Bonus Chapter
Ziaktu: Cck Lalchhuanawmi
Dawra ka awm laiin School lam aṭangin call ka dawng, "Freddy-an a pawlpui a sawisa a, tunah in lo kal thei ang em?", an rawn ti.
"Kan rawn kal nghal ang", ka ti a. Ka ṭim uai uai. A chhan min hrilh lo mah se, rinzawn ka nei.
An chhaih ang a, ani dawhthei tluan ta lo chuan a sawisa ta a ni ang. Sammy-a an hrilh ang em aw?
Sammy-a hrilh se chu min rawn call miah lo ang.
Bawihbawihi ka pawm a, "Kan va haw tawh ang e, hman chuan naktuka lo kal leh kan tum.ang", Hriatin pawn thleng min thlah.
School kan thleng a, Principal Office-ah min lo nghak tawh. Freddy-a chu a kûn ngâih a, hliam a nei ve lo. A bulah a sawisak ni ngei tur a ding kawisawi. A kam sir a khem nuai a, a mit ko dinglam a kak nge mawni?
A va sawisa nasa ve aw...
Principal chuan, "A pa ni loin a nu kan rawn hrilh hmasa che, a pa kan hrilh lo. Engtin nge ni dawn? Hei, a ngawi reng a, engmah a sawi duh lo. Nangin i biak ṭawng theih kan ring a ni. Hliam tuar lah hi a né né kual vel ta mai mai a", a tih laiin, hliam tuar nu leh pa an lo thleng.
A nu chu a ṭawng zuah zuah a, a bengchheng tak tak a ni.
A fapa hliam te chu enin, "Hnawh chhuah a ni tur a ni", a ti bung hmuk. A zak thei lo e.
"Sir, ka fapain a sawisak chhan hre ve phawt ang u. Ka fapa a thiam lo a nih chuan min hnawtchhuak dawn nia", ka ti ve ngat.
Freddy-an thiam lohna a nei lo tih ka chiang a, ka ring nghet bawk. Ka rin hi a sual mai mai ngai lo.
Chu nu chuan, "Ka fapa hi thiam loah chhuah tum ngawt suh. Kan hre vek, A nuin mipa dang a umsan a, a pa MLA ni ve lah kha a eiru thul. Nang, a nuhrawn ve mai mai, inlak fel tum kual vel lo khan awm mai mai rawh", min ti zêk.
"A mizia tur a hriat mai alawm, tumahin ka fapa hi hetiangin an sawisa ngai lo. Tumahin an kut hmawr pawhin an dek ngai lo. Nungchang ṭha leh fel tak a ni asin. A nu leh pain keh thei dawma kan dawm, kan fapa neihchhun a nih hi", a ti zung zung.
Nungchang ṭha leh fel a ni lo a ni ang, sawisak a tuar em mai.
Freddy-a mizia a sawi a, a fapa mizia a sawi chhuak zawk ni maiin a lang.
Amah vêkin a fapa nihna mai bakah, an chhungkaw nihna a pho lang nghal vek alawm.
Tlawm zawka ṭan a ngai tih ka hria, Freddy-a ding ngawi reng chu, "Bawiha, thil thlen dan sawi rawh", ka ti a.
Ka thu hi chu a hnial ngam lo, "Miss Ramtei chhuah ve leh, ka bag-a min vuain, "Eiru pa nei kan class-ah an awm tur a ni lo, chhuak ve nghal rawh", min ti a",
"Tichuan, i sawisa ta em ni?", ka ti a. A lu a thing, "A nih, engvang nge?", min melh zawk a, a kun leh daih.
"Bawiha, min en rawh. Engvangin nge i sawisak a?", ka ti leh a. "A chiang reng, hei hi alawm chhungkaw kal phung dik lo rah chhuah chu", Nu chuan a lo ti hmanhmawh.
Ka tuar ta ngang lo, "Ṭhiani, min hrethiam la lo ngawi lawk ta che. Principal Office-ah a nih hi kan awm, Zirtirtu dangin min ngaichang ṭhup bawk a, chingfel vat teh ang", ka âw a nêm hran lo.
