng bawk ka lei leh phah a," tiin ka chhungte zawng zawng hriatah min han chhal ngeiah.!

End of chapter 2

Link:
BBcode:
HTML:
Hide post links
Show post links

TMAWII
Posts: 417
Joined: May 18th, 2018, 8:29 am

Unread post by TMAWII » September 17th, 2018, 7:52 pm

LALRINAWMI

Chapter 3.
Ni 17/9/2018.

Kan chungkua-in kan awm a, chutih lai chuan chhungkaw member 13 vel ka la ni a; a nuam tham ṭhin hle.

Puan zuar hi a lo kal hlauh mai a, ka u nen kan rawng duh zawngte kan lo thlang ve nawk nawk a, a hring, hring tak ngak mai rawng duk ni hauh si lo hi ka hmu fuh hlauh mai a, a tah mam ṭhat leh ṭhat lohte ena ka lo chik viau lai chuan C-a leng haw lam a rawn lut nawlh mai a.

Ka puan enlai chu rawn pawtthla-in a zuartu a pe let daih a, a ngaihna hre lo taka ka hawi he haw lai chuan, rawng dang pawh enkual miah lo hian pakhat a phawrh chhuak nawlh a, " Hei hi bih rawh, a mawi ka ti ber." tiin a vutbuak paw thak mai hi min pe a.

Han hnialna hun awm tawh hek lo; a vawi khatna atan industry puan khawltah ngei chu ka nei ve ta phawt a.

Ni leh thla te ral ve zelin kum hial a vei ve ta reng mai.

Tum lawk em em pawh awm hman lo vin, Aizawlah zirna chhunzawm turin ka chhuk ta kha a ni a, tlangnel khawp a ka kal hma si hian kan class ami Lalremruata hian min chhaih peih em em mai a, thingtlang mi ka nih hrerengin ka zûm dak reng mai kha a ni si a, ka zak ve ṭhin hle mai.

Mahse, tlangnel hun nei chho ve-in nuam pawh ka ti ve ta viau a, nikhat Remruata min rawn chhaih leh tur chu ka lo sawi khalh ve ta phat mai a, " Awi, Lalremruat, i hmel leh pian a ṭha si ! ka ui lutuk che," ka ti hlut mai a.

" Eng atan maw min ui? Rinawm,"

" Eh, UPC atan chuan,"


( tuman huat awih loh, UPC Sikul a ni miau a, ka uang ve 😁)

Remruata nuihza leh runthlak ti bawk si chuan min tum ta zawt zawt mai a.

"Ngawichawi leh ṭi reng emaw min tih laiin ka lo chhaih let ve ta si a, mak tih loh chi pawh a ni lo reng a ni.

Ka lehkha zir dan ve kha a dangdai deuh bawk a, byheart a sawi vak vak lo-in ka chhiar kha ka ziak leh mai ṭhin a, exam hunah sawi lovin kan ziak zawk dawn tih kha ka changchawi ve tlat ṭhin a. Kei, Nghaki, Rami, Dâwna, Muana leh Sangtea kha kan inkawm ngeih em em mai a; a theih chinah chuan kan inṭan thei hle bawk.

Chemistry kan zir hun a ni a, kan Miss Dini a rawn lut dawn si a, kan huphurh ngang mai a, ṭek hi a hmuam deuh reng lah tak a, ka ṭhianpa Dáwna u a ni nghe nghe.

Batary charge chungchang hi home work min pe a, a tawi zawk leh sei a awm nghe nghe a. Ka ṭhiante a tawi a sawitir laiin kei chu a sei zawk sawi turin min ti ta a, kei lahin, " Miss, khawngaihin black board-ah min ziah tir mai rawh, sawi lovin ka ziak chhuak thei a nia," ka ti kha,

"Sawi rawh."

" Exam hunah pawh ka ziak tho dawn a sawi lovin."

"Sawi rawh ka tih chuan sawi la a ni mai, Zirtirtute hnial zawt zawt reng mai desk ah khan ding nghal rawh."

Zak takin ka ding ta ṭham ṭham a.

Chutah ṭhianpa Dâwna a rawn ding ve ta zuah mai a, " Miss, inbengdai teh," a rawn ti chu kan miss chuan:

"Dâwnkim, Rinawmi sawi tur kha i sawithiam em ni? Khatia i rawn din ve hluah mai," a ti zui bawrh bawrh a.

Ka ṭhiana lah chuan, " Thiam.e, mahse Rinawmi hi ṭhut tir zet la, ka sawi dawn nia," a ti mai si a. "I thiam loh vaih chuan in ṭhianho zawng hi ka hrem khawp ang che u," ti chung chuan min ṭhuttir ta a.

Dãwna chuan sawi tum ang taka han awm kual velin min rawn en a, nui duh hlek lo hian, " Â...miss ka tihder a le... Awmte ding tawh miah suh," a'n ti mai chu tih ngaihna dang a vang duh teh a nia. A u khan han ti chiam dawn se a rem tawh ṭeuh si lo a😁

Kan exam hnuhnung ber ni a ni tawh a, chawhmaah kan zawh dawn avaagin kan nghakhlel tlang hlawm hle mai a; kan zawh veleh kei pawh khawmuang lo vin ka haw tlang nal nal a.

