THE SICILIAN (BOOK III-V) By Mario Puzo

[Loma hmar]

CHAPTER 19A

Inhmuhkhawmna hriatreng tlak tak chu ni hnih hnuah chuan neih a ni ta a ni. Chutiang hun rei lo te chhung chauhah pawh chuan Montelepre khuaah chuan an pasaltha ropui, Turi Guilianno hmu turin Don Croce ropuia chu a lo kal dawn tih chu a thang chhuak nghal vek a. Engtinnge chu thuruk chu a put chhuah theih tih pawh hriat a ni lo. Guilianno-an he inhmuhkhawmna atana venhimna lam a uluk zual em vang pawh a ni maithei. Palermo lam kawng dang ping turin a mite a tir a. A pawlte zinga mi sawmnga chuang zet chu an chhungte tlawhin zan hun an hmang bawk a ni.

Passatempo leh a hote chu Balempo Barrack lam veng tur leh, carabinieri patrol an awm hlauh pawha che thei lova siam turin a tir a. Castellamare kawng leh Trapani lam kawng chu Terranova leh a hote chuan an thunun bawk a. Corporal Canio Silvestro chu rifle kapthiam ber ber mi panga leh machine gun nen in chung lamah tomato phorona atana siam phera inkhuhin an awm bawk a. Chutiang pher chu Sicilian in tin deuh thawin an nei a ni.

Don Croce chu thim hmulah, Alfa Romeo Car lianpuiin a lo kal a, Car chu Hector Adonis-a in kawtah chuan a ding a. A unaupa, Father Beniamino leh guard pahnih chauh hruaiin a lo kal a ni. Guard te erawh chu Carah a khalhtu nen chhuak lovin an awm thung a. Hector adonis chuan kawngka bulah a lo hmuak a, a inchei nalh zar zar hle. Don Croce pawh chu nidang ai thlawt chuan a incheina pawh a uluk ve deuh tih a lang.

Father Beniamino chuan a puithiam kawrfual a ha a, thleng kum ang tak lukhum dum a khum bawk. Ina a luh hmain in chu mal a sawm phawt a, kraws chhinchhiahna siamin malsawmna a sawi sup sup a.

Hector Adonis chuan montelepre-a in tha ber a nei a, a chhuang ve hle. Furniture te chu france atanga lak luh niin lem ziak intar te pawh chhuanawm ve tak a ni. A thlengte pawh germany atanga lak luh a ni a, a chhiahhlawh rawih pawh italian nu valai lam, indo hmaa england-a in zir chhuak ngat a ni. Chhiahhlawh chuan Coffee rawn pein Guilianno nghakin an pathum chuan an thu tlang ta a.

Don Croce chuan a him hle tih a hria. Guilianno chuan a thutiam bawhchhiain a godfather chu a timualpho dawn lo tih a hre tlat a ni. Don chu a phur lawk hle mai a. Tunah chuan miropui ni chho mek chu a mit ngeiin a hmuin a en thlithlai thei dawn ta a ni. Chutichungin thawm nei hlek lova Guilianno a lo luh chuan a phu ru deuh zawk tho a ni. Lung phah chhuah vek kawtthlerah chuan a ke pen ri hriat tur a awm lo hrim hrim a, kawngkhar a hawn lai leh a khar leh ri pawh a awm hauh lo bawk. Mahse Guilianno chu chawei pindan kalpawhna laiah chuan a rawn ding thut mai a ni. A hmelthatna chuan Don Croce chu a deng deuh dawt a ni.

Tlang lama a khawsakna chuan a awm chu a tipharh lian deuhin a hmai pawh a tilang cher deuh a. Ramvah jacket thawl tak hain a chhung lamah chuan a ken fo thin Machine Pistol chu a hmuh theih bawk a. Kum 24 lai a ni tawh chungin a la lang naupangin, mipa naupang aia u awrh ni maiin a lang a ni.

Rome cho a, friends of friends khum zak a, Tualthah hmang Andolini thuhneh a, Passatempo te ang mi tawrawt pawh enkawl thei leh Sicily ram hmun lia thena hmun khat lai hneh a, Sicily ram pum mipuiin an hmangaih em em chu he naupang hi a ni thei dawn em ni? Don Croce chuan Guilianno chu huaisen rum rut a ni tih a hria. Mahse Sicily chu mihuaisenin an khat a, mahse inphatsanna tenawm takin lem zovin thlanmual lamah an liam leh mai thin.

