Tori's POV
Ethan-an a fate a chhaih nui ri kar kar reng chu ka bedroom atang chuan ka hre pha vek a, kitchen-ah chuan an fapa za-in an awm a, hmangaih taka a biakna aw ril raih mai te chu ka ngaithla reng a.
An bulah chuan zuk chhuk a, an dinner ei chu zuk zawm ve ka chak kher mai, mahse Ethan-an a fate duat leh hmangaih taka a biak leh a mitmenga zaidamna leh hmangaihnaa khata a en chu ka hmu duh lo a ni. An tana a thawhrimzia leh an bula a tam thei ang ber khawsak a duhzia te chu ka ngaihtuah zawm duh tawh lo.
Naupang vannei an va ni teh lul em!
Anni unau angin, chhunah ka pa hnathawhnaa kalin, ka u nen min ti nui ve ar ar se a nawm turzia ka ngaihtuah a, chu ngaihtuahna ngawt pawh chuan min ti ni deuh nghul thei hial a.
Ka u chu ka call ta ngawt a, minute 10 hnu velah chuan Kat-i motor-ah chuangin an in lam kan pan dun a.
"Hey, Peggo, enge naute a an?" a naupai thla 7 chu a len tawh em avangin motor steering chu a dul chuan a si lek lek thei hial a. A dul lian zet chu ka en a, hetianga lian nau hrin tur ka ngaihtuah ngawt pawhin ka CC (Hmeichhe thil
) a na nghal hluah hluahin ka hria."Kan tha zel e, nang zawk? Enge ranch chu nuam i ti em? I room lam te?"
"Aw, ka room pawh a nuam lutuk."
"Anih Ethan lam te, thil a kal tluang deuh tawh em? I lakah a la che ngeiawm zel em ni?"
"Ni tawh lo e, Ethan chu pa fel tak a lo ni, a fel mah mah zawk niin ka hria, amah duh lo turin ka in control a ngai hial tawh zawk a nih hi." Hrilh ve ngei chu a tha zawkin ka hria a ni.
"Oh, oh! Well, Enge chu chu a pawina tur awm? A single alawm, engmah thiang lo a awm hlei nem, amah lah mi tha tak a ni bawk si."
A hmelah chuan a lawmin a phur a hle a.
"A single hlei nem, an inthenna court-ah an la ti fel chiah lo niin aman min hrilh a. Bakah, tun atangin heltu a nei nghal der tawh." Sakawr dahna kan va kal khan kan haw dawnah hmeichhe pakhat amah ngaihsan hmel em ema en dauh dauhtu a rawn hruai thu erawh chu ka hrilh a.
Jamie hnen atanga ka experience atang chuan châk zual châng leh khawhar hnem ang bak ka ni dawn lo, a duh hunah min ti ang a, kumkhua atan erawh min thlang leh chuang lo ang.
Inchhirnain min rawn luah nghal up up a, eng vanga kha relationship-ah khan ka enkim ka lo hlan le? Koh kir leh theih se ka va duh tak em!
"Ethan chuan nula han chhai a, sex hmankual a, a nupui theihnghilh a mamawh a ni, a kawp ve satliah nih ka duh hleinem. Rebound nih ka peih lo." (Rebound = ngaihzawngte nen inthen hlima duh tak tak vang pawh ni chuang lova, midang kan kawp satliah mai mai ang hi)
An inchhungah chuan Allision-i thlalak eng emaw zat Ethan chuan a la tar a, 'a hmelchhia tih theih ka chak ngawt mai, mahse a hmelchhe mawlh si lo. A hnarngul nalh tak leh a pixie haircut bul mat te chuan a ti lang duhawm hliah hliah zawk si. Ka sam hmawr er chu ka paih thin a, mahse ka sam mehna tur pawisa ka neih miau loh avangin a tan em chu ka tan ngai lo.
Zaninah ka lenchhuahsan dawn tih ka hrilh laia Ethana hmela khawharna hmu tlatin ka inngai lui tlat a, ka tan ngaihtuah let a nuam ve deuh.
Anihna takah chuan keimah leh keimah ka inbum a ni reng si.
