OBEDA BY Natasha Hrahsel (Completed)

[ngaia]

CH-23





Ruatkimi POV.




"Kanlalkimtei chu khawmaw ilo la mu vûm thur em ni a?" Ti lawng lawng ri ka hriat rualin na mangkheng hian ka room kawngkhar chu a rawn in theh hawng a! Lalnunthari zet zawng,zingkar kar ah thlipui a rawn keng lut ani ringawt alawm.



"I dam that hmel lel lawl hi maw"khuma ka lo mu min hmuh rual a ti sap in ka bulah chuan a pheikhawk bun a tlawh phelh sawk sawk a a rawn inrawlh ve nghal sat sat.




Kar khat aliam leh tawh a,U Obeda hnen atang thu ka la dawng leh lo.Thudik zawn chhuah tumin ka bei a,alaka ka beiseina neih erawh ani tel in a tla hniam tulh tulh mai si!
Thinrimna ,lungngaihna ,hlauhthawnna ten ka thinlung an in luah chhawk a.A changin ka thinrim a,achangin ka lungngai a ka hlauhthawnnluat vanga zân muthilh theih thak loh chang pawh ka nei bawk.Pawnlam chu sawi loh inhnuai lam tak ngial pawh ka chhuak thla mang lo a,ka naupai lai vang chauhin a hmingin thil te chu ka ei ve tak meuh meuh hi ani ber.





"Vawin chu i inentirna hmun turah ka kalpui dawn che" a rawn ti chhuak nawlh a! Engtin nge alo hriat ni?






"I buai awm si" ka ti sap chu ateu leh hlar tawh a, "i harsatna tawh te hi min hrilh ve thuai zel rawh.Thian nih man a awmlo emai" a ti nur hlar.

"I buai ka hlauh vang ania" inthlahrung zet chuan ka ti nawn leh sap a,min vin tawh bik em lo e.





"Buai lo e,tunlai chu khawmpui zo christmas ala hla bawk si nen thui tur ka ngah over lo a.Bakah ka thui reng peih biklo,khawl ka hmuh te hian ka luak achhuak hlui mai.Ka hne tawp ka eizawnna ve hi maw" a ti nang nang a,nakin lawkah chuan thui tur aneih loh vangin a buai khu leh chuk tho ang.


"Rochanpuia chuan a rawn be leh tawh che em?" A rawn ti chhuak nawlh a, ka lu ka lo thinkhum mai thung.




He tak te hi ania ka hnual leh zual na,phone call tal pawh a min rawn bawh zui lo te hian min ti hlauthawng zual a,U Jeneti nau pai chu afa alo ni tak tak mai ang tih te chenin ka hlau hlur tawh .Min rawn biak beisei in ka phone ka inchhawp reng a,a reh tlawk tlawk mai si! Ka ngai a,abula awm ka chak a mahse a rem bawk silo.Ka thinrim a,nasa taka ankhum a vin ka chak a,kan nun atanga kalbo tir tak tak turin ka la phal chiah silo, ka rilru hi amah leh amah ala insual buai ngar ngar thin khawp mai.






"Rawn be tawh hlek che suh se,ani lo pawh hi i hmu zo dawn lutuk" a tih te chuan ka tah achhuak hlur a,ka thinlungin ani lo athlang tawh dawn tlat silo.





Ka hmel diklo deuh ahmuh rualin kan thusawi chu athlak ta thuai a, "Bawihpuia khuan U Lawmi fa khu a nau chei tawp a! A len zawk vang mai khuan" tiin a nui zui kur kur a,ka sawi tawh em ka hrelo Nunthari hian U Lawmi hi a teithei vak lo.A chhan ni a amah takin asawi chu anungchang a ei loh thu ania,anihna takah erawh U Thanpuia a star lutuk vang ani zawk.
Kan tleirawl chhuah tirh ata U Thanpuia hi astar ve ngar ngar tawh a,U Thanpuia ahmuh chak avanga rawn len kawi lah angah.U Thanpuia lah hian alo nau en hmiah a,fiamthu thawh nan tak alo hmang ta thin bawk nen Nuni hian abem zui ngam ta lo a,a huaisenna zawng zawng asawm khawm ve tumah lah U Thanpuia'n bialnu nghet anei tih a hre zawm leh nen a beidawng ve ta tawp kha ania! U Lawmi hi a sual hranlo a,apasal vangin Nunthari hi chuan a ngaitheilo hrih mai mai ani.






