ZOSANGZUALA BY Becca Lnz (Completed)

[Rebec Nunziri]

Chapter-34



Zorinsangi POV



Kan in then vang hian kan in haw hlen dawn tihna a nilo a, in then mahila in zawmna kan la nei reng dawn, chuchu kan fanu hi a ni a, kan tih danglam theih loh thil a ni bawk, ka chunga a thiltih tawh zawng zawng avang te pawh khan ka la ngaidam hauh lo, mahse hun a kal anga, ka la ngaidam thei em em ang tih ka hria, mahse tunah rih chuan nilo, kha ka natna te kha nimin ang maia chiang in ka la hrechiang miau a, chuvang chuan thinlung taka ka sawi theih hma chu ka ngaihdam thu ka la sawi hauh lo bawk.




Hmalam pan nan chuan hun a la kal tam lo em a, chuvang a hetianga awm pawh hi a ni tih ka hai lo, hun hi han kal ve deuh se a nun pangai ang khan a hmang leh vat thei dawn tih pawh ka hria, keipawh chutiang bawk in hmalam ka pan a ngai a ni, Zosangzuala hi ka theihnghilh thei ngai dawn lo, kaa mipa hmangaih hmasak ber a ni a, eng ang pawn theihnghilh tum mahila ka thei ngai dawn lo tih ka chian em avangin amah hre reng chunga hmalam pan ka tum tlat a ni.




Room atang chuan ka chhuak ta miah lova, ka fanu chu khumah mut tirin a bulah chuan ka mu ve a, ka en ning theilo, naute en tura rawn kal te chu an rawn lut leh pheuh pheuh zel a, thenawm khawveng te hi an fel em a, ka fanu tan thil pek an rawn keng deuh fur bawk a, an mi duhsak na zozai ah hian ka lawm takzet a ni, nakin ah hun remchang awm hunah pangai zawk a lawmthu sawi ka ba a ni.




Chaw ei an rawt tak avangin ka tho chhuak a, Bawihtei a mutui bawk nen room ah chuan ka kalsan a, kawngka erawh ka khar nghet duh lo thung, ka thiante pawh an rawn thlen atang rawng an bawl ve nghal mawlh mawlh a, in biak na mumal pawh kan la nei lo, chaw kan ei dawn chuan ka pa in hun serh a hmang a, bible chang te a chhiar zawh hnuah thu dang a sawi leh a, "Nghaka nen hian kan lo sawi dun tawh a, kan tunu hming atan hian a nu leh pa te hming chawi in Lalrinzuali tih sak kan duh a, in ngaihdan te han sawi ula" a ti dap dap a.




"A tha mai alawm, a nalh lutuk" midang in an lo tih takah chuan ka fanu hnung atan chuan Lalrinzuali tih chu an phuah fel ta a, keipawn mawi ka ti khawp mai, chaw te kan ei a, midang aiin ka ei hma a, ka nu te erawh in an la ei lo thung, chaw ei kan siam laiin Bawihtei a rawn harh bawk nen ka nu ten an pawm a, chaw chu ka ei sawk sawk a, ka ei tam ngang mai, damdawi in a ka awm chhung zawng khan ka ka a tui loh em avangin ka ei tam ngailo a, bakah ka fanu in ka hnute a ring tawh dawn bawk nen thil ei that ka mamawh.




Thla hial a liam leh tawh, Pathian zar ah ka fanu pawh a fel em em a, zan mut theih loh hi kan la nei lo, thlakhat chiah a la nih vang pawh a ni maithei, mahse tah te hi a tap ngai lo, a fel em em a, a pa ang chiah in a mitmeng a fiah kal bawk a, hnute ka pek lai te hian min en ve kar zel, min la hmu pha lo maithei a, mahse ka mita chiang zet a min en hi chuan ka hlim veng veng thin, ka rai lai khan ka naute a rawn pian hunah chuan ka hlim ve tak tak tawh ang ka tih thin kha a thleng dik chho mek chu a nih hi.