Ani ang mipa kha chuan min duh tak tak lo ang, a duh apiang thing thei turin a zalen tep tawh. Chu chu ka pawm thiam a la ngai dawn a ni.
12
Ethan's POV
Kawmchara hlim taka naupang nui leh khek ri hriat tur a awm leh ta, Tori vang a ni.
Hnathawhna bal ka intih fai zawhin kitchen lamah ka pan ding nghal a, Tori chu ngawi rengin a room lam panin a kal nghal daih a.
Naupang ho lah hian Tori bak sawi tur an hre mawlh lo, a felzia te, a bula awm nuam an tih thu te, chhuna an infiam chungchang te tui ti takin min hrilh barh barh thin a.
Eitur a siam laiin naupang ho chu tihtur a lo tuk sak ve thin a, anmahni tawkah an lo buai ve mam mam thin a, tangkaina nei ve nia inhriain nuam pawh an ti thin hle.
Mila chuan Cody-an Tori-in ei tur a siam laiin a keah a lo vuan tlat thin tih min hrilh a, Tori lah chuan dawhthei takin a duh ang chuan a dawm tir ve reng mai thin a ni awm a. Naute mai mah ni se, a be siam siam a, a thil tih lai chu a hrilhfiah vek a, naupang ho pawh chuan ngun takin an lo ngaithla ve kar thin a ni. Ani hi chu naupang specialist a ni ngawt alawm.
A eisiam lah a tui em em mai bawk si, a tel lova ka ei puk puk mai chu ka inthiam lo hial zawk.
A atthlak ngawt mai, zanah enge a tih dawn tih ka lo ngaihtuah ve tur a ni lo. Keimah zawkin chhun lam ka hnathawk ka haw tawh chuan a duh duh a tih theih tur thu ka hrilh zawk a nih kha, mahse a kal chhuak tur chuan ka rilru a kam ve tlat si, min pulhna a ni zawng ang riau lehnghal.
Nikhat lunch min rawn ken sak tuma, ka bula a rawn kal bak kha chu lunch min rawn pek reng rengin Mila min pek tir a, ani chuan gate-ah Cody pawm chungin min lo nghak daih zel a. A chang chuan dinner a buatsaih laiin naupang ho ka bulah a rawn kal tir thin thung.
Kartluanin min pehhel char char tawh. Kartluanin a nih chu!
Friday zan chuan ka dawhtheihnain a tlin ta ngang lo a, naupang ho ka muttir hnuin a room lam ka pan a, a room kawngkhar ka kik dat dat a.
"Come in"
A khumah chuan a kut lukhamin a lo mu zar a. A sam chu a lo la hnawm char a, kawr pan leh dawrawm zet leh kekawr bul tawngchham zet ang chi bawk kha a lo inbel a. A thawmhnawin a khuh loh chin a dul thep zai mai leh a vun mam takin ka taksaa hna a thawh dan chu haider luih hram tumin, a hmai chu ka en lui a.
"Dinner min siamsak avangin lawmthu ka hrilh duh che a, i brisket kha kum tam chhunga tui ka tih ber a ni hial ang, ka nu hnenah i thilsiam tui ka tih zawk thu erawh hrilh reng reng suh aw."
Muangchanga thut chhuah pahin, inthlahrung hmel lek lek zawk hian min nuih a, "No problem" a ti halh a.
Chik zetin a mit chuan min en kar bawk a, khawdang min hawisan lo tal alawm.
Sawi mai tur hre lova ka ngawih vang vang hnu chuan, "Friday zan te a ni bawk sia, eng emaw tih tum te i nei em?"
"Helai thleng thlenga ka thiante inlam tira khawilai night club-ah emaw beer man tlawm zet leh music ring tak nena khawsa ho tura ngen ka phur teh fahran lo a ni."
"I duh phawt chuan ka motor i hmang thei reng alawm."
A ang zuau a, a ngawih leh vang vang hnu ah, "Ka tan chutiang indil chu a nuam lo a lawm."
"Ka phal lutuk alawm."
A dar san âk pahin, "chu pawh ni se."
A room khawngkhar nghengin ka inkuangkuah a, "Hetianga luhlul reng hi em ni i nih a?"