"I rilru nawmloh hlau viau mah ila nang lo zawh ngam ka nei silo, sum chu in chhuah tawh em?"a rawn ti chhuak leh phawng a,kha maw a rilru a awm ang a sawi chhuah loh hi chuan athaw te hi achham dawn lek lek zelin ania ka hriat ni.

"U Sawma'n ala rem ti lo a.Ka pa Hruaia te lam lahin sum chhuah hrih lo turin min rawn ngen ve lawm lawm sia" tha deuh chuan thil nihna ka sawi ve mai bawk.





Thil dang ah kan pakai zel a,U Joshua leh U Dami chanchin te.Mi hausa pakhat jail tang nuamsa lutuk chanchin te chu a sawi zui luam a,a rei deuh hnu ah ka chungchang ah bawk kan pakai leh thin.

"Bawihpuia khuan apa alam alam ve em?" A tih chuan ka bu leh nghauh tawh a,an in awm hnem pafa bawk a,la naupang viau mahse apa chu azawng ru ve ruai thin alawm.




Kan chhuk tuk phei kha chuan ka bulah lo a awm duh miah lo a,room ah kan nufa in kan tawm nileng tawp.Durtlang lamah khan phone en kan khap hneh viau a, tunah chuan khap theih ani tawh silo,a tlei nan tiin ka phone ah nursery ryhmes ka en tir tawp tawh a,atlei pui viau mai.

Nu leh pa tamtak an faten phone an khawih hnem leh khawih hma te hi kan han dem ve ngawt a,buai deuh tan phei chuan an lo tlei pui ve bawk nen nau awm nan alo tha em kher anih hi maw.





Rei ngial kan ti ti dun hnu ah intifai in inentir tur chuan ka insiam ve ta nge nge a,pawn lama chhuah chu ahreh tak te hian ka hreh a,mahse ka chhuah ngei angai bawk si.
Nau ka lo pai kher bawk nen ka taksa achaklo a,keimah chauh ni ila chuan ka thil tawn in a zir bawk nen nachhawkna ei in ka tuar thei mai anga,ka nau pai ngaihtuah tel angai tawh tlat a tin ni.



Inhnuai ah chuan kan inzui thla ta pauh a,pawnlama chhuah chu ka la hreh takmeuh meuh tho.Inlama ka haw leh thu hi hretu an la awm mang lo a,an hriat hunah phei chuan pawn chhuah ka hreh lehzual ngawtin ka ring.





"Bawihpuia chu ka lo awm mai ang,hei amuhil deuh chiah bawk a kan in awm thei mai ang.Tikhan in pahnih khan fel fai deuhin kal thuai zawk rawh u" ka nu'n bawihpuia awi dur dur chung chuan alo ti a,Duati ka ûte fanu ala hleithei silo a Bawihpuia zawk a awm deuh chawt hrih.

"A lo harh hunah a sual ange" ka ti ve luam a, min hnial hneh viau thung.An inhmu zing tawh bawk nen Bawihpuia pawhin Durtlanga api angainat tluk zetin ka nu hi angaina ve tawh hialin ka hria.Naupanh hi chuan an hmuh ngun ngun te hi an ngaina zung zung mai zel.






Nunthari nen chuan a scooty a inphurh chhuah kan tum ve ngial a, kan ngam lo dun ve ve.Ala thar ve chauh a,mi phurh chu ani pawhin ala zuamlo deuh aniang.Scooty hi chu hmeichhe tan chuan khalhthiam bik neih te hi a awl riau a,scooty danga mi han phurh te hi a huphurhawm ru riau thin.Nunthari scooty lak phei chu achhuakthar a seat sang chi alo ni kher bawk nen taxi a kan inentir na tur hmun lam pan chu kan ti tlu ta tawp.





Kan thlen chuan kan hma ah mi panga lai anlo awm hman tawh a,a doctor ber ala rawn thleng bawk silo nen kan rei ve deuh maithei ani.