Prof. Sangzuala te chhungkua pawh an rawn kal reng a, a bikin Prof. Sangzuala hna a kal na chhung leh zan mut dawn ah lo chuan kan inah a awm deuh chawt a, kan fanu hi a atchilh zia sawi hranpa a ngailo, keipawh hian ka atchilh em em a, a awmdan ka hriatthiam pui avang hian ka khap duh lem lo, a la hlim chhawn ve em bawk a, chutih rual in thenawm khawveng te mitmei erawh ven a ngai viau thung, fel hlawm em em mahse ngaihdan maksak pu tawk hi an awm lo thei thin silo a.




Zan lamah chuan Prof. Sangzuala chu a rawn leng leh a, ngai ah ka nei tawh, room a kan lo awm lai a ni bawk nen ka nu in min rawn ko a, Bawihtei pawh a harh tha bawk a, pawm in ka chhuah pui vat, "Kha a pa kha pawm tir ve rawh, vawin nileng in a la hmu bawk silo a, a ngai ve ang" ka nu in a lo tih avang chuan Prof. Sangzuala hnenah a fanu chu ka hlan a, a awi nghal durh durh mai, a mah a lian bawk nen a fanu nen an in pawm hi chu hmuhnawm tham hi a tling takzet.




Prof. Sangzuala chuan min rawn en leh zeuh zeuh a zel a, sawi tur nei a ang ka ti, mahse ka zat duh kher chuanglo, "Bawihi i nu nen hian Zosanga nu te inah kan va leng phei ve ange, tikhan lo awm mai rawh u aw, kan rei lovang" ka pa in a tih chuan ka en nghal vat a, Prof. Sangzuala leh kan fanu nen chauh a awm chu ka duh lo a sin le, sawi chi la a ni der silo a, ka pa te chu an in zui chhuak a, sawi tur a vang ang reng bawk nen kan ngawi chawt chawt ringawt..




"Karleh lamah Remsangi chung thu an rel dawn a, i kal duh kher loh pawn a pawi lo a nia, mahse hre ve hrim hrim la ka duh a ni" a rawn ti chhuak sup a, "A nihchu, ka kal ve ang, khatiang khawp khan buaina min siam sak a, a chung thu an rel laiin ka awm ve ngei duh a ni" ka tih chuan a bu nghut, kan ngawi leh vang vang a, ka mut a chhuak ru riau lehnghal, chutah Bawihtei chu uar em em mai hian a rawn tap a, an pafa thutna lamah chuan ka va kal hnai vat.




"Bawihte, tap tawh suh le, i ril a tam em ni?" tiin ka hnute chu hnek tir ka tum a, a duh reng reng lo, hetiang em em hian a la tap uar ngai silo a, "Ngatinge le?" ka mangang tan der, "Khawi ka lo awi ang, a tap satliah mai mai pawh a ni thei a" tiin Prof. Sangzuala chuan min rawn lak sak leh a, mahse chutiang chu a niin ka hrelo, nidang ah tap ve fo mahse hetiang em em hian a tap ngailo, eng emaw na a nei pawh a ni maithei.




"Damdawi inah kan kalpui mai dawn mi, hetiang hian a la awm ngailo reng reng a nia" ka ti a, "A tha alawm, a rang lama damdawi in kal pui vat chu a ngai a ni" Prof. Sangzuala pawh chu a hlauthawng tih a aw ah chuan ka hre thei, kan chhungte pawh hrilh lem lo chuan damdawi in lamah kan kal a, doctor te chuan ka fanu chu an en dik vat, a tap nasa tawh bawk nen a zawi vek tawh a, ka hlauthawng lutuk chu ka tha a khur der der thei.




"Hlauthawng suh, engkim a tha leh vek ang tih ka tiam a che" Prof. Sangzuala chuan min hnem tum takin a rawn ti a, mahse a ni pawh a hlauthawng tih ka hai lo, "Kan chhungte engmah kan hrilh silo a, kan hrilh ve lawk ange" tiin a kalsawn deuh a, kan fanu an check na lam chu ka en reng, "Midang te pawh an rawn thleng har lovang, an lo kal nghal tur thu an sawi kha" tiin ka bulah chuan a rawn thu thla a.