Min nuih let sak a, a nui chuan min khawih za deuh zak mai. "Ni mai e, ngaiah neih i tum a ngai ang."
"Anih chuan ka motor i hmang duh lo a, ka bulah chaw i ei duh hek lo a, Rangers game min en pui ve thung la? Baseball i ngaina em?"
"Ka tih loh a tha zawk ang, min sawm hrim hrim avang chuan ka lawm lutuk tho e."
A luhluh reuh bawk sia.. "Thil ka zawt ang che aw? I pawi ka sawi em ni?" ka tih chuan mak tih hmel zetin min rawn en. "Ka zawhna chhan che chu hmannia lunch in rawn ken hnu atang khan min pehhelh char char tih ka hai bik lo."
A ngawih vang vang hnuah, "I tan alawm ka tih."
"A eng ti zawng chuan?"
Min chhang nghal mai lo a, a'n thaw deuh halh a, "I lak atangin ka inla hrang alawm. Mi hrang bula awm nuam i ti lo tih ka hriat vang a nia."
"Mi hrang i ni tawh hlei nem. I eisiam tui ti takin ka ei tuam tuam thin alawm, eng lo.... kei leh ka fate bula awm reng i ning deuh a nih chuan.."
"Chutiang lam a ni lo, i fate hi ka ning reng reng lo."
A sawi duh loh chu keimah ka ni tih ka ngaihtuah chuan ka na ru zawk mai. "Anih chuan... keimah a ni maw i nin ber zawk chu? I lakah sual tak angin min la hmu reng em ni? A chang chuan dawhthei leh fel tak chu ka ni lo tih ka hria a lawm, mahse__"
"A tawk e, nangpawh ka ning lo che, chuan i fel em em bawk" a'n meng tal deuh tap tap a. Chutah khum atanga chhukin a kal kual tarh tarh a. A te ve ang reng sia, pheikhawk tel lo phei chuan ka dar pawh a chen mang lo. Nula tereuh te, ke pen tan tan mai ka hmuh chuan, ka rilruah Tinkerbell film a rawn lang zawk a. A kut te reuh tea min la kangin a room atang chuan min theh chhuak ang a, a room kawngkhar min khar hnan bur duh hmel hi a pu a. Chutah, "Eng game pawh ka enpui ang che, mahse Rangers game chu ka thei lo, a chiang em?"
"Anih leh Cubs game aw, Dodgers nen an inkhel dawn a?" a room atanga min nemchhuah lai chuan ka ti leh hram a.
"Fine."
TV-ah inkhel ka hmet chhuak a, ice cream leh fian pahnih ka va la leh a, Tori bulah chuan ka va thu ve nghal a. "chocolate Cherry Garcia nge Chocolate Chip Chookie Dought i duh zawk?"
"Chocolate Chery, please."
"Kha le, my lady."
Tv flatscreen-a inkhel chu a volume ka'n up deuh a, nuam tih hmel zeta zik ar ar pahin min rawn ngheng a, min rawn si ek ek chauh a ni na a, hnuai lam chuan a hre rang kher mai, ka TT chu a tho nghal talh talh mai.
Tui tih hmel zetin a fian chu fawpin a hmui chung leh hnuai liah pahin an rum leh tiah tiah bawk nen.
A hnuai lamin min tih mualpho hmain ka bawp ka khawkherh ta ngawt a.
Engtin nge hetiang hian ka thawh nghal theih mai zawk le? kum 2 chhung hetiang zawng hian hmeichhia a melh pawh ka melh ngai lo kha a ni si a. Tleirawl thisen chak vanglaia hmeichhe kekawrte hmuh ruala thisen lum nghal pup pup ang maiin a lawm le ka awm le.
"Hetiang hi alawm ka duh chu, thank you." a thil ei tuam tuam lai en reng pah chuan ka ti a.
Sawi zawm tur hre lo in ngawi rengin inkhel chu ka en dun leh ta ngawt ngawt a.
Min delhna lai ka dar a kham viau tawh tihah vawiina phone call ka dawn chu ka hrechhuak ta hlauh a.
"E taka, vawiinah Babysitting agency atangin phone call ka dawng a."
"OH," chesawn chuang lo chuan a ti ringawt a.
