STORYFB.COM

TRAITOR




Chapter-32 (last)




Dam takin Christmas kan hmang liam a, in thar luah hlim ve chauh kan la nih vangin kohhran leh veng chhungah pawh kan la tal tam lo khawp mai a, chhung inkhawm erawh nitin neih harsa mah se Pathianni ah hi chuan kan nei ve ziah thin a, Zodinga pawh dawra a kaltih loh hi chu hmun dangah a leng chhuak meuh lo.




Spi thilsawi kha rilru ah awm ve ruah rauh thin mah se Christmas karah dawr kan khar avangin in lamah kan tawm deuh chawt hlawm a, kan inleng neih zin ber lah Rsa a ni deuh mai thin bawk nen, kan nupa leh kan chhungkaw boruak nawm lai taka Spi thilsawi vanga boruak tihchhiat chu tulin ka hre lo a, chu lo rengah, ka pasal a la beisei ve thinzia ka hriatchian em avangin a thil sawi chu awih dan tawk te pawh ka thiam a ngai dawn tih ka hria a, ka rilru nawm lohna tur zawnga a tawngkam thenkhatte pawh haider hram hram ka duh zawk.




December ni 31 tlaiah chuan ka nu in chaw ei turin min sawm a, mahse Zodinga te lam atanga sawmna kan dawn ve tho avangin chulama kal zawk tur chuan thu kan titlu a, tukthuan ei kham velah insiamin bazarah te kan kal hmasa a, chawhmeh leh thei eng i lo bakah Geena-i ta tur barbie ka leisak bawk a, u Elise-i nena kan inkar chu tha lutuk lo mah se Geena-i ka ngainatna erawh a dang lova, chutiang bawkin ka fapa nen pawh an la inngai em em reng a, Christmas ah engmah kan tihsak lo bawk nen leisak ve reng reng chu ka duh a ni.




"Kha kha i duh tawk em ni? Lei tel duh dang i la nei em?" tia ka pasalin min zawh chuan ka han ngaihtuah leh vang vang a, ka nu leh pate ai mah chuan Diktei tan eng emaw tak leisak ve ila a tha in ka hria.



Thuamhnaw dawrah kan lut leh rih a, thlasik lai a ni bawk nen Diktei chu kawrlum phiar senno ka leisak a, amah a hmeltha in a nû zem bawk a, a inhmeh viauin ka ring.




In kan thlen chuan a lo reh thuap mai a, choka lamah phei tlangin Diktei ka ko zui a, tuman min chhan loh vangin Zodinga hnenah chuan an kalna tur a hriat leh hriat loh te ka zawt leh rih a, chutih laia in chung chhohna kailawn atanga lo chhukthla mek ka hmuh vang chuan ka ngawi leh rih.




Diktei chuan a hmunphiah ken lai then lah lah chungin min lo nuih var var a, "Ka rin aiin in lo thleng hma daih, thingpui ka lum anga, eirawng kan bawl tan dawn nia" a lo ti var a, choka lama a phei chu ka zui ve leh nghal vat.



Ka nute awmna ka zawh chuan u Elise-i te nufa nen thenawma an len thu mi hrilh a, ka pa erawh a kalna a hre bik lo ni awm tak a ni.



Midang awm loh lai chuhin a kawrlum tur ka leisak chu ka pe a, a lawm thiam ngang mai a, a rawng lah chu rin ang chiahin a inhmeh em em bawk nen, kan pahnih chuan kan ri le lu a, kan bengchheng khawp mai.




Tlai lamah chhungkua in zanriah kan kilho a, Geena-i barbie tur ka leisak pawh u Elise-i chu a lawm thiam ve khawp a, min la be tha duh vak lo na in, "Hetiangte chu a to si a, leisak kher pawh a ngai hleinem, in in luah luhnaah in insen hnem tawh nen" a ti ve luam tho a, beisei ai daihin chhungkaw boruak pawh a zangkhai a, inrem danga kan indang thei chu thil lawmawm tak a ni bawk.