In ka thlen chuan tum loh deuhin C-a lo awm teh tlat a, kan in chibai zawh chuan a tih duh leh lo kal chhan te sawiin a ṭawng luam a.

"Awmte,"

"Um, eng nge ni ta,?"

"Ka pa hi a tar ve tawh si a, kum 80 a chuang ve ta reng mai a, a la chak vak ve viau nain a hmu chak em em che a, zankhat tuisik lemsual palha kal mai thei a nih ve tawh vang hian, ka nupui hmel hmu lo va kal hi a hlauh ber a ni ṭhin a, kei lah a fa naupang ber ka lo ni bawk si a. Ka pa hmu tur chuan kan khaw lamah kan kal ve zawk dawn em mi niang, in chawlh lai te a ni bawk a." a ti teh duah a.

Kei ve thung chuan rang deuh mai hian, " Chi loh lutuk mai, ka u te'n an phal dawn lo, chawlh chhung hi chuan keimah pawhin puih ka duh hrim hrim bawk a; ka theih ka ring lo a ni." ka ti nghal zung zung a.

Ani chuan min hnial duh hlek lo hian,

" I u te chu han dil ve chhin phawt la maw le," a ti duh lek fang a.

Tichuan ka u dil tur chuan Choka lam ka pan nghal a, ani (C-a) erawh chu sitting roomah a la awm thung a.

Ka u te nupa bula ka 'n sawi chu ka rin loh tak maiin an lo remti em em ta mai a; keiin a rem loh tur thu-in ka chhang ta zawk a.

Thlanglam aṭang chuan za em em a nui ri a lo chhuak a, C-a nui ri a ni.

"Nang kha,"

A aia za zawk mah chuan a nui leh ta hawr hawr a.

Ka u te chu lo kal hnaiin, ka sikul kal chhunga an inbiak dan leh ṭha an tih ve thu an lo hrilh vek tawh tih te chu min hrilh ta chauh a.

Va'n che runthlak thei tak!!!

Tichuan a tuk lama an khuaa kal tur chuan kan inbuatsaih ta zawk a.

Ke ngatin kan kal a, New market a ka ṭhiannu puanṭhui kha a kal ve loh chuan kal duh loh mai ka tum avangin, C-a te ṭhiandun chuan an va sawm chawp chuk chuk a, a lo remchang ve hlauh mai bawk a.

Maubawk veng lamah kal pheiin Tlawng kam lam panin kan chhuk thla a, Tlang kan hnaih tawlh tawlh a, a lum thla ta telh telh mai a; "Tui awmna remchangah hian chawl ila, i ṭhu thlandai ang u hmiang," ti ta lem lo chuan kan kal ta zel a.

A hnu deuh fe ah chuan Tlawng kam tak tak chu thleng thlain chawlhna chhete, buk an lo zar hlim ve diaiah chuan tu rawt bik pawh awm hauh lo hian kan chawl ta dial a.

Eitur leh mahni duh zawng kan lam sap sap a.

End of chapter 3

Link:
BBcode:
HTML:
Hide post links
Show post links

TMAWII
Posts: 417
Joined: May 18th, 2018, 8:29 am

Unread post by TMAWII » September 20th, 2018, 6:32 pm

RINAWMI
Chapter 4
13/9/'18.
By...T mawii.
Tlawng kam bukte-ah chuan thildang vak a awm lo a, thingpui leh chhang tlem azawng a awm ve a, ka ei peih der si lo.

Rosgulla mum khat te te hi plade-in an rawn chhawp a, a tak zawng chu ka ei thuai thuai a, a tui in lovin ka kalsan ta nal nal a.

C-a chuan min rawn au a.

"A tui chiah i kalsan a, a tak i ei zo vek bawk si, mum khat kha ₹ 5 zel a nia aw, mum 4 lai i ei a."

"Um, nangni'n chhang leh thingpui duh tawka in ei hnuah ka ei duh chhun min la huphurh vel, hlawh la hlim kan awm a ni lo'm ni." tiin Tlawng lui lam pan chuan ka kal nghal nul nul a.

Kawng hre hawt lo khan ka kal ve tawp a, Reiek kawng lo zawkah ka lo la kal zui. Tlawng aṭang chuan chho zawng hlira kalin hmaa mite mawng kan si lo chauh a ni mai a, luite lo luang her her bul chiah kawngah kalin, "Chawl ila i ṭhu thlandai ang u le," ti ta lem lo chuan kan chho zui leh ta thliai thliai a.

Chho ulh zual pui rehin pialtlep leh lengkir ve angreng deuh awmna hi kan chuang chhuak hlawl mai a, chutah meuh zawng tuma khap hman hma chuan tui khawhthla ser ser, a hnuai lung a zuk sawhna bul chiaha chhimbal zâm raih mai karah chuan ka lo awm hman reng tawh mai a.

Kan ṭhiante pa 2 an cheng ve duh ta si lova, C-a nen chuan chhimbal zâm karah kan han single dun ta ngei a, thawmhnaw nen vek ngei khan; a hlimawm ve hranpa ngawt mai.

