Mikhual Hunter BY Vtei Zahau (Completed)

[ngaia]

Ngaihdami's P.O.V





"Engkim vâng khan ka lawm e, ṭawngkam chauh hi a tâwk lo em ni? A nih chuan ka taksa pawh hi i duh dan in i ti thei ang, mah se ka thil hriat chhuah te vâng khan ka ngaidam thei lo che, i bulah hian rei lo tê chauh pawh ka awm duh tawh lo" chu thil ka sawi laia ka mittui luang zawih zawih chu hruk pawh ka hru thei tawh lo, Zomuanpuia chuan mak min tih hmêl deuh in min en ngawih ngawih ringawt.








"Ngaihdam, awle kal lo tûrin ka ngen tawh lo ang che, a hmasa ah pawh i ti tawh tho a lawm tiraw ka rilru put hmang dik tak hre lo in i kal bo tawh a, tunah erawh haider chungin min kalsan leh dâwn a ni mai a, a vawikhat thlenna pawh a ni lo a, ka tuar thiam ang, min lo ngaihtuah suh" a ti a, za lo tih hriat lutuk hian a nui chhuak hawk a, a rui tih a hriat hle, chuan a thusawi kha engnge a awmzia ka hre lo hle bawk.









"Ka tibuai tawh lo ang che" bah nawk in a ti leh a, a in her a, muangchangin min hlat zawng chuan a kal a, dan chu ka duh mah se ka thei lo a ni, a tan a mi tling lo ber ka mi a, a kiangah chuan ka hlim dâwn a ni tih ka hria mah se a kianga hlim taka awm ka phu lo a ni.









Ka ruak ta vek niin ka in hriat, ka mittui a rawn luang nghal zawih zawih a, leiah chuan ṭhu sawp hnawk in Zomuanpuia'n ka thawm a hriat hlau tak si chuan ka hmui hup chung chuan ka ṭap khur ngat ngat, ka thinglung chu a phawrh chhuak ta daih ni awm tak hian a na a ni, a na lutuk chu awm ngaihna pawh ka hre lo, ka âwm chu ka chûm dawt dawt a, tih ngaihna ka hre lo.









"Duati i ṭha em? Bawihte" kapi chuan ka thawm a lo hria a ni mah na a rawn tlân chhuak a, min rawn kuah vat, kapi in min kuah takah phei ka ṭap uar sauh sauh, "Piii" tih bâk ka sawi thei lo la thinlung erawh chu a rûm vawng vawng thung, ni e ka hmangaih lutuk a ni, min kalsan lo tûrin ka duh bawk a, mah se min kalsan tûra ka siam a ngai bawk si, a kianga awm a hlîm tak leh thlamuang tak a awm kha ka la kham bik reng reng lo a sin.









Kapi chuan ka awmdan a thil awmzia a hriat vang chuan ka pindanah min luh pui nghal, "Duati naktukah haw kher a ngai em ni, ipa a rawn chhuah thut chuan i chunga a thil tih duh tur a hriat miah loh a nia" kapi chuan ka rilru lak pên a tum tih ka hria, "Pi ruahmanna ka siam fel vek tawh a lawm, dawihzep takin ka awm tawh dâwn lo, ka bei lêt ve zêl tawh ang" ka ti a, kapi hmelah chuan engmah ka chhiar thiam lo.









"Ka ngaihdân min zâwt a nih chuan Aizawla i chhuk hi rem ka ti lo bur mah se puitling i ni tawh a, i chungah thu neihna kan nei tawh si lo" kapi chuan khur dat in a ti a, "Pi, engnge maw i sawi le, chutiang lam a ni lo, hna te ka zawng ve a nga kan in hmuh leh meuh chuan mi hlawhtling tak ka ni tawh ang, chuan ka rawn haw leh a nga ka enkawl vek ang che u" nui lui var var chung chuan ka ti a, "Awle Awle, i nun uluk la, engkimah taima tak leh rim takin thawk zêl ang che, mah se hah lutuk chuan thawk lo la" a ti leh dap dap a, a nui a, a nuih erawh a za fahran ṭhin lo tih ka hria.