Don Croce chu hlauthawng rilru viau mahse, Guilianno chuan a rilru tihlim deuh tu thil tih a nei tlat a ni. He naupang hi lamtanga siam turin a han intiam nawn leh a. Guilianno chu roomah chuan lo lutin Don Croce lam chu a rawn pan nghal a, “Bacio Tua Mano,” a ti a.

Chu chu Sicilian minaranin dinhmun sang zawk te- puithiam, ramneitu emaw lal chhungkuate emaw - chibai an buk dan a ni a, ‘i kut ka fawp e,’ tihna a ni. Guilianno chuan lawm hmel taka nui hmel a pu sang a. Engvanga chu thu chu sawi nge a ni tih Don Croce chuan a hrechiang zet mai. Don Croce laka a tlawm zia entirna leh a kum upat avanga zahna lan tir nana sawi a ni lo va, Don Croce chu Guilianno kuta a rawn intukluh avang leh chutia a rinna chu a zahsak a ni tih lan tir nan a ni. Don Croce chu muangchangin a tho a, tho tura a tha a han sawmkhawm vel chuan a hmel chu a thim zual sauhin a lang. Guilianno-a kut chu a lo vuan a, he tlangval hi mi tha tak a ni a, chuvangin a ngaina a ni tih lan tir a duh tlat a ni. Chutia a tih lai chuan Hector Adonis an a godson a chhuan zia- mipa dik tak a ni tia a hmela a tihlan chu a hmu zawk a.

Pisciotta chu pindan inkalpawhnaah chuan lo kalin chung zawng zawng chu a hmel tak ngala nui hmel pu chungin a lo thlir a. A hmelthatna chu hriatreng tlak tak a ni ve tho mai, mahse Guilianno that dan nen chuan dang tak a ni. A chuap lam dik loh avang chuan a cher deuh hle a. A sam dum tle hlarh mai chu mam taka khuih a ni a, Guilianno-a sam erawh chu lukhum ang maia chhing taka tan a ni thung.

Guilianno lamah thung chuan chibai a bukna kha Don Croce-a rin loh tak a ni ang tih a ring sa reng a, mahse Don Croce-an hrethiam tak leh ngaina taka a lo dawngsawng chu mak a ti lehling hle a ni. Don taksa lianpui a han hmuh chuan inrin reng a ngai tih a hrechiang zual sauh a. he mi hi mihlauhawm tak a ni, a lar vang chauh ni lovin, a huhang nat dan atang chuan. A taksa lianpui, pianhmang nalh lo zet chuan lumna thahrui a pe chhuak emaw tih mai tur a ni, room chhung chu a chiah hneh hle a ni. Don a lo tawng chhuah chuan, a lu ropui tak atanga aw lo chhuak chu zaipawl aw ang ruih a ni a, Hawihhawmna te, dikna leh amah hmin tumna te a tawngah chuan a lang thei vek a ni. Ani ang a thil tih apianga zei lo taka ti thin anga lang tawngka chhuakah chuan a mak dangdai hle a ni.

“Kum engemaw zah chhung chu ka lo thlir chein he hun hi nghakhlel takin ka lo nghak a, tunah hei a lo thleng ta a, ka beisei ang zawng zawng chu i lo ni vek mai.”

Guilianno chuan, “Ka lawm hle mai,” a sawi leh tur a han ngaihtuah zawk a, eng nge sawi tura beisei a ni tih hre ran chungin, “Thian kan nih hi ka lo beisei reng thin a ni.”

Don Croce chu a bu nghat a, chutah Minister Trezza nena inremna chungchang sawi tur chuan a inbuatsaih a. Guilianno chuan Sicily miputen inthlan leh huna thlan tur dik thlang thei tura ‘zirtir’ tura a pui thei a nih chuan Ngaihdamna kawng a inhawng thei dawn a ni. Guilianno chu a khua leh tui pangngai angin a chhungte hnenah a kir thei tawh ang a, bandit a ni tawh lovang. He inremna dik zia tih lan nan Minister chuan Don hnenah Guilianno beihna tura ruahmanna lehkha chu a pe a ni. A sawi leh tur uar nan Don chuan a kut a phar a, “I remti a nih chuan, khang ruahmanna te kha minister chuan a thuneihna hmangin a dang vek dawn a ni. Sipai vak chhuak leh Sicily chhunga carabinieri sangchuang dah belh a ni dawn lo a ni.”