Tin, kal zelin kan tum ram/khua chu tlai thim chhiat hma chiahin kan lut ve ta hlawl mai a. Inchhunga kan luh dawn chuan C-a chuan min rawn hrilhru sap a, " Ka lut hmasa ber ang a, ka dawtah nang, a dawt lehah Thangi (ka ṭhiannu kha) lo lutin a hnuhnung berah Pu Zova (C-a ṭhianpa) a lo lut dawn nia," tiin.

Inchhung kan lut chu lawm leh makti takin min lo en ṭhap hlawm a.

Pa ber chuan, " Mate, in rawn luh dan teh ṭhap pawh chu mo leh a ṭhiante pawh in va ang ve maw le?" a ti a.

Ani lah chuan,

" Kan ni alawm, i fa mo hmel tur kha hmuh hman loh i hlau em a, hei ngun takin en rawh le, ka bula mi zawk hi a nia," a'n ti mai chu ka va han zak ve tak em!!

Chutah ka inrin hman miah loh hian keimah ang rual vel, nula inkhaithli ang reng deuh hi lo kal hnaiin, " Awi, U Makhum, chawlh i nei ve em ni i lo kal ve tlat a," a rawn ti ta mai a.

Kei lah chuan a ngaihna hre lo zeta lo chibai pah hian:

" Aw selection test chawlh ka neih lai a nia,"

" Awi ha, Durtlang Hospital nurse hmelṭha Makhumi chuan eng selection nge paltlang i la ngaih cheu chu le?"

Mak hi ka ti tawlh tawlh mai a!

"Min hai em aw?"

" Hai thei nang le, hmanni ka nu nat laia kan chunga i felzia te kha, lawmthu hrilh tur che hi kan ngah teh mai a nia," te chu a la ti tak deuh deuh a.

C-a chuan inbual turin min rawn tir ta hlauh mai a; ka thaw huai mai.

A hnu a kan hriat leh chuan, Durtlang nurse hmelṭha leh fel, Khumtiri kha emaw min lo ti chu niin; min va han hmu hmelṭha tak.!!

Chawlhni hmang tura kal kan ni a, zan kan han mu, zing ka han tho leh chu namen lovin ka lo vung pum ul mai a, ka phei khawk kente pawh pakhatmah bun theih ka nei ta lo va.

(Motora chuang ngai hlei lo ke-in min kalpui hrep miau a😁)

Kan tum dan chuan, kan thlena a naktuk chiah kha Reiek tlang chuan tum kan ni a, ka kal thei tho vang chu tiin ke lâwngin ka chhuak lui nain, engchen mah ka kal thei ta chuang law; tun thleng hian Reiek tlang ka kal loh hlen phah ta a ni.

Tlai lamah chuan C- a chhungte'n chaw eiah min sawm a.

Chumi tlaiah chuan a ni ka tum leh beisei hauh loh thil ka hmuh tak ni.

Ruah a sur bur bur mai a, kan lênna te kawm tur awm lovin inseng fel velin an buai hle mai a, ran an ngahin an kawmchar lamah chuan bawng leh sial an awm ṭeuh mai a. Kan kalpui Pu Zova nen chuan Sitting roomah kan ṭhu a, kan thusawi tur neihin min daih tak vak loh avang leh C-a leh ka ṭhiannu inthiar tura kal an reh tak vang vang si avang chuan, kawt hmailam ân bathlar-ah chuan ka tei chho ve mai mai a. A piah lam inkil tawp cheta bathlar awm phei raih mai chu ka va hawi ve satliah mai mai a, ka ṭhiannu leh C-a chu duhthawh zet mai hian an lo infawp ngawng ngawng mai chu niin !!.

Ruah tam leh tam lohte, Pu Zova te leh engti tura kal chhuak nge kan nih theihnghilh ṭhakin pawnah chuan ka tlanchhuak ta dâwr dâwr a.

Ka rilru a fim leh meuh chuan kan thlen Inah pawh kal duh lovin an khaw Hall sir hulhliap chu bêlin, ka mittui nge ruahtui pawh thliarhran theih rual loh chuan ka ding dir ta zawih zawih a.

Amaherawh chu, C-a te pahnih khan ka hmu a ni tih an hre hauh thung lo.

Chaw ei hun thleng pawha ka awm tak lovah chuan min rawn zawng a, kan chaw eina turah pawh ka kal duh tawh lo va, kan thlennaah lah ka ei duh ta chuang hek lo.

Ka pumnat chhuanlama hmangin hma takah ka mu a, min ngaihsakna zawng zawngte chuan ka ṭah chhuak a belhchhah lek fang a ni bawk si.

Aizawlah khan lehkha zir turin zinglam dar 2-ah ka tho ṭhin a, hemi zan pawh hian hemi hunah chiah hian ka tho leh a, pawnah chhuakin an leikapuiah ka ding a, Aizawl lam chu thlirin ka mittui a sur zung zung reng a.

Ka rin loh laitak chuan ka kawngah hian kut hian min rawn kuah a, ka phu nasa ngei mai.

Engvanga chutianga awm nge ka nih leh ka pumna te chu a ziaawm zel em? tihte min zawt luam a.

"Ka lung alêng,"
tih chiah hian ka lo chhang thung a.