"Lalmate,mipa dang i hmu zo lutuk ang ka tih kha ka fiamthu miahlo ania aw" inentir tur thutna a kan thut ve reng lai chuan Nunthari'n a rawn ti chhuak leh hlawl tawh!
Ka nui mai chu "nui ringawt suh,ngaihtuah la U Buatsaiha te ang pawh hi" ti in min kheuh zui neuh neuh a! U Buatsaiha berkher !




"Khatin min melh vak suh,U Buatsaiha hmanni lawkah ka dawr ah alo kal a,anau kawr min thuitur a rawn lam na ah a sawi chhuak zeuh che alawm.'Kimtei hi chu la nula se chuan ka chhuahlo ang mawle' a tih che kha.Sum lamah lah kan Rochana te aiin ala lut hnem a,amah lah Pathian tih tlat mi leh mi fel lutuk ala ni zui.Bawihpuia leh i naupai lai pawh hi a hmangaih tel vek thei ang che u.Naupan lai atanga kan enkawl te hi chu hmangaih an awl hrim hrim "a ti zui luam a, "Nunthar chutiang lam chu sawi lo ang" ka lo ti hap thung.Min ti hah zual ngawih ngawih.





Doctor alo thlen chuan beisei aiin damlo a en chak a, ka hun a thleng thuai.

Test neuh neuh neih angaih vangin inhnuai a lab lamah min chhuk tir leh nghal a,result darkar khat dawn nghah ala ngai zui bawk nen Bawihpuia ka ngaihtuah chuan inlam ka phone deuh chhen a,ka nu lahin ala tlei thu in min rawn chhâng ve zel tho.






Nghah tlawk tlawk chu aninawm em vangin Nunthari chu min hawsan mai tur ten ka ti ta tawp a,min hnial masa leh ngang ngang viau mai.
MC lama thil ei a rawt ta zawk a,peihlo viau mah ilang ka hnial ngam nganglo.Ka tan hun insiam in helai thleng thleng rawn kal miau hek.





Kan thil eina tur hmun kan pan na lamah U Buatsaiha ber kher kan la tawk zui!
Nunthari'n U Buatsaiha min sawi dan kha sawi ta lo se ka hmu hreh kherin ka ringlo,tunah chuan ka hmu hreh zo vek tawh.





"Nangni tehhlawl cheu chuan" nui sangin alo ti leh var tawh a,hmeichhe tam tak dream boy ang kha ani ngei ang.Ka tan erawh U Obeda tluk tu chu an awm miahlo thung a!

Zonunthari lah chuan eng ahria nimaw?"Hei,anulat leh kan lawm anih hi" alo ti kher a,zawhna mitmeng in U Buatsaiha chuan min melh ta run.




"Tak tak a,a inentir result nghah pahin hei kan inhnawhpuar lawk dawn" Nunthari bawk chuan a tih zawm leh a,U Buatsaiha mitmenga zawhna lang chu a reh phah tawh derlo thung.





"Ka bazar ve lawk e ka tia,keipawh inhnawhpuar ka lo tum lai tak i ei ho law law ang u.Ka treat dawn cheu nia" a ti zui ta hluai a!MC a kanlo kal ta kher kher chu ka inchhir ta viau mai.

Eng ka hria nge mawni? U buatsaiha min melh dan te chu ka ngaih melh tlat tawh a,Nunthari vang vek.ka û ang tak takin asin ka lo en le? Ka thiannu sawidan hi anih chuan ka hnaih tha duh tawh kher lo ang le.






Ka thil chah chu ka ei leh ta mang chuanglo a,U Buatsaiha sawi tawh angin kan eina vel man chu aman a pe vek.Lo hnial ve mah ila asawt lo viau mai.

"Inla rei dawn em? Motor in ken loh phei chuan ka thlah haw thei cheu ania " a ti erawh Nunthari tawng ve hma in ka lo hnial thuai a,"kalkawi duhna te kan la neih takin minlo hawsan zawk rawh" ka ti thuai.Min hnial ta em biklo.





Clinic a kan let leh lam erawh Nunthari chu a inthiamlo ta deuh nge ni a ngawi reng a, a thaw leh hak thin.A rilru hah ve changa a awm fo dan ania, ka hrechiang ve thawkhat tawh viau mai.