"Engkim a tha leh vek ang tiraw, mahse tinge an va rei em em ve, kan fnu chungah hian thil ṭhalo a thleng a ni thei mai angem?" ka ti sawk sawk a, an sawi thin nu te hi chu an date chungchang a ni tawh phawt chuan an hlauthawng hma thei hle an tih thin kha, a tak ngeiin ka tawng mek a ni, hetiang em em hian ka hlauthawng hma ngailo, mahse ka fanu chanchin a ni tlat, khatiang a a awm thut chhan lah kha ka hre silo a, nausen mai a la ni bawk nen thla kim lova piang a nih vangin eng emaw natna a lo nei a ni mai angem tih thleng chuan ka ngaihtuah a.




Kan chhungte pawh an rawn thleng vat a, thil thlen dan min zawh chuan chhan pawh ka chhang theilo, Prof. Sangzuala zawk chuan a lo hrilh nghal zung zung a, doctor pawh a rawn chhuak ta a, kan kal hnaih vat, "A pum a lawng nasa lutuk a, engvang nge hriat a har khawp mai, a nu hnute tui bak rin a la nei silo a, i hnute tui ah hian harsat na a awm pawh a ni maithei, test turin kan lak a ngai dawn a ni, nurse hi lo zuk ta che" a tih chuan ka zui vat a.




Doctor leh nurse te an fel bawk a, min buaipui zung zung mai, ka hnute tui ah chuan buai na a lo awm ngei a, ka hnute tui a thur thu leh chichu ka fanu nausen pum la no tak tana a hlauhawm thu an sawi chuan ka nghing lawih ni ber hian ka hria, "Kan hre chhuak hma hlauh a engkim a tha leh vat mai ang, chutih rual in a pum a la no kan tih tawh kha, damdawi inah hian reilote chu in la awm a ngaih ka ring" doctor chuan a ti leh zung zung a.




Ka fanu chu naupang ward pangai ah an dah a, midang pawh an awm ve nual, ka fanu anga nausen erawh hi chu an awm chiah tawh lo thung, hlauhthawn awm em em a nilo chu kan lawm tlang hle a, chutih rual in keimah vanga hetianga awm a ni tih ka hriat hian ka in thiamlo takzet a ni, lo hre chhuak har ni ta phei ila chu ka fanu hi engtinge a awm ang, chutiang thil ka ngaihtuah zawng ringawt pawh chuan ka tah a chhuak tun thei.




"Bawihte engmah hlauhthawn awm a awm tawh lo a nia aw, kan tunu pawh a tha leh vat mai ang" ka nu in a ti a, "Mahse nu keimah vangin ka fanu hian thil hreawm tak a tuar a sin" ka ti tiak a, ka mittui chu a tlak loh nan ka dang hram hram bawk, "I thiam loh engmah a awm hleinem, hetiang thil a thleng dawn tih kan hre lawk miau silo alawm, engpawh chu nise a tha leh vat mai ang, hlauthawng lo la" a ti leh sep sep a, ka chhang tawh lo.




Nihnih chhung damdawi inah chuan kan awm tawh a, ka fanu pawh a harh tha leh viau tawh, a tap ngai mang lova, doctor te pawn kan chhuah vat theih an rin thu an sawi kha, chutih rual in ka hnute tui hi chu a ring thei tawh dawn lova, hnute tui siam chawp a rin mai a ngai tawh dawn a ni, hreawm ka ti takzet, ka hnute tui ngei a ring theilo tur hian hreawm min tih tir a ni, nu ni tawh te chuan in hriatthiam ka ring, kan fate'n kan hnute tui an mamawh ber laia pek theih loh hreawm zia chu.




Kan chhungte pawh an rawn lang awl lova, Prof. Sangzuala phei chu hna pawh kal lovin nileng in min rawn awm chilh tawp zel, hma kal turin eng ang pawn han ti lui mahila a hrelo der hmak a, sawi sawi mahila awmzia a awm dawn lo tih ka hriatchian em avangin ka ti lui duh tawh lo, ka fanu a ni ang bawk in a fanu ve tho a ni a, ka ngaihtuah ang chiah in a ngaihtuah ve tho tih ka hai biklo.




