THE SICILIAN (BOOK III-V) By Mario Puzo

[Loma hmar]

CHAPTER 28A

Aspanu Pisciotta chuan kum kalta atang khan a thinlungah phatsan duhna tenawm tak chu a thang mek zel niin a hria a ni.

Pisciotta chu a rinawm reng thin a. An naupan lai atang tawhin Guilianno hruaitu zawk a nihna chu thikna tel miah lovin a pawm thlap a. Guilianno chuan Pisciotta chu an pawla a hotu nih pui a nih thu leh Pasatempo te, Terranova te, Andolini leh Corporal te anga en tur a nih loh thu a puang fo va. Mahse Guilianno nunphung hrim hrim chuan a tlin hrim avangin, hotu pui tih chu thawnthu satliah ang lek a ni; Guilianno chuan a kaihruai vek tho a ni. Chu pawh chu Pisciotta chuan a pawm thlap zel tho a ni.

Guilianno chu midangte aia huaisen zawk a ni a. Rawlrala beihna kawnga a remhriat dan chu el phak rual a ni lo a, Sicily mipuite hmangaihna a indawn tir dan pawh Garibaldi tih lohah chuan tluk rual a ni lo. A tha ber duh mi a niin mi hip theihna riau a nei a, Siciliante ngaihsan em em ramsa ang maia fin karna a nei bawk. Mahse dik lohna a nei tlatin chu chu Pisciotta-an a hmu a, siam that a tum a ni.

Guilianno-an an thillak te mirethei hnena a chanve pek a duh tumin, Pisciotta chuan, “I hausa thei a, hmangaih i ni thei bawk. Sicily mipuite chu lo tho chhuakin Rome i beih hunah an zui che i beisei a nih chuan, an ti ngai lo ang. I pawisa an lak lai chuan an hmangaih ang che a, hum him i ngaih hunah an hum ang che a, an phatsan ngai lo ang che. Mahse revolution rilru an pu lo a ni.” tiin a hrilh a ni.

Guilianno-an Christian Democratic lak atanga ngaihdamna a beisei tum pawh khan Pisciotta chuan, “An ngaidam lovang che, Don Croce chuan thuneihna i neih a phal ngai lo ang. Kan hmaa ruatlawk awm chu pawisa hmanga keimahni in lei chhuah emaw, bandit ni chunga thih emaw a ni mai. Chu chu thih dan chhe zawk zawk a ni lem lo, ka tan chuan,” tiin a sawi a. Mahse Guilianno chuan a ngaithla lo va, a tawpah chuan Pisciotta rilruah chuan huatna a intuh ta a, phatsan duhna tenawm tak chu a lo tiak ta a ni.

Guilianno chu rinnaa innghat mi a ni a, mi ngil a ni; Pisciotta erawh chuan thil chiang taka thlir mi a ni. Colonel Luca leh Special force an lo thlen khan, Pisciotta chuan an tawpna a lo thleng ta tih a hre thei. Vawi tam tak hnehna an chang a ni thei e, mahse vawikhat hneha an awm lek pawhin an thihna thlentu a ni dawn tlat a ni. Charlemange hmuna Roland leh Oliver te an inhnial ang khan an pahnih chuan an inhnial a, Guilianno chu pasalthatna kawngah thu a duh lutuk a ni. Pisciotta chuan Oliver-a ang mai niin a inngai a, tawtawrawt ham tura Oliver-an Rolanda a ngen reng ang mai kha niin a inhria a ni.

Chutah Guilianno chu hmangaihnaah tlu lutin Justina nen an han innei a, Pisciotta chuan Guilianno nena an hma lam hun chu a hrang ta hlawk tih a hre ta a. Guilianno chu America-ah a tlan chhia ang a, a nupui leh fate nen. amah, Pisciotta erawh chu mi vakvai a ni kumkhua dawn a ni. Rei tak a dam thei lo ang a, silaimu emaw a chuap natna emaw chuan a nunna a titawp mai dawn a ni. Chu chu a hma lam hun a ni tlat. America-ah chuan a cheng thei ngai lo ang.

Guilianno tihrehawm tu ber zawk erawh chu, Guilianno, tleirawlte laka hmangaihna dawng zo hlim chu, bandit a nihnaah lamah chuan a tawrawt zual sauh chu a ni. A miman carabinieri te a tihlum a, honeymoon laiin Pasatempo a tihlum bawk. Thu tiputrutu an awmin an chungah zahngaihna a lantir ngai lo bawk. Pisciotta chuan a hmangaih thin leh khang kum chhung zawnga a nun a humhimsaka chu ama lamah a tuan palh ang tih a hlau zek zek a ni. Tun hnaia a thiltihte Guilianno chuan a hre chhuak a nih chuan, amah ngei pawh chu a tihlum dawn tih a hre tlat a ni.