"Helai hmuna rawn awm nghal duh an la zawng hmu thei lo a nih chu. Mahse, an hmu hlauh a nih chuan min rawn hriattir vat tur thu min hrilh a."
Tori chuan engmah a sawi lo a, keimah vek chuan, "Chuan, engtin nge ni ta ang? I awm belh thei ang em? A tirah khan kar 2 chhung han awm chhin phawt la kan ti kha chu a nia. Dik taka sawi chuan... awm lo la chuan tunah hian engtin nge kan khawsak ang tih pawh ka hrethiam lo hial zawk a ni."
A mitmeng chu a nem sawtin ka hria a, a ice cream chu ka melh ngar ngar a, ka rilru in 'khawngaihin aw ti rawh' ka lo ti mawlh mawlh a.
"Ka apartment luahtu tur ka hmu maithei a, chuvang chuan.. maithei tiin ka chhang mai ang che"
"Maithei tih chu Aih tih aiin a la tha zawk tho alawm. Maithei tih chu ka pawm rih ang e. I apartment luahtu tur chu thuthar a awm hunah min hrilh dawn nia, chan leh che ka duh miah lo a nia"
Chu mi zawh chuan engmah sawi lovin game chu kan en dun leh ta ngat ngat a. Tui tih hmel zeta a ice cream a fawp ri chak thin chuan sex hman laia sound lo tel ve min ti hrechhuak tlat nia.
OMG, ka tuah ve ta tak tak a nih hi, lenchhuaha nula date ka mamawh.
"Ti nge dinner i rawn ei ve loh a? Ei tur a tam teh lul nen" aw then kharh pahin ka ti a.
A lu a thing miat miat a, chutah ka lam rawn hawiin, "Weekend-ah ka u te inah ka kal dawn a nia."
"Okay."
A biang a sen tan tan a, thutak zet hian, "Ka awm loh laiin puar takin chaw lo ei thin la ka duh a ni."
Inngaihtuah chiang miah lovin sir zawng chuan ka va kuah a, "Hun rei tak hnua ka hnena miin an sawia thumawi ber i sawi a ni tih i inhria em, darling? Ka lawm e."
A kutin ka awm a nem deuh a, mahse second khat pawh a tling hman kher lo ang, min kuah let ve ta zawk a, min kuah lai chuan a nui a ni tih ka hre thei a. A va cute teh lul em, a rim lah chu a tui em em mai bawk si.
Kumkhuaa kuah char char ka va chak teh lul em!
Min ngaihtuah thu a sawi kha a ti mai mai lo a ni tih ka hria, kei chauh min ngaihtuah a ni lo a, ka fate nen lam min ngaihtuah em em a, naupang enkawl a thiam piah lamah eisiam duhthusamin a thiam bawk si. Ani ang hi an awm lo ang, amah ang hi khawvelah an awm lo tawp ang, kawng engkimah a fuh vel vek.
Min kuahna kut chu la thla in a hmaa a thut ngai ang khan min ngheng ar ar chungin a thu tha leh ta a, kei pawh chu beer la turin ka tho a, beer lak pah chuan a ei turin sandwiche ka siam sak nghal a.
A hmaah ka va chhawp sak a, "Ei turah chuan ka siam thiam ve ber a nih hi, han en chhin teh," ka ti a.
Tori chu a nui a, a lu thin zauh pahin a ei ta a, ka lawm nan, ei chu min ei zawh sak ve hram e.
Thunawi zep leh teh ang, a chhiar peih tan a chhiarah
Comment lamah min sawisel turin ka ngen che u a, in rawn sawi sap sap hlawm a, kha atangte khan hei ka inzir ve zel a nia, spelling mistake check turin Rozami ka ngen ngawt a, uluk takin min check sak a, chhiar a nawmsawt ngei ka beisei. Letling pahin ka type nghal nghal mai thin a, a lehdan turah ka tawngkam ka thlak thut hian a hmasa lama ka ziah kha lo en nawm tawh lo in ka zawm ta mai thin a, thu inzawm lo pui pui a awm nual thin tih a, chhiar a nuam lo hle chungin min chhiar sak tan tang thin a, ka lawm tak zet zet e...