Damdawi in atanga kan chhuah theih tawh thu doctor in a sawi a, Prof. Sangzuala chuan min rawn lam a, kan chhungte dang erawh in lamah an lo awm thung, dam taka in kan thleng leh thei chu ka lawm takzet, ka pa in tawngtai na a nei a, Pathian hnenah lawmthu a sawi mawlh mawlh a, ni e, Pathian hnena lawmthu sawi kan ba nasa em a ni, a hun taka ka hnute tui kan fanu tana a that loh thu min hriat tir lo nise tunah hian he in ah hian dam takin kan lut tawh kher lovang.




Vawin hi Remsangi chung thu an rel ni tur a ni tawh a, kal turin ka in siam mek a ni, ka pa leh Prof. Sangzuala te pafa te nen kan kal ho dawn a, ka nute pahnih erawh in lamah ka fanu an lo awm thung ang, ka thiante pawh an rawn kal ve vek dawn a, court a kan luh chuan ka thaw chhuak hak a, a phu tawk hrem na a hmuh ngei ka beisei, a thiltih te kha ti ho mai mai a ni tlat lo, thah hial min tum a nih kha.




Remsangi chu hmeichhe police in a rawn hruai a, dawh san ah chuan a ding ran mai, zam hmel pu eih lovin kan thutna lam chu a rawn en reng bawk a, theih ni se a hmai ah tawk sawn ven sawk a nia ka nap ni, Judge a rawn luh takah chuan kan zavai in kan ding a, kan ukil rawih chuan Remsangi thil tih sual te chu a sawi chhuak mawlh mawlh a, lehlam ukil a rawn din hnuah a thusawi te chu uluk takin ka lo ngaithla a, ka thinrim takzet.




Khatiang zozai a tih tawh hnuah pawh dawt an la sawi ngam a nia, "Ka sawi tawh ang khan Lalremsangi hi a rilru a buai a, report a a in tar lan ang hian hrem na ai mah chuan enkawl a ngai a ni, Judge zahawm tak ka ngen a che, Remsangi hian thil chu a ti sual nge a lawm mahse a duh vang reng a ti nilo in a rilru buai vang zawk a ni, a ni hian enkawl na a rang thei ang ber a pek a mamawh ber zawk a ni, chutiang a nih loh chuan ama tan hian a pawi thui thei dawn tlat a ni" ukil in a ti dap dap a.




"Ka hnial e, doctor tham in ka client in damdawi ei angin report lem pawh a siam tir thei a nia, he report hi a thu dik a ni em tih pawh hriat a nilo a, kan ring ngam tur a nilo, chuan a thiltih te kha a duh vang reng a ti a ni bawk, khatiang taka rapthlak ruahman na a nei thei a nih chuan a duh vang reng a ti a ni ngei ang, eng chhuanlam mah a awm lo, a duhthlan na a ni a, ka sawi tawh ang khan khatiang ruahman na a siam lai khan rilru fim taka a awm ngei pawh ka ring" kan ukil in a ti ti ve lehnghal.




"Your honour, hei thlalak hi han en la, hetah hian chiang takin a lang a ni, Remsangi hi jail a a awm chhung pawh khan vawitam tak a in ti na a, chuvang chuan i hmaa report kha dawt a nilo tih chiang takin ka sawi duh a ni" lehlam ukil chuan a ti ve leh, Judge chu a ngawi vang vang a, thlalak chu uluk takin a en a, "He thlalak a a landan ah hi chuan Remsangi hi a rilru a buai ngei a ni, chuvang chuan a ni hi mental hospital a dah turin thu ka ti tlu a, chutih rual in a dam that ve leh a chinthu hi rel that leh tur a ni ang" Judge chuan a ti a.