Tun kum thum kal ta chhung khan Don Croce chuan Guilianno leh Pisciotta inlaichinna chu uluk zetin a thlithlai reng a. An ni pahnih chauh chu a lal ram dinna tur kawnga mi hlauhawm an ni. Anni chauh chu Sicily ram chunga a rorelna daltu an ni bawk. A tirah chuan Guilianno leh a pawlte chu friends of friends-a a sipaiah a hman theih a inbeisei a. Guilianno hrilh tur chuan Hector adonis a tir a nih kha. A rawtna chu a chiang hle, Gulianno chu indona pasaltha ropui a ni ang a, Don Croce erawh sorkar lam roreltu a ni ang. Mahse Guilianno chu a thuhnuaiah a kun thung ang, chu chu Guilianno chuan a hnial a. Amah chuan tih tum a nei tlat a ni, miretheite tanpui a, Sicily chu zalen rama siam a, Rome laimu kheuh fai leuh te chu. Chu chu Don Croce chuan a hrethiam thei lo a ni.

Mahse 1943 leh 1947 inkar chhung khan Guilianno chu a thang duang hle. Don chuan Friends ho chu inpumkhat tura a beih a la ngai reng a. Mussolini-a fascist sorkarin a tukzal atang khan friends of friends chu an dinhmun ngai an la luah hlei thei lo a ni. Tichuan Don chuan Guilianno-a thiltih theihna chu Chistian Democratic Party nen inzawmna nei turin a hruai kawi ta a. Chutih laiin Mafia lal ram chu a thuam tha sauh sauh bawk a. A thil tih hmasak ber, Portella della ginnestra hmuna inpawng thahnaah, mawh zawng zawng chu Guilianno chungah tla ta vek kha, ropui ber chu a ni chiang a ni. Mahse a bat a tlaknaah a ngai thei lo. Kha thil tih khan Rom Sorkarin Guilianno an ngaihdam theihna chance leh Sicily mipuite thlawpna tam tak kha a tichhe ta vek bawk a. Thawmhnawa reh theilo kai ang maia Sicily champion ni thin, Guilianno-an a put reng tur chu a ni ta a ni. Guilianno-an mafia chief paruk a tihhlum khan Don Croce chuan duhthlan tur anei tlat lo a ni. Friends of friends leh Guilianno pawlte chuan thih thlenga an inbeih a ngai ta a ni.

Don Croce chu Pisciotta lakah chuan a insawrbng leh zual ta a. Pisciotta chu a fing a, mahse tleirawl finna - mi tak tak thinlung chhunga hlauhawm inphum ru leh sualna awm dan dik tak teh phak lo finna a ni tlat. Pisciotta chuan he khawvel thil thlemna hi a tawk ve tho a ni. Guilianno an pawisa hi engah mah a ngaih loh laiin Pisciotta chuan a duh hle thung. An thilsual tihnaah maktaduaih tam tak hlawh chhuak mahse Guilianno chuan ama hlawkna atan a hmang ngai lo a, a chan pual zawng zawng chu mi retheite leh chhungkaw tan a hmang vek thin.

Pisciotta chuan Palermo-a thui suit nalh ber ber a hain, nawhchizuar man to tak tak a kawm thin tih Don Croce chuan a hre reng a. Pisciotta chhungte chu Guilianno chhungte ai chuan an khawsak a tha zawk tih pawh a hmu. Pisciotta chuan Palermo bank-ah hming dang invuahin pawisa a dah tih a hre chhuak ta bawk. Chutiang chu dam reng tum tana tih chi chauh a ni ang. Hming hrang pathum hmanga ID a siam tir ang bawkin Trapaniah in thar a puah mek tih a hre bawk. Heng zawng zawng hi Guilianno hriat loha tih a ni tih Don Croce chuan a hre ta bawk. Tichuan Psciotta-an a rawn tlawh hun chu a lo nghak ta a, Pisciotta-an tlawh tura a rawn ngen hun chu. Don Croce chu phur tak leh hlim takin a inhawng reng tih a hre sa bawk nen.

Don Croce awmna hmuna Pisciotta a kal chuan a ralthuam hlih chu a remti a. A hma ni lawka Don Croce tan thil ropui tak a tihsak avangin a hlau lem lo a ni. Guilianno-an Hotel beih a tum thuah khan a lo va hrilh a ni.

An pahnih chauhin an thu dun a. Don Croce-a chhiahhlawhte chuan dawhkanah chuan ei tur leh wine an rawn chhawp a. Mikhualte zahna lantirna dan hlui angin Don Croce chuan Pisciotta thleng leh no chu a tih khah sak a.

