KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA





CHAPTER 27





“Lo haw i tum lo em ni?" ka nu in min rawn bia a, ni e Christmas a thleng leh dâwn tawha, haw tum chuan haw ka ngai rêng a ni. “Haw rihlo ang, a theih leh a mas dâwn teah te ka lo haw ang chu, tûnah chuan a la hma a lawm" tiin calendar chu ka ena, Sama a lo haw dawn tih ka hriat vang a ni pakhat.






Naktukah a rawn thleng dawn tih Valpuia te ho hnên aṭangin ka hria a, lo biak leh ngei ka duh. Ka theilo a nih leh harsa chung pawhin ka hlat ve mai angai tawh ang, kan inhmu thei zen zen tawh dawn lova, theihnghilh hun ka nei mahna.







Nileng chuan ka thusawi dan tur vel ngaihtuahin ka awm ni lêng ṭhaka, ka be thei ngei angem ka hrelo, min ngaihthlâk duh ngei ka beisei thung. A tello in ka awm thei tawh lova, vawikhat tal chu ka bei leh chhin tur a ni, chumi a zirin na chung pawhin ka inthiar fihlim tawh mai ang chu.







A tûk a rawn thlen meuh chuan ka zâm ve takzet, engtin nge bul ka ṭan ang ka hrelo va, mahse biak ngei ka duh heti mai hian kan inkar ka ti tawp thei hek lo, “U Samuela alo haw, nupui hmelṭha tâwk mai a rawn ru haw a nia aw" naupang ho in tlanpaha an au ri chu hria in ka phu zawka.







Nupui a!? Hmanhmawh zet chuan an in lam panin ka kala, thawm chu a lo ri laih laih mai. Valpuia te ho pawh an lo awm vek bawk “Saw i bialnu a lo kal ania" Rengpuian fiam paha a tihchuan ka lam a rawn hawi zawka, chutah ner sawkin a hawisawn lehnghal daih bawk.






“Ka bialnu a ni hleinem, Marry hi lawm ka bialnu" tiin naupang ho in an sawi kha phone a a rawn status fo hmeichhia ngei kha ka hmuh lai reng chuan a kuah a nih chu. Ka nghing dawt thei hial mai, in kuah mai mah nise kei a hma aṭanga lo nghâk ṭang ṭang tu tân chuan ana lutuk, ka thawk te chu a har nghal vek.






A bialnu anga a sawinu lah chuan nuih ver verin a biangah a fawh sak zauha, ka ṭap mai dawnin ka hria “Samuel, Nunui saw ngaithla ve phawt la" Rengpuia chuan a lo ti ve bawk, Sama erawhin engmah a sawi lem lo. A bialnu nen ringawt chuan an in bia a, a ṭhiante pawh chuan tih vak ngaihna an hrelo nge keichu hahdam turin an mitmei chuan min ti hlawm ringawta.







“Sam, zâninah kan inhmuhna ṭhinah khân ka lo nghak ang che. Chutah chuan engkim kan sawi fel ang chu, chuta ka thusawi i ngaithla duh lo a nihchuan keipawhin ka rawn tibuai tawh lovang che, i rawn kal ngei ka beisei, i rawn kal hma chu ka nghâk reng dâwn che a nia, chaw ei tui ule" ti a phun sapin ka in luah lam pan chuan ka kal leta, ka mittui chu ka hru zauh zauh bawk.







Hmeichhe dang maw? Engvang bik nge ka mipa tawn te nunah hian a pahnihna ka nih bik reng, a nek chhuah zâwk ka ni reng bik hi ka hrethiam theilo, na taka ka awm hnuah mipa pakhat avângin hlim takin ka awm leh dâwn chauha, a ni pawh mumang ang mai a ni si.






Ka mittui chu hru pah in ka inluahah chuan ka pen lût chhat chhata, kha hmeichhia nena an nui ri te, hlim taka an inkuah te kha ka tân chuan a na tâwk lutuk tlat.