"Kan dam a nga Duati dam takin kan in hmu leh dâwn nia, i tân kan awm rêng tih hre reng ang che" kawngka ah chuan kapu a lo ding ve reng a ni tih a rawn ṭawng chhuah chuan kan hre ve ta chauh.







~~~~~~~~~~~~~~~~~~~~~~~~~~~~~~






Zomuanpuia's P.O.V







"Muanpui, i la mu em ni?" tiin zîng kar hma takah chuan U Bebeth-i'n ka pindan kawngka a rawn kik ri dat dat a, kei erawh ka khumah chuan bâng nghêng in ka lo la ṭhu reng thung, U Bebeth-i chu a rawn lût a, chutia ka ṭhu reng min hmuh chuan a phu deuh zawk niin ka hria.









"I mu lo em ni?" tiin ka bulah chuan a rawn ṭhu thla a, ṭawng ka a chhâng lo in ka lu ka thing nak ringawt, "Kan kal tawh dâwn a sin" a ti leh a ka chhang lo, "Enteh in buaina chu engpawh ni se tuna i beidawn san a nih chuan engtikah mah i nei lêt leh tawh lovang, theih tâwp chhuah a ka beih chauh in kan thil duh em em chu kan nei thei chauh a nia" a ti leh a, chu pawh chu ka chhâng chuang lo, a thusawi chu ka ngaithla liam mai mai a ni ber.







"A nih aw" a ti a, ka pindan chu a chhuahsan ta nghal a, ka lu na bûr vang chuan ka khumah chuan ka mu ṭha a, ka mit chu ka chhing ta vâng vâng, nia nizân khan chhin khat pawh ka chhing lo, ka ruih zawng zawng kha a bo ta vek niin ka hria a, ka rilru hi a na hle a ni tih chauh ka hria.









Chutia ka mu chu ka lo muhil a ni ngei ang, ka phone ri vang chuan ka harh a, harh chiang mang lo deuh chuan ka la a, "Hello, Zomuanpuia a ni em?" a aw chu ka hriat hnu a ni mah se ka hrechhuak thei mai lo, "Ni e" tih te in ka chhang a, in tih harh tum in ka ṭhu chhuak ta bawk, "Keimah Rsa a tih takah chuan ka harh chiang ta hle.









"Ngaihdami pa in khuaa lo kal a tum a" a tih chuan ka nui chhuak hawk, "Thu at thlâk tak a nih kha i sawi, Jail ah a awm daih a lawm" ka ti a, Rsa chuan, "Aih a awm lo, a chhuah dân ka hre bik lo mah se tukin ah a rawn kal a, in khaw lama Ngaihdami a awm ṭhu leh a ram lehkha a chhuk sak tur thu te a sawi a, kanu hnênab ngaihdam a dil bawk a" a ti leh a, ka ding chhuak nghal zawk.








"Tûnah khawiah nge a awm?" ka ti hrawk a, ka aw ki a ring ta deuh a niang rang takin kanu ka pindanah a rawn tlân lût nghal a, "Ka hre bik lo, mah se Duati chungah a thinrim hle a ni" a ti a, kan in biakna chu ka ti tawp ta daih, "Nu, Aizawl an thleng tawh em?" ka ti ringawt a, ka in siam nghal sawk sawk, "An thleng ṭêp tinge?" kanu hmelah chuan hlauhthawnna ka hmu nghal, "Call rawh, nu Ngaihdami pa Jail aṭangin a chhuak a, Ngaihdami a zawng bawk" ka ti a, keimah pawh in Ngaihdami chu ka call ve nghal a, kanu in U Bebeth-i a call ve bawk, mah se tu zawk mah chu kan call tlang thei lo.








"Nu lo biak tum char char rawh aw, ka zui dâwn" ka ti a, kanu pawh chuan sawi tur a hre lo, ka bag ka la a chahbi nen Aizawl lam pan tur chuan ka chhuak nghal a, ka kal kawngah chuan Hruaia ka tâwk bawk, kekawr bûl leh TShirt nen chauh a awm chung chuan, "Bawiha zawhna in zawh hun a ni lo a nia, lo lawn rawh" ka ti ngawt a, a bulah chuan ka bike ka ti ding nghal, ni e pakhat ai chuan pahnih thil tih theih chu a ṭha zawk ngei ang.