Nêmtir ka tum lo hrim hrim.
Principal chuan, "Ni e, Lawma, han sawi vat teh. In ṭhiante in tiphili zo vek", a lo ti ve bawk.
"Bawiha, sawi rawh", Freddy-an min melh zawk a, "Gold digger a ti che a, "I nuhrawn saw mutpui ka châk", a ti bawk a. Ṭawngkam chhe pui puiin, zahmawh takin i chanchin a sawi", a ti ta mai.
"Dâwt sawi suh, ka hriatah ṭawngkam chhia chu sawi loh; zahmawh takin a la ṭawng ngai lo", Nu chuan a lo ti vat.
Principal-in, "Chu, i nu avangin i sawisa ta tihna em ni?", a ti a.
Freddy-an, "Aw, Sir, kei chu engtin pawhin min ti rawh se, ka palzam thei. Mahse, tumahin ka nu chungchang mawilo takin an sawi tur a ni lo. A bikin, zahmawh ṭawngkam ngat phei chuan", a ti nghet charh charh a.
Principal chu inringtawk takin a mitah tak a en.
Principal a bu nghat nghat, Nu bawk chuan, "Ka fapa a sawisak avangin hremna a hmu ve ngei tur a ni", thinrim takin a rawn ti leh.
"Sir, ka fapain a sawisak chhan a sawi tawh bawk a. Eng hremna pawh min pe la, lawm takin kan pawm ang", ka ti a.
Nui varin Freddy-a ka en. Ka va han chhuang tak.
Keimah avangin a pawlpui a sawisa chu a ni si a. Eng ka nih loh tehlul nen, 'Nu' tih hming ka put avang maia hetiang chang thei ka ni si a.
Principal.chuan, "School Campus chhungah insual kan phal lo tih in hria, tin; Campus pawnah pawh, School Uniform in hak chhung chu in insual thei lo bawk. Chuvang chuan, hremna i pumpelh lo ang. Vawiin chawhnu atan suspend i ni e", a ti a.
Ka nui ver ver, Zirtirtu dang pawh an nui ṭhaw hlawm.
Nu erawh a lungawi lo, "Chutiang a ni ringawt thei lo", a ti hlak a. A pasal hnenah, "Eng emaw tal sawi ta che", a vin nghek.
A pasal lah chuan a hlau nimaw, a phu zawk lehnghal a. "Nia, Sir, hremna a ni hleinem", a han ti ve a.
Principal-in, "In fapa suspend ve ila in duh em ni?", a ti ta. An duh lo nasa lutuk.
Office aṭangin kan chhuak a, an Miss pakhatin, "Kha aia naa sawisak tur alawm", tiin a rawn phun sep.
Siamtean lo kalin, "Ka haw ve duh", a rawn ti. "Tlaiah i rawn haw dawn alawm", ka ti a.
"Nu, min dilsak la", a ti a. A ner kual vel. Bawihbawihi lahin a u Siamtea a kuah cheng chung. "Keimah chauh a lo haw ka peih lo", a la ti deuh deuh.
"I zak lo lutuk, in class-ah va kal rawh. Tlaia i rawn haw loh chuan hnuk haw tur chein ka lo kal ang",
"Ka awmna i hre awm lo e",
"Police ka zawntir dawn che alawm", ka ti a. A nui ruh ruh.
An Sir-in, "Lalnunsiama kha, class-ah lut rawh", tiin a lo ko. Peih lo takin an classroom a pan hna hna. Lainatawm reuh lutuk.
School bân veleh amah chauhin a lo haw dawn chu ni sia, zirlai a la chhunzawm zel a nih chuan Phaiah te a la zir duh awm si a.
Ngaihtuah thui vak lo teh ang.
Freddy-an Bawihbawihi a pawm a, kan nufain muangchangin kawng sirah kan kal dem dem.
Restaurant nuam tâwkah ka chawlhpui a, lungchim takin ka thlir doh doh. Tuna ka awmdan hi chu, pawisaa lei theih rual a ni lo.
Ka bazarpui bawk a, a thawmhnaw duhzâwng apiang ka leisak. "Lei a ngai lo", a ti chuang bik lo.