“Sam, ka beiseina êng neih chhun i ni a sin" tiin ka phun sap sapa, ka thawmhnaw vêl chu siam fel sa in naktûk lamah ka haw ve tawh ang chu.







Zanriah chu hma takah eiin khaw thim rual chuan khawpawn deuh hmun fal lai kan inhmuh fona ṭhinah chuan kalin ka ṭhu renga, khua a vawt chho leh tawha, ka khur deuh hlak hlak mai. Darkar khat chuang ka nghah hnuah pawh thâwm reng reng ka hreloa, a rawn kal dawn lo emaw ka ti hial tawh.







Ka la nghâk ve zel tho, a rawn kal hma chu zankhua pawhin ka nghâk mai ang chu. Khur hlak hlakin ka inkuah khâwm hlâna, a vawt lutuk tlat.




Darkar hnih tling ṭep ka nghah hnu chuan thawm ka hria a, ka hawi phei rualin street light chhana a bialnu nena an rawn kal chu ka hmu nghal zat mai. Tûnah chuan kei min hmu tur pawhin hmeichhe dang a rawn hruai tawh a maw? Za lo zet chuan ka ṭhensaka.







A bialnu chu ka bul ema rawn hruai chu a hreh pawh ania'ng, engin a chhun phak loh chinah chuan din tirin ka lam chu a rawn pana “Sam, ilo kal tawh maw?" khur dar dar chuan ka lo ti a, a vawt bawk nen ka aw chu an khûr nasa viau mai.







“Vawt i tihchuan in ha lum mai ta che?" a tihchuan ka nui thâm chhâla,“I sawi duh chu sawi vat mai rawh" a tihchuan thawk la hakin “U Sangpuia khân ka inrin loh laiin min fâwp a nihkha, Sam, ka duh lo che ka tih kha i hrethiam lo anih kha" ka tihchuan ka sawi zawh hma in a kut a lo vai hluka, a rum nghut bawk.







A thinrim leh tawh tih ka hria, a kutah chuan va vuanin “Ka ti tak tak, u Sangpuia hnênah khan ka hmangaih thu che ka hrilh zawk a sin" ka thusawi chu a awih lo nge alak aṭang chuan min nam hla dawrha “Dawt leh bawk maw, fiahna nêna ka hmu chung pawhin i la pha a" a nui deuh hawka, “Hmeichhe tenawm, dâwt sawi tûr i vân lo hle mai" a rawn tihleh chuan ka inpet ruha.






“Kan thusawi zawng zawng i hmulo a ni lâwm ni? A enga mah hma in hmeichhe dang i rawn hruai haw a, a ni saw i nupui a ni zawk hial lo maw?" ka tihchuan nui leh hakin “A nimai thei a sin, mi pângngai mai mai ka rawn hruai haw i ring em ni? Taka a vun te saw deh a nuama, ka kham theilo, ka tân ui a nei hek lo. A hmelṭha a, a chêtzia pawh a zahawm viau a sin, a hriatna lah a zau, nang nen chuan danglam tak in ni" a hmaiah chuan ka beng nghal sawk mai.








Rilru na lutuk chuan ka ena, engtin nge chutiang thu min sawi khum theih zawk? “A ṭha e Sam, i lakah hian beiseina ka lo nei ve ṭhin a sin, mipa dang vanga ka nat lai khan engtin nge min tih kha? Mahse, ka tan hian ilo danglam bik tawp lo, nilo ka tan chuan i danglama, i tan ka danglam lo mai zawk a lo nih hi. Ka hmangaih ber chuan hmeichhe dang vâng bawkin min kalsan ve leha" ka ṭah nuih hak haka.