"I bulah ka awm a, ka pa hmu turin kan kal a ni a, tunah zan 2 chiah kan la riak a, kei lo midang i lo nei reng a ni maw? Rei lo teah ka nupui i ni tawh mai dawn a, zep awm hauh lovin tunge i ngaih chu min hrilh rawh," thinrim awrãwl lek lek chuan min la leh tih zaw mah a.

Zawite hian, " Ka u te ka ngai a," ka lo ti sep a.

Khualkhua a ni si a, han inhnial thinrim kha ka peih loh bakah a ṭha ber loin ka hre ve bawk rih a ni.

Mahse, ka rilru na erawh a thup bo vek theih chuang lo va, ten chungin ka inkuah tir lo thei si lo a, mualpho zau a hlauhawm ve tlat si a ni. Aizawl kan haw hunah ka la tilang ve nasa ang chu aw ti chungin ka inbengdai ve ta hram hram a.

Zing khawvar hma chuan mei kan chhem a, tapchhakah ṭhuin kan ti ti mai mai a, chutih lai chuan a pa kum 80 ralkai zet tawh chu mei chhem tumin a rawn tho ve ta bawk a.

Feh ṭhinna hmuna awm tih takah chawbel chhuan zui mai hi a tum nghe nghe a.

Kei chuan," Ka pu, ka lo siam ang e, engzat nge chhum tur min hrilh la," tiin cooker chu ka laksak nghal a, C-a chuan cooker chu min rawn pawhthlak sakin, " Ka pu ti suh, ka pa ti rawh, Decemberah chuan ka pa i ti tho tho dawn a, tuna i lo pu laklawh chuan i ko sawn thei lo palh ang e," tiin min lo zilh nghal pang mai a.

Apa hnenah thung chuan, " Ka pa, hei hi a nih hi ka nupui tur a ka hual chu, ṭhiante nen kan ni sia, mumalin engmah kan sawi fumfe thei rih si lo va, chiang deuh khan in en rawh u; nakina i fanu tho tho tur a nia. I fa mo hmuh chak ber i hmuh hunah pawh hei tho hi a nia i hmuh dawn ni." a ti ta duah a.

End of chapter 4

Link:
BBcode:
HTML:
Hide post links
Show post links

TMAWII
Posts: 417
Joined: May 18th, 2018, 8:29 am

Unread post by TMAWII » September 24th, 2018, 9:05 pm

LALRINAWMI

Chapter 5.
By ..Tmawii. ( 24.9.2019)


Aizawl kan thleng leh ta chu ka thaw huai mai a. Hlim takin ka u te'n min lo chiauau va, kan kalna nawm leh nawm loh thute min zawtin kan thil hawn ve chhunte chu an hlimpui hle mai a.

Chumi chawlhkar chu sikul kan la chawl dawn a, ani (C-a ) pawh office dawr leh tih neuh neuh ngaite ti fel pahin a la cham ve a.

Ni khat chu New marketah bazar turin kan kal a, eng nge kan tih ber dawn erawh ka hre sa bik lova; kan thlen chuan ka ṭhiannu Thangi thawhnaah khan kan lut zawk a, Bazar tur chuan kan chhuak zui leh ta a.

Zion street chhuka kan kal lai chuan, " Kawr tur puanthan ka hauh lawk a, i zuk en ang hmiang," a ti a.

Kei pawh chuan ka remti ve mai bawk a. "Foreign lane-ah puanthan nalh leh tlawm si Mathani nen a in kawr tur kan lei dawn nia, (Mathani hi a u fanu a nia) kan khaw nu a ṭhu ve a, ka hrilh sa vek tawh ," a ti a, chutia ama kawr tur emaw ti a ,"Aw," ka ti vek tawh chu ka kawr tur tih ka hriat veleh ka duh leh ta lo va.

Mipa lak aṭanga thilpek dawn emaw lak fo hi ka duh lo hrim hrim ṭhin a.

Zion street chhukah chuan theihtawp tak meuhin ka'n ṭang ṭha leh mai a, ani'n min hruai ngei tumin min pawt/nawr nasa bawk si.

Min hmutu ṭhenkhat chuan mak an tih hmel hlawm kher mai;

Chutah, Pa pakhat, pa lian angreng deuh mai leh Nu raipuar luah mai hian min rawn pan hnai a;
"Engtizia nge ni Mate, khatia kawng lunlaia in inhnuh chawt chawt mai ni, hei mi lah chu an tam nasa mai si a, ṭha deuhin sawi rawh le; tlangval, Matei kha thlah la, eng nge thil awmzia min hrilh rawh le," a rawn ti a.

Chiang deuh mai hian C-a chu a en rùn mai a.

Makti leh zak tak chunga tunge maw ni le? ti a ka han hawi chhuak chu U Zova, ka u ṭhianpa chu lo ni rengin. Ka zah tluk zetin ka lawm bawk si a, ka lâi chhe lo chauh a ni e.

U Zova bulah chuan ding chhuakin ka kuah ve ta tawp a, U Zova chuan, "Tlangval, Matei hi ka duh ngawih ngawih leh nupuia neih ngei pawh ka tum tlat kha a ni a, a nungchang leh zia pawh hi ka hre thawkhat chuan ka inhria, mahse, amah te reuh hian min duh thei ngang si lova, ama phalna la thlap hian hei, tuna kan nu ni ta hi ka nei ta a ni," tiin a bula nu raipuar chu a kawk zauh va.