Kei aiin a sâng hret tawh a, nakumah chuan hei ai hian a sâng zual tawh ngei ang.
Hlimna chhiar sen loh hian min tuam hlup mai a, keu hawng turin chakna ka nei lo. Hlimnain tha a tiṭhum zo vek si a.
Zanriah tuihnai tak ka buatsaih bawk, Sa tel miah lo mah se, Bai leh kan(kang) tui tak tak a awm.
Sammy-an, "Vawiin ka chau bawk a, ka han ei ṭeuh teh ang", tiin, ka biang a fawp a. Bawihbawihi a pawm.
"Zanin zanriah hi, a special tlata hriatna ka nei. Nu, a special tiraw?", Siamtean a ti a.
Sammy-an, "Special a? Engthil nge thleng? Chhuanpui Darling, Bawihbawihi'n nau a nei dawn em ni?", a ti mai a nih kha.
Ka ṭhen chak chak, Siamtea leh Freddy-a an nui ruh ruh. Bawihbawihi lah chuan, "Nautê ka duh, Apa, nautê ka duh", a lo ti hmanhmawh.
"Anu dil la", Sammy-an tiin, "Anu, nautê ka duh", min lo ti.
"Nautê chu i ngah em kha", ka han ti a, "An duh thuin an kal thei hleinem", Sammy-an a ti leh.
Dawhkan hnuaiah a ke ka tlawh, "Ngawi mai mai rawh", ka ti a. "Hmar lunglien hi chu a!", a khi suk suk.
Ka mood a off vek dawn.
Âw thian kharhin, "Zanin zanriah hi special taka ka buatsaih a nih hi", nui varin ka ti a.
Sammy-an, "A chhan sawi la", a lo ti vat.
"I fapa naupang zawk hian hna ropui lutuk tak mai a thawk mawle. Chu pawh, ka tan ngat", Freddy-a ka en a.
A lâi chu a hawi chhuak ngam lo.
Sammy-an, "Eng nge a tih, Zanriah special a hlawh bikna turin? A va phakar ve a", ner nûngin a ti.
A mak ṭhin mang e aw...
School-a thil thleng ka sawi ta vek, "Hau miah suh ang che u, in hau tih ka hriat leh si chuan ka vua ang che u",
"Ka hau nghal dawn", Sammy-an a ti chu ka melh nghek.
"Fiamthu nih kha", Freddy-a lam hawiin, "Tlema inthunun i zir a ngai a nih chu. Infiammi tan chuan inthunun theihna a pawimawh ber a, a ṭangkai ber bawk", a ti a.
Chu bak sawi zui a tum lo, a tawk viau a ni.
Chhungkua hlim takin kan awm dawn emaw tih laiin, Manoi a rawn lang hlawl.
"Sam, biak lawk che ka duh a, Siamtea leh Freddy-a te nen", a ti a. Keipawh ṭhu ve kur mah ila pawi a ti lo.
Thu hlimawm lam a sawi dawn emaw tih laiin, "Duhsaka hi awmpui ka duh, ka nu leh pain an phal tlat lo a. Khawngaihtakin min dilsak rawh", a ti ta mai.
"A tir aṭang khan lo awmpui daih tawh ila, Ser nung a awm lo tur. Khang kum chhung zawng khan a duh chuan tih luihnain min awmpui thei. Mahse, min hmangaihna leh min zah em avang khan tihluihna a hmang ngai lo", Manoin a ti a.
Freddy-a thoin pindanah a lut a, na zetin kawngka a khar.
Siamtea chu tho tum pawhin a lang lo. A kun tlat. Sammy-a a ngawi reng. Kan ngawi vek ti zawk teh ang. Manoi chauh a ni mai, ṭawng awm chhun chu.
Bawihbawihi pawh a ngawi reng, Manoi a en duh em em lehnghal.
A tawpah, harsa ti fe hian, "Pasala neih i duh tihna em ni?", Sammy-an a ti chhuak. Manoi ai chuan, Sammy-a ka lainat zawk.
"Sam, ka duh a ni", a ti a. Siamtea tho chhuak chu Manoin a kutah manin, "Siamte", ṭap chung hian a ko.