“Hun thate chu an liam ta a,” Don Croce chuan a ti a, “Nang leh kei hian tunah chuan ka tih tak tak a hun tawh a ni, kan nunna chhanhimna atana duh kan thlan hun chu a lo thleng ta a ni. Tuna ka thil sawi turah hian i inpeih tawh ngei ka beisei e.”

“I harsatna chu ka hriat pui lo che,” Pisciotta chuan a ti a, “Mahse ka nun chhan nan chuan ka fin viau a ngai tih ka hria a ni.”

“Tlan bo i duh lo em ni?” Don Croce chuan a ti a, “America-ah Guilianno rualin i kal thei alawm. Kan ram angin an wine te chu a tui lem loin, Olive oil te pawh tui mai a ni a, Electric chair pawh an nei. Mahse kan sawrkar ang ema hmanlai mi an ni lo. Thil tha lo i ti thei lem lo ang a, mahse nun chu a harsa lutuk lem lo ang.”

Pisciotta chu a nui hawk hawk a, “Eng nge America-ah chuan ka tih ang? Guilianno a kal bo tawh chuan keimah chu min zawng nasa lutuk tawh lo ang, bakah tlang khi a pilril tha em em bawk.”

Don chuan Ngaihtuah hmel zetin, “I chuap chuan harsatna a la thlen che em? Damdawi i la ei reng maw?” a ti a.

“Aw,” Pisciotta chuan a ti a, “Ka chuap hian min thah nan hun remchang a nei hman lo hi ka vanneihna a ni ve thung.” then sawng chungin a ti a.

“Sicilian angin thu i sawi dun teh ang,” Don Croce chuan a ti a. “Naupang kan nih lai kha chuan kan thian te kha kan hmangaih a, an chungah kan thil phalin an thiam lohah pawh kan ngaidam mai thin. Nitin kha ni thar sar a ni a, kan hma lam hun chu hlim tak leh hlauhna tel lovin kan thlir thin. He khawvel pawh hi a hlauhawm lem lo a, hun hlimawm tak a ni. Mahse kan thang lian a eitur thawh chhuah kan ngaih chinah chuan inthianthatna hi a tlo mawh khawp mai. Keimahni tan theuha kan nun a ngai a, kan aia u ten min enkawl tawh lo a, naupan laia kan hlimna ang khan kan awm reng thei tawh thin lo. Chapona keimahniah a lo awm a - miropui nih emaw thiltithei tak emaw hausa tak emaw nih kan duh a, vanduaina lak atanga inven te kan duh thin. Turi i hmangaih zia hi ka hria e, mahse han inzawt la, hu hmangaihna hlawh chhuah chu eng nge ni ta ang? Tun thleng hian a la awm reng nge a awm thin tih hriatrengna mai?” Pisciotta chhanna a han nghak a, mahse Pisciotta chuan Cammarata tlang ang mai a hmel chang puin a lo en a. A hmai chu a dang hle bawk a ni.

Don Croce chuan a sawi chhunzawm a, “Guilianno chu a dam emaw a tlan bo emaw ka rem ti lo. A laka i rinawm zel chuan ka hmelma i ni tihna a ni mai. Hei hi hria ang che, Guilianno a kal a nih chuan ka venhimna tel lo chuan Sicily-ah hian rei i dam lo vang.”

Pisciotta chuan, “Turi Guilianno-a thuthlung bu kha America-a a thian te hnenah him takin a awm a ni. I that a nih chuan kha thuthlung bu kha a lo lar chhuak ang a, sorkar chu a tlu ngei ang. Sorkar thar chuan hata Villaba-a i huana chawl turin an nawr lui mai thei che, chu aia nasa pawhin.”

Don chu a lo nui a, chutah a nui chhuak ta vak vak a. Hmuhsit hmel zetin, “He thuthlungbu hmingthang tak hi i chhiar tawh em?” a ti a.

“Aw,” Don awm dan avang chuan a chiai ru hle a.

“Keiin ka la chhiar lo a,” Don chuan a ti a, “Mahse awm lo ang hmaka chet ka tum ta a ni.”

Pisciotta chuan, “Gulianno phatsan turin min ti a ni a, engin nge chu chu thil theih a ni tih rin tir che?”

Don Croce chu a nui suk a, “Hotel-a inbeihna chungchag kha min hrilh lawk a nih kha. Kha kha thian tha thil tih em ni ta?”

“Guilianno tana ti ka ni, nangmah ni lovin.” Pisciotta chuan a ti a. “Turi chuan chhia leh tha hriatna a nei tawh lo a, thah che a tum a ni. I thi a nih chuan, kan tan beiseina a awm tawh lo tih ka hria a ni. Thuthlungbu a aw emaw awm lo emaw, kan thih hma chuan Friends of friends ho an chawl dawn lo a ni. A hma khan a tlan chhuak thei reng a, mahse awm hnufualin phuba leh i nunna lak a tum ta a ni. Vawiin hian inremna siampui tur chein ka lo kal a ni. Guilianno chuan ni reiloteah he ram hi a chhuahsan dawn a, i laka phuba lak a tumna chu a titawp ang. Kal tir mai rawh.”