Guilianno chuan ngunthluk takin a lo ngaithla a, mahse chung thilte chu mak ti awm pawhin a awm lo tih Don chuan a hmu a, sawi zawm lehin, “Sicily a awm zawng zawng hian mirethei i ngaihsak zia an hria a, thenkhat chuan left party i tanpui an ring maithei. Mahse Pathian ringtu i ni a, sicilian dang aiin i chung nung a ni, mahse i nu tana i inpek nasat zia hi tunge hre lo awm? Communist-in Italy an kaihhruai chu i duh takmeuh em ni? Kohhran chungah eng nge thleng ang? Chhungkaw tin chungah eng nge thleng ta ang? Italy leh Sicily tlangval indona-a kalte chu ramdang politics, Sicily-a awm thei ngai lo turin a ei chhia a a ni. Ram pumpuia thunei tur, a mipuite lungawi lohna pawh ngaithiam miah lo tur chu thuneitu atan i duh em ni? Left party sorkar hian kei leh nangmah do tur hian beihpui an thlak ngei ang, mahse sicily-a roreltu dik tak chu kan pahnih hi kan ni lo em ni? Left party te hi inthlan leha an chak a nih vaih chuan Russia mi ho hi kan khuaah te lo kalin, tunge biakin pan tur tiin duh an thlang vel ngei ang. Kan fate chu school-ah nu thianghlim Mari leh pa thianghlim Josefa aiin ram a pawimawh hmasa zawk tiin an zirtir ngei ang. Chu chu a phu kan ti em? Ni lo ve, tun hun hi a ni Sicilian diktak zawng zawngte chuan an chhungkua leh an zahawmna te ram laka an hum hun tur chu.”

Pisciotta chu inkalpawhnaah chuan ban nghengin a la awm reng a, rin loh takin a lo inrawlh a, tui loh hmel zetin, “Russia ho chuan ngaihdamna chu min pe maithei asin,” a rawn ti a.

Don ngaihtuahnaah chuan thil a lo lut ta a. Mahse he hmuihmul nei inchei nalh tehzawrina a rawn tih el avanga a thinurna chu a tilang chhete lo. Chupa chu a han zir chiang a, engvanga a awm ve a ni tih rawn lan tir nge a nih? Engvanga Don chuan hre ve se tih duh nge a nih ang? Don Croce chuan nakin lamah hepa hi hman theih dan a la awm mai a beisei a ni. A thil hriat theihna fing zet chuan Guilianno-a sipai hotu rin ber chak lohna lai chu a hre ta riai riai a, a chuap natna vang pawh chu a ni thei a, hlim lohna ruk a neih vang pawh a ni thei tho. Pisciotta chu tumah ring ring pumpuhlum mi a ni lo va, chutiang bawkin a mah chu rin pumpuhlum chi a ni lo vang. Don Croce chuan a chhan hmain chung zawng zawng chu a ngaihtuah hman a ni.

“Engtik laiin nge ramdang mi ten Sicily an tanpui tawh ngai?” a ti a, “Engtik laiin nge ramdang miin Sicilian te hnenah dikna an lan tir ngai? A bikin nangni ang tlangval chungah ngat phei chuan.” tiin Pisciotta hnenah chuan a sawi a. “Kum za tam tak chhung chu heng min rap bettute bei turin mi tamtakin friends of friends an zawm a, tuna Guilianno-an a beih dikna chanvo chang tur hian.Tun hi Sicily chhanhim tura kan tan ho hun chu a ni.”

Guilianno chu Don Croce-a thusawi chuan a tinghing eihin a lang lo. Ngaihtuah ngun tih hriat takin, “Mahse Rome kan bei rengin min awp turin mi an rawn tir reng tho a, Kan hmelma an ni a, tunah anmahni tanpui tur leh ringngam turin min ti a maw?”

Don Croce chuan thuk ruihin, “Hmelmate nena thil tum inang kan neih a tul hun a awm thin a ni. Christian Democratic hi an chak a nih chuan kan tan chuan an hlauhawm nep ber a ni. Ro an rel theihna atana puih mai kha kan tih tur a ni a, chubaka awlsam eng nge awm chuang?” a han chawl hlek a, “Left party chuan ngaihdamna an pe ngai lovang che, a chiang a ni. An verther lutuk a, ngaihdamna thinlung pawh an nei lo, Sicilian nungchang hi an hrethiam bawk hek lo. Mirethei te chuan ram chu an nei ngei ang a, mahse an tharchhuahte an chang bik dawn em ni? Kan mipuite an thawhho theih dan tur i suangtuah thei em? Kan sakhaw serh leh sangah Virgin Mary-in kawr sen nge a hak ang kawr var tih vang ringawt pawha inhnialin an inthat duh a nia.”