A ni pawh chuan zawhna min zâwt buai lo chuan a rawn chuang ve mai bawk a, ka tlân chhuak leh ta nghal, ka bike pawh chu ka khalh muang zawk zawk lo, "Bawiha khawnge kan kal dawn" khua kan chhuahsan hlat tak viau ah chuan Hruaia chuan thil min zâwt ve ta chauh, "Aizawlah" tih ringawt in ka chhang a, "Enga?!!!!!! Hey, kekawr bûl leh chapal nen hian Aizawlah min hruai i tum a maw?" a ti vak a, a lungawi lo hle tih ka hria.








"Min zâwt bik hleinem" ka lo ti ve leh bawk, "Zawhna in zawh hun a ni lo i ti a nih kha" a lo ti ve hlur bawk, "Kekawr tlawn ka pai a lawm i in thlâk mai dâwn nia" ka tih takah chuan a ngawih ve ta hram a, chak tak chuan Aizawl lam chu kan pan nghal.










Ngaihdami's P O.V








Aizawl kan lût ṭêp tawh a, ka bulah chuan U Bebeth-i chu min nghêng ar ar in a muthlu a, kei erawh ka muthlu ve thei lo thung, ka rilruah chuan ngaihtuah ka ngah em a, ka muthlu thei lo a ni, eng thil nge ka tih anga, engtinnge ka nun ka chhunzawm ang tih te thleng chuan ka ngaihtuah a, ka mitthlaah lah Zomuanpuia bak a lang thei si lo.









Nia theihnghilh tur chuan hun pawh ka duh ngei ang, ka thei ngei bawk ang.








Aizawl kan luh takah chuan phone ah pawh signal a rawn lêt ve leh tawh tih hriat tak chuan ka phone chu a rawn ri deuh sek a, ka en a, Zomuanpuia call hlir a lo ni, ka call lêt duh lem lo, zu a in ṭeuh a nga a rui phur in min rawn call ah ka ngai mai.








"U Bebeth kan chhukna tur kan thleng tawh dâwn a nia" tiin U Bebeth-i chu ka kaitho a, Sumo aṭanga kan chhuk hnuah Taxi kan la leh a, U Bebeth-i chuan kan in thleng min thlah a duh tlat vang chuan min zui haw ta nge nge a, in kan thleng chu Tala lianpui in a lo in kalh bur mai, chahbi kapa in a dahna tur ni a ka rin thenawm te in lam chu ka pan vat a, rin ang ngeiin a lo awm bawk.









U Bebeth-i nen chuan kan inchhungah chuan kan lut a, rin aiin a lo fai rei tak awm bo san tih a hriat miah loh chu mak ka ti ve reng, ṭhenawm te lah khan engmah an sawi bawk si lo a.








Zomuanpuia's P.O.V







Kan tlan chak bawk a, Aizawl pawh chu kan thleng har lo, "Bawiha engnge kan tih dâwn rêng rêng, Ngaihdami te kan um zui em ni?" Hruaia chuan a ti leh a, "A ni ber mai" ka ti ringawt, "Sawi chiang la" a tih leh takah chuan, "Engtin tin emaw Ngaihdami pa Jail aṭangin a chhuak a, Ngaihdami a zawng bawk, Ngaihdami Aizawlah a haw leh hman si a, kan be tlang thei bawk si lo" ka ti zung zung a, Hruaia pawh chuan sawi tur a nei tawh lo a ni mah na a ngawi ta tawp.









U Bebeth-i te in lam chu kan pan hmasa a, an in kawt kan thleng chiah tihah Taxi in U Bebeth-i chu a rawn thleng ve chiah bawk, "Khawnge Ngaihdami" min hmu ringawt pawh mak a tih tawh nak laiin ka zawhna vang chuan mak a ti zual hle tih ka hria, "Hmanhmawh in, khawnge Ngaihdami chu" ka ti leh a, U Bebeth-i pawh a harh zawk, "An in ah, ka rawn kalsan chiah a" a ti bah nawk a, "Taxi-ah khan lut leh rawh kan lo zui ang che u, Ngaihdami te inah lêt leh a ngai" ka ti a, U Bebeth-i chuan "Engnge thil awmzia sawi phawt teh, ngatinge hetah in awm, Ngaihdami chungah engnge thleng" a ti a, rilru hmanhmawh tawh nen ka in sûm zo tawh lo.