Ka rilru lo na lutuk chu tlanbo daih ka duh.
Siamtea hi chu a puitling bik ṭhin, a nu bulah fel takin a ṭhu thla a, a kuah vawng vawng.
"Ka pa thutlukna chu kan thutlukna a ni", a ti a. A ṭawng a dam thlap mai a. Tu nge a chhun le? Naupang têin a puitling em mai.
Sammy-an, "Tunah mai chuan thutlukna ka siam thei lo, kan lo ngaihtuah ang", a ti a. Inthunun zo loa a ânkhum hrep loh nan a inveng ṭang ṭang.
Siamtea leh pawn thleng kan thlah a, "Sammy-a thutlukna chu eng pawh nise, hnial lo hram ang che", ka ti a.
Manoin, "Hnial lo ang, a thutlukna ang ang ka pawm ang. Ka pawm tur reng pawh a ni", a ti a. A ṭap bâng thei lo.
Siamtean Bawihbawihi pawmin an pindanah a kalpui.
A kut khûr dar dar vawn hnanin a hmaah ka ṭhu hniam a, a mit sen rum hliah turin mit tui an luan chhuah a ngai.
Mipa tak a ni a, a luan chhuah tir hauh lo ang.
Lo âwn hniamin a chal leh ka chal nawktirin, "Ka hmangaih che, Puipui Baby, ka hmangaih che", a ti chu ka nui hak.
Ani pawh a nui, ni lo lo hian min ko ziah mai.
"Min kalsan turin ka phal lo che", ka hmui a fawp zeuh.
"Phal pawh ni la, ka kalsan lo ang che", ka ti a. A kiai sak. Kal ta ila, amah ber hi ni awm thei loa, min zawng a min hruai tum tur chu.
Hei hi chu chiang tak ka ni, ka tel lo hian a awm thei lo.
Na zetin min fawp a, a mal chungah ka lawn kai tawh. Thinrimna, lungngaihna leh huatna ten an hualna lak ata tal chhuah tuma, inthiarfihlim tum ang mai a ni.
Ka âwmah a hmai thukruin a thaw ri leh hrawih ṭhin.
Thutlukna hautak zet a siam a ngai a, a tifuh ang nge tifuh lo ang tih lam a ni. Tihfuh aiin tihfuh lohna chance a sâng lutuk.
Tukṭhuan eia dawhkan kan kil te chu, zing dang ang lo takin a reh tlawk tlawk. Bawihbawihi nena kan inkhak thawm bak a awm lo.
School kal turin kan inbye bye hlawm a, an pafaa an sawi ho ngei ka ring a. An thutlukna ka hriat châk rualin ka hre châk lo.
Ka hriat châk lohna hi a buk a rit zawk ang.
Chumi zan chuan Sammy-an min sawipui ve, "Ka thutluknaah an innghat tawp a, engmah an sawi duh si lo. Nang tal chuan eng emaw tak han sawi teh", a beidawng takzet.
"I fate ang tho kha a ni e, sawi tur ka nei lo", a thaw chhuak hawk. Lehlam min hawisan dawn emaw ka ti hman. In chung a en kar.
Ni hnih hnuah chuan thutlukna a siam thei ta, Manoi koin a lo kal, "A bulah awm ngei ang che. Helam lo ngaihtuah lo la, ka pi leh pu pawh ka lo sawi pui ang", zângkhai vah hian a ti a.
Manoi a ṭap hawm hawm.
Min lo en a, ka bu nghat. Thutlukna siam hautak ber a ni alawm.
Thutlukna dik tak a siam ngei bawk e.
Freddy-a leh Siamtean Manoi an kuah a, thik thei ka ni lo. Nufa inngai tak an ni.
"Ka hmangaih em em lutuk che u", Manoin ṭap ṭeuh chungin a ti a.
Lungchhe vânkaia ṭahna khawp ni mah suh se, mit tui luangin kir an rel thei meuh lo.
Mit tui tal hi chu luang chhuak ve teh se.
Sammy-a chuan Manoi nu leh pa biain, Sammy-a a ni bawk a, a thu an hnial lo.