Ka thinrim takzet, court room atang chuan ka chhuak vat a, engmah pawh ka sawi theilo, kawngka bulah chuan ka pa ding reng thung a, Remsangi rawn chhuah hun chu ka lo nghak a ni, ka bulah ka chhungte leh thiante an lo ding ve reng bawk, Remsangi chu rawn hruai lut in hmeichhe police khan a rawn chhuah pui a, a hnuah police dang ten an rawn zui bawk, "I lemchan kha ka hriat loh ring reng reng suh, nang hian kei mai nilo ka fanu hial thah i tum a ni a, chuvang chuan i phu tawk hrem na i hmuh hma chu ka beu zel ang tih hria ang che" ka ti ram hmarh a.




"I duh ang chuan ti tawh, mahse i hlawhtling ngai lovang, Prof. Sangzuala ka neih theih nan khatiang thil kha ka ti duh a nih chuan kha aia rapthlak pawh kha ka thing ngam tih hria ang che" zam hauh lo chuan a rawn ti ve hmak, "Lalremsang ngawi hmak rawh" Prof. Sangzuala chuan a ti hrawk a, "Ka pi lo lungngai duh suh u, he hmeichhia hian a thiltih man chu a la hmu em em ang" amah rawn hruai chhuak tu police chuan a ti ve bawk a.




"Midang hmaah lem i chang pawh a ni maithei, mahse min bum thei tawh hauh lovang, nang hian i phu tawk hrem na chu i la hmu dawn khawp alawm, lo nghak ang che" ka ti kha leh fak a, a lo nui sak, "I duh duh chu ti rawh ka tih kha, chuan jail ah emaw mental hospital ah pawh ni rawh se, khawi hmunah pawh awm ila hlim taka in awm hi ka phal dawn chuang lo, Prof. Sangzuala hi ka neih theih hma chu ka vei zel ang" a rawn ti ve leh.




"Eng ang pawn neih tum mahla i thei ngai dawn lo, nang ang mi a leh rapthlak hi chu tu mipa mah hian an duh ngai lovang che" ka tih chuan min rawn ban zuai a, mahse police te chuan an lo man bet hman, "Hmeli ka la that khawp ang che, hre rawh i hlim rei chuang lovang, ka la dam ve chhung hi chuan i hlim ka phal ngal dawn lo" tiin a au tuar tuar a, police te chuan an hruai sawn vat, chuti chung pawh chuan tal chhuah a la tum ve tang tang tho.




"A ni kha a a deuh tak tak chu a nihkha mawle, chuti nilo se khatiang khan a tawng hauh lovang, engtinge kha hun chhung zawng khan a mize diktak a lo thup reng theih ni?" Chhani chuan en zui vawng vawng chung chuan a ti sal a, "A a a nihkha, lem a chang mai mai emaw ka tia, a rilru kha a kim zan lo tih a hriat, hetiang a thleng tawh chung pawh in Prof. Sangzuala neih a la tum a nia" Mary chuan a ti ve sep, keipawh chu chu ka ngaihdan chuan a ni.




In lamah kan haw a, ka thiante erawh an rawn peng tawh lo thung, ka pa in chanchin ka nu te a hrilh ve vek tawh avangin in kan thleng chu an lo ang zui bawrh bawrh a, "A rilru chu a buai tak tak a nihkha, enkawl na han dawng phawt se, a phu tawh hrem na chu a la hmu em em ang" ka pa chuan a ti a, kan chhuak rei ve bawk nen ka fanu chu ka pawm vat a, reilote ka hmu loh chhing ringawt pawh hian ka ngai hman em em mai zel chu a nih hi.




Hun hi a kal chak khawp mai, ka fanu pawh thla ruk lai a ni ve ta, nghet vak lovin a thu ve thei tawh a, hnute siam chawp a ring bawk nen a chak lutuk lo, mahse a fel hlauh a, chhaih te hi a hre ve tawh lutuk, a aw rawl lah hi mipa ang maiin a lian reuh a, an nui tak tak hi chu kan zavai hian min ti nui a ni hlim zel, duh loh hi a hre vak lova, kan in a rawn leng lut tawh phawt hi chuan an lawm maithei zel, chum ti a sawi tur nilo mahse a duhawm thu an sawi ngei ngei thin thung.