Zan lamah erawh rei kan awm lova, Gideona a hritlan deuh avangin kumhlui thlah zan ni mah se kan mu hma khawp mai.

Inleng kan nei lova, Rsa pawh a thian dangte bulah hun a hmang a, "Chhungkaw pa ber i ni tawh si a, ka lo kawm tam lutuk tawh lo ang che" a ti ve thlap a, tlangval ang maia khawsa thei a nih tawh loh vangin Zodinga pawhin a hrethiam khawp mai.




Kum thar kan han chuangkai chu engkim a thar vûk ni hian a hriat a, rilru a thar a, beiseina in hmalam hun tur kan suangtuah a, chhungkuaa hlim tak maia kum thar kan han thleng ringawtte chu Pathian hnenah lawmthu sawi mawlh mawlh tur kan ni.




Kan chhungkua chuan a hnenah kan inhlan thar leh a, kan fapa min enkawlpui turte, hriselna tha min pe tur te in leh nunkawng dik kan zawh tlat theihna turte in kan nupa in kan tawngtai dun a, kan bul tandan chu duhthusam lo hle mah se a tawp kan khar that phawt chuan a pawi lo. Tunah chuan kan nupa in Pathian hnenah kan kun dun thei a, kan inhlan thei, hei tluka hlu hi a awm dawn chuang em maw ni le..




Kum tharah rilru thar nen tia suangtuahna tam tak kan neih laiin kan beisei loh lam atangin chhiat tawh thu kan han hre sui a, Sangkimi pu, Pu Zuia kha zingah a Tu ten a muhil an kaitho zo lo a ni âwm e...




Zing dar 6 velah Zodinga chu an rawn call a, insiam sawk sawin a tlan chhuak a, keipawhin kal ve ngei kkaduh avangin ka che sawk sawk a, ka nu leh Jaydena ka hrilh ve bawk a, hmanni lawkah ka naua lah chu a lehkha zirna lamah a lo kal leh hman tawh bawk nen, a thiannu chu han hnem ve te pawh a duh dawn teh lul nen..



Zodinga chu engkimah an râwn ber anih vangin buai ber lo thei lo a, Sangkimi te unau lah naupang mai an la ni bawk nen, an tuar thiam lo ve khawp a, han hnem viau ngaihna pawh ka hre lo...


An unau dinhmun chu a chhiat em avangin Zodinga chuan "Hostel ah kan dah mai dawn em ni? Keini bak chu han belh tur an nei silo" tiin min râwn ve thlap a, kei lahin ka lo pawmpui viau a, a pu boral hnu karkhat a liam leh chuan hostel ah kan indah fel a, kan dinhnun la harsa deuh mah se naupang pahnih te han ngaihthah ngawt chu kan thei si lo a, an zirna leh hostel fee te erawh chuan hun eng emaw chen chu min tiharsa deuh dawn a, chu erawh kan nupa chuan pawi kan ti lo hle thung.







Hriat loh karin hun chu a liam ve zung zung a, thlasik boruak pawhin min kalpel tan tawh a, kan chhungkua pawh Pathian malsawmna kan dawng nasa a, a hma ai chuan thawkrim deuh mah ila kan mamawh tawk chu kan nei ve zel a, kan neih chhunah chuan kan vui ngai lo.




Nitin ka pasal chu dawrah a kal a, bungraw thar, Mizorama la awm tam lo thilte chahin a theihtawp a chhuah a, a lo haw hi chuan a chau thin bawk a, keipawhin ka theih ang angin ka lo duat ve thin a, kan nupa inkar pawh a tha viau a ni.



"Ama... "
Ka fapa au ri vang chuan bathroom atangin ka tlan chhuak vat a, choka ah lo awmin a bulah chemte a lo awm bawk a, thisen ka hmuh rual chuan ka bing nghal mup mup mai a, a thutna atanga pawm kang lawp chung chuan tui dehna lam ka panpui a, a kut chu a lo zai kak a, a zau lutuk lo na in thisen a chhuak tha duh ngang mai a, ka hlauthawng deuh chuan damdawi in kalpui mai ka rilruk a, a pa ka call laite chu ka fapa chu a la tap nasa mai si a, vawi tam tak midang hliam lo khawihsak tawh mah ila tunah hi chu ka mangang em a ni.