"Lût vat la in lo kalna lamah khan lêt leh rawh u, Ngaihdami dinhmun a ṭha lo" Ka ti tuar a, U Bebeth-i pawh chu pa hamhaih ang reng deuh chungin ka sawi ang chuan a ti a, Taxi chu kan zui ve ta zêl a, a lo hla lem lo, "Kapu khawngaih in Police lo ko ta che" ti a Taxi driver chu thu chah in Ngaihdami te in lam chu kan pan a, U Bebeth-i chu Hruaia chuan ka thil hrilh ang ang chu a hrilh chhawng ve leh a, Ngaihdami te in bul kan thlen chuan thawm duhawm loh zet kan hria.








"Dawih zêp takin ka awm tawh dâwn bik lo, i fanu dik tak ka ni a, mah se chu pawh chu i ring lo a, kanu min thah sak in kum kha leh chen kha hreawm takin min siam tawh bawk, ka nun a chhiat vek nachhan hi nangmah i ni" Ngaihdami aw ngei mai chuan vin zet chuan a ti a, kan hmanhmawh zual sawt.









"Hmeli mai mai a che chutiang te a min tih vel chu le" apa chuan tiin kan va hmu thei tawh a, Ngaihdami ben tum chuan a kut a lek uaih a, ka va tlân vat a, Ngaihdami pa chu ka phih lêt nawk.







"Ka rin aia in thil i ti thei daih mai" tiin Ngaihdami hmaah chuan ka va ding a, ka hmel a hmuh chuan za lo deuh hian a nui, "Nang tê hi i in rawlh lohna tur ah i in rawlh hnem ta viau mai, kan chhûngkaw thu ah hian lo in rawlh ve tawh suh" a ti ṭhawt a, khawih chu min khawih ngam êm lo, "A hma khan Police bulah case ka file duh lo a, mah se min rawn tihbuai zêl dâwn ai chuan ka tân tîr mai ang che, i damchhung in i tang tawh ang, kanu i thah vanga i hremna hmuh tur hi i hmu ngei tawh ang" Ngaihdami chuan ka hmaa rawn din pah chuan a ti ve leh a.








"Nang hmeichhe zakthei lo lutuk ipa hian kum engzat nge ka châwm tawh che i hria em?" a ti ṭhawt a, engtik laia a ban hman nge ka hre lo, Rod bung lian zet chu a rawn lek chhuak a, chutia a chet chu tumah in kan ring lo bawk nen a rod ken chu lu zawn velah a rawn vai fua a, Ngaihdami chu pawt sawn in ka hnunglamah ka pawt a, ka lu chu a rawn ri bur a, ka thil hmuh engkim chu a phe ta vek, "Zomuanpui" Ngaihdami'n a ti ṭhawt chu ka hria a, a bâk engmah ka hre zui ta lo.








Ngaihdami's P.O.V







"Zomuanpui" ti ṭhawt in a tlu tur chu thei leh thei lo in ka lo dawm a, a lu aṭang chuan thisen a rawn chhuak nghal puat puat bawk, "Zomuanpui" chu bak ka sawi thei lo, Hruaia chuan a rawn buaipui ve nghal bawk, "Bawiha Bawiha harh teh, hey Bawiha in ti harh teh, Ambulance ko vat rawh u" Hruaia chu a au tuar tuar a, kei erawh ka che thei lo a, ṭawng nachâng pawh ka hre lo, ka mal chu a thisen nen a in chiah piah nuah Zomuanpuia chu ka en tlawk tlawk ringawt.









Kan thawm a rin tak deuhah chuan ṭhenawm khawveng te pawh an lo kal khâwm thuai a, kapa erawh hmuh tur a lo awm tawh hauh lo thung, rei lo teah Police an rawn thleng a, Zomuanpuia chu a rang thei ang ber in damdawiin ah kan hruai ta nghal a, an hnungah Taxi in kan zui ve bawk.









Damdawiin kan thlen hnuah chuan Doctor ten Zomuanpuia chu OT ah an nawr lût a, pawnah chuan engmah tih tur hre lo in ka vei kual sek a, awm ngaihna ka hre lo, ka kawra thisen kai nuai te pawh chu tih fai pawh ka tum lem chuang lo a.










"Nula na i nei em? Thisen i va kai nasa ve" tiin Nurse pakhat chuan min lo hnaih a, U Bebeth-i leh Hruaia pawh chuan min lo en ve vat bawk, "Ka engmah a na lo" ka lo ti nghat a, Nurse chuan, "Ka lo en dik hrim hrim ang che, thisen i kai nasa emai" ti a min kal pui a tum chuan "Na ka nei lo ka tih chu maw le" ka ti tuar a, Nurse pawh chuan min melh ran ran chungin min kalsan ta daih a.