Don Croce chuan a thlenga eitur chu a hawi san a, a noa wine chu tlem a han in a, “Naupang ang maiin i awm a ni,” a ti a, “History tawpna tur kan thleng dawn tawh a ni. Guilianno chu dam tur chuan a hlauhawm lutuk tlat. Mahse ka that thei lo. Sicily-a cheng ka ni a- a pasaltha ropui ber chu ka thatin ka tih tur dang pawh ka ti thei tlat lo. Mi tam takin an hmangaih tlat a, a thih chuan mi tamtakin phuba lak an tum ngei ang. Chumi ti tur chuan Carabinieri an ngai tlat a ni. Chu chu ruahman theih dan ber chu a ni. Tin, nangmah chauhin chutiang thangah chuan Guilianno chu i hruai lut thei a ni.” A han ngawi vang vang a, chu tah,“In khawvel tawpna a lo thleng mek a ni. A chhungah chuan awmin a rualin i chhe vek emaw chuta tanga lo chhuakin khawvel dangah i cheng daih thei a ni.”

Pisciotta chuan, “Krista venhimna hnuaiah ka awm thei a. Mahse Guilianno ka phatsan tih hriat chhuah a nih chuan rei ka dam hauh lo vang.” a ti a.

“Khgawi hmunah nge i hmuh leh dawn tih chauh min hrilh a ngai ang.” Don chuan a ti a, “Tumah dangin an hre lo vang. Colonel Luca leh Inspector Velardi nen rem chu kan ruat mai ang. A bak zawng chu an lo buaipui vek ang.” A han chawl leh hlek a, “Guilianno hi a inthlakthleng tawh a ni. I naupan laia i thian kha chu a ni tawh lo a, i thian tha ber a ni tawh hek lo. Tunah chuan a mah chauh a inenkawl tawh a ni. Chuvangin i ti ngei tur a ni.”

Chuti chuan chu mi ni july ni 5-ah chuan, Pisciotta chuan Castelvetrano lam a pan hmain Don Croce hnenah chuan a inhlan ta a ni. Guilianno nena an inhmuh leh na tur chu a hrilh a, ani chuan Colonel Luca leh Inspector Velardi te chu a hrilh ang tih a hre bawk. Zu Pepino inah an inhmu dawn tih chu a sawi lo va, mahse Castelvatrano-ah ngei chuan an inhmu ang tih chauh a hrilh a ni. Fimkhur turin a hrilh bawk a, Guilianno chuan thang awm leh awm lohah chuan hriatna chi ruk lai a nei a ni.

Mahse Zu Pepino In a va thlen chuan putar chuan chibai lo bukin nidang lo ang takin a tak vei ngul a, Pisciotta chuan putar chuan a ringhlel emaw a ti deuh hial. Khaw chhunga Carabinieri chet dan dang ta thut chu a hre ve ngei ang a, chutah sicilian thil chik mi a nihna angin pahnih leh pahnih chu a belh mai dawn a ni.

Chutih lai chuan Pisciotta chu hrehawm tawrh avangin tim sung sungin a inhria a. Thil hrehawm takin a ngaihtuahna chu a rawn luah leh a, Guilianno-a nu chuan a fapa phatsantu chu a hmangaih Pisciotta a ni tih hre ta se engtin nge a tih ang? Eng tik niah emaw a hmaah dingin a hmaiah chil chhak se, phatsantu leh tualthattu tiin ko ta se? Bana inkaihkuahin an tap dun a, a fapa chu venhim ngei a intiam a nih kha, Juda Iskariotan Isua a fawh ang mai khan a fawp ve a lo ni reng mai. Putarpa chu thah a, amah pawh inthah mai a han rilruk zawk a.

Zu Pepino chuan, “Turi i zawng a nih chuan, a lo kal a, a kal leh tawh.” Pisciotta chu a khawngaih hmel hle; Pisciotta hmel chu a var pap a, boruak a thaw lut kawk kawk bawk a ni. “Eng emaw i duh em?”

Pisciotta chuan a lu a thing a, kal turin a inher a. Putar chuan, “Fimkhur ang che, khawchhungah hian carabinieri an khat a nia.”

Pisciotta chuan thil hlauhawm tak a hmachhawn mek niin a hria a. Guilianno an thang a awm tih a hria tih hre lo tur khawpin a a tlat lo. Guiliano chuan phatsantu chu hre chhuak ta se?

Pisciotta chu In atang chuan a tlan chhuak a, khua chu hel kualin lo panna kawng a pawh a, chu chuan inhmuh nana an tiam dang, Selinus kulh chu a pan ta a ni.