"Ka tihpalh aw,i down lutuk tur tihziaawm nan U Buatsaiha lam kha ka sawipui mai mai che anih kha"Clinic kan luh rualin a ti ta chiah a,alo inthiamlo hle tak anih dawn hi a! Ka va khawngaih leh zawk e aw..


"A ho lutuk, ka thinrim hleinem" ka tih chuan a pangai ve leh thei ta chauh.





Kan nghahna hmun a kan chhuak chho erawh tumloh deuhin ka ding chawt a,kan hma a thu ve te nen kan mit a intawng ta chiah bawk.

U Obeda leh U Jeneti te chu inhnaih chet hian anlo thu dun a,ka thin rawn phu dawt dawt in ka awm ah hian engemaw hian min hnawh ta tlat bawk!




Ka mualpho ahlau nge ni Nunthari chuan min kaisawn thuai a,U Obeda chuan min enzui reng tih ka hrethei.Ka tah achhuak a,ka ngaih em em leh a kianga awm ka lo thlakhlelh ruk thin ngawih ngawih ka hmu ta cheng a,chem hriam taka vih sawk ang maiin ka na leh si!

Ahma kha chuan beiseina chhete ka la nei a,U Obeda rinduhna nen nî ka vuiliam thin kha ania.Tunah erawh ka beiseina neih zawng zawng te kha an bo zo ni maiin ka hria!





An thutna lam chu ka hawi lo theilo a,inhnaih lutuka an thu te,U Jeneti'n a ta emaw tih tur khawpa a be siam siam te chuan ka thawk an ti rangin ka tah an ti chhuak zual ngawih ngawih ani ber.

Nunthari chuan min hnem ve mawlh mawlh a,nuih luih ngial ka tum te chuan ka thei tawh der lo mai.




Receiptionist in ka hming a rawn lam a,Doctor room a ka lut tur te chu ka muangchang ngang mai.

Ka chhuak phei a,U Obeda te zawn ka thlen phei chu ka khûr ti tih der nia! Ka tha azawi thut a,ka tlu thelh nghe nghe.




"Bawihi"ti thum dut ri ka hriat rualin ka in la hrang nghal thuai a,hriatthiam har fe hian minlo melh ngawih ngawih.




"Ka tha..ka tha" ti nawk nawk in ka test result chu ka ban sawk sawk Doctor room ah chuan ka lut nghal zat.





Thaw halh halh a ka lut chu doctor chuan minlo en duh khawp a,Ka that leh that loh minlo zawt nghal thuai.





Ka result te a han en hnu ah hlauhawm em em a awm loh thu te chu min hrilh zawm luam a.Ka taksa lam chakloh hrim hrim vang leh ka HB hniam deuh vanga luhai fo ka nih thu te chu a sawi dap dap a,a thusawi atam zawk phei ka beng lehlam ah achhuak lehnghal zel nimai in ka hria! Pawnlam a thu te bakin ka rilru an luah tlat lo a tin ni.


A tawp lama ei leh in lamah thahnem ka ngaih thu asawi chu ka hriat chian ber awmchhun ani ngei ang.Damdawi min chawh tho avang chuan engmah ka zawt tha lo a,chu ai mah chuan a room a awm reng mai chu ani ka duh ni.Thil theih ani silo.





Doctor room chu ka chhuahsan leh ta nge nge a,U Obeda chu hmuhkan luiin Nunthari ka hui a,hmanhmawh zetin ka chhuahpui ngjal vawn vawn.Damdawi min chawh takngial pawh chu lei lo in taxi ka phar a,ka chezia buai lutuk chu Nunthari chuan minlo thlir deuh tawp ringawt.



Taxi kan chuang lut chiah tih in ka thaw chhuak ngjal ham ham a,seat nghengchhan ngjeng dawtin ka mittui a dir nghal zung zung.





"Matei"




"Nun, khatiang em em kha chu ka beisei bik lo asin le! Min ti beidawng hle mai" ti tuau in ka inhnitchhuak ta hlawp hlawp.
U Jeneti nau pai afa anihloh thu arawn sawi hun ka nghah mek laia ka hmu dun kher chuan min vilh ngut ngut a,ka na tihbak sawi ngaihna pawh ka hrelo.