U Zova em em chu aw, ka lo zak chem chem; dik ve thawkhat mahse, ka zirlai chhun zawm zel kha ka thlan vang a ni reng si a.
Ka ṭawng chhuah hma chuan C-a chu rawn ṭawngin, " E, a nih tak chu, hei, Foreign lane-ah kalin a kawr tur puanthan leisak ka tum ve a nia, tihtak zetin a duh lo tlat mai a, a zuartu kan khaw nu hnenah lah chuan, 'kan rawn kal ang e, i neih nalh nalh kha hak hnih tal kan rawn leisak ang che,' tiin ka lo sawi diam tawh si a; U Zova maw i nih kha, kal duh ngei turin Awmtei hi han hrilh teh. Engmah hi ka tihsak thei lo hrim hrm mai a, ka lak aṭanga thilpek dawn hi a duh lo bur zel mai a ni." a ti ta duah a.

U Zova chuan, " Mate ṭha te te khan kal rawh le, i duh loh viau pawhin in lei lo thei tho a, 'ka duhzawng a awm lo e,' tiin i hnial thei leh tho alawm, kawtlaia hetia awm reng chu a ṭha ngai lo a nia," tiin min thlem pah ve bawk a.

Hnial thei ta si hek lovi kan lei teh ta poh a.

Khawi dangmaha peng khawtlai lovin kan haw phei zui a, hemi tlai hian kan inah chaw eiin a riak ve ta nghe nghe a.

Zanah chuan ka lehkha zirna ṭhin room, kan inhnuaiah kan chhuk a, chutah chuan min fawh mai hi a tum ta a, " Min dai suh, i hmui bawlhhlawh khan min fawh hi a phu mawlh lo, ka ten a nia," tih leh a hlat thei ang bera tawlhsawn chu ka rual nghal zat a.

A ngaihna hre lo leh hrilhhai zet hian min en ta hau mai a.

" Engvang nge?"

In khua a kan zin ṭum a, i chhungte'n chaw eia min sawm ṭuma in khawsak dan zawng zawng kha ka hai hleinem, ka hmu ve reng che u a, haider khanglang lo mai teh." ka lo ti vin hlur mai a.

A inngaihtuah vâng vâng a.

" Ê... kha kha maw? a ni dawn teh tak e; min hmu tih ka lo hre miah lo asin,"

" Phatna tur pawh i hre lova, a tawk e. Kei chu tun aṭang chuan i lakah mihrang ka ni ta; ka lakah hian hmelhriat satliah ang bak chuan i khawsa thei tawh lovang," tiin thu tawp ka siam khum ve ta hmak a.

Ka lehkhabu ka khawm sawk sawk a, hmanhmawh zetin inchung a chho turin ka inher rem chiah chu ka banah min pawt her lawih mai a.

" Insawi fihlim ka tumna a ni lo. I hmuh chin tlemte-ah khan thutawp siam nghal ngawt lo turin ka ngen hmasa duh che a, ka thusawi ngaithla phawt la, chumi zawhah chuan ngaihdan i siam dawn nia; Awmte, khawngaihin ka thusawi tur hi min ngaihthaksak phawt turin ka ngen che a ni," a ti ta charh charh a.

" I hmuh kha ka pha lo, a dik e. Mahse ka fawh a ni lo, ama min fawh hmasak a ni; zep ṭhen nei hauh lovin ka'n sawi vek law law ang e....."

" I u Mama kha Thangi hian a duh em em mai a, mahse, i u Mama lah training neilai a nih bakah ani hi a duh zawng vak a lo ni bik si lova, hetia nang leh kei kan inkawp rem tak viau si-ah hian, i u-in a hnarna kha remchangah la-in i chunga phuba lak pah tum hian min hawlh ṭhen dan a zawng ngar ngar asin; nanga rilru tluang lutuk lah hian ṭhianṭha berah i vuan tlat mai si a.

" Tih tak emah chuan ani chang hi ni lovin, a nau tleirawltê mai, nula angah pawh in la en loh leh a nu chawp hian min pawhṭhen tum hian an che nasa teh mai ania, helamah i awm daih a, khawchhung lam chanchin i hre ngai bawk si lo. Rilru na taka siam che a, nangma duhthu ngeia min kalsan hi an duhthusam a ni asin.

" Keimahni pahnih mai ni lovin kan chhungte hriatpui vekin thu kan thlung tawh a, chumai ni lovin kan pahnih inkarah hian pawhṭhen mai mai theih loh thil a awm tawh a, nang pawhin i hriat kha. Kei chuan tihngaihna a awm ngang lo a nih chauh lo chuan thlah che hi ka tum reng reng lo a, ka chanchin leh nihna pawh a chhe ber thlengin ka hrilh vek tawh che kha...."

I tana awmreng turin ka intiam tawh a, hmeichhia zawkin khati taka min nawr ngam chuan mipa chu mipa kan ni a, tlawmah kan la tlat zel ṭhin. Awmte, ka phatsan lo che asin. He mi bak pawh hi i hriat loh thil tam tak hrilh tur che ka nei a ni..."