Prof. Sangzuala pawh a hma ang bawk in kan in ah a rawn leng lut tan a, kei nen pawh tha takin kan in be thin, a bula let turin min sawm rawn ngai lova, chu chuan ka awm a ti nuam huai thung, ka thiante pawh an in zir chhuak ve tawh a, hna an zawng ve mek bawk, Chhani erawh in a nei tawh a, ka sawi hmaih chu Feli leh Hlima pawh thlaleh mai hian an in nei tawh dawn bawk, a chhan pawh Feli a rai vang a ni, a rai tih a hriat tirh khan a rilru a hah em em a, ka hrethiam takzet.




Keipawh ka rai tih ka hriat tan tirh kha chuan ka hlauthawng ve tho a nihkha, mahse a chhungte bulah an sawi a, Hlima lahin hna tha tak a nei a, an fanu hi a hmangaih takzet tih an hriat chian avangin in neih lam pawh an lo phur phian zawk a, chutiang bawk in Hlima chhungte pawh, dan hnih naa in nei tur ni mahse an chhungte ve ve an hausa bawk a, lawm ropui an tum khawp mai, keini pawh dan hnih na mah nise kan ti lui ve viau kha a nia.




Mahse kan in an loh na chu khatih hunlai khan in neih ka hreh em em a, hlim na pawh ka nei hran lo kha a nia, Feli erawh a phur em em a, ka lawmpui takzet bawk, nupa hlim tak an nih ngei pawh ka beisei, kei leh Prof. Sangzuala anga an awm ve loh hram ka duh, a hreawm zia ka hrechiang a, ka hun tawn ang kha ka thiante erawh tu midang mah hian tawng ve lo se ka duh, mihring tupawh hian hlim kan phu a, in nawr luih na tello a in neih na hi thil hlimawm tak a nih ngei pawh ka ring.




Vawin chu Bawihtei nen bazar ve ngei kan tum a, ka phur tawh khawp mai, pawn lamah hian ka chhuah pui ngai meuh lova, a chhan pawh hritlang a kai hma em vang a ni, mahse vawin chu Feli te in neih naa ka kawr hak tur te leh Bawihtei kawr hak tur en la duh mai piah lamah Bawihtei nen han chhuah dun ka chak ve hrim hrim pakhat avangin kan chhuak dawn a, ka thiante pawh an tel ve dawn a, Feli erawh a rawn tel ve thei dawn lo thung.




Chhani nen kan in phur a, Bawihtei scooty chuan vawikhat na a ni a, nuam a tih hmel khawp mai, MC a kal kan peih loh avangin bazar pui lamah kan lut a, kawi rawng in ang hak kan tih avangin puan than dawr ah kan lut nghal, duhthlan tur a tam bawk nen kan han in hnial leh bap bap thin a, Mary leh Puipuii'n a senno an thlan laiin keiin mihring rawng ka thlang thung a, Chhani'n a uk a duh ve thung a, kan nalh tih zawng lah hi a in ang hlawm mang silo a.




Dawt neitu te pawn min lo en tawp, "A senno kha chu ka duh lo a nia aw, nalh pawn ka tilo" ka tih chuan "Nangte chu i mit a pa alawm, hmeichhia te chuan a senno hi an duh tlangpui thin, i mit a thing lutuk" Puipuii chuan min ti zek a, ka ner nang mai, "A senno lo engpawh ka duh vek, a senno chu ka in hmeh ve lo alawm, bakah in thlan ber kher lah kha a senno dan ka ngei chi, a lar emai, khatiang te chu khaw lum nen khua kan tih kum belh chhah ang" ka lo ti leh hram.




Dawr nghak tu te chu an lo nui hak hak a, "Khawi lehkha in thlang mai ang u, a rei dawn tiang chuan" Chhani'n a ti ta tawp a, dawr nghak tu te hnenah chuan paper leh pen kan dil a, kan thian ho a thil in ang neih ve kan tum apiang hian kan buai ve ziah, kan in hnial rei thei bawk sia, a tawp ah paper te ah kan ziak a, kan pawh fuh fuh ang kha sawisel lovin kan la tawp zel a a tha phian, Chhani chuan paper chu pawt thler in pathum ah a siam a.