Phone a lo chhan rual chuan "Bawiha hi chemte in a lo inzai a, damdawi in kalpui a ngai ania" ka ti nghal chul a, ka tap titih ringawt chu a hrethiam aniang "Engtinnge maw a inzai theih le? Taxi rawn la rawh u, damdawi inah chuan ka lo kal nghal ang" a tih vangin rei pawh inbe lovin phone chu kan dah a, a inzaina lai chu rawmawla tuamsakin hmanhmawh deuhin kawngpuiah ka pawmchho a, a tap a la bang duh si lo a, a chau chhe zo mai ang tih mawlh chu ka hlau a, civil hospital kan pan chhungte chu rei ka ti lutuk ringawt.





Ka fapa chu an lo thuisak a, na a ti lutuk mawlh mai chu hrehawm ka lo ti a, ka pasal rawn thleng ve lah chuan midang awm laiin min vin chiam mai a, "Naupang khawih phakah chemte chu dah lo turin ka hrilh ziah che alawm, engmah ti lovin inah i awm a, naupang pakhat lek pawh veng zo lo" tiin min hau chian mai a, ka inthiam loh ve tehlul nen, a tawngkam chu ka la na ngang mai a, a inthiam lo leh deuh tih chu hre ve tho mah ila ka be duh lo.




Nahhawkna te an pek hnu chu a muhil ve ta siar siar a, min thuisaktu nurse in "Naupangte chu an intipalh ve fo alawm, a kak thui lo a, a hliam hi enkawl uluka silfai that bawk chuan a dam thuai mai ang" tiin min hrilh a, damdawi in kan han chhuahsan chu lungphu a danglam leh nghal khawp mai.




A bike awmna lam a pan chu ngawi rengin ka lo thlir a, rawn hawi let pah chuan "Lo kal ta che" a ti leh nghut a, "Taxi kan rawn hmang leh mai ang" ka ti chu a lawm lo zual ting mai ni hian ka hria.




Ka lam pana rawn pen hlawk hlawkin ka banrekah a rawn man zui hmiah a, min en run run hnuah ngawi rengin min kai dawt dawt a, ka hnunga ka nau puak chu a ngaihven tawh eih lo.




Bike a dahna bul kan thlen chuan lawn in "Chuang rawh" a ti leh nghat a, ka hnial ngam loh vangin phur lo deuh chuan ka chuang a, ka nau puak vang chu aniang, a tlan chak lo khawp mai.




In kan thlen hnu pawh chuan kan la inbe lova, ngawi rengin kawngkhar ka hawng a, in chhung kan lut chiah chu thawk ka la nghal hawk hawk.




Pindan lamah ka kal tlang nghal a, zawi muangin ka fapa chu khumah ka muttir a, a tal deuh naa, a harh phah lo.



A biang tai hlar leh a sam pheng ang reng takte chu ka chulsak hliau hliau a, ke pen thawm ka hriat avangin ka in hum ruh nghal teuh bawk.



"A harh loh chuan lo chhuak lawk teh, inbe lawk teh ang"
A thil sawi chu ka chhang let lova, hria ang pawhin ka awm lo.



Ngawi rengin ka fapa chu ka thlir ngawt ngawt a, damdawi ina thil thlengte ngaihtuah zuiin ka pasalin min tawngkhum dante chu ka han chhui kir leh a, ka mittui rawn hnâm tiam tiam vang chuan ka insût ri deuh hraih a, ka bul lawka ding thawk la hawlh ri pawh chu ka hria.