Keini pathum chu in hnem thei emaw pawh chu kan awm lo, rei lo te ah Zomuanpuia nu leh pa leh kapi leh pu te pawh an lo thlenga tumah chu biak pawh ka tum lo, "Nangmah vang vek a ni, engkim hi nangmah vang vek, a ngaihtuah vang che in a lo kal a sin" ti a ṭap hawm hawm in Zomuanpuia nu chuan min rawn pan a, ka ke bulah chuan a rawn ṭhu thla hnawk a, Zomuanpuia pa chuan a rawn kuah vat, "Duati a rilru a mumal lo a nih hi a thusawi kha engah mah ngai suh aw" a rawn ti mawlh mawlh thung.






Keipawh chu ka in sûm zo ta lo, Zomuanpuia nu bulah chuan ṭhu thla ve in ka ṭap chhuak ve ta hawk hawk a, a dik a ni keima thiam loh vek a ni, a call ka hmuh te khan lo call lêt ila chu hetiang thil hi a thleng miah lo tur.










Chutia kan lo ṭhut tlawk tlawk hlawm lai chuan Doctor chu a rawn chhuak a, "A ṭha vak lo, a hmel erawh in hmu thei ang, pahnih kha va lût rawh u" a rawn ti a, Zomuanpuia pa chuan, "Ṭhiani, Duati nen khân lût rawh u" a ti a, Mah se Zomuanpuia nu chuan, "Ni lo e, helai thleng a tlanchhiat san a, ka fapa rilru ti na tu leh tun dinhmun thlen tîr tu hian ka fapa a hmu thei hauh lo ang" tiin Zomuanpuia nu chu a mah in a lût a, vui thei ka ni lo, a sawi kha a dik vek.








"Bawihte, inu kha a la mangang a nih kha" tiin kapi chuan min rawn kuah a, ṭap pawh ka ṭap ngam tawh lo, ka hmui chu ka pet fan fan ringawt, mah se rei lo te ah Zomuanpuia nu chu a rawn chhuak leh a, min rawn melh vang vang in, "Tun dinhmun a thlen hnuah pawh nangmah tho a ni a la lam che, ka fapa chungah hian engnge thleng ta leee" tiin Zomuanpuia nu chu a rawn ṭap chhuak leh hawk a, anpa chuan lo kuah vat pah hian "Duati va lût rawh" damdap in a rawn ti thung.







Muangchang chuan ka pên lût a, Zomuanpuia hmel ka hmuh chuan ka in sûm thei lo, a lu chu an lo tuam var lûk a, a harh chiang lo tih hriat deuh chuan a meng a ruai bawk a, oxygen an pe bawk, "Engvangin nge i rawn kal a" tiin a bulah chuan ka ṭhu thla a, a kut chu a vuan vat, "Keimah vang vek a ni, kapa kha ka chhaih kawlh a, khatiang khan ti lo ila chuannn" ka ti a, ka sawi zawm thei tawh lo, ka ṭap chhuak hawk hawk a, Zomuanpuia chuan thei leh thei lo in ka mittui chu a rawn hru a, "Ka lo nghâk reng ang che" zawi tê chuan a ti a, thâwk leh khatah a âwm chu rawn sep dawrh dawrh in a thaw kawk kawk a, a zawi ta vek.






"Zomuanpui, Zomuanpui, hey harh teh, Zomuanpui, hey Zomuanpui harh tehhh" tiin ka sawi dat dat a, hmanhmawh takin Doctor leh Nurse te an rawn tlân lût a, Nurse pakhat chuan min nawr chhuak ta dawt dawt a, Hruaia chuan min lo kuah bet vat.










"Nilo a ni thei lo, min thlah teh, Hruaia min thlah teh, ka hmangaih thu pawh ka la hrilh hman hleinem, Hruaia min thlah teh" tiin ka au chiam chiam a, aw rawl chhuah meuh in ka ṭap bawk, ka hmangaih thu pawh ka la hrilh hman lo a ni, ka huat loh thu takngial pawh ka la hrilh hman lo, "Zomuanpui, tho teh, Zomuanpui" ka ti tuar tuar a, hmeichhe ho chu tumah kan in sûm thei lo.








Doctor chu a rawn chhuak a, "A pawi ka ti khawp mai, mihring kan in chan zo ta lo a ni" a rawn ti a nih chu, ka khawvel hi a tâwp ta vek ni mai hian ka hria.