" Khatia nang nen kan inkawp rem ta thlap mai kha....." a tih mek lai chuan U partei te nupa chu mu turin an lo chhukthla ve ta chiah mai a.

(Zanin laklawh deuha tawp a ngai tlat mai.)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


TMAWII
Posts: 417
Joined: May 18th, 2018, 8:29 am

Unread post by TMAWII » September 26th, 2018, 6:43 pm

LALRINAWMI.

Chappter 6.

25/9/2018.
By Tmawii.


U Partei-te an lo chhuk takah chuan sawi zawm lovin a tawp ve ta a.

Inngeih hauh si lo kha inngeih ber ang maiin kan inkai chho ta ral ral mai a. (Hringnun hi drama a ni ber e)

Kan khaw lam chanchin hi an dam ṭhat chuan ka hre lovin ka ngaihven hran lo va, ka chhungte nen erawh chuan kan in be pawp reng a, tunlai angin Fawn leklam theihte kha la awm ve hek lo le, mahni khua leh hmelhriatte zin veivak hmuh remchan ang ang kha chanchin kan inhrilh tawnna chu a ni ve ber ṭhin.

Hun a kal chho ve zel a, dam chuan hun hi chu a liam zung zung mai a nih hi; keipawh ka zirna lamah ṭan ka la nasa ve hle mai a, thla tawpah hi chuan C-a pawh hlawh lak pah hian a rawn chhuk ve deuh ziah bawk a. Mahse, khawchhung lama a thil tawn vel engmah min hrilh ngai lovin kei lahin ka zawt bik hek lo. Ka zirlaiah deuh ngawr ngawr ka insawr bing mai ṭhin a, ngaihṭhat lohna tur awm em emin ka hre lem lo a ni.

Ka mizia hrim hrim hi midang ring thei tak mai leh ṭhiante tana rintlak tak mai hi ka ni ve a, thu ka tiam tawh lahin a hnu lama ka tana pawi leh deuh tur zawk pawh nise, hlen hram duh mi ka ni a; a awlsam zawngin luhlul ve khat tak mai ka ni mai e.

Tlai khat ka Sikul bang chu, haw mai lovin kan Sir Chunga hovin Extra class kan nei a, darkar khat leh a chanve vel kan khawtlai a; chumi hnu chuan hmanhmawh ve pangngai takin kan ṭhiandun (Thlana nen)-in kan haw phei a.

Hemi zan hi Chanmari West-a ka u te'n riak phei ve hrim hrim tura min sawm avangin riah phei ka tum nghe nghe a.

Kawlthei huan pel pheia kal zelin, ka ṭhiannu Mazawmi te inbul kan thleng chiah chu hmanhmawh fe- a Partei (Partei hi ka u fanu) lo tlan pheiin,
" Ka ni, ka ni, Vawiin kan sikul tualah Tawn bus (Town bus) leh Suara maida (Swarazmazna)an in su amaw, Bike-in Nu Zuali fanu Zonunmawii a su thlu bawk a, chuan kan tualah Jeep hringin darkar 4 an nghak bawk che," a'n ti duah mai a.😆. (A ṭawng hi ala fiah vak lova)

Hmanhmawh taka in chhung ka lut chu kan khuaa ka ṭhian ṭha em em te pali hi an lo ṭhu ṭhap mai a.
Tea leh Peka hian Aizawlah Motor khalh zirin Driving license thar an nei a, chumi lawm nan chuan an pute'n motor an lo pechhuak chu niin; an nula phurh tur mamawh khan min lo nghak reng mai hi a ni awm a.

Ina ka lut chu Peka'n min lo be hmasa ber a, " Darkar 3 vel kan nghak tawh che, insiam thuai thuai la, Chanmary-ah chuan kan thlah ang che, fawr pah kan duh bawk si a." a ti zung zung a.

Chutih pah chuan ka ke aṭangin ka lu thlengin ngun deuh mai hian min thlek vung vung mai bawk a.
Kan khuaah khan nula pangngai ang maia awmin min rim/kan inkawm nasa thei bawk si a, chutah form pawnfen khup pawh khuh ṭha lo feng a necktie leh green bag, form pheikhawk dum leh mawza nena min han hmu kha mak hi a ti thlu ngang ni tur a ni.

"Form nen khan leng ve mai teh," a ti ta hluk a.

Tea pawh chuan, " Ni e, nula emaw kan nghah kan ti a, hmeichhe naupang lek kan nghak chhuak ta si a, Peka'n hmuhnawm a ti ropui mai che si a," tih pah chuan a nui vur vur a.

Hmanhmawh viau e ti lo chuan Peka lah chuan min han kuaivir kual leh ṭhin bawk a.

Chutah, ka dara min dawm dingin ngun zet maiin min thlir vung vung a;

"Nupui ka neih veleh form ka leisak ve ang," a ti ta nulh roh a; nuih loh a va har tak em!!

Tichuan ka inthlak zung zung a, Chanmary pan chuan kan chhuak phei ta a. Ka u te inah kal nghal lovin Zemabawk lamah kan tlang phei zet a, TB Hospital peng bula thingpui dawr kawtah khan a ding chut a.