Manoi chuan Duhsaka a awmpui ta a, Innei angin an kal lo. Tlan inko angin an kalpai tawp.
Thingtlang lamah an awm ta daih a, an chin reng ka hre mang tawh lo.
Vawikhat chu, zah sawi thei loin ka call, "Hmasâwnna hmuh tur a la awm lo, chuti chungin a fel tawh khawp mai", Manoin a lo ti a.
A âw hriat ringawt pawhin thla a timuang.
Dam ṭha zel sela, Duhsaka pawh fel taka awm chho zelin, a rilru harh thuai tawh teh se.
Sammy-a lo haw hmuakin, a hmel a hlim lo.
"Sam, engtizia nge a? I hmel a hlim tlat lo",
"Eng ni lo e, ka chau deuh a ni e", ring phawt teh ang.
Mahse, a intihlim chawp mai maiin ka hria. Office aṭangin a lo chhuak thei reng reng lo.
Bawihbawihi mut felin ka va en a, Office-ah a lo awm lo.
Tukverh inhawng hmuin ka va kal a, Balcony-ah awmin, a koah innemkhalhin a lo ding ngawi reng.
"Sam, ka zawng nasa che alawm", amah zawkin min pawt a, min kuah vawng vawng. Thil ṭha lo thleng a awm chiang mai.
"Kan ṭha em?",
"Ṭha chiah lo", ka ring dik chiah e.
"Min hrilh la, ka lo ngaithla ang che", min fawp ngawng ngawng.
Eng thil ṭha lo nge maw thleng ta le?
"Chhuanpui Darling, ka hmangaih luatah che hian tihnat che ka hlau a ni. Awlsam tak hian na takin kan insiam thei a, intidam leh tur erawhin a khirh tawh si",
"Sam, eng thu nge maw i sawi tak hi le? Inṭhenna thu sawi i tum em lo ti raw?",
"Tum lo e, engtikah mah ka ṭhen thei ngai lo ang che. Ka bulah tun thlengin i la awm a, ka lawm a ni. Hmangaih dan che hi thiam ka inti lo a, ka thiam theiin ka inring lo. Ka hmangaihna che hi kei ngei pawh hian duhkhawp loh chang ka ngah ta mai, luang liam zawih zawiha hmangaih che hi ka duh ṭhin asin".
Min tikhûr, inṭhenna thu a sawiin ka hre tawh.
"Sam, nitinin min hmangaihzia i lantir fo alawm. I hria maw? Kei hian, i duhkhawp hmangaihna ka pe lo zawk che a nih hi maw", ka hmui a khar vat.
Ka bek a dawm a, duhthawh zetin min fawp. Ngaih a ṭha thei mawlh lo.
"Min hmangaih tih ka hria asin, i hre tawh lo em ni, "Sam, ka hmangaih che", i tih zan kha?", ka âng phuau a.
Ka nui tawp, "I lo hria elo, kha kha?",
"Hria e, i harh hmain pindan ka chhuahsan daih a nih kha. Min hrilh lo mah la, i chetzia aṭangin min hmangaih tih i lantir tam tawh bawk e", a ti a.
Ka dang chiang lutuk. Chuti chungin, "Ka hmangaih che", ka la ti ngam lo.
"I hre tho, a hranpain ka hrilh lo mai ang che", te ka ti. A nui huah huah. Manganthlak duh tak a ni.
"Min hrilh teh, hlim lo taka siamtu che chu eng nge ni ta?", thâwk a la te te, "Inthlanah ka din leh ngei a ngai, Substitute-ah min dah tawh lo, ka hnial hneh ta ngang lo. Harsa ka ti",
"Khawi Bialah nge ni dawn?",
"Serchhipah", ka thaw hap.
Sammy-a chuan, "Freddy-a leh Siamtean an remtiin ka ring lo, i remti hek lo, a dik em?", ka lu ka thing.
"A dik lo hulhual, dik leh rinawm takin i nung a. Chu chu kan hria, kan thlawp tlat ang che. Kei hian ka ringin ka zui tlat zel ang che. A chhan chu, ka hmangaih si che a", a âwmah ka hmai ka thukru nghal.