~~~~~~~~~~~~~~~~~~~~~~~~~~~~~~









Zomuanpuia kuang bulah chuan ka ṭhu a, engmah ka sawi lo a, ka ei in ka in thei hek lo, mi aaa ang mai ka ni, ka ṭap chhuak thei lo bawk, Zomuanpuia hmai duk vek tawh chu ka melh tlawk tlawk ringawt a, Pastor chuan a vui zo a, Zomuanpuia kuang rawn chhin an tum chiah chu ka harh chhuak zawk, "Zomuanpui, tho teh, Zomuanpui lei hnuaiah an dah daih dâwn che a nia aw, tho tawh teh, Zomuanpui, khawngaihin tho tehhhhh, khawngaih takin tho tehh, lei hnuaiah an phûm dâwn che a nia, ka tuar zo lo ang, Zomuanpui khawngaihin tho teh" tiin ka ṭap chhuak hawk hawk a, tu emaw hian a awmah nghet zetin min rawn kuah bet a, aw rawl chhuah meuh chuan ka ṭap chhuak leh, ka phal thei lo a ni.








Thlanmuala ka zui ve pawh min rem tih sak lo a, Hruaia chuan min zui kual reng a ni ber e, tu te pawn thil at thlâk tak ka tih mai an hlau a ni, ka lo tih tawh ang khan, mah se chutiang thil tih duhna chu ka rilruah a lang hauh lo thung.








"Zomuanpuia khan a vawihnih nân min kalsan leh dâwn a ti a, kha thil kha engnge a awmzia" Zomuanpuia te in kawtah chuan kan ṭhu a, thlana kal ho an la rawn lêt lo, "Sawi rem a ti angem aw" tiin Hruaia chu a ṭhen sak a, van lam a hawi leh vang vang hnu chuan, "Têt lai aṭangin Zomuanpuia hian a at chilh che a lawm" a tih takah chuan za lo zet hian ka nui chhuak a, ka awih lo hle.







"Tak tak a lawm, a hrilh ngam si lo che a, midang nen in awm dûn te khan a thinrim ṭhin a, chuvângin a chhaih vak vak zêl che a, mah se midangin an chhaih ve thung che chuan kan sual rawn hrep ṭhin" a ti a, Hruaia thusawi ka hriat chuan awih har ka ti a, mah se tun ang hunah dawt a sawi ka ring si lo, "Tak tak a ni em" ka ti bah nak a, "Khang hun chhûng zawng khan a nghak char char che a sin, hmeichhe dang ngaizawng ṭhin mah se theihnghilh nân che a a tih a ni, mah se a thei chuang lo a" a ti leh a, ka in rin hma hauh in ka mittui chu a rawn tla leh.