"Tuin nge thlang ang?" Chhani'n a ziah zawh hnu chuan tiin lehkha chu a keng ran a, a thlep vek bawk, "Bawihtei hi thlan tur ila" Mary'n a tih chuan kan pawm tlang viau, "Le.. Bawihte, tah hian i duh ber han thlang teh le" tiin Chhani chuan lehkha chu Bawihtei ka puak na bulah chuan a rawn dah hnai a, ka fanu chuan a lo ban chat chat a, a ban fuh mai theilo, a tum ve fe hnuah paper pakhat chu a la hram a, Chhani'n laksak a tum chuan a lo phal lo nasa.




A hum bet ve tlat a, "Le... Bawihte anutei ta tur a nih kha, a dang hi ka pe ang che aw" tiin a lak loh pahnih chu ka pe a, a lak hmasak ber chu ka laksak nghal, Chhani chu ka pe a, "Awi.. i fanu hian i puan thlan kha a hrethiam ve a nilo maw, i duh rawng kha a thleng chat mai" a tih chuan ka lo nui hak a, Bawihtei pawh chu ka nuih chhan hrelo in a lo nui ve sen sen a, a biang ah chuan ka chuk zeuh, "Ka fanu a ni miau alawm" ka ti a, ka thiante chuan min ei loh hmel hlawm khawp mai.




Ka sawi hmaih takin Mary hi Feli'n thian ah a hmang dawn a, kan kawr rawng hak tur in ang lo mahse min bazar pui ve hrim hrim a, a hak tur emaw a ti a niang amah zawk hian kan thlen tirh atangin duh a thlang nghal zat zat zawk, "I fanu hi a hmeltha e, a fel hmel bawk si" dawr nghaktu hmeichhia chuan a ti a, lawmthu ka lo sawi vat, "I va hmeltha em em ve a" tia a biang a a piai sak zeuh te chuan ka fanu chu a lo nui hak hak a, "Awi.. ka duh reuh e, ka nei daih mai dawn che emaw ni" a ti leh thin.




Dawr atang chuan kan chhuak a, kan ril a tam tawh deuh avangin restaurant ah kan lut leh a, eitur kan chhah zawh hnu kan nghah mek laiin Bawihtei chu hnute siam chawp ka pai chuan ka lo hrai a, a ni pawh a ril a lo tam tawh hle aniang a hne nghal dawk dawk mai, rei pawh a hnek hma chuan a hne duh leh tawh lova a ham leh bai bai tawh mai, a mut a chhuak tih hria in pawm chung chuan ka in sawi a, ka zai pah rat rat bawk, reilote ah a muhil nghal mai bawk a, a la mut ngheh loh deuh avangin ka pawm ta reng a, eitur a rawn thlen pawn chuan min ti buai lem lo.




"Rinrini hi chu naute fel a van ni ve chiang tak, a tap ngai mang silo a, a chhun lo che tih hi chu a chiang mawle" Mary'n a tih chuan ka lo nui a, a sawi dik chiah, min chhun lo tak chu a ni, ka nu hian a sawi fo thin a, ka nausen lai deuh chuan ka tah belh thei em em a, ka muthilh dawn pawn puak kher ka ngaih thin thu a sawi thin, Bawihtei hi chuan a la a chhun hlauh a, keipawh ka hahdam phah viau.




Thil kan ei zo chhuah tum a kan in tin tuah mek laiin Prof. Sangzuala leh hmeichhe pakhat bang kil a lo thu reng ka va hmu fuh thut a, a tir ah chuan ka hmuh sual emaw ka ti zawk hial, mahse ka hmu sual lo tih ka hre ve vat thung, a hmeichhia zawk chu a hmel ka hmuh chian theih loh avangin tunge a nih ka hre mai theilo thung, ka awm chu a nuamlo khawp mai, min rawn hmu duh ang tih te ka hlau, ka thiante chu ka tur vat vat a, Bawihtei chu paw tha sawk sawk in pawn lamah ka chhuak nghal vat.

Cont....

Tunlai chu ka regu thei loh bakah a thui hleithei lova min lo hrethiam hram hram mai dawn nia u aw...