Min kuah vawng vawng a, ka sa pup pup mai. Ka zak lutuk ringawt.
Ka thawl hawk mai bawk, "Ka hmangaih che", ti ve tain, ka hmangaih thu ka hrilh ve tawh.
Mumangah lehzel pawh ka hmangaih thu hrilhin ka lâi lutuk chu, ka inchhuih tlu. Mang rapthlak!
Sammy-a chuan Freddy-a leh Siamtea a sawipui ve a, "Ka nu thu thu a ni mai", an ti. An fel a nia aw.
Freddy-an, "Badminton-a ka dreams a hlawhtlin hunah, Tlangval Senior Pu Rahul Gandhi angin Politics ka khêl ve ang", a ti ta pek.
Siamtean, "An Party-a awm i tum maw?", a lo ti. "Awm kher a ngai lo, amah angin Politics chauh ka ngaihsak ang tihna nih chu. Rilru te hi hman tur", Freddy-an a ti duah.
Aaa, a ṭha vek tho e.
Hetiang lamah hian inrawlh tam lo ila a ṭha.
Sammy-an ka nu leh pa te a hrilh a, "Chhuanpuii thu thu a ni mai", an lo ti. Min tichau.
Ka intithei a nia, ka thu loin engmah an sawi ngam lo. Sammy-a ka hlau lo tih an hre tlat a.
Inthlan a hnai leh ta hle a, Official takin Sammy-a chu Serchhip Bialah kan Party Ticket-in a ding dawn.
Chhungkuain kan ṭang a, tlin ngei tumin kan Campaign lo bawk.
Ruahmanna tenawm takin hmun a chang tawh lo. Tin, kan Party hi kan insiamṭha nasa hle bawk a, hei hian min ṭanpui.
Bial mipuiten min duh tih avang ngawtin ngaih kan tiṭha chuang lo. Kan ṭang nasa.
Programme hrang hrangah telin, Interview turin an ko deuh zut reng bawk
Rin ang ngeiin a nun hlui phawrh chhuahsakin a awm leh ta. Tun ṭum chu, a nasa mah mah.
Insawifiah mah ila min ring zo lo tih ang a ni. Sammy-an a hranpaa insawifiah a tum lo. FB group ṭhenkhat hi an rapthlak.
Freddy-a leh Siamtea ka ngaihtuah, "School-ah in ṭha em?",
"Ṭha ni mai, min ngaihtuah duh suh. Kan ṭha lutuk", an ti a. Eng kawng emaw taka chhaih an tawh leh ka ring.
Ni leh Thla liamin, inthlan nî kan thleng.
Mitin mai kan phu suau suau, rilru a hah. Inthlan a zo a, Serchhip aṭangin a rawn haw.
MLA-a dingte a ni a, kan Party lamin Driver min ruaisak a, a lawmawm.
Bawihbawihin a ngai lutuk chu, a thlah phal lo reng reng. "Apa, ka ngai lutuk che", a ti chhen.
Sammy-a pawhin a ngai, a chhuktir duh lo. Tv an en hle hle emaw tih laiin an muhil.
Ka kaitho a, "Sam, pindanah insawn rawh", phelh phangin a tho a.
Bawihbawihi chu pindanah a insawnpui. Lukham a deh rualin a muhil leh thuai. A tling a nih chuan, Professor aṭangin MLA a ni leh dawn si a.
Chhungkaw hlim loh a awm lo, chhungkuain kan ṭang vek.
Siamtea leh Freddy-a pawhin thu nawi an nei lo a, Siamtea a hlauthawng tawh hek lo. Keipawh chuti tho. Hlau kan awm tawh lo.
Tling mah ila, buaina a awm tawh dawn lo. Chhungkuain kan ṭang dawn alawm.
Tling lo pawh ni ila, kan vui lo ang. Kan lawm hlei hlei zawk ang.
Zing lamah ka hnute hmur za mer merin min tiharh, ka meng a, "Ka tiharh che elo?", a phun sup.
"I va harh hma ve",
"Muhil leh rawh", ti pahin a kut a la chhuak a, min kuah ṭha sauh sauh. A awmbo rei lutuk a, ka beisei ve deuh.