"Lo kal teh" tiin ka banah bawk a rawn man leh a, pindan atanga min kai chhuakin sitting room ah min kai phei a, inhmachhawn zawnga kan han ding chu ka melh chho ran a, insum ka tum ve tehlul nen, a hmel ka han hmu chu ka thei lo chiang khawp mai.



Ka mittui chu a rawn luang nghal zung zung mai a, "Titeh Bawihi, kan hun tawnin a zirloh vangin ka lo tawng na deuh a nih kha" tiin a âwmah min kuah bet thlawp a, ka kuah let lo.




Ngawi rengin ka tap hliam hliam mai a, ka fapa ka ven uluk loh vanga ka inthiam loh ve tehreng nen, khati lutuk lo deuh kha tawngkamte pawh neih ve tur ania, midang an awm ve thup bawk nen, ka zah bakah ka rilru a na ngawih ngawih mai a ni.




Ka hnungah chuan dimte in a chul a, "Ka tihpalh, ka tawngkam vang khan ka tihpalh lutuk" a ti mawlh mawlh a, a lak atanga inlak hran ka tum chu min lo kuah nghet sauh sauh.





"Midang khan engtinnge min ngaih ang a? Hrehawm ka ti ve lutuk alawm, i tawngkam vang khan... "
"A tawk.. Ka thiam loh a ni, min ngaidam rawh, a thleng nawn tawh lovang"
Chhang let tawh lovin ka insût leh hraih hraih thin a, "Awmpui?"



Ka darah dawmin amah en turin min ti a, keipawh chu inhru hul ve sawk sawkin "Ka insuk laiin a tap ri ka hria a, choka ah chemte a lo khawih a, a thawm engmah ka hre lo, TV kha ka en tir a, engtik laiin nge a khawih ka hre lo tak tak" ka ti mawlh mawlh a, hrehawm ka ti lutuk chu awmngaihna ka hre lo ni ber.



"A pawi lo, eng êm a thlen loh hi, a pawi lo aw" tiin ka chalah a hmui a rawn nawr si vang vang a, keipawh hi tunlai ka tahbelh zual lutuk a, ka inhrethiam bik lo.




Dar 3 a pelh tawh vangin eirawng ka bawl zui nghal sawk sawk a, Zodinga erawh dawr lamah a let leh thung a, an laklawh deuh aniang a rawn haw tlai leh khawp mai.




Dar 7 vela a rawn haw chu eng eng emaw hi a rawn khai bawr khawp mai a, chawhmeh bakah a kut lehlam chuan pangpar mawi em em mai hi a bawrin a rawn keng a, ka pangpar ngainat ber chi leh nghal.




Mak ti deuha ka lo en lai chuan mawi deuha min lo nuihin "Vawiinah k titap che sia, ngaihdam dilna a nih hi" tiin a thil rawn lei chu min pe a, sawi tur pawh ka hre lo.



Ka pasal lak atang hian thilpek danglam deuh emaw, manto deuh ang hi ka beisei ngai lova, chutichung chuan a theih ang angin min ngaihsak a, 'mamawh i nei em' tih hi min zawt zing thin khawp mai.



Ka thiante neih ang ka neih loh a hlau a, kan thenawm lawka mi ka thiannu nen hian inkhawm turin kan insawm thin a, a pasal bank ah a thawk bawk nen thil thar a nei thei si a, a neih ang ka neih ve loh mawlh hi a hlau thin.



Pawisa tam tak nei lo mah se ka lungawi na tur tawk hi eng eng emaw min rawn hawnsak fo thin a, pasal nachang hre tak neih chu a hahdamthlak thin viau a ni.






Bawihpuia pawh rin ai takin a fel a, a kut kan tuam deuh lûk chu a hrethiam vak lo aniang, rawn lek kang ur ur pah hian "Ama.engnge?" hi a ti leh ha thin a, a pa nen pawh kan nuih pui kan nuihpui leh tawh.




Chutiang chu kan chhungkaw dinhmun chu a ni, tu nunah mah kan va buai lo va, kan chhungte nen kan inrem tawh bawk a, Pathian dundana nun chu kan tum leh vei ber a ni reng bawk.