Tinge kha hmunah khan a rawn hruai? A fa anihloh chuan tinge abuaipui tlat ang ni? Tihian kan tawp hlen tak tak mai dawn em ni? Ka rilru ah zawhna chhân sen loh a rawn lut a, U Obeda hi midang ta ni turin ka phal lo ka phallo takzet.





Tinge insawifiah tuma min rawn umzui loh? Doctor hnena ka kal min hmuh te khan min ngaihtuah ve eihlo tihna nge ni zawk? Minlo hmangaih ve tak tak lo zawk nge ni? Chutiang pawh chu lo nisw tinge Bawihpuia tal hi a rawn ngaihven zawm ve loh le? Tinge?

Ka tap khur ngawt ngawt a,Driver pawh chu ahrilh ahai ve ngawt ang le.Mahse ka na em a,ka insum thei tlat lo.





Nunthari chuan ka hnungah chûl in inbengdai turin min lo hrilh ve lawm lawm a,ka tah nasat luatah ka chau nghulh thei hial bawk.





Traffic jam karah kan tang bawk si nen ka tah zawh meuh chuan Taxi driver in aw a rawn thian kharhin "zahna tur a awm miahlo ania,mami achhuak anih chuan tah bawrh bawrh tur.Kei chu min veng thawng duh suh u" a rawn ti a, ka inthlahrung lutuk chuan "apawi hle mai ka pu" ka ti chhuak sep a, ka aw te chua ala lai viau.


"E, inthlahrunna tur a awm miahlo ania.Hringnun hi chu ahahthlak ve bawk alawm.Hringnun hahthlak vanga mittui la seng ve lo te hi chu mi vannei tawpkhawk an ni mai" a rawn ti leh luam a,pa fel tak chu ani ngei ang.






In kan thlen chuan Bawihpuia'n minlo ban ngjal thuai a, ka nu'n a hrai puar zawh chiah thu alo sawi bawk nen ka in ei puar tawh thu sawi in room lamah ka chhohpui ta nghal daih a.Ka nu pawhin min hnial lo in ka in tur nakin deuha a rawn dah chhoh tur thu a sawi ve mai bawk.




Bawihpuia chu ka en leh thin a,apa in heti tak maia kan nufa min ngaihsak zawm lo tih hi a hrethiam ve der silo a, ka lainat lutuk chuan ka tah ati chhuak leh ringawt tawh! Ka chhel a ka mittui a tlak khat thin teh lul nen U Obeda vang hian ka tap ngun ta malh malh khawp mai.Ani lah chu amah vanga mittui ka sen mek lai hian U jeneti buaipui in ala buai viau awm si a!





Bawihpuia chu akhalh tur khumah chhawp hnawk sak hluai in a bulah ka thuthla ve a,ka chhawnchhaih peih hrih meuhlo.
U Obeda call dawn inbeisei zet hian ka phone chu ka melh ka melh thin a,mahse a reh hian ala reh tlawk tlawk tho.




"Bawihpui, Papa tello hian kan nung thei ang tiraw?"engthu nge maw ka fapa bulah hian ka sawi tak mai le! Ani lah chuan ka thusawi hrethiam ve ni awm tak in min melh kar a,â inti lutukin ka chhaih zui ta tawp.




"Khâ, amuhil leh der tawh elaw?" Bawnghnute rawn chawi lut hian ka nu in a rawn ti a,tunlai Bawihpuia mut duh lutuk hi kei pawhin mak ka ti deuh.






"A tal chau ve aniang" ka tihchuan ka nu pawh a bu ve leh nghauh nghauh tho.




"Mate,sawichhuak lo mah la i nat zia hmulo kan ni miahlo ania aw.Tunah hrih chuan hnem dan che kan hre hrih thlawtlo mai chauh che ani.Kan hnem nasat pauh che leh i zuau ting anga ,i tan bung thar kai aharsa tulh tulh dawn a.Ipa nen pawh ngaihtuah viau che mah ila nangmah a i paltlang theih kan ring tlat ania" ka nu chuan a ti ta luam a,min ngaihsak lo nia ka ngaih a hlau ni berin ka hria.
Show post links
Top