" Ti khan lo awm ula, eng nge eitur ka zuk en ang e," tiin a chhuk thurh a.

A lo chhuak leh chuan, " Zuk kal ve r'u le, in duh duh in ei ang a, in ei leh in man zawng zawng chu keima'n ka pe vek dawn nia," tiin motorah a zuanglut thurh roh a.

Ka zuk lut chu a nghaktu kha a lo nui teuh teuh mai a, eitur kan lam a, a nui ri ta hawk hawk a.

A ni le, kan Three Peka pheng khan eitur zawng zawng a lo khawm vek a, a ei bak fun ṭhain a kengchhuak vek bawk chu lo niin, kan hrilhhai ngei mai. Mahse chintawk nei lek lova infiam ṭhang vek kan ni hlawm a, kan va nui tak em!

Tichuan, Chanmary lamah let lehin ka u te inah chuan min dah fel thlap a, thimhmulah ka thleng leh hman chiah chiah a ni.

En nge maw chang chuan ṭhian ho va han chhuah veleh zauh te kha a lo va nuam ṭhin tak em.

C-a pawh rinhlehawmin awm zeuh tawh mahse, a hnu lamah engmah thleng zui awm lem loa ka hriat avangin ka ring ve leh thlap tawh bawk a.

Mahse, rilru fim leh thiang taka ka ngaihtuahna ka hman chang hi chuan inthiar fihlimsan hi ka duh fo mai. Chutih rual erawh chuan kan khuaa ka awmlaia ka chunga thilthlengte ka ngaihtuahin, khawdang hawi ve duh ta pawh ni ila, ka tan mualphona bak hi awmtheiin ka hre si lo va, pasal ka neih hun hunah ka thianghlim tawh lo tih an hrechhuak ang a; mualpho leh ṭahna bak chan tur nei hian ka inhre ngang lo va, chumi vang tak chuan amahin min phatsan tawp a nih loh chuan ka inthiarfihlim san thei bik ṭhin lo a ni.

(Awle, he mi khawdang hawi thei ka nih loh chhan chungchang bik hi chu LALRINAWMI (COMPETITION)ah khan a chhan ka sawi tawh tho va, min lo hrethiam hram dawn nia, type thar leh a ngaiin ka hre tawh lo va😥)

Thla a liam a, hun chu a kal liam ve duak duak mai a, August thla hial a lo thleng ve leh ta, keini pahnih pawh tluan lohna em em nei lovin kan awm ve zel a, a lo kal apiang hian ka zir zawh a nghahhlelh thu leh result nghak thleng kher lova inneih mai a duh zawk thu te, ka zir lai bika in sawrbing tur leh ama lam chu ngaihtuah hah miah lo turin min fuih nasa thei ve hle.
Kei pawhin exam a hnaih tawh avangin ṭul bik thil a nih lem loh chuan ka ngaihsak teh chiam ngai lo bawk a, amah avanga tihchhiat ai chuan amah vanga result ṭha tak neih ngei tumin, ṭhahnem ngai leh ngaih ṭha takin ka zir ve mawp mawp a, ka sikul kal tur hi min thlahin min rawn hruai ve fo ṭhin bawk.

(Lawks : Pawl sawm chauh ni chunga hetianga kan awm hi min lo dem mai lo ula, thingtlangah chuan nun a harsain kan rethei ve tlangpui ṭhin a, zirna pawh hi zawm ngar ngar thei lovin, kum kar laka chawl leh hnathawk ve zel chungin; zirna ka rualawh em vang zawkin hawpkhawp kan neih kum hian ka zawm ṭhat leh chauh vang zawk a ni a. Kum 18 chu thingtlang nula tan chuan kan vul ṭan hun leh, mahni tawka kan mawi ve ber hun lai a ni tawh tlat a ni. Chubakah changtunu hi a chhe lo ve hrim hrim a😊)

Hun hian luipui luang zel angin kan hun hman tawh hnu chu kohkir rual lohvin a her liampui zel a, chutiang bawkin kan hringnun a a chhe lai leh ṭha lai pawh siamṭhat emaw kan duh lai pawh a liampui vung vung ṭhin, chuvangin aw nang ka ṭhalaipui, i tun hun kha hmang ṭha rawh aw; keimah anga hriat lawk lohna-in damchhunga inchhirna a thlen ve loh na'n che.

Sepṭember thla a lo thleng ta.

August thla chanve vel aṭanga kan exam ṭan chu a hmawr kan bawk lek lek tawh a, ni 6 Sepṭember-a zawh fel tur a ni tawh si a, kei pawh ka ṭangin kan exam question paper ka thlir a, ka chhan dan ka en let pawhin ti-ṭha ve khat chuan ka inhria. Ka u mipa, min chhangtu chiah hian, "Mami, tun exam-a i passed phawt chuan Sana i awh ve deuh ṭhin *HMT* kha ka leisak tawh ang che, ṭang rawh aw i lut tlai bik si a," tiin min tiam ve thlap bawk a.(a hun lai khan HMT Sana kha lar ve vet vet deuh a nia aw)

Ni 5 sept chu a lo thleng a. Zirtirtute ni a ni nghal bawk a, mahse a hrana hmang thei lovin exam nan kan hmang tlang ta zawk a. A tuk ni 6, Inrinni a mathematics 1 exama zo nghal tur kan ni tawh nghe nghe.