Chhungkaw hlim thei tak,, tumah huat pawh nei lo kan ni a, thenrual kan ngainat tluk zetin kan thian leh thawhpui thenkhatte hi an rawn leng lut ve reng thin bawk a, Gideona erawh a ni telin a harh tulh tulh emaw tih mai tur a ni thung a, mi pawi a khawih kan hlauh luatah pawn pawh kan chhuah tlem tir khawp mai.



March thla tawp kan thlen meuh chuan keipawhin diklohna ka nei tan tih ka inhria a, thla hmasa atangin ka period tawh lo va, zingkar luak chhuak ka nei ta zauh zauh bawk nen Zodinga pawh hrilh lem lovin ka in test a, ka beisei ang chiahin nau ka pai a ni.




Khang hun liam ta chhung zawng khan ka pasal nen hian kan in enliam tawp bik lo va, nupui nihna hlen zawh loh ka hlauh berte zing ami a nih vangin nupa nun hmanna kawngah pawh ka theihtawp ka chhuah ve a, chau tak a hnathawk a rawn haw changa ka laka beisei a neih chuan ka hnar ngai bik lo, chu chu kan nupa nun phuar nghettu tak pakhat pawh a niin ka hria.





Ka nau pai thu ka hrilh tum chuan a hlim ve khawp mai a, ka nu leh pa te hrilh in kan ina chaw ei khawmte chu an rawn nghal chuk chuk a, kan chhungte lahin min lawmpui thiam ve bawk nen, Diktei kan ko phei a, chhun lamah eirawngte kan bawl lawk a, chhungkaw inhmuhkhawmna hun tha tak a nih bawk avangin ka nu leh pate pawh an lawm a, sawi tur pawh kan ngah hlawm viau a ni.




Kan nupaa kan nun dan chu hei hi a ni, kan famkim lo tih kan inhre tawn a, chumi avang tak chuan hriatthiamna nen kan inpawm tawn a, kan tihdik loh leh hriat loh te in hrilh tawn in hringnun kan zawh dun a ni.




Mite tana engmah ni lo, mi awmtha duh lo leh khawtlang endawng, ram leh hnam phatsantu ang hiala an ngaih kha keini tan erawh khawvela pasal tha ber leh pa tha ber a ni a, piang nawn leh dawn pawh ni ila amah tho hi ka thlangin ka ring.




Kan tan nun a sual a, a la tawn ngai loh leh hriat ngai loh tam tak a paltlang a ngai a, mipa leh hmeichhe hna a thliar hrang lo, a tul chuan a insu a, thleng a sil a, 'thaibawih' tia a thianten an fiam chang pawhin keimah min en chungin "Ka hmangaih vang alawm" tiin a chhang thin a, a van hlu thin tak.





Chhunghhatte tana belh ngam ni turin a theihtawp a chhuah a, tute tan pawha kawm ngam ni turin amah a indahsang ngai lo. Hmangaihna a au chhuahpui chiam ngai lo a, mahse a chetzia ah a tilang chiang em em thin thung.




Hei hi ka pasal nihna chu a ni, 'Phatsantu' tiin an sawi fova, engah nge insiamthat a tumna kawng hi an hmuhsak theih hlawm loh ni?
Kei chuan a chhungkaw tana a theihtawp chhuahtu hi 'phatsantu' ka ti ve phal lo, kan tan chuan khawvela pa tha ber a ni reng dawn.








.... A TAWP TA

A tawp danah hian in lungawi lo mai thei e.. Mimal hatsatna neuh neuh ka neih thin vangin ka regular thei lo viau thin a, chuti chunga dawhthei taka min nghak a, ka thawnthu ziahte min chhiarsak hram hram thin vang hian ka lawm em em a, tin, comment chhiatrnuam tak tak min pek thin vang pawhin ka lawm em em a ni.. Min lo hre ve reng ula, thawnthu thar lo neih leh vat ka tum ang aw..
❤❤
Show post links
Top