“A ṭha a lawm, vawitam kan kar siamṭhat tumin ka theihna zawng zawng ka hmanga, tûnah chuan ka theihna zawng zawng a zo tawh. Min ngaithla duh lova, ka tina ngai lo ang che tinrêng chungin u Sangpuia ai pawhin min tina zâwk chu anih si hi, hlim takin awm rawh. Ka beidawng tawh e, tun aṭang chuan keipawhin ka rawn tibuai tawh lo ang che. Hmalam ka pan ve thei tawh ang chu, dam takin; engtikah emaw thudik hria in ka kiangah rawn let tum mahla keipawhin ka lo pawm thei tawh lo ang che tih ka hlau, mangṭha le Samuel" tisapin a zungbun min bun tîr chu ka ena.








“Hei pawh hian awmzia a nei tawhlo" tiin ka kut zungṭang aṭang chuan phawiin ka vawm bo nghal a “Nuntluangpui phelh hauh suh" a tih pawh chu a tlai zo tawh.Mittui tla zawih zawih chuan Christmas zâna a ṭhi min awrh tir chu ka pawt chat leh hmawka “He..he ṭhi pawh hi a ṭangkai tawhlo" min rawn dan a tum chu lo namsawnin zungbun ka paihna lam hnim karah bawk chuan ka vawm leha.








“Ka thinlung i hliama, hmangaihna hi i tân chuan engmah lo mai a lo nih hi, i tân ti a ka lo inven ve na te chu a thlâwn zo tawh" tiin ṭap chung chuan ka tlan hawa, min rawn umzui tih ka hriat chuan tlan chak zual sauhin ka in ka thlen rual chuan kawngka hawngin chhunglam aṭang chuan ka kalh zuia, helamah chuan mi inrawk hmang an awm ngailo bawk nen ka kalh duh lem lo kha ka tan a lo ṭha phian a nih hi.







“Nuntluangpui kawngka hi lo hawng rawh" a tih pawh chuan ngaithla lo in ka ṭap hlawp hlawpa, “In bia ang, kawngka hi rawn hawng rawh" a rawn tih leh pawh chuan ka chhang lo, ka phone phawrhin kan thlalâk chu ka en vang vanga, a ṭhen chu ka delete ta bawka, ngawi reng hian kawngkhâr nghêng chuan ka ṭhu a.





Thâwm a reh vang vanga, a haw nge pawh ka hrelo, kei erawh ka ṭap hlawp hlawp renga. Kha chen an tân ka inveng a, rinawmin mipa dang ka hnawla, mahse a ni chuan a thei ve lo. Mipa dang nên min hmuh dun avângin min zâwt chiang duhlo in thutlûkna a siama, min tihnat a thlang ta mai hian min tina vawng vawng mai.






Traviz sailo leh Criz bierzack sak CHHINGMITTUI A FAR LEH ṬHIN tihchu ka ngaithla a, ka ṭah a chhuak zual. Ka awm dawm meuh in chu hla ngaithla chung chuan ka ṭap hâwm hawma, rap hla mah nise a thu chu keimahni hun tawn nen ka hmehbela, a inan em avâng te pawh aniang ka ṭah pui char chara, pâwnlam aṭang chuan Saman min rawn au ri ka hriat chuan ka tâwp chata, a la awm amaw?





Ka mittui chu ka hru zauha, ka thâwk thleng chuan a har hetiang thleng tur hian ka inring ngailo.




Kawngkhâr bul chhuatah chuan mu in “Ka nun zawh mek ah hian ka tawng tam ta phatsan, he thinlung mâwl hian a tâwk tawh, ti a rilru siamin a thawk tâwp thleng pawhin a ring leh duh tawh lo'ng derna an ka vangin a tawt tawh. Thinlung hliam hian a chianga, hmangaihna nun hian aw ahliama" ka mittui chu a luang ngiai ngiai renga, ka bengah chuan a bialnu nena an inkar a sawi lai ringawt kha a ri lehnghâl.