Hemi ni hian Economics kan exam a.

( Hriat atan:
Keini ho hi pawlkua leh pawl sawm zirlai zawng zawng Matrix-a exam kawp hnuhnung ber kan ni nghe nghe-in ka hria, chutah pawh March thlaa exam ṭan tura tih kan ni a , chawpchilh angreng takin November thla tawpa exam ṭan tura sawn hnaih sak thut kan la ni zui bawk a.
Tunlaia pawlsawm zirlai chauh exam ang kha ni lovin, a kum hmasa lama pawlkaw zirlai kha kan exam tel vek bawk a ni.)

Economics hi kan class-master Sir. Speedy-a subject niin ka tui hle mai a, ka chhang reiin ka chhang ṭha ve viauin ka inhre nghe nghe. Amah ngei pawh chu lo lutin, " Awmte, a har em? i va chhang ṭha awm ve," nui var var chungin min rawn ti a.
Kei pawh chuan dak chhuakin ka lo nuih ve tawp a, kan Sir hi kan ngaisangin kan zah a, a nungchang lah a mawi si; ani'n biak tlaka ngaia min rawn bia chu ka hlim phah ve nasa mai a ni.

He kan Sir hi alawm, Pawlkaw zirlai naupang pahnihin an lo inchuh vak mai a, Sikul compound chhungah an insual buai chiam mai a ni awm a, an buai chhan Speedy-an a hriat chuan a zakin a thinur hle mai a; an pahnihin a hnawtchhuak hmak mai a ni awm e. Pà si, hmelṭha bawk si hi a ni roh tlat a ni.

Ka exam zo ka chhuak tur chu ka hmaa zo tawh ho pawh an lo la awmṭhap a, class roomah lut leh lawkin kan Sir chuan thu tlem asawi a, exam zawh hun leh result chhuah hun turte nen.

Tin, " Lawks," an tiah.

Lehkhathawn pakhat hi a hum rân a.

Chu chu rawn lek chhuakin:

“ Lalrinawmi,
Cl- X, Rollno five two,” a rawn ti bauh a, (fifty two a ti duh ngai lo a)

Ngawirengin ka ding chhuak a, a kutin min rawn hûi zauh va; envelope uk, sei chi, mipa kutziak tih hriat reng reng leh felfai thlarh mai hi min pe ta a.

Tichuan min bân tir ta hlawm a.

Kan chhuak tur chu ṭhiante'n min chhaih fiam nak nak a, min chhiarsak tum tawk lah an awm ve bawk a; kan hlim dar dar viau.

Ka ṭhianpa Thlana nen kan haw kawng a in an avangin kan haw dun a, exam chungchangte sawi dunin, a tuk Inrinni a min rawn sawm phei turin ka hrilh a, ani chu kaltlangin kei chu kan inah ka lut ta nghal a, kan In hi kawngpui ân chiaha awm a ni.

Inchhunga ka lut chu a lo reh diak a.

Sitting roomah lutin Bed roomah ka lut tlang nghal a, inthlak tumin ka necktie ka pawt thawl a, ka form pawnfen hlipin kekawrbul a hnuaia ka hak chu ka ha tlang nghal mai a.

Ka Kamis nghawng kilhna phelh thawlin hlih ka tum lai tak chuan ka lehkha dawn kha ka hre chhuak ta thut a.

Ka Kamis pawh phelh ta lo leh ṭhu ta chuang lo chuan chhuata ding chungin lehkha chu nghakhlel ru tak siin a tuamna ka pawtthler a, ka chhiar hma-in address inziak chu ka en nawn leh zet a.

C-a kutziak ngei chu a nih avangin leh, kan thleh ṭhin dan bik ngeia thleh a nih bawk avangin ka pharh ta sawk sawk a.

To,
Duhtak Awmtei,
He ka thusawi tur avang hian min ngaidam ang che. Hmaichhanah ka hrilh ngam thlawt lo che a ni.

August thla tawpa ka haw chho kha maw, (ka awmna te) ka nu leh pate'n ka nupui tur an lo be fel diam tawh mai a; a hmeichhiate khan ka awm loh chhung khan palai tirin 'kan laklawh tawh e,' tiin ka nu leh pa an lo va hrilh a ni awm e. Kei lah ka lo awm bawk si lova, ka nu leh pa chuan tlanchhe theiah inngai lovin remthu an lo sawipui ta mai a. Tuna ka awmna te hi chuan kan chanchin kha an lo hrechiang ve tawh si lova.

Ka nupui tura an lo biak fel chu maw i rin loh tak a nih pawh ka ring a. I ṭhian ṭha ber Thangi nau Lianchhungi kha a ni..."

Hemi thleng hi ka chhiar hman a, a tak a nih theih ka rin loh em avangin ka chhiar nawn leh a; chutah engmah hre lovin chhuatah chuan ka tlu ta tawp mai a.


👏🏻👏🏻👏🏻End of chapter 6

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)