Ṭan hmasatu nih ka duh loh avang maiin a ni pakhat.
Ka inher a, "Sam, min ngai em?",
"Ngai lo", ka ner sawk. "Keiin ka ngai che", ka hawisawn daih.
Ka beng bulah a nui ruh ruh, "Chhuanpui Darling, muthilh nawntir che ka tum lo a nia", a phun sup.
Ka beng kawm a seh ner ner.
Ka beisei ruk a nih avangin ka tlanchhe rei lo. Min khawihna te chu phur takin ka dawngsawng a, nghah ka nei.
Nghakhlel tak ka ni. Muangchang lo turin ka duh a, min khawihna te chuan min thlawh chhuahtir thei dawn dawn.
Thawmhnaw inbel reng kan nei tawh lo, ka mal tikauin a ke tlak zeh tirin, a mal chuan ka sensitive point a nawk nawk.
Ka hnute chu a changin a hmuam a, a leiin a hrual kual a. A changin a kutin a hrawm kual thul. A tawpah chuan, ka sensitive point thlengin a sâwk ṭan.
Hetiang ṭan hmasa loa puitlin vat ka duh ṭhin, nuam ka ti vak ngai lo bawk. Tun erawh, a dang, a nuam lutuk ringawt. Ka kham dawn loin ka hria.
Sammy-a ban bulah vuanin, min fawp pah a, duhthawh takin ka chhang. A sâwk rang tual tual a, thâwk a rangin min fawhna ka chhâng ṭha thei tawh lo.
Ka taksa danglam telh telhin, ka ke mar phutin, ka dang a ro hulh nghal.
Tui ka lam a, bottle chhin khat chauh min intir. Ka melh nghek a, "A ṭangkailo", a phun sup ringawt.
Min bawh ta ran, ka nghakhlel bawk a, ka za chuai chuai.
A lo innemkhalhna ka vuan, muangchangin a lut a, ka meng tal tap tap. A che ṭan a, ka awm hle hle thei lo, ka che sek.
Bawihbawihi a harh ka hlau tawh, insawnthlak nan hun a awm tawh bawk si lo.
Lo kun hniamin, "A harh lo ang, lungngai suh", a ti a. Ka ring hmiah. Kei aiin a duhthawh ta lutuk a, ka ngei dawn dawn.
Vawikhat dangin, a dang a hring zel.
"Puipui Baby", tia min koh chuan khum aṭanga nam thlak ka tum. Ṭha taka inkoh awm lo lutuk mai.
"Hmar hrangsie tih hi i inhmeh tual tual, ka va han phuah thiam tak", a ti a. A lawm ber berah a ṭang.
Nakinah, hming dang ka phuah sak ve ang.
Kar loah inthlan Result an puang, Party Office-ah a awm, kan nufain inah kan awm.
Point khat chauhin Serchhip Bialah a tling.
"Nu, ka pa a tling. A tling, a tling", tiin Freddy-a a au a. In chhungah a tlan kual zawr zawr.
Ka phone ri chhang thuaiin, "Chanchin thar i en em?", a rawn ti a. A âw a khûr.
"Lo haw vat rawh",
"Ka lo haw vat ang", a ti a.
Lal Fanu thlalak thlêk vang vangin, "I pa hi lawmpuina lo hlan ve rawh aw", ka rilruin ka ti a.
"Tunah chuan a dang tawh ang, Lal Fanu, buaina a awm tawh lo ang a, he Term hi kan hmang zo ngei bawk ang. Min lo ṭanpui dawn a ni tiraw?", rilruin ka be mawlh mawlh.
A pa MLA a nih lai khan buaina leh harsatna hrang hrangin min tlakbuak a, a tuar ve nasa em asin!
Sammy-a lo haw chu mit tui nen lo hmuakin, kan inkuah vawng vawng. Chhungkuain kan inkuah vawng vawng.
Phone call hmangin Hnahthiala ka pain Lawmthu sawi Ṭawngṭaina a rawn nei.