Ni e theih tâwp ka chhuaha, kan inkar a ṭhat leh theih nân leh a hma anga kan awm leh theih nân, ka theihna zawng zawng ka hmanga. Mahsela, theihtâwp ka chhuah ve na te chuan awmzia an nei velo, kalsan ka ni a hriatthiam ka ni ve lo bawk.








“Kal la, rawn kîr tawh suh aw Sam, tûnah chuan hmangaihna hian min zawng hmu ve ngai dâwn lo tih ka hrethiam tawh e, ka tân hian hmangaihna a awm velo, kal mawlh rawh. Ka chelh lui tawh dâwn lo che, i rawn haw anga engkim a ṭhat leh beisei chunga lo nghâk tu che thinlung hi a kehchhe vek tawh" tiin ka aua, “Naktukah ka lo kal leh ang, Nuntluangpui i hria em? Naktûkah lo awm ang che" a tihchuan ka ngawi renga.









“Inhmuh a ṭulna a awm tawhlo, i duh i thlang tawha, engkim a tawp tawh. Min tihnat belh chu tum tawh suh" ti sapin ka tho chhuaka, ka khum lam chu ka pan chhet chhet bawk. “Phatsan hmasa tu zâwk i nih kha, khatiang sawi hauh suh, ka haw phawt anga naktukah ka rawn kal leh ang" a tihchuan ka chhang tawh lo.







Naktukah chuan ka haw tawh anga, a kal leh hma chu ka awm mai ang. Kan in hmu ngai tawh heklo ang.





Status chu a tâwp nan ka up a, “Engtikah emaw chuan thudik hria in ka lam i la rawn hawi leh ngei anga, chutih hunah ka rem thei tawh bik lo ang. I nun hman zêl turah duhsakna hlân chung che in kumtluang atân mangṭha mai le" tihchu up in reilote hnuah amah ngei chuan a rawn en a, chuveleh block zuiin call ah pawh chuan ka block vek bawk.







A chanchin hi hriat tawh loh ka duh ber a ni tawh ang, ka theihnghilh ngai dâwn lo tih erawh ka hre chianga, mahsela hriatreng erawh ka tum tawh bik lo ang. Ka hmangaihna lah a reh ngai dâwn lo va, mahsela ka bulah a hlim loh miau chuan ka tân tih theih a tlêm em ani.






“Sam ka hmangaih che a, ka hmangaih reng ang che. Nang lo ka nunah ka la lut ngai dawn lova, ka kiangah i hlim lo erawh ana ka ti, tûnah chuan ka hlat ve tawh mai ang che aw.A harsa dâwn tih ka hria a, mahsela ka tum ang, engtikah emaw chuan ka la tuarchhuak em em ang" ti a phun sap sapin ka mittui chu ka hru a.







Rawn let leh duh se chuan ka pawm leh thei mai thei, a chhan chu ka hmangaih ema. Nep in tih ngawt chi lah a ni heklo, kan thinlung taka kan hmangaihte lakah kan nem hma zia chu tupawhin an hrethiam ang. A tawngtu nih loh chuan nêp tih leh nem hma tih kan hlawh fo, mahse hmangaihna chu thir rawh lin ang vut hi a ni a, thinrim avânga kan sat vut lai pawhin reiloteah tuiah chiah daih leh ang maiin kan thinrimna an ti dai leh ṭhin si.









A tûkah chuan zing takah tho in ka haw na tur sumo chu a rawn thleng bawk nen ka thawmhnaw ṭhenkhat chu dah lûtin ka hawi let vang vanga, Sama khan min rawn hmuh a tum kha a nia. Mahse tûnah chuan he khuaa a awm chuan awm loh hram hram ka tum tawh ang, chu chu ka hlat theih dân awm chhun a ni, ka hmuh phâka a awm reng chuan ka na reng dâwn si a, chuvang chuan ka inthiarfihlim zêl tawh ang.


FATU KA NGAI SIA RAWN DAHTLAI