"Engvangin nge tûnah chauh min hrilh a" ka ti a, Hruaia chuan min rawn en vat a, ka ṭap leh tawh tih a hmuh vang chuan min rawn kuah leh, "Khawngaihin ka ṭhianpa kha ngaidam rawh aw" a rawn ti a, ka sam chu ka ṭhâm ngawt ngawt a, "Ka haw lo" lawi rat chuan ka ti a, thlanmual lam pan chuan ka tlân ta chiam a, ka hnungah Hruaia chuan min rawn ûm zui vat bawk, thlan aṭanga lo lêt mek te nên chuan kan in tâwk a, min lo en haw haw hlawm a, mah se engah mah ka ngai lo.






Thlanmual chu ka thleng a, kanu thlan bula thlan thar tak ka hmuh takah chuan ka ding chawt, thlan lung te reuh te ah chuan Zomuanpuia tih chu a lo in ziak vah bawk a, rang tak chuan ka va tlân a, lei chu ka kut chuan ka hai ta chiam a, thlan lai la haw lo tlem lo la awm ho chuan min lo dang vat.









"Min thlah rawh u, rawn harh leh ta se a mangang lutuk dâwn a sin" ka ti a, ka tal chiam chiam a, "Zomuanpui, lo chhuak teh, lo chhuak rawh khawngaihin, Nu khawngaihin lo hruai lêt teh" tiin kanu thlan chu ka va en leh a, chutih lai chuan Hruaia chu a rawn thleng a min lo man bet a hmuh chuan, "Thlah ru, keima'n ka lo buaipui ange" a ti a, Hruaia chuan min rawn vuan a, ka kut lei kai nuah tawh chuan Hruaia kawr chu ka lo ṭhâm tawn tawn a, "Hruaia, lei hi min hai pui teh Zomuanpuia an phûm daih a nia, lo harh leh ta se, Hruaia" tiin ka ṭap vak vak a, ka kawchhung hi an phawrh darh vek ni mai hian ka hria, chutia ka awm lai chuan engkim chu a rawn thim ta hmuk a engmah ka hriat zawm tawh lo








~~~~~~~~~~~~~~~~~~~~~~~~~~~~~~






Ka harh leh chuan ka bulah Zomuanpuia nu a lo ṭhu reng a, mittui tling piau in min lo en, "Duati" tiin lawm zet chuan min lo kuah vawng vawng a, "Duati engkim hi kan pawmthiam mai a ngai tawh a ni, a la dama te hi kan pawimawh ber si a" a ti a, engmah ka sawi ve lo mi aaa ang maiin bang chu ka en tlawk tlawk ringawt.






2 Years later.






Inkhawm kawr nen kan in chu ka chhuah san a, pawn a min lo nghâk reng tu hmel ka hmuh chuan ka nui var var a, "Ngaihdam, i mawi lutuk" a ti sup a, kei pawh chuan nui var var chung in, "Zomuanpui, min lo nghâk rei tawh em?" tiin ka chhang lêt ve bawk a, mah se ka hmuh lai ngei chuan hlim hmêl tak pu chung chuan a thâm ral leh ta daih a ni.







Awih a la harsa khawp mai, Zomuanpuia kha he khawvelah a awm ve tawh lo a ni tih hi engtik an mah ka pawm thiam hian ka ring lo, ding lam a ka in hêr in ka hre chhuak a, vei lama ka in her pawh in a mah bawk rilruah a rawn thar a, hnuai lam leh chung lam ka en pawh in a ni lo chu thinlung ah an lang thei lo a ni.






"Duati kal ila" ti a Hruaia'n min koh tak vang chuan ka harh zawk a, "Tukin chu i va ṭang ve" nui ṭha chuan a lo ti a, "Nia" tih ringawt chuan ka lo chhang a, Biakin lam chu kan pan ta nghal a, inkhawm kan ban veleh Thlanah kan kal lehnghal, nia vawiin Zomuanpuia awm loh cham a ni a, engkim chuan a mah min ngaih zual tîr takzet a ni.









"Ka in nghah rei tîr lutuk che vang in min ngaidam ang che" a thlân nghêng chuan ka ṭhu vang vang a, Hruaia erawh a lo in thiarfihlim rih thung, "I hmeichhe nghah char char kha ka ni tih hria ila chuan i kianga awm kha ka thlang ngei ang" min chhang thei lo tih ka hria, mah se ka rilru a pai ngut ngut ai chuan hetia a thlan lung mai mai biak pawh hian min ti thâwl ve huai ṭhin.








Thih kha ka duh hle ṭhin a, vawi tam tak keimah ka in tina fo bawk, mah se kei ni lo in Zomuanpuia a thi a, a ni chuan dam a thlahlel em em a, mah se a ni ni lo in kei ka dam thung, remruat tu remruat dân hi hriatthiam a har ka ti ṭhin, eng chiah hi nge min zirtir a duh ang lee ti te pawn ka ngaihtuah ve ta fo mai.











Kapa pa pawh kha Police in an man tawh a, Zomuanpuia leh kanu thah thubuai awrh tîr a ni a, dam chhung ṭang tûrin a chung thu rêl sak a ni, kapa a nih vangin a thil sual tih thup sak tûrin min beisei a, mah se ka thei lo a ni, kapa ni mah se ka hmangaih te min lâksak tu a ni a, hremna chu a hmuh ve ngei a ngai a ni.









Ka thil tawn aṭang hian thil tam tak hriat chhuah ka nei a, ṭhenkhat fe chuan an nunah harsatna leh buaina tam tak an tawh hnuah an tan kawl a eng a, an nun ah hlimna a thleng fo ṭhin mah se ṭhenkhat keimah ang chi ho hi kan awm ve leh a, harsatna kan tâwk a, kan hlim ve leh ṭan dawn chauh tihah kan hlimna tur chu chhuh sak in kan awm leh a, ni e, mah ni chan a nih hi chuan a chhe ber a ngaih hi awl tak a ni, mah se keini aia chhan chhe zawk te hi an lo la awm ve leh tho a ni tih hi hriat tlat a ṭha a ni a.