MLA mai ni lo, Education Minister-ah an la ruat zui. Minister Office a luahlum a ngai tawh dawn
"A mak lutuk", tih ṭawngkam hian a sawifiah zo lo.
Hmingin, "Minister Nupui te i ni vel a, i intithei e", min rawn ti duah. "Khatin min ti suh, min be ṭha hle ang che", ka ti vel a.
"Ka be chhe tawlh tawlh dawn che", a rawn ti a. Kan nui huah huah. A hahdamthlak ṭhin e.
Nu Papuii a rawn kal nal nal bawk, nu Papuii bianga mit tui luang chu a lem lo kher asin!
Manoi pawhin min lo bia, "Ka lawmpui lutuk che u. Sammy-a chuan a duhthusam a thleng zel e. Chhuanpui, i thlawpna zar vek a ni, thlawp tlat ang che aw",
"Kan lawm e. Nia, ka thlawp tlat zel dawn alawm",
"Thilpek ka lo thawn che, nangmah chauhin hawng rawh. Sammy-a leh midang hriattir miah suh aw", Manoi chuan a ti a.
Ni hnih hnuah ka dawng, Sammy-a a chhuak a, Siamtea te unau an lêng chhuak bawk.
Saranga intuam chu hawngin, hal hnu tih hriat tak, a kawm kang ral vek; chhiar tlak loa kang ral ti zawk teh ang, chutiang chu a ni.
Thlalak pakhat a inzep, ka han enchiang a, Vantawng Khawhthla bula Lungpui chunga hmeichhe naupang, Scool Uniform ha ṭhu hmel enchiang leh zelin, ka thau-ah min man!
Sammy-an ka thla a lak thu a sawi tawh kha. Thlalak pawh chu a chanve a kang, ka lang chiah chiah tih vel a ni.
Thlalak hnungah 'Puipui, bialpa nei rawh, pasal erawh lo nei suh' tih te hi a inziak.
Sammy-a kutziak ngei a ni.
Mit tuiin a far khum a, ka ṭhu ngawi reng. Sammy-a bula ka awm reng zawngin, ka la â thei tak tak ang mawle.
"In va reh ve, Chhuanpui?", Sammy-a âw ka hriat rualin sofa hnuaiah ka thukru a, Sammy-a chu ka va kuah.
"Chhuanpui, engtizia nge?",
"Ka lawm em a ni", mit tui kar aṭangin ka melh piau.
"Ṭah kher tur a ni hleinem",
"Aww, Sam, min han fawp teh", ṭhutthlengah min tlukpui a, thil awmzia min zawt.
"I duhthusam ram i thleng a, ka ngaihtuah hian ka duhthusam ram thleng veah ka inngai", a nui a.
Ka duhthusam ram thlengah ka inngai tak tak.
"Mak ka ti, MLA-a tling turin nasa takin ka bei a, tunah lem; kan ṭang nachungin awlsam taka kan tling thei hi mak ka ti. Point khat chauhin tling mah ila, a hmasa ai khan awlsam ka ti",
"Kawng i lo sial tawh alawm. Serchhip Bial mipui ten an rawng bawl turin min la duh tihna a ni a. An lungawina zâna hnathawh chu kan tihmakmawh a ni",
"I tidik e, ka Hmar Lalnu!".
Professor nupui niin hring nun ka chhiar tawh dawn emaw ka ti a. Politician nupui niin Hring nun ka chhiar leh dawn ta chu a nih hi.
Sammy-a pawh a buai leh ṭak ṭak, Education Minister nihna chu a namai lo khawp mai.
Buai taka a awm lai pawha, "Sammy, ka mut a chhuak", ka tih tawh chuan min pawm a, min kuah a, tichuan; he thu hian min âwi ta ṭhin, "Chhuanpui Darling, ka hmangaih che", tiin.
(Qoutes ziah tur ka hre lo!!! Dawhthei taka min nghah ṭhin avangin ka thinlung zawng zawngin lawmthu ka sawi a. Ka tihbeidawn ṭhin che u avangin in mi ngaihdamna ka dil bawk e. Arsenal Trophy chawi lo khan nun phung a tikhaihlak em a ni
)*** A Tawp Ta ***
Show post links
Top