Guilianno chu a nui sang a. engtik niah emaw chuan he pa hi thah ngei a la tul dawn tih a hria. Guilianno chuan nem takin, “Communist ho chungchang chu ka pawmpui che, Sicilian tan chuan an tha lo a ni.” Tunah chuan Don Croce-a chu a duh dan dik tak sawi tir hun a ni tawhin a hria, “Rome ho hna bawlhhlawh tak ka ti a nih chuan, ka mite hnenah lawmman ka tiam a ngai a, Rome chuan eng nge min tih sak tak ang?”

Don Croce chuan a coffee chu a han in zo a, Hector Adonis chuan thlitsak leh nghal a tum chu a lo dang a. Guilianno hnenah chuan, “I tan kan thawk chhe lutuk lem lo, Andolini-an carabinieri ho chet dan tur chungchang i lo inbuatsaih theih nan a rawn ken thin che a, Tlang atanga um chhuak tur che uin tha an thawh tak tak ngai lo. Mahse chu chu a tawk lo tih ka hria, I tan ka tih theih tawk min tih tir rawh, tichuan keimah ka hlim ang a, i nu leh pate tan lawmna a thlen bawk ang. I godfather hmaah leh i thian tha tak Aspanu Pisciotta hmaah ngei hian hei hi ka hrilh ang che, ngaihdam i nih theihna a nih phawt chuan lei leh van sawn dawrh pawh ka huam e, ni e, i mite zawng zawng pawh.”

Guilianno chuan a rilru a siam fel tawh a, mahse chu intiamkamna chu a theih ang tawka tihngheh a duh a ni. “I sawi zawng zawng kha ka pawm deuh vek a, Sicily leh a mipuite hi ka hmangaih a, mahse bandit angin ka la nung reng a, diknaah ka innghat a ni. Mahni in leh chhungte bula kir leh tur chuan engpawh ka ti duh ang. mahse engtinnge rome chuan a thutiam a hlen ang tih ka hriat ang? Chu chu a pawimawh ber, tih tur min tuk hi a hlauhawm hle a, lawmman ka hmu ngei tur a ni.”

Don chuan a ngaihtuah vang vang a. Chutah muang chang leh fimkhur takin, “I fimkhur viau hi a tha e, mahse khan ruahmanna lehkha Hector Adonis hnena entir tur che a ka pek che kha i nei a. Minister Trezza nena inzawmna innei a ni tih tifiahtuah kawl ang che. Lehkha pawimawh dang pawh i hman theih tura rawn ngaihtuah ka tum ang a, tichuan rome chuan chanchinbua i lehkhathawn hmingthang taka i tih lan an hlau ang a, a tawpah i thil tih tur i tih zawha Christian Democrats an chak a nih chuan i ngaihdamna chu a chiang mai dawn a ni. Minister Trezza hian keimah min zah ve em em a, a thutiam a bawhchhe lo vang.”

Hector Adonis chu a phur hle a, a hmelah a lang chhuak hial a ni. Misual ang ni lova a fapa a lo haw huna Maria Lombardo hlim hmel tur pawh a lo suangtuah lawk hial a ni. Guilianno chu tul lohah a fimkhur mai mai tawh niin a hria a, mahse Communist ho laka Guilianno leh Don Croce te tan dunna chu an inthianthatna phuar khawm tura kawng hmasa ber a ni maithei bawk a ni.

Don Croce-an sorkar ngaihdamna a sawi chu Pisciotta meuh rilru pawh a khawih hle. Mahse Guilianno thung chuan chung don thusawiah chuan dik lohna pawimawh tak a hmu tlat a ni. Chung zawng zawng chu engtin nge Don Croce-an a phuahchawp a ni lo tih a hriat ang? Ruahmanna lehkha te pawh kha ruk mai mai niin Minister Trezza chuan a thuneihna hmangin a lo dang reng tawh maithei asin. Minister Trezza ngei chu hmuh a ngai a ni.

“A tichiang viau e,” Guilianno chuan a ti a, “Nangmah bik intiamna khan i thinlung that zia a tarlang a, chuvang chu a ni ngei ang Sicily mipui ten ‘thinlung tha mi’ tia an koh che. Mahse rome-ho rinawmlohna hi a thang chhe em mai a, chubakah politician te - eng nge an nih chu kan hria e. Ka mi rin takin Minister Trezza ka ngei atanga a tiamna hriat ka duh a, intiamna tichiang tur lehkha pawimawh ka mamawh bawk a ni.”