~~~~~~~~~~~~~~~~~~~~~~~~~~~~~~







"I hna kha dah tawh la, hei eitur hi lo ei ve phawt rawh le" Zomuanpuia nu chuan dawhkanah eitur a rawn chhawp nual a, ka in thlahrung ang reng hle, "A ngai lo a sin le, ka rol pawh a ṭam teh chiam lo a" tiin in thlahrung ru ang reng tak chuan a bulah chuan ka va ṭhu a, "Duati, in enkawl ṭha rawh i taksa te pawh an chhe sâwt teh a nia" tiin ka sam chu a chûl deuh hliau hliau a, tûnah chuan a hnuaiah hna ṭha tak ka thawk tawh a, lungkham em em pawh ka nei tawh lo.







"Chuan mipa te hi melh ve leh ṭan tawh rawh, tiang ringawt chuan i leng tar thei mai ang, hun hi a kal chak si a, tun ang reng a i awm chuan kawp pui nei lo in i leng tlang mai ang tih ka hlau a ni, bakah kum hnih lai a liam tawh a" a ti leh a, "Nu min ngaihtuah vak duh suh, keichu ka ṭha a lawm" ti ringawt in ka chhang a, a duh khawp chiah lo hle.





"Nakinah kan sawi leh dâwn nia, tûnah chuan hna buaipui lai ka ngah lutuk" ka tih zawm leh a ka dawhkân lam chu ka pan leh ta daih a, tih ngaihna hriat loh hmel fe chuan min en tawp.




Zomuanpuia thlânlung nghêng chuan ka ṭhu leh ran tawh a, nitin in ka la kal ziah a ni, "Nangpawh in kha leh chen min nghak a, i thinlungah tu dang mah an leng ngai lo ang khan tunṭum chu ka lo nghâk ve thung tawh ang che, hreawm chhûng rei deuh dâwn mah se I duh ang ngei khan rei tak ka dam ang tih ka tiam a che, ka kiangah hian i awm reng a ni tih ka hria a, hmu thei lo che in khawih thei lo che mah ila ka hmangaih reng tho ang che.








Zomuanpui, ka hmangaih che".







A TAWP TA......


Show post links
Top