Don Croce chuan mak a ti hle a, tawng nachang pawh a hre lo hial a ni. An inbiak chhung zawng khan Don Croce a ngainatna chu a zual zel a, he naupang hi a fapa ni ta se eng nge a an ang aw, ti tein a lo ngaihtuah hman hial a ni. Mahse a intiamna a pawm lo tih a han hriat chuan, a ngainatna chu a kiam deuh sawt a ni. Mit lehlam chauh chhinga muhil chunga fimkhur leh dilchhut thin ho ang maiin fiahna dang, intiamkamna dang a la phut cheu a ni. Don Croce Malo-a intiamkamna chu a tawk tlat lo.

An ngawi thap hlawm a, Don chuan a sawi tur a ngaihtuah a, midang chuan an lo nghak a ni. Hector Adonis chuan Guilianno-a thil nawr avanga a thlaphanna leh Don lo er let tur a hlauhthawnna chu thup hram hram a tum a. father Beniamino hmelah pawh chuan lungawi lohna a hmuh theih. Mahse a tawpah chuan Don chu lo tawngchhuakin an thaw ta huai hlawm a. Guilianno rilrua thil awm tur ang leh a mamawh tur ang chu hre tain inhria a ni.

“I pawm thei chu lawmawm ka ti hle mai,” a ti a, “Keima ngaihdan ka lo kal pui thui deuh pawh a ni ang e. Mahse hetiang zawng hian thu tih tluk han tum chhin teh, a hmasain Minister Trezza chuan chutiang lehkha pawimawh chu a pe ngai lo ang che, a tan a hlauhawm lutuk. Mahse tawngkain ka hnena a thutiam ang kha ahrilh thei ang che. He kan thil tih tura remtihna chu Prince Ollorto leh lal chhungkaw member dangte atangin ka nei thei ang. Chu aia tha zawk tur nangmah hmin thei tur che thian ka la nei a ni- Catholic church pawhin i ngaihdamna tur chu an hriatpui ang che. Palermo Cardinal atangin thu ka dawng a ni. Minister Trezza ka atanga i hriat hnuah, Cardinal nena inhmuh hun ka ruahman sak ang che. Tichuan, Minister of Justice thutiam leh Catholic church Cardinal, nakina pope la ni maithei thu, leh keimah ngei thutiam pawh i nei dawn a ni.”

Guilianno chu a nui hawk hawk a, “Rome-ah ka kal thei si lo a ni.”

Don Croce chuan, “chuti a nih chuan i mi rin ber lawrlak i aiawhin tir mai rawh. keimah ngeiin Minister Trezza hnenah chuan ka hruai ang e, tichuan Cardinal hnenah ka hruai leh ang a, Holy church lal fapa thu chu i ringngam em ang chu?”

Guilianno chuan Don Croce chu ngunthluk takin a en a. Inralrinna tur thu chu a rilruah chuan a dah bo tawh a. Engvangin nge Don Croce chuan puih a chak em em? Amah, Guilianno chu rome-ah chuan a kal thei lo tih a hrechiang em em a Cardinal leh minister sang chuang thu hmu pawh ni se a hlauhthawnawm tlat a ni. Chutia nih chuan a aiawha kal tur chuan Don chuan tunge a beisei ni ta ang?

“Ka second in command baka rin tumah ka nei lo,” Don hnenah chuan a ti a, “Rome leh Palermo-ah chuan Aspanu Pisciotta hi hruai rawh. Khawpui ngaina mi a ni a, Cardinal chuan a sual puanna a lo ngaithla hlauh a nih chuan a sualte ngaihdam a ni maithei asin.”

Don Croce chu hnung lama awnin Hector Adonis chu coffee thlit turin a han mitmei. Chu chu mi a bum dan thin a ni a, a lungawina leh hlawhtling a intihna thup a tumna a ni. Mahse Guilianno, bandit a nih atanga fighter ropu tak a ni tih tilang tawh tu chuan, mi chet dan hmang man thiamin, an rilru ziarang man thiamna a nei tlat a ni. Don Croce-a lungawina chu a hre ve nghal thei mai a. Don Croce chuan a thil tum pawimawh tak a hlawhtling a ni. Mahse Don Croce chuan Aspanu Pisciotta nena inkawm falna hun neih chu a duh ber a ni tih chu a ring thiam bik lo.